رواية عرين الصياد الفصل السابع والعشرين 27 بقلم شذرة العدوان

والجلاب تركض ورايه شگگو ملابسي عضوني من رجلي خرمشوني واني متجاهله نفسي

وكل همي احمي الحمامات

وصلت على بيت مظلم اني شايفته قبل وطبيت على حجره اعرفها اتذكر هم نهزمت وختلت بيها

جانت ظلمه بارده وموحشه

ختلت ولميت نفسي ولامه الحمامات على صدري واشاهگ سمعت صوت خرخشه قرفصت نفسي وجان تطلع حيه سوده وجبيره رادت تهجم عالحمامات بس انطيتها ضهري ولدغتني صرخت بعلو حسي

ليال :فزيت من نومي مرعوبه دخيلك ربي شهل حلم

بلعت ريگي يابس يطگ وگلبي يطرد عبالك جنت بحقيقه مو حلم اذان الفجر ينادي حي على الصلاة

هاي ثاني نوبه احلم واگعد على اذان الفجر وحلم اسوء من حلم

جسمي عرگان عبالك سبحانه نهضت راسي ادور مي اشرب ما لگيت السراحيه فارغه ادحگ استاذي ماكو بفراشه يمكن طلع يتوضه فتحت الباب ورحت عالمطبخ شربت مي

امشي وافز مجاي اصدگ الي شفته مجرد حلم كلشي اخاف منه جاي اشوفه الجلاب والظلام والبرد والحيات

ابلع بريگي واتلفتت رجعت عالحجره بساع وقرفصت نفسي وارجف مسحت شعري واتعوذ من الشيطان اريد گلبي يركد

فات استاذي وهو يستغفر وينزل بردانات القميص

شافني گاعده استغرب

...#قصصmyhopes

صائب : ها ليال اشوفج گاعده اليوم من وحدج

يالله گومي توضي وتعاي نصلي

ليال : جاوبته برجفه اخاف تعال ويايه

طلع ويايه بدون ما يحجي وجان اتوضه وارجع

بسط السجادات وصلينه الفجر فتحت كفوف اديني ما اعرف شنو ادعي واگول دموعي لحالهم ينزلون تذكرت ماجد شلون وگع وشلون استاذي من سمع بي گال طبه مرض

ليش هيج يكره اخو اشو اني حميد ضربني وما اكرهه انعاد المشهد بذاكرتي

من اخذو ماجد فاقد جنت مثنيه على ركبي واصرخ ما ادري ماجد شبلا معد يتحرك ولا يفتح عيونه غازي وبركات ما اخذوني وياهم شگد توسلتهم

طلع استاذي وشافني ابجي اخذني وحطني بالحجره

گعدت عالجربايه واشاهگ ما اعرف شلون اعبر عن حزني يربي اني ما اريد ماجد يموت ما اريده يموت گمت الطم

عصب عليه استاذي

صائب : كافي تبجين ليال مو زيلج هسع تمرضين

ليال : گالها وطلع واني ظليت حاضنه المخده وابجي لحد ما فحيت ونمت وحلمت بهاذ الحلم الي ما ادري شنو

رجعت من صفنتي واني احاول ادعي ربي وما اعرف شگول امسح دموعي وارجع افتح كفوف اديني ما اجه ابالي غير ادعي لماجد گلت بگلبي يربي طيب ماجد ولا تخلي يموت

صد عليه استاذي لگاني ابجي

عگد حواجبه وفرك گصته تربع وگعد گبالي

صائب : اسمعي ليال تره لعبت نفسي شگد تبجين متگليلي انوب على منو على ماجد موو

ليال : دنگت راسي وگمت اعصر بأديني

صائب : تدرين منهو جان سبب رسوبج

ليال : رفعت راسي ورجعت دنگت ما گدرت اگله حميد

صائب : شبيج ليال ما تريدين تعرفينه منو

ليال : عصرت اديني وگلت اعرفه

صائب : ومنو بالله

ليال : هو حميد بس شنسويله

ــ ضحك وجان يهز راسه بعدم قبول

صائب : هاذ ماجد گالج حميد مو

ليال : دنگت راسي ما حجيت

صائب : اسمعي ليال ماجد جان سبب رسوبج هوه وره كلشي حت المعلمين الي اثق بيهم مثل ما اثق بنفسي اشتراهم واشتره اخلاقهم وضميرهم ومو بس هيج جان يريد يفصلج من المدرسة نهائي

