رواية بعد ان فات الاوان الفصل الثامن 8 بقلم جمانه السعيدي
ياسين.....كملت كلامي ابو رحمه بقه ساكت
صح اني خوش انسان وماعليه اي شبهى بس تبقى السمعه مهمه
الرجال من حقه يناسب ناس سمعتهم طيبه
لمن شفته طول السكوت
كتله من رخصتك عمووو تكدر تفكر براحتك وبعدين ترجعلي خبر
رحمه...ياسين انتظر دقيقه
ياسين....راح انتظر رحمه انتظر رد ابوج
اني مشتريج الاخر لحظه
طلعت شغلت سيارتي ومشيت
ليش هيج ليش يمه اني بيش اذيتج
ليش جاي اتاذيني بشغلي وبزواجي ليش مصره تبقين انانيه وخبيثه طول عمرج
وليش مصممه لاتفيدني ولا تريحيني
لا تبتعدين عني ليش طلعتي بحياتي
انتي اختاريتي حياتج خلاص كملي ليش رجعتي عليه
رجعت للمكتب قبل لا اوصل شفت الشرطه اخذو امي
وهيه تعيط بصوت عالي
ليش ماخذيني هذا مكتب ابني
اني ماسويت شي
جدي جان واكف يباوع عليها
ماجده...بابا احجي وياهم خل يعوفوني
اريد بيت اني كاعده بلشارع ابني عنده بيوت
طلبت منه بيت
شنو الجريمه الي ماخذيني علمودها
بعد ما تحركت سيارة الشرطه سيارتي وكفت
ياسين.. هااا جدو و
جدي....نروح وراها للشرطه وما نعوفها اله ناخذ عليها تعهد
بعد ما تتعرضلك
وكف جدي والناس كلها تتفرج
جدي...اي واحد ينزل مقطع او صوره عن الشي الي صار
مايلوم اله نفسه
اعتقد كلكم تعرفون اني منو
اي مقطع ينزل راح ادور صاحب المقطع لو يطلع للسما
اقاضي
وحده مجنونه وجاي تتبلى علينا يله كل واحد
يرجع المكانه
صعد جدي وياي ورحنا للمركز ورا امي
دخلنا وهيه انهدت علينا غلط وحجي المشكله ما تستحي
ولا تعرف ريحة الخجل
معقوله من كمية الحرام الي بحياتها
شكد صايره صلفه وبدون اخلاق
شكد حجت علينا اني وجدي واحنا ساكتين
ماجده...ما تخافون من الله عدكم بيوت وقصور
وعايفيني مبهذله
كاتلكم البخل ماتهونون تنطوني بيت اكعد بي
انشاء الله رب العالمين مايوفقكم ولا يرزقكم
ناس لاذمه ولآ ضمير
شلون رب العالمين رازقكم مااعرف
جمانه السعيدي
بقينا ساكتين طلع الضابط وصاح بيها
اس اشكد تحجين اي كلمه زايده ادخلج الحجز
اس وين احنا بسوك
من سمعت الضابط سكتت بعد ماحجت
دخلنا اني وجدي طبعا كل الي يشوف جدي يجي يسلم علي الضابط طلع من مكانه وكاله تعال اكعد بمكاني
جدي.. اكعد بمكانك وشوف شغلك
الضابط.. تفضل اامرني وكلامك راح يصير حتى بدون مااحقق
انت اصل الثقه استاذنا العزيز
جدي...اني ماريد منكم شي غير تاخذ عليها تعهد
ماتقرب على ياسين ولا على شغله
صح هيه بنتي بس اني متبري منها صار عشرين سنه
وهسه جايه أتريد تستغلنا
واني ابد مااقبل بهذا الشي حتلو كان من بنتي
الضابط....تدلل بس هاي
جدي...اريدكم تخوفونه شويه حتى تحرم تقرب علينا
الضابط...اخليها تمشي على السراط المستقيم
طلعنا اني وجدي هيه بقت بلمركز
جدي...هاي هيه انحلت ليش ضايج
ياسين... مااعرف ابو رحمه راح يقبل نكمل لولا
بعد ماعرف تاريخ امي المجيد
