رواية عرين الصياد الفصل السادس 6 بقلم شذرة العدوان

الفصل 6

ديالا:ماجد لازم ادين ليال ويگول يابه ماتت البنت

انهد حيلي لا صرخت ولا تحرگت ثانيه على ركبي ومصدومه انهد حيلي

استاذ صائب اجه بساع دفع ماجد ويگله شنو ماتتتتت شبيك تخبلت يلزم نبض ليال وفتح عيونها گال هاي بس غميانه هبط عدها الضغط يمكن

شد على شفايفه وشالها وراح عالهول جمعت قوتي ومشيت ورا اسحل بروحي خلاها بصف الصوبه حطها عالدوشگ وگعدت يم رجليها ودموعي يجرن وشفتي ترجف مگدر حت احجي

استاذ صائب رجع على امل ويصفگ بوجها ويگعد بيها ويرجع على ليال نفس الحاله

وثنينهن فقدن لا ايد ولا رجل وماجد كل ما يريد يساعد بشي يگله استاذ صائب وخر من دربي

وماجد برد گلبه بالجگاير

من شفت حالة بيتنا انهارت اعصابي تخبلت گمت الطم على وجهي نحير بمنو عماد الي بالمستشفى بين الحياة والموت

لو امي الي ما ندري حالتها شنو هسع

لو ابويه لو امل وليال

العاقله بينه مهره والوحيده الي جاي تستوعب الي يصير تركض ركض على امل وعلى ليال

اما صبره مجتفه اديها وواگفه عبالك خطار ولا جن هاذ بيتها وهزت ايدها وراحت لحجرتها

لازمه ادين ليال الي جمدو وافرگ بيهن وادموعي صب

ماجد يصفگ بوجها قوي وهاي ماكو ما تگعد شال المخده من جوه راسها وخلاها جوه رجليها وحط مخده ثانيه وغطاها

شال مي بأصابعه ونفضه عليها

وماكو نتيجه عبالك ميته وجفن عينها مورم

امل صحت وگامت گوه تحجي والسانها ثگيل

جابلها استاذ صائب علاج من مال ابويه وانطاهه وخله مهره تاخذها لحجرتها تنومها

اجه گعد ليال وما تفعل تگعد تخبل

گال هاذ الي جنت خايف منه اني ليش نهزمت وما ردت احجي كله بسبب هالمواقف

ماجد گله شبيك صائب اهدئ

صائب:شون اهدئ ما تگلي اني زعم ذبيتها براسك گلت يحجيلهم ويهديهم

ماجد:واني منين اعرف واحجيلهم.

صائب:شبيك مو گعدتك وحجيتلك

ماجد:والله ولا ادري اگلك گعدت فاقد الذاكره اروح وارجع عليهم اريد افتهم انته شگلتلي نسيت

صائب:خلفله عليك

ماجد:وشراح يتغير يعني نفس الحاله

صائب:لا مو نفس الحاله هسع الدنيا ليل اني وين اولي بيهن ابوهن مريض واخوانهن بالمستشفى ينحبون مثل النسوان

وامهن مفرفحه تربعت بالمستشفى وما تفعل تجي

تگول اذا اخذتوني اور نفسي

ماجد:نفخ دخان بعصبيه گال بالله زلم انتو يطب واحد بنصكم يصوب عماد ويمشي وانتو واحدكم بگد الحايط فهموني شلون خليتو يمشي بهل بساطه

استاذ صائب ردله بعصبيه وصاك على سنونه ويهز بيده گاله يا سهالة الحجي حضرة الضابط واحد مخبل ولازم سلاح ويريد يكتل شكو واحد گدامه شنسوي احنه وسلاح ما عدنه

وكمل على عماد صوبه وساح دمه وما رفله جفن لو عنده طلقات انوب يكتل الكل وما يهمه بعدين شينفع الحجي هسع احنه بيا حال

ماجد:ااخ ااخ لو بس موجود زين ما تعرفهم

صائب:اگلك اول مره اشوفهم اشكالهم غريبه يمكن بدو لابسين دشاديش لون صحراوي ومحزمين بحزام جلد ما مخلين شي وما حاطينه بالحزام وشايلين خناجر ولافين روسهم بشمايغ سود

