رواية صغار العم الفصل العاشر 10 بقلم مسرة اسامة
وايــة #صغار_العم
الحَـــلْـــقــة الــعـاشـــرة 🌸
شافها محمود من داخل تكنطا : حييي على امه الكلللللب
يوسف شبحله : مني ؟
محمود : الكلب منذر شوفه شن يدير لهناء
يوسف شبح جهة الشط لقاه يكر فيها بالغصب
تكنطا و طلعله بسرعة
اروى تشوف : مصح وجهه البارد
محمد يصيح : اطلع ربيه المسخ
محمود لحق يوسف
و أصيل مش فاضي يعاكس
_____
منذر قام هناء من جنابها خاش بيها
هناء تبكي ؛ تحرك ف رجليها و تصيح : نزلنيييي 😭
نحت تليفونها من جيبها و لوحاته ع التراب
منذر لوحها ف المية : ههههههههههه
هناء غطست و وقفت تبكي و تكح : خزي عليك ماتتحشمش
يوسف جاها شدها : والله الا ما نربيه الكلب
هناء تبكي : طلعني مانعرفش نعووووم 😭
يوسف شادها و طالع بيها
هناء طلعت من البحر ؛ خدت تليفونها و مشت تجري للشاليه راعشة
يوسف طلع للمنذر متعفلق : خير **** ؟
منذر شبحله : كنك !!
يوسف شده من رقبته و بدي يضرب فيه : توا نقولك كني
المنذر طاح و يوسف فوقه يضرب فيه بوكسات على وجهه و وقف يضرب فيه تيروات على جنابه
المنذر يصيح : كنك يا الهبل ؟؟
( الناس التمو عليهم يتفرجو )
يوسف مازال يضرب فيه 👊👋👊
طلع محمود يجري من البحر : حول حول خليهولي
يوسف شبحله
و منذر قام راسه
محمود جاي يجري عطي تيرو لمنذر على وجهه
منذر داخ و طاح
___
هناء خاشة للشاليه تبكي و مبلولة
شافوها النساوين ف الفيراندا استغربوا
حلومة : هناء ؟؟ خيرك خاشة هكي سمله ؟
سعاد ضحكت : اكيد عوموها و غرقت
اسماء تشوفلها : حتى انا مانحبهش العومة
( النساوين مايسمعوش في عركة صغار العم بسبب صوت الموج و بُعد الشاليه ع الشط )
_
خشت هناء للحمام بتدوش : يعطيه مايرعشه البارد زي ما رعشني 😭
__
محمود شد منذر من رجل و يوسف شد رجله التانية يكرو فيه للبحر
يوسف يصيح و حامق : ترعش ف البنت يا امسخ ؟؟؟ ... تو نوريك الحناطه متعك شن شكلها يا *****
( خشو بيه للمية هما الزوز و منذر مش قادر يتكلم )
محمود متعفلق : زيد خش بيه زيييد
__
البنات يشوفو فيهم من الداخل و مصدومات
سنابل و سلسبيل : حي عليهم 😲
اروى : اطلعلهم يا محمد بسرعة
محمد و هو طالع : قلتله ربيه مش اقتله
روان : يستاهل ان شاء الله يموت 😒
__
المنذر يشلبك ف المية مش قادر يطلع
يوسف و محمود مازال يكرو فيه
يوسف متعفلق : تجيب فيه لروحك يا عيل
أحمد يشوف و ساكت
( جوهم ناس بيطلعو منذر منهم )
يوسف يصيح : والله واحد يقربنا مايصير فيه الا زيه و اكتر
محمود شد منذر من راسه يغرّق فيه
أحمد متشمت : ايه محمود زيده زيده خلّا هناء تبكي
جي محمد : تي شن ادير انت وياه ؟
يوسف شبحله : انت اطلع منها يا محمد ماتدخلش
محمد : تي اما اطلع منها الزح
و جي يجبد في خوه محمود : تي اركح يا راجل بلا هبال
محمود يعيط : حول لازم يتربىٰ
محمد تكنطا و بدي يدف فيه : ارخيه و اطلع بلا عار قدام الناس
و شبح ليوسف : برا شوف البنت شن صاير فيها بدل ماتقتل فيه
يوسف تفكر هناء طلع
محمود : مازال نبي نربيه ماكتفيتش
محمد فنص فيه : اطلع خير مانبدا نخرط عليك
محمود سكت
و محمد شد المنذر يجبد فيه للشط
...
