رواية غرباء ( لقاء بعد الموت ) الفصل التاسع 9 بقلم اساورالموسوي

السلام عليكم

الله صلِ على محمد وآل محمد

يا ؏لي

لا تنسون التفاعل، تصويت+ تعليقات عالفقرات+ متابعة لحسابي..

ابقــــــــي يــــــمي لارگصلچ رگص منهوب

اخلي الغجر تحتار عني تگول متعافي.

لـــــدبچلچ دبچ معدان، واوصل الطين لـ چتافي

واگلچ هذا الفرح ترا مو كله عوافي.

----

"صقيل"

الباب بعده مفتوح واني واگفة بنص الصالة، انفاسي هوسة، عيوني مثبتة على الدفتر بيد أمي..

ايدها تضغط عليه بقوة ماعبالك دفتر مذكرات دليل ادانة، الا صدگ هو دليل ادانة.

صوتها طلع موجوع وعصبي..

:- ولچ مستهترة تخلعين حجابچ؟!

رجعت ليورا حلگي وريگي نشفن حاولت ارتب حچي بسرعة..

:- ماما هذا مو صدگ، هاي مجرد كتابات خيال...

گاطعتني بعصبية..

:- لا تچذبين عليّ ولچ حيوانة وتنزعين حجابچ وتروحين حفلات؟! شنو هذا اللي قريته هاااا شنو هالحچي صقيل؟!

قربت منها احاول اهديها..

:- ماما والله مو صدگ اني اكتب من خيالي بس هيچ، كل البنات يكتبن...

صرختها رجفتني بمكاني..

:- اسكتي ولچ ادبسزز لا تبررين ولا تچذبين هذا مو خيال هذا واقع، انتِ كتبتي كلشي كل وصاختچ كاتبتها بيدچ

هزيت راسي صوتي يرجف..

:- لا ماما والله مو هيچ اني...

شمرت الدفتر عليَّ بغضب ضرب بصدري..

:- منو هذا هشام؟!

انبلع صوتي اريد احچي ماعرفت.

:- احچي ولچ منو هذا الجابچ للبيت وگال دعمچ عندچ علاقة وياه؟!

هزيت راسي بنفي هستيري..

:- لا والله العظيم ماما اقسم بالله ماعندي علاقة تربيتچ اني، ماسويت شي

صاحت بغضب اكبر..

:- چذابة ماصدگچ انتِ مو تربيتي ابدًا مو البنية اللي ربيتها

:- والقرآن ماعندي شي وياه

:- شعندچ ويااااااه؟ احچي لا انهيچ واخلي عمچ ياخذچ للعراق يمه ويربيچ على ايده

:- والله ماكو شي والله يمه ماعرفه...

:- لا تچذبين، وتحلفين چذب بعد

ظلت تصرخ بوجهي لدرجة خفت مو امي ابدًا، حتى كلما تقرب عليَّ ارجع ليورا بخوفي.

دارت وجهها بسرعة ودخلت لغرفة خليل، گلبي طاح بالأرض، عرفت رايحة تجيب شي، طلعت وبيدها حزام خليل، انفاسي انگطعت.

وگفت گبالي الحزام بيدها وعيونها تجدح نار من الغضب..

:- منو هذا؟!

صوتي طلع كله بچي..

:- والله ماعرفه ماعندي شي وياه...

گاطعتني..

:- لاااااااا تحلفيييييين بالله چذب

:- والله العظيم مو چذب...

ما خلصت كلامي نزل الحزام على فخذي، متت شاغت روحي صرخت بدون وعي.

:- آااااه ماااااامااااااا

:- حيوانة وادبسزز ومستهترة وتخلعين حجابچ، فوگها تحلفين بالله چذب!!

اجتني ضربة ثانية بنفس الفخذ وصارت ثالثة، ورابعة وظلت تنوع بكل جسمي حزام واني اصرخ، ايديه بس احاول احمي نفسي بيها.

طاحتلي حيل وحيل ماظل مكان سليم من الحزام واصرخ واحچي احاول ابرر نفسي ماتسمعني.

:- ماما والله صادقة والله ماكو شي بيننا

:- لا تكذبين لا تحلفين بالله كااافييييي

كل كلمة منها وياها ضربة، دموعي گامت تنزل توسل بيها توگف، صوتي اختنگ..

:- يمه لااا..... يمه بس اسمعيني......

ما تسمعني حاولت اهرب من الضرب بس كلما احاول تلزمني وتزيد.

ظلت تبچي بقهر..

:- ضيعتي تعبي ضيعتي تربيتي ولچ ليش بشنو قصرت وياچ؟!

لحد هسة ما مستوعبة هاي امي تضربني، فجأة وگفت عن ضربي بالحزام، واجاني كف بخدي بكل قوة، والثاني صلخ وجهي، الثالث والربع ماحسيت بيهن مثل الاولات خدر وجهي.

امي بكل غضب..

:- هذا خيال موووو هذا خياااااال؟!

طحت وراسي انضرب بالسراميك، گمت بسرعة اريد اشرد دوخة لزمتني، وامي كذلك، كسرتني تكسر وكل ضربة حچاية.

:- اني ربيتچ على الشرف على الحجاب على الدين مو هيچ، ولچ ليييييش؟!

لزمت حجابي جرته وشلعت شعري من مكانه صرخت بعلو صوتي..

:- آآه ماما راح اموت!

:- موتتهم طبچ مرض اني اريد اموتچ، ليش تسوين هيچ بيَّ ليييييييش؟!

حسيت بطعم الدم بحلگي، ايديه غطت وجهي غصب..

:- ماما والله مو صدگ والله ماعندي شي...

:- اسكتي ولچ حيوانة!

ضربت ايديه حتى تبعدهن، شبعتني كتل بلا رحمة، حتى ما مستوعبة هاي امي اللي جاي تضربني، ولا بعمرها ضربتني.

كل ضربة وياها حچاية..

-مستهترة!

-قليلة ادب!

-انتِ مو تربيتي!

-حيوانة!

-طايحة الحظ!

ظليت اصرخ..

:- كافي ماما دخيلچ كااافييي!

بس هي ولا هماها كأنها كل قهرها، اخر شي دفرتني برجلها ابطني، ظليت اتلوى عالارض هنا عافتني.

وگفت فوگي وهي تتنفس بصعوبة وتلهث، مسحت وجهها وايديها ترجف، صوتها طلع مخنوگ..

:- ماعرفچ والله ماعرفچ مو بتي الربيتها، الظاهر الدلال فسدچ

هالكلمة كسرتني، ماعرفچ، اذتني اكثر من الضرب ماگدر اباوعلها، دموعي ظلت تنزل بلا توقف، واشهگ بصوت عالي.

تمنيت ابوية موجود بهاللحظة حتى اشرد من غضبها لحضنه بلكي يفهمني وينقذني، ماگدرت حتى امسح دموعي.

ظليت ابچي بشكل هستيري، تركتني وراحت لغرفتها وسدتها، گمت بصعوبة واني ابچي، گلت بگلبي الا احرگ گلبچ عليّ اكثر.

مشيت بالگوة من الالم بكل جسمي، شعل نار كل شبر بيَّ، ومن النار اللي بگلبي ردت اطلع واهيم بالشارع وين ما اوصل اوصل.

بس وگفني صوتها وهي تبچي وتصرخ، وهي تعاتب ابوي، هنا انهار كل غضب بيَّ، تراجعت ودخلت داخل.

رحت لغرفتي واني ماعرف شسوي، بچيت وملخت شعري من القهر، اني اول مرة انضرب هيچ.

ظليت ابچي هيچ واتألم من جسمي ماعرف شكثر مر وقت هواي، غفيت مكاني بعد ماجتني امي، فزيت على صوتها وهي تشيل الغطا عني.

:- گومي ولچ گومي احچي وياچ

فتحت عيوني بصعوبة وجسمي كله يوجعني باوعتلها ورجعت جريت الغطا وغطيت حتى راسي..

:- مو احاچيچ گومي

:- ماگدر وماريد

:- ماطلبت رأيچ، گومي گدامي

:- شتردين مني بعد

:- هسة تگليلي منو هذا هشام

:- گتلچ ماكو شي

:- لا تكذبين، اني قريت كلشي

:- مادامچ قريتي كلشي بعد ليش تسألين

:-اريد اسمع كل تفصيل منچ

گمت بصعوبة واحس وجهي يوج نار..

:- ماما بس اسمعيني...

گاطعتني..

:- ماريد اسمع كذب، جاوبيني منو هذا وشيريد منچ

ماجاوبت.

:- احچي ولچ لا هالمرة بالقندرة!

:- بقت بس القندرة جربيها يلا

:- صقيل وحق لا إله إلا الله ازوعچ الدلال كله هسة، ومن باچر تصبحين انتِ بالعراق يم عمچ، ولو تموتين يمه ماحچي ولا اجيبچ

:- شتردين احچيلچ مو قريتي كل مذكراتي

:- شيريد منچ هذا اللي اسمه هشام؟

:- يريد... "سكتت شوي" يريد يتزوجني

:- شنووو؟

:- هذا اللي صار كله

:- صدگ تحچين لو يلعب عليچ؟ لو هاي كذبة جديدة منچ؟

:- والله صدگ هو اليوم گلي

:- اليوم؟!

:- اي من اجيتچ طلعت من الامتحان وهو واگفلي مثل كل يوم، گلي اريد اطلبچ

:- وانتِ مصدگة؟

:- ما ادري

:- شنووو مادري؟! تحارش بيچ؟

:- لا والله ولا حتى حاول يلمس ايدي

:- تحلفين ما جاي يلعب؟ ولو حلفانچ صار عادي وماصدگه

:- احلف والزهراء گلي زواج

:- وانتِ شنو موقفچ؟

سكتت.

