رواية عرين الصياد الفصل الثلاثون 30 بقلم شذرة العدوان

ليال : اتگلب مگدر انام متوجعه وساده اثمي اشاهگ

احس نار مشتعله بيه جسمي كله يوجعني وصخنت

صائب نام بصفي ما تحركت من الخوف

اذا ينگلب افز والزم گلبي واغطي راسي واطگ سن بسن اخاف منه بعد ما احبه انخدعت بي هاذ مو استاذي مستحيل 1

شگد بجيت بوكتها وانهضمت ماكو احد يمي لا ام ولا اخت بس هاذ وعمته الي ما عدهم رحمه

عطشت وما گدرت اروح اشرب مي ولا گدرت اگعده

نمت ودمعتي على خدي وعطشانه

گعدت على حس الحجيه تنادي

مديحه :الشمس الضهر يا عرسان

اگعدو تغدو 1

ليال : فتحت عيوني بتعب

شفت صائب گعد مرتاج ويدحگ عليه

غطيت راسي ولميت نفسي ما اريد اشوفه

حسيت علي يمسد على راسي وجان يبوسني من راسي

صائب : ليال احجي وياي بيج شي من البارحه ما سمعت صوتج

كرهتيني مو هو هاذ الزواج يا ليال ولازم هيج گومي غسلي وتغدي وهسع افهمج زين يالله بابا گومي 1

ليال : ما كشفت راسي ولا صديت علي ولا حجيت

بس دموعي تصب گمت الوم بنفسي ياريت ما نهزمت وگتله اريد لهلي كله من ورايه جابني هين وهيج سوه بيه

صائب : ليال ليش تبجين احجيلي شبيج اوديج عالطبيبه گومي بس خن اشوفج يا عيني

ليال : گام يسحب بالغطه يريد يكشف راسي

انرعبت وگمت وصرخ

صائب : شبيييج ليال ما اسوي شي بس اريد اشوفج لا تظلين خانسه احجي اي شي ليااال

ليال : گام يعيط عليه ولازم اديني واني اصرخ اجت عمته

مديحه : شكو شعندك تصيح عليها

صائب : ارتاحيتي عمه هاي البنت انرعبت وصارت بيها خوفه كرهتني واني ما ردت يصير هيج دحگيلها شلون مرعوبه

مديحه : حقها تخاف غير انته ما علمتها شي وين اكو رجال مزوج وحده جنها الگمر وعايفها ونايم بالگاع كله من ايدك شو وخر من دربي خن اشوفها 1

صائب : مو وكت حجيج هاذ عمه شوفي البنت هسع

ليال : اجت يمي وجان تلزم راسي واني مغطيه نفسي ومقرفصه

مديحه : ليال بنيتي شو صدي عليه اشوفج يبعد عمتج شو دحگيلي

ليال : سديت اثمي واشاهگ هذول شبيهم ما يعرفون نفسهم شسوو بيه وانوب يسألوني شبيه علت صوت شهگاتي وعبرتي

مديحه : گوم صائب اطلع بره خن اشوفها هاي خايفه منك

صائب : عرفت والله راح يصير هيج عرفت خلفله عليج عمه

مديحه : هاذ صائب طلع وبعد ما اخلي يفوت الحجره شو كشفي راسج واحجي وياي بنيتي

ليال : ما رديت ما اعرف شحجي وياهم ومجاي اگدر اسكت ليلة البارحه مجاي تروح من بالي

گامت الحجيه تمسد على راسي وتقرا قرأن

مديحه : يالله بنيتي گومي اشوفج وابدلج جبتلج ملابس حلوات وسويتلج غده يخبل وراح اخذج سفره بس اني وياج صائب ما ناخذه ويانه عوذا منه

ليال : ظلت تحجي وتقنع بيه لوقت طويل

كشفت راسي ودحگت عليها بدون ما احجي باست راسي ومسحت وجهي گلتلها عطشانه گوه حجيت ريگي يابس

مديحه : يمه يخسا عنج العطش يبعد گلبي هسع اجيبلج مي

ليال : راحت بساع جابتلي مي وشربتني نهضت راسي دايخه وجسمي متكسر رجليه توجعني على طولها

حدرت من الجربايه اريد اگف اتوازن ارجف مدري شبيه

مديحه : يبو يالعثره هاي ملابسج مدمرات انوب تعاي اسبحج وابدلج

ليال : ظليت واگفه بمكاني وهي طلعتلي ملابس واخذتني عالحمام اسحل بروحي سبحتني بدلتلي

گعدت بالحجره وفات صائب بس شفته گمت ابجي وغطيت وجهي گعد يمي وما حجه بس اسمعه يستغفر

مديحه : گوم يالله نوديها عالطبيبه

صائب : ليش عمه شبيها

مديحه : ويسأل ليش گوم انهض خن نودي البنت ما صدگ على روحه يلزمها ويسأل ليش جاهل انته يول جاهل

ليال :طلع بدون ما يحجي

گادتني الحجيه ورحنه عالطبيبه الحجيه گالتلها هاي عروس والبارحه ليلتها

واليوم الصبح وبعدها تنزف

اجت الطبيبه يمي گالت تعاي عالسديه افحصج

رحت ومددت واني ما اعرف هي شتقصد حضنت بطني وغمضت عيوني

اجت الطبيبه گالت هاي شلون ماما انزعي ملابسج الداخليه وخن اشوفج يالله

ظليت مصدومه فهمتني بالحرف شتريد تسوي

لميت نفسي وگمت ابجي وعصبت الطبيبة وگامت تصيح عليه

ــ بلا عياره هالگدوتج ومزوجة شجنتي متوقعه الزواج لعب تكي فضيني افتحي رجليج خن اشوف

ليال : قرفصت نفسي وگمت اصرخ انهاريت خفت منها

وتذكرت صائب شسوه وجان تجي الحجيه وطلعني الطبيبة گالت اخذيها وروحي

صعدت السياره واني اشاهگ

وارجف رجليه تختض وصائب عصب على عمته وتگاضبو بالسياره

مديحه :شسوي اني شعليه ما خلت الطبيبه تشوفها غير انته صاير ثور بالحجره جبتلها علاج بلكت تصير زينه حجي زايد ما اريد اسمع منك انته اخر من يحجي انوب يلومني زعم اني العرست عالبنت 1

