رواية كف الطاغية الفصل الثالث 3 بقلم سارة الحسن
- كلشي صار بثواني وبلمح البصر !
لزمت گلبي البقى يرجف مرعوبة وخايفة حيـــل،
بعدني هسه اريد أعيط وألم العالم تخلصة مِـنْ
بين أدين هالوحش بـس مِـنْ سمعت صوتة وعرفت
هالوحش أخوية زاد الخوف بگلبي أكثر وأكثر
برهان: هـذا گبرك وأنحفر، اذا سمعت بيك بعد متعارك ويَّ أبو بگرة أطمك بي وحگ السواك
301
- هذاك روحة رادت تطلع لزم أيد برهان اللازم بيها تفاحة آدم بس يريد يدفعة وبرهان ما عافة إلا مِـنْ حَس روحة راح تطلع، وخـر عنه وزبير وكع بالگاع مختنگ گوة يجر النفس ويضرب على صدرة بقبضة أيدة حيــل روحة فرفحت .. فزيت مِـنْ برهان دفر بطل مي جان ؏ طارف الگبر وشمرة يم زبيــر ينتر بي
برهان: تسمم
156
- تمدد زبيـر على ظهرة مغمض عيونة وما تقرب لبطل المي لما أرتاح وبرهان واكف فوك راسة ، وكف على حيلة طولة وضخامتة بطول وضخامة برهان وأبتسم عينة بعين أخوية
زبيـر: ضيم اللّٰــه أراويه ، ولا أنتَ ولا الخلفك ولا اليطلع وراك يوكف بوجهي ، مو يگولون أبعد عن الشر وغنيلة؟ اني بنص الشر واغنيلة وأهز جتف عليه هم
189
برهان: وشراح تستفاد؟ وأنتَ اول واحد حاقد علــيَّ وما رايد رجعتي؟
115
زبيـر: ولا ميت عليك هم بس أغيضهم بيك
116
- تقرب عليه برهان ساحب لثمتة عن حلگة ورفع أيدة اليمنى طبطب مرتين على خد زبير مادري شنو حچة وياه خلاه يرفس .. مشى عنه مبتسم ناحية بيتنّا عرفتة راح يفوت لأهلي وراح يكعدهم وراح يفگدوني ويعرفوني هنا وتتصخم عيشتي .. بقيت اكل بشفتي يارب كون ما يعرفون .
مشى زبيـر ورة برهان شايط وميت قهر ويگلة
زبيـر: ما تحچي ليش گتلتة لعد؟ ما تحچي؟؟؟ لو جباااان؟؟؟
116
- ويَّ ما زبير كمل حچايتة زلگت رجلي عن الغصن من التوتر والخوف وصار صوت بالشجرة رفع عينة بساع وصارت بعيني! عگد حاجبة مستغرب واني نزلت دمعتي مِـنْ الهبطة اليوم انذبح ما بيها مجال ، درت عيني على برهان ما منتبه ووكف يم الباب يريد يفتحها، رجعت اباوع لـ زبيـر عيوني تتوسلة مِـنْ صعوبة الموقف العايشتة .. دنگ مغمض عيونة لثواني وشفايفة تتحرك ادري بيه هسه دا يسبني اني وعشيرتي .. الموقف كله صار بثواني تحبس الأنفاس ، رد فتح عينه وصاح على برهان يگلة
زبيـر: خوش دام ماتريد تحچي لا تحچي، بـس إذا فتت بيتكم راح أروح لبيت شبلي وأكللهم برهان كسر خشمكم ورجع
148
- أندار عليه برهان يضحك بنفاذ صبر
برهان: تچفى شري زبيـر وولي منا يلا
23
زبيـر: أسويها وحگ غلات الغطاه التراب أسويها إذا عتبت رجلك عتبة هالباب
66
- ميل راسة برهان عاگد حاجبة بصدمة ومشى متقرب منه
برهان: ولك زبيــر!!!
40
زبيـر: هالمرة أنتَ تچفى شري وولي منا
- بقى برهان مصدوم بـ زبيـر!! رفع حواجبة أثنينهن مِـنْ أستوعب كلامة وهز راسة خوش اكثر مِـنْ مرة ما تدري هالحركة مشى بيها الأمور لو دا يتوعدلة؟! دار وجهة برهان وغير دربة ما فات للبيت ومن كثر ما ضاج واشتعل نار احس حرورتة تحرك الحشيش اليدوسة ، شويَّ وأختفى مادري بي وين راح بس المهم راح .
46
- زبيـر بقى واكف بمكانة لما أمن برهان راح ودار راسة ناحية الشجرة بساع عيونه يطافر منها الشر رجعت لورة ضامة روحـي ، حسيت خطواتة دا تقترب مني يمشي سريع وبعصبية لمن صار جوة الشجرة عدل .. حضنت الغصن كل قوتي وغمضت عيوني اريد اختفي يارب كون اختفي يارب كون هذا حلم يارب كون يتخربط زبير بس المهم اخلص بس صوتة إجاني يرعد مِـنْ جوة يحچي بصوت ناصي بس بحرگان دم
زبيـر: بنت الخاااايسين انعل شيب عشيرتج شجاااابج هناااا؟؟؟ لج أنتِ ما توبين؟ ما تخافين؟ ما تهابين بشر؟؟؟ أنزلــي أنزززلـــــي القردة أنزليييي
284
- عفت الغصن ودنگت اباوعلة من اجت عيني بعينه التشع نار وتگلي اليوم اطيح حظج بساع رديت رفعت راسي، تشاهدت على روحي يلا نزلت وكفت گدامة مدنگة راسي وأديَّة وحدة تمرد بالثاني وهمست
زُبيــدة: صباح الخير
- عاط بيه فززني
زبيـر: شعندج هنــااااا؟؟؟
156
- أشرتلة بأيدي على الخضرة، دار راسة باوع و رد يباوعلي ويأشر على البيت يزمخ بيه يريد يخبزني
زبيــر: ولج 6 زلم بالبيت مابيهم واحد شاربة على وجهة ويكسر رجلج؟؟؟
70
- تمنيتة واحد ما لازم لزمة علــيَّ لزمة حتى أعرف شرد عليه بس أخخخ هذا إذا حچيت وياه وراح فتن لأبوية وگالة اني رايحة لبيت شبلي تصير مصيبة ما إلها حل ، بقيت ساكتة واكول ميخالف بيها صالح بس لو الزم صالح اطبكة هو وزبيـر واقسملهم لباجر الصبح .. أشرلي أمشي وحچة گاز على سنونة
زبيـر: أمشي صخيمة أمشي الچذابة أم التأليف خلّ أشوف الزلم المشوربة وينها
117
- مشى للبيت گدامي، ضربت رجلي بالگاع ميتة قهر هذا هيج يحاجيني اخخ مِـنْ الزمن الأغبر ، غميتة سكاتي ودنگت شلت الصندوگ اركض وراه
زُبيــدة: والله غازي مريض خطية رجلة راح يگصونها، ومعن وعادل تعبانين ونايمين
94
- شال طابوگة مِـنْ الگاع كاملة ويتهدد عليهم
زبيـر: اليوم انومها فوگاهم
92
- ركضت سبقتة وكفت بالباب ما مخليتة يفوت عيوني تتوسلة
زُبيــدة: باوع والله ما يدرون همه واني اختنگ مِـنْ البيت وعندي هالفجرية بس أطلع بيها للبستان، باوع لا تحچي شي واني بعد ما أطلع وجزات هالشي والله احترمك منا ليوم القيامة
88
زبيـر: دوخري مِـنْ وجهي الچذابة ام التُكي ميت على أحترامج اني، مو گلتي مِـنْ أغلط گول لأبوية واخوتي هاي اني هسه جاي أكللهم وخـري مِـنْ وجهي
80
- لزمت صندوگ الخضرة بأيد وبأيدي الثانية أشرتلة ناحية الگبر اليكعد يمة
زُبيــدة: بداعت النايم هنااااك ومگابلة ليل ونهار لا تحچي بس هالمَرة
89
- فرك وجهة حيل مرد ملامحة ووخر أيدة يهز براسة بدون ما يباوعلي وگال
زبيــر: بس بشرط
زُبيــدة: موافقة
زبيــر: أسمعي بالأول
زُبيــدة: هم موافقة
75
- حط عينة بعيني وگال
زبيـر: هاي صار مرتين والثالثة ثابتة إذا لگفتج بيها اني أدفنج لا اگول لأب ولا لأخ متفقين؟
65
- هزيت راسي اي اي اي بس اريد اسكتة
زُبيــدة: الگبر الحفرلگياه أخوية أدفني بي
94
- گلب عيونة مغمضهن خلص صبرة وزفر نفس يهدي روحة وگال بصوت ناصي مِـنْ بين سنونة
زبيــر: غضب
زُبيــدة: هــاا؟
زبيــر: مِـنْ أفتح عيني ما اريد اشوفج گدامي
145
- بدون لا احچي رجعت لورة بخطوات ماينسمعلها صوت وسديت الباب على كيفي حتى محد يحس على صوتة وهمستلة مِـنْ ورة الباب أسمعة
زُبيــدة: اشكرك والله اليوم جنت بطل ونقذتني
123
- اني اگلة بطل وهو سَطَر العشيرة ونعلهم واحد واحد مِـنْ صباحيات اللّٰــه ، مشيت بساع للبيت ما مهتمة عفت صندوگ الخضرة باب المطبخ وطبيت للبيت بدون ما أطلع صوت ومادري شعجب أهلي بعدهم ولا واحد كاعد، ندهت غازي مِـنْ حس عليه خليت حلگي يم أذنة وهمست
زُبيــدة: اني جبت الخضرة بس اذا واحد مِـنْ أهلي سألك منو راح؟ گللهم أنتَ رحت وكعد معن او عادل يرحون بمكانك
20
- هز راسة أي وگام طلع يشوفها واني ذبيت الحجاب واندحست بفراشي گلبي بعده يرجف مِـنْ الهبطة وحتى أنفاسي متخربطة ، غمضت أهدي روحـي وصرت اتخايل مشهد لو شافني برهان شجان صار أويلي يمة حتى ماريد أتخيل .
