رواية صغار العم الفصل التاسع 9 بقلم مسرة اسامة
وايــة #صغار_العم
الحَـــلْـــقـــة الــتاسعـــة 🌸
سنابل اتكت ف سريرها : هناء قاعدة معاه ؟
سلسبيل : ايه شوية و بنمشي نقعمز ف الدرجة نراجيها
سنابل شرين تليفونها
لقاته محمد ردت : الو
محمد : اهلا
سنابل ابتسمت : اهلا بيك
محمد : رقدتي ؟
سنابل : لالا مازال
محمد : مابيتش نرقد لين نتطمن عليك
سنابل : بعد ماكليت في السيارة بديت احسن الحمد لله
محمد : الحمد لله
سلسبيل تأشر لسنابل بصبعها : اني طالعة لهناء خير ماتركب ماما على غفلة و تورقلها مهناش
سنابل هزتلها راسها و هي تتكلم ف التليفون : شن بدير غدوا
محمد : بنوصل عصام للمطار مع الظهرية
سنابل : ماقالش انه بيسافر
محمد : شكله خطرله توا
سنابل : وين بيمشي
محمد : جربة .. قال بيقعد عشرة ايام
سنابل : باهي مليح سعدودهم
محمد ضحك : خاطرك ف مشية للبحر
سنابل : ااه ياريت .. بالذات لو قرية
محمد : تعرفي فكرتيني
سنابل : شنو
محمد : صاحبي محي كان حاجز هو و عيلته اليامات هادي لكن صارلتهم حالة وفاة خالهم توفىٰ .. اكيد مش حايمشو
سنابل : الحجز يبي قبله بشهر و ان شاء الله تحصل
محمد : ايه تو نشوفه غدوا و نسأله كان هدا ناخدو الحجز ف مكانهم
سنابل فرحت : مليح بكل ان شاء الله تشد
_______
طلعت سلسبيل من الحوش و قعمزت ف الدرجة تعس
فتحت تليفونها تلهي ف روحها بيه : يا قعادي نعس عليكم و خلاص
و تضحك بروحها : غر كان تقولو بيه باهي هههههههههه
فجأة ركب محمود : خيرك تضحكي زي الختشة
سلسبيل انخلعت و شبحتله : انت ! 😲
محمود استغرب : شن اديري هني بروحك ؟
سلسبيل تلخبطت : النت ف حوشنا ضعيف قلت نفتح من نت يوسف 😅
محمود قام حواجبه : ماتقدريش تفتحيه من حوشكم ؟ ماهو يوصل مش لدرجة تقعمزي ف الدروج زي الشحاتة
سلسبيل : مصح وجهك 😠
محمود فنص فيها : بالك تحسابيني نسيتلك موضوع أيوب
سلسبيل حركت ايدها بإستهزاء : كان عيل و يبيها الطريحة اللي خداها
محمود : عجباتك امالا
سلسبيل تتكلم بحماس : امالا شنيييي انتو تهبكّو و انى نشجع من ورا الباب 👏😍
محمود : مصح وجهك وخلاص ، بالله شن منظرنا بالبدالي العربية نتهابكو
سلسبيل : اححح من الاخير 😍
محمود قام حواجبه : احّا
سلسبيل ضحكت : تي والله تهبلو هي .. بالذات يوسف كيف قاللكم هيا انت وياه للفاتحة هههههه متع كأن مش صاير شي
محمود : لا بالك تبينا نخشو نبكو على حجور اماهتنا و يطبطبو علينا
سلسبيل : انت علاش ضربته ف المدرسة به ؟ ماني حكيتلك
محمود : لان قال عليك كلام مش تمام يا فالحة
سلسبيل انصدمت : بالحق ؟ 😲
محمود : امالا نكذب
سلسبيل : مصح وجهه الخامر رد بالك تصدقه والله الا يتبلى عليا ره
محمود : عارف لان عنده سوابق
سلسبيل : خزي عليه حيوان طلع عيل
محمود : خلاص توا تأدب و روح لحوشهم زي الجريو
سلسبيل ضحكت : لنقانك راجل صقع 😍
محمود ضحك : أثر فيك منذر امالا
سلسبيل تضحك : نحبها لهجتهم
محمود هز راسه و ركب
_______
.
هناء خايفة : يوسف نبي نروح ليل
يوسف يغازل فيها و حاط ايده على خدها : أحبك، أحبك، أحبك ..
و تبا لقلبي الذي فجَّر ضلوعي
و مزَّق شراييني بعَشِقك
قلبي خُتِم بإسمك
فكيف استطيع ان أتخلص من هيامكِ ؟
من ارتعاش روحي حزناً لحزنك ؟
من احتياجي الدائم لكِ ؟
من خلايا جسد تعول مستجدية لمسة منكِ ؟
من روح تسكنها مواسم الشيب حين تبتعد ؟
2
هناء تسمع فيه و قلبها يدق 💓
يوسف : مللت ادعاء القوة وتمثيل أن بعدك لا يأثر بي
وأنا نظرة منك تميتني وتحييني ..
إليك عنقي أسلمه لسيف حبك ..