صائب : خلفله عليج والله لو ادري هيج يصير فلا اجي ولا اطب هييين

مديحه : بس كافي تهرط مابيك خير زلمه شكبرك شگدك جان هسع مرتك تلفلف عليك جان هسع مغرگتك بالعشگ مو تناديك استاذي سليمه اطمك اي والله زلم تالي وكت كافي تسولف دوختني

ليال : وصلنه البيت وحدرت گادتني الحجيه

ما ردت افوت جوه اخاف من بيتهم گلت اريد بالثيله

گعدت وخايفه من صائب ما اريد اشوفه وهو متعصب منفعل

جابتلي الحجيه الغده وجان يجي صائب همت تا اگوم جلبت بيه

مديحه : اگعدي يمه ما اخلي يجوسج بعد اكسر راسه

الهثور هاذ

ليال : گعدت بصفها ولزگت نفسي بيها اعصر بثوبها ومدنگه مگدر حت ارفع راسي

گامت تسويلي لفات وتقنعني اكل

الزم اللفه وادي ترجف اكل ودموعي تصب وامسحهم برداني اريد امي اني شجابني هين

گام صائب وگعد بعيد عني وصد غاد

والحجيه حضنتني وگامت تحجي

مديحه : ليال بنيتي اسمعيني هاذ الي صار وياج البارحه هو الزواج وعادي يمه كل المزوجين يصير بينهم هيج

الله سبحانه من سابع سماء حلله

صائب يبنيتي هسع مو معلمج ولا ابوج ولا اخوج هو صار زلمتج شرعاً انتي يا بنتي مسكن زوجج هيج الشرع يگول ويأمرنه يبعد گلبي

وبالشرع يا بنتي والدين لازم الرجال يتمم زواجه من مرته تا يصيرون واحد ويحبون بعضهم

ويخلفون جهال زغار مو انتي مؤمنه بالله وتصلين

يا بنيتي الله سبحانه ما يعترض على هاذ الشرع وانتي يمه لا تظلين خايفه من صائب وترجفين هاي بس هالنوبه توجعتي عبنج بنيه ويه الوكت تعودين وتصيرين تحبين صائب هالثور المصگوع

ديالا : ظليت واگفه بمكاني اريد استوعب الي اسمعه

شنهي خطبوني بيت الشيخ علوان

رجعت عالمطبخ حطيت الجاي عالطبله ما وديته

لزمت وجهي واحجي ويه نفسي خاف اني متوهمه

لا مستحيل زواج شنهي اني ما اريد لا

غسلت وجهي ونشفته اريد اخفي توتري حميت

الجاي وصبيته عماد وفاتن من شافوني سكتو گعدت يمهم وما حجو شي

عماد : يالله اني اروح هسع

فاتن : بعد وكت

عماد : لا والله عندي شغل جثير ومعد امن اغيب عن البيت وحميد غادي

فاتن : اي والله ما تلام

عماد : انتي يمج يا فاتن شلون ما ردتي دبريها

فاتن : ان شاء الله لا تشيل بال

ديالا : راح عماد وبالليل اجتني فاتن عالحجره گعدت يمي وحجتلي

فاتن : ديالا اريد اگلج شي اسمعيني عود بدون عياط هاي حياتج وانتي تقررينها احنه ما نجبرج على شي

ديالا : بلعت ريگي وگلت شنو

فاتن : صياد العلوان طالبج لأخو شاكر

وهذول يا ديالا ميحتاج احجي خوش ناس صيت وسمعه ونسوانهم اميرات اخير بجثير من ربعنه

عاد انتي شگلتي شرايج

ديالا : دنگت راسي واعصر بأديني تشجعت وگلت ما اريدهم اني ما اريد اتزوج

فاتن : احنه ما نجبرج بس انتي لا تستعجلين فكري براحتج وشتگولين احنه وياج

ديالا : هزيت راسي بــ اي وراحت فاتن لزمت گلبي

الحمد لله اهلي ماراح يجبروني مثل ليال اني ما اريد اتزوج بحياتي

سعاد : كملت شغلي وجاي اشطف بالطرامي

ادحگ سياره صائب ماكو

اجه ماجد حاط ادينه بجيوبه ويمشي على كيفه ويدفر حصو بالگاع

ماجد : سلام عليكم

سعاد : وعليكم السلام

ماجد : غازي هين

سعاد : لا طلع يشتغل

ماجد : ها

سعاد : راح وهو يتلفت وبي سالفه اخذله فره وجان يرجع يحك براسه

ماجد : اگلج سعاده اشو گعدنه واخوي العود هو وليال مالهم حس ما لگيناهم

سعاد : استغربت مثله صديت عالممشى اشطفه وگلت وينهم يعني

ماجد : هو جيت اسألج ما تندلينهم

سعاد : لا والله ما اندلهم خاف وده ليال لهلها

ماجد : شنهي دفانه وطالع غبشه همه اهلها هذول ما يشبعوني ركض بس يجوز وداها هوه اصلا مخبل

سعاد : راح وشويه ورجع يمشي سريع

ماجد : سعاده هذول مو يم اهلها خابرت وطلعتلي امل گالت محد جه علينه

سعاد : استغربت وصفنت زين اني شكو ماجد يجي يسولفلي وشعلينه احنه رجال ومرته ادحگ على ماجد عيونه مغورگه عوزه يبجي

گلت خاف راحو عالمستشفى

ماجد : ها هيج گولتج وعش راحو عالمستشفى البارحه كلشي ما بيهم

سعاد : اي عجل وين يروحون من الصبح اذا مو عالمستشفى

ماجد : اي يجوز اني اصلا شسويلهم بس استغربت هاذ صائب المرض يشوفه وينهزم

سعاد : گالها وراح وهو يحك براسه ويتلفت گعد بالطرمه مثل اليتيم الي مضيع اهله طلعت توحه يمه تنشف بشعرها گعدت يمه وجان تورثله جگاره

صديت عنهم وفتت جوه

امل : جاي اكنس بالصاله ودگ التلفون رحت جاوبت الو

ماجد : هلا امل شلونج

امل : بس سمعت صوته خنگتني العبره شصير لو انت اخذت ليال جان هسع مگابلنه وتمزق وتضحك

ماجد : امل يمعوده

امل : ها هلا وياك شلونك.

