رواية ثأرهم وقلبي الفصل الحادي عشر 11 بقلم الكاتبة تراتيل
بروحك چم سمة وما غيّمت وياي
عليه تزخ عطش ومنشف السبعة
بگصايب ياحلم شديت روحك خيط
خيطك من يمر دخان ما گطعه
ثكلت بروحي جثة وما لكت جناز
وخيالك كمت أشوفه منين ما اضيعة
اليسافر للببجي يأخذ عيوني متاع
على جفني ولام جايه مخيطه الدمعه
اليفاركني شبر أبقه التفتلة سنين
وأتاني بيا جرح يا لجمة الترجعه
علي رشم
_
___
زينب....
كُل ضني ترجع الي مو تجازيني بوجع
حسيت امل ونعدم گدام عيوني
باوعت بوجه ريناد بادلتني النظره وامي مبهته
وجها اصفر تباوع على مريم الي مصدومه نفسنه
من طلع الرقم المطلوب مُغلق
رحت واديه ترجف اخذت الجهاز من ريناد
ورجعت اتصلت عليه مره مرتين وماكو
باوعت بوجه خالي منقرف وجها يفور من العصبيه
حجه بصوت عالي وكانه انتصر
عبدالله: ها هسه شنو؟
اني اكوللكم شنو خلي اتصل على سجى
طلع جهازه من جيبه واتصل عليها دگ الموبايل گدامنه وهيه دارت الشاشه علينه وهيه تشهگ
بلبچي وگوه تجر نفس وتگول
سجى: كلها توقعت تحجي عليه لو تتهمني لو تذلني بس عمري ماتوقعتها منج عمه ولا من زينب شنو ذنبي شنو غايتي حته اسوي هيج شي
دنكت راسي احس كلشي اختلط عليه صرت احس اني مو بعالم حقيقي معقوله تخيلت سجى
هيج سوت معقوله مو سجى الي جانت بلخط
زين اني دااحلم لو حقيقه هاي شدا يصير
نتر بينه خالي وگال بعد مااروحلهم ولا يجونه
صعدت احاول استوعب الي صار لزمت الجهاز كتبت كلشي الطالب واني ارجف والدنيا تظلم
بعيني تمددت بلفراش واني احس جسمي يخدر وعيوني تغوش غمضت وشردت من الي اني بي
الأحلامي احاول انسى شوي بس تزود حالتي من احلم بي بكل مره انام بيها
فزيت واني جسمي كله يرجف من الحلم الي
حلمته واسمع صوت رسائل من جهازي سحبته باوعت بلشاشه وطفرت من الفراش للگاع
من شفته "طالب" فتحت الرسائل واني افتر بلغرفه واكل بأظافري
لگيته يحچي عليه ويلومني لان اتهمت سجى
وما چان لازم اسوي هيج
طالب: زينب انتِ شبيج شلون هيج تسوين
بخالي عبدالله خابرني يعتب عليه ويکول
بنت عمتك متخبله وگامت تتهم الناس
زينب اصحي لا تخبلينه سجى شجابها بلنص
انتِ مريضه ويحتاج تتعالجين
زينب: طالب والله سجى خابرتني وگالت اني
والله طالب بس صدگني فدوه ولا تگول عني
مريضه مابيه شي مابيه شي
_ع العموم زينب حبيت اگلج اني اصلا راح
اخطب واتزوج بهل فتره وحبيت تكونين اول
الحضور لان تبقين بنت عمتي واحبچ
واعزچ مثل اختي او صديقتي
راح انسى الي صار واعتبرها صفحه ونطوت
مو كلا جان سهم ورى سهم يدخلن الگلبي
ويتناوبن منو وجعه اكثر باوعت بلفراغ
سكتت دقايق اسمع كولشي صدى
لحد ماثگل سمعي الخدر بلش من عقلي ونزل
لحد اصابيع رجلي ملت على الچربايه سندت راسي مااگدر احرك اي شي من جسمي
ولا صوتي يگدر يطلع عجزت اسوي اي شي
حته دموعي ما ترضى تطلع
ريناد...