سعاد : قصدك للمنذر يا خالتي ؟
نورية مبتسمة : اها .. وين نلقو خير من هنيوه نحنا
سعاد ف عقلها .. ( ما لقيتي الا نجاة تبي تناسبيها ! ربي يكون في عونك )
حلومة ساكتة
نورية تلفتت لحلومة : شن قلتي يا حلومة كنك ساكتة
حلومة : والله الشور شورها و شور اماليها
أسماء تضحك : هنيوه مش حترفض حسيت جوها تمام مع المنذر
جي يوسف متعفلق : وين هناء ؟؟
سعاد شبحتله : فالحمام
نورية : تعال خودلك قهيوة
يوسف هز راسه و مشي
سعاد لحقاته : تعالى نبيك
يوسف شبحلها : شن تبي
سعاد : خالتك نورية قالت تبي هناء للمنذر ؛ شن رايك فيه ؟
يوسف فنص فيها : تدوي بجديات ولا تبصري معاي ؟
سعاد : تو انى عمري بصرت معاك بصارة زي هادي ؟ قلت انتو شباب و تعرفو بعضكم اكتر ؛ كان الولد كويس و مناسبها قول و كان مش كويس ماتدسش عليها مهما كان البنت بنتنا
يوسف علّا صوته و يتكلم بِ ايديه : قوليلهم يلمو شلاتيتهم و يروحو خير مانروح بيهم اني
سعاد انصدمت : نقص صوتك يسمعو فيك 😱
2
( النساوين سمعو صوته شبحلوله )
يوسف : الكلب قامها و حذفها ف البحر خلاها راعشة قريب ركبها الصُفير تقوليلي نورية تبيها ليه ؟؟
سعاد تشوف للنساوين و متحشمة : نقص صوتك تو يسمعوك يحرجو
يوسف : هونا شوفوه ممكن مات
سعاد شبحتله : شنوو ؟؟ شن درتله ؟
يوسف : ضربته شن بنديرله يعني نصفقله ؟
سعاد : عيب عليك ولد خالتك هذا
يوسف و هو ماشي للشاليه التاني : لا خالتي لا عمتي نطلع نلقاه مهناش
سعاد سكتت و شبحت لنورية
نورية مستغربة : كنه اوسيفه راقيله
حلومة تشوفله : انظر شن صاير
اسماء تشوف و ساكتة
جت سعاد و قعمزت
حلومة : خيرهم شن فيه
سعاد : منذر رعش هناء و حذفها ف البحر و يوسف ضربه
نورية خبطت وجهها : يانعلياا 😱 طيح سعده المرزي سودلي وجي
أسماء : عليك سماطه حشم حاله
______
محمد قعمز منذر ع الشط يصحصح فيه : تسمع فيا ؟
منذر مقعمز و شاد راسه ؛ عينه زرقاء و فمه مجروح : اها نسمع فيك
محمد : نوض معاي الداخل ارتاح شوية
منذر دايخ : صبيني
محمد شد من كتافه و وقفه
جاه محمود : برا صلي ركعتين شكر لله إني ماقتلتكش
محمد شبحله و فنص فيه : انت سكر فمك و اسكت
محمود سكت و قعد يدور ف يوسف بعيونه
البنات طلعو من البحر يشوفو لمنذر و ساكتات
جاته نورية : طيح سعدك كان يسمع باتك شن درت للبنية حي عليك
منذر يسمع و مايردش عليها
جت حلومة : ماترعشيش روحك يا وخيتي هو حب يبصر عليها و الولاد ماتحملوش امسحيها ف وجهي تربحي
نورية : شيلونا الحوش توا توا
حلومة : صلي ع النبي و بلا نكد مش مستاهلة انكم تروحو
نورية تحرك ف صبعها بمعنى لالا : و الله ماقاعدين المرزي خربها على روحه قبل ماندويلها
حلومة : توا انتي فاش ولا فاش يا نورية
نورية شبحت لمحمد : محمد شيلنا توا يا ولدي الله يربحك
محمود : ايه هيا اطلعو يا خالتي توا يوصلكم
محمد تحشم و سكت
نورية مشت للشاليه هي و منذر
حلومة : حشمتونا مع خالتكم الله يحشمكم
محمد ساكت
حلومة : هيا كلنا بنروحو تحركو
محمود علّا صوته : والله مانا مروحينها على خاطر العيل الهرواك اهوا
__
أسماء شادة ولدها توكل فيه ؛ جي بحداها منذر انخلعت : هيييي ويش اللي داروه فيك 😱
منذر ماردش عليها لبس التيشرت متعه و طلع لسيارة محمد
نورية : صبي لمي الدبش
_____________
بعد ساعة 🌹
طلعت هناء من الشاليه لابسة سروال ازرق و بلوزة بيضاء لامة شعرها فوق
لقت يوسف واقف يراجي فيها
يوسف : وينك لتوا
هناء : شن تبي فيا 😒
يوسف : البسي وشاحك و تعالي
هناء خشت : مانيش طالعة من هني
يوسف خش وراها : خيرك متعفلقة
هناء شبحتله : بالعكس جوي حلو هلبا 😊
يوسف : مش باين
هناء شبحت للباب : برا للرورو متعك بلكي خاطرها تسلوط فوق كتافك
يوسف كيف بيتكلم ..
