رواية عشق لا يروض كامله وحصريه بقلم حنين محمود
اهلا بكم في مدونة مكتبة حواء نقرأ لكم ونكتب من اجلكم
عشق لا يُروض
الحلقة الأولى
بقلم: حنين محمود إبراهيم
━━━━━━━━━━━━━━━━━━
قدام شركة المغربي للإستيراد والتصدير وقفت عربيه سوده فخمه احدث موديل قدام الشركه
نزل منها راجل بسرعة البرق وفتح الباب الخلفي لبطلنا اللي كان قاعد ورا بكل هيبه وشموخ
بعد ما الباب اتفتح نزل مِنُه رائد بِكُل هيبه ووقار لابس بدله كلاسيك شيك متقسمه على جسمه ومبينه عضلاتُه البارزه بشكل واضح
قال محمد بإحترام شديد:
رائد باشا تحب حضرتك استناك في العربيه؟
رائد قال ببرود : لا اركنها وشوف رايح فين واما اخلص هبقى اكلمك
محمد انحنى ليه بإحترام وقال: تحت أمرك يا باشا
مشي رائد تجاه بوابة الشركه الضخمه بخطوات ثابته ورزينه كالعاده وكان وراه رجالتُه
دخل وبمجرد ما رجله خطت المركز الرئيسي للشركه وجوده طغى على الكل
الكل وقفوا ليه بإحترام شديد جدًا هو كمل طريقه ومإكترثش لكل دا
وصل قدام الاسانسير الخاص بيه وركب اما رجالته طلعوا على السلالم بسرعه عشان يوصلوا قبلُه
وقف الاسانسير في الدور الرابع واللي يبقى فيه مكتب رائد
خرج وراح عند مكتبُه بص للسكرتيره وقال:
سُهى حضري الشغل اللي ورانا النهارده وهاتيه ورايا
سُهى قامت وقفت بسرعه بتوتر وقالت: اااا تحت امرك يا مستر رائد
دخل رائد على مكتبُه اما رجالتُه وقفوا بره حمايةً للمكتب
قعد على الكرسي ونفخ بضيق وقلع چاكت البدله وحدفه على الكنبه بإهمال
دقيقتين بالظبط والباب خبط سمح بالدخول. دخلت سُهى
بخطوات متوتره وحطت الملفات قدامه على المكتب.
وقالت وهي بتحاول تتكلم بثبات:
مستر رائد دي الصفقة الخاصة بشركة الشرق للتوريدات وصلت من ساعه.
محتاجين الموافقه النهائيه من حضرتك بس في مشكله صغيره في الشحنه اللي جايه من إيطاليا
رائد رفع عينه ليها ببرود وقال:
مشكلة ايه؟
سُهى بلعت ريقها وقالت :
الميناء مأخر الإخراج الجمركي بسبب اختلاف في بعض الأوراق ولو الموضوع ما إتحلش النهارده ممكن نخسر التعاقد
رائد سند ضهره على الكرسي وقال :
وهو من امتى شركة المغربي بتخسر تعاقد عشان كام ورقة؟
سُهى اتوترت أكتر وقالت:
أنا حاولت أكلم المسؤول أكتر من مره بس
قاطعها رائد بحدة وهو بيخبط على المكتب لدرجة انها اتفزعت:
بس ايه يا انسه سُهى؟ مشغل اطفال عندي مش عارفين يتصرفوا ولا ايه مش فاهم.!!؟
سكتت سُهى فورًا ف كمّل وهو بيقلب في الأوراق بغضب وقال:
سُهى هزت راسها بسرعه:
تحت امرك يا مستر رائد
رائد وقف عند ورقة معينة وضيق عينه وقال:
والأرقام دي ايه؟
سُهى قالت بتوتر:
دي أرباح الربع الأخير يا مستر رائد زادت بنسبة خمسه وعشرين في الميه عن السنه اللي فاتت
ابتسم رائد ابتسامه خفيفه بالكاد تُرى وقال:
كنت متوقع أكتر من كدا بس هقول مشغل عندي بهايم
