رواية غيوم تحجب القمر الفصل السادس 6 بقلم مني السيد

الفصل السادس

فى الشركة كان أدهم فى مكتبه يلملم اوراقه على عجلة وفوجئ بآخر صوت يريد ان يسمعه الآن .... " أدهومى حبيبى اللى مطنشنييييي" انقلبت شفتاه لا اراديا وفكر فى عقله بنفس لحن صوتها ( ياااا دمك اللى بيلطشنييييي) وابتسم صاغرا "اهلا يا ميرا ايه المفاجأة دى " - ميرا " انا قولت بقا انت مفيش حاجة نافعة معاك يبقى لازم اطب عليك واعزمك ع الغدا" - أدهم "ميرا انا تعبان اوى بجد مش هاينفع النهارده ولسه هاسوق لحد البيت الكبير" - ميرا " وانت ايه اللى مقعدك هناك مش قاعد ف شقتك القريبة هنا ليه؟" -أدهم " انتى عارفة شقتى دوشة ووسط البلد وانا محتاج هدوء شوية اليومين دول" اقتربت منه ولمست رقبته بغنج مبالغ فيه " بتفكر في ايه يا حبيبي في معاد جوازنا مثلا" انزل يدها بهدوء " لاااا معاد جوازنا ايه لسه بدرى على الموضوع دا " قطبت ميرا حاجبيها " لسه بدرى ليه بقا ان شاء الله مستنى تكون نفسك ولا لسه هانتعرف على بعض" أدهم بجدية " احنا فعلا محتاجين

نتعرف على بعض اكتر من كده يا ميرا " اقتربت منه مرة اخرى ولكن تلك المرة التصقت به تماما وهى تتحرك فى دلال مقزز محاولةَ الاحتكاك به علّها تحرك فيه ساكناً " طب ما تتعرف حد ماسكك ومدت شفتيها المفتوحتان فى شراهه نحو خاصته لكن أدهم ازاحها عنه بهدوء " ميرا احنا فى مكان شغل انتى مش واخدة بالك ولا ايه " -ميرا " طب يالا نروح على بيتك او شقتك اللى هنا اقرب" زفر ادهم " ميرا انا مش قصدى نتعرف كده انا قصدى نعرف بعض اكتر يعنى بحب ايه وبكره ايه وانتى بتحبى ايه بتكرهى ايه كده يعنى" رفعت ميرا شفتيها امتعاضاً ثم كررت المحاولة وهى تحتضنه وتستريح على كتفه وتتحدث بدلال "بحبك انت, انت ليه مش حاسس بيا يا ادهم انت عارف انى بحبك من زمان اوى وكنت نادرة نفسي ليك ليه بتعمل معايا كده " ضحك أدهم بنصف ابتسامة هازئة فهو يعلم جيدا كيف نذرت نفسها له بسفرها هنا وهناك وصداقاتها التى لا تعد "خلاص يا ميرا اوعدك لما اخلص من دوشة الشغل والمشاريع الكتير اللى عندى هافضالك ونخرج ونتعرف وكل حاجة " وابعدها عنه بلطافة " دلوقتى بقا يالا بينا عشان انا تعبان ومنمتش من امبارح ومحتاج اروح بجد" زفرت ميرا بملل " طيب خلاص بس انا مش هايأس بردو" ربت على ظهرها وكأنه يتخلص منها وخرجا كل منهما فى طريقة.

