رواية غرباء ( لقاء بعد الموت ) الفصل الثالث 3 بقلم اساورالموسوي

السلام عليكم

اللهم صلِ على محمد وآل محمد

لا تنسون تعبي والتعليقات بين الفقرات+ متابعة لحسابي+ النجمة

اللي هنا مو بس لقاء اموات هنا تجمع اللي انكسروا وجمعوا بقايا اجزائهم⸙

**

سكون البيت وهدوئه مرات نذير شؤم للي تعود على هوسة روحه، الأماكن الهادئة ما تطمن الكل، بعض الناس تحتاج فوضى وضجيج حتى ما تواجه نفسها..

بعد ما طلعوا الأولاد للمدارس، ماكو غير صوت الماي يغلي بالكيتلي الكبير، جدر ينحط عالطباخة وصوت طگطگة اماعين..

الخالة طوعة من الصبح تشتغل بالبيت، تكنس وترتب، تحضر للغدا، تفتر بالبيت ماتگعد، حتى مايصيبها برد، رغم الشمس طالعة بس البيت وجدرانه شايلة برد مايحمله جسم انسان.

ايام عيد الفطر انقضت بس بعدها لابسة دشداشة الهريسة مالت العيد، تفاصيل زخرفتها ولونها البسيط.

عبرت على غرفة الخالة عتبار باب الغرفة مفتوح، گاعدة فاتحة جنطتها الجلد، لابسة نظاراتها، گدامها كتبها الماتحب احد يفتحهن ولا يقراهن، وتكتب على ورق بقلم جاف.

تشوفها وتهز راسها بقلة حيلة وهي ساكتة تعرف شتسوي بس مابيدها شي وما تگدر تدخل، تشمر حسرة وتروح تكمل شغلها وكأنها ما شافت شي.

عبر الوكت والساعة صارت بالتسعة وخالة طوعة جهزت ورتبت كلشي، بقه بس تبزل التمن..

شافت انُ عتبار ولا مرة حطت ايدها بشي اليوم كلش، كلشي عليها صار، مسحت ايدها بوصلة اللي على كتفها وراحت لغرفة أكبر وعتبار..

:- شني اليوم ما راح تساعديني بشي؟

عتبار ما ترفع راسها..

:- عندي شغل

:- كل يوم عندچ هالشغل وملاحظة نفسچ كلشي عليه هالفترة

كملت كتابة وماهامها الكلام..

:- گتلچ هسة مشغولة، ماتنكسرلچ ايد بيت رجلچ واذا سويتي

:- ما معترضة بيت رجلي بس همين بيت رجلچ واولادچ

:- مو تگولين اولادچ هم اولادي، ما مسويه لغريب

:- هذا مو حق البيت كله شغل وبراسي

عتبار رفعت راسها شوي..

:- دبري نفسچ، هسة راح يجوني ناس

نافخت بقهر..

:- ان ما وديتي نفسچ بتهلكة وبرجليچ كلشي ماحچي، بس كون تحسبين حساب لهالرجال اللي يتعب واولادچ المالهم ذنب

عتبار وگفت كتابة ورفعت راسها الها وباوعتلها بنظرة غامضة بدون كلام، استغربتها، دارت وجهها وطلعت من الغرفة..

استمرت بحركتها بالبيت، انطت الدجاج أكل، اندگ الباب طوعة راحت فتحته صاروا گدامها نسوان وجوههم مغطاية، بينهم وحدة بالوسط، واضح رجفة على كل جسمها وتختض..

وحدة منهن حچت..

:- السلام عليكم، نريد الداية عتبار

طوعة ما جاوبتهم ولا حتى ردت السلام، حست بالخوف من اللي جاي عرفت ليش جاين هذول، دخلت جوه البيت.

صاحتها من باب الغرفة..

:- عتبار اكو ناس برا اجوچ

وگفت عن الكتابة فجأة شالت الورق وكتبها كلهن بالجنطة وقفلتها ودحستها جوه الچرباية الخشب، بسرعة گامت وهي تلف شيلتها..

طوعة لزمتها من زندها..

:- عتبار لا تسوين هيچ لخاطر اولادچ، لا تورطين نفسچ بهالسوالف، كافي ابوس ايدچ باوعي لاولادچ ولأكبر، خليهم يحيرون ببتهم وبسوالفهم

وخرت ايدها من زندها ونترتها..

:- لا تدخلين بشي

:- فدوة بس سمعيني

:- وخري عن دربي

:- عتبار خلي الله بين عيونچ

:- گتلچ لا تدخلين

تركتها وطلعت للباب، دخلت النسوان بالدوانية ورحبت بيهن، وقررت طوعة ماتدخل، بس خايفة وجسمها صار يختض.

طوعة خوافة مو مثل عتبار امرأة قوية وجسورة وماتخاف من احد ولا يهمها احد، اللي براسها تسويه، يگول سيد أكبر لطوعة من يوم تزوجتچ وهي تغيرت، صارت اقوى.

وهي تعرفها متعودة تگعد ويه هيچ نسوان ويجوها يا اما بولادة او شي اسوء، "اسقاط" وهو قتل ارواح ممكن يأدي لقتل ام وجنينها..

أكبر مايعرف بهالشي، من يروح للبحر تشتغل هيج شغل بالخفاء، بس طوعة تعرف، مرات ترفض بس مرات تقبل علمود الفلوس، والعرض الاجاها امس ماگدرت ترفضه..

طوعة رجعت للمطبخ حاولت تكمل شغلها بس ايدها ترجف خايفة ماتمر على خير واهل البت يغدروها لو صارلها شي ويشتكون على عتبار، بس هي لازمتهم من ايدهم التوجعهم خوف من الفضيحة.

هنا ماكو شي اسمه امرأة انظلمت وتعرضت لاغتصاب، هنا فقط مذنبين وحكم ظالم انها غلطت ومادافعت عن شرفها.

قررت طوعة تروح للبستان حتى لو طين تريد تلهي نفسها لمن تخلص هالسالفة على خير، بزلت التمن وحطته عالنار، نصت المرگة.

خذت سلة ولبست عبايتها عبرت بسرعة على الدوانية حتى ماتسمع شي.

مشت بالطين بالگوة، راحت جابت منجل من بيت عمها، راحت للبستان الطين للركب بس وصلت مشارة الرشاد حشت شوي، شلعت روس فجل، حشت كرفس وراحت للنعناع.

ظلت گاعدة شوي وهي تجرجر انفاسها، وتفكيرها مايغيب عن اللي يصير هناك، تذكر آخر مرة صارت هالحالة وشصار بيها.

نفضت الافكار وگامت راحت للبيت تحاول توصل بسرعة من الطين، بس دخلت سمعت صوت بچي وصريخ خفيف كأنه انكتم بإيد.

مضطرة توگف تغسل بمقطورة الماي المحطوطة بالحوش، غسلت طين رجليها والخضرة وهي تسمع صوت البنية تتألم وتبچي.

عيونها دمعت وتفكر لو بتها تنحط بهالموقف، دموعها نزلت وتمتم لسانها بكلمات دعاء من گلبها.

:- عساك لا تتهنى ولا يرتاحلك بال يلي سويت هيچ بيها، عساها بحظك وبختك يا حيوان ياذكر، شنو ذنب هالطفلة تنجر لهيچ وضع، ياربي حط علة بگلبه لا تتشافه ولا يهدأ ألمها

ظلت تبچي بحرگة شمرت من ايدها راس الفجل اللي جاي تنظفه من الطين والماي يجري يم رجليها بارد، والقهر طعن شعورها.

:- ياربي احفظ بناتنا يارب، حروب مثل الغيمة وشامية نسمة هوا وزمان بيها ترافة ورد تنجرح من ورقة شجر، ترفة بنتي الوحيدة وماعندي غيرها، يارب احفظهن من شرور نفوس القذرين، ياربي اقسم عليك بمحمد و ولاية علي لا تخلي ام تمر بهيچ موقف ولا بنت تنجرح وتنكسر بهالطريقة، ياربي بمحمد وآله استجب دعائي

شوي واختفى صوت البنية، جسمها كزبر، وطلعت عتبار وهي تصيح..

:- طوعة تعاي ساعديني، جيبي ماي

مافهمت لشنو الماي بس ركضت وبين كفوفها ماي بارد، دخلت بينهم وبلا تفكير شمرته على البنية، طلعت مغمى عليها، لا عطر گعدها لا ماي، بقت دقايق.

امها ظلت تلطم وتولول خسفت صدرها من اللطم، طوعة ظلت مصفنة ومافاهمه ماتت لو شنو وشراح تسوي!