:- احچي صقيل لا تسكتين اني امچ مو عدوچ ماريدچ تنضرين

ماجاوبت.

:- ترا قريت كل افكارچ كلشي لا تكذبين، احچي تردينه؟ صقيل!

:- اي

:- شنو اي؟

:- اي اريده

:- شنووووو!

:- لأني احبه...

ماكملت اجاني منها كف فوگ الألم زاد اضعاف، هنا ماعرف شصار بيَّ عصبت وصرخت بوجهها.

:- اريده واحبه واقبل بيّ!

:- ولچ تصيحين بوجهي وبهالكلام شهالجرأة صايرة جسرة وماتنجرعين!

:- احبببببه احببببببه اي احبببببه شبيهاااااا؟!

اجاني منها كف ثاني خلاني اثور اكثر ماهداني، كلما تضرب ازيد تمرد.

:- تسكتين لو ادفنچ هنا!

:- لا ما اسسسسسكت! احببببببببه! واخذه اني قابلة!

:- واني اگلچ مستحيييل على جثتي!

:- وشنووو بيهاااا حرااااام لو عيب؟!

:- اسكتي ولچ بعدچ 17 سنة زعطوطة وتفكرين بالزواج؟! فكري بمستقبلچ وبدراستچ تفكرين برجال، اذا رجلچ توجعچ اظل طول الليل اداويچ

بطنچ توجعچ تبچين مثل طفل، تردين تتحملين مسؤلية زواج، ومن منو هذا الرجال الشايب والله العالم شنو ومنو ومتزوج ولاعب بعقلچ

چنتي لو واحد شاف شعرچ تگعدين تبچين وهسة صايرة كلش ادبسزز وصلاتچ ماتأدينها شجاااااچ ولچ

:- هاي مو ذنبي اني حبيته واريده، ومنو گلچ ماتحمل زواج، مو طفلة گدامچ، وبعدين اني فاشلة بالمدرسة مانجح گتلچ اني فاشلة جاي تخسرين فلوسچ عالبلاش

:- لاعب بعقلچ هذا الشايب مريض، لو اشمر دم گلبي ماخليچ تزوجينه وتعوفين مستقبلچ، كلمة فاشلة لا اسمعچ تگوليها

:- اي فاشلة بالدراسة ماتشوفين اخواني كل واحد اشطر من الثاني، إلا اني فااااشلة مااامااا افهمي اني مو مال دراسة

:- لا ترفعين صوتچ عليَّ، الدلال الزايد خربچ!

:- اني حرة بحياتي!

انطتني كف من جديد اجه على خشمي قوي اذاني، حسيت روحي شاغت فرفحت بمكاني.

:- حياتچ تعيشيها بصورة صح اني عايشة لو ميتة؟!

وخرت ايدي عل خشمي وبعصبية..

:- اتزوجه!

:- شنوووووو عيدي ماسمعت؟!

:- اتزوجه! اني قابلة!

:- على جثتي والله!

:- بس هذا قراري!

:- قرارچ مووو، شوكت صرتي تاخذين قرارات بكيفچ؟!

:- اي هذا قراري واني حرة، ماريد ادرس ماريد مو گوة تخليني اكمل

:- والله لا اكسر راسچ قبل لا يصير

:- ما راح تمنعيني

:- امنعچ وغصبًا عليچ

:- جربي

:- تتحديني ولچ؟!

:- اي اتحداچ

:- ولچ انتِ مو طبيعيه

:- وانتِ ظالمة

:- اني ظالمة؟!

:- اي ظالمة

:- بعد هاي كله اللي سويتيه تگولين ظالمة؟!

:- اي ظالمة ضربتيني تعاي شوفي اثره بكل جسمي والله لا يرضى عليچ هيچ تسوين بيَّ

:- تستاهلين منا وهيچ تعاملي كله وياچ بالعنف لمن ترجعين لوعيچ

:- سوي اللي تردينه والله فلا اتراجع عن قراري

:- والله لأخليچ تنسين اسمه

:- ما انسى

:- غصبًا عليچ تنسينه

:- ما راح انسه ولا اتراجع وراح يجي يطلبني وتشوفين

:- خل نشوف

:- افشلچ واقبل گدامهم

:- اخوچ موجود، وعمچ يتصرف وياچ

:- لا تهدديني بعمي مايهمني تردين تخلصين مني مو يلا دزيني للعراق يم عمي وخلصي

ماجاوبتني عافتني وطلعت، گمت ابچي بهستريا حطيت وجهي بالمخده، بالگوة چنت لازمة نفسي.

خلصت دموعي وتعبت من البچي گمت للحمام اسبح، افكاري روجات تروح منا وتجي مناك ومافاهمة نفسي، كل الاريده هسة بس هو.

جسمي يخوف صاير خريطة من الضرب واثر الحزام يخوف صاير وبكل مكان حتى انقهرت على نفسي، شلون هانت عليها هيچ تسوي.

وجهي همين مورم وخطوط زرگه بخدي اثر اصابعها، انهضمت على نفسي، طول عمري مدللة ومانهانيت بهالطريقة بس هسة.

ماچنت اعرف اللي اسوي غلط، چنت اشوف نفسي صح وان هاي حياتي وقراراتي تخصني وبس محد اله حق يدخل.

ماطلعت من غرفتي ولا تركت سريري، اجن خواتي وشافني انصدمن بوجهي.

اصيل:- صقيل هاي شبيچ؟

فاطمة:- شصاااير منو ضاربچ؟

:- امي ضربتني

اصيل:- ليييش شصاير؟

:- بيننا

اصيل:- شنوو بينكم اسرار احنه غرباء

:- لا بس موضوع تريد تگوله الكم سألوها هي مالي خلگ اسولف

فاطمة:- شمسوية وامي هيچ ضربتچ؟

:- عفية بنات مالي خلگ احچي عوفوني فدوة والله جسمي يوجعني وتعبانة اريد انام

طلعتهن من غرفتي بالگوة قابلات يعوفني، رجعت نمت وتمنيت ماگعد حتى امي تحس بغلطها وتتحسر وتندم.

صدگ تمنيت ماگعد گد ماقهرتني، حتى البنات گعدني للاكل ماردت رجعت نمت، فزيت على صوت غريب بسرعة گمت مفزوعة، صوت خليل يصيح وعصبي.

خفت راح يجي يكمل عليَّ هو همين، بس لا الصياح چان مو عليّ، طلعت بسرعة واني بالگوة امشي من وجعي، اسمع خليل يصيح.

سمعت صوت خليل يصيح من المجلس..

:- ماعدنا بنات للزواج اطلع بره يلا!

صوت ثاني هادئ گلبي دگ بسرعة هذا هشام..

:- اسألوها عالأقل، هذا حقها

خليل بعصبية:- تعلمنا شنو حقها ومو حقها؟! انتَ شكوو اطلع بره گتلك

:- لا تصيح الزلم مو بصوتها مراجلها بأفعالها

قبل لا يحچي شي دفعت الباب ودخلت بدون وعي وكلامي طلع بتهور وغباء..

:- اني موافقة محد اله حق يمنعني

صار سكوت تفاجئوا كلهم حتى هشام، چان جاي وحده وبس هو وامي بالمجلس وخليل اخوي.

امي تفاجئت..

:- صقيل؟!

خليل بصياح..

:- ولچ شتسوين هنا حجابچ وين؟!

:- گتلكم اني موافقة عليه

خليل:- انتِ تخبلتي؟!

امي :- شعرچ ولچ وين حجابچ؟! طلعي بره!

خليل جراني يريد يطلعني..

:- ولچ تخبلتي؟ سترچ!

:- عوفنييييي اگلك

:- طلللللللعي بررررره

:- لا ما اااااطلع

:- گتلچ اطللللللعي

:- ما اطلع اني احچييي

:- انتِ ما تحچين!

:- لا احچي هذا مستقبلي

:- مستقبلچ شنوووو بنت الذينّ؟!

:- اي مستقبلي

:- ولچ بعدچ طفلللللة

:- اني مو طفلة

:- اسكتي ولي منا

ويجر بيَّ وامي ساكتة لازمة حلگها مصدومة وعيونها مفتوحة عالآخر على جرئتي وصلافتي، وخليل يتصايح وياي حتى هشام ساكت.

:- لا ما اااااسكت اني اررررريده

:- انتِ ما تعرفين شتردين

:- اعررررف

:- لا ما تعرررررفين

:- اعرف واني احبه

اجاني كف منه شلع وجهي بغضب، واجاني الثاني بكل جرأة ولا هماه فكي انشلع من الثاني طلع حرگة گلبه.

خليل بغضب..

:- اسكتي حقيييييرة مو بعينچ شطولني شعرضني

:- لا ماسكت وبعيني بس هذا قراري

اجتني صفعة اقوى..

:- گتلچ سكتي وطلعي بره

:- ما ااااااسكت

:- تريدين تجيبين العار

:- شمسوية حتى اجيب العار اريده واتزوجه بالحلال

:- ولچ راح اكسرچ

راد يدخل هشام امي منعته واشرتله يطلع وطردته بصياح، بس ماتحرك وخليل يتصايح وياي وطاحلي كتل حيل وحيل حتى حسيت نفسي راح اموت بيده.

امي تصيح..

:- ولچ كافي لا تراددين

هشام فزعلي ولزمه قوي..

:- كافي تضربها ايدك وخرها

خليل بغضب دفعه..

:- انتَ لا تدخل

رجع هجم عليَّ ملخني حتى ملابسي انشگت من ياقة التراك، صوتي طلع بالگوة استنجدت بيها بس ماهماها.

:- مااااماااا ساعديني

هشام لزمه بغضب..

:- كااافيييي ولك

خليل دفعه..

:- مااااالك علااااقة

هجم علي يجرني ويطلعني بره المجلس واني اصيح بصوت ضعيف..

