رواية عرين الصياد الفصل الثامن والعشرين 28 بقلم شذرة العدوان
اهلا بكم في مدونة مكتبة حواء نقرأ لكم ونكتب من اجلكم
امل : اول ما طبينه بيت فاتن عماد فتح باب السياج وفات جانت ديالا واگفه بره بالحديقه من شافتنا فزت ابتسمت واجت تركض حضنتني وحضنت عماد وتگمز
ديالا : الله جيتو مشتاگلكم والله شلونكم
عماد : اواش راح توگعيني يولي مو توگفينه بالباب تسألين امشي جوه اني هم مشتاگلج
ديالا : شلونج امل تعال علاوي اشيلك اشو صاير ادبس
امل : عبن بالشمس 24 ساعه گبل انتي عينج منهم ومن رحتي هملته التهيت بالشغل
ديالا : عجل والفطيره ليال ما تعاونج
امل : ابتسمت بحزن ومشيت امبلا تعاوني
عماد : حجي حسين هين
ديالا : لا بالمعمل وفاتن جوه امدده يالله فوتو عش واگفين
امل : طبت ديالا جوه شايله علاوي وتنادي بفاتن
وصلنه باب الصاله طلعت فاتن عيونها ملزكه جاينه نايمه
كيفت بينه جثير طبينه جوه گعدنه مقابيل الشباك الي يطل عالحديقه يجينه هوا بارد وحلو
بلشن فاتن وديالا يسألن واني وعماد نجاوب زينين والحمد لله
ديالا : عش ما جبتو ليال وياكم لو الجهال
عماد : جوانه ادوخ بالسياره وذا جبت جاهد من يمها راح تنرعص
ديالا : وليال شجايها ما دفگت نفسها
امل : دنگ عماد وشبك ادينه وما حجه
استغربت فاتن وعگدت حواجبها
فاتن : خير عماد اكو شي اشو وجهك متعوب وحجيكم بارد من نسألكم عالحال
عماد : اگوم ادخن جگاره بره واجي
امل : طلع عماد بره يدخن وفاتن عينها ويا من طلع صدت عليه واشرت بحواجبها
فاتن : امل عماد شبي انتو ثنينكم شبيكم جاين مسيرين لو متيرين
امل : ابتسمت گلت مسيرين جينه نشوفج
فاتن : حياكم الله تشوفكم العافيه بس وضعكم ما يسر
امل : گالتها وهيه تنزل حواجبها وتعقدت گامت تفرك اصابعها واني تندمت اني اجيت
اجه عماد عيونه مدمعه گعد وجابتله ديالا مي اخذه وايده ترجف ادحگ على فاتن مراقبته وفاتحه عيونها گامت وگعدت يمه لزمت ايده
فاتن : عماد وروح ابونه وروح مهره ومحمد وراس الشيخ الگيلاني احجيلي شكو تره گلبي گام يرجف مبين اكو شي وجيتكم غريبه
امل : عماد شرب مي ذب الگلاص وجان يفتحلها ايده حضنها باسها من راسها وگال
عماد : اني لوما اندلج اختي السبعه والي راح تگف ويايه مثل الجبل وتسندني ما تعنيت واجيت تا احجيلج
فاتن : عليك الله شكو لا تهبطني
امل : گامت فاتن تبجي وشفتها ترجف وادحگ علينه
لزم اديها عماد ورجع باس راسها
عماد : اسمعي فاتن وروح ابونه خليج قويه واثبتي تره مابيه الوب عليج من جبتلج ديالا ورحت البغداد
رجعت لگيت بيتنه مهجوم حميد وصائب ورايه مسوين رهامات صائب ماخذ ليال ومنطي بدالها رافده وبثلاث تيام مكملين كلشي وصائب زاف ليال وهسع يمه
انكسر ضهري يا خيتي والي كسرني اخوي
امل : انبهتت فاتن وظلت فاتحه اثمها وعيونها
وادحگ علينه وتهز براسها وعماد مجلب بأديها
وديالا جانت واگفه انخرطت وگعدت بالگاع ومصدومه
عماد : فاتن لا تسكتين سولفي شي عليج الله
صيري قويه وعينيني تره صفيت وحدي بدون اخوان اريدج انتي اخوي
امل : داخت فاتن وگامت تروط شالها عماد واني لطمت وجهي وگمت الوم بروحي
گامت ديالا بساع وجابت علاج فاتن وانطته الها
ديالا : شلون صار هيج ناصبين علينه موو استاذ صائب شلون يتزوج ليال خاف متوهمين
امل : لزمت كتوف ديالا وهيه ترجف وتنگز ومو مصدگه حضنتها وبديت افهمها وحجيتلها كلشي
لطمت وجها وگامت تبجي وتضرب برجليها
وعماد مگابل فاتن تفتح عيونها تبجي وترجع تغمض وعماد يبوس براسها ووجها
عماد : خيتي على بختج اجيتج اريد العون
ام درويش يمعوده گومي انتي السبعه هاي الي صار صار خيتي اگعدي نلملم جروحنا ونادويها جميع
امل : مرت اكثر من ساعتين وفاتن منهاره وما تحجي تالي ستوعبت وگامت تبجي وتلطم وتلوم بينه عبن ما خبرناها وسوينه شي
عماد : يا خيتي مو گتلج جنت ابغداد وما ادري