الأم:- ولكم بنيتي يممممممه شروووووووق، يبوووووية تصخم وجهي، ولچ يمه شروووووق گومي لا تصخمين وجهييييي

"ظلت تضرب صدرها وخدودها بقوة وتتجه لبتها تلطم وجهها قوي وتصيح"

ولچ شريقة يمممممه گومييييي حلفتچ بعفتچ، من الله لا ينطيك يا...... عساها بخواتك يا ........ عساها بامك الظالمة الخسيسة، يمااااااااا يماااااااااا ولچ يمااااااا تعالي ليه........

بعد ساعة...

طوعة گاعدة بزاوية غرفتها صافنة ايديها على راسها، جسمها يختض بعدها تذكر صوت ام البنية ولطمها لوجهها وصدرها، ودم النزيف اللي عبر النايلون جواها ولطخ الفرشة.

منظر البنية مايفارگها وحرگت گلب امها والنسوان اللي وياها يلزم ايديها يمنعنها تملخ بشعرها وتخسف بصدرها ويبچن وياها.

ما مستوعبة الصار ليهسة وما مستوعبة البت فتحت عيونها بس من الألم انغمى عليها.

عتبار بالحوش تحاول تشيل الدم وتغسلة عن الفرشة وهي ماهمها الصار وماهزاها، متعودته وصار الأسوء بيدها.

اجتها طوعة وهي تتحلف..

:- آخر مرة تخلين هيج حالة اطب بيتنا وحق القرآن أگول لأكبر وشيريد يصير خلي يصير

:- خلصتي؟ طبي جوه صلي وصبي الغدا هسة يجون الجهال جواعة

:- انتِ شنووووو حجررررر ماتحسين! البت چانت راح تموت وماهامچ

:- شتردين اسوي الطم وابچي مثل لطم امها؟ هاي الصارلها مقدر وخلصتها من بلوة ابتلت بيها

:- استغفر الله، اگلچ البت رادت تموت انتِ شنو من ياطين مخلوقة؟! تخيلي لو حروب بهالموقف وبين ايديچ وماتت! يمه اسم الله! اسم الله!

:- اسم الله على بتي، هم ما حاطين بالهم على بتهم وصار بيها هيچ

:- لو تضميها بقوطية هم لابد يطمع بيها حيوان قذر، عوفي هالشغلة لا اطيح ببناتچ

:- وشعليه قابل انه الحبلتهن!

:- جاااااي تقتلين ارواح بريئة!

گامت عتبار هجمت عليها لزگتها على حلگها بلطمة..

:- صوتچ طلع للشارع، طوعة ان ما سكتي والله لا اموتچ واخلص منچ

:- ولا اسكت موتيني بعد ماسكت عليچ بس يجي أكبر اگله كلشي

:- تسكتين وغصبن على الخلفوچ، والا افضح المستور انه همين

طوعة دفعتها قوي وابتعدت بسرعة وطبت داخل البيت، ابتسمت عتبار ابتسامة خبيثة رجعت كملت غسل الزولية.

**

"ترفة"

رجعنا من المدرسة، وافتقدت ابوي اليوم كل مرة يجي علينه بالبايسكل، دخلنا للبيت انه وشامية وحروب وزمان ورانه عقيل وجسام يتعاركون.

صوت ماي طلعت خالة عتبار بالحوش گاعدة تغسل فرشة لونها مو طبيعي، الدم طالع من الماي الجاري منها.

وگفنا بمكانا مصنمين من الدم.

حروب نطقت بخوف..

:- يمه شنو هالدم؟

زمان :- يمه شصاير هاي شنو الدم؟

عقيل رفع صوته..

:- شكوووو يمه؟

جسام:- شني ذابحة عجل عالزولية!

خالة عتبار باوعتلنا ورجعت نزلت عينها تجلف بالفرشة بعصبية..

حروب صاحت بخوف..

:- يممممممه شصاير جاوبي؟

زمان:- اي شكووو دم منو هاي؟

حروب:- يممممه!

الخالة عتبار :- وجعه من الله يعني شنو كتلت ابوكم هاي دم حرمة ولدتها، سلموا صخموا گولوا الله يساعدچ يمه

حروب بلعت ريگها، وجهها اصفر دارت ودخلت للبيت بسرعة، اسمعها تصيح..

:- خالة طوعة وينچ

شامية بقت صافنة شوي زمان دخلت بنفس اللحظة ورا حروب، انه ضليت واگفة عيني على الفرشة والدم، حتى جسام وعقيل.

جسام :- ولك عقيلو هاي كل النسوان يجيبن يطلع منهن هلگد دم؟

شامية بفطرة :- اي غير يشگون بطنها

عقيل :- اسكتي راسچ مثلث ماتعرفين يطلع الطفل من...

طلع تيجان وراه واجته كفخة معدلة منه على علباته..

:- اي منين يطلع الطفل حبيبي عقولي

عقيل ضحك بتوتر..

:- ههه يطلع من بطنها شبيك

تيجان غمزله..

:- عبالي مخربط

خالة عتبار :- روحوا جوه لا توگفون هنا على راسي، چنكم بومة فگر

تيجان :- الله بالخير يمه

خالة عتبار :- صلوات يمه واحد سلم

تيجان :- احلى ام واحلى من يعصب، تخبلين حتى وانتِ معصبة، شبيچ اروحلچ فدوة الصوجچ هسة ادچه، احرگه الچ

خالة عتبار :- انچب وادخل جوى مالي خلگكم

جسام:- بممممم ههههههههههههههههه

عقيل:- اللهم لا شماته خخخخخخخ

تيجان :- ومرض شلون يضحكون، چنكم بشوش غرگانة

جراهم من ياقة ملابسهم ثنينهم ودخلهم وهم يضحكون عليه شلون فشلته خالة وهو يتلوگ الها.

ضحكت على ضحكهم، دخلت وراهم، رحت اشوف امي واسلم عليها، يمها حروب وشكلها تعبانة، البيت هادئ زيادة هدوء مو مريح.

البيت بلا بابا وصوته وهو يقرأ قرآن بلا طعم، سجادته بمكانها، كل مرة يفارگنه ويروح اسبوع واكثر للبحر، بس ابدًا ماتعودنا غيابه هذا.

شوي ودخلو اخواني الباقين هم نفس خط شرار بس چانوا واگفين بره يم صاحبهم يسولفون.

شرار توه گعد من النوم خالة عتبار شكلها طاردته لغرفتها، لأن من تجيها حالة ولادة تطرد الولد من الدوانية.

شرار يمطگ:- يماااا شنو غدانه

تيجان:- صلوات على محمد وآلِ محمد، وين چنت غاط

رشاش :- مسعدة وبيتچ على الشط

علي الزكي :- والبلابل تغني ابابچ

يوسف ظل يلحن :- عطشانة لو جوعانة

عقيل كمل :- ها يام طول الحلو يفلانة

جسام كمل اللحن :- گليلي هااا وشسوين هنانه

رشاش دگ اصبع ويدبچ وبنفس اللحن..

:- جاوبيني ترا روحي منچ خلصانة

تيجان كمل اللحن..

:- من انعل ابوچ شلون حليانه

خنجر :- اممممم اعددد

كلهم طگوها ضحكة..

شرار هز خصره مثل الهنود..

:- كملوا كملوا انطربت

علي الزكي هز ايده:- تهي بهي فرق بين الگاضيها نوم وبين الشابع ضيم

رشاش :- لا احساس لا ضمير دراسة

علي الزكي :- اريد ابطل انعل ابو المدرسة

يوسف :- اي والله شوكت تخلص طلعت ارواحنا ولا جايك الصيف يسمط ابو الخلفوك

رشاش :- لازم تاخذلك فريز بتايرات وتروح المدرسة وانتَ داخله

تيجان :- وتصيح ديد ديد عااان عااان وخروا عن الطريق

يوسف :- خوش فكرة ونصعد وياك كل احنه ونجمده بالليل وبالنهار نطلع بيّ

رشاش :- انچب هاي سيارتي شوفلك وسيلة

علي الزكي :- كافي تلغون انه نعسان وجوعان

امي :- هسة اصبلكم الغده روحوا بدلوا وصلوا

اطشروا اخواني بين تبديل واللي يصلي، واللي ريحة جواريبة تگطع وراح يغسل رجليه، ملابس مطشرة وكتب مجمعة، صار شوي صوت بالبيت الحمدلله.

شرار يتثاوب ويباوع بنص عين النعسان، ويصيح الغدا متنه من الجوع، طبعًا ماصلى صلاته.

هو الوحيد يلعب بصلاته يوم يصلي وعشرة لا وبوجود ابوي طبعًا شگد يحچي وياه مايفيد.

صبوا والتمينا عالغدا بس حروب گاعدة بالزاوية ماجت تتغده، حاضنة نفسها وجهها احمر وتختض راحتلها امي لمست جبينها..

امي :- حروب ماما شاعلة نار ولچ

خالة عتبار :- گومي تغدي ونامي

حروب گامت :- ماشتهي رايحة انام

ماقبلت خالة واجبرتها تگعد تاكل اكلت شوي وگامت راحت للفراش نامت، خلصنا الغدا الولد راحوا نامو بغرفة خالة عتبار اللي اخذ الچرباية يم حروب واللي نام بالگاع.