51
- دفنت وجهي بالمخدة وأحاول افكر بغير شي لما غفيت، كعدت ورة ساعتين على صوت مكينة الخياطة يضرب بالراس ، أمي بس تسوي ريوك لأبوية واخواني وتطلعهم للشغل تكعد ورة المكينة تخيط ما تگوم إلا وهيَّ حيلها مهدود .. كعدت مسطور راسي ما شبعانة نوم اباوع على أمي وجهها ما يتفسر ضايجة حيل حتى خفت احاجيها ، مشيت اني وساكتة كعدت يم البنات جيداء كاعدة تنظف تمن تنظف شوية وتصفن نص ساعة!! ندست أُميمة اهمس بيني وبينها
زُبيــدة: شبيهن؟ امي بس أصيح اللّٰــه أكبر يمها تنفجر وهاي صافنة على التمن تتسومر وياه بالنظرات و...
31
- حطت ايدها على حلگي بساع تسكتني تدري ماعندي بريك وهمست
أُميمة: أمج ضايجة لأن ما إجاها برهان وهو البارحة داز خبر ويَّ خَطاب يجيها الفجر
59
- بلعت ريگي واحس گلبي نمرد بتأنيب ضمير لو ما طلعتي وشافني زبيـر وراد يخلصني منه جان ما أنحرمت شوفتة ، حاولت أضيع الموضوع على أُميمة وأشرتلها بعيوني على جيـداء
زُبيــدة: وهاي شبيها؟
- رفعت حاجبها بمكر وگالت
أُميمة: عـاد أنتِ أدرى بيها
39
- حتى ماكدر اكللها مادري شي ، هذه ما تفوتها فايتة ولا عصيدة بايتة كلشي تدري مادري شلون، حتى أسرار أهلــي تعرفهن بس ما تحچي شي ولا تحب احد يسألها على شي دومها تبلع وتسكت ..
86
- غلست عليها وگمت للمطبخ سويت ريوگ وغلست المواعين وبقيت مِـنْ شغلة لشغلة ويَّ جيـداء لما خلصنّا، أُميمة من يوم گال خَطاب بعد ماكو مدرسة وهيَّ مريضة تقهر بروحها وتتخربط علينّا وتخبل أهلي عليها، وهالفترة أمي ما تخليها تگوم بس تريدها تبقى صاحية، وأبوية گاللها بلشي أدرسي وأعتبري فترة مراجعتج بدت من تبلش الأمتحانات هو ياخذها تمتحن حتى لو خَطاب ما قبل .
36
- صــارت بالعشرة وسمعت باب بيتنّا الصغيرة أنفتحت وأنرگعت حيــل، گلبي يفز كل ما أسمع باب تنفتح! بقت عيني على باب الهـول لما فات غـازي يعرج ما يگدر يدوس على رجلة .. كعد بالهول ومدها گدامة وجهة معصور عصر من وجعها، بقن أمي والبنات يسألن وهو يحچيلهن وأمي تريد منه يروح للمركز الصحي ما قبل .. ركضت اني للحمام جبت نجانة بيها مي دافي بس مايل للحرورة خليتها يم رجلة وهو باوعلي مستغرب
غـازي: شتردين تسوين؟
- دنگت اهمس بيني وبينة
زُبيــدة: اخدمك مـــو أنطيتك وعد
52
- أشرتلة يحط رجلة بالماي الدافي ورحت ادور صابون رگي بالبوفية مالت جدتي بدرية وهيَّ تصيح علــيَّ من الهول ماعندي ماعندي بقيت ادور لما لگيت ادري بيها عدها بس مستعزة بيهن
زُبيــدة: جدة عيب الجذب هسه شماخذة منج هيَّ صابونة
52
- بقت تدردم علــيَّ واني شمرت الصابونة على غـازي وكعت بحضنة
زُبيــدة: أغسل رجلك بيها هاي ألتهبت من الوصخ بس صابون الرگي ما يخلي وصخاية
36
- رجعت طبيت لغرفتنّا أخذت واحد من دشاديش جيـداء وطلعت عليها اسألها
زُبيــدة: أكلج تردين هاي الدشداشة؟
- بعدها ما جاوبتني شگيتها من ذيالها وكفت على حيلها من الصدمة
زُبيــدة: ماعدنّا وصلة نظيفة وخطية غـازي رجلة تنگص إذا بقت هيج
111
- اخذت منها على گد ما تكفي رجل غازي ودحست الباقي بالقنينة اكللها سوي وگاية للطباخ، طبت ورايَّ ترعد وتدردم وتحچي علــيَّ محترگ گلبها
جيـداء: ليييييش هيج؟؟؟ مو القماااش تااارس غرفة امي
زُبيــدة: شسوي بيهن أمي
- عاطت بيه فايرة
جيـداء: لعد شتخيط علاليـــــگ؟؟؟؟
41
زُبيــدة: غــديي وشمدريني منين جايبيهن
15
- بقت تدردم واني رجعت كعدت يم غـازي يضحك ويغسل برجلة، من كمل طلعها نفضها من المي ومد أيدة يريد قطعة القماش الليّ لازمتها
زُبيــدة: راح تلفها ناشفة؟
غازي: شحطلها لعد؟
زُبيــدة: دهن شي، ولو ماعدنّا غير دهن تنك
59
- سحب مني قطعة القماش يباوعلي صفح، بقى يلف برجلة وانـي مگابلتة وكاعــدة
زُبيــدة: تدري شوكت نرتاح؟
- شدها من الطرفين ورفع راسة علــيَّ عيونة تسأل شوكت؟
زُبيــدة: من يصير عدنـّا فلوس
62
غـازي: الفلوس مو كلشي
- هزيت راسي اي
زُبيــدة: اي عايزهن جهال، لان المال والبنون زينة حياة الدنيا ..
60
- راويــــــــة ..
مثـــل عمــي هزبر عندة فلوس الدنيا بس ما مرتاح!
بعد ما مات أبنة "الشاهيـــن" تحسة عايش جفيان شر
رغم رب العالميــن رازقــة بـ خمس بنات
خلقة، أخلاق، أدب، رزانــة، ينحسد عليهن بــس
هو بقىٰ بغصة الولــد تحس فرحتة واكفة عليه!
221
- ألتفتت على بينات كاعدة تصبغ أظافرها لون سمائي
تخلي فرشاة الصبغ بمقدمة أظفرها قريب
من اللحم وتحركها بهدوء تخليها تنفرش على عرض
الأظفر ومن جــرة وحــدة تصبغة كله لا زايد ولا ناقص،
أصابعها ناعمة وكلش بيضة واللون يشع على أيدها ..
