رواية كف الطاغية الفصل السادس 6 بقلم سارة الحسن
- گلبي صار يرجف مفرفح من الخـوف مثل طير بقفص وأشتعلت مدايرة النار ضل يضرب بجناحة حيل! الدموع ترسن عيوني ورجلية ما عاد تشيلني لزمت بذراع برهـان بقوة حط أيدة فوك ايدي وعيونة بعيون هذاك الغثيث التشع شر! نظراتة المليانة حقد شرحت لهفتة لهاي اللحظة! اللحظة الليّ يلزم بيها أخوية .. ضَحك بشماتة على حالنا وضحكتة رعب
زيـدان: شايف الدنيا شكد صغيرة
214
- بثواني وصاروا بالعشر زلم ورة زيـدان! مادري منين طلعوا ووين جانوا! شهگت خايفة وبلا وعي ركضت اريد اسد الباب بوجهم بس اريد احمي منهم، عتني من أيدي مرجعني ورة ظهرة مجاوب زيـدان بهدوء
برهـان: تاخــذني وين ماتريد بــس بلاية حس، ماريد بشر يدري اني عدكم
117
زيـدان: حتى لا يگولون انداس راس السبع؟
125
- هز راسة لا يحچي بنفس الهدوء
برهـان: حتى مايبقى شاهد على چتالك
133
- ضَحك زيـدان يهز براسة خـوش، أشرلة برهان على الزلم الليّ وراه يعني خلّ يرحون
زيـدان: لا تلعب بذيلك برهـااان مو من صالحك
41
برهـان: الغـدر مو ثوبي
78
- اندار زيـدان على الزلم الليّ وراه أشرلهم يمشون وصاح على أثنين بس همه يبقون ، وكفوا على جهة وهذا الغثيث على وكفتة أديه ورة ظهرة وعينة علينّا، أنــدار علــيَّ برهـان ورفع أديه ضغط على عيوني بأبهامة نزل دمعهن المتجمع بيهن ومسحة عن خدي يحچي بصوت ناصي
برهـان: اگـدر أثق بيج؟
96
- هزيت راسي أي والدموع تجري وهو يمسح بيهن ويحچي بنفس النبرة
برهـان: لا تجيبين طاري الصار هسه، ولا تگولين لمخلوق كائن من يكن انــي رحت ويَّ زيـدان، خـوش؟
- بقيت صافنة بوجهة ما مفتهمة ليش! أشرلي بعيونة
برهـان: هاي أول مرة أأمنج على سر لا تفشليني گدام روحـي الما تأمن ببشر
- غمضت عيوني مدنگة وشهگت أبچي متذكرة حچاية هزبــر وهو يگلي مقابل طلعة أهلي يريد "راس برهــان" ، هزيت راسي لا مفرفحة روحـي لازمة أديه التمسح دموعي بثنين أديَّة ماريد أعوفة
زُبيــدة: لااا تـروح ما ترجعلنّااا بعــد لااا تــــروووح
125
- سحبني حاضني حيل يسكتني ما يريد أحد يحس علينّا، دنگ راسة يم راسي يگلي
برهـان: الخايفة منه يصير راح يصير اسوء اذا حچيتي خليها ببالــج
63
- عبرت أدية على ظهرة مجلبة بهدومة حيـل أنهد حيلي من الخوف والبچي، شمرني بوسط النار بهاي حچايتة .. سحبني لورة بهدوء عينة على بيتنّا ورجع يباوعلي يمسح على راسي
برهـان: ميخالف مو كل ايام دنيتنّا حلوة
- باوعتلة مختنگة احس راح اموت
زُبيــدة: ليش أنتَ عشت أيـام حلوة؟
73
- گبل لا يجاوبني ضحك زيـدان يحاچيني
زيـدان: لا يسترعن گلبج وتصدگين بي حنين! هذا واحد من دروبة التعبانة
97
- أبتسم برهـان واندار عليه
برهـان: لاعبهن عليك لما حافظهن
71
- انگلبت خلقة زيــدان وبخطوتين وصل برهان لزمة من تيشيرتة عتة حيــل طلعة من البيت ودفعة على الزلم الوياه، تراكضوا لزموه منا ومنا بكل قوتهم وهو يضحك عليهم
زيـدان: تعاااال اشوفك اللعب الجديـــــــد يااا عــاار
54
- حط أيدة ورة راس برهـان نزلة وضربة بركبة رجلة على خشمة بساع طگ دم، شهگت وركضت عليه دفعتة حيــل شايغة روحــي
زُبيــدة: وخــر عنه وخــــرررر كسرررر بأيــدك أن شــــاااء الله
60
- برهـان من شافني طلعت اركض عليه اريد احمي منهم نفض روحــة من بين أديهم ورجعوا لزموا بساع، خـــزرني ولأول مرة هالنظرات من عيونة ما تخوفني بگد خوفي عليه بهاللحظة، أشر براسة ارجع للبيت وصاح
برهـان: بســااااع
45
- رجعت للبيت وبقيت واكفة بالباب عيني وراه شلون أخذوه يجرجرون بي وبگلبي أدعــي يارب احد سمع صوتة ويطلع يخلصة منهم! يارب كون زبيـر يطلع بهاللحظة ويخلصة من بين أديهم بـس ما طلع، لو زُبيــدة طالعة للبستان جان اول واحد شفتة فوك راسي.
147
- من طببوه لبيت شبلي يلا طبگت الباب وكعدت وراهــا أبچي وروحـي لابت احسها راح تطلع من القهر، صارت هوسة براسي والأفكار عبالك اوراق الشجر بفصل الخريف تفردهت لا ضلت فكرة براسي ولا داستوعب الصار كله . عضيت طرف شالـي حيل أضم بشهگاتي واني اسأل بروحي شلون عرفوا؟ انــي ما بعتة ألهم والله ما بعتة مااا رضيت شلون اذا عرف اني رحتلهم شلون أذا صدگهم لو گالولة اني السلمتهم راسة!
72
- حسيت على خطوات أمي إجت، مسحت دموعي بساع ووكفت على حيلي اريد أضم روحي بأي مكان بس ما لحگت! لمحتني وشافت حالـي جحظت عيونها بخوف وإجت تمشي بخطوات سريعة بأيدها صينية الشنگ، شمرتها على طرف التنور وهيَّ تسأل بخوف وقلق
حَفصة: شبيييج زُبيــدة؟؟؟؟ شكووووو شصااار؟؟؟
- هزيت راسي ماكو شي ومادري شچذب وتعبر عليها غير هالچذبة
زُبيــدة: اشتاگيت لأبوية وأخواني، لشوكت يبقون محبوسين صرت انسى حتى ملامحهم
32
- كعدت بالگاع رايحة روحـها من الهبطة، لمعت الدموع بعينها ميتة قهر
حَفصة: وگعتي گلبي يايمة، حالي عايزة هبطاااات والله ماضلي گلب يحمل مصايب بعد
41
- الله ذب علــيَّ كل البچي من سمعتها تحچي هيج، كعدت بالگاع ضامة وجهي بأدية وأبچي بحرگة، شحال گلبج لو عرف برهان صار عد بيت شبلي! إجت علــيَّ جرتني من أيدي تكومني خانگتها العبرة
حَفصة: كومي يمة كافــي لا تبچين وأدعي الله يفرجها علينّا
32
- مشتني للحوض تگلي غسلي وجهج وهيَّ راحـت للمطبخ مادري شأخذت ورجعت يم التنور، كعدت على طرف الحوض سانـدة ظهري على الحايط الورايَّ، مديت أيدي جوة مي البوري وعيونـي تباوعلها شيصير لو هالمي جاري على گلبي بلكت يبرد! شلت بجف أيدي ورشيت على وجهــي مرتين وتلاثة لحد ما تبلل كل وجهي والمي بلل شالي ووصلت الرطوبة لرگبتي، ضربتني نسمات الهوى جانت باردة بهالوكت وكلني رخيت .. رجعت راسي ساندتة على الحايط مغمضة عيوني أحـس روحــي مسلوبة منــي وباقية لا حول ولا قـوة! ضربت براسي صدى صوت ضحكتي بأيامــي القديمة، رجفت شفايفي خانگتني العبرة أريــد هذيج أيامــي انــي مو گـــد هالمصايب .
44
- صاحت علــيَّ أمـي گمت بساع رحتلها، وكفت أساعدها بالخبز ومادري شلون داتنزل دموعــي ميتة قهر والحيرة ماكلة گلبي أكـل شسوي علمود برهـان وهو أمني ما أحچي! بقت امي مرة تسكتني مرة تحچي علــيَّ مرة تبچي ويايَّ لما خلصنّا الخبز بألف ياعلـي .
