رواية عشق لا يروض الفصل الثالث 3 بقلم حنين محمود
اهلا بكم في مدونة مكتبة حواء نقرأ لكم ونكتب من اجلكم
عشق لا يُروض
الحلقه الثالثه
بقلم حنين محمود إبراهيم
_____________________
رائد: طب اعمل ايه دلوقتي
يامن: مش هينفع ناخده على المستشفى وحد يشوفه بالشكل دا
رائد من التوتر خبط على دركسيون العربيه بعصبيه وقال: ايوا انا مطلوب مني ايه دلوقتي.!!!!! بلاش تعب الاعصاب دا
أدهم: رائد اهدى واطلع على شقتك بسرعه هي اقرب حاجه لينا دلوقتي
بالفعل رائد طلع بالعربيه بسرعه جنونيه لحد ما وصلوا على شقته اللي كانت في مكان راقي
نزل بسرعه وفتح باب العربيه وشال زين
ويامن قفل العربيه وطلع وراه هو وادهم
باب الشقه اتفتح ودخل رائد وحط زين على اقرب كرسي قابلُه
قرب يامن بسرعه وحاول يفوقه بس زين كان في عالم اخر ومش حاسس باي حاجه بتحصل حواليه
راىد كان واقف على اعصابه هو وأدهم
قال يامن: يادي النيله دا شكله شارب بطريقه غبيه.!!!!
منك لله على اللي عملته في نفسك وبتعمله فينا دا يا زين منك لله.!!
رائد بزعيق: كفاااايه..! كفايه بقى هنقعد نتفرج عليه لحد ما يموت مننا.!!!!
يامن ولأول مره رغم انه دكتور جراحه وبيشوف حالات كتيره محدش يتحملها الا انه ما كنش عارف يتصرف ولا يعمل اي حاجه
رائد قرب من زين وشاله وقال: اتصل على مؤمن يجي بسرعه هو اللي هيعرف يتصرف
يامن مكنش سامع رائد وباصص لاخوه بخوف ودموعه بتنزل
رائد زعق فيه وقال: غبييي.!!! مش وقته.!!! قوم وكلم مؤمن يجي يللاااااااا اخوك حالته بتسوء
يامن بدموع: طب.. طب انت واخده على فين
رائد وهو ماشي تجاه الحمام هحطه تحت الدش عشان يفوق لحد ما مؤمن يوصل
أدهم كان واقف عاجز عن الكلام وبيتفرج على عياله وهما بيضيعوا منه
بالفعل دخل رائد الحمام وحط زين في البانيو وفتح الدش على المايه الساقعه
في الاول سمع صوت شهقه قويه خارجه من زين بس بعد كدا.......
________________________________
عند نيروز دخلت احدى الحواري الشعبيه بالقاهره وصلت قدام البيت وطلعت
خبطت على الباب وفتحت منال مامتها
نيروز: هيييح اخيرًا وصلتتت وسعي كدا ياوليه عشان خلاص جبت اخري الشمس اكلت نفوخي
منال: استني عندك يابت انتي داخله بالكوتش؟
نيروز: احم نسيت وربنا
رجعت خطوتين لورا وقلعته وحدفته على الارض بإهمال ودخلت وقفلت الباب وراها
.
منال: رايحه فين.؟
نيروز: الله هو ايه اللي رايحه فين يا ماما اكيد داخله انام يعني
منال: اترزعي يابت احمد جاي وعاوز يشوفك
نيروز نفخت بضيق وقالت: ييي هو انا موارييش غير احمد دا.! انا تعبت وانا بقولكم مش عاوزاه والله ما عاوزاه يا ماما
منال: اسكتي يابت قطم رقبتك ومن امتى عندنا بنات بتقول اه او لا وبعدين دا خطيبك ولا ناسيه تحبي افكرك؟؟؟
خلصت كلامها وبصت لإديها ملقيتش الدبل قالت بعصبيه: فين الدبل يابت انا مش محرجه عليكي الف مره ما تتشالش من ايدك؟
نيروز: ياستي انا مش عاوزه البسهم انا حره الله
منال قربت منها ولسه هتضربها بالقلم مسك ياسين اديها وقال:
بردو تاني يا ماما هتمدي ايدك عليها.!