هناء خشت للدار و سكرت الباب
يوسف تكنطا : شيت
و طلع برا
______________
البنات مقعمزين ع الشط و رجليهم ف الميه
أروى : بصراحة مش عارفة كيف هناء عاطياته وجه بليييييد
سلسبيل : هي ماتحباش غر هو يحب يتلصق عليها
سنابل بصوت واطي : كان يوسف اللي حذفها راهو مش هكي صار
روان ضحكت 😂
اروى : كيف مافهمتكش
سلسبيل : فوتيها تخرط
أروى شرين تليفونها داراته سايلنت
روان : ردي عادي حني مش برانية
أروى كشرت وجهها : هذا واحد يحب يعشش
سلسبيل : ركيه ف الحظر و افتكي منه
أروى تكتب ف مسج ( شوية و نكلمك يا قلبي )
روان تشوفلها : شكلك حطيتيه
اروى شبحلها : ايه بااارد
سنابل : وين تعرفتي عليه
اروى : اخته تقرا معاي شافني معاها خدي رقمي منها بالدرقة و عشش
سلسبيل ف عقلها ( كان مانعرفك راني صدقتك 😏 )
روان : شبحتي فيك ضاحكة عليه بفلتر السناب
اروى : كيف
روان : اكيد شافك ع السناب و لخبطيه بالجو الوهمي اللي تحطي فيه
اروى فنصت فيها : مصحك 😠
روان : و الله هذا الحق انتي وهمية 😂
سنابل شبحت وراها : زعما محمد امتى يجي
سلسبيل : يبي ساعتين مشي و ساعتين جي هو و صلاة العشي باش يرجع
سنابل سكتت و شبحت للبحر
طلع أصيل من البحر مبلول
وجاهم ينفض ف شعره : وين الجماعة اختفو فجأة
سنابل تشوفله : الحمد لله ع السلامة 😏
أصيل : تكلمي بلا تسهويك
سلسبيل : فاتاتك ملاكمة اطلع طول وانت مش لاهي مداير روحك كاظم الساهر ف البحر
أصيل فنص فيها : ادوي باهي خير مانهبكلك فم كبدك
اروى : وووه تو نحكيلك انى غر بلا عراك توا
سعاد تنادي من بعيد : تعالو اشربو نسكافيه يا بنات
سنابل شبحتلها : شوية و نجو
أصيل خبط اروى على راسها : تي تكلمي الزفت
اروى : اااي 😩
اصيل : هيا
اروى تحكيله ف اللي صار : .......
اصيل تكنطا : حي كان ريته الكلب !! راهو ماروحش عايش المسخ
خواته ضحكو بإستهزاء 😏
روان : شن كنت بتدير يعني 😂
سنابل تحرك ف يدها بإستهزاء : تي فوتيه اللي يسمع يقول حق
اصيل خبطها على ظهرها : شن مش مالي عينك يا حلوفة !
