رواية كف الطاغية الفصل السابع 7 بقلم سارة الحسن
- إلا زُبيــدة واكفة يم خالها،
صاح عليها غـازي بضحكة فاتحلها أديه
باوعتلها وجهها صار كركم!
تباوع بوجوهم واحد واحد الدموع تارسة عيونها،
دارت راسها تريد تباوع لخـالها ما لحگت
وشَهگت مرعوبة من وكعت بين أدين حكمت
عيونها مبيضة ..!!
تلاگفها خَطاب من بين أدين خالها وكعد بيها بالگاع
مخليها بحضنة يضرب على خدها بخفة أيدة، لون وجهة
مخطوف من خوفه عليها! تراكضنّا كلنّا عليها ميتن خوف وحكمت
يصيح جيبو مـي وابوي يصيح خلّ ناخذ للمستشفى،
من شافوا عيونها شلون هيج انگلبت وما طالع منها غير
البياض امي تخبلت صارت تلطم وتملخ بروحــها
حَفصة: زُبيــدة زُبيـــــــدة يمةةةة حاچيني
- رفعت راسها على اخوها وأبوية عاطت بيهم مفرفحة
حَفصة: بنتي رااااح تمــــوووووت
93
- دفع ايدها خَطاب وسحب زُبيــدة يحاچيها بنبرة ترجف
خَطاب: زُبيــدة أخَيتي تسمعيني؟
144
- من صدمتنّا بقينّا بس واكفات ونبچي ماندري شنسوي منظرها يخوف، شكد أُميمة تتخربط بس ولا مرة صارت حالتها مثل زُبيــدة! غازي أجة يركض ناسي حتى وجـع رجلة دفعهم عنها بأيدة گلاص مي ويصيح متخبل
غـازي: خنگتوهاااا وخروااا
75
- غسل وجهها وهيَّ روحها رايحة جثة بين أديهم، غمضت عيونها بحركة بطيئة لو تخبلوا اهلي عليها .. رجعنّا لورة اني و أُميمة نلملم بروحنّا من أندفعت الباب وطب صهيب يركض من شافها هيج عَت خَطاب من جتفة يريد يگومة يصيح عليه
صهيب: شوكت تتحــــرك رحمةةةة لاهلك من تمووووت
133
- حسيت خَطاب حيلة أنهد بألف يا علي يلا شالها وطلعوا يركضون بيها لسيارة خالها، كلهم طلعوا يتراكضون وراها حتى امي و أُميمة رجعت ركض للبيت جابتلها عبايتها ولحگتها للسيارة أنطتهيا، السيارة ما كفت غير خَطاب وامي و زُبيــدة كاعدين ورة وخالها گدام وصهيب يسوق، أباوع لأبوية واكف بالباب أديه على راسة وشفايفة يبست صارت بلون بشرتة، غـازي عافنّا وطلع يركض للشارع العام يريد مناك ياخذ سيارة ويلحگهم .
- بقوا معن وعادل واكفين يم أبوية وربيـع واكف يم الحايط يدير بعيونة خايف، صاحتلة أُميمة كعدتة يمها بعتبة باب المطبخ وهو يحاچيها شفايفة ترجف
ربيـع: ماتت زُبيــدة؟
- هزت راسها لا تحچي والعبرة خانگتها بس ماتريد تخوفة
أُميمة: لا حَبيبي اسم الله عليها، بس دايلعبون غميضة هسه ندورهم اني وياك
84
- ميل راسة حطة بحضنها وسكت، سمعت صوت عمي كامل وعدنان بالباب يحچون ويَّ أبوية عود عمي فرحان بطلعتهم بس خطية أبوية ما على لسانة غير زُبيــدة وراد من عدنان يجيب سيارتهم ويجي حتى يروح وراهم، عمي كامل ما عجبة الحچي وأسمعة يشمر
كامـل: كلشي مابيها بناويت هالوكت يتعايرن من الدلال، فوت اسبح نام اكل لگمة ارتاح هو اخوها يجيبها
122
- سكت أبوية لما عدنان جاب السيارة صعد هو وياه ولحگوهم وعمي بقى يدردم ما عاجبة شلون عافة ومشى، كعدت يم أُميمة الخوف ماكل گلبي باوعتلي بعيون تارسها الدمع
أُميمة: ليش هيج صار بيها؟
- رفعت جتافــي مادري امسح بدموعي
جيـداء: مادري هالأيام مدري شبيها لو نايمة لو تبچي
أُميمة: خاف راحت لأم عفريت؟
35
- احسها ضربتني على راسي! هيَّ طلعت بذاك اليوم التخربطت بي جديتي بدرية بس مارضت تحچي وين راحت! بقيت اكل بأظافري خاف صدك راحت؟ يمكن خافت اهلي يعرفون وتخربطت؟ لو هيَّ سوتلها شي وبعد زُبيــدة ما ترجع زُبيــدة القديمة؟! لزمت راسي متخبلة من التفكير وبگلبي أدعي يارب كون ما مسويتها صدك .
33
- مرت الساعة والساعتين وهمه ماكو، معن وعادل كل شويَّ يخابرون عليهم ما يردون دكت الساعة الأربعــة العصر يــلا رجعوا فاتت هيَّ وامي وغـازي وياها لازمها من أيدها وهيَّ تجر بيها، رجع جرها يلزمها تباوعلة بملامح مذبلها التعب وصوتها مبحوح رادت تحچي بتأتأة
زُبيــدة: عـ عـ.. عوفـ..
- بلعت ريگها ولزمت حنجرتها من فوك الحجاب
زُبيــدة: عوفـ .. عوفنــي غـازي أكـ.. أكـ .. أكـدر امشي
69
- كلنّا صفنّا عليها ليش هيج تحچي بتأتأة؟ وتعصر وجهها عصر يلا تگدر تحچي الحچاية!! بقت عينها بعين غازي الميت قهر بچت تأشر على حنجرتها ترجف
زُبيــدة: مـ.. مـاا مـااداتطلع الحچاية
85
- غـازي مصدوم حرف ما نطق بس عيونة حچت شكد هو خايف عليها، سحبها خَطاب من بين أمي وغـازي مشاها وياه للبيت مخلي أيدة على جتفها يگللها
خَطاب: لأن مابيج حيــل تحچين هسه، هاي اني مرة تخربطت شكد بقيت يمكن اسبوع ماگـدر احچي، تنامين وترتاحيــن ومن تكعدين صاير بيج كل الحيل وتتعاركين ويَّ غـازي لا تخافين
70
- وصلها للهول دارها عليه مسح على جتافها منا ومنا وأشرلها بعيونة
خَطاب: وضحت؟
24
- هزت راسها أي ساكتة، مسح دموعها واندار على أُميمة هيَّ بساع ركضتلها جرتها وياها للغرفة وباستها من خدها تگللها
أُميمة: على گولة جديتي ام لسان غلابة النسوان أنتِ كلشي مايصير للسانج
46
- اباوع بوجوه أهلي كلها باهتة وواحد يسأل بالثانـي شبيها؟ امي حالها ما يتفسر وخَطاب يهدي بالكل ويحاول يقنعهم مابيها شي واذا تأتأت غير جانت بحالة صعبة! وهو أكثر واحــد خايف .
