رواية كف الطاغية الفصل الخامس 5 بقلم سارة الحسن
- جيـــداء ..
مشت زُبيــدة تفتح الباب وانـي مديت أيدي أريد أشلع الخبزة الليّ بالتنــور! حرورة الجمر لذعتني سحبتها بساع وبــس سمعت صوت أم عفريت فزيت جفــلانة ووكعت مني الخبزة بنص التنور! ما تجي إلا والشر سابقها .. باوعت لـ زُبيــدة وجهها أصفر تخاف منها حيـل! زادت نبضات گلبي صار عبالك سعفة بهوى من سمعت حچيها وشلون تلعب بعقل زُبيــدة حتى تروحلها!! ركضت عليها دفعت عگازتها عن رجل زُبيــدة حيل وسحبتها من أيدها وخرتها من وجهة أم عفريت، گويت گلبي وصحت بيها بغضب
جيـداء: چفينّا شرج وبلاج عـاااد، ساكتيلج لأن مستحين نهين شيباتج بس لا تزوديها ترا توصل حـدها
112
- أبتسمت ودارت عينها على زُبيــدة، رفعت أيدة المليانة تجاعيد ومدگدگة بلون أزرگ دگات أهل قبل وأشرت على رگبتها تگللها
أم عفريت: دم رگابهم بيدج
166
- عطت بيها محترگ گلبي
جيـداء: ولــــي منـــاااا فـــــااال الله ولا فالـــج
58
- رگعت الباب بوجهها وأسمع صوت ضحكتها يقشعر منها البدن، بقيت واكفة بمكاني لما سمعت صوت سحيچة خطواتها أبتعدت من يم بيتنّا، أنداريت على زُبيــدة وجهها ما يتفسر مستغربة على خايفة على مصدومة ، لزمتها من ذراعها احچي وياها
جيـداء: لا تصدكين بيها شما حچت ما يعلم الغيب إلا رب العالمين وحرام عليج تصدكينها هم
70
- هـزت راسها لا وتحچي بتلعثم
زُبيــدة: ما اصدكها وما خاف من سوالفها بس شكلها يخوفني
44
جيـداء: ديري بالج تروحين لبيتها زُبيــدة
- بلعت ريگها ومسحت على حاجبها الثخين بگُفى أيدهــا
زُبيــدة: لا والله ماروح لأن عاجبني منظر رگبتي بين جتافي ماريدها تطير
141
- حچتها وركضت للتنور احسها تخفي خوفها بسوالفها، مدت راسها بي ومن لذعتها الحرورة رجعت لورة تأشرلي عليه وتگلي
زُبيــدة: ولــج احترگن الخبزات من ورة ام صخام المتصخم وجهها بالدنيا گبل الآخرة
70
- وكفت على صفحة كاش وجهها من حر التنور واني مديت ايدي شلعتهن وخليتهن على صفحة لان محتركات وطلعت الوكعت هم، جابتلي حَطب شجرت شجار ثانـي وكعدت اشنگ الباقي من العجين وهيَّ جابت خبزة وگعدت گدامي تنگعها بالمي يلا تاكلها، ضَحكت
جيـداء: خمو فريخ بط أنتِ تنگعين الخبز يلا تاكلينة
105
زُبيــدة: من جنت صغيرة اشوف جديتي رحيمة تنگع خبز للبطات الصغار واني أنتظرها تفوت للبيت واروح اكله اغار منهن ليش تسويلهن وما تسويلي، لمـا مرة لزمتني عـاد كامت تنگعلهن واني تنطيني خبزة وطاسة مي اكعد يمهن وابقى انگع خبز واكل
94
- هيَّ تحچيلي واني ميتة ضحك، طريقة سوالفها تضحك اكثر من السالفة نفسها وماا تاخــذ نفس إلا من تزوع كل الحچي الليّ بطنها
جيـداء: يبووو عليــج اكو وحدة تغار من بطات؟
زُبيــدة: بصغري جنت اغار من كلشي اريدها بس إليَّ، وهذولة ولد خالي من يريدون يحرگون گلبي يرحون يحضنون ويبوسون بيها ويخلون عياطي سابع جار يسمعة
69
- تحچي وتلوج باللگمة، گومتها تشوف التنور وإجت أُميمة تدور خبزة لـ ربيع كاعد، عيونها مورمة من البچي حتى صوتها مبحوح اخذت گرصة ودارت وجها تريد ترجــع للبيت ساكتة صحت وراهــا
جيـداء: أنتِ هم تريگي حتى من اخلص خبز نكعد نقرا
- ما اندارت علــيَّ ورفعت أيــدها تتذمر
أُميمة: أهــووو أحْنـا بيااا حــال
48
- راحت ما منطية مجـال أناقشها و زُبيــدة رجعت تسأل بصوت ناصي
زُبيــدة: هاي أم زلوف البيض ليش تگلولها أم عفريت؟ شنو لابسها عفريت؟
52
جيـداء: سحارة وحاكمة جن ومن كثر مـــا قوية يگلولها أم عفريت لأن العفريت واحد من الجن الأقوياء حيل
104
- رفعت عيني عليها ما أريد اخوفها منها أكثر بس مجبورة حتى لا تفكر تروحلها
جيـداء: وهوايَّ ماتو من ورة شرهــا، اليروحلها مرة ينجبر يصير محبس بأصبعها
59
زُبيــدة: أُميمة گالت شتحچي يصير
- شلت صينية الشنگ ومشيت حطيتها على طرف التنور
جيـداء: كذب المنجمون ولو صدقوا، وارجع أگلج مايعلم الغيب إلا الله
46
- هزت راسها خوش وسكتت ، كملنّا خبز وهيَّ بس تتصفن وطول اليوم عيني عليها تشتغل وتتصفن الموضوع أخذ حيز براسها!! سولفت لأمي على جية أم عفريت أستغفرت ربها وگالت
حَفصة: ماتروح بس هم خلي عينج عليها خاف يلعب الشيطان بعقلها
32
- ردت أسوي الغدة من وكت حتى نكعد ندرس اريد أُميمة تلتهي اذا تبقى هيج تشبع بچي وتتمرض علينّا ما رضت أمي كالت ادرسن وعود زُبيــدة تسويلنّا اي شي، كعدنّا بالغرفة وجدتي بدرية كاعدة بالهول وتنعي وتبچي ما نشفت دمعتها .. دفرت الكتاب أُميمة محتقنة وروحها بخشمها
أُميمة: عوفني ماريد اقرا اريد ابچي ويَّ جديتي بدرية
53
- زُبيــدة جانت متمددة يمنّا وصافنة، كعدت على حيلها تگللها
زُبيــدة: راح اسكت جديتي وأنتِ اقري، أبوية وأخوتي اول وتالي يطلعون بس أنتِ حرام تضيع منج سنة
40
- سكتت أُميمة و زُبيــدة طلعت على جدتي بدرية سحبت شيلتها من حلگها مسحت دموعها ومددت مخلية راسها بحضنها تگللها
زُبيــدة: جدة عوفي البچي وفليني يمكن بيه گمل
149
- جدتي هم أخـذها الواهس وكعدت تفلي بشعرها وصــدك سكتت، امي شادة راسها وكاعدة على جهة الدنيا طالعة من عينها تنتظر خبر من أخوها حكمت، درسنّا شويَّ گوة علينا وندكت الباب صاحت أمـي على ربيع طلع يركض فتحها ورجعلنّا يركض يگللنّا عدنان بالباب، طفرت زُبيــدة واكفة على حيلها تلبس بشالها
زُبيــدة: انــي أطلعلة
33
- گمت مخبوصة أدري بيها تتمالخ وياه بس تطلع وسحبت الشال من راسها حطيتة على راسي
جيـداء: انـي أطلعلة
37
- جلبت بدشداشتي تعتعت بيه وتخزر ما تقبل لما صاحت بيها امي يلا عافتني، طلعت عليه وكفت ورة الباب ومادة بس راسي وهو منطيني ظهرة من سمع صوتي أنـدار علــيَّ يحچي بهدوء
عدنان: الســلام عليكم
- رديتلة بنبرة جامدة
جيــداء: وعليكم السلام
عدنان: شلونج؟
جيـداء: زينة
عدنان: امج شلونها؟
جيـداء: زينة
عدنان: وجديتي بدرية شلونها؟
جيـداء: زينة
عدنان: مريت اشوفكم اذا محتاجين شي
جيـداء: لا
عدنان: اجيبلكم شي؟
جيـداء: لا
79
- دنگت يستغفر و رد يباوعلي
عدنان: شنو السالفة تخلصينها زينة ولا؟
جيـداء: لا
44
- دفر الباب بعصبية متنرفز
عدنان: لاااا تستفزينييييي لج جيــدااااء، شبييييج اليــوم؟؟؟
جيـداء: شبية؟
75
- تخبل شلون هيج احچي وياه لا منطيتة أهمية ولا دا أخذ وانطي وياه بالحچي تعلم على جيـداء هذيج الليّ تشوفة تگوم ما تندل دربها ولا لسانها يعرف يحچي بعد، رفع ايدة بوجهي يأشر ويصيح
عدنان: شبيج شبيج؟؟؟
جيـداء: لا تصيح عدنان و..