25
- شلت الخبز وأنداريت للبيت خليتة بالمطبخ وهيَّ شمرت النجانة بالحوض وفتحت المي عليها حتى تنگع، رجعت للبيت طبت لغرفتها اخذت هدوم ومشت للحمام تسبح، انــي كاعدة بباب المطبخ وصافنة جفوني أحسها ثگلت لأن ورمت من كثـر ما بچيت، كعدت جيـداء وكفت تغسل وجهها على السنگ ونشفتة بردن دشداشتها
جيـداء: باچيــة لـو ما نايمة؟
- رديت عليها بصوت مبحوح
زُبيــدة: أثنينهن، ذبلت زهرة شبابي من مصايبكم
67
- ما حچت حطت قوري الچاي على النـار ومشت تگعد أُميمة تقنعها يدرسن رغم حتى هيَّ مالها واهس ولا خلگ، غمضت عيوني اريدهن يهودن وأسمـع باب الحوش تندك ما تحركت من مكاني مابيه حيـل حتى أرفع جفن عيني .. طلعت جيــداء فتحت الباب وأسمع واحـد حچة ويـاها بصوت هادئ ماميزتة وتوقعت عدنـان، رجعت علــيَّ ندهتني عبالها غافية، فتحت عيني اگللها
زُبيــدة: عدنان؟ يمكن هسه گاعــد ومابي حيــل يزأر علينّا من صبح الله
35
جيـداء: هــذا صهيب
- وكفت على حيـلي بساع ومشيت أريد أطلعلة وبگلبي ادعي جايب وياه بشارة حلوة
25
- صاحت علــيَّ تهمس
جيـداء: ضمي زلوفج جنج أم عفريت
- مديت أصابعي السبابة منا ومنا دحستهن جوة الشال
64
- فتحتلة الباب جان منطيني ظهرة
زُبيــدة: هلو صهيب
صهيب: يا صبـااااح الـ..
- أندار وما كمل الخير وشاف عيوني المورمة! راحت أبتسامتة
صهيب: الطيحان حظ، شبيييج ولــج؟ ياهو وياج؟ عمج او ابنة المسربت؟ بالحسين املص رگبتة إذا محاچيج
162
زُبيــدة: أخذ نفس وصلي على محمد
- من صدك ضاج وهز راسة يسأل بس يريدني احچي
صهيب: گوة ساكتلهم لخاطر أبوية وخاطرجن حتى لا يحچون عليچن بس اذا يزودهـــا احطة جوة نعاااالــي هو وأبوه الناااقص واسحك روسهم
42
زُبيــدة: تطرب على المصايب، محــد محاچيني بــس انـي بچيت وورمن عيوني
صهيب: وليش تبچين؟
زُبيــدة: من الفـراغ العندي وين أروح گلت أبچي وأبيع دموع، تشتري؟
42
صهيب: بيعيهن بالصيدليات مغذي مالــح يعدل الراس
81
- ما ضحكت بوجهة ولا هـو رغم هاي سوالفنـة بالأيام العاديــة نتمدد بالگاع من الضحك عليها، أشرتلة براسي شجابة گــال
صهيب: أمــج خابرتنــي گالت مرلــي گبل لا تروح للشغل، صيحيلها إذا گاعدة
20
- هزيت راسي ومشيتلها دگيت باب الحمام عليها جانت مخلصة سبح وطلعت، شالت صندوگ الخضرة وطلعتلة تگلة
حَفصة: صهيب عمة بس وصلهن للسوك انطيهن لصاحـب غـازي يبيعن ويَّ مالاتة
4
- نزل عيونة للصندوگ ورجع يباوعلها
صهيب: تحچين صدك لو تشاقين؟
23
حَفصة: اني بحال اشاقة؟
- رفع حواجبة يگللها
صهيب: إذا سمع أبوية يحطهن براسي والله، منو طلع جااابهن هذن؟ جيبلي خلّ املص راسة
57
حَفصة: صهيب عمة لا تشلع گلبي
- دفعت الصندوگ لحضنة وهو مدري شبي ما أفتهمتة إلا من گال
صهيب: بالحسين عييييب أحْنـا موجودين وتعتازن شي؟ بالحسيييين عييييب وخزي وما ينلبس عليهااا ثوب هم
79
- شمر الصندوگ من ايدة يطلع تلفونة من جيبة
صهيب: تعااااال بوية حكمت تعااال شوف اختك وبنتهاااا مو بعينهن شواربنّااا
71
- امي تجرجر بي طببتة للبيت تريد تاخذ التلفون منه ما رضى ومن صدك خابر على خالــي يگلة
صهيب: هــا يابة، حاچي اختك انــي ماگدر احچي واجب علــيَّ أحترمها
- سألة شمسوية وهو انفتگ
صهيب: مطلعة البناااويت يجيبن الخضرة وحاطتهن بصندوگ وتعال يا صهيب روح بيعهن تريد تعيش بفلوسهن؟ تعال زين شاربي عليك الله بالعباااس انهضمت
168
حَفصة: يـااا ولك صهيب شبييييك؟ والله ندمتني خابرتك امشي اطلع شووو امشي
17
- دفعتة وهو لازگ بمكانة وانطاها التلفون يگللها اخوج يريد يغرد عليج، اخذتة من ايدة تحچي ويَّ خالــي ومن حچيها عرفت هو ما راضي لأن ما مقصر علينّا ويومية يمرلنّا المسواك بأيدة ويسأل اذا محتاجين شي بعد، بــس أمي تستحي تبقى تاخذ منهم تحس همه كلهم عدهم عوائل ومصرفهم هوايَّ ومسؤوليتهم جبيرة مو مال تكلفهم .
24
- سدت التلفون ورجعتة لصهيب تدردم عليه
حَفصة: امشي من وجهي المفضوح
30
- ضحك يگللها بس هالمرة لأن تعبتن بيهن راح اخذهن لصاحب غازي، على صوتة كعد ربيـع اجة يركض عليه حافــي شالة بحضنة وباس خدة حيل شلعة شلع وربيـع يضحك يگلة
ربيـع: اخذني وياك أصيح ريحاااااناااات للبيع، كرفس ريااااان للبيييييع، نعناع اخضر منشنش للبيــع
181
- ميت ضحك عليه لان كم مرة غازي ياخذة وياه ويسمعهم هيج يصيحون ومتعلم، گالة بصوت ناصي
صهيب: كامل الناقص للبيع
- بدون تفاهم عاط بعلوا صوتة
ربيـع: كامل الناااقــــص للبيـــــــع
151
- خبلوا امي بقت تضرب باطراف اصابعها على حلگها وتصيح بهمس
حَفصة: أششش ولكم أشششش خزيتونّاااا
10
- نزلة من حضنة بالگاع مدري شيشاورة! ركض ربيـع يلبس نعالة ويصيح عبالك سماعة جامع
ربيـع: عدنان اللاگف للبيــــع
121
- خلة امي تملخ بخدودهــا وصهيب يضحك من كل گلبة، صاحت بي جيــداء من المطبخ
جيـداء: عيب ولك ربيـــع
49
- خنس ربيع وامي حلفت عليه ما يعلمة حچاية بعــد، مشى لصهيب لزم أيدة يريد يطلع وهو يباوعلي يحچي بصوت ناصي
صهيب: ما يرضنها على أبن عمهن
- هزيت راسي اي
زُبيــدة: انــي هم ما اراضاها
صهيب: أنچبـي أنتِ
118
- ضربتة امــي على أيدة وفتحتلة الباب تريدة يطلع، صار بوجهم عدنان واكف وعيونة بگصتة مبين سامــع كل الحچي!! غير يتوب صهيب؟ سلم عليه ودنك شال الصندوگ يگله
صهيب: تجي نبيعك؟
135
- خزرة عدنان مادري شلون ساكت لهسه وصهيب يسوي روحـة ما منتبه للحچي
صهيب: نبيعك شنو؟؟ عمي اعذرنّا مسطورين من الصبح، قصدت تجي ويانه نبيع خضرة عمتي حَفصة طگها العوز الظاهر محد مندار عليها
68
- التفت على امي طاك شريان بگصتة من العصبية يحچي كاز على سنونة
عدنان: وتلوميني إذااا أهينة هســة مووووو؟؟؟
81
- امي بقت بين ناريــن، دفعت صهيب من ظهرة وحلفت عليه يمشي مايبقى واكف ويشمر حچي ضحك ومشى .. اندارت على عدنان تسأل عن سبب جيتة؟ وهو يهز براسة بوعيــد عينه ورة صهيب وگاللها
عدنان: جديتي بدريـة تريد تشوف جيـداء و أُميمة على مجالهن خلّ يندارن يمها
88
- مشى بدون لا يسمع جواب، امي سدت الباب وباوعتلي تدردم ميتة قهر
حَفصة: هذااا ابن خالــــج هم متسربت ورايــح ويزعل من عدنان يتعاارك ويااا
- محترگ گلبها منه وطلعت قهرها بيه
زُبيــدة: أبن اخوج متسربت انـــي شلي غرض
32
- مشت للبيت تدردم واني مشيت ساكتة مددت بالهول وكل ما أتذكر برهان تنزل دموعي ميتة قهر، مسحتهن ودرت وجهي على الحايط حتى لا يشوفوني .. جيـداء و أُميمة تريگن وعزلن البيت وكعدن مالهن خلگ يدرسن .. حسيت أُميمة كعدت يم راسي تحاچيني
أُميمة: شبيج اليوم دمعتج ما نشفت؟
زُبيــدة: ماطلعت بالشمس
أُميمة: گومي اطلعي هسه حتى أنتِ تتبخرين من حرورة الشمس مو بس دمعتج
43
- سكتت وهيَّ گامت راحت للغرفة شويَّ ورجعت كعدت يمي تگلي
أُميمة: ادري بيج تردين ترجعين يم خوالـج وكارهة عيشتنّا وهالمصايب بـس شنسوي بعد هذا المكتوبلج، هاج هــذا أتاري لعبي بي لهي روحج
53
- كعدت على حيلي اباوع للأتاري الليّ بأيدها مثل التلفون بس حجمة جبير ومستطيل "لونة رصاصي" من فوك بي شاشة صغيرة ومن جوة بي دكم لونهن أصفر مرتبات تلث دكم صغار فوك سرة أفقي، وعلى يسرتي اربع دكم سوة وعلى اليمنى دكمة وحدة جبيرة ، اكثــر لعبة جنت احبها بي هيَّ المكعبات .