بعد كلشي مرينه بي اجواء البيت ابد مااستقرت
كل شوي امي دزني اشوف زينب والگاها نايمه
گعدنه اني وامي ومريم نحچي بسالفه سجى
وامي حيل مقهوره من تصرف خالي وسجى
ومريم فجأه فتحت موضوع ويا امي ما چنه متوقعي من گالت
مريم: ااااا يمه شسمه اكو شخص وياي
يريد يتقدملي ومن فتره گال اريد ادز اهلي بس اني ما وافقت لحد ماافاتحكم بلموضوع
بس لا الوقت ولا الظروف سمحت ومن رحت للدوام گال شنو الموضوع لان مارديتله خبر
فا انتِ شنو رأيج؟
باوعتلها بنظره مكسوره گوه على نفسها تحچي
گالتلها
_هم تحبي؟
هزت مريم راسها بسرعه بشكل متتالي بـ لا لا
_شنو احبه ماما اني اصلا مااعرف عنه زين
بس كم شغله يگولون خوش ولد وبس
_الله كريم الله كريم بس خلنخلص
من موضوع زينب هسه والله شلت گلبي
ريناد: ماما زينب ابد مو طبيعيه
من تنام هواي تحجي لو تفز مخروعه وجسمها
يرجف وتضل تبچي وتعرگ هواي
گلبي ينمرد عليها والله
_اووف يا زينب شلعت گلبي وياها الله يبرد گلبها والله روحي محترگه، گومي يمه
شوفي اخيتچ
ريناد: والله تعبتوني راح انگطم من صعده والنزله شنو هاي بتليت بيكم
_يلا لج ام لسان امشي صعدي شوفيها
صعدت فتحت الباب شفت بس راس زينب
گاعده ومايل شوي ظهرها على چربايه
وجها كدام الحايط اشوف بس گفاها الي مبين
منه بس راسها الي مايل ع جهه
زيناد: زينب زينبو گعدتي؟
زينب يول گومي يمنه جوه مريم جايها عريس
حسيت بخوف وگلبي دگ من ما جاوبتني رحت
امشي بخطوات ثگيله احاول اوصل الها وروحي
وکلبي وكلشي بيه يرجف عليها ومن شفتها هيج
احس الدنيا وگفت بعيني نزلتلها وهيه بس
تحرك بعيونها احركها مثل الجثه ماكو
ما تنطق وجها ازرگ ركضت اصيح الـ مريم
اجتي تركض وحارت بيها شنو تسوي شلناها
نومناها على الچربايه ورفعت رجليها لفوگ كلش
واني ابچي من الصدمه وهيه حته نفسها گوه
تجره وطلع صوت هم شويه شويه فكت وصارت
طبيعيه وبدون كلام نامت گبل
نزلنه جوه وجوهنه صفره وامي بقت تسأل بينه
بس ماردنه نخوفها فا گلنالها ماكو شي
بليل اجه سلطان وابوي جان هم راجع من الشغل
صاح سلطان الـ مريم
سلطان: مريم وين زينب؟
مريم: گضته نوم
_صار شي جديد ما خابرت ذيج عجوز البين
_ها لا ماكوشي محد اجه ولااحد خابر
_احچي شكو
_شكو
احجي والتوتر واضح عليه واطگطگ اصابعي
وماينضم التوتر على سلطان
عرف اكو شي شيخلصني منه بعد
هز راسه بمعنى شكو واني مُصره انكر واگول ماكو
شي
خلصت من نظراته وسؤاله گوه
راح الـ ريناد سألها وريناد كتت الاول وتالي
باوعلي واجه عليه
سلطان: ليش ما تحجيلي عود شبيها زينب
شلونها هسه
مريم: مو صارت زينه ماردت اخوفك عليها
وهسه شويه واصعد يمها
هز راسه بمعنى اي وصعد يمها هم
ساعدت امي بلشغل وصعدت يمهم شافني
گام وصاني عليها وراح نمت بصفها على الجربايه
حضنتها ونمت....
زينب....