قطِّعي أوصالي وأَدْميِ روحي ما شئتي
لكن امنحيني لحظة بقربك ❤️
هناء قلبها يدق : حبيبي
يوسف : نعم يا بيبي
هناء : أشعارك و كلامك الحلو هذا مانقدرش نقاومهم ره
يوسف شدها من خصرها : هادو مشاعري يا قلبي مانقدرش ندسهم عليك
هناء حطت ايدها على لحيته و ذايبة : نحبك
يوسف قربها ليه يدوي ف وذنها : و اني نموت فيك حبيبتي
هناء ضحكت : خلاص خليني نروح
يوسف شبحلها و هز راسه : لا مازال
هناء : شن مازال
يوسف : بتقعدي واقفة جنب الباب هكي ؟
هناء : شن تبيني ندير
يوسف حك لحيته و ضحك
هناء : يوسف !!
يوسف يضحك : خلاص المهم شفتك و مشيت كلمتي
هناء ضحكت
يوسف شرين تليفونه ؛ لقاها سلسبيل
هناء شافت اسمها : تو نوريها كله منها
يوسف قرب منها : سلسبيل تستاهل احلى هدية لولاها راهو مش واقف معاك هالوقفة ولا عايش معاك هالحب
هناء ضحكت : صح
يوسف : باهي حبيبتي مانبيش نعطلك اكثر اطلعيلها اكيد فيه حاجة
هناء : اوكى ، تصبح على خير
يوسف باسها من كتفها : و انتي بألف خير
هناء تحشمت 😳 و طلعت بسرعة
يوسف ضحك و سكر وراها الباب
__
سلسبيل واقفة ف الدروج : وينك لتوا ؟؟
هناء خشت لحوشهم و ماردتش عليها
سلسبيل خشت وراها : نكلم فيك عبريني به
هناء ضحكت ؛ خدت شنطتها اللي حاطتها ع الكنبة و خشت لدارها
أصيل طلع من الحمام لقي سلسبيل : وين كنتو ؟
سلسبيل شبحتله : كنا ف الشارع معكسين مع الشباب
أصيل تعفلق جي بيضربها : لما نسألك جاوبي زي الناس ياحيوانة
سلسبيل هربت منه و خشت لدارها و سكرت الباب
__
هناء ف دارها شبحت تليفونها لقاته يضوي ؛ يوسف يتصل
سكرت الباب و ردت : خليني نوصل بس
يوسف : ماقدرتش
هناء ضحكت : باهي نغير قفطاني و نتصل بيك
يوسف : غيري وانتي فاتحة الخط عادي 😍
هناء : يوسف !!!
يوسف ضحك : باهي امتى ما اتمي كلميني
هناء : اوكى باي
يوسف : سلام .. و سكر الخط
_______
سنابل تتكلم ف التليفون : نستأذن منك محمد ننعس هلبا معاش قادرة نتكلم
محمد : مريضة ؟
سنابل : لالا ننعس بس
محمد : باهي تمام ، غدوا لو حسيتي روحك مازال دايخة لازم تعايني
سنابل ابتسمت : ان شاء الله
محمد : ان شاء الله مايصير الا الخير
سنابل : تصبح على خير
محمد : و انتي بخير
سنابل سكرت الخط و شبحت لسلسبيل : روحت اختك ؟
سلسبيل اتكت ف سريرها : ايه ، قريب باتت عنده ، كان ماكلمتهمش راهو نسو روحهم
سنابل ضحكت و تلفتت للحيط
سلسبيل : مع مني كنتي تميعدي
سنابل مغمضة عيونها : محمد ولد عمك
سلسبيل ضحكت : و من امتى ان شاء الله
سنابل : اليوم بس .. يسأل عليا
سلسبيل : امممممم
سنابل : بابا روح ؟
سلسبيل : شاد ديوتي الليلة
فجأة هز تليفون سنابل
شافاته لقاته آدم : اييييي علينا مش وقته
سلسبيل : مني
سنابل : آدم .. هاك خودي مشي معاه ماعنديش ليه خلوق توا
سلسبيل : لالالا فكيني منه بليد
سنابل حدفتلها التليفون : غر هاك كلميه شوية و وزعيه اني ننعس معاش قادرة نقاوم
سلسبيل خدت التليفون : مبردك ديما و انتي بترقدي
و فتحت الخط على اساس سنابل : الو
آدم : تي وين وين وين
سلسبيل : قاعدة
آدم : معقولة ثلاثة ايام فايتيني ؟ لين انشغلت عليك
سلسبيل : ماهو عندنا عرس عمي عوالة مش فاضية بكل
آدم : اااه ايه صح كنت ناسي
سلسبيل تشقلب ف عيونها : كيف حالك
آدم : انى كويس الحمد لله ، انتي اللي كيف حالك بعد الطيحة
سلسبيل شدت ضحكتها : رقدت ف الفراش تاني يوم كله
آدم انصدم : معقولة ؟
سلسبيل تكذب : ايه و العيلة انشغلو يحسابو ظهري و حوضي تكسرو
آدم : لا حول ولا قوة الا بالله .. اسف يا روحي كله مني
سلسبيل : فداء الشكلاطة عادي 😍
ادم ضحك : باهي و خلاص
سلسبيل شرين تليفونها ؛ الأفريقي يتصل
ادم : المرة الجاية وين نتلاقو
سلسبيل : نستأذن منك ادومي الشحن بيفصل خلاص
ادم : باهي حطيه ف الشحن و هدرزي
سلسبيل شقلبت عيونها : ماهو الشحن عند خوي مش عندي
ادم : شن رايك نتصل بيك على رقم سلسبيل اختك و ....