ليال : انصدمت وفتحت اثمي ليش هيج لا ما اصدگ هاذ حميد وره كلشي بس اني مو زعلانه منه حميد يظل اخويه وما ادعي علي مثل ما انت تدعي على اخوك وتكرهه

تعصب وگعد تك ركبه ويدحگ عليه مخنزر

صائب : من ايمت گمتي تعلين صوتج وتناقشين وتجذبين الحجي الي اگوله هيج علمتج اني

جاي اگلج ماجد الحقير وره كلشييي تريد تصدگين تردين لا ما يهمني بس اياج بعد اشوفج تبجين علي فتهمتييي

ليال : گالها ولم السجاده وراح نام بفراشه

واني مسحت وجهي وگمت مددت عالجربايه ودمعتي مجاي تنشف ظليت افكر بماجد صدگ هو رسبني وليش

لحد ما طلع الصبح واني اتگلب ما گدرت اغفي

جاب استاذي الريوگ وما اكلت

گعد گام يتوسل بيه اكل اندگ الباب بقوه گام فتحه طلعت رافده جانت تبجي و متعصبه نار

رافده : انته شنهي من بشر صائب بس فهمني اخونه وامنه من البارحه بالمستشفى وانته ولا همك ولا سألت ولا رحت فهمني شبيك شبيك

صائب : صوتج نصي هسع گلت اتريگ واروح لخاطر امي بس مو لخاطر هذاك النذل

رافده : والله مع الأسف مستحيل اصدگ انته نفسك اخوي المثقف الي جنت اعتبره ابويه واقتدي بي

بسبب سوء تفاهم تبريت من اخوك لحمك ودمك والف مره شرحتلك وفهمتك ومجاي تصدگ

على كلاً الحجي بعد مابي كل فايده وياك يالله استعجل اني هم اريد اروح وذا تتأخر دقايق اخذ سعد واروح وحدي الحگهم

ليال : گالتها وردست الباب وطلعت

اجه استاذي گعد تك ركبه يمي

صائب : ليال اني رايح عالمستشفى طلعه من هين ماكو خوش اسمعي الكلام روحي اگعدي ويه كريمه وسعد بس ممنوع تطلعين هين ولا هين وممنوع يطلع حرف من داخل حجرتنه يا ويلج اذا اسمع طالع حجي من هين(الناقله روعه الطائي)

ليال : استغربت وصفنت بوجهه شنهو الحجي الي يطلع استاذي گمت ادحگ عالحجره شنهو يعني اگول

عض طارف شفته وجان يگول

صائب : مثلا خاف احد يسحب منج حجي وتگولين استاذي ينام بالگاع وحده لو يسألونج امور خاصه بالمزوجين ما يصير تنحجي عبن عيب لا تسمحين لأحد يسألج شي

وذا صار وحجيتي هاي تعتبر خيانه نميمه وغيبه وعلوم وتصيرين انتي مو محل ثقه الله سبحانه يغضب عليج

ليال : هزيت راسي بـ لا والله ما احجي شي انته تعرف اني مو نمامه ولا خاينه

مد ايده وگال

صائب : اوعديني ما تحجين شي ابد ابد

ولا اي حرف

ليال : صافحت ايده وگتله وعد استاذي

صائب : واوعديني ما تحاولين تروحين لهلج ورايه

ليال : دنگت وردت اسحب ايدي وجلب بيها دحگت علي رفعلي حواجبه گال

صائب : اذا صرتي حبابه وسمعتي كلامي وحافضتي عالوعد وين ما تردين اوديج وشتردين اجيبلج يالله اوعديني وتره وعد الحر دين يا ليال