منال: وسع من وشي السعادي يا ياسين البت دي ناقصه ربايه
ياسين: ماما بعد اذنك عاوزك لوحدنا
منال: قولتلك وسع من وشي يا ياسين
ياسين بإصرار: وانا بقولك بعد اذنك عاوزك يا ماما
منال: ماشي يا ياسين جايه معاك واما نشوف اخرتها وانتي يا مقصوفة الرقبه تدخلي تستحمي وتجهزي عشان احمد زمانه على وصول
ومش هكرر كلامي تاني ووالله يا نيروز وما ليكي عليا حلفان اي حركه زباله من بتوعك دول لهضربك علقه تحلفي بيها طول حياتك
ياسين بضيق: يلا يا ماما.!!!!
مشيت معاه منال ودخلوا اوضته
قال ياسين: ماما انا وافقت ان احمد يخطب نيروز دا عشان اصرارك وانا مش بحب ازعلك لكن بنتك رفضاه من جميع الاتجاهات ايه هندفنها بالحيا معاه.!!!
منال: الله الله انت هتمشي على عوم اختك ياواد انت كمان ولا ايه؟
ياسين: يا ماما يا حبيبتي افهميني بنتك مش بضاعه بنبيعها بنتك الف من يتمناها ليه احنا ندفنها مع شخص هي بتعتبره اخوها ليه ؟!
منال: وانا اديت كلمه لخالتك ومش هرجع فيها يا ابن بطني
ياسين ضغط على سنانه وقال:
حتى لو هتتعذب العمر كله؟!
منال بعصبيه:
تتعذب ايه ياخويا هو احمد عيبان ولا ناقصه حاجه؟ دا راجل محترم وابن ناس وبيحبها والاهم من كل دا انه ابن خالتها والقريب اولى من الغريب
ياسين:
بيحبها لوحده يا ماما! انما هي لا طايقاه ولا شايفاه غير اخوها.!! افهمي بقى انتي كدا هتضيعي بنتك ب ايدك
ومتنسيش انه مش ابنها مش عشان هي اللي مربياه بقى ابنها ها
منال ضربت على رجليها بعصبيه وقالت:
وهتحبه بعد الجواز غصب عنها عادي كلنا اتجوزنا كدا ولا انت عاوزني اسيبها لمياعة البنات بتاعت اليومين دول والحب والارتباط والكلام الخيبان دا مفيش احسن من اصول زمان
ياسين :
لا يا ماما مش عادي مش طبيعي واحده تعيش عمرها كله مجبوره عليها جوازه هي مش عاوزاها.!
وبعدين انا ما قولتش انها هترتبط وتعمل زي البنات بس بنتك من حقها تختار شريك حياتها.
انا لما وافقت ومشيت ورا كلامك قولت يمكن احمد يقدر يخليها تحبُه بعد ما يخطبها
لكن بنتك مش قادره تشوفه غير اخوها وانا مش هغصبها على حاجه تفضل بقيت عمرها تدعي علينا بسببها يا امي مع احترامي ليكي
منال:
وهو انت بعد كلامك دا خليت فيها مع احترامي ليكي يا امي.!؟ عمومًا الكلام خلص يا ياسين والجوازه دي هتتم يعني هتتم
ياسين قام وقف وقال بضيق:
طيب ولما تهرب من البيت؟ لما تكرهكم كلكم؟ هتعملي ايه وقتها؟! هتفرحي ب ابن اختك مش كدا؟!؟ لما بنتك نفسيتها تدمر وقتها هتعيشي مبسوطه صح.!