29
- خالها واكف يم باب الحوش وجهة ما يگصة السيف، مدنگ ومخلي أديه ورة ظهرة .. أبوية أشرلة يفوت هز راسة ما راضي يحچي بحدة ضايج
حكمت: أرتاحـــوا نجيكم غير وكت
- دار وجهة يريد يطلع صاحت وراه أمي
حَفصة: أبو صهيب خوية
- التفت عليها عيونة بگصتة
حكمت: بعد ساعتين للمغربية رفعي راسج لربج وأدعي مابيها شي حتى لا أهـــد البيت على روسكم لو مو أهلها
278
- طلع ورگـــع الباب وراه حيل، ما يعتبرها غيــر بنتة وگوة متحمل رجعتها يمنّا لخاطــر ما تصير مشاكل بين أهلي وبيت عمي وهمة يقرون براسة على رجعتها! أسمع صوتة برا يحچي ويَّ صهيب وتصايحوا بيناتهم صهيب مـادري شبي يرعد عبالك مزنة سودة! طلع عليه خَطاب يخزر بي واسمعة يگله
صهيب: سويلي درب اريد احاچيهاااا
70
- ما رضى خَطاب يريد يفهمة هيَّ هسه تعبانة وهذاك دفر الباب حيل راد يكومها بگاعها وتخبل خَطاب منه، طلعوا الولد وأبوية يفازعون بيناتهم وحكمت جرجر صهيب يريد يصعدة للسيارة يصيح عليه ما راضي على تصرفاتة، انفتحت الباب على عرضها واباوعلة اندار يريد يصعد يهز راسة بوعيد ويخوزر بـ خَطاب المتخبل وكل ولدنّا لازمينة يلا مسيطرين عليه
صهيب: راسي من راسكم واكثررر، مثل ماهيَّ اختكم أختي هم ربت وكبرت يمي وتمون علــيَّ أكثــر من ماااا تمون على شكولكم الزفرة
191
- صاح بي حكمت ذرة صبر ما باقية عندة
حكمت: أصعد صـــــهيييب
10
صهيب: جاي من تالــي تعلمني شلون اتعاااامل وياها تعبانة وخلّ تنام وتطرد بيه؟؟ اهد البيت على روسكم واخذها من چداااام عينكم وارجعها للبيت الربت بي وأطيـــح حظ اليوكف بوجهي من ربيع وهيَّ صاعدة
117
- دفعة ابوه كوة صعدة بالسيارة وخَطاب شاااغت روحة بس يريد الولد يعوفونة يدفع بيهم يجرجر بروحة ويصيح
خَطاب: وخــــر عنـي وخــــر خلّ افلش سنونة بحلگة هالناااقــص
47
- رد صهيب طلع راسة من السيارة يريد يحجي دفعة أبوه بأيدة مطببة وحلف عليه ما يفك حلكة، رجـع على خَطاب يصيح عليه رافع أيدة بوجهة
حكمت: ما أستحيتوااا من شاربكم؟ الجهال ما تسوي سوايتكم هاي خزيتونّا گدام خلق الله على شنــووو ولكم؟؟
28
- نفض روحة حيــل ووكف عينة على صهيب يخـزر بـي، دنگ يعتذر من خالة وگالة
خَطاب: حكك على راسي بس هذا ابنك اذا شفتة واصل عتبة بيتنّا اكسر رجلة
22
حكمت: اليطرد أبني بحسبة طاردني ولك خَطاب! وسفة عليك والله وسفة
40
- دار وجهة وصعد بالسيارة زعـلان، وأبوية گوم الدنيا وگعدها على راس خَطاب شلون هيج يحچي ويَّ خالة، خَطاب يگلة اني دا افهمة تعبانة خلها تنام هسه وحاچيها بعدين وهذاك عاند إلا هسه عبالة شو شبيها من گالت الحچاية مدا تطلع مني، وصياح وهوسة ابوية راد ينجلط حتى حيل ماضل بي من الصبح شربة مي ما مخلي بحلگة، كل هالهوسة و زُبيــدة مددة بفراشها صافنة بالفرااغ فاصلة عن عالمنّا! وما فضت هالهوسة إلا من أبوية طرد خَطاب من البيت وحلف عليه ما يطب الا يراضي خالة حكمت .
74
- مدد بالهول نفسة مگطوع، هالطول والضخامة كلها وهدوا حيلة بسوالفهم! امي كعدت يمة ساكتة تخاف تحجي ويرجع يصيح ويصيرلة شي .. معن وعادل ورة مافضت الهوسة طبوا المطبخ يدورون اكل ويمهم ربيع، كعدوا مادري شياكلون وأسمعهم يتهامسون بيناتهم
عـادل: هسه من نگول خلّ ترجع يم خالي عبالهم نكرهة وما نريدها بس الحگ ينگال هيَّ ربت وكبرت هناك حتى مبين عليها ما مرتاحة يمنّا
معـن: عمـك كامــل ما يرضى يگول شنو مديحين بناتنا
- جاوبة بنرفزة
عادل: وهو شنو عمي نعال وواحد يمشي بحچايتة؟
114
- رفع ايدة معن الليّ بيها لفة دحسها بحلگ عادل يگلة
معـن: هو لان نعال وناقص سواها شغل عناد وهدد ابوك اذا ما رجعها يروح يعقدلها على عايد ويحطها ببيتة
100
عادل: وأحْنـا غنم يسوگون بينّا لا نهب ولا ندب
37
معـن: حقنًا للدماء يا اخي شبيك
26
- نزل اللفة من ايدة عـادل ضايج
عادل: وتفتر تفتر السالفة ونلگاها من ورة مصيبة عمتك الناهبة
37
- معـن ياكل ما مهتم
معن: عمتك ليش عمتي؟
عـادل: هم صدك أنتَ لاگينك على المزبلة وربيناك
71
معن: شسوي لقسمتي، هاي امي الأجنبية ما تحملت العيشة هنا شمرتني وهجت
95
عـادل: مبين ابن اجنبية من عيونك الزرگ جنهن مرايا
44
- ضَحك معن وبقوا طول ما همة ياكلون يسولفون، واحدهم لحيتة مضيعة ملامح وجهة وحولوا الحچي وصاروا يحششون على روحهم
معن: الحـلاق من يشوفنة اليوم يرگصلنّا چـوبي بسبحة أبوه الحچي
45
عـادل: جتف وللگاع الچوبي ما يكفي فرحتة
11
- أبتسمت وردت عيني على أهلي، غـازي كاعد گدام المبردة وعينة على الغرفة يباوع لـ زُبيــدة بقهر ، درت وجهــي عليها مغمضة عيونها يمكن غفت، گام غازي أخذ هدوم وطب يسبح وأبوية صاح على أُميمة تجيبلة عباية أمي يحب يتغطى بيها من ينام، غطتة وكعدت يمة تلگة
أُميمة: بابـة لفني وياك
112
- مددت يمة نامت على أيدة وهو شمر طرف العباية يغطيها وياه، عفتهم وطبيت مددت يم زُبيــدة ومادري شلون غفيت ما حسيت إلا على صوت آذان المغرب وربيـع يم راسي يجر بشعري ويغني مدري منين سامعها
ربيـع: جيداء ام شعرات الحلوات، ربيع يدور لفات
140
- جريت شعري من أيدة ورفعت راسي أباوع الولد كلهم نايمين بالهول ويمهم امي، زُبيــدة يمي هم بعدها نايمة بس أبوية و أُميمة ماكو! گمت ويَّ ربيـع للمطبخ لگيتهم هناك، اداريت عليه متخوصرتلة
جيـداء: ما تكعد تاكل وياهم ليش هلست شعري؟
11
ربيع: ماريد من اكلهم اريد لفة بيتنجان وطماطة وخضرة
41
- خلاني اسويلة وبعدني واكفة اگلّي والولد واحد ورة الثاني كنوب واحد يكعد ويجي يگلي جيداء اني هم اريد واكعد اكشر بيتنجانتين فوك الداسويهن لما انحمست حمس بالمطبخ ويدورون وياهن چاي وواحد يدور زلاطة وخضرة مثل ربيـع ردت اخبز ربيع على هالدگة .
54
- اخذت هدومي وطفرت للحمام بعد ما اتحمل الحر، من طلعت جانت زُبيــدة هستوها كاعدة باوعت لأخوتي مبتسمة وتقربت على غازي حضنتة هو وكاعد
زُبيــدة: والله البيت ما ينجرع بدونكم
- حضنها بتك ايد يضحك
غازي: تمنيتج ويانة بالسجن فد ونسة
87
- وخرت وضربتة راشدي خلتة صافن
زُبيــدة: متونس مرتاح وأحْنـا هنا گلوبنّا محترگة
56
- جر أيدها ونتفها بعضة خلاها تگمز وتعيط وتضرب بي على وجهة، شوغ روحـها ودفعها عنه يضحك
غـازي: هاي الونسة الصدك
13
زُبيــدة: ما تصيرلك جااارة وحگ راس الحسين اني صوجي متت قهر عليك من انسجنت لو تفطس بعد هم مـا أنقهر عليك
55
- گامت من يمة كعدت يم ابوية حضنتة وهو يضحك يبوس براسها من شافها تحچي طبيعي، اندارت على معن وزحفت ليمة حضنتة
زُبيــدة: أنتَ هم مو خوش أدمي بس والله أشتاقيتلك
- ضحك حيل ودفع راسها لازمة من حنچها حيل باسها من خدودها من الجهتين
معن: الخايسة والله مكانج خالي بيناتنا بعد ولا اضوجج
66
- عيبت على حچية واندارت على عادل حضنتة
زُبيــدة: أنتَ مثل تكك مابيه اعيد الحچي
40
- مد ايدة يطبط على ظهرها وبأيدة الثانية حط اللفة بحلگة يگللها
عـادل: ولا رحتي من بالي وابو الحسنين
- ضحكوا كلهم وأحْنـا صافنين ما مفتهمين السالفة شنو؟ باوعت بوجوهم مضيگة عيونها
زُبيــدة: ليش؟
عـادل: اكو ابو بريص بغرفتنّا كل ما اشوفة تجين على بالي سبحان الخالق حباية ومفشوگة منج
107
- دارت وجهها على أبوية بزعل وهمه انبطحوا بالگاع من الضحك حتى أبوية ضل يضحك ويگللها
أسماعيل: شسويلهم بوية والله من اول يوم فتنّا هو يشوفة يگول عبالك صورة زُبيــدة معلگة بالحايط صرنّا كلنّا نتذكرج بشوفتة
150
- وكفت على حيلها زعلانة وتدردم عليهم
زُبيــدة: صوجي اني خلصتها أبچي عليكم وانتو هناك مسويني ابو بريص والله فلا تستحون
24
- باوعت لأبوية ترگعها
زُبيــدة: طبعـًا حشاك بابة أنتَ ما مشمول بهذا الحچي
26
- وكفت بباب الهول عينها على الحوش تسأل على خَطاب؟ گالولها مطرود رجعت كعدت يم غـازي
زُبيــدة: خابرة شوفة وين راح
غـازي: يم عمتي أم غايب قبل شوية أُميمة عبرتلهم ماعون بيتنجان
37
- هزت راسها خوش وأنطت خبر لامي راح تروحلة، وكفت بالباب تلبس نعالها وصاح عليها معن يسأل
معن: اكلج شلون صرتي؟ ليش بيضت عيونج من شفتينّا؟
9
زُبيــدة: جنت مرتاحة منكم من شفتكم رجع الهَم والغَم على گلبي وتخربطت
69
*
3
- زُبيــدة ..
