رواية عرين الصياد الفصل السابع 7 بقلم شذرة العدوان

عرين الصياد

الفصل 7

بقلمي شذرة العدوان

ديالا: اني وليال لازمين ثوب مهره وخايفين منهم

ونتراجع خطوات ورا صرنه على حافة الشارع ورانه مشروع البزل مليان زل وحديد الي تگع تموت

مهره خايفه مثلنه متلثمه و لازمه الفرس بأيد والثانيه مخليتها علينه

وهذول سياراتهم جثيره وهمه اكثر منها

وكلهم لابسين زي عربي وعگل ولافينها على روسهم

وعاگدين الحواجب

والدخان مال الجگاير يطلع من جامات السياره

مهره توترت وما تگدر ترجع لو تكمل الطريق همه گطعو الطريق بسياراتهم

حدر رجال من اول سياره وگف يم مهره يسألها

خويتي تندلين بيت عماد الحداد ابن الدرويش

مهره:شرايد منه

جاوبها اريد اخطبه تندلين بيته وين

مهره رادت تختصر الكلام

الدنيا ضهريه وكل الفلاحين والطلاب روحو لبيتهم

ماكو بس صوت الطيور بالبساتين والوحيدين احنه عالفلكه

گالتله تطلع من هاذ الطريق

وأول بيت يلاگيك يمه بستان نخل هاذ هو بس محد موجود كلهم بالمستشفى

الرجال عگد حواجبه وگال مشكوره خيه وراح عالسياره مد راسه من الجامه ويحجي

وجان صعد السياره وفترو تايرجعون

ليال:اني اول مره اشوف سيارات بهل عدد اكثر حت من الزفه وانوب كلها زلم وشكلهم يخوف واحدهم بگد الحولي

اي والله بگد الحولي ماجد خفت گلبي راد يطلع من صدري وخنگتني العبره اريد ابجي لزمت ثوب مهره وبلوز ديالا والتفتت ورايه اشوف مشروع البزل اخاف اكثر گمت ابجي

من سأل مهره وراح وفترو بسيارتهم تايرجعون احس روحي ردتلي اول سياره فاتت الي وگف سألنه ويا الرجال الجبير

مشو تقريباً اربع سيارات والخامسه من وصلت يمنه صار يمشي على كيفه

قريب عني مترين يدحگ علينه من فوگ لجوه

اسمراني طوخ شواربه مفتوله اول مره اشوف هيج شوارب

رفع تك حاجب ورجع عگاله ليوره وبتسم بخبث

الي گاعد بصفه ندسه بمعنى امشي

تغبيت بين ديالا ومهره وادحگ بتك عين

مشى الرتل وكلهم يدحگون يمكن اول مره يشوفون بنات بس مو مثل ذاك ركز وشكله يخوف

رجعنه عالبيت بساع گلوبنه تطرد من الخوف

مهره فلت التلثومه وگامت تفتر وتفرك بأديها

متعرف شتسوي

ديالا: خاف هذول الي ضربو عماد

ليال:گلبي وجعني كورت ايديني على صدري

گعدت بالگاع شگد خفت

ديالا:ظلينه محتارين للمغرب ونفكر بهذول الناس الي

سألو على عماد ومهره گالت لا تحجن لأي بشر

گنالها تمام

اجت هاجر گالت لمهره اريد اروح لهلي

مهره جاوبتها بستفهام وگالت العفو منج وين تريدين

هاجر رجعت گالت اريد اروح لهلي

ردتلها مهره گالت عيوني اني حماتج مو زلمتج عصمتج مو بيدي تا تشوريني تريد تروحين هذاك الطريق اني معليه

گالتلها امل عجل شگد ما عندج احساس احنه بيا حال وانتي دورين مساير ولو عليش اعتب عليج اذا عمتي اخت ابويه وام زلمتي الثانيه ادور مساير ظلت عليج