87
- شهگت تباوع بوجهي
أُميمة: أيــعع هاي شصاااير بيج؟
- غميتها ورجعت نمت وهيَّ جرجرتني كعدتني تضحك
أُميمة: اشاقة والله هو صح تخوفين بس بعد خلقة الله، هاج أخذي
- اخذتة من أيدها حطيتة جوة المخدة لما يصيرلي خلگ ومتأملة هالمصايب تخلص ..
28
*
9
- راويــة ..
بس شيخلصها! نطلع من شي نفوت بشي أتعس ..
مثل عادتي كاعدة الصبـح على أمل يكون يوم هادئ!
بس الغريب ولا واحــد رايــح لشغلة!! لا أبوية ولا عمي
هزبـر ولا حَمـد ولا حتى زيـدان! وشبل أصـلًا ماعنده
شي الصبحية .. سألـت أمي شعدهم اليــوم ما مداومين
وعمـي وزيدان وجوهم تضحك، رفعت جتافها ماتدري وگالت
عهود: يريدون يجربون كعدة البيت اذا صار الظهر وما تعاركوا الف الحَمـدُ لله
55
- زيـدان يمشي يدندن بأغنية وشبل صاح عليه
شبل: اصبر اصبر خلّ اجيب جدرية امي ادكلك
33
- ركض للمطبخ جاب جدرية يدك وزيـدان يضحك ويغني
زيـدان: فرط الرمـان خدودة وعيونة الحلوة السودة
وعيونة الحلوة السودة ..
لـو تجمع كل الحلوين!
لو تجمع كل الحلوين
محد يوصل لحدودة محد يوصل لحدودة .
270
- شدها شبل يصيح صياح بضحكة ومودة تركص بين رجليهم
شبل: ودگولة دگة! چوبية .. وغنولة غنــــوة چوبية
32
- واكفة صافنة عليهم هسه شبل خفيف وغاسلين أدينّا منه هـذا زيـدان شبي؟ حسيت على بينات وكفت يمي صدمتها مو أقل مني
بينات: زيـدان سحب خيط من شبل؟
راويـة: اذا ما طلعوا مبدلينة
35
- جر شبل مادري شنو شاورة وشبل خبل رفع أديه لفوك يصيح "الله اكبر" .. تمشى على أبوية وعمي وحَمـد واكفين بالحديقة ورجع رفع أديه يضحك وصاح
شبل: حَـي الله الحكومـــــةةة
111
- حَمـد گالب خلقتة وأبوية دار وجهة بصفحة يستغفر ربة هم ضايج بس عمي هــزبر يضحك وصاح على بينات يريد گلاص مي، صبتلة بگلاص وحطتة بأيدي
بينات: أخذي أنتِ دشداشتي گصيفة ومابيه حيل أبدلها واذا شافني هذا اخوج يخزيني يگول تتمصرنين گدامي
48
- أخذتة منها وطلعت عليهم بس حطيتة بأيد عمي شبل كام يدك على الجدرية حيــل ويغني بعالــي صوتة
شبل: من عداااانـّاا الماااايركص لزيـــودي .. من عدانـّااا المااا يركص لزيــودي
- شدها حيــل وجسمة كله يرعش يهز تخبل
شبل: هزي هزي هزي هزي .. هلا هلا هلا هلا
104
- زيـدان رفع أديه يطگلة اصبع وهذا فصم الجدرية من الدك، وكف اخذ نفس رافـع أيدة ورجع صاح
شبل: ولعيون زيودي!! ولعيون زيـــودي إجيت ألعب لعب
73
- اخذلة جولة بنصنّا كل جسمة يهز وعمي وزيـدان ميتين ضحك عليه حتى أبوية هم ضَحك ، على صوتة طلعت تركض أمي الضحكة تارسة وجهها وهيَّ تگلة
عهود: بعد وحدة بلكت يقتنع زيـدان ويتزوج
25
- فَـح گلبة، اخذ گلاص المي من أيد عمي شرب الباقي بي وشمرة علــيَّ ، رفع أيدة يريد يهوس وانـي مشيت للمطبخ وأسمعة صاح
شبل: اسمعي اسمعي، جنة لعااابة هـاا! جنة لعااابة أبـنج يا ام حَمـد
81
- طبيت للمطبخ لگيت بينات ومودة يهزن على هوساتة وعمتي دلال واكفة تضحك عليهن، حطيت الگلاص على السنك ووكفت أصفگلهن ومودة تصيح عود تسوي نغمة
مودة: ويص ويص ويص
44
- فجأة وكف شبل ووكعت گلوبنّا على صوت عيطة امي رجعت اركض لگيت أبو بكـرة ساحب سلاحة يريد ينوم الطلقة براس شبـل وهو خاتــل ورة عمي
أبـو بكرة: منو هذاااا العااابة هــااا؟؟؟
86
- أندار على زيـدان يريد يگول زيدان! وهذا الثاني دنگ نزع شحاطتة وشالها بأيدة وفنة لگدر ينطق اسمة بعد، أشر على روحة يصيح
شبل: انـي عمي انـــي اللعابة شبيهاااا تجكجك؟؟
55
- جرتة امي تمشي گدامها تريد تطببة للبيت بأمان، وكف على طرف الطارمة يعدل بتيشيرتة وگاللهم بضحكة
شبل: رفعت معنوياتكم وورة ما يلعبها عليكم اهوسلكم "من اسمة يهزهم العراقــي"
117
- زيـدان انگلبت خلقتة وشمر عليه شحاطتة محترگ دمة وعمي غلط عليه ، هو طب يضحك ومشى لغرفتة .. باوعنّا اني وبينات وحدة بوجه الثانية ما مفتهمين شبيهم هسه جانوا يركصون وزيـدان يطگ أصبع عبالك عدهم عرس
بينات: شبيهم؟
راويــة: علمي علمج
بينات: اخوج غريب
راويـة: أنتِ هم غريبة
بينات: بيت غرباء
- رفعت راسها مودة علينّا تسأل ببراءة
مودة: وينة بيت الغربان؟
84
- ضحكنّا وبينات شالتها تبوس بيها تكللها
بينات: بس أنتِ تعرفين اصلنّا شنو
17
- بقيت اباوع لأهلي وعمي واكفين بنص حديقتنّا الجبيرة ومحاوطها الورد من كل الجهات مادري بشنو دا يتناقشون بــس أبو بكرة ضايج حيــل ضايج وعيونة صايرات بگصتة ، وراهـا عمي صــاح علينّا گال
هزبر: الولــد عدهم شغل بالمخزن الورة لحد تروح هنـاك
- جان يقصد بالولد حمايتة الما يمشي بدونهم وواحــد منهم "عـدي" أبن عمتي .
105
- بقى گلبي يلعب منهم خصوصًا ورة حچاية شبل الهم، صعدت للطابق الثانــي باوعت على المخزن ماكو أحــد يمة!! أستغربت ليش جذب علينّا عمي! بقيت طول الصبحية انــي بالي يفكر بالسالفة لحــد ما صار الظهر وتغدينّا، شبل طلع لشغلة، عمي وأبوية كلمن طب لغرفتة ينامون شويَّ، زيـدان هم بغرفتة بقى بس حَمـد كاعــد بالصالة لما فرغت كلها وهو صافن! بقيت كاعدة بغرفتي وفاتحة الباب عيوني عليه تلفت بالصالة ما شاف احــد وگام على حيلة مشى بخطوات بطيئة للمطبخ، گمت مديت راسي من باب الغرفة اباوع وراه واكف يم الثلاجة مـد أيدة بتردد فتحها طلع منها بطل مـاي وسدها بهدوء، مشى طالع من باب المطبخ وبـس ردها ما طبگها حتى لا تطلع صوت .
140
- مشيت وراه على روس أصابعي حتى لا يحس علــيَّ وبقت عيوني وراه لما شفتة أندار على المخزن، وكف يم الباب مدنك راسة وبقى هيج فوك الخمس دقايق احسة خايف من الليّ ورة هالباب! رفــع أيدة اليسرى على حبل نازل من اعلى الباب سحبة وصار صوت طكة مثل طكة القفل، ويَّ سحبت الباب صار گدامي رجـال مربطينة على كرسي قديم، شهگت فاتحة عيني على وسعها من صدمتي هـذا "برهـان"!!
