رواية كف الطاغية الفصل الثاني 2 بقلم سارة الحسن
- أحس النفس ضاگ من الخوف
واني مركزة بحركة شفايفها المتجعدة
وهيَّ تحجيلي على المصايب الـراح تصير بسببي!
المصيبة صارت مصيبتين وفزيت جفلانة
أحس گلبي على لحظة يوكف من سمعت
صوت خَطاب صاح بيه بغضب!
خَطاب: زُبيـــــــــدة !!
126
- درت راسي عليه بساع عيونة بگصتة يباوع لـ ام عفريت
خازرهــا ، أشر بأيدة أروحــلة بدون لا يباوعلي وبقت
عينة بعين أم عفريت هنيال گلبة ما فززتة نظراتها التخوف!
بقت تباوعلة مبتسمة واني ركضت وكفت ورة ظهرة
متحامية بي منها عبالك شو شراح تسويلي ،
أشرلها بأيدة اليسرى على
حَـد يوضحلها الحَـد الفاصل البستان مالتنّا
عن بستان بيت شبلي جان مثل النهر الصغير وگاللها
خَطاب: أنتِ وشَرج حــدج هالنهر، كاعنّا ممنوع تدوسها رجلج
86
- ضِحكَت بصوت خشن ومبحوح وصارت اجتافها تنتفض من ضحكتها، حركت راسها بهدوء وكل حركاتها بطيئة تخليك حابس نفسك حتى تعرف شتريد تسوي! اندارت على جهة الخُضرة بينها وبينهن خطوتين تقربت عليهن ودنگت ساندة حيلها على عگازتها أخذت منهن بأيدهــا ومشت تريد تطلع من البستان مالتنّا ، من وصلت النهر ألتفتت علينا انـي بساع ضميت روحي ورة خَطاب وطلعت بس عيني اباوعلها، راحت أبتسامتها وتحولت نظراتها لنظرات شر هيَّ وتباوع لـ خَطاب!
125
- دارت وجهها ومشت وهو بقى واكف بمكانة عينة بعينها يباوعلها بنفس النظرات، من أبتعدت أندار علــيَّ ينتر بيه بصوت ناصي
خَطاب: شجابج هنـــاا؟؟؟
- بلعت ريگي اباوع بوجهة ساكتة نسيت شلون أحچي من الخوف رد صاح بيه يريدني احچي، مسحت حاجبي بگُفى أيدي متوترة وصوتي كوة ينسمع
زُبيــدة: أنطيني مجال افكر شجاوبك
79
- لزمني من ذراعي يعتعت بيه دفر باب بيتنّا الصغيرة ودفعني مطببني للبيت واني افكر شلون ألطشها؟؟ دخيلك يا ابو الحسنين وين انطي وجهي شگول؟ وكف گدامي حاجبة ملزوك بشعرة من كثر ما رافعة ويأشرلي براسة احسه ما يگول احچي عيونة تگول يالله جذبي أسمعج، تذكرت أمـي وماعندي حل غير أذبها براسها وبساع گتلة
زُبيــدة: مو أمـي حامــل وتريد تُكي
- تقربت عليه أأشرلة بأيدي واشرحلة واهم شي احچي بصوت ناصي عود هالحچي بيناتنّا وحتى محد يسمع
زُبيــدة: باوع مو هيَّ بعدها ما متأكدة وبنفس الوقت مستحية يعني المفروض هسه مزوجة ولدها وهمه الدا يخلفون بس بعد هذا نصيب شنسوي ، لا تسولف وتگول عرفت خطية تستحي
88
- احچي بدون ما أنطي مجال، ينگطع نفسي يلا اسكت رفعت راسي اباوع بوجهة وسألتة
زُبيــدة: وضحت؟
25
- رد رفع حاجبة احسة ما مقتنع وگال
خَطاب: ووينة التُكي لعد؟
- قوست حلگي فاتحة أديّة منا ومنا عايشة الدور
زُبيــدة: ما لحگت أجيبلهااا أجتني هااااي أم عفريت يبست الدم بعروگي الله وكيلك
48
- مديت أيدي بيني وبينة رجفتها
زُبيــدة: هاااك شوف لهسه ارجف منها
39
- أخذ نفس عميق وهو يباوعلي احسه دا يشوف الچذب بعيوني بس ماعندة دليل، رجع أديه ورة ظهرة وگال
خَطاب: وإذا طلعتي دا تچذبين؟
- بعدني ما فگيت حلكي هو كمل بساع مسكتني
خَطاب: انصب حبل مشنقتج بالتُكية متفقين؟
100
- هزيت راسي أي وبلعت ريگي بخوف منه احس جبيني صار يتعرق صدگ أخاف منه لأن هو مو أعقل من زبير الخبل
زُبيــدة: أچذب عليك؟ هو اني أخاف منك أكثر من ام عفريت تريد أچذب عليك إله ما عندي عقل
74
- سكت ما مقتنع بس أنقهر على حالتـي راح يوگف گلبي! مبين على وجهي اعراض الجلطة، سألني على امي وين؟ گتلة ببيت ام غايب هز راسة خوش وطلع من الباب الصغيرة، لزمت گلبي بثنين أديّة وكعدت بالگاع حيلي مهدود من الهبطة
زُبيــدة: الحَمـدُ لله الذي أنجانّا وأغرق فرعون
126
- بعدني بس خلصت حچايتي رد اندفر الباب حيل حسيتة رگع گلبي بدفرتة مو الباب ، وكفت حتى حيلي بسااع عبالك ملك الموت فايت علــيَّ .. رجـع تقرب وكف گدامي يسأل
خَطاب: شگالتلج أم عفريت؟؟
73
زُبيــدة: منـ.. منـي أم .. أم عفريت؟
- أمتمت من الخوف وهو عاط بيه حتى الشياطين الملتمة علينّا المغربية انهزمت خايفة من صوتة! فزيت اطك سن بسن ورجعت خطوة لورة صرت أشوفة طنطل مو خَطاب مادري شبي؟ بلعت ريگي ناشف وهمست
زُبيــدة: بس شسمة گالت راح نسگي التُكية دم
54
- بقى يباوعلي بنظرات غريبة عيونة تريد تطلع من مكانها! مصدوم؟ ما مستوعب؟ بي شي؟ يعرف شي اني ماعرفة؟ مدا أفتهم حالتة، دنگ فرك وجهة بجف أيدة و رد باوعلي يحذرني بطريقة مخيفة
خَطاب: الراح احچي تخلينة ترجية بأذنج للممات، ذبحج يصير على أيدي إذا بيوم سمعت حاجية وياها لو رايدة شي منها ويا ويلج أشوفج واصلة بيتها وحگ اللّٰــه ورسوله ادفنچ بگاعج
93
- هزيت راسي أي اكثر من مرة واحس راح يغمى علــيَّ من الخوف والتفكير وأول شي إجة على بالـي رند! رد عافني وطلع أنداريت اريد أرجع للبيت لگيت أُميمة وغازي واكفين يباعون علينّا، مشيت متقربة منهم وأديَّة عاصرة طرف عبايتي بگل قوتي .. تجاهلت كل اسئلتهم؟ شكو وشصاير؟ وشبي خطاب؟ وسألتهم
زُبيــدة: ليش تكرهون أم عفريت؟ اني أخاف منها شكلها يخوفني بس ما أتذكر مسوية شي هيَّ
30
- أُميمة بقت تبلعم وغـازي گلب خلقتة وگال
غازي: هاي غضب ولعنة تطيح حظ كلمن يتقربلها، وحـدة سحارة ودجالة وتحجي حچي فارغ
63
أُميمة: يـا حچي فارغ؟ أصلًا يگولون كلشي تحچي يصير صدك
54
- حسيت رجلية بعد ما تشيلني اني شسويت بروحي؟ إذا واحد مات بسببي شلون أعيش؟ والله الموت أهــون، بقيت حَسبة تجيبني وحسبة توديني وحايرة ومحتارة ما أعرف شسوي .. عفتهم ومشيت لگيت جديتي بدرية كاعدة بالهول كعدت يمها ساكتة وراسي يريد ينفجر من التفكير .. لحد ما طب أبوية وياه أمي وخَطاب هم .. وكف بنص الحوش يكُف ردان الدشداشة مصعدها لفوك العكس يريد يتوضى وأسمعة يگللهم
أسماعيل: هاي البنية الجانت تتعارك ويَّ زُبيــدة يگولون ماكو ما راجعة للبيت ورة المدرسة ومن العصر أهلها يدورون عليها
119
حَفصة: يــاا وين راحت؟
- رفع حواجبة مايدري وگاللها
أسماعيل: الله اليعلم ، والنـاس بدت تعلج بسمعتها بدون لا يفتهمون حالها .. الله يعين گلب أهلها
55
- مغصتني بطنــي من سمعت حچية، أروح احچيلهم؟ يذبحونـي والله وحتصير مشاكل بين أهلي وأهلها، وخَطاب؟ شيخلصني منه؟ هــذا إذا عصب مثل نار بنص گصب يابس النهرين ما تطفي بعــد ولو يذبحني لو يذبحني!