ماجد : الحمد لله اگلج صائب وليال يمكم

امل : استغربت لا مو يمنه شكو صاير شي

سده بوجهي بدون ما يرد هاذ شبي

طلعت اكمل شغلي وستلمت الملابس غسلتهم وطلعت انشرهم واگفه يم الحبل واعدل بالملابس

اجاني عماد وجهه اصفر وشايل ورقه بأيده لزمت گلبي شبيك عماد احجي

ناوشني الورقه

وجان اقراهه مكتوب

(روحو شوفو اختكم الو زوجتوها وما سألتو شحالها ولا تخلي الحقد يعميك عن واجبك يا عماد اختك هاي ) 1

امل : شنهي هاي عماد

عماد : هاي رحت افتح الحداده ولگيتها ملزوگه بالباب منهو توقعين حطها يا امل من شفتها ما گدرت حت اشتغل ولا فتحت باب الحداده رجعت بساع

امل :بعدنه على وگفتنه وفات حميد يمشي سريع ومرعوب وهم شايل ورقه اخذها منه عماد وقراهه

(صير زلمه حميد وروح شوف اختك الجاهل الي رحت ذبيتها بجحر الثعالب يا عارات الزلم عمت عين الموت الي اخذ الدرويش وخلاك صير ادمي لا اسويك غده لجلابي يا فاين )

حميد : هاي لگيتها ملزوگه اباب النجاره

منهو حطها انته مو لو ماجد اكيد

عماد : ما تولي وعش احطلك ورقه اني خايف منك

اني هم لگيت ورقه ويجوز ماجد صحيح

حميد : امشي نروح عليهم

عماد : اني اروح اشوف ليال تريد تگاضب انته وماجد يطبكم طوب

امل : راحو وظليت لازمه گلبي وادعي يربي تستر

سعاد : جاي اعزل بحجرتي وفاتحه الشباك على كبره

دحگت شفت عماد وحميد اجو يمشون ومتعصبين

لفت بساع گلبي حسني ليال بيها شي

وگفت بالطرمه گبالهم جان ماجد گاعد بالطرمه بس طبو شويه وجان يتگاضبون واسمع عياطهم

اسمع ماجد يگول

ماجد : وانته شنهي واحطلك ورقه واهددك ليش انته ياكلك الجلب مدحگ على نفسك حشه خلقة الله

لو منك ولا اگف يم عماد

سعاد : ضحكت بگلبي اكيد يقصد حميد عبنه ادبس وعماد اشگر تگاضبو فتره گمت امط بروحي اريد اشوف شكو شويه وجان يروحون

امل : ظليت گاعده بره انتظرهم اجو وگمت بساع

ها شكو

عماد : ماجد يگول ما حطيت ولا ورقه واني اصدگه عبنه ما قصر بالحجي من رحنه 1

امل : زين وليال شبيها

عماد : مدري هيه لو صائب مريضين ورايحين عالمستشفى ماجد يگول گعدنه ما لگيناهم

امل : يمه بعد روحي بس لا مريضه ليال

عماد : اني ارجع على شغلي هسع والضهر هم اروح اسأل يالله حميد ارجع لشغلك

حميد : شغل شنهي والله ما اخطي لو اهين

امل : شگد جبان حميد گام يذرذر خوف

راح طب لحجرته بس والله ما يلام هاذ منهو الي حطله ورقه

سعاد : الضهر اني بالمطبخ اسوي الغده

واجه ماجد انوب

ماجد : اگلج سعاده هاي ما طلعت مستشفى اشو ما رجعو

سعاد : والله مدري عاد الغايب عذره ويا يجوز راحو سفره عاط بيه وجان يضرب الباب اني هم شجاني وحجيت

ماجد : سفرة شنهي هسع سفرة شنهي وين اخذها هاذ المخبل وين

سعاد : لزمت گلبي هاذ شبي واني شعليه اعرفهم يعرفوني گتله اهدئ اخوي غير مرته واخذها قابل غريب

ــ صد عليه بنظره عوزه يشلع جوزتي على هاي الحجايه ردس الباب وطلع

ظليت افكر ويه نفسي وين اخذها عود

شويه واسمع العياط ماجد هجم البيت على اهله صوت التكسير وصياحه يرج فقد معد يندل بروحه شيسوي يطلع بره يفتر ويطب جوه يهجم عليهم

وشفت عماد رجع هم سأل وراح

خفت يربي شكو بس لا ليال بيها شي اريد اروح اسأل وخايفه يفشلوني ومحد يحجي

طلعت بره واحوص شفت كريمه وجان اناديها

اجت يمي سألتها ما رجعو صائب وليال

كريمه : لا خابر صائب گبل شوي گال لا يظل بالكم علينه احنه طالعين سفره بمكان

سعاد : سفرة شنهي ما گال وين

كريمه : لا والله ما حجه وماجد هجم علينه يگول تعرفونهم وين ومحد يحجي

سعاد : وين اخذها هاذ سفرة شنهي بهل وضع وبيتهم عالگ لليل والوضع نفسه اجه غازي بعده توه جاي يغسل وجفت علينه ماجد گعد تك ركبه يم غازي ولازم رجله

ماجد : غازي عليك الله هاذ صائب مدري وين اخذ ليال ما خليت وما سألت ودورت وماكو مدري وينهم

ــ عاط بي غازي

غازي : انته شبلاك تخبلت انجنيت شعليك انته وين راحو رجال ومرته بس فهمني شتريد منهم اصحه على روحك وليال مرت اخوك صارت ان رضيت وان ما رضيت لا تظل تفكر بيها تروح ويه رجلها وين ميريد انته شعليييك كااافي كااافي

سعاد : تخبل ماجد انرعص من هاذ الحجي شال الطشت ورجده جنت حاطته لغازي يغسل ودفر شكو شي بالهول وگام يضرب بالحايط وكسر جام الباب وطلع فاقد ما يندل بروحه ويتهدد

