رواية عرين الصياد الفصل التاسع 9 بقلم شذرة العدوان

لا عيبَ في الحُبَّ لو صُنَّا طهارتهُ

عن عابثٍ ما وعى للطهرِ إدراكا

الحب وردٌ من الرحمن نقطفهُ

والعابثون به يجنون أشواكا

ليال:حالتي بهاي اللحظه ما اتمناها حت العدوي ماجد تحول مثل رياح عاصفه بيها برق ورعد ويعصفني من مكان لمكان واني مثل ريشه بهاي العاصفة

اتهمني اواعد ولد واتمعشگ واني والله ما اعرف شنو معنى تواعد وتمعشگ ولا بحياتي سمعتهن غير من صبره من تعير مهره

وما شفنه مهره سوت شي غير تكرب شغل ليل ونهار ما اعرف والله شنو تواعد وتمعشگ بس مزال سمعتهن من صبره وماجد بهالطريقه والنبره يعني شي مو حلو يعني هاي اهانه انجرحت بداخلي انهضمت انرعبت

لازمني من عكسي ويعصف بيه ويگلي احجي منهو هاااذ احجي لا ابتلي بيج گبل اخوانج بگد النعل وتواعدين احجييي اطلع گو**د وينك اطلععع

هاذ من المدرسة موو احجي صديقججج ول احجيييي

ليال:مغطيه وجهي بأديني واگله والله ما اعرف شتحجي شنو اواعد وعندي حبيب والله حتى اصدقاء بالمدرسة ما عندي بس سعد وكريمه اخوانك

قفل ما يفعل يصدگ ويخض بيه جذابه جذااابه

دفعني وراح بتجاه المخزن يدور خفت يشوف مهره وحامد حطيت اصابعي بأثمي وصوفرت بتعب واشاهك من البجي

رجع عليه وضربني راشدي احس اذني انشگت وگعت بالگاع حاطه ايد على خدي وايد كاتمه صوتي واصرخ تمرغلت بالتراب

رجع جرني من قميصي وجان يتگطعن ازرار القميص من يم صدري لزمت قميصي كورت اديني على صدري

ويگول حيوانه مسويه روحج كلشي متعرفين عجل المن جاي تصوفرين للحمام احجي مواعده منووو وليش تصوفريله وين ختل احجي ول احجييي لا تخرسين

ما حجيت ولا نطقت بحرف ما اعرف شحجي شنو اگول مهره گالت لا تحجين

گال ماشي الگا وين يطير وجان يروح يدور بالمخزن فتح باب المخزن وطب اني رحت بساع على مكان حامد ورا المخزن تشوفهم خاف تغبو من سمعو ماجد

لازمه قميصي اغطي صدري وابجي وصلت المكان والتفت ادور لمهره وين راحت ما شفت غير الشال الي جانت مخليته على جتفها واگع بالمكان الي جان بي حامد دنگت تا اشيل الشال اجه ماجد لزمني من شعري گال يعني هين جنتي مواعدته

گال ما تحجين موووو يالله جوه انتفاهم اخذني سحل يعصفني گدامه واني بالي يم مهره ماكو گمت اصرخ واحاول افلت منه گتله هدنييي هدنيي الله عليك

وهاذ مجلب بيه عضيته من ايده بس اريد اخلص روحي ولا حس من عضيته وصلنه الباب وما فعلت اطب دگيت رجلي على حافة الباب وابجي بعبره اگله امانه عوفني والله ما اتمعشگ ويه احد الله عليك هدنيي لا تسلمني لحميد يبطلني من المدرسة يكتلنيييي امانه گمت اضرب رجلي بالگاع ولزمت الباب بأديه ثنينهم

شالني من خصري ودفر رجلي برجله

فوتني للبيت وعالصالة يدفع بيه تلاگينه ويه استاذ صائب شايل الجاي وفاتن وديالا ويا من شفت استاذ صائب جن شايفه الموت قميصي مگطعه ازراره وشعري مهلس وكلي تراب الكل ظل فاتح عيونه ويدحگ عليه واكثرهم استاذ صائب الي اريد دوم اظل بعيونه الطالبة المثالية

ديالا: حطيت القوري عالطباخ اخدر الجاي ظل بالي يم ليال بس لا جفصت سالفه وماجد ظل يحاسبها زين ليش طردني ااخ يالفضول راح اموت اذا ما اعرف

