رواية كف الطاغية كامله وحصريه بقلم سارة الحسن
- كَـ شريط عتيق باهت
تتراءى لي الصور في رأسي !
نوافذ تُفتح وتُغلق بصفعات الرياح،
حديد يصكُ حديدًا ليتردد صداه في رأسي
كـ طبول حَرب لا تهدأ!
ضجيج الأطفال يزداد وأرى كفوفهم الصغيرة
تخط عَبثها على جدار منزلٍ مهجور!
كانت ضحكاتهم تتلاشى ثم تعود
لتتلاشى وتعود من جديد كَـ نغمة رعب
من جوف كابـــوس!
وفجـــــأة ..
انطفأت الصورة على صوت زجاج النوافذ
وهو يتحطم ويتلطخ بدم محطمهِ !
وعلا أنين بابٍ خشبي قديم يئن أنين فاقدةً ،
وماذا بعــد؟!
ساقتني قدماي هاربة إلى مكان أشبّه بالمتاهة
وقفت متحيرة لا أدري لأي أتجاه ألوذ
فكل الأتجاهات كانت تُخيفني وكلها تنتهي بالضياع!
حتى إذا بالذئاب تحيط بيّ من كل أتجاه
وأخذت تدنو شيئـًا فشيئـًا لِتفترس
ما تبقى منــي ..
سَقطتُ أرضـًا اصرخ من وجعي ورُعبي
وغدوتُ أذوب بين أنياب الخوف بدلًا من أنيابهم!
وحين أيقنت أنها نهايتي المحتومة
شقَّ العدم حضورُه، فظهر أَمام عيني ذلك الغريب
تَجمدت أحدق بهِ وألف سؤال يرتطم في رأسي:
من يكون؟
أَجاء لينقذني؟
أم ليُكمل ما بدأته الذئاب؟
- بشفايف ترعش وصوت مخنوگ طاغي عليه الوجع والخوف همست بكلمة وحدة "ساعدني"، أنحنى مخلي وجهة گدام وجهي مجاوبني بكلمتين حاول ينتزع هالخوف مني ويفززني من كابوسي
::- أضغاث أحــلام
307
- رد وكف على حيلة منطيني ظهرة يريد يمشي ويرجع للعدم الأجة منه، ألتفتت منا ومنا أشوف عيون الذيابة علــيَّ تجدح من كل مكان وحَسيت بس يبتعد راح يرجعن ينهشن لحمي، بچيت الخوف مسيطر علــيَّ، حضنت روحي بثنين أدية وصحت وراه مختنگة
::- اخذنــي وياك
194
- التفت علــيَّ وأبتسامة غريبة على محياه
::- وين أخـذج؟ انـه المطرود من الديرة والعشيرة
بيـا بيت احطج وأنتِ التستاهلين عيشة أميـرة؟
1K
..
122
- في أحدى أطراف محافطات الوسط ..
292
- الحقيقة الليّ جنت عايشتها صارت كوابيس،
شارع ترابــي طويل ، ونخل عالــي مِـنْ الجهتين
أتمشى بيناتهن لما أوصل بيت يتوسطهن
جنت أشوفة أكبــر بيت بالدنيا !
حديقة جبيرة گدامة وكل أنــوع الورد بيها ..
مِـنْ جهة قفص جبير بي وز وبط ودجاج وكل وحدة
بيهن عدها 5 او 6 فروخ يمشن وراهــا !
ومن جهة قفص ثانــي ممتد على طول الحايط بي
كُـل أنواع الطيور "حمام ، بلابل ، طيور حب ، كوكتيل،
كناري ، وفناجس صغار كلش هذن جانن عشقي .
230
- قريب مِـنْ قفص الدجاج والبط خالــي حافر
حفرة ومحاوطها بحصو كبار "جلمود" مسويها مثل
البحيرة حتى البط والوز يسبح بي ..
جنت أعوفهن واركض ورة الجراوة مالت الچلبة
بعدهن صغار ابوكهن مِـنْ امهن وأجيبهن أشمرهن
بالمي اريدهن يتعلمن يسبحن ، كُـل ما يطلع واحد اركض
وراه اجيبة وارد اشمرة بالبحيرة .. ويمي توثية مالت خالـي
بس تجي امهن علــيَّ اضربها بيها، تبقى واكفة مِـنْ بعيد
تنبح علــيَّ تريد جهالها ، ما اعوفهن بحالهن إلا مِـنْ تطلعلي
جدتي وتهددني تكسر عكازتها على ظهري لو ما عفتهن
جدة رحيمة: ولـج حتى الجراوة ما خلصن مِـنْ شرج
290
زُبيــدة: جدة اريد اعلمهن يسبَحَن، أمهن ما منها فايدة بس تنبح
325
جدة رحيمة: اني هم ما مني فايدة وما عرفت أربيج
- مدري منين يجيها الحيل وتركض ورايَّ بذاك الحوش الجبير على كولتها يطارد بي الخيل ..
109
- فزيت من هالكابوس گلبي يدگ حيل بقهر وخوف على لمسات أدين تمسح بدموعي الليّ مبللة خدي ويباوعلي بقلق وحزن يسأل
غـازي: زُبيــدة بيج شي؟
342
- دفعت أيدة بساع امسح وجهي بطرف ردني وهزيت راسي لا، رد يحاچيني بصوت ناصي حتى لا النايمين يحسون على صوتة
غازي: زين كومي أخــذج ويايَّ، لو ترجعين تنامين؟
98
- رفعت راسي باوعت للساعة بـ٥:١٥ الفجر، دفرت البطانية وگمت
زُبيــدة: أروح وياك بس أغسل
82
- عفتة وطلعت من الغرفة غسلت وجهي على السنك وهو كعد بباب المطبخ ينتظرني، لبست شالي وخليت طرف منه طويل رفعتة تلثمت بي .. كعدت بالگاع بأيدي جواريبة سود وثخان البسهن من كملت مسحت حاجبي الكثيف بگُفى أيدي ونهضت سحبت عبايتي المعلگتها بالباب حطيتها على راسي وطلعت عليه، ضَحك يگلي
غـازي: شنو خنفسانة من فوك لجوة كله أســود
169
- دنكت جريت صندوك من جوة السنك بي الخواشيك والسچاچين، أخذت اكبر وحدة يدتها خشب أسود وانداريت عليه رافعتها گدام وجهي أشوفة
زُبيــدة: عمايلها هم سودة
208
- ضحك يفر بأيــدة وأشرلي نمشي، أندارينّا ورة البيت شال صندوك بلاستك اسود وباهت لونة من الشمس ومشينّا للباب الصغيرة نطلع منها للبستان، فتحها وأشرلي أطلع وهو طلع ورايَّ وسدها على كيف حتى لا يفز أحد على صوتها، مشى گدامي واني وراه بس صوت سحيچتنا مسموع ووحيف الشجر الخفيف، ألتفت علــيَّ إجت عينه بعيني ورد يباوع لطريقة يسأل
غـازي: زُبيــدة تكرهينّا؟
148
- بقيت ساكتة وهو هم سكت لما وصلنّا شجرة التُكي الجبيرة حيـــل، زارعين جواهـا خُضرة بأنواعها "رشاد، ريحان، نعناع، جرجير" .. كل كم يوم الفجر يجي يحصدهن، ويسويهن باقات باقات يرتبهن بالصندوك ويروح يبيعهن بالسوك، شمر الصندوك من ايدة يمهن وأنـدار علــيَّ تعديتة اريد أصعد على الشجرة لزمني من ذراعي موكفني وكال
غـازي: أحْنـا أهلـج ونحبج زُبيــدة، وجدة رحيمة مثل ماهيَّ جدتج جدتنّا هم ونحبها وكلنّا مقهورين على موتتها، بــس أحْنـا مالنا علاقة بموتها أستوعبي وشيلي هالحقد من گلبج
284
- سحبت أيدي منه بهدوء
زُبيــدة: ما حاقدة عليكم، حاقـــدة على الليّ دمرتني ودمرتكم
91
غـازي: منو قصدج؟
- ترددت احچيها ولو ما يعيد سؤالة علــيَّ مرتين ما ينطقها لسانــي وأنعتها بصفة نزلت شكثر روس
زُبيــدة: الناهبــة ..
284
- هيَّ .."الناهبـــةُ".. لو أردت وصف الدمار!
يكفيك منها هــذا الأختصار !
- ومن بعدها! أرتجفت بيوتُ عزِّهِم
وأنطفأَ في وجوهِهِم نورُ الوقار
ومالَ ظهرُ الأبِ انكسارًا وذِلّةً
وبقيتْ أمٌّ تُرمِّمُ ما انهارِ
وهناك مِـنْ صار في أعناقهنَّ ظلُّ خطيئةٍ
فغدَت ثقلًا لا يزول ولا يندثرُ ..
186
- دنگ راســة بدون لا يحچي حَـرف واحد، زفر نفسة واندار منطيني ظهرة، كعد گدام الخُضرة وبدا يحوش بيهن وگال
غـازي: اصعدي لبين ما أخلص
52
- مشيت ساكتة صعدت لشجرة التُكي ،
جانت جبيرة حيــل واغصانها متفرعة بطريقة مخيفة ..
من غصن لغصن لما وصلت قمتها كعدت فوك كلش
بحيث لا الليّ يجي يشوفني ولا حتى اليوكف جوة الشجرة .
يجيبني وياه من يجي الفجر لأن يدري شكد أحب
اكل تُكي وشكد أحب جيتي للبستان بــس بالنهار ممنوع علــيَّ .
156
- لمــا كمل هو يلا نزلت ، شال الصندوك مخلي على جتفة وأشري أمشي، مشيت وياه وبأيدي كم تُكية اكل بيهن بدون غسل من الشجرة للمعدة .. ما مشينّا خطوتين وأندار علــيَّ مَــد أيــدة رفع اللثمة مغطي بيها حلگي وخشمي، خزرتة وهو أبتسم يگلي
غـازي: أكــو خبل بالبيت ينتظرنّا إذا شافج بدون لثمة يشمرنّا بالنهر انـي وياج
210
- درت وجهي ساكتة وضايجة، هنّه خطوتين بين شجرة التُكي وبين باب بيتنّا الصغير بس جيب اليقنعهم انـي مو أميرة زماني ويغارون كل هالغيرة علــيَّ .