وهاذ الي صوب عماد مبين عمره زغير اني اكبر منه

اسمراني حيل حارگته الشمس

ماجد:ما عرفت اسمه

صائب:لا بس الي ويا اسمه شراع ومن شكله واضح اكبر منه نطلع اني نفس العمر بس ثنينهم نفس الضخامه والنذاله

ديالا:يحجون بصوت ناصي ويفترون بالهول وماجد يحش جگاير واستاذ صائب نوب يگعد يلزم راسه يعصره نوب يگوم يفتر ويصفگ بأيده ويجر حسرات

اخر شي ذب عصبيته بماجد گاله اطلع برا دخن

ماجد:شبيك صائب

صائب:كلشي بيه ماجد امشي اطلع برا دخن غبرت الحجره من جگايرك لعبت نفسي

ماجد:لا حول الله هاك طفيتها ارتاح

صائب:انته متگلي شبرودك

ماجد:اي برود يمعود من كل عقلك تريد تذب عصبيتك بيه

حقك انته مشايف الي نشوفه وين طالع من المدرسه عالبيت شايل دفترك وقلمك

اني شايف مواقف اصعب من هاي اصلا هاي نقطه بحر گدام الي نشوفه +

وهاذ ما يسمونه برود

العصبيه والتوتر واللوم والبجي والنحيب

ما ينفع بهيج موقف مطلوب منكم الثبات والصبر

استاذ صائب گعد على حافة الشباك ودنگ راسه گال كافي ماجد اسكت رحمه لبويه

ماجد صفط مخدتين وگعد عليهن شبك ادينه دحگ عليه وگال هاي ليال اول مره تخرب لو بيها حاله

ديالا:مسحت دموعي برداني ولازمه ايد ليال گتله لا اول مره

وجان يگوم اجه يمي كشف رجلين ليال

اجه استاذ صائب بساع وعاگد الحواجب

لزم ايد ماجد وصاك على سنونه گاله شجاي تسوي ماجد

ماجد:اهوو صائب شبيك بهيج حاله من يغمى الواحد نفرك راحة رجليه ويگعد

استاذ صائب سحب ايده وخرها گاله اي جان گلت لأختها وهيه تتصرف روح عالبيت ماجد

ديالا:ماجد تعصب وعگد حواجبه ويدحگ على استاذ صائب وجان يعوف ويروح بدون ما يحجي

اجت مهره گالتله وين تريد ماجد ظل راح اصبلك عشه گال مشكوره منهو اله نفس وياكل ديري بالج على خواتج وجان يروح

مهره اجت يم ليال تبوس بيها وتگعدها ما گعدت گاللها استاذ صائب مهره خليج يم امل ممنوع تعوفينها وحدها هزت راسها بــ اي وعيونها حمر من البجي وراحت

ظل استاذ صائب گاعد عالمخاد وجان فرك عيونه ويفرك صوابر گصته باصابيعه ويطگگ رگبته الف حسبه اباله يعض شفته ويغمض عيونه ومبين علي التعب والقلق

صفن شويه گالي ديالا سوي مثل ما گال ماجد

جاوبته بغصه شسوي

گال فرجي راحة رجلها بالله

ديالا:كشفت رجلين ليال واني اديني ترجف

وگمت افركهن وجان تجفل ليال واني هم جفلت عبن جان هدوء وخفت هديتها وگحزت عنها

گالي لا تخافين شبيج هاي معنى زينه وهسع تگعد طگگ اصابعه وتنهد ويهمس تنحل ان شاء الله تنحل

اجت هاجر مورمه العيون من البجي وصوتها مخنوگ جابت العشه گدام استاذ صائب گالتله تفضل