45
- مابقى عنــدي غيــر حَل واحــد! گمت من مكاني طلعت على غـازي فارش مصلايتة بنص الحوش ويصيلي .. أبوية وخَطاب توضوا وفاتوا للهول .. باوعت بوجه أمي خزرتنـي وضامتلي ضميمة بس ماتكدر تحچي هسه، مشيت كعدت يم غـازي لما كمل أول فَـرض وباوعلي يضحك
غـازي: شو وجهج أصفر؟ شمسوية بيج أم عفريت
33
- باوعت بعيونة ودنگت احچي بصوت ناصي
زُبيــدة: باوع اكلك شي بيناتنّا
غـازي: سرج بگهوة احچي
47
- رديت باوعتلة بعتب واريد أبچي ضحك وكفخني على راسي
غـازي: احچي لا تخافين ما تطلع
16
- خفت احچيلة صح هو حنين وحباب ويمكن يطمطملي مرات بس بهاي مادري شيسوي؟ ترددت وغيرت الموضوع وأختاريت غير طريق
زُبيــدة: باوع أخذ حصة من عشانّا وخلّ نروح نتعشة يم عمتي أم غايب اني وياك
32
غـازي: خـوش بس اكمل صلاتي
8
- هزيت راسي وگمت من يمة مشيت للمطبخ گلت لـ جيداء تخليلها حصة على جهة ورحت لأمي اكللها اريد أروح، باوعتلي مدري شبيها وگالت
حَفصة: گولي لأبوج
- درت وجهي على أبوية بعده يصلي ، بقيت واكفة لما كمل ورفع راسة علــيَّ
أسماعيل: روحــي يابة
24
- أخذت حصتها وطلعت على غـازي رحنالها سوة، تلگتنّا من الباب تهلي بينّا .. غـازي كعد بالصالة وانـي طبيت للمطبخ احط الاكل بالصينية وأطلع وياه خبز وهيَّ هم جانت مسوية جمعتهن ووكفت بالمطبخ صحت عليها، إجتني الضحكة مرسومة على وجهها فرحانة بجيتنّا بس صدمتها من گتلها بدون مقدمات
زُبيــدة: سويت مصيبة عمة وأحتـاج معجزة حتى أطلع منها
39
- بقت صافنة بوجهي مصدومة واني بساع بساع خرطت الأول والتالي بدون لا أخذ نفس، مصيبة وطاحت على روسنّا لطمت على خدها تحچي بهمس حتى لا يسمع غـازي
أم غايب: صخاااام الصخمج زُبيــدة ولــج يمة شفرقج عنهاااا؟؟ هاي وراهــا دم شلون تسوين هيج؟
42
زُبيــدة: حرگت دمي عمة وتهورت، طلعيني منها وبعد ماعيدها وحگ راس الحسين
15
أم غايب: هم عايزة يمة هم عايزة تعيدينها لگص راسج وأنعل سلفة سلفاج على هالعرامة
29
- سكتت شكدر احچي؟ عايلة من السماء للگاع ومصيبتي ما تتلطش! بقت تفتر بالمطبخ حايرة ومحتارة منين ما تصفنلها خربانة وتشوف صورة أخوتي وهمة يذبحوني على هالدكة! فلت شيلتها وردت تلف بيها من الحيرة وگالت
أم غايب: ماكو غير غـازي يساعدج ويطمطم مصيبتج
25
زُبيــدة: اخاف عمة والله خاف يتحول طنطل مثل خَطاب
25
- ضربتني على أيدي حيل ميتة قهر من دگتي
أم غايب: خلّ يطيح حظج بلكت تعقلين
9
- اشرتلي اشيل الصينية ونطلع يمة لأن كام يصيح "وين صرتن"؟ .. اخذتها وطلعت عليه حطيتها گدامة وكعدنّا هو ياكل مندمج وعمتي أم غايب تخزر بيه يعني أحچيلة .. ما گدرت اكمل لفتي من التوتر وحطيتها بالصينية مادري منين أبدي
زُبيــدة: غازي اكلك على شغلة وتضمها ما تفضحني؟
8
- باوعلي يلوج باللگمة وهز راسة أي ، تربعت اريد نبضات گلبي تستقر وگتلة
زُبيــدة: شوف مو يگولون هاي رنـد ماكو وأهلها دا يدورون عليها فَـ اني أتوقع يعني بس هو مجرد توقع أنحبست بحمامات المدرسة لأن هيَّ تحب تترتب قبل لا تطلع والبيبان مالت الحمام مرات يحشرن شكد صايرة وبنات خطية درس ودرسين يبقن محبوسات بيها فَـ أنتَ روح شوف أخوانها وگللهم يمكن هناك تطلع
70
- ضيگ عيونة علــيَّ يسأل بشك
غـازي: مجرد توقع لـو ...؟؟
38
زُبيــدة: اي اي بس لا تگول انــي جبت طاري هالتوقع، لأن اكرهها وماريد أساعدها ولا أريدها تدري اني التوقعت هالتوقع ونقذتها
20
أم غايب: أي يمة بلكت تطلع حجايتها صدك وأنتَ هم إلك أجر
1
- صفن بوجهي صفنة طويلة بين مقتنع وبين ما مقتنع، ابتسمت بوجهة گوة حتى أخفي توتري الراح يفضحني
زُبيــدة: أثنينّا إلنـّا أجـر حتى نطب الجنة سوة
48
- بقى الشك بداخلة بــس وافق حتى لو حَس أو عرف سويت مصيبة اني هم حس لازم يخلصني منها ، گام طلع حتى ما خَلص عشة وبقت عمتي أم غايب ترزل بيه واني ساكتة .. عزلت الصينية وگالت أمشي نروح يم أهلج .. رحنّا يمهم وانـي كاعدة على نار بس أنتظر غـازي يرجع الدقايق صارت ما تمشي .. عفتهم يسولفون وگمت طبيت للغرفة اباوع للساعة و أُميمة تسأل شبيج؟ رفعت أيدي أأشر بأصبعي ويَّ ميل الساعة
زُبيــدة: إذا أفر الميل بأصبعي الوكت هم يركض مثل ركضتة؟
24
أُميمة: لا بس تهجمين الساعة
46
- سكتت وكعدت اكل بلحم أظافري لما رجع غـازي ، مشيت كعدت على عتبة باب الغرفة وهو كعد يم أهلــي وعمتي أم غايب .. سألوه وين جان گاللهم طالع بشغلة رد أبوية سألة إذا سمع أخبار عن رند؟ هز راسة أي وگال
غـازي: يگولون لاگينها متخربطة بحمامات المَدرسة
- ألتفت علــيَّ احسة كاشفني و رد باوع لأهلي مكمل كلامة
غـازي: بـس بعديش؟ صارت علج بحلوگ العالــم ناس يگولون منهزمة وتلاحگوها ونـاس تگول الله أعلم وين جانت وبعد تعرف العالم لا شغلة ولا عملة غيـر القال والقيل
82
- جيـداء طلعت من المطبخ سامعة سوالفهم، شايلة صينية أستكانات الچاي حطتها بيناتهم وگالت
جيـداء: جابت عمرها تحچي علينّا وتطعن بشرفنّا بلكت تتوب عــاد
15
- زفرت نفس براحــة الحَمـدُ لله عايشة وما ماتت، غمضت عيوني هسه يلا ردت روحـي ومن فَتَحِت صارت عيني بعين خَطاب، جــان متمدد ومخلي أيدة على عيونة من سمع بالسالفة كعد على حيلة يباوعلي مضيگ عيونة!