سلسبيل سكرت عليه الخط و هو يتكلم ❌
و داراته وضع طيران : تي برا فكني منك قداشك نفاخ
و فتحت الخط على الأفريقي : الو
الأفريقي : مساء الورد 😍
سلسبيل : مساء السماد 😂
_______________________
لبست هناء بيجامتها و وقفت قدام الشكماجة تمسح ف مكياجها بالوايبس
اتصل بيها يوسف
حطت الوايبس و ردت : الو
يوسف : تي وين هذا كله يا هنو حتى كان تغيري ف فيلو مش هكي
هناء ضحكت و اتكت ف سريرها : بالي واسع شن بدير هي
يوسف : واسع هلبا ماشاء الله
هناء : حقا تفكرت ؛ وين شنطتي اللي كانت معاي ف المزين ماعطيتهاليش
يوسف : خليها نشم عليها الريحة 😍
هناء ضحكت : اما ريحة فيها حاجات نبيهم
يوسف : زي ؟
هناء : حاجات و خلاص
يوسف : نقول اني ؟
هناء تحشمت : هيا اسكت
يوسف يضحك
هناء : انت كيف تفتحها و تمس حاجتي 😒
يوسف : ياودي مافتحتهاش خيرك رعشتي
هناء : اه نحسابك بس
يوسف : لكن شكلها فيها حاجات ماتبينيش نشوفهم
هناء سكتت
يوسف : حاجات .... اها ! هههههههه
هناء : نوض توا توا جيبهالي
يوسف يضحك
هناء : هيا تلقاني قدام الباب
يوسف : والله ماني فاتحها خيرك
هناء سكتت 😒
_______
1
تاني يوم 🌹
12:00 م
نزل عصام من حوشه هو مرام و خشو لحلومة بيسلموا
حلومة مقعمزة ف دار المعيشة مع نورية و سعاد
عصام و مرام : السلام عليكم
ردو عليهم : و عليكم السلام
نورية : مرحبا بالعرسان
حلومة تشوفلهم و مبتسمة
عصام ضحك : مراحب بيك يا خالتي
مرام تسلم على حلومة و متحشمة : كيف حالك ماما حلومة
حلومة شبحت لنورية و شبحت لمرام : الحمد لله كيف حالك انتي
مرام : الحمد لله
سعاد تتفرج على مرام و ساكتة 😒
ف عقلها .. ( ماما ؟؟ عليك تزعبين قولي اللاّي و لا عمتي استر )
2
مرام لابسة سروال جينز عليه بلوزة سماوية و دجاكة بيضاء و وشاح حرير باللون الأبيض و السماوي و الوردي الهادي
سعاد ف عقلها .. ( خيرها العفو لابسة هكي ؟ لبست بدلة بيضاء ولا بدلة وردية عرايسية تبان انها عروسة سمله !! )
1
عصام : محمد وين نبيه يوصلنا للمطار
حلومة : توا كان هني ممكن طلع الشارع
عصام شبح لمرام : اني ف الشارع نشرينلك اطلعي
مرام : لالا بنطلع معاك
عصام : شوية نشوف محمد و نكلمك
مرام : به
عصام سلم على امه و طلع
و قعدت مرام واقفة متحشمة
سعاد : مرووومة 😊
مرام شبحتلها
سعاد : قعمزي معانا انتي من العيلة توا
مرام ابتسمت و قعمزت خاشة بعضها
حلومة تشوفلها و ساكتة
مرام توترت و بدت تكح : احم احم
نورية تبي تفتح موضوع : امتى طيارتكن
مرام : ساعة 3
نورية : ردي بالك على روحك و على راجلك
مرام سكتت
نورية : يقولك كلمة تقوليله حاضر يقولك هضا الحليب لونه اسود تقوليله اها اسود
مرام 😳
نورية : و لما يرجع من شغله حِبي على راسه و قوليله كلمتين طيبيله خاطره بيهن
مرام انصدمت : اها ؟؟ 😳
نورية : و ردي بالك ردي بالك تقوليله وين كنت ولا امتى جاي ولا وين ماشي .. لان الراجل مايحبش الأسئلة هذينا
و استمرت نورية بعطي النصائح .....
مرام مصدومة
و سعاد تشوفلها و ساكتة 😏
____
2
عصام ف الشارع مع محمد فتح تليفونه و اتصل بمرام
مرام سكرت عليه و وقفت : و اخيرا
و شبحت لحلومة : هي بالسلامة ماما حلومة نشوفوك على خير
حلومة : بالسلامة بنيتي
مرام طلعت تجري
سعاد : خيرها طلعت تجري سمله ؟ يالطيف قداشها مستعجلة عليه ماهي كانت معاه الوقت كله 😒
____
العارف مقعمز ف الجنان يتشمس : قداش بتقعد
عصام : عشرة ايام
العارف هز راسه : بالله قداش صرفت عليها اللي واخدها هادي
عصام تعفلق ؛ كيف بيتكلم مرام طلعت
العارف شبحلها و سكت
مرام جت تسلم عليه : عمي كيف حالك
العارف عجباته و ابتسم : الحمد لله كيف حالك انتي يا بنيتي
مرام مبتسمة : الحمد لله بخير
العارف شبح لعصام : والله الا ماشاء الله عليها تعرف توازي ياولد
مرام تحشمت و ضحكت
عصام ضحك : طالعلك يا حاج
العارف : رد بالك على مرتك يا ولدي
عصام : ماتوصيش يا حويج
خش محمد للجنان : هيا يا عصام
عصام شبحله : هي
سلم على بوه هو و مرام و طلعو
العارف يشوفلهم و ساكت
أحمد يلعب بالكورة بحداه : اجديده علاش عصام بيسافر ؟
العارف شبحله : ماشي بيعسّل
____
2
نجاة و ازهار في مطبخ حلومة
ازهار تحرك في الرز : اما سعاد كيف تغيرت امس !