رجعت عليهم گلت اختل واتصنت بس ما لگيتهم رحت عالحجره هم ماكو استغربت الوضع مو طبيعي رجعت عالمطبخ انوب واجت فاتن تفور مي لأبنها گالت مهره وينها

گلتلها والله مدري صار بالساعه او اكثر ما شفتها

اجه استاذ صائب گال وين صار الجاي هم لو باجه تستوي گتله استاذ ليش تجي انته حميد ومحمد وينهم ما يجون ياخذون الجاي

گال اسكتي لازمهم ابوج وجاي ينطيهم طريقة الكزنزانية

وماجد نهزم وجان يضحك

فاتن گلتله وانته ما اخذت الطريقه

گال لا و بكل صراحه گلتلهم ما اخذ اشو اصلي واصوم وازكي واحج بعد عليمن اخذ طريقة واتدروش

گملت الجاي ردت اصبه گال لا يبرد منا للديوان بعيده راح اخذ السكانات وانتي الحگيني بالقوري اصب غادي شال صينية السكانات واني شلت القوري والشكر وامشي ورا وفاتن ورانه شايله لفه تاكل بيها

طلعنه بالصاله وجان يفوت ماجد شايل ليال من خصرها وحالتها حاله شفايفها بلون الحبر وترجف ملابسها كلها تراب شعرها مهلس ولازمه قميصها من يم صدرها وتبجي تشاهك وتحاول تفلت من ايد ماجد

طلعت صبره گالت يهالعثره شهل حال ليال وين جاينه شمفينه

ماجد هدها وجان تركض بساع سدت على نفسها باب الحجره

ظلينه مصدومين الكل استاذ صائب وگعت الصينية من ايده ويدحگ على ماجد مصدوم

فاتن لحگت ليال تشوفها

استاذ صائب لزم ماجد من ياخته وصاك على سنونه يگله شكووو شبيها لياللل

ماجد يفح من العصبيه بياض عيونه صاير احمر وهنه خضر يخوف ومتعصب نار يگله روح اسألها

ارتعبت گمت افرك بأديني شمسويه ليال

بس لا جفصت وغلطت على ماجد وسمعها

اجت صبره على ماجد تحلفه بروح ابوك شكو

گاللها ماكو شي خاله وجان ماجد اخذ صائب وطلع برا ولحگتهم صبره تمشي على كيفها

رحت عالحجره وفاتن ادگ بالباب وليال ما تفعل تفتح الباب قافله طلعت امي عالصوت عبن فاتن علت صوتها وادگ الباب بقوه

واجت شكحه وست رافده وكلها تسأل شكو ومحد جاوب عبن ما ندري السالفه شنو اني لا ارادي گمت ابجي گعدت بالگاع امي گامت ادگ بالباب وتنادي بليال اجه حميد يصيح لياللل افتحي الباب اليوم اكسر راسج حيوانه بگد القندره تواعدين افتحييي گام يدفع بالباب تا يكسره

أمي ظلت مصدومه انهد حيلها

فاتن لطمت وجها گالت جذب جذب منهو گالك شهل حجي

واني ما اقل عنهم صدمه ما ظلت بيه قطرة دم اريد احجي بعد مگدر

فاتن تگول لحميد وخر من الباب تعوذ من الشيطان

منهو گالك هالحجي خن نفتهم يمعوود شبلاك فهمني

فاتو استاذ صائب وماجد شافو حميد يدفر بالباب ويصيح تفاجئو وجيتو علي لزمو گلوله شبيك حميد اهدئ

صد عليهم وگاللهم انتو لا تدخلون وخروو عني

ماجد يگله بس فهمني شكو وحميد يردله خاييب دوخر مسوي روحك متدري مو انته الي لگيت ليال تواعد بواحد

ماجد فتح عيونه گال شنهي اني منهو گالك لا مو هيج الحجي منهو گالك يحجي ويصد على استاذ صائب وثنينهم انصدمو

استاذ صائب مجلب بحميد ويگوله اهدئ وتعال اگعد افتهم الحجي تعوذ من الشيطان والله عن نفسي ما اصدگ لو اشوف بعيني ليال جاهل شمعرفها بهالسوالف