هاجر گالتلها بس تجي عمه اگللها عليج

ردتلها امل اي يحياتي اندل بيج تحجيلها واجبج الفتنه والبلبه بهالبيت

ظلن متناگرات اكثر من ساعه ومهره عن غير عادتها ما سكتتهن مرتاجه عالحايط ولازمه راسها

هنه من كيفهن ملن وسكتن امنيتي اعرف سر هالعداوه الي صارت بدون سبب هيج هاجر من بطنها عادت امل وتكرها

ليال: سبحت وگاعده يم الصوبه اتدفا وديالا گاعده تراجع دروسها جاهد وجوانه عن غير العاده گاعدين عاقلين ومهره نايمه على مخدتين مكوره اديها على صدرها وحاطه الشماغ على عيونها

هدوء تام بالهول محد اجه علينه وسأل غير سنان واهله

وصبره ما تلمها بس الوجبه ما اجت من اهلها الا بعد صلاة المغرب جفتت علينه عبالك طابه حرب

ولا سألت شصار ولا شي گعدت وگالت اريد عشه شنهي محد مسوي عشه ما طابخات المسعدات گلتلها هاجر عدنه من مال الغده راح احمي

ردتلها صبره اي هاي تاليها من شلت ايدي من المطبخ گمنه ناكل اكل بايت الحمد لله والشكر يربي امشي جيبيلي خن اتزغنب وانام صدت عليه گالت هاا سبحانه

ليال: اي

ردتلي حت المعرسه جديد ما تسوي سواتج وتسبح المغرب بهل برد

جاوبتها مهره يالله بلشي ما عندج شي تحجين بي استلمي ليال ليش سبحت

جاوبتها صبره محد فسدهن وفرعنهن غيرج

گعدت مهره وشالت الشماغ من وجها شبكت اديها وگالت لا بربج فسدتهن !

شنهو الفساد البيهن اشو كلها تحلف بروسهن بالمدرسه وغيرها منهو بشطارتهن ونضافتهم

رجعت مهره ارتاجت وگالت من تجي الناس وتمدحهن يمي هاذ يعتبر فساد مو اذا هيج اني قبلانه وافتخر بفسادي

ليال: مهره وصبره مو عبالك ام وبنتها مدري شلون اوصفهن ما بينهن اي حنيه وتعودنه عليهن متكاونات طول الوقت غلسنه عنهن رحت يم ديالا تاتجذلي شعري گالت متشوفيني جاي ادرس وخري عني ورجعت تكتب

تعشت صبره وگالت رايحه انام صوت ما اريد

منو يسوي صوت غيرها هيه لاجه بالبيت

مهره گالت تعاي ليال اني امشطلج

رحت ركض وگامت تمشط وتشم بشعري وتگول يمه فديت النضافه والريحه الطيبه والشعر الطويل السرح مو مثل بعض ناس ما تجذل شعرها ويظل مهوش جنه الفزاعه

جاوبتها ديالا بدون ما ترفع راسها گالت ادري بيج عليه اخذي راحتج ترا حساس ما عندي تا اغار

ظلت مهره تسرح بشعري بالربع ساعه ومو صاخيه تجذله

وجان نسمع باب السياج اندگ قوي

ديالا: جنت مركزه اكتب وبالي بالدرس بس سمعت الباب لا ارادي گمت على طولي ومهره وليال هم طلعنه كلنه تنشوف شكو والخوف خيم على ملامحنا گلوبنه تطرد

طلعت مهره وهيه تلف الشماغ على راسها

وگفت بالباب گالت منو

هاييي انيي ماجد دفتحو الباب عاد

فتحنه الباب ونشوف ماجد شايل درويش ابن فاتن

واستاذ صائب وابويه بالسياره انثولنه ظلينه واگفين لحد ما استاذ صائب طلع راسه من الجامه گال وخرن لو تريد ادعمجن

وخرنه وجان يفوت واحنه لازمين الباب وشفنه فاتن گاعده بالسياره وره هيه ومحمد گلوبنه تطرد ونرجف من التوتر