174
- درت وجهي مسوية روحـي مندمجة بسوالف أهلي، لما راحت عمتي أم غايب وأهلي كلمن راح لمكانة ينامون من وكت .. غـازي واكف بالحـوش وصاح علــيَّ طلعت عليه بساع، لزمني من ملابسي يعتعت بيه روحة بخشمة
غـازي: گلتيلي توقع مــوو؟؟ لـج زُبيــدة تردين تمشينها علــيَّ؟
39
زُبيــدة: اي اي شبيك هيج تعتعت بيه
2
غـازي: تدرين إذا احچي لأهلي هسه شيصير بيج؟
- دفعت أيدة عني بهذل حالـي وهو يجرجر بالدشداشة، نترت بي بهمس
زُبيــدة: واذا اني حچيتلهم وگتلهم غـازي يدخن بالسر شيصير بيك؟
85
- تخبل علــيَّ شلون أهددة ورجـع لزمني من ملابسي خضني خض دمي صار رغوة ويدردم ويغلط ويتهدد علــيَّ
غـازي: راح اسكت هالَمرة بس أدعي ربج هيَّ هم تسكت وما تفتن عليج بس تصحىٰ
16
زُبيــدة: الكل حيعرف بيها چذابة وتريد تطمطم سالفتها براسي ومالگت غيري لان أحْنـا على طول مشاحن يعني محد راح يصدگها بـس كون أنتو ما تنطون بيه
23
- فزينّا أثنينّا على صوت خَطاب ورانّا يسأل
خَطاب: خيــر؟ شبيكم؟
78
- أبتسم غـازي مخلي أيدة على جتفي ودارني على خطاب بساع أبتسمت حتى أبين طبيعية وهو گالة
غـازي: ماكو شي دانسولف
3
- رفع حاجبة ومن يرفعة يقلقني يعيشني برعب، عيونة أفترت بيناتنا ما مقتنع مبين بـس ما لَح .. باوع لـ غـازي يسأل
خَطاب: هاي البنية متخربطة لو حاشرة لو شنو سالفتها؟
48
غـازي: اي يگولون الباب هاي دائمـًا تحشر
5
- هز راسة خوش وبقى واكف برا، انـي وغـازي مشينّا نريد ندخل للبيت وهو گاللنّا نصيح على أُميمة .. رحت ركض مددت بفراشي وگتلها خَطاب يصيحلج .. غمضت عيوني أريد أنـام بساع وأنسى الصار كله، لحگتني رند لأحــلامي سوت النومة علــيَّ سِـم وبيـن ضجة أحلامـي صرت أسمع هوسة حَقيقية ورَمـي فوگ بيتنّا! فزيت مخترعة على صوت البنات يتعايطن وكفت على حيلي ما متسوعبة شكو وأنسحبت من أيدي بقــوة رجعت وكعت بفراشي شفتها أُميمة السحبتني تخاف لا يلوحني شي !
95
- صياح الولـــد يضرب بالــراس ومن بينهم طلع خَطاب بأيدة التفكة! طلع أبوية يركض وراه ويصيح عليه بخوف
أسماعيل: أرجــع ولك خَطاااااب
71
- صار الرمـي من كل جهة مدا نفتهم منو دا يرمــي على منو! صارت ليلة سودة ومرعبة، من وكف صوت الرمــي أسمع صوت خَطاب يصيح مادري على منو متخبـــل خبال
خَطاب: لك شسوووويت أنتَ؟؟؟
29
- طلعت امي تركض وأحْنـا كلنّا طلعنّا نريد نفتهم شصااار؟ أخـو رنـد الصغير واكف گدام بيتنّا ويرمـي على البيت وما بطل رَمي إلا من عـدنان ضاربة ومصوبة بأيدة! شهگت من شفتة طايح بالگاع وأخوتة البقية ملتمين عليه وكل هـذا وعَـدنان متخبل يريد يرجع يذبحة گوة خَطاب وغـازي وأخوه عايد لازمينة .. ألتمت النـاس عليهم وأهل رنـد البقية أجوا يتراكضون وأسمع واحد من اخوانها البقية يصيح على أهلي يگللهم
::- بتكم الحااابستهااا تريد تفضح وتطين سمعتها مثل سمعتكم الخاااايسة
92
- عـدنان سحب أقسام يريد يرجع يرمي بالشافعات أخذوها منه وصار يرعد عليهم
عـدنان: لك خسيييييس أشرب من دمك إذااا تجيب طاريهن على لسااانك ناااقص، روح شوف أختك وين جاااانت وشتسوي بعدين تعال احچي على بنااات الناااس
64
- ردوا تمالخوا بالحچي وصارت عرگة بين ولدهم ولدنّا هذولاك هوايَّ كل أثنين لو تلاثة ملتمين على واحـد من ولدنّا .. الزلم الكبار ضلوا يتصايحون ويردون يفازعونهم ما يگدرون ، ومن بين هالهوسة كلها شفت زبيـر إجة يركض مادري وين جان طب بيناتهم بأيدة توثية وويــن اليوجع گام مااا يشوف دربـة ياهو اليطلع كدامة يضربة توثية على راسة يكومة بالگاع .
294
- مثل المصراع يفتر بيناتهم ما وكف غير من ضرب واحــد وولدنّا كلها عاطت بي لااا! طلع ضارب معن مخلي دمة بطولة
260
- غير يتوب؟ ما تاب عبالك هذولاك الليّ ضربوا معن مو هو ورجع عليهم فرهم فر ، ما فاككوهم إلا بالشافعات وعلى صوت سلاح أبو بكرة يلا فضت هالعركة، وكف بين الطرفين مدري يريد يحلها مدري يريد يستفزهم يگللهم
أبـو بكرة: ولد شوارع صايـرين لو شني فتيلتكم؟
133
- هذولاك رجعوا يحچون ويصيحون يگلولة بنتهم حابسة بنيتنّا بالحمامات تريد تموتها، رجلية مـا عاد تشيلني كعدت بالگاع وامي واكفة بالباب تدك وتلطم ملخت روحها .. ألتفت أبو بكرة على ولدنّا يسألهم بهدوء
أبـو بكرة: صدك هالحچي؟
42
- راد يجاوبة عمـي كامـل بس زبيـر ما أنطاه مجال وطلع من بين الولد ينتر بي
زبيـر: وياهي مالتــــك أنتَ؟ صايــر قاضي وماندري؟
113
- أبتسم حَمد بأستهزاء والمسدس يفتر بأصبعة
أبـو بكرة: هـم صدك سوالف زعاطيط شجابني عليها
116
- عافهم ومشى، وأهـل رنــد شالوا أبنهم الليّ ضربة عدنان ومشوا والبقية بقوا يتوعدولنّا ويحلفون ما تعدي على خيـر ! خَطاب كاعد يم معن يشوف جرحة وكومة وياه طببة للبيت وضمدوا بالبيت ما أخذوه للمستشفى أبوية ما خلاهم يخاف يتعاركون هنــاك .