سألتها من شفتها مغيمة
راويـة: شبيج؟
بينات: ما مــرتاحة
140
- حجتها بغصة ضايگة بيها الدنيا، سألتها ليش؟
سكتت ما ردت علــيَّ ، كملت صبغ أيدها اليسرى ولزمت
الفرشاة بنفس الأيد الصبغتها تريد تصبغ الجهة اليمنى
من أول أظفر انلاصت وما گدرت تضبطة شمرتة
من أيدها محترگ دمها وبچت بقهر تصيح عليه
بينات: شبيك أنتَ؟ ليش هيـــج تسوي بيه؟؟؟
61
راويـة: يا يا شبيج ولج بينات؟؟
- ركضت شلت الفرشاة من الگاع لأن دمرت الفراش وهيَّ صارت تشهگ وتبچي من كل عقلها عبالك رادت سبب حتى تنفجر
31
- بقيت صافنة عليها حتى ما أدري شسوي اني افشل انسانة بالمواساة، كعدت يمها ايدي تطبطب على ظهرها
راويـة: بينات صاير وياج شي؟ احچيلي
25
- هزت راسها أي تتشاهگ وتحچي
بينات: تعبت من حياتي ومـن الخوف العايشتة وكلها بجهة والكوابيس بجهة
راويـة: احچيلي كلشي بلكت اكدر اساعدج بشي
بينات: كل يوم أحلــم انـي ميتة ودا أمشي بطريق مفروش جمر والنار تلهب علــيَّ من كل جهة ومن اسأل الليّ دا يمشون ويايَّ أحْنـا وين؟ وليش هيج دربنّا كله نار؟ يگلولي نتيجة ذنوبنّا
208
- صفنت بوجهها وهيَّ تشرحلي أحـلامها المخيفة والمرعبة، شِهگت مختنگة وگوة طلعت منها الحچاية وهيَّ تگلي
بينات: اتوسلهم رجعوني للدنيا والله ماسوي ذنوب بعد وأرجـع أركض منهزمة من هالعــذاب بس باب من نار تنسد بوجهي ما اكدر اطلع من هذاك المكان
44
راويـة: أنتِ مسوية ذنب جبير؟
- بلعت ريگها وصفنت بوجهي الخوف مستوطن عيونها! لزمت جف أيدها أقنعها تحچيلي أريد أساعدها تخلص من هالكوابيس، بس تحركن شفايفها تريد تحچي أندگت باب غرفتنّا بقوة من رهبة الكلام الليّ سمعتة من بينات فزيت جفلانة ووكفت على حيلي
61
شبـل: راويــــة ولج أم عطوب ليش مااا كاوية هدومي؟؟ ما تگولين أخوية التاااجــر شلون يطلع بهدوم مجعوصة؟؟
111
- ركضت فتحت الباب اغم بگصتي
راويـة: نسيت وعلي نسيت، وينهن هسه اكويهن من فدوة اروح لاخوية تاجر النسوان
54
- بقيت واكفة گدامة هو طالع من الحمام لاف المنشفة على بطنة واصل للغرفة لاگيهن ما مكويات وراجعلي صلوخ! شو هذا دفعني وطب للغرفة يگلي
شبل: ماعندج عطر حلو يسطر الحلوات؟
64
- وكف بنص الغرفة من شاف بينات الليّ راجعة مدنگة وتصبغ بأظافرها! عتيتة من أيدة اريدة يطلع جبل ما يتزحزح يگللها
شبل: نعتذر عيوني ماندري بيج هنـا
- ردت عليه بدون لا تباوعلة
بينات: هسه دريت يلا أطلع برا
102
- رجعت اعتعت بي وهو باوعلي يخزرني لأن هيج اسحبة حيل
شبل: هاي شبيج؟
راوية: اطلع شبيك فايت مصلخ علينّا
شبل: تحچين صدك؟ شبيج راوية
راوية: أنتَ شبيك؟
شبل: لا صدك شبيج؟
راوية: شبييييك شبل شبيييييك
شبل: شبيه؟
74
- عطت متنرفزة صوتي وصل سابع جار
راويـة: يبـــــووووووووووو
40
- طلع ركض وكف يم الباب منطينّا ظهرة عود هو ماطب للغرفة وباوع لجهة باب الصالة يصيح
شبل: تعال زيدان تعال اسمع اختك شلون خزتنّا
27
- من الخـوف حتى بينات وكفت على حيلها تگلة
بينات: عليك العبااااس؟ زيدان هنااااا!!
50
- ألتفت علينّا يباوعلنّا صفح
شبل: صگارجن شبل
راويـة: أي خوش صگرنّا بطاري زيدان
57
- سحلني من دشداشتي اكوي هدومة وبقى يفتر داير مدايري يلا! استعجلي! مابقى وكت! التاجر تأخر على شغلة! التاجر راح يضيع رزقة خبصني خلاني ماعرف شلون اكوي
راويـة: أدري وين اكـــووو تاجـــر شغلة ورة الظهر؟
44
شبل: اني، مراعي شعوري وشعور الموظفين بحبنّا لنومة الصبح
96
- كملتهن وشمرتهن عليه، كشخ بيهن وطلع وانــي رجعت لـ بينات اريد أفتهم شبيها؟ لگيتها نايمة! ويمكن مسوية روحـها نايمة حتى تخلص من اسألتــي .. رفعت راسـي للساعة قربت رجعة أخوية زيدان ، طبيت للمطبخ أحمي الأكــل إله لأن هو يجي متأخر ، سمعت صوت سيارات بالباب باوعت من الجامة طب زيـدان يمشي بهدوء روب المُحاماة بأيـدة وشايل جنطة حاسبة هـم! وطب وراه عمــي هزبـر مثل العاصفة جرة من ياخة قميصة دارة عليه وصـاح بوجهة
هزبـر: لا تفتح بـــاب جنهم على روحك زيــــداااان، وكتهااا لا ذكائك ولا محاميـــن الدنياااا يكدرون يساعدونك
112
زيـدان: بس مو صعبة على رب العالمين
- حچاها بهــدوء وعمي دفعة متخبل حسيتة راح يوگف گلبة من الصياح
هزبـر: ليش أنتَ مقتنع أفـعالك ترضي رب العاااالميـــن؟؟
24
زيـدان: أبو المثل يگول "صَفي النيّة ونام بالبريّة"
68
- طلع أبوية وأمي ونسوان عمامي وبناتة يركضون على صوت صياح عمي، رفع أصبعة السبابة بوجه زيـدان يحذرة
هزبر: هاي أفعالك ما تنومك غيـر جوة التـراب ولا تگول عمي ما گال
25
- هز راسة خـوش وگالة
زيـدان: من رخصتك
29
- كمل دربة يريد يفوت للبيت وأبوية بقى بيناتهم يسأل شكو؟ الخوف اكل گلبة وعمي معصب حيــل ومن هيج يعصب بياض عيونة ينگلب دم يخووف، طب للبيت وشيجي گدامة يدفرة يكسرة لما صار بنص الصالة نزع السترة شمرها على الكرويتـة وسحب الرباط من رگبتة مثـل المختنگ بي، أبوية رجـع سألة شصايـر؟ كعد على الكرسي لازم راسة بثنين أديه وگاله
هزبـر: أبنك زيـدان صاير محامي للمجرمين والطايحين حظ، اليـوم خَلص تاجر مخدرات من حبل المشنقة وطلعة براءة
141
- شهگت أمي لاطمة على صدرها خسفت ضلوعها من صدمتها
عهود: يمة أبني يمةةة زيــداااان
25
- باوعلها عمي يزيد الطين بَلة
هزبر: اذا بقى يمشي بهالطريق وكتها صدك تشبعين لطم عليه
24
- أبوية ما نطق حرف واحد، سحب روحة وراح ورة زيـدان لغرفتة وما سمعنّا شنو حچوا بعد لان لو شيصير وشما جانت الأوضاع مشتدة أبوية ما يصيح ويناقش بهدوء .. من طلع مبين عليه ضايج من زيـدان راد يرجع لغرفتة بس عمي عبالك كاعد ينتظرة صـاح وراه يسأل شصار؟ أتنهد أبوية وجاوبة ومبين عجز عن فهمة
صفوان: لا راح نتحاسب بمكانة ولا راح يموت بغير يومة
57
- بهالحچاية وضح لعمي هزبـر ما گدر يفتهم شي من زيـدان ولا گدر يغير تفكيرة، أستسلم للأمـر الواقع! گام عمي من مكانة يحاچي أبوية
هزبـر: وسمعتنّا صفوان؟ انـي؟ أنتَ؟ وحَمـد تضمنة إذا أنجاب طاري أخوه بسوء راح يسكت؟
55
- سكت أبوية مايدري شيگلة وهو عاجز يغير زيدان، مشى عمي لغرفتة نار وتمشي مو بشر معصب حيل وضايج من زيـدان يخاف على سمعة العائلة وهمه كلهم بالدولة إلا شبل محد يدري بي شيشتغل بس يگول اني تاجـر، تاجـر شنو؟ الله أعلم .
250
- صــار البيت هالظهرية هـــدوء لحد ما إجـــة
العصر وإجــت المصايب ويــاه!
أندگت الباب وانـي وبينات وأمي وعمتي دلال وتقوى
بالمطبخ، صحت على زيـدان مرتين أريدة يطلع من غرفتة
ما طلع ولا عبالك يسمعني! تنرفزت أمي وصاحت عليه محترگ گلبها
عهود: ما تطلع يمة شعندك بالغرفة حتى الجايبة هم تگوم تتمشى
97
- طلعت تدردم شافت حَمـد كاعد بالحديقة
على كرسي وماد رجليه مخليهن على كرسي گدامة،
مخلي مسدسة على بطنة ومرجــع راسة لورة ساندة على
حافة الكرسي، أيدة اليمنى نازلة من جهة أطراف
أصابعة واصلة للثَيل يحرك بأيدة بهدوء
وبأيــدة الثانية لازم جگارة وساندها على مسند
الكرسي ما يدخنها يخليها تحترك وحدها لما تخلص .