ليال : هزيت راسي بـ اي وگتله وعد

ابتسم وجان يخذ ملابس وراح عالحمام

شويه واجه ينشف بشعره عدل نفسه ولبس سترته

وساعته طلع حذائه مسحه وراح وصل الباب والتفتت اكد عليه

صائب : وعد الحر دين

ليال : هزيت راسي ابتسم وسد الباب وراه من طلع

ظليت فتره مقرفصه بمكاني وضايجه مالي خلگ كلشي تالي طلعت واخذت الصينيه ويايه حطيتها بالمطبخ

شفت كريمه گاعده بالطرمه وتبجي رحت يمها من شافتني صدت بصفحه

كريمه : عش جيتي يمي روحي كله من وراج ماجد وامي تمرضو

ليال : ختنگت وگمت ابجي

والله مالي شغل يا كريمه اني شسويت

كريمه : امي تگول كله من وره ليال فتنت بين الأخوان امي تكرهج واني هم اكرهج بعد ما اريدج صديقتي

ليال : گالتها وفاتت جوه تبجي لحگتها وجان تقفل على نفسها الباب ظليت افتر بالبيت وحدي

اجت عيني على حجرة ماجد

دحگت حواليه ماكو احد هين غير اني وكريمه سعد مدري وين راح مشيت عالحجره فتحتها

ريحتها شگد طيبه ومرتبه

گمت افتر بيها ادحگ على صوره معلگه بأطارات هو واصدقائه الضباط لابسين زيتوني مثله

واكو صور انوب ماخذينها يم الجبال والزرع

وصور ماخذينها يم النواعير اشكال الصور تارس الحايط وكلهن حلوات

الميز ماله مرتب كلشي بمكانه المشط والفرج وزيت الشعر من جهه والعطور والساعات من جهه والنضارات معلگهن بالمراة وملزگ صور فنانات بتيب على جنب من المراة وبالنص ملزگ ورد احمر

فتحت الجرار الفوگ جان متروس اقراص سيديات

والجرار الجوه جان مليان كاسيتات گلبتهم واحد منهم گاتب علي ماجد مع ليال اخذته وگمت ادور عالمسجل

دورت ولگيته بالكومدي

نفس المسجل الي جابليا

شغلته وحطيت الأغنيه الي كاتب عليها اسامينا جانت نفسها الي گال احبها حطيت ايدي على اثمي اكتم صوت شهگاتي

سعاد : جاي اشطف بالمماشي واجت رافده عليه مورمه العيون

رافده : صباح الخير سعاد

سعاد : صباح النور شلونج رافده شسمعتو عن ماجد ان شاء الله زين

رافده : والله كلشي ما سمعت هوه لايبه روحي اريد اعرف وهسع راح نروح اني وصائب

سعاد : ما گدرت اگللها خابرني غازي وگال مو زين بعده سكتت و بس جابت اسم صائب لعبت نفسي

گلت الله يهدي بلكت تندم ويروح يشوف اخو

رافده : شيتندم يمعوده زايد قاطات خبال

عليج الله اريد اطلب منج اذا ماكو زحمه اني وصائب راح نمشي هسع وما يظل غير ليال وكريمه عينج عليهم ليما نرجع احنه ما نبطي هاذ سعد ما علي منتكل يفيع

سعاد : ميخالف لا تاكلين هم ترجعون بسلامه والله يشافي ماجد

رافده :تسلمين سعاد الله يسهلج

سعاد : راحت رافده وكملت شغلي وعيني على بيتهم ما شفت احد طلع منه گلت اروح اخم الوضع

طبيت عالبيت ماكو ولا حس مشيت انوب اسمع صوت نحيب وصوت اغاني ادحگ باب حجرة ماجد مفتوح والصوت يجي منه

رحت وگفت بالباب واشوفها ليال مشغله المسجل وتبجي تشاهگ وشعرها منثور عيونها عبالك دم

من شافتني وجان اطفي المسجل وتمسح دموعها بردانها گامت تعصر بأديها وتلم بالحجره گالت

ليال : طبيت اعزلها

سعاد : تنهدت بداخلي انتي طفله يا ليال شجابج على هاذ الهضم گربت منها وحضنتها عبالك جانت تريدها حجه انفجرت تبجي وشدت عليه بالحضن