12
- وكفوا بالحوش عمي و ولدة وأبوية واخوانـي مهوسين ناس ترفع ناس تكبس إلا خَطاب ساكت محضرلهم المصيبة الجبيرة وهيَّ ذبحي ، اني ما ضل عندي حيل كعدت بالهول وجهي أصفر وحلگي يبس أريد احچي بعد ما گدر ميلت راسي اريد أسندة على الحايط ووكعت جفي على وجهي كل أطرافي ميتة
58
- أنخبصوا بيه امي والبنات وجدتي وعمتي أم غايب هم إجت يمنّا ورة هالهوسة يغسلن بوجهي ويفركن برجلية وادية ، انـي صاحية أسمع وأشوف بس ماكدر أتحرك ، عمتي أم غايب حاطة راسي بحضنها تمسح بوجهي ودنگت باستني من گصتي وهمستلي
أم غايب: اذا يجيبون رنـد تحلف على القرآن أنتِ أبقي انكري
79
- ويــن يلا صَحصحت وكعدت يم باب الهول
أسمع سوالفهم بالحــوش عدنـان يگللهم
عدنان: لا تطولونها وهيَّ گصيرة، إذا صدك واذا جذب بكل الحالات الموضوع جذب وأفتراء من بتهم وخلص
34
كامـل: شو ماخذ الموضوع تعربط؟؟؟
26
عدنان: لو محترمين روحهم وجايين داكين الباب وگايلين يابة بتكم حابسة بنتنّا جان ذبحتلهم زُبيــدة جوة رجليهم ، بس يجون هيج يرمون ويعلمون علينّا؟ يخسووووون وحگ الحگ أطين عيشتهم والصواب انوبة بگلب اليطلع منهم
97
- ولدنّا صفوا ويَّ عدنان بالحچي، صاح بيهم أبوية گاللهم
اسماعيل: كوموا أدفنوا السلاح هسه ماتحسون إلا والشرطة فوك راسنّا
15
- كام غـازي وعادل ووياهم عايد اخو عدنان لفوهن بنايلون وحفرولهن جوة الحايط طموهن ورشوا مكانهن ، ومثــل ما گال أبوية ما حسينّا إلا وسيارات الشرطة بالباب .. اخذوا عدنان وخَطاب، ورادوا زبيـر هم ما لگوه بالبيت، گال الشرطي لعمي كامل
::- خلّ يسلم روحة حتى تهدأ مشاكلكم لما تحلونها بيناتكم
30
كامل: دور عليه واخذنة أحْنـا مالنّا علاقة بي
- حجاها متنرفز من طاري عبالك واحد غريب مو ابن أخوه
54
- نتفتني امي بگرصة خلتني اشهك شهگة طلعت روحي وياها، سحلتني وياها للغرفة تملخ بروحها حسيتها راح تنجلط من الهبطة
حَفصة: حبستيها صدك ولج زُبيــدة؟
- ضربتني على راسي حيل مفرفحة
زُبيــدة: مااكــوو عقل هناااا؟ ما تفكرين بس بالمصايب؟؟ اخوتج واهلج ما يهمونج روحــج هم مــااا تهمج؟؟ يذبحوووونج وما اكدر افك حلگي ولج شسوي بيج شسوي؟؟
44
- دنگت راسي أبچي وهيَّ تفتر بالغرفة وتلطم على روحها ماتدري شتسوي من القهر والحيرة، فاتت علينّا أم غايب تحچي وياها بصوت ناصي
أم غايب: خابري خالها خلّ يجي بس هو اليحميها من غضبهم
31
- ماعدها غير حل بساع صاحت على أميمة تجيبلها تلفون أبوية وخابرت على خالــي بنص هالليل تگله زُبيــدة مسوية مصيبة وتعال خلصها من أهلها لو يذبحونها، عمتي أم غايب مارضت تگللها
أم غايب: ليش هيج تخبلين الزلمة ولج حَفصة
17
- سكتت امي وكعدت على جهة ضامة وجهة بجف أيدها وبچت، أبوية وعمي مادري وين طلعوا ورة نص ساعة تقريبًا رجعوا وصاح عليه عمي كامل متعصب كالتلي عمتي كومي أطلعي هزيت راسي رافضة، سحبتني من أيدي وطلعت ويايَّ ، إجة علــيَّ يرعد غـازي ركض صار بيناتنّا يگلة
غـازي: مالها علاقة زُبيــدة
40
كامـل: ماكووو دخاااان بدووون نار شمعنى من بين كل البناويت اتهمت زُبيــدة؟
- التفت على أبوية يلومة ويكلة
كامـل: من جنت اكلك بنيتك جيبها جوة جنحك حتى تربيها عدل تگلي لااا خالها ما يقصر؟ هيَّ هاي تربيتة؟
37
- خفق گلبي بقوة من سمعت صوت خالــي صاح عليه من ورة باب الحوش بعصبية
حكمت: تخسى وتعگب، مااا عــااش اليجيب طاااري تربيتي أبـو عدنـان
200
- ركض عـادل فتحلة الباب وهو طب العگال على راسـة وسبحتة ملفوفة على أيـدة ووراه أبنة "صهيب" عيونة دورتني بين الواكفين من شافني بعدني عايشة زفر نفس براحة وگال لعمي
صهيب: إذا مستثگلين مصايبها نردها يمنّا أحْنـا ما نستثگلهن
356
حكمت: والله اليمس شعره منها حز نحرة على أيدي
66
كامـل: أفتهم شمسوية من مصيبة بعدين احچي أبو صهيب
- صوت صياحهم كوم الدنيا وكعدها بالتواسيل أبوية خلاهم يطبون يكعدون بالـهول حتى يفتهمون السالفة
13
- بقيت خاتلة بظهر غـازي اني، إجة صهيب علينّا يأشر على غـازي
ويحچي بصوت ناصي
صهيب: يذبحونج وهذا التيل محاميج؟ غير أزين شاربة بالنعال
87
غـازي: ضم نعالك للصبح تريك بي
55
- سحبني غـازي طببني للبيت خلة صهيب يضحك وكعد بباب الهول حتى يدخن براحتة، كعدوني كدامهم عبالك بمحكمة وصار أبوية يحچيلهم على سوالف رنـد ويايَّ وشلون تطعن بشرفنّا اني واخواتي وشلون تشكك بعبايتي وكل سوالفها سولفهن .. وعمي كامل ذبح روحة بس يريد يطلعني اني العايلة واني الغلطانة ويگول لأبوية ليش ما حچيتوا ويَّ اهلها وأبوية يحلف حاچاهم لما طفرت روحة وماكو نتيجة .. گاللهم خالي
حكمت: من تحچي بتربيتي يا أبو عدنان ما لگيت حل لعد؟ اني لو جايتني زُبيــدة وگايلتلي خالي هاي البنية هيج وهيج مسوية بيه اكوم الدنيا واكعدها على راس اليغثها
72
- عمي يصيح ويمتمت بالحچي يضيع فشلتة
كامل: الله وكيلك اني هذا الحچي كله مادري بي محد گالــي غير هسه
41
حكمت: وهسه صار عندك علم بي، باجـر نكعدهم للحگ ونلم عليهم عشاير الصوبين لان لو سكتنّا راح يتغدون بينّا گبل لا نتعشة بيهم
26
- ألتفتت على صوت الجداحة الليّ شعلها صهيب حتى يورث جگارتة المادري شكد وكاللهم
صهيب: أي هاهيَّ وبشر الفاضح بالفضيحة
102
غـازي: مو جانت بشر القاتل بالقتل؟
- هز راسة أي ماخذ نفس من الجگارة
صهيب: المعنى واحد، اليكتل ينكتل، اليفضح ينفضح، اليبوك ينباگ وهيج
90
- أتفقوا باجر يدزون عليهم شيوخ العشيرة حتى تنتهي هالسالفة وما تروح إلنا خساير لا هم قليلين شر ولا ولدنّا . عمي كامـل مشى لبيتة هو وأبنة عايـد وبقى خالــي كاعد أشرلي أروحلة كعدت يمة حضني وباس راسي مبتسم
حكمت: لا تخافين بنيتي والله أسويها حرب علمودج واگص لسان اليحاجيج لو يحچي عليج
85
- معن متمدد راسة مضمد وگالة
معن: هو أنتَ رجعتها متفرعنة علينّا، عدنّا بنات اثنين غيرها وحدتهن گملّة إلا هيَّ
68
- ضحكت خالي يسألة
حكمت: راسك انفتح بالعركة؟
معن: ياريت خالـي بس هذا أبن عمي الفتح راسي، زبير طب يفزع وكلنّا طرحنّا عبالك ضاملنياها ولگاها فرصة
171
- ضحكوا وبقوا يحششون على العركة وامي كاعدة وتبچي شلون خَطاب أنسجن، گام خالــي يريد يرجع لبيتهم همه منطقتهم قريبة علينّا .. باوع لامي يگللها
حكمت: كافــي تبچين ولا تضلين تدردمين على زُبيــدة هم ما أرضاها ترا والله اخذها وشتردون تسون سووا
27
- هزت راسها اي وسكتت، راح هو وصهيب وأبوية رجــع كعد بالهول وصاح علــيَّ كعدني گدامة وأول سؤال جان
أسماعيل: أنتِ الحبستيها صدك؟
- هزيت راسي لا، عاد نفس السؤال وعدت نفس حرگتي رد گال
أسماعيل: شنو مصلحتها تذبها براسج لعد؟