75
- من شافتة أمي ضربت أيد بأيد وصوت بتوتها رَن
فَـززنة، ألتفت عليها بحركة بطيئة وهيَّ تصيح عليه بصوت
ناصي حتى لا الليّ بالباب يسمعونها
عهود: انتو تردون تجلطوني؟ أطرشيت تالي عمرك يمة؟ الباب تندك وأنتَ صافن عليمن ما تفهمني؟
31
- دار وجهة وين ما جان يباوع وگاللها
أبو بكرة: يدك يدك محد يفتحلة ويروح
78
- تنرفزت أمي ومشت للباب تريد تفتحها ما هامها منو وراه! من شافها أبو بكرة نهض بساع مخلي المسدس بحزامة وركض وراها مأشرلها ترجع، بقى واكف يم الباب لما شافها طبت المطبخ وأندار فتح الباب .. أشوفة واكف ويحچي ويَّ شخص بعدين وخر عن دربهم وأشرلهم يفوتون، فاتوا أربع زلم أثنين منهم لابسين بس دشاديش "واحـد شاب والثاني جبير" وأثنين معگلين مبينين شيوخ، أنداريت على عمتي دلال من حچت بعصبية
دلال: شعدهم هذولة مـــن لاااا هـــلااا
- عگدت حاجبي مستغربة ما شايفتهم اني قبل وسألتها
راويـة: منو هذولة؟
دلال: حكمت، خــال چتال أبني
147
- مشى گدامهم أبو بكرة وجهة ما يگصة السيف فتحلهم باب الأستقبال وطببهم، وطلع من الباب الثانية راح لـ غرفة عمي هزبر أنطاه خبر بجيتهم، طلع عمي روحة بخشمة تلگتة عمتي دلال بنص الصالة تبچي مفرفحة
دلال: إذا رجع برهان لهالديرة اني ما أبقى بيها وروح أبني ما أبقى، تريدة يرجع يعيش بين اهلة مرتاح ومنوم أبني جوة التراب؟؟
82
- تحچي مفرفحة وتزلع بخدودها، طبطب على جتفها بهدوء بدون لا يرد عليها وفات للأستقبال وأبو بكرة إجة كعد يمنّا بالمطبخ يفور أكثر من القوري الليّ على الطباخ! كاعد على كرسي وساند عكوس أديه على رجليه الليّ تهتز بحركة سريعة تخفف توترة بس تزيد توتر الواكفين يمة .. ألتفت على صوت خطوات زيـدان من إجة يمشي ناحية باب الأستقبال يريد يفوت ورة عمـي وصاح عليه يگلة
أبـو بكرة: عــود سهل أمــرة ورجعة ما أوصيـــك
65
- ضحك زيدان يهز براسة
زيـدان: شلون لعد؟ حَـق الجار على الجـار
109
- فات يمهم وانـي وصيت بينات على الچاي ومشيت وكفت ورة الباب يحچون برجعة برهان أبن أسماعيل للديرة ، خال برهان يگول لعمي هـــو يگدر يرجـــع هسه ومحد إله حَق عليه بـس
حكمت: نريــد برضاتكم حتى ننهي المشاكـــل أبـو الشاهين
17
- سكتوا كلهم همه وانـي والكـل ينتظر جواب عمي لحـد ما نطق وگال
هزبـر: يرجـع بس يحچي السبب الخلاه يكتل صاحبة بالأول
48
زيـدان: صحبتهم دغش مابيها صدك
63
حكمت: شـراح تستفاد من السبب؟ الصار صار بعد وما راح يتغير
- صاح بي عمي فايـر من القهر
هزبـر: ياسبب هـذا اليسوى ينهدر دم أبني علمووووودة؟؟؟
76
- تدخلوا الزلم البقية يردونة يهدأ وهـو تخبل عليهم صار يصيح على حكمت ويغلط على برهان وأهلة ومن جهة أبن حكمت ماسكت وماقبلها يحچون على گرايبة وتذابـــح هو وزيــدان .. بالشافعات فاككوهم وعمـي طردهم كلهم من حكمت لأبنة وحتى الشيوخ طردهم وياهم وصار يحلف مية يمين بس يرجـع برهان للديرة إلا يذبحة ويحرگ گلب أهلة مثــل ما محترگ گلبة كل هالسنين، رجعت ركض لباب المطبخ الخارجية أباوع منها وأشوفهم شلون طلعوا زعلانين ومهوسين وكف أبن حكمت يم باب الحـــوش وصاح بعمي وزيـدان والغضب يطافر ويَّ كلماتة
صهيب: الزلمة وأبن امة وأبوه اليندك بـ برهان اسحگ راااسة وراااس اليطلعلةةةة بِـ اللابستة رجلي
159
زيـدان: أشوفك تهدد؟ هاي حچايتك وراهـا قانون يحاسب
- هز راسة ونتر بأيدة ما مهتز
صهيب: أعلى ما بخيلكم أرگبوه
75
- ضرب باب الحوش بأيدة رگعها بالحايـــط وطلع، كل هاي الهوسة وأبو بكرة على نفس كعدتة! ساند عكوس أديه على رجلية ويهز برجلة ..
38
- بقت عمتي دلال تبچي وتدعي على برهان مفرفحة روحها، وعمي رجع للأستقبال مادري عليمن خابر وبقى يصيح گوم الدنيا وكعدها .. وحلف بأسماء الله كلهن ما يخلي برهان يرجـع إلا يعرف السبب! ورة ما غلق الخط وكعد ينفث من التعب على گد ما صيح ، زيـدان واكف فوك راسة طلع جگارة من الباكيت وشمرة على الطبلة وسحب الجداحة من جيبة طگها مرتين يلا أشتغلت ورث جگارتة ماخذ منها نفس وزفرة لفوك يحاچي عمي بهدوء
زيـدان: تريد تشتكي على صهيب؟ تهديد واضح صريح
109
- عمي من حرگة دمة هز راسة أي وطب لغرفتة بدل بدقيقتين وطلع هو وزيـدان، عمتي دلال جرت دشداشتها مطلعة صدرها ولطمت عليه حيل رافعة راسها للسماء تشهگ وتحچي بحرگة
دلال: الله يبرد گلبي بيكم يااا بيت أسماعيل، كون ولدك كلهم يندفون ورة الشاهين
185
- ورة هاي الهوسة گلها يـلا گام حَمـد، مشى لغرفتة وگاللها
أبو بكرة: يرحون يلعبون شدة يا ورد ويَّ ابنج بالبرزخ
186
- رجعت تدردم وتحچي على أبو بكرة تگلة كله من وراك أنتَ المصادق برهان وأبن عمة وهو حبهم من وراك وصادقهم .. هو ما أهتملها لأن خلصان گلبة من هالحچي هذا، بس أمي ما رضت گرصتها من رجلها تسكتها ما راضية
عهود: لا تلومين حَمـد لا أسوي المااا صايــر
36
- زعلت ومشت لغرفتها، تقوى كاعدة توكل بنتها الصغيرة لا حچت ولا تدخلت بهاي الهوسة .. بينات ورة ماشبعت بچي ويَّ أمها راحت خابرت أخواتها المتزوجات تحچيلهن شصار .
87
- هدأ البيت كلمن بغرفتة والليّ كاعد بالصالة بس محد يحچي ويَّ أحد كلها ضايجة .. كل ما ينجاب طاري الشاهين يدخل البيت بكأبة عبالك هسه خلصانة فاتحتة . المغرب رجـع زيـدان وحدة طب لغرفتة أخــذ حاسبتة وجنطة أوراق وطلع كعد بالحديقة، مخلي طبلتين گدامة وحدة مخليها عليها الحاسبة والثانية الأوراق، لما سويتلة چاي وصبيتلة بگلاص جبير وطلعت عليه لگيتة نافض باكيت الجگاير! أشرلي أحطة على حافة الحاسبة
زيـدان: عاشت أيدج
- دنگت حطيتة وين ما گال وسألتة
راوية: أشتكيتوا على الولد؟
- هز راسة واكتفى بـ "امممم" وكفت عدل ورجعت سألت
راوية: وشصار؟
زيـدان: شالـــو
49
راوية: ويـن؟
- رفع راسة يباوعلي ويجاوبني بنفس الهدوء
زيدان: على ظهرهم، أفتروا بي بالديرة يلعبونة ورجعوا لبيتهم
146
- من بقيت ساكتة رجع يباوع للأوراق الليّ گدامة يقرأ المكتوب واني لزگت على گلبة
راوية: بس هو ماسوة شي؟ غير لازم اكو شهود؟
زيـدان: عمج بس طب المركز تراكضوا گدامة يهلون بي وواحد منهم يگلة ياهو المضوجك آغاتي؟ يأشر علــيَّ و يرد يگلة هذا مضوجك؟ أعتقلة؟
68
- أبتسمت واريد اسأله بعد رفع أيدة يأشرلي اسكت وگال
زيـدان: كافي عندي شغل
راوية: بس أخير سؤال، راح يبقى محبوس؟
- هز راسة أي
زيـدان: جرة أذن حتى لا يبقون ينبحون
73
- زبيــــــدة ..