انه وشامية وزمان گعدنا نسوي ملابس للعابات من گراض قماشات وبقاياه.

واحنه گاعدين طلعت حروب وهي غريبة وتتحرك بدوخة وچان تظل تتقيئ خفنا عليها، صار عدها حالة اسهال وتقيئ قوية.

بحيث تيجان خاف عليها وراح اجر جيرانه بيت ام عاتب عدهم تكسي واخذها للمستشفى، رجعوا الدنيا ظلمة فوگ المغرب.

بيدها كانولة وحالتها حالة وناطيها ادوية وابر، ظل يلوم خالة لأن خالتها تروح مدرسة بالگوة وهي مريضة ومتخربطة هناك.

خلاها تنام بالفراش حتى عشا جايبلها لفات كباب وعصير ما اكلت شي نامت گبل.

جاب اللفات قسمهن علينا كل وحدة نص انه وزمان وشامية، شگد حنون وكل اخواني حنيتهم تفوز، بس تيجان اكثرهم ويهتم بينا من يغيب ابوي هو بمكانه.

نمت يمها الليلة گلت لأمي وقبلت، گعدتني بنص الليل هزتني بهدوء صوتها مبحوح..

:- ترفة گومي وياي اريد اروح للتواليت شامية ماتقبل تروح وياي

فتحت عيوني عالنص الدنيا ظلمة والبرد يموت،

رجعت صاحت على شامية دارت وجهها وحطت الغطا على راسها.

شامية بنعاس :- ماريد عوفيني نعسانة روحي گعدي امي

گمت وياها وانه ساكتة واتثاوب وافرك عيوني، نمشي على كيف الولد نايمين بالصالة لأن فراش الدوانية مغسول كل واحد نايم بجهة.

رشاش رجله شوي وتدخل بحلگ شرار، وعلي الزكي خانگه يوسف، خنجر نايم عرض بنص فراشه، عقيل راح يوصل للباب.

عمي جسام حاط راسه على بطن تيجان، رشاش شخيره عالي، تيجان نايم على ظهره، چنهم صور من المعركة.

طلعنا للحوش، الهوا بارد والظلمة تخوف التواليت بصف الدوانية ومن الجهة الثانية جن(قن) مال الدجاج.

بمجرد ما مشينا چم خطوة البطوط نخبصن فجأة صوت جناحات قوي وماي يتطشر خبصة مو طبيعية.

حروب دخلت التواليت وبقيت واگفة بمكاني جسمي كله تبنج من الخوف والبرد..

حضنت نفسي..

:- يلا حروب انه خايفة

طلعت قربت مني لزمت ايدي..

:- يلا تعاي

بس لفت نظرنا الظلمة صوب الجن سودة تخوف كأنها ثقب اسود يبلع الاشياء والرؤيا، لاحظنا وسمعنا حركة ثانية مو البط، شي يتحرك وصوت خشخشة خفيفة، سمعنا نَفَس تنهيدة بس صاحبها ما ينشاف.

وگفنا جامدين بمكاننا وما شفنا شي بس الصوت موجود، فجأة صرخنا بنفس اللحظة صرخة طالعة من رعب حقيقي.

ركضنا وانضربنا وحدة بالثانية طحنا وگمنا بسرعة دخلنا البيت واحنه نصرخ برعب، الولد كلهم انتفضوا من فراشهم..

تيجان گعد وهو يصيح..

:- شنوو؟ شكوووو شنو صار؟

رشاش گمز داس على مخدة عقيل وراسه يباوع يمين ويسار..

عقيل صاح:- دماااغييي راح ماتشوووف

رشاش :- شبيييك مادري

البيت صار هوسة شبكت حروب بعده گلبي يدگ ما نعرف شنو چان ذاك الشي.

تيجان :- ماتحچن شكوووو شنو صاير؟ حريگه لو مات واحد

رشاش وهو يفرك عيونه..

:- انچب فوگ صريخهن انتَ تصيح

ماما طلعت خايفة..

:- شكووو شبيهن البنات، خرطتوا عافيتي

شرار :- شمدرينه! شنووو شفتوا جن؟ لو حرامي شكووو

عقيل باوع علينا بخوف مصطنع..

:- يمه يمه شفتوا حرامي؟ لو الدجاجة الحمرة گامت تحچي؟

جسام يلف الغطا عليه..

:- نريد ننام يابشر شنو هالازعاج، لا تكونون شفتوا شبح

حروب صوتها طلع متگطع..

:- اكو شي بالحوش... شي يتحرك... ويتنفس... سمعناه...

ماما بخوف..

:- شنووو

تيجان:- وانتِ ماتصير النايبات بس وياچ

يوسف رفع راسه..

:- شني شي خاف ديچ لو بطة

علي الزكي :- يمكن البطوط مسوين حفلة بدون مايعزمونا

رشاش صفگ..

:- اي مسوينها من ورانه اولاد الكلب

ماما :- يلعن بليسكم هسة وكت شقاكم

شرار يقلد صوت البط..

:- قااا قااا لا تخافون بنات هاي حفلة مسوين وماعزمنه علي الزكي ابو الضروگ خاف يضرگ ويترس الحفلة خيسة

علي الزكي زگطه..

:- الضروگ بحلگك

حروب عصبت..

:- لا تضحكون علينا مو البطوط الصوت غير، شفنا ظل يخوف

ماما:- حااااا

تيجان صار جدي..

:- زين وين بالضبط؟

اشرت صوب الحوش..

:- يم الجن مال الدجاج بين الحديقة والجن بالظلمة

جسام رفع راسه..

:- هااا عدل يم الجن؟ هذا مكان الجن الاصلي يرحون للدجاج يلعبون وياهم

تيجان رگعه بالمخده..

:- لا تظل تضرگ انچب وانلصم البنات يخافن

عقيل سوه نفسه شجاع..

:- انه اطلع اشوف، سورة وحدة ارگعه بيها يطفر لاهله يتحسر

تيجان سحبه من ياقته..

:- اگعد لا تسوي نفسك رامبو وانتَ اكبر جبان

شرار :- اروح انه اشوف هلاااا بالرعب

تيجان جراه طيحه بالگاع..

:- ولكم ليش تخلوني ابتلي بدمكم تيوسه

علي الزكي :- ترا البنات ما خافن هيچ بلا سبب، صدگ اكو شي ابيتنا

رشاش :- اشششش اسكت خلي البنات ينامن، واضح هذا تاثير الافلام الهندية عدكم ماكو شي

تيجان ضحك..

:- اي والله البطوط طلعت هي الوحش الليلي مخوف عتيوي والبنات وراح تطهركم واحد واحد خاف ما مطهرين

رشاشا :- خاف انتَ ما مطهر عضيدي

ضحكوا كلهم..

ماما تضحك :- ولكم عليكم سوالف

البيت رجع صوت وضجة الضحك غطى الخوف، باوعت لحروب بعدها مليانة رعب، بس هم ضحكت غصب حتى ما يبين.

تيجان كمل وهو يضحك..

:- روحن نامن باچر نجيب مصيدة جنانوه

ماما :- تيجااان هنوب انتَ تخوفهن

رشاش :- او نبيع البطوط، واضح مسوين رعب نفسي

شرار تمدد ورجع غطا نفسه..

:- تصبحون على خير يا بطلات افلام الرعب

بعد ما ضحكوا وبلشوا يلغون اكثر، فجأة طلع صوت خالة عتبار من الغرفة صياحها سكتهم..

:- نامووووو كافي تلغون گعدتوا حتى الموته من گبورها

سكتوا بلحظة عبالك واحد صب ماي بارد عليهم.

تيجان حط ايده على حلگه

:- استغفر الله سكتنا راح ننام

رشاش همس..

:- والله عبالي طبوا علينا، طلعت القائد عتبار

شرار غطا راسه..

:- انه نايم نايم، حتى چنت احلم

عقيل مط نفسه..

:- منو گعد انه من الأصل ما گمت

جسام ضحك بخفة وهو يغطي ضحكته..

:- شفتوا شلون انگلبت من فلم رعب لعسكرية

يوسف :- بعد هالصيحة من امي حتى الجن رجعوا ناموا انرعبوا من صوت عتبار

ماما ضحكت وكلهم كتموا ضحكهم بالبطاطين، سحبتني حروب وياها بهدوء، رحنا لفراشنا، تغطينا بالبطانية، بس نظرنا بقه على الباب گامت حروب گالت لماما تشعل الها الفانوس حتى يضوي الغرفة تخاف.

گلبي يدگ وعيوني تراقب بخوف، بس صوت خالة عتبار خله الكل يرجع مكانه، البيت رجع سكون مرعب، كأنُ هالبيت شايل سر ما نعرفه شنو.

