رواية خيط وابرة الفصل السادس 6 بقلم شمس العراقية
رواية "خيط وأبرة"
بقلم الكاتبه "شمس العراقية"
(الحلقه السادسة)
1
لميعه ...
ـ كبرت أكبر من عمري كله بسبب هالزيجه الكشره من خضير خبل المخابيل نحسب عليه زلمه وكظيت عيشتي بالضيم وأنه بعدني على ذمة خضير بس بيت أهلي ما قبل يطلگني ولا أهلي رادوا الطلاك وأبويه بالأخص حتى أمي ما رضت وطلبت يطلگني بس أبويه معند كلمه والثانيه ما أريد أخسر أخوي رزاق مثل ما خسرت ياسين بسبب بناتي مكاصيف العمر هاي جانت حجايته دومه يحجيها
2
الحجيه عطايات ـ ليش ما تردين اله وتخلصين وعمج كايل بيتها لوحدها ومحد عليه بيج بس زلمتج يجي عليج ، أحسن ما تضلين كاعده ومكابلتني .
1
لميعه ـ گتلج گبل وأگولها هسه أجيتج واضل طول العمر مكابلتلج لا خضير ولا غير خضير يصير رجال على رأسي جزت نفسي من الزواج كله ، وراضيه اضل هيج احصد وأنكل واشتغل وأداري الحلال بس فگوا عني وطلگوني من خضير وهو تزوج مو بحالي ليش مبقيني على ذمته وكلما يفوتن اخواته يشمرن عليه سوالف يبطن الگلب ، جزعت يمه جزعت .
1
ـ چا ابقي هيج هذا حالج تشتغلين بالكاع وتلزمين مكان نهاوند ، أنه هم ما بيه والقصر يريد ونسوان أخوانج ما يلحكن لوحدهن .
ـ راضييه وحتى لو ما تطلگوني منه وابقى على اسمه هم ميخالف بس ما أرد اله مرتن نوب ، أبقى أخدمج والم الج الزرع والحنطة والشعير والحلال وكلشي انه اسوي بس لخضير لو أموت ما أرد اله .
3
ـ چا هذا هو ، گومي على شغلي ودزيلي نهاوند أرد احاجيها بسالفه خل تجيني .
ـ على أمرج مشيت وصاحت وراي
ـ ما سألتي شنهي السالفه الاعرفنه عنج فضوليه ما تصبرين أذا ما تعرفين .
ـ هاي گبل مو هسه عكب ما سلبتوا مني رويحتي وطفيتوها ، عكبيش يمه ومالي نفس بعد اسأل ما يهمني كل الأريدنه يكظي اليوم ويجي الليل وأكظ مخدتي وأنام
4
مشيت وعفتها بصفنتها بلكي تحس بغلطتها ولو بنت كتبيه ما تحس جان إمها حست بغلطتها من كظت زكيه ام مهديه وذبحتها وراحت لبيتها محنيه أيديها وكظت الجدر وكعدت تأكل ولا جن مسويه شيء وخلت شر وراها توارثنه الحبايب وما وكعت غير برأسي ..
6
"حتى سميعه احسن من حالي سمعت عنها خلفت بنيه وسمتها نويره ، اي چا تسد بطنها التزوج شتسوي غير تخلف وتصير ام بيت .
وام البيت المفروض أنه بس شغل عطايات حرمتني من عشكي ويا عشك هاذ ألاسولف عنه أنه بطرانه على وكتي ما ضل عشك وطلع عشك جهال وحسب مسموعي ويسولفن يينهن الحبايب يكولن صباح يحب سميعه وكاظ ذيال ثوبها ويريد رضاها وأنه ترك عشكي للوكت الخلاني مكفخه للغمان المثل خضير الخبل .
6
وصلت الكاع وشفت نهاوند كاعده ويه البنات سلمت بس شافني ردن السلام وأبتسمن وكامن ونهاوند حاجتهن بس ما رضن كامن يشتغلن .
نهاوند ـ خرب بيومج لميعه مسويه خوفه بالأوادم محد ينسى تاريخج شون جنتي تكظيهن وتضلين تأمرين عليهن ، أكعدي أكلي وياي چا ضليت أكل لوحيدي شسالفه خايبات بعدني ما شبعت ، رجعن خايبات لميعه مالها شغل بيجن .
لميعه ـ عوفيهن على راحتهن وشدراهن عبالهن لميعه بعدها تهوبز وتزامط بأبوها وفلاحته وحلاله ما يدرن خضير ما خله بيه عرج واهس أعيش يومي لباجر .
ـ لا هيج تحجين ، هذه قسمتج بعد
ـ لا يمعوده قسمة الكشره وهسه ما علينا من هالحجي روحي للقصر أمي دزتني وكالت دزيلي نهاوند تريدج بسالفه ، أباوعلها وجهه ورد جن عدها علم ها تروحين
ـ أي أروح .
ـ مشت وحاجيتها نهاوند بالخير عليج والله فرحتلج ضحكت بخجل وكالت
ـ على شنو تباركيلي ليش شگو
ـ على خطبتج من صديق مشعان واليوم يجون ، ترى أدري بكل السالفه وادري اليوم يعقدون الج وماله داعي تضمن عليه عبالجن اخرب فرحتجن عود لان امي ضلمتني بزواجي ، لا انه مو هيج واتمنالج الخير من كل گلبي وطمني گلب امي أنه ما اخرب ولا الي غرض
ومبارك والله يسعدج وياه .
5
ـ الله يبارك بعمرج خيتي ويعوضج خير على كل الشفتي
ـ راحت وكعدت أشتغل وصفنات توديني وتجيبني ما يروح من بالي دومه متربع وشاغل تفكيري وهو هم مثلي يذكرني يكول وين صفى بيها الوكت لو صدك حجي الحبايب ويحب سميعه ...
3
" كملت وكعدت أحش لما منعم يجيب السياره وناخذه لحلال وصالحه هم وياي تحش بس بعيده عني وانه ملثمه فكيت اللثام واجه من هذاك الصوب زلمه! خير منهو هاذ الزلمه الاجانا يطارد!...
عاينت زين شما اشوف هذا خضير ، من مشيته يطارد دكول حصان ، نداريت ومشيت غاد وشو هاذ كرب صوبي واجه يهف وكاظ دشداشته وكظني من ايدي وصحت بي ، شتريد مني عوفني يخضير هدني اكولك هدني ، خايب شمالك تسودنت ما اخلص مـن سوادينك من فلك طگك بمنيه وخلصني منك يعت ويجر بيه ، ولك خضير هدني لا ادج هالمنجل بطنك وأبتلي بيك .
1
خضير ـ اليوم تمشيين وياي والله ما أهدج الا أخذج وياي ، شنهي نسيتي بعدج حرمتي وانه زلمتج أمشي ولج أمشي .
1
ـ من يمت أنه حرمتك خاب ما تنطم على حلگك انه ما عولت اخلص منك ومن وسخك جاي وترد مني امشي والله لو اعرف ادج روحي بالمنجل وأموتن ما امشي وياك يخضير
ـ تمشين وغصباً عليج اكولج تمشين وياي تمشين
ـ الموت الاهون من اعيش وياك تحت سكف واحد ورايني مكفاك والدرب الجابك يرجعك يخضير ، فگ ايدي وخليني أكمل حشيش مالي خلك سوادينك وأمشي منا ما ناقصه طلايب أنت وهلي امش منا يخضير أمش .
ـ لو أنه لو أنتِ ، اليوم أكظ الدنيا وأحركها أهدج وما متخلخل منا الا تمشين وياي .
ـ تمشي لا أمدك گدام الأوادم وأخزيك بين العربان يخضير وأخلي كل أثنين يحجون بسالفتك خضير طگته حرمته ، أحفظ ماي وجهك وأمش على حرمتك لاتسويلي طلابه ، ترى سواديني كبن عليك ابوك اصمطه ، كفخته بالمنجل على ايده وعافني وراد يضربني وصاح بي منعم .
منعم ـ خضيــر وتالي وياك وتالي ما نخلص من طلابتك .
1
خضير ـ راح أمشي بس راجعلج واليوم اللي أكظج بي عشيرتج كلها ما تهدج مني لان مشتاگلج حيل يلميعه
2
لميعه ـ مشه يهف ورافع دشتداشته ومنعم حاجاه وعفص وما جاوبه بس يهف بإيده ويحاجي روحه واجتي صالحه كاظه ربطتها على حلكها وتضحك ، شمالج تضحكين هذا هم حظي المصخم.
صالحه ـ اضحك على خبالات خضير شفتي شون رافع دشداشته يريدج تحنين وهم يشوفج قلاقيه .
10
ـ فلك فلكج علل هالحجي من خفت وبلت اي والله شأحن على وسخه على سوادينه من حنت عليه سليمه خايبه ما تسكتين ما صدكت خلصت منه .
رجلج منعم اجه ومالي خلك احاجي أنتِ فهمي كوليله كبن سوادينه واجه يريدها تمشي وياه ، خلهم يفگوني ويطلكوني منه عاد لا يضل يوميه رايح راد ومجلب بيه كدام الاوادم شتگول علينا الخلك .
ـ ماشي حبيبه هسه أنه أحاجي وروحي كملي حشيش خل نمشي للقصر والحك اشوفن خطيب نهاوند يكولن عليه حلو ، الحبايب صار مرتين يشوفنه وانه وياج كاظين الشغل وكلشي ما نشوف نرد بس نحصل الكيك والشربت وحتى كيك ما نلحك عليه وهسه جاسم شال الكيك والجكليت وضمه بخانة البوفيه .
ـ لاتحلصين يكولون خيرهم جثير
ـ اي خطيه خل ترتاح وتنسعد فرحتلها نهاوند فقيره وتستاهل كل خير وأنتِ هم الله يعوضج .
ـ الله كريم ، وگملنا ورجعنا وصالحة طول الدرب تحاجي منعم على سوالف خضير وتقنع بي يحاجي ابوي يوافق يطلگني منه وافتك ما طلعت هاي يضل يركض وراي كدام خلك الله .
