رواية عرين الصياد الفصل التاسع والعشرين 29 بقلم شذرة العدوان
اهلا بكم في مدونة مكتبة حواء نقرأ لكم ونكتب من اجلكم
عرين الصياد
الفصل 29
بقلمي شذرة العدوان
ليال : الكل مصدوم ومبهوت ويدحگ على ماجد
والمراه الي ويا
نضال وگعت ومحد صد عليها
وشكحه تصيح وست رافده واستاذي واحد يدحگ على واحد واني وكريمه وسعد كلشي مفاهمين
وماجد حاضن هاي المرأه شطولها توصل يم رگبته
ويشاورها وتضحك ولازمه ايده وطگ بعلجها ودحگ علينه
ماجد : راح تظلون هيج واگفين وادحگون علينه تاخذولنه صوره شنهي
اجه بركات من بره جان يم غازي دحگ على نضال امدده ودحگ على ماجد والمراه
بركات : شكو شبيها نضال وهاي منهي يمه شبيج تصيحين
ماجد : شو ما سلمت عليه يالفاهي هاي اهلي كيفو بجيتي ومرتي نضوله خربت من فرحتها
بركات : شلونك الحمد لله ع سلامه هسع فهموني شكو
شكحه : شوف اخوك شسوه تزوج رگاصه هجم بيتنا خزانه عد تالي عمري الي يشوف طوله يبات بفيه وهو عقل ما براسه
ماجد : اهلي شمسوين غده تره جوعانين اني ومرتي
بركات : هاي امي شجاي تحجي
ماجد : ما ادري احسها ضايجه
شكحه : لا يوليدي بروح ابوك گول انك تمزق مجودي عليك الله
ماجد : بركات فوت الجنط جوه عفه
تعاي توحتي خن نگعد بهل هول اهلي صايرين فرند نوب بدون احساس ولا گالو متغدين ولا شي بس صافنين بينه عبالك اول نوبه يشوفون حلوين
ليال : خلاهم على صدمتهم وگاد المراه وفات عالهول وينادي يريد غده
بركات : صائب فهمني شكو يمعودين وهاي نضال شبيها ميته
ليال : انتبه استاذي وجان يدحگ على نضال وعاط ابركات
جاب بركات مي ونفضه على وجها وجان تصحه وادحگ علينه گامت وتمسح بوجها وترجف
ماجد : يمعودييييين اكو غده
ليال : راحت نضال عالهول واحنه وراهه شافت ماجد گاعد وتوحه بحضنه وابصبعها تخط على وجه ماجد وتضحك
نضال جيتت على توحه وتلزمها من شعرها وتنزلها بالگاع تسحل بيها
نضال : يا *** يا **** شجابج على رجلي ام الزلم
ليال : ماجد ظل گاعد ويضحك وجان يورث جگاره وتوحه گامت و لزمت نضال هلس من شعرها وتكفخ تگاضبن بالهول وحده نتفت الأخرى ومحد يحاجز اني لزمت ايد استاذي واعصر بيها گمت اخاف
شكحه : يمه تمنجدنه بالعرب تخزينه صارت سمعتنه بالطين
ماجد : يمه بس وخري من دربي خن ادحگ زين شلون يتكاونن بس وخري شو
صائب : شهل مهزله اسوي شي تحرك راح تلتم الناس على حسنها
ماجد : لازم نزعجت حضرة المعلم
معليك انته لا تحشر روحك نسواني بينهن جاي يتفاهمن وخل الناس تلتم اريد افضفض
ليال : هذني متگاضبات ومحد تفعل تهد رفيجتها وماجد مرتاج ويحجي ابرود ويدخن وبركات واستاذي مستحين يحجازون بينهن هاي توحه ثوبها فوگ الركبه وكل شي يرتفع ونضال صدرها طالع
وشكحه تصفگ على رجليها وتلطم ثنت بالگاع وست رافده واگفه بالباب وما تعرف شتسوي
نضال گامت تصيح عبن نغلبت
وگعدت بالگاع وگامت تلطم وتبجي
نضال : ليش هيج ماجد تزوجت عليه شناقصني وانوب وحده لا اصل ولا فصل رگاصه من ال****
ماجد : نضوله سوينه غده توحه جوعانه
نضال : شجاي تحجي شجاي تحجيييي شسويلك غده وانته متزوج عليه
ليال : انفعلت نضال وگامت تشيل بروحها وترجد وتوحه عدلت شعرها ونفنوفها وراحت گعدت يم ماجد اخذت الجگاره منه وگامت ادخن ظليت فاتحه اثمي
ماجد : يمعودين اكو غده لو لا
شكحه : ماكو غده تعال فهمني منهي هاي الي جبتها علينه مصلخه وتشرب جگاير لا حيه ولا مستحه وانوب تگول مزوجها شبيك انته جاهل اسفي على رتبتك
ماجد : اهوو عاد يا طلبة الگشره گومي توحه خن نروح عالجيران نسلم عليهم
ليال : گامو تا يطلعون وجان شكحه تگف بالباب وحطت اديها
شكحه : وين موليي
ماجد : وخري يمه نروح عالجيران هم اتغده وهم اعرفهم على مرتي توحه الضاهر انتو ما عدكم شي واحرجتكم مو
شكحه : لا عدنه كلشي عدنه امشي يرافده
سويلهم غده وانت ارجع اگعد
ماجد : لا تكلفون نفسكم يمعوده هم لو خبزه وطلي
تعاي توحه نگعد فرجت الضاهر شگد ما يستحون اهلي غدي