بدون ما يدحگ عليها هز راسه گاللها خيتي شيلي الصينيه اني ما مشتهي

لحت علي وعزم الرفض

شالتها وراحت گالي گومي ديالا تعشي وعشي اخوتج وياج جاهد وجوانه

گتله استاذ مالي نفس والله

اجت جوانه گالت گومي جاهد ما يخليني اكل

گالي گومي بنيتي عشي اخوانج ونوميهم خطيه

غطيت ليال زين وگمت وياهه بملل اعشيها

كملنه عشه واخذت الجهال نومتهم بس حطو روسهم عالمخده نامو نيالهم ياريت اني طفل

رحت عالمطبخ جبت گلاص جاي للأستاذ اعرفه يحب الجاي

لگيته لازم ايد ليال ويدفي بيها عالصوبه

من شافني هد ايدها وفرگ عيونه

انطيته الجاي اخذه

دحگ عليه وعگد حواجبه گالي شبي وجهج ديالا

دنگت ابلع بريگي واسلت خيوط من اردان البلوز

رجع سألني ديالا شبي وجهج

حطيت ايدي على عالجرح الي بشفتي گتله امي صبره ضربتني

شد على شفايفه ويدحگ بعصبيه وما سأل ليش

بس مبين ملامح الغضب على وجهه وشد على شفايفه

شرب نصه گلاص الجاي برشفه وحده

ويفرگ برگبته

گتله استاذ ما خطت الجاي اشو شربته مر

دحگ عالگلاص وهوه لازمه ومخلي اصبعه عالخاشوگه وجان يحرك الخاشوگه بضياع صافن بزمانه

لزم الخاشوگه وطلع شكر من الگلاص

مثل الي ما مصدگ ان الجاي مر

دحگ عليه وهوه متوتر گصته صارت تلمع

بلع ريگه وانطاني الگلاص گال تسلمين بعد ما اريد جاي

اجت مهره گالت خن ناخذ ليال على حجرتها رادت تشيلها وما گدرت

گال استاذ صائب اشيلها اني وخرن

مهره گالت لا تسلم راح نتگابل عليها اني وديالا

جاوبها گال وخري مهره هاي حسبة بنتي

شالها ورحنه ذبها بالفراش ورجع وليال ولا حست

نمنه كلنه بالحجره اني ومهره وجاهد وجوانه وخلينه ليال بالوسط عبن تخاف

واستاذ صائب راد ينام بالديوان گناله بارده

گوه قنعنا ينام بالهول

گعدت الصبح على صوت البجي فتحت عيوني شفت ليال گاعده ولامه نفسها وتبجي بحرگه وساده اثمها

حضنتها اهدي بيها

واجت مهره گامت تحجي علينه گالت اذا ما سكتن احطجن واكتلجن

گالت استاذ صائب راح تا يطلبلجن اجازه خطيه

يالله گومن صيرن سبعات واني راح اودي خبز للفلاحين واريگ الخيول صيرن قويات وعينني

ليال: جسمي تعبان عبالك جنت اكرب من گعدت كل ظني جنت بحلم ما اتذكر غير كلام استاذ صائب من گال عماد حالته خطره وساح دمه

گمت ورحت على حجرة ابويه وشفته نايم والكانوله بيده وجفن عيونه مورم

بوسته ودموعي على خده وگعو

رجعت عالحجره ابجي معد اگدر ارفع جفن عيني من البجي

ديالا:اجت هاجر گالت گومن تريگن احنه من لگمة البارحه الغده ونفسنه مسدوده محد يشتهي گوه قنعت ليال تگوم تاكل شي

بدلنه وطلعنه نغسل

اخذت حصيره وفرشتها ورا المطبخ بالشمس

گعدت الجهال يتيرگون

وليال گعدت وياهم وما تفعل تاكل

رجعت عالمطبخ اجيب الجاي واسمع استاذ صائب يحجي ويا ابويه ومتعصب

رحت بساع لحجرة ابويه لگيته گاعد عالمصلايه يسبح واستاذ صائب يمه

صوت انفاسه مسموعه من گد العصبيه

دنگت على ابويه حبيت راسه وخليت شعري على جنب وجهي تا مايشوف الضرب الي بيه

استاذ صائب گال ها ديالا شونج اليوم وليال شونها

گتله زينين استاذ

گال اخذتلجن اجازه

ديالا:شكرا استاذ

ليال:گاعده برا ولامه نفسي الشمس خليتها على ضهري ملل بملل سحبت جذيلتي وگمت افتح بشعري

ادحگ على جاهد وجوانه ياكلون ويعيبون لبعض اخير شي تكاونو بالبيض السلك واحد يلگح على واحد احجز بيهم بملل وماكو