دخلت القصر والهوسه كابه لستار وجهالنا وجهال النسابه الجديده كم واحد يفترون عدهم جوله بالقصر ونافع لازم يطف بيهم ولك عيب شمالك تكفخ بيهم
1
نافع ـ مثل الشواذي بس ينكزون ، مو جهال فلك .
لميعه ـ مسودن هالولد ، دمه حار من بعده صغير دخلت المطبخ وشفتهن يصبن الشربت والكيك وحربيه التشرف ومخبوصه ووهبيه تحاول هي التقوم بالواجب بس امي مشيخه حربيه رغم وهبيه الاولى بس ما يفيد طبع ابن أدم ما يتبدل والتفرقه توارثت منهن لخلفتهن
1
صبلي وكعدت أكل طيب هالكيك
صالحه ـ أي سمعت حربيه تكول جايبينه من الزين عبن ناس طاكين وخيرهم جثير ، خل نأكل هسه تجي هالزعط ما تخلي يتشالكونه من حلوكونه .
لميعه ـ أكلي عليج بالعافيه ، شصار ما صار عقدولهم
وهبيه ـ لا بعدهم ما دزوا عليها
لميعه ـ طلعت حلوه ما شفتها شلبست
1
وهبيه ـ شحلاتها طلعت فلگة گمر .
لميعه ـ الله يسعدها وجاي اكل وجان أغص بالكيك من سمعت صوت صياح يا ساتر استر شگو ، طلعنا نتراكض والنسواوين طلعن يشوفن شگو وأمي وكفت تحاجيهن وتهديهن ، وحربيه حاطه أيدها على صدرها وخايفه شگو وحده تمشي وتفهم شصاير .
حربيه ـ عمه دخيلج أطلعي وطفي النار لاتكثب مرتن نوب أنه مالت سميعه لحد الان تكرظ بگلبي نوب نهاوند ، أمشي حاجي محمود لايسولنا سالفه تسودن وكعد ، دخيلج عمه أمشي
1
وهبيه ـ مشعان وين
حربيه ـ مشعان ما يتفاهم واخاف لا يتعارك وتصير طلابه الها أول ما إلها تالي ما تفضها غير عمتي .
الحجيه عطايات ـ شيفضها ويه ولد مهديه شيفضها
ما اخلص أنه ما أفتك منهم ومن نسبهم مو أنطيتهم نسوان أثنين طلابه هي خوما طلابه ، شنهي وليه وين جان داحس رأسه أخوج وهسه يله فكر ببنات المرحومه أنه شحصلت منك بعروبه ، وارد أجددها بنهاوند ...
1
لميعه ـ النسوان دخلت الغرفه ووهبيه تكفلت بيهن وأمي وحربيه واكفات يم الباب والحجي صار كدامي ومشت هي وحربيه صوب الديوان ، رجعت عاينت من الباب عالنسوان ولبسهن كله من الراقي مبينات مرتبات وحلوات أكابر وريحة عطرهن تشك الخشم وباوعتلي نهاوند وتبسمت مستحيه الله يكملها عالخير وتخلصين من هالقصر دگول مخابيل مهرجيين يوميه كابه طلابيهم هما وبيت مهديه بلكي تروحين على ناس اوادم ويقدرون المره مو مثل حظي ويه أختي خيطت زواجنا بفضيحه وبخيط وأبره بس خياط تشبج ...
1
وشوي ودزوا عالنسوان وكامن مستعجلات والفهمته راحوا لان محمود ناهي على نهاوند يريدها من فلك فلكك كون وعروبه چا نسيتها عود علمود البنات شگد شايل همهن وتفكر بيهن وتريد خالتهن!
زلم ما يغزر بعينكم لا حب لا صخام الصخمكم چا أنت اخومن مو صباح ووينه وين صفى بي الدهر هو وعشگه ..
خفت الرجل وصارت صنطه ما فهمت شسالفه وشقرروا على نهوة محمود ، معقوله عطايات توافق تعيد النسب ويه أبن مهديه اي ليش متعيده چا ضلت على نهاوند هي ضحت بينا كلنا وما وكعت بس براسي بس ان شاء الله ما ترهم وتخرب ما أريدها تمرمر مثلي وقسمتها تبين خوش قسمه .
خذتني رجلي للغرفه الكاعدين بيها أبوي وأمي ومشعان ومنعم وصلت واسمعهم يحجون وشافتني نهاوند واجتي خطيه حسيتها مقهوره .
نهاوند ـ ها شسمعتي فدواتج لاتكولين ينطوني لمحمود ما أريدنه المسودن .
لميعه ـ تعالي سمعي وياي توني اجييت حالي من حالج بعدني ما سمعانه شيء .
حبيب ـ بويه مشعان هذا الحجي ما يرهم ومحمود أبن عمك وما اريد سالفة سميعه تنعاد وتنفتح دفاتر وعمك ياسين زعلان وأريد أرضي ما أريد أخسر أخوي بعد ويثگل زعله بسبب أخواتك يوميه طلابه ويه عمامك من وراهن .
مشعان ـ بويه گبل سگتت وبلعت سوالفكم الما تنحمل ومشيتها بزواج سميعه وصباح هم الرجال أدمي بلع موس وسگت ورضى بقسمته لان أبن عمنا وسكت غيره ما يسكت على هالدكه الناقصه ، ونوب لميعه وخضير طلعها من بيته بفضيحه وطركاعه سوده ونزلت علينا وخله خضير يصير زلمه ويتهدد عليه بالدواوين لو نصير يروح فدوه لقندرة ولدي يوكف لحربي وباقر بالكاع ويشمرلهم حجي على عمتهم وحربي دمه حار كلشي ولا عماته ينجاب طاريهن ويوميه حاطينه بالطينه وكاتلينا وتعال فگ الطلايب يمشعان ويه صگبان كاظ عبايته ويهوبز
1
الحجيه عطايات ـ والله يمه ولدك مو أوادم وراعيين مشاكل وحربي يركص لشر بجفيه شوداك على نصير وطلابيه .
1
حبيب ـ هسه عوفلي أخواتك وخضير ونصير ، أحاجيك على نهاوند ومحمود
مشعان ـ هاي سوالفكم گلبي مفحم منها ، والسبه أنتوا ما تعرفون تتصرفون وتاليتنا نوكعلنا بطلابه والعالم تضل تعلج بلحمنا ونصير مضحكه لامة محمد وانتوا ولا هامكم أحد لا بنت ولا ولد وأنه هذا الحجي ميصرفلي ، عندي ولد باجر عكبه يكبرون ، ليش عبالكم سالفه سميعه ولميعه نكظت هيج وهاي هي تنسي والله لولد الولد ما تنكظي ولا تنسي وهذا شاربي أزينه ، سميعه حقده وما تنساها الكم نوب رجعتوا على نهاوند والمن لمحمود المخبل .
حبيب ـ خبل مو خبل أبن عمها وغصباً عليها چا المن ازوجها للغريب وهذا صاحبك كوله ما الك نصيب وانطينها لابن عمها علمود بنات اختك عروبه وفض السالفه ولا تورح النار ويه عمك ياسين.
1
منعم ـ لا بويه اسمحلي بهاي أنه مو وياكم ونهاوند لو اطلعها بجنازه وادفنها بصف المرحومه ما ازوجها لمحمود وهيج شايل هم البنات ما جان يدير باله على امهن وكلنا ندري عروبه ماتت من القهر والكتل ليش تعرفون الحق وتحرفونه مو انتِ جنتي تردين محمود يطلگها اشوفج سكتي لو الج نيه تزوجينها لمحمود علمود بنات عروبه تردين نهاوند تصيرلهن ام وتخلصج من شر مهديه لا تكظهن وتغسل كلوبهن عليج هذا التردينه .
1
حبيب ـ منعم كصر حسك وحاجي أمك عدل لا أكوم اكسرك اشوفك ضيعت مالات الأوادم .
منعم ـ لا ما ضيعتهن بس من اشوفكم تخبطون اوكفكم عند حدكم وكافي صرنا مهزله ما كافي خضير يوميه هاد على لميعه وكاظها يريد يجرها للبيت والله حرمته لان انتوا ما طلكتوها منه وتاليتها انجلب علينا ما تطلگونها شمنتظرين تردون خضير يسويلكم فضيحه وهو خبل متخافون يكظها كدام الفلاليح وهو مسودن
لميعه ـ نزلت دمعتي من شفت دمه محترك عليه ردت أمشي وصارت عركه بين أبوي وأخواني ومن الحجي سمعت مشعان يحجي وما راضي الا أمي ما سمعت الها صوت خانسه مدري شبلاها ياخوفي تطلع تريد نهاوند لمحمود !
مشعان ـ محمود ما اله شيء عندي ونهاوند ما انطيها اله لو يعبد يم الباب لو ازوجها لجلاب السود لولد عمي ياسين ما انطي مره كافي عاد كلمه والثانيه أخواني واخواني واخوانك لو صدك كاظين الاخوه ومسوين الها قدر جان خافوا الله ببناتك ، ونهاوند أنطيها لعارف الولد خوش ولد وأهله أوادم ورادين النسب ، وكبل سعيت بزواج صبيحه وكاظم وهذيج هي اسعد اخواتها وهسه نهاوند لو تخلوني ازوجها لو اخذها لـ ولايه ومناك اخلي يجي يكبعها وياخذها .
1
لميعه ـ طلعت أمي وشافتنا وطلعنا نتراكض لغرفتنا وبعدها صارت صنطه مامش حجي ومشعان مشه لولايه وأمي ما تخلي نهاوند تخبز وتطلع لشغل بس الشغل الخفيف ولا تشوفها شمس ، يمكن وافقوا على زواجها من عارف .
وضليت أيام ما مخليه بالي يم السالفه بس اريدن برودة الكاع من خضير وسوالفه كل سبة وكت جاي للكاع وكاظ دشداشته ويهوبز عليه وأنه احاجي بخلك طويل مالي واهس اتعارك وياه ، نفسي مسدوده من العيشه كلها كرهني بنفسي وكلما اشوفنه تكش نفسي منه شون خليته يكرب صوبي وكلبي جفل منه ...