112
- فات أبو بكرة وسد الباب وراه! وانــي ركضت الفضول موتني وبنفس الوكت خايفة!! وكفت ورة الباب مخلية عيني بالفتحة الليّ بقت ، مربطين أديه ورة ظهرة بـس رجليه لا، فاتحهن وراخلي راسة لورة عينة على الباب من فات حَمـد أبتسم
برهـان: هـلا بالصاحب الزيــن، هلا بالماتلوك الرتبة إلا على متنة
170
- ما رد عليه، تقرب مد أيدة سحب الحبل الرابطين بي أديه حيل فتحهن وشمر بطل المي بحضنة، فتحة برهان شرب منه ونزلة بالگاع، أنحنى مخلي عكوس أديه على ركبة يباوع لأبو بكرة الليّ كعد على الكرسي الكدامة وجهة ما يكصة السيف! عكس برهان ليباوعلة بلهفة، بعيونة نظرات واحد ميت من الحنين! دنگ راسة جار حسرة طويلة ورفعة يسأله
برهان: ردتني أجيكم وهذا انـي گدامك، شتريد؟
79
- طلع باكيت الجگاير من جيبة سحب منه جگارة ورثها وأخذ منها نفس واحـد وخلالها تحترك وحـدها
أبو بكرة: شنو الخلاك تجي على عمى عيونك؟ يمكن خدعتك حتى توكع بين أدين عمي
32
برهان: لو تريد جان سويتها من زمان، صارلهم سنين يركضون ورايَّ ما لزموني وأنتَ تدري لو خبر واحد واصلني منك تلگاني گدامك عسى ما موتي وراها
116
- دار وجهة أبو بكرة يباوع للجگارة شلون تحترك شويَّ شويَّ مثله محترگ ومحد حاس عليه! شمرها يم رجلة داسها حيل
أبو بكرة: شسمها هاي اختك ام حواجب؟
برهان: زُبيــدة
141
- هز راسة اي
أبو بكرة: أي هيَّ هاي
برهان: شبيها؟
أبو بكرة: أجت على أبوية وعمي تتوسلهم يعوفون اهلها وساوموها على راسك، علمودها جبتك وخليتك بين أديهم حتى لا تنجبر هيَّ بيوم وتغدرك
160
- عگد حاجبة برهان بصدمة
أبو بكرة: اني وأنتَ وهذاك العار ثالثنّا جان عدنّا مبدأ كلشي نسوي بحياتنّا بس ما ندخل نسوان بمشاكلنّا من هالباب ما ردتها هيَّ التجيبك الهم، أفتهمت مـو؟
65
- ويَّ ما طفر برهان من مكانة واكف على حيلة فزيت ورجعت لورة بخوف، ويَّ وكفتة وكف أبو بكرة بوجهة وسحب سلاحة من حزامة حطة برگبة برهان يريدة يرجع لمكانه بــس اهتزتلة شعرة من سلاحة دفعة من صدرة يريد يطلع وجت بي نــار
برهـان: يســـــاومهااااا مـــووووو؟ إذا مااا گطعت ونينة هالـ**** عمـــــك
52
- لزمة من ملابسة أبو بكرة ونفضة بقوة يصيح بوجهة يريدة يسكت وهذاك تخبل ضربة گلة صارت بنص وجهة شوغت روحة ودفعة عنه حيل
برهان: أهـــد البييييت على روسكم مخاااانيث، مو أخت برهاااان اليساااومونهااا
162
- نفض راسة أبو بكرة وسحبة من رگبتة بكل حيلة شمرة على الكرسي وصار يلف عليه الحبل وبرهان يلبط بين أدين حَمـد گام ما يشوف گدامة بس يريد يطلع من هالمخزن على هالغضب لو يلزم عمي هزبر يشلع حنجرتة من مكانها ويخلي اخرس لباقي عمرة .
24
- گوة ابو بكرة سيطر عليه وجتفة هالمَـرة حتى رجلية ربطهن حتى لا يگدر يگوم .. دار وجهة على أبو بكرة عيونة يريدن يطلعن من مكانهن وصاح بي يرعد
برهان: جبتني هنــاااا حتى تسمعني هالحچــي موووو؟؟؟
- كعد أبو بكرة گدامة حيلة مهدود
أبو بكرة: أنچب
43
برهان: خاااايـــس علمك عمــــك على خيستةةةةة مـــوووو
24
أبو بكرة: گتلك أنچب
69
- سديت أذنــي بصدمة من صار يفشر فشار ما ينلبس عليه ثوب على أبو بكرة وعلى عمي هزبر وعلى زيـدان، يمة ضعت بهدومي من الفشلة بحياتي ما سامعة هيـج فشار!! خلة ابو بكرة يشيط وصاح بي محترگ گلبة
أبو بكرة: سد حلكك عــااااد كااافـــي برهااااان
برهان: اتفل على شااااربك المخليك انگس منهم
62
- هجم عليه أبو بكرة لزمة من خوانيگة گطع نفسة يصيح بوجهة
أبو بكرة: مااا نسيت بعدني مااا نسيت جنت بيوم صاااحبي وعرضك عرضي، ما ارضاهااا على أختي وماااا رضيتها على اختك يااا عـــاااار
68
- كل هالصياح واني عيني على برهان وجهة صار أزرگ مگطوع نفسة ورخت مقاومتة وبقت عيونة مفتوحة مات!! سديت حلگي بثنين أدية فاتحة عيني على وسعها ومن الخوف تيبست بمكاني، كتلة؟؟ دفعة وكعة بالگاع جثة هو والكرسي المربوطة عليه!! رجفت رجلية وتيبس الدم بعروگي عيني على عيونة اريدة يرمش اريدة يشهگ النفس بس ماكو اي حركة! لزمت الباب رجلية ميتة وباد حيلي، دفرة برجلة يحچي بهدوء يمكن من صدمتة يگلة
أبـو بكرة: اكعد من شوكت العار يموت بهالسهولة
144
- احس غيمة سودة غطت على عيوني وبگلبي اصرخ دخيلك ياااعلي! دخيلك يااا قالع باب خيبر!! دنگ ابو بكرة شال البطل البقى وين ما حطة برهان فتحة ودار المي على راس برهان! شهگ هذاك ينفض براسة! لزمة من الحبل سحبة كعدة عدل ورجـع كعد گدامة، لزمت بالباب وكعدت بعد مابيه حيل اوكف من الهبطة! حلگي يبس ولو يذبحوني هسه قطرة دم ما يلگون بيه! بقيت اسمع بس سوالفهم
أبـو بكرة: انـي سويت الليّ علــيَّ وبقت منك لعمي شلون تريد تدبرها وياهم دبرها
43
- من حسيت على أبو بكرة گام زحفت بحركة سريعة وبدون لا اطلع صوت صرت بعكسة المخزن حتى لا يشوفني من يطلع لأن ما الحگ انهزم، صاح عليه برهان يسألة
برهان: وأنتَ ما تريد تعرف السبب؟
- صار هدوء توقعت كلنّا نريد نعرف سبب موت الشاهين بس صدمني أبو بكرة من گالة
أبو بكرة: ماريد اعرف سبب، الأريدة كونك ما تلفي بهاي الديرة وهاهيَّ
برهان: ليش؟
أبو بكرة: اذا ضليت گدام عيني راح يجي اليوم الليّ تگول بي الناس مثل ما الشاهين مات على أيد صاحبة "دارت الدنيا" ومات برهان هم على أيـد صاحبة
80
- سكت برهان وابو بكرة طلع من يمة سحب الباب بعصبية رگعها رگع، بقيت مخلية أيدي على حلگي گاطعة على النفس، غمضت عيوني بقوة وادعي يارب كون ما يشوفني حَمـد، ما فتحتهن إلا من صوت خطواتة صارت بعيدة علــيَّ، ذبيت نفس براحة وگمت من الگاع أنفض بدشداشتي من التراب وركضت للبيت بدون لا أباوع ورايَّ .
27
- ردت افوت لغرفتي وتذكرت بينات هسه كاعدة درت وجهي ومشيت للحمام طبيت وقفلت الباب، كعدت بالكاع مخلية أيدي على گلبي اليتردام ورة ضلوعي احسة راح ينفجر من الصدمة والخوف والتوتر! مدا أستوعب الدايصير "برهان تعاقب قانونيًا وانسجن وتعاقب عشائريًا وتدير من الديرة" وهسه جايبينة وحابسينة يمنّا بس حتى يحچي والله اليعلم شراح يسون بي بعــد! تذكرت حــال زُبيــدة من طلعت من يمنّا مفرفحة روحـها طلعوا مساومينها على راس أخوها!! يمةةة الله يعيييين گلبج يا زُبيــدة .
