رواية عرين الصياد الفصل الثالث 3 بقلم شذرة العدوان

يحطك الله بالنال عمو الجذاب وتگرط جزر ومكشره …

ليال: -يا گاع انشگي وبلعيني حطينه ادينه على اثمنه اني وديالا من الفشله

واستاذ صائب خطيه شحب لونه گام يبلع رياگه وصد بصفحه ويحگ براسه ظل مثل بلاع الموس لا يگدر يگول جذب ولا يگدر يگول صحيح

ديالا :

عاد اني بحضن ابويه وجان اشاوره گتله جذب من نروح عالبيت احجيلك.مگدر يم.ام العلوم.

ابتسم وجان يبوس راسي

وشد عليه بالحضن

ابويه گال اي وانت صادگ ليال ذيبتي ادري بيها ترفع راس ابوها

ليال: -بادلت ابويه الحضن وبست صدره

ديالا:

صديت على ابويه واني رافع حواجبي احم شونك حجي اني ديالا بنت الجيران خاف ما شفتوني

استاذ صائب ضحك وصفگ بيده وابويه شد عليه بالحضن وباسني بخدي ويضحك گالي الما يشوفج يسمعج ام اللسان

ديالا: - والله لا سمعتو ولا شفتو استاذ صائب يمدح بليال وانته تگول ذيبتي عجل واني شنو البطه السوده

گالي انتي لبوتي

ليال: طلعتلها الساني ااممم غواره وجان تعيبلي وبحرگه شفايفها وتميل بجتفها وتغمز بحواجبها گالت واني لبوه

ديالا: - استاذ صائب گال والنعم من ديالا وليال الذيبه واللبوه

من يمهن لا تسأل بس الضيم ضيم يملا درويش ويأشر على جوانه بحواجبه هذا مو اللسان عثره

ابويه ضحك بصوت عالي الا شخط وگام يگح وجان نطبطب على ضهره اني وليال گله مشكلتك انته سلجتهم وانته تكفلتهم هاي اخذ بعد

استاذ صائب حط ايده على راسه

جوانه ملتهيه تگرط جزر منگدر نجيب اسمها تزعل

ابويه ناده الفلاح گاله روح جيب خضراوات للأستاذ واخذهم ويا لبيته

استاذ صائب گال زحمه ملا ميحتاج عدنه

وجان تگول جوانه توك گلت عدهم خضله ( خضره)وما ينطونه نحسين

استاذ صائب تفشل وصد بصفحه ويعض بشفته خطيه

وهاي انفلتت وكملت اي وگلت يزلعون لواحة اوادم وما ينطون

ابويه ضحك ولزم خاصرته كافي ام اللسان

وجان استاذ صائب اشر على اثمه يعني اليوم اكلج وعض اصبعه وتروح تركض تغبه وره ابويه وتوايج

بتك عين

ديالا - ابويه گاله الخير جثير يابه خيرات الله. بس والله ما عندي احد ادزه كلمن بشغله وحگك علينه تاخذه مربع اجو الفلاحين جايبين خضراوات من كل نوع صندوگ خلاهن بالعربانه مال الحصان

وراحو ويه استاذ صائب

تشكر من عدنه وصعد بالعربانه ويعض اصبعه لجوانه

ويتوعدلها

ليال :- اجت مهره راكبه الفرس جايبه غده للفلاحين تارسه الخرج ترس

گضبت رجلها وهيه عالفرس وبعبره دخيلج انقذيني ميته جوع گالت شنطيج اگوم افلهن هسع ذاك البيت خطوه

ليال: - زين لو بس خبزه سويها لله

انطتني خبزه اخذتها ورحت اسوي لفات جزر وخس واكل

مهره :شونك يابه هله مهرتي هله يالله بنيتي ودي غده العمال جاعو وانا ابوج

مهره :اي يابه تبشر

وانطلقت بالفرس الي ما تقل عنها رشاقه تمشي عالمرز بين الزرع توزع الأكل للفلاحين

ديالا :-ابويه لزم جوانه مردها مرد يبوس بيها ودغدغها وهاي تضحك شالها على رگبته رجعنه للبيت مسافه