نجاة مقعمزة ع الكرسي و حاطة رجل على رجل : كان مش من بنتي هناء راهي ضحكنا عليها زي ليلة الدخول
ازهار شبحتلها : قصدك هناء هي اللي غيرتها ؟
نجاة : ايه ؛ طبعا فرختي مابتش تحكيلي لين جبدت لسانها .. يا حنه تختختها باش تشري قفطان جديد و رفعتها معاها للمزين
ازهار ضحكت : والله ربحت فيها اجر
نجاة : و شوفي سعاد كيف مرزرزة كأنها هي اللي غيرت روحها
ازهار تضحك : مسكين السنوسي مالحقش عليها 😂
نجاة ضحكت : راهو ممكن من الصدمة بات ف الجنان
ازهار : ههههههههههه
خشت سعاد : ضحككم واصل للدار ضحكوني معاكم
ازهار سكتت
نجاة شبحت لسعاد : وين اسماء ماقابلتنيش
سعاد : طلعت هي و منذر قالو بيشرو حاجات قبل مايتوكلو
ازهار : قصدك مروحين ؟
سعاد : ايه قالو غدوا
ازهار : حتى البنات مانزلوش اليوم
نجاة : قالو بيتغدو فوق
___________
هناء ف مطبخ حوشهم اتطيب
شرين تليفونها لقاته يوسف
دارت السماعات و ردت : الو
يوسف : اهلين هنو
هناء : اهلين بيك .. روحت ؟
يوسف : لا قاعد ف الشغل غر رايفت عليك
هناء ضحكت : حتى اني ، نراجي فيك تروح
يوسف : ساعة و جاي .. شن اديري
هناء : مكرونة بشاميل
يوسف : امالا غداي عندك
هناء : متأكد بتآكل ؟؟
يوسف : حتى سم من ايدياتك ناكله
هناء تضحك : امالا وين هداكا الجو اللي كنت اديرلي فيه
يوسف : هداكا طروح باش مانطيحش ف شباكك لكن هكي ولا هكي طايح
هناء تضحك
يوسف : هي سكري توا و اني سويعة و نكون عندك
هناء : اوكى باي
يوسف : سلام
كيف هناء بتسكر الخط جتها مكالمة من رقم غريب
ردت : الو ....
____________
سلسبيل تسيّق ف الحمام و سنابل واقفة ف العتبة تهدرز عليها
سلسبيل : حي ع الجو كان يصير منها
سنابل : بالك ماما تعفس فينا
سلسبيل : بالنسبة ليا حانسكر فمي لين نمشو و الحوش نضموه صبح ليل
سنابل ضحكت
جتهم هناء تجري : كان نقوللكم خبرررررر
خواتها شبحولها : خيرك
هناء فرحانة تنط : قبلوني ف الراديو 😍💃
سلسبيل و سنابل ضحكو : مبروووك مبروك
هناء تضحك : الله يبارك فيكم .. اااه اخيراً صار منها
سنابل : اني حتى نسيته موضوعها الخدمة توقعتهم ماقبلوكش
هناء : حتى اني ، قالولي نهاية الاسبوع نردو عليك و ماردوش نحسابهم خدو غيري لكن اهي شدت 😍
سلسبيل : مانبيش نطيرلك فرحتك لكن سي السيد نحسه بيعفس فيه الموضوع
هناء : فآل الله ولا فالك فكينا ترا
سنابل : ماتعدليش عليه كان قالك لا ، تعبتي و قريتي سنين مايجيش توا هو بالساهل يقعمزك
هناء : من قالك بنسمع كلامه اصلا ؟ .. انتو اسكتو و ماتقولولاش لين يجي وقت الحلقة
سلسبيل : امتى ؟
هناء : الإربعاء الجاية
سنابل تعد بصوابعها : الاربعاء الجاية ؟ هو اليوم ثلاثاء معناها مازال تسعة ايام
___________
02:00 م
يوسف وصل الحوش درس السيارة ف الشارع و نزل
لقي محمد كيف خاش الزنقة وقف يراجي فيه
محمد درس و نزله : ها شج
يوسف : مليح شن مداير
محمد خش معاه : كنت نوصل ف عصام للمطار
يوسف ضحك : دارها ! صحة ليه
محمد : ايه
يوسف : خيرها سيارتك الصبح ؟ ريتك تمكعل فيها
محمد : بدت تصرف يا راجل مش وقتها
يوسف : امالا غيرها
محمد : هكي مفكر حتى انى
يوسف : حتى هدا راي
و ركبو هما الزوز ف الدروج
محمد : شن بنقولك
يوسف شبحله
محمد : حصلت زوز شاليهات ف البحر ع الأبيض
يوسف ضحك : منين ليك
محمد : واحد صاحبي كان حاجزهم لعيلته ماصارش من موضوعهم طربقت عليه و حلف ماياخد حقهم
يوسف وقف قدام حوش هناء يطق : مليح بكل ، امتى المشية
محمد : بعد غدوا موعدهم ، نرفعو العويلة و نمشو شن رايك
فتحت هناء الباب مبتسمة : اهلااا
يوسف ابتسم : اهلا بيك
هناء : خيرك عطلت هذا غر سويعة
يوسف : الطريق لقيتها زحمة
محمد يشوفلهم و ساكت
هناء شبحتله : محمد خش
محمد : اصيل قاعد ؟
هناء : مازال ماروحش .. خش تغدا معانا
محمد خش مع يوسف : به عادي
____
سنابل ف الدار سمعت صوت محمد طلعت : اهلااا
محمد شبحلها : اهلا بيك