وحميد يشيل بروحه ويرگعها يگله وخررر صائب محد دمرنه غيرك هاذ تالي مدرستك گامت البناويت تواعد وخرو هدوني اليوم اذبحهاااا والله اشرب من دمها اليوم

ديالا:حاطه اديني على اثمي كاتمه صوتي وابجي وارجف صخنت وأمي داخت وگعت گمت اصيح يماااا شالها ماجد وظل استاذ صائب مجلب بحميد من ادينه بكل قوته تمرغل على كبر الصالة يعصف بي وما يفعل يهده

اخذ امي عالهول ورفع رجليها بالمخاد

فاقده امي ما تحس تگطع گلبي أمل گامت تفرك بأديها مگدرت اظل يمها صوت حميد وهو يتهدد يرج براسي ويخلي جسمي يرجف رجعت عالصالة گلبي يم ليال

اجت صبره وعلى وجها ابتسامه گالت ول محد شاف مهره وين محد جاوبها وجان تروح ادورلها

شكحه گالت يمه شلون صگعه ادري شناقصها البنت وتخلي روس اهلها بالطين اشو مدللات دلال

حميد بثواني بس سمع هالحجايه تحول وحش وگام يصيح بعد محد يگدرله دفر استاذ صائب على رجله وفلت من ماجد وعلى ركضته دفر الباب وگعه

وجفت عالحجره واحنه ورا جانت ليال مكوره نفسها بصف الكنتور وتبجي لزمها من شعرها ويضرب بيها ويگللها منو هاذ احجي منهووو گطعها تگطع

احنه النسوان محد بينه تگدر تحاجز فاتن مريضه وحامل واني مالي قوه وامل وهاجر ما يگدرن

محمد وعماد وابويه بالديوان ما يدرون شكو الصوت ما ينسمع بسبب صوت الدف

استاذ صائب حاضن حميد يشيله شيل وما يفعل يهد ليال وماجد لازم ليال وادين حميد ويحاول يفك شعرها من ايد حميد ما يگدر ما شفت بوكتها رجال وحش وما ينگدرله مثله

ماجد عاط بأمه گاللها عالبيت يالله روحوووو

ست رافده بساع جرت امها وراحت

فاتن داخت ولزمت بطنها سندتها هاجر

هالموقف ظل يحز بگلبي سنين عشته بكل رعبه وحزنه وقهره

ادحگ على اختي بين ثلاث زلم منهاره مابيها روح ما تگدر حت ادافع عن نفسها واني مگدر اساعدها بشي بس كاتمه صوتي بأدي وگلبي ينزف

گامو يضربون بحميد بوكسيات ودفرات وما يفعل يهد ليال لحد ما خلاها بتالي روح الا ماجد ضرب حميد بوكس على خشمه خله دم حميد يسفح داخ ولزم خشمه

و هد ليال سحلها ماجد من جوه حميد يوخر شعرها من وجها رحت عليها مغمضه عيونها واثمها كله دم وتگول عمو حامد والله عمو حامد گال نادي مهره والله عمو حامد گوه تحجي السانها ثگيل

حميد لازم خشمه والدم يطلع من بين اصابعه رجع على ليال گاللها شنهوو

بعبره تگص الگلب گالت عمو حامد گالي نادي مهره اودعها ومهره راحت تشوفه ورا المخزن گالت انتظريني وهسع ماكو هيه بس الشال بالمكان شفته

والله والله ما واعدت احد والله هو عمو حامد شافني يم الشباك ادحگ عالذكر گالي نادي مهره

حميد صك على سنونه وجان يطلع تلاگه ويه صبره وجان تگول محد بيكم شاف مهره اشو ماكو

دفعها حميد وطلع ركض واستاذ صائب ورا

رحت على ليال حضنتها منين ما اجوسها بتعب تگول ااخ ردت اوگفها مگدرت

اجه ماجد يشيلها بقهر گلتله وخر عني رجع ادينه وملامح الحزن على وجهه

ثنيت بالگاع وليال على صدري تعن وگلبها يريد يطلع هالگد ما يدگ دموعها تنگط على صدري ودموعي على خدها

صبره گالت شكو شبي حميد

رجع حميد وهوه شايل الشال مال مهره وينادي مهره وينهااا الكل گام يدور على امل يطلع حجي ليال غلط