وامل لا حول ولا قوة حميد النذل مهددها اذا تسولف شي يطردها لهلها وامج الله يسامحها ضاربه امل وبيوم زافين ليال حاطه امل بالحجره وساده عليها الباب
فاتن : هينه اني اعلمهم امي وحميد
ليال ااخ يا گلبي شلون انطاهم گلبهم شحالها هسع ما رحتو عليها ما اجت
عماد : ما شفتها غير نوبه وحده من هجمت عليهم وضربت صائب كسرت ضلعه وجماعتي الدراويش زعلو منو وحلفوني بعد ما اصلهم گالو جم يوم تهدئ النفوس ونلگالكم حل
فاتن : حل شنهي عماد حل شنهي
ليش ما شتكيت عليهم وطيحت حظهم
عماد : ردت اشتكي والله ورحت بس سدو الطريق بوجهي گالو عقد شرعي وبرضات البنت ورضات اخوها وزواجهم شرعي بعد عليمن رايح انوب سمعت صائب مصدق العقد بالمحكمه ومخلي مبلغ يكسر الضهر في حال حاولنه ناخذ ليال
فاتن : الله يعثرك بگلبك يا صائب هاي عود انت المثقف شخليت للجهله
عماد : ماله نيه يجي يوم واطلعها من عيونه
انتي بس صيري زينه اريدج ويايه سند
ديالا : عفتهم يحجون وطلعت بره بجيت لحد ما فحيت هاي شلون والله مجاي اصدگ ليال واستاذ صائب تزوجو يربي ليش ثنيت على ركبي وره البيت واشاهگ اجه حيدر شايل الغده شافني وذبه من ايده واجاني بساع
حيدر : شبيج بويه ليش تبجين ام درويش بيها شي
ديالا : هزيت راسي بـ لا
حيدر : جا شكو
ديالا : اختي ليال شفتها انته بعدها جاهل
رايحين مزوجيها لمعلمها شلون هيج يا حيدر هيه زغيره وما تعرف حت تسولف
غطيت وجهي بكفوفي وگمت اگهد
گعد تك ركبه يمي
حيدر : بويه استهدي بالله شلون هيج اخوانج رضو
ديالا : عماد ما يدري هاذ حميد الي سواهه الله لا يوفقه
امل : طلعت ادور لديالا تنطي الجهال اكل گامو يصيحون ادورلها ماكو رحت عالمطبخ فتت من يم الشباك وادحگ ديالا مثنيه بالگاع ويمها حيدر هاذ الي يشتغل ويه حجي حسين
ادحگ حيدر يواسي بديالا ويرجع شعرها وره اذنها يمسح دموعها ولازم وجها بأيده
حطيت ايدي على اثمي وطلعت بساع وگفت وراهه وناديتها فزت وجان تصد عليه وحيدر انبهت دنگ شال الغده جابه يمنه سلم وراح بساع
لزمت ديالا من ايدها وادحگ عليها ارفعلها حواجبي
اريد افتهم گامت تبلع ريگها ودنگ وشفتها تمتمت
ديالا : امل هاذ حيدر تره خوش ولد ووو
امل : قاطعتها ماراح اتزوجه تا تمدحينه شعنده وياج
ديالا : والله مو عنده شي هو خوش انسان ومؤدب
امل : مؤدب لازم وجهج ويمسد على شعرج
دنگت وما حجت شي
هزيت راسي خير ان شاء الله
گدتها جوه لاگانه عماد وجان ديالا ادحگلي وتبجي عماد يعبالي على ليال حضن ديالا ويبوس براسها يصبر بيها
عفتهم واخذت الغده صبيته
محد اكل غير الجهال وره الغده بساعه شفنه فاتن زينه عاد عماد گال يالله نرجع دوبنه نصل هسع امي گلبها علينه سلمنه عليهم وطلعنه وديالا ادحگ عليه بتوسل ودنگ
مشينه واني گلبي يغلي هاي ديالا جاهل وحيدر غريب ومحد يعرف نيته شنو شلعن گلبي هالبنات
ديالا : فتت جوه لازمه گلبي خايفه امل تحجي لعماد عني وعن حيدر والله هو حباب ما بنيته شي
لزمت وجهي صخنت اني اعرف هالشي عيب
بس حيدر خوش انسان
من اول ما اجيت هين يم فاتن جان يتفاده يشوفني
يجيب الريوگ والغده يخلي بالمطبخ ويطلع بساع
وكل مره اتلاگه ويا تجي عيونه ثنينه على بعض ويدنگ
حيل مؤدب والله جان اذا يدحگ بالغلط
يختفي وما اشوفه
مره عن مره كل ما يجي يجيب اكل لو توصي فاتن على شغله بس يشوفني يلتبك يريد يفوت بالحايط
وبالليل من نگعد نتعلل يدز علي حجي حسين
يگعد بهدوء وما يحجي واني الاعب درويش ارفع راسي صدفه اشوفه مدنگ ويعصر بأدينه
وبيوم خابرت اهلي وحصلتهم همزين طلعتلي امل حجيت وياهه شويه وسديته اخذتلي فره بالمطبخ شفت مواد كيك اشكال عد فاتن بس اني ما اعرف اسوي
گمت اگلب بالكاونتر ولگيت كتاب الطبخ
مكتوب بي وصفات حلويات اشكال اخذت طريقة الكيكه
حطيت الكتاب گبالي وبلشت اخلط