خضير ـ شتردين أسويلج ، أبنيلج بيت وأشتريلج غرفه صاج اسويها الج حطاطه خشب جوز بغداد من الولايه اجيبها الج اخليهن كلهن يغارن من غرفتج ويسولفن بيها بس أمشي ردي وياي ، مشتاكلح ومشتاك لريحتج الطيبه الاحبنها .
1
لميعه ـ يشتاكلك عزرائيل ويخلصني منك من دهر صابك ما أفتك منك انه ما اخلص خاب ما تولي منا شتكول علينا الاوادم .
1
مشيت واجه يهف وراي ما ظنتي يسوي شيء حسبالي يهوبز بس طلع مسودن وجرني بنص الحشيش ويعت بي ولك من فلك فلكك شتسوي تسودنت يا صخام الوجه على هالطركاعه صالحه لحكيلي وخر عني لا ادج عالمنجل وافتك منك ومن شرك صالحه لحكيلي يصالحه ...
خضير ـ خذيت حكي وكسرت عينج والج مني غيرها اضل وراج واخذ حكي الا تملين وتجين وياي اني الج يبنت حبيب .
2
لميعه ـ الله يأخذك ويخلصني منك يا نذل ، عافني والم بثوبي الوسخه بقذارته ، نعله على يومج عطايات ما الج كبر بين الكبور ما تردين رحمه من عندي ، بجيت ولطمت والقهر ما كدرت اعيط وافضح روحي والعالم تضل تعلج بلحمي شكول عليكم ، لفيت ربطتي ومشيت وانه اغم نفسي وصلت القصر شافتني أمي
2
الحجيه عطايات ـ شعندج راده البيت وشغلج كملتي وصالحه وينها ماهي وياج مو احاجيج شمالج تخشبتي
لميعه ـ ما حاجيتها كظيت ثوبي ودخلت تسبحت وتنظفت وطلعت فرشت سجادتي وصليت ودعيت الله يفك طلابتي ويخلصني من خضير وشره لان اهلي ما منهم فايده ، أشكي طلابتي يم الله هو يفگها ويأخذلي حكي من كل واحد ظلمني .
ضليت سبة وكت خانسه على سالفتي وهو ما عاد بين كون عزرائيل كظ روحه وخلصني منه ، ونهاوند عقدوا الها وبظرف شهر جهزتها أمي وصبيحه احسن جهاز وضلن بيت مشعان مناك گبلهن جهزنها كملنها وكبل العرس بكم يوم اجتي وجابلي وياهن ملابس حلوه وأمي مشتريتلي كومه ملابس وشغلات ترست البوفيه تجيب وتبيدر عليه حسيتها مقهوره عليه ما حاجيتها ولا تشكرتها لان مالي نفس بكلشي انه الزاد أحسه مر علگم والماي يجمر بلعومي من القهر .
3
كاعده بصف البوفيه وأعاين الهن يكلبن بجهازها ويصفطن ويرتبن وهي فرحانه طايره من الفرح وصبيحه تجاجيها وتعلمها وأمي تعاين لي واصد وجهي عنها .
واجه يوم العرس وأمي ما منعت ولا عارضت ناس غربه مالها كوه عليهم يردون يفرحون بأبنهم ، واجو شكثر ناس كلهن لبسهن راقي ومرتب وزفوها ويه رجلها حلو مبين خوش زلمه ومشت وياه الله وياها ، الله يسعدج يخيتي تستاهلين كل الخير .
ومشت وراحن وياها صبيحه وهبيه وحربيه وضلت أمي تعن وتون وتبجي وصالحه تسكت بيها .
الحجيه عطايات ـ يمه مشت نهاوند والدار فرغت يمه اليوم عريب مشت يمه بنياتي مشن وخلني سوده بوجهج يعطايات .
صالحه ـ كافي ياعمه شلزومه هالحجي وليش الدار فرغت أسم الله على ولدج وخلفتهم، وهاي سنة الحياة كلمن تمشي لبيت زلمتها چا انه مو عفت بيت أهلي ولحكت أبنج ولا ورى ولا كدام مفلسين من كلهن ما الله قسمنا ويصيرلنا فريخ نلعب عليه .
الحجيه عطايات ـ لاتوجعين گلبي بحجاياتج يصالحه اسكتي يا صالحه اسكتي خلي الجرح المدثر سالفتج دك بكلبي بهاون أنتِ ولميعه سوده بوجهي عليج يلميعه
1
لميعه ـ گمت لغرفتي وتذكرت اللي صار وخفت تنعاد عليَّ دكة خضير ما تنسي ولا ظنتي اخلص منه وياهو اليفك طلابتي ويه هالمسودن ماكو غير صالحه أحاجيها وخلها تحاجي منعم بلكي يطك عرجه ويخلصني منه .
وضليت على هالمنوال كل يوم اكولن باجر احاجيها لما خذني الوكت ويوم كاعده احش لهوايش واجتني مره غاد تهف بعابيتها يا حافظ منهي هاي ما عدنا حرمه بهل الضعف تكول خيزرانه وكلنا مدعبلات ، يا خيزرانه دگول محراث تنور دخيلك ربي هاي جايه والشر معجج وراها شعلومها جنها كربت عليَّ .
ـ أنتِ لميعه
ـ أي أنه لميعه منهي أنتِ .
ـ ها أنتِ لميعه مو أكولن شكلج مو غريب عليَّ
ـ مو گتلج انه لميعه شنهي طرنه ما تسمعين وبعدين منهي أنتِ وشسالفتج وشتردين مني ومن أسمي شنهي طلابتج .
ـ أنه حرمة خضير وطلابتي وياج طلابه وما يفگها الا موتج!
ـ ما احس الا أنهبدت عليه وتطك بيه وتجر بربطتي ما ردت أمد ايدي عليها بس مامش منها خلاص وكظيتها وجريت شعرهة ، دولي غاد لا ادوس عليج بقندرتي
ـ فگي عن رجلي ام الزولم يوميه كاظته ونايمه وياه بالحشيش من جان أستحيتي ما خفتي تجيج حجايه ويسمع ابوج من فلك فلكج يبنات عطايات حتى المتزوج ما خلص منجن امهات دوده .
ـ هجمت عليها وخنكتها ولج جنج محراث تنور وتحاجيني معلك تراه جان رجلي كبل لايصير رجلج وبعدين كظي زلمتج لان هو ملاحكني واني عفته الج وبختج لان ما يشرفني يكون رجلي من امداه من بين الزلم وامداني من صرت حرمته وساعة الكشره الصرت على ذمته
كظي زلمتج لا يوم ادزه الج محمل بكونيه التبن شلتها ونفضتها بالكاع والدرب الجابج يعثرج اذا شفتج بكاعنا مرتن نوب الا احطج واكتلج وادفنج ولا من شاف ولا من درى وانه بنت حبيب اسويها وجديتي كتيبه وروحي سالي الحبايب على كتيبه وهنا يسولفن الج تأريخها مطمس بالدم والميراث يتوارث ، يله غاد يله
2
مشت وتنفض بثوبها من أنعل ابوج لابو خضير لابو ساعة السوده ، كعدت اشتغل واجتي صالحه وطلعت بيها ضيم كلبي تخبلت
صالحه ـ لاتحجين على سالفتج لاحد تراهم يرجعونج اله وأنتِ حاجيتي حرمته ، كون هي تكظه وتخلصج من شره وهو خنيث صاير مكفخة امه وأخواته وحرمته وكحه موكفه البيت على دك رجل ، هاي ما تعجبج جنها شطب رمان داهيه سوده سايكه عليهم كلهم .
لميعه ـ هي هيج لازم يله ينعاش وياهن لاتذكريني من دهر صابهم وفكني منهم .
ومن بعد هذاك اليوم صدكت صالحه وصدكت حرمة خضير وبعد ما كرب صوبي وقليل المحه ومن اشوفنه اكظ اللثامي وامشي بغير صوب بس عيونه تضل تلاحكني ويضل سبة وكت يخنس شكد ابتعد بس اضل اخافن منه ومرت تسع سنوات وبنته صارت مره واشوفها تتلكى ابوها وتعاونه وعمر راح من عمري وانه على ذمته وابوي حبيب عاند ما طلكني منه وضليت على ذمته المهم ما يردون وحده من بنات حبيب ينجاب طاريها ويكولن بنت حبيب مطلگه بس عادي تضل كاعده بيت اهلها وتخدم النساوين وتفلح وتزرع وتحش وتركض وره الحلال والصغيره والجبيره براسي وينج يا لميعه وتعالي يا لميعه يعثرون بالكاع صاحوا لميعه
3
كلشي ما ردت منهم بس يطلكوني عافوني معلكه بإسمه وهالعمر المر وخضير المسودن فك شره عني والعرفته من صالحه على اساس حبايب طاكاته سحر علمود ينساني ويكطع رجله منه وخافن لايكظني ويحبلني ويرجعني على ذمته وهذا الشي ما يردنه ولا انه اريده وشيسون خل يسون مهم خلصني منه .
ولا حسيت بالوكت شون فات والفروخ كبرت وولد أخوي صاروا زلم ونهاوند خلفت بنيه وثلاث ولد وتزوجن أخواتي بيت ورجال وجهال وضليت أنه بس أباوع عليهن ومن يجن يلمعن هنا وخلفتهن ونهاوند يجييبها بسياره حديثه من هاي الغاليات وجهاله كاشخين وجنطتها مليانه وشحلاتها وصايره مثل عيالها واحسن بعد هنا وصبيحه نفس الشيٕ الله يسعدهن يستاهلن كل الخير .
1
يسولفن ويحجن عالملابس وعالعيال وانه صافنه واباوعلهن وعايفات جهالهن وكل شوي يكومني واكومن اغسل واشطف واوكل وانوم واركض وراهم اجمعهم من الشموس هاي نهاوند كلما تجي انه اكعد واكابل جهالها وامي تتخبل لا واحد منهم يروح بعيد وكلمتها دوم تكولها .
الحجيه عطايات ـ ركضي كظيهم جهال غرب شيخلصنا من عارف ولكم حبوبه اركدوا بكاعكم ، لميعه عينج عليهم .