صبره تصفگ بأديها تگله يول شكو شبيها مهره ما جاوبها حميد وطلع ركض شايل سلاح وصائب ورا يركض لحگهم ماجد عاط بي استاذ صائب گاله ظل هيين ممنوع تطلع منااا ويركض ورا حميد

ماجد واگف بالباب وفاتح ادينه بعلامة استفاهم

گال خاله منهو حامد فهمونه شنهي السالفه

صبره انصدمت گالت ها شعرفك بي وليدي شجاب طاريه هسع هاذ واحد مو خوش ادمي عوفك منه

فاتن وراهه لازمه بطنها عاطت بيها انتييي الي مو خوش كله بسببججج دمرتينه

جان هسع حامد ومهره متزوجين

شستفاديتي من طمعج هاي مهره انهزمت ويا حامد ارتاحي عاد يلزموهم وينجتلون عود حني ايدج

صبره لطمت على وجها وصاحت يهالصگعه يبوو شتحجين مهره نهزمت گامت ادگ على راسها وتملخ بروحها

گام ماجد لزمها فاتن تبجي وتحجي تگله عوفها ماجد عوفها خلها تبجي على فعايلها وتلطم خلها تحصد زرعها ماجد عاط بيها اسكتي فاتن خالتي شعليهااا

فاتن صدت على هاجر گالتلها روحي هاجر على ابنج وذا شفتي محمد وعماد اجو الهيهم ولا تحجين شي طلعت هاجر وفاتن وراهه سدت باب الحجره

صدت على ماجد وهيه تفح من العصبيه ودموعها تنگط من حنجها گالتله شعليها خالتك اني اگلك شعليها اشرت على صبره وگالت هاي المره حرام تتسما اااام حراااام تتسمااا ام هاي المره اكبر عدوه لضناها بلشت بيه وغصبتني غصب اتزوج حجي حسين الي اكبر من ابويه

بسبب طمعها بفلوسه

عوفك من هاي سهلة

عندك علم محمد جان يريد أمل

وهاجر جانت تريد عماد

ماجد حاضن صبره يهدي بيها گال كافي فاتن شجاي تخبصين شهل حجي

جاوبته لا لا مجاي اخبص اواش افهمك فعايل امي

اجاني محمد گالي اني عاجبتني أمل بنت خالي خوش بنيه معدله اريد اخطبها

وقبلها اني ادري بهاجر تحب عماد بس كرامتها ما خلاتها تعترف لعماد عبن جان عشگ من طرف واحد

اني الثوله رحت حجيت لأمي تا نخطب امل لمحمد وهاجر لعماد ونزوجهم بيوم واحد

اشرت على صبره وهيه تضحك وتبجي گالت وشراحت سوت خالتك يا حزرك خلت محمد ليما يروح لبغداد يجيب علاج لبست عبايتها وراحت خطبت أمل لعماد بعتبار بنت اخوها زعم ادورلها الخير وافقو الناس ورجعت مزرعده على ابويه گالتله اخوي عاجبه نسبك واهدالك أمل لعماد

وانته تدري ابويه ما يرد الهديه وعماد عبن ما بگلبه احد وما يخالف رئي احد وسمع امل سمعتها طيبه وافق عليها

رجع محمد من بغداد لگه عماد عاقد على امل

وراهه روحي واخطبي هاجر لمحمد اغرت اهلها بالذهب والفلوس وغصبو هاجر على محمد غصب

ما همها سعادة ابنها المهم تاخذ هاجر الحلوه لأبنها وامل عبنها سمره تزوجها لأبن معاضد

وجمعت الكل ابيت واحد وخلت حزازيات بين الأخوان محمد كاره عماد وهاجر كاره امل

عاطت بعبره تگص الگلب احجيييي ماجد اكوو ام تسوي هيججج بضناها تعبالي كتفت لا صدت على مهره وهم رادت تزوجها لسعيد اخو حجي حسين شايب وعنده مره وسنونه مكسره طمعانه بفلوسه

فاتن ثنت بالگاع گامت تلطم احنه عايزين فلووس مااجد الله عليك احنه عايزيين

ومن مهره رفضت سعيد گالتلها عجل اختاري يا صائب يا ماجد گالتلها يمه شنهي بكيفي هيه وبكيفج هذول مثل اخواني ويعتبروني اختهم