غازي : اني اخيرلي اشوفلي مكان اهج علي وما اظل يم ولد عمي راح يخبلوني واحد اطگع من رفيجه انعل بليسهم خبلتهم بنيه بگد جهالهم جان استحو

سعاد : گام غازي بره يدخن عفته براحته

وللصارحه اني گلبي يم ليال مجاي تروح من بالي

مر ثلاث تيام وهمه ماكو ماللهم اثر شتگتلها والله

تذكرت سوالفها من گالتلي انتي شلون حبلتي

وتربعت بالگاع تريد اعلمها

ليال : هسع بطنج بيها جاهل صحيحي

سعاد : اي صحيحي عجل جذبي يولي

ليال : زين شلون صار الجاهل ابطنج منين اجه

شكلتي وصار

سعاد : امم دعيت ربي وجان يصير

ليال : وهسع اني اذا ادعي يصير جاهل

سعاد : اي

ليال : يارب ان شاء الله يصير ابطني جاهل واخلي امي تسويله ملابس مثل جاهل سعاد

سعاد : اضحك على فطارتها مزوجه عود وكلشي متعرف ورافعه اديها للسماء وتدعي

و مر اسبوع كامل وصائب وليال ماكو

التحق ماجد بالعسكريه واخذ توحه ويا

وظلت نضال تصيح وراه وتلطم

بس اريد افتهم كرامتها وين اخر مره من هجمت على توحه وتريد تكتلها بالسجين گاللها مو تزوجت عليج وهسع گلبي يم توحه ما تخليني افكر بيج

احردي وروحي لهلج عود من يحن گلبي افكر ارجعج

ظلت واگفه وگالت ما اخطي لمكان هاذ بيتي وانته راح اطلگ توحه غصب عنك ضحك وجان يصفگ بأيده وعافها ومشه

تستاهلين كله من ايدج هاذ تالي جذبج وذبيتي نفسج على واحد ما يريدج ولعبتي بين الأخوان

ديالا : صايره تصرفاتي غريبة خاصة ويه حيدر

اذا يغيب شوي انفجر بوجهه والي يعصبني اكثر من يضحك وما يرد شگد بارد يخليني اشيل روحي وارگعها وهو متخوصر ويضحك ولا همه

وبيوم جنت بمكانه المعتاد انتظره

الجو يخبل والگمر 14 يضوي عبالك نهار

تأخر حيدر هاي عود حذرته اذا يتأخر دقيقه اگلبها على راسه ويدري بيه مخبله

انتظر وانتظر وماكو ماشي يا حيدر يصير خير گمت ونفضت اديني التافيت تا ارجع عالبيت

تصادمت ويا ما حجيت وجان ادفعه وامشي

سحبني من ايدي حطها وره ضهري وشاد على شفايفه ومركز بعيوني

حيدر : شبيج انتي صايره عدوانيه

ديالا : هد ايدي وخر ما اريد احجي وياك هدني

شفطنك هسع اجيت

حيدر : لا خاف متقبلين فهميني شسالفتج مجاي افهم مزاجياتج كل شوي شكل مخبله انتي صار ظرف ونشغلت

ديالا : جذاب كل شغل ما عندك وخر

حيدر : مو اگلج مخبله

ديالا : گالها وهدني بنتر ختنگت وگمت ابجي اي مخبله وبعد لا تحجي ويايه ابد

رجع لزمني ثبت اديني وصفن بعيوني واني احاول اتجنب نظراته واريد اروح

ما حسيت الا حضني بكل قوته

ظليت متصنمه وگلبي يطرد همس يم اذني

حيدر : احبج انتي وخبالج

ديالا : بس گال هالكلمه مدري شجاني دفعته

وردت انهزم جلب بيه وحضني من ضهري

حيدر : احبج ومتأكد هم انتي تحبيني اياج تنكرين

ديالا : فرني بتجاه واني فاتحه اثمي انخرست ما حجيت ظل صافن بعيوني ما اعرف شصارلي ولا اگدر اوصف شعوري بهذيج اللحظه شنو

ما حسيت على روحي الا واني محاوطه رگبته بأديني وهو محاوط خصري بأدينه ويبوس بشفتي

ايده على رگبتي ويبوسني بشغف

دفن راسه برگبتي وحاضني بكل قوته

حيدر : احبج اعشقج انتي وعدوانيتج ومزاجياتج اميرتي

ديالا : ما اعرف شلون صحيت على روحي فلتت منه دفعته ونهزمت جوه وقرفصت بالحجره وابجي اتلمس بوجهي وامسح اثمي وارجف اني شسويت شسويت

ليال : مرت ايام واحنه بعدنه ابيت عمه مديحه گمت انام يمها وكل يوم تعيد عليه نفس الحجي وتفهمني وتعلمني حال المزوجين ويوميه تنطيني علاج احس نفسي صرت زينه

صائب جان مبتعد وبس وكت انام اني يجي ينام بصفي ومن اگعد واشوفه اطلع بساع اروح يم عمه مديحه بالمطبخ مجاي اتقبله ولا اقتنع بي

وبيوم اجت گالت يالله نروح سفره ما ردت اروح لحت عليه بدلت وطلعت وياهم رحنه على بستان شگد حلو اشكال الفواكه بي تغيرت نفسيتي عبن المكان مريح ويخبل

گعدنه تغدينه وجان تاخذني عالمراجيح

ظليت امرجح ومكيفه تونست جثير ما رجعنه لليل

ثاني يوم اني طلبت منها نطلع انوب ورجعنه عالمراجيح وهم ما رجعنه لليل

وراهه رحنه عالسوگ ما خلو شي بنفسي وما شترو

كيفت والسوگ حلو وبي شغلات تخبل گمت افتر براحتي وهمه ورايه يمشون شايلين العلاليگ

وصلت يم بسطيه يبيع كاسيتات

دنگت گمت اگلب بيهم ما گدرت اشتري عبن ما عندي مسجل ذبيتهم بحزن امدي گلهن اخذهن

رجعنه عالبيت وگمت اگلب بالغراض واگدر الملابس على نفسي اشكال شترينه العشه اكلت شوي ورجعت بساع عالحجره مال عمه مديحه اگلب بالغراض