ليال : گادها وهيه تمايل وجان تگعد وهو مدد وحط راسه على رجلها ويدحگ على اهله ويغمزلهم بحواجبه
ماجد : توحه خاف اغفي من يجيبون الغده گعديني
ليال : گامت رافده بساع عالمطبخ تسويلهم غده
ونضال مثنيه وتلطم تريد تستوعب وماجد متجاهلها
ماجد : توحه خليني اعرفج على اهلي گبل لا انام
هاي امي اسمها شكحه زعم هيه جبيرة البيت بس الأسم كفيلك الله
وهاذ الواگف بالباب ومخنزر هاذ اخونه الجبير زعم الأستاذ صائب مربي الأجيال بس ديري بالج منه تره عينه زايغه ويفقد عالحلوات بحيث طالبته ما سلمت منه
وهاذ اخونه بركات رجل كرسي هين محد يشوره بشي وما نشوفه بس وكت تصير طلبه يجي يحاجز
وهذيج الي زعم راحت تسويلنه غده الخانگه نفسها بالربطه هاي اختي رافده
حبيبة اخوها صائب الي ما ترفضله طلب
وهذول كريمه وسعد
اما هاي الحلوه الي جنها الحوريه
هاي ليال مرت اخوي العود
ليال : من وصل السره عليه ظل صافن بيه بعدين كمل
ماجد :وهاي الي مثنيه وتلطم هاي ضرتج نضال
يوميه اريدجن تگاضبن دير بالجن تصيرن خوات
لازم انام واگعد لا طلايبجن
ليال : لطمت وجها و راحت سدت باب الصاله وگالت لبركات واستاذي لحد يحجي ويا هسع
بركات : شلون ما نحجي ويا راضيلج هاي المهزله الضاهر
شكحه : يول مو راضيلي خايفه يلم علينه الجيران ويمنجدنه اووف يهالعثره يبوو منين اجتني هاي الصگعه لو ميته ومو شايفه هاليوم اسمعو ضحكها هاي المعثوره يبووو يصگعتج يشكحه
ليال : تربعت شكحه بالصاله وتبجي وتنعي
ورافده كملتلهم الغده وجابته الهم تغدو وشربو الجاي ونضال الا طبگ حسها من البجي ادحگ عليهم وتشاهگ وتفرك بأديها
اهلا بكم في مدونة مكتبة حواء نقرأ لكم ونكتب من اجلكم
طلع ماجد وهو گايد توحه فات عالحجره
وسد الباب وگمنه نسمع صوت الأغاني طربگه وضحك توحه يلعلع
نضال راحت وگامت ترجد بالباب وتصيح ومحد فتحلها قرفصت بالباب وتبجي وتلطم وشگت ثوبها محد راح يمها كلمن ملتهي بمصيبته
بركات : هسع شراح نسوي هاذ ماجد تخبل من گاعه
وتالي
صائب : هاذ تالي دلال امي الي جانت ما تخليني احاسبه لحد ما تفرعن من جنت اگللها ماجد مصاحب بنات الليل ما تصدگ خلها تفرح هاي جابلها بنت الليل جنه
شكحه : وزعم انته الخوش مو هم تزوجت هاي
ليال : گالتها واشرت عليه وعاط بيها استاذي
صائب : يمه من كل عقلج تجيبين بنت الليل يم ليال كل عقلج
بركات :كافي يمعودين كافي مكاون وفكرو بسمعتنه بين الناس
نسيتو عدنه خوات بالبيت منو بعد يگلبهن واحنه منو بعد ينطينه نسوان عگب الي سواه ماجد
صائب : خلي هالحجي بينه ولا تثيرون السالفه
مو لازم العرب كلها تدري
بركات : لازم هيج نصير كلنه طوع ماجد
صائب : مجبورين
بركات : كله بسببك
صائب : كافي انلصم
ليال : گالها استاذي وگام عالحجره
رحت وراه شفته گعد بالگاع ورجه ضهره عالحايط ولازم راسه
دحگ عليه وگال
صائب : ليال عود ديري بالج الگاج بنصهم
هاي المرأه وماجد ونضال وين ما تشوفيهم غيري مكانج اذا يطبون لحجرتج عوفيهم واطلعي
ليال : هزيت راسي بــ اي
امل : حطيت ايدي على اثمي هاذ شجاي يگول صياد
گمت وجان اخذ فره بالصاله واعصر بأديني رجعت گعدت انوب اتصنت
صياد : نريد نخطب بنتكم ديالا على سنة الله ورسوله لأخوي شاكر
امل : من گال شاكر گلبي برد عبالي بالبدايه اله
الحمد لله يربي
مر وقت وما اسمع جواب من عماد وحميد گمت احوص كفيت البرده شوي اجه گبالي صياد
جانت عيونه مثل عيون الصگر اي والله مركز بيهم مثل الي يريد يفترسهم
صياد : ها ابو علي
عماد : والله يا ابو نشمي فاجئتنه صراحه
صياد : انتو خوش ناس يا ابو علي واني عاجبني نسبكم ويشرفني
عماد : النه الشرف ابو نشمي منهو يردكم انتو عالراس وكلها تريد نسبكم بس البنيه بعدها زغيره وجاهله ما توالمكم ابد ياردلكم مره فاهمه
صياد : الي ادري بي انتو زوجوتو اختها الي ازغر منها
ولواحد هو بالعمر اكبر مني
