رواية عرين الصياد الفصل الرابع 4 بقلم شذرة العدوان

الفصل 4

ديالا :بعدنه عالدرج وسمعنه العيطه

صرخات تشگ الگلب نصين

الدم حدر برجليني

لا ارادي صرنه نركض اني وليال

تانشوف شكو تلاگينه احنه وابويه الي فات يركض لحجرته ومخطوف لونه

طلعنه لگيت أمي گاعده بالگاع

وتلطم وتصيح راح ابني راح انصگعتي يمعاضد انصگعتي وتملخ بروحها ومخمشه وجهه وطالع دم

وأمل بصفها حاطه ابنها بحضنها وتصيح

ومهره مجلبه بيها وتسد بحلگها

وهاجر حاطه الشال على اثمها ومدنگه تبجي

وجاهد وجوانه يم الدنگه حاضنين بعض يبجون وخايفين

ادحگ هين وهين من شفت المنظر مالهم هيج

هبطت وانهد حيلي رجليه مثل جانو جامدات وذابو گعدت بالگاع تربطت وليال گامت تبجي بدون ما تدري السالفه شنو

واستاذ صائب گاعد يم أمي

و يگللها والله زين هيه بس ضربه خفيفه يا خاله استهدي بالله ولازم اديها وأمي تهز براسها

وتعض بشفتها وتگله هدني الله عليك هدنييييي وتصرخ اوف يمه العمده گلبي من الصبح لاسبني ما مرتاحه يمه شحالك يبعد روحي ودموعها تصب صب وتريد تفلت من استاذ صائب وهوه مجلب بأديها ثنينهن ويعجل عليها ،،

اني ظليت بصدمتي

ودگات گلبي صارت سريعه حت كتوفي ارتخن

اريد احجي ما اگدر بگلبي اگول عماد شبي

وليال تبجي وتفرگ بأديها وتروح وتجي وتسد اثمها بأديها حيل وتصرخ صامت

استاذ صائب دحگ علينه اني وليال من شاف حالتنه منهارين

گال يبنات لا تخافون

كلشي ماكو عماد تصاوب اصابه خفيفه وهسع يجي شبيجن هاي عود انتن الذيبه واللبوه

امل گامت تصرخ وابنها فرفح

استاذ صائب اشر على مهره تفوت أمل جوه ومهره شالتها شيل وفوتتها وگالت لهاجر الحگيني

وطلع ابويه مخنوگ ولون وجهه شحب ملامحه انگلبت بثواني ويحاول يكون قوي گال يالله صائب نمشي

استاذ صائب هد ادين امي وگام

وجان امي تجلب بأبويه تگله اخذني وياك

والله اذا ما اخذتني شوف شسوي

ابويه صفگ بأيديه گال يا مره وين موليه بنص الزلم هسع اجيبلج يا كلشي مابي اذكري الله يا مره

هزت راسها بنفي ولازمه دشداشته وفحطت

تگله لا لا اخذني من اظل هين اموت

استاذ صائب وجهه اصفر ومهدود حيله بغصه گال خن ناخذها ملا ميخالف نفخ ابويه بقهر و ستغفار

گال يالله امشي

فاتت أمي جوه لفت العباة وطلعت و تردد

دخيل الله عليك وليدي دخيل الله ومشو وهيه تنحب وتبجي

اني ظليت گاعده ومصدومه واريد اشيل اديني ما اگدر وليال تبجي وراحت گعدت يم الكرويته ولامه نفسها وجاهد وجوانه اجو يمي حاضنين ضهري ومتغبين ورايه

رجع استاذ صائب بساع گال امج طلعت حافيه ناسيه نفسها اريد شحاطه شي اشرتله بأصبعي على شحاطتها بدون ما احجي صفگ بأيده بأسف وراح اخذها

دحگ عليه گال ديالا اخوج مابي شي تفائلي بالخير

صيري سباعيه وعينج من خواتج روحي يمهن وراح ركض شايل شحاطة امي ،،،،،

ليال: گاعده يم الگرويته ولازمتها احس الدنيا ادور بيه اجت مهره دحگت عليها ريگي يطگ من گد الغصه گلتلها شكو مهره امانه احجي

عضت شفتها وادحگ فوگ ودموعها تجري

مهره : والله ما اعرف شنو الي صار

ديالا:ليش تگولين ما اعرف واني شفتج واگفه ويا استاذ صائب ويحجيلج من گتلها هيج قلصت عيونها

ادحگ عليه بهدوء

مهره:اي صحيح گالي اخوانج متكاونين ويه جماعه وعماد تصاوب اصابه خفيفه برجله ونقلو يخيطونه

عاد اجينه تنبلغ ابويه يلحگهم ما ندري انجان امي معاضد ورانه جت من يم الخيول وسمعتنه وگامت تصيح وطلعت امل هم ولا خلو صائب يكمل السالفه