يوم ثاني تيجان ماقبل حروب اداوم لأنها تعبانة، ردت اغيب وياها گال انچبي، رحنه للدوام وست نجوى هي اللي تحليه.

رجعنه ورجعوا الولد من المدرسة، تغدوا وتفرقوا، انه وزمان طلعنا نلعب صگله ولاگ..

وهي لعبة نلعبها بالشارع وبالمدرسة عبارة عن عصتين وحدة طويله الي هي الصگله والاگ الگصيرة.

طريقة لعبها، تنحط العصه الگصيرة على حفرة او صخرتين وتنضرب بالعصه الچبيرة، فتطفر العصه الزغيرة ويضربها اللي يلعب بالطويلة.

وتروح بعيد يركضون يجيبونها الي يجيبها هو الفايز ويكمل اللعبة.

الگاع بعدها رطبة شوية بس ينلعب عليها، حطينا العصه الگصيرة على صخرتين، والطويلة بيدي، ضربتها طفرت وضربتها مرة ثانية وطارت بعيد.

زمان صفگت..

:- عااااااا خوش ضربة

ركضت اجيبها رجعت وانه اضحك، هنوبه دور زمان سوت نفس الحركة وطارت العصه ابعد.

فد شوي وسمعنا اصوات اخواني اجوا.

تيجان اول واحد..

:- هااااا شني اليوم صگله؟

رشاش ضحك..

:- ولچن انتن بنات وتلعبن صگله!

عقيل:- هاي لعبة ولد مو لعبة بنات

جسام:- باچر نشوفچن تلعبن مصارعة بعد

زمان عصبت..

:- وشبيها لعبة يعني لعبة

شرار أخذ العصه من ايد زمان..

:- انطيني خل اشوفچن شلون تنلعب

:- لا هاي شنو تخربون لعبنا

تيجان اخذ العصه من شرار..

:- بعد احنه دخلنا صارت للولد

زمان عصبت..

:- يماااااا تعاي شوفيهم، روحوا العبوا شي ثاني

رشاش:- انتن بنات لعبتچن بيت وبيوت، مزوجات وحوامل وكل وحدة بيدها فروخها

علي الزكي :- وحدة تطبخ والثانية تريد تولد

زمان صاحت..

:- انگلعوا عنا خربتوا اللعب

عقيل يقلدها..

:- نا نا نا خربتوا اللعب خربتوا اللعب

جسام اخذ العصه الگصيرة وشمرها..

:- يلا روحي جيبيها اذا تريدين تلعبين

انه ركضت عليها بعصبية رجعتها..

:- ليش هيچ خربتوا لعبنا والله لو بابا هنا يكتلكم

تيجان مبتسم..

:- احنه استلمنا اللعبة، وهاي لعب ولد مو لعب بنات، تردن تلعبن انتظرن دورچن

شمرت العصه بعيد..

:- ما نريد نلعب وياكم

رشاش :- لاااااا زعلت زعلللللت

شرار :- اي زعلت، روحن لعبن باللعابات

تركناهم واحنه معصبات، دوم يخربون لعبنا اخواني، لأنهم الولد ولأنهم الكبار مسيطرين، بس لو ابوي هنا يشگ حلوگهم يخربون لعبنا.

گعدنا يم صندوگ بلاستك متروس گطن امي شارته بالشمس تريد تسوي مخده منه، بس لاحظت اكو زعة طالعة بنصه.

فرحت بيها وصحت على زمان تباوع، ضحكنا ضحك اطفال كأنما شافوا شي عجيب زرعة نابتة بنص الگطن.

ظلينا نراقب الولد يلعبون ويضحكون.

خنجر حط العصه الگصيرة..

- ركزوا شوفوا شلون اللعب الصحيح

رشاش:- لا تطفرها مثل المرة الراحت خليها تطلع عدل

خنجر ضرب العصه طفرت بس ضربها غلط وطاحت ورا ظهره..

علي الزكي انفجر ضحك..

:- ولك ضاربها وانتَ معصبة عيونك لو شنو

يوسف يضحك..

:- هاي مو صگله هاي محاولة اغتيال بالظهر

خنجر:- اسكتوا خلوني اعيدها

تيجان خمط العصه من ايده..

:- دوري هسة انتَ فشلت

رشاش :- لا لا دوري انه قبل لا تكسرون العصه

جسام خمطها :- كلكم فاشلين شوفوني

ضربها طفرت ضربها الثانية، العصه طاحت بنص الحوش..

عقيل يضحك..

:- هدف سجلنا هدف بمرمانا

يوسف يقلد عليه..

:- والحكم وين يمكن نايم

عقيل ضحك..

:- هسة اجه دور علي الزكي هذا لاعب محترف

علي الزكي اخذ العصه..

:- ركزوا هسة تشوفون لعب المدارس

ضربها وطارت وطاحت يم الدجاج على راس الدجاجة بالضبط صاحت صيحة عالية والدجاج الباقي نخبص، رفيف جناحات وقاق وقيق، وصوت الفريخات..

شرار صاح..

:- لااااا دجاجتيييي شبييييك اثول هو هيچ

تيجان ضحك..

:- هاي ام الفروخ هسة تجي تنگرك وتضرگ فوگ راسك وتروح

رشاش:- روح جيبها بسرعة لا تجيك لطمة

علي الزكي..

:- وهرش شبيكم مادري قابل ماتت كلشي مابيها

راح دخل الجن طلع العصه ورجعوا يلعبون، ساعة عرايك وساعة ضحك وساعة امالخ من الروس وساعة لعب محترف.

بس هيچ نگضي وقتنا مابعد الظهر او العصريات، هاي حياتنا، دراسة ومخلصينها وكتابة وكتبنا..

**

"حروب"

العصر امي طالعة رايحة لصاحبتها، خالة طوعة احتارت بوقت الابرة مالتي، قررت تاخذني لجيرانا لأن امي ما موجودة وهي تضربني الابرة.

جيرانا نفسهم بيت عمو ذياب مرته ممرضة، رحنه دگينه الباب فتحلنا ابنهم رضا عمره 6 سنوات.

ماشاء شگد حلو هالولد شعره اشگر وعيونه وساع عسليه مائلة للصفار بالرغم امه مو مثل رجلها فرق السما عن الارض.

عمو ذياب احلى منها بفارق چبير وسمعنه هي اكبر منه بهواي، ابوه مزوجه من جان عمره 16 سنة وهي بت عمه..

مشكلتها سمينة هواي بس گلبها طيب وحبابة تنحب گبل بلا مقدمات ومن اول مرة.

ظليت اباوع لشكل رضا يخبل واضحك بگلبي هسة وكت زحف على رضاوي جاية مريضة حتى اضرب ابرة.

اول مادخلنا سمعنا صوت..

:- راح اتركه

ومرة ثانية تشجعها..

:- اي تركيه اهم شي كرامتچ خليه يولي محد سمنچ غيره

گلت بگلبي..

:- عزززااا تترك منو؟ بس لا عمو ذياب ليش خوش رجال دوم يكعد يم جدي وعمامي وابوي وكلش يحترموه ويحبوه

ومن نندخل نشوف صحن تشريب گبالها واختها تگلها..

:- انتِ گدها اي گدها عوفيه

وهي الا شوي تبچي..

:- اتركه اي اهم شي اضعف

اختها:- اي ضعفي ترا والله اذا ماضعفتي والله ورب الكون انه اروح اخطب لأبو رضا، مو كافي متحمل جهرتچ اللعبان النفس وكوام اللحم البيچ

لزمتني الضحكة بس سكتت، سلمنه بسرعة گامت اخت ام رضا، بوست خالة طوعة احنه عرف، سلمت علينا ام رضا بحرارة سؤال وعتاب.

قبل لا انطيها الابرة والسرنجة دخل عمو ذياب ابتسم وسلم، باوعلي بضحكة تارسة حلگه..

:- هاي چليب الماي حربية جايتنا اليوم

خجلت ودنگت راسي..

:- هلا عمو ذياب

ذياب:- هاا خيركم سلامات منو مريض

خالة طوعة :- حروب مريضة ماتسمع بس الصحة والعافية

ذياب:- من السبح بالنهر بت السيد تگول حارة بس انتِ مناخچ غير

شعلت نار من الخجل، فضحني عمو ذياب، ظليت اباوع لخالة طوعة وهي متفاجئة، غيرت الموضوع بسرعة.

انطيت الابرة لخالة ام رضا حتى تخلصني واروح، لأن عمو ذياب اذا ابقه اكثر يگول گدام مرته خطيبتي وهي تدري شقه فتظل تضحك، بس انه افطس خجل.

رحت وراها للغرفة داخل، واسمعه يگول..

:- ديري بالچ على خطيبتي

ظليت اللطم بداخلي وشبعت روحي چلاليق وزگط من الخجل، راح يرجع الاسهال من الفشلة.