ومن ذاك اليوم گامت تشوف مهره عدوتها وزادت من ابويه ايد مهره وگال ما اجبر بنيه على زواج واني لو احجي لأبويه بذاك الوكت مجان خلاني اتزوج وافقت عبن الي احبه يا ماجد ما يحبنيييي وكرامتي وگفت گدامي ما گدرت اعترفله

حامد عشگ مهره 12 سنه وهيه عشگته

وامي درت بيهم وشدت وياهم حرب عبن حامد فقير ومهره ما فعلت تزوج سعيد او تختار بينكم ومشت بطوع امي شدت الحرب ويااهم يوميه لابسه عباتها وطايره تهدد بحامد

طردته من شغله وسلبته راحة باله وااخر شي تهمته يتحرش بأبن اخوها الزغير لزمن الولد وعلمنه شلون يحجي هيه وخواتها ومنجدت الرجال بالعرب

وعلگت الدنيا بوكتها كلها ادور لحامد تا يكتلونه

لوما ياخذ اهله وينهزم بروحه بليلة ظلمه جان هسع دم مسلم حلال برگابنه يا مااجد شحجيلك تا احجيلك

ديالا: فاتن تحجي واني مجاي استوعب هالظلم هاذ كله من صبره عرفت هسع سبب العداوه ابيتنا والحرب بين الجناين ابجي اشاهك واعض بشفتي ادحگ على ماجد حت ادينه ارتخو جان حاضن صبره معد يگدر يحجي بس دموعه تصب

صديت على ليال شفتها نايمه وتعن من الوجع سحبت مخده خليتها جوه راسها بمكانه و غطيتها رحت اشوف أمي لگيتها تعن گعدتها من فتحت عيونها صاحت ليال گلتلها ليال زينه ونايمه ارتاحي ما فعلت تظل راحت عالحجره تسحل بروحها شافت ليال نايمه گعدت بصفها وگامت تنعي وتبجي

امي استغربت الوضع من شافت صبره تبجي وتملخ بروحها وماجد يسكت بيها وفاتن سانده راسها عالحايط لازمه بطنها والدموع تجري ما تدري مهره ماكو تعبالي يبجون على ليال ما سألت شكو

فاتن نادتني رحت يمها شاورتني بتعب گالت روحي لبيت سنان بلكت يعرفون شي بساع ارجعي لا تخلين احد يشوفج

رحت بسااع شفت الباب الي بينه مفتوح وحت باب بيتهم مفتوح دگيته وجان افوت واشوف سنان وجهه مكشم والدم يجري عاطت بيه امه شجابج علينه امت نخلص من بلاكم ومصايبكم احنه شعلينه بحامد وعمايله يصدون على سنان ليش

عاط بيها سنان يماا كافي تعاي ديالا شتردين

رحت يمهم اعصر بأديني ما ادري شحجي. وشگول

گلت فاتن دزتني اسأل اذا تعرفون شي

ام سنان گالت كلشيي منعرف لا شفنه شي ولا سمعنه هاجبين ابيتنه وننتظر رحمة الله وجفت علينه اخوج سگط سنان من الضرب يعبالي احنه ملفين حامد

احنه متبرين من حامد خاف صيت سنان ابن عمه الگربه ما نريدها ما جتنه من وراهه بس المصايب وگامت تدعي على حامد بالعثره

ما حجيت شي بس دموعي تصب ونقهرت على سنان خطيه بكل صگعه يلوحه طشار

عفتهم ورجعت بساع ابلغ فاتن انهم ما يعرفون شي

مرت ساعات والدراويش راحو ومحد ظل يمنه اجه عماد لازم عمليته ومحمد گايده فوته لحجرته ينام

ومحمد فات لحجرته هم وابويه ظل بالديوان يتعلل ويه واحد من اصدقائه

توتر قلق اعصاب نار دموعنه ما نشفت وصبره تملخ بروحها عالساكت وماجد يفتر بالحجره يدخن غبرت الحجره للساعه وحده ونص محد نام غير ليال ومحمد وعماد والجهال

اندفر باب الصاله ويا صوت صرخه طلعنه نركض شفنا حميد واستاذ صائب ومهره حالتها تخوف الشعر منفوش وثوبها مشگوك من يم جتفها ومنگعه مي وطين وترجف وخشمها ينزف دم