سنابل قعمزت ف الطاولة : شن الجو
محمد : بيك احلَوْ
سنابل ضحكت
هناء : راجوني نزيد كواشيك
و مشت للمطبخ
سلسبيل : لوطه مطيبين رز بالبصلة تبو ؟
يوسف : لالا
و لحق هناء للمطبخ
سنابل وشوشت محمد : شن صار ف بوك ؟
محمد شبحلها : عرسه بعد عشرة ايام
سنابل انصدمت : و كيف بيصير ؟؟ بتقول لأمك ؟
محمد : لالا ، بنخطفه قبل العرس بثلاثة ايام و نخليه اسبوعين مشدود
سنابل فاتحة فمها و مصدومة 😲
محمد : و انى عرفت رقمها اللي بياخدها بنكلمها و نقوللها انه سافر هو و عيلته و ضحك عليها
سنابل : و هو تو نعرف كيف انحيها من راسه
محمد : كيف ؟
سنابل : تو نسحب صورته اللي حاطها ف الفيس و نخربشها على اساس مسحور و ندير فيها خلالات و خيوط و الجو هذا و نبعتهاله على اساس لقيناها ف الفيس منزلينها ناس لاقيينها في جبانة
محمد ضحك : منين جبتي امها الفكرة هادي
سنابل : كيدهن عظيم 🌚
محمد يضحك
سنابل : حقا صار من البحر ؟
__
هناء ف المطبخ خدت الكواشيك و تلفتت
يوسف سكر عليها الطريق و ضحك
هناء : يوسف اطلع خير مايشوفونا
يوسف : من شن خايفة
هناء : تو محمد يشوفك و مرات بابا ولا اصيل يروحو توا
يوسف قرب منها : اصلاً بنخطبك من عمي ف اقرب وقت
هناء قلبها دق بسرعة و سكتت
يوسف حط ايده على ذقنها : يعني تحسابيني نتسلى معاك وخلاص ؟
هناء : علاش مستعجل
يوسف : تي نقولك بنفتح باب بيني و بينك تقوليلي علاش مستعجل
هناء : مازال بكري على علاقتنا خليها بينا توا و بعدين ساهل
يوسف : علاش
هناء : باش نفهمو طباعنا اكثر 😉
يوسف : انى فهمتك خلاص
هناء ضحكت : اجلها شوية على خاطري
يوسف : باااه
خشت سلسبيل : احم احممم
يوسف وخر من هناء و شبحلها : ديما خشوشك غلط
هناء ضحكت
سلسبيل : حظك يا برو 😂
_____
سنابل تصفق : خششششي 👏
محمد ضحك : تي اعقلي
سنابل : خايفة ماما تقول لا بس
محمد : تي بنمشو كلنا و اللي مايبيش سلامته يشد الحوش و يقعمز فيه
جت هناء هي و يوسف : شن تقولو
سنابل : بنمشو للبحر 😍
يوسف شبح لهناء و غمزها
هناء وجهها انحمر : مش حانعوم
يوسف ضحك : به تو نشوفو
محمد يشوف و ساكت
و قعمزو ياكلو
سنابل وقفت : خلي نجيب تليفوني و نصور الجمعة الحلوة هادي
سلسبيل فمها ماكلة : و اكذبي قولي انتي اللي مطيبة
سنابل ضحكت
و هي خاطمة من ورا محمد داخت و شدت ف السورية متعه
محمد تلفت : خيرك
سنابل شدت روحها و رمشت عيونها : شي شي
محمد وقف : دختي تاني ولا
سنابل : لالا
هناء تشوفلها : سنابل خيرك ؟؟
سنابل : خلاص مافيا شي
و خشت لدارها تجيب التليفون
يوسف : شكلها تاعبة
محمد شبح لهناء : وضعها مش عاجبني هادي ثالث مرة اتدوخ قدامي
سلسبيل : ماتشوفش فيها رايحة زي الخلال ماتاكل ف شي
محمد قعمز ف كرسيه و سكت
جت سنابل شادة التليفون ؛ وقفت قدامهم و فتحت ع الكاميرا : هيا كلكم اشبحو هني ناخدو سيلفي
كلهم شبحولها
سنابل صورت 📷 : اقوا بعد احلى صغار العم
يوسف : ردي بالك تنزليها سناب
سنابل شبحتله : علاش
يوسف : اختك فيها
سنابل : و شن المشكلة
يوسف شبح لهناء : تنزلي ف صورك ع السناب ؟
هناء تلخبطت : لالا 😅
سلسبيل و سنابل شبحو لبعض و زرتهم الضحكة 🌚
محمد : تي هي كولو المكرونة صقعت
أصيل فتح الباب و خش : اوووه خيانة !! تاكلو عليا
_____
تاني يوم
10:00 ص
سنابل راقدة حست بتليفونها يهز ؛ شافاته لقاته محمد
ردت : الو
محمد : صباح الخير
سنابل : صباح النور
و شافت الساعة : تحلم بيا ولا شنو
محمد : ألبسي حوايجك و انزليلي ف الجنان
سنابل استغربت : علاش
محمد : عندنا مشوار
سنابل : يخص بوك ؟
محمد : ايه .. البسي بسرعة ماتعطليش
سنابل قعمزت : به
محمد : ماتفطري شي تو ناخدو مع بعضنا
سنابل : اوكى
_____
محمد ف سيارة عصام يراجي فيها
بعد شوية جاته سنابل و ركبت : خيرك بسيارة عصام
محمد : سيارتي صايرلها
سنابل : عندك علم طلعت بالدرقة زي الخنابة
محمد طلع بالسيارة : كويس
سنابل : وين ماشيين !