جاهد هلس جوانه من شعرها

گامت تصيح وجان يجي صوت هيي ولك ليش ليش

التفتت شفته ماجد

گعد تك ركبه لزم جاهد من اذنه گال ليش تهلس اختك ولك

گاله تعيبلي

ماجد:وذا عيبتك تهلسها تگطع شعرها الحلو

ليال:جوانه بس تريد حجه گامت تبجي جذب وصحيح وتشكي لماجد

گاللها اطيح حظه اذا بعد يكتلج اكو واحد يكتل هالگمر

صد عليه گال ها ليال شونج اليوم

گتله زينه سيدي

گال اهوو عوفي سالفة سيدي رحمه لله

ليال:دنگت بحزن و استحيت منه

گال احم وين ابوج

ليال:بحجرته

ماشي اروحله وجان يگرص جوانه من خدها

ديالا:اجه ماجد دگ الباب وفات سلم على ابويه ويواسي بي

ابويه گوه يحجي ومخذول

ماجد:ها شقررتو

جاوبه استاذ صائب بعصبيه

ملا درويش ما يفعل لا يشتكي ولا يسويها عشائر

ماجد عگد حواجبه وگال ليش عود

صائب:والله مدري هاذ گدامك اسأله

ماجد گعد تك ركبه يم ابويه گاله ليش ملا ما تريد تشتكي انته بس اشر بيدك واجيبه الك من جوه الگاع

والله لو طير بالسماء هم اصيده واجيبه

وذا تريد تسويها عشائر احنه كلنه وياك لا تگول ما عندي احد

ديالا:ماجد مستمر يحجي ويتهده ويتفده وداگ صدره

وابويه صافن بالسبحه يسبح وساكت لحد ما خلص ماجد كلامه گاله ماجددد هاذ الرجال الي صوب عماد هوه من عشيرة(……… ..)

مجرد گال اسم العشيره

ماجد واستاذ صائب ظلو صافنين واحد يدحگ على واحد

استاذ صائب بلل شفايفه وگعد عالكرسي ودنگ گال ميخالف ملا نشتكي عليهم

ابويه رفع راسه وبنظرة اسف گال وين اشتكي اذا همه حكومه

صائب:نسويها عشائر

ردله ابويه والغصه تشگ صدره

ومنيلي عشيره تا اگاومهم اذا اني بتك نفسي وانتو مهما جانت معزتي عدكم تظلون غربه عليه ومو گد هذول الناس

هذول حزمتهم گويه وحگهم ياخذونه من حلگ السبع عجل هاذ الرجال لوما يدري ورا ضهر يسنده شون يتجرا وبنصكم يصوب عماد

ديالا:استاذ صائب حيل تعصب

صائب:عجل الحل شنووو ملا نظل هيج واحد يدحگ عالثانيييي

ابويه جاوبه الحل اريد ابني يتشافه ويگف على رجلينه

صائب:وحق عمااااد

جاوبه الحگ يم الله وليدي الله سبحانه ياخذ حگ عبده مربع

ماجد:ملا والنعم بالله بس هاذ مو حجي

رد ابويه لا تضغطون عليه يولد انتو تعرفون اني مالي احد ما عندي غير اخ وعافنه وراح مدري مات مدري عايش محد يعرف اراضيه وين

والعشيره تدرون بيه طالع منها وما تسما عشيره جدام هذول احنه ناس تطعن بناس وكلمن علي بنفسه

مو مثل هذول الناس الي عدهم مثل ماشين علي ضم اخوك لأبن عمك وضم ابن عمك للأجناب

ماجد:ملا احنه وياك وهاذ تعده على عماد وهوه بأرضنه وبنصنه انته اطلع منها مزال الحداده مال عماد يمنه وبگاعنه يعني تعتبر دوسة گاعنه هاي

ابويه جاوب بعصبيه وقهر

ماجد لا تلح يابه اني لا اريد اشتكي ولا اسويها عشائر اترجاكم لحد يحط نفسه

ماجد حيل تعصب وطلع برا يدخن وصائب عيونه گامت اطلع شرار وهم طلع

ابويه رجع يصلي ويناجي ربه يساعدنه ويشافي عماد

واجت صبره وجها ينطي الوان ومرعوبه خايفه لا احجي لأبويه ادحگ عليه واثمها يرجف

صديت عنها

من كمل ابويه صلاة گعدت يمه شلت ايده بستها

مسح على راسي واني نسيت نفسي اذا بيه علامات ضرب دحگ على وجهي وفتح عيونه ويدير بوجهي هين وهين ويتلمس بيه گال من ضاربج

بلعت ريگي گتله محد ضربني يابه

لزم حنجي وگال لا تجذبين عليه

خنگتني العبره گتله ما اجذب عليك بس من اجانه خبر عماد گمت الطم على وجهي وحت اسأل امي صبره دحگت عليها گتلها مو يمه