:- مااامااا

امي بدال ماتساعدني ظلت تصيح..

:- شوف شسوت بنفسها الغبية

خليل :- تستاااااااهل

ظليت ماسمع شي دخت وتعبت فحطت، شعري شلعه خليل اشوف خصل بيده تتشلع، ويه كلام هشام يگول اتركها.

دفعني خليل وانضربت بالبلاط وراسي حسيت انشال من الضربة، گمت ماحس بشي ولا اسمع احد، صوت امي تصرخ وتركضلي.

بس اسمع اسمي باصواتهم كلهم ماعرفت منو ومنو يحاچيني، غبت عن الوعي....

**

صوت الأم وصريخها خله البنات يخافن ويصيحن وياها، امها وهي تصيح بشكل مرعب..

:- صقييييل ماما ولچ ردي عليّ

خليل بصوت متوتر..

:- يمه شبيچ لا تخافين يمكن بس غابت عن الوعي

:- لاااااااااااااااا بنتي صقيل لاااااااا ولچ ماما عيني افتحي عيونچ صقيييل

هشام :- لا توگف هيچ شيلها نروح المستشفى

خليل بلا شعور نزل عليها يضرب على خدها..

:- صقيل حبيبتي ردي ماقصدي اذيچ

البنات خافن وظلن يبچن وامها ظلت تصرخ وتبچي، خليل توتر گام شالها بسرعة حتى بلا حجاب، امها ركضت جابت عبايتها.

خليل وهو مرتبك..

:- وين نوديها وين نروح؟!

هشام :- سيارتي هنا جيبوها بسرعة

خليل بعصبية..

:- لااااااا انتَ ابتعد انتَ السبب بكلشي

هشام :- هسة مو وقت هالحچي، خل نوديها للطوارئ

امي تصيح وتبچي..

:- خليل دخيلك لا توگف هسة البنية راح تروح من عدنا

بلا تفكير زايد فتح سيارته هشام وخليل صعدها وهو وره وامه صعدت وياهم، راسها بحضن امها، تبچي وتگعد بيها.

:- صقييل ماما ردي احچي وياي فدوة

خليل صفگ الباب بقوة..

:- امشي بسرعة، يمه هدي مابيها شي اكيد

الام:- ولك يا مابيها شي غير ماتگعد بتي، يمه كسر بيدي المديتها عليچ صقيل ماما گومي

خليل سكت وهشام يمشي بسرعة بدون كلام، فجأة صوت غريب صدر منها، وصوت امها وهي خايفة ومرعوبة.

:- جاي تتقيئ شبيها ليش تتقيئ

هشام مرتبك وخايف..

:- حطوها على جنب لا تختنگ

ظلت تون وتفتح عيونها بصعوبة بس مافاهمة ولا فاقت بالكامل، هالشي خوفهم اكثر، وصلوا للطوارئ ونزلوها وهي بعالم غريب.

الام گطعت نفسها من البچي خليل وهو ينزلها وامها بعبايتها لفتها على شعرها.

داخل المستشفى الممرضين ركضوا الهم وسأل بعضهم شصاير.

خليل بصوت عالي مرتبك..

:- اختي مغمي عليها وضربت راسها بالارض

هشام :- ممكن يكون ارتجاج چانت تتقيأ بالطريق

:- جيبوها بسرعة، حطوها عالنقالة

خليل التفت لهشام..

:- انتَ انتهى دورك، اطلع بره

هشام :- المستشفى مو ملكك، ما راح اروح

:- شنو شگلت؟!

:- ابقى لحد ما اطمن عليها

خليل بعصبية..

:- انتَ ساس البلا كله انتَ السبب بكلشي صار

هشام بهدوء..

:- مو اني الضربتها

:- لا تسوي نفسك بريء مو انتَ السبب

:- لا تحاول تطردني اذا اطلع، راح احچي للشرطة كلشي

خليل انصدم..

:- تهددني؟!

:- لا بس احچي الحقيقة

خليل رفع صوته..

:- لا تعيش دور المنقذ والبطل

الأم ادخلت بينهم بصوت مكسور..

:- بسسسسس سكتوا انتو الاثنين، مو وقتكم هسة، مو وقت مشاكل، خلونه نشوف دربنا بنتي جوه بين ايدينهم

سكت خليل وهو متوتر، وهشام همين سكت، بس نظراتهم شرار ويتجادح، الأم راحت يم بتها.

سولها فحوصات واشعة (CT) وطلع سليم، بسبب حالات التقيأ المتكررة عدها والتشويش وعدم التركيز، اكد الدكتور انها مصابة بارتجاج.

بس الدكتور ماسكت بحالتها واتصل بــ وحدة حماية الأسرة، رغم هي گالت محد تعرضلي اني طحت، بس بسبب تشوشها وعدم تركيزها ما اخذوا بكلامها، ولازم يبلغون لا تكون مضغوطة.

الأم توترت وخليل كذلك، فظل يلوم هشام ويتصادمون بالكلام.

خليل بصوت ناصي بس مشحون بالغضب..

:- لا تفرح هواي، وجودك هنا غصبًا مو بارادتي

هشام بهدوء..

:- ما جاي حتى ارضيك، اني شاهد

:- ولا جاي حتى تبين نفسك منقذ وبطل

:- ما احتاج اثبتلك شي

:- انتَ تعرف شسويت؟ خربت بيت كامل

:- بيتكم خرب من قبل لا ادخل

:- لا تحچي بهالثقة اختي ماچانت هيچ

:- يمكن انتوا ماچنتوا شايفينها

:- لا تدخل وتسوي نفسك فهيم وعليم

:- هسة انتَ اللي فاتح باب المواجهة

خليل يصر على اسنانه..

:- اختي طفلة وانتَ لعبت بعقلها

:- ما لعبت بعقلها بس حچيت وياها

:- هذا كله تسميه بس حچي؟! تجي كل يوم تلاحگها وتگولها بابا؟!

هشام سكت شوي ورفع راسه..

:- اذا هالكلمة اثرت بيها، اسألوا نفسكم ليش؟

:- لا تلف وتدور انتَ استغليت نقطة ضعفها، هي الوحيدة ماشافت ابوي

:- كل انسان عنده نقطة ضعف، ونيتي صافية وياها

:- انتَ واحد استغلها وهي طفلة مراهقة، للأسف مو كل رجال ينگال عنه رجال

هشام بنبرة هادئة مستفزة وماهماه كلام خليل..

:- ومو كل اخ يحمي اخته

خليل فقد اعصابه يريد يهجم على هشام اجت بهاللحظة لزمته امه..

الأم:- شبييييك عوف الرجال كافينا فضايح ومشاكل

خليل :- لا تجيب اسمي بالموضوع

:- ليش وجعك الحچي؟

:- وجعني اللي شفته اليوم وجعني اختي واگفة گدامي ويم رجال غريب وتگول اريده

:- يمكن لأن محد سمعها قبل

:- وهسة انتَ اللي سمعها، احنه اهلها نعرف مصلحتها

:- لو چنتوا تعرفون ما وصلت لهالمرحلة

:- وانتَ تعرف؟! منو انتَ حتى تفهمها؟!

:- واحد سمعها وفهم داخلها

:- سمعها لو غازلها؟

:- فرق كبير بين الاثنين

:- لا ماكو فرق عندك، واحد ناقص شايب واستغل مشاعر طفلة

:- انتبه لكلامك

:- اي وشنو تضربني مثل ما خليتني اضربها؟

:- لا تحط ذنبك عليَّ

:- انتَ السبب

:- يمكن اني الوحيد اللي شفتها

:- انتَ اللي خربتها

:- اذا هي خربت فأنتم اللي وصلتوها لهالمرحلة

خليل رفع ايده بس وگفها وامه دفعته وهي تسمع وتفور وساكتة، ماتريد مشاكل اكثر من هيچ.

خليل :- والله لو مو المستشفى چان شفت شسوي بيك

:- يلا جرب

:- لا تختبر صبري

:- وانتَ لا تختبر هدوئي

:- هدوك هذا تمثيل

:- ترا عصبيتك هاي مو رجولة

:- لا تحچي عن الرجولة

:- الرجولة مو بالصياح

:- ولا الرجولة بــ تلاحگ بنات الناس

:- اني ما لحگتها هي ماعارضت وجودي

:- لا تحاول تگلبها عليها

:- ما گلبت شي هذا الواقع

:- هاي واقعك انتَ مو واقعنا

:- هي گالتها گدامك

خليل عصب اكثر..

:- لا تعيدها انهيك والعباس! يمه هديني!

هشام يستفزه..

:- ليش تخاف تسمعها مرة ثانية؟

:- ولك اسكت! يممممه هديني!

الأم:- استغفر الله والله جزعت من عركتكم هاي، كااافي احنه بمصيبة وانتوا تتعاركون

هشام :- ترا اني ما اريد أأذيها

الأم :- بس انتَ اذيتها

هشام :- ما اذيتها مثل ما سويتوا انتوا

خليل :- اذا طلع بيها شي والله...

هشام گاطعه..

:- راح تكونون انتوا السبب

خليل :- انتَ السبب كله منك

:- اني ما مديت ايدي عليها

خليل ظل يصيح..

:- بس دخلت حياتها

:- وراح ابقى لحد ما اتأكد هي بخير

:- على جثتي بس يخلص تحقيق تولي

هشام ابتسم..

:- نشوف

:- شتقصد

:- ترا حياتكم متوقفة على شهادتي، فلا تستفزني سيد خليل وخلينا حلوين

ظل يصيح خليل امه سدت حلگه وجرته لبعيد عن هشام، تعرف هالليل ماراح يخلص على خير، وابنها عصبي وراح يتهور.

