رواية عرين الصياد الفصل العاشر 10 بقلم شذرة العدوان

الفصل 10

بقلمي شذرة العدوان

رؤياهم حق

تبدو عليكَ مِن الغرامِ أدِلّةٌ

وإخالُ أنكَ عاشقٌ مفتونُ

بُحْ بالذي تُخفيهِ من سِرِّ الهوى

كِتْمانُكَ الأشواقَ ليس يَكونُ

إن تُخْفِ سِرَّ هواكَ أو لم تُخْفِهِ

ستَنُمُّ عنكَ وعن هواكَ عيونُ

ما دام نبضُكَ في المحبةِ صادقاً

هيهات يَخْفَى سرُّكَ المكنونُ

……

امشي بطريق مجهول ادور اهلي وينهم مرعوبه اخاف اظل وحدي حت بالنهار شفت خيمه من بعيد رحت اركض عليها

فتحتها شفتهم اهلي كلهم عاتبتهم ليش عايفيني وحدي محد جاوبني دحگت عالخيمه جانت عباره عن بيت شعر دائري ومثبته بعامود واحد بالوسط ومشدوده من الطوارف

بس مرتاحين بيها وكلشي متوفر تعجبت رغم خيمه بس كلشي بيها فجئه وگع العامود الي بالوسط والخيمه انهدت على روسنه صار ظلام ومعد اشوف احد ارتعبت اخاف من الظلام احاول اخلص روحي وانادي اهلي اسمع بس صوت صريخهم ظليت احاول اطلع ماكو طلعت ايد من جوه الخيمه لزمتها وجان تسحبني

طلعت من الخيمه وما شفت الي طلعني منها رجعت احاول ارفعها واطلع اهلي وجان تطلع منها حيه جبيره گامت تركض ورايه لحد ما وصلتني بيت فتت علي وختلت بحجره گمت ارجع خطوات ورا وادحگ عالباب خاف تفوت الحيه ابجي وكاتمه صوتي

حضني شخص من ورا صديت علي ما شفت وجهه جان ظلام دامس وبس الباب علي ضوء گالي اااش لا تخافين انتي يمي محد يأذيج حضنته وطمأنيت رتحت ونشال الخوف مني وهو يمسح على راسي

غمضت عيوني واني بحضنه واحس بالأمان غفيت ومن صحيت ما لگيته

سمعت صوت بالحجره التفتت ورايه شفته ثعلب اسود هجم عليه

ليال:فزيت واني اصرخ يمااا يابااا وينكم وحاطه اديني على وجهي اجت فاتن حضنتني وتهدئ بيه فتحت عيوني استوعبت هاذ حلم حضنت فاتن واشاهگ خفت خوف مو طبيعي گلبي يطرد يريد يطلع من صدري واتلمس وجهي واتخيل الثعلب بالحجره اتلفت واختل بحضن فاتن ظلت تهدي بيه وتگلي شفتي كابوس اهدئي گومي صلي الفجر مزال اذن

گمت واني خايفه ارجف توضيت ورجعت عالحجره فاتن گعدت ديالا تصلي ما فعلت تگعد تگلبها منا تنام منا فرشنه المصلايه وصلينه اني وفاتن

مددت بفراشي غطتني وهيه فارشه بصفي وديالا منا مخليني بالوسط دحگت مهره ماكو

لزمت ايد فاتن سألتها وين مهره گالت نايمه يم ابويه وانتي نامي لا تفكرين بشي

حطيت راسي عالمخده ودموعي تصب شلون ما افكر ليش الي صار ينسي

تذكرت من جابني ماجد سحل وشفت استاذ صائب حيلي گله گام يرجف فتت عالحجره ركض

وقفلت الباب بالسرگي مو خوف منه بس احترمه واستحي يشوفني بشكل مو حلو

فتحت الكنتور بساع وبدلت قميصي المشگوگ لبست بلوز وعدلت نفسي فاتن جانت ادگ الباب رحت تا افتحه بس من سمعت صوت حميد شگد مرعب متت بدمي

سديت اذاني وگمت اصرخ افتر بالحجره اتمنى ينفتحلي منها منفذ وانهزم منه گعدت بصف الكنتور حطيت راسي بين رجليه وابجي مرتعبه وارجف مثل الي ينتظر اعدامه