گامن يصيحن،،،

ديالا :دنگت راسي وعيوني غوشن مجاي اصدگ ملامح استاذ صائب تحجي غير الي گاله گلبي ما مطمأن حطيت ايدي على گلبي واتخيل منظر امي وادعي بداخلي ربي لا تصگعنه

مهره فرگت گصتها وجان تگول

بس صائب گال ضربه خفيفه شاخطته شخط وصائب مستحيل يجذب عليه بللت شفايفها گالت

يالله گومن جوه تغدن و الجهال كتلهم الجوع

واخذت جاهد وجوانه وراحت تغديهم

من مهره گالت هيج حسيتها مثلي ما مطمنه وما مصدگه بس تحاول تكون قويه

رحت يم ليال الي تبجي بعبره وتناشغ حضنتها گتلها مزال استاذ صائب گال زين يعني زين

گوه تطلع مني السالفه ياريت اني مثل ليال ابجي وارتاح

ليال: كلشي صار بلحظه

يعني ماكو دقائق صعدنه فوگ تانشوف شكو

حدرنه لگينه امي تصيح

شبساع الخبر الي يغث ينتشر

گلبي نار على عماد

هوه الوحيد من اخواني مهتم بينه

اول مره نسمع هيج خبر يغث وما نعرف شنسوي حطيت راسي على جتف ديالا وابجي وادعي بهمس يربي تحفظ العمده يارب،،،،،

ديالا:سمعنه صياح امل وفتنه جوه

لگيناهه تشيل بروحها وتلطخ

حت هاجر وياهه تصيح

نعبالي سمعت خبر اندحگ على اثمها شون راح تگول عماد مات

گلبي راد يطلع من صدري وليال مجلبه برداني وتصيح حت جتفي طلع

طلعت مهره مفرفحه لابسه ازار الصلاة جانت تصلي وتدعي وعيونها دم گالت لأمل شبييييج

امل گالت ليش ما اخذوني وياهم لييييش مو مرته اني وتبجي بحرگه دموعها تطافر من عيونها

ديالا:عاطت بينه مهره بصوت مسموع كاااافي

موتن الرجال وسويتن فاتحة خبلتني خبلتني

اسكت هاي تبجي هاييي

تره هوه هم اخويه واعزه اكثر منجن شبيجن تفائلن بالخير لا تفاولن عالزلمه روحن صلن وادعن

گنالجن ضربه خفيفه برجله كافي بعد

الي اسمعها تصيح لا تلوم الا روحها

بعدين انتي وين موليه بنص الزلم

هيه امي وگوه اخذها ابويه

وقابل عماد راح يكيف من يشوفج بالمستشفى بنص الزلم وتناشغين وملفعج يسحل وراج متر

كافي ابنج نحمس حمس فرفح الولد فكري بي وانوب يرضع ع صدرج شيصير بحاله

ديالا:أمل ثنت بالگاع وگامت تبجي وحطت اديها على صدرها وتبجي بحرگه وتگول شجاي تحجين مهره افهمينييي عماد هوه ابني وروحي وحياتي اوف ربي لا تعثرني بي من عمري على عمره

ليال:بس شفت منظر أمل هيج معد اتحمل حضنتها وگمت ابجي واجت مهره حضنتنه ثنينه وگالت ما تصدگن بيه من اگول عماد زين

وهسع ما تحسون بيهم الا جفتو علينه يدورون غده

تفائلو بالخير تجدو گامت وجان تگول

يالله يالله كافي بواجي انجان كل ما واحد من الولد تكاون ونضرب نگعد نلطم ما فلحنه عجل

يالله كل وحده بيجن تلزملها شغله هسع وادم تجينه يجوز يجون يتغدون ويظلون عالعشه كلشي توقعن

صدت على هاجر گالتلها امشي عجني وكثريله خمره

وصدت علينه اني وليال گالت وانتن امشن

عزلن الديوان اريدها تبرج

وانتي امل كافي عاد راح احطج واكتلج امشي سكتي ابنج ونومي واطلعي عاونينه بشغله

وصفگت بأديها بحركة كلمن على شغله وحس نفس ما اريد بعد وجرت امل گومتها ودفعتها جوه

كلام مهره مثل مي بارد اثلج گلوبنه

الكل سكت وصار ينفذ الأوامر أمل گامت لحجرتها اني جريت ليال واخذتها غسلت وجهه وهاجر راحت تعجن

