رواية عرين الصياد الفصل الثامن 8 بقلم شذرة العدوان

الفصل 8

بقلمي شذرة ألعدوان

‏‎لولا النساءُ لما تبسّم عابسٌ

و لما ترنّم بالهوى عشّاقُ

تُمسـي الحياةُ ببعدهنّ مقيتةٌ

و بقربهنّ جنائنٌ و وِفاقُ

ديالا:من يوم الأصابه لحد اليوم الي منتظرين عماد يجي ماجد واستاذ صائب ما عافونه

يركضون ويانه عبالك عماد اخوهم

ماجد يوميه يغبش علينه گبل الريوگ ويظل يتعلل وما يروح لنص الليل الا تطرده فاتن طرد

تبين بهاي الأيام ماجد شگد حباب ومتواضع وشخصيته حلوه يدخل الگلب بساع

وما يفوت فرصه اذا ما يحجي موقف ويضحكنه خاصة من يتگابل هوه وفاتن

اختلاف بينه وبين استاذ صائب جثير

استاذ صائب طول الوقت ماخذ شخصية المعلم الملتزم

صبره حيل ضايجه تغار ليش ولد اختها يركضون ويه ابن ضرتها تطحن بروحها طحن

فاتن ما صدگت من گلتلها هاي العلامات بوجهي عبن لطمت على عماد گالت يصير خير اني اعرف بطريقتي

طبعاً مهره حجتلهم عالناس الي اجو سألو على عماد ومن خلال الوصف والبحث وطلعو حت عالمستشفى رايحين يسألون

ومحمد گال هم اكو رجال جان يوميه يجي ياخذله فره بالممر وحت ويه الدكتور شفته يحجي

من خلال التحقق والبحث الي سوا استاذ صائب طلعو همه نفسهم الي ابنهم صوب عماد والكل توتر وقلق الا حميد وماجد تحلفو بيهم اذا واحد منهم اجه يكتلونه

و ابويه ما يرضه بسوالفهم رزلهم وحذرهم

راحو حميد وابويه واستاذ صائب تايجيبون عماد

وظل ماجد يرتب ويانه جيبن هاي ودن هاي

من الغبشه محزم ويشتغل

خلانه نعيد تعزيل البيت من جديد وكل ما يفوت من يم شغله يگول هاي نشاز ما عاجبتني عبن فاتن حطتها ويخلينه نغير مكانها

فاتن تگمز عبن يخالفها الرئي ويداهرها

صعد عالصطح تا يشد البلاجكتورات بالستاره مال البيت بكل ركن شد واحد ونادانه نساعده اني شايله الوايرات وليال واگفه يمه شايله الدرنفيس والبسامير

ماجد لازم البلاكتور مد ايده وگال ليال ناوشيني الشسمه گالتله شنوه سيدي

گال اهوو يا طلبة سيدي ال ما تخلص

من تگولين سيدي انوب احطج بالسجن بتهمة ازعاج ضابط فقير وتشتيت تفكيره

ليال فتحت اثمها بصدمه گلتله تسجنيي

ماجد نزل البلاجكتور من ايده وگاللها اي اسجنج

ليال گامت تبجي گلتله لا الله عليك عمو غير احترمك واگلك سيدي عبنك ضابط وجبير

گال انوب عمو

لا والله خاف متقبلين احد گالج اني شايب لو راضعين الدره اني وابوج صد عليه گال يابه ديالا اني شايب

گتله لا والله تخبل البارحه بنات الجيران من شافنك تشتغل ويانه نادوني يسألون عليك

ابتسم گال شگلولج بالله

ستحيت منه بس حجيتله الصدگ

گلولي هاذ منو الحلو الي يمكم وسألو اذا متزوج گلتلهم لا

صد على ليال گاللها شفتي نفض ادينه وگال لا عمو ولا خالو فتهمتي خن اروح اجيب الدورية تجي تشيلج

ليال من كل عقلها گامت تشاهك وتضرب رجلها بالگاع لزمته من عكسه امانه والله بعد ما اگول لا تسجني عليك الله