جفت عليه حميد مثل الذيب گطعني تگطع بالضرب بحياتي محد ضربني جان دوم يصيح علينه ويخوفنه ويهددنه بالضرب بس ما يمد ايده علينه

الكل يحاول يفكني منه وما يگدرون من الضيم الي شفته اعترفت على مهره غصب عني

فكوني من حميد وديالا حضنتني ماجد حاول يشيلني نهرته بزعل شگد كرهته وحقدت علي

غفيت من التعب والضرب وقلة النوم الي عشناها بأخر هاي الأيام على أمل اني ارتاح بس شفت هاذ الحلم رعبني بزياده وشال النوم من عيني ظليت اتگلب بافراشي وافز كورت نفسي ركبي خليتهم يم صدري

انفتح الباب وفاتن گالت تعاي مهره اني گاعده

اجت يمها گالت شلونها ليال

جوابتها مهره شنهو لونها كسرها حميد تكسر تنام وتفز واخر شي شافت كابوس

ردتلها مهره بقهر بنات هالبيت مكتوبلنه القهر والحزن زعم ادعي ليل ونهار حظ ليال وديالا وجوانه مو مثل حظي وحظج

فاتن:انتي مو زعم عفتي حامد شجابه

مهره:ااخ أي عفته يروح يشوف حياته بعيد عن صبره وبنتها بس هوه ما عافني يا فاتن ظل يلاحگني يتلثم ويجيني يم الفلاحين زعم عابر سبيل يدور شغل يتعنى من ديره بعيد ويخاطر بحياته تا بس يشوفني

وظل يدزلي رسائل اخر رساله دزها بيوم اصابة عماد اشم رسايله واحبهن احضنهن بس ما رديت عليهن اريده ينساني ما جنت متوقعه سوايته هاي

من اجت ليال وگالت حامد يناديج گلبي هوه الي ساگ رجليني ورحتله حضني ويبجي يبوسني بكل مكان ويشمني بلهفة

ضعت يمه ما حسيت على روحي فاتن وهو حاضني بكل قوته بوده يحطني بگلبه

توسلني انهزم وياا ما فعلت

ااخ ياا حامد ليش سويت هيج ودمرت حبنه الي قدسته بكل جوارحي وصنته

كلماته بعدها ترن بأذني وهو بالسياره يگلي سامحي انانيتي احبج مگدر اعيش بلياج اعشگج

ومن نهزمت منه يصرخ بعلو صوته مهره غاليتي لا تعوفيني ثنه ركبه بالگاع ويبجي ويضرب على راسه لا تعوفيني مهره

ظليت بالبوابه ورجليني جمدو دعيت ربي بگد هاذ الجليد الي صابني يصيب گلب حامد ويبرده وينساني

ااه يحامد شتحملت لخاطر عشگنه شذليت نفسك

اذا صار على حامد شي اموت يافاتن اموت گامت تنحب وتبجي

فاتن:بلكت الله يلگا ماجد گبل حميد

مهره:اوو ماجد اعصابه اطگع من حميد

فاتن:بس مو همجي مثل حميد

مهره:ما عندج عصاره شي ادهن رجليني ملخني العاگول تملخ

فاتن:عندي عصاره لدرويش حطي منها تدرين اني لو بمكانج مجان سويت مثلج ما يلام ابويه من سماج مهره

مهره:الحمد لله الله انطاني شجاعه احنه كلنه سبعات بس ليل خوثه

فاتن:ايي والله ام دميعه تگطع گلبي عليها گومي مهره نامي وراج گعده من الصبح هسع صبره جاي تفكرلج بعريس تا تزوجج

مهره:والله لو اطگ ما اتزوج لو حامد لو اظل موغفه على گلبها

اروح اصلي محتاجه شي

فاتن:سلامتج تقبل الله

ليال:سمعت حجيهن كله وما ركزت غير على كلمات مهره من تحجي عن الحب والعشگ

شنو هاذ العشگ شنو شعوره شنو شكله

اريد افهم كلها تحجي بي وما جاي افهمه

دخت من التفكير ونمت وما حسيت الا ديالا تگعد بيه تا اداوم

رحت دحگت على نفسي بالمرايا العب النفس عبالك طالعه من مصارعه گمت ابجي ما احب احد يشوفني بهالشكل اريد اظل حلوه ومرتبه ما فعلت اروح