- ولا خلاني اكمل ودفر الباب يرعد
عدنان: لااااا تگوليييين لا تصييييح اشعل اهلج واهل اليطلعلج
- عطت بي متنرفزة ومحترگ گلبي منه
جيـداء: كافي صيااااح وغلططط ترااا مو مراااجل
96
- صارت عيونة بگصتة، دفعني من جتفي طببني للحوش وطب ورايَّ وجهة ما يگصة السيف، گبل لا يحچي عطت بي واني الدموع غرگت وجهي
جيـداء: ادافعلك گدامهم بس أنتَ كلك غلط من ساسك لراسك، أنتَ تتعارك ويَّ صهيب لان كاعد يحمينّا بعد ما أخذوا كل اهلي وابوك يطرد امي شنوووو من بشرررر؟؟ عبالك ابوية واخوتي راح يصفگولك على هاي افعالك؟
- أشرتلة على باب الحوش مفرفحة
جيـداء: والله يلزمونك الباب واولهم خَطاب وتحلم بعد تشوف أظفري
77
عدنان: اشتعلوااااا اهل خَطاااب، شترديني أسوي لعد هـااا؟؟ ابوس راسة واكلة مشكور لان كاعد يم بنيات عمي
- هزيت راسي أي امسح بدموعي
جيـداء: أي وواجبك هــذا لأن فكر بينّا بوكت أنتَ تركض ورة أبوك، لو تريد جان بقيت يمنّا وگتلة مشكور واني أبن عمهن وعيني عليهن وفنة اليگدر يحچي بعـــد
66
- بقى يباوعلي خازرنــي وطك شريان بگصتة من سمع كلامي، دنگت راســي من سمعت صوت امـي وراي تحاچيه
حَفصة: روح عمة مشكور ما معتازين شي وهالباب لا تدكها بعد واذا عندك حچي بس يطلع عمك تحچي وياه
46
- باوعلها ودنگ يفرك بوجهة، حچة بصوت ناصي مايريد يسمعها
عدنان: شنو اليرضيج
- رفعت راسي عيوني تفتر بين عيونة بس هو ما باوعلي
جيـداء: تعتذر من امي واخوها وابن اخوها
64
- باوعلي بساع رافع حاجبة
عدنان: تردين تصغريني گدامهم جيـداء؟
هزيت راسي لا عيني بعينة وجاوبتة بصوت ناصي
جيـداء: الأعتذار يكبرك بعيونهم وعيوني
49
- لانت ملامحة واني رجعت دنگت ، رفع راسة على أمي يگللها
عدنان: طماطة خيار بتيتة ووياهن بصل هذن الگالتهن جيـداء، أنتِ ما ببالج شي؟
104
جَفصة: كلشي ما نريد تسلم
- عرفها زعلانة من نبرة صوتها الجامدة
عدنان: ابنج الصغير وسواها بحضنج عمة هم اعذريني كلنا اعصابنّا جانت تلفانة، وحگج على راسي واعتذرلج وابوس راسج وراس عمي حكمت وابنة الدايح بعـــد؟؟
172
- اكلها وشربها بلسانة لما ابتسمت يلا سكتت، سألتة عن أبوية واخوتي گاللها ماكو خبر لهسه هزت راسها خوش وگالتلي
حَفصة: سدي الباب ورة عدنان وتعالي كملي قراية
- فاتت للبيت وهو رفع حواجبة اثنينهن يباوع وراها
عدنان: والله وانطردت يا عدنان
50
- أبتسمت واني مدنگة راسي ما اريدة يشوف وجهي، مشى طلع من الباب واني وراه دفعتة اريد أسدة وهو وكف يطلع باكيت الجگاير رافع راسة يباوع للشارع واندار علــيَّ باوعلي بنظرة سريعة وگال
عدنان: هاي بس لخاطـــر عيونج
55
- من الخجل رگعت الباب بوجهة حيل والضحكة ترست وجهي ولا عبالك قبل دقايق جنت أشمر عليه، رجعت كعدت بالهول و أُميمة مسفطة الكتب ضامتهن ونايمة بفراشها ومبينة داتبچي بسكتة ..
31
- العصر مَـر علينا أخوها لأمي حَفصة وجان حيــل ضايج لأن ما مخلينّا يشوف أبوية وأخوتــي، بيت شبلي متحزمين حزام إلهم وأبــد ما ناوينها على خيــر بعد ما أنحرگت بستانهم، خلة أمي وجدتي يرجعن للدك واللطم .. أستغفر ربة ودار وجهة بقى واكف بباب الحـوش محتار شيسوي؟ وكفت وراه زُبيــدة لازمتة من ذراعة العيون تلمع بيها الدموع وصوتها محتقن
زُبيــدة: ليش ماتروح تحچي ويَّ بيت شبلي وإذا يردون كلنّا نحلف أحْنـا ما حرگنّا البستان
43
- باوعلها ورفع أيدة مسح على راسها ونزلها على جتفها، سحبها عليه حاضنها يحاچيها بهــدوء
حكمت: رحت وحچيت وحلفت بمكان اهلج بــس النار الحرگت البستان وچوت گلوبهم ماطفت بعدها، خليهم هالأيــام لما يبردون وهيَّ تفرج
26
- رفعت راسها تباوعلة متسألة
زُبيــدة: منو جبيرهم؟
حكمت: صفـوان، خـوش زلمة بس ماعنـدة لا كلمة ولا سلطة على هزبـر
93
- سِكتَت، باس راسها وطلع وبقينّا مثل اليتامة كلمن كاعد بزاوية وصافن واليبچي ماندري شنسوي، باوعت لـ زُبيــدة خايفة منها حيـــل لأن طول الوكت تتصفن، شمرت عليها المخدة احاچيها
جيـداء: گومي نامـــي حتى يرتاح گلبي
61
*
5
- زُبيــــــدة ..