محمد : لما نوصلو تعرفي
سنابل ضحكت : مفاجأة ؟
محمد سكت
بعد شوية درس قدام مصحة : هي انزلي
سنابل استغربت : علاش جينا هني
محمد : لازم تعايني باش نتطمنو
سنابل : قصدك مطلعني على خاطر الدوخة ؟ موضوعها عادي ره
محمد نزل : هيا انزلي
سنابل نزلت و خشو الداخل
01:30 م
دارت سنابل كشف و تحاليل و طلعو
سنابل : ها ريت توا طلع الموضوع إرهاق و قلة ماكلة بس
محمد : انى هذا وين ارتحت تشوفي ف الدنيا كيف متسبلة
سنابل ضحكت : خفت يطلع ورم قصدك
محمد سكت و ركب السيارة
سنابل ركبت معاه : شكرًا هلبا لكن ماكانش فيه داعي
محمد : تي امس ماجانيش نوم و انى نفكر
سنابل سكتت
محمد : لازم تاخدي الفيتامينات اللي كتبهملك الدكتور و تاكلي فاكهة و تشربي عصائر
سنابل : حاااضررر
محمد : مانتسهوكش .. دمك ناقص لازم تقويه
سنابل : حاضر حمودي
محمد شبحلها و سكت
سنابل : نبي امية ريقي جاف
محمد : انتي قاعدة صايمة .. شوية و ننزلو نفطرو
سنابل : روح بيا تو نفطر على عركة نجاة
محمد : امك عندها علم كلمتها
سنابل شبحتله : شكرًا هلبا على اهتمامك بيا .. مافيش حد اهتم زيك أو حتى ركز
محمد شبحلها و ابتسم
_______
تاني يوم 🌹
09:30 ص
العيلة ف الجنان طالعين للسيارات
محمد : اعطيني نسوق اني يا اصيل سيارتي مش محركها
اصيل : اوكى انى ف الشارع تلقاني
طلع الشارع و طلع معاه شنطته
خش محمود من الشارع : خلاص معاش فيه شي يبي التطليع ؟؟
يوسف سكر كوفينو سيارته : لالا تمام
سلسبيل و سنابل طلعو و قالو مع بعضهم : مع من بنركبو ؟
محمود : تعالو معاي بنمشي بسيارة عصام
و طلعو معاه البنات
طلعت اروى هي و هناء للجنان : وين بنركبو ؟
محمد : انتي و روان تعالو معاي انى و اصيل
اروى : كان هدا تو نركب مع يوسف
هناء تتكلم بِ غُل : يوسف بيركب معاه اميمة و خالتي نورية و امه
اروى قلبت وجهها : باهي تو نركب مع اصيل و خلاص
هناء سكتت 😏
و طلعت اروى للسيارة
نزل احمد لابس طاقية و شاد كورته ف ايده ينعس حال عيونه بالسيف
منذر خش من الشارع : هناء ؟ بتعدي بسيارتك انتي
هناء : لالا
منذر : اوكى كذا عطني مفتاح سيارتك نعدي بيها انا و اسماء
هناء : به
و مدتله المفتاح
يوسف جي وشوشها : شن رايك تركبي معاي و هكي نكونو بروحنا 😉
هناء شبحتله و ضحكت : و اللي بتركبهم معاك شن وضعهم ؟
يوسف : تو نتصرف
هناء : كان هذا خودو سيارة ماما و قول لمحمد ولا اصيل يسوقها لان قالت بتلحق غدوا مع بابا مش ماشية معانا
يوسف : اوكى مليح ، تو نطلع نوزعهم انى بين السيارات
و طلع الشارع
__
نورية طالعة مع حلومة : و الله ما في بالي البحر يا خيتي
حلومة : اسكتي و بلا كتر كلام تو شن الفرق كان زدتي قعدتي معانا ثلاثة ايام غيرتو جوكم
اسماء شادة ولدها راقد : انا راجلي مايندريش عليا 😂
حلومة ضحكت
سعاد : مش لازمك تقوليله راجلك غر بينكد عليك و يقولك روحي ؛ لاحقين ع المرواح معليشي برو معانا حتى تنوسونا انى و اللاّي ، نجاة و ازهار بيلحقو غدوا
اسماء سكتت
سعاد ف عقلها .. ( عمري ماريت وحدة تطلع بلا شور راجلها عليك وقت 😒 ؛ كانها كنتي مانديرلها الا مرداح مليح )
نورية : الحاج مش ماشي ؟
حلومة : مايبيش قال غدوا تو يجي مع عماد
سعاد : امالا وين قاعد
حلومة : عند ازهار
1
يوسف خش للجنان : حناي انتو اركبو مع اصيل
سعاد : علاش انت من بتركب معاك
يوسف : السيارة تعبت بضاعة معاش ترفع اكتر
هناء ضحكت
و طلعو العيلة للسيارات
يوسف قرب من هناء : هيا اركبي
هناء ضحكت و ركبت معاه
فتح يوسف القراج و طلع بالسيارة