86
- من سبقني بخطوة غافلتة ونزلت اللثمة أحاجيه
زُبيــدة: غــازي گول لأبوية يحچي ويَّ أبو رند تكف بلاها عني بالمدرسة لا اني اكف رداني عليها
137
غـازي: تجاهليها
- دغيتة بجتفة بالسچين الشايلتها
زُبيــدة: ماگدر، وإذا ما تحچون ويَّ أهلها أسوي مصيبة رمل صحراء الغربية كله ما يغطيها
189
- ألتفت علــيَّ ضايج ورجع نتر اللثمة صعدها على وجهي وأحْنـا وصلنّا باب بيتنّا، خزرتة وهو كفخني على راسي وگال
غـازي: كملي هالسنة بهدوء وجفينّا شر المشاكل لا افكس عينج
60
- فتح الباب دافعها حيل ووكف صَفح يأشرلي افوت، وكفت گدامة ونزلت اللثمة عن وجهي
زُبيــدة: أكثر شي أكرهه بالحياة "الهــدوء" .
129
- تعديتة ومشيت أدبج متعاركة ويَّ الگـــاع عبالك عندي طلابة وياها، فات ورايَّ وركع الباب حيل رافع راسة للسماء يصيح
غـازي: ربي دخيــلك لو تاخذها لو تاخــذني
95
زُبيــدة: أدعيلي الله يطول عمري بعدني ما عشت زهرة شبابي
62
- تنرفز وإجة ورايَّ يدردم علــيَّ من شافتنّا أمي تأفأفت ضايجة
حَفصة: انتو الاثنين اني مو گايلة ما اشوفكم سوة؟
233
- سكتنّا واني نزعت شالي شمرتة بالهول اريد أرجع أمدد بفراشي بعدني بس كعدت ما حطيت راسي على المخدة وصاح علــيَّ يضحك
غـازي: أبو بريص جوة مخدتج
84
- طفرت وكفت على حيلي فاتحة عيني على وسعها وصابتني رعشة قرف بس ذكر اسمة ، بقيت اباوعلة والبنات نايمات بس سمعن أسمة طفرن حتى بالغرفة مابقن
زُبيــدة: عليك الحسين؟
- هز راسة اي ميت ضحك
غـازي: ردت اطلع للبستان وگلت أخلي جوة راسج وأروح بس شفت دموعج تجري أنتِ ونايمة وقهرتيني، وين أودي بعد دحستة جوة مخدتج وكعدتج اخذتج ويايَّ
127
زُبيــدة: يعني شلتة بأيدك؟ وراها مسحت وجهي بأيدك بدون لا تغسل؟
- هـز راسة أي يضحك، گلت لروحي اهدي يا زُبيــدة اهدي ياروحي وتأكدي من الموضوع قبل لا تتهورين! سحبت روحي من الفراش بهدوء ووكفت يم المخدة دفرتها برجلي طيرتها وطلع يركض من جواهـا خلاني ما اندل دربي
186
- طلعت أركض وأصيح متخبلة ولعبان ام روحــي لو بأيدي هسه احطة بحلگ غازي وأعلمة لعبان النفس شلون يصير
زُبيــدة: ولـــــججج يمةةةةة
60
- كعد أبوية وأخوانــي البقية على صوت عياطي وأمي إجت من المطبخ تركض فاتحة عيونها وتصيح شكووو؟؟ وكفت بنص الهول اكمز وأأشرلها على الغرفة
زُبيــدة: مخليلي أبو بريييييص
48
- حسيتها هبطت من عياطي كعدت بباب المطبخ روحها رايحة، وغازي غاص بالضحك .. أبوية گام يحچي عليه وهو ولا مهتم أهم شي عنــدة كرهني بروحــي بهاي اللحظة، طلعت برا هاجة من البيت فتحت البوري وكعدت افرك بوجهي بالصابونة وأبچـي احس كلنـي صرت نكسة وأمي ورة ما أرتاحت شالتلنّا النعــال وإجتنّا ، غازي طك الصندوك وطلع منهزم من البيت وانـي حصلتلي نعالين طبعت أثرهن بظهري .
107
- بقيت مطنگرة وكاعدة بالحوش، أبوية وأخوية خَطاب طلعوا للبستان عدهم شغل، معن وعادل تريگوا ومشوا للمدرسة دوامهم صباحي،
أمي عليها بس أبوية من يطلع تروح تكعد ورة مكينة الخياطة تكمل الليّ عدها ..
- جدتـي بدرية "أم أبوية" فرشت حصيرتها يم باب المطبخ وكعدت بفَي البيت هيَّ وأخوية الصغير "ربيــع" ..
- اني و أُميمة عزلنّا لبيت كنس ومسح ورش الحوش، وكعدنّا بباب الحمام نغسل ملابس مــال عشيرة مو بيت .. جيــداء غسلت المواعين وكعدت يم جدتــي تگلّم البانية حتى تطبخها ..
213
- أُميمة تغسل الملابس وتشمرهن بالطشت الگدامي اموصهن واخليهن بالسلة حتى نكمل ونشرهن ، وكل ما تشمر هدم يطفر علــيَّ مي تبللت من فوك لجوة وساكتة .. غسلت دشداشتي وشمرتها بالترابة بصف الطشت صارت طين، شلتها وشمرتها عليها حتى ترجع تغسلها حطتها بالطشت ورشت عليها تايت رافعة راسها تباوعلي
أُميمة: مو دا أتحرش بيج ليش ساكتة؟
75
زُبيــدة: مالــي خلگج كملي وأنتِ ساكتة
- شالت وغف شمرت علــيَّ
أُميمة: ما يلوگلج دور الفقيرة، أرجعي شلون قبل تحچين كل خمسطعش كلمة سوة
57
- سكتت انتظرهــا تكمل غسل الملابس، جعصت دشداشتي حيل حيل تفرك بيها وتدردم متنرفزة
أُميمة: بالعبــااااس راااح اكوم هيـــج أجعصج كااافــي عـــاااد
39
- صاحت عليها أمي تخف أيدها خلصتني منها، كملنّا الملابس شريناهن وكعدنّا يم جدتي نراجع تحاضيرنّا لما صارت بـ11 تغدينّا وبدلنّا حتى نمشي للمَـدرســة طفر ربيع من يم جدتي يكمز بيناتنا يريد يروح ويانّا وجيــداء و أُميمة يبوسن بي ويتوسلن يرجــع وهو كام يوّن كطع روحــة ومن البيت أمـي تصيح عليه يرجع وجدتـي مدري شتگلة بالربــع ساعة أحْنـا على نفس الموال، زهگنــي جريتة من بين أدين جيــداء وسحلتة من تيشيرتة كعدتة يم جدتي ونترت بي صاگرتة
زُبيــدة: انطم واكعد يم جديتك لا اخبزك
127
- ضم راسة بحضن جدتي يبچي وكلها صارت فزيعية ولا وخطية عبالك ناحرتة ومعلگتة للغربان، من جهة ننتظر غـازي يوصلنّا للمدرسة وما إجة ولا معن وعادل يرجعون هسه لأن مدرسة الولد بصف مدرسة البنات ما يحلون إلا من يبدأ دوامنّا .
24
- گالت أمـي
حَفصة: روحــن يمة شكو عليجن
37
- لبسنّا العبي وطلعنّا بعد ما يهم شيصير نگول امي گالت روحـن وحــدجن، بعدنّا ما أبتعدنـّا هوايَّ أسمع واحــد يصيح بأسم جيــداء ألتفتنّا كلنّا نشوف الصاح علينّا "أبـن عمـي" وهو جاي يمشي بخطوات سريعة ناحيتنة بشداشتة السودة والجگارة بين أصابعة اخذ أخيـر نفس منها وشمرها على يمنتة هو ويمشي قبل لا يوصلنّا، زفر دخانها ووكف گدام جيـداء عاگد حواجبة يسأل
عـدنان: شو وحدجن وين الولــد؟
143
- جيــداء ..
انـي جبيرة أخواتــي ولساني يعادل عشرة بس گدام هالبشر أصير فارة ولا اعرف احچي، مادري شيصير بيه أكوم ألزگ كلمات غريبة عجيبة .. دنگت ماحط عيني بعينة وأمتمت وألوص بالحجي
جيــداء: وحدتنّا تعادل الف زلمة ما نحتاج احد يوصلنّا
183
- گرصتني أُميمة من ضهري وگالتلة
أُميمة: ماكو أحــد من الولد وغازي ما رجـع إذا ماعندك شي وصلنّا
29
- هز راسة ميخالف وأشرلنّا نمشي وهو مشى گدامنّا الطريق كله عيني على خطواتة شلون محدودة بعرض الدشداشة، نزيت على گرصة بظهري من ورة العباية ألتفتت على زُبيــدة تباوعلي بنظرات مدري شلونها وتحجي بصوت ناصي
زُبيــدة: من سمحلج تسويني زلمة؟
127
أُميمة: صح هاي ما تعادل چلب سلوكي مو عاد الف زلمة
59
- عافتني وأندارت على أُميمة
زُبيــدة: كافــي تتحرشين بيه لا أخبــزج
37
أُميمة: براسـج خيـر اوكفي على التنور واخبزي مو مگضيتها تخبزين بينّا
70
- عفتهن متكافشات واني رجعت أباوع لليّ گدامــي لما وصلنّا المدرسة وكف على جهة وأشرلنّا نفوت، مشينّا وحدة ورة الثانية من صرت گدامة رفعت عيني باوعتلة ودنگت بساع من شفت أبتسامة خفيفة مرسومة على وجهة وگال بصوت ناصي
عـدنان: إذا الولد ماكو انــي موجود لا تعيدنها وتجن وحـدجن
250
- كملت دربي واني اهز براسي اي وشكد بنفسي ابتسم بس أخاف مادري من شنو، اني و أُميمة صارلنّا سنين نايمات بالسادس ما دا نطلع منه و زُبيــدة أصغر من عدنّا، فرت أيدها وگالت
زُبيــدة: شو من جنت يم خوالي أروح وأرجــع وحدي ما يوم صارلي شي وهنــا محسسيني أحْنـا أميرات زمانة
89
أُميمة: ديرتنّا مو خوش ديرة
36
- مادري شدردمت عليهم ومشت لصفها
وصاحت وراهــا أُميمة تگللها لا ترد
على رنـد الغثيثة لو حاجتها وسمعتها كلمة ،
دوم البنات يعيرونّا بـ نهيبة عمتـي .!
بعــد ما جانت سمعة عائلتنّا ينضرب بيها
المثــل وصيتنّا سابقنّا، صاروا مِـنْ يذكرونّا يگولون
هذولة "أهـــل الناهبة" ..