زُبيــدة: هيَّ كل هَمها تفضحنّا وعبالها هيج راح ننفضح
21
- هز راسة وگال
أسماعيل: إذا مو أنتِ الحَمـدُ لله، وإذا أنتِ فَـ يا يابة ماضل فرق بينج وبينها هيَّ شوهت سمعتجن وهسه أنتِ خليتي سيرتها على كل لسان وشوهتي سمعتها
27
زُبيــدة: مو انـي
- صفن بعيوني أحسهم كلهم متأكدين انـي ودا يعيشون بـ حيرة من أردهم بكل ثقة واگللهم مو اني! رَد يهز براسة وگال
أسماعيل: الحَمـدُ لله ، روحـي نامــي
17
- طلعت عمتي أم غايب من غرفة جدتي هيَّ والبنات وگالتلة
أم غايب: راح أخذها يمي تبات لما تفض هالطلابة
12
- ما أعترض بس أمي مارضت خلت عمتي تحچي عليها وگوة أخذتنـي وياهــا .. فتحت باب الهــول وعاطت جفلانة وكفت گلبي بعيطتها وأسمع دبچة وصوت زبيـر يحاچيها
زبيـر: هـــذااا انـي زبيــر لااا تخافين
92
- شغل الضوة ووكف بنص الهول يباوعلها، هيَّ لزمت گلبها تحاچيه بعتب من الهبطة
أم غايب: على حظك عمة ليش هيج فززتنّا
22
- أعتذر منها ورد كعد بمكانة يگللها
زبيـر: الشرطة إجت ومالــي خلگ سجن ومشاكل وهوسة من ورة حموينج، إجيت يمج لأن أدري ما يفوتون لبيتج حدهم يدوروني ببيتنّا وهاهيَّ
42
- هزت راسها خوش وگالتلة حتجيبلة بطانية حتى ينام، هيَّ مشت واني ركضت وراها انضربت بضهرها أندارت علــيَّ مستغربة وتهمس
أم غايب: شبيج؟ الزلمة ياكل؟
30
زُبيــدة: لا بس عنده ثار يمي وخاف يستغل الوضع وياخـذ ثارة
36
- وكفت مخلية اديها على خاصرتها
أم غايب: أنتِ ما تگليلي شنو سالفتج؟ شو متعاركة ويَّ الكل
زُبيــدة: همه مو خوش أوادم
72
- غمتني وراحت ودتلة بطانية وانـي بقيت بغرفتها، أسمعها تحچي وياه بس ما أفتهم شتگلة لحــد ما صاح هو متنرفز وضايج
زبيـر: عمة واليرحم أهلــج لا تجيبيلي طاري هالخااايس
32
- صار هدوء شويَّ وإجت يمي نزعت شيلتها وكعدت محتقنة وضايجة، سألتها شبيج؟ أتنهدت بحــزن وگالت
أم غايب: زبيـر وأبو بكرة وأخوج برهان المتدير ووياهم الشاهين أبن هزبر جانوا أصدقاء واحدهم يتفدى صاحبة بروحة
135
- بقيت صافنة عليها الليّ أعرفة هسه نار وبارود ما يتوالمون أبد! باوعتلي وگملت
أم غايب: تطشروا من أخوج گتــل الشاهين وطب السجن، أبـو بكرة عاداهم علمود أبن عمة وزبيـر صَف ويَّ أخوج
121
زُبيــدة: ليش گتلة؟
- اني سامعة السيرة بس ماعرف الأسباب ، دنگت ايدها تمسح على الحصيرة وگالت
أم غايب: محــد يدري ولا أخوج گال ليش، شحلاتهم جانوا وفجأة بين يـوم وليلة صاروا حَـرب كل يوم متعاركين والديرة تفازعهم وواحدهم يتهدد على الثاني ويحلف يذبحة وأخوج بركان لو أنفجر يحرگ ما يخلي عقبة بدربة
54
زُبيــدة: يعني برهان عصبي أكثر من خطاب؟
- هزت راسها أي
أم غايب: عصبيتة وصلتة يكتل صاحبة وأنتِ أعرفي شكد
45
زُبيــدة: وبرهان لشوكت يبقى متدير؟
- صفنت تحسب بأصابعها لمُدة وگالت
أم غايب: جان ما طاب عمرة الـ18 وطب سجن أحداث لما صار عمرة 18 وتدير مايطب الديرة إلا بالشهر مرة بالختلة يشوف امج وهاهيَّ، بس هسه خلصت سنين عقوبتة ويگدر يرجــع
88
زُبيــدة: ويقبلون بيت شبلي؟
- جرت حسرة تهد الحيل وهزت راسها ماتدري
أم غايب: مادري كون الله يهديهم ويرد بدون مشاكل
31
- هيَّ مددت بفراشها تريد تنام وانـي هم بقيت صافنة بالسگف حسبة تجيبني وحسبة توديني وهوسة براسي مادري شلون راح تصفى .. ألتفتت عليها من گالت
أم غايب: جانوا يفرشون بالبستان ويكعدون يدرسون كلهم سوة يريدون يصيرون ضباط تالي ما صار ضابط غير حَمـد
152
- سكتت مادري شگللها وهيَّ مقهورة شلون هيج تطشروا، واحد جوة التراب وواحد ضاع عمرة بالسجن والثاني صار معقد وكاره كل البشرية، مادري شلون غفيت وما حسيت إلا وعمتي تكعدني الظهر! فزيت جفلانة وعيني بعينها عبالي شو شصاير! أبتسمت وگالت
أم غايب: عدنان وخَطاب طلعوا كومي نروح لأهلج
15
- گمت بساع متلهفة على شوفة خَطاب بس بنفس الوكت خايفة، حطيت عبايتي على راسي ومشيت وراهـا باوعت بالهول زبيـر ماكو بس بطانيتة مسفطها ومخليها على جهة، رفعت عيني على الساعة جانت بـ ١٢:٣٠ الظهر! وصوت سماعات الجامع عالية دا يصلون صلاة الجمعة جماعية .
9
- طبينّا للبيت اني وعمتي جان خالـي وصهيب وعمي كامل وولدة كلهم يمنّا وولدنّا كلهم موجوديـن، أسمع خالــي گاللهم
حكمت: السالفة ونسدت، والحچي الكم كلكم اذا سمعت واحد بيكم مسوي مشكلة وياهم حظة أطيحة
17
- اندار على عدنان يحچي وياه بهدوء
حكمت: وأنتَ يَبعد عمك من تلزم سلاح صلي على محمد وأهل بيتة واستغفر مرتين تلاثة قبل لا تستخدمة مو كل مرة تطلع منها
24
عدنان: على حچيك تخلص العركة واني بعدني واكف ورة الباب أستغفر
186
- أبتسم وباوع لـ خَطاب الليّ واكف على يمنتة اديه ورة ظهرة ومدنگ عينة على رجلية التزيح بالتراب هيج وهيج تحسة واكف على أعصابة
حكمت: وأنتَ بوية ألزم أعصابك إذا تضل هيج نهايتك مثل أخوك الجبير
21
- رفع راسة من شافني أشر علــيَّ يگلة
خَطاب: راح أصير مخنث وعار مثلها وأسكت عن اليدوس على راسي
59
حكمت: وسفة وانــي خالك
3
- ساعة واكف يحچي وياهم يريدهم يهدأون وبعد ما يتعرضون لأهل رنـد وأنتهت السالفة بـ زُبيــدة ما إلها علاقة بسالفة رنـد وخَلص !
مشى خالـي يريد يطلع وصل باب الحوش وباوع لأبوية وعمي گاللهم
حكمت: أرتاحــوا من هالهوسة يومين ثلاث حتى نلتفت لسالفتنّا الجبيرة ونرجع برهـان عاد
64
- كلها گالت أن شاء الله وهو طلع، باوعت على اخواتي وجوهن صفر والخوف مبين على ملامحهن مادري شبيهن بس جان خوفي أكبر لأن انـي أم المصيبة .. عيني على خَطاب طول الوكت يخوفني سكوتة لحد ما طلع خالـي هو إجة يمشي للبيت وكف بباب المطبخ وأندار على أبوية وعمي يگللهم
خَطاب: مدرسة بعد ماكــو لا زُبيــدة ولا جيــداء ولا أُميمة
155
- جيـداء شهگت ولطمت على صدرهـا وعيون الكل صارت عليها شهگتة تشك الگلب! أُميمة بقت صافنة على خَطاب ماطولت ثواني ووكعت بالگاع مغمي عليها خلت امي تتخبل عبالها شو شصار بيها! ومن ذاك اليــوم و أُميمة مارجعت أُميمة القديمة صارت على أقـل شي تجفل وتتخربط حتى إذا واحد يفززهـا بالشقة تتخربط .
102
- الكــل أنخبص بيها ومن جهة أبوية تعارك ويَّ خَطاب ما راضي بــس گال كلمتة بعد والمعروف عنه حچايتة ما تصير اثنين لأن يلعب فلك بينّا .. امي حاضنة راس أُميمة تغسللها وتبچي تريدها بس تفتح عيونها وصوت شهگات جيـداء تدك براسي كل شهگة تشهگها اكول هاي الأخيرة وطلعت روحها وياها ، عمي كامـل لو ما يستحي يوكف بنص الحوش ويركص بجفية من الفرح وبقى يگله كفوووو وما تــلام وزوجهن وأخلص منهن وبرد راسك وهو عاف هالهوسة وطب بغرفة جدتي بدرية بعد ماطلع.