اجه ممرض وحذر خليل لأن صوته عالي، سكت وگعد على مقاعد المستشفى وهو يهز رجله بتوتر وغضب.

اجه موظف وسلم عليهم وعرف عن نفسه....

**

تيجان طلع للحوش وهو يفكر وضايج، بعد ماهلك وهو يحاول ينام من التفكير، ما يدري شنو اللي يريده بالضبط.

بس ماگدر يبقى جوه فراشه يحس اكو شي خانگ صدره افكاره ملخبطة، يمشي بدون هدف واضح، يحس بتأنيب الضمير.

لو رفض يساعد مظلومة فعلًا؟

يتذكر دموع حروب وهو شكثر يأذيه دموع خواته، توسلت بيّ علمود بنية غريبة اكيد اخته تشوفها نقية لأنها طيبة وتحب الخير للكل.

وصل يم جن(قن) الدجاج ذاك المكان اللي كلما يوگف بيّ يحس بخنگه غريبة وطاقة سلبية.

الظلام هناك اثگل من مواجهة وحوش، حتى النفس يطلع ثگيل وشعور غريب، بان احد يراقبه هنا.

وگف شوي مرر ايده على راسه ولحيته، شمر زفره بضوجة رفع راسه وبحركة لا ارادية التفت وتجمد مكانه.

شاف شي يتحرك مو واضح بس خيال شخص، وجواه خشبة مگصوصة من جذع شجرة، واگف يم السدرة.

ثانية وحدة واستوعب وشاف الحبل مو بالكامل، انصدم وشكو فكرة سلبية اجت اباله، بلا شعور ركض وهو يصيح.

:- حرووووب؟!

ايديه بسرعة اندفعت ناحيتها حتى يلزمها وينزلها وبهاي اللحظة انصدم اكثر، شاف الوجه مو حروب بل آية.

وجهها يلمع بالدموع بس مايبين واضح، وگف ثانية بس يستوعب، بس بلا تفكير زايد جر الحبل يريد يوخره وطخ بيها بلا قصد، وهي ظلت تنحب وتجر الحبل منه.

:- شبييييچ تخبلتي شتسوين هااا؟!

:- اريد انهيها خلللييييني الله يخليك

:- شهالغباء ليش تنهيها ليييش؟!

آية واگفة جسمها كله يرجف عيونها غرگانة بالدموع صوتها مخنوگ..

:- اخلص العالم من عاري

سكت يباوعلها ما مستوعب الكلمة..

:- شنو شتگولين؟

هزت راسها ونحيبها لچمه..

:- هذا الحل الوحيد حتى اخلصكم واخلص اهلي من مصيبتي

:- انتِ غبية والله غبية، عار شنو؟ منو گالچ انتِ عار؟!

ما ردت بس ظلت تبچي.

:- راح تبلينا بدمچ مو تخلصينا شوكت اشتكينا منچ ها؟ منو گال متثاگلين منچ؟ منو طردچ؟

ظلت تنحب اكثر وصوتها عله بالبچي.

:- دگيتي بابنه وطلبتي مساعدة شفتينا طردناچ؟

هزت راسها بــ لا ودموعها زادت، هو سكت شوي يفكر ويحاول يرتب حچيه، ما متعود يشوف هيچ موقف.

:- زين ليش هذا الحل؟

صوتها طلع بصعوبة..

:- ما عندي غيره

تنهد والتفت شوي رجع دار الها بس مايباوعلها..

:- عندچ والله عندچ، بس انتِ ما شايفته، هذا مو حل هذا يأس من رحمة الله، عندچ علم اللي يقتل نفسه بالنار؟

كأنها انصدمت وهزت راسها بعنف، اشفق عليها بهاللحظة لأن واضح انها جاهلة وما تعرف شي..

:- هاي الروح والجسد امانة يمچ، مالازم تشمرين نفسچ بتهلكة، ولا تأذين هالروح هو بكيفه شوكت مايشاء ياخذها

ظلت ساكتة واضح مصممة على فعلتها وماهماها كلامه، يائسة كلش.

مد ايده للحبل شاله وشمره بعيد وهو عصبي..

:- هذا مو حل

آية بعذاب..

:- فدوة خليني...

گاطعها بسرعة..

:- لا ماخليچ، "سكت شوي يفكر" اللي تسوينه قنوط من رحمة الله

حچت وصوتها مبحوح..

:- بس اني ما الي احد بعد

:- الچ الله خلقچ اكيد مو للعذاب انتِ مو عار، العار اللي يظلم واللي...

سكت ماكمل مايريد يحسسها ان هو يدري بسرها ولا يريد يحسسها بشعور شفقة، مايريد يذلها ولا ينزل كرامتها.

:- سمعي بس دقيقة، الدنيا ما تنتهي بهيچ شي واذا انتِ تعبانة مو معناها تنتهين

جاوبت بنظرة يأس وبتردد بنفس الوقت..

:- انتهت، لازم تنتهي

سكت ظل يباوعلها لأول مرة يركز بيها وهاي الكلمة وگفت الحچي بحلگه، نظرتها فارغة بطريقة تخوف.

:- لا ما انتهت، انه احلها وعد زلمة، بس نزلي

ما ردت ودموعها بعدها تنزل واگف گبالها يحاول يلگه كلمة توگفها عن قرارها.

:- احلها الچ واعدتچ ومو زلمة الما يوفي بوعده، يلا نزلي

صوتها مبحوح..

:- يعني انه مو عار؟

:- ابدًا انتِ انسان والچ كامل الحق تعيشين الحياة

:- بس انه مو مثالية

:- ياهو مثالي

:- ماريدك تنجبر تساعدني

:- ما مجبور والله انه اريد اساعدچ

:- والله ؟

:- والله وجلاله، بس اوعديني ماتعيديها؟ يلا نزلي

سكت وهو ينتظرها تنزل، بس ماتراجعت رجع يحچي وياها.

:- آية نزلي يلا اللي تسوينه غلط، اعرف انچ خايفة وقرار صعب بس احنه وياچ ماراح نعوفچ

شوي شوي كأنها بدت تقتنع، هزت راسها شوي، مترددة بس ارتخت ونزلت من على الخشبة وهو ابتعد حتى يفسحلها المجال.

ماصدگ كلام بسيط خلاها تتراجع اكيد چانت مترددة وخايفة، قرار الموت مو سهل، چانت منتظرة كلمة بس تخليها تتراجع.

حس انها فطيرة وعلى نياتها، وشخصيتها ضعيفة وهشة، لدرجة كلمة توديها وكلمة تجيبها.

دنگت راسها بخجل منه، وتريد تتهرب بس هو ماحس بالثقة ظن بس يروح ترجع بقرارها.

فجأة مشت بسرعة طبت داخل بلا اي كلام، بس هو ظل گاعد هنا ولا تحرك رغم عيونه ظلت تقفل من وحدها، بس خاف ترجع من يروح وتصيرلهم بلوة چبيرة.

ماگدر يقاوم لصلاة الصبح صلَ صلاته وراح نام قبل لا يگعدونه للبستان، توه يريد يغفى.

رشاش :- ولكم تيجان شبي بس صلَ صلاته بدون حتى لا يقرا اي صفحة من القرآن مو عادته

علي الزكي :- شفته مانايم البارحة شكله متأرق

يوسف :- اكو شي وجهه مو طبيعي، عيونه حمر وكأنه شايف جن

عقيل :- يمكن صدگ شايف شي، هذا المكان بالليل يخوف

رشاش :- اغبياء لا تصيرون اخوكم النچر طاح ومحد سمه عليه

شرار :- اسم الله الرحمن الرحيم، احنه نسمي عليه هو وين طاح؟

رشاش :- طاح على خشمك الطويل ياغبي افهم

خنجر :- ولكم لا يكون طايح من مكان وما گال

رشاش بصوت ناصي..

:- خاب شمالكم شني متريگين فهاوة، يمكن يفكر بيها ولكم

شرار :- هااااا هسة ربطت الفيشة

رشاش:- صلوات على محمد وآل محمد

علي الزكي :- ان بعض الظن اثم لا تظن بأخوك السوء

يوسف :- وشنو واذا فكر بيها من حقه يحب

علي الزكي :- ترا هسة هو يشوفها مصيبة مو وكت حب ورومنسية لا تفكرون بحدودية

رشاش :- مثقف العايلة ارجوك اسكت اسكت بليييز

يوسف :- من يعصب رشرش يحول انگلوزي

عقيل :- اخيرًا حب تيجان

خنجر :- ركضت عالحب، گول بداية

رشاش :- لازم نعرف كلشي، بس هاي المهمة مو سهلة

يوسف :- نحقق وياه اليوم ما يفلت

شرار :- لا تستعجلون خل نشوف تصرفاته اول وكلشي يبين

عقيل :- شفتوا شلون سرحان مساع؟ نحچي وياه ما يسمع

خنجر :- اي قبل شوي گتله انطيني التربة مارد، عبالي معصب

رشاش :- لا مو عصبية هذا غرگان

يوسف :- الغرگ اللي مابيّ انقاذ

شرار :- هسة يطلع يسمعنا

رشاش :- خلي يسمع شراح يسوي يعني يگص ذيلي

تيجان رفع راسه..

:- شبيكم تتبسبسون بينكم؟

رشاش :- جاي نحچي عن الجو

شرار :- اي اي الحر جاي يزيد

يوسف :- ايي ونفكر نزرع ثلج بدال الطماطة

تيجان باوعلهم بشك..

:- والله شكلكم متفقين عليَّ

رشاش :- لاااا وين انتَ بعيد عن الشبهات

يوسف ما گدر يلزم نفسه..

:- بس اذا طحت لا تگول محد گلك اسم الله

شرار :- يمه اسم الله الرحمن الرحيم على گلبك خويه

تيجان گام من الفراش واخذ مخدته..