سُهى بصتله بدهشه من طموحه المرعب بينما هو رمى الملف على المكتب وقال ببرود:
رتبيلي اجتماع مع رجال الأعمال الإماراتيين الساعه سبعه والملف دا يكون كامل قدامي قبل المعاد
سُهى:
تحت أمرك يا فندم
وقبل ما تتحرك وقفها صوته الرجولي الحاد:
واسمعي
أي غلطه في الصفقه دي هتكون آخر مره ليكي هنا في الشركه
اتجمدت مكانها وقالت بخفوت:
مفهوم يا مستر رائد
خرجت من المكتب وهي بتاخد نفسها بالعافية وقالت: يباااي قلبي كان هيقف من الرُعب
بينما رائد رجع سند على كرسيه وبص من ازاز المكتب الضخم لشوارع القاهره وازدحامها
____________________________________
في إحدى المدارس الثانويه الخاصه
نزلت أيسل على السلالم ومعاها مي صاحبتها
2
مي: انا بجد مش قادره اصدق يا أيسل ازاي رائد يبقى اخوكي
أيسل: ومتصدقيش ليه ان شاءلله
مي: مش عارفه بس عمري ما شوفته معاكم خالص دايمًا بشوف اخباره من على النت انا لولا اسمائكم ما كنتش هصدق
أيسل: لا يختي صدقي زي ما يامن اخويا رائد بردو يبقى اخويا
مي: لا بس بقولك ايه اخوكي الله اكبر عليه الله يخربيت حلاوته يابخت اللي هتتجوزه
أيسل: يابنتي انتي طول ما انتي ماشيه بتكراشي على خلق الله انتي لو لمحتي كلب معدي هتكراشي عليه
مي: لالا بس افهميني والله اخوكي دا كدا يابت يا أيسل حاجه كدا مختلفه طول بعرض بعضلات بيعيون زرقه يختاااي مفيش حلاوه بعد كدا
2
أيسل: الله اكبر في عينك هيطب ميت دلوقتي
ضحكوا الاتنين سوا ووسط ما هما ماشيين وقفهم شاب ومعاه 3من اصحابه
حازم: ما بالراحه على الارض يا جميل عشان مش بتاعتنا
أيسل مدتلوش اهتمام وكملت طريقها قام مسكها من اديها وشدها عشان تبصله وقال: إيه يا أيسل هتعملي فيها تقيله كدا كتير.؟
أيسل بعصبيه ضربته بالقلم على وشه وقالت: ايدك الزباله دي لو لمستني تاني صدقني انت اللي هتطلع خسران انا كام مره اقولك تحترم نفسك وملكش داعوه بيا تاني
حازم بغضب: انتي قد القلم ده.!!!!!! جرا ايه يابت انتي مفكره نفسك مين انتي تطولي اصلا تمشي معايا انا نص بنات المدرسه هتموت عليا
أيسل بسخريه: ياقلب امك بجد والله طب ربنا يوفقك انت ونص بنات المدرسه مع بعض شوفلكوا اي زريبه تلمكم كده
حل عني بقى الا وقسما بالله هطلع اقول للمديرة على اللي بتعمله دا انا كل دا سكتالك
حازم: واو لا واو بجد القطه طلع ليها صوت مالك كدا مين مقوي قلبك يابت
مي بعصبيه: هو في ايه يا حازم ما تحترم نفسك بقى انت مش عندك دم كدا ليه كام مره ترفضك في وشك وتقولك انا مش طيقاااك انت مبتفهمش بجد
وكام مره تقول انا مش عاوزه ابص في خلقتك ايه zero كرامه للدرجادي.!؟ دا انت غريب يا اخي
حازم اتعصب وقال: وانتي مال اهلك.!؟ كنت وجهتلك كلام اصلا.!؟
وبعدين أيسل خطيبتي وبينا خلاف مش اكتر عشان كدا هي متضايقه مني وبتقول اي هبل.!
أيسل صوتها علي من العصبيه وهي بتقول: مين دي اللي خطيبتك يا شمام يازباله.!!!!!