سنابل ضحكت و فتحت تليفونها
سلسبيل شافت الولد اللي عاكس سنابل و هما يعومو فرحت : أصيل برا البس حاجة تو تمرض
روان : كيف بيمرض
سلسبيل : حسيت الجو تغير
أصيل مشي و ماردش
سلسبيل شبحت للولد و ابتسمتله
الولد فرح يحسابها هي نفسها سنابل
و سنابل فاتحة تليفونها لاهية تصور في روحها هي و اروى
الولد يأشر لسلسبيل بيده
سلسبيل ترد عليه بيدها : شنو ؟
الولد يأشرلها بيده بمعنى تعالي خودي الرقم
سلسبيل شبحت وراها و ناضت
روان شبحتلها : وين
سلسبيل : عسيلي شوية و نجي
روان ضحكت و قعدت تشوف لجهة الشاليه
1
_________
11:00 م
صغار العم مقعمزين قدام الشاليه ياكلو في شواء
هناء تاكل و تضحك مع محمود و أصيل مش معبرة يوسف
و يوسف مقعمز مقابلها يدخن و ساكت
محمود : تي ماقدرش حتى يدافع على روحه العيل
أصيل : كان صفرتلي بس راهو طلعت طقتقتله ضلوعه
محمود : نسيتك بكل ، لما ريت اللقطة ظلمت قدامي
هناء : انى مانندري على شي لين سألت امّيمه عليهم مشي حكتلي شن صار
أصيل : باهي اللي روح فكة من وجهه
هناء : هو صح رعشني لكن حرام عليكم اللي درتوه فيه هلبا وجعني
يوسف نفخ الدخان : مايوجعك غالي
هناء شبحتله و ماردتش عليه
محمود خبط صدره : حني ف الخدمة يا بنت عمي تبي اي حاجة ماتخمميش
هناء ضحكت و شفشفتله شعره : عارفاتك ماتقصرش ؛ عاد المشاكل عندك زي من ياكل في سمينسة
محمود ضحك
يوسف يشوفلها و ساكت
أصيل جاته مكالمة وقف : تصبحو على خير
هناء شبحتله : مازال بكري خونا 😂
أصيل و هو خاش للشاليه متع التاني : هو هداكا تاعب
محمود وقف : و انى ندير دورة و نجي
هناء : اميمة و مرت عمي وين
محمود : رقدو من بكري
هناء سكتت
و محمود مشي باش يبي يدخن
لقي البنات مقعمزات ع القزّة قراب ع الشط ؛ صفقلهم ايده
البنات تلفتو و شبحوله : خيرك ؟
محمود علّا صوته : هيا الداخل انتي وياهااا
سنابل : كأنه ابلة غادة متع الإشراف تنادي وله 😂
سلسبيل ضحكت : حي كان يسمعك
روان : خمسة دقايق و انوضو
محمود مشي بعيد و ماردش عليها
_
هناء دارت رجل على رجل و فتحت تليفونها
يوسف قعمز بحداها و جبده منها : شن الحركات هادي ؟
هناء ببرود : حركات شني ؟
يوسف : علاش جو الجفاف
هناء : برا لأروى تو ترطبلك الجو
يوسف تعفلق و خبط ايده ع الطاولة : فكينا منها الدسكة اهيا يا هناء خيرلك
هناء انخضت : علاش ماتعليش صوتك عليها و تصدها كل ماتجيك ؟؟ ولا غر فالح فيا اني !