58
- گمت غسلت وجهي وطلعت وبقيت طول اليوم عبالك وحدة مضروبة على راسها بـس أتصفن وكل ما تجي عيني بعين زيـدان لو عمي هزبر أدنگ ماريدهم يشوفون نظرات الاشمئزاز منهم! واحــد عرض جتافة بعرض الحايط، أسمة وصيتة سابقة وكل الدنيا تعرفهم تالــي يستقوّن على بنية لا حــول ولا قوة يستغلون ضعفها حتى يحصلون راس أخوها؟؟! مسحت گصتي محترگ گلبي وهمست ويَّ روحـــي
راويــة: عمت عيــن الشوااارب أي والله
83
- ندستني بينات تسأل بنفس النبرة
بينات: شگلتي؟
راويـة: مو وياج
بينات: شبيج تحچين ويَّ روحج لعد؟
راويـة: دا أستغفر ربي لو ما يصير؟؟
- باوعتلي صفح ودارت وجهها
بينات: ما تستغفرين لازمة لسانج انــي
21
- سكتت عنها وطول اليوم انــي بالي بسالفة برهان وأهلة وأشوف عمــي وزيـدان يروحون ويرجعون لذيج الغرفة وكل ما يطلعون منها عبارة عن بركان مفجور، مادري شجاي يحچيلهم ويخليهم يوصلون هاي المرحلة من الغضب .. جنت خايفة من وجودة يمنّا لأن راح تصيــر مصايب بعدين تذكرت هو ما بقاله احد كل اهله بالسجن !
29
- زفرت نفــس وغمضت عيوني منهلكة بسبب التفكير ما لحگت أغفــى وفزيت على صــوت هوسـة برا بعدني ما أستوعبت شدايصير وصــار صوت السلاح يهلهل فــوك بيتنّا، صرخت ضامة راســي بين أديّة وبينات فزت تصرخ خايفة وصوت بنات عمي هزبر الصغار من غرفتهن يعيطن، الولــد صياااح وهوسة كوموا الدنيـا وكعدوها وامي كعدت بالصالة تدك وتلطم على أبو بكرة وشبل شلون طلعوا يتراكضون بنص هالهوسة والرمـي
40
- صوت صياحهم يجيب التايه وأبو بكرة يصيح على حماية عمي هزبر بخبال طلعوا همه الدايضربون، عمي هزبر مشى للأسقبال فتح الباب مالتة يريد يطلع عليهم ووكف صافن على الباب!! تراكضنّا كلنّا نريد نعرف شدايصير؟؟ وكفت بمكاني مرعوبة "ورقة نابتيها بسجينة أم الياي على باب الاستقبال الخشب" !!
91
- سحبها بقوة ولزم الورقة بأيدة الثانية وانگلب كل حالة من قراها!! طلع عليهم يرعد رعيدة متخبل عقل ماا باقي براسة
هزبـر: منــــوووو الگــــدر يــــدوووووس بيـــتيييي؟؟؟!
89
- الطارمة جانت عبارة عــن بطالة گزاز مليانة بانزين مرمية علينّا ومتفلشة! بدون نــار!! الولد الليّ بحماية عمي ووياهم عدي طلعوا يتراكضون مداير البيت يريدون يلزمون الليّ سوة هيج! زيــدان ثنى ركبة كاعد يم البطالة المتكسرة مضيگ عيونة عليهن وأبوية وعمي فوك راسة واكفين، باوعلهم وگال
زيـدان: ملتوڤ بدون نـار! هــذا تهديد وتحذير هالمرة ما شعلهن المرة الجاية الله اليعلم
213
- وكف على حيلة يباوع مدايرة وصــاح على الولد
زيـدان: لگيتوا شي بعــد؟
- محد لاگي شي وعمي جعص الورقة بأيدة وبأيدة الثانية شاد قبضتة على السجينة حيــل، رفعهن گدام عينه اخذ الورقة بساع فتحها وقراها بصوت
زيـدان: وياكم الحكومة ، ويانّا عزرائيــل !!
285
- شهگت بخوف وامي وعماتي لطمن علــى صدرهن مرعوبات!! ما عرفوا ياهو السوة هيــج فص ملح وذاب .. ركض زيدان للمطبخ أخذ نايلون حط بي السچين يتأمل يلگى عليها بصمات ، طب أبــو بكرة من باب الحوش يمشي بخطوات سريعة عينة التشع غضب على دربة وبأيدة سلاحة وبوجهة راح للمخزن! وكلهم مشوا وراه هسه يلا تذكروا برهان!! ما گدرت ألزم روحي وركضت وراهم متأكدة ومتيقنة ما راح نلگاه!! بــس من فتحوا الباب وفاتوا كلهم جان على كعدتة! ما متحرك بــس وجهة مليان كدمات مبين مضروب وماكو غير زيـدان الليّ ضربة
63
- تقرب عليه شايط ضربة على عينة وكعة بالگاع هو والكرسي ورجـع عتة كعدة على حيلة فاتح الورقة بوجهة يصيح متخبل
زيـدان: أنتَ منــو وتلعب وياااانــاا؟؟ راسك الحاطة براسنّاااا اسحگة بالقندرةة برهـــــااان
82
- أبتسم برهان ودار عينة على عمي يگلة
برهان: انـي يمك وأهلي بالسجن وهم تردون تذبون بلاكم علينّا؟! زحمة شوفلك غيرنّا
55
- راد يضربة زيـدان بــس أبو بكرة ما خلاه دفعة لورة ووكف گدامة منحني مخلي وجهة بوجه برهان يحچي كاز على سنونة
أبـو بكرة: وزبيـر ما يسويها؟
24
برهان: مايدري اني يمكم، ولو يدري جان طب بنصكم حرگ البيت بيكم مو بس يهدد
96
- تقرب عليه عمي دفع أبو بكرة من جتفة بخفة وخرة من گدامة، عينة بعين برهان يسألة
هزبـر: اول ليلة أنتَ يمنّا وصارت ليلة گشرة، صدفة؟
23
برهان: اجي وياك ونگول مو صدفة، الهد عليكم من طرفي وخلاكم راس براس ليش ما طلعني؟
61
- بقوا كلهم صافنين عليه راح يتخبلون حتى اني قنعني! دار وجهة عمي يريد يطلع وصاح عليه يگلة
برهان: شوف غريمك المستغل عداوتنّا ياهو، أظن مو صعبة عليك ...
69
- ماكمل حچايتة وضربة زيــدان على وجهة نفضة نفض وأبو بكرة صاح بي بخبال ما راضي يضربونة، وعمي تخبل ليش ما يرضى!! وتعاركوا بيناتهم صاروا دماية گوة أبوية فازعهم وعمي يصيح على أبو بكرة ووجهة صار احمر دم من العصبية راح ينجلط
هزبـر: ولك تبَدِي صااااحبـــــك على دم أبـــن عمــك؟؟؟
43
- تخبل صار مايعرف شسوي وشيحچي ، درت وجهي على برهان عينة على أبو بكرة ومبتسم احسة فرحان وهو يحس صاحبة بعده صاحبة القديم!
85
- فزيت من نلزمت من ذراعي وهمس شبل يم أذني بعصبية
شبل: أششش ما اسمعلج صوت
41
- سحلني للبيت دفعني على باب المطبخ طببني عيونة تخزر بيه
شبل: شفتي شي؟
- هزيت راسي لا
شبل: شكو بالمخزن؟
- بلعت ريگي امتمت
راويـة: ماكو أحـد
43
- ابتسم ومسح على راسي
شبل: سباعية، سويلنّا أستكان چاي خلّ نسهر على هالمسرحية
78
- طلع وعافني واني ركضت ختلت بظهر امي الكاعدة بالصالة هيَّ وعمتي دلال وتقوى والبنات وما على لسانهن غير الصار كلهن مرعوبات ، گلبي يرجف بخوف مدا اتخيل أهلي هيج يسون ويستقون على واحـد! حتى لو جان عدوهم هم مدا تطب براسي، بقيت أفكر منو الممكن يسوي هيج علمود برهان اذا هو يگول محد يدري بي هنـا! مادري ليش أجت على بالي زُبيــدة معقولة هيَّ؟ ضربت راسي ادردم على روحي بگلبي "بعد لا تفكرين راويــة خمو طرزان هيَّ" .
70
- ما غفتلهم عين بهذيج الليلة لا همه ولا أحْنـا بقت گلوبنّا تتراجف من الرعب الليّ عشناه! للصبح وهمه كاعدين وزادوا الحماية مداير البيت من برا وبس .. الصبح بدلوا يردون يطلعون لدواماتهم اني واكفة بالمطبخ طلع عمي ووراه زيـدان ، اجت امي تركض بأيدها تلفون زيـدان ناسي حطتة بأيدي تكلي ركض انطيهيا، ركضت وراهم بعدهم ما وصلوا باب الحـوش وأسمع عمي يگلة
هزبر: هذا الحيوان اكطع عنه الاكل والشرب
18
راويـة: زيـدان
- صحت عليه مادة ايدي الليّ بيها التلفون، اندار علــيَّ ومد أيدة سحبة مني، باوع لعمي يهز راسة خوش
زيـدان: راح أنسي حتى حليب أمـة
82
- طلعوا وانــي بقيت واكفة بمكاني الف فكرة براسي! راح يحچيلهم السبب ويخلص روحة لو راح يبقى هيج ساكت ويلعب بأعصابهم! حسيت راسي راح ينفجر من التفكير وگلبي مفطور على زُبيــدة وأمها واخواتها من جهة ابوهن واخوتهم بالسجن ومن جهة برهان بين أدين عمي، شراح يصير بحالهن إذا عرفن !!