وصل أدهم الى المنزل وتوجه من فوره الى غرفة قمر ليحاول تلطيف ما حدث بالامس وفوجئ حينما لم يجدها فى الغرفة بحث فى المطبخ وفى كل ارجاء المكان ولا جدوى هل هربت مرة اخرى ياتُرى ؟؟ لابد انها تركت المكان خاصة بعد كل ما حدث بالامس ولعن نفسه تبا لقد كان مستفزا لأبعد حد. ولفت نظره الحائط خاصته لقد كشفت مكانه السري الذى ينأى فيه عن الجميع فاستشاط غضبا وصرخ باسمها فارتعدت فى مكانها ولم تلبث الا ان وجدته خلفها - أدهم بحنق " انتى ايه اللى جابك هنا " قمر بتلعثم " أأانا أنا كنت بس عاوزة اعرف ...." قاطعها صارخا " عاوزة تعرفى ايه انتى مش من حقك تدخلى هنا فاهمة اطلعى برا" ارتجفت قمر خوفا فهى لم تخف هكذا منذ زمن لقد اقسمت على نفسها الا تخاف من مخلوق ولكنها ارتعدت خوفا منه وعليه. فهو لأول مرة تظهر عليه امارات الغضب والحنق والألم معا هكذا, ولم كل هذا هى لم ترى شيئا يستحق كل هذا الغضب ؟؟ بضعة صور معلقة على الحوائط يبدوا انها لعائلته وصور خاصة بوالدته التى تشبهه للغاية و صور أخرى لاخته الجميلة للغاية ببرائتها الظاهرة فى كل صورها. ولاحظت بعض من الهدايا التى لم تُفتح بعد مركونة فى إحدى الزوايا. وملابسهما وكل ما يخصهما لماذا اذن كل هذا الغضب ؟ انها اشياء عادية للغاية. استندت للخروج والقت عليه نظرة اخيرة فوجدته يفرك جبهته وعلامات الالم تبدو واضحة عليه. (هو ماله دا قافل على حاجاتهم كده ليه ؟؟؟؟ يكونش هو اللى قتلهم ؟ انتى مجنونة أدهم يقتل بردو لا مش معقول !!! انتى ليه محسسانى انك بنت خالته مثلا تعرفيه منين انتى ما يمكن فعلا مجرم ولا قتال قتلة) انتفضت من افكارها وهى تراه يتخطاها ويتوجه نحو غرفته ( هو احنا كل يوم حد فينا يتقمص لا بقا الاسبوع هايخلص كده ومش هالحق اقعد معاك ) نهرت نفسها ( ما تتلمى بقا وترجعى لعقلك كده انتى قاعدة هنا عشان رجلك المتجبسة دى واللى كان هو السبب فيها ... ااااااه صح صح) حاولت تصديق نفسها وهى تعلم انها كاذبة وتوجهت الى غرفته وطرقت بابها الى ان سمح لها بالدخول -قمر " انا كنت عاوزة اعتذرلك على تطفلى معلش متزعلش" ظل ينظر اليها نظرة واجمة جوفاء وفاجأها برده " انتى مزهقتيش من قعدة البيت دى ؟" عقّدت حاجبيها ( ايه المجنون دا ) فأردف " تعالى تعالى تقعد فى الجنينة شوية" نظرت خلفة وهو يتوجه نحو الحديقة " بس انت عارف انا بخاف من الكلاب مش هاقدر " وبنبرة مُطمئِنة " بس تعالى انتى معايا ومتخافيش" انصاعت لكلامه ومشت خلفه وأقبلت عليهما الكلاب حين خرجا للحديقة وقمر تحاول السيطرة على خوفها -أدهم " تعالى ياقمر اقعدى هنا لما اعرفك عليهم" جلست قمر وهى ترتعد وتهز رأسها نفيا " تعرفنى على مين لا لالا خليهم بس يبعدوا عنى وانا هبقا كويسة" ونادى أدهم على من يبدو صغيرهم "عنبر تعالى ..