گربنه من البيت ونسمع العيطه

أبويه ذب جوانه واني ذبيت كتبي ونروح نركض

ونلگه. أمل وهاجر مناتف من الشعر ناس تملخ بناس

ابويه صاح بيهن

وجان يهدن وكل وحده تلم بشعرها وتعدل بنفسها

ابويه تعصب عيونه صارت تجدح نار

كلشي ولا يطلع حس مره خارج البيت وأحنه عدنه فلح بالمزرعه يروحون ويردون

گامن يبلعن برياگهن هاجر مدنگه وتفرگ بديها گالت عمي اني ابويه قاطعها وما انطاهن مجال يحجن

لزم سبحته وعصرها وأشر عليهن گال مالي حجي وياجن يجون الرابطيجن واشوف وراد يفوت لغرفته

گالت هاجر عمي والله أمل تعيل

ابويه التفت عليها بدون ما يحجي

أمل جاوبت لا والله يعمي هيه تعيل بيه تعيرني الزرگه والعجوز وگامت تبجي وثنت على رگبها

اني شنو ذنبي عمي شنو ذنبي

الله خلقني سمره ومو.حلوه ومحد اخذني اي عمتي صبره مشت عليه لعماد واني ولا ابالي شو جابتني هين وهدت عليه جنتها تعيرني بشكلي عبن عماد احلى مني وتعيرني عبن اكبر من عماد يعمي من اخذتوني لليوم شفتو مني العيبه

هاجر مدنگه وتعصر بأديها وتبلع رياگها

أمل كملت گالت اني افتهم مشكلة عمتي ويايه بس هاجر ليش معاديتني شسويتلها

ابويه يهز براسه ولازم سبحته بإدينه ثنين

گال عماتجن وين أمل مسحت دموعها گالت عمه صبره راحت لهلها عمي جاي من السفر ودزو عليها تطبخ ليش ما گلج حميد بلغنه يعلمك

گال لا ما شفته هذا خلفتي زياده من الله والحمد لله على كل عطايا

أمل وعمه معاضد راحت تغدي الخيول

ابويه گال خير ان شاء الله وراح لغرفته

ديالا -: گصت گلبي أمل خطيه صحيح مو حلوه بس گلبها طيب احسن من هاجر الجامده الي محد عرف عداوتها ويه أمل شنو التفت تاحجي ويه ليال ماكو اسم الله ختفت

تلفتت هاي وينها دورت بالحجره ماكو بدلت وحليت شعري ودلكت راسي وطلعت

رحت عالمطبخ لگيت ليال متربعه بالگاع بملابس المدرسه اول مره صدگ الجوع كافر وحاطه اكل وتاكل بشراهه مثل الهمج وتعلس خضراوات

گتلها شنو مابيج صبر تلتم العائله دحگتلي ولا صدت ولا ردت

ليال :طبيت البيت وما همني أمل وهاجر عسما ناس تخلص ناس شنو الجديد رحت عالمطبخ اكشف الجداري همزين مسويات غده اووف

لحم على مرگة شجيج (باميه يابسه )وتمن جبت ماعون جبير واترسه واحط لحم واگعد اكل

اهم شي بهالدنيا معدتي وتجي البطرانه تگلي العائله

ما تدري مستعده ابدل أمل وهاجر بجدر باميه

گلتلها تعاي اكلي واشبعي قبل لا تجي مهره

ديالا :عوجت اثمي ليش عود

ليال شبيج نسيتي المعركه مال المدرسه وجوانه الخبر العاجل

ديالا: حطيت ايدي على حنجي اي والله نسيت تربعت يمها وگمت الف واكل تحسباً خاف تهجم مهره نكون شبعانين ونسوي نفسنه زعلنه وما تغدينه ضربت ليال على راسها