رحنه عالمطبخ شربنه مي وگلت يالله ليال تنعزل الديوان

وهسع يجي العمده كلشي مابي

شنو قابل اول مره يتصاوب تذكرين من ضربته الحديده وشگت رجله

تراهو خيطو وطاب كلشي مابي

ليال: مشيت دموعي وهزيت راسي بــ اي

ديالا: طلعنه بالطرمه وتلاگينه ويه اهل استاذ صائب اجو امه شكحه والست رافده وكريمه سلمنه عليهم وست رافده حضنتنه وطبطب علينه

وكريمه حضنت ليال وگامن يبجن

ست رافده گالت ها يبنات شسالفه بدون بجي كلشي ماكو ان شاء الله سلامات

وسألتنه ما سمعتو شي

ديالا:لا والله ست ما سمعنه

جاوبت ست رافده برداً وسلاماً ان شاء الله

وجان تبوس ليال گالتلها ام دميعه شگد باجيه عيونج مورمات ودم سوده عليه هالعيون الحلوه يبجون

ديالا: احجي بصوت تعبان ست تفضلو جوه ومشينه وياهم تنفوت وليال وكريمه يمشون حاضنات بعض

فاتت الست رافده قبلهم گالت بسم الله الهي يفرج الهم ويبعد الغم

وشكحه ولا سألتنه شي وملتهيه تنزع حذاها وتحطه بصفحه عبالك احد يبوگه

اجت مهره تلگتها هلا خاله حياج الله

شكحه گالت لمهره ها يمه منين جتكم هالصگعه

مهره: خاله العالم تسلم وتسأل

شكحه: اي يمه عماد بسلامته ليش يسوي طلايب

مهره: خاله فوتي جوه تغدي توني صبيت

ديالا: مهره بس تريد تسد حلگ شكحه

شكحه:متغدين يمه متغدين عجل امج وينها

مهره:امي راحت خالي جاي من السفر عجل ما تدرين

شكحه صفگت على ايدها الا والله صحيح عجل اني بنت الهود محد گالي

ديالا: رغم گلبي النار حصرتني الضحكه كتمتها وعضيت شفتي اليهود صار اسمهم الهود

مهره:خاله بربج هاذ وكته الحجي هسع تفوتين تگعدين لو نگعد بالباب

شكحه:اي يمه امشي مهيره نفوت انتظر امج سوينه جاي والله ما لحگنه نشرب الجايات يمه صائب خبصنه گال الحگوني على بيت الملا گلت ما اجي بدون غده تغدينه وجينه

رافده:يمه كل عقلج هاي عود الطريق كله نوصي بيج

شكحه: شبيج رفيده فوتي فوتي اووف يمه مهره جينه مشي رجليه تكسرو صائب بسلامته اخذ السياره

ديالا:شكحه جرت مهره ورافده من اديهن وفاتت تحجي وهنه مصدومات بيها شنهي من بشر عبالك جايه مسيره لو معزومه ما عليها عتب اخت صبره

استخطيت ست رافده شگد تفشلت

ديالا: ظلينه واگفين بالطرمه اني وليال صادين عالبيت

ومجتفين ادينه والحزن مخيم على ملامحنه

ليال:امشي نگعد وياهم هسع يگولون ما گعدن يمنه

ديالا: عوجت اثمي شنهي تخبلت شراح تحجي جابها الذهب وداها النضد وتحجي عن بطولاتها الي كلها جذب وحت صدام حسين خطبها ورفضته شجذابه

ليال: واخر شي تختمها لحالجن تدرسن اكرها

ديالا:وكل سالفه تشفط استكان جاي وتگول بارد أحمو

ليال:الله يكون بعونج مهره اليوم

ديالا: انتي شفتيها شون تحجي ردت افحط من گالت الهود

ليال:الي يشوفها ما يصدگ هاي ام استاذ صائب وست رافده بس يصدگ اذا گناله هاي اخت صبره

ليال:اي والله مدري عش اجت ولا سألتنه على عماد

ولا واستنه

ديالا:جت تلگط علوم

ليال:اليوم نسوي جاي بالكتلي

ديالا:مستمرين اني وليال نگص بشكحه اجانه صوت من ورانه

احم احممم فزينه ثنينه

ديالا: التفتت طلع رجال شكبره وشطوله

و شواربه تخوف انصدمنه

مد ايده وگال السلام عليي

ديالا: بعده ما كمل سلام عليكم وانطگها بركضه جوه وحده تدفع بوحده وسدينه باب الصاله وقفلنا بالسرگي

ليال: هبطت ما ظل بيه قطرة دم وجهي صار نار يربي هاذ منو

ديالا: ما عرفته اول مره اشوفه

ليال: هاذ مو من منطقتنه

ديالا:گلبي يدگ سريع وريگي نشف گتلها اي مبين

لابس دشداشه سوده وشكله مرعب

ديالا: خاف من اصدقاء العمده اجه يسأل

ليال: شيجيبهم علينه اصدقاء عماد حدهم باب السياج وعماد ما يصادق بس الدراويش

ديالا:وشمدريج هاذ مو درويش

ليال:ما شفتي شعره خفيف

ديالا:تعاي اندحگ من شباك الصاله نشوفه راح

ليال:مشينه كفينه البرده ونشوفه بعده واگف وعلامات الغضب تارسه وجهه وشاد على شفايفه ويعصر بالسبحه