اجت عمه مديحه وجان تمدد تا تنام

اجيت فرشت تانام يمها مثل كل يوم وجان تطردني

مديحه : ما كافي مگابلتني شنهي رجلج اني امشي ولي انطمري يم زلمتج

ليال : لزمت ايدها لا امانه ما اريد اروح خليني يمج گادتني وگالت

مديحه : يبنيتي ما يصير اني شفهمتج يوميه اعيد الحجي واگول شبلاج مجاي تفهمين هسع تروحين يم رجلج وذا زعلج يابه اشلع اذانه

ليال : سحلتني سحل وگفنه اباب الحجره وجان ادگ الباب طلع صائب من شفته ختلت وراهه جرتني وجان تحطني گدامه

مديحه : هاك مرتك وعود صير ادمي وعرف تصرف

ليال : گالتها وجان تدفعني جوه وتسد الباب

ظليت واگفه واعصر بثوبي اجه صائب گرب مني وجان الزگ نفسي بالباب واغطي وجهي

صائب : تعاي شوفي شجبتلج

ليال : دحگت علي من بين اصابعي وما تحركت

راح هوه وفتح الكومدي مدري شيسوي اسمع صوت طگطگه

صد عليه وهو شايل مسجل شهگت وحطيت ايدي على اثمي

جان مسجل اسود جبير شگد حلو حطه عالجربايه وارتاج يمه وطلع كاسيتات ونثرهن يمه ويدوس بالدگم وما يعرف يشغله

صائب : هاذ شلون يشتغل يمكن عاطل

ليال : يحجي ويه نفسه وما يعرف يشغل المسجل

مشيت يمه اعصر بأديني

صائب : هاذ شلون يشتغل تعرفين

ليال : هزيت راسي بــ اي

صائب : هاج شغلي عجل

ليال :گحز المسجل هو والكاسيتات وجان يمدد ويصد غاد رحت بساع وجان اخذه واحط الكاسيت واشغله وجان صوته عالي فز صائب وصد عليه گال نصي

نصيته وبدلت الكاسيت تربعت عالجربايه واشغل مكيفه حضنت المسجل صد عليه صائب وهو حاط ايده جوه وجهه

صائب : حبيتي

ليال : ابتسمت وگلت اي

گعد وجان يتربع گدامي طفه المسجل وخلى على جنب لزم اديني خفت وردت اروح

صائب : بس تعاي نامي والله ماني يمج

ليال : سحبني گوه وجان ينومني يمه حضني وغفه واني ظليت الاوز بعيوني وخايفه وادحگ عالحايط اريد انهزم مگدر محاوطني بأدينه ورجله فوگ رجليني

مدري امت نمت وگعدت الصبح لگيته يمشط شعري بأصابعه غطيت راسي وجان يعضني من اذني صرخت وزعلت گام يضحك وجان يدغدغني من بطني خلاني اصيح من الضحك الا گمت اتوسله واحلفه يهدني

هدني وجان ينام على صدري وشبگ ايدي بأيده

وگال

صائب : ما جنت اتخيلج بيوم تصيرين مرتي

جنت معجب بجمالج ودعيت اذا الله رزقني بنت كون مثلج نضيفه مرتبه وانيقه وذكيه

ليال : صافنه عالسگف واستمعله

لزم ايدي باسها ولزم وجهي بكفوف ادينه وباسني بخدي

صائب : لا تخافين مني ليال وعد مني ما اذيج ولا ازعلج وشتردين اجيبلج وين ما تردين اخذج بس لا تعوفيني وتكرهيني

ليال : اني ما جنت اكرهك

قاطعني وگال

صائب : لا جنتي ولا اريد تصيرين الي صار بينه ما ردته والله حاولت امنع نفسي ما گدرت الي گدامي حوريه وحلالي ما گدرت سامحيني حبابه

ليال : ما عرفت شحجي ويا جنت خايفه منه وبنفس الوقت مأمنه لكلامه هو طريقته بالكلام مقنعه وتأثر بالبشر لهسبب جنت افتخر بي معلمي

ارتاج يمي وگام يمرر اصبعه على وجهي

دنگ وباسني يم شفتي بهدوء

صائب : ما راح تحجين شي اي شي حت لو تگولي احبك استاذي

ليال : صديت علي وگلت عمه مديحه تگول انته معد تصير استاذي

صائب : هاي عمتي مديحه هجمت بيتي بدال ما تعمره

گليلي استاذي واي شي يعجبج المهم تظلين تحبيني اني تعودت عليج منهو يفليني بالليل

منهو يحجيلي سوالف حلوه

ليال : بأسلوبه وكلامه خلاني انسه واني هاذ طبعي ازعل بساع وارضه بساع ابجي على اتفه سبب واضحك على اتفه سبب

مر 14 يوم واحنه بعدنه ابيت عمه مديحه

تأقلمت وستوعبت حياتي واني مزوجه ولازم اتقبل زوجي طول هاذ الوكت الي مر ابد ما حاول صائب يگرب مني ويخوفني

جان بس يريدني احبه وامن بي وفعلا امنت بي

وبيوم جنه گاعدين عالجربايه مثل كل يوم بلش يحجي وياي بلطف يمسد شعري ولزم اديني يبوسهم

گرب مني حضني تلبكت وما انطاني مجال اخاف

ظل يحجي وياي ويلهيني

وبطريقته واسلوبه بالأقناع صارت بينه علاقه انوب وما اذاني ولا انطاني مجال احجي شي

اخذني عالحمام هو وسبحني شال الخجل مني

وصرت مرته من صدگ

ظلينه وراهه يومين ورجعنه لديرتنا گامت عمه مديحه تبجي ورانه

بالطريق جان يسوق ولازم ايدي ويحجي وياي

صائب : الي صار ابيت عمتي مديحه ممنوع تحجينه لحد وذا سألوج گولي رحنه سفره احجي بس الشي الحلو