انت هتطلع عليا سمعه بقى انا ايسل ادهم المغربي اتخطب لواحد شمام شبهك.!!!!
ليه كنت بايره ولا مش لاقيه اللي يتجوزني.!!؟ انت اخرك تتجوز واحده قذره شبهك.!! من الشمامين اللي انت تعرفهم
حازم: ورحمة امي يا أيسل انا هكسرلك مناخيرك اللي رفعاها في السما دي.!!! وهعرفك مين هو حازم الانصاري.!!!
أيسل: ولا تعرف تعمل حاجه اخرك كلام مفيش افعال والراجل بيفعل مش بيهري ف كلام على الفاضي وخلاص
حازم ضحك بشر وقال: هتشوفي يا قطه بكره هخليكي تيجي تترجيني وتبوسي على رجلي اني اتجوزك واسترك من الفضيحه
أيسل اتوترت بس حاولت متبينش دا وقالت: دا بعينك تبقى حمار وغبي لو فاكر ان الهري بتاعك دا اسميه تهديد.!
انت ولا تعنيلي شيء اصلًا ولأخر مره يا حازم هحذرك تلزم حدودك معايا
ومتتعرضليش تاني عشان المره الجايه هقلع اللي في رجلي وهنزله على دماغك.! ولا هيهمني وقتها انت ابن مين او احنا فين اصلا واللي امه معرفتش تربيه انا اقدر اربيه عادي جدًا
خلصت كلامها وسحبت مي ومشيوا من قدامه
حازم: ورحمة امي اما مجبتكيش راكعه تحت رجلي مبقاش حازم
مازن: ما تخف شويه ياشبح انت عارف كويس تبقى بنت مين واخوها مين
حازم: طز ولا يفرقلي اي حد انا ابن ايمن الانصاري وكله عارف مين يبقى ابويا ومفيش مخلوق على وجه الارض يعرف يدوسلي على طرف
يزن بسخريه: لا يا حيلة امك اخوها لو لمحك تقول على نفسك يا رحمن يا رحيم
احسنلك يا حازم ارجع عن اللي في دماغك أيسل مش زي الزباله اللي انت بتمشي معاهم
أيسل بنت عيله كبيره وانت عارف دا كويس.! وواثق ومتأكد ان لو حد بس فكر يبصلها مش يتعرضلها اخواتها هيعملوا ايه او رائد بالأخص قادر يعمل فيك ايه ده بإشاره واحده منه يرميك انت واهلك بره سوق العمل خالص وانت عارف
حازم: وانا مفيش حاجه تصعب عليا واللي بعوزه باخده وكلنا عارفين كدا كويس ومش هيجي حتة واد زي ده يخوفني انا وهتشوفوا كلكم انا هعمل ايه
مازن: ربنا يهديك بجد بس متندمش من نتيجة افعالك
حازم: غور انت وهو من هنا هتعملولي فيها شيوخ ما احنا دفنينها سوا يلا
خلص كلامه وسابهم وطلع على فصلُه
______________________________
في نفس الوقت
قدام شركة المغربي للإستيراد والتصدير وقف تاكسي أصفر قديم نزلت منه بنت كانت لابسه تيشرت أوفر سايز أبيض
وبنطلون چينز واسع وحاطه شعرها البني الكيرلي في كحكه عشوائيه طالعه منها خصلات ناعمه حوالين وشها
نزلت وهي ماسكه ملف بإيديها وباصه للشركه بإنبهار واضح
نيروز همست لنفسها بتوتر:
يا نهار أبيض دي شركه ولا قصر؟
السواق قال وهو بياخد الفلوس:
ربنا يوفقك يا بنتي شكلك غلبانه وبنت حلال
نيروز ابتسمت بخفه وقالت:
اه والله ياعمو يارب بس يقبلوني عشان أنا حرفيًا صرفت آخر فلوس معايا على المواصلات
الراجل ابتسملها بهدوء ودعالها ومشي
اما هي خلصت كلامها واخدت نفس عميق ودخلت الشركه