- يا ريال بطل

-مابطل

- توب

- ماتوب

الشيطان وزاني، زگطته، رجع وزاني،هم زگطته، آخر شي ظليت اسوي محادثات بخيالي بيني وبين نفسي والله خيال طفلة مو بيدي.

- ترى اليوم مو بمودك لا تجربني ارگعك ببسم الله الرحمن الرحيم و الله أكبر تسمط عشيرتك

الشيطان-

جاي اساعدچ عوبة ليش هالعداوة!

- تساعدني لو تصخمني، آخر مرة اجيت تساعدني چنت تريد تخليني اگول حچي ماينحچي لو اگعد اضحك بمكان ما ينضحك بيّ

- مو ذنبي انتِ دمچ خفيف

- لا والله ثگيل لدرجة لو تطيح بيدي اكسرك

- شنو هالقسوة تره انه شيطان مو حايط ماعندي مشاعر

- گلي عندك خوات لو لا

- شنو هالسؤال الغريب

- جاوب عندك خوات، اذا عندك عوفني بحالي، اذا ما عندك همين عوفني بحالي

- انتِ شبيچ

- تخبلت لأن اسوي حچي وياك ماصاير

:- ليش تسألين عن خواتي

:- لأن اللي يوسوس لبنات الناس يا ما عنده خوات

يا خواته ما يحچون وياه ويأدبونه

- تفوووو طاح حظچ

- تف عليك يعني تريد تفضحني لو شنو؟

- لا اقصد...

- لا تقصد ولا غيره روحي بخشمي مريضة وتكومت دراسة عليَّ وعندي دوام وماروح، وعندي دجاجة نايمة عالبيض

- شدخل الدجاجة

- دخلها اكبر من دخلك بحياتي

- انتِ غريبة

- اي واعترف لدرجة احچي وياك واتخيلك

- خخخخخخختفووووو على الي يحاول يساعدچ

- هو انتَ لو تگدر تساعد چان ساعدت نفسك وماصرت رجيم

نفضت افكاري السخيفة هاي، خلصنا الابرة، انطيناها فلوسها واخذت خالة طوعة بسرعة طلعنا قبل لا اشوف عمو ذياب.

بس سمعت صوته بره قبل لا اعتب باب الحوش، جاي يحچون بالمرة الثانية سمعت صوت عمي مجتبى.

:- ابو الذيابة شرايك بالمرة الثانية، شتگول تزوج على ام رضا

:- هو كله نفس الربل الأسود شيختلف وكل الهوايش حلابات

سمعناهم سكروا من الضحك..

ذياب:- خيركم سلامات اليوم گابين عالمرة الثانية لازم الهوش العدكم ماعاجبكم

صوت عمو حسن..

:- يعني ماتزوج على ام رضا

ذياب :- چؤ مرتي عاجبتني قابل راح آخذ كارينا كابور

ظلوا يضحكون من جديد، طلعنا سلمت على عمامي بسرعة البرق مشيت بسرعة للبيت.

عمو ذياب صاح..

:- على كيفچ لا اطيحين ثولة مالابسة عيونچ

تجاهلت واشرررد اركض للبيت، مشت الايام صرت احسن بس بعده صدري متنگ، رجعت للمدرسة وآية صديقتي كلش قالقتني..

تگول بت عمها ابوها شابعها كتل ويريد يبطلها، كلش ضجت ليش هيچ، بدون آيو مايسوة الدوام مو حلو، تواعدنا انه وياها نكمل سوية.

هي تصير مهندسة وانه دكتورة، وازوجها لاخوي تيجان، هي صح اكبر مني وراسبة چم سنة بس شدت حيلها وصارت احسن درجاتها.

بالبيت گاعدين ننتظر ابوي يجي صارله اسبوع وكل يوم نگول اليوم يجي، خاصة صار هوا عالي وهالشي مو بصالح البحارة.

اندگ الباب ركضنا انه والبنات نصيح ابويه، فتحناه طلعت خالتي سلاسل، هي وزوجها جاين.

خالتي حتى ماسلمت..

:- وين امچن يالعوبات

:- هلا خالة داخل امي

خالتي غمتني..

:- وگبور سلمي گولي خالة شلونچ

:- اسفة خالة شلونچ

دفعتني وطبت..

:- وين الولد خلي يدخلون جنطي

همست لنفسي..

:- چا البعير الجاي وياچ شني مزهرية لو علاگة!

خواتي وراها يگمزن من الفرحة ويه بنات خالتي، مع انُ مانحب خالتي سلاسل، عدها بشاعة روح مو طبيعية وماتحبنا، بس نحب بناتها نلعب وياهن.

زوجها گرص خدودي..

:- ها حلوة شلونچ

لعبت نفسي وابتعدت عنه شعور مقرف اجاني ويضوج، ماحب وجودهم ماحبه كلش، يجون ويظلون ايام هنا وزوجها لتگول بيته جاي وياها عربانة.

غير نضرته النگسة وحتى مرة تحارش بخالة طوعة شفته بعيني ومن يومها احسبه مثل زوج عمتي اللي يتحارش بيَّ هو وابنه..

بس هي خالة ماحچت تخاف من امي تتهمها ابختها وانها تحاول تألف، هذا الانسان اكرهه مثل زوج عمتي نفس الطينة والخيسة، وحتى خالتي تدري بي عفونة مايهمها.

صح طفلة بس عقلي چبير وافتهم هواي اشياء، واعرف ان الرجال اللي يتحارش بالبنات مقرف ويخوف.

هسة جايبة جنطة شگدها، دخلت داخل وراهم، ضجت لأن ما طلع بابا مشتاقتله، بس هو يوخر وحشة هالدنيا بعيني ومنا صديقتي ماكو بالمدرسة.

خالتي تسلم على خالة طوعة وهي مشمئزة عود هي تلحگها ربعها ماتوصلين والله.

امي ترحب بيها بس همين شكلها ضاجت، لأن تعرفهم هسة يستوطنون هنا ويردون الأكل كله دجاج ولحم، وامي تضطر تذبح من دجاجنا، هو احنه بحسرة الأكل مرات لحم مانشوفه.

الوضع تعبان وحصار وهذول استفزاز وجودهم، ابوي مايضوج من خطار ابد ويفتح عيونه مو بس بيته، بس حذر امي نسيبچ يجي هلا بيّ بس يبات هنا يحترم نفسه احسن.

بس هو مايفهم بلا كرامة ماعرف من شنو مصنوعين ذولي، اتمنى يجي بابا حتى يولون مايباتون هنا.

گعدت خالتي وزوجها وسلام وكلام، شوي خالتي ظلت تشمشم ومتقرفة..

سلاسل :- شنو هالريحة عتبار بيتكم خيسة عبالك مرافق

امي :- من هالبنات الخايسات غير يخافن بالليل يطلعن بره ويبولن بالحمام يصير ريحته تجيب المرض

خالة طوعة :- بس انه توني جالفته وغاسلته شوفي حفاظة ابنچ خاف هو

خالتي شمت ابنها..

:- يوووووع الله يلعنك شگد خايس

خالة طوعة :- ليش تلعنينه ترا طفل وهاي الشي مو بيده

خالتي :- خل ياكل خ.... ملعب نفسي مليت من غسل الز......

علي زوج خالتي :- گومي غسليه ولا تحچين زايد

سلاسل :- حروب عفية غسليه وياچ غسلي لباس النايلون مالته والوصلة

:- اي بس انه اخاف اطيحه

امي :- گومي ولا تتعاجزين من ابن خالتچ

:- يمه اطيحه انه ماعرفله

خالتي:- عووذة شدعوة عليچ

امي ظلت تخزر وتنتر من بين سنونها، گمت رحت اغسله، مثل بيت جدي من اروح يبلوني بغسل جهالهم.

حاولت اسيطر نزعته اللباس النايلون والوصلة تفطس الاحياء ريحته.

غسلته بالگوة دبرتها لأنه سمين هواي ويبچي ماسد حلگه، ردت اگوم تزحلگت رجلي وطاح من عندي، راسي تفلش.

صرخ صرخة قوية راسه اجه بالصبه، سكر وصار ازرگ امي وخالتي ركضن خذته امه تصرخ.

سلاسل :- يمه يمه ابني ابنيييي

امي :- ومرض سل كون حيوانة مادبرتيها

الا شوي ابچي..

:- يمه ماگدرت اشيله متين كلش متين

خالتي عافت ابنها يبچي بالگاع ولزمت شعري وطاحتلي دگ راشديات تهضمت وظليت ابچي، حتى خالة طوعة اجتي عصبت، امي دفعت خالتي عني بسرعة.

امي بعصبية:- فوگ ما مغسلة خ.... ابنچ تضربيها والله ماتستحين انتِ

خالة طوعة بعصبية..