غلطة مِـنْ عمتي "فيــحاء" دمرت حياة شكثر ناس
وراهــا بلا سبب يوم شردت ويَّ شخص مِـنْ المنطقة!
277
- جَــدي ما تحمــل هالمصيبة وطاح بالفراش
مريض ماطول أربـعة أشهر ومــات ، جدتي تحس ما
ضــل عقل براسها دوم تفز مِـنْ نومها وتگوم تطلع
للحديقة تدردم وتحچي ويَّ بنتها وحبيبة روحــها عبالك
موجودة صدك مو تتخايلها وتگللها
بَـدرية: نصي صوتج ولج فيحاء ما تكولين أمي نايمة
91
- محد بينّا يحچي لأن أكثر مِـنْ مرة امي تكللها
وتنكر تكول متوهمين وبعدين عرفنّا هيَّ ماتدري بروحها
ويمكن حلمانة وما تذكر هالشي ، أبويّة وعمامي صاروا
يمشون وهمه مدنكين بعد ما جان الراس شامخ !
86
- مَـرت سنين وعمي يدورهــا يريد يذبحها ويغسل
عارهــا حتى يكدر يمشي بين الناس مرفوع الــراس بـس
ما لگاها ضاع أثرها، والعالــم ما بطلت توصللهم أخبارها
كـل فترة ويجي واحــد يگله شفت بنتكم بهيج محافظة
وهيــج مكان ويــروح عمي يدورها بس ما توكع بين أديه،
أمــر وحكمة ربنّا .. ودوم أسمع أمــي تگول
"بعدها مــا خلصت خبـــزتها" .
115
- انـي وأخواتي أثنين أصغر مني اكثر مِـنْ
مــرة ردنّا نبطل مِـنْ المدرسة بسبب الحچي وبكل
سالفة تصير لو حسرة على وحدة بينّا تحجي ويَّ بنية
بدون تفاهم يعايرونّا بنهيبة عمتنّا .
جانت عجيبة هالسالفة وأول مرة تصير بالمنطقة
وسنين والعالــم مصدومة وتحچي بيها وشلون وشلون؟
وكل ما شخص غريب يسأل علينّا بالمنطقة
حتى يتقدملنّا يسمع نفس الجواب من كل واحد يسأله
"أووو يمعود شجابك عليهن هذن عمتهن ناهبة" .
94
- نگول ما نهتم بس للصدك "الســالفة تقهــر وتحز بالخاطر" .
41
- ورنــد أكثــر وحــدة دمرت نفسية زُبيــدة
كل يوم تسمعها حچي وتذكرها بـ عار العائلة الما نغسل!
انــي وأختي أُميمة نبلع ونسكت مو لأن فقيرات
بــس حتى لا السالفة توصل لأهلي ويضوجون،
بــس غَضب بيتنّا ما تكدر تسكت وكل ما وحــدة عيرتها
بسالفة عمتي تسحلها مِـنْ شعرها بنص المدرسة ،
تنظف تراب الساحة بيها .. بنص الدوام دا نمشي اني
و أُميمة بالساحة نراجع تحضير الدرس الجـاي وصارت
هوسة ورة المدرسة، گالت أُميمة تضحك
أُميمة: كون صايرة مصيبة تلغي كل الدروس ، أمشي نشوف شكو
68
- ماردت أروح بس سحلتني وياهــا غصبًا علــيَّ ،
شفنّا البنات ملتمات وصوت صريخ بنية كوم الدنيا
وكعدها رجف گلبي بخوف وصرت أركض بس اريد
اوصل اعرف شدايصير؟
دفعنّا البنات وطبينّا من نصهن وبس عيني لمحت
الشافتة لطمت على صدري حيـل وجحضت عيوني
بصدمة من منظر زُبيــدة وهيَّ تسحل بـ رند من شعرها!!
البنات يجرجن بيها وهيَّ مثل الدودة الفارسية من
تلزگ على واحـد تگطعها وما تعوفة تعت بشعر رند بكل
قوتها تسحل بيها وتصيح عليها مفرفحة
زُبيــدة: هيج قصدج أحْنـا ساحلات سمعة أهلنّا مو؟ مثل مدا أسحلج هسه؟؟
319
- ركضنّا اني و أُميمة خلصنّا رند من بين أديها
وهـي ثور وهايج ولا ينلزم مدري شلون تفلت من بين أدينّا
وترجع على رنـد تهطر بيها بكل حيلها، تخبلت اني صرت
ادفع بـ زُبيــدة واملخ بروحي والله اليوم كلنّا ننفصل مو بس هيَّ،
إجن المدرسات على صوت الهوسة وتخبلن وصار
الحچي مطر على زُبيــدة شبعت رزايل لما تريعت منهن
وكل هالرزايل ما بردت گلبهن وما أرتاحت المديرة إلا
من فصلت زُبيــدة ٣ أيـــام .
73
- ما خلوها تطلع لحد ما خلص الدوام وطلعت هيَّ عيونها بگصتها صايرات، جان غـازي واكف ينتظرنا بباب المدرسة أول ما شافتة گالتلة
زُبيــدة: خلّ يرتاح أبوك فصلوني من المدرسة
54
غـازي: ليـــش؟؟
- سألها بصدمة وهيَّ صارت تمسح بعيونها التصب دموع وتشرحلة بصوت مخنوگ الصار وشلون رنـد تگللها العرگ دساس وكلنّا نهايتنّا مثل عمتي فاضحين اهلنّا وساحلين سمعتهم بين الناس
56
- سكت ضايج وبقى طول الدرب ساكت ما حجة شي لما وصلنّا البيت لزم باب الحوش قبل لا يفتحها وأنـدار علينّا
غـازي: لا تسولفن لأهلي الصار، وأنتِ زُبيــدة باجر بدلي واطلعي ويَّ البنات على اساس رايحة للمدرسة وروحـي يم عمتي أم غايب لما ينتهي دوامج وأمر اخذج ارجعج للبيت ويَّ البنات
37
- هزينّا روسنّا سمعـًا وطاعة لان مابينّا حيل رزايل من امي وجدتي وأبوية وكل العشيرة ترزلنّا، سوت مثل ما گال غـازي ثاني يوم كعدت كملت شغل ويانـّا وبدلت وطلعت على أساس تروح للمدرسة وغازي يوصلنّا، هيَّ راحت يم مرت عمي "ام غايب" بيتها بصف بيتنّا ووحيدة ماعدها احد رجلها الليَّ هو عمي ميت وماعدها جهال لهيج يصيحولها أم غايب، وتموت علينّا ودوم شنسوي مصيبة هيَّ تنقذنّا منها .
82
- خلصت عقوبتها ورجعت للمدرسة وغـازي مَر على المديرة بأعتبارة أخوها الجبير وهم مسؤول عليها لأن ما يرجعون مفصول إلا يجي ولي أمرة، وطلع حجة أنُّ أبوية مريض وما گدر يجي حتى لا ينكشفون .. غير زُبيــدة تتعض وتوب؟ ما توب لو ينزل عليها وحي يگللها توبي هم ما تتوب ورجعت سَوّت الما صاير بـ رند وبنات عمها كسرت عودة الماسحة عليهن بذاك اليــوم وهم فصلوها ودزوا على أهلي وهم طمطمها إلها غــازي وأنسدت السالفة بالشافعات.
157
- فارشين حصيرة العصر جوة الحايط الليّ يم باب الحوش وكاعدين ندرس، أُميمة تتأفأف وتنافخ ضايجة تگلب بالكتاب بعصبية متعاركة وياه، سألتها زُبيــدة شبيها؟ وهيَّ انفجرت ترعد
أُميمة: أقنعي أبوية وأرجعــي يم خوالــج إذا ما تتحملين الحچي لأن إذا تبقين هنا تطيحين حظ روحج وحظنّا ويــاج بالمشاكل
90
- باوعتلها بنظرات باردة مابيها ذرة مشاعـر
زُبيــدة: وبعديش؟ بعــد ما أخذتوني من جدتي رحيمة وموتوهــا من القهر
52
أُميمة: كاااافــــي تگولين أحْنـا موتناااهـــا كاااافـــــي
- أُميمة تصيح مفرفحة و زُبيــدة تردها بهــدوء
زُبيــدة: ليش عمتج مو من عدكم؟ محد مطيح حظ عيشتنّا غيــرها، أنهزمت تتمعشگ وبقت زُبيــدة المعايرات تكفخها من التسوى والما تسوى
49
- دمعن عيون أُميمة مقهور تگللها
أُميمة: خاف ما تعرفين أبوية زيــن ترا يبطلنّا والله لو بقت مشاكلج يومية، عوفيهم خلّ يحچون على الناهبة هيَّ أختارت مصيرها بأيدها
28
زُبيــدة: دايحچون علينّا أُميمة، دايشبهونّا بيها والكل يباوعلنّا بالعين الصغيرة عبالك صراصير مو بشر
28
- بچت أُميمة من قلة حيلتها أتجاه الموضوع، ودنگت مخلية راسها بنص الكتاب تضم بوجهها من أنفتحت باب الحوش جان خَطاب! طبگ الباب وإجة علينّا كعد على حافة الحصير منطينة ظهرة بأيدة سبحة يلمها ويرجع يفتحها يعد خرزاتها ويرد يلمها .. زفر نفس بضوجة وباوع لـ زُبيــدة
خَطاب: الصار طيح حظنّا كلنّا، جدج المات من قهرة وجدتي التهلوس بأسم بتها، ابوج وعمامج وأحْنـا لهسه ما رافعين راسنّا ولا خلينّا عيونّا بعين أحد فَـ لا تعيشين دور الضحية وحـدج، سالفة عمتج يجيها يوم وتنسي بس دراستج اذا خسرتيها ما تتعوض
116
- بقت ساكتة ومدنگة تدري بروحها إذا حچت هسه بعد ما تسكت ومبين عليها مالها خلگ تجادل، طبگ أيدة على السبحة حيل فززني وحاجاها رافع حاجبة بأستفهام
خَطاب: خــوش؟؟
- رفعت راسها تباوعلة
زُبيــدة: مو خـوش بس لخاطرك راح أعتبرة خوش
57
- نهض واكف على حيلة يهز براسة
خَطاب: الله يجبر خاطرج
27
- مشى خطوتين ورجــع باوعلها
خَطاب: اليحب شي يتحمل كلشي علمودة، وأنتِ يا مدرستج يا راحة بالج؟
17
- جاوبتة بدون تفكير
زُبيــدة: مدرستي
خَطاب: لعد أنطيني وعد بعد ما تسوين مشاكل وخليج گد هالوعد لأن وعد الحر دين، حتى من أبطلج ضميري مرتاح واكول هيَّ الما وفت بوعدها
74
- لزمت مكان شاربها تگله
زُبيــدة: أخذها حچاية من هالشارب ما تسمع زُبيــدة ساحلة بنية بالمدرسة بعد واذا سمعت زين شعري
111
- أبتسم وهز راسة خوش، ما حچة شي ويَّ أُميمة رغم شافها تبجي بس مبين سامع حديثنّا ، اخوانــي بيهم طبيعة حلوة من يشوفونة نبچي ما يلحون علينّا حتى يعرفون السبب يعوفونّا على راحتنّا بعدين يجي يسأل اذا حصل جواب خيرًا على خير واذا ما حصل يگول "انـي موجود اذا احتاجيتي شي" ويكتفي بهالجملة .
