رواية عرين الصياد الفصل الثاني 2 بقلم شذرة العدوان

الفصل 2

بقلمي شذرة ألعدوان

ديالا: عفت الكتب واطلع ركض گلبي حسني هاي ليال المدرسه قاسمينها بساتر بلوك بس مو حيل عالي ما اجاني صبر الوف من الباب گمزت من فوگ الساتر ادحگ ليال لازمه ساره ودگ بوكسيات رحت اركض ويطفر گبلي مهدي اخو ساره ويايه بالصف تا يضرب ليال

وگضبه من ايده وافره فر تا بس اوخره ما يجوس ليال هديته وجان يگع بالگاع گام واجاني تايضربني دفرته على رجله ودفعته گال نعلبوج اليوم وارجع اجيت تاضربه ويجي سعد جلب بيه من اديني جاتفني عود يحاجز ومهدي استقل الفرصه ويضربني راشدي

سعد هدني وراح تا يضرب مهدي وجان اگضب سعد واجيبه براشدي ظل لازم وجهه وصافن

ومهدي جر ليال من شعرها تيوخرها من فوگ ساره مخليتها بتالي روح

من شفته تخبلت واروح اجيبه بدفره على صفحته

وانزع حذائي ودگ على راسه الا شالني سعد وخرني

اني وليال صارت حالتنه حاله الشعر مهوش والملابس

تمرغلت تراب

ليال -

كلشي ولا واحد يمد ايده على ملابسي الغاليه الي احبها كل شغلاتي غاليه عليه ومهتمه بيها وما احب احد يلزمها اغسل ملابسي بنفسي وارتبهم بنفسي

اذا تگع لطخه على قميصي اتخبل مو انوب ينشگ

ومنو الي شگه ساره وگعت عليها ضرب بدون تفاهم نتفتت شعرها نتف فقدت اجت ديالا وهم تگاضبت ويه مهدي وبعدني فاقده اضرب بساره وهيه حاطه أديها على وجها تامخرمشه وتصيح اجه مهدي جرني من شعري وتجيت عليه ديالا تضربه

ديالا

وگعت مهدي على بطنه وگاضبه راسه ادج بي بالتراب اسمع استاذ صائب ينادي هييي هيي اجه يركض هوه وست رافده وباقي المعلمين صاح علينه اني گمت گوه اتنفس وگلبي يطرد حجز بينه وجان نگف بثبات ويلزم سعد ومهدي كل واحد راشدي معدل وسعد خشمه واثمه متروسات تراب ويمسح بعيونه ويتفل تراب

وأني وليال حصلنه رزاله

دنگت بفشله وجريت ليالي بصفي .و ساره گامت تبجي وحالتها حاله نافشتها ليال نفش شعرها الف مشط ما يسرحه بعد

ساره صف سادس من غير شعبه اكسل طالبه بالمدرسه الي بگدها راحو ثالث متوسط

ليال :ساره بكل عرامه تگله هيه البدت وتغلط علينه

ما تعجبت من اتهامها كل نوبه هيج ضربني وبكا وسبقني وشتكا

اخوها مهدي گال اي صحيح

ديالا :--وجعي كون ليش تجذب انته مو جنت بالصف ويانه!!

استاذ صائب حط اصبعه على اثمه وبعصبيه گال ولا كلمه وخزرني دنگت وامسح بشعري وانفض بليال صد على مهدي گاله ياريت تبلغ اهلك واحد منهم يجيني باجر

مهدي گال استاذ مايحتاج اعتذر وبعد ما تنعاد وساره ورا متغبيه

استاذ صائب بصوت عالي وعصبيه گاله يحتاج ويأشر بأيده بحرگة التهديد يجي ابوكم باجر ونتفاهم هاي مو اول نوبه