عاد هاي اكبر من اختها واخوي شاكر بعده زغير ويوالمها وذا البنت جاهله احنه نعلمها على اطباعنه وعاداتنه اما العمر لا تحجيلي بي ابد
امل : يحجي ومركز عيونه بيهم ويعصر بالسبحه
قصده كله على ليال من يحجي عض شفته وصد بصفحه وعماد وحميد محد بيهم جاوب
صياد : اني جيتكم وگلت الي عندي تشاورو بينكم وردولنه خبر وذا تراهمنه نجيكم ان شاء الله وذا ما فعلتو هاي ظلت يمكم محد جابركم على شي ولا يظل بالكم يمنه نظل حبايب
والبنيه الزينه كلها تريدها وتخطبها وبالنهايه كلشي قسمه ونصيب
يالله يا شيخه نمشي بطينه جثير
عماد : وين ابو نشمي تراك گاعد
صياد : اشغالنه جثيره يابو علي
ورغم هالشي جيتكم اريد افرح بأخوي واني اختاريتكم من بين ناسي وهلي
عماد : الله كريم ابو نشمي ان شاء الله ما نتغاثه
صياد : ليش المغثه ابو علي اي خبر منك راح احترمه
انته اخ عزيز تره غلس عالظروف الي تواجهنه بيها بيومها ضيفتك بارود تعذرني
عماد :هههه عز الله ونعم الأخ وهذيج صارت سوالف يمعود وعلى زين من عدها صرنه اهل ان شاء الله
صياد : ان شاء الله اهل يالله اودعانكم
امل : راحو وعماد يمشي وياهم
وصياد وگف ولزم كتوف عماد طبطب عليهن عماد ابتسم وكملو طريقهم مشو ورجع عماد طلعت لگيت حميد مرتاج يدخن
عماد : شفت يا حميد بسبب فعايلك صرت بهدومي گدام الزلمه وما عرفت شجاوب
حميد : هو شعلي بالله نزوجها لزغير لجبير شعلي هوه
عماد : هو هاذ الحجي العندك اتحداك تملك غيره
اهلا بكم في مدونة مكتبة حواء نقرأ لكم ونكتب من اجلكم
حميد : عوفنه من هاي هسع ليش ما ننطيهم ديالا ليش ما وافقت بساع
عماد : الحمد لله اني موجود جان انته حت امي گبعتها وانطيتها الهم.
حميد : هسع شلازمه هالحجي هو منهو ما يتمنى يناسب بيت العلوان
عماد : كلها تمنى بس مو هيج ننطي جفت بدون ما نشور اختنه الجبيره وناخذ رئيها ونشور امهاتنه ونشوف ديالا ترضه لو لا قابل مثلك اجبرها
حميد : اهوو انته شيفهمك اروح على شغلي اخيرلي وبعد لا دز عليه اذا الشيخ يجي بنفسه
عماد : خايب روح انته بس تسمع بأسم صياد تگوم ترجف
حميد : الضاهر نسيت من اخذنه عالعرين ماله الي محد يندله وين صوت التعذيب وصوت الذيابه بعده يرن بأذني
عماد : يراد ادزك جم يوم غادي بلكت تصير ادمي
ماجد : تريد تصيحون تحجون شتردون سوو الي براسي اسوي وهاي اني تزوجت توحه يعجبكم ما يعجبكم اخر همي وهسع وخرو نريد انام شنهي احساس ماكو اشو متستحون
شكحه :يول هو منهو الي ما يستحي وين تنام هاي حجرة نضال
ماجد : الله صايرات ربع انتي وبنت اختج من ايمت يا امي عالعموم هاي حجرتي واجيب بيها الي يعجبني واليوم انام بيها اني وتوحتي عود نضال باجر دورها اذا هويت ها هسع نوميها يمج
ليال : گالها ورگع الباب بوجوهم
ونضال ظلت بالصاله تبجي وتلوب فحطت
صائب : ليااال
ليال : ها
صائب : شعندج واگفه بالباب مو گتلج ابتعدي عنهم تعاي نامي
ليال : مو هاي نضال تبجي خطيه هو ماجد ليش هيج سوه
صائب : تاصدگين من اگلج هو مو خوش انسان
ليال : دنگت راسي
ورحت ومددت عالجربايه غمضت عيوني وافكر هاذ ماجد ليش هيج يسوي وصدگ هو تزوج هاي المراه
ونضال عش ضايجه يعني وذا رگاصه
شبي الرگص حلو بس خاف عبن هيه حلوه احلى من نضال ضاجت منها
مرت ايام والوضع يزداد سوء ماجد مشاهم على هوا ومزاجه بحيث استاذي صار يسمع منه الكل خايف لا الجيران تسمع
ومحد بوكتها عرف غير غازي واهله اجو على صوت الصياح مال نضال
معد تتحمل ماجد لابسها ومگابل توحه راحت نضال عالمطبخ وجابت سجينه وتريد تكتل توحه
وهذيج اخذت السجين من نضال وسحلتها سحل
اجو غازي واهله
غازي : شكو يمعودين حسكم عالشارع
ماجد : ماكو شي نسواني متكاونات عليه
غازي : جان ستحيت والله مع الأسف يا ماجد تزوج رگاصه
ماجد : شبيها مو بشر وزعم احنه الخوش مو خليني ساكت تره ابلش افضفض
ليال : يوميه طلبه ويوميه سالفه صار البيت عباره عن نضال وتوحه وطلايبهن
گامت توحه تطلع بالطرمه تگف تشرب جگاير ولابسه نص ملابس