ليال : كلمه اسمعها وكلمتين لا عبن اغفي نمت وما حسيت الا لمن وصلنه البيت

وتلگتنه شكحه بالعياط وسممتنا بحجيها ما جاوبنه وفات جوه وهو حاضني

ديالا : من بعد الي صار ويه حيدر صرت اتجنبه

وما التقي بي شگد حاول يتواصل وياي وما فعلت يخليلي رسائل بالمطبخ ورد بدون ما اقراهم اذبهم بالزباله 9 ايام واني اتجنبه ولا عيني تجي بعينه

خجلانه من روحي شلون هيج اسوي

لحد ما بالليل طلعت اجيب ملابس درويش عالحبل

وجان يلزمني حيدر ويسد اثمي تا ما اصرخ گمت افالت واضرب بي حضني قوي قيد مقاومتي

حيدر : خن نگعد ونحجي مثل الأوادم احسلج

ما تگولين حيوان شحاله لابسته صارلج 9 ايام شبيج فهميني شصار وتالي وياج

ديالا : وخرت ايده من اثمي ودفعته

زعم ما تعرف شصار وخر من دربي احسلك تره والله اعيط والم الناس عليك

لزم الحبل وسد عليه الطريق

حيدر : عيطي ياريت خلي الناس كلها تعرف احبج وتحبيني وتباوسنه شنو يعني لا تعذبيني ديالا مو جنتي مندمجه وياي ليش تخبلتي

ديالا : ما احبك اني خوش اني غبيه ما اعرف شجاني ما اندل بروحي يالله وخر من دربي

حيدر : ما تحبيني وجنتي ذايبه بين اديه

ما تحبيني وتحاسبيني وين رحت وين اجيت وذا اتأخر دقيقه تگلبين الدنيا وتهتمين بيه اكثر من نفسج اكلت نمت شربت كل هذا وما تحبيني

ديالا :عيونه مغورگه و لازم ايدي ويدحگ بعيوني ويحجي اي ما احبك

حيدر : اني احبج ديالا بكل جوارحي احبج واريدج جنت بدون شي بلاج انسان بدون هدف بحياته اكل وانام والصبح نفس الروتين ما عندي احد افكر بي محد جان يهتم بيه وبحياتي ما فتحت گلبي لأحد وحجيت خصوصياتي جنت ساد گلبي

بس انتي يا ديالا من اول ما شفتج حبيتج تذكرين من اجيتكم اول مره وتصادمنه ونكسر الرادو مال حجي حسين

وثاني نوبه من جنتي تمشين بره بيتكم ودفرين بالحصو وما منتبهه بوكتها سوتيلي ريوگ

ظليتي ابالي افكر بيج بس گلت وين يا حيدر شيجيبها عليك ما ترهم گمت اطردج من تفكيري وبلشت انساج وعلى حظي جيتي هنا گبالي

شفتي القهر جنت احاول اتجنبج وانهزم بس ماكو مفر حبيتج هواي

وبيوم شفتج لازمه فستانج وتفرين بالحديقه سحرتيني يا اميرتي

دعيت بيومها تكونين حبيبتي

طلبتج من الأمام الحسين والعباس يا ديالا يوميه انخاهم واتوسلهم

احبج لا تكسرين گلبي وتصديني

واعرف تحبيني

ديالا : ما احبك لا هدني خن اروح

حيدر : ليش تنكرين ليش

خايفه اهلج ما ينطوج الي مو اذا هذا همج مستعد ابوس رجليهم اتوسلهم اجيب اهلي وعمامي كلهم

نتزوج واسكن هنا ما ارجع للنجف ابد وين ما تحبين نظل

ديالا : غطيت وجهي گمت اشاهگ

اني اخاف من كلمة الحب يربي مو انوب اعيشها واحب اني شنو سوه الحب لمهره غير حطها جوه التراب واخذ ابويه ومحمد ويا ما اريد احب لا ما اريد

مسحت وجهي وحيدر صافن ينتظر مني كلمه

دفعته وفتت جوه بساع والليل كله ابجي

ثاني يوم فاتن گالت خن نروح لهلي ضوجه

كيفت ولميت ملابسنه ودانه حيدر وصلنه البيت ورجع ما صديت بوجهه ابد اكيد گلبه شتعل نار بس يريد يحاجيني

سعاد : اول ما طبو صائب وليال

شهگت والله شگد مشتاگلها هالمصگوعه

فاتو جوه ارتاحو وجان تطلع شافتني بره احوي باميه اجتني تركض وتضحك حضنتني وتگمز

ليال : هااا سعاد جذابه اعرفج شلون حبلتي

سعاد : فتحت اثمي وضربتها على جتفها وهي مكشره تضحك

وجع شلازمه هالحجي هسع وين جنتو احجي

گمت امتمت

ليال : جنت بسفره رحنه عالمراجيح والبستان والسوگ تونسنه واشترولي اشكال الحاجاات تعاي اشوفهم الج وشتريت قاط للجاهل مالج

سعاد : يبعد روحي سفرة خير ان شاء الله ظل بالي يمج المهم تونستي والحمد لله على سلامتج يگلبي

ليال : الله يسلمج اعرف شلون حبلتي تره علمتني عمه مديحه

سعاد : اي افتهمنه عاد اسكتي انوب عمتها مديحه امشي جوه احجيلي

طبينه وبلشت تحجي مثل المسجل اريدها تسكت ماكو وكل شوي وگالت اعرف كلشي خبلتني گوه گشطتها من يمي مگرود الي يحط. بأثمها سالفه

ليال : اجه ماجد وبعده نفس طبعه وجاب توحه ويا اول ما طبو وتگاضبو ويا نضال وشكحه

عافهم متعافشات واجه يمي تخوصر

ماجد : وين رحتو انتي وصائب

ليال : رحنه سفره

ماجد : سفره گلتيلي ومكيفه

ليال : ابتسمت گلت اي كيفنه وتونسنه

وجان يشيل الكرسي ويرگعه بالحايط

ماجد : مكيفه انعل شيب اهلج مكيفه واني روحي رادت تطلع والله لسود عيشتكم اصبرولي

ليال : سديت اذاني ونهزمت لحجرتي سديت على نفسي الباب وما فتحته لحد ما رجع صائب گمت فتحتله الباب ومن فات سديته