سحبت المخدة الليّ شمرتها علــيَّ خليتها على الفراش ومددت، الف حَسبة ببالـــي والف فكرة ببالـــي والف شك والف شخص عليه علامة استفهام بهاي الحادثة! صرت أشك حتى بأهلي معقولة غـازي سواهــاا؟؟ انفض راسي مثل المخبلة واحچي بصوت عالــي
زُبيــدة: لااا زُبيــدة گبر شهالتفكير الجايف
61
- كلهم باوعوا علــيَّ و أُميمة هيَّ والعيون مورمة اجت كعدت يم راسي لازمة وجهي بين أديها تقرأ آيات قرأنية من كملت نفخت بوجهي
أُميمة: اللهم ان كان سحر فأبطلهُ
162
- دفعت ايدها ودرت وجهي على الحايط وجيـداء تضحك، المغرب أجة العاشگ جايب مسواك النّا وجيـداء گرطت كيلو الخيار كله لأن منه، فريت أيدي كارهة عدنان لأن تعارك ويَّ صهيب
زُبيــدة: غديي تتمعشگ وأهلها بالسجن
81
- خطية راحت أبتسامتها وحتى الخيارة الليّ بأيــدها ما كملتها، لليل كلش أحْنـا كلنّا متجمعات بالهول وقافلات البوب .. انـي مخلية ربيع بحضني وبين غافية وكاعدة أسمع الباب تندك بخفة! فتحت عيوني بلا وعــي أباوع على أُميمة شلون ركضت فتحت الباب طببت رجـال ورجعت سدتة! رجعت غمضت اگول لـروحــي حلمانة بس من سمعت صوتة فزيت على حيـــلي جفلانة! دار راسة علــيَّ يحاچيني بصوت ناصي
برهان: أســم الله
86
- گامت جيــداء فتحت الأضوية وهو مشى كعد أمي حضنها ورجعت تشهك وتبچي عافها لما خلصت دموعها ورفع راسها يمسح بوجهها، باسها من گصتها يگللها
برهان: لا تبچين يَـا ضي العيـن انــي احلها وداعتج
43
حَفصة: لا يرضون يعوفونّا بحالنّا ولا يرحمونّا
8
برهان: لا تنتظرين رحمة من العبد دام رحمة رب العالمين موجودة، گتلج انـي أحلها
58
- بقى شكد كاعد يمها وهيَّ تشگيلة وتحجيلة شلون راح تكبر هالمصايب يوم بعد يوم وهو يسمعها ساكت، سكتت أمي على سؤال أُميمة وهيَّ تباوع لـ برهان بشك
أُميمة: تريد تسلم روحك بمكانهم؟؟
- باوعلها بعيونة الغايــرة داخل محجرها، وعظمة الحاجب مرتفة شويَّ تنطي مظهر حاد لنظرات عيونة! فكّه حاد وبارز لان ماعنده لحية، يوم عن يوم يزيد خوف گلبي منه اكثر .. رفع حاجب واحد بحركة سريعة بمعنى لا وجاوبها بنبرة هادئة عكس حدة ملامحة
برهان: اكو حلول أســهل
95
- وكف على حيلة يلف بالشماغ الأسود على وجهة يخفي ملامحة يريد يمشي وأشرلي براسة أطلع وياه
برهان: تعالــي سدي الباب ورايَّ
48
- طلعت وياه هو يطلع من الباب الصغيرة، مد أيدة لزم رگبتي من ورة يمرغها بين أصابعة بهدوء لما وصلنّا الباب وگال
برهان: وين ظلج؟
- عگدت حاجبي مستغربة سؤالة، اتلفتت مداير نفسي ماعندي ظل لأن ماكو ضوة، دنگ راسة مخلي عيونة گدام عيوني وقبضة ايدة شدت على رگبتي يمرغلها بقوة احسة يريد يملصها
زُبيــدة: ماكو لأن ظلمة
- هز راسة أي
برهان: حتى بظلج لا تأمنين، وكت الظلمة يعوفج زُبيــدة
260
- ما أفتهمت شيقصد بس الليّ افتهمتة ما يريدني أأمن بأحد! بــــس ليش؟؟ رخت أيدة وأستقام بوكفتة ، فتــح الباب يريد يطلع وصحت وراه
زُبيــدة: أنتَ وين عايش هسه؟
- ما رد علــيَّ طلع وســد الباب ردت أشيل الطابوكة وانومها براسة
83
- رجعت للبيت محتارة ويا كبر هالحيرة! مر أول يوم وثانـي يوم وثالث يوم وماكو خبر عن أهلـــي! خالــي حار شيسوي ويَّ بيت شبلي وهمه معاندين ما يسحبون الشكوى .. برهان ما لگة كل حـــل وصارت الشرطة تدور عليه هو هم لأن بيت شبلي مشتكين عليه وحتى علينّا ما گدر يجي بعد .. سألت جيــداء عليه وين عايش؟ گالت
جيـداء: يم خالتــج هاي المتزوجة بقرية منسية حتى الشرطة مــا تندلهــا
80
- باليــوم الرابع أتخربطت علينّا جديتي بدرية من القهر، تيبست بفراشها لا تصد ولا ترد! تخبلنّا عليها وكفت گلوبنّا امي كاعدة يمها تبچي مفرفحة وتصيح على جيـداء تريدها تخابر عدنان يجي ياخذها للمستشفى، خابرت عليه ماطول خمس دقايق وإجة طلع ربيع عليه ركض فتحلة الباب وهو طب يركض وعمي وراه يرعد على أمي
كامل: شسويتيلهااا موتيهاااا الله لاااا يوفقج
119
- امي لبست عبايتها وطلعت تركض ورة عدنان الطلع جدتي للسيارة متجاهلتة حتى ما ردت عليه .. طلعوا وبقينّا بس أحْنـا ضاكت بينّا الدنيا ما ندري شنسوي! صار المغرب وهمه ماكو ولا وصلنّا خبر منهم ولا عدنا تلفون ونخابرهم لان التلفون امي اخذته وياها، أُميمة حابسة روحها بالغرفة تبچي وجيـداء بالمطبخ كاعدة يم ربيع يدور اكل وعيونها تجري دمعها سكتة، اخذت عبايتي من الغرفة وطبيت للمطبخ على جيـداء
زُبيــدة: اني راح اطلع شويَّ وأجي اليسألج علــيَّ گولي بالحمام
52
- طلعت من باب المطبخ امشي سريع وهيَّ ركضت ورايَّ لزمتني من أيدي تهز براسها لا متخبلة
جيـداء: ما تطلعين زُبيــدة مااا تطلعييييين
18
زُبيــدة: عوفيني جيـداء
- جرت العباية من راسي تلم بيها بين أديها
جيـداء: يذبحونج زُبيــدة والله يذبحونج لااا تطلعيييين
- اخذتها من ايدها ماعندي غير حَـل
زُبيــدة: أنتِ لا تحچين وتگولين اني طلعت ومحد راح يعرف شي
22
- مشيت بساع البس بعبايتي وهيَّ تركض ورايَّ للباب الصغيرة تتوسلني بس كون ارجع، من عجزت تقنعني صاحت ورايَّ بعصبية تهددني
جيـداء: و روح أمي أگللهم اذا رجلج عَتبت عتبة هالباب
- ألتفت عليها دموعي تكت من القهر
زُبيــدة: واني هم أگللهم جنتي تتواعدين ويَّ عدنان وخلّ ننذبح اثنينّا
77
- بقت مصدومة مني، عفتها وطلعت راگعة الباب ورايَّ حيــل، بعدني يم باب بيتنّا ولمحت الغريب كاعد على حافة النهر اعرفة من الشفقة الليّ دوم براسة، ما أهتميت إله وبقيت أمشي ناحية بيت شبلي بخطوات سريعة من صرت قريبة منه حَس على خطواتي أندار باوعلي إجت عيني بعينة خزرتة ودرت عيني، وكف على حيلة واجة يمشي أتجاهي
غَضنفر: السـلام عليكم
- ما وكفت وبقيت أمشي سريع مغطية وجهي بطرف عبايتي ماطالع غير عيوني، نترت بي محترگ گلبي منه
زُبيــدة: لا هلة ولا مرحبا
65
- مشى حـذاي يحجي بصوت ناصي
غَضنفر: على حچايتي وياج انـه ما غدرتج، ساعدتيني وساعدتج
19
- وكفت مندارة عليه
زُبيــدة: بشنو ساعدتني يالفتااان؟ فتنت علــيَّ يم زبير وجانت راح تطير رگبتي هيَّ هاي مساعدة؟؟
21
- مدنگ ما يباوعلي والشفقة مغطية نص ملامحة
غَضنفر: ماحچيت إلا من عرفت السالفة شني، حتى يطمطم مصيبتج وما تنفضحين راح ابن عمج سمم نص بستان اهلج علمود لا يشكون بيكم
38
- درت وجهي بساع على بستان أهلي جهة وحدة منه كلها ذبلانة وداتموت! بلعت ريگي ميتة قهر هذا تعب أهلي! مسحت عيوني ورجعت باوعتلة بشك
زُبيــدة: أنتَ منو؟ وشعندك لهسه هنــاا؟
- جاوبني بساع بدون تردد
غَضنفر: انـه من أهــل الله، رجــال أتهموا باطـل وشارد من ديرتة لما ربنّا يبين حوبة المظلوم
257
زُبيــدة: بالمــرة الجاية أبجيلك دمعتين ويَّ هالفلم حتى أصدكك
58
- دار وجهة يستغفر ومادري شحچة هم ما أفتهمتة، مشيت وعفتة وهو مشى ورايَّ
غَضنفر: ماعندي مصلحة أچـذب عليج
زُبيــدة: بس عنـدك مصلحة تفتن علــيَّ
13
غَضنفر: دحجج على شعــ..