صارت العجينه يابسه اشو حطيتها بالفرن وچبنت
اخذتها ذبيتها ورجعت اخلط غيرها
وهم خربت عجنت وحترگ نصها كبيتها
وما استسلمت حجي حسين فلوسه جثيره وبيت اختي عادي امون خن الوص
ظليت اخلط وتخرب واذبها شعري صار كله طحين والمطبخ انگلب
سمعت خرخشه ورايه صديت شفته حيدر يدحگ عالمطبخ ومصدوم حط العلاليگ عالميز وتخوصر
حيدر :شنهاي شصاير بالمطبخ
ديالا : جاي اسوي كيكه
حيدر : وينها الكيكه هاي الي جاي تخلطيها
ديالا : اخذ الخاشوگه مني شال عجين وكنش
اهلا بكم في مدونة مكتبة حواء نقرأ لكم ونكتب من اجلكم
حيدر : هاي شنو شگد حاطه طحين
ديالا : دحگ عالكتاب وشاله
حيدر : هاي عود عالكتاب جاي تشتغلين والهگد لوصتي
ديالا : تفشلت ودنگت ادحگ اديني العجين والطحين واصل لجسعي
هي شنهي جاي الوص تره اعرف اشتغل
حيدر :لا واضح تعرفين معدله بس روحي غسلي واني راح اعلمج
ديالا : لا شكراً اني اعرف تره بس شتتني الكتاب اكو كلمات ما افهمها
حيدر : يالله ما صار شي ميخالف الواحد ما يستسلم ويظل يحاول ويتعلم اني جنت ما اعرف
بس اقبلي المساعده اعلمج مابيها شي
ديالا : صفنت شويه
يالله هسع خن انضف المطبخ بالأول
حيدر : نسوي الكيكه ونضفه فرد مره ياردله جلف
ديالا : يالله ماشي
ابتسم وجان يروح يفتح الكاونتر طلع نجانه جديده
حطها عالطبله گدامي واني ادحگ علي واخلط بعجينتي اليابسه
شمر اردانه ادينه بيض يلمعن راح جاب بيض وطكه بالنجانه وحط دهن وحليب وشكر وخلطه لحد ما صار قوام كريمي
جاب ككو وحط خاشوگه وضاف طحين شويه ورشة ملح وهيل مطحون وشويه مي وبلش يخلط شگد حلوه عجينته
راح شغل الفرن وخلا يحما حيل
ورجع ضاف خميرة الكيك طفه النار الفوگ وخله بس الجوه يشتغل بكل رشاقه ومهاره عبالك ملعبه بالمطبخ
ولا وصخ نفسه واني جيس طحين كامل فوگ راسي وعجين الكيك واصل كتوفي
دهن القالب ورشله طحين ضاف الخليط وحط الكيكه بالفرن
ورجع ينضف الويصه الي سويتها اني
يشتغل بدون حس ويدحگ عليه نظرات خطف ويبتسم ويهز براسه
ادحگ على عجينتي يابسه حت ما تنشال بالخاشوگه
زعلت وجان اخذها اذبها بالزبل هيه والنجانه والخاشوگه +
رجع ورايه اخذها وفرغ النجانه واخذهن غسلهن هنه والخاشوگه رتب المطبخ واني غسلت اديني وانفض بشعري
اريد اطلع واحافظ على ما تبقه من كرامتي
بس فضولي خلاني اريد اشوف الكيكه شلون تطلع وهو كمل وگعد عالكرسي ورجه ادينه عالطبله
شويه وگام شغل النار الفوگ
حيدر : تعاي گعدي ليش واگفه
ديالا : مسحت شعري ورجيت ضهري عالحايط بعدين رحت جريت الكرسي وگعدت يمه
فاحت ريحة الكيكه التفتت عالفرن گتله ستوت
دحگلي وهو حاط اديه على خده
حيدر : لا بعدها
ديالا : شلون عرفت
حيدر : اعرفها
ديالا : اممم صديت بصفحه هسع اني شعندي هين گاعده فوگ فشلتي احس نفسي نشاز بالمطبخ يالله هم شي اعرف اسوي جاي
حيدر : شعرج بي طحين
ديالا : ها
حيدر : شعرج بي طحين هذا من وره
ديالا : نفضت شعري ورجعته وره اذني
گلت هسع اغسله ظليت گاعده وساكته واريد افتهم ليش مجاي اگوم اولي اني وشكلي الي يخزي
حاولت افتح حديث واخلي يغلس عن لويصتي
سألته عن اهله ليش مو ويا وشجابه من النجف يشتغل هين ابتسم وگام يحجي
حيدر : ابوي جان يشتغل هنا قبلي وتعرف على حجي حسين خوش رجال معدل الله يحفظه هو وام درويش ونعم الأخت عاد اجيت اني بالبدايه ما حبيت المكان وظليت مستغرب وما اختلط كلشي جديد عليه
واهلي اجو مره وحده ورجعو ما حبو يظلون
ديالا : اهيو احلى النجف لو الأنبار
حيدر : ماكو شي اسمه ياهو احلى كل انسان متعود على منطقته وناسه ومحافظته الي تربه وكبر بيهن ومن يروح لغير منطقه لو يشيلونه على كفوف الراحه
راح يظل يحن لمنطقته واهله ويعتبرهن جنه والمكان الي هو بي جحيم
ديالا : صحيح هسع اني مشتاگه لديرتنا احس نفسي مخنوگه هين رغم نفس الوضع ما اطلع لا هين ولا غادي