صد عليها گاللها ما اسجنج بشرط بطلي سالفة سيدي وعمو ناديني ماجد وبس

ليال هزت راسها بقبول ومسحت دموعها

خلاهه تسلم علي بالخنصر هاي زعم صارو اصدقاء من شافها مبرطمه گاللها يابه بس تنجحين ملابس المتوسطه عليه ومن تصيرن بالجامعه اني اوديجن

بساع ابتسمت گالت صدگ

ردت كنشت گالت خاف حميد ما يخليني اكمل دراسه

گاللها شنهي حميد ادوس على راسه اذا يحجي

يالله ناوشني البسامير خن ادگ هالصگعه شتعلو اهلك ماجد صارلهم سبوع يكربون شغل عليك اخ يضهري عمت عيني عالحدود والدوام

ديالا:اني بطبعي مرات قويه وما اخاف

ماجد عبن اول مره نشوفه خلانه نزوع العافيه ونخاف منه بس گدر بأسلوبه يغير نظرتنا اله

ليال خوافه وما تستگوي بس على ساره وذا احد حجه على مدرستها لو گاللها غشاشه

سمعنه صوت سيارة اجت نعبالي عماد اني ذبيت الوايرات وليال ذبت البسامير ورحنه ركض اندحگ من الستاره وماجد ينادي شكو شكو

طلعت هاي سيارة حجي حسين زوج فاتن

برطمنه بملل اجه ماجد لزمنه من شعرنه گال شتگولن هسع اذا ارگع روسجن بالستاره هبطتني عبالي الرئيس اجاكم

دحگ من الستاره گال غدي هاذ حجي حسين

الشويب رجل فتونه العريس الغني التحفه ختيار خالتي صبيره

ليال گامت تضحك

ابتسملها گال دحگي ليال هاذ شايب ويصير تگليله عمو ما اني الشاب المعدل مو بالله ديالا

ديالا:ضحكت گلتله اي

ماجد گال هاذ منهو ويه حجي حسين

ديالا: ما ادري اول مره نشوفه شاب مرتب

حدرو وتلگاهم محمد سلم عليهم

ماجد:يالله امشن خن اكمل الصگعه الي وگعت براسي اسست بيتكم لوما اني شلون جنتو عايشين

رحنه وكملنه شد الأضويه كلها وحدرنه

لگينه حجي حسين بالصالة يسلم على صبره سلمنه عليه شايب يربي اكبر من ابويه شلون اخذته فاتن

ليال مدت اديها تسلم وماجد ورا حجي حسين گام يسوي حرگات و يرعش زعم هاذ حجي حسين الشايب وجان ليال تكوم تضحك بوجه الزلمه ورزلتها صبره وماجد سوه نفسه يدحگ عالحايط واني حطيت ايدي على اثمي كتمت ضحكتي

رحنه عالمطبخ لگينه مهره تسوي جاي اجت فاتن سألتها مهره هاذ منو الشاب الي ويه حجي حسين

فاتن گالت هاذ حيدر من النجف يشتغل بالمعمل وصعبة علي يروح لهله ويرجع والمسافه بعيده من الأنبار للنجف عاد حجي حسين شافه خوش ولد مؤدب وخلوق انطا البيت الي بصفنه سكن بي حت گاله اذا تريد جيب اهلك بس رفض خطيه هوه واخوانه مو على وفاق

مهره گالت والله مبين من شكله مرتب

جاوبتها فاتن اي والله معدل لو تشوفين طبخه ما ينشبع منه

مهره صدت على فاتن گالتلها بس لا خليتي الولد يطبخلج وفضحتينه

فاتن گالت والله هو يطبخ ويدزلنه ومرات يگول للخدامه لا تطبخين اني اطبخ

مهره گالت يبو يهالعثره هوه يلام ماجد

فاتن گالت عود هاذ الحجي بيناتنه ماجد ما اريده يعرف عاد يستلمني وجان تروح

مهره گالت ديالا اخذي المصلايات حطيهن بالديوان گلتلها مو الزلمه بالديوان گالت لا گاعد برا امشي وديهن هنه والخاوليات يالله بنيتي