دفو محاوطني بنص احلامي السوداويه
احس براحه رغم شد الاعصاب
فتحت عيوني حسيت بثگل على بطني
باوعت نزلت عيوني على بطني لگيت ادين
محاوطتني التفت لگيت مريم شلت ايدها
وبستها براسها باوعت للساعه ب2بلليل
طلعت من الغرفه اريد
اروح للحمام وسمعت امي تحچي بلصاله
روحها مفرفحه
ايمان: انتِ من عقلچ راجحه شهل صلافه
العدكم ولججج بنتي روحها راحت وانت
تعزميني على خطوبه ابنج الي بنتي رايدته
سمعتها من حچت وجسمي كله اهتز
من الي سمعته حطيت ايدي على حلگلي
امنع شهگاتي تطلع واسمع امي كملت بلحجي
_لا مااجي ولا اوصل هوه اصلا ماراح اخلي
زينب تسمع بسالفه غير تسوي شي بنفسها
حسيت خذتها اشاره منها اخذتها فكرة
رحت اسحل بروحي للغرفه فتحت المجرات على
كيف احاول مااطلع صوت علمود مريم اخذت
موس منها وايدي ترجف طلعت جهازي اتصلت
على طالب رفضني كتبتله
زينب: ترد لو راح تتندم والله
طالب: زينب مافارغلج
_ليشش بيمن ملتهي وصرت مافارغلي
_ويا خطيبتي الجديده عندچ شي؟
_طالب والله اسوي شي بروحي اذا
متلغي هاي السالفه ليشش هيج گلبت
عليه طالب والله احبك وحبيتك من گلبي
ولك روحي جاي تحترك علمودك افهمنيي
طالب: خلصتي؟ يلا روحي لا تحچين بعد وياي
تعبان ودايخ ومابيه حيل
لزمت الموس وايدي ترجف قربتها من ايدي
وجريت خط بوجع روحي وسويتهن اكثر من واحد
صار الدم يجري ملى مكاني لزمت الجهاز
صورتها ودزيتلهيا وكتبت
زينب: هيه هاي ضريبه حبي الك من هل يوم
بعد ماكو شي اسمه زينب انتهت زينب.
علبه الدوه يمي فتحتها حركت ايدي اذتني
تقلص وجهي بألم واخذت كميه وحطيتها
بحلگي وبلعتهم جان هذا اغبى شي اسوي
لان علقت نفسي بي الهل درجه اذيت نفسي
علموده حته اثبتله ماعندي شي اخسره
بلعت العلاج مرت دقايق وحسيت بدوخه وحرگه
بمعدتي اذتني حيل وبلشت الدنيا تغيب
گمت من مكاني اريد اتنفس مااگدر مجرد حاولت اوگف طحت ورگع راسي بلچربايه ومنا غبت
عن الوعي وعن الدنيا....
مريم...
گعدت على صوت رگعه هزت الچربايه فززتني
باوعت لگيت زينب ماموجوده
عبالي رايحه للحمام رجعت لسه نعسانه
واريد انام وتذكرت فزيت من ورى رگعه بلچربايه
وزينب اليوم اغمى عليها الصبح فا گمت بسرعه
عبالي هم مغمى عليها
گمت وشفت زينب بلگاع ايدها الدم يجري منها
وملطخ الارض وعلبه الدوه يمها ونص العلاج
بلگاع چان منظر مرعببب حسيت روحي طلعت
صوتي تگطع ببلعومي جسمي مات طحت
على ركبي مااتحرك ازحف زحف يلا وصلتلها
حرت شسوي منين الزمها وهيه وجها صاير ازرگ
والدم يطلع من كل جهة صرخت بكل حيلي
صرخت صرخه وحده خايفه تفقد اعز شي ع گلبها
مريم: ولكممممم لحگونيييييي ولجج يممه
لحگوننييييي راح امووووت گلبي يممممه زينبببببب سلطااااان الحگ زينبببب راح تموت
اصيح واريد اسحلها احطها بحضني مااگدر
حيلي ميت اختي يا ناس اختي جاي تموت بين اديه بأدين ترجف لزمت خاولي جان مشمور بلارض الفه على ايدها اريد الدم يوگف
واصيح لحد ما نفتح الباب ودخلو ريناد وسلطان
سلطان جمد بمكانه من المنظر الشافه
ريناد بقت تصرخ من الصدمه وامي اسمع
صوتها من جوه
مريم: سلطااان سلطـ زينب زينب حباب
سلطان تحركككك خنوديهااا يمه يمه زينب
راح اموت والله سلطان راح تموت تعاال