:- كسر بيدچ كون والله لو يشوفچ أكبر تلطمين وجهها، هو صياح مايصيح عليهن، كلشي ولا بناته

سلاسل عصبت :- انتِ انچبي ولا تدخلين بيني وبين بت اختي، والله حلوة البيت بيت ابونا والغرب حاربونا

خالة طوعة :- عتباااااار احچي ويه اختچ تحترم نفسها شنو غرب؟! حروب مثل بتي وهذا بيتي مثل ماهو بيتچ

امي خذت خالتي :- ابنچ ومابي شي ولا تكبرين الموضوع كافي لغوة

رحت عفتهم وركضت للغرفة ظليت ابچي بحرگة، شبعتني راشديات شگد تهضمت حتى امي وابوي واخواني ماضاربيني، وره شوي اجتني..

سلاسل :- عن الدلع گومي روحي غسلي لباسه النايلون والوصلة وشريهن

انه لساني من يحچي يفشگ.

:- روحي غسليهن بنفسچ ابتليت بابنچ

:- ولچ ترادديني!

لزمتني من ذاني وطاحتلي كتل، ظليت اصرخ وابچي، بدخلة تيجان للغرفة وهو يصيح وياه خالة طوعة..

تيجان :- شكوووووو ليش تصرخ حروب!

ببچي احچي واشهگ بحسرة..

:- شبعتني كتل

تيجان بعصبية..

:- لييييش!

سلاسل ببرود وهي تعدل شيلتها..

:- وزربة الجيش على راسك وراس الخلفك، خالتها وادبها لا تعلي صوتك عليَّ

تيجان:- واذا خالتي تجاوزين على ابوي فوگ ما ضاربة بته!

سلاسل :- طيحت ابني عناد وكسرت راسه، وبدال ما تعتذر گامت تبچي وتراددني

تيجان التفت الي باوع لوجهي..

:- هو طاح لو انتِ طيحتي؟

سلاسل :- طيحته عناااد حتى ماگلها شطفي مرة ثانية

:- والله العظيم ما ماقصدي اطيحه طاح مني لأن چبير ودبدوب

سلاسل رفعت حاجبها بعصبية..

:- تچذبيني يا ادبسزز!

تيجان :- وهذا مو سبب تضربينها احنه نأدبها وهي طفلة مو خدامة، وين تعرف تشطف طفل

سلاسل بعصبية..

:- طفلة لو دلوعة من بداية عمرها تتعلم الدنيا ما ترحم وباچر تعرس وماتعرف

تيجان قرب منها صوته ناصي بس يخوف..

:- يمكن انتِ باچر اتزوجين بتچ احنه مانزوج اطفال، والدنيا يمكن ما ترحم بس ببيتنا ماكو رحمة للي يمد ايده على بناتنا، وما نسمح تنكسر وحدة منهن، عدهن ثمان زلم يغطون عين الشمس

سلاسل كتفت ايديها..

:- توگف بوجه خالتك وتهدد ولك فصمة

تيجان :- خالتي على عيني وراسي بس مو تمدين ايدچ على خواتي

سلاسل :- يعني هسة راح تطلعني ظالمة! وابني الطاح وراسه انضرب!

تيجان:- طاح لأنكم خليتوا طفلة تشيل طفل وبعدين عاقبتوها لأن ماعرفت تشطف طفل؟!

سلاسل:- لو چانت شاطرة چان عرفت

تيجان صك على سنونه حاول يسيطر على غضبه..

:- الشطارة بالرحمة وهي ما عندچ، وهي طفللللة! تفتهمين؟ طفلة!

سكتت لحظة وبعدين شمرت الكلام القذر بهدوء وهي تباوع لخالة طوعة..

سلاسل:- خالة هاي مو تربية امكم لا ابد، تربية ناس وصخة وقليلة ادب، هاي تربية مرت ابوك واگف گبال خالتك وتصيح عليها

تيجان:- لا تجيبين سيرة مرة ابوي ولا خواتي

سلاسل رفعت صوتها..

:- يعني شتسوي تطردني؟ ترى هذا بيت اختي

تيجان :- هذا بيت ابوي وبيت امي وبيت خواتي وخالتي طوعة وانتِ ضيفة، والضيوف تحترم نفسها

سلاسل شهگت..

:- شوفوا شلون يحچي ويا خالته! كله منچ انتِ ام السحورة

خالة طوعة :- كلمن يشوف الناس بعين طبعه

تيجان:- خالتي مالها شغل، وجاي احچي وياچ باحترام بس لا تختبريني اكثر

سلاسل بنظرة سامة..

:- جاي تطردني من بيتكم!

تيجان :- ماطردتچ

سلاسل :- هاي اذا من هسة هيچ باچر لو ازوجت شتسوي؟ إلا اربيك واربي الخلفتك

راحت طلعت ورجعت هجمت على تيجان بشحاطة وهي تصرخ وتضرب بيّ، ادخلت خالة طوعة بينهم وملختها تملخ هلست شعرها، فرفح گلبي من الخوف.

صارت مشكلة، اجت امي طبت للبيت بعبايتها شكلها چانت طالعة طاحت من ايدها علاگة وراحت تفك بيهن.

فكتها امي من خالة طوعة هجمت عليَّ هنوب بالشحاطة..

سلاسل:- ما متربين انه اربيكم

طاحتلي كتل بالشحاطة على راسي، دفعها تيجان بقوة وصاح باعلى صوته..

تيجان :- جاي تفرغين حقدچ، لازمني خالتي وإلا اكسر راسچ

امي صاحت..

:- بسسسسسس! بسكم! ساعة السودة تلفين بس سوين مشاكل

سلاسل :- انه الكم ياعارات اطردوني!!

امي :- ولي الله لا يحفظچ شگد احترمتچ مايفيد

سلاسل :- يحرم علي اعتب بيتكم بعد

امي :- لا هلا ولا مرحبا فرگاچ عيد

راحت لجنطتها وزوجها يتفرج لتگول ابيته گاعد لا احترام لا رداها، خالة طوعة تضم بشعرها بالحجاب، تيجان صاح..

:- اطلععع بره انتَ ماعندك دم بيوت الناس الها حرمة!

أخذ ابنه ويريد يطلع وهو يخزر بينا، بنفس اللحظة دخل ابوي للبيت وراه اخواني شايلين جنطته وغراضه وعمامي دخلوا كذلك، الصياح لملم العالم، خواتي مسمرات مكانهن من الخوف.

ابوي :- شصاير؟ شبيكم اصواتكم لمت الوادم!

سلاسل بسرعة سوت نفسها مظلومة وتبچي..

:- ضربوني اولادك ياخويه وطردوني مرتك هاي شلعت شعري وملخت وجهي ترضاها وانه ضيفه عدكم

انه بس شفته ركضت شبگته وابچي واشكي بلا شعور وببراءة ما متعودة انضرب ولد عمتي من يتمادون شيسوي بيهم..

:- بابا شلعت شعري وكسرت راسي بالشحاطة وضربتني على وجهي

ابوي باوعلي وهو فاتح عيونه عالآخر..

:- لييييش؟! ومنو ضربچ هيچ؟!

امي ظلت تلطم خفيف على فخذها..

:- حروب ابوچ تعبان، لا تكبروها خالتها حاولت تأدبها وبس ماكو شي

ابوي عصب..

:- ومنو خالتها حتى تلطم وجهها هيچ؟ هااااا!

عصب ابوي وظل يصيح على امي وخالتي، رغم شگد محترم وياهم بس اليوم صار غير واحد، انه شرحت شكل وخالتي شرحت شكل ثاني.

سوت نفسها مظلومة وانُ تيجان غلط وتجاوز وضربها، وامي تحاول ادافع لاختها والي ولتيجان وظلت محتارة.

صارت عركة وهوسة وحچي عمامي ادخلوا وجدي اجه، خالتي طلعت وهي زعلانة لأن محد صار ضدي يعرفونها شنو من بشر، محد هماه زعلها طبعاً حتى امي، لأن كلها ماتحبها لا هي ولا زوجها.

ابوي انقهر وظل يتحسر وهو يفرك بخدي ويمسح على شعري الهلسته خالتي، خدي مزورگ واحمر وطبع اصابعها بقه اثره.

اللي مستغرب صاروا ضد حرمة شكبرها ويه طفلة، ابوي وعمامي وجدي كلهم مايرضون على بناتهم، حتى اخواني مايطيقونها، دوم تجاوز عليهم وعلى ابوي من ما موجود وتسب وتغلط.

خالتي معروفة خباثتها ومكرها عد الكل، بس ابوي محترمها لأن اخلاقه ماتسمح يتجاوز على حرمة وخاصة تنعد من اهله.

بالليل بعد العشه گاعدين بالهول وابوي يسأل على احوالنا واخبارنا، انه والبنات حوالينه مشتاقيله.