- اول كلمة حچاها بنرفزة والثانية ما كملها سكت!!
160
- وكفت دايرة وجهي عليه بساع مضيگة عيوني بشك
زُبيــدة: أنتَ مدزوز علينّا مو؟ أنتَ الحرگت البستان حتى تسوي فتنّا بين أهلي وبيت شبلي؟
23
- لزم مقدمة الشفقة يعدلها على راسة يتلفت يمنى ويسرى وگال
غَضنفر: دام عقلج على گدج خلّ افهمج، ليش ساعدتج من البداية حتى لا تطيح مصيبة على روسكم اذا أريد أحرگة بعدين؟
24
زُبيــدة: حتى تكسب ثقتي عود ساعدتني واگول عليك رجال ماكو منه
14
غَضنفر: وشسوي بثقتج؟ تطببني الجنة؟
63
- هم صدك ما خلالي حجة أتهمة بعد بس ما اگدر اتنازل، درت وجهي مكملة دربي ونترت بي
زُبيــدة: خوش لا تبقى تمشى ورايَّ تـرا مو بس اخوتي يكسرون رجلك حتى الملفيك لو شافك يكسر رجلك
23
- ما حجة بعد ولا مشى ورايَّ، وصلت بيت شبلي وهو بقى واكف يم باب بيت زبيـر مادري ليش مأمـن بي وملفي يمة رغم صاير زين ويكدر يشوفلة غيــر مكان .. دكيت باب بيت شبلي الصغيرة حيــل لمــا فتحولــي الباب جان هذا الما ينجرع خازرنــي بضوجة منزعج من دكة الباب
زيـدان: خيــر؟؟
42
زُبيــدة: هنـا صفوان؟
- رفع حاجبة ما عاجبة الحچي
زيـدان: اخوج المنغولي وتصيحيلة بأسمة لا عمـي ولا خالــي
188
زُبيــدة: أخوية المنغولي يسوى راســك وما راح أرد اكثر حتى لا يگولون أسماعيل ما عـرف يربي
30
- فر أيدة يضحك
زيـدان: بكل الحالات مگيولة عنه ماعرف يربي وأولهم اخوج العار برهان
24
زُبيــدة: ماعندي حچي وياك، صيحلي رجال أتفاهم وياه
135
زيـدان: الگدامج شنو لعد؟
57
- درت وجهي عنه ورجعت دگيت الباب حيــل
زُبيــدة: مو كلمن صخم وجهة گال انـي حداد
126
- تنرفز حيل عافني ومشى مادري عليمن صاح بعصبية
زيـدان: تعااااال شوفهااا شتريد وچفيناااا شر هالمخاااابيل
20
- شفت راوية طلعت من باب المطبخ الصغير مالتهم تباوعلي واخوها الاغث من أخوه الجبير أجاني سلم وسأل شمحتاجة عدت عليه نفس الحچاية
زُبيــدة: جاية على صفوان
- لازم الباب بأيدة اليسرى وأصبعة السبابة يدك على الباب بحركة سريعة يوتر
أبـو بكرة: راح أعوف عداوة أهلي وأهلج على جهة وسألج بأحترام وجاوبي أنتِ بنفس الأحترام، شتردين؟
32
زُبيــدة: أبـوك
- رفع راسة يستغفر ورجع يباوعلي
أبـو بكرة: بگد بنتة أنتِ ما يباوعلج، أبنة يفيدج؟
227
زُبيــدة: احچي ويايَّ بأحترام يا أبو الأحترام، اريد احچي ويَّ أبوك شنو المامفهوم؟ خايفين عليه مني؟ جيب اختج خلّ تفتشني
29
- وخـر عن دربي أشرلي أفوت، سد الباب ومشى گدامي
أبـو بكرة: تعالـي
6
- مشيت وراه فتح باب الأستقبال وأشرلي أفوت بس عتبت رجلي عتبة البيت بقيت واكفة يم الباب وهو راح يصيح لأبوه، ماطول ورجـع هو وياه! من التوتر أدية بقت تعصر بعبايتي حيـــل! فات وهو مدنگ ويصلي على محمد، سَلم ورفع راسة بس صارت عيونة علــيَّ عبالك أتكهرب! رديت السلام وهو صافن بوجهــي توترت أكثر وما نزل عينة إلا من أبنة گالة
أبـو بكرة: هـاي بنت أسماعيـل
143
- أشرلي أكعد، كعدت على القنفة الليّ يم الباب عبالك راح ياكلوني، كعد گدامـي وگال لأبنة يطلع ويعوفنة وحدنّا، أشرلي أحچي وگال
صفوان: گولــي بنيتي بشنو اكدر اساعدج؟
- بلعت ريگي ومن قهري على أهلي وحالنّا نزلت دموعي وحچيت بصوت مخنوگ
زُبيــدة: انـي شايلة روحـي بجف أيدي وجايتك لان لو عرفوا أهلـي والله يذبحوني، بس خالـي حكمت گال أنتَ خوش رجـال إجيتك وانـي كلني أمل ما ترجعني خايبة
31
صفوان: الأكدر عليه ما أقصر بي أن شاء الله، گولــي
3
زُبيــدة: أريـدك توصل الراح اگولة لأبو الشاهين، أهلــي مالهم علاقة بحرگ البستان أنتَ فكر بيها ليش يحرگونة؟ يدرون راح تثبت التهمة عليهم معقولة هيج أغبياء همة؟
19
صفوان: لعـد منو؟
- رفعت جتافي مادري
زُبيــدة: مادري منو بس مبينة فتنة بيناتنّا، أحْنـا بوگت ندور رضاكم حتى يرجع برهان وتخلص المشاكل ما معقول نروح نحرگ بستانكم ونزيد الطين بَلة
44
- وكف على حيلة وانـي وكفت بساع وياه گلبي يتراجف
زُبيــدة: على الأقــل خلولنّا واحــد نحتمي بي أحْنـا تطشرنّا وراهم
34
- فزيت من أنفتحت الباب الواكفة يمها انــي، كلهم جانوا واكفين! زيـدان وأبو بكرة ووياهــم عمهم هزبــر! گلبي تزيد نبضاتة بخوف أكثـر واكثر كل ما يتقرب مني خطــوة، درت وجهي على صفوان من قلة حيلتي أهلي "خـرز ناعم وتطشر من أدية" وأنسدت بوجهي من كل كتر
زُبيــدة: شوف بينّا بناتكم شنو حالهن لو صفن بلا أب واخ
86
*
2
- راويـــــة ..
الضــــــياع! هــذا حالنّا بدون أب وأخ ..
كسرت گلبي شلون تحچي مهضومة ومبينة
ما إجت هالچية إلا وبيبان الدنيا كلها أنسدت بوجهم!