حيدر : مو عبن ديرتكم هناك مفتوحه وريف
وهنا مدينه وبيت فوگ بيت تحسيها مخنوگه
ديالا : اي صحيح
مرت ربع ساعه واني گاعده وصافنه بالحايط
حيدر : ستوت الكيكه ابشرج
ديالا : گام طلعها وطفه الفرن حطها عالطبله وغطاها بخاولي
حيدر : هاي علمود ما تبس
ديالا : گمت احوص كل ما امد ايدي تا اشيل الخاولي اشوفها ينهمني
حيدر : اصبري سبعيه انتي
ديالا : بس اشوفها
حيدر : اصبري شويه
ديالا : مر وقت شويه
هسع يالله شوفني الكيكه اريد اروح اغسل شعري
حيدر : تصبري خليها تبرد خاف تصير يابسه مثل كيكاتج هههه ومو بس شعرج سبحي كلج
ديالا : تقلد مو شو بساع اخذت ميانه اشو
خلص بعد ما اريد اشوفها كيكتك
عفته وطلعت وهو متفشل
ورحت سبحت ونشفت شعري فتت عالحجره گعدت شويه نادتني فاتن طلعت
فاتن : ديالا سوينه جاي معدل حبابه
ديالا : رحت عالمطبخ اسوي جاي شفت صينية عالطبله مغطيه بجرجف ابيض كشفته وطلعت كيك مگطع ومحطوط بماعون وياهم رسالة
فتحتها مكتوب
اسف هواي مجان قصدي حبيت اشاقي شفتج حبابه واني صارلي زمان ناسي الضحك شنو
نقهرت اني فشلته وضجت من نفسي لازم اعتذر منه
شلت قطعه اكلت منها
والله طيبه كملت الجاي واخذت الكيك يم فاتن
اول ما شافته گالت
فاتن : امت حيدر سوه الكيكه عاشت ايده
ديالا : گبل عرفتها حت اذا اريد اجذب واگول اني بعد مگدر
ثاني يوم گعدت من الصبح الكل نايم
طلعت عالحديقة مددت عالكرويته وجان اغفي
فزيت على صوت عياط گعدت شفت حيدر مكتف ادينه ويرزل بواحد عالصطح صاعد
اجه يمي وعاگد الحواجب انطاني الريوگ وگال
حيدر : ليش نايمه هنا اكو هواي شباب يصعدون عالصطح عدهم حمام وهذا الولد جان يعاينلج بعد لا تنامين بالحديقة علمودج يعني ما يصير
ديالا : اخذت العلاگه منه وگلت اي
راح وهو يتلفت ومدري شبي
رجع الضهر جايب الغده طب عالمطبخ حطه الطبله
اني جنت اسوي ممه لمحمود صديت علي گتله طيبه الكيكه عاشت ايدك واعتذر عالبارحه مدري شجاني وزعلت
دنگ راسه وما حجه
رجعت كررت
اني اسفه حيدر والله هاي طبعي بساع اتعصب امانه لا تاخذ على خاطرك
ابتسم
حيدر : ولا يهمج اني هم تماديت
ديالا : لا بالعكس انته تصرفت طبعي بس اني مفترسه لهسبب ابويه الله يرحمه جان يسميني اللبوه
بس گلتها طگها بضحكه
حيدر : اسف ما گدرت ما اضحك
ديالا : ضحكة خير ان شاء الله
راح وثاني يوم هم اجه جاب الغده واني جنت بالمطبخ حط العلاليگ عالطبله
وفتح جنب سترته وطلع ورده حمراء قدمها لي
حيدر : هاي وردة الج اذا تحسيها زحمه لا تاخذيها
عصرت ايدي وجان اخذها منه حيل حلوه
گتله شكراً
اهلا بكم في مدونة مكتبة حواء نقرأ لكم ونكتب من اجلكم
ابتسم ومسح شعره وراح بدون ما يحجي
شميت الورده ريحتها تخبل اخذت گلاص وحطيتله مي وحطيت الورده بي وخليتها عالطبله
وصبيت الغده
والعشه اجه وهم جابلي ورده وثاني يوم وتكررت
گمت ارتاحله واحجي ويا ونگعد مرات بالمطبخ نحجي صارت صادقتنه حلوه گام يحجيلي عن نفسه كلشي بس اني ما حجيت عن نفسي شي(الناقله روعه الطائي)
وبيوم جنت گاعده من الصبح وضوجه طلعت بره افتر بالحديقه اشم بالورد وابتسم اخذني الواهس وجان الزم نفنوفي وافر وادندن
اجت عيني بعين حيدر جان واگف يم الدنگه شايل علاج لفاتن صافن بيه يدحگ ومبتسم
تفشلت ورجعت شعري وره اذني تخوصرت وگلت خير
اجه وهو مبتسم
حيدر : تفضلي هاذ علاج ام درويش
ديالا : اخذت العلاج منه وهو بعده صافن
هي حيدر اكو شي
فز وانتبه لنفسه بلل شفايفه
حيدر : ها لا ماكو شي تحتاجون شي بعد
ديالا : شكرا كلشي ما نريد سلامتك
حك شعره وراح وهو يلتفتلي
هاذ شبي طبيت جوه وديت العلاج لفاتن
وبالليل حجي حسين جان گاعد يم فاتن
طلعت بره گعدت عالممشى جان عالي ونزلت رجليه جان جو حلو سمعت صوت ورايه احم
صديت طلع حيدر جان واگف ومكتف ايدينه گال
حيدر : عادي اگعد
ديالا : رجعت شعري وره اذني وهزيت راسي بقبول