أول ما دخلت حسّت برهبه في المكان الموظفين كلهم لابسين فورمال والمكان هادي وفخم بشكل يخوف
قربت من الريسبشن وقالت بتوتر بسيط:
لو سمحتي أنا عندي انترڤيو الساعه اتنين لوظيفة السكرتاريه التنفيذيه وال Hr بلغتني اجي هنا
البنت بصتلها وقالت:
اسم حضرتك؟
نيروز:
نيروز سامح
البنت كتبت الاسم على الجهاز وبعدها قالت:
اتفضلي اطلعي الدور الرابع عند الأنسه سُهى مستر رائد بنفسه اللي هيعمل الانترڤيو النهارده
نيروز فتحت عينها بصدمه:
مين!!؟
البنت باستغراب من ردة فعلها:
مستر رائد المغربي
نيروز بلعت ريقها وقالت في سرها:
يالهوي دا اللي بيقولوا عليه العقرب المتنكر في هيئة بني آدم؟ احيه احيه احيه مكنش يومك يا نيرو
فوق في الدور الرابع وبعد حوالي نص ساعه سُهى خرجت من مكتب رائد وقالت بعمليه:
الآنسة نيروز سامح؟
نيروز قامت بسرعه وقالت:
ايوه
سُهى:
اتفضلي مستر رائد مستنيكي
قلب نيروز بدأ يدق بسرعه وهي داخله المكتب
أول ما دخلت حسّت برهبه شديده من المكان كان مكتب ضخم جدًا ومُرتب بشكل انيق للغايه وورا المكتب كان قاعد رائد مركز في ملفات قدامه
رفع عينه عليها للحظه من غير ما يتكلم
نيروز اتوترت أكتر من نظراته البارده
رائد قفل الملف اللي في إيده وقال ببرود:
اقعدي
نيروز قعدت قدامه وهي ماسكه الملف بتاعها بتوتر
رائد مد إيده وقال:
الـ CV
ناولته الملف بسرعه فأخده وبدأ يقلب فيه بتركيز
رائد:
امم اسمك نيروز سامح عبدالحميد
عندك خمسه وعشرين سنه خريجة تجارة إنجليزي بتقدير امتياز
رفع عينه عليها وقال:
امتياز ومعندكيش خبره ازاي؟
نيروز حاولت ترد بثبات:
كنت مركزه أكتر على دراستي والكورسات أثناء الجامعه
رائد رجع بص في الـ CV وقال:
عندك كورسات إدارة أعمال وExcel وBusiness Communication
نيروز هزت راسها:
ايوه
رائد شبك إيده ببعض وقال:
طيب قوليلي بقى يا انسه نيروز انسه مش كده؟
نيروز: ها اه اه انسه
ابتسم ابتسامه جانبيه وبعدين كمل:
لو حصل ضغط شغل كبير وكل اللي حواليكي متوترين هتقدري تسيطري على الوضع ازاي؟
نيروز أخدت نفس وقالت بهدوء:
هبدأ أحدد الأولويات وأقسم المهام حسب الأهم والأسرع وأحاول أكون هاديه عشان التوتر بينتقل لكل الافراد اللي حواليا
رائد بصلها كام ثانيه بدون تعبير وقال:
ولو مديرك كان شخص صعب؟
نيروز فهمت التلميح ف قالت بخفه:
هتعامل بإحترافيه حتى لو الشخص اللي قدامي صعب المهم الشغل يطلع بأفضل شكل
طرف شفايفه اتحرك بإبتسامه خفيفه لأول مره مش هينكر انه عجبه طريقة تفكيرها
رائد:
شايفه نفسك فين بعد خمس سنين؟
نيروز:
عايزه أبقى في مكانه قويه وأكون حققت نجاح يخليني فخوره بنفسي
رائد:
وايه نقطة ضعفك؟
نيروز سكتت ثواني وقالت :
إني بتعصب بسرعه بس بعرف أتحكم في نفسي وقت الشغل
رائد قفل الـ CV وقال:
ودي ميزه مش عيب
نيروز استغربت كلامه
أما هو ف بصلها بثبات وقال:
آخر سؤال