على گــد ما جنت مقهورة من حرگ البستان
على گـد ما قهرتني زُبيــدة اكثــر وأتمنيت أهلها يطلعون
اليوم قبل باجـر! لازگة أذني على الباب أسمع سوالفهم
وسمعت عمــي هزبـر گاللها
هزبـر: ماكــو شي بدون مقابل، حتى يطلعون لازم تتنازلين عن شي
52
زُبيــدة: شـ.. شنـ.. شنو؟؟
- تمتمت بالحچي بخوف، حچالها اليريدة منها بصوت ناصي ما گدرت أسمعة وهيّ شهگت شهگة تشگ الگلب
82
- سمعت الباب انرگعت وهيَّ طلعت اسمع صوتها بعيد، ركضت لباب المطبخ اباوعلها وكفت يم الباب الصغيرة واندارت على الولد وعمي تمسح بعيونها وصاحت بيهم مفرفحة
زُبيــدة: عساكم بمصيبة تخليكم تحيرون وين تصدون وجوهكم
80
- فتحت الباب الصغيرة وطلعت واني ركضت وراهــا حسيت اريد أحضنها وأهون عليها مصيبتها بس ما لحگتها، بقيت واكفة بالباب اباوعلها وهيَّ راحت تمشي بخطوات سريعة، من صارت گدام بيت كامل أنفتحت باب بيت عمها حكمت وطلع زبيـر باوعلها وصاح وراها بعصبية
زبيـر: لـــج غَضب ؟؟
73
- وكفت وأندارت عليه تمسح بدموعها المداتوكف، تقرب عليها يسألها وين جانت؟ شهگت تبچي ومادري وين تأشرلة
زُبيــدة: هنا هنا وين اروح يعني
2
زبيـر: وشعندج هنـااا؟ أنتِ ما توبين من المصاااايب؟؟ احچي وين جنتي ولا تچذبين
21
- عاطت بي روحــها مفرفحة ميتة قهر
زُبيــدة: نسييييت وأجيتك اريـــــد اكلك اخذووو كل اهلي وجديتي تخربطت وبقينااا وحدنّاااا، نسييييييت وصلت بابك وتذكرت لو اموت بعد مااا أجيــك
44
- دارت وجهها وكملت دربها وصوت شهگاتها ليمي واصل، بقى واكف بمكانة الحايط رَد وهو ما رَد! فزيت على أيـد حَمـد انحطت على جتفي سحبني بهدوء وسد الباب بس ماطبگها حسيتها متقصد حتى لا يوصل صوتها لـ زبيـر و يشك هيَّ جانت يمنّا!
59
- مشاني وياه للبيت باوعت لوجهة محتقن
راويـة: شراد منها عمي هزبـر؟ ليش هيج كسرتوها وهيَّ دايسة بيتنّا؟
- سكت مارد، خنگتني العبرة وصوتي راح گوة ينسمع
راويــة: تخيلني انـي بمكانها أروح لبيت اريد رحمتهم وانطرد واطلع هيج مفرفحة
44
- وخــر أيــدة من جتفي ومشى من يمي ساكت، وكفت بباب الأستقبال أباوع لأبوية وعمـي متذابحين بيناتهم ودلال بنصهم تبچي مفرفحة تگول لأبوية خليهم يخيسون بالسجن مفرفح گلبها على أبنها، صاح بيهم أبــوية محترگ گلبة على زُبيــدة
صفوان: واحـــد غلط شذنب أهلة؟؟ أخيااااتة شنو ذنبهن هيج يصير بحالهن؟؟؟
44
- لطمت أمي على صدرها وصاحت
عهود: يــاااا تدافعلهم صفــــواااان؟؟؟
45
- ما ألتفت عليها وبقى يباوع لعمي وأيدة تأشر على زيـدان
صفوان: من تحچي على زيـدان وسوالفة الما ترضي الله! أنتَ هاي عمايلك ترضي لعد؟ لو صايرين مثل الينصح بالصلاة وما يصلي
72
- زعــل وطلـــع أبوية وامي ركضت وراه شايطة شلون يفزعلهم، جان يريد يطلع من الباب الصغيرة من شافها وراها عاط بيها زهگان وغير دربة طلع من الباب الجبيرة الليّ على الشارع وهيَّ مــادري شبيها فرفحت وتخبلت عبالك شو شسوة .
17
- درت وجهي على زيـدان يسأل عمي
زيـدان: شنسوي هسه؟
هزبـر: خلّ نشوف هاي أم لسان تسوي الأريدة منها لو لا؟ وراها نقرر أحْنـا شنسوي
41
دلال: شردت منها؟؟؟
- سألتة بحدة ونبرة شك! وكف على حيلة متمشي للباب الليّ على البيت مجاوبها بهدوء
هزبـر: مو شغلج
82
- بقينّا مثل الأطرش بالزفــة، بين يوم وليلة صارت المصايب والمشاكل تمطر علينّا! كله بسبب ثار قـديم! ومن تصرفات عمي وحقــدة عليهم نعرف عمي لهسه ما طفت نار گلبة على ابنـة وضالة بنفسة لـ يـا سبب مات.!
14
- بقى بالــي يم زُبيــدة وصورتها مدا تطلع من راسي شلون طلعت من يم أهلي مفرفحة وشلون صيحت بوجه ابن عمها محترگ گلبها، درت وجهي على بينات لازمة تلفونها مادري شتكتب وضايجة، زفرت نفس زهگانة من حالتــها
راويـة: أنتِ تعرفين شلون تضحكين؟
- باوعتلي صفح ورجعت تباوع بتلفونها
روايـة: اعلمج؟ نبلش من الابتسامة شويَّ شويَّ لما نوصل الضحكة أم الصوت
69
بينات: مقهورة
- ضحكت وتربعت كاعدة عدل گدامها
راويـة: وين الجديد؟ كل ما حچيت وياج گلتي ما مرتاحة، مقهورة، ضايجة، احس بيه شي! البومة مو مثلج تدرين؟
19
بينات: لا والله معلومة جديدة راح أضيفها للقاموس
11
- شمرت التلفون من ايديها وباوعت لكتبها تتذمر
بينات: لو ما الخوف البگلبي والليّ ماله داعي جان هسه اني متخرجة وياج مو بعدني بالسادس
16
- گلبت اوراق الكتاب ورقة ورقة وهيَّ تحچيلي شلون دا تحلم باللحظة الليّ تشوف مكتوب گدام أسمها ناجحة، وراهـا تداوم كلية وتطلع من هالقوقعة الليّ هيَّ بيها! تتخرج وتتعين بأي مكان وكل يوم تكشخ وتروح تداوم بكل حماس .. ضَحكت على أحلامها
راويـة: وين اكو تعيين
31
بينات: أشتغل ويَّ شبل تاجرة