منال قامت هي كمان وقالت:
نيروز متقدرش تعملها ولو عملتها اقطع رقبتها فيها مالك ياواد بقيت خيبان وماشي على عوم اختك كدا ليه.!؟
اظبط يلا.!! عيني على الرجاله صحيح ماتت في الحرب على رأي المثل وبعدين ان مكنتش انت تخاف على عرضك مين هيخاف عليه
ياسين: ايه ما اخافش على عرضي دي انتي شايفاني مركب ارايل وسايبها ماشيه تكلم في دا ودا ولا ايه مش فاهم.!؟
منال وهي بتمصمص شفايفها: لا يا حبيبي ولا حاجه عاوز تمشي ورا كلام البنات الخيبان بتاع اليومين دول والله الله يرحم ابوك كان يقول الكلمه ما يعدهاش تاني مش عارفه انت طالع خايب لمين
بصلها بضيق من تفكيرها وقبل ما يتكلم الجرز رن
منال عدلت طرحتها بسرعه وقالت:
أكيد احمد وصل وسع كدا ياواد اما اروح افتحلُه
خرجت بسرعه من الأوضه بسرعه بينما ياسين طلع وراها بضيق
في الصاله
كان احمد واقف لابس قميص أسود وفي إيده علبة شيكولاتة كبيره أول ما شاف منال ابتسم وقال:
ازيك ياخالتي اخبارك ايه
منال بابتسامه واسعه:
حبيبي يا احمد اتفضل اتفضل نورت البيت ياقلب خالتك
دخل احمد وهو بيدور بعنيه على نيروز وقال:
امال نيروز فين؟
منال:
بتجهز جوه يا حبيبي عشانك
قال ياسين بضيق:
ازيك يا احمد نورت
احمد ضحك بتوتر وقال:
ازيك يا ياسين عامل ايه
ياسين ببرود: انا تمام الحمدلله اتفضل اقعد تشرب ايه
أحمد: لا انا هتغدى معاكم خالتي عزمتني على الغدى
ياسين بص لأمه بضيق وهي ضحكت بتوتر
في نفس الوقت
كانت نيروز واقفه قدام المرايه بعد ما غسلت وشها عنيها حمرا من العياط وباصه لنفسها بكسره في المرايه
سمعت صوت ضحكاتهم بره
قفلت عينيها بضيق وهمست لنفسها:
يارب خلصني من الجوازه دي يارب والنبي..!!
الباب خبط مسحت دموعها بسرعه وقالت: ادخل
دخل ياسين وقفل وراه الباب شافها واقفه قدام المرايه بتحاول تداري دموعها
قرب منها ووقف وراها ولفها ليه وحضنها بحنان وقال:
ممكن اعرف اميرتي الصغيره بتعيط ليه.!؟
نيروز اكنها ما صدقت ودموعها نزلت تاني حضنته بكل قوتها وقالت:
انا مش عاوزه اتجوز احمد يا ياسين عشان خاطري بلاش والله هموت نفسي ارحم من اني اتجوزه مش بحبه والله ما بحبه.!!!
ياسين مسح على راسها بحنان وقال: ششش اهدي وبعدين بس الكلام العبيط بتاعك دا.!
نيروز: بالله عليك يا ياسين ما تسمع كلام ماما.. ووو بص انا اتقبلت في الشركه وهشتغل واصرف على نفسي ولو حكمت اني اعيش لوحدي والله هأجر اوضه واقعد فيها لوحدي ارحم من اني اتجوز احمد
ياسين صُعق من الكلام اللي بيسمعُه خرجها من حُضنه ومسك وشها ب ايده وقال:
أحمد عملك حاجه يا نيروز صح؟
نيروز بدموع: ياسين عشان خاطري قول اي حاجه بس مش عاوزه اقابلُه
ياسين بزعيق: ردي عليا يا نيروز احمد عملك حاجه.!!!!!!!
نيروز تعالت شهقاتها ومردتش عليه اما هو الغضب عماه لدرجة انه كان مستعد يخرج يقتل احمد
مره واحده بعد عنها وخرج على بره و......