اجت مهره من شافتني حضنتني وگامت تبجي واني حضنتها خفت عليها من دورتها وماكو گامت تبوس بوجهي بكل مكان بي علامه وتگلي بنتي الذيبه سبعتي سامحيني

ليال: بست ايدها گلتلها مسامحه مهره احبج بعد لا تروحين

مهره: بعد گليبي بنيتي شلون اروح واعوفجن امشي اطلعي بالشمس اگعدي افتحي شعرج خلي يتشمس واني راح اسويلج ريوگ رحت بمكاني المعتاد توني تا اگعد شفت حيدر وحجي حسين گبالي رجعت بساع وين اگعد ماكو بس هاذ المكان بي الشمس حلوه

اخذت جودليه ومشط وصعدت عالصطح بصف البيتونه فرشتها مشطت شعري شگد وگع منه شعر هلس نصه حميد ختنگت احب شعري حت ما اخلي مهره تگص اطرافه بس اشوفها شايله المگص اخترع بالتواسيل يالله تگدر تگص منه طرف بسيط واظل زعلانه سبوع

انهضمت لميت الشعر وابجي لفيتهم خليتهن جوه الجودليه تا اخلي بالنخله نمت على بطني نثرت شعري بالمگلوب ظليت فتره الشمس خدرت جسمي

ديالا:راح ماجد لصف استاذ صائب وسعد جابلي مي خطيه احس صخنت من گد ما لعبت نفسي ودايخه لايبه روحي ما ادري شجاني المدرسة تفتر بيا

طلع ماجد من يم استاذ صائب وراح لصف ست رافده شويه وطلع هو وحميد وماجد عاگد الحواجب وخازر حميد ومدري شيحجي ويا واگفين بالباب حميد يبين بگد النمله يم ماجد

حميد مدنگ راسه ما حجه مشو بتجاهي لابيه اگوم ولا بيه اظل من شفت حميد خفت منه سعد صار بيني وبينهم عود تا مايشوفني

بس حميد مثل الثعلب اذا ما يشوف يشم اجه عليه گالي شعندج هين شبلغتج هوب عليه تا يجرني

رفعت اديني اتفاده ضربته خفته يضربني گتله ابويه دزني والله روح اسأله

ماجد لزم ايده وضغط عليها گاله كافي حميد جوز من خواتك ودراستهن شنهي طينتك متگلي هاي بدال ما يكيفن بيك تجيهن عالمدرسة گامن اذا يشوفنك يخربن نفض ايده گاله خايب ما تريد احد يبجي عليك اذا فطست بگد الزمال وعقل ما براسك

راح حميد وهو خازرني ويتوعدلي

ماجد هز راسه بعدم قبول گال گومي روحي لهلج

متشوفين حالتج وجهج اصفر جنج طالعه من الكبر تقسمين الورث

گتله مگدر اروح منو يجيب جاهد وجوانه

گال سعد يجيبهم امشي اوصلج لبيتكم سعد جيب الكتب مالتها وياك

جرني من ايدي گوه اتوازن گادني وطلعنه

بالطريق احس روحي لايبه واشوف كلشي بنفسجي واحس الگاع تمشي من جواي وعبالك اريد اگع من مكان عالي ماجد سريع بالمشي واني اسحل بروحي ورا

يمشي گدامي بعد عني جثير گال عجل ليال ما داومت

گتله لا تعبانه ما گدرت تجي

التفتت عليه گال شبيج ديالا اشو گوه تمشين والسانج ثگل

ديالا: رجع يمشي عليه دخت وگعت انهد حيلي وماجد عاط بياا ديالاااا

رغم دايخه بس احس مثل الحلمانه ماجد شالني ويركض وصار صوته بعيد معد اسمعه وظلام دامس صابني

فتحت عيوني واني ابيتنا والكل ملتم عليه بس بعدها الدوخه بيه وصوت لجتهم تأذيني وكلها تسأل شبيج شصابج غمضت عيوني