:- خرااا بشرفه اللي ينام يمكم، انام ببارگة الحيوان مال جدي ولا ابقه يمكم

رشاش :- وين رايح تعال

علي الزكي :- يعني ماسمعكم ماتوبون

رشاش :- استغفر الله ربي واتوب اليه وهاي تبنا

يوسف :- يجي يوم نحول عليك بس اصبر خويه

خنجر :- لا هسة الدور لرشاش بعده

رشاش شبگ المخده..

:- آخخخخخ اريد اطيح بالحب

يوسف ضحك..

:- بالحب لو بالبير

خنجر :- بالخيس وبالسرجين ولا بالحب، شفادهم الراحوا كلهم ماتوا وماخذوا عشگهم

يوسف :- اي صح سمعت هواي قصص عن اللي يحبون يصيرون مسودنين

رشاش :- اريد اصير مسودن عش احرم نفسي من هالشعور

يوسف :- هاااا گالب انباري عزيزي رشرش

شرار :- ام الماطور مأثر ة عليه

رشاش دفره بكوعه..

:- ام خشمك يا ام ماطور

خنجر :- هااااا هاااااا طلع الحچي، انباري! ام ماطور! يعني بيت جيرانه ابو سلطان

رشاش :- لا متيهين الطريق

علي الزكي ضحك..

:- هل ايام هواي تحچي انباري، يولي وعش وقرچ وبعد ذكروني

يوسف غمزله..

:- دحك يول، وريتيني ور، تا نروح، نمشيلو، نحچيلو

علي الزكي :- عمي مشينا لأبونا نخطبها

رشاش ضحك..

:- ماكو شي شبيكم غير اخوتها اصدقائنا

ظلوا يضغطون عليه حتى خنجر نام عليه يعصره ويگله اعترف، بس ماتنازل واعترف بشي.

**

"حروب"

گمت من النوم لازم اداوم امس غايبة، غسلت ورجعت بدلت لبست صدريتي خذيت عبايتي وكتبي وحجابي حاولت ماسوي صوت لأن آية نايمة.

شامية جاي تسوي حجابها ماخذه المراية كلها، تخصرت الها..

:- يمته تخلصين ساعتين بس تسوين حجابچ

:- شبيچ اوگفي خلصت

زمان :- حروب سوي حجابي

ترفة :- انه اول فدوة

اخذت حجاب زمان..

:- حجابچ وصخ زغيرونة ماغسلتي

ترفة :- انه نظيف شوفي يلمع

:- يلا شامية راح نتأخر بسببچ

شامية :- خلصت ها آها

:- بس تصيح خلصت وهي واگفة حاجزة المراية من الفجر

زمان :- احنه مراية شلون مراية تخبللل، امحححح

:- اخخ منچ لوگية

زمان ضحكت..

:- اتلوگ لأختي مو غريبة

طفرت راحت للمطبخ، سويت حجاب ترفة ورحت اباوع عالمراية اسوي بحجابي، كترت جنطتي يم باب المطبخ وياها عبايتي.

طبيت صبحت عالكل، اخواني كلهم جاي يتريگون، امي مسوي طماطة گلي وعليها بيضات، ابوي بيده سبحته ويمه گلاص حليب ونص خبزه ما ماكلها.

گعدت يمه والشمس تدخل من شباك المطبخ، بست ايده وخده، همست بذانه من شفت امي مشغولة عالطباخ تحمي الحليب.

:- يابه اليوم لازم اداوم آية وين تروح؟ اخاف امي تأذيها شلون نأمنها يمها بحدها؟

حچه بصوت ناصي صوت الولد يغطي صوته على امي..

:- اخذيها يم بيت جدچ، خليها يم بيبيتچ، وانه اتصرف ويه امچ

:- خوش هسة اگعدها

تيجان دخل وشكله تعبان عيونه حمر دم، واضح عليه لأن عيونه كبار، شعره مهوس ولحيته مخربطة.

تيجان :- صباح الخير

الكل :- صباح الخير

تيجان :- يمه چاي

:- شبيك حبيبي شكلك تعبان بعد اختك؟

تيجان :- ماكو شي نعسان

رشاش :- سهران يفكر بالحب

:- ياحب؟!

شامية :- خير ان شاء الله

يوسف :- باع عيونه

تيجان :- تنلصمون لا بالقوري مال الچاي افرغه فوگ راسكم

ابوي :- اذا تعبان بويه لا تروح للبستان اخوتك يكفون ويوفون

تيجان :- هو شكلي ماروح

امي صبتله چاي وماتحچي، شكلها واصلة روحها لخشمها، بس واحد يگلها شي تگب بوجهه.

رفع گلاص الچاي شفاف ابو العروة وامي تارسته اله، ظل ساكت يباوعله ومايشرب، يطلع منه البخار بيده.

شفته تحركت ورجع سداها ورجع هم يريد يحچي وتراجع، ظل يباوع لاخواني ولأبوي، بعدين لأمي.

تيجان تنحنح..

:- يابه بالنسبة للي طلبته مني وگتلك عن قراري

ابوي :- اي بويه هاي حياتك وانتَ حر ماضغطك

تيجان :- تراجعت عن قراري

ابوي :- اي خير ان شاء الله شنو هسة؟

تيجان :- قررت اساعدها وانفذ طلبك

ابوي ابتسم..

:- چنت اعرف انك زلمة گدها وليدي واثق بيك، بس ماريد تتسرع متأكد؟

تيجان :- اي متأكد فكرت عدل، اريد اتزوجها

الولد كلهم عله صوتهم والضحكة ترست وجوهم حتى علي الزكي ظل يضحك وياهم، امي ظلت واگفة مكانها مصنمة عيني عليها.

رشاش :- مو گتلكم ولككمممم

خنجر :- هاااااا ولك هاااااا

يوسف :- يابويه راح يعرس اخونا الچبير

شرار :- علي الزكي هلهل

علي الزكي :- انچب مرة واهلهل

عقيل :- شراح البس ماعندي بس بجايم مزرفة بلا العريس مضمونة ملابسه احنه شلون

تيجان :- ومرض شبيكم خلونا نفصم اول

امي عصبت وحطت قوري الچاي البيدها على الطباخ قوي..

:- مستحييييل بموتي ما تاخذها

سكتوا كلهم واختفت ابتسامتهم وفرحتهم.

ابوي عصب :- عتبااااار

امي بعصبية..

:- تريد تاخذ وحدة ما نعرف اصلها وفصلها؟

ابوي :- هذا قراره، مالچ علاقة

امي بصياح..

:- شلون مالي علاقة، هذا ابني بچري تعبت بيّ لو ماهامك ابنك!

ابوي :- وانه ابوه شنو ماهامني ادري شامره بالشط، هذا قراره بنفسه

امي :- وانه ما اقبل هالتايهة تاخذ ابني، شاب شحلاته طول وهيبة وسامة وتربية ودين واخلاق، تجي تاخذه هاي العوبة

ابوي :- تقبلين غصبًا عليچ، البنية ما بيها شي

امي.. :- ما بيها شي؟ انتَ تدري شنو بيها خلي اخوته يعرفون...

ابوي صاح بعالي صوته وگام على حيله وبيده عوچيته..

:- عتبااااار اذا ماتسدين بوزچ انعل ابو خيرچ طلعتيها من ماعونها، عندچ بنات خافي ربچ

امي بغضب..

:- لا تجيب بناتي على هالتايهة تروحلهن فدوة

ابوي بصياح..

:- يعني بناتچ عزيزات وبنات الناس هينات؟

تيجان گام ولزم ابوي..

:- يابه هدوا، يمه كافي شنو هالحچي شنو كل كلمة والثانية تايهة وتايهة عيب

امي :- انتَ اسكتتتت ماتاخذها لو تصير آخر بنية عالارض، ولك شنو تاخذ هاي شناقصك؟!

تيجان :- يمه هذا قراري، شنو بيها ما اريد اسمع شي بعد، اذا تنقصين منها تنقصين مني

امي.. :- انتَ ما تعرررررف شتسوووووي بنفسك

تيجان :- اعرف مو مراهق گبالچ

ابوي :- خلص الحچي، انتهى الموضوع، رضيتي اهلًا وسهلًا مارضيتي الباب يوسع جمل

امي :- تطردنيييييي؟!

ابوي :- اذا تبقين هيچ وتشاهرين بشرف البنية وسمعتها، قسم بالخلق سبع سموات اطلگچ ولا احط بعيني هالزلم والبنات ولا العشرة

امي طلعت من المطبخ وهي معصبة رحت لحگتها والبنات وراي حتى الولد، طابة للغرفة

صوت آية.تصيح..

:- دخيلچ خالة... ماسويت شي والله ماسويت

جارتها من شعرها ومگومتها من الفراش صرخت يمه عوفيها، حاولت افكها ماتقبل، اخواني داروا وجهم لأنها بلا حجاب.

بس تيجان ماسكت ولا وقت يغض البصر، سحب منها آية وهو يصيح بوجهها لأول مرة..

:- يمممممه كااااافي حرام عليچ الظلم

امي عصبت وانطته كف قوي خلته يصنم مكانه حتى مالزم خده، ابوي اتدخل بعوچيته ضربها ولأول مرة نشوف ابوي هيچ يضرب امي.

ابوي بغضب..

:- طلعييييي بررره الله لا ينطيچ مرار مو مرة

ترفة ظلت تبچي وزمان تبسمرت مكانها، شامية رجفت ايدها، امي ثارت وخذت عبايتها وطلعت مانعرف وين.

اكيد بيت جدي ماعدها مكان تروحلها لا عدها اب ولا ام ولا اخوة بيهم حظ، جدي الوحيد مايقبل نسوان ولده يزعلون بيت اهلهم يگلهم زعلكم ابيتي انه واطيح حظ ولدي لو عالوا بيكم.