وبيوم طگت روحي ردت اتخبل شتاگيت لهلي جثير وشگد توسلت استاذي يوديني وما فعل وانوب اجه حميد تا يگللهم يريد يتزوج رافده وجان طرده ماجد
ماجد : امشي ولي مالك مره عدنه تريد اختك هاي اخذها وسالفة رافده انسها من گاعها
ليال : تگاضبو بيومها وناس هددت ناس
ردت اروح ويا حميد وما اخذني گعدت وره البيت وگمت ابجي جانت دنيا العصر شجعت نفسي وجان افلت تا اروح لهلي گلت اروح عالشارع مگدر افوت من البستان تطلعلي جلاب
مشيت وصلت الشارع وادحگ خاف يلحگوني
امنت وكملت الطريق صرت دوبني اشوف بيت استاذي امشي واتلفت ورايه
وجان اسمع نبيح جلاب فزيت وگمت ابجي واتلفت اريد اشوفه وين حترت اكمل الطريق لو. ارجع الشارع فارغ محد يفوت من هين بس الي يريد يجي علينه وعلى بيت غازي
اجه الجلب من وره الشجره
لزمت وجهي وگمت ابجي تصنمت بمكاني شويه وجان اركض والجلب ورايه شفت سياره اجت بتجاهي من حلات روحي ذبيت نفسي عليها شخط بريك بالگوه جان دعمني
اجت عيوني بعيونه ولأول مره من اشوفه جن شايفه واحد من اهلي بساع فتح باب السياره وحدر
والجلب مستمر ينبح ويريد يعضني
ضربه دفره خلا يروح يدرج
واني ابجي واعصر بأديني وگلبي يطرد اشاهگ وارجف اريد احجي بعد مگدر قرفصت يم السياره
وجان. يرجع گعد تك ركبه يمي شعري على عيوني وجسمي كله يختض اريد اشيل اديني بعد مگدر خفت ينغمي عليه مثل كل نوبه
گمت اطگ سن بسن من الخوف
والهبطه وكلشي ختلط عليه
مد ايده وكف شعري عن عيوني ومسح وجهي بغترته
جابلي مي من السياره
صياد : هاج اشربي راح الجلب لا تخافين
ليال : اخذت المي ما گدرت اشرب كبيت نصهن على ملابسي اخذ المي شربني هو
ظليت گاعده لحد ما بديت استوعب بس الرجفه بشفتي واديني بعدها
صياد : شتسوين هين ول يابه
ليال : جاوبته گوه وبعبره
اريد اروح لهلي امانه وديني لهلي
صياد : لا حول ولا قوة الا بالله
گومي ارجعي لبيتج زلمتج ما يوديج
ليال : ما اريد ارجع ما اريد وديني لهلي
احجي ويا وامسح دموعي برداني وادحگله مدنگ ويعض بشفته
صك قبضه ايده وجان يضرب الگاع بوكس
ورجع ضربها انوب وثلاثه لحد ما طلعت ايده دم
دنگت راسي خفت وجان ادحگ من بعيد اجه استاذي يركض وصل يمي وحضني ويتلمس بيه
صائب : شجابج هين ليال شجابج
وشنهاي حالتج
ليال : حضني وجان يدحگ على صياد الي ظل على گعدته تك ركبه وايده بالگاع بوضعيه البوكس گام وجان ينفض ادينه ودشداشته
صد عليه استاذي وسألني
صائب : هاذ شعنده هين شصار ليال احجي
ليال : ركض ورايه جلب وعمي صياد فكني
صائب : مشكور ابو نشمي
ليال : راح صياد بدون ما يحجي كلمه
صعد سيارته ومشه
صائب : شگد مغرور امشي ليال نرجع عالبيت
ليال : ما اريد ارجع عوفني اريد اروح لهلي
صائب : امشي بس اليوم بس هاي الليله وبعد وين متردين روحي
ليال : ما اريد وديني لهلي امانه استاذ والله مشتاگتلهم.
صائب : اوديج بس امشي هسع
ليال : ظليت معنده وتالي شالني شيل رجعني عالبيت شفت سيارة صياد طابگه يم بيت غازي
سعاد : جنت بالمطبخ وسمعت صوت سياره طلعت
شفته صياد عاگد الحواجب وايده كلها دم حدر يمنه واگف يم السياره وضعه مو طبيعي يمسح برگبته وجهه ويغمض عيونه يدحگ عالسماء
رحت سلمت علي ردلي السلام وهو متعوب مدري شبلا
وطلع غازي وگف ويا واني فتت جوه اجيبله مي
تالي طلعت ما لگيته
وين راح
غازي : هاي امج دازه ملابس ويا انطاهن وراح مدري شبي
سعاد : يبوو هاي راح يصير عندي نضد منا ليما اولد
ليال : فتت عالحجره واني بعدني اگهد ومصره ما اريد اظل لازم اروح لهلي اخاف منهم يربي شهل حياة هاي اريد اهلي
اهلا بكم في مدونة مكتبة حواء نقرأ لكم ونكتب من اجلكم
ظليت گاعده واتگلب عالجربايه مگدر انام
اجه يمي استاذي يمسد على راسي
صائب : ليال
ليال مو جاي احجايج
ليال : انته گلت بس اليوم ظلي وباجر توديني تره اذا ما رحت والله انهزم انوب وازعل منك
صائب : اوديج وغلاتج بس اصبريلي تعاي فليني
حبابه
ليال : افليك بس اليوم.