36
*
4
- رُبـــى ..
عصرت راسي حيــل التفكير يأذي اني ويني ووين التفكير ولاااا بمنو؟؟ بواحد غريب شفتة كم مرة وسمعت صوتة سطعش مرة كاعدة أفكر بي بس لأن صارلة يومين ماكو! غميت نفسي وگمت ألهي روحي حتى ما ابقى أفكر بي گلت خلّ اسوي كيكة واروح لبيت عمتي مريم وهناك راح أعرف أخبارة وليش مختفي .
151
- فرشت فراش بالحديقة وطلعت كل الأشياء الليّ أحتاجها احب اكعد هناك واخلص شغلاتي ، كعدت اخبط بمواد الكيكة وعقلي يخبط أفكار من يمة ، عطت بروحــي ضايجة
رُبـى: كاافــي رُبى كافـــي
20
- تحمحمت اجاوب نفسي بصوت لطيف
رُبـى: لا تصيحين علــيَّ لو سمحتي
98
- ارد اعيط بروحي متنرفزة
رُبـى: أحترمي نفسج ولا تبقين تفكرين بهذا الما مخليلة لحمة
69
- عفست ملامحي عود ضجت
رُبـى: مو احسة خطية مطرود ووحيد وشكلة حزين
30
- نترت بشخصيتي الفاهية
رُبـى: شبيها كافلة اليتيم والفقير؟ بعد ضخيلة حنان بمكان حنان أمة
84
- درت وجهي بزعل صرت اطرگ بالعجينة بحركة سريعة ضايجة والخاشوكة تضرب بأطراف المعجانة الستيل وصوتها عالــي
رُبـى: روحــي من يمي أنتِ مو لطيفة وما ينحچي وياج عديمة المشاعر
40
- عفت روحــي بعد ما حچيت وياها لما كملت وخليت الكيكة بالفرن، لملمت الأغراض غسلتهن وعزلتهن ومشيت توضيت لأن بعد شويَّ ويأذن .. كعدت يم الفرن لما أستوت الكيكة طلعتها حطيتها على الطباخ ورحت أصلي لمـا تبــرد شويَّ ، كملت صلاتــي ومتعلمة بنهاية كل صــلاة أدعي بنفس الدعاء
رُبـى: يارب أنتَ الخالق الحافظ احفظلي عمي محمد وأبعد عنه كل شر، ربي لا تفجع گلبي بي واجعل يومي قبل يومة انـي مـو گد فراگة.
47
- نزلت أدية وإجة على بالــي هذاك الغريب ورجعت رفعتهن امتمت ومستحية حتى من نفسي اني وادعيلة
رُبـى: ربي والله مستحية منك بس رحمتك واسعة وأحْنـا كلنّا عبدك، احفظ هذاك الغريب لأهلة خطية
167
- گمت بساع عبالك منهزمة من شي لميت المصلاية خليتها بمكانها ورجعت للمطبــخ شلت الكيكة خليها بالثلاجة على ما تبرد كلش يلا أطلعها من القالب، حضرت نمنمات الغدة أنتظر عمي يرجــع ونتغدة سوة بس هالمرة تأخر ومو من عوايدة! بقيت أفتر يم الباب وأدية وحدة تمرد بالثانية بتوتر وخوف، عدت أول ساعة وماكو وثاني ساعة وماكو!
43
- كعدت على طرف الصبة أيدي على خدي وعيني على الباب، فزيت من أندگت ركضت بساع فتحتها واني متلهفة على رجعة عمي
رُبـى: وينك لهسه ياعمي والله وكع گلبـ...
- بلعت باقي الكلمات ويَّ بَلعَت ريگي بتوتر من شفتة رجـال غريب عمرة نهاية الـ30 تقريبًا .
27
- صرت ورة الباب ضامة روحي من عيونة وهو سلم وسأل
::- محمد هنــا؟
رُبـى: لا والله ماكو، اذا إجة منو اگلة؟
::- أبـو عطية
64
- أول مرة أسمع هالأسم! والأعرفة عن عمي ماعنده أصحاب هوايَّ بس اثنين ووياه بالشغل يحچيلي عنهم بس ما يجون علينّا إلا يخابرونة! رجعت للبيت لبست شالي وصعدت على الطابوكات الليّ جوة الحايط اليفصل بين بيتنّا وبيت عمتي مريم، صحت على رزان الف مرة يلا طلعتلي تركض وترف بشالها على راسها شعرها من گدام طالع ومن ورة طالع وصدرها طالع تركض مخبوصة
رزان: أنطي مجــااال احط شالي على راسي شصااايـــر وركضتيني هالركض
25
رُبـى: غير صوتي راح واني أصيح عليج
- غمتني تدردم
رزان: صوت المرأة عورة وهلگد صيحتي لو مو عورة تصيحين علــيَّ بسماعة الجامع
53
- تأفأفت ضايجة، صعدت على درج بيتهم القديم من طين صارت بمستواية تسأل
رزان: يمكن حسدتج البارحة گلت كل حلو مهموم إلا رُبـى
17
رُبـى: راح أضربج على عينج أطفيها
6
- جرت وجهي باستني
رزان: اعتذر بالعباس، وهسه گليلي شبيج؟
رُبـى: أبـوج هنـا؟ عفية خلّ يخابر عمي محمد لهسه مارجع
9
- هزت راسها أي ونزلت تركض راحت للبيت تنطي خبـر، بقيت واكفة أنتظرها دقيقتين تقريباً وسمعت باب الحوش مالتنّا أنفتحت انداريت بساع وردت روحي ويَّ طَبت عمي للبيت! لزمت الحايط ونزلت عن الطابوگات بساع وأسمع رزان تصيح
رزان: عمج يگول بالبيت دوري خاف مسوي بيج مقلب وخاتــل
49
- ضحك عمي من سمعها واني ركضتلة وكفت گدامة وجهي ليمونة من الخوف
رُبـى: ياااعمــي والله متت خوف وينك لهسه
14
- حط ايدة على جتافي حاضني يتعذر وگال
محمد: صارتلي شغلة ما تتأجل وما گدرت أرجــع
42
- طبينّا للبيت سوة وهو شغل المبردة و رد طلع يرش الليف مالتها، مداير المبردة كله زرع وزارع متسلق هم صاعد على الشباك ومغطي نص المبردة هواهـا كلش بارد ..
24
- صبيت الغدة وهو بدل وغسل وإجة شال الصينية حطها بالهول كعدنّا نتغدة وهو يحچيلي على يومة لما كملنّا شلت الصينية رجعتها بالمطبخ وصبيتلة چـاي أخذتة اله وكعدت يمة متذكرة الرجــال الليّ إجة علينّا
رُبـى: صدك عمي إجـة رجال سأل عليك
- الخاشوگة بأيدة حطها بالأستكان يخوط وسأل
محمد: يا رجـال؟
رُبـى: گــال أسمة أبو عطية
16
- راحت أبتسامتة وبقت عينة على أستكان الچاي بدون لا يخوطة! شال راسة باوعلي
محمد: وشگال بعد؟
رُبـى: ما گال بس سأل عليك گتلة ماكو اذا رجع منو أگلة؟ گال ابو عطية
21
- نزل الأستكان من أيدة ووجهة أنگلب ينتر بيه بعصبية
محمد: وشلون تفتحين الباب من اني ماكو؟ شمحذرج انــي رُبـى؟؟؟
- دنگت راسي گلبي يدگ حيل متوترة
رُبـى: والله عبالي أنتَ لو أدري بي غريب ما فتحتلة
22
- زعـل وصار يحچي ما راضي مدري من فتحة الباب مدري من طاري ابو عطية! بقيت ساكتة ما حچيت شي لما تعب من الحچي وراح نام واني بقيت كاعدة مقهورة، بالليل كعد وبعده زعـلان وثاني يوم الصبح گعد بدل ومشى لشغلة حتى ما تريگ .. رجـع الظهر مادري شبي وضعة مو طبيعي أحسة مثل الواكع بمصيبة وشايل هموم الدنيا كلها على ظهره!! طبيت للمطبخ أصب الغدة صاح ورايَّ يگلي مايريد .. عفت كلشي من أيدي ومشيت كعدت يم راسة هو متمدد گدام المبردة ومخلي أيدة على عيونة، دنگت اباوع لأدية متوترة ومستحية شلون احچي وياه
رُبـى: عمي محمد والله ما تنعاد
- وخر أيدة يباوعلي
محمد: شني الماتنعاد؟
رُبـى: أفتح الباب لأحــد، بس والله جنت خايفة لان أنتَ تأخرت وعبالي رجعت وركضتلك فتحتلك الباب
28
- كعد على حيلة يمسح على راسي
محمد: ما زعـلان منج بس تعبان هالايام عندي شغل هوايَّ
15
- باس گصتي ورجع مدد يگلي
محمد: مو تردين تروحين لبستان أبو كاظم؟ حچيت وياه اليوم گال البستان بستانها شوكت ماتريد تروحلة وهم گال اليوم العصر فارغ اذا تردين تروحين أخـذي وياج عمتج مريم لو وحدة من بناتها
30
- من فرحتي جريت أيدة بستاها حيـــل الضحكة ترست وجهي وملت گلبي، غمض عيونة يضحك واني ركضت اصيح على رزان أتوسلها تروح ويايَّ وهيَّ تتذكر
رزان: ولج امي ماااترضى
رُبـى: اني اجيبلها كيكة واجيها وترضى ما عليج بس تحضري
19
- هزت راسها خـوش وراحت واني نزلت تغديت وحدي وبقيت احوس اريد العصر يجي، لبست دشداشتي الحمرة بيها ورد ناعم وبصدرها فوك القماش تور أبيض ونهاية الردن الكلوش هم تور .. عندي منها قطعة مثلثة هم مطعمة بـ تور تلبس بالراس، خليتها على جهة ولبست شالـي وعبايتي وأخذت سلتي مالت الخوص ومخلية بيها وشاحي المثلث گلت هناك ألبسة ..