بلعت ريگها گالت ها اي اي صحيح

بوكتها ما سكتت لخاطرها لو ستخطيتها اني بيه طبع حقي ما اخلي وذا تأخرت اخذه مربع بس سكتت لخاطر ابويه الي بي يكفي وزياده ومو وكت اگعد اشكيله عمايل صبره

گال ليش بنيتي مو حرام هالشي شمسويه بنفسج

گتله بعد ما تنعاد يابه

اول مره واخر مره

حضنته ودحگت على صبره

وهيه الدخان يطلع من خشمها من گد العصبيه

وعافت وطلعت عبن ابويه ما عبرها ولا صد عليها

ليال:بعدني على گعدتي والدمعه لايجه بعيني

شفت ماجد طلع يمشي سريع ويدخن وطلع استاذ صائب ورا

وگفو يم السياره يحجون.مبينه عليهم العصبيه وماجد يصفگ بأدينه

واستاذ صائب لازم رگبته من وره ويهز براسه وجان يتخوصر ويرفع راسه للسماء

خفت اكو شي وگمت بساع على حجرة ابويه

ولحگوني جاهد وجوانه

فتت شفت ابويه حاضن ديالا ويمسح بشعرها

اشرتلها بحواجبي شكو رفعت حواجبها انو ماكو شي وعلى حطت ايدج

گعدنه كلنه حواليه

وهوه مبتسم ويبوس بينه

ديالا:يابه مو جنت دوم اسألك

احنه ليش ما عدنه احد لا عمام ولا گرايب

وتگول ما عندي احد وهاذ طلع عدنه عشيره وعم ليش ما ترجع عالعشيره وتاخذ حگ عماد

مسح على راسي وگالي بنيتي اني لو ادري عشيرتي بيها خير ما اطلع منها

وگرايب ااخ الگرايب عگارب يبنيتي لوما اجلب بالدنيا بسنوني جان هفوني الگرايب انتي شفتي احد جانه وگال شلونكم

زين يابه واهل امي خوالي وينهم ليش ما تطلب مساعده منهم

جاوبني امج ما عدها اهل

تعصبت ووگفت يابه شني ما عدها اهل

معقوله مگطوعه من شجره وين اكو بشر بدون اهل

دنگ راسه ويسبح بالسبحه ونزلو دموعه حضنته ليال وگامت تبجي

واني طلعت افور اعصاب

گعدت وره البيت ورتجيت

واتحسر ليش كلها عدها گرايب الا احنه

افقر الناس بمنطقتنه عدهم گرايب جثيره ويلتمون بالعرس والمناسبات وشحلاتهم الا احنه ما عدنه غير اهل صبره الي كل ما نروحلهم بمناسبه ما يخلن حجي وما يذبنه

لا عدنه عمام ونزورهم ولا عدنه خوال

ولا احد يجي يزورنه غير اهل صبره وبيت استاذ صائب يجون تعليلة تخلصها شكحه تحجي بطولاتها

سمعت باب السياج انفتح التفتت سنان

گال الله يساعدج ديالا

ديالا: هلا هلا امت تسون طريق لبيتكم ظل عوزك شويه تفوت بنص بيتنا تا اطب بيتكم

صد عليه وجان ينبت الكرك بالگاع

گال والله مو ميت على شوفة بيتكم مستعجل شسوي اذا انتو مسيجين داير مداير بيتكم

ماخذين نص المنطقه وسادين كل المنافذ الي تجي علينه منين افوت عجل

اطير بطياره لو احفر نفق الطمع مو حلو نوبات اذا مو مستعجل الوف نص المنطقه تا اصل الشارع

وتره كلها تشكي مو بس اني

يمكن لو عدكم فلوس زياده تسدون علينه الهوا

ديالا:شبيك شبيك نهديت تعال اخذلك راشدي

وترا ما ماخذين حلال ابوك هاي گاعتنه وبكيفنه نسيجها هاي عود خلينه على كل شارع باب وحضرتك مو عاجبك راح اخلي ابويه يسد كل البيبان

سنان: هسع اذا اعدل الكرك براسج هم احد يلومني تعرفين شنهو الي ينهد

ديالا:ابتسمت گتله اي اعرفه

سنان:وجعي انوب مكيفه تگول اعرفه يالله داشره ما عليج عتب مو السان غضب وميحتاج اخذ راشدي