اكبر جذابة بالدنيا بس مو مال واحد ينطيهم وجه،
شمر ورايَّ خاشوكة وكعت بالباب ..
وكفت يم الحايط احس رجفة بگلبي مدا تهدأ والخوف
ماكلني اكل على برهان! مسحت وجهي حيل اخفي دموعي
ماريد ابچي گدامهم وبنفس الوكت حايـرة شسوي؟
حتى حيل ما ضل عندي خايفة اسكت ويطلع برهان
صايبة شي وخاف احچي ويطلع مابي شي ويزعل!
شمرني بنار ما تنجرع حرگتني حرگ ما خلت
على حالــي حــال! بــس الليّ أعرفــة
ثمـن حرية أهلــي دفعــة برهـان !
37
- زفرت نفس بتعب وعبرت الحايط على بيت عمتي أم غايب، جان باب الهول مفتوح وخَطاب كاعد وحدة من شافني گام على حيلة بساع .. دك گلبي بخوف منه وبقيت واكفة بمكاني عيني عليه رجعتلي التأتأة من خفت اريد احچي وياه الحچي گوة يطلع
زُبيــدة: أجيت أشـ أشـ أشوفك
36
- تقرب علــيَّ مد ايدة محاوطني ومسح على ظهري، نزل راسة باسني من خشمي وباوعلي مبتسم
خَطاب: شلون صرتي؟
- هزيت راسي اريد اكول زينة ماطلعت ويايَّ غير أول حرف ، بلعت ريگي بصعوبة اريد اكملها متت قهر ليش هيج صرت! مشاني وياه يضيع الموضوع وگال
خَطاب: طلعت مصايبج رحمة على السجن
42
- أبتسمت وكعدت يمة بقى يحچي ويايَّ بهدوء لما هدأت انفاسي وأنتظمن دگات گلبي، من حسيت بأمـان گدرت احچي طبيعي ردت أعاتبة على عركتة ويَّ صهيب وزعـل خالـي بس خفت يعصب ويطبگني وياهم، من حَس علــيَّ بلساني حچي ضيگ عيونة يسأل
خَطاب: مسوية مصيبة؟
- هزيت راسي لا بساع
زُبيــدة: لا لا بعــد التوبـة
خَطاب: شعجب؟
زُبيــدة: أخــاف منكم تذبحونــي
35
- لميت شفايفي ودنگت الدموع تلمع بعيني، رجف گلبي بخوف من گال
خَطاب: جان ذبحتج على طيور طارق الصدتيهن لربيـع
106
- رفعت راسي فاتحة عيني على وسعها، بقى يباوعلي وساكت رجعت دنگت حتى چذبات خلصت شچذب عليه بعد وأرگعها، جر نفس بحسرة تهد الحيل وگال
خَطاب: ليش تحسبين دمج رخيص وينهدر برمشة عين؟ أنتِ أخيتنّا زُبيــدة، وكت الغلط أطيح حظج بس ما توصل أذبحج غير أفــداج بروحي اني
154
- تحرك كعد يمي مخلي أيدة على جتفي، رفعت راسي أباوعلة فرحانة بكلامة أبتسم لأبتسامتي ورجع يخزرني يحذرني
خَطاب: بـس إذا توصلين أم عفريت صدك أذبحج وأشمر لحمج للچلاب حتى گبر ما خليلج
42
- ضحكت ونزلت راسي امسح بعيوني، طبطب على جتفي ووخر من يمي يگلي
خَطاب: روحي يم البنيات
زُبيــدة: لعد عمتي أم غايب وين؟
خَطاب: اندارت على جديتي بدرية
زُبيــدة: تحب عمي كامل لو اغلط عليه؟
- ضحك يهز براسة يستغفر
خَطاب: كومي ام وجه الفاهــي ولا تحشرين روحج بسوالف الكبار
39
- عفتة ورجعت لبيتنّا ضايعة بالحسبات! أسمع امي تسأل بأبوية شلون طلعوا؟ يگللها حققوا ويانه وعرفوا أحْنـا مالنّا علاقة .. رجعت تسألة على برهان تگله هالأيام ماكو لا خابر ولا مَـر علينّا ومخابرة خالتـي مريم گايلتلها ماكو يمنة، بقت امي عايشة بقلق وأبوية والولد لأن متعلمين عليه يگطع بيهم هيج ما خايفين ويگللها
أسماعيل: ما تحسينه إلا وفجرية واكفلج بالباب
27
- مددت بفراشي روحي داتلوب من القهر والسؤال النعاد براسي ألف مرة شسوي؟ مابيدي شي بس الأعرفة ماكدر اسكت بعد! انتظرت الكل ينام وطلعت من البيت بسكتة الشافعلي وما يحسون علــى طكطكتي الخفيفة صوت المبردات، طلعت من الباب الصغيرة وخليتها مفتوحة شويَّ وكفت يمها عيني على بيت شبلي محروگ گلبي منهم، تفلت عليهم بحرگة ادردم
زُبيــدة: الله ينتقم منكم ويعيشكم الداعيشة بسببكم
39
- مشيت لبيت زبيـر ماعندي غيره، هذا دربي المشيت بي شكثر ايام وحافظتة حتى لو مشيت مغمضة شهالضياع الداحس بي هسه! صوت خطواتي بظلمة الليل يخوف ويتخايلي خطوات ورايَّ .. من اوكف يروح الصوت وبس صوت وحيف الشجر الخفيف مسموع! ألتفت اباوع ورايَّ عيوني مغوشة من الدموع مسحتهن حيل بطرف عبايتي وكملت مشي، لما صرت گدام باب بيتة! ترددت ادك بابة متذكرة شلون يصيح ويغلط علــيَّ واذا رحتلة هسه راح ينعاد نفس الليّ يصير كل مرة! نزلت عيوني على الگبر الليّ يم الباب وشهگت أبچي روحــي متگطعة هيج تاليتي ويصير حالــي مثل حــال زبيـر!
43
- رجف جسمي جفلانة على صوت الغريب من ندهني باسمي بصوت ناصي
غَضنفر: زُبيــدة !
59
- ألتفت عليه أمسح بدموعي وهو ما يباوعلي وحتى بالليل لابس شفقتة ما يذبها من راسة، سألني مستغرب
غَضنفر: بيج شي؟
- درت عيني على الباب، ورم بلعومي من الغصة الواكفة بي وهمست مختنگة
زُبيــدة: ماريد اروحلة
17
- رفعت أيدي الحاضنة بيها اطراف عبايتي ضميت وجهــي وبچيت متگطعة روحــي بين أهلي وناسي وديرتي ضايعة، شهگت اخر نفس وزاد رجيف گلبي من سمعتة گــال
غَضنفر: تعاليـــلي
219
- رفعت راسي عليه ومادري شجاني ورجعت خطوة لورة مبتعدة عنه، ضرب رگبتة من الجانب بخفة مكمل حچية بدون لا يرفع عينة
غَضنفر: بهالرگبة الج دين العمر كله، اعتبرني أبن عمج، اخوج، غريب، عمي اعتبريني كلهم شتردين انــه حاضر
114
- أنطيتة ظهري اريد امشي خايفة حتى منه، بس وكفت مندارة عليه من گال
غَضنفر: طالــع من ظهر زمزير وتربات شروگية لا يردج بنخوتي إلا لسانج
153
* زمزير يعني الزلمة المعدل والكلف
47
- ضربت براسي حچاية برهان وهو يگلي "حتى بظلج لا تأمنين وكت الظلمة ما تلگينة" منو الغريب وأأمن بي إذا بناسي مدا اكدر أأمن؟ هزيت راسي بـ لا ماريد ومشيت راجعة للبيت، كعدت ورة الباب الصغيرة مخلية أيدي على حلگي اضم بشهگاتي الگطعت صدري المن أروح هسه؟ وبرهان شصار بي وشنو حالــة؟
65
*
5
- راويـــة ..