رحت وديتهن وجاي اصفط بيهن رتبت وجان اطلع بساع و اتصادم ويه حيدر الي اجه ويه حجي حسين جان شايل الرادو مال حجي حسين انرگعت براسي وگعنه ثنينه والرادو وگع من ايده وتطشر

تعصبت ونسيت انه خطار وعيب گتله شنهييي اعمى ما تشوووف

گال العفو بويه والله ما شفتج سلامات صارلج شي

عفته وطلعت احك براسي شگد توجع الضربه

الضهر اجت فاتن گالت ما عدكم تيب تا حيدر يسوي الرادو

رحت جبتلها تيب گالت ودي لحيدر برا عالممشى اني اروح انوم هالمصگوع

شگد عيب هاذ حيدر اني انهديت علي اخذت التيب ورحت شفته حاط الرادو ويصلح بي تگربت منه گتله احم

صد عليه ورجع دنگ راسه انطيته التيب گتله العفو منك والله ما تقصدت احجي عليك

ابتسم وگال ولا يهمج الغلط مني وبساع شاح نظره عني شگد مؤدب ومرتب وحلو

وره الضهر اجه عماد بالسلامة والحمد لله استقبلنا بسلات الجگليت وهو حدر من السياره ويرفع ايده يتشكر الموجودين ماجد گاله نزل ايدك ريسنه

زعم عماد يقلد الرئيس صدام حسين

اجو الدراويش واصدقاء عماد وابويه تا ورا العشه يسون الذكر وذبحو الخرفان على اثر عماد

ماجد گال ننصب خيمه للطبخ برا تامتصير ريحه طبخ بالبيت وراح نصبهن ويه حميد وفاتن ومهره تقدمن عالطبخ وماجد وياهن

و قبل العشه بربع ساعه تقريباً ست رافده طلعت تساعد فاتن ومهره بصب الأكل

اجه حميد گال الأكل احنه الزلم نصبه انتن عليجن عزوبية النسوان كملن الطبخ وروحن

ست رافده هزت راسها بقبول وراحت وجان يطلع وراها حميد

اني وگفت بصف النار ادفي اديه ارجف من البرد

مهره گلتلي ديالا روحي بدلي هدومج منگعات اخير ما تمرضين هاي گتلج ولمي مي غسول ونگعتي نفسج لو تطبخين شتسوين

ما گدرت اگللها ضربت سعد راشدي عبن عيبلي وجان ينگعني وينهزم

طلعت تبدل شفت حميد جر ست رافده من ايدها ويحجي وياهه وهيه متعصبه وصاكه سنونها وتفلت بأيدها مدري شگلتله ما اسمعهم يحجون همس

فلتت ايدها منه ودفعته وجتفت اديها وتحجي ويا وعاگده الحواجب

اني فتت من يمهم

من گربت يمهم سكتو

طبيت على حجرتنه بيها بنات من گرايب صبره ما گدرت ابدل گدامهم اخذت هدومي ورحت على حجرة امي ظلمه حميد تعاجز يشتري گلوب اخذ گلوب حجرة امي وشده برا

بس ضوء البلاجكتور عاكس شوي

رحت بصف الجربايه نزعت ملابسي ولبست البلوز وجاي البس بالتنوره وجان ينفتح الباب واختل ما ادري منو فات اني شون نسيت الباب ما قفلته

اسمعها تگول هاي ظلمه الحجره هسع وين ادور الخاوليات عرفتها من صوتها ست رافده رفعت راسي تاحجي وياهه وجان يطب حميد ويقفل الباب وما خلاهه تطلع

اني حطيت ايدي على اثمي وختلت حت النفس گطعته واسمعها تگله اهوو حميد اعقل عاد مو جاهل انته

يگللها رافده والله احبج ليش مجاي تفهمين ارحميني عاد مو هاذ عماد ازغر مني وعرس وعنده جاهل