اجه گعد بيني وبينه متر شبك ادينه وشاد على شفايفه بي حجايه وما يعرف شلون يبدي اخر شي گال
حيدر : احم ديالا انتي اكو احد بحياتج
ديالا : استغربت شنو يعني اكو احد بحياتي ما عرفت اجاوب قوست اثمي صد عليه وضحك
حيدر : عذري غبائي واضح حتى المعنى ما تعرفي
ديالا : گتله حيشاك بس هالكلمة جديده عليه
حيدر : واضح
ديالا : اخذ فتره يعصر بأدينه ويفرك رحة ايده حط ايده على عيونه وگال
حيدر : ديالا اريد احجي بموضوع بس خاف تفهميني غلط وتزعلي
ديالا : لا ليش ازعل احجي
حيدر : متأكده ما تزعلي
ديالا : هزيت راسي ب لا
حيدر : شفتهمت هسه
ديالا : يعني ما ازعل احجي شنو
حيدر : شتعرفين عن الحب
ديالا : عگدت حواجبي وسكتت شويه وگلت
كلمة مو حلوه وعيب
حيدر : ليش هذا بالله برري
ديالا : سحبت رجليني وتربعت
تذكرت مهره زعم حامد يحبها تالي جتلها وماتت
غورگن عيوني وگمت ابجي
حيدر : ليش تبجين مو گلتي ماكو احد بحياتج
ديالا : دحگتله بعصبيه انته شجاي تحجي
تعقد ودنگ
حيدر : جا ليش البجي
ديالا : هيج لحالي تذكرت اختي الماتت
حيدر : مهره الله يرحمها ويعوضها الجنه
ديالا : گام يواسيني ويحجيلي عن اخو المات
هم جتلو ومحد يعرف جتاله وشلون تشتتو وتهجولو من ديرتهم لغير ديره صدگ الي يسمع مصيبة غيره تهون علي مصيبته
وراهه حجالي عن الأمام الحسين (عليه السلام)
شلون مصيبته وشلون صار ويا دمعن عيونه واني ابجي ويا
بعدين تربع گدامي وغير الموضوع وگام يحجيلي مزقات ويضحكني وحجالي مواقف اخوانه الي تضحك مرت الساعات واحنه گاعدين ولا حسينه بالوقت الا طلعت فاتن عاطت بينه
وصرنه يوميه نگعد بنفس المكان عالممشى ونحجي صارت صداقتنه قويه حيل وذا يشوفني صدفه ابجي ينرعص ويرزلني
واليوم من طلعت ابجي ودنگ يواسيني وشافتنه امل خايفه تحجي لعماد ويرزل حيدر واتفشل ظليت افكر والوب
سعاد : جنت انشر بالملابس وتوها ليال راحت من يمي شفت سيارتين طبگو وحدر ماجد مثل العاصفه گضب صائب وجضعه بالگاع وطاح بي ضرب
رحت بساع اركض عليهم وبركات وغازي يحاولون يشيلون ماجد من صائب وهاذ يدفعهم يلزگهم بالحايط
ماجد نها صائب خلا خارطه الدم تارس وجهه
گضبه بوكسيات سريعه فقد الشعور
الولد كلهم ومجاي يگدرون لماجد صاك على سنونه ويصيح ويضرب بصائب
الا غازي گبع ماجد بجرجف وجعم راسه
وسحلو صائب من جوا بتالي روح واخذو بساع سدو علي باب حجرته دمه ظل بالمكان
گام ماجد مذعور ويصيح ويدورله
صد على ليال جانت مقرفصه وساده اذانها وتصيح
گنبص يمها وهو يلهث راد يلزمها وجان تصرخ وتخاف منه غطت وجها
لزم راسه راد يگع توازن وگام يضرب بالدنگه بوكسيات
فات جوه وهو ينادي
ماجد :صاااائب اليوم اموتك وخل تگول العرب ماجد جتل اخو اطلع وينك
سعاد :دنگت على ليال جانت منهاره وتشاهگ وترجف
گوه تحجي من رجفة شفايفها حضنتني ورادت تگع
ليال : سعاد وديني لهلي وداعت ابنج الي ابطنج وديني امانه اني ما اريد اظل هين هاذ البيت مو حلو امانه سعاد اني اخاف
سعاد : شديت عليها گلبها يريد يطلع يطرد طرد
لزمت وجها اريد اهديها ترجف يربي وحيلها ما يعينها گوه سحلتها فوتتها جوه گعدت بالصاله قرفصت وادحگ على ماجد يرجد اباب الحجره ويريد صائب يطلع
وغازي بره الباب يهجد بي وبركات جوه يم صائب وابن عمهم ذاك ما يگدر يحجز بماجد يخاف منه
شكحه تربعت بالگاع وگامت تنعي ورافده يمها زعم هاذ،وكته تنعي دروحي فزعي العرب مبين ماجد قافل نهائي انوب طب لحجرته وطلع مسدس ورمه فشگه ورهن غازي
ماجد : وخر غازي من دربي اخيرلك اول وتالي اني جاتل صائب
غازي : اي خوش تكتل اخوك عجل اكتلني گبله كافي والله مو جهال انتوو
ماجد : ور گلبي يا غازي ور گلبي غدرني لو حاط فشگه بصدري ولا هاي سوياته يول يتهمني اني ونضااال شلون يا غازي شلون والله ما جستها
غازي : امبلا يا ماجد امبلا انته جنت سكران وما تذكر وكلها شافتك