ليال: احنه شگد نحب درويش ابن فاتن بس ما درناله بال بسبب قلقنه على عماد

فاتت السياره واحنه نمشي وراهه وعفنه ماجد بالباب شايل درويش ناده هيي وين موليات وحده تجي تاخذ الجاهل مني تا اسد الباب

ليال: مهره وديالا لا صدن ولا ردن رجعت اني اخذت درويش واريد اسأل ماجد مستحيه منه وبس ابلع بريگي سد اول باب ومشيت تا اروح ناداني گال هي اگفي ام الخربات وگفت وحيلي كله يرجف والدمعه لايجه بعيني عبن ادحگ عالسياره مال استاذ صائب ما حدرو منها بس محمد وفاتن وابويه عجل امي وحميد وعماد وينهم

اجه ماجد وره ما سد باب السياج وقفله بالسرگي ابتسم وگال شبيج ميته بدمج دخيلج لا تخربين مثل البارحه

عضيت شفتي ودنگت گتله مابيه

وجان گرب راسه يمي وگال عندي بشاره

رفعت راسي ونومت درويش على جتفي گتله شنو هيه

گال احم وشتنطيني

گتله شنطيك والله ما عندي شي عود اخلي ابويه يشتريلك

گال عود اني اطلب بشارتي

اي بس گلي شنو هيه بالأول

گال احم ترا عماد زين جنه البعير

فتحت عيوني ونزلن دموعي ابتسمت لزمته من عكسه گتله سيدي عليك الله صحيح

گال اي والله وداعت صائب ما احلف بي جذب

وبطلي سالفة سيدي رحمه لهلج

عفته ورحت ركض عالسياره تا اتأكد

ديالا: وصلو يم البيت استاذ صائب طبگ سيارته بصف الديوان حدرو ابويه واستاذ صائب

ومحمد يسحل برجله مبين تعبان وجان يگعد على حافة الطرمه وارتجه عالندگه

وفاتن حدرت گوه تمشي منا مريضه بالسكر ومنا حبله

تلگيناها بساع بوستنه وحضنت مهره وگامت تبجي

واجت هاجر سلمت واستغربت البجي وراحت يم محمد تسأله

طلعت امل من شافت البجي وتگوم تصيح

شبي عماد احجو شبي امانه احجو

استاذ صائب گال هدي امل يابه الحمد لله عماد بخير والله

امل گالت احجو الصدگ لا تضمون عليه

جاوبها استاذ صائب لا حول الله مقبوله منج بنت خالي طلعت جذاب

مسحت دموعها وگالت تعذرني بس روحي ذايبه

حضنتها فاتن وگالتلها والله زين

اجت ليال تركض شايله درويش لزمتني من عكسي وتبجي گالت ماجد يگول عماد زين

گلتلها اي هم فاتن تگول وحضنتها گمنه نبجي

استاذ صائب نزل غراض فاتن فوتهن جوه خطيه شگد حباب لو واحد غيره جان گال شعليه اركض وياهم من البارحه وبدربه وهوه يشيل الغراض گال لمحمد فوت جوه نام ورتاح

گام محمد بدون ما يحجي يسحل بروحه تعبان منتهي

وهاجر ساندته

ومهره وفاتن مستمرات يبجن واحنه

نشاهگ وياهن صارت مناحه

ماجد گال استهدن بالله استدهن

والحمد لله على سلامة العمده لا تبجن يم سياره صائب راح تغرگ ،،،

ديالا: لزمت ايد ماجد بعفويه سألته

امانه شونه عماد امانه

لزم ايدي وابتسم گال والله زين شبيج

ديالا:من لزم ايدي خجلت وسحبتها منه

گال عدكم شي ينوكل تره الجوع واصل للهامه

مهره:جنك على طلي مشوي ابن خالتي بس طمني يرحم ابوك

گال يبوو يهل طلبه

والله عماد جنه الزمال وصحه وحجه ويانه

مهره: گربت يم ماجد وحجت بهمس تا امل ما تسمع گالت بروح ابوك احجي الصدگ

جاوبها بهمس يابه وروح ابويه زين اسألي اختج هاي جانت يمه واشر على فاتن شنهي اجذب عليج اني تدرين بيه ما اعرف اضم سالفه المهم گليلي شمسوين عشه