_______________________________
في شقة رائد بعد ما حط زين تحت الدش
في الاول سمع صوت شهقه قويه خارجه من زين بس بعد كدا بدأ يتدارك الي بيحصل حواليه
قام وقف بعصبيه ولسه هيخرج من البانيو قرب منه رائد بسرعه ولزقه في الحيطه لدرجة ان المايه كانت بتنزل عليهم هما الاتنين
قال زين وكان لسانه لسه تقيل اثر الشرب: ابعد عني.!!!!!
رائد مردش عليه وكان مثبته بس تحت المايه عشان حرارته كانت لسه منزلتش
اما زين كان جسمه بيرتجف حاول يزق ايد رائد من عليه بس مكنش قادر حاول يزعق وقال: قولتلك ابعد عني.!!
رائد: مش عاوز اسمع حرف زياده منك.!
زين كان بيتنفس بعنف وعنيه حمرا من أثر الشرب والغضب
حاول يبعد رائد عنه وهو بيقول بصوت متقطع:
ملكش دعوه بيا سيبني امشي من هنا.!!
رائد قرب منه أكتر وقال بحده:
تمشي تروح فين وانت مش شايف قدامك أصلًا؟!
زين ضحك بسخريه وقال:
وانت مالك؟ من امتى وانت فارق معاك حد غير نفسك يا رائد؟!
ملامح رائد اتشدت بقوه لكن مردش
أما زين ف بصله بوجع مكبوت وقال:
فاكر نفسك لما تجيبني هنا وتفتح عليا المايه تبقى عملت بطوله.!؟
ولا كدا اخدت الشو قدامهم انك الاخ الطيب الحنين اللي خايف على مصلحة الكل وانا اللي ابن ميتين كلب وصايع ومش نافع!؟
رائد جز على سنانه وقال:
انا جبتك هنا عشان لو كنت سبتك بالحاله دي كنت زمانك مرمي في الشارع
زين زقه بكل قوته المرادي وقدر يبعده خطوه وقال بزعيق:
وانت ايه دخلك بيااا؟! قولتلك مليون مره ابعد عن حياتي كام مره اقولك ملكش داعوه بتصرفاتي ولا عُدت عاوز اشوف وشك انت ولا اخوك تاني...!!
رائد بصله للحظات بصمت
وبعد كدا قال بهدوء عكس الغضب اللي جواه:
لو كنت فعلاً عاوزني ابعد مكنتش اتصلت بيا امبارح الساعه ٣ الفجر وانت سكران
زين اتجمد مكانه
رائد كمل وهو باصصله بثبات:
ولا فاكر اني نسيت كلامك؟
زين لف وشه بسرعه وقال بتوتر:
انا مكنتش واعي
رائد ضحك بسخريه وقال:
لا يا خفيف كنت واعي اوي ولو مكنتش واعي مكنتش قولت كلامك بتاع امبارح دا
في الوقت دا كان الهدوء هو السائد العام في المكان ومكنش فيه غير
صوت المايه بس اللي مالي الحمام
زين بلع ريقه بتوتر وحاول يعدي من جنبه لكن رجله خانته فجأه
رائد مسكه بسرعه قبل ما يقع ف زعق زين بعصبيه:
متلمسنيش.!
رائد انفجر فيه:
كفااايه بقى يا غبي! انت بتموت نفسك بالبطيء ومش عاوز حد يكلمك.!!!!؟!
زين بصله بعين مهزوزه وقال بصوت مكسور لأول مره:
وانت فاكرني مش تعبت؟ فاكرني مبقتش خلاص مش قادر؟
رائد ملامحه اتشدت من كلامه وقرب منه بهدوء وقال:
طيب ليه بتأذي نفسك بالشكل دا؟
زين :
عشان مفيش حاجه بتسكت اللي جوايا غير الشرب مفيش حاجه بتفصلني عن العالم غير الشرب مفيش حاجه بتنسيني قهري غير الشرب.!!