صائب : ميخالف تعاي يالله
ليال : حدرت من الجربايه ورحت يم راسه وگمت افلي
لزم ايدي وجان يبوسها
صائب : شكراً لوجودج ويايه اهلي الي اني من دمهم كرهوني وانتي ما كرهتيني
ليال : ابتسمت وعدلت گعدتي
اني ما اكرهك استاذي اني احبك انته غالي عليه
بس خليني اروح لهلي
گعد وجان يتربع گدامي لزم وجهي بأدينه وباسني من گصتي
صائب : اني عباره عن كتلة برائه يا ليال
ليال : گالها وهو مبتسم ويدحگ بوجهي
مدد وجان يگول
صائب : تعاي نامي بصفي
ليال : فتحت عيوني وصافنه شلون انام بصفه عيب
صائب : يالله ليال تعاي
ليال : ظليت بمكاني واعصر بثوبي ما حجيت
تالي گام هو وحط دوشك بصفه وگال
صائب : تعاي مددي وفليني
ليال : مددت بصفه بس خجلانه وهو حط ايده جوه وجه وگرب مني عيونه وجوهنه صارت گريبه من بعض وصادين على بعض
صائب : يالله فليني اريد انام
ليال : ما اگدر هيج الا اگعد
صائب : عوفي عجل
ليال : گام هو يمسد على شعري ويمشطه بأصابعه
صار زمان محد لعب بشعري غفيت وجان انام
گعدت عالصبح لگيته حاضني من خصري وراسه يم صدري
تململت وجان يگعد فرك عيونه ودحگ عالساعه
صائب : گومي بساع غسلي وجهج وبدلي ولا تسوين حس
ليال : نروح لهلي
صائب : اي گومي
ليال : گمت بساع وجان اصفگ
صائب : اااش حسج راح يگعدون
ليال : سديت اثمي استغربت ليش ما يريدهم يعرفون گمت بساع وغسلت رجعت لگيته مطلعلي نفنوف احمر
صائب : هاذ لبسي
ليال : عش ابدل همه اهلي وهسع نايمين
صائب : بس بدلي يا عيوني
ليال :ماشي صد غادي
صائب : يالله صديت فضيني
ليال : لبسته وجان امشط شعري اجه شده شعري بشال من النص
صائب : يالله امشي بدون حس اصعدي بالسياره
ليال : رحنه وجان اصعد جان الصباح توه متكشف رجع هو وجاب جنط ملابس حطهن وره صفگت اديني وكيفت والله بس اروح بعد ما ارجع هين
مشينه وصلنه الشارع گربنه من النزله مال اهلي تعداها وجان انبهت
هاي وين نريد هذاك طريق اهلي
صائب : ادري ليال احنه مو رايحين لهلج هسع
ليال : گمت اعيط عجل وين انت شگلتلي ليش جذبت عليه
صائب : اصبري بابا نروح لمكان وبعدين من نرجع نروح لهلج
ليال : وين نروح اني اريد لهلي
صائب : نروح يم عمتي مديحه هسع
نظل جم يوم لحد ما يهدئ وضع البيت ونرجع اوديج لهلج
ليال : ما اريد وين هاي عمتك وعش نروحلها
صائب ساكنه :……… .) حلوه ديرتهم راح تحبيها
وعمتي خوش مره عايشه وحدها ولا گال ولا گلت راح تحبينها جثير ومن هسع اگلج لا كل شوي وتسألينها ليش عايشه وحدج مو
ليال : كتفت اديني وما حجيت ضجت اني اريد لهلي مو على احد گمت ابجي
صائب : عش تبجين يا عيني بس نرجع اوديج
ليال : ما جاوبته مليت من وعوده
ظليت ساكته والطريق كله صاده عالشباك وهو كل ما يوصل يم محل يحدر يشتريلي
ما اكلت شي ملل الطريق وجان انام بالسياره
وما حسيت
گعدني صوته
صائب : ليال اگعدي وصلنه
ليال : گعدت وجان اتمطه ضهري متشنگ
ادحگ عالديره مو زعم گال حلوه اشو تخزي
فتحت الباب وحدرت كتفت اديني وهو نزل الجنط
حطهن بالباب وجان يدگه
شويه وطلعتنه حجيه بگد امي لزمت استاذي تبوس شفطته شفط وهو حاضنها ويبوس راسها فات وجان تسد الباب واني ظليت بره نسوني
اسمعه يگللها عمه ومرتي بره
فتح الباب ورجع گادني وجان تلزمني بالباب كل بوسه احسها تشفط نص وجهي
ودحگ عليه وتلزم بوجهي وتمثلني من فوگ لجوه حت شعري نفشته وگلبته
وتگول ول صائب هاي منين بگتها جذاب مو مرتك هاي ناصب عليه
صائب : عمه شنهي بگتها هسع فوتن جوه
تره بدون ريوگ مشينه
گالت اي هسع فوت جنت اسوي دولمه
ليال : طبينه جوه جان البيت يوحي للراحه والهدوء
فتنه من باب المطبخ جانت حاطه التخته وتگرض لحم وحاطه نجانه بصفها بيها سلج وبصل وطماطه محفره
گعدنه بالصاله
وراحت جابتلنا مي وراهه جابت جاي وجبن وخبز
گالت هاذ ريوگ خفافي بس يسد جوعكم لبين ما يستوي الغده
ــ ول وليدي صويئب شلون سويتها يمه وعرست وهاي اهلها شلون انطوها الك
صائب : ليش عمه اني شبيه
مديحه : تخبل وليدي جنك العافيه بس هاي مبينه زغيره مو جبير عليها انته وتضوي ول يابه شهل شمعه
صائب : عمه كلشي قسمه
مديحه : هاي هي
ليال : صدت عليه ولزمت ايدي گالت شلونج زينه مرتاحه وهيه هاذ المعثور
هزيت راسي بـ اي
خلصت سؤالاتها وراحت تلف الدولمه رحت گعدت يمها علمتني شلون الف السلج خربت جم وحده يالله تعلمت