125
- ومن يومها و زُبيــدة صارت أعقل وحــدة بالمدرسة تروح وترجــع ساكتة حتى بالبيت ما تسولف ولا تتعارك ويَّ اخوانـي ، جانت هيَّ وغـازي من الروس 24 ساعة هو يخبث عليها وهيَّ تخبث عليه هسه ذابتها على الصامت ..
44
- أمي تموت قهر من تشوفها هيج لأن هذا مو طبعها وكلنّا نعرفها شكد تلغي وشكد تحب الهوسة وحتى لمصايبها اشتاقينّا .. مرتين نطلع من المدرسة اشوفها لابسة عبايتها مشگگة تخزي ولا تلبس!!
جيـداء: هاي شكو؟ ليش هيج عباتج؟
زُبيــدة: رنـد وبنات عمها مشگگاتها ومرجعاتها بعلاگتها واني لان خوثة وما براسي حظ وعارة سكتت حتى لا اسوي مشكلة
92
أُميمة: احس نفسي دا امشي ويَّ مجدية، ذبيها وامشي بالصدرية ولا هالمنظر المخزي
60
- باوعتلها صفح ودارت وجهها
زُبيــدة: لا أهم شي الستر، خاف اذبها واسحل سمعة أهلي بالگاع
37
- تلگانّا غازي بنص الطريق يركض ما ملحگ يجينّا من وكت بقى صافن عليها من شاف عبايتها وسأل شكو؟ هيَّ سكتت واني حجيتلة وضاج طفرت روحة اول ما طبينّا للبيت صار يرعد يصيح يريد أبوية يروح يحچي ويَّ اهلها، هيَّ نزعت العباية انطتها لأمي تگللها
زُبيــدة: اذا ما تتركع انطيني عبايتج ألبسها واذا مستعزة بيها ألبس مالت جدتي بدرية
26
- أمي سكتت، خَطاب من شافها كام يحچي عليها
خَطاب: أنتِ لو طخة لو طلع مخة ماااا عنـــدج حل وسط موووو؟؟
65
زُبيــدة: مو راح احچي وراح تعيرني بعمتي وراح اسحلها وأنتَ تزين شعري نسكت ويا محلى السكتة
53
- بهدوئها شعلت فتنة النهرين ما يطفنها، وأبوية هَـد على أهل رنـد وصارت مشكلة شكبرها وهوسة ونكرن وحلفن چـذب مو هنّه رغم زُبيــدة متأكدة منهن لأن صديقتها شايفتهن وگايلتلها بس كون ما ينجاب طاريها تخاف من لسانهن .
14
- ضمتها بگلبها وسكتت يوم يومين وصارت هوسة
بالمدرسة وفز گلبي بخوف ماكو غيــر زُبيــدة ، طلعت من
رحلتي اركض و أُميمة تركض ورايَّ وتگلي
أُميمة: تراهنين من الف؟
جيـداء: على شنو يمصخمة هيَّ مال رهاااان
أُميمة: هاي الهوسة سببها زُبيــدة وساحلة رنـد لو وحـدة من بنات عمها
29
- وكل ما يعلى صوت صريخ البنية ينخمط گلبي اكثر
عبالك واحد دا تنغرس ببطنة سچاچين وروحة دا تطلع
من الوجع ، اني متأكدة زُبيــدة بس ادعي يارب مو هيَّ!
من وصلت دفعت البنات الملتمات طبيت من نصهن
ووكفت بمكاني حيل مابقى عندي من شفت
فاتن صديقة زُبيــدة لازمة رنـد من شعرها من ورة
الحجاب مثبتتها ونابتة سنونها بذراعها عبالك ذيب
صارلة أسبوع ما شايف اللحمة!
البنات يجرجرن بـ فاتن وهيَّ عبالك لاحمينها
ويَّ رنـد مدا تتلحلح، وبنات عم رند
يضربن بـ فاتن على راسها حيل
حسيت جمجمتها راح تنفطر من كثر الضرب بس يردنها
تعوف رند وما عافتها إلا صارت بحلكها زفرت الدم!!
190
- رنـد وكعت بالكاع تصرخ صريخ لَم الصوبين
وتترافس شايغة روحها من الوجع، اباوع لقميصها الأبيض
صار كله دم ! المدرسات تخبلن يصيحن عليهن وفاتن من بين
أدين المدرسات تعت بروحها تريد ترجع تاكل رند
عبالك رعيدة وصارت ترعد علينّا فززتنّا بصوت صياحها مفرفحة
فاتن: وروح جـــددددي لجبتي طاااري اخوية لشلع لسانج بدل لحمة زندج الخااااايس
164
- الصار مصيبة مصيبة دخيلك ياا ابو الجوادين
صرت ادعي بس كون تعدي هالمصيبة علــى خير!
و بعد كل هاي الهوسة
زُبيــدة واكفة على جهة تباوع لـ رند بشماتة!
صارت الرزايل تمطر على فاتن من المدرسات
ومن البنات وحتى حارس المدرسة صار بنصنّا يصيح
وما مفتهم شنو السالفة بس بنية شلعت لحمة بنية !
67
- أخذن رند للأدارة والمديرة تصيح على المرشدة تريدها تخابر على أهلها يجون ياخذونها، ركضت زُبيــدة جرت فاتن الترعش من العصبية من أيدها مشتها وياها للصف واني و أُميمة نركض وراهن اسمعها تگللها
زُبيــدة: أعضها مِـنْ خوانيگها وأكطع ونينها شنو عاضتها مِـنْ أيدها ولج؟
71
- شِهگت فاتن تبچي بقهر وتمسح بحلگها
فاتن: مِـنْ أيدها وگوة جرعتها، عفية زفرة
104
زُبيــدة: أخـذي جنطتج وأمشي للبيت جيبيلهن أبوج حتى لا يطلعنج أنتِ العايلة
16
فاتن: غير شلعت لحمتها
19
زُبيــدة: بس هيَّ التحرشت بيج واليهيج المزبلة يتحمل ريحتها
- هزت راسها أي وسحبت جنطتها مِـنْ الرحلة حطتها بجتفها
فاتن: هم صدك
59
- مِـنْ بين نص هالهوسة طلعتها مِـنْ المدرسة ركض لأن اذا خابرن أبوها وإجة ما راح يخلنة يفتهم السالفة ويبقن يصيحن بنتك وبنتك ويرجع أبوها يطيح حظها حتى يسكتهن ويخلص من لسانهن .
18
- بقن المُدرسات ملتهيات بالمشكلة وماكو دروس وكل الطالبات بالساحة يحچن بالسالفة، أُميمة تگرص بـ زُبيــدة تريدها تحچي شكو؟ گالتلها
زُبيــدة: هاي رند الخوش أدمية تگول لـ فاتن ضمي أخوج من زُبيــدة بنات هالبيت مو أمان تروح تورط أخوج وتنهبة هو مهتلف على الحافة، واني انطيت وعد لـ خَطاب ما اسوي مشكلة بس ما حلفت على فاتن وگتلها هاي دا تطعن وتشكك بأخلاق اخوج وتربية أهلج وهيَّ شالتها الغيرة وانطتها المقسوم
118
- سكتنّا ننتظر نعرف شراح يصير؟ وأسمع وحــدة من الطالبات تكول لصديقتها
::- انـي منا وهيج إذا فاتت مِـنْ يمي زُبيــدة ادكلها تحية
- ردت عليها صديقتها
::- شو لـ زُبيــدة؟
::- هيَّ الشيشت فاتن اخاف تشيشها علــيَّ
::- يعني تصيرين لوگية؟
- التفت عليهن اشوف تعابيرهن هذيج تحچي مِـنْ كُـل عقلها هزت راسها أي تگللها
::- لوگية ولا مشلوعة لحمتها
181
- باوعت لـ زُبيــدة ما منتبهتلهن، بقينّا واكفين لما رجعت فاتن وياها أبوها وأبوية! صارت وحدتنا ليمونة من الخوف شجاب أبوية؟ طب وياهم بالهوسة وتلاغوا همه وأهــل رنــد وعرفوا سبب العركة وهاي الهوسة كلها بسبب لسان رنـد الجبانة الصارت تحلف چذب وتگول ما حچيت بس المديرة خوفت صديقاتها بالفصل وحچن عليها وگالن صدك هيَّ هيج حچت! ما سكتوا أهلها وأهل فاتن إلا من صاح أبوية ميت قهر من السالفة
أسماعيــل: شنو فرق الناهبـــة عن التطعن وتحچي بأعراض العالــم هــاا؟؟
65
- سكت أبو البنية لأن يدري بنتة عايلة يوم صارت تطعن بسمعة زُبيــدة بسبب ذنب مو ذنبها! دنگ عم البنية و رد على أبوية
::- الشهادة لله ماكو فرق وذنب بنيتنّا اكبر مِـنْ ذنب الناهبة
39
- المديرة نبصت الا تريد تفصل زُبيــدة وفاتن عقوبة الهن لأن سوّن هالمشكلة، وعم البنية ما قبل گاللها كلهن غلطانات لو كلهن ينفصلن لو يبقن، تدخلت المرشدة مأيدة كلام المديرة وتريد توصف چلابة فاتن بطريقة حضارية بس ماطلع وياها غير تگلة
::- هذا أعتــداء أستجلابي أحْنـا لا ممكن نسكت عليه
227
- البنات الواكفات قريبات على الأدارة ضحكن كلهن وصارت صوت ضحكتهن عالي حتى عم البنية ضحك ودنك راسة ، التفت عليهن المرشدة عاطت بيهن كلهن طردتهن وخلت وحدة مِـنْ الطالبات تدك الجرس حتى نطب لصفوفنّا وماعرفت شصار وياهم بعد .