وانته حسابك عسير شجابك عألابتدائي و تضرب بنيه

جاوبه مهدي استاذ هاي مو بنيه بلوه ما ادحگ حالتي جگمتني تجگم (ضربتني بقسوه) وگام يبجي اسليمه و ساره گامت تتوسل وتگله اسفه وبعد ما تنعاد وتبجي

استاذ صائب گال كلمه وحجيتها اهلكم باجر اريدهم عاف وراح

ديالا :ساره صدت علينه گالت حقيرات كله منجن وجان تتفل وتولي جيتت عليها انوب ويجلب بيه سعد گال كافي

دفعت سعد و نفضت نفسي واعدل بملابسي والم كتب ليال من الگاع وكريمه تگول عوفنها تولي

ديالا لاوالله اليوم بسببها اول مره انضرب هينه (بسيطه) لج ساره

ليال - انقهرت قميصي الحلو انشگ وجتفي طالع ارداني هدل برطمت وارفع القميص على جتفي ويرجع ينصل

ديالا :امشي ليال نغسل و انضف انفسنه قبل لا تشوفنه جوانه وتسرسبهن لمهره وتجي ركض تبطلنه وتخلينه فلح بالگاع

ليال: ابشرج.شافتنه ذيج واگفه ادحگ علينه ومكشره

ديالا :بلعت ريگي انتهينه بعد وجان الوحلها بأيدي الحركه مال بيباي نادانه استاذ صائب ليال ديالا

جفلنه وبصوت واحد نعم استاذ

گال تعالن

ديالا :بلعت ريگي انتهينا منا جوانه ومنا استاذ صائب گلت لكريمه ازحمج تظلين يم الجهال وتنتظرينه گالت ميخالف بس لا تتأخرون هزيت راسي اي

رحنه گال الحگني يمشي بثبات وشايل سترته بأيده ودفاتر بأيد نمشي ورا وخجلانين من تصرفنه صح احنه دوم مشاكل بس اول مره يشوفنه استاذ صائب بهل منظر وحده ادحگ على وحده ومنعرف شراح يطلعلنه

وصلنه الصف ذب الكتب عالرحله گال اگعدن گعدنه عالرحله حط ادينه عالرحله والقلم بين اصابعه يطگطگ بالرحله

وأني وليال مدنگين فشلانين خيبنه امل الأستاذ

استاذ صائب صاحب فضل علينه هوه الي قنع اهلي يخلونه ندرس وتكفل بينه. اهنه جانو رافضين ندرس عبن مختلطه وصارت مشاكل وبنات انكتلت وعشائر اطشرت بس استاذ صائب گال بحمايتي وتحت عيني

ونادانه عالصف عبن ما نگدر نحجي مشاكل المدرسه بالبيت هاجر تفتن علينه

ديالا :- واني صافنه بزماني افكر شنو يطلع منك استاذ صائب راح تبطلنه خلص احنه انتهينه

ما حسيت الا مد ايده لزم وجهي وداره بصفحه وشاف اصابع مهدي الخمسه مطبوعات بوجهي تعصب وعگد حواجبه ويستغفر وينفخ وجان يفرگ گصته گال خوما زعلتن من رزلتجن

ديالا: احس الدم رجع براسي هزيت راسي لاا

گال أسمعي ديالا انتي طالبه شاطره ومن احسن طلاب

استاذ خلدون احسن حت من اخويه سعد

ولا تعبالن (عبالكم ) اجاملج عبن بنات خالتي

لا والله بس هذا الحق صح امجن مو خالتي بس والله اعزها اكثر من خاله صبره

خجلت ودنگت راسي واعصر بالتنوره شكراً استاذ

قاطع حديثي ودار وجهه على ليال وانتي يا ليال من احسن طلابي واني مفتخر عندي هيج طالبه مرتبه من جنطتها وكتبها ولبسها ونضافتها

