رواية نص غلطة الفصل الثاني 2 بقلم عمرو خالد ليث
: عجبك عصير القصب؟
• خلاص يا فرح مكنش عصير ده
: اصل شيفاك مبسوط
• طب واي الجديد مأنا طول الوقت مبسوط
: العصير هو إللي جديد
• طب وإحنا لحقنا نخلص من القديم
: قول لنفسك بقا
سبتها تغني وترد علىٰ نفسها لحد ما طلعنا الشقة فوق ولقينا أمي بتستلمنا من قدام الباب عشان تكمل المسرحية ..
: أي مالكم بتضحكوا ومبسوطين ليه وأنت مالك شيفاك مبسوط المفروض تبقى شايل الطين
• ماهو شارب
: شارب أي يلهوي!
• شارب عصير قصب
: وعصير القصب يعمل كده؟
• أمال طبعًا بالذات لو حد عزمك عليه يلهوي يا ماما مقولكيش مقولكيش
: لا قوليلي
وراحت فرح قربت من ودنها عشان تقولها نفس إللي قالته، وراحت بصتلي بإستغراب كده ..
: وعجبك العصير يا يوسف
• حتىٰ أنتي يا ماما
وسبتهم ودخلت الاوضة عشان اسيبهم يكملوا المسرحية مع بعض، كانوا واخديني محتوى ليهم، ماهو برود مكنش ينفع أبان مبسوط كده، ما لازم يشكوا ويضحكوا ويتنمروا، غيرت هدومي واترميت علىٰ السرير وأنا في غاية الراحة، أخدت نفس عميق وبدأت احس أن الدنيا بدأت تلف بيا ومحستش بأي حاجة حواليا تمامًا .
: والله لا أنا لقيت نفسي بعمل كده لوحدي من غير سبب، لأنه تعب مرة واحدة وكان هيقع، واي حد مكاني كان هيعمل كده وأكتر
• هو كان أي حد هيعمل كده بس مش أي حد هيجيبله عصير قصب بردو
: يا سما بقا متهزريش والله اعيطلك
• خلاص .. بس هو تعبان ماله
: عنده ورم وبيتعالج والحمدلله قرب يخلص فترة العلاج
• أنتي متابعة بقا
: مأنا عشان بكلم فرح طول الوقت وبتحكيلي وقد أي أنه تعبان وبيقعد لوحده، ده حتىٰ عايز يروح يقعد في شقة لوحده عشان ميتقلش عليهم
• يسلام واي كمان؟
ولقيتها حطت ايديها تحت دقنها وبصتلي مستنية أكمل الحدوتة إللي بحكيهالها قبل النوم ..
: مستفزة بجد
• مش شايفة نفسك شكلك عامل إزاي أنتي وبتحكي!
: عامل إزاي؟
• مبسوطة ومبتسمة وواخدة راحتك وايدك بتروح يمين وشمال وشعرك طاير وسايح وهيء وميء وطبلة ورئ
: مش بقولك مستفزة طب والله مأنا مكملة
• خلاص خلاص
: لا خلاص حلفت
عيلة مستفزة بجد حرقت دمي والله، واي يعني واخدة راحتي أنا وبتكلم وجايبة سيرته، المفروض البس طرحة يعني ولا اغض بصري، بصيتلها بصة مليانة قرف وفضلت العب في التليفون، لقيت فرح بترن عليا ولسه بفتح عليها سمعت صوت عياطها ..
: مالك بتعيطي ليه؟
• يوسف اتحجز في المستشفى وفقد الوعي ومعلقينله دم ومحاليل كتير
: اي اللي حصل!
• بعد ما جينا من الفرح دخل يغير هدومه، وروحت انادي عليه عشان يجي يتعشى معانا ولقيته واقع علىٰ السرير ومبيردش عليا، طلبنا الاسعاف واخدته من بليل
: مستشفى أي!
• الميري
: جيالك
ورميت التليفون وروحت البس عشان أنزل أروح لـ فرح ..