ديالا:ظل واگف بالطرمه وطلع جگاره ورثها وگام يفتر اجه مقايبل الشباك شافنه اندحگ وجان نسد البرده حطيت ايدي على اثمي وارجف يمه هاذ بعده وانوب شافنه

ليال: نحجي بهمس خاف هاذ الي تكاون ويا عماد امشي انادي مهره

ديالا اسكتي اذا طلعت مهره راح تگاضب هيه ويا

ليال:عجل شنسوي هسع

ديالا:والله مدري يمكن هاذ بس شجابه علينه شيريد

ليال:يجوز اجه يعتذر

ديالا:بعدنه نسولف اني وليال وجان يگول بصوت عالي

اهل البييييت ويدگ الباب قوي بعصبيه راد يكسره

ليال:يمه هاذ شبي رحنه ركض انادي مهره

طلعت مهره گالت شكو منو عالباب

ديالا: ما ادري رجال بگد الحولي جفت عالبيت

مهره فتحت عيونها وراحت تشوف منو

نادت منو عالباب

ردلها بصوت ونبرة زعل وغضب اني ماااجد يمعودين شسالفه صدگ جذب

مهره فتحت الباب وجان تگول هلااااا

ديالا:اني وليال بصف الباب ظلينه وحده ادحگ على وحده منو ماجد ؟؟

ومهره تگله هلا والله هلا عاش من شافك وين هالغيبه تفضل تفضل

گاللها هلا بيج لا ما اگعد جيت اسلم واشوف شكو

وخوش استقبلوني بناتكم استقبال

ديالا:رجعنه اندحگ من الشباك نشوف بس جنب من عنده

ليال: يهالعثره هاذ مهره تعرفه بس لا من الفلاحين

ديالا:بس هاذ شكله مو فلاح متشوفينه يبرج

خاف تاجر

شگد عيب واحنه سدينه الباب بوجهه وجاي يشكي المهره علينه اليوم تسحلنه

مهره:ديالااا ليال تعالن

ديالا: بس سمعت اسمي ركض انهزمت هاي مهره نادتنه تا ترزلنه گدام الزلمه وتجر اذني صعدت عالسطح وگلبي يطرد طرد

ليال: ديالا عافتني ونهزمت واني ظليت جامده بمكاني واعصر بيدي شگد فشله راح ترزلنه شون يربي هم انهزم

مهره مستمره تسأل شونك شون صحتك.وعليك الله فوت اگعد وهاذ يگللها لا والله مگدر رايح بعدين امركم وان شاء الله ماكو شي ،،،

ليال: شفتها فرصه وانهزم لحگت ديالا عالسطح

لگيتها يم الستاره ادحگ تا تشوفه من يطلع

رحت يمها

گلت ها وجان تفز گالت يمااا وحطت ايدها على گلبها

ديالا:اسليمه اطمج جفلتيني

ليال:ليش عفتيني ونهزمتي

ديالا: لازم ترزلتي

ليال: لا نهزمت وهاذ راح يروح

ديالا: ما عرفتي منو

ليال: لا والله بس خلي يولي شبعنه هبطات

ديالا:گلبي يطرد اليوم الهبطات مراگع راح نشيب من وكت

ليال: مديت راسي ادحگ وياهه وشفنا راح يمشي بگد الحولي وگف وجان يلتفت بساع ويشوفنه اندحگ

ديالا:بساع نزلنه راسنه يبو هاذ شافنه هسع شيگول راح يشهرنه بالعرب

ليال: خلي يولي بس انگلع امشي نحدر نعزل الديوان

حدرنه لگينه ست رافده وكريمه ومهره واگفات بالصاله

من شافنه ست رافده ضحكت گالت هاا يولن شمسويات بماجد

ديالا:ست هوه شجايبه عالباب ما ظل برا وناده احد يطلعله

مهره: خبال الي يخبلجن انتن شون تسدن الباب بوجه ماجد لا وبعد تسمنه الحولي

ست رافده گالت شبيجن بنات هاذ اخويه ماجد ما عرفتنه

ديالا:فتحت عيوني مصدومه وليال مثلي اجت شكحه

گالت يعرفنه بس تعمدن ما عدهن اصول العرب تربية معاضد

مهره: شبيج خاله لا نبلش عليج الله مو وكته

وبعدين وين يعرفنه

بحياتهن ما شافنه ولا شافن بركات

هوه اني بنت خالته وهاي ثالث نوبه اشوفه واني هم راح عن بالي ما يعرفنه حقهن عجل من سدن الباب بوجهه