56
- من صحت أُميمة ركضت حاضنة ايد أبوية تبوس بيها وتتوسلة بس كون يقنع خَطاب ويخليها ترجع للمدرسة، اباوع لوجه ابوية ميت قهر حضنها يبوس براسها ويگللها
أسماعيل: ترجعين ترجعين بس لا تبچين بنيتي
27
- دنگت راسي أمسح بدموعي الندم ماكل گلبي اكل بس شيفيد بعد، ومن ورة قرار خَطاب كلها زعلت مني اولهم أمي .. بـس غازي وأبوية وربيع بقوا يحاجوني، الأيــام صارت ما تنجرع أُميمة مريضة وجيـداء 24 ساعة دمعتها بعينها وضايجة لأن بطلوها وامي تطلع قهرها بيه بشغل البيت من تكعد الفجر تكعدني لليل وهيَّ تكفخ بيه هيج وهيج وتدور الزلة علــيَّ حتى تگطع نعالات البيت على ظهري .
64
- كل هذا وانـي ساكتة اگول اني غلطت وخلّ أتحمل نتيجة غلطي، بعد أيــام كعدتني الصبح گالت سوي ريوگ لـ معن وعادل عدهم دوام .. كملت ريوگهم لما بدلوا وحطيت الصينية بالگاع بالمطبخ أجوا كعدوا ومعن يگول لـ عادل
معن: شكد حلوة المدرسة ولك
عادل: جنة الله على الأرض
47
- ادري بيهم يبسمروني واني مغلسة، رد باوعلي كوة ضام ضحكتة يگلي
معن: شلون صار ظهرج؟
- سألتة مستغربة
زُبيــدة: ليش شبي؟
معن: هوايَّ نعالات لعبت عليه هالفترة
50
- ضحكوا اثنينهم وعادل يگلة لا لا اسكت هاي اختك ويصنفون علــيَّ من الفراغ، صبيتلهم چاي وحطيت الاستكانات گدامهم
زُبيــدة: عوفكم مِـنْ ظهري يومين تلاثة ويطيب، بس أنتو شنو وضعكم؟ خستوا بالمدرسة شوكت تطلعون منها؟ مو حتى بَلم الكسالة النايمين بي غرگ
48
- معن سحب مسطرة حديد مِـنْ بين كتبة الليّ يمة
وراد يخوفني وبس يضرب بالهوى، اني رفعت ايدي عبالي
راح يضربني على وجهي وصارت الضربة على گُفى أيدي
شخطها وطلع دمــي، اني شفت الدم لو تخبلت !!
وكفت على حيلي اگمز واعيط بعلو صوتي
زُبيــدة: ولـــج يمةةةةة ولـــــج يمةةة أنشگ وريــــدي أنشگ
67
- أمي والبنات أجن يتراكضن على صوتي وهو بس يريد
يلزمني يشوف شبيها خبلتهم حاضنتها وأعيط انشگ وريدي ،
ما سكتت إلا مِـنْ عاط بيه غازي بعلو صوتة وعت أيدي حيل
يشوفها صدك طالع دم بس مو هواية، انگلب وجهة خطية
صار ما يعرف شيسوي بس يمثل عود ماخايف وهو هادئ،
سحبني كعدني على گدام المبردة صاح بيهم يجيبولة
مي ، وجيـداء ركضت جابت گطن ووصلة قماش من ثوب قديم،
غسلها ولفها ووكف على حيلة يكلي
غـازي: مابيها شي لا تبچين
27
- شهگت ابچي بحرگة مو بس من أيدي
من حچي معن وعادل وزعل باقي أهلي مني،
أسمعة يحاچيني معن بعدم أهتمام يگلي
معن: كلشي مابيج ومو من يرجع أبوية تكعدين تتبجبجين گدامة
40
- ويَّ ما كمل حجايتة أندار عليه غـازي ضربة راشدي فر وجهة فر! حتى معن بقى صافن ما مستوعب .. رفع أصبعة السبابة بوجهة يصيح عليه
غـازي: عبالك ما سمعت سوالفك الخاااايسة؟؟ اريد من الله بعد محاچيها حچاية بعد وحگ الخلقكم حظكم أطيحة، اكطع كل هالنعالات على روسكم
123
- حتى دموعي نشفت من الهبطة بقيت بس صافن عليهم، دنگ معن يبلع بريگة وگاله بصوت محتقن
معن: نشاقة وياها أحْنـا بس ما تنعاد
34
- رجـع للمطبخ أخذ كتبة وطلع من البيت بدون لا يحچي حرف واحد، وعـادل هم أخذ كتبة يريد يطلع وباوع لامي يگللها
عادل: رجعوها يم خالي بس هو يتحملها
107
- عاط بي غـازي محترگ دمة
غـازي: انچب وســـد حلگك عااار
17
- سكت ولحگ، امي أشرتلي على الحوش ضايجة ونترت بيه
حَفصة: كومي اكنسي الحوش خير مابيج شرج معميج
83
- گمت ساكتة غـازي ما قبل أشرلي على الغرفة وگال
غازي: روحي نامي اني اكنسة
97
- بقت عيني تفتر بينه وبين أمي شيخلصني من لسانها الجوّ توتر وحسيت راح تصير مشكلة نوب بين أمي وغازي .. ردت أطلع وجيـداء طفرت گدامي تگللها
جيـداء: أحْنـا مقسمات الشغل واليوم الحوش علــيَّ، زُبيــدة عليها العشا
29
- سكتت عاد واني سويتها صدك ورحت مددت بفراشي شبعت بچي يلا نمت .. مادري شكد نمت وفزيت على دبيچ وصوت ربيــع يصيح بعلوا صوتة
ربيع: طَلع دمـــــةةةة طَلع دمـــــــــةةة
33
- عبالك اني بحلم گمت مِـنْ مكاني اركض بدون حجاب وطلعت أركض وراه البنات لباب الحوش وأسمع صوت عمتي أم زبيــر شايغة روحها وتصيح صيحة المفجوعة
صفية: أمشيةةة عليييييك أم الحسنين يايمةةةة تعوفة، بداعت شبابك تعوفلياه ماعنــــدي غيــــــرة يمةةةة
- صرخت اخير حچايتين بوجع تمرد الگلب
22
- أمي ركضتلها بدون عباية، مديت راسي مِـنْ الباب بساع فاتحة عيني على وسعها بس اريد أشوف شدايصير؟؟ واشوفلك زبيــر وأبو بكرة صاير مذابح بيناتهم! زبيــر وجهة كله دم وبأيدة سچين! وأبو بكرة ببدلتة العسكرية المتربنة وفوك حاجبة مجروح والدم مغطي نص وجهة! واحد لازم الثانــي وواحد منوم سلاحة برگبة الثاني، الشر يطافر مِـنْ عيونهم! وأخر حچاية سمعتها مِـنْ زبيــر يگله
زبيــر: يرجع وحگ غلات الغطاه التراب يرجع، ولونك رجاااال حاجيه لراويك ضيــــم اللّٰــه
65
- عتة ابو بكرة عليه حيل وعيني على سچينة زبيـر النابتة بنحر ابو بكرة جرحتة وسال دم قليل على السچينة وكل هذا هو ما مهتم ويحچي بحقد يريد يفترس زبيــر
أبو بكرة: المخانيث المثلكم ما تكلفني غير طلقتين، واذا ما شاري روحة خلي يرجع ادفنلكياه بصف الگبر المكابلة واخليك تخلص عمرك تولول عليه
96
- دفعة عنه حيـــل كوة زبيــر حافظ على توازنة وبقى واكف، وأبو بكرة فات مِـنْ گدام بيتنّا مِـنْ صار گدامنّا عدل التفت ناحيتنة بس عينة بالگاع وتفل الدم البحلگة ، زبيــر مِـنْ شافة هيج تخبل وويَّ ركضتة عمتي صفية ركضت حضنتة مِـنْ ظهرة تبچي وهو يصيح محترگ دمة
زبيــر: إذا ما فرگت حلكك بالقنـــدرة حيــوااااان
34
- فَلت روحة من بين أديّن عمتي وركض وراه جرة من ياختة وويَّ جرتة أندار حَمد ضرب زبيـر على راسة بنهاية سلاحة! ورجعوا تمالخوا كل ضربة منهم اگول هاي الاخيرة وواحد منهم راح يطلع ميت من هالعركة، مادري منين إجوا غـازي وعدنان طبوا بيناتهم يردون يفازعوهم واثنينهم نـار محد يقبل يهد الثاني إلا من صفوان صاح على أبنة بعصبية
صفوان: لك حَمـــــــــد!!!