صحى سلطان من صدمته اجي ركض شالها من الگاع واني عاصره ايدها بلخاولي وهيه تنقط دم ركض يريد ينزل حطيت على راسها شال ولبست عباتي وركضنه نزلنه امي واگفه بدايه الدرج
تريد تصعد من ورى رجليها ما تگدر گوه عليها
الصعده شافتنه شايلين زينب بهتت وجها اصفر
ايمان: شكو شـ يمممه شبيها شبيها بنتي
ولكمم شبيهااا وين رايحين اوگفو
طلع ابوي من الغرفه شافنه شايلين زينب
فتح عيونه بصدمه وامي تلطم وتصيح
ايمان: راااحت بنتي يمممه راحتتت سوده
بوجهج يا ايمان ولججج يمه
علي:: شفتيي هذا اخر دلالج من وراج
ومن ورى سوالفج طلعتي عينهااا فسدتيها
شفتي ويننن وصلتت من ورى سوالللفججج
سلطان: افتحولي السياااره وتعاركووو راح تموووت وخروووو عنيييي وخروووو
ركضت فتحت الباب حطها بحضني صعد ابوي
ويانه وسلطان ما قبل گاله جيب امي وتعال هسه
تموت
نزل ابوي بسرعه وامي بلباب بعبايتها
سلطان يسوق بسرعه وگانو ما شايف احد گدامه
واني راس زينب بحضني وجها كل شوي لون صاكه على اسنانها مااگدر اطبب ايدي واخليها
تذب الحبوب لازمه النزيف وكل شوي
اشوف نبضها شوي شوي يضعف
_سلطان عفييه اسرررع نبضها خففف حيلل
يا ام البنين دخيلج يا علييي ياا علييي
_ياابو الحسنين اختي بشاربك لا تفجعنه
بيهااا
مو عشر دقايق صارن قرن متت لحد ما وصلنه
للمستشفى دخلنه ركض للطوارئ بس شافوها وسلطان عاط بنص الصاله اخذوها منه
وركض ثنين بلشو بأيدها و3يركبولها اجهزه
اخذو من دمها يعرفون زمرته لان خسرانه هواي دم
شكلولها قناع اوكسجين خذوها دخلوها غرفه
طحت بلگاع اشهگ باد حيلي وخلصت اخر
ذره قوه بيه
مريم: اخخخ ولجج يمممه اخخخ گلبي
يمممه اختي سـ سلطـــان
اجه سلطان حضني وباس راسي
واني جسمي يرجف
_اشش تگوم ان شاء الله تگوم
يحچي وصوته محتقن اجتي ممرضه تركض
وطلعت وراها ثانيه انوب طبن 3واحنه بس اريد
نحجي وياهن نريد نعرف شصار طبت امي
تركض وتصرخ
ايمان: عليكم الله وينهااا يممممه بنتي
بروح الزهره وينها شبيها هيه شبيها
هاي مو سوالفها زينب هاي مو سوالفها
ولججج يمهه سوده بوجهي
طلعت ممرضه تمشي سريع لزمتها من ايدها
اتوسل حته تحچيلنه على الاقل شدا يصير
الممرضه: حبيبتي دا يخيطون ايدها
نازفه هواي واكثر من جرح بأيدها
وغسل معده ديسون فورا تحتاج دم بعد
نطيناها بطل بعد بطل ونص يمكن
او بطلين
مريم: اني اني انطيها شنو دمها
الممرضه: O+ الي نفس دمها خلي يجي
لان جان عدنه بطل واحد من متبرع
ماعدنه هل زمره
باوعتلها بحيره اني مو زمره دمي هاي ابوي
گال اني هاي زمره دمي بس سلطان قاطعه
سلطان: اني هم هاي زمره دمي اني انطيها
امشي خويه وين تسحبيلي
_هسه مااگدر
بس ثواني اشوف منو فارغ
مريم: اني داادرس تحليلات اسحبله؟
الممرضه: لا عيوني مايصير هسه بس ثواني
واارجع
راحت شوي ورجعت اخذت سلطان وراحت
سحبت منه دم واجو وبقت تحچي ويا عبالك عجبها طمنه على زينب وتصبره
بقيت اروح واجي و3ساعات يلا طلعو طمنونا
عليها بس طلع الدكتور كلنا رحنه عليه
ايمان:: دكتور هاا بنتي شلونها شصار
فدوه طمني
الدكتور:: خالتي لا تخافين بس اصبروا
احنه خيطنه الجرح الحمدلله ما متعمقه
ومامگطوع الشريان جانن مجرد خدوش
عميقه وهسه جاي نكمل اجراء غسل المعده
وراح تضل تحت المراقبه اليوم من
25-75 ساعة وأن شاءلله تعداكم الشر.