ماجد : يول والله ما اتذكر والله ليش مجاي تصدگوني
زين ليش ما سألني ليش ما عاتبني جان عاقبني بغير طريقه ليش الا يور گلبي لييييش
غازي : هاي صارت بعد يا ماجد اترجاك تهدئ مو زيلك تنفعل سمعت الدكتور شگال
ماجد : انعلابو الدكتور لابو عشيرته وخر من دربي يا غازي تخسه والله
غازي : تنحل وروح ابوك بس تعوذ من الشيطان وصل عالنبي
ماجد : شلون تنحل وانته گلت تمم زواجه الحقير وخلص كلشي وانوب متفاخر ومكيف هسع منهو النذل اني لو هو يول اگص ايدي اذا ما طلع حاط عينه على ليال من زمان ولگاهه حجه من اول ما شفتها وهو بانگ بحلگي ما يخليني حت اشوفها وانوب محذرها مني وخر يا غازي لا تشلع گلبيييي
سعاد : ظل ماجد شايل المسدس ويتهدد وغازي لازگ نفسه بالباب ومصلخ بطرگ البجامه راعيهم ماجد رعي
تالي فحط وجان يدوخ ويثني على ركبه ويلزم گلبه سحله غازي سحل واخذه عالحجره وسد علي الباب
الحمد لله داخ جان محد يعرف شصار
بركات فتح الباب شويه ومد راسه يدحگ طلع
وجان اگله داخ ماجد وفوتو عالحجره
خطيه بلع ريگه ورجع يم صائب طلع سانده وصائب يتفل دم وقميصه احمر صاير من دمه
اخذه بركات وطلع بره يمكن يودي عالدكتور يضمد وجهه
صديت على ليال امسح بوجها الدمع ينگط من حنجها
وما تفعل تبطل رجيف
ما حسيت الا شكحه جيتت على ليال وتضرب بيها وتسحل بشعرها اريد بس اهد ايد شكحه من ليال مگدر گامت تضرب بيها دفرات وتسب وتغلط
اني ورافده وما گدرنه نفكها الا طلع ماجد من حجرته عالصوت وشال امه شيل دفعها
ورجع على ليال امدده بالگاع وشعرها على عيونها
يوخر بالشعر يادوب فتحت عيونها رمشت وجان تغمض وتفقد الوعي وعبالك ميته
گام يصيح عليها ماجد ويصفگ بوجها شالها وحطها بحجرته عالجربايه ويگلب بيها عبالك ميته فاتحه اثمها ونفس ماكو
غازي لزم راسه وثنه بالگاع ويدحگ عليه
وماجد يشيل بروحه ويرجد
غازي : روحي شويفها يا سعاد شوفيها ماتت
سعاد : صعدت يمها واگلب بيها لا شبطه ولا لبطه حطيت اذني على گلبها دگات گلبها گوه تنسمع
عايشه يا غازي هاي كل مره يصير بيها هيج من الخوف والهبطه اهلها گالو
ماجد : والله لدفعك الثمن غااالي يا صائب والله لبجيك دم بدال الدمع امشي غازي جيب سياره خن نوديها
سعاد : طلع غازي يجيب سياره هو بس لا ينسه نفسه وما يلبس قميص
وماجد گعد يم ليال لازم ايدها ويبجي عيونه دم صارو
شويه واجه غازي همزين لابس قميص
ماجد شال ليال وطلع
وغازي گال تعاي ويانه رحت وياهم بدشداشتي لا عباة ولا صايه
غازي صعد گدام وماجد وره وليال بحضنه واني بصفها وصلنه الدكتور حطها عالسديه وگلبها گال الضغط حيل هابط ومبينه منفعله
فتح عيونها رص اديها اخذلها فحص سريري كامل
گال هم عدها فقر دم حاد وضعف بسبب قلة التغذيه
اهلا بكم في مدونة مكتبة حواء نقرأ لكم ونكتب من اجلكم
گام يدور وريد تا يحطلها مغذي
زرف اديها تزرف تا لگه وريد راد ماجد يبتلي بي
حطلها المغذي خلص وحط الأخر
وماجد يعض بأدينه ويصفگ بيهم ويهمس لغازي
ماجد :موتينها يا غازي دحگلها شلون متغيره اني اعلمهم اذا ما اخزيهم الكل من نضال على امي على صائب هينه اذا ما ارجع ماجد القديم والله لكرهم عيشتهم
سعاد : صحت ليال فتحت عيونها وتعن
انطاها الدكتور علاج مقويات وگال لازم تنتبهون لصحتها ونفسيتها
طلعنه من يمه اني گايده ليال تمشي ودايخه وماجد شايل المغذي وصلنه البيت شفنه صائب گاعد بره ومضمد خشمه
اول ما شافه ماجد ناوش المغذي لغازي وزرگ صائب انوب لزمه من ياخته شاله ورجده عبالك شايل ريشه
وصائب گام بساع وهم ضرب ماجد وتگاضبو من جديد
غازي حط المغذي بيدي وركض عليهم وبركات اجه من جوه يصيح
بركات : كافي لخاطر ربكم الله يهجمك يهالبيت كافي
ضحكتو الوادم علينه خزيتونه
سعاد : ليال جلبت بأيدي وادحگ عليه وتبجي