مادري شنو حالــة صارلة يومين تقريبًا بدون اكل وشرب! حتى أبو بكرة ماكو لا يحن گلبة على صاحبة القديم ويخلصة منهم! بقيت افتر بالمطبخ اروح وارجع افكر أروحلة على الأقل أنطي مي، عمي أبوية زيدان كلهم بالدوام، شبل بعد ساعة ويطلع أستغليت هالفترة ورة طلعة شبل وقبل رجعة البقية وجبت گرصة خبز طلعت نتفة لحم من المرگة الطابختها أمي خليتها بالخبزة ولفيتها، أخذت وياها گلاص مي وطلعت اتلفت خايفة لما وصلت المخزن!
102
- سحبت الباب اباوعلة على نفس مكانة مربط على الكرسي مرجع راسة لورة ومغمض عيونة وجهة مليان كدمات! التفتت بخوف اباوع ورايَّ خاف احد شافني وتقربت امشي عليه رجلية يرجفن مترددة، وصلت يمة واحس گلبي انخمش من ما حس علــيَّ عبالي بي شي، صحت عليه بصوت ناصي اريد يحس
راويـة: برهااان
47
- ما رد علــيَّ ولا تحرك، درت مي بأيدي ورشيت على وجهة فـز بساع وفتح عيونة بتعب من شافني عدل راسة ودنگ يحچي قبل لا يفتهم سبب جيتي
برهان: روحــي منا لا يشوفونج ولد عمج
- رجعت خطوة لورة اصححلة
راويـة: اني اخت حَمد
32
- دار وجهة يحچي ويَّ روحة بس سمعتة من گال
برهان: بعد انگس
80
راوية: باوع اني اخاف على أخوتي اذا متت أنتَ عمي هزبر يلبسها بروسهم ويبتلون بموتك، فَـ جبتلك لفة اكلها حتى تبقى عايش
53
- اندار يباوع للفة الليّ بأيدي، واني رفعتها اله صارت يم وجهة شال راسة باوعلي ورجع يباوعلها
برهان: بيش ألزمها بحلگي؟
77
- من الخوف والتوتر نسيت هو مجتف! نزلت گلاص المي بالگاع وانداريت وكفت وراه حايرة شلون افتح الحبل ، حاولت بأيد وحدة أفتحة ما گدرت مديت ايدي الليّ بيها اللفة كدام وجهة وگتلة
راوية: ألزمها بس لما افتح الحبل
64
- حرك أدية وگال
برهان: أدية يمج
38
- سحبتها بساع من گدام وجهة وحطيتها بأيدة وهنه مربطات، تعاركت عركة ويَّ الحبل يلا أنفتح سحب أديه يعصر بيهن متأذيات ومحزوزات من الحبل خشن ومضبوب عليهن .. تشكرني وگال
برهان: روحي لا يجي احد ويشوفج يمي
15
- وكفت گدامة مرتبكة وادية وحدة تمرد بالثانية
راويـة: ومنو يرجع يشد أديك بالحبل؟
15
- هو مدنگ رفع بس عيونة يباوعلي من جوة حاجبة المرتفع نظراتة تخوف، رجعت خطوة لورة گلبي يدك حيل وامتمت بالحچي
راويـة: باوع اني انطيتك اكل حتى لا تموت أنتَ هم لا تنهزم لان يموتوني اذا عرفوا، سترت على حياتك وأنتَ استر علــيَّ
33
- نزل عيونة يسأل
برهان: ليش ساعدتيني؟
راوية: حتى لا تموت واخوتي يبتلون
- رجع باوعلي بنفس النظرات
برهان: هذا الچذب، والصدك شنو؟
- توترت وتندمت شجابني عليه شورطني؟ رفع حاجبة بحركة سريعة بأستفهام، درت عيني على الباب ورجعت باوعتلة
راويـة: لخاطر زُبيــدة خطية
82
- نزل روحة بحركة سريعة على الگلاص الليّ بالگاع وانـي فزيت ورجعت لورة بساع خايفة كل ظني يريد يلزمني انضرب ظهري بالبراميل الورايَّ يلا وكفت! اتنفس بصعوبة هو ما أهتملي شرب المي كله ورجع الگلاص بمكانة مخلي اللفة فوگاه وكعد عدل مرجع أديه لورة وگال
برهان: تعالــي شديهن
28
- ركضت بساع جريت الحبل وصرت اشد بيهن حيل، شديتهن زين ووخرت عنه متوجهة للباب بس اريد اطلع احس انكتم على نفسي، صاح ورايَّ من التفتت عليه أشر بعيونة على الگلاص واللفة رجعت مخبوصة شلتهن من الگاع ووكفت بمكاني من حچة بهـدوء
برهان: مشكورة بس النفسة عزيزة يموت وما ياكل بمكان مذلول بي، بعد لا تجيبين شي
35
راويـة: تموت اذا تبقى هيج
5
- حرك بس بؤبؤ عينة يباوعلي وگال
برهان: تردين تساعديني صـدك؟
- هزيت راسي أي وحچيت بساع
راويـة: بس ماكدر اطلعك
8
برهان: اگدر اطلع لو ردت بس مو وكتها، اريد منج توصلين خبر لـ زُبيــدة تطمنينها علــيَّ وتگليلها برهان بخيـر وبعده مأمن بيج
68
- هزيت راسي خوش وطلعت من يمة ركض وهم ورطت روحــي انــي شلون راح أروحلها؟ بقيت حايــرة ومحتارة اذا نلگفت يطيح حظي عود شراح أحصل .. من شافتني بينات حايرة سألتني شكو؟ تربعت گدامها هم حايرة احچي الصدك لو اجذب عليها؟ ما گدامي غير الصدك وخرطت الأول والتالــي لزمت أيدها أشرحلها شلون اريدها تساعدني الگى طريقة دفعت ايدي خازرتني
بينات: خاف نسيتي هذا الكاتل أخـوية
82
- هزيت راسي لا ، دفعتني من جتفي ووكفت على حيلها ترجف من العصبية وتبچي
بينات: ليش تساعدينة لعـــد ليــش؟؟؟ مااا راح يموتونة أهلي كل اليردونة يعرفونة ليش گتل الشااااهين
36
راويـة: مدا اساعدة اني بس اريد أطمن گلب زُبيــدة عليه خطية شنو ذنبها يبقى گلبها محترگ
- شهگت تبچي وتأشر على گلبها
بينات: ما فكروا بحرگة گلوبنا همه هـاا؟؟
42
- بلعت ريگي وسكتت وهيَّ تبچي فرفحت روحها عبالك من يومين مات الشاهين مو صار سنين! جريتها من أيدها كعدتها يمي وحضنتها
راويـة: ما اساعدهم خلّ يولون هاهيَّ
13
- عافتني وطلعت من الغرفة وانــي عديت هاليوم بدون ما أسوي شي لأن رجعت الولد قريبة .. ثانــي يوم ردت أروح وگال عمي هزبر ورة الظهر راح يجون علينّا خطار وانخبص البيت خبص تنظيف وتعزيل وتحضيرات ضيافة وقبل جيتهم بنص ساعة تقريبًا تكشخنّا كلنّا لان خطار عمي وياهم نسوان هم ، اني لبست دشداشة لون زيتوني والتطريز مالتها واصل للخصر .. بينات لبست نفسها بس لون أحمر دوم نشتري نفس الاشياء بس بألوان مختلفة، لبست گلادتي ومحبسين وبتوت باوعتلهن بأيدي مدري شلونهن صايرات ما يعجبني ، اخذتهن ومشيت لغرفة أمـي لگيتها متكشخة ومكملة ودا تلبس بذهبها سحبت اديها بوستهن ولبستها البتوت مالاتي واخذت مالاتها لبستهن
راويـة: بعدج شباب هذن يلوگن على ايدج اكثر
41
- رفعت ايدها حركتها سمعت صوت رنتهن وضحكت مرتاحة، طلعت من يمها اريد اروح للمطبخ وصارت عيني على غرفتنّا بينات لاطشة وجهها بالمرايا تحط كحل لنهاية عينها بدون ما توصلة للمدمع عيونها كبار ويلوگلها الكحل ، ابتعدت تباوع زين لعيونها وابتسمت رافعة الشال من جتفها لراسها
بينات: وينك ما تجي تشوف كل هالجمال
152
- عگدت حاجبي أضحك ومشيتلها فزت من سمعت صوتي
راويـة: منو هذا عيني ؟؟
9
- رجعت تباوع لروحها تثبت شالها من فوك بشعرها حتى تعوفة نزل منا ومنا وگالت
بينات: المحروس الراح ياخذني مدري شوكت يجي يخطبني عاد
13
راويـة: كل ما عندج امتحانات تخبصينة بالزواج وراها يصيرون كل الزلم كخة
37
- ضحكت وسحبت العطر سبحت بي، واندارت علــيَّ تشوفني كشختها رگبتها متزينة بگلادة خناگية ذهب والتراجي نازلات يلمعن ، الشال على نص شعرها ومرجعة الگذلة ورة أذانها .. مخلية حداد لشفتها المليانة اغمق من الحمرة طالعة تجنن عليها، ضحكت
راوية: عمي صدك وينه عمت عينة ما اجاج لهسه
38
- گلبت عيونها كوة ضامة ضحكتها تضيع خجلها، دفعتني من جتفي وطلعت مشيت وراها أضحك طبت للمطبخ نباوع من الباب أبوية وعمي وزيـدان واكفين بالحديقة، أنفتحت الباب وطب شبل يباوعلهم مستغرب وهز راسة يسأل
شبل: شنو عرس زيـدان اليوم؟ شو كلها مهندمة!