ليال :-اااخ شبيج

ديالا :احجي واللگمه بحلگي والله ذكيه صايره وجان تضحك ورجعت تثرم شبعنه وجلفنه الماعون بساع وغسلنه وراحت ليال تبدل واني زعم انتظر تلتم العائله المتحابه

ليال: سبحت لبست بجامه وبلوز احمر من حياكة وتطريز امي واخذت قميصي المشگوگ ضميته

ليما اخيطه وغسلت هدومي وصعدت عالسطح انشف شعري واشر الملابس الشمس تصگع فوگ امشي وادندن بأغنيه بشار يا بشار هيا الى العمل گملت الملابس

وگلبت شعري وانفض رفعت راسي

وجان اشوف مهره اجت حدرت من الفرس وجان تربطه بمكانه يم النخله مال باب السياج ولتفتت يمين يسار ماكو احد طلعت ورقه من صدرها وجاي تقرا

ديالا :دورت ليال بالحجره ماكو عرفت صعدت للسطح لحگتها واشوفها مجلبه بالستاره وتراقب مدري بمنو مشيت على كيفي تشوف وصلت يمها وشفتها ادحگ على مهره لازمه ورقه وتقرا شاورتها شتسوين

جفلت وجان تنزل راسي گالت اسكتي لا تشوفج

بصوت ناصي گلتلها شكو

ليال: بس اصبري نفتهم

ديالا گمت ادحگ وياهه تافهم السالفه وشفت مهره تقرا وتبتسم ومن خلصت باست الورقه وشمتها وجان تطبگها وترجعها بصدرها وتمشي وتضحك لروحها وتحط ايدها على گلبها هاي شبيها وترفع راسها للسماء بتوسل

ظلينه اني وليال وحده ادحگ على وحده وثنينه وبحركتنه المعتاده رفعنه كتوفنه وقوسنه اثمنه بمعنى منعرف

ليال: نشفت شعري يبسته ما امشطه وهو منگع يتگطع

اخلي من ينشف واحط زيت زيتون مخلوط بي بذور الرشاد تخلي الشعر حرير

مشطت وديالا لفتلي شعري بكيتاره وحدرنه جوه

شفنه مهره گاعده مرتاكه عالحايط ماده رجل والثانيه مثنيتها وجوانه لابسه ملفع امي و شايله لفة يمها تعلس وتحجي ومهره عاگده الحواجب وتسمعلها بلعت ريگي احس عطشت

دحگت على ديالا هم وجها شحب

ديالا :من شفت جوانه مگابله مهره گلت معد ينفع انكار

خل استعمل اسلوب جوانه لصالحي

رحت لمهره. بساع مهره مهره

صدا عليه بدون ما تحجي

گلتلها ما شفتي اليوم شصار

هزت راسها خير

گتلها تخسين جنت بالصف واسمع العيطه

واطلع ويه الطلاب تشوف شكو والگالج الطالبات واگعات دگ كتل بساره بنت حميده

واني شالتني الغيره خطيه هم تظل بنت جيرانه واروح افزعلها واحاجز بينهم يبو ويفزع اخوها وتعلگ بين الكبار شحجيلج تاحجيلج يمهره گوه حجزنه بينهم واصفگ بيدي

وسعد اكل كتله من استاذ صائب هوه ومهدي احجي وهيه ادحگلي ومقلصه عيونها جنها ما مصدگه

گالت اي واستاذ صائب عش مرزلكم وكاتلكم وليال عش تبجي

ديالا: ههه غير عيونها انترسن اتراب خطيه واستاذ صائب رزلنه گال شعليجن لا تفازعن احنه نتصرف عاد من طلعنه وجان تسأله ام الجوج وهوه حب يشاقي گال كتلتهن عبن مو كاتبات مو صح جوجو وجان اگرصها من خدها