- ضحكنّا أثنينّا نقشمر على تاجرنّا الحلو
22
- مشت الساعات بسرعة وكلمن حابس روحة بغرفتة وبباله الف حَسبة، أبوية من رجع للبيت وهو كل شويَّ يدك على شبل يسأله وينه؟ وهو يگله كملت شغل ورحت للگهوة تالــي تأخـر الوكت وهو ماكو وخابرة أبوية رزلة طلع حرگة گلبة بي يـلا رجع شبل للبيت، باوع لأمي وأبوية أثنينهم متنگين ويخوزرون بي
شبل: شهالوجوه الحلوة التگطع الخلفة
91
- گام أبوية عصبي
صفوان: منا وهيج حدك للـ9 أنتَ مگبور بالبيت أفتهمت؟؟؟
23
- هز راسة أي، أبوية مشى وأمي تعاتبة عود
عهود: الا تخلي ابوك يحچي يلا ترجع؟ هاي كل اخوتك من المغرب همه بالبيت
2
- كعد يمها يبوس بوجهها
شبل: اكو عالِم يگول "الليّ يريد ينجح بحياتة ما يطب البيت إلا وكت النوم"
36
- ضربتة راشدي بخفة أيدها وگامت من يمة تدردم
عهود: أي كون يشتغل مو يروح يگعد بالگهاوي
8
- بقى يضحك ورجــع راسة لورة ساندة على الكرويتة، اني وبينات واكفات نباوعلة، دار وجهة علينّا يباوعلنّا صفح
شبل: رزايـل وترزلت شوكت تروحن؟ لما يرجعون يضربوني؟
18
بينات: شبعت لو تريد بعد؟
8
- گاملها بساع وهيَّ ركضت طبت للغرفة وطبگت الباب ، باوع علــيَّ ينتر
شبل: ماعندج أبرة وخيط
- أخذتلي صفنة بوجهة وسألتة
راويـة: شسوي بيهن؟
شبل: خيطي لسانها مفتوگ
40
- عافنـي وراح لغرفتة يدردم علينّا، ما أهتميتلة وطبيت للغرفة هيَّ كاعدة لازمة تلفونها تضحك، فريت أيدي ومددت بفراشي مغمضة عيوني .. بقيت افكـر بأفكار عشوائية تمر الساعات وانـي على هالحال! سمعتها صاحتني بأسمي ما رديت عليها مابيه حيــل! كامت طلعت ووين يلا أنبني ضميري گلت خطية خاف هم دا تبچي .. گمت طلعت وراهــا البيت أظلم كله وهدوء إذا توگع الأبرة أسمعها، أتلفتت على نهاية الغرفة والأستقبال اشوف ياهيَّ منهن ضواها مشتغل! ماكو ولا وحـدة .. طبيت للمطبخ وسمعت صوت همس من برا، مشيت بساع مديت أيدي على يدة الباب أريـد أفتحها وفتحت عيني مذهولة من شفت شبل واكف يمها مادري شحچتلة وهيَّ تبچي، أندار عليها لزمها من فچها بقوة شهگت ورفعت روحها واكفة على أطراف أصابعها وهو مخلي وجهة بنص وجهة الغضب يتطافر من عيونة
شبل: جربي تحچين إذاااا ما شربت من دمــج لـــج بيناااات
165
- فتحت الباب وركضت عليهم مادري شبيه بس اريد أبعدها عنه، من شافني لانت ملامحة بساع وفر راسة بأيده يمنى ويسرى يگلي
شبل: دافحص عيونها شو صايرات حول
26
- جريتها من أيدة بقوة گلبي يدك حيل
راويـة: شبيك وياهاااا؟ وليش هيج لازمهااا شبل؟
- عگد حاجبة عود مستغرب ليش اني مصدومة
شبل: واذا لزمتها قابل زليخة هيَّ؟ بعدين اني هم مثل أخوها ونيتي طاهرة أتجاهة
26
راويـة: أحْنـا ما نمشي على النياااات
- هز راسة اي
شبل: صح والله نمشي على رجيلنّا
33
- نرفزني انداريت عليها هيَّ مدنگة وتمسح بدموعها، أشرلنّا نطب جوة اخذتها ومشيت من وصلنّا الباب صاح وراها يحذرها مادري يهددها
شبل: كون اسمعج تگولين بعد اريد ابطل لو أأجل هاي السنة
25
- خزرتة ونترت بي
بينات: شتريد تسوي يعني؟
شبل: نزوجج لهذا خبل المنطقة
66
- عتيتها وطببتها للبيت اسأل بيها شكو وشصاير بيناتهم؟ عادت نفس حچي شبل على أساس تريد تبطل او تأجل هالسنة وهو مايقبل، سكتت ما مقتنعة وخليتها تنام يلا نمت، كعدت الصبح على هوسة جديدة بين عمي وأبوية وعلى نفس الموضوع! زفرت نفسي بملل وضوجة شگد مشتاقة لايامــي القديمة الليّ ...
34
*
8
- رُبــى ..
أكعد كل يوم من الصبح على صوت العصافير الليّ توكف على شجرتنّا، أگوم وانــي كلني نشاط ألبس وحدة من دشاديشي الأحبها تكون مخصرة من الخصر ومن جوة كلوش، والردن نفس الشي هم كلوش جوة العكس، كل دشداشة أخيطها أسوي من نفس القماش قطعة مثلثة اشـدها بشعري لو أخلي مفتوح لو أظفرة ظفاير أثنين ..
217
- فتحت الباب والشبابيك حتى يتهوى البيت، حطيت قوري الچاي على النــار وطلعت للحديقة شغلت الصوندة ارش بالورد حتى تبرد الحديقة ، جان خايط بيتنّا طيــن من أرشة احضن الحايط وأشم بي
رُبـى: أوف بس أنتَ الترد روحــــي
51
- فزيت على صوت عمي يضحك
محمد: ياهو هذا؟
20
- وخرت عن الحايط بساع متفشلة
رُبـى: الطين والله الطين
5
- مشيت وكفت يمة حط ايدة على جتافي وباس راسي
محمد: شنو هالعصفورة الحلوة
24
- أخجل أخجل وجهي احسه يگوم يبخ حرارة من يتغزل بيه وهو يموت ضحك، عفتة وركضت للمطبخ بحجة اسويلة الريـوگ كملت وحطيتة بالصينية وهو إجــة شالها حطها بالحديقة وانـي أخذت القوري والأستكانات وطلعت كعدت يمة، صبيتلة وحطيتة گدامة تريك وكمل وگام طلع لشغلة .. وانــي نفس روتين يومية أعزل البيت وأسوي الغدة وأنتظر عمي محمد يرجع من شغلة، هو كل أهلي ماعندي غيرة ولا عنده غيري بهاي الدنيا.