1
لميعه ـ صار ، كل العيال تأكل وانه حايره بالزعط بس ولد اخوي ما يقبلون من يشوفوني حايره بيهم يضلون يحجون على عمتهم نهاوند ، واجه الليل كظيت مخدتي وبحضني بنت نهاوند تحبني وتنام يمي وعفتهن يسولفن وسمعت طاري سميعه! ويكولن ما تخلف مدري مهديه مسويتلها سحر وتابعه كاطعها نسلها
ضميتها بگلبي ولفيت رأسي ونمت ما اريدن اسمع شيء من هذاك الصوب تسع سنوات مرن من عمري مر وعلكم جرن عليه تسع سنوات لا انه شفته ولا هو شافني وسميعه كذلك ...
كاعده أغسل بالحوش ودخلوا حربي وباقر فرحانين ناجحين حربي راح السادس وباقر خامس اعدادي بس محد أستقبل فرحتهم بس أمهم ومشعان جان بالولايه حربي دخل غرفته وأمه لحكته وباقر أبتسملي ، مبارك يعين عمتك
2
باقر ـ الله يبارك بيج عميمه مشكوره ها حبوبه ماكو مبارك نجحت .
الحجيه عطايات ـ مبارك حبوبه ، چا أخوك شبي عنفص ودخل الغرفته شنهي راسب
باقر ـ لا الحمدلله ناجح ومعدله زين ، نعحبج احنه ولد مشعان.
الحجيه عطايات ـ أي چا ولدمن يحبوبه ، امشي روح على عمك جاسم وجيب الغنم والهوش هاذ يضل يدودي ما يلفي عالبيت .
باقر ـ صار حبوبه .
لميعه ـ راح ورجعت لمطبخ طبخت الغده وهيج كاظيه حياتي بالبيت والشغل والفلاحه ولمة اخواتي وهوسه جهالهن ، بس الما جنت محسبه اله حساب اشوفن بنته عكب تسع سنين ...
1
كاعده أخيط جودليه أنه وأمي ودخلوا علينا مشعان وحربيه وبناتها ونافع وغافر ولازم ايد بنيه صغيره وحليوه صايره بنصهم تطلع بعمر حليم أبن مشعان وكرب نافع حضن أمي ويبوس بيها وفرحان بنجاحه وراه غافر كذلك حضنتهم وتبوس بيهم وتهلي وترحب وانه عيني عالبنيه تباوع بالوجوه وتضحك لمشعان ومشعان يركصها من خدها ولازم أيدها
الحجيه عطايات ـ هلا حبوبه هلا بالشيخ قصر جده هلا بنافع هلا عزيز گلبي هلا حبوبه هلا بيكم مبارك يحبوبه مبارك والله لو اعرف اهلهل جان هلهلت يمه فدوه وصدقه لناجح يحبوبه .
نافع ـ الله يبارك بعمرج حبوبه
الحجيه عطايات ـ منهي هاي الفريخه الوياكم ؟ .
نافع ـ هاي نور
الحجيه عطايات ـ يا نور ولك
غافر ـ بنت خالتي سميعه .
لميعه ـ صفنت عليها ونزلت رأسها ورجعت باوعتلها ونافع كبل شالها وخلاها بحضنها وأمي حسيتها تتهزم منها ، وأنه أباوعلها لابسه ثوب يخبل عليها ورجليها طالعات وشعرها ذهبي من للون عيونها ونافع تقرب شالها ويبوس بيها وغافر انزعج ونزلها من حضنه
1
نافع ـ بوسي حبوبه هاي هم حبوبتج أم أمج شون جديتج مهديه ام أبوج ، يله بوسيها .
نور ـ شلونج جده اني هم نجحت وبيبي مهديه أنطتني ثلاث معاضد ونافع هم انطاني ثلاثه شوفيهن شكد حلوات وكالت من تروح لسوك هم تجيبلي بعد ذهب
لميعه ـ بوست أمي وأمي تباوعلها وتنزل راسها ونافع اخذها لديوان على أبوي ولحكه غافر ومشعان يصيح عليه .
مشعان ـ نافع ولك نافع ، شگد رأسك گوي .
الحجيه عطايات ـ مشعان يمه حاجيني وأحجي الصدك مو أنت الجبتها وياك!
مشعان ـ لا مو أني ، نافع جابها وهي رفيجتهم تؤام ثلاثي ما يتفاركون جابوها واجو عليج يفرحونج بنجاحهم وحتى لو اني جايبها وياي يمه نور مالها ذنب بسوالف صارت بالماضي طفله ما تدري ولاتعرف شيء
الحجيه عطايات ـ وأمها شون دزتها وياك شون تفاركها وهي بهل الحسن .
مشعان ـ لاتشيلين همها تدري بسوالف نافع مشيب گلبها يوميه جايبها ومخليها ادور عليها بالدرابين يوم تحطه وتكتله .
الحجيه عطايات ـ ليش أنت تحاجيها .
ـ لا بس كد السلام من بعيد هي ما تحاجي أحد عازله نفسها بيتها مالها دخل بأحد بس بصبيحه تطب وتطلع من يمها وتروح على عيالها
ـ يعني رجلها تأخذ على مهديه وبناتها
ـ اي چا تكطع رجلها منهم وزينين مو زينين ترضى بيهم وتسكت وغصباً عليها وأهل رجلها وأجداد بنتها .
لميعه ـ نزلت رأسها تلف بالخيط وإيديها ترجف أيباه على العمر شون مر خطف بينا الوگت وتسعة سنوات كظت وهما وسميعه عالخلاف كل ظني اليتبرون من خلفتهم سبة وكت ويرجعون حبايب وأحباب بس ما عبالي يكظي العمر والزعل هو هو والصغار صارت كبار والزعلوا عاشوا وخلفوا والگلوب بعدها مخزنه جروح مدثره .
1
كامت لغرفتها ومشعان ضل ساكت وباوعلي نزلت رأسي والعبره بصدري تخرخش ، كلشي شفت بحياتي وجرن على گلبي ضيم وضلايم بس مال أشوفن بنته ومنهي أمها ، أمها أختي تؤامي ، هاي الما جنت محسبه الها حساب .
شلت الجودليه وخذتني رجليه أدور عليها ريد اشوفها تشبه منو تشبه أبوها لو إمها ، أيديه يرجفون واعجد بطارف ربطتي وصلت الديوان وهي بحضن حبيب وتلعب بلحيته وهو صافن ويباوع على نافع وغافر ما راضي على تصرفهم بس ساكت ولازم نفسه .
2
باوعتلها وشافتني گبل رجعت أخط برجليه وطلعوا نافع صاح وراي .
نافع ـ عميمه ما تسلمين عليها أنه جايبها اعرفها على خوالها وأريدها تعرف عدها خالات وجد وجده ما اريدها تكون بس حصة مهديه ، أنتِ خالتها أخذيها بحضنج عمه ونور تستاهل .
لميعه ـ صافنه علينا وتباوعلي دنچت وأيديه يرجفون تلمست خدها الحلو ، أني اسمي لميعه وأنتِ شنو أسمج .
نور ـ أسمي نور صباح ياسين
لميعه ـ يخبل أسمج منو سماج هالاسم الحلو .
نور ـ بابا هو سماني وسماه أخواتي هم
ـ شنو اسماءهم أخواتج
ـ لبنى ولينا .
ـ بستها ونزلت دمعتي مسحتها عالسريع يله دخلوا غافر نافع دخلوها خاف جاعت خطيه ، دخلوا وياها وراحوا على أمي وكعدت يمها وتسولف ولاحظت عليها اجتماعيه وللسان وتحجي ونافع وغافر صافنين عليها .
نور ـ صارن عندي سته معاضد بعد غافر وخالوا مشعان أنت كلشي ما انطيتني
مشعان ـ هههه تدللين خالي شتردين أنطيج .
نور ـ اي مو تنسى .
غافر ـ نور هديتج موجوده بالبيت من تروحين اجيبها الج
نور ـ ماشي
نافع ـ شنو هديتها
غافر ـ بعدين تعرف
نافع ـ لا كول هسه بس لا بايسكل ممنوع نور ما تصعد بايسكل
ـ ليش ممنوع وهي تحب البايسكل من زمان رادت وعمي ما جابلها واني جبتلها
ـ كلت ممنوع لا تلح
الحجيه عطايات ـ شبلاكم جده تمالختوا ، مشعان حضر طلي زين واذبحه بهل مناسبة نجاح الشيخ نافع وغافر
لميعه اكو بالبوفيه جكليت جيبي اطشه عليهم .
1
مشعان ـ أن شاء الله ، حربي وباقر وين
لميعه ـ باقر بالسراحه ويه جاسم وحربي يعاون منعم بالكاع ، عافنا وراحلهم ولاحظت أمي شكثر تفرق بينهم وحربي وباقر مبارك كوه طلعت منها لباقر ضجت من تصرفها وطلعت الها الجكليت ذبيته بحضنها وصاحت بيه
الحجيه عطايات ـ شبيج كمتي تزاكطين لو لان شفتيها
لميعه ـ أشوف منو! يمه ليكون عبالج عليها لاتبخطين وهالسالفه صارلها عمر ومضى عليها الوكت فكي عني بس راجعي نفسج وتعرفين شمسويه ، نافع أمشي الحك ابوك وساعده بالذبيحه حربي وباقر مو خدام بعدني ما مكمله حجايتي كفختني بجيس الجكليت فشختني شفتي حجايتي شون غثتج .
2
ـ أنلطمي على حلكج لا أكوم افركه الج وادوس على راسج ، مالج غرض وكومي على شغلج شكو لزكتي يمي .
نور ـ بيبي ليش ضربتيها خطيه
لميعه ـ جديتج ما تعرف خطيه گلبها گلب يهودي حجيتها وطلعت خليتها ترعد وراي ونافع وغافر طلعوا ونافع شايل نور وغافر يحجي عليه ما راضي لان شالها
غافر ـ شگو شايلها نزلها يمعود ترة جبيره مو مال شيل صدك تحجي .
نافع ـ وليش ضايج وأني الشايلها مو أنت عاجبني اشيلها وافررها من اتعب أكولك .