: رايحة فين؟
• يوسف في المستشفى
: ورايحة بصفتك يعسولة أنتي؟
• صحبتي بتعيط ومحتاجة حد جنبها اسيبها؟
: لا طبعًا مينفعش تسيبي صحبتك في وقت زي ده هتبقي قليلة اصل
• شفتي
: اه طبعًا شفت أمال أنتي هتقوليلي
• حساكي بتغلسي
: لا اتأكدي ياحبيبتي
سبتها ومشيت مرضتش أرد عليها عشان مكنتش هخلص منها، لبست ونزلت بسرعة وكنت طلبت اوبر واول ما نزلت كان وصل تحت البيت، وروحت المستشفى ولقيت فرح قاعدة بتعيط قدام غرفة الحجز، اخدتها في حضني وقعدت جمبها لحد ما نشوف اي إللي هيحصل .
: ما تقومي تجيبي أي حاجة
• عايزة أي اجيبهولك؟
: عصير قصب مثلًا
ولقيتها بتغمزلي كده إللي هو يا بت اتلمي أهلك حوالينا وأنتي كنتي لسه بتعيطي من شوية ..
: طب اتلمي أخوكي تعبان وأهلك قصادنا
• ماشي يكتكوتة
ضربتها على كتفها عشان تسكت، اتكسفت والله وحسيتها هتاخدني غسيل ومكوى زي ما سما عملت شوية، شوية شوية بدأوا أهل يوسف يمشوا واحد ورا التاني، لحد ما فضلت انا وفرح ومامته، كان هو فاق ودخلوا اهله اتطمنوا عليه ومشيوا وفضلت أنا وفرح ومامته مع بعض، قالتلي فرح تعالي ادخلي معانا حاولت اخلع معرفتش واضطريت أدخل أنا ومغصوبة للأسف .
فوقت بعد معاناة وحسيت جسمي متكسر من التعب والوجع إللي كنت فيه، شكله كده العلاج بدأ تأثيره يظهر عليا، لقيت نفسي في المستشفىٰ واهلي كلهم كانوا حواليا، وبعد شوية دخلت أمي وفرح ولمحت شهد داخلة وراهم، اتعدلت بسرعة من مكاني وكأني اتنفضدت من مكاني، لقيت فرح بتغمزلي وهي وداخلة قدامهم ..
: اي يا حبيبي بقيت كويس؟
• طبعًا يا ماما ماهو لازم يبقىٰ كويس
ولقيت شهد وراها بتحط ايديها على وشها وبتضحك، وكان نفسي أمسك فرح اعجنها دلوقتي حالًا ..
: اجيبلك عصير قصب يا يوسف!
كانت جمبي ازازة مية فاضية ضربتها بيها عشان تسكت وتخرس عشان شكلها كده مش ناوية تسكت وهتودينا في داهية، قعدوا شوية واستأذنت شهد ومشيت ومتكلمتش معاها طول القعدة خالص بسبب الجواسيس إللي كانوا معانا، وبعد شوية دخل الدكتور واتطمن عليا وإني خلصت كل المحاليل إللي كانت متعلقة وقولتله حاسس أني تمام وعايز أمشي قالي ..
: أنت ممكن تمشي عادي بس حاول متبقاش لوحدك ومتنساش العلاج بتاعك واهم حاجة الأكل
ولقيت فرح بتتكلم معاه وبتسأله ..
• طب وبالنسبة للعصاير يا دكتور عادي؟
: اه عادي والأفضل تكون طبيعية
• طب وعصير القصب؟
الدكتور بصلها بإستغراب ولحقت الدنيا ورديت عليه ..
: معلش يا دكتور متاخدش عليها
فضل الدكتور يضحك واخد بعضه ومشي خالص عشان يخلص من الهطل إللي سمعه .
: بعد أسبوع يا رحمة بعد جواز أسبوع جاي تقولي مش مرتاحة!