89
- حطيت عبايتي على راســي وصعدت على طابوكات يم حايط الطين الليّ يفصل بين بيتنّا وبيت جيرانة الخياطة، بيتهم القديم من طين وحتى الدرج خارجي صاير لزگ ويَّ الحايط الليّ بيناتنّا بـس من بنوا بيت جديد عافوا على حطتة وسكنوا بيتهم الجديد الليّ بصفة .. صاروا أبعد علــيَّ شكد ما أصيــح عليهم ما يسمعوني، بـس من فترة كل ما أصيح عليهم يطلع ولد غَريب من بيت الطين وبدون لا يباوعلي يسأل
::- تفضلي خوية رايدتمن؟
152
رُبـى: عمة مريم اذا متصير زحمة
- يهز راسة أي ومشى وكف بباب المطبخ دگها حيل وصاح
::- خالـــة مريم وينـــج؟؟؟؟
98
- طلعت على صوتة وهو أشرلها علــيَّ، إجتني وهو طب للمطبخ مالتهم
مريم: تدورين على دشداشتج؟
- خابت امالي من سؤالها
رُبـى: ما مخيطتها مـو؟؟ عمةةة والله صارلها هوايَّ
11
- ضحكت تگلي
مريم: والله حقج بس ما صَحلي
- سكتت شلون أقنعها؟ رفعتلها حواجبي اضحك
رُبـى: أسويلج كيكة وتخيطينها اليوم؟
10
مريم: تعالـي العصر أنتِ والكيكة وقيسي يمي حتى إذا بي شي اسويلجياه
22
- شمرتلها بوسة بالهوى وسألتها عن بنتها گالت نايمة، رجعت لبيتنّا سويت كيكتين وحدة إلها ووحدة إلنـا ، العصر أخذتها ورحتلها من دگيت الباب فتحلي واحد من ولدها الصغار! طببني للبيت تلگتني رزان بنت عمة مريم اخذت الكيكة من أيدي تضحك وگالت
رزان: هيَّ امي تنتظر كيكتج حتى چاي سوت
20
رُبـى: عمة منا وهيج أجيب القطعة وأجيب وياها كيكة ولا ابقى يومية صايحة عليج
- ضحكت عمة مريم وهيَّ تمدح بكيكتي وشكد تحبها
15
- جانت مكملة دشداشتي جربتها گدامها فيت مابيها لا زايـد ولا ناقــص، ردت أرجـع للبيت ماقبلت گالت اكلي ويانه يلا، قسمت الكيكة عمة مريم وصاحت على رزان تجيب صينية صغيرة بيها ماعون وأستكان فارغ، صبت چاي بالأستكان وحطت قطعتين كيك بالماعون وگالتلها
مريم: أخذيهن لـ برهان
410
- راحت رزان توديهن ورجعت، شربت چاي يمهم واخذت دشداشتي وگمت اريد ارجع للبيت .. طلعت ويايَّ رزان توصلني للباب وشفت الليّ أسمة برهان كاعدة على درج الطين الليّ يم حايطنّا! سألت رزان عليه گالت
رزان: هـذا أبن خالتــي
رُبـى: خطار يمكم؟
رزان: لا زعـــلان من أهلة وإجة يمنّا لما يجون يصالحونة يرجع يمهم
77
- ضحكت مستغربة رجــال شكدة شكبرة! ملامحة تخوف ذيب بليلة ظلمة مابيها گمرية يزعل من أهلة ويهج؟ وفوگاها ينتظرهم يجون يصالحونة؟
رُبـى: وليش زعلان؟
- باوعتلة ورجعت باوعتلي بقهر عبالي شو شراح تگلي وتصدمني وصدمتني بصدمة أقوى
رزان: خطية متغدين وما مخليلة غير عظم بالمرگة وهو زعلان هاي أهـانة
257
رُبـى: اكلج تحچين صدك لو ناصبة علــيَّ؟
- حطت أيدها يم راسها تأشرلي بمعنى مخبل وهمست
رزان: لا يغرج شكلة ترا راسة فارغ
31
رُبـى: نحشي
- طگتها بضحكة حتى هو رفع راسة على ضحكتها
رزان: ولج هو بيتنجانة دولمة ونحشي؟؟
46
- بقت عيني عليه خازر گُفاها، دغيتها من جتفها بأصبعي وبعيوني أشرتلها عليه
رُبـى: ترا خازرج وراح يجي يخبرج
15
- التفت عليه وبعد ما دارت وجهها ركضت للبيت وعافتني بالباب، سحبتها بهدوء سديتها ومشيت لبيتنّا .. وهيــج تعدي الأيــام انــي هذه حياتي نفس الروتين ماعندي أي شي جديد أسويه .. وتكرر نفس الصباح واني وأرش الحديقة من الصبح واندندن أغني، رشيت الحايط وضربت بخشمي ريحة الطين ابتسمت وتقربت عليه اشمة زينة ومستمرة أغني لحد ما فزيت على صوت تلفون يدك ورة الحايـط! أبتعدت بساع وأسمعة جاوب يحچي بهدوء
برهان: هــلا يا ضي العين
79
- عرفت بنية من النبرة! سكت شويَّ ورد گاللها
برهان: خلّ ياخــذها هيَّ هم أمة، بس يطلع أبوية يروح يجيبها
26
- بقى يسوي "اممم" وهيَّ مادري شداتحچي وياه، طول وهو ساكت يلا گاللها
برهان: أچــذب عليج إذا اگلج لگيت حل لأن ماكو حل غير الليّ ببالج وبالي وإذا طــال الوضع راح يصير
40
- فزيت على صوت عمي محمد، أنداريت ومشيتلة بساع
محمد: شتسوين واكفة هنـا؟
- بلعت ريگي متوترة واحاول أخفي هالتوتر بأبتسامتي
رُبـى: مو رشيت الحايط نسيت روحـي واني أشم ريحتة
4
- هـز راسة خوش وانـــي ركضت للمطبخ وبقى كلامة براسـي منو هاي ضي عينة؟ ومنو هاي الليّ أخذوها وبعدين أبوه يروح يجيبها؟ ما أعرف كلشي عن حياتة لهالسبب ما أفتهمت كلشي من حديثة .
81
*
3
- زُبيــدة ..
بعــد أيــام من نومة جدتي بالمستشفى گالــوا صارت زينة وراح يطلعونها، كعدنّا من الصبح نظفنّا البيت وجيـداء طبخت الغــدة حاسبة حساب عمي كامل راح يجي ومرتة وعمتي أم غايب هالأيام خلصتها يمنّا .. للظهر أنفتحت الباب وفاتت أمــي وحــدها تبچي وتتحسب على عمي كامل! سألتها أُميمة شبيج؟ كعدت بالگاع تمسح وجهها بطرف شالها محترگ گلبها
حَفصة: عمــج أخذ جديتج بدرية يمة يگلي انتو تموتونها لو بقت يمكم
أُميمة: على اساس هو راح يعيشها بالفردوس
51
- جابتلها مي جيـداء شربت وكامت طبت للحمام سبحت ولفت راسها ونامت ميتة تعب وقهرها عمي فوك قهرهـــا والضيم العايشتة .. ربيـع هاي الايام يطلع يلعب هوايَّ برا لو بالبستان لأن يضوج وحدة بالبيت ، بهذاك اليوم تغدة وطلع يلعب بالبستان فوك النص ساعة تقريبًا وإجة يركض يگلي
ربيـع: زُبيــدة هاي بنية تگول صيح لـ زُبيــدة
28
- گمت وياه انداريت ورة البيت فتحت الباب الصغيرة لگيتها راويـة! بقيت صافنة بوجهة وهيَّ متوترة وتتلفت تخاف أحـد يشوفها، مديت راسي أباوع وراهـا أشوف وحدها لو أحد وياها! لمحت زيـدان الغثيت واكف عبور النهر عينة علينا، رجعت لورة وثبتت نظراتي عليها
زُبيــدة: تفضلي محتاجة شي؟
- باوعت لأخوها ورجعت تباوعلي
راويـة: ماردت اجي وازعجج بس أنجبرت، زيـدان گال شصار وياها؟ فكرت بالرادة عمي منها؟
25
زُبيــدة: وأنتَ تعرفين شيريد عمج؟
- هزت راسها لا
زُبيــدة: خوش واني ما راح اگلج حتى لا تلعب نفسج منه ومن أخوج
77
- دنگت راسها فشلانة، بعدنــي ما حچيت كل الحچي الليّ بگلبي وسمعت صوت زبيـر تعارك ويَّ زيـدان، راويـة عافتني وراحت تركض عليهم تريد تصير بيناتهم تفازعهم وصاح بيها زيـدان جمد الدم بعروگها خلاها تركض لبيتهم بدون ما تباوع وراهــا! زبيـر لازم زيـدان من مقدمة ملابسة مادري شيحچي وياه وعلى غفلة زبيـر ضربة على خشمة وكعة بالگاع وصــاح بي يرعد