حت الطلاب گامو يغارون منج ويحاولون يصيرون نفس ترتيبج

ليال - ابتسمت ابتاسمه من الأذن للأذن

كمل وگال عاد أسمعن تأخرجن عن الدروس والشكوه عليجن من الطلاب هاي كلها تأثر عليجن وعليه وشدد على كلمة عليه يوميه مصارعه ويه وحده حت الولد ما سلمو منجن وگف وجان يلوح بيده بحركة استفهام

وگال الا عاد صدگ انتن شون تصارعن ويه ولد ذاك اليوم كاتلات ابن حجي حسين مو عيب بابا انتن بنات

واليوم المصارعه ويه طالبه اكبر منجن وهاي مو اول مره انتن وهل طالبه تتكاونن عيب بابا وجرها كلمه طويله عيييب شتگول عليجن الناس بنات ملا درويش رايحات يدرسن لو يصارعن احجلي شنهي القضيه

ديالا-- معدتي مغصتني من گد الأحراج

گرب راسه باتجاهي گال شو ارفعي راسج واحجي اليوم ما نطلع من هين اذا ما تحجين لو اخلي حميد يبطلجن

ديالا :رفعت راسي وخنگتني العبره لا عفيه استاذ لا تحجي الحميد هوه بس يريد حجه يبطلنه گمت اشاهك ابجي وأمش دموعي وخشمي برداني

دحگلي مكنش يمكن لعبت نفسه مني.او مو يمكن صدگ لعبت نفسه

طلع.جفيه (منديل) من الستره وگال هاج امسحي بهاي وكافي تناشغين فيضتي الصف دموع اريد افتهم يابه مجاي اكاونج هسع ميخالف انتي والبنات مكافش الولد شون تكتليهم انتي بنيه يا بابا

گتله استاذ والله اني معليه همه يعيلون

مره ساره گالتلي توسطيلي يم استاذ صائب مو هوه ابن خالتج گليله خل يزود درجاتي ويعبرني الصف

واني ما فعلت گلتلها ادرسي بذراعج مو فالحه دحگين عالولد وما تدرسين

ردتلي وزعم انتي دارسه بذراعج همه گرايبج يحطولج درجات وينجحونج

ومن ذاك اليوم شدت ويايه وگامو الطلاب يعيروني ام الواسطات يعبالون انته وست رافده تنجحوني بدون ما ادرس

هيه تسوي خباثه استاذ تحرض حت طلاب الأبتدائيه يعيبون لجوانه

گمت ابجي بزياده ونسيت الجفيه ومشيت دموعي برداني انوب وجان يكنش خشمه (انقرف)

وأشرلي بحواجبه عالجفيه

صد على ليال

ها وانتي ست ليال شعندج اليوم بارزه عضلاتج

واني اگول افقر منج ماكو

ليال: -بلعت ريگي وشاده على شفايفي ومگدر ارفع راسي جفلني گال احجي جاوبته وبدون ما ادحگله

ما عندي شي وياهه استاذ هيه خبيثه ولحالها تعدت عليه

استاذ صائب شو بالله دحگيلي

رفعت راسي گال متأكده

ليال :- عيونه حطهم بنص عيوني لأول مره ورجع گال متأكده ورفع حواجبه

بلعت ريگي الا حنجرتي طگ اي متأكده هيه تمادت دحگ استاذي شگت قميصي وشوفته الشگ وجتفي طالع

هز راسه ويدحگ بصفحه وعض شفته بعصبيه

ليال: -خنگتني العبره گمت اعددله بأصابعي شوف استاذي منا گعدت على صوت العگرگ امل وهاجر ومنا جوعانه طلعت بدون ريوگ

گمت ابجي واناشغ وافرگ بعيوني طلع جفيه وانطاني هذا شگد شايل جفيات

ابتسم وحگ خشمه ولحيته گال اي كملي

ليال :-اي استاذ هم تعيرني ام الواسطات وتذب عليه حجي زعم اني اريد اخوها وجان اختنگ واگوم ابجي بنفعال گتله واني اكره اخوها ابو خشه الجايف من بده الشته ما سبح محمض قميصه صاير اسود عاد سحلتها هيه واخوها گدام البنات وصارت تكرهني