حاضنها استاذ صائب يحميها من حميد

كل ما يجيت عليها يصير بوجهه لزمه ماجد گاله كافي حميد والله لعبت نفسنه شنهي ما عندك عقل ما عندك اذان تسمع

وحميد يصيح بعلو صوته اذبحها اذبحها

عالصوت طلعو محمد وعماد واجه ابويه من الديوان گال شكو

مهره عافت الكل وراحت لزمت ادين ابويه وتبجي صوتها مبحوح وحيلها مهدود گالتله يابه ما تهمني الدنيا كلها وشما حجو عني محد يهمني غيرك

والله والله ما نهزمت حامد نهبني وخلصت روحي ورجعت ودنگت راسها تبوس رجل ابويه وتگله مو مهره الي تنزل عگال ابوها

ديالا: ابويه فاتح اثمه ما يدري السالفه شنو ومحمد وعماد واحد يدحگ على واحد ويسألون شكو شجاي تحجي مهره وشبيها

حميد جيت على مهره شالها من شعرها وهيه راكعه گدام ابويه

ابويه تناوش العوجيه وضرب بيها حميد كسرها علي وجر مهره حضنها يگول شبيها مهرتي شبيج بنيتي منهو وياج شجاي تحجين

حضنته وگامت تصرخ وابويه يبجي وياهه ويتهدد على حميد عاط بينه عماد احجووو عاد شكو احجوو

حجه حميد وعاط بي ماجد گال ممنوع احد ينطق بحرف واحد محد غير مهره تحجي حاول حميد يحجي گاله كافي انلصم كلمه ما تطلع منك وجان يدفعه

اجه يم مهره گاللها احجي مهره نسمع منج احجي ولا تخافين الي يمد ايده عليج ازين شاربه

حميد گاله خلفله عليك بالله هاي لو اختك هم تگول نفس الحجي لزمه ماجد بوكسيات ويگله مهره اختي وعرضي و اخاف عليها اكثر منك تصرف بحكمه ولا تظل همجي گوه طلعو حميد من جوا وگف ماجد وهو يفح من العصبيه رافع اصبعه ويتهدد على حميد گاله جم مصيبه بمصيبه وگعتنه بسبب رعونيتك وهمجيتك هاذ اخوك عماد جان راح بيها بسببك اقسم بالله اذا ما صرت ادمي احطك بالسجن وما تطلع الى يوم القيامه

يالله احجي مهره نسمعج

مهره دنگت راسها خجلانه وتشاهگ گالت اجت ليال گالت حامد يناديج يريد يودعج تايروح اني ادري بنفسي غلطانه سامحوني ماجد گاللها كملي لا توگفين

اي رحت تا اشوفه گالي يالله ويايه ننهزم واني ما فعلت رفضت وطردته عفته ومشيت لزمني سد اثمي وجتفني طلعني من الباب وجان ويا واحد شالني حطوني بالسياره جان طابگها ورا السياج

مشينه مسافه واني احاول افلت شال الربطه من اثمي گتله دخت لعبت نفسي اريد ازوع وگف السياره الله عليك وگفها بنص الطريق حدرنه ثنيت بالگاع سويت نفسي دايخه جان لاف الشماغ على خصري شاد اديني شاله واني گمت زعم اتخوع الدنيا ظلمه تلمست الگاع تناوشت حجره گتله اريد مي ما عندك صد عالسياره فتح الباب عالسايق گاله ما عندك مي

صديت علي وضربته على راسه وگع وجان انهزم ركض لحگوني وختلت بالبوابه مال المشروع ما همني تطلعلي سعلوه لو ذيب والبوابه بيها مي للنص وبارد همني ارجع عالبيت وما انزل عگال ابوي ظليت خاتله ليما عجزو يلگوني طلعت وكملت ركض عالبيت ليما وصلت الباب شفت ضوء سياره من ورايه عبالي حامد رجع فتحت الباب وفتت ناداني مهره وگفت طلعو صائب وحميد

لزمني حميد يضرب بيه بدون ما يسمعني اني لو اريد انهزم ما جان رجعت

الكل تعاطف ويه مهره ويبجون الا حميد يشيل روحه ويرگعها گال هسه اني لازم اصدگ مووو

احجي شسوالج احجييي

مهره جاوبته بغصه وتشاهك گلتله ما احجي اعرف شنو ابالك اخذوني عالفحص ودوني وين متردون والله ما لمسني والله گال ننهزم ونتزوج