وكلما تزعل امي تروح بيت جدي وهو يرجعها، لأن جدي حقاني ومايقبل وحدة من چناينه تنهان او تنذل.

ظلينا مصدومين، آية تبچي بنحيب بالگوة لازمتها ماتطلع، تريد تروح، تيجان طلع بسرعة واخواني وراه.

ظليت ساكتة، بس من داخلي اندعي يارب استرها وعديها على خير، اجه سايقنا اضطريت اعوف آية واروح.

امنتها بيد ابوي ومشيت، افكر بيها، انتبهت من تفكيري على سيارات الامريكان، شكلهم مو بس مرعب مقرف همين.

باوعت عمال بيت جيرانه شغالين، ماشاء الله رغم الظروف اللي يمر بيها البلد جاي يصير بنيان وتطور بعض البيوت، ان شاء الله دوم وربي يدوم نعمته عليهم.

بالمدرسة طول الوقت افكر بآية وبأمي راحت زعلت وبتيجان الاخذ كف بعد عيوني قهرني.

رجعنا من الدوام واول مانزلت اباوع الجو هدوء، طبينا جوه انه والبنات، همين هدوء غريب!

طبيت محد اكو، بسرعة رحت اشوف وين ابوي وآية، حتى ريحة طبخ ماكو يعني امي ماجاية، لگيتها گاعدة بالغرفة حاضنة نفسها وتايهة بتفكيرها.

بسرعة سلمت..

:- آية وينهم وين ابوي؟ الولد مارجعوا من البستان شنو صار؟

آية گامت اول ماشافتتي..

:- ماعرف اجو الشباب واخذوا عمو اكبر وطلعوا، اظن سمعتهم يرجعون امچ

شامية :- يارب يتصافون يارب

زمان :- ويارب تقبل امي بزواجهم

دفعت زمان بخفة حتى تسكت وابتسمت بوجه آية، ردت احچي واسمع الضحك بره للولد، التفتت طلعت من الغرفة.

دخلوا الصالة وهم شابگين امي شرار وعقيل ويبوسون بيها كل شوي واحد يمكن يراضوها، تيجان وجهه باهت خطية، رشاش يتشاقه ويضحك، ويكملها يوسف وخنجر.

استغربت حيييل بس امي رجعوها اخواني ورضت بزواج تيجان من آية، شوي وابوي هم رجع.

رحت اخذت تيجان على صفحة سألته..

:- شنو صار امي شلون قبلت واقتنعت؟! وهي عناد الصخر شايلة

تيجان :- گتلها فترة واطلگها

:- صدگگگگ تحچي!

:- ماعرف لحد يسألني اي شي والله تعبان، رايح انام حتى زقنبوت ماريد

عافني ومشه انقهرت عليه، اعرف حملناه مسؤلية چبيرة، ياربي تريح باله وتنطي كل اللي يتمناه.

رحت انه وشامية سوينالهم غدا عالسريع تمن وجبنا روبة من بيت جدي، خضرة ولبن وخبزات حارة من بيت جدي وكمل الغدا، رحت جريت آية ماقبلت تطلع تخاف من امي وهمين خجلانة.

رحت اخذتلها ماعون تمن وياه روبة وشوية خضرة ولبن، زلاطة شوي، امي تخوزر بيَّ بعيونها التخوف بس ماهماني.

اسوي اللي مقتنعة بيّ صح ماعليَّ بتصرفات غيري، امي الها يوم تتقبل آية مو اليوم ولا باچر ولا عگبه بس تتقبل مجبورة.

العصر ماتأخر ابوي ولا لحظة وجمع كل السادة العشيرتين، بيت السيد عبدالحسين وسيد ناصر وسيد عباس وعمامي واخوتي، اخذ زلم تغطي عين الشمس.

وراحوا لبيت ابو آية نشوف شلون راح يوگوفون بعين السادة اللي وگفتهم تشهدلها قرية مصاعب.

**

وصلوا مشية السادة بيت ابو آية، السلام عله، وكل واحد اخذ مكانه بهدوء، بس الهيبة تفرض نفسها بدون ما واحد يحچي هواي.

السيد عبد الحسين وياه زلمه، سيد محمد وسيد نعيم والسيد سعيد، وسيد عباس رفع عبايته بكل هيبة ولحيته البيضاء وقاره، زلمه وراه.

السيد علي وياه اشباله، وماتخفى هيبته رغم فقدان بصره، وكذلك السيد أكبر تيجان لازم ايده، بس هو وخر ايده بهدوء.

مشه بعكازته اللي يتلمس الطريق بيها، رغم شبابه فقد نور عيونا، لكن هو يشوف عن طريق الزلم الرباهم.

كل اولاد السيد علي تجمهروا گدام بيت ابو الجاين علمودها، الشيخ مهدي وياهم وكأنه واحد من السادة مايختلف عنهم.

الزلم تجمهرت بشكل مهيب، بحيث يمكن ماكو ديوان يكفيهم بهالبيت البسيط، استقبلهم ابو آية، من شافهم عرف ليش جاين.

گعدوا بالديوان وانفاس هواي وزلم معگلة ماناويه تطلع الا بمرادها الاجوا لاجله.

هو يعرف جاينه ناس دزوله خبر، لحظات ودخل رجال يضيفهم چاي، ظل يفتر وراح جاب بعد صينية وهم اكو بعد.

محد شرب چايه ولا حتى قربوله، الامتناع عن شرب الگهوة او الچاي يعني الحاجة، من يتم تقديم الضيافة الضيف يهز الفنجان او يعوفه مايشربه.

يعني حاجتي عدكم وماشرب حتى تقضون حاجتي، بهالطريقة يتم رفع الحرج، تعتبر طريقة ذكية لطلب الحاجة بدون احراج.

بحيث يفهم المضيف المقصود فوراً، واحترام للضيف مايلح التزام باعراف الضيافة، ويحاول يفهم طلبه.

ابو آية فهم بسرعة، حتى الرجال اللي جاب الچاي احتار شيسوي، يقدم ويكمل لو يوگف.

أبو آية..

:- خير يا وجوه الخير آمروا؟

السيد عباس..

:- الچاي موقوف

ابو آية..

:- تدللون حاجتكم قبل الچاي

السيد عبد الحسين تقدم بالحچي بصوت مهيب..

:- الله بالخير

ابو آية :- الله بالخير

السيد عبد الحسين :- جايينك بوجه الله وبسمة زلم نحچي كلمة حق ونطلب طلب ما ينرد ان شاء الله

ابو آية :- تفضلوا نسمع

السيد علي :- بتك يمنا دخيلة واحنه ما نرد الدخيل، هذا عرفنا وهاي تربيتنا

ابو آية لازم عصبيته..

:- بتي غلطت من طلعت من بيتي، وهذا الشي ما ينسكت عليه

السيد عباس :- الغلط يتصلح والبنية تنصان، واحنه ما اجينا نغطي عالغلط اجينا نصون عرض

ابو آية واضح متضايق..

:- هسة شتريدون بالضبط؟

السيد عباس :- اليوم اجينا نريد نطلبها لأبننا تيجان، على سنة الله ورسوله

ابو آية رفع صوته شوي..

:- بهالسهولة؟! بتي تطلع من بيتي وتروح لبيت ناس غرباء وبعدين تجون تخطبونها؟!

سيد محمد اتدخل بصوت هادئ..

:-ماغريب إلا الشيطان، ومو بهالطريقة تنحچي واحنه ما جينا نكسر هيبتك جينا نرفعها

الشيخ مهدي اتدخل..

:- لو چانت رخيصة چان ما اجتمعنا كلنه واجيناك، چان خليناها بس هي بنت اصل ونريد نطلبها بأصل

ابو آية ظل ساكت يباوع للسادة واحد واحد، وكلهم هادئين ساكتين، اكو طفل عمره بالعشر سنوات اتدخل بنص السكوت.

:- بابا لا تتورط ويه السادة واقبل، يشورون بيك يطگونك بالگاع برمشة عين

تعالت الضحكات بالديوان، مو ضحك استهزاء انما من لطافة وفطرة هالطفل..

ابو آية :- واذا رفضت؟

سيد أكبر :- القرار قرارك واحنه نحترمه، بس همين تعرف الدخيل ما ينرد، واللي ينطلب بوجه طيب ينرد بوجه اطيب

السيد عبد الحسين :- واحنه ما جايين نفرض، جايين نطلب والطلب هذا وراه زلم توگف مو حچي فارغ

السيد علي :- والبنية من يوم دخلت بيتنا، ما شافت الا الستر والاحترام، ويشهد عليها الكل گدامك

ابو آية :- ومنو يضمنلي؟

السيد أكبر :- احنه نضمنلك وكل واحد هنانه يگوم ضمانة، واذا ما صارت كلمتنا فعل احنه نتحاسب قبلك

السيد عباس :- وتيجان ابننا معروف دين وتربية وسمعة طيبة، ما اجينه نعرض عليك واحد ما ينشال اسمه

سيد ناصر :- انه اشهد السيد أكبر والنعم من تربيته ولده سباع يهزون الگاع بنخوتهم وتربيتهم تشهدلها العربان

سيد محمد :- وانه اشهد على تربيتهم، زلم كفو وسيد أكبر خير ماربت العلوية ام أكبر

سيد نعيم:- الشهادة لله صار عدكم اربع شهود

الشيخ مهدي :- صاروا خمسة شهود

السيد عبد الحسين :- وهاي صاروا ستة يابه ولدنا تربيتنا ترباة نهج محمد وآل محمد

ضج المجلس بالصلاة على محمد وآل محمد.