22
زيـدان: لاا جايين خطابة عليك روح اكشخ
16
- صاح بيهم ضايج
شبل: لااااا غير تحچون من وكت هسه شلحگ اسوي
58
- عافهم واجة للبيت يمشي سريع طب من باب المطبخ، بينات انطتة ظهرها حتى لا يشوفها وهو فات مدنگ مارفـع راسة اصلًا، طب لغرفتة مادري شأخذ وطلع صاح وراه زيـدان يضحك
زيـدان: هااا اشوفك انهزمت؟؟
شبل: كلولهم منهي عليه
81
- عافهم وطلع شويَّ ووصلوا خطار عمي، فاتوا من الباب زلم اثنين معگلين ووياهم واحـد بعمر حَمـد لابس دشداشة رصاصية والسبحة لون ماروني بأيدة، ووراهــم نسوان أربعة كلهن لابسات عبي .. عمي طبب الزلم للأستقبال وزيـدان وصل النسوان لباب الصالة طلعت عليهن امي وعمتي دلال تهلي بيهن، وحدة منهن جبيرة واثنين بعمر امي وحدة بعمرنّا اني وبينات ، كعدن يتعارفن هاي اول مرة يجون علينّا، بينات كعدت يم بنتهم ودك سوالف عبالك اول مرة واحد يحچي وياها .
28
- گمت للمطبخ جبت مي بارد لأن الگدامهم خلص، وهيج على لحظة اجت ببالي هاي فرصتي اكدر اروح لبيت اسماعيل! الصبح شبل هنا وورة الظهر البقية، بالليل اخاف أطلع والفجر زُبيــدة نايمة بس هالوكت حسيتة مناسب الكل ملتهي اروح واجي محد يحس علــيَّ ، اخذت عباية أمي معلكة بظهر باب المطبخ وطلعت اتختل لما وصلت الباب الصغيرة فتحتها بهدوء وطلعت من جهة البستان اركض ركض مغطية كل وجهي بالعباية ما مطلعة بس عيني وادعي يارب محد يشوفني يارب محد يحس علــيَّ يارب كون تعدي هالخمس دقايق على خير، فَـح گلبي لما وصلت بيتهم لگيت ابنهم الصغير يلعب يم الباب يبني بيوت من طين ويَّ الحايط، زفرت نفس براحة وحمدت ربي وشكرتة لان رتبها إلي .
33
- صحت عليه بصوت ناصي وكف على حيلة يمسح اديه بهدومة من الطين ومبتسم بوجهي، مديت ايدي مكركزة على خدودة الحمر من الحر گرصتة وگتلة
راويـة: زُبيــدة هنا؟
- هز راسة اي
روايـة: روح شاورها بينك وبينها گللها عمة تصيحلج
17
- دفع باب بيتهم وطب يركض ماكو دقيقة ورجعت هيَّ وياه اباوع لوجهها ينطي الوان خايفة مادري شبيها! وكفت گدامي وعيونها تتلفت ورايَّ عبالها أحد ويايَّ سلمت عليها وهيَّ توترت والحچاية حشرت ببلعومها گوة نطقت أسمي
زُبيــدة: را را راوية!!!
14
- جريتها من أديها طلعتها يمي احچي بصوت ناصي على السريع
راوية: لا تخافين زُبيــدة، اجيت اطمنج على اخوج ووصاني اكلج هو بخير وبعده يأمن بيج
28
- گبل لا تحچي حرف سمعت صوت أختها صاحت عليها، سحبت اخوها الصغير وياها وطبت للبيت راگعة الباب حيل
أُميمة: ويامن جنتي تحچين؟
- درت وجهي اريد ارجع واسمعها تگللها
زُبيــدة: هاي مجدية تدور اكل وفلوس
70
أُميمة: شو جاية من الباب الصغيرة؟
5
زُبيــدة: اي عبالها بيوت جديدة مو نفس العدهم باب على الشارع
9
- أشرت على روحي مصدومة منها
راويـة: اني مجدية؟ طاح حظج زُبيــدة بس صوجي والعباس صوجي مكسور گلبي عليج
62
- غطيت وجهي بالعباية ورجعت امشي سريع وصوت بتوتي يرن وامشي وادردم ليش ما نزعتهن قبل لا اجي ليش أجيب الفضيحة لروحـي، بس تعديت اخر بيت من بيوتهم انفتحت باب بيت حكمت ما التفتت ولا وكفت وأسمع صاحب حَمد قبل صاح ورايَّ
زبيـر: اليريد يسوي مصيبة ما يمشي ويخرخش لج غضب
280
- أنگطع نفسي من الصدمة ووكع گلبي ببطني من حجة ويايَّ هيج! وكفت وانداريت عليه منزلة العباية عن وجهي بحركة بطيئة اريد احلفة ما يحچي لـ حَمد شي وهو بس شافني بساع دنگ يعتذر
زبيـر: أعذريني خوية حسبتج بت عمي
118
- دار وجهة ورجـع لبيتة، زفرت نفس براحة هم أنعم الله وكملت ركضتي للبيت طبيت وسديت الباب نزعت العباية من راسي ومشيت للمطبخ دفعت الباب وفتت بس علگت العباية وانداريت اريد اوصل الثلاجة اشرب مي ريگي يبس طبت بينات تسأل مخبوصة وجهها مگلوب گلاب
بينات: وينج وينج أنتِ ؟
- اشرتلها بايدي برا مرتبكة
راويـة: هنا شبيج بالتواليت
بينات: وكت صخاااام أنتِ تعاااالي اسمعي هذن شجاي يمسلتن ولج
25
- فتحت الثلاجة ايدي ترجف
راويـة: شكو؟ شبيهن؟
بينات: جايات يخطبني لهذاااا الرصاصي
140
- اخذت ميَّ ودرت عليها عاگدة حاجبي
راويـة: منو الرصاصي؟ ابنهم هذا ابو دشداشة الرصاصية؟
- هزت راسها اي
راويـة: وشبيج أنتِ راح تموتين؟ جايين يخطبونج مو يشنقونج
12
بينات: عفية مااااريد
- دمعن عيونها دارت وجهها ومشت فاتت من يمهن للغرفة صاحت وراها امها ما ردت، ضحكت تگللهن
دلال: بعد اسبوع ما تشوفنة وجهها من الخجل
26
- مشيت وراها اباوعلهم اوزع ابتسامات، طبيت للغرفة وسديت الباب مستغربة منها
راويـة: شبيج أنتِ ؟ مني القبل شوية واكفة گدام المرايا وتسوي نداءات وينك ووينك هياتة اجة شبيج بعد؟
25
بينات: بس اني ماريد هسه، باعي اني داقرا وامتحاناتي بعدلها كم يوم يعني هيج راح يطلع مني قرار تحت ضغط وخوف وراح اتندم عليه بعدين، اخذي أنتِ حبابة خلصيني منه
31
راويـة: هذا اخذه اني واخلصج منه واذا اجاج غيره منو ياخذه ويخلصج منه امي؟؟ شبيج بيناااات
- ضربت على رجلها ودارت وجهها حايرة خبلتني ولا دا افتهم شبيها!