ضحك بصوت عالي على سالفتي وفرك عينه حط ادينه بجيوبه وگال يالله هدي هدي مصار شي واني الهم بعد اصارع بدالجن مشي دموعج

وگومي نطلع اليوم تذبين ضيم الجوع بينه

ليال: حطيت ايدي على اثمي وضحكت واني ابجي وگتله اسفه استاذي وديالا هم ضحكت ومشت دموعها

احنه حيل نحب الدراسه وعايشين بخوف لا يبطلونه

طبب على جتفي گال ولا يهمج روحن نفضن نفسجن وغسلن تره صايرات سعلوات

ديالا :رحنه غسلنه ونفضنه

ليال :-- دلو ما عندج دنبوس بس اجلب قميصي بي

ديالا :-لا والله ما عندي عود البسي جنطة جاهد خليها على جتفج ليما نصل البيت

ليال: -ديالا تره الراشدي حيل طابع بوجهج

ديالا: -حطيت ايدي على وجهي اي اعرف وجهي منمل عبالك مبنج غسلت وجهي وبگلبي اگول هينه الك مهدي انته وسعد

ديالا :-طلعنه لگينه كريمه وسعد والجهال واگفين ينتظرون

واستاذ صائب وياهم المدرسه صفت محد ظل

جوانه من شافت عيون ليال مورمه گالت للوش عش تبجين

ديالا :جاوبها استاذ صائب كتلتهن عبن ما كاتبات واجباتهن وانتي صيري سباعيه اكتبي واجباتج

جوانه -اي اني اكتب اقلا وادلس (اقرا وادرس)

جاوبها يابه فديت القلا وادلس شو تعاي شهل خدود والجمال دنگ عليها باسها

اجت ست رافده شهل اناقه والجمال والنزاكه سلمت علينه وهم لزمت جوانه تعصر بخدودها هوه منو ما يحبها جوانه جنها التفاحه بيضه الشعر اشگر وخدودها ورديه وعيون عسليه والسانها الخبر العاجل

واليوم تنعل سلفانه وتحجي لمهره كلشي

استاذ صائب گال لست رافده اخذي سعد وكريمه وفوتو گدامي اني راح اوصل البنات

سعد گال اني اوصلهن

ديالا: عوجت اثمي وگتله لا تسلم سعد روح انته خاف تلگالك كونه تا تحاجز ضاج وراح عشتو وما تضوج

استاذ صائب ضحك گاله اليوم اني اوصلهم

واريد امر المزرعه نجيبنه هاي هاي

اشو العالم زارعه رواحة اوادم ومحد يدزلنه عشتو

ولا جن گرايب

ديالا: -ضحكت گتله استاذ حقكم بس هم ابويه ما عنده احد الولد كلمن بشغله وحميد من يجي مجاز يخلصها سفرات والفلح يادوب يلحگون حت مهره گامت تساعدهم تلگاهه 24 ساعه راكبه الفرس تودي اكل وتشرف عالعمال ويه ابويه

حگ راسه وحط ادينه بجيوبه گال هم صحيح ذاك اليوم شفتها راكبه الفرس وتفتر عالعمال توزعلهم اكل صلاوات عالنبي صدگ مهره وتسابق الريح واني رجال وما اعرف اركب الخيل مثلها وضحك

ليال: يالله نمشي شنو نبات هين تره وصلت حدها بالجوع

استاذ صائب ضحك يالله مشينه ام بطن والله حت اني جوعان حتمال اكل جوانه شهل خدود گيمر وجان تگول جوانه لاااا عمو اني مو طيبه اكل جاهد اني بيه ليحة(ريحة) شخا