السيد سعيد :- الشاهد سبعة نكفل تربية سيدنا ابو تيجان

ظلوا السادة واحد وره الثاني يرفعون ايدهم ويشهدون ويضمنون لأبو آية تربية ولد السيد أكبر، وان بنته مصونه ومحد يمسها حتى بنظرة، لمن صاروا 24 شاهد وهذا اكثر من كافي.

ابو آية نزل راسه يفكر ملامحه رخت رفع راسه الهم..

:- والبنية شراح يصير بيها؟

السيد عبد الحسين :- تنصان ببيت رجال ويكون الها اسم وظهر، ما تبقى بحچي الناس

السيد علي :- واحنه ما نرضى عليها كلمة، مثل ما ما نرضاها على بناتنا

ابو آية تنهد..

:- والله احرجتوني

الشيخ مهدي :- ما نحرجك نوگف وياك

ابو آية ظل ساكت ثواني ورفع راسه للگاعدين..

:- اذا هي راضية واذا تضمنونها هيچ

السيد عباس :- نضمنها برجالنا وكلمتنا ما تنكسر ان شاء الله

ابو آية هز راسه ببطء..

:- توكلنا على الله، اعتبروا طلبكم الكم ياسادة

كل اللي بالگعدة تنفسوا براحة وابتسامات اتسعت.

السيد علي :- الله يتمم على خير ببركة الصلاة على محمد وآل محمد

ضج المجلس بالصلاة على محمد وآل محمد.

الشيخ مهدي :- نگول مبارك ان شاء الله، وما ننسى هالموقف الكفو

سيد محمد :- الكفو منكم والكم، والراس ما ينحني الا لربه

ما هدأت الگعدة، بس الهيبة بعدها مالية المكان، كلمة زلم انگالت بس مانتهى الحچي.

ابو آية ظل يباوع بوجوههم واحد واحد، تنحنح وعدل گعدته..

:- بس يا سادة عندي شرط يمكم

سكت كل اللي بالمجلس يسمعله..

السيد عبد الحسين :- تفضل

ابو آية :- البنية ما تطلع من غير بيتي، ترجعلي وتطلع من داري لبيت زوجها، حتى لو ساعة، بس تطلع من بابي

سيد عباس هز راسه..

:- حقك وهذا اصل، بس تضمن انها تكون بأمان وما تتراجع عن كلامك؟

ابو آية :- اي وعد زلم وحتى اضمنلكم اياها بروحي

السيد علي :- اذا هيچ ترجعلك مرفوعة الراس، وبيدنا نرجعها ونوگف يمك

الشيخ مهدي :- هذا حق الأب واحنه ما نكسره

سيد محمد :- ونجيك ونطلعها من دارك بزفة گدام كل الناس، حتى محد يحچي حرف

ابو آية :- وشي ثاني

السيد عبد الحسين :- آمر

ابو آية :- اريد كلمة رجال گدام الله وعباده ما ينمس شعره منها لا اليوم ولا باچر، ولا ينكسر خاطرها، ولا بيوم تجيني مطلگة

سكت الكل لحظة، بعدها السيد علي رفع راسه..

:- ننطيك كلمة رجال واللي يقصر وياها نحاسبه قبل لا تحاسبه

سيد اكبر :- بتك صارت بتنه، واللي يمسها يمسنه كلنا

سيد عباس :- واحنه ما نربي زلم يمدون ايدهم على حرمة

سيد ناصر :- لو تنجرح بكلمة قبل الفعل احنه خصم ابننا مو انتَ

ابو آية تنهد..

:- زين مشكورين انكم وگفتوا هالوگفة

كلهم گالو:- الشكر لله وحده وهاي اخلاق عترة محمد.

السيد أكبر :- احنه هم عدنا شرط

ابو آية :- تفضلوا

السيد أكبر :- محرم عالأبواب، واحنه ما نحب نطولها

سيد عباس :- يعني ياخوي نريد نعقد ونعرس بهالأسبوع، على سنة الله ورسوله

سيد محمد :- اي صح لا نأجل ولا نخليها بحچي الناس

الشيخ مهدي :- نكملها بسرعة وبالحلال، ونخلصها بستر

ابو آية فكر شوي..

:- بهالسرعة؟

السيد علي :- الستر ما يتأجل

سيد ناصر :- وكلشي يصير گدامك وبموافقتك

ابو آية :- وزيارتها النا والها؟

سيد عباس :- بابها مفتوح الك، تجيها يمته ما تريد وهي تجيكم، عزوتها واهلها ما ينگطعون

سيد أكبر :- مانگطعها منكم بالعكس نثبتها بينكم اكثر، قطيعة الرحم من كبائر الذنوب اللي تمنع دخول الجنة وتعجل العقوبة في الدنيا، الإمام الصادق عليه السلام يقول" ان قاطع الرحم ملعون في كتاب الله" وتذكره الروايات ضمن اسباب حرمان الجنة

ابو آية هز راسه..

:- اذا هيچ ما عندي كلام بعد، ترجعلي ومن داري نطلعها، وتعقدون وتعرسون بهالأسبوع، وبنتي امانة برگابكم

السيد عبد الحسين حط ايده على صدره..

:- برگبتنا

سيد عباس :- توكلنا على الله

السيد علي :- تمت على خير ان شاء

الشيخ مهدي :- وليدي تيجان، مبارك ان شاء الله

تيجان هز راسه باحترام..

:- يباركلك باعمالك شيخنا

ضج المجلس بالصلاة على محمد وآل محمد.

**

"حروب"

رجعوا ابوي والزلم واخواني يضحكون ويصنفون على تيجان، امي خلته يسولفلها بالتفصيل، آية بالغرفة اكيد تسمع.

ضجت من گال تيجان ابوها يريدها ترجع لبيته ومن هناك ناخذها، حسيت روحي اندفنت شحال هي، شلون راح تواجه اهلها وعمها العار خاف يرجع يتعدى عليها.

خفت وبطني وجعتني، اختنگت خفت ابوها يطلع حرگة گلبه، بس ابوي أكد ابوها ماعتقد يتراجع، هالشي مو بصالحه، رشاش گال واضح ماصدگ كل هالمشية على بته.

شلون مضى الليل ماعرف يوم ثاني العصر اجو عليها مرة ابوها وحرمتين، حسيت بنظراتهم ماتريح وتخوف، انه انعصر گلبي.

الدموع چانت بعيونها..

:- حروب ادعيلي فدوة انتِ على نياتچ، اكيد دعائچ مستجاب عند الله اكثر مني

عيوني دمعت..

:- والله انتِ على نياتچ ويمكن دعائچ ينسمع اكثر مني، كلمن ونيته

:- ماريد اروح

:- ولا انه اريدچ تروحين

:- اخاف ابوي يعاقبني

:- حتى لو تحملي بس اسبوع وتجين عدنا وتكونين عروس لاخوي وبعد منو يأذيچ

:- وعمي خايفة منه ماعنده مخافة الله

:- لا تسكتين صيري قوية وفضحي انتِ ماغلطانة والعار عليه، بس يدنالچ صرخي وصيحي وفضحي لا تسكتين لو بالقوة اثبتي نفسچ

:- خايفة انه ماگدرله

:- حطي سچين يمچ بفراشچ وبس يدنه هددي وشوفي الخوف، هالنوع يصير جبان مو بس خسيس

هزت راسها قوي وطلعت الهم وانه وياها، خذوها النسوان، وآخر نظرة منها كسرت باب گلبي.

ظليت طول الليل افكر وافكر حتى مانمت، خايفة ياترا هسة هي وين وشحوالها، تمنيت تنقضي الايام بسرعة.

يوم ثاني بدت التحضيرات السريعة للعرس، السادة تكفلوا كل واحد بشي، جدي باع چم راس من حلاله، واللي حضر المهر واللي مشتري القاط.

ابوي ماگدر يرفض كرمهم اللي تكفلوا ودگوا صدرهم اله، كلهم يگولون تيجان يستاهل والله، حتى گالوا لوما خطب حتى مرة ننطي.

جاي اقنع امي تشتريلنا حتى بس دشداشات بسيطة للعرس، ماعدنا ملابس والدنيا ضيگة، وابوي ماعنده ولا شي.

سمعونه الولد ظلوا يضحكون علينا ومدري شنو، انقهرت بس بنفس الوكت ماهتميت، راضية بعيشتنا الحمدلله هاي مقدرتهم اهلنا هم خطية.

گاعدة ادگ الحنة بالهاون حتى نجهزها قبل العرس، يمي وصلة بيضة خفيفة نشخل بيها الحنة حتى تصير ناعمة.

دخلو تيجان ورشاش وعلي الزكي ويوسف وخنجر، وراهم اشياء، فجأة داروهن النا علاگات..

:- هاي شنو؟

شامية :- شني بصل لو طماطة للعشه

رشاش :- بت الفگر تفكر بالبصل والطماطة

خنجر :- مو تعودنا عالفگرومحد يجيبلنا هدايا

تيجان :- انچبوا راح تذلوهن

شامية :- شكووووو؟

:- شني هاي؟

تيجان حط العلاگة بحضني..

:- چنت مجمع الفلوس حتى اشتري بيهن بيت بالقضاء بس مايغلن عليچ

ضحكت اعرفه يتشاقة فتحت العلاگة، دشداشة بلون جوزي مشجرة وبيها صدر كله خرز وبلك يلمع، رداناتها نفس البلك(تشبه المخور)

اتسعت ابتسامتي وعيوني دمعت..

:- فدوة اروحلك اخوي، ياروحي كلفت عليك ليش مو انتَ محتاج الفلوس؟

تيجان :- يرحلچ مليون فدوة تهني وفرحي

:- ياروحي احبك

گمت شبگته حيل ابوس بيّ، هيچ متعودين عالمحبة بيننا ماكو خجل بيننا، وهو يضحك، ضحكته دخلت لروحي ماشفته هيچ من يوم قرر هالقرار.