رائد بصله للحظات طويله
وبعدين مد إيده قفل المايه وبص لجسم زين اللي لسه بيرتجف من البرد
مدله ايده وقال: تعالى
زين: سيبني في حالي بقى معدتش عاوز مساعدات من حد
رائد مسكه غصب عنه وخرجه معاه وقعده على اقرب كرسي
قرب منه يامن بسرعه عشان يشوف درجة حرارته
زبن: ابعد عني مش عاوز حد يلمسني
أدهم بحده : زييين.!!!!
زين بص اتجاه الصوت وضحك بقهر وقال: الله دا انتو كلكم هنا.!
أدهم: ايه كنت مستنينا نسيبك اما تموت مش كدا؟
زين: وانت من امتى كنت تعرف عني حاجه اصلا؟ انت بالإسم ابويا وبس لكن بالافعال انا ابويا ميت وجودك شبه قِلِتُه
تعرف انا عايش ولا ميت؟ تعرف تعبان ولا كويس تعرف حتى انا ببقى قاعد فين؟
ولا بيشغلك كل دا بتيجي ترميلنا القرشين وتمشي انت دمرتنا انت السبب في كل حاجه انا فيها.!!
مشيت في الطريق الوسخ دا بسببك ومش عاوز ارجع تاني
أذتني كتير وحتى البنت الوحيده اللي حبيتها رفضت اني اتجوزها وكل دا ليه عشان مستواها مش نفس مستوانا
ضحك بسخريه وكمل: ما اه صحيح أدهم باشا المغربي ما ينفعش يناسب ناس غير من نفس مستواه.!!!
عشان الناس متتكلمش عليه لكن عيالُه يولعوا بأوسخ جاز قُدامهم
انت اكتر انسان اناني انا شوفته في حياتي مش بتفكر غير في نفسك وفلوسك وبس.!!!
ما همكش اي حاجه غير ان الناس متتكلمش على رجل الاعمال ادهم المغربي ازاي عيل من عياله يتجوز واحده من حاره شعبيه
طب ما فكرتش في مشاعري.! مفكرتش في قلبي اللي طعنتي فيه بسكينه تِلمَه.! مفكرتش هبقى عامل ازاي وانا شايفها بتضيع مني.!
انت ما فكرتش في اي حاجه غير في نفسك وبس.!!!!
أدهم كان واقف ساكت بيسمع وبس لأول مره يشوف ابنه بالحاله دي
أما زين قام وقف قدامه بعين حمرا مليانه قهر ووجع سنين
يامن بص لزين وقال:
زين كفايه كدا انت تعبان دلوقتي مش وقت الكلام دا.!
زين زعق فيه بعنف:
لااا دا وقته... ووقته اوي كمان!
خليه يسمع بقى يسمع اللي عمره ما حاول يسمعه
بص لأدهم وكمل بصوت مهزوز:
انت فاكر الفلوس هتعوض كل حاجه؟
فاكر لما رميتني في مدارس انترناشونال وعيشتني وسط ناس عمري ما شبهتهم كدا بقيت أب كويس
عمرك حضنتني؟
عمرك سألتني ناقصني ايه؟
عمرك قعدت تسمعني من غير ما تبص للموبايل ولا للشغل؟
انا كنت كل يوم بموت واحده واحده وانت ولا كنت شايف غير نفسك ياباشا.!
وفجأه مسك طرف التيشيرت بتاعه بعصبيه وقال:
شايف الخراب دا؟!
انت السبب فيه
رائد قرب من زين بسرعه ومسكه خوفًا من ان أدهم يضربُه وقال بهدوء:
زين كفايه عشان خاطري كفايه كدا.!!
لكن زين زقه بعنف وقال:
ابعد انت كمان!