__
يوسف و هناء مع بعض بروحهم
و اصيل مركب حلومة و نورية و سعاد و اسماء
و محمود معاه سلسبيل و سنابل
و محمد رافع الطناجر و الماكلة و معاه خوه احمد
و منذر مركب معاه روان و اروى و معلي صوت المسجل
_______
هناء لابسة سروال جينز و بلوزة حمراء
يوسف : بلوزتك مش متع بحر
هناء : انى مش حانعوم
يوسف شبحلها : متأكدة ؟؟
هناء شبحتله ؛ قامت حواجبها و حركت راسها : سي سنيوري 😌
يوسف : معادش تشبحيلي هكي
هناء ضحكت : علاش
يوسف شبح قدامه : هكي وخلاص
هناء تضحك ؛ فتحت المسجل و علت الصوت
يوسف طلع دخانه بيولعه
هناء شبحتله : يوسف !!
يوسف نحاه من فمه : اسف بيبي
هناء : امشي بالشوية و معادش تجري
يوسف نقص السرعة شوية
هناء فتحت شنطتها و طلعت منها حلوة فروالة كلتها
يوسف شبحلها : الناس يعزمو
هناء ضحكت : كان صبرت بس
فتحت وحدة و مدتهاله
يوسف : وكليهالي انتي
هناء وكلتهاله و يوسف عضها ف صبعها
هناء جبدت ايدها : اااي
يوسف : نذوقو ف العسل بالشحاتة
هناء تضحك
___
منذر معلي صوت المسجل و يرقص بيديه
اروى منزعجة منه : الله يصبرني على ما ابتلاني
روان : واااااك يا منذر سكر علينا البلي خير ماننزلو
منذر يضحك : كنكن نكد الزف
روان : حني ف سيارة ولا في ديسكو ؟ احترمنا عاد حني ماناش صاحباتك باش تهيج بينا
___
سلسبيل و سنابل مع محمود
سنابل : افتح دسكة ولا راديو نغيرو جونا
محمود : فكيني من نفخ الراس صبح
سنابل : تي كساااااد
محمود : كان هذا انزلي و اركبي مع يوسف
سلسبيل : مشناك تقول راكبين مع شباني 😒
___
أصيل متكنطي من ميعاد النساوين اللي مركبهم معاه
سعاد تقرّم : ايه ريتيها يا اللاّي كيف مابتش ترشق الزيانة وقت الجلوة ؟
حلومة : ماهي حاطة حق الجلوة 700 جني مازال تبيها ترشق ؟
سعاد : هادي العادات امالا شني الجلوة كلها على ام العروسة
حلومة : ايام كانت ب 50 جني مش توا 700
سعاد قلبت وجهها : و النبي فكيني ترا ؛ علاش عاطية بنتها كان ماتبيش تدفع
نورية و بنتها يسمعو و ساكتات
_____
محمد بروحه هو و احمد ؛ شبح لخوه لقاه منزل الكرسي و راقد
_____
بعد ساعتين 🌹
وصلو العيلة للقرية و نزلو
يوسف نزل : هناء ماتخشيش بروحك راجيني
هناء : اهم خواتي تو نخش معاهم
يوسف شبحلهم : اوكى بري
هناء مشت لخواتها : شن جو الطريق
سنابل : دراه كبد 😒
سلسبيل تصور سناب : حي ع الجو يهبلللل
محمود فنص فيها : ياسر بلا هبال مش وقته اللي اديري فيه
سلسبيل : برا فكني منك يا منكدي
محمود : سكري فمك خيرلك 😠
منذر جي من ورا هناء : هنيوه شن الحموري هضا
هناء مشت و ماردتش عليه
سنابل ضحكت
______
4
أصيل نزل من السيارة و فتح الكوفينو ينزل ف شنطته و باقي الحاجات
جاه محمد : شن انزل معاك ؟
أصيل : كانك عليا نزل كل شي اقسم بالله راسي راح زي البرميل من لُقني النساوين الزفت
محمد ضحك : لاش مركبهم معاك
أصيل : دفهملي يوسف و هما قرمة ليه ليه ف العرس
______
05:00 م
النساوين مقعمزين ف الفيراندا متع الشاليه يشربو ف القهوة
و صغار العم خشو يعومو و هناء واقفة ع الشط تتفرج عليهم
جي يوسف بحداها : ماسهفتكش المية ؟
هناء شبحتله : ابدا
يوسف نحّا التيشرت متعه : هيا خشي معاي
هناء : لالا
يوسف : غر هيا نص ساعة و اطلعي
هناء وخرت : لالالا فكني
يوسف : به براحتك .. اني خاش
هناء أشرتله على عيونها : I'm watching you
يوسف ضحك و خش
قعدت هناء واقفة تتفرج عليه كيف يعوم و يغطس
جي بحداها منذر : كنك تحقي من بعيد
هناء شبحتله : مانحبش نعوم نخاف منها المية
__
3