رشاش جايب لشامية همين نفس دشداشتي تقريبًا ولزمان وترفة علي الزكي ويوسف وخنجر متعاونين بينهم، جايبين كوستمات الهن.

من فرحتهن ظلن يگمزن، والله لو جايبين النا گونية همين نفرح الهدية اثرها يجنن بالنفس.

ظلينا نضحك رحنه قسناهن يجنن، گلت لأمي البس عليها الهاشمي مالتچ ماحچت.

حتى شالات جايبين النا، حسيت هواي مكلف عليهم هالاشياء، لأن الوضع كلش تعبان والفلوس ماتجي بالساهل.

طبعًا راح يسون حنه ابيتنا للزلم، واحنه عزمنا نسوان نسوي لآية حنة حلوة ابيتهم، جدي انطانه فلوس تحضيراتها.

بدلت وشلت ملابسي رجعت للحنة الولد بالحوش يتشاقون ويضحكون، اندگ الباب، شوي وسمعت صوت ناعم، دلع امرأة.

گمت بسرعة للباب الولد فاتحيلها الباب ومدنگين، رشاش حسيته مرتبك بشكل مو طبيعي، طلعت بت جيراننا بيت ابو سلطان.

خديجة بصوت دلوع يموت..

:- سلام عليكم، يولي حروب شلونچ

بوستها بترحيب..

:- وعليكم السلام حبيبتي خديجة هلا بيچ، تفضلي

خديجة تباوع لرشاش وتبتسم..

:- لا مستعجلة، بيچ يول ماتمرين

:- والله دراسة وما لحگ

:- الله يوفقچ، دحكي جيت هينا هساع امي گالت اعزمكم عرس اخوي الخميس، اخوي عزم اخوانچ وابوكم

:- الله يوفقه ان شاء الله حبيبتي متباركين ان شاء الله

:- مشكورة يول، بس تجين عليچ الله

:- اذا ابوي واخواني قبلوا نجي ان شاء الله، انتم جيراننا وحق الجار علينا

:- يولي شگد لطيفة، اريد آكلچ

ضحكت ورشاش يسوي نفسه يفحص الگلوب بالحوش، اخفيت ضحكتي، ماعوايده يوگف بوجود مرة، الظاهر جاست شي عميق يمه.

الولد كلهم راحوا طلعوا الا هو وهي همين كل شوي تباوعله وتتبوسم، لابسة عبايتها بس بدون حجاب، طالعة خصل شعرها.

بدون نقاش تجنن خديجة، ابتسامتها ولهجتها تجنن ودلعها يخبل، انه جبار يم دلعها.

راحت بعد ما اصرت اجي، واني اسلك الها، ماحب احضر اعراس اصلًا ماروح لأن دائمًا ماعندي شي البسه، والجابهن اليوم تيجان مايهون عليه كشخة عرسه.

:- احم احم الگلوب مابيّ شي حضرة المهندس الكهربائي، واگف تتسمع لسوالف حريمات رشرش

رشاش :- انچبي وروحي للعرس تونسي

:- ماريد اروح ماگدر واكيد يحتاج ملابس ماريد اخرب كشخة عرس تيجان

:- شسالفة شني يضر تلبسيهن ساعة ساعتين

:- وليش تريد اروح للعرس؟

:- هيچ تتونسين علمودچ انتِ والبنات

:- الله يخلي مودك سيد رشرش

:- حربية عفية روحي فدوة يروحلچ رشرش

:- هاااا شعندك طلعهن قبل لا يجون ويفضحونك

اتقرب عليَّ وهمس..

:- ماعندي شي والله، بس ماجاي تطلع من راسي

ضحكت..

:- هاااا صادوگ وانتَ النچر

:- يانچر يابطيخ يارگي يا بيذنجان

خربت ضحك..

:- شجاب البذنجان عالبطيخ

:- حريبة بروح ابوي صادقيها

غمزتله..

:- ليش؟

:- اريدها...

سكت من انفتح الباب ودخلوا الولد، وكلهم صاحوا سوية..

تيجان ويوسف وخنجر وعلي الزكي..

:- هاااااااااا هااااااااا

يوسف :- ياهي التريدها

تيجان :- اجه دورك الا اسويك طاولة وكرسي

رشاش :- هااا شبيكم، صخنتوا؟ عرس تيجان مأثر عليكم، يابه غير الاريدها... اقصد چنت اگول... حروب گليلهم

ضحكت :- غير هي بيذنجانة بالتنور مشوية، يريدها يگلي حمسيها الي الا هي والا مايتعشه بعد

ضربني على راسي خفيف..

:- بعد احچيلهم تفاصيل الحميسة، طماطة وبصل وثوم

تيجان غمزله..

:- وخبزه سمره وياها تگعد عالگلب

رشاش :- في امان الله نسيت منجل مالتي بالبستان

راد يطلع يشرد لزموه كلهم، واحد من ياخة فانيلته والثاني من طرفها وتيجان يفرك ايديه..

تيجان :- الا ازوعك العافية اذا ماتعترف اسرار بينا هااا

علي الزكي :- الانباري مچلب بلسانه ويدور بيذنجان

يوسف :- ويريد ثووووم ابن الحلو

رشاش :- عمي انه رجال ادور بطيخ ورگي ومشمش

خنجر :- ليش نيتي راحت بعيد

رشاش :- انچب ابو الضروگ، خلي نيتك تستقر

تيجان :- خاف تموت بحسرتك حبيبي، همَ سنة وانتَ شيعي ينطوك كف مو مرة

رشاش :- لا ماعتقد همَ بهالتفكير، غير محرم كله يطبخون ويلطمون ويانه، واحنه ويه ولدهم روح وحدة...

سكت حس على روحه فضح روحه، ظلوا يضحكون وجروه الولد للدوانية سحل وانه اضحك، دخلت جوه اكمل.

بعد شي ساعة اندگ الباب والولد ما موجودين، گمت انه صحت منو، من وره الباب سمعت صوت عمو ذياب..

:- الفقمة حروب وين ابوچ؟

:- مو هنا بيت جدي

بعد ماسمعت صوته راح، احس نبضاتي تخربطت، ضربت راسي اعدل تفكيري واغير الموضوع بدماغي.

بالليل ما نمت عيوني مغمضة بس دماغي يشتغل فكرة وره فكرة، وكلها بــ آية كأنُ روحي معلگة يمها.

تگلبت، غطيت راسي، تنفست، قريت آية الكرسي والمعوذات، تعوذت من الشيطان نفس الشي، گمت من فراشي.

البيت سكون بشكل مو مريح، هذا مو هدوء عادي عبالك يضغط على الگلب والنفس، مدري ليش بيتنا بالليل يصير يخوف هيچ ومو مريح.

طلعت للتواليت بره خلصت طلعت، سمعت صوت مو واضح هواي بس مو موجود، وگفت مكاني ركزت شوي.

صوت نباح كلاب بعيد وهمين صوت غريب وقريب مني كأنه شي ينغرس بالتراب وينجر ويرجع نفس الشي.

دگات گلبي تخربطت، حاولت اقنع نفسي يمكن بزوناتي، يمكن هوا، بس لا الصوت منتظم ومايوگف، كأنه واحد جاي يحفر.

بلعت ريگي بصعوبة وبدون ماحس رجلي مشت على كيف، اخاف حتى النفس يطلع صوت، وصلت يم الحايط اللي يطل عالحديقة وگفت وراه مديت راسي شوي.

الظلمة هناك غير عبالك ثقب اسود ويبلع الاشياء هناك، انفاسي ثگلت ثبتت عيوني وشفته.

متأكدة شخص منحني على الأرض ايده تتحرك بسرعة نفس الصوت اللي سمعته وجاي يحفر.

بس ماكو ملامح ماشفته واضح، لا وجه لا لون معين ولا شي ينشاف عدل بس ظل يتحرك، جفلت بمكاني وجسمي كزبر وشعر جسمي وگف.

منو هذا وشجاي يسوي بالحديقة وشنو يحفر؟!

بلعت ريگي ولزمت انفاسي وحلگي حتى خشمي كتمته، خفت يسمع صوت مني وينتبه.

تبنجت حتى ما گدرت اتحرك من مكاني، گلت معقول اخواني؟ بس شيسوي بهالوقت بالحفر؟!

لا لا اخاف شخص غريب طافر بيتنا ويسويلي شي، ويه تفكيري هذا بلحظة حسيت وگف ايده ماتتحرك ورفع راسه شوي مجاي اشوف وجهه بس حسيت نظرته وصلتني.

رجليَّ جمدن بمكانهن اريد اتحرك ماكو الدم نشف بعروگي بهاللحظة، حتى النفس صار گوة يطلع ويدخل.

هو شافني؟ لو چان يعرف من البداية انه واگفة اراقبه؟

طفرت اركض چان اعثر ورجلي تتأذه، من الرعب صحت تيجاااان بعالي صوتي، سمعت صوته وراي وحسيته اقرب من انفاسي، ماحس إلا هو وره ظهري وايده على حلگي........

**

"ترفة"

لبست حجابي وعبايتي اللي على گد طولي، طلعت لبيت جدي، كله علمود المرجوحة اللي بــ سيچ الصخول، عمو جسام مسويها وانه اروح اتونس بيها.

جدي گاعد بالباب على كرسي..

:- ياهو هاي؟

:- انه جدو

:- ترفة

:- اي

طلع فلوس من جيب صدره..

:- هاچ يابه هاي الچ

:- ياااي شكرًا جدو احبك

شبگته وبسته وهو يضحك، ولأن گاعد صار راسي بمستوى راسه، وخرت عنه ورحت داخل، دوم من يشوفني ينطيني فلوس.

مبلغ يشتريلي موطة او چيس حب شمسي، الوضعية صعبة لذلك محرومين من هواي شغلات.