فاتن حاضنه امل وتحجيلها عن عماد وصحته وگالت سأل عنج وعن ابنه

والله زين جنت يمه

وحجيت ويا يضحك ويشاقي گال بس اطلع اخليكم خدم عندي

امل تبجي وتضحك گالت ميخالف اخدمه طول عمري بس يطلع سالم

الحمد لله يربي

ناداني ابويه گال ديالا بنيتي تعاي جهزيلي مي لرجليني ورحت ركض ويا

ليال:فاتن سألت عجل امي وين

جاوبتها مهره گالتلها نايمه

رفعت حواجبها فاتن نوم شنهي هسع

گالتلها تعبانه من الهرفه مال النهار وگامن يتهامسن

وجان ماجد گال احمم وطلع جگاره يدخن عود ينبه مهره ما تحجي

درويش لزم شعري من يم اذني ويهلس شوط روحي گتله اااخ لا نبلش هدني وحاول افك شعري منه ماكو جلب بعد

اجه ماجد لزم ايده تا يهد شعري

وهاذ صاك ايده مجاي يفلتها

وماجد يگله هده ولك لا اشعل عشيرتك

طلع استاذ صائب نادانه گال فوتو جوه احجو يبنات فاتن مريضه خلوها ترتاح شنو راح تفرشون يمكم بهالبرد

فاتن گالت اي شوي ونفوت والله كارهه الگعده جوه وريحة المستشفى بعدها بخشمي خن اشم هوا نضيف

ماجد حاط الجگاره بحلگه و يحاول يفك شعري من ايد درويش الي عبالك علج ولزگ بالشعر واني خايفه من ماجد لحالي الخوفه من فززنه بعدهي بيه

گاله هاي سوالف النسوان ما تحله الا بالباب لو برا

وجان يردله استاذ صائب عجل انته شعندك وياهن محسوب عالنسوان

ماجد وهوه مدنگ عليه رفع عيونه على استاذ صائب وجر حسره وبتسم

گوه هدني درويش الا شلع من شعري دمعن عيوني

ماجد طلع الجگاره من حلگه ونفخ دخان واشر لأستاذ صائب عالجگاره گاله بس اخلص هاي افوت

ارتاح انته لا يظل بالك وغمزله

وجان التفتت شفت استاذ صائب واگف بثبات وحاط ادينه بجيوبه و يدحگ على ماجد وعاگد الحواجب صد عليه وگالي فوتي ليال بارده عالطفل

وماجد گال اي ليال فوتي يابه لا يبرد الطفل وصائب يزعل اذا برد الطفل

ابويه طلع گال فوتن يابه الجو بارد شنهي تريد تخلصن سوالف شهر بساعه وحده

هنه ظلن يم السياره يحجن ما يگدرن يحجن جوه من صبره هاي كل مره هيج صح نايمه بس هاي مثل الثعلب بساع تگعد