جان هسع جهالنه يمشون

گلتله وخر من دربي حميد لو تظل بس انته بالدنيا ما اخذك كافي شيلني من بالك

يگللها ليش ليش بس فهميني شبيه والله احبج رافده

گلتله كلشي مابيك بس اني ما احبك ولا راح احبك هيه مو گوه ترا خلي عندك كرامه وشيلني من بالك وروح تزوج وبعد عن طريقي وخلي نصيبي يمشي ليش دمرت حياتي خاف تعبالي ما ادري بيك كل مشيه تجيني انته تخربها ادري بكلشي ترا وذا ما جزت مني اسولف لأخواني كلشي واني لوما امي اسولف من زمان بس امي مربطه اديه

جاوبها اي رافده اني اخرب كل خطوبه تجيج اذا ما تصيرين اليه تحلمين اخليج لغيري

گالتله خايب ما توخر ولله بطران زعم اني بحالك من اريد اتزوج

سمعتها صرخت ونكتم صوتها گمت ارجف وگلبي يدگ انهد حيلي بس لا خنگها موتها اسمع بس صوتها مكتوم ولا ارادي رفعت راسي تشوفها

والگه حميد جاتف اديها وراها ويبوس بيها من اثمها وهاي تفالت ويلگحها عالجربايه بعصبيه ويخنب عليها وارجع اختل انوب وحاطه اديه على وجهي لا يشوفني گمت ارجف واطگ سن بسن اول مره اشوف هيج منظر

ظل مخنب عليها فتره وهاي تعن والجربايه تهتز

واني لامه نفسي ولابسه التنوره عالنص

شويه واسمعه يحجي ويتنفس سريع ويگللها خلي هالحجي ترجيه بأذنج اذا ما رضيتي من هواج اكسر عينج واخليج تبوسين رجليه تارضه اخذج فتهمتييي

وهاي العلامات كل ما تشوفيها تذكري كلامي وفكري زين

اسمع صوتها مكتوم يمكن ساد اثمها وجان يگوم يطلع

وست رافده نزلت بالگاع گعدت وساده اثمها بأديها وتبجي وحالتها حاله وتمسح اثمها بقرف وتفل عدلت نفسها ولبست الربطه وترجع تبجي تشاهك

وتسد اثمها وتمسحه بردنها

شگد كرهت حميد بهاي اللحظه تمنيت ما عندي اخ مثله

طلعت ست رافده واني لبست التنوره بساع وجان اطلع افرك باديني شفت ليال حدرت من فوگ جانت بالبيتونه جريتها من ايدها واخذتها برا حجيتلها

ليال كلشي مفتهمت شلون يعني باسها بأثمها

اربع مرات أعيدلها المشهد وما افتهمت الا مثلتلها

ديالا:يولي يبستي ريجي جاي اگلج باسها بأثمها هيج جاب اثمه على اثمها وباسها

ليال:غدي راح ازوع

ظلينه نفكر بكلام حميد

شنو علامات وشنو اكسر عينج

ليال گالت خطيه بس لا يريد يفكس عينها

شون الست رافده راح تظل بتك عين

شنسوي هسع

گلتلها مدري منگدر نحجي وذا حميد عرف بينه راح يكتلنه ويبطلنه من المدرسه

ليال گامت تبجي گالتلي انتي شوداج وسمعتيهم لزمت ايدي گالت عفيه ديالا لا تحجين شنسويلهم همه كبار ويعرف يتصرفون بلكت ست رافده هيه تحجي لهلها احنه ما علينه بيهم

عضيت شفتي صدگ احنه شعلينه اصلاً ما فتهمنه شبينهم ولا فتهمت عليهم شعلينه نسينه الموضوع خلال خمس دقائق وما حجينه لأحد

من خلصو عشه رحت اصب مي غسول للنسوان

لگيت شكحه ماخذه المجلس حاصل فاصل بس هيه تحجي

وصلت يمها اصبلها مي اخذت الصابونه وغفتها وتفرك بأديها گالت والله لوما ولدي يگفون ويه الملا جان تسولفت عليهم والله بس الحمد لله ماجد وصائب واگفين مثل الدنگ حملتنه منيه بوگفة ولدها

المرأه الي بصفها گالت شكحه مو گتلج مشو علينه لماجد والله لو تدرين شگد تجينه خطابه ونرفضهم علمودكم احنه نريد الگرب منكم