سنابل تعوم هي و البنات ؛ شافت واحد يأشرلها بيده : برا ف حالك يا راجل
سلسبيل شبحتله : يهبل محلاه
سنابل شبحتلها : هذا محلاه ؟
سلسبيل : طرف أغبر
سنابل سكتت و قعدت تعوم على ظهرها
سلسبيل : شن رايك اتطيحيه انتي و نكلمه اني 😍
سنابل ضحكت : مصحك و كان ورقلي محمد يفرمط فيا المرة هادي بجديات ، ياسر عملة السلوم سكت عليها
روان تعوم و تهدرز لأروى : نهدرز مع واحد ع الفيس ترا قولي شن قالي
اروى : انتي تهدرزي مع واحد ع الفيس 😳
روان : ايه خيرك هازية ؟
اروى مصدومة : لا مش هازية 😅 .. شن قالك ؟
روان : قالي ابعتيلي صورتك .. مشي شن قلتله ؟
اروى : شن قلتليله
روان : قلتله ابعتلي صورة اختك يا خايب نبعتلك صورتي
اروى ضحكت
روان : مصح وجهه و خلاص ولا يتختخ فيا يبي يخطبني نبدا زي زهرة القصر
اروى : هههههههههههه
2
محمود يعوم قريب عليهم : سكري فمك خير ماتطلعي
اروى شبحتله : باهي 😒
محمود : روان عومي هني معاش تباعدي
____
1
أصيل يعوم و يعاكس ف وحدة تعوم بحداه : غر اشبحيلي بس
البنت شبحتله
أصيل : قلبي تفترششششش 😍
البنت : اغطس لِمه 😒
____
1
يوسف و محمد يعومو الداخل شوية
جت اروى تتدحنس على يوسف : يوسف سلوطني من فوق كتافك
يوسف : اهو محمد يسلوطك
محمد : بري اخطيني ماعنديش خلوق
اروى : هيا اوسيفه
يوسف : باهي تعالي
غطس شوية و جت اروى ركبت فوق كتافه و غطست
__
هناء تشوف فيهم من بعيد و متكنطية
منذر : غار هيا هنيوه خشي معايا
هناء شبحت لأحمد يعوم قدامها : فوتني يا منذر مانحبش
منذر شدها من ايدها : غار خلينا نخشو
هناء تفك ف ايدها منه : لااا
و تشوف لأحمد : احمددد معاش تبعد تو تغرق
احمد مايسمعش فيها : شنوو ؟؟
منذر : هيا هناء عشان خاطري
هناء تعفلقت : لا اله الا الله
__
الولد اللي يعاكس ف سنابل قرب بحداها : يا بنية شعرك طالع من الوشاح
سنابل : عاجبني و هو طالع
محمود شبحه جاه شلبك عليه المية 💦 : هييييييه 😡 برا عوم بعيد ع البنت
الولد بعد و مشي ف حاله
سلسبيل : خزي قطعلي رزقي 😒
___
هناء : منذر انت ماتفهمش ؟ نقولك مانعرفش نعوم ومانحبش نخش
منذر : انا نشدك ماتخافيش
و شدها من ايدها يكر فيها : هيااا
هناء علّت صوتها : حول مانبيييييش
منذر يضحك : هيا بلا دلع هيا
هناء بدت تبكي و رجليها انبلو : حووووول 😭
منذر يضحك
هناء تبكي : تليفوني في جيبي 😭
___
شافها محمود من داخل تكنطا : حييي على امه الكلللللب
يوسف شبحله : مني ؟
محمود : الكلب منذر شوفه شن يدير لهناء
يوسف شبح جهة الشط لقاه يكر فيها بالغصب
تكنطا و طلعله بسرعة
اروى تشوف : مصح وجهه البارد
محمد يصيح : اطلع ربيه المسخ
محمود لحق يوسف
و أصيل مش فاضي يعاكس
_____
منذر قام هناء من جنابها خاش بيها
هناء تبكي ؛ تحرك ف رجليها و تصيح : نزلنيييي 😭
نحت تليفونها من جيبها و لوحاته ع التراب
منذر لوحها ف المية : ههههههههههه
هناء غطست و وقفت تبكي و تكح : خزي عليك ماتتحشمش
يوسف جاها شدها : والله الا ما نربيه الكلب
هناء تبكي : طلعني مانعرفش نعووووم 😭
يوسف شادها و طالع بيها
هناء طلعت من البحر ؛ خدت تليفونها و مشت تجري للشاليه راعشة
يوسف طلع للمنذر متعفلق : خير **** ؟
منذر شبحله : كنك !!
يوسف شده من رقبته و بدي يضرب فيه : توا نقولك كني
المنذر طاح و يوسف فوقه يضرب فيه بوكسات على وجهه و وقف يضرب فيهم تيروات على جنابه
المنذر يصيح : كنك يا الهبل ؟؟
( الناس التمو عليهم يتفرجو )
يوسف مازال يضرب فيه 👊👋👊
طلع محمود يجري من البحر : حول حول خليهولي
يـتـبـــع ...