فتت جوه وصلت بصف استاذ صائب

گال البسيلج شي يدفيج

هزيت راسي بــ أي وفتت

ديالا:جبت مي دافي وخليته بطشت وخليتله ملح

گعد ابويه عالكرسي وحطيت رجلينه خطيه تعبان منتهي

نشفت رجلينه وگام راح لحجرته ومثل كل مره يسد الباب على نفسه ويگوم يدعي ويناجي ربه

شگد مابي حيل يصلي لحد ما يتعب ومن يگعد يلزم السبحه

ليال:اخذت درويش نومته ورجعت ارتب الهول

مدنگه ارتب المخاد

سمعت صوت ورايه صوت احم التفتت شفته استاذ صائب

اجه يمي گال ما صارتلي فرصه اسألج شون صرتي

ابتسمت گتله زينه استاذ

گال ليال البسيلج شي بارده ترا

گتله لا مو بارده واني جذب سالگني البرد بس ما اريد البس بلوز يطلعني سمينه

لابسه قميص حرير صار جليد عليه

رجع كرر الطلب وغير نبرة صوته گال ليال روحي البسيلج شي بابا الجو بارد

خجلت منه حسيت نفسي بالدرس

وهوه ينبهني البس قميص عريض وصدريه طويله هزيت راسي وگلت اي هسع البس استاذي

طبو ماجد وفاتن ومهره

ماجد گال صائب حت بالبيت ماخذ دور المعلم ما شاء الله عليك

استاذ صائب عگد حواجبه گاله شي اكيد

طلابي مسؤليتي اعتبرهم جهالي واخاف عليهم خاصة اذا جنه محاطين بناس همج ما تعرف الأصول لازم بكل مكان نظل ماخذين دور المعلم

ونعلم الناس ونوعيها

ماجد قوس اثمه بستهزاء وتجاهل وگال هاي الصوبه بيها نفط

گتله اي وجان طلع علبة الشخاط من جيبه وشعل الصوبه

مهره وفاتن گعدن بزاوية الهول يحجن

فات ابويه گعد وجان استاذ صائب گله ملا روح نام انته تعبان والدكتور گال لازم يرتاح

ابويه جاوبه لا يابه مو تعبان زين الحمد لله

ردله استاذ صائب ملا هاذ بيتنه تره خاف تعبالي نزعل اذا رحت نمت روح ارتاح واحنه هم راح نمشي

گاله ابويه لا والله ما تروحون تتعشون وترتاحون هين

استاذ صائب گاله منگدر والله

ابويه لح عليهم وگال والله محد يخطي من هين

جاوبه استاذ صائب عجل تروح تنام وترتاح

ابويه هز راسه بقبول گال دومك تغلبني حضرة المعلم ترخص من الكل گال اعتبرو بيتكم يابه صائب وماجد ما قصرتو وحط ايده على راسه يتشكرهم

گالوله واجبنه ملا اخذ راحتك

طلع ابويه ومشيت ورا لحد حجرته

مدد وحط ايده على عيونه

ويهمس اللهم لك الحمد دائما وابداً بوسته من خده فتح تك عين وبصوت ناعس گال هاا ذيبتي

غطيته وطلعت

ديالا:سمعت صوت ابن فاتن يبجي ورحت شلته يمه حبيبي شگد حلو ينگرط يشبه فاتن

همزين ما طلع يشبه ابو حجي حسين

ليال: اجت ديالا شايله درويش گلتلها ديري بالج لا يهلس شعرج شوط روحي

ديالا:امشي نودي لفاتن يمكن جوعان

رحنه عالهول جانو بس ماجد وفاتن يحجون بهمس من شافونه سكتو

فاتن گالت اريد جاي يبنات راسي يوجعني

ماجد گال جاي شنو انطونه شي ناكله

گلتله فاتن عساهه گشره مو اكلت بالمستشفى

گاللها اي عبن بالمستشفى ما استطعمت وتعتبر تصبيره وهسع جوعان عندج اعتراض

ما جاوبته صدت عنه وهيه مكنشه

ليال: احجولنه عن عماد عفيه

ماجد: شحجيلج عنه مثل شنو هواياته لو اختصاصه لو قدوته بالحياة

فاتن گلتله جاوب على گد السؤال لا تستلم ليال ترا هاي ام دميعه ما تعرف بس تزعل وتبجي

وجان ماجد گال وتخرب

گلتله فاتن شنو

ردتلها غير البارحه خربت مثل الميته والله ياساتر

يابه ليلى جيبلي خبزه اكل منها واحلفلج عليها ان عماد زين وجنه البعير

گتله محشوم عجل شو ما اجه

گال اهوو نعيد ونگول ما يگدر يطلعونه هسع ليما يتعافى اكثر قابل هوه رايح يولد لو يشلع سنه يا عيني

ديالا:وامي شو ما اجت

ماجد:ما فعلت تجي ظلت هيه وحميد خليها يمه اخيرلها اذا تجي هين تخبصكم المهم عماد زين وهاي اهم شي كافي تسألن يبستن حلگي وكل ما تسألن اجوع اكثر