شكحه اخذت مي وتمضمضت وبزته لعبت نفسي گالت والله ما يفعل يعرس ماجد ما يريد من هين الا من بنوات بغداد وجان تنشف اديها بالخاولي وتجاهلت المره اتفيك

كملنه كلشي حت المواعين جلفناهن وبدلنه ملابسنه ليال لبست قميص احمر حرير وتنوره سوده ما فعلت تلبس قمصله تگول مو بارده وهيه جذابه تعبالي اللبس يطلعها سمينه فلت جذيلتها ومشطت شعرها ما صدگت تصير لمة تا تكشخ وتغور ساره ولو هيه طول الوقت كاشخه قفلت كنتورها المفتاح مخليته بالسبحه لفته على ايدها سوته سوار

بلش الذكر ورحنه ندحگ وليال راحت على غير شباك

شفت واحد من الدراويش شعره حيل حلوو وطويل واصل للگاع رحت تگول ليال خاف ما شافته

اشو ما لگيتها ادور ماكو تلفتت هين وهناك گلت يجوز طبت جوه اسليمه شون عافتني وراحت رجعت ركض

عالبيت ادورلها رحت على حجرتنه ما لگيتها نادتني بنت اخو صبره گالت هاذ الكنتور مال من ليش مقفول گلتلها هاذ كنتور ليال ليش تردين شي گالت اي اريد قمصله شي اشو بردت

عشتو عليش سادته قابل بي ذهب هنه ملابس

ديالا:والله هاي بطرانه ما تدري ليال عدها ملابسها اغلى من الذهب ومن البارحه جمعتهن وقفلت الكنتور ولبست المفتاح برگبتها سوته گلاده

تخاف على ملابسها

گلتلها عيوني ملابسنه كلها غاليه ابويه وين ما يروح محافظه يشتريلنه اغلى الملابس وليال اكثر ملابسها حرير گامت تمجغ بحجيها عفتها ورحت ادور شنو ختفت ليال اشو ماكو

ليال:صافنه ادحگ من الشباك ومركزه احب المديح وصوت الدف وهاذ المداح صوته حيل حلو

ما حسيت الا ايد على خصري وايد كتمت صوتي وجان يشيلني واني ارفس واخرمش بأدينه واريد افلت واصرخ ماكو بساع شالني واخذني وره المخزن

فرني گباله وشال التلثومه ويگلي اش ليال الله عليج اني حامد حامد عمو حمدي

فتحت عيوني مصدومه هاذ شجابك

گال الله عليج لا تصرخين ليال عفيه ساعديني

ليال:بلعت ريگي نشف الدم بيه حيلي كله يرجف

گتله هسع يكتلك حميد شجابك منين طبيت روح لحد يشوفك وخر عني هدنييي هدنيي

گال اروح ميخالف بس ناديلي مهره

گمت بنتر گتله روح عمو حمدي الله عليك عوف مهره غدي شگد ما تستحي طلعت

گال مو عيب لوله هيج تحجين بس عندي اخر كلام وياهه واروح بعد ما تشوفوني ساعديني ليال

عزمت الرفض وهزيت راسي گتله لا والله ما اناديها انته مو خوش ادمي تگطع الطريق على مهره وتحجي كلام مو حلو

گمت ابجي ختنگت گلتله امشي هسع يصدون على مهره من وراك شگد اكرهك بعد ما احبك

وجان انهزم منه جلب بيه و گال

هاي من گالج اني اسوي هيج

گتله صبره گالت

گال جذب والله جذب

ليال: عجل عليش حميد ضربك وحرم عليك طبة گاعنه غير عبنك واحد مو خوش انسان صبره تگول

گال جذب والله جذب دحگي يا لوله انتي بعدج جاهل ما تفتهمين اني خوش انسان واحب مهره وتحبني انتي متعرفين شنهو حب بس احنه نريد نزوج عرفتي

گتله جذب جذب صبره وحميد گالو عليك حجي مو حلو وبلغونه ما نلتقي حت بأهلك من وراك سنان ابن عمك واهله ما اجو عالذكر عبنك واحد مو خوش هدنييي اروح لو اصرخ الم الناس عليك