يسولفنا عن البحر وايامه هناك، طلع من جيبه شي ومداه الي..

:- هاي المن منو وصتني على حصان البحر؟

فتحت حلگي وعيوني من الفرحة..

:- الله! يجنن يابه شكرًا شكرًا احبك اموت عليك

انطاني حصان البحر مجفف صغير يخبل لونه مائل للجوزي، فد فرحت بيّ.

تيجان:- انطيني اياه اشوفه

:- ما ما تاخذه

تيجان :- اسوي الچ مدالية

:- لاااااا خاف تبوگه وماترجعه مالتي

تيجان :- ايا الفگر ماراح ابوگه بس اشوفه

ترفة :- وانه بابا

زمان:- وانه ليش ماجبتلنا

شامية تخصرت..

:- وانه شني لاگيني ماا ماا زعلت بعد

رشاش :- انتن لگيناكم يم حضيرة الدجاج

ابوي :- اسكت عن بناتي، ان شاء الله المرة الجاية اذا لگينا اجيبلكم

شامية :- وليش ماجبتلنا كل احنه

ابوي :- يابه ماكو ماشفنه منهن وهي وصتني مرة وتتمناه

:- الله شگد فرحانة بيك يابه نور بيتنا

ابوي ابتسم وهز راسه..

:- يمه من لسانچ المعسول

ضحكت وحضنته ابوس بيّ، كالعادة سوالف خواني وضحكهم وسؤالهم لابوي على كلشي هناك، وتيجان يگول اتمنى اروح بحر وياك.

نمت هالليلة وانه مطمنة وفرحانة بابوي وهمين حاسة بالأمان بوجوده، احب ابوي حنون علينا وطيب بشكل.

وسامة وهيبة دوم افتخر بيّ، كريم وطيب وخلوق ويوجب الناس ويحب الخير، ويعلمنا عالدين دوم.

وهو مو چبير بعده شباب بس هو تزوج من وكت وخلف هلكثر اولاد لأن چان يريد بنية وماجته فظل يخلف، هو ثلاثيني العمر هنا.

الصبح گعدنا مثل روتين كل جمعة، سباحة مفروضة علينا من قبل ابوي، بس لأن شتا يخلينه نسبح بس مرتين بالاسبوع، بالصيف كل يوم.

وكالعادة شرار يجرونه بالچلاليق اخواني للحمام ويصيح ويغلط عليهم وهم ميتين ضحك وابوي كذلك.

راح ابوي يم جدي وعمامي وانه طبيت للمطبخ، خالة طوعة تنظف بالسمچة الچبيرة الجايبها ابوي، حاطتها بالصينية الچبيرة وتصدفها ويتطاير حواليها، بينما امي تطبخ التمن.

گعدت گبال خالة طوعة..

:- خالة شنو راح تسويها؟

:- مطبگ تردين تتعلمين وياي؟

:- اي اي اريد اتعلم الطبخ

:- بس اخلص تنظيفها واغسلها

ظليت اباوعلها وانتظرها تخلص تحمست اتعلم طبخ، خلصت خالة وشطفت السمچة، ماگدرت تگصصها اجه تيجان طبرها بالطبر.

ملحتها وحطت عليها كركم وليمون بس، خلتها عل صفحة بالمعجانة غطتها بالصينية حتى لا تاكلهن البزونة، صاحتلي.

:- حروب تعاي شوفيني شسوي

هزيت راسي وگفت يمها، حطت جدر على السيباية حطت دهن تنكه جابت راس بصل فرمته ناعم حمسته بالدهن وهي تشرحلي خطوة بخطوة.

تكرمل البصل وحطت المعجون ويه حمسها اله حطت لومي بصرة بالهاون طحنته فرغته فوگ المعجون، الثوم كذلك دگته بالهاون صار مهروس، فرمت كزبر وكلهن حمستهن سوية..

كمل وخلته على صفحة، طلعنا بره على الحطب نگلي السمچ، حطت الحديدة اللي نحطها فوگ الچولة، جواها حطب شعلته جابت الطاوة وبدت تگلي.

خلصت مرغت السمچ بحميسة المعجون السوتها وحطت عليه التمن، اموت على طبخ خالة كل احنه نحبه، خاص مطبگ السمچ.

سمعت صوت ابوي اجه بالمطبخ وهو مبتسم..

:- راح يحوشني تسمم من أكل السمچ بس طوعتي طبخها غير

خالة خجلت..

:- يااا اسم الله عليك

ابتسم وبينت اسنانه الحلوة..

:- الله يحفظچ الي

:- احم احم وانه يابه

ضحك هو وخالة.

ابوي :- غير انتِ شوف ابوچ وعيونه وروحه

لزم وجههي بين ايديه ويبوس خدودي، وانه اضحك وخالة طوعة تگله خنگتها كافي.

سمعنا صوت مرة مو غريب طبت وهي تگول.

:- السلام عليكم، شلونكم

الولد كلهم :- وعليكم السلام هلا عمة

عمتي زهرة طبت للمطبخ..

:- هااا شلونكم

ابوي وخالة :- كل الهلا

ابوي :- هلا ام مسلم

عمة زهرة :- هلا بيك خويه، الحمدلله على سلامتك

ابوي :- الله يسلمچ، ادللي خويه

عمة :- ماكو اجيت يمك اسولف وياك ماشفتك جاي يم ابوي

ابوي :- مريت عليچ گالوا بالحيوان تنطيهن ماي واكل

عمة :- اي والله ياخوي راحن رجليه بهالحيوان شنسوي عيشتنا بيهن

ابوي :- الحمدلله على كل حال، الله ينطيچ القوة والحيل

اخذها وراحوا بالصالة ويسولفون وسالفة تجر سالفة عمتي وابوي كل شوي بموضوع، اخواني محد يتدخل بينهم سوالفهم بينهم وامي يمهم ماتحچي.

عمة زهرة :- اگول يبو تيجان حروب بعدها بالمدرسة؟

:- اي اكيد بعدها

:- وليش ماتبطلها مو كافي تعلمت، كبرت بعد وصايرة حلوة وتجذب نظر

:- صدگ تحچين! تجذب نظر؟! اكسر عينه اللي يباوع لبتي

:- بس الدنيا ماترحم وبدت تكبر ترا وتخوف العالم وطريق بعيد للمدرسة

:- طفلة بعدها! شنو ابطلها واظلمها وليش وهي من حقها تتعلم

:- شگد ما تعلمت مكانها بيت رجلها اول وتالي

:- شنو البنية خدامة ولبيت رجلها؟!

:- يعني راح تخليهن يدخلن كلية؟

:- اكيد اخلي بناتي يوصلن ويكملن هذا حقهن

:- ياحق ياخوي هاي احنه طلعونه وعرسنا شنو تاليتهن غير للهوش والعرس

:- ام مسلم خيتي شهالتفكير العلم سلاح يقاتل بيّ الانسان، العلم نور والجهل ظلام، يعني انتِ انحرمتي تگومين تحرمين!

:- هاي انتَ درست وماكملت، وهاي آنه ماكملت وعايشين نفس العيشة

:- هذا مو مبرر احرمهن من العلم

:- مو مبرر بس البنية سمعة وسمعة البنية اغلى من تعليمها، لو انكسرت تروح وما ترجع

:- السمعة تنكسر من قلة التربية مو من المدرسة

:- الدنيا ذيابه والبنية لحم طري

:- الذيب اللي يفكر ينهش نكسر نابه، مو ندفن البنية بالبيت

:- تحچي هيچ هسة، باچر إذا صار شي لا تلوم غير روحك

:- اذا صار شي الوم المجرم مو الضحية هذا الفرق بيني وبين هذا المجتمع

:- حچي كتب ياخوي الواقع غير

:- احنه نصنع الواقع مو نستسلم اله

:- خويه البنات مو مثل الولد، الولد يطلع ويغلط ويتصلح البنية اذا غلطت راحت

:- والله ياخيتي الغلط مو بالجنس، الغلط بالعقل، والعقل يتربى بالعلم

عمتي بصوت مستهزء..

:- عود خوش علم، شنو راح تطلع دكتورة؟ مهندسة وبالأخير تطب مطبخ

:- حتى لو طبت مطبخ تدخله وهي واعية مو مكسورة وتخلف وماتعرف تربي جهالها بسبب الجهل

عمتي انفعلت..