فات استاذ صائب ينشف ادينه بالخاولي وينزل اردانات القميص گال خلهن يسألن غير اخوهن

و فاتن وجهه الخير من طبت المستشفى عماد صحصح

ماجد گال هاي اللقطه شايفها بفلم هندي نسيت اسمه

وجان فاتن گلتله هاي بعدك تغار مني

اي والله يا صائب شلون عجل حت حجي حسين يگول انتي ملفه الخير عليه ،

ردلها ماجد اغار منج على حورج

فاتن گالت لأستاذ صائب

صائب شبيك متشوفه شون يحجي ويايه واني مريضه خلي يسكت لا اگوم ادفره

استاذ صائب گاللهم كافي ما كفاكم مكاون بالسياره

ماجد گاللها شتدفرين بابا ضابط والي هيبتي احترميني لا اگوم افعسج

عوجت حلگها وجان تگله عشتو ضابط مصدگ روحه يول مو جنت اكتلك بالمكناسه

استاذ صائب يضحك ويهز براسه

وماجد يگللها كافي كافي انطمي

اني جنت استخطيج بنيه وضعيفه بگد السلبوح وما اكتلج

وفاتن تردله منو جان يروح على امه يبجي يگول فاتن كتلتني

استاذ صائب گال هسع شون ما نصلي خن اروح عالديوان امري لله

اني وليال صافنين عليهم شون متناگرين مثل الجهال ولا عبالك كبار واحنه بگد جهالهم

ماجد گال شووو واگفات جيبن اكل خاف ما عدكم تاروح لهنه اكل

ديالا: يمه هاذ شو ما يستحي عبالك بيته

ليال:امبلا عدنه راح تجيب مهره

صفگ بأدينه وگال ااخ والله هاذ البيت اذا مو مهره بي يديح والله

فاتن گالت اي والله طالعه عليه

جاوبها ماجد لا گولي غيرها هوه انتي حت جاي مثل البشر ما تعرف تسوين لحد هساعه الجاي الي شربته يمكم لازگ بلاهتي عاگد دبس

گالتله هاي قبل بس هسع اطبخ طلي مو بحاله

ردلها هاا عجل اذا تطبخين الطلي ومو بحاله شكو رجلج جابلج خدامه

جاوبته تغيضه گالت فلوسنه جثيره ونحير شون نبذرها روحي ديالا جيبيلي گلاص جاي مهيل بدون شكر عبن اني من گاعي عسل

ديالا: گلتلها هسع اجيبلج بس درويش جوعان

ردت بملل اهوو من ابو بطن جيبي وجان تاخذه وتروح لحجرة امي ترضعه ممه وتنومه

ليال:رحت عالمطبخ تخبرهم ماجد جوعان

گلتلها مهره هاذ ماجد يصيح يريد اكل اشو ما يستحي غير هوه خطار

ابستمت گالت لا مو خطار من اهل البيت گليله هسع دقائق ونجيب الأكل

ديالا:طلعت ليال وردت اطلع وراهه اسوي جاي لفاتن ناداني ماجد گال هي تعاي

مشيت خطوات يمه وهوه گاعد بصف الصوبه ويطگطگ بيها بالمحبس الي لابسه بگد راسي

گال حجيتي لأبوج

فتحت عيوني گتله شنو شحجيله

ماجد:ينعل شيطانج شگد فطيره

شبيج من خالتي ضربتج حجيتي لأبوج

ديالا:خجلت ودنگت راسي جتفت اديه واحرك برجلي گتله لا ما حجيت ولا راح احجي

ماجد:عفيه وهاي بعد اخذيها من هالشارب بعد ما تمد ايدها عليج انتي هم عايله تره خالتي حسبة امج المفروض ما تراددين