گال اذا ما ناديتيها هسع افوت بنص المجلس واگول بعلو حسي اني اريد مهره واخلي اخوانج يكتلوني تقبلين بهالشي لوله مو جنت اشتريلج حلويات واشيلج مو اني عمو حمدي عفيه ساعديني

بس روحي على مهره گليلها حامد ينتظرج بصف المخزن يريد يودعج

گتله وين تريد گال اروح لغير ديره وبعد ما تشوفوني

گمت ابجي گال راح اشتاگلج لوله ام دميعه عود صيري شاطره وانجحي صيري دكتورة

هزيت راسي بـ أي مسحت دموعي گتله ظل هين هسع اناديها

ورحت ركض ادور لمهره وجسمي يرجف

ادورلها بكل مكان ماكو رحت سألت امل

گالت بالحمام طبت تسبح

رحت عالحمام ناديتها اجاني صوتها لياللل خبال الخبلج حت بالحمام لاحگتني ما اخذ راحتي امشي انگلعي خن اسبح من ريحة الطبخ

مگدرت اگللها على حامد عبن ناس تروح وتجي بالصاله والحمام صاير جوه الدرج مال الصاله خفت احد يسمعني

ظليت واگفه بالباب لحد ما طلعت مهره مبدله ولافه شعرها بالمنشفه

گالت هاي بعدج واگفه بالباب وعافتني ومشت ما سمعتني شريد منها

طبت بالحجره وگعدت يم الصوبه وتنشف بشعرها الي واصل حد جعبها من طوله ما شاء الله اسود واطرافه احمر من لون الحناء

وگفت بالباب واعصر بأديني وخايفه احجي لو اسكت بس خاف هاذ حامد الخبل يروح يحجي دنگت راسي اعض بشفتي

فززني صوتها هي ليال تعاي شرايده

دحگت عليها والقلق والخوف مبين عليه وابلع بريگي ما گدرت احجي الحجره مليانه نسوان گرايب صبره

حسيتها انتبهت وفهمت وجان تگول تعاي ليال مشطيلي

صدت عليه وجان تگول خيرج

ادحگ عليها ومگدر احجي انخرست

گالت من بين سنونها شبييج

تشجعت وشاورتها حامد يناديج يم المخزن يريد يودعج وگال اذا ما اجت افوت عالمجلس اگول اني احب مهره

انخطف لونها وگلبها راد يطلع من صدرها وفاتحه عيونها مصدومه وادحگ عالنسوان

انهد حيلها تريد تمشي معد تگدر

لمت شعرها وگامت وراحت عالمطبخ تتنفس بصعوبه ولازمه گلبها وترجف گالت متأكده ليال

گلتلها اي والله

دحگت يمين ويسار وجان تحط ايدها على جتفي گالت ليال تعاي اگفي بالباب من تشوفين احد اجه انطيني اشاره صوفري وممنوع تحجين لأي بشر حت لديالا

هزيت راسي بـ أي

راحت وهيه تهمس شجابك حامد تريد تموت شجابك

لفت جسمها بشال حياكه ثخين وطلعت

ظليت واگفه بالباب تقريباً بالعشر دقائق وماكو وبردت مگدر اروح اجيب شي البسه ولا اگدر اسد الباب

ومحد يفوت من هين الا نادراً عبن هاذ الباب بس عالمخازن

رجيت راسي عالحايط وحاضنه نفسي وارواح برجليه

جمدت گمت امط بنفسي بلكت اشوف مهره اجت وگفت على طوارف اصابعي

ومنزله اردانات قميصي لازمتهن

اجاني صوت ناصي بصف اذني

گال شتسوين هين

فزيت وحطيت ايدي على گلبي

گتله ممماجد

جاتف ادينه وره ومدنگ راسه يحجي ويايه ومبتسم گال شتسوين هين بشنهو صافنه وفزيتي

توترت معرفت شحجي واخاف اجفص ولازمه گلبي واتخيل ماجد حميد بهاي اللحظه لو يگصون رجلي ما احس شجابه هين