:- انه خايفة عليها

:- خويه الخوف اللي يمنع الحياة مو خوف هذا سجن

:- والسجن ارحم من الفضيحة

:- الفضيحة تجي من قلة التربية ومن الظلم، مو من الدراسة

:- انتَ كلش مدلل بناتك زيادة

:- مو دلال بس انه ناطيهن حقهن، وبشنو مدللهن غير شوفة عينچ

:- بس هالمجتمع ما يقبل وتعرف كلش زين

:- المجتمع اذا ما يقبل الحق، يتغير مو لازم نعدم الحق علموده

:- يعني هسة ما راح تسمع حچايتي؟

:- اسمعچ بس ما اطيع، ما مجبور، مادام بيَّ نفس اخليهن بحريتهن يختارن حياتهن، يكملن دراستهن، اليوم وباچر ولمن يصيرن فد شي، واللي يباوع بنظرة مو زينة انه اعرف شلون اخلي يندم، اعرف شنو تربيتي

:- مسؤلية البنات ومصرفهن مصرف چبير

:- غير انه جبتهن للدنيا واقدملهن وياريت موفي حقهن عليَّ، بناتي مو عبء اخاف اضيعه بناتي امانة من رب العالمين وامانتي ارفعها مو اضمها

:- زين بدون لف ودوران، انه رايدة حروب لابني

طلعت الصدمة بصوت ابوي..

:- شنووو؟!

:- مثل ما سمعت، ابني يتيم والبنية زينة وتربايتك ونريد نسترها من هسة

ابوي بشوية عصبية..

:- وشنو عريانة وتسترينها، ماتشوفين حروب طفلة

:- اليوم طفلة باچر تكبر، اريد احجزها لابني

:- تكبر وهي تدرس، مو وهي محجوزة فرض

:- وشبي الحجز؟

:- احترامي الچ خيتي بس ما اسمح احد يحجز بناتي هن مو سلع

:- زين عقد وبس لا عرس ولا شي، تظل مخطوبة لمن تكبر شوي

:- لا عقد ولا خطوبة، ولا حجز لا تعصبيني ام مسلم، تردين تعقدين لطفلة على رجال ماتوصل لفخذه، بناتي مو غنم حتى تنربط بعلامة

:- هسة شنو الداعي تكبر السالفة، كل الناس تسويها

ابوية بشوية عصبية..

:- وانه مو كل الناس، خارج هالناس

:- هو رايدها وانتَ خاله والولد يتيم ينكسر خاطره

:- يتيم ينكسر خاطره بالظلم، مو بالرفض

:- وابني خوش ولد، رجال وما عليه شي شايل عيبه

:- حتى لو ملاك عمره اكبر منها، وانه ما ازوج طفلة

:- ما راح تضرها بالعكس تفرح وتطمن عليها عند اخيتك

:- واطمن عليها بحلقة بصبعها؟! اطمن عليها بعقلها من يكبر

:- على الأقل انطيني كلمة، تحجزها لأ....

ابوي گاطعها..

:- لا تنحجز لا لأبنچ ولا لغيره، بناتي يختارن بنفسهن، بالوقت اللي يناسبهن

عمتي عصبت..

:- شنو يعني؟ تخليها تختار رجلها؟!

:- اي نعم مو حرام ولا عيب، واللي يشوفه عيب مشكلته هاي

:- ليش هيچ ابني يتيم وانتَ خاله، المفروض تنطي مرة

:- انطي مرة اذا چانت بعمره بس بناتي لا

:- شنو قصدك يعني ابني مو كفو؟

:- ما گلت مو كفو بس مو لبناتي شوفيلچ بنية بعمره وترضى بيّ

:- ليش رافضه؟

ابوي عصب..

:- لأن ما اريد استغيب واحد واكول شنو وليش، ولا اريد يوم اوگف گدام بتي وابررلها قرار مو قرارها

عمتي تعصبت..

:- خوش خليها تكبر وتضيع، لا تلوم غير نفسك

:- اذا تكبر بعلمها وكرامتها ما تضيع، بعد لا تسولفين وياي بهالموضوع، وعلم خل يوصل للكل بناتي مو للحجز ولا للزواج

:- ماراح اسولف لأنه منتهي، وبعد بيتك مادوسه

:- تزعلين لأن مارضيت باللي تردينه؟!

گامت لبست عبايتها على راسها وطلعت معصبة ورگعت الباب قوي فلشته، صار هدوء اخواني مانطقوا حرف.

چنت واگفة يم باب المطبخ نفسي محبوس، گلبي يدگ بسرعة، خفت بس بنفس الوقت حسيت روحي عالية بابا وگف وياي وگفة مثل الجبل.

خالة طوعة ساكته وتستمع الهم وياي، امي همين حتى اخواني ما تدخلوا لأن سالفة بينه وبين اخته وهو حسمها فمو من حق احد يدخل عالخط.

رحت يم ابوي..

:- بابا

دار عليَّ..

:- عيون ابوچ

:- ليش عمتي تگول عن ابنها يتيم مو ابو مسلم زوجها ما ميت؟

:- ابو مسلم الحقيقي مات من زمان، واللي وياها هسة اخوه هو تزوجها بعد ماترملت حتى يربي ايتامها، بس هو ابوهم كلهم، الثنين الأخيرين اولاده

انصدمت اول مرة اعرف انُ عمتي زهرة چانت ارملة ومتزوجة حماها، لأن زوجها يگلوله ابو مسلم، وهم يصيحوله يابه.

امي جاي تنظف خضرة، ضحكت ضحكة بايخة وگالت..

:- ابوه المات بگيعان الوادم واللي لگوه منحور ويه...

ابوي گاطعها..

:- حسچ يامرة لا تشمتين بميت ولا تستغيبينه، الغيبة للحي شكبرها هنوب لميت ماتجوزله بس الرحمة

سكتت امي ورجعت تنظف بدون كلمة، مافهمت والفضول اخذني شنو يعني منحور؟!

عقلي مليان اسئلة بس خفت اسئله ويعصب.

:- بابا ليش الغيبة حرام؟

ابتسم مسح على راسي..

:- لأن الغيبة مو بس مجرد حچي الغيبة اذى

:- هااا بس شلون؟

:- رب العالمين وصفها وصف يخوف گال بكتابه الكريم {أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتًا فَكَرِهْتُمُوهُ} (الحجرات 12) يعني تتصورين تاكلين لحم واحد ميت؟

هزيت راسي بخوف..

:- لا ابد

:- الغيبة هيچ تاكلين لحم انسان وهو ما يگدر يدافع عن نفسه لأنه مو حاضر وحتى بحضوره يجرح الكلام

كمل كلامه..

:- الإمام جعفر الصادق عليه السلام قال "الغيبة اشد من الزنا" لأن الزاني يتوب وربه يغفرله، بس اللي يغتاب ما ينغفرله الا اذا الشخص اللي آذاه سامحه

انقبض گلبي وخفت..

:- يعني اذا نحچي على الناس الله ما يغفرلنا؟

:- يغفر اذا توگفتي واعتذرت، بس لا تستهينين بالكلمة ممكن تدمر

:- والكلام يضر لهالدرجة؟

:- اي الإمام محمد الباقر عليه السلام قال، "الغيبة تأكل الحسنات مثل ما النار تأكل الحطب" يعني صلاة وصيام وسنين تعب وعبادة تروح بكلمة، والإمام علي همين وصه

بلعت ريگي بخوف..

:- والإمام علي عليه السلام شگال؟

:- گال "إياك والغيبة، فإنها إدام كلاب النار" يعني اكل اهل النار وگال همين "الغيبة جهد العاجز" يعني اللي ما يگدر يواجه يطعن ورا الظهر

كمل كلامه..

:- والنبي صل الله عليه وآله شاف ناس يوم القيامة أظافرهم من نحاس يخمشون وجوههم وصدورهم

سأل من هؤلاء؟ گالوله هذول اللي يغتابون الناس

كلش خفت..

:- يعني شنو

شداني لحضنه..

:- احنه مو هيچ ما لازم نطعن بالظهر، لساننا لازم يكون انظف من ايدينا، واللي ما يعجبچ ادعيله لا تأكلين لحمه

هزيت راسي وگلبي سعيد بهيچ أب..

:- بابا

:- نعم

:- انه فخورة بيك

ضحك باسني على راسي..

:- وانه فخور بيچ، بس خليچ دوم بعيدة عن سوالف الكبار، كبرچ علمچ مو حچي الناس

شرار بصوته الغيرة..

:- چلاب گاعدين احنه ماتبوسنه يابه

راد يحچي ابوي، فجأة گطع كلامه صوت صريخ مو صريخ عادي، صوت حرمة يخرط العافية جاي من الشارع عالي ومكسور يگطع الگلب، على صرخة وحدة وراها الثانية، وكأنه واحد ينصلخ جلده.

بابا طفر من مكانه تيجان وراه بنفس اللحظة ورشاش، كلهم ركضوا، امي ركضت على الباب..

خالة طوعة شهگت..

:- يا ساتر يا رب استر

طلعنا وراهم بالحوش الصريخ صار اقرب بابا طلع والولد وراه، واگفة بمكاني رجلي ما تشيلني من الرعب.

حرمة تصيح باسم ما ينعرف وما مفهوم، تصرخ وكأنها تشوف الموت گدامها، طلعنا للشارع انترس زلم وناس ونسوان......

يتبع