جرة أذن!! بس هيجت بركان جان راگد
من سمعوا أهلي بسجن صهيب تخبلوا وإجـة خالـي
حكمت علينّا يصيح متخبل ويگول لأبوية برهان
يرجع غصبًا على اكبر شارب لو مو يحبسون صهيب ،
خَطاب طب من باب الحوش يركض عيونة بگصتة
الولد مخابرينة من صايرة هاي الهوسة،
صــاح على غـازي يسألة وين دافنين السلاح!
أشرلة جـوة الحايــط وأبوية ركض وكف گدامة
ما يخلي يحفرة ويطلعة
أسماعيل: عوف السلاح خَطاب بوية لا تسويلنّا مصيبة جديدة
66
خَطاب: خَطااااب بوية أسكت، خَطاااب لا تسوي مصيبة، خَطااااب لا ترد عليهم وهااااااي أنـــــدااااس على راسنّاااااااا يابة
- صياح بصياح وصوتة يفزز الگلب بخوووف مفرفح مدا يشوف بشر گدامة
52
- لزمة أبوية يتوسل بي يريد يهدي وزاد الطين بَلة عدنان من دفر الباب وطب محزم وجايب تفكة مدري منين يگول لأبوية
عدنان: ما نرجــع إلا وأحْنـا ربحانين يا الحگ يا الشهادة
142
- خَطاب كعد يحفر بالتراب بثنين أدية يريد يطلع التفگة، وعادل ومعن تراكضوا جابوا كرك يردون يحفرون وياه بـس خالي حكمت رفع أيدة بوجههم ما مخليهم يتقربون ومشى كعد يم خَطاب مادري شيحچي وياه بصوت ناصي، أبوية واكف على صفحة هم يخابر على الشيوخ الراحوا ويَّ خالي لبيت شبلي يريدهم يرحون يشهدون صهيب ما حچة ولا هدد يسوي شي هسه إلا إذا همة سووا شي لـ برهان .
6
- خَطاب عاف السلاح وكعد بالگاع ميت قهر يسمع لخالي، من كمل كلامة وكفوا أثنينهم على حيلهم وهو طلع تلفونة مادري عليمن خابـر بس أسمعة يگلة
خَطاب: مو تريد تعرف ليش؟ تعال برهان هنـا يريد يحچيلك، عندك عشر دقايق إذا ما جيت بعد ما تشوفة
63
- كمل حچايتة وسد الخط، أشر لـ عدنان يبقى واكف يم الباب هو ومعن وعـادل، غـازي كاعد على عتبة باب الهول ما يگدر يمشي على رجلة حيــل مورمة وتوجعة .. دقيقتين بس واندگت الباب بخبال! كلنّا فزينّا على صوتها ونباوع من الشباج نريد نعرف هـذا ياهو الليّ إجـة! معن فتح الباب وطب أبو بكرة مثل العاصفة يتلفت بيناتهم عيونة التشع حقد تدور على برهان، من ما شافة لزم خَطاب من مقدمة ملابسة وعتة عليه بعصبية صاروا وجه بوجه ونار تلهب بيناتهم
أبـو بكرة: تلعب علــيَّ ولك عــار؟؟
62
خَطاب: تچفوا الشر بيت شبلي، لا انـي فقير ولا أخوتي وإذا تشوفوني ساكتلكم هاي لخاطر شيبات هالعزيز
- اشر على أبوية الليّ واكف على يسرتة
19
- لزم أيد أبـو بكرة ونفضها حيــل
خَطاب: جبتك هنـا حتى أشوفك شلون اكدر اجيبك لأي مكان أريدة بكل سهولة واكدر هم أخفي أثرك أنتَ واخوانك واحد ورة الثاني لما أگطع نسلكم، ولا واحد بيكم يبقى يشم الهوى حتى محد يدور بثاركم بـــــس أحْنـا ما نغـدر
74
- تقرب عليه خالي يگلة
حكمت: رجلك داست هالبيت والشر ينفض منك نفض
- أشرلة على البيت يريدة يشوف روحة وين واكف
حكمت: أصفنلها ويايَّ وليدي، أنتَ وخَطاب تتعاركون بأعتبار بيناتكم ثار قديم، وأنتَ تعصب لدرجة تضرب خَطاب طلقة بهذا سلاحك
- طبطبلة على سلاحة الليّ بحزامة
حكمت: ويگوم واحد من خوان خَطاب مثلًا معن يضربك بطابوكة بلوكة توثية على راسك يسيح مخك من جمجمتك، شنو عقوبتة؟
44
- صفن أبو بكرة بوجه خالي صفنة طويلة يلا جاوبة
أبـو بكرة: دفاعًا عن النفس "بريئ"
38
خَطاب: وهـذا الراح يصير ويَّ واحد من أخوتك إذا ما طلع صهيب من السجن وكفيتوا شركم عن بيت أسماعيل
59
- أندار على خَطاب فاتح عينه على وسعها يمة قل أعوذ برب الفلق يخوف والله يخوف، نظراتة هاي تخوف أكثر من نظرات ام عفريت!! بس ما هزت خَطاب وكمل كلامة بهدوء عكس النار الموجرة بگلبة
خَطاب: دزيت عليك أنتَ بالذات اكلك هالحچي لأن عندك خيط عقل وتفكر زين
52
- بدون لا يحچي حرف دار وجهة ومشى يريد يطلع من البيت ، وصل الباب وعتها حيــل گلت راح يشلعها بأيدة، صاح عليه خالي
حكمت: وبرهان من ساكت عن سبب كتل الشاهين يمكن لان هالسبب ساتر على سمعة أبنكم وسمعتكم بين الناس، مو قصدة عناد وحرگان گلب
214
- بقى واكف ولازم الباب لما خالي كمل حچايتة طلع ورگعها وراه حيـل، وخالي حجة ويَّ الولد فهمهم محد يتعرضلهم هالأيــام مادري شنو براسة وراهــا مشى يريد يطلع، عدنان واكف بالباب شايل التفگة گالة
عدنان: سمعت حجايتك وبقيت أصلي على محمد وآل محمد شو فَضت العركة
194
- طبطب على جتفة يهز براسة
حكمت: في التأني السلامة
25
- عافنة وطلع هو وأبوية ، خَطاب مشى للبستان وعدنان مشى لأهلة والبقية بقوا كاعدين يم غازي .. أمي كاعدة تنعي وتبچي هيَّ وجدتي بدرية بالهول گلبنها مناحة ، لـ ثاني يوم الصبح والوضع هدوء ووصلنّا خَبر ورة الظهر صهيب طلع من السجن .
19
- عَـدن يومين هدوء ماكو شي بس عمي كامل يهوس على أبوية ويطلع ما يريد برهان يرجع يخاف الطشار يصيب ولدة هم ، باليــوم الثالث إجــة بالليل بس هادئ هالمَرة، الولد كلهم موجودين بس خَطاب بالحمام يسبح وهو كاعد ويسولف طبيعي، طلع خَطاب وإجة للهول المنشفة على جتافة ورافع جهة منها ينشف براسة سلم على عمي وفات لغرفة جدتي وكف گدام المرايا يمشط وجيـداء كاعدة يم باب المطبخ گدامها معجانة ستيل بيها الأستكانات ترتب بيهن بالصينية، وحطت بيهن شكر وشالت القوري داتدير بيهن چاي، گال عمي
كامل: جايك بطلبة ما تردني يا ابو برهان
أسماعيل: أنتَ تآمر
كامل: اريد جويدة لأبني عدنان
145
- شهگت جيـداء من فلت القوري من أيدها ووكع فوك الاستكانات كمزت مفرفحة الچاي اندار على رجلها واني وامي و أُميمة ركضنا عليها وهيَّ طبت تركض للمطبخ تدير عليها مي بارد وكل دمعة تذبها تسبح جاهل
حَفصة: شجاج يمة شجاج؟؟؟
31
- شهگت تبچي من الوجع وساكتة ، إجوا معن وعادل يردون يشوفونها امي تجرجر بدشداشتها تريد ترفعها وهيَّ تجرها تريد تنزلها إلا شوية تتشكك بين أديهن ..