گالت اي صح

مهره فركت ركبتها الي مثنيتها بملل وصدت گالت ميلام صائب شعليجن بعد ممنوع تحطن نفسجن تره والله اذا اسمع شي ابطلجن واخليجن تحشن وتفلحن كلامي مفهوم گنالها مفهوم گالت خوش عجل اگوم اسبح فحانه مشت وهيه تمط بضهرها

من راحت واجلب بجوانه گتلها ليش تسوين علوم

جوانه: - ما سويت

ديالا :-جذابه مو گلج استاذ صائب الله يشوفج من تسوين نميمه وعلوم

جوانه :- لا ما يشوفني لبست ملفع امي

ديالا: -فتحت اثمي وعيوني مدري اضحك مدري ابجي

فززتني ضحكه ليال بصوت عالي

ليال :-جنت حيل معصبه بس من گالت جوانه الله ما يشوفني لبست ملفع امي وگعت بالگاع اضحك

وديالابعدها مصدومه

ديالا :- عفتها وگمت شسوي رحنه صلينه الضهر وصارت الساعه بالوحده واخوانه ماكو همزين اكلنه اني وليال طلعنه بالطرمه گعدنه نكتب ونقرا

اجه ابويه سابح وينشف بشعره ومثل كل نوبه نتكاون اني وليال منو تمشط لأبويه

اجه گعد واحنه وحده ادفع بوحده تناخذ المشط نمشطله وابويه يضحك گال كل وحده تمشط شوي فضني

ليال :اخذت المشط اني اول شي وانشف بشعر ابويه گاعد وشعره داگ بالگاع من طوله اسود وبي شيب احلى من شعري اي والله احلى

ثخين وقوي امشط ومبتسمه عود كل الدراويش الشفتهم بالذكر مال طهور ابن اخو صبره شعرهم يخبل حت عماد شعره حلو حد كتوفه مستمره امشط لحد ما ديالا خمط المشط ودفعتني گالت وخري اجه دوري شالتني شيل عيبتلها ورحت اقرا

ديالا: - افقد على شعر ابويه امنيتي يظل گاعد وامشطله وانوب اني شعري حد كتوفي اغار من شعر ابويه عماد النحس ما يخلي بس ليال تمشطله امشط امشط ابويه گال كافي يابه لفنه وانطني الغتره

ديالا :- بس شويه يابه عفيه

وابويه يضحك

اجت جوانه لابسه ملفع أمي يسحل عليها شافها ابويه فتحلها حضنه وجيتت بي گاللها هاا يسبعتي اليوم متحجبه گالت صلت مله (صرت مره ) وگامت اجر بلحية ابويه وتلعب بشعره وابويه يغنيلها يمه البنات ميه واگول گليلات

ليال: تفطنت ملابسي فوگ هسع يذرگ عليهن العصفور مثل ذيج النوبه ورحت بساع تشوفهن

صعدت درجتين وسمعت هاجر تبجي وتخابر عالأرضي تگول والله اذا ما اطين عيشتها فلا اتسما هاجر اي خيه اي دمرتني وحطمتني وبلتني بالشين والزين راح مني اخ يا نار گلبي گالت بعدين نحجي هسع يجون اروح اصبلهم غده سدته وطلعت تمش بدموعها رحت وما خليتها تشوفني غلست اصلاً شفتهمت اهم شي ملابسي

يمه لگيت الذبانه على قميصي ردت اكتلها بالعصا وما لگفتها مسحت قميصي بعده ما ناشف

جلبت برداني وگمت افر وارگص وادندن

وشفت ابن الجيران سنان راجع من السگي وحاط الكرك على جتفه

طريق بيتهم وره بيتنا شلت حصوه واطلگها عليه وتغبيت وگعت بجتفه وجان يتلفت وگف يدحگ وينادي منو واني متغبيه وساده اثمي واضحك