تشاهگ مثل الطفل ودموعها نار عجل شگد كاتمه بداخلج والي صدمني من حاضنتني وتگول

ليال : جيتي مهره لا تخليني هين اني ما اگدر بلياج محد جاي يفزعلي كلكم رحتو وراج كلشي تخرب حت شعري محد يمشطه من جيت اهين ولا اگدر اسبح زين محد يفوت ويايه يعاوني امشي مهره خلينه نروح اني ما اريد اظل هين ما اريد اظل

سعاد : دافنه راسها برگبتي وعاصرتني وتشاهگ وتشكي وخرتها من حضني ولزمت وجهه بأديه واحجي وياهه بهدوء اني سعاد يا ليال اذا تردين اصيرلج اخت مثل مهره فتحت عيونها وصفنت عليه وادحگ حاوليها ولازمه اردانات قميصها وفاتحه اثمها وشهگتها مجاي تركد

ليال : احس الأغنيه لامست روحي تذكرت ابويه ومهره شگد جانو سندي بهالدنيا ابجي عليهم ليش عافوني وحدي ليش

انفتح الباب ما گدرت اركز منو عيوني مغوشات من البجي سويت نفسي زعم اعزل بالحجره

حضنتني

شهگت هاذ الحضن اعرفه حضن مهره وهاي ريحتها اي والله ما صدگت على نفسي شديت عليها بكل قوتي شگد مشتاگلها يربي

گمت اشكيلها وابجي ما حسيت الا وهي تگلي اني سعاد

تفشلت احس خاطري نكسر

شلون هيج واني جنت حاضنه مهره شلون تحولت سعاد

مسدت على راسي وگادتني على حجرتي وسدت حجرة ماجد

سعاد : ما ردت اكسر بخاطرها ردت تفهم وتستوعب الي جاي يصير وقررت افهمها وعسا ولعل تفهمني

اخذتها على حجرتها ولزمت وجها تردين اصير اخت مثل مهره

هزت راسي بـ اي ودموعها نار تصب

عجل اسمعي ليال ركزي ويايه اعتبري مهره الي جاي تحجي انتي هسع مزوجة وعلى ذمة رجال ما يصير تروحين على حجرة رجال اخر وتفتشين بملابسه وغراضه وتبجين خاصة اذا هاذ الرجال يصير حماج

مسحت دموعها بردانها وجان تگول

ليال : شنهي على ذمة رجال وشنهي يصير حمايه

اگلج اني بطلت ما اريد اتزوج اني اريد ارجع لهلي

سعاد : افهميني يا عيني ما يصير ترجعين تزوجتي بعد

طلعتي من بيت اهلج عروس ولابسه ابيض مو

هزت راسها بـ اي

ــ هاي عجل ما يصير ترجعين لهلج

صرتي مزوجة ودخلتي بعلاقه زوجيه ويه زوجج صرتو واحد حت لوما تحبي وتريدي بعدج هسع جاهل وما تفهمين ويه الوكت راح يتوضحلج كلشي وماجد يصير اخو زوجج صائب يعني حماج لازم تعتبرينه مثل اخوج منا وغاد وتحترمين ارتباطج ويه صائب