21
- مِـنْ أنتهى الدوام طلعنّا اني وأُميمة نركض ركض للبيت بس نريد نعرف شصار؟ حتى غازي ما أجانة يمكن نسونّا ..
لگيناها لافة راسها ونايمة بغرفة جدتي مِـنْ سألنّا أمي گالت
حَفصة: فصلوها هيَّ وفاتن ورنـد ٣ أيام ، بس هيَّ معاندة تريد تبطل وتعاركت ويَّ أبوج لأن ما يرضى تبطل
33
أُميمة: لا خلّ تولي شنو تبطل هيَّ غير تموت على المدرسة بس تهدد أبوية حتى من تشكيلة من اليسمعنها حچي ما يغلس
17
- سكتت أمي وبقى القهر ماكل گلوبنّا بذاك اليوم!
لما كعدت زُبيــدة من النوم راحت غسلت وسوت لفة اكلت
وكعدت بالصالة تباوع تلفزيون ويَّ أخوية الصغير ربيع.
كامت أُميمة راحت للغرفة جابت جنطتها وحطتها يمها
أُميمة: أدرسي ونجبي وعوفي هالسوالف التعبانة
25
- زُبيــدة شالت الجنطة وركعتها بالگاع حيل محترگ گلبها
لو بيدها هسه تملخ الجنطة والليّ بيها، رفعت عينها على
امي وصاحت مختنگة
زُبيــدة: اني لشوكت أبقى ينداس على راسي وأبلع وأسكت هــااا؟؟؟
30
- أمي دارت عينها على جدتي الكاعدة گدامها وردت تباوع لـ زُبيــدة تحاچيها بهدوء
حَفصة: مِـنْ تخلين لسانج بحلگج وتبطلين تتعاركين ويَّ الرايح والچاي
37
زُبيــدة: هــاا؟ واني رايحة ادرس وأرجع لا افك حلگي لا أتعارك لا أطيح حظ التدوس على ذيلي هيج ترديني مـــو؟؟
16
- رغم الوضع متوتر وعصبية زُبيــدة وصياحها ومن جهة قهرة جدتي بسبب سُمعة بنتها، ضحكت أُميمة معلقة على حچايتها
أُميمة: أنتِ چلب ويدوسون على ذيلج؟
49
- خَلت زُبيــدة تشيط مِـنْ القهر ، ردت شالت جنطتها ورگعتها بالگاع حيل مقهورة ماتدري شتسوي الحچي التسمعة ضال ينهش بروحها مدا تتحملة، رجعت أُميمة تگللها
أُميمة: مايصير ترگعين الجنطة هيج حرام، غيــــر بيها أســلامية
55
- وكفت زُبيــدة على حيلها وضربت الجنطة چلاق مرتين وتلاثة إلا رادت تتشكك يلا عافتها ومشت للكنتور تدبج دفرت الباب مالتة برجلها انفتح مِـنْ الخوف بوحدة ، سحبت سلة الهدوم تطلع إلها دشداشة وگالتلها
زُبيــدة: ماعندي بجدول اليوم أسلامية
110
- اخذت هدومها ومشت للحمام، كل ما تريد تبچي
تسوي روحة داتسبح وتطلع العيون مورمة من البچي ،
وبقت طول اليوم هيَّ روحــها بخشمها ومقهورة
وياهو الليّ يحاچيها تطگ عليه تخزي ،
لمــا رجعوا أبوية والولد المغربية من البستان وأنجمعنا وكت العشة
هيَّ كاعدة تاكل ساكتة ما إلها صوت
شكثر تحرش بيها أخوية "غــازي" ما انطت ردة فعل،
ندسها بطرف الخاشوگة بجتفها ومد راسة يباوع بنص وجهها
غـازي: مخلصة شحن لو شبيج؟ شو طافية؟
91
- حطت اللفة الليّ بأيدها كلها بحلگها وبقت تلوچ بيها وعيونها تفتر بين أهلي قلقتهم بقوا بس صافنين عليها، لما كملت لگمتها واندارت سحبت سراحية المي شربت منها يلا باوعت لأبوية وگالتلة
زُبيــدة: رجعني يم خوالـي
42
- صفن عليها أبوية شويَّ وراهـا نزل عيونة على خاشوگتة وشلون مدها بطاسة المرگة شال منها حط على التمن وهو ويخبطهن سوة گاللها بهدوء
أسماعيل: گطنة وشيليها مِـنْ أذنج هالحچاية
78
زُبيــدة: ما أتحمل الدا يصير لو اسوي مصيبة بيها لو انجلط من القهر واموت مثل موتت جدتي رحيمة
- غصت بحچايتها مقهورة ودنگت راسها تفرك بعيونها ماتريد تبچي
29
- أبوية عاف الخاشوگة وحط أديه بحضنة اعرفة أنقهر بس يحاول ما يبين
أسماعيل: كلها فترة وتنسي الحچاية
زُبيــدة: ما تنسي لأن منطقتكم مابيها مصايب غيرها، العالـم ماعدها حچاية غير نهيبة عمتي تحچيها
26
- ضَحك غـازي على حچايتها وگاللها
غـازي: خوش فكرة، نسوي مصيبة جديدة حتى العالم تنسى مصيبتنّا
39
- رفعت راسها عليه صافنة بوجهة وسألتة
زُبيــدة: شلون يعنــي؟
غـازي: أنتِ تگولين العالم ماعدها سالفة جديدة تحچي بيها حتى تنسى سالفتنّا، بس اذا صارت مصيبة يلتهون بيها راح ننسي أحْنـا
41
- زُبيــدة ..
من بعد حچايتة أول سؤال إجة براسي هـو شكدر أسوي من مصيبة ما تمسني حتى اخلص من عار عمتي؟ كطع تركيزي أبوية من گام وگال
أسماعيل: وهاي سالفة أبطل شيليها من أذنج مـا تروحيــن برضاتج أخلي غازي يسوگج بالنعال للمدرسة
53
غـازي: خــادم وعلــي
84
- ما حچيت وكعدت أدرس ورة العشة وثانــي يوم البنات داومــن وانــي خلصتها شغل بشغل امي طلعت كعدة البيت من عيني عبالك دا تعاقبنــي ويَّ عقوبة المدرسة .. هيَّ كاعدة تخيط وانـي برة أشر بالهـدوم الغسلتها، صاحت علــيَّ عفتهن ورحتلها ركض وكفت بباب الغرفة الليّ تخيط بيها
زُبيــدة: هــا يمة ؟
حَفصة: عوفي كلشي من أيدج أريد أدزج لبيت شبلي توصلين دشاديش البنيات
44
- سندت جتفي على اطار الباب أنزل بردن دشداشتي
زُبيــدة: إذا أبوية عرف تخيطين لبيت شبلي يطلگج
51
حَفصة: إذا ما حچيتي ما يدري
21
- سكتت، بـس اني التكدر تگلي على شي وهيَّ مأمنة لأن لو يذبحوني ما احچي .. گملتهن وحطتهن بعلاگة مخليتهن بأيدي هنّه وعبايتي .. مشت ويايَّ للباب الخلفية الليّ على البستان وگالت
حَفصة: ألبسي عبايتج ليش شايلتها بأيدج وطالعة شلوح
18
زُبيــدة: راح أطر بيوت عمي مِـنْ جهة البستان لا مِـنْ شاف ولا مِـنْ درى
22
حَفصة: ميخالف دشداشتج گصيرة ، ارجعي البسي غيرها لعد
13
زُبيــدة: بيه حيل أبدل اني
18
- سكتت وانــي حطيت العباية على راسي، وهيَّ الف مرة وصتني ما اتأخر من الباب أنطيهن وأرجع واني بس أهز براسي أي .. فتحت الباب حتى أطلع وگالت
حَفصة: زُبيــدة لسانج يمة
زُبيــدة: شبي؟
21
حَفصة: خلي بحلگج ولا تحچين أي شي غير السلام عليكم وهذن دزتهن أمي، ماريد حجاية زايدة فوك هالحجايتين
19
- هزيت راسي خــوش وطلعت بطرك العباية على راسي وشايلتها مِـنْ جهة وبدون لثمة! إذا لگفني أبوية لو واحد مِـنْ أخوتي يشدون بيه بلوكة ويشمروني بالنهر حتى أغرك ويخلصون مني ، عَـديت بيت عمي الأول الليّ مابي غير مرت عمي "أم غايب".
16
- عَديت بيت عمي الثاني كامل "أبو عدنان" ، ولدة خوش ولد بـس هو ببيتنا محد يگلة غير أبو المشاكل يموت على الطلايب والهوسات مِـنْ يشوف المنطقة هدوء يتمرض ..
96
- وأخيـر بيت هم بيت عمي "حكمت" وهم ميت اللّٰــه يرحمة، الساكن بي مرت عمي وأبنها "زبيـر" .. مالهم علاقة بكل بشر حتى أحْنـا وعمامي مقاطعينّا وزبيـر ولا عبالك يقربلنّا .. يطلع الصبح لشغلة ويرجع الظهر يكعد جوة حايط بيتهم من جهة البستان هناك اكو مثل الگبر "تل تراب ومحاوطة بطابوك" يبقى صافن عليه ويدخن .