ليه المفروض أقبل نيروز سامح في شركة المغربي؟
نيروز ابتسمت بثقه لأول مره وقالت:
لأني حتى لو معنديش خبره ف أنا بعرف أتعلم بسرعه ومش بستسلم بسهوله ولو أخدت الفرصه هثبت لحضرتك إن قرارك كان صح
سكت للحظات ومردش عليها بس كان مركز في ملامحها بشكل أربكها
بشرتها البيضه وخدودها الوردي وشعرها البني كل ده خلاه بيصلها بإنبهار لأول مره كإنه مشافش بنات قبل كده
يمكن عشان هي غيرهم كلهم ويمكن عشان لبسها بيسيط وجمالها طبيعي ومش مصطنعه زي البنات اللي بيشوفهم على طول
لوهله ادرك هو بيعمل ايه بعد عينه عنها بسرعه وأخيرًا قال بهدوء:
اتفضلي برا واستني الرد
نيروز قامت بسرعه:
شكرًا يا فندم
ولسه هتمشي سمعته بيقول بدون ما يرفع عينه:
نيروز
لفتله باستغراب:
ايوا يا مستر رائد
رائد:
متتأخريش عن مواعيدك تاني انتي اتأخرتي سبع دقايق وانا هنا بحب النظام لأقصى درجه.!
لو عاوزه تكملي معانا هنا في الشركه تمشي على نظامي والا هتمشي من قبل ما تتعيني انا ممكن اعديلك اي حاجه في الدنيا الا عدم النظام انا بكره الفوضى فوق ما تتخيلي ف الاحسن تبعدي عن شري ومتحليش غضبي يطولك
اتصدمت وقالت بتوتر:
الطريق كان زحمة بس والله انا.....
قاطعها ببرود:
الشاطر بيحسب خطواته قبل ما يتحرك يا انسه
سكتت نيروز بإحراج وقالت:
انا اسفه يا مستر رائد ان شاءلله مش هتتكرر تاني
ابتسملها رائد بهدوء وسابها تخرج
اما هي بعد ما خرجت من المكتب قعدت وهي بتهمس لنفسها:
يا ساتر يا رب دا بني آدم ولا لجنة تحقيق منك لله يا مناااال يا بنت ام منال كان زماني عايشه متستته ومتهننه بدل المرمطه ديييي.!!!
بعد شويه اتصل رائد على سُهى وقال:
تعالي يا سُهى عاوزك
سُهى بالفعل قامت ودخلت المكتب ليه ف اداها اوراق وحاجات خاصه بالشغل وهي اخدتهم وخرجت.
واول ما قفلت باب مكتب رائد قامت نيروز وقفت بتوتر
بصتلها سُهى وهي ماسكه التابلت الخاص بالشغل
وقالت بعمليه: اتفضلي اقعدي مستر رائد لسه هيحدد القرار
نيروز ابتسمت بتوتر: حضرتك بتشتغلي هنا من زمان؟
سُهى نفخت وقالت: بقالي تلات سنين ودي تعتبر معجزة إني لسه عايشه أصلًا
نيروز ضحكت بتوتر: للدرجادي؟
سُهى همست ليها بصوت يكاد مسموع بينهم: بصي يا حبيبتي لو اشتغلتي هنا هتعرفي إن مستر رائد دا مش بني آدم طبيعي دا ماشي بنظام عسكري
قبل ما نيروز ترد باب المكتب اتفتح فجأة وخرج رائد بخطوات ثابته
الاتنين وقفوا فورًا احترامًا ليه ولحضوره
رائد بص لسُهى وقال: الاجتماع يتأجل للساعه 9 والملف يكون جاهز قبلها
سُهى: تحت أمرك يا مستر رائد
رائد لف عينه ناحية نيروز اللي كانت واقفه بتوتر وقال ببرود: انتي لسه هنا ليه؟
نيروز اتلخبطت: حضرتك قولت استنى الرد
رائد سكت ثواني وكان بيتأمل ملامحها وبعدين قال: من بكره تقدري تنزلي تدريب هنا لمدة شهر ولو أثبتي نفسك هتتعيّني رسمي
نيروز فتحت عينها بفرحه وعدم تصديق: بجد؟!