ديالا :جيتت عليها وجان اسد حلگها

گتله شخاط بيها ريحة شخاط دخان التنور تسمي شخاط گوه تلافيت السالفه لا يفتهم جاهد ويلزمها و

مشينه وهاي مجلبه بيه تعبالي صدگ ياكلها استاذ صائب وهذا يفتحلها حلگه عود مثل الأسد ويأشر على اثمه يعني اگلج عمم

وهاي متغبيه ورايه وتعصر بتنورتي ونصلتها

لزمت تنورتي بأيد وايدي الثانيه شايله كتبي

مشينه مسافه وهاي مجلبه بيه وتتعثور رادت توگعني

استاذ صائب گاللها تعاي جوانه اگودج

جوانه ما اليد تاكلني

جاوبها لا اني ما اكل بس الجهال الوكحين العاقلين احبهم گالت اني عاقله والله گاللها عجل خلص ما اكلج گوه قنعها وراحتله وانطته بس اصبع واحد خايفه منه گادها

ليال-:- اني شايله كتبي وجنطة جاهد خليتها على جتفي تا مايبين الشگ وينصل ارداني وامشي سريع گدامهم وهذول يمشون مثل السلحفاة متعافين واني سمط بليسي الجوع گمت ما اشوف ناداني استاذ صائب امشي على كيفج يابه لا تگعين

التفتت عليه گتلها لا استاذي ما اگع ابتسم ورجع يدحگ على جوانه

ديالا :-استاذ صائب يسئل جوانه شنطوج دروس

گالتله ميزان قدولي

گال عفيه اكتبيهن وصيري شاطره اذا رسبتي اكلج تره

وگفت گدامه وجان تحضن رجله لا عمو لا تاكلني اصيل شاطله وگامت تبجي وبرطمت

گعد بمستواهه وگام يراضيها ويمش دموعها وجان يعضها من خدها گال غدي (عيع) مو طيب بطلت معد اكلج

كيفت وصفگت بأيدها هيي

ردلها بس اذا سويتي نميمه اكلج

جوانه ردتله شنو نميمه معلف

گاللها علوم اذا تسوين علوم

اكلج

گامت تبجي لاا عمو اني ما اعلف شنو علوم.

گاللها من تحجين لأهلج لأبوج اي شي يصير بالمدرسه او يسونه اخوانج اخواتج هذا يسمونه علوم ونميمه عاد يورج الله بالنار وما يظل عدنه جوجو الحلوه

ديالا: انصدمت حجه هيج استاذ صائب يعني اجه ويانه حتى يعلم جوانه تبطل علوم عبن يدري بيها الخبر العاجل مو جوانه ضيم حت استاذ صائب مدخلته انذار ج حلال عليج ام العلوم

ليال: استمعلهم و هزيت ايدي بملل وطافره روحي واحجي بگلبي لا اليوم لو نلحگ بالعشه لوما نلحگ حت الغده معد افكر بي ظل بالي يم العشه

گمت اشوف الشمس بنفجسي من الجوع وگلبي گام يهفت ورجليه صارو خيوط

ديالا: جوانه گالتله لا عمو ما اسوي علوم والله

گاللها وذا سويتي تره يصلني الخبر ها تره الله يشوفج من تنقلين الحجي

جوانه -لاا عمو لا وجان تصد عليه تريد العون مني غمزتلها بحواجبي اجه من يصگرج

گاللها اذا صرتي حلوه وشاطره وما تسوين نميمه يدخلج الله سبحانه الجنه

كشرت وگالت شنو الجنه گاللها حلوه بيها العاب ومراجيح واكل طيب

جوانه گلتله وبيها وبيها بابا گاللها اي كل الي تحبينهم بيها گالت هييي شكلن عموو

گال لا تگوليلي عمو گولي استاذ

ماشي استاذ

گرصها من خذها وگال اي عفيه وگفت گدامه لزمت ايده جنها السنفور گوه تبين ومكشره عفه استاذ