هزت راسها بـ اي واني ادري ما فتهمت عليه شي بس هيه مطيعه

حضنتها شگد تنحب يربي وبريئه بدالتني الحضن هاي مبينه متعوده عالدلال

گعدت يمها عالجربايه وامسد على راسها واهدئ بيها

ظليت يمها لحد ما حسيتها امنتلي ورتاحت

گامت تحگ براسها

ليال : عرگانه اريد اسبح

سعاد : لزمت شعرها صدگ صاير يابس من العرگ شنهي وين جاينه

ليال : سبحت ونمت بس عرگت عبن حلمت حلم مو حلو

سعاد : لا تحجين الحلم اذا مو حلو

يالله گومي اسبحج ريحتج عرگانه يرادلج جلفه معدله

وامشط شعرج اليوم اخلي حرير ها شگلتي

ليال : اي اريد احد يجلفني ما اناط ضهري

بس اني استحي شلون راح تسبحيني انتي اني اعرف تره اسبح وحدي بس تمشط ما اگدر افح

سعاد : عود اغمض عيوني وبس اجلف ضهرج واغسل شعرج

صفنت شويه وعضت شفتها وجان تگول

ليال : والله عيب

سعاد : ها مو زعم اتفقنه گبل شوي اني اصير مهره اختج

ليال : يالله بس تره ما دحگين

سعاد : ههه ما ادحگ بس يالله

رحت عالكنتور تا اطلعلها ملابس

لبسها كله مشلتح وگصير وردان ماكو هاي الديره كلها ما شفت بيها محجابات غير رافده وامل والنسوان الگبار حيل

باقي بناويتهم كلها مفرعه ولبسهن گصير وعادي عدهم محد يسولف

واحنه بديرتنه اذا وحده تكف ارادنها وتعجن ما تدري الرزاله منين تطلعلها من ابوها لو اخوانها لو ولد عمها

اخذتلها فستان ماروني زعم مستر شويه طويل جوه الركبه واردانه للنص وملابس داخليات ومنشفه ورحنه عالحمام

ظلت واگفه وادحگ عليه ومستحيه

حطيت اديني على عيوني گلتلها غمضت يالله

ادحگ عليها من بين اصابعي تنزع بملابسها وتگلي ديري بالج ادحگين هي

ابتسمت على سوالفها گعدت عالتخته وجان اخذ الليفه والصابونه واهيضهم واجلف ضهرها

جذبني الشامات الي برگبتها من وره يخبلن

سبع شامات لونهم جوزي حيل حلوات مايلات على جتفها الأيمن وجسمها ابيض ثلج يخبل ما بطلت اصلي عالنبي بداخلي

كملت ناوشتها الليفه وگامت تجلف ايدها وصدرها واني غسلت شعرها اللهم صل عالنبي شگد حلو طويل وثخين واسود جير

هيه ليال كلها حلوه من ساسها لراسها

تخبل ما شاء الله حيل بيضه وخدودها حمر عيونها كبار حواجبها عبالك سيوف خشمها زغير وشفايف دائريه ورصعه بوجها رموشها طوال مرسومه رسم

رغم زغيره عمر بس انوثتها بارزه وتسحر العين

منو يلومك يا ماجد من فتت بغيبوبه

تنهدت بداخلي وصفنت عليها وين تاليج يا ليال

ليال : اييي عيوني طب بيهم تايت وريت

سعاد : اواش لا تگمزين هاج امي شاهدي وجهج

ليال : ااخ عيوني وريت

سعاد : يول لا تصحين وتگمزين مثل الجاهل اصبري

گامت تنگز عبن غسلت شعرها بتايت طب بعيونها شاهدت وجها اكثر من مره فتحت عيونها وتعرك بيهم صدت عليه زعلانه

ليال : انتي مو خوش تسبحين مهره وامل ما يحطن تايت بعيوني انتي وريتيني

سعاد : هههه يولي ما متعوده اسبح احد يالله بس هالنوبه بس خوش جلفتج طلعتي تبرجين

كملتها نشفتها وطلعنه

راحت تنگز عالحجره وتصفگ مكيفه عبن جلفتها

ينعل بليسج توج مورمه العيون تبجين شگد فطيره يربي تبجي بساع وتضحك على ابسط سبب

وصلت الحجره لگيتها مطلعه لزواقه حطتهن گدامي وگالت

ليال : هاج سعاد زوقي من هذول

مدري شله بيهن استاذي اشتراهن

سعاد : عش ازوق يولي

وهذول غير جابهن صائب الج

ليال : لا هذني جيت لگيتهن عالميز ما گالي الج استاذي ما يقبل اخلي زواقه اني مره بالمدرسة حطيت حنه وجان يرزلني

سعاد : قافله ليال مجاي تفهم عفتها وجان اخذ المنشفه انشف شعرها ونفضته

ثنيت على ركبي حطيتله زيت وگمت امشط تملعو اديني تا سرحته جاينه تسبح ودقمره وتجذله متعگد