158
- وأطرف شي صاير بيت شبلي ، كلهم عندهم بوب صغيرة على البستان حتى بيت شبلي .. الباب جانت مفتوحة بس ماكدر افوت وبقيت واكفة وادكها حيــل أحس أيدي يبست ومحد طلعلي رغم أسمع هوستهن جاية مِـنْ المطبخ ، لزمت العلاگة بأيد وبأيدي الثانية شلت حصوة مِـنْ الگاع وصرت أدك بيها حيـــل لو اني وواحد هيج داك باب بيتنا جان دفنتة وخزيتة وعزيتة ، أسمع أم زيدان طلعت ومادري شتحچي مِـنْ بطلت ادك الباب يلا أسمعها مِـنْ بعيد تصيح مخترعة
عهود: يــاا يــاا هاي منووو وهيج هَــد علينااا؟؟ لو جاينّا الغزو وماندري
50
- جانت أوضاع العراق مو زينة بوكتها والكل خايف، شمرت الحصوة وفريت أيدي أدردم
زُبيــدة: هو انتو الغزو يخاف منكم، عمت عين الوكت الخلانـي أخدمكم
58
أبو بكرة: ليش شبينّا؟؟
- فزيت وفز گلبي ويايَّ جفلانة وصرت اردد بلاية صوت "سلامًا قولًا مِـنْ رب رحيم" هذا وينه؟؟؟ عـزااا هذا واكف وراية! شلون وشوكت وليش ما حَسيت عليه؟؟ جحضت عيوني وسارت رجفة بجسمي مِـنْ سمعت صوت بكرة المسدس تفتر ورد گال
أبو بكرة: مو احاچيــج؟؟
155
- بقيت دايرة وجهي أسوي روحي عصبية واني اذا يگلي بز هسه اتخربط
زُبيــدة: أستحرم احچي ويَّ زلمة غريب خوية
86
- ضَحك وتعدانـي دافع الباب يريد يفوت، مسدسة أبو البكرة بأيدة يفر بي وگال مستهزأ
أبو بكرة: تستحرم أم الدشداشة الطافرة اربع أصابع
223
- دخنت مِـنْ الفشلة مال هسه اتربع بالگاع والطم على رجليه حيل مثل لطم أمي، أستاهل بالعباس أستاهل مو أمي حچت وگالت يا بنت الناس غيري دشداشتج! فوگاها جايبلتي عباية أُميمة وگصيرة علــيَّ هيج احسلي هـذا الأكرع يشمر علــيَّ .. همست بيني وبين روحي بحرگة احس دخنت
زُبيــدة: گبر لهالراس الأكرع ليگول صجمة
197
- أندار علــيَّ مدري صدفة مدري سمعني، بساع درت وجهي عنه وأم زيدان تمشي على بيض مادري شوكت توصلني .. شال لبيت ولا عبالك خطوتين يبست رجلية مِـنْ الوكفة يلا وصلتني وأشرتلي افوت للبيت وهيَّ تگلي
عهود: ما تفوتين يمة ليش واكفة على الباب
25
زُبيــدة: خالة هذن امي دزتهن
- باوعتلهن وگالت
عهود: يـاا كملتهن؟
- هزيت راسي أي، اخذتهن من أيدي وگالت
عهود: تعالي خلّ يقيسنهن البنيات گدامج حتى الليّ بي شي ترجعينة وياج تسوينة
13
- باوعت بوجهة أخخ لو اكدر احچي بــس عهود خوش عهود ماگدر احچي عليها، الكشخة كشخة عروس والذهب كله مِـنْ الثگيل وگلابية بيها كيلوين مِـنْ التطريز وحتـى حُمرة مخلية صح خفيفة بس مبينه، عمي هنيال أبو زيدان عليها .. بس بيها شغلة مو حلوة شوكت ما تحاجينها وگالت "مريضة، وشحالني، وحيلي مهدود" ..
125
- هيَّ مشت وانـي وراها دخلنّا للبيت من باب المطبخ الصغيرة ، أفترت عيوني على تفاصيل المطبخ تحسه مال ملوك غصبًا علــيَّ بقيت أباوع منبهرة بكل تفصيلة بي !! دنگت منحرجة مِـنْ حسيت على روحـي وسَلمت على نسوانهم الكاعدات كلهن ردن إلا وحــدة منهن باوعتلي ودارت وجهها محتقنة وملامحها تحچي وتبين شكد هيَّ ما طايقتني رغم فرق العمر الجبير بيناتنا !
67
- أفترت عيوني عليهن وحدة وحدة كلهن كاشخات مِـنْ الأمهات للبنات ووحدة تكول للثانية اوكفي على صفحة اني أحلى منج ! درت عيني لأم زيدان وهيَّ تسأل تعرفين تطبخين؟ تعرفين تسوين هيج؟ شتگلي اكللها لا، مادري على شنو دا تسأل، ضربت گُفى أيدها بأيدها الثانية وصوت البتوت يرن وهيَّ تگلي
عهود : يـااا ولا عبالك بتها لحَفصة، امج سباعية ولج عليمن طالعة أنتِ ؟
زُبيــدة: خالة ما سامعة أبو المثل اليگول النـار يخلف عار
146
- نسيت روحـي اني "العار" !! والنسوان الكاعدات ضحكن ، هسه بعد المذمة واكلتها بس حتى اخلص غير كون اخلص؟ ما خلصت وخلت البنات يروحن يقيسن دشاديشهن ويجن يشوفنهن ويسألن هاهيَّ لو بيهن شي؟ وخلال ما يلبسن ويقيسن أسمع عهود ومرت حماها دلال يحچن سوة بسالفة بيها زواج وكل ما دلال تگول على وحدة ما تقبل عليها أم زيدان وتگللها
عهود: خاف مثل أمها خلفتها بس بنات وأحْنـا نريد ولد
37
- درت راسي عليهن ما سامعة نصيحة أمي ومخلية لساني بحلگي وگتلهن
زُبيــدة: يرادلكم وحدة مثل امي خلفت لأبوي نص درزن ولد
117
- كلهن باوعن علــيَّ بنظرات مدري شلونها يمكن ما عجبهن شلون اني مركزة بسالفتهن وشلون تدخلت! دنگت ساكتة متفشلة لساني طويل وأحشر روحي بشي ما يخصني وما دا أتوب، ضحكت وحدة من بناتهم تطلع بعمر جيـداء وهيَّ تعدل بدشداشتها گالت
راوية: ليش شكم أخو عندج أنتِ ؟ يمكن اني ماعرف بس خَطاب
67
زُبيــدة: عندي هوايَّ، خَطاب وغازي وعادل ومعن وربيع وواحد مو هنا بغير ديرة يشتغل
52
- هزت راسها وسكتت ،
بيت شبلي بيت جبير عايشين بي أخوة أثنين
"هزبـر و صفوان" ..
- صفوان أبو زيدان رجل عهود، عنده 3 ولد
"زيدان ، أبو بكرة " حَمـد" ، شبل"
وبنية وحدة الليّ هـيَّ راوية ..
- هزبـر متزوج أثنين "دلال ، وتقوى"
ماعنده ولد، بــس خمس بنات وحدة أحلى مِـنْ الخ .
126
- رفعت راسي مِـنْ سمعت صوت ضجة صارت بالحوش وأصوات الزلم هوايِّ واضح من كشختهم عدهم عزيمة ووصل خطارهم! صارت عيني على الباب بساع منحرجة مِـنْ أنفتحت ومد راسة أبنهم شبل يباوع لأمه ينطيها خبر يبلشون يصبون الغدة وطلع ، بنفس الثانية رَد مد راسة عليها يگللها
شبل: بالليل تطنطشي لرجلج هسه زحمة صوت بتوتج واصل لراس الشارع
55
- بأيدها سچين شمرتها عليه وهو بساع سد الباب حتى لا توكع بي وطلع يضحك، ما باوع على أي وحدة غير أمه .. درت وجهي على دلال مِـنْ گالت لأم زيدان مِـنْ ورة خشمها
دلال: أنطيها فلوس الدشاديش وخلّ تروح خاف تأخرت على أهلها
27
- بعدها أم زيدان ما حچت اني مشيت اريد اطلع وگتلها
زُبيــدة: أي واللّٰــه
8
- صاحت علــيَّ عهود وكفتني لما جابت الفلوس وكالت
عهود: بعد دشداشتي فدوة گولي لامج لا تبطي بيها العندي صغرانات
17
- هزيت راسي خوش وطلعت ركض من المطبخ اريد ارجع من نفس دربي، بعدني بالباب الصغيرة بس فتحتها صاحت علــيَّ وحدة من بنات هزبـر .. وكفت أنتظرها لما وصلتلي وكالت
بينات: اني ما اعرفج زين بس اعرف اخواتج وأحبهن، بس هاي رنـد دا تحچي على أُميمة وتگول عندها علاقة بـ طارق جيرانكم وحتى حچت گدامـي مرة السالفة بعدها ماطلعت بس شكد تريد تبقى وتطشها رنـد بالمدرسة؟
45
- يمة احس عيوني دخنت من القهر هيَّ شنو رنـد ولاعبة بينّا طوبة؟ هزيت راسي وفتحت الباب بقوة وشلت طرف عبايتي بس اريد اوصل البيت وافضح أهلي لان راح ننفضح وهمه ساكتين لرند واهلها، صاحت ورايَّ بساع
بينات: بس اصبري افهمج شبيج ولج زُبيــدة
25
- ما وكفت بعد واحلف واتكفر اله اسحل رنـد بالمدرسة لو اعرف يبطلوني ، بعدني بس صرت گدام بيت عمي حكمت انفتحت بابهم وطلع زبيــر منها باوع على بيت شبلي بينات بساع طبت وسدت الباب ورد عاينلي عيونة تريد تطلع من مكانها على گد ما خازرنــي!! نزلت نظراتة على رجلية بساع حليت العباية بس ما تغطيهن گصيرة و رد باوعلي ينتر بعصبية
زبيـر: الخيطلج هالمصخمة ما گدر يطولها شبر؟؟ شلــوون تطلعين بيها هيــج ؟؟؟
127
- بقيت أعصر بالعباية بثنين أديَّة ، ماريد أحجي لأن معروف عنه هـذا خبل هسه يتخبل علــيَّ ونتعارك وتوصل السالفــة لأبوية ويتعارك ويَّ أمي إذا ما طلگها صدك، فزيت مِـنْ دنگ شال شطب رمان مِـنْ الگاع وضربة بالهوى بس سمعت صوتة جسمي وجعني مِـنْ كد ما مكتولة بي
زبيــر: ويـن جنتي ؟
- بلعت ريگي أمتمت بالحچي مادري وين راح لسانـي
زُبيــدة: أمي دزتني گالت اشوفك اذا معتاز شي ؟
56