اسمع ماجد يگللهم هاي البنت مريضه مدري شبلاها لگيتها برا الصف وجها اصفر جبتها اشو بالطريق وداخت وين صار عماد دزينا على سيارة مو طيارة

فاتن تصفگ بأديها وتگول ربي دخيلك بس لا سكر

ماجد يگولها لا تفاولين عالبنا خاف عدها فقر دم لو ضغطها نازل زين هاي متريگه اكلت شي ولو الي صار البارحه گدامها لو تاكل بعير ما ترجع حالتها زين ليال وينها اشو ماكو

جاوبته مهره ليال عالصطح همزين ما موجوده جان خربت بصفها

ديالا: اسمعهم اشكال يحجون بس مگدر افتح عيوني الساني ثگيل واحس نفسي طايره

اجه عماد گال يالله هاي السياره جيبوها تانروح اجه يشيلني ماجد گاله وخر عماد عمليتك ما تگدر شالني ماجد وحطني بالسياره واجت فاتن ويايه وعماد وامي نمت على جتف فاتن واحس السياره طايفه بينه يربي اني شبيه

ليال: نايمه على بطني وصاده عالحايط مال البيتونه ومخليه ايدي على وجهي حسيت ايد تمسح بشعري عبالي مهره بدون ما ارفع راسي لزمت الأيد حسيتها ايد جبيره وخشنه فزيت بساع شعري صار على عيوني كفيته وشفت ماجد

گال شلونج ليال دورتلج بالمدرسه ما لگيتج مداومه

ليال: ما حجيت سكتت

عدلت نفسي كورت گعدتي وصديت بصفحه جفيت عنه ما حجيت ويا گمت اسلت خيوط من الجودليه

بودي انهد ما اخلي بالحجي بس عيب استحي منه رغم قهرني

اندار ماجد وصار مقابيلي صديت عنه وهم گام وصار مقابيلي واني مستمره كل ما يصير مقابيلي اندار عنه گال والله خوش لعبة حبيتها اخر شي صديت عالحايط وغطيت وجهي بأديني

گال ما راح تسامحيني ليال

ما جاوبته ساكته گال زين بس خن اشوفج گبل لا اروح شو صدي عليه مو جاي احاجيج هي صدي عليه

ما فعلت اجاوبه بشي اني من ازعل زعلتي كشره اظل مطنگره وتحز بگلبي هوه طگت روحه وجان يلزم وجهي بالگوه خلا مقابيله ومركز بعيوني جان مبستم من شاف وجهي ختفت ابتسامته فتح عيونه ويلمس علامات الضرب الي يم عيني ويم شفتي شد على شفايفه گال الله يعثرك حميد جعلها ايدك بالكسر

وخرت ادينه بنتر گتله عليش جيت علينه كلشي صار بسببك بعد لا تجي علينه رجعت صديت عالحايط وگمت ابجي

گال سامحيني اني مذنب والأعتراف بالذنب فضيلة

والمسامح كريم سامحيني ما جاوبته مجتفه اديني وصاده عالحايط

گال شتريدين هديه وتسامحيني

بدون ما اصد علي گتله كلشي ما اريد خليت شعري ورا اذني وامسح دموعي برداني

گال ضعفانه صديت علي بنتر گتله جذب ما لحگت اضعف من البارحه لليوم

گال افا اني تسميني جذاب مو عيب تغلطين على واحد اكبر منج اروح اگول لصائب عليج اخلي يحطلج صفر

دحگتله بزعل برطمت رفعت اكتافي گتله اني مو عليك اسفه

مسح على شعري گال اني الي اسف سامحيني يالله اريد اولي التحق فضيني گولي سامحتك ماجد صديت بصفحه وجان يدقني من خصري فززني گمت اضحك

هاي نقطة ضعفي الي اكرها اغار من خصري ومن راحة رجلي ومن رگبتي

گال يالله ضحكتي راحت هيبة الزعله سامحيني تاروح هاا نسيت اگلج ترا ديالا مريضه ودوها للطبيب

فتحت عيوني شنو شنو ديالا شبيها گمت گتله صارلك ساعه ما حجيت گال هو اني الوطن الغالي نسيته