يوسف : تي ديما نوزع فيها ماتفهمش
هناء ضحكت باستهزاء : او ماي قاد
يوسف قام حواجبه
هناء تحرك ف ايديها : الجنتل مان يوسف يحب يستلطف مع الآنسات لدرجة مايقدرش يصارحهم بإنه على علاقة حب مع بنت عمه .. بجديات واااو
يوسف يشوفلها و مصدوم
هناء خدت منه تليفونها و خشت الداخل متكنطية
___
محمد وصل ؛ حط مفتاح السيارة ف جيبه و جي ليوسف : شن الجو
يوسف شبحله و وقف : تمام خيرك عطلت
محمد : هو هداكا مشي و جي
يوسف : شن صار فيهم وين قعدو
محمد : بايتين ف حوشنا الليلة و غدوا متسقدين لبنغازي
يوسف هز راسه و مشي لسلسبيل
محمد كان لابس طاقية حطها ع الطاولة و لحق يوسف
اروى شافت يوسف جاي فكت شعرها 😍
يوسف وقف جنب سلسبيل : بيلو ترا تعالي شوية
سلسبيل شبحتله : نعم ؟
يوسف : تعالي نبيك
سلسبيل وقفت و مشت معاه
اروى تشوفلهم : شن يبي فيها زعما
سنابل : مالك و مال الناس انتي
اروى شبحتلها : ندوي عادي خيرك
( محمد قرب منهم )
روان اخته شبحاته : اخيراً جيت
محمد ابتسملها : استاحشتيني
سنابل سمعت صوته تلفتت
روان ضحكت : والله من غيرك الجو مش مليح انت عارف
محمد ضحك و وقف بحداهم
سنابل تشوفله : وينك لتوااا
محمد شبحلها : صار موضوع عطلني
سنابل هزت راسها بمعنى شني
محمد غمزها : مش مهم
سنابل : به
محمد : وين احمد ؟
روان : رقد مع اميمة من بكري
محمد : باهي كويس ؛ قعدت نخمم فيه قلت كان مايغرق
روان : و حني شن انديرو
اروى وقفت و حطت ايدها ورا ظهرها : اااه ظهري ايبس من التقعميز
روان : بري تمشي شوية
اروى تشوف ليوسف : يكمل يوسف موضوعه مع سلسبيل و نتمشىٰ معاه
سنابل : شن امالا قالولك توكة بتوكة ؟
اروى شبحتلها : يا لطيف من طول لساناتكم تقولي وراثة
روان تحرك ف حاجبها : وارثينه من عمتي 😏
اروى تكنطت ؛ مشت للشاليه و ماردتش عليها
محمد ضحك : قصفتيها
روان شبحتله : تي شوية فيها مبرد دمها غر علاش جاية معانا بس
سنابل : ماهي امها ديوتي في المستشفى ماصدقت وين تلصق روحها
روان وقفت : انى جعت بنمشي ناكل حاجة و بعدها بنرقد
محمد : و ديري طلة على احمد بالك راقد قدام المكيف
روان و هي ماشية : حاضر
محمد قعمز مع سنابل ع القَزّة مقابلين الشط
سنابل شبحتله
محمد : شن كليتي اليوم
سنابل : كليت عادي زيهم
محمد : سميلي شن كليتي
سنابل : النهار كله نعوم ماكليت شي لكن بعد ماطلعت كليت سينابون مع النسكافي
محمد : و شن تاني
سنابل : و بعدها فاكهة
محمد : به ؟
سنابل : و شوية شواية
محمد شبحلها
سنابل شبحتله : بطاطا مقلية و مشروب
محمد : بتقعدي تسمي بالحاجة ؟
سنابل ضحكت : و كليت شكلاطة و تشيبس و خلاص
محمد : الدكتور قال اشربي عصائر مش مشروب
سنابل : عادي ف مكانه كليت فاكهة
محمد : باهي كويس المهم كليتي
سنابل سكتت و قعدت تشوفله
محمد ابتسم : خيرك تشوفيلي هكي
سنابل : محلاها حنيتك
محمد : كان مانحنش عليك على مني بنحن ؟
سنابل تحشمت و شبحت للبحر
محمد شبح للبحر حتى هو و سكت
__
7
هناء لبست بيجامتها و اتكت ف السرير مع روان
دارت السماعات في وذانها و فتحت قران تسمع فيه
__
4
يوسف : تفاهمنا ؟
سلسبيل : مية مية ماتخممش يا برو
يوسف ضحك : تي معاش تدوي بيه الأسلوب هذا خلي عندك شوية أنوثة
سلسبيل ضحكت : حاضر
يوسف : تعرفي ياخدك النوم و ماتنوضيش نخش نجبدك من شعرك