- رفعت عيني باوعتلة خازرني عبالك عنده طلابة ويايَّ، عبر مِـنْ فوگ الگبر الگدام بيتهم وتگرب عليه بأيدة شطب الرمان رجعت خطوة لورة خفت لا يضربني ، تقرب علــيَّ نبت طرف الشطب بجف رجلي وحچة گاز على سنونة
زبيـر: بالعبااااس ياااا صخيمة الشفتج طالعة هيج لو واصلة بيت شبلي بعد لگرم رجليج بهالشطب، للبيت بساااع بســـاااع
106
- اخير حجاية عاطها بوجهي، ورفع راسة يتلفت خاف اكو احد .. هزيت راسي أي وركضت منهزمة منه، بـس صرت گدام باب بيتنا وأمنت درت وجهي عليه ميتة قهر وصحت بي
زُبيــدة: مِـنْ أسوي مكسورة گول لأهلي يحاسبوني لأن أنتَ لا أبوية ولا أخوية
46
- إجـة علــيَّ بخطوات سريعة يتهدد ويتوعد اليوم يطلعلي جلد جديد، اني دفرت الباب حيل عبالي مفتوحة طلعت ما مفتوحة شاغت روحــي راح يلزمني واذا لزمني وضربني اسويها كربلاء على راسة اليوم .. اجت على بالي اعبر مِـنْ فوك الباب ، شمرت الفلوس وحطيت رجلي على حديدة مِـنْ الزخارف الموجودة بي وبساع بساع مادري شلون عبرت وتكومت بالگاع عطت بوجع احس عظامي طكطكت وهو صاح متشمت بيه
زبيـر: حيل وابو زايـــد، كون الگفج بعد طالعة هيج حتى ضيم اللّٰــه أراويج
147
- دمعن عيوني ولزمت ظهري احسه انطر نصين، لزمت بالباب ووكفت على حيلي عطت بي دمي يفور مِـنْ القهر
زُبيــدة: دمشي مناااا المعقد هم طلعلك لسان
63
- ضرب الباب حيل يرعد علــيَّ ويغلط على عمامي نعل جدهم السابع وعلى صوتة إجت امي تركض فاتحة عيونها على وسعها ، مِـنْ شافتني الدموع تارسة عيوني ولازمة ظهري لطمت على خدها
حَفصة: شبيج ولج شبيج ؟؟
- أشرت على الباب ادردم بصوت عالي
زُبيــدة: هذا الخبل يريد يضربني وحگ راس الحسين اليوم الا اكول لأبوية عليه خلّ يكسر أيدة المعقد ابو الجنانونة
85
- سدت حلگي بأيدها ودفعتني للبيت وتحلف بمية يمين اذا فكيت حلگي بعد تگطع الصوندة علــيَّ ، دنگت شلت الفلوس وصرت بعكسة البيت وهيَّ فتحت الباب تحاجي زبيـر تريدة يسكت وتفتهم منه شكو؟ نصة صوتة بس بعده يفور ويحجي بحرگة ما راضي شلون اني طالعة هيج وشلون رايحة لبيت شبلي! وامي تكله اعتبرها جاهل عمه والجاهل نعلمة تريد تقنعة يسد حلگة، هز راسة خوش لخاطرها راد يمشي ورد باوعلها عيونة بگصتة وينفث مِـنْ كثر ما صيح ويحچي كاز على سنونة
زبيــر: هاي اخر مرة اشوفها ببيت شبلي يا ويلها وويلج اذا خليتيها توصلهم بعد
50
- سكتت أمي تدري محد يقبل نوصلهم لا اهلي ولا عمامي ، واذا أبوية يعرف يمكن يطلگها مو بس يهوس علينا .. راح زبيـر وهيَّ سدت الباب ورجعت علــيَّ اكلت گلبي صياح وعياط وضرب ومن ما ارتاحت رجعت تدك على روحها وتتحلطم بقهر
حَفصة: راااح تجلطيني ولج زُبيــدة، اكللها لا تبطين تروح تنام! اكللها لا تفكين حلگج اسمعها تلعلع على ولد عمهااااا! اذا ضربج شگدر احجي وياااه اني ولج شحچي ويااااه
21
- ضربت على خدها حيل هاي حرگة الأمهات الليّ عجزت افتهمها، مسحت عيوني حيل ادردم بقهر
زُبيــدة: شنو تايهتلة يضربني ؟؟ وحگ راس الحسين اخلي أبوية واخوتي يدفنوا بالگبر المگابلة
37
- خزتني وطيحت حظي بالرزايـل ما سكتت إلا من رجعن البنات من المدرسة وما حجت بعد حتى محد يعرف شصار .. صبينّا غدة من رجعوا الولد وراهـا رجعوا طلعوا عدهم شغل وخَطاب حتى على الغدة ما إجة ، امي عجنت لـ جيــداء حتى تخبز وانـي حچيت سالفة بينات لامي تگلي
حَفصة: انـي اروح لامها هاليومين اريد أفتهم شنو علتها هالبنية
16
أُميمة: اني أفهمج العلة، اخت رنـد جانت خطيبة الليّ أنهزمت وياه عمتي حلو؟ حلـــو، وهنّه دا ينتقمن من عدنّا ويشوهن سمعتنّا حتى يبردن گلوبهن، وخلّ ازيدكم من الشعر بيت السالفة طاشة بالمدرسة وكلها تحجي علــيَّ بس اني مغلسة اريد اخلص هالسنة على خير
69
- درختهن بدون لا تاخـذ نفس وكامت طلعت من يمنّا وجهها دم محتقنة من القهر ، سكتت أمي بس ماغيرت رأيها إلا تريد تـروح لأم رنـد وتحاجيها .. العصر اندارت جيـداء ورة البيت تخبز بتنور الطين واني كعدت يمها نسولف خلصت الشجار الأول وداتحط حطب بالتنور تريد تخبز الثاني وسمعنّا صوت عدنان صاح
عدنان: اليوم عمتي حَفصة متأخرة بخبزها
34
- متعلمين عليها تخبز الفجر من جانوا قبل ببيت العيال وكلهم عايشين سوة، ابتسمت جيـداء مجاوبتة
جيـداء: اني الليّ دا أخبز وباقية للمغرب
15
- مادري شحجة ما افتهمنّا اثنينّا عليه وحسيت خطواتة أقتربت من الحايط يسألها
عدنان: طلعتي خبر بعدج؟ أنطيني وحـدة
61
جيـداء: اي طلعت تعـال
14
- كل ظنها وظني راح يجي من الباب گمت من مكاني اريد افتح الباب الصغيرة وهيَّ صبت نفط فوك الحطب وشمرت بي عود شخاط وويَّ ما گبت النار هو مد راسة من ورة الحايط صارت النار بوجهة بساع رجع لورة صايح بوجع ووكع على ظهرة .. جيـداء مادري شصار بيها أنرعصت صارت تفتر مداير روحها وتصيح
جيـداء: عــزااا احترك احترك
106
- ركضت على الباب الصغيرة فتحتها وهو اسمعة يضحك وإجة على الباب يگللها
عدنان: ما احتركت صوتج جيـداء
- سكتت تباوع بوجهة وهو واكف گدامها يتحسس وجهة
عدنان: بس شاربي شوية ورموشي وحواجبي
94
- وصلت ايدة لشعرة وراحت ابتسامتة بقى يتحسسة مصدوم المقدمة كلها متشعوطة، طكيتها بضحكة على منظرة
زُبيــدة: ريحة الشعواط وصلت لسابع جار
70
- خزرني ودار وجهة يريد يمشي ورد باوعلها
عدنان: انطيني خبزة هسه هم محترك وهم ارجع ايدي فارغة
41
- رجعت الثولة تركض شالت كل الخبزات وراحتلة ضحك وسحب وحدة بس
عدنان: عاشت أيدج
18
- بقى واكف مبتسم وهيَّ تكله شاربك احترك وهو يهز راسة اي، ترد تكله رمشك احترك وهو يعيد نفس الحركة، صرت ورة الباب ومديت بس راسي من شافني بوجهة راحت ابتسامتة وكتلة
زُبيــدة: خَطاب لازم الباب لاختك أميرة تراضاها؟
81
- جيداء بساع مد ايدها دفعتني ما راضية على حچايتي وهو يخزر بيه عبالك عنده طلابة ويايَّ، دفـر الباب برجلة ومشى يدردم
عدنان: مثـــل اخووووج العــاااار
12
- ركعت الباب وراه سادتة وجيـداء تعاتبني ليش هيج حچيت؟ باوعتلها بقرف
زُبيــدة: غديي تلعبون النفس
44
جيـداء: أنجبي واحجي عدل
1
زُبيــدة: عليمن لازملج الباب من ما يرضى خَطاب يلزم الباب لأميرة؟ هم أبن عمها شكو بيها
46
- سكتت ورجعت تكمل خبز ضايجة، عفتها ورجعت للبيت وهاليومين مرن بهــدوء ورجعت أداوم وانــي مصيبة براسي تنهش بعقلي ما ارتاح بعــد إذا ما سويتها وأنتظرت وتأنيت لما إجة يوم الخميس يصادف دوامنّا ظهري
، غـازي رجع من شغلة بوكت كعد يتغدة حتى وراهـا يوصلنّا للمدرسة ويروح يعاون أبوية بشغل البستان وربـيع حاضنة من ورة مجلب برگبتة ويدك رجليه بالكاع يتمرجح بـ غازي ويسوي
ربيـع: هيـــلا هوب هيـــلا هوب
27
- سحب أيدة مِـنْ رگبتة يگله
غـازي: اللگمة مدا تفوت ولك مال هيلا هوب
37
- زعــل وراح يم أمي بالغرفة دا تخيط
وبـــس صوت المكينة مسموع يضرب بالراس يسطر،
كمل وراح يغسل وأحْنـا لبسنا العبي ووكفنّا ننتظرة ..
ركضت جبتلة حذاء الشغل الليّ خلتني أمي أغسلة
شمرتة يم رجليه بباب الهول وگتلة
زُبيــدة: البس هذا غسلتة إلك طالع جديد
25
- ضَحك ومد رجله يلبسة
غـازي: ما غسلتي وجهج لعد بلكت يطلع هيج حلو
54
- بقيت واكفة مبتسمة وهو رفــع رجلة ومد أيدة حاط أصبعة بين حافة الحـذاء الورة وبين رجلة حتى يطب برجله، ويَّ ما سحبة بقوة وطبت كُـل رجلة نزلها بالگاع وعاط شايغــة روحـــة ، طلعت امي تركض على صوت عيطتة وهو بقى ينفض برجلة يريد الحذاء يوكع ما وكع إلا من كعد بالكاع ينزعة ونفضها ماليتها شوك زَرف اصابعة .