90
- كعدت عمــي انطي خبر راح أروح اشرلي براسة روحي، ورجع غمض بقيت كاعدة صافنة بوجهة حايرة شلون أصارحة! من حَس علــيَّ بعدني كاعدة فتح عيونة يسأل
محمد: هـا أروح وياج؟
- هزيت راسي لا
رُبـى: اريد تلفونك حتى أخذ صور
- ضَحك وسحبة من جوة المخدة انطانياه .
33
- اخذتة وطلعت من باب بيتنّا جان گدامنـّا ساگية صغيرة ويَّ الحايط الطين الليّ مسيج البستان وعلى طول فرعنّا ممتدة الساگية ميها جاري من النهر ، دگيت باب بيت عمتي مريم وطلعتلي رزان مبدلة وعبايتها براسها .. حطيت الكيكة بأيدها راحت ركض ودتها لأمها ورجعتلي الضحكة التارسة وجهها
رزان: جبت علاليگ انـي اليوم احصد نص البستان
18
- ضحكّنا ومشينّا لباب البستان صاير بعد مرتين او تلاثة عن باب بيت عمتي مريم، دفعنّا الباب جانت من خشب وما تطبگ بس يشدونها بسيم هالمرة عايفينها علمودنّا، اول ما طبينّا تراكضنّا أثنينّا لنص البستان على شجر التفاح والمشمش واكو كم شجرة تين هم، نزعت عباتي حطيتها بالشجرة هيَّ والشال ولبست الوشاح المثلث براسي وبقيت شعري مفتوح ضامنة محد يشوفني، أنطيت التلفون لـ رزان وگتلها
رُبـى: صوريني صور حلوة
- أخذتة مني واني اسوي روحي أگطع تفاح ومشمش واحط بسلتي وهيَّ مصورتني صور تجنن
91
- وراهـا احترمت روحـي لبست حجابي وعبايتي وبقينّا نفتر بي، كعدت على طرف الساگية اغسل تفاح واكل و رزان بعدها تجمع بعلاگتها
رُبـى: اكلج سؤال
- صاحت اسألي واني اكل عود ما متهمة بس هيَّ مجرد سؤال عابر
رُبـى: شو هذا أبن خالتـج ماكو؟
21
رزان: زعل وهج من يمنّا
11
رُبـى: ليش زعل؟ هم ما خليتولة لحمة؟
32
- ضِحكت وشمرت علــيَّ تفاحة
رزان: لا زعل لان منطينة بطانية خشنة وبشرتة الرقيقة متتحملها
75
رُبـى: الچذب عندج وراثة لو صفة مكتسبة؟
38
- شمرت علــيَّ تفاحة أكبر وكعت براسي فشختني، اجت كعدت يمي لازگة جتفها بجتفي تحچي بصوت ناصي
رزان: ليش ما تاخذينة وتسترين عليه، اخذي كعيدي يمكم أحْنـا نقبل
104
رُبـى: خاف مهرة غالــي منين أجيبلة
39
رزان: لا يمعودة بس حطي حلقة بأيدة واخذي وامي تخيطلة قاط العرس وها أهـاا
69
- متت ضحك بس تخيلت الداتحچي، ميلت روحــي غاطسة أيدي بالمي وفرگت التفاحة زين
رُبـى: راضوا خلّ يرجع وأفكر بالموضوع
13
رزان: هو يومية يهج من يمنّا يومين تلاثة ويرجع محد يتحملة غيرنّا
17
- سكتت ما لحيت بطاري بـس أطلع جذابة اذا اگول گطعت التفكير بي! رجعنّا للبيت المغرب لگيت عمي طالع .. كل ما شخصيتي العنيفة تگلي كافي تفگرين بي الفطيرة تگلي مو خطية، عاطت بيه العنيفة زهگانة
رُبـى: هــوَّ شنووو خطية؟؟ اذا فكرتي بي يعني يصير مو خطية
37
- ردت عليها الفطيرة أم گلب الحنين
رُبـى: اي حتى لا يحس روحة منسي من كل العالم
46
- غمتني شخصيتي العنيفة بس عقلي الفارغ الماعندة سالفة بقى يفكر بي عبالك ما صدك لگالة شي يلزگ بي!
36
*
5
- زُبيــدة ..
بس هو على بالي ضل!
شصاير بي هسه؟ بيت شبلي شسووا بي؟ إذا أذوه شلون؟ وليش ما رضى أحچي؟ واذا حچيت شيصير؟ كاعدة على عتبة الباب وصرت أضرب براسي بثنين أدية اريدة يبطل تفكير، انضربت على أيــدي رفعت راسي لگيتها جيـداء عاگدة حاجبها مستغربة
جيـداء: شبيج أنتِ خبلة؟
35
- هزيت راسي لا ورجعت دنگت ساكتة، تمر الساعات مثــل السم وصارت هوسة بيت شبلي وگعت گلبي! كلنّا واكفين بالحـوش وهوسة العالم برا أنگلبت الدنياا .. ما طبينّا إلا من أجانّا عدنان طمنّا ماكو شي بس هذولة حماية هزبر شايفين حرامـي ودا يضربون عليه!! كعدت بعتبة الباب روحــي رايحة من الخوف وهمست بحرگة
زُبيــدة: كون يصيبكم حكة وجرب وأصابع مكسرة يارب
86
- مَـر ثاني يوم بالشافعات، للعصر شفت جيـداء وأُميمة يلبسن سألتهن وين يردن؟ گالت
أُميمة: نشوف جديتي بدرية
- طلعت غسلت وجهي ورجعت اخذت شال غير الليّ لابستة وگتلهن
زُبيــدة: انــي هم أروح اشوفها
- صاحت امي ما راضية
حَفصة: لا تروحين زُبيــدة
- ميلت روحي على جهة الباب عيوني تسأل گبل لساني
زُبيــدة: ليش؟
حَفصة: عمج ما يسكت وأنتِ ما تسكتين بس تروحين تتعاركون
43
- نزعت الشال ضايجة لطختة بالگاع ومشيت دفنت روحي بفراشي سحبت البطانية علــيَّ حتى راسي غطيتة بهالحر، گالتلها أُميمة
أُميمة: أحْنـا هم ما نروح لعد
34
حَفصة: روحن شوفن جدتجن وتعالــن لا تسونها سالفة، زُبيــدة ما تتوالم هيَّ وعمجن كامل
22
- جيــــداء ..