زبيـر: عليمن متفرعن علينااااا لك خااااايـــس؟؟؟ ناسيهن السويتهن علموووودك؟؟ مااا غزرن بييييييك؟؟
82
- زيـدان مدنگ لازمة خشمة بوجع، نفض راسة وباوع لـ زبيـر
زيـدان: ما ناكرهن وهنّه الشافعاتلك، لو ما هنّه جان هسه أنتَ ويَّ ولد عمرك تتسامرون بالسجن
28
- تمالخوا بيناتهم ما فَضت عركتهم إلا من إجــة صفوان فازعهم! صار يصيح عليهم محترگ گلبة واني واكفة بالباب حاضنة أديّة على صــدري واتفرج! صفوان اخذ زيـدان طببة للبيت وبقى زبيـر واكف گدام بيتة! من فاتوا طلع الغريب يباوع على باب بيت شبلي و رد يباوع لـ زبيـر يسألة
غَضنفر: ما شمرتة بالنهــر
41
زبيـر: الثور بس لشة ما يعرف يسبح
39
غَضنفر: اي خلّ يشوف الموت وطلعة
27
- بحركة سريعة أندار علــيَّ زبيـر عبالك هسه يلا تذكرني، إجـة يمشي علــيَّ بخطوات سريعة عبالة راح أخاف وانهزم منه بس اني بقيت واكفة اريد يجي يعاركني حتى افرغ ضمي بي .. بعده گدام بيت عمتي أم غايب وصااح بيه
زبيـر: شيريـــــد منــج هالعااااار؟؟؟؟
23
زُبيــدة: يريدني
- جاوبتة بهدوء وهو تخبل وكف بمكانة يتلفت شاف طابوكات يم الحايط دنگ شال وحدة وإجانـي والغريب إجة يركض عليه صار بيناتنا منطيني ظهرة واسمعة يگلة بصوت ناصي
غَضنفر: عيب مني ولك
103
- وهذاك يتهدد ويصيح تخبل يريد يعرف زيـدان شيريد مني؟ ليش داز أختة علــيَّ؟ رديت اجاوبة بنفس الهدوء
زُبيــدة: أنتَ شعليك؟ صارلنّا ايام وحدنّا ما دگيت بابنّا تسأل علينّا هسه شالتك الغيرة من شفت زيـدان داز أختة علــيَّ مو
29
زبيـر: خـرب ولج لساااااانج
- يدفع بـ غضنفر يريدة بس يوخر عن دربة وهذا مثل الجبل بوجهة بكل حيلة لازمة
زُبيــدة: هسه عرفت روحك ليش ما أجيك؟ جان أستحيت غريب محاميني منك
86
- شمر الطابوكة على الحايط وصار يرعد والغريب بس يريد يسكتة صار يصيح وياه
غَضنفر: ماااا غريب إلا الشيطاااان ولك ماااعليك بالحچي
70
- وخر عن غَضنفر يفرك بوجهة حيــل ورجع باوعلة يكلة
زبيـر: روح غَضنفر
- راد يحچي بساع خزرة، هـز راسة ومشى
6
- تقرب وكف گدامي يحچي بهدوء
زبيـر: همه سبب سجن اهلج وحيرتج هاي، ليش تاخذين وتنطين بالحچي وياهم؟
11
زُبيــدة: جنت تگدر تجي تسألني من الأول بهذا الهدوء وتستفسر مني ويمكن اجاوبك، ليش تسويلنّا هوسة ومصيبة واكرهك وتكرهني؟
12
زبيـر: وهسه سألتج بهدوء يلا جاوبيني شيريد منج؟
- نزلت أدية ولزمت الباب اريد افوت وأسدها
زُبيــدة: ما يخصك
37
- طبيت للبيت بعدني ما سديت الباب كاملة صاح علــيَّ يهددني
زبيـر: تحچين لو أگول لـ برهان على طلعات الفجر والتُكي؟
14
زُبيــدة: عندك دليــل؟ لا، ما راح يچذبني ويصدكك خصوصًا انتو مو على أتفاق
57
- رگعت الباب بوجهة وهو صار يقسم ويسفط العشيرة يسبهم واحد واحد .. ما أهتميتلة رجعت للبيت وضحكة هالبيت غايبة ويَّ هوسة الولد وطول أبوية الحلو ، نگعد على الأكل گوة ناكــل حتى لمناگر معن وعادل أشتاقيت وشلون يقشمرون علــيَّ وعلى طبخاتي، وگلبي فرفح على غــازي وكل بالي يمة ويم رجلة هسه شلون صارت؟ خاف ألتهبت ودا توجعة! علاجة ما أخذة ولازم يغيّر ضمادة كل يوم منو بحالة هسه!
20
- مشيت بتعب طبيت للغرفة سحبت البردة وكعدت وراها ضامة روحي من عيون امي والبنات، حضنت رجلية على صدري وبچيت حتى لعصبية خَطاب وصياحة وخوفي منه اشتاقيت .
12
- خالـي يجي من الباب يسأل علينّا ويشوفنّا إذا محتاجين شي ويمشي من ورة عمي كامل وسوالفة الناقصة، عدنان كل يوم يجينّا يشوفنّا إذا محتاجين شي و يـروح .. النسوان كامت ما تجي لأمي ورة هالسالفة عدهم اذا بيت شبلي تعاركوا ويَّ بيت كل العالم تقاطع هالبيت وهذا الصار ويانه! لا بقى شغلها! ولا رجلها! ولا ولدها ..
34
- ثانـي يوم كعدتني ويَّ صلاة الفجر يادوب مكشكش الوكت وگالت
حَفصة: گومي يمة روحـي حوشي الخُضرة وجيبيهن خمو نضل عايشين على العالــم
15
- ما گلت لا، لبست وتلثمت ومشيت للمطبخ أخذت سچينة ومشيت للباب الورة لبيت شلت الصندوك وطلعت للبستان على الخُضرة الليّ جوة شجرة التُكي، كاعدة أجمع بيهن واسويهن باقات باقات وأسفطهن بالصندوگ، فزيت جفلانــة من شخص نزل من التُكية شمر روحها من جذعها للگاع، وكفت على حيلي أيدي على گلبي لو يذبحوني هسه قطرة دم ما يلگون بيه! باوعت بوجهة هـذا غَضنفر نزع الشفقة من راسة مرجع شعرة الورة ورجع لبسها يگلي
غَضنفر: جفلتج؟
82
زُبيــدة: لا وين بس دغدغتني
39
- باوع للصندوك وسأل
غَضنفر: أعاونج وتعذريني
زُبيــدة: وتروح تفتن علــيَّ يم زبيـر وتگلة بت عمك طالعة الفجر وساعدتها
28
- دار وجهة ناحية بيت زبيـر وزفر نفس يستغفر ويحچي بصوت ناصي
غَضنفر: دحجج على ..
- الكلمة الثانية حچاها بصوت خافت حيل ما سمعتها
130
- تجاهلتة وكعدت اكمل الليّ بديتة وهو واكف فوك راسي وگال
غَضنفر: راح يجي أخــوج
7
- هبطني هبطة أقوى من قبل شوية، رفعت راسي اباوعلة گلبي يرجف
زُبيــدة: ياهو؟
غَضنفر: يمكن اسمة شرهان! سمعت زبيـر يخابرة متعاركين وعرفت راح يجي الفجر
93
- شمرت السجينة بنص الصندوگ، شلتة ووكفت على حيلي
زُبيــدة: برهان برهان أسمة، شكرًا الفتا.. ءءءء شكرًا يَالغريب
43
- مشيت بخطوات سريعة اريد ارجع للبيت وأدعي ما يلگفني، هسه اني امي دازتني عليمن خايفة مادري بس گلبي بقى يرجف .. طبيت للمطبخ لگيت امي عاجنة وگاعدة تشنگ، شمرت الخضرة يمها اسألها منو يوديها للسوك؟
حَفصة: عوفيها هسه وروحـي أشجري التنور حتى نخبز
3
- هزيت راسي أي ورجعت ركض اسفط حطب بالتنور بعدني ما شعلتة وطفر برهان من عالباب الصغيرة ملثم! شهگت جفلانة وبقيت متيبسة بمكاني وخـر اللثمة عن وجهة بساع وحجة بصوت ناصي
برهان: لا تخافيـــن هذا انـي
َ
- لأول مرة أحس روحي شايفة كل أهلي
مشيتلة بخطوات سريعة وحضنتة حيل، لمني بين أديه
وباس راسي ساكت ..
143
- وخرت من حظنة الدموع تارسة عيني ويَّ ما أندگت الباب وهمس
برهان: منتظرين أحــد ؟
- هزيت راسي لا! بقى يباوعلي بشك ما متطمن بس هالشي ما منعة يفتح الباب، لزمتة من ذراعة بقوة خايفة لا البالي يصير! رجلية ماتت ما عــاد تشيلني وگلبي صار يرعش ورة ضلوعي من شفت هذيج العيون المليانة شر! وصار الما محسبتلة حساب يصير ..
- يتبــــع ..