ردلها حميد بصوت يرج والعالم اذا درت راح يقنعهم الحجي مالج

گاله ماجد محد يدري بس اذا ظليت اجان راح تفضح نفسك بنفسك كافي انلصم

وهاذ حامد دوا عندي والله لو يدفن نفسه هم اطلعه بسيطه ممنوع احد يدورله اني الگا

ابويه حاضن مهره وجان يدوخ التمينه علي شالو على حجرته نام عالقريوله انطا صائب من علاجه گال خلو يرتاح اطلعو گوه يحجي گال مهره مهرتي خلوها يمي لزم ايدها وهيه بالگاع حاطه راسها عالقريوله تبوس ايد ابويه وتبجي طلعنه الكل

استاذ صائب سأل ليال شلونها جاوبته فاتن شنهو لونها كشمها حميد تكشم ولا جن طفله جوه ايده

حميد صد بصفحه وجهه صاير خارطه من الضرب

گاله استاذ صائب شفت يا حميد بسبب تسرعك وسؤك للفهم جم شخص اذيت امت تعقل حميد بس گلي بعدين تعال اريد افتهم منهو گالك ليال مواعده احد ولو فرضنا صحيح البشر يسأل يا حميد يسأل ويستفسر ويفهم قال الله تعالى ( ﻳَﺎ ﺃَﻳُّﻬَﺎ ﺍﻟَّﺬِﻳﻦَ ﺁﻣَﻨُﻮﺍ ﺍﺫﺍ ﺟﺎئكم ﻓﺎﺳﻖ ﺑﻨﺒﺄ ﻓﺘﺒﻴﻨﻮﺍ ﺃﻥ ﺗﺼﻴﺒﻮﺍ ﻗﻮﻣﺎ ﺑﺠﻬﺎﻟﺔ ﻓﺘﺼﺒﺤﻮﺍ ﻋﻠﻰ ﻣﺎ ﻓﻌﻠﺘﻢ ﻧﺎﺩﻣﻴﻦ ) خلي هاي الأيه ابالك ابن خالتي

حميد ظل ساكت ويبوگ نظرات خطف على صبره وهيه ادنك راسها لاحظهم استاذ صائب يدحگ عليهم ثنينهم

گاله ليال طالبتي اني ربيتها واعرف اخلاقها شنو صحيح ذكية وشاطره بس هاي السوالف ما تعرفها ولا تفهمها ليال نقيه مثل مي زمزم وما شفت طفله مثل برائتها

اني اتمناهه بنتي مو اخت الك تعذروني على كلامي يولد بس انتو حيل ظالمين هالبنات مشبعينهن اكل ولبس بس ما منطينهن حنان الأخ

جاوبه حميد گاله يالله بعد منا وغاد نشبعهن حنان الأخ راح يظلن هين ودراسة ماكو

جاوبه صائب اي هاي الي گادر عليها تروح وترجع على دراستهن اتحداك. اذا عندك غير هاذ التهديد

يالله ماجد امشي تصبحون على خير وطبطب على جتف عماد گاله انته العاقل هين دير بالك

ديالا: الصبح گعد ابويه تعبان عيونه مورمه گوه سحل روحه وراح عالفلاحين يشوفهم اني بدلت لجاهد وجوانه وريگتهم تا نداوم گاعده امشط لجوانه گالت محد قلاني

ديالا: مو سألتج البارحه گلتي ما عندي دروس

يالله گولي شنطوج

جوانه: لياضيات

ديالا: مال شنو

جوانه: مال واحدات ثنين

ديالا: واحد زائد واحد موو

جوانه: اي

ديالا: يالله سهله هسع لبين ما اخلص تمشيط تحفظين واحد زائد واحد شگد يصير

جوانه: يصيل واحد طويييل

ديالا: يبو يهالعثره يصير ثنين ثنيييين مو تروح تگولين للمعلم يصير واحد طويل اموتج

بدلت ولفيت شعري رجعت على ليال انوب بلكت تقتنع وتروح ما فعلت عبن وجها بي علامات ضرب اثمها وارم وخدها ازرگ وتشكي من صفحتها تگول توجعني