ـ شو نزلها وخلها تمشي شنو مكسره ما عدها رجلين شكدها شايلها ، شو نزلي يله أمشي وانت بعد لاتشيلها عدها رجلين وتمشي لوحدها .
لميعه ـ شافوني وأبتسمت الهم ومشوا واجت وهبيه ضايجه وجهه ما يكصه سيف ، خير وهبيه شعلومج
وهبيه ـ شعلومي غير أمج وأبوج تاليتي أموت قهر على ولدي ، اني ما متنحسه لا والله خل تذبح وتعزم وتطبخ وتطش جكليت وتهلهل شتسوي تسوي حفيدها وشكو بيها شيء ناجح بس ليش التفرقه ...
"مو قبل كم يوم نحجوا ولدي شو مبارك محد گل الهم وروحي شوفي أبوج حبيب شون حاضن نافع ويبارك اله وحربي خنت حيلي يباوع وكاتم بگلبه والله اخاف عليه لايصيرله شيء هو كبر صار زلمه ليش مستصغرين وجوده بهل القصر لو يخافون حربي يكبر وياخذه الشيخه من عمي وهما يردونها لنافع ترة الشيخه مو بالمزامط والشيخ من الكماط شيخ مو أبني وأدافعله بس حربي من كماطه شيخ .
الحجيه عطايات ـ صمي حلكج وهبيه وهالحجايه حجيتها مرتن نوب أفركج حلكج وأدزج لأهلج والتفرقه محد فرق بس أنت ما تحبين ولد ضرتج وتردين بس الج من المزامط مالتج بالكماط هو شيخ خايبه ما تسكتين بعده عمج بحيله تردين الشيخه لابنج ، يله أمشي عاوني زلمتج بالذبيحه وحجي ولغوه زايده ما أريد .
1
لميعه ـ وهبيه خيطت حلگها ومشت كلمه ما حجت ورجعت أمي حاجتني بعصبيه
الحجيه عطايات ـ وأنتِ رأس الفتيله لاتيششينها وتورثين النار بين الضراير وتشلعين گلب أخوج بطلايب هو ونسوانه خلي مرتاح ، لو هاي هي صرتي فتنه بالدار بس معججه بالشر .
لميعه ـ ما حاجيتها ولحكت وهبيه ولكيتهم ذابحيين وهي وصالحه يصلخن كعدت اعاونهن وحربيه واكفه يم مشعان ، هاي ليش ما تجي تعاوننه شبيها هم حبلى
صالحه ـ لا مـا ظنتي بس تخاف على جبتها متشوفينها تنفض بيها دكول بس هي لابسه جبه
لميعه ـ سگتي لاتسمعج أمي ، وكملنا وطبخنا وصبينا وكعدنا نتغدى وحربي صافن ويباوع على أمه وبعدين باوعت على أبوي مخلي نافع بصفه ويسولف وياه والحصه الجبيره تندز اله من أمي ، حبيب مخلي نافع وغافر ومشعان حربي وباقر حتى لو ابوهم ما يفرق بس يلاحظون التفرقه من الأهل شكول عليج وعلى شغلج أنتِ وحبيب يا عطايات .
1
كملنا وكمت أشيل المواعين لمطبخ أغسلهن ولكيت حربي وأمه يحجون وحربي محترك دمه .
حربي ـ المزامط والذبايح والجكليت يركعن على رأس نافع بس ولد الخايبه حربي وباقر تفله محد تفل بوجوهنا ومعدلاتنا عاليه راحت بنفسي أسمع مبارك ونافع ذبايح والقصر كله مخبوص بنجاحه
"وبعدين منين نجح بذراعه غير بالدفرات والواسطات كلنا ندري بمستواه واحد مسربت كاظيها يتطفر من الحياطين المدرسه وملاحك جماعته خلف الله على عمي جاسم ما خله دجاجه بالمحبس ما شالها ونگلها للمعلمين ترس حلوگهم دجاج ووز وبيض عرب وشيش الدهن الحر تركع كله علمود نافع ينجح .
وهبيه ـ ولك يمه شلك بهل الحجي هذا وتحرك بدمك ما تسوى يمه وبعدين هو أخوك ميخالف وليدي ميخالف وهم مريض خطيه
ـ أخويه على عيني وعلى رأسي وما اريد منهم شيء بس على أقل أخوي باقر ، أنتوا تشوفونه يضحك وما مهتم بس بداخله مقهور وشبي نافع أفندي شنو مرضه أبو صفار هو هذا هم مرض خبصتونا بي كلمة والثانيه مريض لا والله تردون حجه وتزيدون الدلال عليه والا هو من بعده صغير تمرض مره خوما يضل بي لما يكبر والمريض ابو صفار ما ياكل لحم أحمر ترة مو أغبياء
ـ ولك يمه كافي لاتسمعك جديتك
ـ خلها تسمعني ما خايف من أحد وهذا شغلها ما يعجبني حربيه تجي خاتون ما تجيس غرض بهل القصر وهبيه ضاله خدامه لرايح والجاي يمه ما تستكين لا اشيل رأسي وأهج لـ الأنبار على خوالي وبعد تحلمون تشوفوني والله أسويها وحتى باقر أخذه وياي .
2
ـ يمه سوده بوجهج يوهبيه ولك حربي أوكف احاجيك حربي يمه ، تريد تعل گلبي تعال يمه أحاجييك .
لميعه ـ لحكت أبنها وتتوسل بي وصالحه سگتت ما حجت ولا أنه دخلت نفسي ،وأمي ترد عليه وتسميني فتنه بالدار مالي شغل بعدين يبين شغلها الأعوج زرعت التفرقه بين الاخوان وخلت واحد يغار من الثاني ومشعان يركع ويخيط وراها ويعدل بينهم علمود ما يخرب خوتهم بس شيلحك وعطايات تفتل بالشر تتنفس طلايب .
1
صبيتلهم جاي ونور كاعده بصف نافع وأمي وتباوعلي عيونها حلوات وتنحب هالبنيه انطيتهم الجاي ومشعان ماكو شوي وأجه وباوع على غافر وسگت وأشر لمنعم وطلعوا برة حسيت صاير شيء لان كلهم طلعوا وأمي لحكتهم تفتهم منهم شگو .
صالحه ـ شمالهم طلعوا مخبوصين وعمتي هم لحكتهم ، خاف علمود حربي
لميعه ًـ لا ما ظنتي وحربي كاعد ما حجه شيء بس السالفه بيها النا وجان تكب العيطه يا حافظ منهو مات
أمشي ، وطلعنا ولكينا أمي تبجي شكو .
الحجيه عطايات ـ طين على رأسج يصبيحه ترملتي ولك يمه غافر خنت حيلي عليك يحبوبه تييتمت وأبوك أشتشهد يحبوبه ، كاظم أستشهد .
2
لميعه ـ خبر موزين نزل علينا وگلبي عصرني وبجيت عليه شون زلمه أدمي وغافر نسخه من أبوه ومشعان حاضنه ويسكت بي وكطع كلبي من يحجي ويه خاله
غافر ـ ما شاف شهادتي ويفرح بنجاحي وأني لحكت نافع اجيب نور خالتي وصتني عليها وأجييت وياكم وما لحكت عليه وأبشره وأفرحه وأكوله بابا نجحت راح وعافني
1
لميعه ـ خواله حاضنينه ويسكتون بي ورجعت أمي تبوس بي وتسگته وهو ملخ روحه ونافع أخذه وحاضنه وتالي تحضروا وكلهم يمشون ردت أروح وأمي ما قبلت
الحجيه عطايات ـ شعندج موليه فاتحة ونسوان أكعدي واسكتي والقصر راح يفرغ كلها تمشي منو يضل .
ـ مشت وتعدل بعبايتها ونور ركضت وراها تريد تمشي وياهم
نور ـ بيبي أروح وياج
الحجيه عطايات ـ وين أخذج وياي وگتج رفگتي لميعه تعالي أخذيها يمج ما اكدر اخذها وياي هسه نسوان واخافن تضيع مني .
1
لميعه ـ تعالي يمي اجتي وكفت يمي وهما مشوا واجه نافع يمشي سريع
نافع ـ عميمه ما أوصيج على نور هاي أمانتي اني اروح ويه غافر لدفنه ما أكدر أعوفه لوحده ديري بالج عليها لما أرجع .
1
ـ أن شاء الله
نور ـ نافع لاتعوفني أني هم أريد اجي وياك وما أعوف غافر لوحده أخذوني وياكم
نافع ـ ما أكدر هسه أخذج كومة زلم وأنتِ بعدج صغيره أبقي يم عمتي وأني بعدين أجي أخذج ونروح وأوديج على غافر خوش
ـ هزت رأسها ومشوا ودخلتها غرفتي وحاولت ما أبجي كدامها طفله تضل تخاف وكعدت تسولف وياي وتسألني واجاوبها ورجعت أني سألتها نور تحبين نافع أكثر لو غافر
نور ـ أثنينهم أحبهم
ـ منو أكثر
ـ والله أثنينهم بس نافع أحبه اكثر وغافر هم أحبه
ـ ما تعرف شتجاوب لان فعلاً واضح تحبهم أثنينهم بس نافع أهتمامه بيها حسيته حب! ولاحظت أهتمام وخوف حرص غافر اكثر من نافع بغير أمور .
وضلت هالليله يمي وهواي سولفت وياها وحيل حبيتها دخلت بگلبي وهي تنحب وخوش بنيه لما نامت وصفنت عليها يمكن لما دگة جديتج الناقصه بيه جان أنتِ هساع بنتي بس وين أنه حتى ريحة الخلفه بعد ما أشمها ، نحرمت من ابسط حقوقي لا زواج بي خير ولا حصلتي طفل ويصيحيلي يمه ضليت معلكه بإسم خضير وشايله شغلهم وفلاحتهم والعمر يمشي وكلشي ما شفت من عمري بس ضيم ووجع لگلبي من أخذوا مني أبوج وزوجوا أختي ، يا هضيمة گلبي الما تنسي بيوم ويضل عشكك بگلبي يصباح لما أموت ، حتى لو أنت تزوجت وخلفت وعشت حياتك ونسيتني أنه ما أنساك ما يهون عليه عشگنا ...