رائد عقد حاجبه بضيق: وهو أنا بهزر؟
نيروز هزت راسها بسرعه: لا لا مقصدش شكرًا جدًا يا فندم والله حضرتك مش هتندم
رائد بص لسُهى: عرفيها النظام وكل التفاصيل
وبعدين اتحرك ناحية الاسانسير ورجالته مشيوا وراه فورًا
أول ما اختفى من قدامهم نيروز صرخت بصوت واطي: يااااااه أخيرًااااا
سُهى ضحكت وقالت: حاسه إني بتفرج على طفله نجحت في الإمتحانات
نيروز حطت إيديها على قلبها: والله يا أنسه أنا كنت هعيط من الرعب
سُهى: لا من غير القاب بما ان مستر رائد سمحلك تيجي الشركه ف انتي كدا حد مميز جداً وحظك حلو فوق ما تتخيلي قوليلي سُهى بس بقى
نيروز ابتسمت بخفه من كلامها وقالت:
خلاص اشطا ماشي يا سُهى بس بالله عليكي فهميني أنا داخله على إيه عشان حاسه إني داخله الجيش مش شركه
سُهى ضحكت جامد وبدأت تمشي ناحية مكتب صغير جنب مكتبها وقالت بين ضحكاتها : تعالي تعالي
قربت منها نيروز وقعدت قدامها
قالت سُهى:
بصي يا ستي أول قانون هنا إن الوقت مقدس يعني لو ميعاد الشغل تسعه تبقي موجوده تمانيه ونص مش تسعه إلا دقيقه حتى
نيروز بلعت ريقها: يا ساتر يارب شكلنا هنشوف ايام عنب
سُهى كملت وهي بتديها ملف:
تاني حاجه ممنوع الغلط يتكرر مرتين أول مره مستر رائد ممكن يفوتلك تاني مره نقدر نقول الله يرحمك بقى
نيروز بصتلها بقلق: هو بيتلكك عشان يمشي الموظفين ولا ايه؟
سُهى: دا مره بنت كانت بتتكلم في التليفون وقت الشغل خرجت من مكتبه وهي بتعيط بعد ما طردها وطبعا معروفه اللي بيمشي من شركة المغربي مش بيتعين في اي مكان تاني نهائي
نيروز: يا نهار اسوح انا ايه اللي جابني هنا
سُهى ضحكت على شكلها وقالت:
بس بس متخافيش كدا طول ما انتي مركزه وبتسمعي الكلام هتبقي تمام هو صارم آه بس عادل جدًا
نيروز بصتلها وقالت بفضول:
هو دايمًا كدا؟
سُهى :
قولتلك انتي عاوزه تكملي معانا هنا ملكيش داعوه بأي حاجه ركزي في اللي هيتطلب منك وبس
نيروز: تمام تمام فهمت
سُهى فتحت التابلت وبدأت تشرح بعمليه:
بصي انتي هتبدئي في قسم التنظيم وإدارة الملفات شغلك هيكون مراجعة العقود وترتيب مواعيد الاجتماعات ومتابعة الإيميلات المهمه.
نيروز هزت راسها باستيعاب:
يعني شغل مكتبي عادي؟
سُهى: عادي إيه بس هنا كل حاجه محسوبه بالثانيه حتى النفس
وأهم حاجه ممنوع تدخلي مكتب مستر رائد من غير إذن وممنوع تقاطعيه وهو بيتكلم ولو طلب منك حاجه تتنفذ بالحرف
نيروز ابتسمت بتوتر:
حاضر هو أنا هتعامل معاه كتير؟
سُهى رفعت كتفها:
على حسب حظك الأسود
نيروز: ربنا يطمنك دنيا وآخره يارب
ضحكوا الاتنين وبعد ما سُهى خلصت معاها نيروز مشيت ورجعت على بيتها من تاني
في قصر المغربي دخل رائد القصر بخطوات سريعه وكانت عينه مضلمه من الغضب
وقف في نص القصر وزعق بصوت عالي: يااااااامن.!!!!!
يتبع...