صائب : شبيج مرعوبه

ليال : اجو ماجد وتوحه وتكاونو ويه نضال

ابتسم وراح يبدل

صائب : وشنو الجديد انتي ممنوع تطلعين هوه ماجد يمل ويبطل هاي المهزله

ليال : شبكت اديني ورحت يمه وگفت على طوارف اصابعي وعيوني مغورگه

لزم وجهي بكفوف ادينه

صائب : شبيج احد حاجاج

ليال : لا بس مشتاگه لعلي جثير والله

گلتها وغطيت وجهي بديني وگمت ابجي

حضني وجان يشاورني

صائب : اوديج باجر بس اريد مقابل

ليال : صديت علي وگلت شنو

حاوط خصري ويدحگ على اثمي وصدري ويمشط شعري بأصابعه

صائب : بالليل عود

ليال : اخاف ما توديني كل مره تگول وما نروح

صائب : صيري حبابه وياي وذا ما وديتج الج حگ عليه هالنوبه

ليال : مو جاي اسمع كلامك وما اطلع وشتگول اسوي

صائب : مو هاذ قصدي بعدين افهمج روحي جيبيلي جاي هسع

ليال : رحت صبيتله جاي بگلاص طلعت شايلته وجان يوگفني ماجد اخذه من ايدي وراح

رجعت اصب غيره وجان ياخذ القوري ويلگحه بره هو والجاي ظليت واگفه بمكاني هاي ليش

ماجد : روحي ابجي يم استاذج احجيله

ليال : رجعت عالحجره وما حجيت شي اخاف يتكاونون

صائب : وين الجاي

ليال : سويته وحرگته

ما حجه شي والعشه سوا ماجد النه سم

ومحد حجه ويا طبينه لحجرتنه فلست علج وگمت اعلج وگفت گدام المرايه وعلج وانثر بشعري اقلد توحه شافني صائب وجان يتعصب

صائب : ذبي العلج ليال

ليال : هسع هو علج شعلي

صائب : ذبي اسمعي الكلام

ليال : طلعت العلج من اثمي ورحت ذبيته بالسله برطمت ورجعت تربعت عالجربايه اجه يمي وهمس يم اذني

صائب : بعدج تردين تروحين لهلج

ليال : شهگت وگفت على رگبي اي اريد

صائب : عجل تسمعين كلامي وسلميني نفسج

ليال : رجعت گعدت بدون ما احجي وادحگ علي هالكلمه گالها من جنه بيت عمته مديحه قرفصت ودنگت اني ما احب هيج ما اريد ردت ابجي

گعد يمي ولزم اديني باسهم

صائب : ها ليال وين صفنتي مو تريدين لهلج صيري حبابه شفتي اخر مره ما خليتج تبجين وتزعلين

ليال : ظل يتوسل ويتودد استسلمت كل همي اريد اروح لهلي گام وطلع سيت نوم احمر گال لبسي لبسته واخذني بحضنه

گعدت بالتسعه على صوت نضال تعيط

افرك بعيوني ملزگات تعال عاد شلون اطلع اسبح وهمه الكل بره يصيحون

صائب : يالله گومي وياي

ليال : لا روح انت بلأول امانه

راح سبح وطلعت اني ومثل العاده وگفلي بالباب سبحت وطلعت بدلت لبست النفنوف الي شترته عمه مديحه جان اسود گصير ومشطت شعري ورحت على سعاد جذلتلي طوگ بالوسط وخليت ذاك مهدود

صعدنه السياره ومشينه والطريق كله يوصي بيه ما اعصي يم اهلي ومن يجي ياخذني ما اعاند تا كل ما اريد يجيبني الهم وصلنه الباب حدرت وجان يلوحلي ويروح وجفتت عليهم

ديالا :عاونت امل بالغده وتونه حاطين السفره

سمعنه الباب انفتح ما صدگت عيوني من شفتها فاتت تركض وتنادي

ليال : اني جيت يما امل عماد

ديالا : گمنه الكل تلگيناها حت حميد وعماد جيتت علينه تبوسنه وتبجي تنتقل من واحد لواحد وتشاهگ مو مصدگه ولا احنه مصدگين شلون خلوها تجي

حضنتها وگمت انگز شالتني شيل

نبجي ومكيفين بيها امي من حلات روحها گامت تنعي وعماد حاضنها ويبجي وحت حميد يبجي وصاد بصفحه يمش دموعه

عماد : منهو جابج

ليال : صائب وصلني هين ورجع

عماد : تعاي يولي شگد مشتاگلج مرتاحه وين جنتو سألت عليج گالو مو هين رايحه سفره

ليال : اي رحنه سفره بعيد يم عمة صائب مديحه

عماد :ها خوش مرتاحه

ليال : اي مرتاحه اشترولي اشكال الغراض واخذوني عالسوگ

امل : صايره حلوه يولي شهل نفنوف الي يخبل

ديالا : گامت وجان تفر وتنگز

ليال : هاذ من عمة صائب شترته

حميد : عوفي الحجي هسع تغدي هاج اكلي

فاتن : صائب زين وياج يضربج احد يحاجيج

ليال : عش يضربني والله زين حت يسبحني ووو

امل : گامت تجفص وتلافيت الوضع سكتتها متفاجئه يربي شلون خلاها تجي ومبينه مرتاحه تضحك ومكيفه

ديالا : الكل مكيف بليال حاطينها وندحگ عليها مثل التلفزيون وهاي تحجي عبالك بالعه مسجل وتجفص بسوالف اني ما اعرفها بس امل تسد اثمها وتغير الموضوع قررنه مزال ملتمين نحدر العصر عالگاع

نفتر صار زمان. ما رحنه

لمينه البيت وحدرنه الكل بس ظلو صبره وامي بالبيت عماد يمشي گدامنه هو وحميد واحنه وراهم وليال تنگز وتصفگ اول ما طبينه المزرعه شفنه سياره طابگه وصلنه جان صياد ويا شاكر اخو يم مزرعتنه من شافنه صد بصفحه سلم على عماد صافحه