56
- من سمع صوت أبوه يلا عاف زبيـر، تقرب عليهم مأشرلة يمشي للبيت وگال لـ زبيـر
صفوان: اني اول الناس ماعندي أعتراض برجعة چتال ابن اخوية بــس الگلوب بعدها حاقدة ورجعت برهـان ما وراهــا غيــر المصايب
28
- مسح حلگة من الدم يهز راسة بوعيد
زبيـر: وأحْنـا أهل لهالمصايب
24
غـازي: أخذتوا حقكم وزايـد، ما ضللكم بعد حگ علينّا
28
- ضيگ عيونة عليهم حسيتة أحتار شلون يفهمهم بس مابي حيل يشرح، هـز راسة خوش ومشى لبيتهم .. العالم كلها ملتمة تباوع والنسوان كلها مادات روسهن من البوب على صوت هوستهم ، زبيـر أخـذ أمة وفات لبيتهم راگع الباب وراه حيـل .. باوعت لـ غـازي راح تمشى على امي حط أيدة على جتافها يمشي وياه بأتجاه بيتنّا وبقى عدنان واكف بمكانة عينة على جيــداء، رفعت راسي باوعتلها عيونها مغورگة !
37
- دنگت وفاتت للبيت من صاروا گدامنّا غازي وأمي .. غازي رفع ايدة حطها بوجهي ودفعني مطببني للبيت يخزر بيه
غـازي: شو بدون حجاب ولج وين كاعدين بديوان أبوج؟
22
- سكتت وأنداريت على جدتي بدرية لزمتها من أيدها مشيتها ويايَّ طبينّا للبيت وكعدت أمي تبچي شايغة روحها تموت إذا ما رجع برهان! غازي كعد بالحوش ضايج والبنات كل وحدة بجهة وربيع مگابل أمي يبوس بيها يگللها
ربيـع: لا تبچين يمة مو اني أنقهر
43
- حضنتة تبوس بوجهة ومسحت دموعها، أُميمة كعدت يمي باوعتلها احك بشعري
زُبيــدة: متعاركين علمود رجعة برهان مو؟
- باوعتلي صفح ودارت وجهها
أُميمة: سوالف عوائل بيناتهم لا تدخلين
113
زُبيــدة: راح اكطع النعال على راسج
4
أُميمة : بيا حَق؟
زُبيــدة: هم سوالف عوائل بيناتنّا
28
- خزرتني ضايجة مني ادري بيها
أُميمة: أنتِ زمالة؟
- رفعت حواجبي لا
زُبيــدة: لا أختها
31
- غمتني وگامت من يمنّا، دقايق وفزينّا على دفرة
الباب وفات أبوية مدخن عيونة بگصتة ،
أبوية ضخم وطويل !!
رافع الدشداشة مخليها بالبجامة
مِـنْ جهة وحدة وطرف بجامتة من جوة مطَين!
وبأيدة كرك كله طين!!
بعده بالحوش فات وراه عمي كامــل يرعد عبالك مزنة
كامــل: أحْنـا كدرنّا نوكف بوجهم بذاك الزمـــن حتى هسه؟؟ ولك اسمااااعيــــل لا تطير رگابنة
52
- ألتفت عليه أبوية وضرب الكرك نبتة بالگاع يصيح محترگ گلبة
أسماعيل: جان الحگ وياهم وأخذوا حگهم وزايد
9
كامـل: أحْنـا نــاس فقرة مو گد بيت شبلي الما يخافون اللّٰــه ، إذا رويحت وليدك عزيزة عليك لا تخلي يرجع خلي متعلم على عيشتة العايشها
34
أسماعيل: اليعيش بغير ديرتة طول عمرة يضل غريب
25
- بقى عمي يحچي ويدردم ما راضي
ومن بقى أبوية ساكت عمي دار وجهة وطلع ،
تمشى أبوية محني الظهر كعد على عتبة باب المطبخ وكلنّا واكفين
نباوعلة وميتين قهر شلون هو مقهور! سحب شماغة مِـنْ
جتفة غطى بي وجهة وبچة!! باوعت لأمي بساع مصدومة
اول مرة أشوف أبوية يبچي وهيَّ على وكفتها ساندة
ظهرها على الحايط ومخلية طرف شالها على حلگها وهم
تبچي ، مِـنْ الوجع الصاب گلبي ما گدرت احچي حرف
والدموع ترست عيوني اختنگت بعبرتي اذا أهلي بچوا
معناها السالفة چبيرة ! محد تقربلهم بس أُميمة
راحت حضنت أبوية تبچي وياه وهو بچة بصوت عالي مكسور .
58
- هذاك اليوم عشناه وعبالك عدنّا فاتحة،
كلها محتقنة وما واحد يحچي ويَّ الثاني إلا ربيع
يفتر علينّا واحد واحد يبوس بينّا
هالولد أحن ولد بالدنيا "مصاب بمتلازمة داون" .
345
- المغرب كلش أندگت الباب وطلع غـازي فتحها ثواني ورجع صاح علــيَّ گال
غـازي: هاي صاحبتج بالباب
31
- طلعت أركض عرفتها فاتن ماعندي صديقة غيرها، سحبت الباب وهيَّ بس لمحتني فاتت بساع حضنتني كل قوتها
فاتن: والله أنتِ فد وحدة خاااايسة ليش هيج منو گبر لفج، مو گتلج اطيح حظها بالحَلة ليش تتصرفين من راسج
11
زُبيــدة: لا تهيجين مواجعي هسه
- ابتعدت عني تضحك
فاتـن: بس أبشرج رنـد العار هم أهلها بطلوها، الناس ما مصدكة هيَّ جانت صدك محبوسة كلها تگول انهزمت وتلاحگوها
30
- فريت ايدي وغيرت الموضوع ماريد أسمع بطاريها، ردتها تفوت ماقبلت بقت واكفة يمي شوية وراحت .. إجة غـازي يمي سألني بهمس
غـازي: هاي صاحبتج هم مشكلجية مثلج؟
157
- باوعتلة عود مصدومة
زُبيــدة: منو فاتـن؟
- هز راسة أي ، أشرتلة بايدي لا لا
زُبيــدة: ابد ابد أصلًا أفقر بنية بالدنيا هيَّ فاتن
55
- سكت ما عَلق ولا حجة شي، سألتة على خَطاب ماكو اليوم گال عندة شغل .. محد قبل ياكل على العشة وكلهم ناموا من وكت ضايجين، إلا انـي بقيت أحوس بفراشي لما صارت تقريبًا بالوحدة وسمعت باب الحوش أنفتحت ونطبگت عرفت خَطاب رجع، گمت طلعت عليه لگيتة كاعد على الحوض يغسل ، رجعت أخذتلة خاولي وطلعت وكفت وراه لما خلص غسول مديتلة الخاولي ما باوعلي ولا أهتم لوجودي عبالك مدا يشوفني!! نشف أديه بهدومة ومشى يريد يطب للبيت صحت وراه العبرة خانگتني
زُبيــدة: راضيني عليك الله
64
- أندار علــيَّ رافع حاجبة من صلافتي، باوع لأيدي شافها ملفوفة وسأل بحدة
خَطاب: شبيها؟
زُبيــدة: أنفجر وريدي
خَطاب: السبب؟
زُبيــدة: من القهر، بعد يومين تلگى حتى گلبي منفجر وميتة ما أتحمل زعلك
81
- بقى يباوع بوجهــي السواد الجوة عينة أسود من ظلام الليل، مبين عليه التعب .. زفر نفس بحسرة ودار وجهة فايت للبيت من باب المطبخ بقيت أمشي وراه ساكتة بلگت ينكسر گلبة علــيَّ ، شفتة فات لغرفة جدتـي بدرية طلع من بوفية النضد صندوگ خشب فتحة ومادري شطلع من جيبة حطة بي ورد قفلة ورجعة لمكانة!!