كملناها وجان تحطها عالطباخ
طلعت بره افتر بالحديقه وهي بالمطبخ تحجي ويه استاذي ظليت افتر واشمشم بالورد تربعت بالثيله وگمت اشلع نوابير والگح من الملل مددت فوگ العشب وجان اغفي حسيت بأيد تلمس بجتفي فتحت عيوني شفته استاذي مرتاج بصفي ومبتسم
صائب : يالله اگعدي تغدي نيالج خوش غفيتي
ليال : گعدت اتثاوب واتمطى اي والله خوش نمت
رحت غسلت وگعدنه نتغده راحت الحجيه جابت الجاي گامو يشربون واني اخذت المواعين وديتهن عالمطبخ وجلفتهن بس نگعت نفنوفي
طلعت عليهم واني رافعته واعصر بي من المي
استاذي يدحگ على رجليه وجان يحك خشمه صد غاد
گالتلي الحجيه انتي يمكن بحياتج مو مشتغله شي
صائب : اي والله كلشي ما تعرف
اهلا بكم في مدونة مكتبة حواء نقرأ لكم ونكتب من اجلكم
مديحه : بسيطه نعلمها
صائب : روحي بدلي
ليال : رحت طلعت قميص وتنوره ولبستهم
لليل واحنه مگابلين بعض وملل الحجيه واستاذي يحجون وبس يشوفني يسكتون
گعدنه بالهول كلنه وره العشه مددت وجان تغطيني بجرجف شويه وبدو يحجون يعبالوني نايمه
مديحه : هسع شلون صويئب تظل ادحگ على مرتك من بعيد عملتك هاي محد سواهه وليدي
صائب : عمه شسوي اصبر عليها ليما تفهم
مديحه : اووو بعدها طويله وليدي طويله حيل بعدين البنت شلون تفهم اذا مو انت تعلمها
صائب : ما ركزت بهاذ الشي
مديحه :زين انته ليش ما تممت زواجك منها من البدايه وخلصت
صائب : مو فهمتج الظروف شلون وهم جاهل هيه استخطيتها وهيه تحبني وتحترمني ما اريدها تشوفني مو خوش بنظرها
مديحه :ما خليت احد من ربعكم يعلمها
صائب : ما اثق بأحد
مديحه : ما حاولت تگرب منها انت شبلاك جاهل وتريد احد يعلمك خاف مابيك خير يول
صائب : عمه شهل حجي بس والله مستخطيها عبن زغيره
مديحه : حجي يفيدك هاذ ما تروح من هين الا وانت متمم زواجك كافي عاد اريد اشوف فرخياتك
صائب : دجاجه وافرخ يا عمه واني ما جيت لهين اتونس جيت من ضيم ماجد گام يتماده جثير وخفت عليها منه گامت الليل ما تنامه من الخوف تهذي وتفز
گامت تنهزم يا عمه
مديحه : هو خلها تصير مرتك من صدگ تگوم تحبك يول وما تفارگك
صائب : عوفي هالسوالف هسع
مديحه : بس ولي جان ستحيت معرس ومرتك ما جايسها عمت عينك
ليال : غفيت وخليتهم يحجون وكلشي مفتهمت
والصبح جابت الحجيه الريوگ وجان تلبس عباتها گالت امشي اوديج صالون يزوقنج اخذتني على بيت
مليان بنات شگد حلوات مدري شحجت وياهن
وجان يلزمني ويحفني بس حواجبي خلتهن
ونضفني من ساسي لراسي شبعت بجي كل ما انهزم يلزمني وحاضنه نفسي مستحيه واشاهگ صلخني تصلخ
سبحني والحجيه اشترتلي من عدهم ملابس ونفنوف ابيض لبسته گعدن وگامن يمشطلي وكون شعري بالأوتي صار سرح حيل وزوقن وجهي وحطولي حمره
كيفت وگمت اضحك
الحجيه گالت ها اشوفج كيفتي
رجعنه واني شايله الغراض الي اشترتهم الحجيه وفتنه من يم المحل وجان تشتريلي حلقوم وعلج
طبينه البيت جان استاذي گاعد بالثيله
من شافني گام وظل فاتح اثمه ويدحگ
اني حطيت الغراض گدامه گتله دحگ عمه شنهو شترتلي طلعتله سيت النوم اني كل ضني عبالي فستان مال عرس گدرته على نفسي گدامه وجان افر
حسيته عرگ وجان يمسح كصته
والحجيه اخذتني جوه اني والغراض
فلست العلج وگمت اعلج مثل توحه
وغده ما تغديت مكيفه بالملابس والزواقه واستاذي يدحگ عليه وين ما اروح ما شال عيونه
وبالليل وجان تجي الحجيه اخذتني عالحجره
مرتبه وحاطه ورد عالجربايه
جابت النفنوف الستن الأحمر گالت البسي يالله صفگت وجان البسه ولزمت شعري رتبته وحطتلي عطر وحمره وگالت ظلي هين اگعدي عالجربايه وصيري سباعيه انتي عروس ولا تخافين
اهلا بكم في مدونة مكتبة حواء نقرأ لكم ونكتب من اجلكم
هزيت راسي بـ اي واني اتعلج
فتحت ايدها وگالت ذبي العلج ما مليتي من الصبح تعلجين هسع دوخين يمه
طلعت واخذت العلج وياهه
شويه واجت گايده استاذي فوتته عالحجره وهو يريد يطلع وجان تدفعه بيدها وگف بالباب ويحجي وياهه
صائب : عمه بس انطيها مجال عليج الله
مديحه :ـ وعمه التعميك شتنطي مجال جان هسع مرتك حبلانه اسليمه اطمك يول هاي البنت قاضي الجامع اطلعه من دينه وانته ما هزك الهزيز اشك هدومي هسع منجدتنه
وروح وليدي ان طلعت وانته مو متممها الا امنجدك بالعرب واگول صائب مو زلمه
صائب : عمه هاي عود ردتج عون.