شكحه:هاي انتي تگولين مهره

مهره:اي خاله اني هوه بالنسبه الهن رجال غريب اول مره يشوفنه لا تسوينها قصة

رافده: يالله عاد غيرو الموضوع مصار شي

ديالا: او هاذ ماجد

الي خبصتنه بي كريمه اخويه ضابط

اخويه بطل اخويه يحبه صدام حسين

اخويه هيج وهيج وحرر العراق وراح يفتح القدس واحنه مصدگات

واخيراً شفنه ماجد البطل المقدام ،

ليال: ما جنت بحياتي اتمنى اشوف شخص بگد ما تمنيت اشوف ماجد الي ردت ارسب من ورا هلگد ما تحجي بي كريمه من الصف الأول لحد ما وصلنه السادس تهذي بماجد البطل

بحياتنا ما شفنا

حت من نطلب صوره تنشوفه تگول ما عندي ولا بحياته اجه علينه هاذ واحد من احلامي تحقق

الحمد لله اني جنت اتخيله غير شكل من گد وصف كريمه الخرافي لهسبب ما عرفته

ديالا: اسفه والله ما عرفنا

-- ست رافده ابستمت گالت ميخالف هسع شفتنه احفظن شكله

ديالا:ان شاء الله ست

وجان نسمع صوته رجع ينادي كريمه كريييمه

ليال:بس سمعت صوته خفت وجلبت بردن ديالا

طلعت كريمه تشوفه رجعت گالت يمه ماجد يريد مفاتيح البيت يريد يرجع ينام

ديالا: مهره گالت امشن مزاله رجع سلمن علي وعتذرن منه

ليال:تجمدت بمكاني ما اريد اروح

ديالا:يربي الفشله شكبرها منا سمعنه من نگص بأمه ومنا سدينه الباب بوجهه وتفشل

هيه الگاع ليش ما تنشگ وتبلعنه

-- عاطت بينه مهره امشن

مهره:خاله راح اودي البنات يسلمن شعلتلج الصوبه بالهول

شكحه:اي وديهن مجهله وحدتهن بيها ثنين مثل كريمه

امشي رافده نگعد بالهول

مهره:خاله شبيج لا تشوفين جسمهن تره جهال كفيلج الله ليال مرات تگعد باليل تبجي الا انام يمها البنيه مو بجسمها بعقلها امشن بنات

ديالا:شكحه مثل اختها صبره نسخه ما تفوت فرصه اذا ما تغثنه

امشي خطوات خفيفه وره مهره واسحل بليال سحل الي تجر بارداني خلته شطوله نشف ريگي عبالك ماخذيني اعدام

ليال:طلعنه ماجد بالطرمه يدخن بعصبيه وصاد بصفحه

مهره:ماجد البنات اجو يسلمون عليك ويعتذرون منك

ديالا: صد عليها ويدحگ علينه بطرف عينه ونفخ دخان گال ما يحتاج

مهره:اعذرهن بحياتهن ما شافن رجال غير المعلمين والعمال وما يعرف يسولفن ويتصرفن عقول جهل اعذرهن

ديالا: بگلبي اگول خلفله عليج مهره وهوه عاگد الحواجب گاللها واضح

مهره:يالله سلمن

ديالا:تشجعت لخاطر ليال راح يگف گلبها

گتله السلام عليكم صافحته ضاعت ايدي بنص ايده الي عبالك كرك ومركز بعيوني ولا يرمش سحبت ايدي ودنگت گتله اسفه ما عرفتك اول مره اشوفك

گال ولا يهمج

ليال:ايدي نشفانه من الدم ترجف مديتها بساع صافحته شونك سيدي جلب بايدي

ابتسم بتعجب وگال سيدي ؟!

ليال:جريت ايدي منه قوي وجلبت بديالا ومدنگه

گال احم مصار شي اني هم صوجي جفلتجن وانتن جنتن تحجن بموضوع ومركزات وبتسم بخبث

ديالا:صخنت يعني سمع حجينه من انكص بأمه ادحگله نضرات خطف وارجع ادنگ اشوفه مركز بينه ردت اگع من طولي من التوتر انقذتنه مهره من گالت يالله على شغلجن

جريت ليال من ايدها ورحنه عالديوان ومن وصلنه ونگعد نتنفس واتحسس وجهي من الحراره صخنت