عفته وحدرت ركض وماجد ورايه يگلي اواشج لا تگعين لياللل

ليال:حدرت بساع تلاگيت ويه امل گلتلها وين ديالا گالت ودوها للطبيب هسع يجون تعاي سويتلج اكل

گمت ابجي گلتلها ما اريد ماجد سلم على امل وطلع صار بالطرمه وتلاگه ويه ابويه طلعت وراهم

ابويه يگله هاي رايح تلتحق وليدي واني جنت مكيف انته هين واريدك تكف ويايه

ماجد گاله ليش ملا شكو

جاوبه راح يجوني الناس الي صاوبو عماد الناس تريد تگعد للصلح وهاذ حميد شلع گلبي مجاي اگدرله خايف يبعرها جدام الوادم شلون هسع

ماجد طبطب على جتف ابويه گاله صائب هين

وأن شاء الله ما يصير شي والله ياريت اگدر اظل بس شوفة عينك التزام

عذره ابويه سلم عليه وراح

فات ابويه شايل سبحته ويستغفر تلگيته مبتسمه شافني وجان يتجمد بمكانه لزم وجهي وفاتح عيونه هاي منهو سوه بيج هيج منهوو ضربج گتله حميد يابه سگطني تصگط دفرات وهلس شعري حضنته وحجيتله كلشي فحط گام يتهدد ويصيح اجت صبره جابتله مي دفره من ايدها گاللها هاذ حميد تربيتج ودلالج دحگي شمسوي بالبنيه

صبره ادحگ عليه بغضب بودها تاكلني گالت ميخالف ملا اخوها ويمون

جاوبها ابويه بنتر مو اخوها هاي بنتي محد اله حق يمد ايده على اي وحده من بنواتي كأن من يكن بالحرام اليوم اذا ما اخزي شاربي مو عليه

طلع ابويه شايل العصه ويدور الحميد

لزمتني صبره من عكسي بعصبيه تگلي نادي ابوج گليله ميخالف وحميد ما ضربني گلتلها لا والله ما اگول خلي ابويه يضربه ليش ضربني هلس شعري

دفعتني گالت هينه لج بربوگ

عفتها ورحت عالمطبخ سوتلي امل لفة جبن وصبتلي گلاص جاي

ديالا: شبه صحصحت فتحت عيوني اني بعياده دكتور هادي المتواضعه نايمه عالقريوله معلگيلي مغذي الدوخه راحت طلع عندي هبوط بالضغط

خلص المغذي ورجعنه الحمد لله صرت زينه

اول ما حدرنه من السياره وصار الهبط ابويه لازم حميد ويضرب بي بالعگال كشمه تكشم وحميد بالگاع رافع ادينه يدافع عن نفسه ومحمد واگف ما يگدر يحجز وعماد تجاهل ولا جنه شافه

شگد هوه قاسي وما ينحمل بس يحترم ابويه حت ما انهزم خله ابويه يضربه ويبرد گلبه بس صبره تفلحط وتحجي گاللها ابويه اذا ما سكتي العگال الي لاح حميد يلوحج

ابويه صد عالولد وهو يفح من العصبيه واشر بأصبعه بحركة التهديد گللهم اسمعوني زين بنواتي محد علي بيهن هاي مال ذني خواتنه نگعوها اشربو ميها اشر على نفسه گال ذني بنواتي اني ابوهن اني خلفتهن قطعه مني بالحرام الي يمد ايده على وحده منهن

منا وغاد الا ازين شاربه جنب وجنب فتهمتووو

بصوت واحد گلوله اي يابه

ردلهم ولبه تلب هالوجو راح تجيني وادم وره الضهر الي بيكم يفص جلمه وحده وياهم اتبره منه واغضب علي ليوم الدين كافي شر خن نعيش بسلام امشي ولي حميد نضف الديوان اجلفها

جاوبه حميد يابه شون انضف الديوان انييي

عجل النسوان شنهي شغلهن

ردله امشي ولي حجي زايد لا جثر رتب الديوان

ليال: افتر وافرك بأديني انتظر حميد يجي ويكتله ابويه كل شويه اروح عالباب ادحگ سمعت صوت ورايه احم التفتت شفته حيدر گال خويه حجي حسين يريد ملابسه حتى نروح