گعدنه كلنا براحه حطيت اديه على راسي
احس هسه يلا صعدله الدم من الخوف والتوتر
اعصابنه مشدوده فجأه وشفنه شرطه تقدمو
علينا ويمهم ضابط
ابوي وجها صار احمر من العصبية وگف كدامهم
وسلطان حطنه ورى وگف مقابيلهم
الضابط: السلام عليكم
الكل:: وعليكم السلام
الضابط:: انتوا عائله زينب علي؟
علي:: اي تفضل واني علي
الضابط:: تمام عندي كم سؤال اريد اطرحهن
عليكم يخصون زينب هذا اجراء نتخذه
من تجينه هيج حاله
هز راسه ابوي بغضب وگاله تفضل
بلش يطرح عليهم الاسأله وانب واگفه
اباوعلهم وكل شوي يباوعلي وسلطان حاد سنونه
الضابط:: تدرون شنو نوع الادويه الي ماخذتها؟
مريم:: باراسيتول ودوا ثاني ماميزته ماادري
اذا ماخذه منه او لا بس چانت علبته مطشره
الضابط:: اممممم منو اول واحد شافها
مريم:: اني شفتها چنت نايمه يمها بلغرفه
وسمعت صوت رگعه راسها بلچربايه
وفزيت وگمت شفتها بهل وضع
بقه يوجه الي الأسأله وميباوعلهم
واني اشوف ملامح ابوي وسلطان وگلبي ينعصر
الضابط:: عدها سوابق هيه هم حاولت قبل
تنتحر تنهزم او هيج شي
_لا ابد ماعدها هيج شي
الضابط:: وصلها تهديد تعرضت العنف
خسره علاقه رسبت بلدراسه؟
مريم:: ااا احم هاي شسمه فصخت خـ خطوبتها
خطيبها فصخها
هز راسه وجان يسجل كلشي نحچي
سد الدفتر الي بأيده وگال
الضابط:: شكرا التعاونكم سجلت
محضر وراح نتخذ اجراء بسيط بس
تگعد المريضه وهم راح نحتاج توقيعكم
على تعهد بأنو تتم مراقبتها من قبلكم
وبس تگعد يتم تشخيصها من قبل دكتور نفسي وانتوا ملزمين بهذا الشي
علي:: ان شاء الله شكرا تعبناك
ابوي گال مادام نبات هنا انضل اني وامكم
سلطان اخذ البنات وروح
مريم:: لا بابا عفيه خلي ابقى يمها
والله مااگدر انام
علي: لا بابا هيه باجر الصبح تجين روحي
نظفي المكان وجيبي ملابس الاختج
سلطان: يلا مريوم يلا حبيبتي امشي
خلي اروح يلا ريناد
اخذنه بلسيارة الطريق كله اني افكر شراح يصير شنو ممكن اسوي شلون راح اتعامل وياها وشنو راح يكون رد فعلها دگ تليفون سلطان شاف
منو الي يتصل عليه تأفأف رفضه
رجع اتصل عليه باوعت للشاشه مكتوب طالب
مريم:: شيريد منك هذا
سلطان:: دزلي صور زينب دازتلهيا
وهيه تنتحر يريد يعرف صدگ لو چذب
مريم:: اي رد عليه مارديت
سلطان:: ياكل خرا خيولي ابن الحيوان
_ياا سلطانن هاي شبيك
باوعلي بطرف عينه وصلنه دخلنه باوعلي سلطان
هزيت راسي بحسره عيوني مليانه دموع
سلطان:: جيبيلي سطل وصله
وماي اني انظف الدم
ابتسمتله بذبول رحت جبتله المعقمات والغراض
_ترا والله اگدر اشوف دم وشي وتدري بيه
انت بس هذا من اشوفه راح اتذكر زينب اسفه
لان خليتك انت تسوي وراح اتعبك
_انچبي يول امشي هسه اكمل واصيحچ