گلتلها بساع ليال سوي نفسج خربانه اگعي يالله تا يبطلون واني راح اصيح عليج
هيه اصلا من گاعها خربانه وما بيها حيل وگعت وجان اصيح ماجد بساع هد صائب واجه يركض
گتله راح تموتون البنت وشيخلصكم من اخوانها كافي ارحموها
اجه صائب وجان يگلبها وماجد لزمه من ياخته دفعهم غازي وعاط بيهم
غازي : والله لعبتو نفسي ودمرتو حياة هالطفله وين تروحون من خطيتها يتيمه اتقو الله
سعاد : دنگ غازي وشال ليال وداهه على حجره صائب
حطها عالجربايه ادحگ عليها نايمه من صدگ هاي عود گلتلها مثلي سوتها صحيح گعد يمها صائب وهو لازم ايدها وگوه يفتح عيونه من الضرب مخلي ماجد بنفسجي
طلعنه وجان ماجد گعد بالصاله ورجه ضهره عالحايط
ودموعه تصب گعدو يمه بركات وغازي ويهدئون بي ما جاوبهم وگام على حجرته لم هدومه وطلع
ينادون وراه وين تريد ما جاوب وراح يكسر الخاطر يربي
ليال : فتحت عيوني ادحگ حجرتي ظلمه وبس ضوء الشباك يبين راسي يوجعني وشعري هم عبن هلستني شكحه عوذا منها اني شعليه ما تسولف ويا ولدها
سندت ايدي حاولت اگوم حسيت شخص نايم بصفي تلمست ايد مدري شنو فزيت وگلت يماا
فز هو وشغل الگلوب
طلع استاذي
صائب : ها ليال شلون صرتي زينه مو تردين شي
ليال :هاي انته جنت نايم هين
صائب : اي شلون صرتي هسع
ليال : اي زينه وجوعانه واريد عالحمام
صائب : يالله گومي بس على كيفج لا دوخين
ليال : ادحگ ايدي شايل منها الكانوله بس مكانها يوجع
رحت عالحمام ورجعت بمكاني وراح جابلي اكل وجان اكل حيل جوعانه شبعت وادحگ على استاذي مضمد خشمه وعيونه وخدوده ازرگ وبنفسجي خطيه
صائب : ها تردين شي بعد
ليال : بس مي
صائب : وهاذ المي
ليال : شربت مي وتشكرته
صائب : للوش الحلوه خفتي عليه وخربتي
ليال : اني خفت عبن تكاونو وگمت ارجف گلبي معد يتحمل صدمات من يوم صگعة اهلي
هزيتله راسي بــ اي خفت عليك
ابتسم وگال وباس راسي
صائب : يالله نامي ورتاحي
ليال : وره ثلاث تيام من هاي الحادثه
استاذي اهتم بيه حيل من اكلي ونومي وصحتي
وبيوم جان گاعد يگطعلي فواكه سمعنه صوت لجه بره
گام بساع
صائب : ممنوع تطلعين ظلي هين
ليال : گالها وطلع بس اني ظليت احوص خاصة من ميزت الصوت هاذ الفاتن اي والله فاتن
طلعت بساع
واشوفها متگاضبه وياهم ولازمه استاذي من ياخته وتحجي علي وتهدد وهو لازم كتوفها شافتني وجان تهده وتجيني تركض حضنتها وابجي شهگت من شفتها
بيومها سوت مشكله جبيره
جانت جايه يم اهلي وباگت نفسها واجتني بدون علم عماد ظلت تحجي وتغلط وتسب الا نهارت وداخت
گمت اصرخ فوگها وجان استاذي نقلها عالدكتور ومناك موديها للبيت ما خلاني اروح وياهم
ظليت گاعده بالطرمه وابجي
يربي ليش ما يخليني اروح والله مشتاگه لهلي كلهم
رجع وظل يقنع بيه ويلهيني ويگلي بس تهدئ الأمور ويتصالح هو وعماد يوديني لهلي
ليال : بس جيبلي جوانه امانه
صائب : والله دزيت عليها اكثر من نوبه بس عماد ما يفعل يدزها
سعاد : مرت ايام والوضع هدوء من عگب مشكلة ماجد وفاتن
ليال گامت تجي يمي العصريات امشطلها بس شويه ويناديها صائب ومرات تگعد على ممشاهم واني مقابيلها ونحجي اضحك على سوالفها همزين الله لطف بيها وبساع تنسه الي يصير وياهه
احجي وياهه وعيني عالشارع اخاف صياد يجي وهم يرزلني عبن اگعد مقابيل الشارع رغم بعيد والله وحت الوجه ما يبين راحت ليال ناداهه صائب
واني توني اگوم وشفت سياره اجت ختلت وره الدنگه وادحگ طبگت يم بيت صائب وحدر منها ماجد ويا نضال گادها وفات ظليت فاتحه اثمي ومصدومه
ليال : فتت جوه ناداني استاذي جان واگف بالصاله يسألني اذا اريد شي عبن عنده روحه للسوگ جان واگف مقابيل الباب واني گدامه يحجي ومركز بيه شويه وشاح نظره وفتح عيونه مصدوم
صديت ورايه وشفت ماجد اجه ويا نضال ومتگاودين
ماجد : امييي وينج تعاي باركي لأبنج هلهلي وطشي جگليت
ليال : صديت على استاذي جان على صدمته