گال اعرفجن لو ليال لو ديالا المخبله رفعت راسي

گتله هاي اني شونك گال هله عرفتج ساحبه خط خبال من ديالا ليش تطلگين لو تردين تفگسين عيني اشلع عينج مكانها

گتله عاد من حورهن عيونك

وجان يشيل طارف شماغه ويمسح عيونه ويتفيك ويجر بيهن يگول شط،العرب عيوني

نبت الكرك بالگاع وجتف ادينه عالربد مال الكرك (عصا المجراف ) ويمسح وجهه بالشماغ گال الخبله وينها

گتله ديالا جوه يم ابويه تقرا

سنان: اي شونجن بالدراسه

ليال :- رفعت جتف واحد وبثقه گتله زينات

سنان -: ايباخ تفيكي ليش ما تفيكين خلفله على استاذ صائب جان انتن هسع مثل مهره كل وحده راكبتلها خيل

ليال -: حطيت اديني عالستاره مال السطح ورجيت راسي على اديني ونعست عيوني گتله تغارون عبن ما عدكم مثل مهره الي اسبع منكم ولا عدكم مثلي ومثل ديالا وجان انثر شعري بغرور وصديت بصفحه وادحگ على اضافري گتله اني ان شاء الله دكتوره

سنان :- طگها بضحكه الا غص گال دكتوره يا ليال يابه اذا خلوجن تكملن شاربي ازينه تاليجن بالبيت ولو تنتهي قصتجن مثل مهره وايست وصارت زلمه

لو مثل اختجن فاتن يضرب الحظ

ليال-: كتله اصلا مهره هيه بطلت ما رادت تكمل

سنان -: بس اني ما اقصد الدراسه

ليال :- ضجت بداخلي من كلامه گتله يا ريت تزين هالشوارب اصلاً جنب عالي وجنب ناصي وشنو ذاك الي بطارف شاربك طين وضحكت

سنان -: مسح شواربه وجان يدحگلي گال عبن جنت متلثم وهاذ الطين كار مو عار على اقل اني ما اورط نفسي بشي مثل الحلم لواحد مثلي

مثل ما سوت مهره حلمت وحلمت وتالي وينها لابسه شماغ وراكبه فرس وتشرف عالعمال اني كاتم بگلبي دنگ راسه وجان يجرها حسره شلع الكرك من الگاع گال روحي ادرسي واقري بس لا تحلمين زايد حضرة الدكتوره

عوجت حلگي وغميته بدون ما يشوفني ورجعت ارگص

وگمت اغني

سنان يا سنان يا احلى الاصدقاء

في غابة الخضراء

شعارك الوفاء يا خييير بعدني ما كملت الكلمه

ادحگ مهره واگفه ويا استاذ صائب

يم باب السياج الوراني واستاذ صائب يلوح بدينه مبين يحجي متعصب ويضرب بالباب ويفتر ويفرگ بگصته وأول مره نشوفه بملابس البيت فانيله وبجامه دائما يجينه لابس قميص وبنطرون وستره

و مهره حطت اديها على اثمها وتتلفت وهم تحجي وتهدي باستاذ صائب وتفرگ بأدينها وتروح وتجي

اني حدرت ركض همست لديالا تجي

ديالا: ها شكو

ليال: جريت ديالا من ايدها وهيه متعرف شكو صعدتها عالسطح تا تشوف بنفسها وصلت وما لگيت احد لزمتني من جتفي گالت شبيييج مخبله

التقطت انفاسي گتلها استاذ صائب جان واگف هين يم مهره بس لا الشغله تخص دراستنا

ديالا :حطيت ايدي على اثمي اوف يربي نظل عايشين بهل خوف

جريت ليال من ايدها گتلها امشي نحدر نصب لأبويه غده الولد حيل تأخرو محمد وعماد اول مره وانوب حميد هم من الصبح محد يندله وين

حدرنه وصلنه نص الدرج ونسمع العيطه يمه وليديييي يبووو

يتبع