16
- عفتها وطلعت من صاحتني امي بقيت وياهن لما مشوا، وطبن عليها امي وعمتي دلال وتقوى وجوهن تضحك يقنعن بيها وهيَّ دايرة وجهها وساكتة، گرصتها تقوى ميتة ضحك على شگلها عبالهن خجلانة
تقوى: السكوت عــلامة الرضا هاهيَّ مــو
- دارت وجهها عليهن ترعد
بينات: السكوت علامة اللعبان نفس، الزلمة الجايباااتة ما اريدة
19
عهود: ياااا لگت رجال وگالت اعور
19
بينات: تالي عمري اخذ واحد يلبس رصاصي
- تحچيها بقرف ودارت وجهها عنهن مطنگرة
74
- طلعن من يمها ورة ما أيسن وعمتي دلال راحت وحطت الحچاية بحلگ عمي هزبر، بالليل على العشا كلهم متجمعين صاحوا عليها ما رضت تطلع، كملوا وكعدوا بالصالة واني بالمطبخ دا اصبلهم چاي انفتحت الباب وفات ابو بكرة، سلم وعبرني صحت وراه اسألة
راوية: أصبلك چـاي وياهم؟
- صفن بوجهي وترنـي ولأن مسوية مصيبة احس كلمن يباوعلي كاشفني، هز راسة اي
أبو بكرة: صبي خنشوف تاليها
47
- مشى كعد يمهم ببدلتة العسكرية، واسمع عمي هزبر يحچيلهم على هذا الولد الليّ متقدم لبينات .. طلعت عليهم وزعتلهم الچاي وحطيت الصينية گدام امي بيها أستكاني هم گال عمي
هزبر: راوية عمي صيحي لـ بينات
7
- صحتلها ما رضت تطلع سحلتها سحل وطلعتها يمهم، كعدت يمي مدنگة واديها وحدة تجعص بالثانية تسمعة وهو يحچيلها عليه ويمدحلها بي وشعنده املاك ووين راح تكعد ويتفاخر بي وبنسبة لما صدمتة من گالت
بينات: بس اني ما اريدة
15
- صار هدوء بس صوت بكرة سلاح حَمـد تفتر لازمة بأيدة ما يبطل هاي الحركة، سألها بهدوء
هزبر: ليش بابا؟
بينات: ما اريد اتزوج قبل لا اخلص جامعة
هزبر: تكملين يمة، اني أعرف بمصلحتج وأنطيتهم حچاية بعد
27
- رفعت عينها تباوع لأبوية والولد ساكتين لما باوعت اخير شي على شبل ضحك يگللها
شبل: يعني شسوي أنهي عليج؟
96
- دنگت ويَّ ما نزلت دموعها تمسح بيهن وعمي يباوعلة صفح
هزبر: أنتَ ونهوتك اركع راسك بيااا حايــط يعجبك حالك حال السوها قبلك
- شبل باوع لـ زيـدان وأبو بكرة وطگها بضحكة من كل گلبة
52
- أبـو بكرة نتر سلاحة بأيدة مرجع البكرة بمكانها وگام وكف على حيلة يريد يمشي لغرفتة وگال لعمي
أبو بكرة: اذا مستحي منهم اني اوصللهم خبر واكللهم مالهم نصيب يمنّا
42
- صاح وراه عمي متعصب ما وكف ولا التفت عليه كمل دربة لغرفتة، وكف عمي يرعد علينّا وعلى بينات ويصيح وزعلان وكوم الدنيا وكعدها وشيحچي على أبو بكرة شبل يهز راسة متأثر ويگلة
شبل: حقك والله
32
- اندار على أبوية متخبل
هزبر: ساكت لولدك لخاااطــرك لااا تخليني اسحك هالخاااطر صفوااان
12
- جاوبة ابوية بهدوء
صفوان: همه هم ولدك أن شاء الله
33
- اجتني الضحكة لميت شفايفي ودنگت راسي حتى لا يشوفني ويفصم راسي هسه .. صارت هوسة شكبرها بهذاك الليل وعمي سواها شغل عناد وحلف الا الخميس الجاي خطوبة بينات وهيَّ تخبلت گطعت نفسها بالبچي ودك ولطم عبالك مودينها لجهنم!
24
- أبو بكرة اخذ أغراض وطلع وامي تركض وراه تسأل وين يريد گاللها
أبـو بكرة: عندي واجب، حماج متكرم علــيَّ بالواجبات حتى لا الفي بالبيت
47
- عافها وطلع وشكيت ومادري اذا شكي بمكانة بس مايريدة يلفي بالبيت حتى لا يلين گلبة على برهان! رجعت للصالة ابوية وزيـدان كاعدين يحچون بصوت ناصي
صفوان: عمك شيريد من برهان بعد؟
زيـدان: بعده ما حچة النريد نعرفة
صفوان: ليش طلع اهلة لعد؟
- اندار على أبوية مسوي حلقتين بأيدة بأصابعة السبابة والأبهام وربطهن وحدة بالثاني يگلة
زيـدان: حقيقة گتل الشاهين صايرة حلقتين گاله انطيك وحدة من تطلع أهلي وأنتَ فكر بالثانية حسب فهمك واربطهن سوة
73
- راد يحچي أبوية بس سكت من حَس علــيَّ واكفة وراهم، وبقيت حايرة بين مفتهمة شلون طلعوا اهل زُبيــدة وبين مـا مفتهمة!
9
*
10
- زُبيــدة ..
منين ما أجيبها أشوف روحي كلشي ما مفتهمة!
والحيــرة الجبيرة السطرت راسي شلون طلعوا أهلـي وبرهان بخير؟ خاف ببالي احچي بعد مــا وصلي خبر منه ما اكدر افك حلگي، كاعدة بالحوش ادفع بشفتي بطرف اصبعي لبين سنوني اجلغ بيها لما گامت تجري دم عفتها متوجعة وادردم على برهان
زُبيــدة: الله يوكعك بين نهرين بالجنة يااا برهان مثل ما موكعني بين هالنارين
70
- زفرت نفسي زهگانة ويَّ ما أنفتحت باب بيتنّا الصغيرة وطبوا أبوية وغـازي ومعن وعادل جانوا بالبستان وميتين قهر عليها نصها ميتة وتعبهم بيها ضاع، كعد أبوية على حافة الحوض فاتح المي يغسل وجهة واسمع الولد بيناتهم يحچون
معـن: اني گلت هسه الدغل معشعش بالبستان
عـادل: اگص ايدي اذا ما واحد منظفة غير مشتغلة احس من عدنّا
27
غازي: تدرون بشغلكم مرعبل ونصدمتوا بي ليش هيج نظيف
12
- وكف أبوية وصاح علــيَّ، مشيت ليمة
أسماعيل: هم شفتوا واحــد بالبستان يشتغل بيها؟
- هزيت راسي لا
زُبيــدة: ليش شمسويلها؟
معن: مدري ياهو منظفها المفروض هسه الدغل ماكلها
79
زُبيــدة: مادري ما منتبه عبالــي هيَّ مايطلع بيها شي
- فر أيدة معن يضحك
معن: وأحْنـا شجان شغلنّا؟ نفلي الشجرات خاف بيهن گمل
55
- سكتت مادري وصدك ما منتبهة، طب للبيت سأل امي والبنات وحتى على عدنان خابــر يسأل كلها ماتدري، كعدت يم أبوية
زُبيــدة: بابة خلّ نروح نشوف جديتي بدرية
- رفع راسة على الساعة وگام على حيلة
أسماعيل: أمشي يلا گبل الغروب
14
- ركضت للغرفة جبت عبايتي وطلعت وراه، طلعنّا من الباب الجبيرة تمشينّا اني وياه لبيت عمي كامل، دك الباب ابوية وصاح عليهم .. درت عيني على بيت عمي حكمت أنفتحت الباب وطلع زبيـر صاح على أمة يگللها يلا مادري وين يردون يروحون، وكف بالباب من شافنّا باوع لأبوية ودار وجهة وابوية هم دنگ وما حاچاه، بقيت اباوعلة خازرتة هو ما يباوعلي رفع عينة باوعلي بنظرة سريعة من شافني خازرتة عگد حاجبة! بقى يباوعلي يريد يكسر عيني واني بظهر أبوية فنة لو حاچانـي اخزر بي مورم گلبي منه، أبتسم يفر بأيدة واندار على بابهم يستغفر بصوت عالـي
زبيـر: أستغفر الله، يــــالله يمةةة
105
- أنفتحتلنّا الباب وطبينّا لبيت عمي كامل يهلي بأبوية، عدلت عبايتي على راسي
زُبيــدة: شلونك عمي كامل
- يضحك گدام أبوية عود هو يحبني
كامل: هـلا هـلا بـ زُبيــدة الوردة
70
- سبيتة بگلبي محترگة روحي منه، متمنية روحي هسه شوكة واطب بعينك أعميها واوكف بزردومك اخلي اللگمة عليك حسرة حتى الحچي اخلي حسرة بگلبك .