ليال:هاذ سمعنه راح يحجي لهله مو

ديالا: افرگ بگصتي گتلها ما ادري ما ادريي

ليال: اوف توبه بعد احجي على احد امشي نطلع نشوفه بلكت راح

ديالا:دحگت عليها شفتها تبجي اخذت نفس گتلها گومي

رجعنه عالطرمه مال الصاله تنشوفه راح ما لگينه احد اجت كريمه گالت وينجن ادورلجن

ليال: رحنه تاننفض فراش الديوان

كريمه: گالت اساعدجن

ديالا:هزيت راسي بـ اي وادحگ هين وهناك تشوفه

ليال: جريت كريمه من ايدها بالله هاذ اخوج الي خبصتينه بي

كريمه: هدي ايدي يولي شبي ماجد

ديالا: ذبحني التوتر سألت كريمه اگلج اخوج خوما يسوي علوم

كريمه:طگتها ضحكه گالت لااا قابل هوه جوانه اصلا ماجد مثله ماكو وقليل يحجي وما يگعد ويانه بس وكت الوجبه ولا يشارك بحديث يختلف عن صائب بجثير ليش تسألين

ديالا: لا هيج عبن افكر بعماد معرف نفسي شحجي

ــ اف تطمنت شوي بلكت الله ما يحجي

ليال:اگلج كروم اني جنت اتخيله يشبه دون فليب بس طلع يخرع

استاذ صائب احلى منه ظل بركات هسع يطلع جنه صبره

كريمه:بزعل گالت بركات حلو يشبه صائب

و ماجد احلى من دون فليب

على اقل عيونه خضر وحقيقي

تره البنات الي بمنطقتنه يكيفن من يشوفنه

يگولن حلو يخبل و يدزله هدايه ورسائل غراميه

ليال:هالشي جديد عليه اول مره اسمع رسائل غراميه

سألتها شنو غراميه وليش يدزله رسائل شيكتبن بيها ما عرفتي صار عندي فضول اعرف ،،

كريمه:لا يولي شون اقرا الرسائل مالته يتخبل

واني هم ما اعرف غراميه شنو بس اسمعه من يحجي بالتلفون يگول دزتلي رسائل غراميه ،،،

ليال: اييي لو اني الا اقراها وارضي فضولي

كريمه: يمه غير يتخبل ما يسمح احد يمد ايده على غراضه ولا جنطته هوه يحضرها بنفسه حت امي ما يسمحلها ،،

ليال:خاف امج تبوگ من عنده وشافها

كريمه: هيو تأدبي امي مو بواگه

بس هوه يگول شغلاتي الخاصه لحد يمد ايده عليهن ،

ليال: ظليت افكر بنفسي شنو يعني رسائل غراميه وبيها اشياء خاصه صديت على ديالا سألتها

انتي تعرفين شنو رسائل غراميه واشياء خاصه ،،

ديالا: حبيت اصير الجبيره الي افتهم براسهن وگلت اي اعرف

وذني كيفن وگفن گدامي كل وحده لزمت ايد وگالن اي احجيلنه

ديالا:حجيت بثقه وتفيك گلت ميصير تعرفن بعدجن صف سادس من توصلن للثالث مثلي راح تعرفن

ضاجن وگالن لو تصبح الدنيا واحنه بالثالث مثلج

ليال:اگلج كروم هوه مو استاذ صائب اكبر واحد بأخوانج

كريمه:اي

ليال:عجل شو هاذ بگد الحولي حيل جبير بي اربع اوادم

كريمه:ليش تغلطين ليال احترمي محد غيرج حولي اني وياج مو نفس العمر وانتي اطول مني وسمينه

ليال: الله يعثرج اني منيلي سمينه هاي عبنج معصعصه تشوفين العالم سمينه

ديالا: يالله كافيييي تحجن امشن

كريمه: اني ما احجي وخلي ليال تسكت

ليال:اذا گلتي عني سمينه انوب اسحلج والله

كريمه:كلها تگول عنج سمينه مو بس اني هسع اني وديالا مو نبين اضعف منج

ليال:يولي والله هاذ البلوز ثخين دحگي بطني وجان ارفع البلوز اشوفهن بطني هاا وين السمن مو بطني برفع بطنج

كريمه:موو بطنج السمينه

ديالا:يمعودااات كافي

كريمه:شنسوي هسع

ديالا: نطلع فراش الديوان انفضه ونمسح الديوان ومن تنشف نرجع نفرشها

كريمه: عجل ما فارشينها قبل

ديالا:امبلا مفروشه

بس محد يگعد بيها بس الدراويش من يجون عالذكر بيوم الأثنين وبيوم الخميس من يطلعون من التكيه يمرون ويه ابويه محد يجي علينه غيرهم وانتو نوبات تجون تعللون نگعدكم بالهول ،،

كريمه:وليش ما تگعدونه بالديوان من نجيكم ؟

ليال:هوه انتو خمس نفرات تجون خوما نگعدكم بالديوان طولها 12 متر الا نتصل عالأرضي تانسمع بعض ،،