مديحه :بس ولي ولي مابيك خير
ليال : گالتها وسدت الباب وهو صد عليه وفتح عيونه ظل صافن قفل الباب وجان يجي يمشي عليه لزم وجهي بكفوف ادينه جنت مو فاهمه شي واگفه مثل الصنم وبالي يم العلج الي اخذته الحجيه
گام هو يمشط شعري بأصابعه ويلمس كتوفي واديني
حضني وباسني بخدي اجتني رجفه ختنگت
لزمت ثوبي وهو لزم اديني وعصرهم حط راسه يم رگبتي وشمني دفعته وگمت امسح برگبتي وارجف رحت عالباب افتحه اريد اطلع
وهو اجه يمي لزم ايدي باسها
وحضني انوب وهمس
صائب : لا تخافين مني ليال
ليال : انرعصت وگمت اگمز بس جان قافل وماكو لا مهرب ولا رحمه مر الوقت عليه مثل السم وجانت ليله انسلبت بيها برائتي وضحكتي وثقتي
انسلب بيها استاذي الي احبه واحترمه جنت اقدسه وافتخر بي تحول لغير شخص مجاي افتهم شجاي يصير
گام مني واني ارجف جسمي كله يوجعني
حيلي نهد مغطيني بجرجف احس نفسي طفت مبهوته مصدومه اريد استوعب مجاي اجمع
لبس ملابسه واجه يمي يمسح بوجهي
واني ارجف
صائب : ليال احجي وياي متوجعه
ليال : ما جاوبته گمت اشاهگ ولميت نفسي راح بساع ينادي عمته وجان تجي طبت عليه وگامت تهلهل
صائب : دعوفي الهلاهل شوفي البنت
مديحه : اشوفها يمه غير عروس هيه كل عروس اهيج وخر انته همزيت فضيتها عوزك كبر
صائب : عمه بس شوفيها امانه
ليال : دنگت باست راسي وگالت مبروك بنيتي الولد الصالح ان شاء الله
رادت تشيل الغطه جلبت بي واشاهگ
مديحه : بس اشوفج يمه متوجعه
ليال : هزيت راسي وما حجيت اي متوجعه
مديحه : هاي طايفه دم البنت گومي اسبحج گومي
ليال : گوه وگفتني وادحگ على نفسي انبهتت وگمت اصرخ وجان تحضني تگوم تهدئ بيه
مديحه : ول بنيتي لا تخبلين هاي كل عروس هيج
ليال : سحلتني سحل عالحمام وسبحتني لبستني ملابس وطلعت نومتني بدون ما انشف شعري
لازمه بطني وارجف واشاهگ
اجه صائب وجان تگله
مديحه : عود هي لا تگربلها تره البنت متأذيه امداك متعرف ادبر شي
صائب : عمه شگرب مو هاذ الي ردتي شسوي گتلج البنت مو فاهمه ردت اعوفها من خافت بس اتورطت بعد
ليال : سديت اثمي واصرخ صامت وافكر ليش هيج سوه ليش تأمرو عليه هو وعمته ليش اني شسويتلهم
خايفه منهم شراح يسون بيه بعد
ديالا : جهزت المواد مال الكيك وانتظر حيدر يجي تا نسويها هالنوبه اني راح اخلطها وهو بس يوجهني
هذيج النوبه سويت نفسي تعلمت وجعصتها گبل لا يجي وجان اترزل منه
سمعت الباب انطبگ ادحگ هاذ هو اجه
طلعت من المطبخ بساع تاميگول جاي تنتظرني ويگوم يتفيك
شويه ورجعت عالمطبخ زعم ما ادري بي
وجان ادحگ شو ماكو هاذ وينه
ما حسيت الا صوت
اهلا بكم في مدونة مكتبة حواء نقرأ لكم ونكتب من اجلكم
حيدر : بووو
ديالا : فزيت طرت طلع خاتل وره الباب وفززني
تخوصرت وسويت نفسي ما جفلت وهو گام يضحك
ــ ما تضحك تره
حيدر : والله تضحك امنيتي اجي وما الاگيج عاگده الحواجب وعابسه
ديالا : صوجي والله ما امشي واضحك ويه روحي تا يگولون مخبله وترضا انته
حيدر : لا مو هيج بس ابتسمي لا تظلين عابسه ومتشأمه يا عيني
ديالا : من اشوف شي يسوه ابتسم عود ما اقصر
حيدر : يعني شوفتي ما تسرج
ديالا : ليش انته العيد
حيدر : ها ماشي مجهزه مواد الكيكه مو
ديالا : اي هاي كلشي جاهز
حيدر : اي خوش يالله سويها وحدج
ديالا : ها وين رايح
حيدر : عندي شغل
ديالا : شغل شنو كلشي ما عندك هسع ليش تجذب
حيدر : ها وطلعت جذاب بعد
ديالا : اسفه مو قصدي حباب
حيدر : حباب صرت شگد مصلحجيه
ديالا : خلص لا تكبر الموضوع اني اعتبرك صديقي الصدوق وامون عليك يالله هاي ابتسمت وشوفتك جنها العيد حيدوري