58
- كعدن گدامة أمـي وجيـداء يشوفن رجلة خمو تأذت هوايَّ واني أخذت الحذاء مِـنْ أيدة اطلع بالشوك كوة ضامة ضحكتي وأدعي بصوت عالــي
زُبيــدة: اللّٰــه ينطي ويوفقة ويرزقة ويفتح ابواب الخير والفرح والسعادة بوجه المسوي هالسواية بيك، اللّٰــه ينور وجهة ويقوي ذاكرتة ويترس جيبة فلوس وثلاجتة اكل
60
- تخبل هو صار يصيح ويحچي وكام شايلي الحـذاء يريد يگطعة علــيَّ بس أمي حلفت عليه ما يضربني ولا يحاجيني .. سكت مجبور وطلعنّا نمشي وياه وكل ساع أتذكر منظرة شلون شاغت روحة واغطي وجهي بطرف عبايتي ميتة ضحك .. بقى يتحلفلي يطيح حظي ابتسمت اباوعلة
زُبيــدة: هاي رد على دكتك مالت ابو بريص هسه تصافينّا
19
- ابتسم يستفزني
غـازي: تتوقعين شلون اردلجياها؟
- جريت عبايتي مِـنْ جوة الجنطة لأن دايسة بيها، عدلتها وگتلة
زُبيــدة: حَبيبي أخوية أبعد عن الشر وغنيلة
24
- هز راسة مبتسم مبين ناويلي مو خوش نية، طبينّا للمدرسة وهو رجع للبستان .. مشيت لصفي خليت جنطتي على رحلتي ونزعت عبايتي مخليتها بعلاگتها وخليتها جوة الرحلة وكل ما أشوف رند الخايسة تدگ بگلبي شلون شگگت عبايتي وخلتني ارجع بيها للبيت مشگگة عبالك مالت مجدية أموت قهر .
25
- هوايَّ ضميت الها سوالف بگلبي بس إذا يبقن
ينفجر گلبي منهن وأصبح مزرگة بفراشي من قهرهن .
ما عافت سالفة عمتي وبقت كل ما تكعد بين بنات تحچيها
ومن شافتني ساكتة صارت تحجي على أُميمة!!
تشوه سمعتها وتطعن بشرفها واليوم على أُميمة باجر علــيَّ
وراها على جيـداء لما تخلينّا علج بحلوگ العالــم .
مبتعدة عن الشر بس هيَّ رجعتني
للشر بالدفرات وجبرتني أطيح حظها .
29
- الدرس الثالث جان عدنّا شاغر طلعنّا بالساحة
نفتر اني وفاتـن اسولفلها على مصايب رند وشلون دا تحچي على أُميمة، ضربت على رجلها بقهر ومتعجبة من عرامتها
فاتن: هاي بعدها بطول النعال وداتسوي مصايب تشيب الراس اذا كبرت شتصير؟
زُبيــدة: أم سحورة
36
- ما رجعنّا للصف بعد إلا من دك الجرس للدرس الرابع
رجعت لرحلتي شفت علاگة عبايتي واكعة بالگاع!
دنگت شلتها اريد ارجعها جوة الرحلة وانتبهت على شگ بيها!
طلعتها من العلاكة ولگيتها مثل المَـرة الليّ فاتت
مشككة كلها عبالك غربال صايرة!!
دمعن عيوني من القهر وفاتن لزمتني من جتفي تگلي
فاتن: لا تنقهرين بالحلة ألزمها اشكك عبايتها عليها وروح جدي
47
- رجعت العباية بالعلاگة وطلعت شمرتها بالحاوية الليّ كدام باب الصف ميتة قهر ورند وجلابها كاعدات يتمضحكن شطت شطت لو بأيدي هسه اعلكها بالبنگة واجلدها وهم ما يرتاح گلبي .. كعدت بالرحلة متعاركة ويَّ ذبان وجهي وفاتن تسأل شلون راح ارجع؟ عطت بيها مختنگة
زُبيــدة: هيج شلووووح اريد اشوف اهلي لشوكت يبقووون ساكتين ؟؟؟
11
- سكتت مخلوسة مني وبقيت باقي الدوام كله اني كاعدة برحلتي صايرة نـــااار !! وبيني وبين روحي أحلف هاليوم ما يعدي على خيــر .
بالدرس الأخيــر مشيت وكفت يم رحلتها ودنگت أشاورها
زُبيــدة: اذا ببالج أنتِ واختج تنتقمن من احد فَـ أنتقامجن من خطيب اختج المسمي روحة رجــال
18
- احتدت ملامحها وهيَّ تگلي بهمس
رنـد: بختة ما نندل مكانة جان من زمان اهلة صلولة صلاة الوحشة
20
زُبيــدة: بس اني اندل مكانهم وين إذا تردين من يدك الجرس للاهل تعالي بالحمامات اكلج وين وشوفيني سباعيتج
- بقت صافنة بوجهي ما مصدكتني، رجعت اقرا براسها وادكلها ناعم
زُبيــدة: ماكدر احجي لأن احب عمتي واخاف يذبحونها بــس راح اكلج حتى تكفين بلاج عن أُميمة، إذا تردين تعرفين تعالي وحدج
64
- عفتها ومشيت كعدت برحلتي والدرس الاخير كله هيَّ كل دقيقة تلتفت علــيَّ واني ابتسملها لما دك الجرس للأهل! لميت جنطتي بساع وطلعت ركض للحمامات أنتظرها هنــاك المدرسة كامت تفرغ وهيَّ ماكو الدقايق تمر مثل السم وكل ما الخوف يسيطر على گلبي واريد اتراجع أتذكر سوالفها الوصخة وارجع أحقد عليها، من تاخرت گلت هاهيَّ ما عبرت عليها وبعد ما تجي! بس خطيت خطوة وحدة اريد اطلع هيَّ طبت شايلة عبايتها بأيدها وگالت
رنـد: احچي بساع وين مكانة؟
10
زُبيــدة: أنطيني ورقة وقلم اكتبلج المحافظة والمنطقة حتى ما تنسين
21
- سحبت جنطتها من جتفها تطلعلي ورقة وقلم واني مديت ايدي أخذت عبايتها منها لان خابصتها بس حسيتها ملتهية سحبتها بكل قوتي ودفعتها بالتواليت صارت رجلها بالقعادة وانجفت على وجهها راسها انضرب بالحايط، سحبت الباب بساع وقفلتها عليها من برة جان بيها سرگي من برة مادري ليش، هيَّ رجعت مثل المخبلة تدك بالباب حيل وتصيح علــيَّ
رنـد: أفتحي الباااب شبيج تخبلتي ؟؟
52
زُبيــدة: گتلج رند تجفي شري بس راسج يابس، اني عمتي مو خوش أدمية وناهبة واختي تحب فلان وعلان مو؟ خلّ أشوف من ماترجعين لأهلج اليوم ويطلعون يدورون عليج وما يلگونج وتطش سالفتج بالديرة شراح يگولون عليج العالــم؟
118
- عبالك حابستها بغرفة بيها عشر زلم، تخبلت صارت تركع الباب بأديها ورجليها وتتوسل بيه افتحلهيا وتحلف وتتكفر بعد ما تفك حلگها وما تجيب طاري لأي بشر .. لبست عبايتها وحطيت جنطتي بجتفي وگتلها
زُبيــدة: المدرسات والطالبات طلعن محد يخلصج بعد ومابقى غير الحارس برأيج ابن حلال يستر عليج؟ لو راح يستفرد بيج؟
105
- هيَّ من سمعت حچايتي خنست وصارت تبچي بخنگ واسمعها تلطم على وجهها حيــل وتتوسلني افتحلها الباب بس ما صدكت بكل حچيها وحلفانها لان ذيـل الچلب ما ينعدل ! عفتها وطلعت للبيت لكيت البنات وغـازي منتظريني بالباب وماكو غيرهم همه والحارس وخط المدرسات الليّ مو من الديرة .
39
- ما أنتبهوا لعبايتي لأن جديدة واني جنت لابسة مالت أمي وهم جديدة ، رجعت للبيت ما مهتمة شراح يصير بـ رنــد .. غـازي بس وصلنّا رد طلع رايح لـ خَطاب مادري شعنده، أبوية طالع ويَّ عمي و معن وعادل لگيناهم نايمين ، بس بدلت صاحت علــيَّ أمي گالت
حَفصة: ألبسي عبايتج وامشي نروح لعمتج أم غايب
زُبيــدة: شعدنّا ؟
حَفصة: أمشي ولا تتسألين
14
- لبست وطلعنّا من الباب الجبيرة رحنّا لبيت عمتي ام غايب ، طلعت علاگة من جوة عبايتها وكالت
حَفصة: ركض اطلعي من الباب الصغيرة وصلي هاي دشداشة عهود وتعالي
36
- اخذتها من أيدها وهزيت راسي خـوش، اني طلعت على جهة البستان وهيَّ كعدت يم عمتي أم غايب لما ارجعلها .. رحت طايرة وصلتها ورجعت من رجعت صارت گدام عيني شجرة التُكي فرفح گلبي عليها ، باوعت لباب بيت عمتي ام غايب ورديت اباوع للشجرة احاچي روحي
زُبيــدة: روحي زُبيــدة اكلي تُكي ضريبة تعبج
24
- گلت خمس دقايق ما تحس بيهن أمي ومشيت بساع للشجرة من غصن لغصن وصرت فوك كلش كعدت اكل والضحكة تارسة وجهي وبقمة متعتي تذكرت رنـد، باوعت للتُكي الليّ بأيدي احچي بحزن حتى أرضي ضميري
زُبيــدة: سودة علــيَّ رند هسه شداتاكلين بالحمامات
91
- ضَحكت ما مهتمة لحجم المصيبة المسويتها والليَّ راح تغيّر حياتنّا! بقيت اكل بساع حتى ما اتأخر على أمي ، من اشلع التُكي اسمع صوت سحيچة خطوات! من اخنس تروح وتكررت هالحالة اكثر من مرة، انقبض گلبي بهالمغربية وابعدت الاغصان عن عيني أباوع ماكو احد! قررت انزل وارجع لأمي وأدعي بصوت ناصي
زُبيــدة: يارب خطاف نسوان وچتالهن ولا خَطاب
52
- نزلت على كيفي بس أنداريت منطية ظهري للشجرة
شهگت واكف گلبي من الرعب الشافتة عيني!
بحياتي ماخفت من شي مثل ما أخاف من هاي الواكفة
گدامي! نظرات عيونها تصيبني برهبة!
ظهرها المنحني، عيونها الضايعة بمحجرها،
زلفها الأبيض الطالع من جوة شيلتها، وأبتسامتها
التكتم على النفس، دنگت ماكدر احط عيني بعينها
وهيَّ رفعت عكازتها أشرت على الشجرة البظهري
وبصوت ناصي جنة وحيف شجر بليلة وحشة گالت
أم عفريت: راح ترتوي مِـنْ الــدم
- رفعت راسي عليها گلبي يرجف، توسعت أبتسامتها لحد ما بانت سنونها الصفر وكملت
أم عفريت: وساعتها ما يطفي نـارج لا نوح ولا نَـدم .
- يتبع ..