رحت على مهره گلتلها جابت ملابس حجي حسين بعلاگه انتطهن الحيدر مشو وصلو الباب وگفهم ابويه جلب بيهم بس ما ظلو راحو

رحتله گتله هاا يابه لگيت حميد گال لا والله دورتله النذل وما لگيته اروح عالخيول بس تشوفينه تعاي ناديني هزيت راسي بــ اي

ظليت اراقب شفته اجه واروح ركض انادي ابويه يابه يابه هاذ حميد اجه

ابويه بساع كام واني ورا اوز بي گتله گطع شعري يابه هلسه كله دفرني على صفحتي ظليت احجيله لحد ما وصل حميد ولزمه بالعگال هبط

اجت ديالا شافت الهبط رحت گدتها جوه نومتها على قريولة ابويه

وره الضهر الكل ينتظر الوادم تجي امي گالت لأمل سوي جاي بالكتلي يمه خاف زلم جثيره

اجت فاتن گالت ديالا صرتي زينه

ديالا: اي زينه الحمد لله

فاتن: عجل اريد ادزج على حجيه خالده جيبيلي سگوه يمكن درويش كارف

ديالا: گوه قنعت ليال تروح وياي حجيه خالده بيتهم مسافه وما عدهم احد بس ليال الا تكشخ وتبدل وتمشط وتعدل نفسها ولبست حجل عبالك رايحين عرس ومحد راح يشوفها هيه حجيه خالده تك عين

رحنه وكل شوي ليال تگول اذا احد سألني شنهاي العلامات بوجهج اني ما اگدر اجذب بس انتي گليلهم هاي وگعت

ديالا: يعني انتي تطلعين منها واطلع اني الجذابه

وصلنه بيت حجيه خالده واخذنه السگوه لفاتها بعلاگه صارتها اشمها من ريحتها طيبه

رجعنه وصلنه مسافه عن بيتنه مقابل مزرعة الخس وشفنه سيارة واگفه بنص الطريق يمها زلم ثنين واحد فاتح البنيد والثاني گاعد مدري شياكل

ليال: هسع منين نفوت امشي نرجع نلوف من البستان

ديالا: طريق البستان بعيد وبي جلاب تمرعدنه تعاي نفوت من يمهم قابل راح ياكلونه

ليال: زين هذول منهو

ديالا: شمدريني سيارتهم بتجاه بيتنا يولي خاف هذول الي ينتظرهم ابويه

ليال: يهالعثره ظلينه واگفين اخر شي قررنه نفوت بدون ما ندحگ عليهم

ديالا: مشينه وصلنه يمهم وليال لزمه البلوز مالي من ضهري لو بس تبطل هاي السوله

ليال: مدنگه امشي ورا ديالا الفضول خلاني التفت عالزلمه الي گاعد مجرد صديت لگيته مركز عيونه بيه

بساع عرفته هاذ نفس الشخص الي شفته بذاك اليوم من گطعو علينه الطريق يسألون عن بيتنه ليش هاي الخلقه تنسي شوارب مفتوله من الطرف وعيون حاده مثل عيون الصگر اسمراني حيل محترگ

ديالا تمشي گدامي على كيفها خايفه لا تطمس بالطين دفعتها بساع گدامي خفت منه والله شكله يخوف

وگعت ديالا بالطين والرجال گال الله الله وگام يمشي علينه وگفت مرعوبه واجر بأيدها تا تگوم گومي ديالا گومي خن ننهزم

ديالا:الزلم واحد منهم يصلح بالسيارة ولا دحگ علينه والثاني گاعد عالمرز وحاط راس خس بصفه جان ياكل حايشه من مزرعتنه مشينه من يمهم ما سمعت منهم شي ولا تعرضولنه ليال مدري بيها خيط خبال مدري شنهي دفعتني انبطحت بالطين يبوو شگد فشله انوب تجر بيه تگلي گومي خن ننهزم من شافت الرجال جه يساعدني