ملجحوني. (مرجحوني ) خزرتها وعضيت شفتي واشرتلها عيب

استاذ صائب ضحك وشافني من اخزر بيها گال عوفيها وتعاي الزمي ايدها تنمرجحها

ديالا :

يربي شگد عيب صح استاذ صائب يصير ابن اخت صبره مرت ابونه واستاذنه بس يظل غريب وعيب

گال يالله شبيج لزمتها وبگلبي اگول دواج مهره بس خن نصل حطها بيناتنا اني لازمه ايد وهوه ايد ونرفعها وهاي جنها السنفور رجليها يطوطحن وتسوي هييي وتغني جاهد الخبل يلعب بالزبل

جاهد جيت عليها تا يضربها وصاح بي استاذ صائب

شگت فشلة يربي ولا تسكت واستاذ صائب يضحك مكيف فحيت عبنها دبدوب هديتها

ليال:

الجنطه كل شويه تنصل ويطلع جتفي

وگمت اتمايل من الجوع صار الطريق شطوله وهوه مسافه زغيره ما يشبعني رگض وبيتنه اشوفه گبالي مثل السراب وهذول عبالك طالعين سفره فورو دمي

ديالا:

جوانه گامت تتوسل تريد انوب گاللها استاذي كافي اختج تعبت وجان يشيلها

ديالا بگلبي حجيت خلفله عليك دنيا واخره

ليال:

وصلنه مزرعتنه صايره بوسط بستان النخل بين المدرسه وبين بيتنا

قطعه من الجنه كلشي نزرع بيها

بالصيف باميا وطماطه ولوبيا وخيار طرعوزي وخيار مي وبطيخ ورگي كل ثمار الصيف نزرعها

وبالشته خس وبيتنجان وجزر وكل ثمار الشته

وحاليا زارعين ثمار الشته وزعيمهم الخس الي احبه

الگاع جبيره وابويه مخلي بيها فلح كل صفحه 12 فلاح بوكت الحاوي (قطف الثمار)

شفنه ابويه ومرينه نسلم

جوانه من شافته جيتت بحضنه شالها تبوس بي وگامت تجر بلحيته وشواربه گالتله جابوني مشي محد شالني فحانه (تعبانه) نزلها وراحت تگرط جزر منضفه ابويه ومخلي بصندوگ تايجيبه للبيت ولا جنها سوت شي

اني وديالا فشلنه فشلت عمرنه شگد عيب عجل والمراجيح بالطريق واستاذ صائب الي نمتن وهوه شايلها خطيه والمواعض الي حجاهه فتح عيونه مصدوم

استاذ صائب گال احم الي يجذب الله يذبه بالنار

اجه على ابويه سلم عليه شونك ملا درويش

هله هله بستاذ صائب زين يابه شونك انته علومك امورك عاش من شافك

گاله بخير الحمد لله تعيش وتشوف

ديالا:

رحنه اني وليال على ابويه وبسنه ايده وخلينا على راسنه حضنه وحط ادينه على كتوفنه وباسي راسي اني وليال ويصد على كله وحده ويسأل هله بناتي السبعات شونكم يابه

جاوبنه ثنينه الحمد لله جاهد واگف مبرطم زعلان عبن ما خلينا يكتل جوانه

ناداه ابويه وما فعل يجي راح يشلع جزر

ابويه سئل استاذ صائب شون بناتي بالمدرسه

استاذ صائب حاط ادينه بجيوبه وگاف بثبات جنه الشرطي ابتسم گال ليال برد گلبك من يمها اشطر مني راح اسلمها الصف وضحك هوه وابويه

ليال : اني خجلت وابتسمت وانتفخت صرت طاووس

لحد ما جوانه گالت جذذذذب للوش كسلانه هيه ودلا أاليوم كتلهن استاذ بالعوده وللوش گامت تبجي يحطك الله بالنال عمو الجذاب ورجعت تگرط جزر ومكشره

يتبع.....