حميد طلع من الغبشه يدور لحامد وشايل سلاح تجاهل كلام ماجد من گال خلو عليه يمشي ويدردم اذا الزمك يا حامد اشرب من دمك

ما گدرت اتريگ مسدوده نفسي مشيت گايده جاهد وجوانه ابتعدت عن البيت مسافه تلاگيت ويه حميد گال وين موليه گتله عالمدرسة

گال امشي ولي جوه بعد دوام ماكو تهجبن هين وتگعدن جيبي الجهال اني اوديهم

ما جاوبته ختنگت اخذ الجهال وراح جوانه گلتله حميد لا تفوت على صفي يخافون منك الجهال يعبالونك سعلوه

رجعت واني ابجي گعدت بالطرمه حاطه كتبي بحضني ودموعي تصب شفت حيدر يدحگ عليه من بعيد صديت بصفحه

رجع ابويه يمشي سريع وينادي عمااد عمااد طلع عماد گاله هاا يابه گاله عماد وليدي الي صار صار بعد

جاوبه عماد يابه شكو گاله الجماعه الي صاوبوك اجوني عالمزرعة

ويريد يجون عالبيت يسوون گعده للصلح

عماد لزم عمليته وگام يتفلحط وتعصب ابويه حضنه گاله وليدي افتهم عليه والله لو عدنه ضهر دمك ما يظل بالگاع

بس يوليدي شوفة عينك احنه ما عدنه احد ولو بتلينه خواتك. وامك وين يروحن تعوذ من الشيطان انته عكازتي بهالدنيا والعاقل بين اخوتك

وهذول الناس گالو ندز خبر اذا اكو شكالات نگعد يم طرف ثالث وذا ماكو تانجيكم عالبيت ها شگلت العمده

جاوبه عماد بقهر اي هاي هيه يابه الي تشوفه مناسب سوي واني ان شاء الله عد حسن ضنك

طبطب على جتفه وگاله ابني السبع عجل اروح ارجعلهم خبر وذا قبلو نسويلهم غده عود ادزلك طارش

صد عليه گال هاا ديالا شبلاج شو ما مداومه

حجيت بعبره گتله حميد رجعني گال ماكو دوام بعد

ابويه صفگ بأيده گال شفت عمايل حميد والله خايف گلبي تزل عيني عن هالبناويت ويظلن تحت حكمه الا يكرهن بالدنيا عماد گال امشي داومي وابويه گال اذا وگفج انوب تعاي بساع بلغيني هاذ امت يلتحق واخلص منه

گمت واني ابتسم وامسح دموعي حضنت كتبي وركض عالمدرسة وبنفس الوقت خايفه حميد يشوفني ويسحلني يربي هاي شلون طلبه وگفت بالطريق ارجع لو اداوم

تشجعت اروح واختل منه وافوت لصفي

وصلت المدرسة وبساع على صفي

گلبي يطرد خايفه وبسبب الخوف بنص الدرس ولعبت نفسي طلعت برا وسعد لحگني جابلي مي اجه ماجد لابس البدلة العسكرية يگصف من النضافه وشايل مدري شني بأيده يدخنها مثل الجگاره بس هاي شكبرها ولونها بني

شافنه وجان يجي گال شبيج گتله دخت عبن ما تريگت وخايفه من حميد خاف بعده بالمدرسه ما فعل يخليني اداوم وابويه دزني

گعد تك ركبه وما خله ملابسه اجوس الگاع گال

مهره شلونها احد حاجها هزيت راسي بـ لا

يتلفتت هين وهناك ويدخن بهاي الي شايلها مدري عوده مدري شنو اول مره اشوفها

صد عليه گال عجل صف صائب وين گتله ذاك الي بابه ازرگ

وصف رافده ياهوو

اشرتله ذاك الي ملزوگ على بابه ورد

گال خوش عجل اروح اسلم عليهم گبل لا التحق يالله گومي فوتي اطلبي اجازه وارجعي عالبيت مزالج تعبانه طلع استاذ خلدون عااط بيه ديالااا من شاف ماجد انخلس گال هاا هلا هلا بيك سيدي تفضل جوه

ماجد خزره گاله ديالااا مريضه اذا تريد تروح عالبيت خلها تروح مسح راسي وگال موفقه وبوس سعد وراح على صف استاذ صائب

يتبع....