بس گرب من عدنه هدتني وطگها بركضه عافتني وحدي وتصيح ياباااا

الرجال اجه وگفني گال الله الله بنيتي صارلج شي يابه گتله لا عمو زينه گمت ادور للسگوه وگعت مني اليوم فاتن تشلع اذاني دنگت بالگاع ادور الرجال گالي شدورين گتله سگوه گام دنگ گام يدور ويايه

انوب رجعت ليال شايله كوم حصو وطالگ علينه تگول للرجال هدها لا اطلع دمك الحصو صار علينه مرادم والرجال وگعو بي حصوتين حاط ادينه ويحمي نفسه گال يول بالحرام هاي البنت فلا ناصحه مهبوله يول كافي اطالگين الله يملهج

عطت بيها ولا ليال جاي ندور السگوه اسليمه اطمج

هم لو جاي ادافعلي عدل نص الحصو وگع بيه

خلصن الحصوات وراحت تركض تجيب انوب الرجال گالي عوفي السگوه وامشي ورا اختج هاي مبينها صايبها هبال

شگد فشله يربي رحت ركض شفتها تلم حصو وحجار كبار من الگاع شافتني وجان تبتسم گالت انقذتج ضربتها على راسها خبال الخبلج امشي اليوم فاتن تشلع اذانه ضيعت السگوه

ليال: وصلنه بيتنا شفنه شگد سيارات طبينه جوه شافتنا مهره گالت يهالعثره شنهاي حالتجن جنتن تلعبن مو

فاتن گالت مبين من شكلجن ما جبتن السگوه

ديالا: گلتلها حجيه خالده گالت ما عندي تعالن باجر

فاتن بيدها خبزه گالت وهاي النعمة تجذبن فوتن يالله بدلن يمنه نسوان

ليال: منهو النسوان

مهره: اجن ويا الزلم

ديالا:رحت انزع ملابسي وغسل الطين

وابدل گلت ليال عود انتظريني نفوت اني وياج نسلم عالنسوان

ليال: رحت عالهول واجيت عالنسوان يمهم صبره تحش سوالف وهاجر بصفها عجل امي وين وگفت بالباب ادحگ عالنسوان شهل ضخامه وشهل لبس ما ينشاف لبسهن من الذهب مشنشلات تشنشل يخرخشن وهنه گاعدات ادحگ عليهم وهنه مركزات بيه وياهن حجيه بگد امي گالت بنيتي شنهي ما ناويه تسلمين

گلتلها امبلا خاله هسع اسلم عليجن بس تجي اختي انتظرها اشو گامن يضحكن رحت گعدت على حافة الشباك انتظر ديالا تجي تا نسلم والنسوان ادحگ عليه صبره گالت تعاي سلمي مخبله

گلتله بس تجي ديالا اصبري

ديالا: بدلت بساع ورحت عالهول شفت ليال عبالي سلمت طبيت گلت السلام عليكم وليال ورايه گالت السلام عليكم فتريت عالنسوان وحده وحده وليال ورايه شگد لبسهن مرتب وشنهي الذهب هاذ

وگفنه اشو يدحگن على ليال ويضحكن ليال طلعت ضايجه تعبالي يضحكن على وجها عبن بي علامات ضرب

رجعنه عالمطبخ فاتن ومهره محضرات صياني الجاي وينتظرن الولد گالن غير طسو طسه اشو ولا واحد اجه گال شگد عددهم الزلم

فاتن گالت صائب جاب عمامه ولد عمه خمسه وهو وياهم سته ولدنه وابويه اربعه ظلو الزلم ذولاك شلون نعرف عددهم

ليال: گلتلها هسع راح اعرفلج طلعت ركض انگز وديالا اجت ورايه مشينه على كيفينه وبلشنه نحسب عدد الشحاطات الي بالباب مال الديوان

ديالا: حسبناهن ورجعنه تلاگينه ويه الزلم الي جانو بالطريق سيارتهم عاطله ليال ركض نهزمت الزلمه گال هاج يابه هاي السگوه لگيتها بالمكان گتله شكراً عمو اخذتها ورجعت

مهره وفاتن گاعدات ينتظرن گالن الجاي برد كل شوي نحمي انطيت فاتن السگوه گلتلها هاج جابها حفيد حجيه خالده اخذتها ودحگتلي بطرف عينها