وجهج صاير خارطة ثبره ما مقصره

عگد حواجبه وبهمس گال جعل ايدج بالكسر يا ثبره

ديالا: وگفت تخوصرت ورفعت حاجبي گتله شمدريك صبره ضربتني

سنان:شفتها من جت تجمح جنها طوير الليل ورحت زعم اسألها على عماد شفتها بسطت بالگاع يمج واجه يمها ماجد اخو استاذ صائب وتراجعت

شويه وسمعت صرختج والله ردت اجي اضربها بالكرك اعدله براسها بس شفت ماجد لازمها وهيه تفشر على مهره نحمست حمس دحگي اللطمه بثمي من القهر مال ثبره

ديالا:شفت اللطمه بأثمه ومبين محموس واعصابه نار

گتله مو زعم تگول عليه البلوه شو ردت تفزعلي وانوب تسمي صبره ثبره

دحگ عليه ومقلص عيونه عض شفته بعصبيه وما جاوبني گال شعندج گاعده هين

ديالا:مسحت شعري وگعدت عالممشا گتله اتجول مداير بيتنا اشوف شگد مساحتنه واريد اخلي ابويه يسد هذاك الباب واشرت عالباب الي بين بيتنا وبيتهم

جاوبني ليش ما تجاوبين مثل الأوادم

گتله انته صاير مثل صبره بالفضول ماشي گاعده اتحسر ورفعت حواجبي

سنان:وعلى شنهو تتحسرين بالله

ديالا: تربعت عالممشا واخذت عود گمت اكسر بي وحجيت بحزن وغصه ليش ما عدنه عمام وولد عم مثل العالم جان هسع كلهم ملتمين ويريد ياخذون حگ عماد

سنان:تدرين انتي بطرانه وما عندج شغل هوه انتن بدون عمام ولد عم اااخ خليني ساكت اروح احسلي

وعاف وراح غميته بدون مايشوفني

ليال:صارت ساعه ب 9 الصبح واجه استاذ صائب گال لأبويه يالله ملا نروح عالمستشفى

ساعدنه ابويه بدل ملابسه

وراحو هو واستاذ صائب وماجد

ديالا:ظلينه ضايعين منعرف شنسوي نفتر بالبيت نوب نطلع برا ملل وقهر وحزن مخيم عالبيت

اتصلت فاتن اختنه الجبيره عالأرضي تبجي

ولزمتني رزايل ومعصبه

وتسأل عن عماد وزعلانه عبن ما حجينالها تگول ليش اخبار اهلي اسمعها من الناس بسيطه الجن بس اجي

گلتلها منين سمعتي

گالت خوالي خابروني

بگلبي حجيت ااخ ولا يفوتون علم اهل صبره

گلتلها مهره بلغت گالت لحد يسمع فاتن شي وهيه مريضه وبعيده

گالت خلفله عليها زعم سوت زين

يعني لو گايلتلي جان رجلي البارحه جابني كلشي ميگول هسع منو يجيبني ورجلي راح على شغله

جاوبتها وشراح تستفادين من تجين شتفتهمين من عدنه شرحتلها وضع البيت وهيه قافله زعلانه وتريد تجي

گالت امي وين گتلها راحت لهلها

وجان تتخبل وتعصب بزياده گالت هاييي شون تروح وتعوفجن ااخ منج صبره ااااخ

زين ومهره وين

گلتلها صارت عالفلاحين وتركض هين وهين

احسها صارت نار واسمع يمها ضرب يمكن تضرب بالميز وتحجي گالت بعد مگدر اتحمل

راح اتصل بحجي حسين وذا قبل اخلي حيدر يجيبني

سألتها منو حيدر

گالت واحد اجه يشتغل يمنه وحجي حسين انطا البيت الي بصفنه سكن بي وخوش ولد مؤدب وخلوق

ومأمن بي حجي حسين انتن ديرن بالجن وصيرن سبعات ليما اجي وسدته ،،،

ليال: صارت ساعه 11 ونص گلنه نساعد مهره خطيه مسؤلية البيت والعمال كلها شالتها وصبره ما مدت ايدها بشغله ولا جنها جبيرة البيت طگت الريوگ ولبست عباتها وراحت لهلها تنقل علوم ،،،