ديالا: كافي تحجن ليال روحي جيبي الحصيره تانبسطها وانفض الفرش عليها

ليال: رحت بدلت البلوز ثخين وحياكه مطلعني سمينه لبست قميص حرير لون ماروني حت لو يكتلني البرد ما انزعه تاميگلولي سمينه جبت الحصيره فرشتها بصف السياج بالشمس وطلعنه قسم من الفرش

ديالا:جبت عصا تا انفض الفرش بيها وكريمه وليال ينگلن

لزمت العصا وگمت انفض اجاني صوت

الله يساعدج

ديالا:فزيت هاذ الحولي اليوم ناوي يموتني

بلعت ريگي وگوه اتوازن گتله شكراً شو ما رحت

عگد حواجبه گال ليش ترديني اروح

ديالا: لا لا بس عبالي رحت

حگ راسه وگال ضايج وجنت نايم واريد اتمشا اشوف بيتكم والمكان

ديالا:ها

ماجد:اني اول مره اجيكم

وما اندل البيوت هين كلها نفس الشي لوما امشي وره اهنه ولا اندلكم

بس بيتكم يختلف شهل خارطه

اول مره اشوف بيت بي اربع بيبان خارجيه

مليوص لوص

بس مساحته الخارجيه مرتبه

ديالا: هوه يحجي ويتفحص المكان بعيونه واني حنجرتي اطگ گتله اي

ماجد:عدكم شي اساعدكم

ديالا:لا

ماجد:عجل اروح اگعد هناك

ديالا:اوف يربي جانت عايزه

راح گعد عالكرويته گبالي

صح بعيد بس گبالي فيت

رجعت انفض بتوتر

عبن سمعنه نحجي على امه كرهته بداخلي وهوه كلشي ممسوي

اجه سعد سلم

بدون ما ادحگله گتله هلا

سعد: شبيج

ديالا: مابيه شي

گال انطيني العصا انفض عنج جنت يم بيت خالي اقرا ويا حسام وما دريت الا توني وجيت

گتله بعصبيه سعد فارجني

زعل وراح جوه شويه وطلع يم ماجد

اخذ مفاتيح بيتهم

تندمت حاجيته بزعل خطيه سعد شگد فقير

لزمت الفرش دگ ضرب انفض بيهن اطلع كل طاقتي والعبره الي بيه گلبي عباره عن نغزات مجاي افتهم حالتي شبيه

انفض بالمخاد اضرب بكل قوتي گمت گوه اتنفس

اجه ماجد يتمشه بتجاهي وجاتف ادينه وره

ذبيت العصا گمت اسفط بالمخاد وگلبي يطرد اكيد رجع راح يگلي ليش تگصن بأمي بس اذا سأل راح انكر

گال انتي ديالا مو ؟

ديالا: صار ساعه نحجي وما يعرف اني منو الحمد لله يربي

دنگت اي سيدي اني

ماجد :ضحك شنو سيدي

ديالا:مو انته ضابط

ورث جگاره ومغمض تك عين گال اي

ديالا: عجل لازم اناديك سيدي لو استاذ

گال لا هاي ولا هاي ناديني ماجددد

ديالا: ما يصير انته اكبر مني شون اناديك بأسمك

ماجد:اني ما احب الرسميات

ديالا: مو رسميات بس من باب الأحترام ابويه يگول

ابتسم ونفخ دخان وگال ناديني ماجد غير هيج ماريد

ديالا:ما جاوبته وشلت العصا كمت انفض بالفرش

گام يگح يمعوده شبيج على كيفج التراب عماني جنج تگليلي امشي منا وگام ينفض بدشادشته گال خلفله عليج هاي عود اول لبستها

ديالا:عضيت شفتي اسفه والله مو قصدي مجاي اركز

يفرك بعيونه ويدحگ عليه گال من باب الأحترام ما يصير تنفضين تراب واحد يمج

ديالا:اسفه احنه اول مره نشتغل

گال واضح تلوصين بالمخاد تلوص تحطيهن بالتراب ينترسن وراهه تنفضيهم وتحطين عالحصيره

و شعرج صار كله تراب هيه غير المعدله تلم شعرها

ديالا:نفضت شعري گتله هوه بس شعري حتى ملابسي شسوي

گال حطي الفرش كلهن عالحصيره ونفضيهن وخليهن يتشمسن مو تمرغليهن بالتراب وراهه تنفضين

ديالا:گمت اشيل بالمخاد وحط عالحصيره

ليال:طلعنه اني وكريمه شايلين مخاد اني شايله اربعه وما اشوف بس من جنب واحد وصلت نص الطريق ادحگ ديالا تأشرلي بحواجبها