اقعدى.... سلّمى على قمر " وبالفعل مدت الكلبة يدها مع اندهاش قمر. ثم وجه حديثه اليها اتفضلى ياستى سلمى على عنبر المشاكسة الصغيرة بتاعتنا " مازالت قمر تهز رأسها نفيا فحثها أدهم " سلمى يا قمر متخافيش طول منا معاكى متخافيش " للمرة الثانية يردد هذه الكلمة وللمرة الثانية تطمئنها بالفعل هذه الكلمة. مدت يدها بحذر وهو يحثها لو ممدتيش ايدك بالذوق هامسك ايدك واخليكي تسلمى عليها بالعافية" فمدت قمر يدها بسرعة وتلمست يد الكلبة فاقشعر جسدها وضحك أدهم " للدرجة دى مسكة ايد الكلبة احسنلك من ايدي" حاولت النظر له وهى مغمضة نصف عينيها وتلهث "خلاص كده بقا خلاص صح " - أدهم متسليا " لا خلاص ايه حسسى بقا على شعرها" وباليد الاخرى حاولت ان تفعل ما أمرها به فوجدت الكلبة تتمدد على الارض وكأنها تطلب المزيد فتدخل أدهم " شوفتى بقا الكلاب طيبة ازاى ومكانش فيه داعى لخوفك دا" ثم عرفها على زعتر وعنتر وبالفعل وجدت نفسها تعتاد على لمسهم بل وتتمتع باحساسها انها احبتهم وانهم يبادلونها نفس الشعور " مش خايف بعد ما اتعودوا عليا انى اهرب بقا" حدق بها أدهم مطولا " انتى عاوزة تهربى ؟ ثم احنا اتفقنا خلاص انا مش حابسك انتى قاعدة هنا بإرادتك" هزت رأسها موافقة وهي تحاول إقناع نفسها قبل إقناعه " ايوة عشان الجبس انا هنا فعلا قاعدة مرتاحة لو كنت روحت كنت هاتعب جدا " كان كلا منهما يحاول تجنب الحديث عما حدث. فهز رأسه مدّعيا انه يوافقها رأيها ويصدقها " آه فعلا عندك حق " فباغتته "انت مش زعلان منى يعنى خلاص؟" -أدهم " عشان هربتى يعنى؟؟" - قمر " لا عشان طلعت السلالم" ابتسم أدهم ابتسامة باهته " انتى فتحتى باب انا كنت كل ما اجى هنا احاول اقفله وكأنى مش شايف ولا عارف ايه اللى وراه" - قمر " بس كل اللى انا شفته حاجات عادية مظنش انها تستاهل كل اللى انت عاملة دا كله بالعكس دى حتى ممكن تكون ذكريات كويسة تفكرك بيهم" - أدهم "انا كل ما افتكرهم بتمنى انى كنت اموت معاهم " انخلع قلبها لمثل ذلك التخيل " بعد الشر عليك متقولش كده هما اكيد كانوا بيحبوك وحاسين وعارفين اد ايه انت بتحبهم واكيد طبعا راضيين عنك " هز رأسه نافيا بحسرة وأسى" لا هما مش راضيين عليا نهائى صدقينى" استغربت قمر من حديثه ذلك " ليه هو انت عملت لحد فيهم حاجة قبل ما ....." اسند مرفقيه على ركبتيه وفرك كفيه ببعضهما ناظرا الى الارض كمن يعانى من التفوه بتلك الكلمات " اااااه