____________________
2
سميعه
ـ ضليت حاطة أيدي على خدي وخايفه لايجي صباح وما يلگاها سوده بوجهك يا نافع والله لو الزمك الا اشرب من دمك مرمرني بسوالفك صايرلي حنين ومنين تجي المحنه من حبيب لو عطايات هسه تشوف دم سنونها ولا تشوف بنت سميعه .
صباح ـ نور وين
سميعه ـ وكعت گلبي يا صباح احجي گول
ـ بنتج وين
ـ يم أهلي
ـ أدري يم أهلج سمعت من أمي أنتِ دازتها لأهلج وشون أدزينها للقريه
ـ مو أني وشعندي دازتها ،بس نافع هو أخذها وياه
ـ منو يجيبها هسه أني تعبان ومالي خلك ، شوفي مشعان روحليهم وخل يجيبها
ـ ماكو رحتلهم أني وصبيحه مأخذ عياله ورايح
ـ شون طلابه أدري بنتج غير تتنبهين عليها بيش مشدوهه شو بس هالبنيه متكوليلي شون تغفلين عنها وتخلين نافع يأخذها شنو من أم أنتِ .
ـ شقصدك صباح تعيريني لان ما خلفت الك بس نور
ـ لا وين راح تفكيرج بس ضجت لا نور راحت القريه وأني محذرج ومانع نور توصل حبيب وعطايات وأنتِ ولا كأنما صباح حجه لا أبالي ، أمشي لبسي عبايتج أهلي عزمونا عالغده
ـ ما حاجيته بس أنغثيت من حجايته بس هالبنيه! أي أكيد يريد خلفه قابل يضل بس على نور أني هم هالشهر ما رحت لدكتوره والعصر اروح لصبيحه خلها تشوفلي حل ومهديه متجوز مني الا تزوجه وقلق ما بيها تخلف بعد الربو مأخذ نص حيلها الحباله صعبه عليها بس الحجي المقصود عليه ويريد ولد يشيل أسمه هو ما يحجي بس أمه وأخواته غضب الله عليهن .
لبست عبايتي ولحكته عصبي ويمشي سريع والله سالفة الغده هسه وراها حجي يغث وهي كلما تعزمنا تسسممني بحاجايتها وارجع مضروبه على رأسي من القهر والكلام الأسمعه ونوب نور مشت للقريه شيخلصني منهم الا يكرعون رأسي اخ منك ينافع .
وصلنا البيت وسلمت وكعدت باوعتلي وعيونها تحجي التريد تكوله وتوجع كلبي وتهضمني نفس سؤالها كل مره تسأله .
مهديه ـ شون كيفج ما تبينين علينا
ـ الحمدلله عمه زينه والله ملتهيه
ـ بشنو ملتهيه شو بطرك هالبنيه من كثر خلفتج
ـ سگتت شجاوبها
ـ اي ما حبلتي
ـ لا والله عمه الله كريم
ـ الله دومه كريم ليمت يضل صباح كاعد ينتظرج تجيبن اله ولي العهد يشيل أسمه ما يصير يضل بس هالبنيه وخلفته كلها بنات وهذيج عذرها وياها المره مريضه بس أنتِ شنو عذرج هم مريضه اذا مريضه وما بيج خلفه بعد كولي ليش تضلين مسربه للاطباء ومصاريف زايده وفايده ماكو .
1
ـ لا أسم الله ما بيه شيء بس كالت اصبري يحتاجلي وقت
ـ شكد يحتاجلج بعد صارلج ثمان سنوات راح تطبين التاسعه وابني صابر عليج ومتحمل وما يريد يهضمج بس ما بيها مجال يمه صباح العمر يمشي ما تريدلك ولد سند لأخياته تضل بس على هالبنات .
صباح ـ ها يمه ، الله كريم
مهديه ـ أمشيلك على مره وتزوج يمه ما يصير تضل بدون ولد لو هم مثل محمود ضل مجلب بإختها تالي هسه يروح لدوام وبناته لوحدهم الولد ميرود يمه شحلاتك من يكولون الك أبو فلان
صباح ـ لا يمه
ـ لا يمه شنهي ، أريد منك توافق ونسوانك اذا خايف على زعلهن يرضن هذيج عذرها وياها وهاي متخلف بعد
ـ لا تخلف بيش طالبتها يمه مو خلفت نور وعندي ياها تسوى عشر ولد والله كريم
ـ ضل ملاحك نسوانك وتاليتك تضل بس على هالبنات وأني ما امشي على حجيك خل يمر هالشهر ونشوف المزيونه مرتك تحبل لا .
1
سميعه ـ تحجي بكل عين وكلامها مثل السم لاتداري خاطر لا تكول خطيه قبيحه شكل وللسان ، تحملت مغثتها بس هالمره ما كفت بس مغثه لا وجعت گلبي من طلعت تريد تزوجه والدمعه بطارف عيني واباوعله مدنك رأسه ويباوع على ولد اخوه قادر ورفع رأسه باوعلي برطمت وبجيت نزلت رأسي وهو گبل كال
صباح ـ يله سميعه كومي عاونيهن وصبن الغده
مهديه ـ بنتج وين دازتها لخوالها دروبج هاي بطليها وأدري بسوالفج تريدين ترجعين العلاقه بين بينا وبين بيت حبيب
1
سميعه ـ عمه مو اني دزيتها هي راحت ويه خالها وعلى واهس نافع وغافر .
مهديه ـ لاتحلمين يسميعه ودگتكم بينا الكواوويد متسويها وأذا أنتِ نسيتي وبيت ورجال وخلفتي احنه ما نسينا دكة اهلج بينا ، ورجل بنتج تكطعينها من بيت حبيب لا اخذها منج وأنه اربيها لان أنتِ مو مال تربيه مسربتها وعايفتها على حل شعرها طفله وتمشي للقريه ولا ابوها يدري وأنتِ بارده ولا مهتمه شنهي من أم أنتِ بنيه وحده مـا تكدرين تسيطرين عليها
2
سميعه ـ ما حاجيتها عفتها تحجي عليها ورحت وياهن وصبينا الغده وأكلت سم مو غده ما صدكت كملنا ولفيت عبايتي وطلعت ما بيه أتحمل بعد بالمطبخ اسمعهن يحجن عليه ما تخلف وما تخلف ليش ما اخلف مو خلفت نور .
صباح ـ وين رايحه وحدج
سميعه ـ ما اتحمل بعد خليني اولي بيتي
ـ أنتظريني هسه اجي
ـ شويه واجه وطلعنا للبيت دخلت الغرفه ما حاجيته بس ضليت ابجي ومهضومه وما حسيت غير سحبني بحضنه ويسكت بيه حضنته وبجيت أموت اذا تزوج عليه والله اموت روحي وراك اذا سويتها وكسرتني أني احبك وروحي معلكه بيك أنت مو بس زوجي اهلي وناسي كلهم منو الي غيرك سانده روحي عليك لاتكسرني صباح الله عليك لاتسويها وتتزوج ...
1
صفن بوجهي ومسح دموعي وباسني
صباح ـ أني هم ساند روحي عليج ومستحيل اكسر گلبج وأهضمج أنتِ ام نور الغاليه يكفيني جبتيلي نور ، ما أريد ولد هالبنات كافي خير وبركه وراضي بيهن وگلت الج قبل لاتهتميين للحجي دام اني وياج وراضي بكلشي منج هذا هو طنشي مثل طنشتي كل هالسنوات ولاتخافين وما ازعلج والله .
2
ـ حضنته ونمت بحضنه بإمان وبالي يم نور للعصر كعدت وصباح ما موجود بلكي رايح يجيب نور ، صباح صباح وين راح الرجال ، يمه سوده عليه نور صارت دنيا عصر وما بينتي عليه.
دخل عليه صباح مستعجل وغير ملابسه وين جنت رحت جبتلي نور صباح مو احاجييك
صباح ـ يم نور يمعوده رجل أختج ابو غافر استشهد هسه راحوا يجيبونه لبسي اوديج عليها
1
سميعه ـ نضربت على رأسي بشيء ثكيل والكاع افترت بيه عمت عيني عليك خويه عمت عيني عليك ابو غافر سوده بوجهي عليج خيتي وكمت ادك والطم تخبلت عليه وصباح ينفض بيه
ـ شدي حيلج وامشي اوديج على اختج محتاجتج هسه الله يكون بعونها ملخت نفسها تحركي بسساع
ـ ما ادري شون لبست عبايتي وصلتها لكيتها ادك وتلطم والدم يرش من وجهه ركضت حضنتها وضلينا ندك ونلطم .
صبيحه ـ ولج سميعه مات كاظم مات راح وخلاني ولك غافر وينك ابوك عافنا يمه .
1
سميعه ـ ضليت يمها والبيت انترس وامه وأخواته الطيبات شكد حنينات ما شفت منهن الا كل خير اخواته اثنين وامه وابو متوفي ، وسمعت اهلي اجو حضنتها اني أمشي اجيج بعدين
ـ لا سميعه لاتعوفيني ابقي يمي
ـ لا خيتي أمشي والله ما اعوفج انه شعندي غيرج بس اجو وما اريد اشوف احد منهم اتمنى تفهميني
ـ براحتج
ـ مشيت ولمحت طول أمي كبل غطيت وجهي وصرت بين النسوان ومشت من يمي وذيال عبايتها طخ عبايتي وريحتها ترست خشمي وسمعت صوتها كابلت صبيحه وادك وتلطم ما كدرت اباوع طلعت مستعجله وشفت غافر يبجي بحضن مشعان ونافع لازم جتفه سوده عليه يعيون خالتك ، مشيت وشافني وذب روحه بحضني حضنته وبجييت وياه وضل يبجي ويصييح وطلعت صبيحه وركض حضنها ما تحملت أكثر مشيت وشفت نافع ولك سليمه نور وينها
نافع ـ يم بيت جدي ضلت
صباح ـ شمطلعج برى امشي يم أختج
سميعه ـ لا امشي لبيتي بس جيبلي نور
ـ وين قابل وهسه وكتج امشي بابا يم اختج بيا حال وأنتِ وين تفكرين
ـ لاتلح عليه خليني اولي لبيتي
ـ ولي حتى مالات الاوادم ما تعرفيهن
ـ ما حاجيته وصلت البيت وكعدت أبجي لوحدي طكت روحي اجه الليل وأنه ابجي ومهضومه اليوم لمحتج يمه اليوم شميت ريحتج ما شتاكيتلي ما كلتي سميعه وينها ما شفتها هم سألتي عليه ، ريتني انه مكانك يكاظم أنت تستاهل تعيش بس انه على شنو عايشه بس قهر بقهر والمصبرني هي نور الاهوى الأتنفسه وينج يمه نور .