فتريت واشوف ماجد يم ديالا وارجع ركض و كريمه تنادي عليه شبيج تعاي ماراح ياكلج

ليال:عيب خاف اجفص انوب و اني گوه احجي ويه استاذ صائب الي صارلي سنين اعرفه مو هاذ الي اول مره اشوفه

ليال:شايله المخاد وامشي بساع وجان يگلي هييي تعاي

ليال:يمه هاذ شيريد وگعن المخاد مني

رجعت المهن اليوم مهره تسحلني

گال عوفيهن وتعايي

بلعت ريگي وادحگ على ديالا هزتلي راسها بمعنى تعاي شلت المخاد ورحت ذبيتهن

و مجلبه برداني وگفت گدامه

گال بصوت هادئ و انتي الي مورمه عيونج من البجي ليال مو ؟

ليال: لازمه ارداني واتمنى اختفي گتله نعم استاذ

ضحك وجان يدحگ على ديالا وعليه گال انتن شنو سالفتجن وحده سيدي وحده استاذ اني مو صائب تره مو معلم حسستوني اني شايب

ليال:حترت شنو اگله اذا مو سيدي واستاذ

مقلص عيونه هز راسه بدون ما يحجي ينتظر مني اجاوبه ويرفع بحواجبه

واني اشد على شفايفي معرف شحجي ويا

گال شبيج انبلع السانج

ليال: گتله المقاتل البطل

رفع حواجبه متعجب گال شنو شنو؟؟

ليال:بلعت ريگي گتله المقاتل البطل وادحگ على كريمه وديالا انتظر وحده تأيدني

وجان يطگها بضحكه الا فززنه وفرگ عينه

مثل استاذ صائب من يضحك

واني مدنگه

گال ناديني ماجد لا سيدي ولا استاذ ولا مقاتل البطل

ليال:گمت ارجف من التوتر والفشله مجنت اتوقع شخص يوترني اكثر من استاذ صائب وحميد

ماجد:اي ليال وين واصله بالدراسه

ليال: اي سؤال بخصوص الدراسة احبه

جاوبت ببتسامه سادس

سحب دخان الجگاره ونفخها

الدخان ترس وجهه

گال خوش خوش اخر سنه اطبين جامعة

ليال: لا سيدي اني سادس ابتدائي

گال شنو شنو وفتح عيونه بتعجب

ويدحگ عليه من فوگ لجوه مركز بيه

حگ گصته وأشر عليه وبيده الجگاره

ايده وصلت يم خشمي گال تشاقين مو

ليال: تعجبت ادحگ على ديالا وكريمه ومو فاهمه شي

وهنه مثلي متعجبات گتله لا والله ليش اشاقي

عگد حواجبه وگال شگد عمرج

ديالا: شفته التها يحجي ويا ليال اخذت البسط اشرهم عالحبل وانفض ومنا اخلص منه

ليال: عمري 12 سنه مثل كريمه

فتح عيونه متعجب بشكل واضح وگال لا لا مستحيل

ليال:شنو

صفن يدحگ عليه وهز راسه گال احم

لا هيج روحن روحن

ليال:همزين فرجت ما صدگت گال روحن وركض اني وكريمه عالديوان

ديالا:جاي انفض بالبسط وجان يناديني گال تعاي

اوف مو زعم ما يحب السوالف

رجعت وجان يگول

وانتي اي صف

ديالا:ثالث متوسط

ماجد:شنو السالفه شتاكلون انتو

ديالا:تعجبت شنو ناكل يعني ؟

كمل كلامه واشر بأيده ورا گال ذيج اختج شاهد الله عبالي عمرها 19 طلعت 12

ديالا:قوست اثمي ليش شبيها اجت ليال جابت مخاد انوب ذبتهم ورجعت وهوه يدحگ عليها لحد ما طبت الديوان

حگ گصته وگال احم اه يعني ما شاء الله

طويله شوي وملامحها الأنثويه بارزه

مستحيل احد يگدر يحزر عمرها

منحوته نحت جنها لوحه فنيه

ديالا:قلصت عيوني هاذ شيحجي شنو ملامح بارزه وانثويه ومنحوته حرام اذا فتهمت

تجاهلته ورجعت ارتب بالفرش

كمل وگال وانتي صح انحف منها بس هم طويله وملامح وجهج مرسومه رسم صلاوات وبشره حنطيه وعيون الريم هم ما حزرت عمرج والله ما يلام الملا درويش من اخذ على خالتي وخلف هيج خلفه

ديالا:هاذ اليوم يظل مگابلني ويحجي بالملامح واني كلشي مجاي افتهم وحرت شرد عليه

گتله بعفويه شكراً سيدي انته هم ملامحك انثويه بارزه

وشلت الفرشه ورحت انشرها

يتبع……