واني صافنه مجاي افهم شي نضال جانت كاشخه وملقمطه نفسها زواقه وماجد حاضنها
طلعت شكحه ورافده وكفو ناس ادحگ على ناس
شكحه : شكو هلا نضال شجابج
ماجد : امي باركيلي تزوجنه اني ونضال وهاي حلمج تحقق وشفتي ولدج معرسين
ليال : استاذي لزم راسه وفات عالحجره
وشكحه ورافده ظلو مصدومين ونضال مكشره تضحك ومكيفه ظلو مجادلين شكحه ما رضت ونصدمت
شكحه : شلون بالله عرست على نضال امت وليش اني مالي علم شنهي ناصب علينه ماجد مو جاهل انته
ماجد : ما سويت عرس يمه مستعجل سوينه گعده زغيره يم بيت خالتي وهاج هاذ العقد واترخص منكم تعبانين نريد نرتاح
ليال : گادها وفاتو عالحجره
واني رحت لحجرتي وگفت بالباب ادحگ على استاذي جان گاعد بالگاع وحط راسه بين رجلينه
ظل بالحجره بيومها وما طلع
ولا اكل شي وبالليل اسمعه يبجي هاذ شبي
انام واگعد واسمعه يگهد عبالي مريض
گمت يمه گلت استاذي مريض انت تحتاج شي
جاوبني بصوت مخنوگ
صائب : لا مو مريض بس مگدر انام روحي انتي نامي
ليال : افليك استاذي هسع تنام
صائب : شتفلين ليال
ليال : افلي شعرك اني اذا ما اگدر انام اخلي اهلي يفلون شعري وانام بساع
ضحك بحزن وگال
صائب : يالله تعاي فلي
اهلا بكم في مدونة مكتبة حواء نقرأ لكم ونكتب من اجلكم
ليال : هو جان نايم وصاد عالحايط ومغطي عيونه گعدت يم راسه وگمت افلي شعره لحد ما غفه وجان تگع ايده من وجهه شفته نايم ورجعت نمت بفراشي
مرت ايام على هاذ الحال يوميه يخلصها بجي بالليل
واخر شي گام هو يناديني افلي ينام
ونضال يوميه تفتر بالبيت كاشخه
وضحكها يوصل لحجرتنه
واستاذي گام يطلع من الحجره وما يجي لنص الليل وبالنهار هم يروح
التحق ماجد بالعسكرية
ونضال معد تطلع من حجرتها الا وكت الوجبه وشگد تسمع حجي تغلس وما ترد البيت صار هدوء كوان ماكو بس شكحه اذا تشوفني اني ونضال تذب علينه حجي اشكال
وبيوم احنه گاعدين بالهول نتغده
جان كلشي موجود بالهول الا العائله محد متصافي ابد ومحد يحجي ويه احد تلمهم الصينيه ومجرد تنشال يطشرون مثل الجراد جابت ست رافده الجاي
وجان نسمع صوت بالصاله
وينكم اهليييي
طلعنه الكل عرفنا من صوته ماجد رجع من العسكرية
شفنا واگف بالصاله ويا بنيه شعرها طويل ولابسه نفنوف ورجليها طالعه كلها وطگ بعلجها وتضحك
ماجد : شلونكم يا اهلي تعالو باركولي تزوجت رگاصة تلوگ لهاذ البيت الطاهر العفيف النكيف المثقف بعد كأبه منا وغاد ماكوو هم گولو ماجد ما يدللنه
ليال : مجرد گالها نضال انخرطت من طولها وگعت
وشكحه گامت تلطم
ماجد : شفتي يا توحه فرحة اهلي بيج
امل : عماد حيل زعل من فاتن هجمت على بيت صائب وتمرضت گال لو يريد يصير بيها شي شحصل
الوضع بعد ما يحله المكاون
مرت ايام وهجد كلشي وفاتن رجعت واخذت ديالا وياهه هم
اجاني عماد الضهر گال
عماد : امل اجاني صياد الصبح عالحداده
امل : خير شعنده
عماد : گال اليوم وره الضهر ازوركم اريدك انت وحميد موجودين
امل : انغبطت ولزمت بطني خير يا ساتر شكو
عماد : علمي علمج وهسع دزيت خبر الحميد بلغته يعزل ويجي
امل : مرت الساعات مثل الدم عليه گمت الوب شعنده صياد هالنوبه لاحگنه
ظليت افتر مثل المخبله وافكر لحد ما اندگ الباب وطلع عماد فتحه طبگ صياد سيارته جوه وحدر هو وامه الشيخه خزامي
اهلا بكم في مدونة مكتبة حواء نقرأ لكم ونكتب من اجلكم
من شفتها بردت شوي تلگيتها وشبعتها تبوس وحضن
من ضيم گلبي وصياد مشه هو والولد
رادو فراش بالطرمه حطيتلهم والشيخه گعدت وياهم
اشو
اني قدمت المي والجاي وما گدرت اگعد
بوجود صياد احسه يگطع علينه الهوا
فتت بالصاله وگعدت گبال الشباك واتصنت
صياد : احنه جيتنه مو طويله مستطرقين
جيتكم بطلب وان شاء الله ما تردوني
عماد : ابشر بالي نگدر علي
صياد : ما تقصر ابو علي
احنه جايين نطلب ايد اختكم المستوره ديالا على سنة الله ورسوله