2
لثاني يوم يله جابولي نور وحضنت وابوس بيها منو جابج يمه شون هيج كدرتي تفاركيني
1
نور ـ خالوا منعم جابني
سميعه ـ خالج منعم! وشونه وياج هم يحبج
نور ـ كلهم زينين ويحبوني بس احب خالتي لميعه كلش هواي
1
ـ لميعه! تعالي سولفيلي ، اخذتها وكعدت تسولفلي ومنومتها بحضنها ودخل صباح ويبوس بيها ورجعت تسولف وصلت لميعه نور كافي ماما هواي لغيتي
صباح ـ ليش تسكتين البنيه خليها تحجي براحتها احجي بابا إشسويتي هناك .
سميعه ـ كعدت تسولف على لميعه وشون مهتمه بيها وصباح ساكت وباوعلي ها أرتاحيت من سمعت طاريها بردت نار گلبك
5
صباح ـ ما تنجبين وتسكتين شهل الحجي كدام البنيه من طاح حظج فلا تصيرين أدمي لا والله .
سميعه ـ راح الفاتحه وهي ضلت يمي وطول فترة الفاتحه ما طلعنا بقينا بالبيت ولا وصلت صبيحه ومر اسبوعين والعرفته أمي بعدها يم صبيحه لان الفاتحه بيته وبعدهم الناس تجي عليهم ، واهلي باقيين يمها
1
صباح ـ اختج ما وصليتها بعد هيج تجازين ام غافر ووكفاتها وياج مو عيب ما تحضرين فاتحه الرجال ما سجلتي موقف ، حابسه نفسج بهل البيت
سميعه ـ ما جادلته ضل يحجي وتالي طلع هالايام متخبل وكاعد ما احاجي احسن قابل جديد عليه واني هم مالي خلك ظهري يريد يطك ونفسي مخنوكه مدري شبيه من مات كاظم الله يرحمه اني روحي
مايعه! ...
اجتني نور ها يمه منو باقي يم خالتج .
نور ـ بس نسوان
ـ ادري نسوان وخوالج بعدهم باقيين لو راحوا
ـ لا راحوا كلهم وبيبي عطايات باستني وكالت سلمي على أمج أم حصن .
4
ـ هذا منطق كدام طفله ، فوتي يمه وبعد ما توصلين تكعدين وتكابليني ونافع ما تمشين وياه
ـ ليش ماما شبي نافع
ـ ما بي شيء لاتضلين بس تسألين دخلت وراحت الغرفتها تبجي هاي شون وياها ويه نافع عقلها بي هذا كله شغل عطايات ...
للعصر لبست عبايتي ورحت على صبيحه ولكيت يمها عمتها وحمواتها مكطعات نفسهن خطيه صبيحه شافتني وكامت تبجي وكعدت فرغت قهر السنين يمها ، وراح الطيب ما شفت منا اله كل خير ...
ومرت أشهر والحمدلله حبلت وكسرت عيون مهديه وصباح طاير من الفرحه بيه وأنه مداريه روحي اخاف من سوالفهن لايسون شيءويموتنه بطني عاد بس هالبطن واخ لنور .
وأختي صبيحه سوده عليه بعدها مصدومه وضلت بيتها أبنها زلمه وعمتها يمها وأني ليل نهار يمها ما عفتها ابد ومن ارجع نور تضل يمها وصار بيتها الثاني وعودتها يمها علمود لاتروح على مهديه لو تلحك نافع ما أريدها تختلط بهذاك الصوب لا أهلي ولا عيالي خليها بس على بيت خالتها هي كل أهلي وناسي ...
1
كاعدة أمشطلها وسمعت صوت احد أجانا وهي تريد تكمز وين موليه كعدي أكملج وروحي على بيت خالتج خاف غافر وأدزج للدكان تروحين خوش .
نور ـ ماشي ماما بس كملي خل أكوم .
سميعه ـ صبر يا بنتي مكروصه يله گملت روحي وشوفي منو اجانا بالاستقبال لما اغسل ملابسج
راحت واجتي تتبسم خيرج الوجه يلمع
نور ـ نافع وخالوا مشعان وياهم رجال!
ـ منو هالرجال! ما عرفتي
ـ لا أول مره أشوفه ، ماما أني اروح يمهم تردين مني شيء
ـ وين تولين يمهم أمشي على بيت خالتج دكت رجلها شكو شبيج ووجع ماكو نافع رجلج اكسرها اذا وليتي الاستقبال كعدي نجبي يمي حتى بيت خالتج ما تروحين وبعدين خيرهم جايين شعدهم اكيد اكو سالفه واجو ما يجون من زود محبتهم على سميعه ومنو هذا الرجال! .
طلعت وگفت يم باب الأستقبال الداخلي وأسمعهم يحجون بينهم وصوت زلمه غريب منو هذا!
ـ أني ما عرفت عليمن أروح وأعرف صباح وكلت أجي عليه واحجي بالسالفه وهو يكون أبن عمها وسألت عليكم وعليها والكل مدحلي منكم ورايد القرب منكم وسألت على المحروسه وكالوا مطلگه!
صباح ـ لا خويه البنيه ما مطلگه ومأخذها أبن عمها
1
ـ والله تريد الصدك صباح أني ردت اجر الحجي منك وعرفت البنيه صارلها تسعه سنوات كاعده بيت أهلها ما مطلگها من زلمتها وبلكي تسعون بهل السالفه ووتطلگونها من زلمتها لان ماكو مره تضل زعلانه تسع سنوات لان أني سألت وعرفت السالفه كلها
وخلافات عائليه خاصه بيكم ورجلها متزوج عليها وعايفها والصراحه يا جماعة الخير اني رايد نسبكم ووصباح يعرفني وبعد أني جيرانكم وتعرفوني وعلى عينكم وأبن المنطقه وزوجتي متوفيه عندي بس بنيه وبيتي لوحدي وشتردون أني حاضر .
مشعان ـ شنو هالحجي هذا صباح جايبني علمود هالسالفه! وبعدين بكيفكم تطلگونها وتزوجونها البنيه متزوجه بس مريضه بيها مس! من تزوجت صار بيها
"ممسوسه وكاعده تتعالج عدنا أمي الحجيه جاي تعالجها يم شيوخ وساده تصير زينه وترد بيت زلمتها يا طلاك يا زواج غير سالفه هاي .
4
ـ أبو حربي ، أني رايد نسبكم والبنيه ما بيها شيء أني سألت هواي ناس ومعارف منكم ، لاتسدها بوجهي بهل السالفه مالت المس! وكتلك بيتي وحدي وشتردون أني حاضر والله أدللها ويشرفني أخذ أختك على سمعتكم الطيبه والطاهره
ـ عمي يا أبن الناس ما عدنا بنات لزواج والحجي السمعته عن أختي كله مو صحيح وماكو اي خلافات عائليه ولا مشاكل هي وزلمتها وتصير زينه وترد لبيتها وأذا رجلها تزوج عليها حقه عذره وياه مريضه، بس العالم شغل وعمل ما عدها تصفط حجي فارغ .
سميعه ـ صار صوتهم عالي وطلع نافع باوعلي ورحت عليه تعال أحجيلي السالفه
نافع ـ مو سمعتي
ـ رجع كعد يمهم وشوي وطلع الرجال مستعجل ومزعوج ودخلت عليهم وصباح ومشعان يحجون
صباح ـ مشعان ليش هيج حاجيت الرجال وشگو بيها رايد نسبكم وأني أعرفه حق المعرفه خوش رجال وأهله من خيرة الناس وموظف وبيته لوحده ليش تكطع بنصيبها خل تمشي بقسمتها شنو هالحجي الكلته على أختك ممسوسه ومريضه من كل عقلك هاي عود أنت الجبير والواعي .
1
ـ شتريد مني احاجي ليكون تريد مني أوافق واطلگها من خضير وازوجه اله لا يابه لا ، شتحجي أنت لازم تخبلت عوزي اشد كرون ، سدي السالفه عمي ولاتحجي بيها لا كدامي ولا كدام احد ثاني
ـ ترى أختك من حقها تتزوج وتخلف شُــنو مبقينها على ذمة خضير الخبل صارلها سنين معلكينها ما كافي عاد
ترى الله ما يرضى بهذا شغلكم عمي خافوا الله بيها
سميعه ـ ليش تردون تزوجونها
مشعان ـ حاجي رجلج جايبني والله اكو رجال عنده سالفه وياك وتالي طلعت سالفته يريد يزوج لميعه لازم تخبلنا
نطلكها ونرد نزوجها!
سميعه ـ لا عيني لا ، حاجي صاحبك وخله يرد بالدرب الجابه ما عدنا نسوان لزواج وهي مو متزوجه خضير شنو طلكوها واتزوجها وين صايره دايره نطلك ونزوج حتى عيب شتكول علينا العالم ، شنهي صاحبها وكاتل نفسها عليها هالكثر .
10
صباح ـ سميعه خليج محضر خير وأنتِ تعرفين السالفه ليش تحرفينها وأختج نظلمت ويه خضير واحد مسودن وهو تزوج وخلف ليش مبقينها كل هالسنين معلكه خلها تمشي بقسمتها والعمر يمشي تخلف الها جاهل لكبرتها .
1
مشعان ـ وتريد اطلگها وازوجها مرتن نوب مو هذا التريده ، والله أرجعها لخضير المسودن ولا ازوجها لهذا الرجال وما عدنا نسوان تتزوج مرتين تردون تجيبون علينا حجايه وتفضحونا وهذا الموضوع هنا ينسد وما ينفتح وحتى أهلي ما احاجيهم بي واذا رد نوب حاجاك اقطعه من يمك وخله يولي وأنتِ هم خاف يجن نسوان من اهله حاجيهن بطريقتج وما عدنا نسوان لزواج .