عملت..... خيبت املهم فيا وموقفتش جنبها لما احتاجتنى" نظرت له قمر مستفسرة دون ان تتكلم فاندفع وكأنما يزيح عن كتفيه حملا أحنى ظهره و زاد من ألمه على مر السنوات " قبل مايتوفوا بفترة قصيرة أمى اكتشفت ان ابويا بيخونها وواجهته وهو انكر وانا كنت بحب ابويا اوى لدرجة انى صدقته هو وكذبتها هى , وسمّعتها كلام كتير من نوعية انتى بتتهميه ظلم وانتى عاوزة تطلعى فيه اى عيوب وخلاص وانها بتدور على المشاكل وأن حتى لو حصل فالعيب فيها هي وان هو أكيد دور على راحته برا وصدمتها بكلام كتير اكتر من دا كانت بتبصلى والدموع متحجرة فى عينيها مش قادر انسى نظرتها دى لحد دلوقتى وكأنها بتقول انا مش مصدقة ان انت ابنى أو ياريتنى ما خلفتك، بس انا كنت ايامها صغير وهلاس وبتاع بنات بقا وشايف ان دا من حق اى راجل يعمله, وانا اصلا مكنتش باستحمل كلمة على ابويا لانى كنت بحبه اوى ومش ممكن اصدق انه يعمل حاجة غلط , وطلبت أمى الطلاق واخدت ملك اختى اللى كانت وقتها عندها حوالى 17 سنة وانا رفضت اروح معاهم لاني كنت مقتنع ان والدتي غلطانة واني لازم اعاقبها ومكلمهاش عشان تحس بغلطها، وبابا رفض يديها اخويا الصغير آدم , وقعدت بعيد لحد ما الطلاق يتم وانا وقفت ضدها مع ابويا وتقريبا كنت بحاربها معاه لانه كان رافض تماما انه يطلقها. وبالفعل الطلاق حصل وامى قررت انها تاخد ملك اختى وتسافر قبل عيد ميلاد ملك بأسبوع عشان تبتدى حياه جديدة بعيد عننا كلنا, لكن للأسف الطيارة وقعت بيهم كانت حادثة مشهورة اوى وقتها. حتى السفر حاولت امنعهم منه لكن للأسف مقدرتش يظهر ان الحياة رفضت ان يكون فيه وقت استسمحها وابوس ايديها ورجليها عشان تسامحنى خصوصا ان ابويا اتجوز مديحة بعد ما توفوا بشهر قبل حتى الاربعين مهموش مراته اللى تعبت ونجحته ووقفت جنبه سنين ودخلته شريك في الشركة اللى اهلها ادوهالها هدية جوازها منه. ولا حتى همه بنته اللى ماتت فى عز شبابها بسببه وبسببى واكتشفت ان كل اللى كنت بدافع عنه وواقف معاه كان كدب وانه فعلا كان يعرف عليها واحدة ومن فترة طويلة كمان وانه كان رافض الطلاق مش تمسكا بيها ولا حاجة بس عشان الشراكة اللي ممكن أمي تفضها بصفتها صاحب النسبة الاكثر في الشركة وكمان قدرتها المادية على انها تشتري نصيبه بسهولة. واكتشفت انى ظلمتها وسلبت منها حقها في أن ابنها يجبلها حقها" كانت عيناه متحجرتان بالدموع وكأنه لا يسمح لنفسه حتى بالبكاء ليزيح عن كاهله هذا الالم" تنهدت قمر تنهيدة حارقة " الام يا أدهم عمرها ما بتزعل من ولادها مهما عملوا وصدقنى هى اكيد مسامحاك مينفعش تجلد نفسك السنين دى كلها عشان حاجة انت ملكش ذنب فيها مش انت اللى خنتها يا أدهم عشان تحس بالذنب دا كله " - أدهم وهو يضحك ضحكة الم "لأ انا خنتها .... خنتها لما مصدقتهاش لما وقفت ضدها لمجرد انى بحب ابويا اوى ومحكمتش عقلى خنتها لما حاربتها مع ابويا

ومحكمتش ضميري وعارفة كمان خنتها ازاى ؟" نظرت له مستفهمة فاستطرد " خنتها لما خطبت بنت اخت مديحة اللى هى دلوقتى مرات ابويا . ( أموت واعرف خطبتها ليه بس الزفرة دي؟ مش معقول تكون بتحب واحدة زي دي) ولكنها تحدثت علّها تحصل على جواب لأسئلتها "وانت يعنى ملقتش الا بنت اخت ميمي دي دونا عن البنات كلها" نظر اليها أدهم مستغربا " وانتى عرفتى منين ان اسم الدلع بتاعها ميمي انا عمرى ما بناديها بالاسم دا ابدا دنا حتى بقولها طنط مديحة عشان عارف ان دا بيضايقها" سرحت قمر بأفكارها مرة اخرى هل تعترف له بأحداث المكالمة التى استمعت اليها دون ارادة ولكن قد تكون مخطئة وأخذت الحديث على هواها هى, وقد تظلم فتاة بريئة بالفعل. هى غير متأكدة مما سمعت او على الاقل ليست على درجة التأكيد التى تجعلها تتحدث عن شرف احداهن. ترى ما رد فعله ان كان ظنّها صحيحا؟ هل سيقبل بها؟؟ وما شأنها هى لماذا تفكر فى ذلك هل لان وضعها لا يختلف كثيرا عن وضع ميرا فى هذه النقطة تحديدا ؟؟!!

أجفلت حين أخرجها أدهم من تفكيرها " هووووووه روحتى فين ؟" - قمر " هه لا ابدا بفكر فى مشكلتك والله فعلا حاجة صعبة اوى من كل ناحية" واحتضنت نفسها تحاول تدفئة نفسها فقد اشتدت البرودة خاصة مع حلول الظلام "انتى شكلك بردتى تحبى ندخل احسن " - قمر " اه ياريت عشان بعد شوية هتلاقى شلالات عطس وحاجات مش هاتسرك بالمرة وكمان عشان اريح رجلى شوية" قبلت مساعدته اياها على النهوض وتوجها كلا منهما الى غرفته مع رأس مثقل بالجراح المنفتحة والاسئلة المحيرة وقلب مضطرب بالاحاسيس الجديدة.