ديالا:هزيت راسي بــ أي وعيوني غورگن ونزلت دموعي

ماجد:هالعيون الحلوه ما تستاهل البجي اها نسيت وجان يمد ايده بجيبه طلع گيتارة مال شعر گال هاج رحت عالمحل اشتري ولگيت هاي اشتريتها الج هدية صلح

اخذتها منه جانت گيتارة حمره حلوه گتله شكراً

لميت شعري بيها صار ذيل حصان جنت مخليه شعري محاوط وجهي تا فاتن ما تشوف الضرب بس الضاهر التعب معميها يالله اذا شافت اگللها هاي عبن لطمت

گال شعرج حلو بس لا تگصين بعد خلي يطول مثل شعر ليال راح يلوگلج احسن

فات استاذ صائب ويدحگ على ماجد وشد على شفايفه

وماجد ابتسم ودنگ راسه طلع جگاره ورثها

استاذ صائب گال روحي ديالا عاوني خواتج

گتله اي استاذ ورحت

ليال: گاعده بالمطبخ يم الصوبه سحبت شعري على جنب وجاي اجذل بي محد جذلي سبحان الله بس اگللهم جذلولي تطلع الف شغله عاطت بيا مهره گالت اذا الگه شعرايه بالمطبخ ازينج صفر

اجت ديالا تحمي الجاي تا تصب الفاتن شفتها مسويه شعرها ذيل حصان گلتلها منيلج الگيتاره هاي

همست گالت من ماجد الحولي

وجان نضحك ثنينه

ومهره گالت وجع شعدجن تضحكن

گنالها على ماجد

هزت راسها گالت عيب شبي وتضحكن عليه

ليال: شطوله بگد الحولي

عاطت بيا عيب ليال شهل حجي هم لو الي تعيبن علي يستاهل وين اكو بحلوه ماجد والطول للرجال هيبة الي اسمعها تعيب اگص السانها

برطمت وگلت بعد ما احجي

گالت خوش تنشوف ورجعت تگشر بتيته

وأمل تگرض الطماطه

تا يسون عشه فات ماجد عالمطبخ تخوصر گال شراح تسون اكل

مهره گلتله راح اگلي طماطه ومقليات بتيته وبيتنجان والله ما ندري بيكم تجون

گال لا تكلفين نفسج بنت خالتي حطيلنه من الموجود هم لو خبزه وطلي

ضحكنه الكل أمل الا غصت گامت تگح

گال بالله عليج مهره جوعان مو مال انتظر ربع ساعه

راح فتح الثلاجه شاف جدريه طلعها گال يبوي مو هاذ لحم اوف وخرن الطاوه خن احمي هاذ

شال الطاوه يعباليها بارده وجان تلجعه گال اااخ

مهره گالتله على كيفك ابو بطن جيبه احمي الك

گاللها اي بالله عليج حمي ااخ اصبعي لزگ بالطاوه

صائب وفاتن احمسيلهم طماطه واني راح اگعد اكل اهين واروح يمهم اكل شوي زعم ما اشتهي امانه مهره اني بحاجبج بنت خالتي لو عندج شارب جان حلفت بي

ديالا:يضحكن سوالف ماجد وبساع اندمج ويانه

وين البارحه زوعنه العافيه

وصدگ حمه العشه وگعد بالمطبخ ياكل شگد متواضع

بعد ما نعيب علي

ليال: لگمته شكبرها اشرلي بأيده يعني اريد مي

رحت جبتله گال فوتي اكلي ام الخربات گتله الف عافيه ما اريد

حرك جتفه گال كيفج شبع وجان يروح يغسل ويجلف ادينه بالصابونه جلف ونشف بالخاولي ورجع عالهول ولا كأن صاير شي

اني رحت لبست بلوز اوف والله يطلعني سمينه نزعته لبست غيره وهم نفس الشي گمت انثر بالملابس

ديالا:فتت عالحجره شفتها مدعوله وليال تلبس وتنزع وعاگده الحواجب گلتلها هي شبيج مخبله