4
سميعه ـ أي أن شاء الله .
مشعان ـ يله بويه نافع نمشي للقريه تأخرنا على جدك
سميعه ـ نافع باوع عليه وعلى أبوه بحقد وعصر أيده ولحك ابوه وكعد صباح مزعوج ويفرك بوجهك شبيك انزعجت ترة حجي مشعان صدك عيب نطلكها ونزوجها
صباح ـ ليش عيب بس كوليلي وين العيب بالموضوع الرجال داك الباب ورايد أختج بالحلال ليش توكفين بقسمتها وتشيشين أخوج وتأدين كلامه .
ـ لا ما يصير تتزوج مرتين
4
ـ ليش ما يصير ، شيخ أنتِ يصير وما يصير دامج تعرفين العيب ليش ما حجيتي عيبج قبل لا أمج تلعب هاللعبه عليه وعلى أختج الضحت بنفسها علمود بس تسترج .
" لو العيب صار بس من سمعتي اختج تقدمها واحد وبعدين عاجبج تضل هيج طول عمرها معلگه بزواج نحسب عليها من واحد مسودن جلاب السود ما ترضى بي ، عاجبج أختج تضل خدامه لنسوان أخوانج وخلفتهم وتدير فلاحة حبيب علمود يجمع ماليه وقصور بخت النسوان وهي تضل بدون زواج عاجبج حاجيني سميعه .
5
ـ أني مالي دخل نظلمت حالي من حالها
ـ لا مو حالج حالها لان أنتِ ما نظلمتي ، وين ظلمج! شو انسترتي ورجال وبيت قصر وبنيه شتردين بعد لاتحجين بالظلم لان محد نظلم غير لميعه ، خلي الله بين عيونج ولاتوكفين بقسمتها .
6
ـ وشدعوه دمك محترك عليها لو حنيت الها اي حنيت تحاجيني وكلبك مورث بجمرة حبها أدري بيك ما نسيتها
5
" نهض من مكانه عصبي وتقرب عليه وعيونه بعيوني وحجه ..
ـ أي ما نسيتها ولا راح أنساها ويضل گلبي طول العمر ولما أموت يوجعني عليها لان نظلمت باللعبه من تدبير أمج وأنتِ مشتركه وياها لان جنتي تعرفين بيها تحبني وعندج علم بعشگي الها وروحي جانت بيها جان تكدرين تنقذين نفسج غير هاللعبه العبتيها أنتِ وأمج ، وصار عمر ما محاجييج بهل الموضوع وغاثثج بس بطيتي گلبي بإنايتتج وهي أختج تؤامج أنتِ وياها بطن وحدها شون ينطيج گلبج ، مصدوم بيج سميعه مصدوم .
4
ـ دفعني ومشه وطلع برة وكعدت مقهوره منه والله يا يصباح لو تموت هالقسمه ما اخليها تصير تريد تزوجها لصاحبك علمود تصير گبال عيونك وبنفس المنطقه وجوارين عبالك ما أعرفك ولا اعرف شنو نيتك كله علمود تكون قريبه منك حتى لو متزوجه ، دام هذا حجيك وتكول ما نسيتها ، يصير خير يصباح اني مو سميعه اذا خليت هالزواج يتم .
______________________
18
لميعه ـ كاعده يم الشباج وصافنه وأيدي تصل عليه البارحه وكعت عليها من جنت احش ورومت وافرك بيها ودخلت عليه أمي لميت أيدي وضميتها ولاحظت عليه
الحجيه عطايات ـ شبيها أيدج ليش ضميتها
ـ ما بيها شيء
ـ لا بيها شو أشوفنها
ـ لا ما بيها ، جرتها مني وصرخت وكتمت صوتي وصفنت عليها شون مورمه وعاينتلي وجرتني وتمسح على شعري .
1
ـ ليش ما ححيتي جان خليت واحد من أخوانج يوديج المستوصف
ـ ما يحتاج هي تطيب ، سحبت نفسي منها وابتعدت
ـ وجروح گلبج هم يطيبن ، ضميتي وجع أيدج مثل جروح گلبج
3
ـ دنجت رأسي وما حجيت وكامت جابت بصله حاره وتمر خستاوي مسويته عجينه وكعدت تخليها وتلفها واني كاتمه الوجع .
ـ هاي تخف الورم والعصر أخلي واحد من أخوانج يوديج
أرتاحي ولاتطلعين لشغل .
ـ طلعت ونمت بفراشي للعصر طلعت لكيت مشعان ونافع جايين ووصلت غرفة أمي وشفت نافع يحاجي أمي ومقهور وضليت أسمعه ونصدمت صدمة عمري ليش سميعه ليش إشسويتلج أني والله ما أذيتج والله هاي تاليتها توكفين ويه مشعان ومنو گلج أنه أريد اتزوج بسبب خضير كرهت الزواج وساعته .
1
الحجيه عطايات ـ والله عمتك طول عمرها نكسه وما تطهر ولو مخلفه جلبه وما مخلفتها هالسمانيه ، بنت بطني مو أختج يا فاينة البخت أختج ، حسبي الله عليج أنتِ ومشعان تكطعون بقسمتها عساها بحظكم وبختكم شدعي على حبيب خلاها معلكه بذمة هالمسودن خضير ابن أخوي أبن أخوي من سليمة لفتك أنت وأبن أخوك ، بط گلبي بالمزامط بأخوانه خفت هيج خوه ما شفت منهم بس الزقنبوت شلعوا گلب بناتي
6
وعمتك سميعه ما تخاف الله ما گلبها وجعها على أخيتها لو أبوك عاجبه حال عمتك ما قنع جدك حبيب وكالوا خل نطلگها من هالمسودن .
" لا ليش يطلگونها لاكينها خوش خدامه الهم ولنسوانهم وفلاحتهم تريد نسوان محزمه مثل لميعه تدير فلاحتهم وزراعتهم وحلالهم وتلم الهم ماليه ويشترون عمارات وقصور بالمدينه وتاليته يضل بخت النسواوين وعمتك تصفى أيد ورى وأيد كدام لا زواج ولا جاهل .
لميعه ـ تحجي وأني ابجي وعبرتي بصدري والله ما أذيتج يسميعه والله والله ، وأنطيتج عشك گلبي علمود تنسترين ليش خيتي ليش شسويتلج . .
2
الحجيه عطايات ـ حسبي الله عليج يسميعه سويت كل هاذ وضحيت بإختج وبگلبها علمود أسترج تاليتج هيج تجازيين أختج وحتى صباح طلع أحسن منج والله أدمي ويفكر بهل المسكينه وحرامات بيها فاتت ما أنطيته لميعه وخليت سميعه مداس الكم فاتت على هالحقد الشايلته أخ ينار گلبي عليج يا يمه يلميعه أخ سوده بوجهي عليج .
3
لميعه ـ طلع نافع وشافني وضل صافن عليه وتقرب مسح دموعي وبجييت وشفت أمي تبجي بصوت مخنوك عفتها ورجعت لغرفتي كله بسبب شغلج هسه حسيتي بذنبج وأنقهرتي عليه هسه يمه ، بعديش يمه هسه بعد تسع سنوات معلكيني بذمته ...
لليل كبت العيطه عرفت السالفه تخصني وكلهم معارضين بس أمي ومنعم ما راضيين.
حبيب ـ تردين تزوجينها مرتن نوب لازم تخبلت على عمري
1
الحجيه عطايات ـ أي ليش ما أزوجها شبيها عوره لو سكط وهي ششافت من زواجها بس الضيم وأبن أخوك مسودن جلاب السود ما تعيش وياه بس أنه الصوج كله مني نكسرت أيدي ورجلي ساعة الزوجتها اله .
1
حبيب ـ هالحجايه ما ينحجي بيها وزواج ما أزوجها واردها لابن عمها تكعد وتنجب حالها حال أخواتها وين عايشين أحنه نزوج بناتنا مرتين .
مشعان ـ بس أريد أعرف ياهو الكلج وطش الخبر بالقصر ولك نافع أنت حاجيت حبوبتك مو
نافع ـ أي أنه
الحجيه عطايات ـ أي نافع حجالي لان شغلكم الكواوويد ما ترضى بي ولك هاي خيتك خاف الله بيها وعندك بنيات ليش تكطع بقسمتها وتخليها هيج معلكه وتكول عليها مريضه وبيها مس ما خفت ربك ، شحجي وشگول عليك أنت وأختك سميعه سليمه البين .
بس أعرفن تردونها خدامة لنسواينكم تعلمتوا على شغلها حتى لخضير ما تردونها ترد ، تعلموني بيكم وحوبة لميعه بركبتك يحبيب عساها بحظك وبختك اي والله اني ظلمتها ليش ترجع تظلمها ، حسبي الله ونعم الوكيل بيكم .
1
لميعه ـ عليمن أتحسب وحوبتي وقهرة گلبي منو يدفع ثمنها وأنه هم الي حوبه ، ليش يا أهلي ليش ظلمتوني ليش بويه ليش يسميعه حتى أنت يمشعان إشسويت الك ليش هالظلم ليش مو جنت زين وما ترضى بالعوجه شغيرك عليه وجنت اكولن عليك أخوي حزام ظهري وازامط بيك تاليتك هم غيرك الوگت ..
وضلوا يحجون وما أتفقوا على رأي كل واحد يحجي وما ينطي درب الثاني وتعاركوا بينهم وما يدرون أني كارهه حتى نفسي مو بس عيشتي والزواج كله مو أبالي وكاطعه نفسي من الدنيا ومالي واهس بيها لان الظلم من يجي من الأهل صعب تكون أنسان يحب الحياة وأني صرت عباره عن أنسانه طافيه بس تريد يخلص اليوم شون ما جان وأكظ مخدتي وأنام وهيج تمشي حياتي فارغه وخاليه من أي شعور ، فاقده الامان والحنيه والسند والعوض ، باقيه بس جسد وروح معدومه ..
11
يتبع ...