38
- رجع للمطبخ شرب مي ودگ تلفونة، طلعة من جيبة باوع بالأسم ورد طلع بالحوش مجاوبة
خَطاب: يا هـلا .. هسه طبيت البيت
- سكت شويَّ يسمع الطرف الثاني ، فرگ وجهة بتعب وگالة
خَطاب: جاييك
21
- ورد طلع من البيت .. رجعت انــي لفراشي غمضت عيوني أريد أنــام مَرت عشر دقايق تقريبًا وحسيت على جيـداء گامت من فراشها كل ظني طلعت للتواليت بس تأخــرت!! احس شي بداخلي گالي كومي أطلعي وراها خاف بيها شي وطلعت .. وصلت للتواليت ماكو! أفترت عيوني بالحوش ما إلها أثـر! ردت أرجع للبيت وسمعت صوت همس من ورة البيت، قريت المعوذات ومشيت اريد أندار وگلبي يرجف برجفة أقوى من رجفة رجلية! من صرت بعكسة البيت سمعت صوت عدنان، فتحت عيني على وسعها هـذا جاي لبيتنا؟ أنحبس النفس بريتي واني أسمعة يگللها
عدنان: مو يوم ويومين ولا بس علمود تخلصين دراسة، جيـداء اني رايدج العمر كله
153
- مشيت بلاية صوت يحسون على الحية لو مَرت من يمهم وما يحسون على خطواتي، باوعتلهم واكفين يم الباب الصغيرة هو بأيدة قطعة قماش مطرزة مِـنْ جهة دوم شايلها هاي رفعها مسح گصتة وما يباوعلها ومن يحچي وياها يبقى يتلفتت هيـج وهيـج، سندت جتفي على الحايط خانسة أسمع سوالفهم و رد گاللها
عدنان: ما أريد الماضي الما ينحچي ينعاد بيج، انـي رايد رضاتج گبل لا احچي ويَّ أهلج
71
- مِـنْ الصدمة عدلت وكفتي وهيَّ بساع دنگت
بقوا ساكتين وبس صوت صرير الحشرات مسموع!
تقرب عليها خطوة يحط ايدة بجيبة ويرد يطلعها، رفعها
بيناتهم يشوفها رجفة ايدة وگاللها
عـدنان: ما فاضحتني هالرجفة كـل ما أشوفج؟ گليلي وريحي گلبي اذا راضية بأبن عمج الشاريج بدم گلبة
66
- شالتني الغيرة على أختي وگبل لا تحچي شي
داهمتهم جريت جيـداء مِـنْ ايدها وعيني بعين عدنان أخزر بي
زُبيــدة: مِـنْ تجيها مِـنْ الباب تسمع الجواب يا أبن عمنّا اليرجف مِـنْ الغيرة
121
- تحول علــيَّ طنطل ولا عبالك جان يرجف گدام جيداء، أشرلي على الباب الوراه ونتر بيه
عـدنان: وشفتيني عبرتلكم الحايط؟ هذا اني جاي مِـنْ الباب
26
زُبيــدة: مِـنْ الباب الجبيرة مو هاي عبالك دانلعب ختيلان
27
عدنان: زُبيــدة احترمي روحج لا اطيح حظج
- متت قهر شلون هيج يسوي ويجي لبيتنّا ويدري إذا لگفوهم اخوتي يطيحون حظ جيـداء
زُبيــدة: أنتَ الليّ تحترم روحك مو عبالك دافعتلي وصرت تگدر تطيح حظي
24
- سحبت جيداء ومشيت الليّ الحايط حچة وهيَّ حرف واحد ما حچت بقت مصدومة من جهة بكلام عدنان ومن جهة من جيتي .. من صرنّا قريبين على باب المطبخ لزمتني وجهها ينطي ألوان
جيـداء: لا تسولفين لاحد زُبيــدة
16
- محترگ گلبي مادري على شنو، صفگت أيدي وغميت الجهة الواكف بيها عدنان
زُبيــدة: هم طلع مسربت ويدور زيجة الخفيف
40
- دنگت راسها تحچي بهمس وخوف
جيـداء: اليدور حلال اللّٰــه مسربت؟
زُبيــدة: أنتِ هم مسربتة أم المواعدة
45
- باوعتلي الدموع تارسة عيونها
جيـداء: يرجعني للمدرسة إذا قبلت
6
زُبيــدة: هسه هو خوش زلمة عدنان بس دگتة هاي ناقصة يرضاها خَطاب يتواعد ويَّ أختة؟ اكيد لا ، وبعديـن غـــــديي شنو كامل يصير عمج
36
جيـداء: هو عمي بكل الأحوال
37
- نزعت شالها ضمتة جوة أيدها ورجعنّا للغرفة بس ما حلفتها الف حلفان ماتعيد هالدگة .. هيَّ ندحست بفراشها مادري بيها إذا نامت لو لا بس اني ما غمضتلي عين لما دكت الساعة بـ الخمسة! طلعت للغرفة مشيت للمطبخ لگيت غـازي كاعد يريد يروح للبستان، بـس رجلة مورمة حيـل! كعدت گدامة اسألة شبي! كش وجهة بوجع وگال
غـازي: البارحة طبت بيها سلية وهسه لگيتها مورمة وتوجعني حيل
37
- سحبت جواريبة الليّ مخليهن يمة أتوسل بي
زُبيــدة: عليك اللّٰــه خلّ اني اروح، ووعد منا لأسبوع أنتَ تكعد سلطان واني أخدمك
18
- رد اخذ جواريبة مِـنْ ايدي رافض
غـازي: خَطاب ما يرضى
زُبيــدة: ما راح يدري وهسه أتلثم واروح وأرجع قبل لا يكعدون أهلي ، والله اخدمك منا لأسبوع حتى رجليك اغسلها
26
- ضليت كاعدة اتوسل بي ما مقتنع ، ويگلي هسه يكعد لو معن لو عادل يروحون واني گطعت نفسي ، أشرتلة بعيوني على الفراش وهمست
زُبيــدة: دروح كمل نومتك اكو واحد يعوف حياة السلاطين ويركض ورة عيشة الخَدم
24
- غمني يضحك وهز راسة قابل ورة ما وكع فچي من التوسل، بدون لا احچي ركضت للغرفة البس والضحكة تارسة وجهي .. لبست بساع بساع وطلعت گبل لا يغيّر رأيـة لگيتة راجع غافي مِـنْ التعب، اخذت سچينة مِـنْ المطبخ وطلعت للبستان وبگلبي اغني ومطربة مِـنْ الفرح عبالك صار سنين ما جاية .. حشت الخضرة بساع ورتبتهن بالصندوگ ، نزعت الجفوف وطفرت لشجرة التُكي كاعدة فوك حيل بين الورق محد يشوفني ، ما مَـرت عشر دقايق وسمعت صوت باب انفتحت وأنسدت وصوت الخطوات يعني واحد طلع للبستان، وجهي صار أصفر مِـنْ الخوف ونبضات گلبي عبالك شادة محرك إلها، لو أنذبح هسه قطرة دم ما يلگون بيه، بلعت ريگي يابس مِـنْ الخوف وهمست
زُبيــدة: يا من أخرجت يونس من بطن الحوت أخرجني من هالمصيبة
81
- بقيت جامدة بمكاني بـس الصوت أختفى وصار هدوء!
حتى النفس گطعتة لما أمنت وبحذر حركت اغصان
الشجرة الصغيرة اباوع على باب بيتنّا وعلى بيبان بيت
عمي اريد اعرف ياهو الليّ طلع؟
وأستقرت عيوني على "زبيـر" واثنينّا بنفس الصدمة
هو واكف مصدوم وصافن على الگبر الثاني الفارغ
محفور بصف الگبر القديم اليكعد يمة!!!
بلعت ريگي حتى نفسي يرجف مادري شسوي
بس اريد اخلص روحي مِـنْ عيونة هسه ..
53
- أخذت نفس أفكر شسوي؟ وبعده النفس ما طلع
مِـنْ ريتي ضلّ محبوس مِـنْ الخوف الشافتة عيوني !
طلع رجــال متلثم مِـنْ عكسة حايط بيت زبيــر
التفصل بين بيتة وبيت شبلي ،
ضربت حلگي بأيدي شاهگة برعب مِـنْ هالرجال
تقدم بخطوات سريعة وبدون لا أحم ولا دستور
سَحب زبيـر مِـنْ ملابسة
ودفعة بقوة راكع ظهرة بالحايط مِـنْ الردمة
الليّ سمعتها حسيت ظهرة أنكســــر..
ما لحگ يتحرك لو يسوي شي وهالرجال
الملثم نبت أصابعة برگبة زبيــر يريد يشلع تفاحة
آدم مِـنْ بلعومة خلة عيونة تجحظ !!
- يتبــــع ..
..