15
- عمي يضحك يگول هاي من الخجل ماعرفت شتسوي؟ بعدنّا حايرين بيها وصدمنّا خَطاب من گال لعمي
خَطاب: جيتك على العين والراس بس أبوية مايريد يزوجهن لما يخلصن دراستهن
114
كامل: بــس انتو بطلتوهن يا دراسة بعد؟
خَطاب: لا ما بطلن عدهن فترة مراجعة وامتحاناتهن مابقالها شي
66
- بقوا حجاية منا وحجاية منا تعاركوا عمي يگول أخذها غصبًا على أكبر شارب وخَطاب يگول على جثتي ، زعــل عمي ومشى وأبوية زعل صار يحچي على خَطاب
أسماعيل: منطيك مجال هوايَّ لدرجة صاروا يشوفوني ما عندي كلمة عليك
43
خَطاب: حاشاك يابة، أنتَ وكلمتك على راسي وبين عيوني بس مرة ولبيت عمي كامل گطنة وشيلوها من أذنكم، اذبحها وما انطيها هيج نطية
54
معن: عدنان صاحبك وخوش عدنان ليش متنطي؟
9
خَطاب: بس أهلة مو خوش أهل اولهم عمك كامل، اذا عدنان يريدها يبنيلها بيت بالأول ويَّ أهلة ما تعيش
97
- أبويّة زعل وفات لغرفتة وخطاب مدد گدام المبردة مخلي راسة بحضن جدتي، دفعتة زعلانة منه بس ما تزحزح
بدرية: وخر وخر گدامي وتحچي على أبني
- رفع عيونة يباوعلها يضحك
خَطاب: منو ابنج؟
بدرية: عمك كامل منين جاي من فطر الحايط؟ غيـر أبني
40
- انگلب نام على صفحتة وضم وجهة بحضنها يگللها
خَطاب: خلّ يولي بس أحْنـا ولدج
69
- بقى متمدد لما غفى وهيَّ خطية ما تتحرك تخافة يفز لما عادل رفع راسة حط جواه مخدة يلا هيَّ كامت راحت نامت بفراشها .
38
- انـي نايمة والليل كله حلمانة بـ أم عفريت مادري ليش، فزيت على ربيع يكعدني أسمع هوسة أهلي بالهول عبالــي صَبحت الدنيا! من گمت طلعت صار عيني على الشباج بعدها ظلمة، أفترت عيوني بيناتهم ليش واكفين كلهم بالصالة لما ثبتت عيوني على برهان واكف بيناتهم، جنت أفرك بعيني مسطورة من شفتة نزلت أيـدي مصحصحة
زُبيــدة: مرحبا
98
- بقى يباوعلي ومعن يضحك يگلة هاي أختنّا خاف ما تتذكر شكلها! بس هو صفنتة عليه مو هذا سببها .. هز راسة يحاچيني بهدوء
برهان: مراحب، شلونج؟
169
- أبتسمت مرتبكة مادري شبيه وأشرتلة بثنين أديّة على كل الموجودين
زُبيــدة: بنص الخير
150
- كعد على جهة مرة جدتي تحضنة تبوس بي مرة امي، وربيع كاعد بحضنة مايقبل يوخر والبنات مگابلاتة وكاعدات يحچي ويشاقة ويَّ الكل حباب ولطيف لا عصبي ولا مبين عليه مجرم وخريج سجون!
80
- شال ربيع من حضنة كعدة يمة وأشر لـ أُميمة تتقرب عليه، كعدت يمة حط أيدة على جتفها يسألها
برهان: سمعت مريضة شلون صرتي؟
- گبل نزلت دموعها وصوت احتقن مختنگة
أُميمة: خَطاب بطلني من المدرسة
10
- باس راسها يضحك
برهان: ما عليج منه، وكت الامتحانات تروحين تمتحنين وأخذيها حچاية من هالشارب
- لزم شاربة يشوفها
32
جيـداء: وانـي؟
- أشرلها براسة اي يعني هيَّ هم تمتحن، أبتسمت وسألتة بفرح واني متأملة اسمع نفس الجواب
زُبيــدة: واني؟
برهان: أنتِ لا
- حچاها وغير الموضوع حتى ما ألح عليه، أبتسامتي وفرحتي وأملي كلهن تلاشن بحچايتين .. دنگت راسي مقهورة بس بلعتها وسكتت
371
- ما طَول نص ساعة وگام مشى مادري وين يروح ولا عندي فضول أعرف وين عايش! ثانـي يوم الظهر أبوية ومعن وعادل رجعوا من الشغل بس تغدوا ابوية نام والولد راحوا لدوامهم، غـازي باقي بالبيت هالأيــام رجلة مدا يگدر يدوس عليها .. خَطاب طلع من الفجر لشغلة ورجعاتة دوم بالليل .
18
البنات يدرسن بالغرفة وامي وجدتي هم نامن بقينّا بس اني وربيع كاعدين كـل شوية واحد يرفع راسة يعاين بوجه الثاني ونموت ضحك بدون سبب وامي تجقجق حتى نسكت ، اخير شي هو گام راح سكاتي للمطبخ شويَّ ومدلي راسة شايل طباشير مال سبورة ملونات .. سحبت روحـي بلاية صوت وطلعنّا للحوش اني وياه بهاي الظهرية
ربيع: نلون الحايط؟؟ شتگولييييين يطلع حلو يطلع حلو
50
- أخذت من ايدة يمكن 4 وهو بعد عنده هوايَّ معن وعادل يجيبولة من المدرسة، لزمنّا حياطين البيت كلها شخبطناها نرسم ورد ونرسم جبال ونرسهم عصافير وشمس شكبرها اليوكف يمها تبلعة، ما خلينّا حايط صاحي لما خلصن الطباشير العدنّا يلا بطلنّا شخبطة .
30
- رحنّا غسلنّا أدينّا على الحوض وهو يگلي
ربيـع: زُبيــدة جيبيلي زحليگة اريد أتزحلگ بيها
زُبيــدة: أمشي أخذك لبيت شبلي تزحلك على راس أبو بكرة
181
- صفن بوجهي مادري شبي وضحك فرحان راح يركض للمطبخ خلاني الطم هسه يكعدهم، شويَّ وطلع بأيدة مصيادة طيور الولد مسوينها ورجعلي يهمس بضحكة
ربيع: نصيد طيور ؟
- أخذتها مِـنْ ايده اهز براسي اي
زُبيــدة: ونسويهن عشا اليوم اويلي يلا تعال
27
- المصيدة جانت على شكل حرف Y يشدون بأطرافها الفوك لاستيك منا ومنا ويلتقن بقطعة جوب صغيرة مكان الحصوة .. جانوا معن وعادل مجمعين حصوا هوايَّ وين الحصوة الشطح وبيها نبلة حتى توكع الطير بمكانة .
65
- صعدت على تنور الطين اباوع للبستان وگلت لـ ربيع
زُبيــدة: اني اضرب الحمامة اوكعها وأنتَ تركض تجيبها خوش؟
44
- هز راسة اي فرحان بس يريدني اصيد طير، بقيت اضرب على الحمام اليوكف بشجر البستان ينهزمن ما توكع بيهن خلصت نص الحصوات وما صدنّا ولا وحدة، ربيع وجهة صار احمر دم مِـنْ الحر كسر گلبي مو مال ارجعة للبيت وأيده فارغة ، باوعت على بيت جيرانة مِـنْ الجهة الثانية عدهم حمامات هوايَّ نص واكفات على السطح ونص على الحايط الليّ بيناتنا ، انداريت ورفعت المصيادة مخلية نيشاني عليهن مِـنْ اول ضربة وكعت وحدة والبقية طارن منهزمات ، طلع ربيع يركض عبالك صايدين بعير مو حمامة .. جابها وإجة يركض ، خلينّا البقية يأمنن ورجعن لمكانهن وردينّا ضربناهن وتصيدنا منهن 7 حمامات .. ذبحناهن ورحت فورتلهن مي ورجعت هلست ريشهن ونظفتهن والريش كله جمعتة بعلاگة وحفرنة جوة الحايط حفرة ودفناهن حتى محد يلگفهن، رشيت الترابة حتى ما تبين محفورة وباوعت لـ ربيع
زُبيــدة: ممنوع تحچي لأحد هنا حفرنّا وهنا طمرنّا خوش؟
150
ربيع: ما احچي ابد ما احچي
- مسحت على جتفة
زُبيــدة: عفية بـ ربيع لأن اذا تحچي اني اموت
2
- هز راسة لا خايف، جان ما يعرف شنو الموت بس يأجوج ومأجوج "معن وعادل" خوفوه بسالفة الموت وكالوله اليموت بعد ما يرجع وهو يتفگدنّا هوايَّ ما يريد واحد مِـنْ عدنّا يبتعد عن البيت ابد .