ديالا:رحت عالمطبخ تشوف شنسوي غده لگيت هاجر طابخه بالجدوره گتلها احد راح يجي گالت لا بس مهره گالت اطبخي للفلاحين وزودي طبخ خاف احد يجي

بگلبي گلت همزين صار بيج خير والله جنت حايره شون نسوي أمل منهاره واني وليال ما نعرف نسوي شي غير الجاي

عفتها وطلعت

رحت على حجرة أمل شفتها ترضع بأبنها وتبجي وهاذ يغص خطيه ما متهني ،،،

ليال:اجه الفلاح گال دزتني عمتي مهره اجيب الغده

گتله اي هاذ جهزنا وزعم نجيبه احنه

حطينا بالعلاليگ وما گدر يشيله وحده جثير گناله نساعدك

گال خاف عمتي مهره تگوم تحجي ،،

ديالا:لا ما تحجي

سكت ما حجه

ورحنه بدلنه اني لبست بلوز حياكة وتنوره سوده وليال لبست قميص حرير لون نيلي وتنوره سوده وشلنه الأكل ويا

وصلنه المزرعه شافتنه مهره واجت گالت شعدجن اجيتن

گلتلها ما گدر الفلاح يجيب الأكل وحده وجينه ويا

فلت التلثومه وشربت مي گالت بعد ممنوع تجن عالمزرعه

ديالا:ن شاء الله بعد ما نجي

مهره گالت للفلاح اخذ الأكل وزعه

گال ماشي عمتي وراح

ليال:اجه سنان كاف بجامته لحد ركبه ورجلينه كلها طين وشايل المجلاة سلم وگال شلونج مهره

جاوبته الحمد لله بخير

سنان:مهره اخذي خواتج وروحي واني اظل بمكانج

ما فعلت گلتله انته تعبان وهاذ وكت استراحتك

روح تغد

ما فعل ولح عليها وجان تگله مشكور سنان جزاك الله خير

ديالا:واحد من الفلاحين من شاف سنان يمنه

عاف الغده واجه گال تحتاجون شي ويدحگ على سنان

سنان ردله وبعصبيه جزاك الله خير روح كمل غداك

وجان يروح وهو عابس

مهره:شبيك سنان فشلت الرجال

جاوبها تايعرف حدوده زين

مهره:الشباب كلهم معدلين ولازمين حدودهم عدل يا سنان

ديالا:سنان طلع جگاره ورثها ويدحگ عالفلاحين گاللها روحي مهره البيتكم خاف وادم تجيكم وعاف وراح يتمشى

مهره تنهدت گالت يالله نرجع احد منكم

تركب الفرس

ليال:لا ما اريد اخاف

ديالا:لا اريد اتمشى

گادت الفرس وتمشي گدامنه

وتهمسله مدري شتحجي ويا عبالك يفتهم عليها

اجانه هوا من ورانه وطير شعري گلبه وگفت گمت اعدل بي وانفضه

صدت عليه مهره وجان تگول ديالااا انتي ليش ما تجذلين هوشتج مثل ليال احسن مو طايرات جنج الفزاعه

ديالا:والله من اجذل شعري اگوم احك براسي

ما اعرف وهوه مو طويل عش اجذله

مهره:وذا مو طويل فرگي بالنص وجذلي

ديالا:غدي واصير جني العنز

هزت ايدها وكملت مشي

ليال:وصلنه الفلكه الي تودي على كل المناطق ويجي رتل سيارات اول مره اشوف هالعدد گطع علينه الطريق

وماكو غيرنه احنه عالفلكه لا نگدر نكمل الطريق ولا نرجع گدامنه السيارات وورانه مشروع البزل صرنه عالحد الي تگحز شويه تگع بالبزل الي مليان زل وحديد

ديالا:وگفت گدامنه اول سياره بيها رجال عمره بالخمسين بگد ابويه ويا رجال يطلع بسن عماد

شكلهم يخوف

حدر واحد منهم وسلم على مهره گال شونج خيه

گالتله هلا تفضل

گال احم تعذرونه وجفناكم بنص الطريج

ديالا:هاي شون يحجون اني وليال تغبينه وره مهره ولزمنا ثوبها

گال لمهره خويتي اريد اسعلج (اسألج) ما ادلينا على بيت عماد ابن الدرويش هاذ الحداد

يتبع……