تاخذين ملابسها واذا تردن نامن بغرفتي
واني انام جوه
رحت بسته وگعدت بلصاله ريناد نامت على
القنفه اليوم شبعت صدمات اخذت تليفوني
فتحته لگيت رسائل من رقم غريب
فتحته ونصدمت من الرسائل من شفتهن من فراس منين جاب رقمي شلون دخلت عليهن
فراس:: السلام عليكم شلونج انسه مريم
خفنه عليج ماكو ماداومتي البارحه واليوم خيرج صاير شي؟
باوعت للرساله اعيدها اكثر من مره وخايفه
اسأله منين جاب رقمي لو ارد عليه بأحترام لان
سأل عني حطيت اصبعي بحلگي واهز برجلي متوتره مااعرف شنو ارد شوي وصاح علينه
سلطان
سديت الموبايل ورحت طلعت ملابس زينب
وكل شويه اباوع المكان زينب سلطان
منظف المكان زين رحت نزلت غطيت
ريناد ونمت يمها گعدني سلطان الصبح
رحت غسلت واخذت ملابس زينب
نبدللها لان ذنيج تلفن من الدم وگعدت
ريناد اخذناها ورحنه بلسياره كتبت الفراس
_وعليكم السلام اهلا اي داامر بظرف عائلي
ماگدرت اجي بلكي هل يومين اگدر اداوم
شكرا الـ سؤالكم عني
طفيت الجهاز وبقيت صافنه بلطريق
شويه واجتي رساله فتحتها منه
فراس: خيركم صاير شي محتاجين شي؟
مريم: لا مشكور ماصاير بس اختي
بلمستشفى وهيج مخبوصين والوضع
متوتر وهواي سوالف دا تصير لا تشغل بالك
فراس: يا مستشفى شبيها شنو الوضع؟
مريم: مستشفى الـ.....، مااكدر هسه
احجي اني بلطريق اسفه
وصلنه دخلنه للمستشفى توجهنه للطابق الي بي
زينب لگيت امي گاعده تبچي وابوي حاضنها
واحنه رواحنه راحت رجليه بعد ما تعيني حته
اوصل ركض سلطان وريناد واني اركض وياهم
ريناد: ماما ماما شكووو شكووو
سلطان: شبيكم يمعودينن شكو
علي: زينب لسه ما صحت وامكم گلبتها
مناحه، عمي شبيچ ترا مابيها شي ما مرت
75ساعه گولي يا الله شبيج
لزمت گلبي بخوف هبطوني انطيتهم الملابس
وگفت اباوعلها من الباب نتأمل شوكت يطلعوها
من العنايه حته نبدللها ونشوفها اريد احضنها
يمه اختي گلبي خلص عليها يا ربي
مرت كم ساعه التفتت اباوع مجموعه متقدمه علينه راح سلطان يمهم احاول اركز اشوف منو هذوله جانو شباب وبنات هواي جاين
اجو كم بنيه عرفتهم من قسمنه انصدمت
فتحت عيوني بصدمه بوسوني وسلمو عليه والشباب سلمو على سلطان وابوي وتقدمو
صارو اقرب باوعت وانصدمت من شفت فراس
فتحت عيوني اكثر وحلگي يبس من الخرعه
والخوف سلمو عليه من بعيد ابتسمت اجاملهم
وسلطان يباوعلي فتح الجگاره وقلص عيونه
واخذ جگارته وطلع وفراس يحچي ويا ابوي
والبنات يواسون بأمي شويه ونسمع صوت
العياط برا صوت عركه ونخمش
گلبنه من سمعنا هذا صوت سلطان.....
اليوم البارت ناااار مو؟؟؟
شنو اكثر جزء أثر بيكم اكتبولي؟
انطوني رأيكم بلبارت وشنو راح يصير
وشلون راح يكون رد طالب على الصار بـ زينب؟