جدي...انت وين اكو منك حتى يرفضك
لك انت احلى بنات العراق تتمناك تروح رحمه تجي الف وحده غيرها
شنو رائيك ازوجك ثنيين سوه
لو اربعه حتى تكمل دينك بصوره صحيحه
ياسين جدي شنو القصه ووحده كافي
اني مقتنع برحمه بنيه عاقله مؤدبه وبت اوادم
تعرف شكد اصادف بنات مايصدكن تريد بس تلزك بيه
تعرف شكد يتواصلن وياي ومستعدات الكلشي
هواي اكو بنات
بس جيب البنيه الي تحافظ على نفسها
رحمه ابوها انطاني رقمها من اول مره التقينا هلكد ما يثق بيها
شكد بقيت احجي وياها بعمرها ماكانت رخيصه
لو ادور فرص
السؤال على كد الجواب
محترمه وشريفه وبت اوادم
اختبرتها بدال المره عشره ابد ماهزها كلامي
ولا حاولت تستغلني
جدي....تحبك
ياسين...اني متأكد من هذا الشي
جدي....خلاص مراح تعوفك بس انت اصبر شويه
لا تستعجل
ياسين.. مستعد اصبر انتظرها العمر كله
رجعت الشغلي وعيون الكل عليه
بعيونهم الف سؤال عن امي هل هيه امي اولا
وليش اني هيج اعاملها
مااريد احجي او ابرر الاي احد هاي حياتي واي واحد
ماله شي يمي
المهم الشغل يدخلون بي حياتي ملكي الوحدي
بليل رجعت شويه متاخر لان عندي شغل
وصلت بيبتي جابت العشى
تعشينا سوا صعدت الغرفتي
اجت بيبي وراي
بيبي...اريد احجي وياك
ياسين.. احجي اسمعج
رن تليفوني رساله من رحمه ماكدرت ارد لان بيبي كاعده
وتريد تحجي وياي
بيبي.....ممكن اطلب منك طلب
ياسين...عيوني تامرين اامر
بيبي....ممكن تساعد امك بدون مايعرف جدك
تبقى مره ووحيده بهاي الدنيا صح هيه غلطت
بس منو بينا مايغلط
البشر خطأين من يوم ادم لليوم
الإنسان يستمر يغلط لمن يتعلم الصح من الغلط
ياسين... بيبي امي عمرها خمسين سنه وبعدها تغلط
معقوله بهذا العمر وماتكدر تميز الصح من الغلط
ولله لو جايتني بأسلوب حلووو
وكايله اني غلطت واريد تسامحني
جان دللتها دلال ماصاير
بس دخلت عليه باسلوب التهديد واني مايمشي وياي هذا الاسلوب
جمانه السعيدي
بس الخاطرج راح اساعدها تدللين
بيبي....الله يحفظك ويديم عليك النعمه
تعرف انت ليش رب العالمين موفقك لان ابن حلال
وصنت الود والعشره وحفظت الجميل
اما ماجده ليش كلشي ماحصلت وحياتها عباره عن مشاكل
خسارات
لان نكرت التربيه وعصت كلام ابوها
اجتني رساله ثانيه بس ماكدر افتح التليفون
لان بيبي بعدها تحجي
ياسين....صار من عيوني تدللين
بيبي...اعوفك ترتاح حبيبي الله يرضى عليك
بس طلعت بيبي فتحت التليفون
رحمه.... ليش مااتصلت عليه اليوم
لاتكون زعلان مني وتريد تفركش العرس
اموتك خلاص انت اليه محد ياخذك مني
ياسين....جاي ادور عروس 
رحمه....يمه الله يستر تحجي صدك اموتك واموت نفسي
ياسين...غير ابوج مايريدني
رحمه...اني اريدك واني الي احبك واني الي ماكدر استغني عنك
ياسين... عود كلت همزين فكه خلصت منج
ادور عروس غيرج
سكتت شويه بعدين اتصلت
فتحت خط اسمعها تبجي
ياسين....ليش تبجين
رحمه....تريد تعوفوني مووو طلعت جذاب