حيدر : غشمريني
ديالا : لا والله هاذ الصح وتره من الصبح انتظرك والحسين لا تفشلني
حيدر :هههه شگد حلوه بحلگج والحسين
ديالا : هاي صرت مثلك تا تصدگ
حيدر : يالله ماشي تعاي نخلط الكيكه يا جميلة الأنبار العابسه
ديالا : نخلطها يا جميل النجف البشوش
خلطنه الكيكه وسط ضحكات وجو حلو وكلام لطيف متبادل مبينه
حيدر انسان ما ينوصف من شكله الحلو والمرتب ولطافته وحنيته صار يومي ما يكمل اذا مو بوجوده
اذا يغيب عن موعده ساعه افتقده
صرت اميز دگة الباب وخرخشة العلاليگ الي بالمطبخ
وكل حركه بالبيت صرت اميز حركاته من بينها
جنه قبل من نگعد نحجي ما اركز بي ولا انتبه
وهسع اصفن بنص عيونه من يحجي نظل ندحگ على بعض
حيدر : وهاي خلصنه حطيها بالفرن
اهلا بكم في مدونة مكتبة حواء نقرأ لكم ونكتب من اجلكم
ديالا : حطيت الكيكه وجيت گعدت وهالمره المطبخ ظل صامد ما تخرب منه شي خوش بديت اتعلم اصير ام بيت بفضل حيدر شگد علمني شغلات گعدنه عالطبله ومخليه اديني گدامي وعيني عالفرن اريد اشوف كيكتي
صديت على حيدر شفته مخلي ايده جوه خده وصافن عليه مبتسم دنگت راسي وما حجيت ما اعرف شنهو عالشعور الي اجاني رجعت صديت علي وهو بعده واخذ فتره هيج حسيت نفسي تلبكت وگمت امتمت
گمت احك بالطبله باضافري احاول التهي
ما حسيت الا ايده نمدت على شعري وجان سحبه وره اذني صديت علي وعيونه بعيون بعض
هاي اللحظات وهاي المشاعر الي ملت المكان
ما تنوصف دگات گلبي صارت سريعه وتوترت اريد احجي بعد مگدر وما اعرف شلون گمت ورحت عالحجره
لگيت نفسي عالجبرايه حاضنه المخده واتحسس حراراتي ولازمه گلبي مسحت شعري وطلعت
شفته مطلع الكيكه ومغطيها بخاولي
وكاتب رساله
(اطيب كيكه اكلها بحياتي لأنها من نفس وروح نقيه مثل روحج يا جميلة الأنبار )
عصرت الرساله وبتسمت مدري شجاني
اخذت من الكيكه شوي واكلت طيبه صح بس اني شبيه
ليل واني حايره بزماني واتخيل نظرات حيدر وكلماته
واتخيله موجود بكل مكان مرات احس اسمع صوته وافز
اجو هو وحجي حسين وجابو العشه صبيته وما گدرت اكل بالي يمه هسع بالبيت وحده بشنو يفكر عود لميت الأكل والمطبخ ورحت على مكانه المعتاد
ظليت گاعده وانتظره وماكو جنت بس اريده يجي
شفته ماكو ما اجه عصبت لحالي وگمت هو يوميه يجي اشو اليوم ماكو رجعت وصلت الطرمه واريد افوت عالبيت وجان يجي تلاگينه بالطريق
انفجرت بوجهه اعيط علي وعيوني مغورگه ما ادري شجاني وهو جان صافن بيه ما حجه شي
عفته وفتت جوه ظل ينادي عليه وما رديت طبيت عالحجره واحجي ويه نفسي اني شبيه ويا
ثاني يوم اندگ الباب طلعت وجان اشوفه عماد
رحت سلمت علي وحضنته طب جوه گام يحجي ويا فاتن رحت صبيتله جاي جبته ستوقفني الحديث
فاتن : يعني اجه خطب ديالا لأخو
عماد : اي خطبها لأخو
فاتن : والله همه خوش ناس بس عاد ديالا توالمهم لو لا
عماد : مو بس خوش ناس فوگ الخوش يا فاتن عزوه وسند وزلم ينشد بيهم الضهر
من راح وگفني بالطريق زلم كتوفي وگال
صياد : اسمع يا عماد اريدك تعتبرني اخوك الي ما جابته امك اني ادحگ على وضعك وما اريد اعوفك وحدك اعتبرني بدال محمد اخوك
شتريد عين عيونك وبعد منا وغاد وين متروح گول اني اخو الصياد
فاتن : شوف الغريب اخير من حميد
عماد : هسع شرايج انتي
فاتن : رائي من رئيك
عماد : اني عن نفسي مكيف قسمه بيت علوان ما تضيع وضهر مثل صياد يفيدني واني وحدي تدرين لا عشيره ولا عمام بس عاد ديالا توافق لو لا مستحيل اجبرها اذا ترفض