عگد حواجبه گال شبيج ليال

بللت شفايفي الي جامدين من البرد گتله ديالا گالت اگفي انتظري صديقاتنه راح يجون من هاذ الباب

گال ها

دنگت راسي وراوح برجليه

گال شبيج

گتله بردانه

ابتسم وگال يخسه عنج البرد هسع اجيب لحاف وامهدج تمهد مثل الجاهل

ابتسمت وحكيت راسي

گال لا صدگ انتي لو خبله لو مخبله

ختفت بتسامتي وبزعل گتله ليش

رجه ضهره عالحايط وجتف ادينه

گال بارده ثلج ولابستلج قميص حت بالصيف ما يدفي وتصيحين بردانه هز بأيده گال البسيلج قمصله بلوز شي شياتين

گتله لا والله ابرد واتمرض ولا البس بلوز وقمصله

طلع جگاره ورثها گال ليش عود

گتله يطلعني سمينه ويگوم يعيبن عليه كريمه وبنات خالها

ضحك ونفخ دخان كال اي صحيح سمينه

اني كنشت وگمت انفض الدخان اجه على وجهي

وجتفت اديه بزعل وصديت بصفحه وما حجيت

گرب مني وهمس يم اذني ول يابه اهم شي الخصر منحوت خلي الباقي سمين وتره يغارن منج هو اني رجال وغرت

ااخ لله في خلقه شؤن

دحگت على نفسي ورفعت اديني بعلامة استفهام شنو يعني على شنو تغارون مني ناصب عليه مو

نفخ دخان بحسره وحك گصته گال ما تفهمين احسلج روحي البسي شي تدفي لا تطبگ عندي اگلبها تموز هسع

گلشي ما افتهم من كلامه

دحگ على ايدي گال هاذ مفتاح الخزنه لابسته

ليال: لزمت المفتاح بيدي گتله لا هاذ مفتاح كنتوري

گال عندج ذهب ومجوهرات گليلي ترا ما ابوگ

ليال: لا والله بس عندي تراجي وگلاده ضامتهن يم امي وكنتوري مابي غير ملابسي

ضحك وگال ملابسج قافله عليهم شگد نحسيه

ليال: تفشلت دنگت راسي گتله ما نحسيه بس ما احب احد يلبس ملابسي احبهن

گال يبوي اذا ملابسج مقفله عليهم وتغارين عليهم عجل نياله الي تعشگينه

ليال: گتله شنو تعشگينه

نفخ دخان وصافن عليه ومقلص عيونه گال اشتعلو اهلك ماجد وين جانت مضمومتلك وجان ينزع سترته گال هاج البسي مو زيلج البرد

ليال: حاضنه نفسي من البرد ارجف وگتله ما اريدها مو بردانه

تجاهل كلامي وسحب ايدي لبسني الستره گام يعدل بالياخه يم رگبتي گرصني من خدي گتله ااااي

ضحك گال عوذا شهواله

حكيت خدي يگول هواله وهوه شلع خدي دحگت على نفسي لابسه سترته تسحل عليه گلت طلعت مرعبله

ضحك وگال اذا انتي مرعبله عجل منهو المرتب لا تخافين بعدج انيقه وحلوه جنج اميره من العصر الفكتوري

برطمت ما حبيت شكلي طلعت شعري من الستره وجتفت اديني

راح ويتلفت عليه ومبتسم ويغمزلي

همزين راح احس روحي ردتلي نفخت على اديني ادفيهم ورجليني تعبو من الصبح واگفين

افتر بمكاني ورجليه خدرو من البرد ومهره ماكو ختفت حيل طولت

ديالا: الناس گامت تروح ما ظلو بس اهل استاذ صائب والدراويش جاي ينطون محاضره

وليال مدري وين طست

اكيد لگتلها مكان ونامت بي اشتغل بملل ومن گفه خشمي وجان ابدي الجاي وتكفخني فاتن

حكيت راسي وبرطمت وگمت الم بالمكان

فات ماجد ويتلفت ورا گال لفاتن ما تندليلي مكان اختل بي ليما يروحون الدراويش ضحكت گلتله ليش لازم بعرتها