ليال: گلتلهن عرفت عدد الزلم

فاتن يالله گولي شگد

ليال: اخذت نفس گلتلهم حسبت بالباب 24 شحاطه

6شحاطات استاذ صائب وعمامه

ديالا: و4 شحاطات ابويه وولدنه

ليال: وهذول الي اجو من تالي شحاطتين يعني صارو 26 يالله صبن على هاذ العدد

ديالا: مهره لطمت وجها گالت يهالصگعه يول انتن امت تصيرن اوادم امشن انگلعن على حجرتجن امشن فاتن گالت يالله عوفيهن المهم عرفنه العدد يالله صبي ونودي للهم بالباب

خلصت الگعده ومشو الوادم

اجه ابويه وكل نسوان بيتنا گعدن يم الولد يستفسرن

ابويه گال الرجال حسب كلامه والشهود عماد عايل من باع شبابيج الزلمه وهو دافعله فلوسهن

ومن اجه يستفسر ويريد حگه حميد تهجم علي وفشر وغلط على عرضه

وهذول الناس اهون ينجتل منهم واحد ولا احد يفشر على نسوانهم وصار الي صار

عاد اجونه للصلح وگالو اطلبو الي تردو ضربة فشگ بمكان ضربة ابنكم لو تردون ودي (فصل فلوس)

گلتلهم ان شاء الله احنه اهل وما بينه ودي واخوان بينهم والي صار صار وانتهى واعتبرو غداكم

الشيخ گام وحب راسي وگال انتو ناس ذهب

ان شاء الله تصير بينه گربه ونسب

ديالا: يابه شنهي يعني

جاوب ابويه يعني تصير بينه مصاهره ناخذ منهم وننطيهم ابن عم صائب اجيكم ان شاء الله يشرفنه گلوله هله بيك وبالجمعة نروح نخطبله

گالت صبره هاا والله خوش هذول الناس صدگ مال نسب مبين عايشين بعز ليش ما ننطيهم

ردلها ابويه اي خوش ناس بس اني ما عندي نسوان للزواج مهره اذا مو هيه تگول يابه اريد هاذ ما ازوجها وديالا وليال بعدهن مجهله اذا ما يكملن دراسة ما يعرسن

گالت صبره شنهي ملا تظل مهره اول وتالي راح تعرس

ردلها تعرس من تكون مقتنعه ورايده هالشي

سدو الموضوع

ليال: مرت ايام واجه ماجد من العسكرية جايبلنه هدايه اشكال ملابس واحذية وفساتين الي ولديالا فستاني اسود گصير وفستان ديالا احمر وهم گصير

سامحته وصرنه اصدقاء يوميه يجيني للمدرسة يفوت عالصف يسلم علينه استاذ صائب اشوفه حيل يضوج من يشوف ماجد يجي

وبيوم اجه وگف بالساحه طالبات المتوسطه كلهن اجن عالأبتدائي يريد ياكلنه هالگد ما يدحگن مدري اشافن بي بگد الحولي

خلص الدرس وطلعنه گال اني اوصلجن استاذ صائب هم اجه بالطريق نمشي ونستمع لحجيهم كلشي ما نفتهم منه

استاذ صائب گله اشو صارلي سنين بهاي المدرسة ما فد يوم شفتك اجيتني وسلمت

خيرك ماجد رجلج علينه مياله

جاوبه ماجد غير انته اخويه وغالي عليه

گاله هاا عز الله اخوك وغالي عالعموم خلي هالكلام براسك الي ابالك ما يتهيالك خوش كبر عقلك مو جاهل انته

ديالا: الكل مرعوب محد يعرف شصار كل الي سمعنا ماجد ظال يسأل عن حامد لحد ما عرف مكانه وهجم علي ضاربه فشگ ومصوبه ومختفي حامد محد يعرفه وين مهره تبجي وتملخ بروحها تگص الگلب

ليال: هسع اني عرفت عنك كلشي شنو تحب شنو تكره كلشي عرفت خليني احجيلك عني

ماجد: ما اريد اعرف غير شغله وحده الباقي ما عليه بي

ليال: اي شنو هيه

ماجد: تعرف ترگصين

يتبع…………