40
- اخذنا الحمامات المسموطة وخليناهن بالمطبخ لما كعدوا اهلي ووكف ربيع بنص الهول يباوع بوجوهم واحد واحد ويصيح
ربيع: صدنّا حمااااامة صدنّاااا حمااامة
33
- محد صدكة بالأول وهو راح يركض للمطبخ جابهن وإجاهم يشوفهم ، نوبة كعدوا يحققون ويايَّ عبالهم طالعة للبستان طيحوا حظي لما صدگوا ماطلعت وعافوني بـس الحَمـدُ لله ماعرفوا هذن حمامات الجيران ، باوعتلهم بغرور عبالك اني الليّ معيشتهم
زُبيــدة: لو ما اني منين تاكلون لحم طير، جان بقت عينكم على الياكلون و رهاويلكم سايلة
37
غـازي: شبي السلوگي ما يكعد راحة
24
- حچاها يضحك خلانـي افور وربيع طفر گدامة يسأل
ربيـع: شنو سلوگي شنو سلوگي؟
غـازي: چلب صيد، مِـنْ يوكع الطير يروح يركض يجيبة
23
- ردت اهد على غازي بس تمددت بالگاع مِـنْ الضحك على ربيع مِـنْ فرح ويگلة
ربيـع: اني السلوگي اني اني
100
- بس يردون يسكتونة ما عاد يسكت حتى أبوية الضايج هم بقى يضحك على سوالفة .. العصرية إجة خَطاب وجهة مجبد مِـنْ التعب سلم وفات للغرفة ، دزتني أمي وراه گالت شوفي خاف بي شي مستغربين رجعتة بهالوكت! مِـنْ رحت شفتة عاد نفس الحركة طلع صندوگ الخشب ومادري شحط بي ، قفلة ورجعة لمكانة وألتفت يريد يطلع صرت بوجهة، قبل لا اسأله گال
خَطاب: مدري شوكت تجيب أمج
94
- صفنت عليه شتجيب؟ وكف گدامي من سألتة شتجيب؟ گال
خَطاب: مو گلتي حامل!
- تذكرت جذبتي الناسيتها مادري شلون باقية ببالة وبساع گتلة
زُبيــدة: غيـر طرحتة من المصايب والهبطات يومية
77
- رفع حاجبة بشك وترني، أبتسمت وسألتة إذا يريد شي؟ هز راسة لا، أخذ هدومة وطب يسبح لما كمل وطلع كعد بالحوش يم أبوية جانوا يحچون بيناتهم بصوت ناصي لحد ما أمي أخذت قوري الچاي وطلعت يمهم تغيّر الموضوع وصار صوتهم مسموع .
- أندار على أمي اخذ استكان الچاي منها حطة گدام أبوية ورد أخذ الثاني إله وصاح على غــازي، راح غازي يعرج كعد يمهم سألة شيريد؟ بقى ساكت عينه على أستكانة وحركة أيدة شلون يخوط بالچاي وبس صوت الخاشوكة التطگ بحواف الأستكان مسموع، كلهم يباعون عليه مستغربين لما نزل الخاشوكة بالماعون وگال لـ غازي
خَطاب: اني حچيت ونصحت وطلبت منك بالعين وأغاتي تعوف الجگاير بس لبستني، هاي بعد منك لأبوية
58
- غـازي بساع أندار علــيَّ عبالة اني الليّ حچيت عليه! جنت كاعدة اسفط بالحطب نريد نسوي جمرية نشوي عليهن الطيور، أشرتلة براسي مو اني بس شيقنعة بعد .. شبع رزايـل من أمي وأبوية الليّ يتخبلون ولا يشوفون واحد يدخن .. شبعوا رزايل تكفي يضوج بسببهن سنة ليگدام .
6
- إجـة يمي محتقن يعدل بالحطب وشعل النـار ردت أشاقيه گتلة
زُبيــدة: خوب أنتَ شبعت بعد ما تتعشة ويانه
- باوعلي ورد بساع يباوع للجمرية وجهة كاش مِـنْ الحرورة وگال
غازي: ششبعت قنادر؟
زُبيــدة: لا رزايـــل
27
- نزع النعال مِـنْ رجلة ومدة فوك الجمر يگلب بي ثواني وشمرة علــيَّ شهگت من وكع بوجهي
غازي: وأنتِ هذا عشاج نعالات مشوية
75
- مِـنْ القهر شلت النعال اريد اضربة بي
بــس فني و اللّٰــه يشويني هسه ،
احترك گلبي وركعت نعالة بنص الجمر حيل
تناثــرن الجمرات ووحدة منهن ضربت خدة
لان هو قريب عليهن،
كمز مفرفح ينفض بروحة مِـنْ الجمر وأهلي كلهم
ركضولة خاف بي شي وهو يصيح تخبل
عبالك ضاربتة صاروخ،
صابتني رعشة من ألتفت علــيَّ
ومن الخوف ركضت للبيت و3 نعالات اجن بظهري
زلزلن عامودي الفقري لا وكفت ولا التفت
بس اريد اوصل الغرفة طبيتها وقفلت بابها بقدرة قادر
گلبي يركع اقوى مِـنْ ركع غازي للباب ،
كسرة تكسير حسيتة راح يفلشة ويطب يشنقني بالبنكة ،
دفرها حيــل يرعد علــيَّ تحول طنطل مو بشر
غازي: وين تروحين؟ تطلعين اذا ما ملصت أذاناتــج
82
- هم عبالة حرشت عليه وهم حرگتة هسه بجمرة صغيرة لو تخبل، سكاتي مشيت ختلت ورة البردة حتى النفس گطعتة وأسمع أمي تدردم وتحجي علينّا أثنينة
حَفصة: مِـنْ احلف ما تكعدون سوة تكولين يمةةةة ليش تدخلين بيناتنا راح تخلينّا واحد يكره الثاني، مو اني هااااي الأعرفهاااا ما تصيرلكم چـااارة انتوو
31
- بقت تدردم وغازي يحچي علــيَّ ومعن وعادل مشمتين بينّا ويضحكون لما رزلهم خَطاب يلا سكتوا ، صار هدوء وراهـا مادري وين راحوا عبالك البيت فرغ، اجتني لحظة ندم بس مِـنْ أتذكر النعال شلون ركع وجهي يروح شعور النـدم .. ورة شويَّ اندگت الباب
جيـداء: أطلعي ماكو أحد
11
- اني طول هالوكت ورة البردة، مشيت بحذر عبالك الغام جوة رجلي لما وصلت الباب فتحتها ومديت بس راسي احچي بهمس
زُبيــدة: وين راحوا؟
جيـداء: أبوية وخَطاب طلعوا مادري وين، وغـازي كاعد بالحوش
زُبيــدة: أمــي وين ؟
جيـداء: دا تبرد السچين حتى مِـنْ تطلعين تذبحج بيها
27
- بلعت ريگي بخوف وهيَّ ضحكت وأشرتلي أطلع
جيـداء: وجهج صار كركم شجاج، اطلعي اطلعي كاعدة يم ربيع بالمطبخ
4
- مشيت بلاية صوت طلعت مِـنْ باب الهـول على غازي ، كاعد جوة الحايط وصافن بالفراغ وجهة ما يگصة السيف خفت منه و اللّٰــه بس أنقهرت عليه هم منچوي وهم حصل برميل رزايل، كعدت يمة وهو صد وجهة عني، ندستة مِـنْ ذراعة احچي بصوت ناصي
زُبيــدة: راضيني غازي وخلّ نفتح صفحة جديدة
15
- ضرب أيدي حيــل موخرها عنه ونتر بيه
غازي: ولــي مِـنْ يمي لا أشويج بهالچمرية واسويج لفات اوزعها للزايعتهم الگاع
12
زُبيـدة: زين أنطيني وجهك ابوس مكان الحرگ وصالحني
- التفت علــيَّ مستهزأ
غازي: لا عبالج بوستج مرهم؟ كومي أم حلگ الخايس أنتِ اذا تبوسين مكان الحرگ يلتهب ما يطيب
56
- بقيت صافنة بوجهة اريدة يصالحني بس ماعرف شلون، دنگت اسوي روحـي مقهورة وگتلة
زُبيــدة: هو اني لأن ماعشت يمكم ما تحنون علــيَّ مثل أُميمة وجيداء بس اني هم بنتكم شبيكم ويايَّ كلكم تصيحون علــيَّ وتضربوني ولا عبالك منكم
115
- مَـد ايدة گدام وجهي ما متهم لدرامتي وگــال
غازي: بوسي أيدي ونتصاحب
19
- باوعت لأيدة ورفعت عيني اباوع لوجهة
زُبيــدة: عبالك أحْنـا صغار؟ ترا أثنينة مستحقين زيجة واحدنا عمرة عمر تفگة شنو هالسوالف
40
- بقى ماد أيدة گدام وجهي وأشر عليها بعيونة يعني لو تبوسين لو تگومين تمشين مِـنْ يمي ، لزمتها بثنين أديَّة وهو أبتسم عبالة صــدك راح أبوســها! طلعت لساني ولحستها وبساع ركضت منهزمة مِـنْ يمة أضحك وهو گام يصيح لعبانــة روحـــة .. راح يعرج للحوض فتح المي يغسل بيها بالصابونة وانـي واكفة بباب الهول وگتلة
زُبيــدة: غــــديي شو مالـــح ؟
136
- كام يغلط عليه ويدردم ومادري شلون فلتت منه كَفرة ، أمــي مِـنْ سمعتة طلعتلة عيونها بگصتة دنگت شالت النعال وهَـدت عليه تريد تضربة
حَفصة: شو تكفــــر ولك مسربت داااايـــــح؟؟ والله لسمعتك تعيدها لاخلي ابوووك يگص لسانك
72
- هــو أستغفر ودنگ ساكت ، رجعت علــيَّ تدردم
حَفصة: ما تجوزيـــن منه أنتِ؟ مااا تجوزيــــن؟؟؟
- رفعت سلاحها تريد تضربني وهو بساع صاح گاللها
غازي: ما عليهاااا هيَّ
37
- ما صدگت هيَّ بس سكتت وحذرتنّا اذا تشوفنّا سوة بمكان .. رجعت للمطبخ واني باوعت لغازي اسأله بهمس
زُبيــدة: لعد الحمامات وين؟
غـازي: مِـنْ فضت الهوسة لكينّا البزازيــن ماكلاتهن
- ضجت درت وجهي ورجعت للغرفة ، هذن لأن مالات حــرام ما تهنينّا بيهن
28
- لحگني وكف بباب الغرفة يگلي
غازي: تعالي سويلنّا عشة واني اكعد يمج بالمطبخ أشجعج
19
- رحت وياه للمطبخ كعد على جهة ماد رجلة گدامة واني اسوي عشة إلنّا
زُبيــدة: ليش ما تروح للطبيب يشوف رجلك؟
غـازي: لازم يفتحها ينظفها ملتهبة
9
- بقيت أقنع بي يروح وهو يگلي أي بس كافــي واني أرجع ألح عليه لما زهگ وحلف اذا رجعت سألتة ما يبقى كاعد يمي بعد، تعشينّا سوة وهو راح مدد رجلة تشض عليه كوة متحمل وجعها .