37
- گاللهم أبوية يكعدون بالحوش، عدهم قنفة خشب مخلينها برا يكعدون عليها كعدوا أبوية وعمي، طلعت أميرة سلمت علينّا وفرشت حصيرة على الثيل .. أجت جديتي تمشي على عگازتها ركضت بوستها طاك گلبي عليها وهيَّ تضحك لازمة بثوبي تعت بيه
بدرية: ولج زُبيــدة ما تگولين اندار على جديتي خطية
7
- سمعها كامل ومن يمة صاح عود يسمع أبوية
كامل: اي والله اني هم گلت شو هاي ما أجت على جدتها، خواتها اجن وهيَّ ماكو
10
- أبوية يضحك واني وجدتي كعدنّا على الحصيرة، وطلعت نبيهة تهلي بأبوية وتدس السم بالعسل وتگله
نبيهة: أُميمة وجيـداء هم مرلهن مرة وبعد ما شفناهن
- بقيت اوزع أبتسامات بوجوهم وبداخلي أعيــط عياط داملخ بروحي وانعل عليهم واغلط لو يصح بأيدي هسه اكوم اضرب راس براس
26
- گوة تحملت لما أبوية شرب استكان چاي وگمنّا نريد نمشي گال لجديتي
أسماعيل: هـا يمة ما ترجعين ويايَّ لو طابتلج الكعدة هنا؟
- مدنگة تمسح بطرف أصابعة على الحصيرة لسانها يحچي غير اليريدة گلبها
بدرية: لا يمة خليني مرتاحة هنـا
34
- گاللها ضلي گم يوم واجي اخذج يمنّا هم كم يوم وطلع رغم يدري هيَّ ما مرتاحة بس من يحچي يتعاركون هو وعمي كامل الناقص .. ويَّ طلعتنّا صاروا بوجهنّا عدنان وعايـد سلموا وفاتوا للبيت وأحْنـا رجعنّا للبيت جيــداء تلگتني من الباب تسأل بهمس
جيـداء: هم شفتي عدنان؟
زُبيــدة: صخمان منو؟
28
- باوعتلي بعتب
جيـداء: شبيج أنتِ اذا ما تمردين خاطـري ما ترتاحين؟
زُبيــدة: غديي امشي من يمي أنتِ وخاطرج
40
- دفعتها ومشيت وهيَّ ركضت ورايَّ تتوسلني اگللها شفتة لو لا ما عافتني إلا گلتلها أي، خلصتها توزع أبتسامات ورجعن هيَّ و أُميمة يدرسن ما بقالهن حجة يسختن .
6
- كعدتني أمـي الفجر تريد تخبز ، گمت فاتحة عين ومغمضة عين انداريت ورة البيت اريد أشجرلها التنور حطيت بي الحطب وهستوني اريد أشعلة أنتبهت على الحايط اكو طاسة بلاستك، مديت أيدي نزلتها حتى لا تموع من النـار وبهتت كل ملامحي بصدمة! مليانة تُكي بعده جديد!
239
- صعدت على التنور اباوع للشجرة والبستان ماكو احد! نزلت صافنة بيهن اخذت وحدة خليتها بحلگي افكر بصوت عالي
زُبيــدة: منو ما جنت والله شريف بس اذا زبيـر لا خلفة الله عليه
139
- حطيتهن على جهة فرحانة بيهن وهم ضامتهن عن امي هسه اذا تشوفهن عبالها اني رحت جبتهن، شعلت النار بالتنور ورجعتلها جبت وياها نجانة العجين والطبگ بي طحين وبلالة وهيَّ تدردم
حَفصة: مسويتهن مثل ناگوط الحب
زُبيــدة: يمة والله ماعندي غير ادين اثنين شلون اشيلهن يعني؟
28
- سكتت وبلشنّا نخبز لما كملنّا هيَّ تطب تسبح وگالت سوي ريوگ لأبوية والولد يكعدون للشغل، ضميت الطاسة جوة جدرية وكل شوية اسوي حاجة وارجع ارفعها اخذ تُكي واضمها لما خَلصت غسلتها ونشفتها ورجعتها على الحايط .
35
- للعصر وصاح علــيَّ خَطاب گال بدلي نروح لبيت خالـي حكمت، احس روحي طلعتلها جناحين وفرفحت من الفرحة .. انخبصت اركض هيج وهيج انطيت خبر لامي ولابوية وركضت بدلت شلون ما جان وطلعت ويَّ خَطاب الطريق كله اني الضحكة تارسة وجهي
خَطاب: هاي هيج تحبينهم؟
- انداريت عليه أهز براسي
زُبيــدة: هذولة اهلي
50
- وصلنّا بيتهم بعد اكثر من نص ساعة تقريبًا، نزلت من السيارة وركض على باب حوشهم سحبت السيم الطالــع منها انفتحت الباب وطبيت اركض بهذاك الدرب الترابي الطويل ومن الجهتين نخل عالــي ، صاح ورايَّ خَطاب يگلي عيب اصبري يطلعون علينّا، التفت علــيَّ ارجع لورة احس طابة الجنة وصحت بفرحة
زُبيــدة: أنتَ ويَّ بنية هالبيت ياهو يطلعلك بعد؟
33
- أبتسم وإجة يتمشى ورايَّ واني اركض فرحتي ما انطيها لبشر، كلشي مثل ماهو هالجنة العشت بيها عمري كله، قفص الطيور وحديقتنّا الجبيرة ومليانة ورد وعلى الجهة البعيدة قفص الدجاج والبط والوز .. حتى البحيرة المسويها خالــي بعدها مثل ماهيَّ البط يسبح بيها ، درت عيني على بيتهم وصحت بفرحة بعالي صوتي
زُبيــدة: خالـــي حكمت
17
- كلها ثواني وانفتحت باب الهول وطلعوا يتراكضون واحد ورة الثاني اولهم صهيب ضحك بصوت عالي رفع أديه يصيح صياح
صهيب: ولك هاااااي دودة ياااابة هــلااااا
68
- طلعوا وراه صافي وجلال ورضوان يتراكضون فرحانين بجيتي، وخالتي جميلة مرت خالـي حكمت واخيرهم خـالي طلع الضحكة تارسة وجهة واجاني حافي ركضت حضنتة حيل وهو يبوس براسي
حكمت: هـلا بشمعة البيت يمن فدوة يروحلج صهيب وصافي وجلال ورضوان
136
- ضحكت طايرة من الفرح هاي حياتي جانت يمهم كلها ضحك وسوالف حلوة وكلهم يحبوني ويهلون بيه، حتى من اكعد من النوم صفگات وغنوات تترس البيت ، ماتطلع خالتي جميلة للسوك إلا اني وياها واذا ما رحت ترجع بأيدها علاكة بس شغلات إلـي، خالــي بيوم اليطلع بوكت ويرجع متأخر وما يشوفني يكعد يم راسي يبوس بيه لما يكعدني يحچي ويايَّ يلا يروح ينام، صهيب شايل على ظهرة كل مصايبي، وبس هو اكبر مني باقي اخوانة اصغر مني ومشبعتهم كتل وهم يحبوني .
61
- تقرب خَطاب سلم على خالـي باس راسة
خَطاب: أعذرني لو غلطت بحقك خالـي
- طبطب على جتفة مبتسم
حكمت: هلا بوليدي المعَدل
19
- التفتت على صهيب اضحك
زُبيــدة: شو امشي بوس راس اخوية وراضي يــالله
21
- بقى يباوع لـ خَطاب يضم بضحكتة يگلة
صهيب: راح أصير احسن منك وماكسر رجلك لان عتبت عتبة بابنّا
13
خَطاب: انچب وتعال بوس راسي يـالله
18
- ضحك وتقرب عليه باس راسة
صهيب: گـ*** بس احبك
71
- نزعلة الشحاطة خلاه يركض وهو يركض وراه، وصافي وجلال ورضوان ركضوا لزموا لـ خَطاب احترمة ما ضربة بالشحاطة ومد ايدة على الصوندة لزمها من النص طبگها وضربة وحدة خلاه يسب كل عشيرتنّا .