واحنه من بعيد سلمنه حط ايده على صدره ورد السلام بدون ما يدحگون هو والي ويا

عماد : زارتنه البركه ابو نشمي ما توقعتك تجي

صياد : مو گتلك اجي اخذ مخضر

عماد : بس ما گلت اليوم

صياد : صحيح ولا جنت اريد اجي اليوم بس صارتلي شغله هين ومريت فرد نوب

ديالا : جان واگف هو وعماد ويحجون

اخذ اشتره مخضر من الفلاحين وراح مشه مسافه

وليال راحت تگمز ويه جوانه وجاهد

ما حسينه الا اجو جماعه شايلين مگوار وتواثي ويتهددون على حميد وصلو يمنه وجان عماد وگف بينهم ويحاجز يريد يفتهم شكو

خفنه والتمينه يم فاتن وامل وادحگ سياره صياد وگفت

الزلمه گال عماد وخر انته لا تفزع اخوك هاذ مو خوش ادمي اسأله الصبح شسويت

حميد : كلشي ما سويت ابنك هو مو خوش ادمي جاب مي وذبه عالخشب نگعه شترديني اسكتله

ــ انته فشرت گبل يا حميد وستفزيته انته دوم دثر حجي واحنه متحملينك لخاطر الدرويش الله يرحمه بس بعد مابيها محمل

حميد : امشي انگلع انته وابنك وربعك مو خوش اوادم انتو

ديالا : من حميد سالفه ومن عدهم وتعلگ وجيتو على حميد ضربو خلال ثواني معد نشوف حميد همه جثيرين وبس عماد وحميد بنصهم

وما يبينون گمنه نصيح ونلطم

شفت صياد اجه يركض ونزع غترته تحزم بيها

جيت بنصهم وگام يشيل اوادم ويلگح كل واحد يضربه يخلي ما يندل دربه اخذ المگوار منهم ويضرب بيهم واجه شاكر وراه هم واخذ منهم سراجي وكسروهم تكسر

واحد من هذولاك فشر على حميد وگال **** عرضك كلمه مو حلوه وصياد تخبل لزمه وجضعه بالگاع ويضرب بي ويگله تغلط على عرض منهو يول منهو خله الزلمه ما ينعرف وجهه من الدم لو الطين

الا شاكر سحب الرجال من صياد وطلعه

فقد لاصهم لوص نهزمو وظلت حذيانهم بالمكان

وصياد گاعد تك ركبه ويضرب بالگاع بيده گام على حميد وجان يلزمه من ياخته رفعه عن الگاع

يحجي بعصبيه وصوته يرعد رعد

صياد : اسمع يول حميد تحملتك جثير يول انته مالك بهالدنيا غير اخوك ليش ما اصييير ادمي شعندك تكاون بالناس وتفشر عليهم وتالي يفشرون على عرضك

صير ادمي حميد اخيرلك ولا يظل السانك يهذي من وراك هذيج النوبه ردت اكتل عماد واليوم جان رحت انته واخوك بالرجلين من وره فيانتك

شتسوالك هسع اخواتك يصيحن لا حول ولا قوة والعالم تفشر عليهن تأدب لا بالقرعان املص رگبتك ولا تگول شجايبك عليه اجيك افتهمتتت اجيك

ديالا : حميد مثل العصفور بيد الصياد شايله ويعصف بي هده بالگاع وحميد تلمس الگاع ما صدگ على الله جاسها وصياد فرك گصته وگف يم عماد وينفض بي ولزم كتوف عماد گاله

صياد : هذول منهم الناس يا عماد خوما يهجمون عليكم بالبيت عندك سلاح تحتاجني اظل هين لا تفكر جثير لو وحدك ما اهتم بس النسوان شلون هسع اخوي

ديالا : ادحگ عماد غورگن عيونه ويريد يبجي

عماد : عگب هاي الجتله الي حصلوها منك توقع يجون

صياد : اي يجون يا عماد الجرح يطيب بس الكلام ما يطيب اذا حميد يفشر عليهم شلون يسكتون هذول مبينين ما يسكتون عن الحگ ومبينين اهل شر ما ادحگ عليهم استگو عليكم وانتو ثنين وما همهم النسوان ولا حترموهن لا تستهين بعدوك ابد

راح اخليلك سلاح يفيدك وان شاء الله ما يصير شي

ديالا : اشر عالسياره واجه شاكر يسوق فتح الباب وطلع سلاح انطا العماد ويا شجاورين وطبطب على جتف عماد وراح

رجعنه عالبيت مخذولين فطر گلبي عماد من گعد يبجي

عماد : يربي احنه ليش بدون عشيره وعمام ليش ما عندي اخ مثل صياد ليش جان شحده الي يطب گاعنه ويتهدد علينه گدام خواتنه

ديالا : حميد جان گاعده مرجي ضهره عالحايط

گال

عماد : مو زعم طلب منك ديالا لأخو وانته ما فعلت وگلت للزلمه ما نزوج البنيه

فاتن : وهسع شلازمه هالحجي

حميد : شلون شلازمه بالله احنه بطرگ نفسنه يا فاتن هسع كلكم تلوموني العالم مستگويه علينه عبن ما عدنه ضهر

تدرين يوميه يفوتون يمي اشكال الحجي اسمع وتدرون بيه مگدر اسكت

نسبنه ويه بيت العلوان يفيدنه وسند النه همه بس خطبو مهره ورادو يزفوها شفتي العالم شلون گامت تهابنه بس ربج صارت الصگعه وخرب كلشي هسع الناس رجعت انوب وتريد نسبنه واحنه ما فعلنه دفرنه النعمه

فاتن : عوزك نجبر ديالا مو

حميد : ما نجبرها هيه اول وتالي راح تزوج

تعاي انتي هي ليش،ما تفعلين ها

ديالا : يدحگ عليه ويحجي دنگت راسي ما حجيت

صديت على عماد جان مرتاج عالدنگه وحاط ايده على عيونه والدمع ينزل على لحيته انعصر گلبي ردت اموت من القهر بللت شفايفي وگلت موافقه

حميد : شنهي عيدي

ديالا : موافقه اتزوج اخو صياد

يتبع……

الحادي والثلاثون من هنا