سلسبيل : بدل ماتخش تجبدني انى ؛ خش نوضها هي احلى و ارقى 😉
يوسف : هيا وجهك للنوم
سلسبيل ضحكت و مشت
و يوسف كمل طريقه يتمشىٰ ع الشط و يدخن
__
سنابل مقعمزة تشوف للبحر : محلاه الجو
محمد ساكت
سنابل : هدوء و روقان ؛ مافيش شي الا أصوات الموج
محمد : ايه عز العوم توا
سنابل : تبي تخش ؟
محمد شبحلها : تسايريني نخش
سنابل ترددت : مش عارفة
و شبحتله : مش ليل توا ؟
محمد وقف نفض ايديه و مدلها ايده : الجو مليح هيا
سنابل تشوفله
محمد ماد ايده : تي هيا نوضي
سنابل شدت ف ايده و وقفت : باهي بشرط ؛ لا نبعدو ولا نعطلو
محمد ضحك : به
شبحتلهم سلسبيل : قاعدين هني ؟؟
محمد و سنابل شبحولها
سلسبيل قربت منهم : نحسابكم حتى رقدتو
سنابل مدتلها التليفون : هاك خليه عندك بنعوم
سلسبيل انصدمت : توا ؟؟
محمد نحّا التيشرت متعه و مدهولها : هاك شدي
سلسبيل خداته منه : هبلتو ؟ 😳
محمد نحّا ساعته و مدهالها مع مفاتيحه و تليفونه : خليهم عندك لين نطلعو
سلسبيل ضحكت : بالك تبي تنحي وشاحك آنسة سنابل
سنابل نحت وشاحها : والله حق غر بيضايقني
سلسبيل خداته منها : تلقوني ف الفيراندا
محمد : بري هي
سلسبيل : باهي تو نمشي
محمد : توا هيا
سلسبيل مشت وهي شادة الحاجات
سنابل تضحك 😂
محمد شبحلها : هي
سنابل خشت معاه ؛ اول ماجتها الموجة عيطت : مسقعععة 😅
محمد ضحك : هيا قدمي ماتقعديليش ف الشط
سنابل تقدم : اسمع نخاف منه البحر ف الليل مرات تمسني حاجة
محمد : تي مايجيك شي حتى الباغليات مش توا وقتهم
سنابل سكتت و زادت قدمت معاه : حي على امها ثلج
محمد : تو شوية و ترتخي
سنابل عيطت : وووه عليااااا
محمد : خيرك ؟؟
سنابل تصيح : في حاجة مستني في حاجة مستني 😰
محمد يضحك : بالك شكارة فكينا من الشهدرة
سنابل تشوف تحتها : مش عارفة بالك
محمد : ارخي روحك تعومي 😉
سنابل شبحتله : شن قالولك مانعرفش ؟ .. غر ف الليل ماعمريش خشيت بس
محمد : حلاوة العومان ف الليل خير من حرقة الشمس و تقييد الأحوال
سنابل : صح
محمد : بتقعدي بعيدة هكي ؟
سنابل : شن تبيني ندير
محمد : قربي شوية
سنابل تحشمت : لالا هكي كويس 😅
محمد : كان غرقتي و مالحقتش عليك ماعلياش ملام
سنابل ضحكت : به
محمد غطس و قعدت سنابل تعوم على ظهرها
بعد شوية محمد طلع : هكي جو عومانك انتي ؟
سنابل : يس يس
محمد قرب منها : تعالي نسلوطك
سنابل بعدت : لالا مانحبش
محمد : علاش فيهم جو
سنابل : مرات نطيح على رشادة ولا تخشلي المية في وذني مانقدرش
محمد : باهي قربي بحداي خيرك خايفة
سنابل : لا مش خايفة خليني هني
محمد ضحك و غطس تاني
قعدت سنابل تشوفله و هو يعوم و ساكتة
______
يوسف رجع للشاليه بيرقد لقي سلسبيل مقعمزة ف الفيراندا متع الشاليه التاني و فاتحة النت
اشرلها بيده : هييي
سلسبيل شبحتله : ايوه
يوسف يتكلم بصبعه : خشي ارقدي وراك نوضة بكري
سلسبيل : يا قعادي نعس عليكم و خلاص
يوسف جاها : شني ؟؟
سلسبيل تلخبطت : شي شي 😅 شوية و نخش
يوسف : زي ماوصيتك خلي تليفونك هزاز بنتصل بيك
سلسبيل : تمام به
يوسف : تصبحي على خير
سلسبيل : و انت بخير
يوسف خش بيرقد و سلسبيل شبحت لتليفونها و كملت هدرزتها مع الولد اللي عطاها الرقم
_______
سنابل تعوم بروحها : خيره هذا عطل ؟ من لما غطس معادش طلع !
قعدت اتدور فيه بعيونها : وينه !!