كلكم شبه بعض كلكم اوساخ
ايه لسه فاكرين ان ليكم اخ تسألوا عليه ههههههه
بعد ايه؟
بعد ما بقيت مدمن؟
بعد ما بقيت كل يوم بصحى بتنشق على الشرب عشان اعرف أتنفس؟
أدهم :
خلصت اللي عندك؟
زين بصله بكره وقال:
انا بكرهك يا ادهم بكرهك كُره عمرك ما هتتخيلُه
الكلمه نزلت عليهم كلهم كأنها صفعه قويه
ادهم قور قبضت ايده وضرب زين قلم سمع في المكان كُلُه لدرجة ان توازن زين اختل وكان هيقع
بس رائد مسكُه بسرعه
زين كان واقف بصدمه مش مستوعب اللي حصل اما يامن قال: ايه اللي انت عملته دا يابابا.!
أدهم: عملت اللي كان لازم يحصل من الاول الظاهر اني دلعتكم كتير ولازم تتربوا
رائد: انت كدا مرتاح صح.!! كدا انت تمام يعني.!؟ حرام عليك يا اخي اللي وصلتنا ليه دا وكمان مش عاجبك اما جاب اخره واتكلم.!!
زين بعد عنهم بسرعه ونزل على تحت
رائد ويامن زعقوا بصدمه وقالوا: زييين انت رايح فين
لكن زين ما كنش بيرد على حد فيهم نزل وهو شبه مش شايف قدامه من كتر الدموع والعصبيه
أما رائد ف جري وراه وهو بيزعق: زييين استنى عندك بقولك.!!
لكن زين مكانش سامع لحد
نزل بسرعه ووقف أول تاكسي شافه وركب فيه وقال بصوت مهزوز: امشي امشي بسرعه
سواق التاكسي استغرب حالته لكنه اتحرك فعلًا
وقال: على فين يابيه؟
زين بصله بتوهان وبعدين قال: على كورنيش النيل
في نفس اللحظه نزل رائد ويامن جري ناحية العربيه
يامن فتح الباب بسرعه وقال: الحقه يا رائد بسرعه.!!
رائد ركب ودور العربيه بعنف ولسه هيتحرك
وصل مؤمن ونزل من عربيته بسرعه لما شافهم نازلين بيجروا وبيركبوا العربيه
قرب منهم بسرعه وقال: في ايه مالكم بتجروا كدا لييه؟!
يامن قال بسرعه وهو بيقفل الباب: هكلمك في الطريق يا مؤمن
وانطلقت عربية رائد بسرعه جنونيه عشان يلحق التاكسي
أما أدهم ف نزل بعدهم بص لمؤمن وقال: يلا وراهم
ركبوا العربيه بسرعه ومؤمن طلع موبايله واتصل بيامن
في عربية رائد
كان رائد سايق بعصبيه وعنيه على التاكسي اللي قدامهم
أما يامن ف قال بقلق: هو رايح فين ؟!
رن فون يامن وكان مؤمن رد عليه وقال مؤمن بقلق: في ايه يا ابني انا مش فاهم حاجه قلقتوني
يامن: زين اتخانق مع بابا ونزل ومنعرفش رايح فين ولو سيبناه هيعمل حاجه في نفسه ف بنحاول نلحقه دلوقتي
مؤمن: لا الله الا الله طب انتو فين دلوقتي
يامن: مش عارف هو رايح على فين بالظبط لحد دلوقتي احنا ماشيين وراه هبعتلك live Location امشي عليه
مؤمن: تمام ماشي
في نفس الوقت
كان زين باصص من شباك التاكسي
غمض عينيه بألم شديد وهو حاسس إن راسُه هتنفجر من كم الألم اللي كان حاسس بيه
بعد فتره وقف التاكسي عند كورنيش النيل
نزل زين ببطء وطلع فلوس لسواق التاكسي وادهاله بدون ما يبصله
السواق قال بقلق: يا ابني انت كويس؟
زين بصلُه بعينه الحمره ومردش عليه
وقف قدام النيل وبص للمايه وعنيه مليانه دموع
في اللحظه دي
وصلت عربية رائد بسرعه وصوت فراملها دوت في المكان
نزل رائد ويامن جريوا عليه
لكنهم اتجمدوا مكانهم لما شافوا زين طالع فوق سور الكورنيش
يتبع.....