گال قابل مثلج بس يريد ينطوني الطريقه الكزنزانيه گلتلهم هسع اجي وجان افلت خليت حميد ومحمد وحدهم

فاتن گلتله اي وليش ما تاخذها گاللها خايبه ما طيرين هسع تندليلي مكان

گلتله والله ما عدنه غير المخزن روح اختل ويه التبن

گاللها من صخونه مال حصونه تلفج ضابط وكل هيبتي اختل ويه التبن

گالتله ضابط والك هيبتك ومنهزم من الدراويش وجان اطگها بضحكه خلته يگمز طلع وجان اطلع ورا شفته راح بتجاه باب المخزن ضحكت گلت خرب بس لا صدگ يختل بالمخزن مشيت ورا

وجان اشوف ليال واگفه بالباب رحت عليها بساع قبل ماجد جتفي انطخ بجتفه گالي ثول

وصلت ليال وجان اضربها على جتفها فززتها گلتلها ليش عفتيني ونهزمتي

لزمت جتفها ورادت تحجي ويايه من شافت ماجد سكتت

ماجد گال خير خير ليش ضربتيها

ديالا:ها لحالي هيج ما گدرت اگله رحنه ندحگ عالدراويش من الشباك

ليال:جانت عايزه اني رجليني صارو خيوط انتظر مهره الي راحت وما ردت واجوني ماجد وديالا متت بدمي وبس ظليت ادحگ عليهم عبالك مدري شمسويه ذنب

ماجد گال وين صديقاتج اشو ما بينو

ليال:بتوتر والكلمه تغص بالعومي گتله مدري

گال عجل امي تدري امشي فوتي جوه لو تظل تنتظرينهم للصبح

ديالا: تفاجأت گلت صديقات شنو

ماجد صد على ليال ويقرا عيونها وليال توترت ودنگت جوه

حالتهم مثل معلم وطالبه ما محظره الواجب ليال تحجي برتباك وتفرك بأدينها وماجد يحجي مثل المحقق وحاط ادينه بجيوبه ومركز بعيون ليال صد عليه وجان يگول ديالا روحي غادي انتي

ديالا:ظليت واگفه هاي عود ليش يدزني شمسويه ليال گلبي گام يرجف صد عليه انوب وگال ما سمعتي شگلت هزيت راسي بـ أي ورحت

ليال:واگفه گدام ماجد اعصر بأديني ومدنگه جوه وهوه يگول شعندج ليال واگفه هين وليش جذبتي

شو دحگي عليه بالله

ليال:ما فعلت ادحگ ولا احجي وبساع خنگتني العبره وماجد يحجي ويريد ادحگ بعيونه واحجيله الصدگ واني رافضه

اخر شي لزمني من حنجي وصاك على سنونه ويگلي مواعده ولد مو عندج حبيب

فتحت عيوني نصدمت من كلامه ودموعي نزلن لزمت ايده واخرها من حنجي گوه احجي گتله لا والله اقسم بالله شنو اواعد شنو عندي حبيب

شاد على حنجي ويحجي من بين سنونه گال ما تعرفيهن شنهي مو هسع نشوف صدگج من جذبج وطلع برا وگام يتلفت ويدور ورحت ورا متت من الخوف وجان اصوفر اصوفر ثلاث.مرات تا انبه مهره

صد عليه وعيونه نار من العصبيه بثواني تغيرت كل ملامحه ولزمني من شعري گال تصوفريله تا ينهزم موووو

وينادي اطلع يا نذللل وينك

وگام يتلفت مثل المخبل وينادي واني جلبت بأيده گتله والله كلشي ماكو امشي نفوت جوه عفيه ماجد وحاول اسحبه يفوت عالبيت ما اگدر

گمت ابجي بعبره وهوه صافن بحالتي لزمني من عكسي وينفض بيه گال احجي منو هاذ منين تعرفينه من المدرسه موووو

انصدمت من شفت مهره وحامد ماكو بالمكان وبس شال مهره الي جانت لابسته واگع بالگاع

شكراً لتعليقاتكم الحلوه

يتبع……