• مش مرتاحة وقرفانة من نفسي مش قادرة اقعد ولا اتكلم معاه
: يا بنتي ده مرتاح وهيريحك ومش هيبخل عليكي
• الفلوس مبتريحش يا ماما مبتريحش حد وانا تعبت بجد مش قادرة
سبتها وخرجت قعدت في البلكونة وانا وبعيط من القهر والزعل، معرفش ليه عملت في نفسي كده، ليه سمحت لنفسي اوافق من الأول واسمع كلامهم علىٰ حاجة انا مش عايزاها ولا حباها، بقيت قرفانة من نفسي، وطول الوقت ضميري بيأنب فيا، لسه بمسح دموعي وببص من فوق ولقيت يوسف داخل علىٰ بيتهم وبيضحك وبيتكلم في التليفون، حسيت نفسي عايزة أسمع صوته، عايزاه جمبي دلوقتي حالًا يطبطب عليا، بس أنا انانية أوي، عايزة حاجة انا معملتهاش معاه، سبته في أسوء الظروف وفي الوقت إللي كان محتاجني أكتر واحدة معاه، مقدرتش أعمل كده، مرضتش أفضل معاه وقررت أمشي، مشيت في هدوء ومعرفتش اواجهه، مقدرتش ومكنتش هعرف أقوله أي، ودي كانت النتيجة هو تأقلم علىٰ غيابي وعايش وبيتعالج ومبسوط، وأنا متدبسة ومحبوسة ومش قادرة اخد راحتي، مش عارفة أعمل أي بس حاسة أني مش كويسة، مش كويسة خالص .
: مساء الخير
كنت في المستشفىٰ روحت اخد العلاج هناك، وكنت قاعد زهقان وحاسس بالملل، ولقيت حد بيخبط علىٰ الباب وبيدخل ..
• شهد إزيك
: أنا كويسة أنت عامل أي!
• الحمدلله .. بتعملي أي هنا؟
: كنت معدية من هنا قولت أسلم عليك
• كنتي معدية من هنا ؟
: ايوة
• معدية في المستشفى!
: ايوة مستغرب ليه
• ايوة صح هستغرب ليه كأنك رايحة تجيبي طلبات من كارفور وكنتي معدية من هنا قولتي تسلمي
: أي ده أنت عرفت منين انت لماح علىٰ فكرة
• وأنتي مستوى الكوميديا بتاعك حلو خالص
: أي رايك؟
• عجبني
: أي بتعمل اي بقا؟
• ولا حاجة لقيت نفسي فاضي قولت اجي المستشفى اخد جلسة كيماويّ
: كنت فاضي!
• ايوة مستغربة ليه
: أنا مطلعتش لوحدي إللي مستوى الكوميديا بتاعي حلو
• شفتي
: شفت
• واي رايك؟
: لا عجبتني
فضلنا نضحك علىٰ العبث إللي كنا بنقوله، قعدنا نتكلم شوية لدرجة أن الوقت عدى ومحسيناش بيه من كتر مأحنا كنا بنحكي في مواضيع كتير جدًا، كنت مبسوط بصراحة منكرش ده بالذات أني متطمن أكتر وأنا معاها وهي بتتكلم بطريقة واسلوب مريحين جدًا .
كنت خلصت من المستشفى ومشيت علىٰ البيت علىٰ طول، بس قابلني محل عصير قصب، اول ما شفته ابتسمت وروحت اشتريت منه، ولسه هشرب لقيت فرح بترن عليا ..
: بترني في أوقات غريبة
• انا عملت أي!
: فصلتيني
• فصلتك من أي كنت بتعمل أي؟
: كنت بشرب
• لا متقولش بتشرب عصير قصب!
: ايوة
• لوحدك؟
: شفتي بشرب لوحدي
• شكلك حبيته
: جدًا بصراحة وهو يتحب أصلًا
• العصير؟
: ايوة يا خفيفة .. عايزة أي؟
• مش عايزة حاجة كنت بكلمك عشان تيجي في حوار هنا داير لازم تحضره
: حوار اي ده؟
• تعالى بس وهتعرف
خلصت العصير وروحت البيت علىٰ طول وانا مش متطمن وحاسس أن في حاجة غريبة، لسه هدخل من قدام الباب لقيت رحمة خارجة وبتعيط ..
: مالك في أي؟
• أنا اتطلقت .
يتبع ..