9
- اني مددت بفراشي سويت روحي نايمة
من رجـع خَطاب وبدون لا أدري بروحي غفيت
مدري منو شامر علــيَّ بطانية من هاي
الخشنة تچكچك خلت جسمي كله يحكني، ادفرها هوى
المبردة بارد ما أكدر ، تعلعلت نومتي وگمت غصبًا عليه جبت
بطانيتي مددت بفراشي وتغطيت بيها بعدني ما غفيت حسيت
على غـازي گام من فراشة للمطبخ ومن باب المطبخ طلع
للحـوش، توقعت للتواليت ويرجـع بـس طول بقيت كل شويَّ
أفتح عيوني فراشة فارغ! ندهت جيـداء أكعدها
زُبيــدة: اكلج كومي شوفي غازي خاف رجلة بيها شي شو مارجع
20
- سحبت البطانية غطت راسها لابستني، ردت اني هم أنام بس گلبي ما أنطاني وگمت طلعت وراه وصلت للتواليت ماكو، مشيت ورة البيت أدورة بعدني بالعكسة وسمعت الباب الصغيرة أنفتحت وانسدت على كيف بس صوت نفس غازي عالـي، ركضت وويَّ ركضتي هو شمر روحة بالگاع لازم رجلة بثنين أديه ووجهة معصور صاير دم من الوجع، كعدت يمة روحي رايحة وگلبي يخفق بقوة ميتة خوف اهمس
زُبيــدة: غــازي غازي شبييييك؟؟
39
- عض طرف الشماغ الليّ مخلي على راسة وعصر رجلة من الركبة وعاط بصوت مكتوم دا يتعذب من الوجع .. بقيت مادري شسوي روحي فرفحت عليه شكلة ووضعة يخوووف ، گمت من مكاني اريد اركض اكعد أهلي بس لزمني من أيدي مرجعني يمة وهز راسة لا الحچاية كوة تطلع منه
غـازي: أششش لا تحچين
26
- أشرلي على رجلة المورمة يريدني أنزع النعال منها، تقربت اباوع بتركيز ومديت أيدي الترجف اريد انزعة بس شهگت بخوف وحسيت الوجـع بكل جسمي من شفت كزازة نابتة بي وعابرة على رجلة ودا تكت دم!! باوعتلة بصدمة هاي اذا سحبتها حتى نفسه ينگطع من الوجع وهزيت راسي رافضة، بچيت احچي بصوت مخنوگ
زُبيــدة: ما تتحمل غازي توجعك والله توجعك
33
- مد أيدة خلاها ورة راسي وسحبني عليه يهمس بروح رايحة
غـازي: طلعيها ولفيها، والشفتي يموت بيناتنا على حز النحر لا تحچين شي
86
- بقيت أهز راسي رافضة خايفة خايفة مادري شسوي، الوجع صار بيه بس شفتها شلون راح يتحمل، دخيلك ربي دخيلك بس قوة الگلب واكدر اساعدة، طبطب على خدي وگال
غـازي: روحي جيبي وصلة شي تشدينها بيها يلا زُبيــدة أنتِ سباعية
5
- بچيت حيل مخلية أيدي على حلگي حتى لا يطلع صوتي وهو يگلي يلا وتلاحگيني .. رجعت للبيت امشي بلاية صوت وبوجهي على ملابسي أخذت منهن دشداشة وسجين من المطبخ ورجعت، لگيت واكف على حيلة ورافع رجلة ، مخطوف لونه ومادري شيدور جوة هدومة! من سألتة گال
غـازي: أنتظريني هنـا راح أرجع للبستان اني
38
- جلبت بأيدة ما راضية
زُبيــدة: وين تكدر تمشي باااع رجلك شصاااير بيها، دمك يخلص لما تروح وترجع غـازي
3
- نفض أيدة مني يرجف مادري شبي
غازي: لازم أروح زُبيــدة
33
- بقيت لازمتة متعاركة عركة وياه ماريدة يروح ومن شفتة شكد خايف مثل المجرم العايف وراه دليل گتلة
زُبيــدة: گلي شعندك واني أروح وإذا ما تأمن بيه بس أرجع كص لساني حتى لا احچي بس لا تروح وأنتَ بهاي حالتـك
7
- صفن بوجهي ومد أيدة ساندها على جتفي ذاب ثگلة علــيَّ يحچي بصوت ناصي
غـازي: جيس أصفر دوري من يم هذا الباب لحد بداية النهر الليّ بين البستان مالتنّا وبستان بيت شبلي
- هزيت راسي أي، رفع راسة يباوعلي بنظرات زادت خوف گلبي أكثر وأكثر
غـازي: لا ترجعين إلا وهو وياج
180
- هزيت راسي خوش، رجع كعد يم التنور وأشرلي اسحب الكزازة من رجلة، لفيت قماش على أيدي ولزمتها بقوة درت وجهي مغمضة عيوني حيل وادعي يارب منك القوة ، سمعتة همس
غازي: يلا السباعية
- سميت بأسم الله وسحبتها كل قوتي حتى تطلع مرة وحدة، صار يرفس مثل الطير المذبوح بلاية صوت شايغة روحة من الوجع
18
- شمرتها من ايدي ولزمت وجهة بثنين أدية أحس گلبي راح يوكف گبل گلبة
زُبيــدة: غـازي غـازي
- لزم ايدي ضاغط عليها بقوة وضل هيج بين أيدي لما جسمة تبنج من الوجع، وكع راسة بحضني وهو يهمس بصوت متعوب
غـازي: لفيها وروحي بساع
8
- سندت راسة على تنور الطين وكعدت يم رجلة الف بيها على كيفي وبعد كل خطوة ارفع عيني عليه اشوف روحة تطلع وترد مفرفحة ، تغوش عيوني من الدموع التارستها امسحها وترد تغوش متت وياه الف موتة يلا كملتها، رجعت زحفت بالتراب صرت يمة اطبطب على وجهة من غمض عيونة
زُبيــدة: غـازي أفتح عيونك عفية لا تغمضهن
10
- فتح عيونة الطفت وبياضها اتحول بلون الغروب، سحب شماغة من راسة انطانياه وگال
غـازي: أمنت بيج لا تخذليني
58
- حطيتة على راسي وهو كوة رفع أيدة أشر على خشمة يعني تلثمي بي، سحب تلفونة من جيبة رفعة يريد ينطينياه ووكع منه ما بقى بي حيل يحرك حتى روحة .. أخذتة من الگاع حتى أضوي بي گمت اريد أطلع فتحت الباب على كيفي ودرت عيني عليه يباوع ورايَّ ، رجعت عليه سحبت اللثمة عن وجهي بستة من جبينة وطلعت .
55
- امشي بهاي المسافة الگال عليها بحذر وبدون صوت، گلبي سابع جار يسمع نبضة من الخوف! مادري غـازي شمسوي من مصيبة ولا أدري إذا اني گدها وراح أرجــع وبأيدي الجيس الگال عليه!
19
- وصلت حافة النهر هاي أخير نقطة!
فتحت التلفون أضوي على الگاع
تراوالي شي على حافة النهر كعدت بالگاع
مديت أيدي أضوي عليه ،
مركزة بكل حواسي اريد أفتهمة شنو!
بعدني ما شفتة زين وانسحبت من ملابسي،
وكع التلفون من ايدي وويَّ شهگتي أنحطت أيد على حلگي
والسچين على نَحري !!
- يتبــــع ..