ووين الحب ووين ابقى وياج للموت
جنك ماصدكت تخلص مني
ياسين... انتي شكد عقلج زغير صدكتي
رحمه...وليش مااصدك من طلعت من بيتنا لسه مااتصلت عليه وانت جنت كل ساعه تتصل
ياسين... ام دميعه
رحمه.... اكتل نفسي اذا عفتني
ياسين.. ابوج شكال شنو رائيه
رحمه....بابا كال بكيفج يكول عليك خوش ولد
ومايصير ناخذك بذنب امك
ياسين...عن قناعه لو كلام وبس وباجر يكعد يعيرني باامي
رحمه....لا بابا موهيج مايقبل نحجي على اي احد
يكول الناس تغلط عن غفله وعدم وعي مايصير نحجي عليهم
يمكن باجر يتوبون ورب العالمين يغفر الهم
واحنا نبقى شايلين ذنبهم
ياسين...تمام خلاص خل نستعجل بلزواج
بهذا الاسبوع راح اكمل كلشي حتى نزوج
رحمه... خليهن اسبوعين علما اكمل تجهيزاتي
ياسين...بعد يومين من طلعت امي من المركز
وبعد ما كتبت على نفسها تعهد ما تتعرضلي
دازه ناس للمكتب مصورين المواقع الي نشتغل بيها
من على اللوحه الي خالينها بلمكتب برا
بدون محد ينتبه
وكل يوم تروح الموقع وتكعد تحجي كدام العمال عليه
تسوي نفسها مظلومه
واني ظلمتها ونكرت التربيه وشمرتها بلشارع
واني ولد عاق
ومااستاهل الخير الي عايش بي
ياسين....جدو امي ماتقبل تعوفني بحالي
جدي...شسوت النوب من مصيبه
ياسين.. تفتر على المواقع وتشهر بيه تكول عني ابن عاق
جدي.. اروح اشتكي عليها هلمره اله اخليها تخيس بلسجن
ياسين...لا دخيلك جدو عوفها
هسه تمل والفلوس الي عدها تخلص تكسيات
وتبطل مني
ترا هيه عايشه على راتب المطلقات يعني تتغدى ما تتعشى
قبل عايشه كل الي تتزوجه يصرف عليها هسه كبرت بعد محد يريدها
عوفها تمل وحدها وتسكت
اذا رحنا اشتكينا عليها يعني خايفين منها
عوفها تتعب وتبطل وحدها
فعلا راحت اكثر من موقع من شافت اني مارديت عليها
عفتها بدون مااهتم بطلت تروح للمواقع
قبل عرسي بيومين اجتني للمكتب
هلمره مكسوره وتعبانه
الولد ماخلوها تدخل
اجاني العامل استاذ هاي صاحبت المشاكل اجت
وطردناها كاعده تبجي برا
ياسين...روح خليها تدخل
دخلت اول كلمه كالتها اسفه وكامت تبجي
ياسين.. دموعج مايعبرن عليه شتردين هلمره
ماجده...الراتب مايكفي واني عندي سكر وضعط
اريد فلوس اشتري علاج اذا على الاكل اني اصلا اكلي قليل مااريد اروح اطلب من احد
وباجر يعيرني
الله يخليك ساعدني بس هلمره
اني حيل تعبانه
ياسين... بسيطه راح انطيج ٥٠٠ الف رتبي امورج بيهن
وباجر يجيج مسواك للشقه
علما الكالج مكان مناسب تسكنين بي
كامت من مكانها اجت تبوس ايدي
ياسين.. استغفر الله كل شهر ادزلج ٥٠٠ بس مااريدج تجين هنا مره ثانيه
بعد المشاكل الاخيره الي صارت
مااريد اي احد يشوفج هنا
ماجده...الله يرضا عليك ويرزقك انشاء الله
ياسين...طلعت الفلوس انطيتها طارت من الفرح
عبالك لكت كنز
ثاني يوم رحت جبتلها مسواك ووصلته للشقه بنفسي
ومناك طلعت للحلاق لان باجر حنتي وعكبه عرسي