عفناها وطلعنّا ما خلتها تجي ويانه لأن تدري بس يتعاركون عمي راح يضرب زُبيــدة وماكو اليفزعلها! رحنالهم من الباب الصغيرة طلعتلنّا أميرة تهلي بينّا وطببتنا كلهم كاعدين يم جديتي سلمنّا وكعدنّا وكامل يخوزر بينّا! جديتي بدرية سألت على زُبيــدة وهو من يمة يحچي
كامل: حضرتها تستنكف تجي لبيتنّا
41
- حچت مرتة تلوي بحلگها
نبيهة: مو گد المقام عيوني، ما تحچي غير ويَّ بيت الحكومة
57
- التفت عليها عدنان يسألها بهدوء
عدنان: هـو هذا حچي يمة؟
8
- عاطت بي عبالج جانت متحملة وهالحچاية ضامتها بگلبها منتظرة الفرصة حتى تحچيها
نبيهة: گرة عينج ياااا نبيهة بعدة ابنج ما اخذ منهن گام يفزعلهن
45
كامل: حيوااان ما تستحي ترد امك؟
22
- گام على حيلة يستغفر ربة وطلع، ما رديت عليهم ادري بيهم يدورون حچة حتى يتعاركون، گمت بست جديتي وجريت أُميمة ويايَّ ترخصت منهم حتى أرجع لبيتنّا
نبيهة: تعالـن عليها يومية التسبحها والتسويلها لگمة، اميرة تحير وين تصد وجهها
41
- هزيت راسي خوش، و أُميمة ردتها تگللها
أُميمة: اذا ماعدكم مجــال إلها رجعوها يمنّا أحْنـا نحطها بعيونـّا
17
- شو جدتي ما صدگت گبل حطت أديها بالگاع تعين روحها وگامت تگلة
بدرية: أي والله يمة ردنـي هناك اني متعلمة على فريشي
76
- تخبل عمي كامل صار يصيح ما راضي ويگللها ماتحبين غير بيت أسماعيل وأحْنـا مو ولدج وبيش مقصرين وياج؟ وشسوينالج؟ خطية حتى هيَّ انصدمت بي ورادت بس تسكتة رجعت كعدت تگلة هاهيَّ ماروح، ونبيهة تخوط بصف الأستكان ، طلعنّا وهيَّ تصيح ورانّا
نبيهة: جايات يشعلن فتنة ويروحن لا يردن يشوفن عمتي ولا ميتات عليها مرتاااحات منهااا
40
- طلعنّا بساع ماردينّا عليها لگينّا عدنان كاعد بالحوش من شافنّا گام طلع ويانة يريد يوصلنّا و أُميمة فايرة من حچي امة من وصلنّا باب بيتنّا دفعتة حيل وأندارت عليه تگلة
أُميمة: همه هذولة اهلك التريد تعيش جيـداء يمهم؟ بس يطلع خَطاب من السجن راح احچيلة كل كلمة سمعناها من امك وابوك حتى خاف يلعب الشيطان براسة وينطيگياها
70
- بقى خازرهــا وهيَّ مشت وعافتة محترگة أكثر من عنده، تشكرت منه وطبيت صاح علــيَّ يريد يحاچيني صاح بيه غادي نار
عدنان: أنتِ الاخرى شبيييج؟؟؟
- زفرت نفس أصبر روحــي
جيـداء: مابيه شي اني وماعندي شي احچي، السالفة كلها يم أهلي أقنعهم ويفض كلشي
25
- فرك وجهة بعصبية ولزم الباب ما خلاني أسدها يحاول يحجي بهدوء هو هم واكع بين نارين وحاير شيسوي
عدنان: لگيت حـل مؤقت يمكن يرضي أهلج بس يطلعون راح احاجيهم
جيداء: وشنو هو؟
عدنان: نتزوج ونكعد يم عمتي أم غايب فترة لما الله يفرجها علــيَّ واگدر ابنيلج بيت
47
- عگدت حاجبي ما داخل براسي الموضوع
جيـداء: ومن يگول عمتي أم غايب ترضى؟
عدنان: من حچيتلها سبب رفض خَطاب هيَّ الأقترحت نكعد يمها وگالت تحاجي اهلج ويايَّ بس يطلعون .
20
- هزيت راسي خـوش وبقيت مدنگة، سحب الباب بهداوة وگال
عـدنان: أصبري علــيَّ هالفترة ماريد أضيعج من أيــدي جيـداء
33
- بقيت ساكتة لمــا گال
عدنان: أضحكي خلّ يحلى يومي
15
- أبتسمت غصب عني وضميت وجهي ورة الباب، ضحك مرتاح
عدنان: يابة من انعل ابو الظروف المخليتج لهسه يم اهلج ومو بغرفتي
92
- من الخجل دفعت الباب حيل طبگها وهو صاح شايغة روحة رجعت فتحتها بساع گلبي وگع ببطني لگيت روحي طابگة الباب على أصابعة أثنين، انعصر وجهة عصر من الوجع وهو ينفض بأيدة ومشى لبيت أهلة يگلي
عدنان: ما تقصرين والله كل ما اجيج ارجع لبيتنّا معوق
82
جيـداء: بس خلّ اشوفهن عدنان
- صحت وراه بخوف، التفت علــيَّ ابتسم وغمزلي يحچي بهمس
عدنان: ارجع تشوفيهن وتبوسيهن حتى يطيبن؟
60
- خزرتة وطبيت راگعة الباب حيل شكد مستهتر هالولد، سندت ظهري على الباب وضحكت مثل المخبلة مدري شبيه .. مشيت للبيت لگيت أُميمة كاعدة يم امي تقصلها الصار، من وكفت يمهن رفعت راسها خازرتنـي
حَفصة: ممنوع تحچين وياه بعد أفتهمتي؟؟؟
- همست بفشلة
جيـداء: ما حاچية
14
حَفصة: وشجنتي تسوين يم الباب؟ تصبغينة؟ مو تحچين وياه
21
جيـداء: مو هو سألني عليج وعلى ربيع وعلى زُبيــدة مو غير شي
10
حَفصة: شوكت ما تصيرين على ذمتة اشبعي حچي واسألة، هسه ما ارضاها جيـداء واذا سمعوا اخوتج والله تحلمين ينطوج اله بعد
17
- هزيت راسي وسكتت حقها بكلشي تحچي اني هالفترة طوختها وصرت مو خوش أدمية، طبيت للبيت علگت عبايتي بظهر الباب وصحت على زُبيــدة ما ردت علــيَّ ، طول النهار هيَّ بفراشها حتى المغرب إجة صهيب وخالها ما كعدت ولا طلعت عليهم .
25
*
6
- زُبيــدة ..
صار الفجر يلا كعدت
توضيت وصليت صلاة الصبح وشكد دعيت بس كون
الله يبرد گلبي وأعرف أخبار برهان ..
17
- كملت صلاتي ولفيت شالي على وجهي تلثمت وطلعت للبستان، رديت الباب ومشيت خطوتين أتجاه التُكية بعدني ما وصلتها فزيت واكف گلبي من الجفلة "غَضنفر نزل منها" إجة ناحيتي بســاع مأشرلي أرجع وهمس
غَضنفر: أرجعــي للبيت
58
- بقيت واكفة بمكاني مستغربة
زُبيــدة: أنتَ شعليك بيه؟ الگاع گاعنّا والبستان بستان أهلي
12
غَضنفر: مو وكت طلعتج هسه أرجعي وتعالي الصبح
24
- اسألة شكو ما يجاوبني بس لازگ ارجعي وارجعي نرفزني، عفنة ومشيت أتجاه الشجرة ما متهمتلة، شهگت بصدمة من لزمني من طرف شالي عتني عليه يريد يرجعني ضربت أيدة بگُفى ايدي وصحت بي
زُبيــدة: وخــر أييييدك شبييييك؟؟؟؟
25
- داير وجهة ما يباوعلي ويحچي بعصبية
غَضنفر: عايني لا عباااالج انــه اعقل من اخوانج وولد عمج بس الشافعلج انـه غريب عنج، أرجعي وبدون مشاكل
84
زُبيــدة: ما تهز شعرة مني وأمشي أطلع من گاعنّا يلااااا
13
- هز راسة خـوش وتمشى مسافة عني مطلع تلفونة خلاه على أذنة وأسمعة يگول
غَضنفر: هـاا زبيـر كعدتك؟ بالله ما تجي على التكية اريد اشوفك شغلة
42
- فتحت عيني على وسعها دا يهددني!! ضربت رجلي بالگاع بقهر ودرت وجهي راجعة للبيت وصحت بي
زُبيــدة: بسييييطة يالفتاااان
57
- ما أندار علــيَّ ولا جاوبني، رجعت للبيت ميتة قهر هو منووو هذا ويهددني وحگ راس الحسين ما افوتلهياااا هينة يالغريب هينة هم لفية وهم عينة گوية .
44
- رجعت شمرت روحــي بفراشي محترگة حرگ منه، مادري شلون وضربت جيـداء فزت رافعة راسها علــيَّ تجر بالحچاية
جيـداء: شبيج تزاگطين مو ورمتي صفحتي
43
*
6
- جيـداء ..
ما ردت علــيَّ مدري شبيها، حاولت أرجــع أنام بعد ما گدرت گمت صليت وبقيت كاعدة لما طلع الصبح كعدت امي والبنات تريكنّا ونظفنّا وعزلنّا، الظهر امي واكفة بالمطبخ تطبخ غداها متأخر واني وربيع بالهول نلعب بالأتاري مالت أُميمة، سمعنّا صوت حكمت بالباب يصيح علينّا
حكمت: وينكم يااا أهـــل البيت
23
- ربيـع طلع يركض يفتحلة الباب وامي من باب المطبخ صاحت تهلي بي، گامت زُبيــدة حطت شالها على راسها وطلعت عليه وأسمع ربيع عااط
ربيـع: بااابـةةة
50
- فزيت واكفة على حيلي وركضت للحوش و أُميمة طلعت تركض، حكمت واكف بنص الحوش يم زُبيــدة وصاروا يفوتون من الباب واحد ورة الثاني، أبوية وخَطاب وغـازي يعرج، معن وعـادل وكلهم صايرة لحيتهم عالية .. بچيت بفرح وامي واكفة بباب المطبخ تبچي وتهلهل من فرحتها .. ركضنّا عليهم نحير ياهو نحضن وياهو نبوس وأبوية خانگتة العبرة يبوس بينّا وحدة وحدة
أسماعيل: هـلا ببنياتي هـلا بشمعات بيتي
97
- إلا زُبيــدة واكفة يم خالها، صاح عليها غـازي بضحكة فاتحلها أديه باوعتلها وجهها صار كركم! تباوع بوجوهم واحد واحد الدموع تارسة عيونها، دارت راسها تريد تباوع لخـالها ما لحگت وشَهگت مرعوبة من وكعت بين أدين حكمت عيونها مبيضة ..!!
- يتبــــع ..