دحگت عليه وما ردت

رجعت سألت شبيييج دعولتي الحجره

گالت شلبس اطلع سمينه وگعدت خانگتها العبره

گلتلها هاي ملابس الشته اطلع الواحد سمين

البسيلج اي شي

گالت ما راح اظل هين ما اطلع اصلاً اني مو بردانه بس استاذ صائب لح عليه الا البس هدوم ثخينه

ديالا:عفتها وطلعت

رحت عالهول شفت استاذ صائب گاعد حاط المخده بحضنه ومكور ادينه وساند راسه عليهن

وماجد شال الصوبه حطها گدامه

اجت مهره جابت الأكل بصينيه گاللها استاذ صائب حطي الأكل بسفره والكل يلتم

مهره گلتله احنه متعشين الف عافيه عليكم

گاللها على گلبج نادينه فاتن وگعدو الثلاثه ياكلون

ماجد وفاتن ياكلون ومتكاونين وهاذ ماجد يسوي گرصة الخبز لگمتين ويعيب لفاتن

وهاي تردله السالفه عشره

واستاذ صائب گاعد بثبات ساكت واميل جسمه على جنبه الأيمن يگشم الخبزه يمسحها يعدلها يصفط البتيته بيها ويرتبها يلفها وياكلها بطارف سنونه تايوصخ اثمه

ياكل بنزاكه وحاط الخاولي بحضنه خاف يوگع فتات خبز وكل لگمه يمسح ادينه ويرجع ياكل وعاگد الحواجب ومبين عليه مو عاجبه الوضع والسوالف والمكاون عالأكل

بنص هدوئه سأله ماجد صائب تذكر مره من طلعنه نتصيد وفاتن باگت العصفور الي صدته

استاذ صائب ما جاوبه اخذ خبزه صغيره واكلها كأنه ما سمعه عبالك مو صينيه الي گدامه عبالك عنده درس مهم ينطي للطلاب بأداب الأكل

وماجد مبين يعرف طبعه هم تجاهله ورجع يحجي ويه فاتن

تعشو وشربو جاي وراحو لبيتهم وفاتن دفعت ماجد طلعته برا

وهوه يگللها يمعوده لا تلحين اگلج ما اظل لا تجلبين بيه وهيه تدفع بي وسدت الباب

شگد حلوه صداقتهم قابل مثلي اني وسعد

رحت عالحجره لگيت ليال نايمه

نمت بصفها بس حطيت راسي عالمخده غفيت

ليال: مـــــرت ايــــــام

وعماد تحسنت حالته واليوم يطلع بالسلامه واحنه من الغبشه گاعدين

نكرب عبن ابويه ذبح خمس خرفان بمناسبه سلامة العمده وعزم الكل

والبيت هوسه اهل صبره مگابلينه من الصبح

واهل استاذ صائب هم

امل تمشي وتهلهل وكاشخه ما خليناها تشتغل

خطيه مهره وفاتن محزمات عالطبخ وهاجر تنافخ وعاگده الحواجب عبن أمل كاشخه وگاعده

للمغرب والناس يمنه تروح وتجي واني وديالا نهد حيلنه اول مره نشتغل هالكثر

امي گاعده بالهول تجيها نسوان وصبره مگابلتها ومسويه روحها هيه ام عماد تنافق عبن النسوان گاعده

من فضينه العشه وجلفنه المواعين سمعنه صوت الدف

الدراويش سوو ذكر رحنه اني وديالا ندحگ من الشباك حيل نحب الذكر والمديح بصوت ابويه

ما گدرت ادحگ زين ديالا ماخذه المكان

رحت عالشباك الأخر ادحگ الله شحلو الذكر والمديح

والا الدراويش يمه شحلوهم شنهاي الشعر يخبل احلى من شعري اي والله احلى

ظليت ادحگ ومأمنه ظلمه يمي ومحد يشوف ادحگ براحتي وديالا عالشباك ذاك

متعمقه ادحگ وما حسيت الا ايد التفت على خصري وايد سدت اثمي كتمت صوتي وشالني اخذني وره المخزن واني ارافس احاول اخلص روحي

يتبع……