18
- مشيت لخالتـي جميلة حضنتها حيل وسحبت اديها ابوس بيهن
جميلة: ياابعــد روحي والله البيت مو حلو بلياج
25
زُبيــدة: شنحچي شنگول غير الله على الظالم
9
- ضحكت وطبيت وياها جبنّا فراش للولد فرشوا بالحديقة وكعدنّا هناك، هاي الكعدة عندي تسوى الدنيا، عضلات وجهي گامت توجعني من كثر ما أضحك وهالضحكات طالعة من گلبي، رضوان صغيرون بالأبتدائية مدري شيشاورة صهيب وهو يجي علــيَّ يشاورني ما افتهمة شيگول وهو يموت ضحك يوكع بحضني مگطوع نفسه ويرجع يگوم يروح لصهيب يگلة
رضوان: نسيت شلون اكولها
35
- لزمة من أذنة ورجع شاورة ورجعلي رضوان قبل لا يحچي تحلف بي صهيب اذا ما حچاها يگوم يكتلة، لزك حلگة يم أذني كوة افتهمة يشوش وگال
رضوان: صهيب يگول الطارش البيني وبينج ياكل وحـل
90
- ضحكت ورجعت شاورتة
زُبيــدة: گله لا والله الطارش البيني وبينك هو الياكل وحل
30
- راح لصهيب يريد يحچيلة ويحلفة
رضوان: عليك الله لا تكتلني هيَّ گالت اكلك هيج
13
- صهيب ميت ضحك وحلفلة ما يكتلة يلا شاورة، صهيب يريد يسكت ماعاد يگدر شلون رضوان خايف يگلة هيج عباله الغلط على صهيب، صاح عليه خالي يضحك وگاله
حكمت: شو تعال احچيلي شداتوصل حچي؟
- كعد يمة يباوع لصهيب خايف، گالة
صهيب: احچي احچي ما احاچيك والله
- رفع راسة على خالي يحچيلة
رضوان: صهيب يگلي اگول لـ زُبيــدة الطارش البيني وبينج ياكل وحل وهيَّ هم گالتلي اكلة هيج
- ضحك خالـي وكفخة
حكمت: ولك بوية أنتَ الطارش بيناتهم يعني أنتَ التاكل وحل
70
- زعــل ووكف على حيلة يضرب رجلة بالگاع محترگ گلبة ويصيح على صهيب
رضوان: ليييييش تضحك علــيَّ ؟؟؟؟
17
- راح يدبچ صيحنّا وراه ما رضى يرجع، راح جاب شرجة صوندة بنصها عودة ووكف يم خَطاب يگله
رضوان: أنخاك لو أنخة الذيب؟
- جر الصوندة من أيدة ووكف على حيلة
خَطاب: يخسى الذيب
79
- طفر صهيب من مكانة يضحك
صهيب: كاتل ابوك ومتحمل علــيَّ؟ ابروح الحسين اخلي دمك بطولك
22
- خَطاب لبس شحاطتة وهذاك ركض للبستان منهزم منه، ضحك ورجع الصوندة لـ رضوان يگله
خَطاب: من يجينّا تعال وياه اربطة الك بالتُكية واخليك أنتَ تشبع كتل بي
- فر ايدة ما مقتنع
رضوان: ومن نرجع لبيتنّا يغط راسي بالبحيرة
11
- مد ايدة يهوس شعره وباوعلي
خَطاب: هـا نروح؟
- وكفت على حيلي ما معاندة حتى يجيبني شوكت ما اريد گالتلة خالتـي
جميلة: خليها تبات يمنّا وباجر خالها يرجعها
7
- بقت عيني بعين خَطاب احسة متردد بس استحى منها، مشيت وكفت يمة
زُبيــدة: لا عود غير مرة اجي ابات يمكم
- طبطب على جتفي وابتسم
خَطاب: باجر يجيبج خالي لو اني امر عليج
24
- جريت أيدة بستها حيل من الفرحة ودعتة وطبيت اركض للبيت خاف يغير رأية .. افتر بالبيت طاك گلبي عليه بكل شبر بي عندي ذكريات واخير غرفة طبيتها غرفة جديتي رحيمة، على حطتها مثل ما هي قريولة حديد ام النفرين هاي اني وياها جنه نام عليها .. فتحت كنتورها فارغ مابي غير شيلاتها البيض سحبتهن شميتهن حيـل وبچيت مفرفح گلبي عليها .
32
*
5
- راويـــة ..
ومــات گلبي من الخوف كل يوم مصيبة كل يوم هوسة كل يوم تهديد جديد، بيوم الليّ عمي هزبر ما يبات بالبيت كلشي ما يصيرلنّا وبيوم الليّ هو موجود عبالك حَرب تشن علينّا! دانعيش ليالي رعب من ورة التهديدات التوصلنّا! يوم صياح وعياط وهوسة لان باب الأستقبال الخشب محترگة، يوم سيارة عمي احترگت ومدا يعرفون شنو الدايصير ومنو دا يسوي هيج وبكل مرة يرجعون لـ برهان المحبوس عدهم يگللهم
برهان: دوروا غريمكم المستغل عداوتنّا
120
- يخليهم راس براس، والدايسوي بينّا هيج يخليهم يأمنون والحراس يلزمون اماكنهم يسويلهم مصيبة بجهة يلهيهم بيها ويسوي المصيبة الليّ يريدها بالمكان اليريدة، وكفنّا بليلة من هالليالي ميتين خوف واسمع أبوية يصيح على عمي يگلة
صفوان: من تگول ومتأكد هالمصاااايب علمود برهاااان طلعة وخلّ يولــــي
31
هزبر: مو گبل لااااا يحچي الصـــــدك
12
- غمضت عيوني گلبي يرجف وعمتي دلال ضغطها صعد وتخربطت علينّا وبقينّا محتارين بيها بذاك الليل ، أنتظرت الصبح يطلع اريد أروحلة وبقيت الصبحية كلها اني احوس لما صار الظهر وشبل طلع لشغلة، مشيت بساع للمخزن فتحت الباب وطبيت برهان بعده بحيلة! وعلى نفس كعدتة مربط على هالكرسي، سديت الباب حتى محد يشوفة وتقربت خطوتين عليه الدموع تارسة عيوني
راويـة: اذا اطلعك منـا ما تحچي علــيَّ؟
28
- عگد حاجبة مستغرب بس ما حاول يفتهم ليش وگال
برهان: روحـي منا لا تورطين روحج
13
- ردت احچي وفزيت جامد الدم بعروگي على صوت شبل مادري ويامن يحچي، ألتفتت بعده ما واصل المخزن شهگت أبچي جبت اخرتي اليوم هاهيَّ، درت عيني برهان من گال بهدوء
برهان: اذا ما تردينة يشوفج اختلي ورة هذنيج البراميل
37
- ركضت بدون ما افكر كعدت وراهن مخلية ايدي على حلگي كاتمة صوتي وحتى النفس گطعتة، اباوعلهم من بين البراميل طب شبل بأيدة ماعـون سحب كرسي فارغ حطة گدام برهان وكعد يگلة
شبل: اجيت اكسب بيك اجر، جبتلك شلووون تمن وبانية
31
- برهان يباوعلة بدون تعابير! وشبل صار يخبط بالخاشوكة حاط المركة فوك التمن ورفع الخاشوكة يم حلگة، برهان ويَّ ما شاف الخاشوكة تريـع وراهـا ضحك، بقى شبل يباوعلة مضيگ عيونة
شبل: شماكل أنتَ وتجوعر؟
70
- ضحك برهان حيل يگلة
برهان: بشوفة وجهك شبعت
11
شبل: هـااا حلويات قبل الاكل ما يصير ياعيني
42
برهان: جان فكرت بيها وضميت وجهك لعد
14
- حط الخاشوكة بالماعون ونزلة من ايدة بالگاع، رفع روحة يباوعلة بشك ولزمة من فجة فاتح حلگة، برهان يضحك وشبل ماد خشمة بنص حلگة يشتمة
شبل: من جابلك اكل؟
111
- بقى ساكت برهان بس مبتسم، بقى شبل يفتر مدايرة يشوفة خمو ادية ما مشدودة زين بس مشدودة!! رجع دنگ على الماعون شال منه الخاشوگة وحطها بالحبل يم جفوف أديه! شال الماعون وطلع ما افتهمت سبب هالحركة ولا ليش سواها؟
43
- غمضت عيوني انفث احس جنت اركض بشارع طويل وحار وتعبت حتى روحي تعبت من الخوف والتوتر! ما تحركت ولا طلعت إلا من صاح علــيَّ يگلي أطلعي، ركضت اريد أطلع من المخزن كله ووكفني صوتة من وصلت الباب گـال
برهان: اليريد يطلعني كون بالليل لو الفجر مو الظهر ويفضح روحة
62
- بقيت واكفة بمكاني كل ذرة بجمسي ترجف من الخوف، هزيت راسي خوش وطلعت واني ناوية على هالنية اريد نخلص من المشاكل هاهيَّ گلبي يگلي هو الدايلعب عليهم اذا طلعتة ما تبقى مشاكل بعــد!
- بقيت هذاك اليوم كله أرجف برهبة، لما صار الليل خليت تلفوني يم راسي واني منبهتة على ساعة الآذان! غمضت عيوني اريد أنام وأسمع صوت شبل وزيـدان مهوسين بالهول، حطيت المخدة فوك راسي وبعد ما ختمت القرآن حتى تتسهل مصيبتي يلا نمت!
18
- كعدت فازة على صوت المنبه طفيتة وگمت بساع طلعت توضيت وصليت صلاة الصبح وراهـا كعدت أصلي صلاة أستخارة من الخــوف، غمضت عيوني اريد ابچي وبچيت ميتة قهر ليش هالرعب العايشين بي، ليش هالخوف وحرگان الگلب .. لا أحْنـا المرتاحين ولا برهان ولا أهلة.
11
- طويت مصلايتي وگمت طلعت أمشي واتلفت بخوف، الف موتة متت لما وصلت المخزن مديت أيدي ترجف سحبت الباب وكل ظنـي هاهيَّ راحتنّا ورة هالليلة، شهگت مفجوعة وخاب ظني باللحظة الشافت عيني هذاك المنظر! شهگت برعب ورجعت لورة كل جسمي يرجف واصرخ برعب متخبلة !!
- يتبــــع ..
الثامن من هنا