و تشوف جهة الشط مافيش حد ؛ خافت
بدت تنادي : محمد ؟؟ ... محمد !
و محمد ماطلعش
قعدت تشلبك ف المية 💦 : محمددد ! وينك ؟
محمد ماطلعش و سنابل زاد ركبها الخوف : حي عليا شكله غرق 😰
بدت تبكي و تنادي : محمد ؟؟؟ .. محمد اطلع بلا جو مانحبش هكي ... محممددد ؟ 😢
فجأة محمد شدها من رجليها تحت المية
سنابل خافت و عيطت : يا محمددددد 😭😭😭
و طلع محمد من وراها : نعممم
سنابل انخلعت و شبحتله : خززززي عليك خلعتني 😭
محمد قرب منها و شدها : خيرك ؟
سنابل : قلبي قريب وقف نحساب اشبح شن طلعلي
محمد : هذا علاش تبكي ! اسف مش قصدي
سنابل تبكي : مخليني بروحي ف الليل و خفت عليك لما ماطلعتش
محمد : باهي خلاص معادش تبكي
سنابل تمسح ف دموعها : لا مانبكيش
محمد مقرب منها ؛ حط صبعه تحت عينها : و اللي نشوف فيه هذا شني ؟
سنابل تحشمت و وخرت : نبي نطلع
محمد : مسرع حني كيف خشينا
سنابل : لما انت غاطس انى عُمت بروحي خلاص
محمد : قصدك زعلتي ؟
سنابل هزت راسها : لالا
محمد جبدها من ايدها : خلينا شوية و نطلعو
سنابل سكتت و ايديها يرعشو
محمد : و اسف معاش نخليك بروحك
سنابل مرتبكة : به
محمد شدها من ايدها و خش بيها الداخل
سنابل : لالا وين ماشي فكنا
محمد : ماتخافيش شادك
سنابل : رجليا معاش يلحقو نخاف نغرق
محمد : مش حانرخيك عيب
سنابل سكتت
محمد : شدي ف ايديا و ارخي روحك بس
سنابل شدت ف ايديه و تعوم معاه
___
سلسبيل نعست خلت حاجات محمد ع الطاولة و خشت رقدت
___
بعد ساعة 🌹
سنابل : انى اعييت نبي نطلع
محمد : تبي تطلعي عندي شرط
سنابل : شن هو
محمد : شدي ف كتافي
سنابل ضحكت : علاش تحرج فيا توا ؟ نطلع بروحي را
محمد : كان قدها الطلعة اطلعي
سنابل قعدت تشوف للمية و ساكتة
محمد : ها شنو
سنابل : باهي تلفت هي
محمد ضحك ؛ عطاها بظهره و شدت ف رقبته
سنابل ساكتة و متحشمة
محمد طالع بيها : نديرو غطسة ؟؟
سنابل ضحكت : لاااا خليك لاهي ف الستيرسو
محمد ضحك و نزل بيها تحت المية
سنابل طلعت من المية مسكرة عيونها : ااااه عيوني يحرقوو 😩
محمد : لازم تتعلمي الغطس مايمشيش حالك تشلفيط فوق المية بس
سنابل ترمش ف عيونها و ساكتة
لما قربو للشط محمد رخالها ايديها و لفتها ليه : ترا نشوفهم عيونك
سنابل : نعم
محمد سكت و قعد يشوفلها
سنابل ضحكت : شن بتشوف فيا ليل
محمد : اهو ضي القمر عاكس على وجيهك
سنابل تحشمت و مشت بتطلع من البحر
محمد لحقها : خيرك منعتي
سنابل قلبها يدق : ننعس
محمد سرع خطواته ف الشط و شدها من ايدها : سنابل
سنابل لمحت محمود مقعمز ع القزّة : حول خوك يشوف فينا
محمد شبح قدامه لقاه مقعمز
محمود ضحك : شن اديرو 😃
سنابل تحشمت و مشت بسرعة للشاليه
محمود يشبحلها و يضحك
محمد طلعله : شن ادير هني
محمود أشر على روحه بصوابعه : انى اللي بروحي شن ندير ؟ امالا انت يا برو شن ادير ف البحر و ف نص الليل 😉
محمد : نوض ارقد يا امسخ نووض
محمود ضحك و ناض
1
يـتـبـــع ... 💗
_________________