سرحته وردت اجذله

ليال : لا عوفي ينشف فرد نوب تا متصير بي ريحه

سعاد : خن جذله يولي خوش نشف ورايه الف شغله

ليال : لا امانه تصير ريحته مو طيبه خلي يصير يابس

سعاد : عجل اني اروح ما اظل مگابلج اسويلي جم شغله غادي ومن يبس شعرج تعاي اجذله لج خوش

ليال : خوش

راحت سعاد وظليت افرد بشعري تا يبس عزلت الحجره ورتبتها شگد ارتاحيت عبن سبحت اني يوميه اسبح بس متعوده لو مهره لو امل يفوتون ويايه يجلفوني وهاي سعاد جنها مهره حبيتها جثير

امل : افتر وره عماد واحوص اريده اگله لازم نحجي لفاتن كلشي ما يصير كل ما تخابر نجذب عليها شلون اذا اجتنه غفل وعرفت

اذا نگعد يمها ونحجيلها بهدوء احسن بجثير

اريد احجيله بس خايفه اهيج جروحه

وهو يتگرضم ويتهدد بداخله حسبه اباله مجاي اعرفها شنو

اخر شي طگت روحي وحجيتله ومثل ما توقعت ور

عماد : شبيج امل تخبلتي شلون تردين اگول لفاتن وتدرين بيها مريضة سكر تروح تموت وشحصل

امل : اسم الله عليها لا تفاول الله حافظها وساترها

فكر يا عماد اذا عرفت فاتن بغير طريقه ومن غير ناس شراح يصير

خلينه نگعد وياهه احنه ونحجيلها بالصحيح

عماد : ما يحتاج اني جم يوم وارجع ليال

امل : شترجع متگلييي وين صايره تجيب وحده من يم رجلها راحت ليال صارت على ذمة رجال ان رضينه او ما رضينه عاد خلينه نعقل ونعرف شلون نتعايش ويه هالوضع

اني معد اتحمل اجذب على فاتن وديالا لعبت نفسي اترجاك فكر زين وخلينه نحجيلهم

ــ لزم راسه وگعد عالممشى وگامت دموعه تصب

لزمت كتوفه وبديت افهمه لازم يتقبل هالوضع واصبره خلص ليال تزوجت هيه اول وتالي راح تزوج نسأل الله يسعدها وبدال ما تحاول ترجعها اسعي بسعادتها

صلح علاقتك ويه صائب وخلي ليال تجي علينه

تزورنه والله مشتاگتلها

عماد : عجل اني مو هم مشتاگلها يا امل وگلبي جاي يتگطع كل ما اگعد الصبح وهيه ماكو وشلون تردين اصلح علاقتي بصائب النذل والله لوما ربعي الدراويش حلفوني براس الشيخ الگيلاني الا اروح اجر ليال واجيبها غصب عن صائب وعشيرته

ــ ينعل الحظ يا امل الي خلاني بدون اخوانه وعشيره

امل : ظليت اجرح واداوي تالي وافق عماد نروح لفاتن بنفسنه ونحجيلها احسن من ما تجي غفل

عماد : يالله گومي هسع نمشي

امل : شعدنه هساعه

عماد : اخير بجثير دوبنه نصل ونرجع ورانه شغل وما نگدر نطول يالله گومي بساع

امل : گمت بساع وبدلت رغم ما اريد نروح بهل ساعه بس شسوي خاف يغير رئيه واني گوه قنعته

طلعت لگيت عماد جايب سياره

صعدنه ومشينه على منطقة فاتن والطريق كله ادعي برداً وسلاماً

سعاد : رجعت على بيتي اكمل شغلي

تربعت بالگاع وگمت اگلم الباميه وبالي يم غازي شصار وياهم بلكت خير يارب

كملت الباميه وطلعت تا اغسلها من التانكي البره وجان اشوف ليال شايله المشط واجت تنگز

وصلت يم وجان تصفگ

ليال : ها سعاد يبس شعري تعاي جذلي امانه

سعاد : ابتسمت على فطارتها ذبيت السله من ايدي

وگدتها عالممشى تا اجذللها

گعدت مقايبل الشارع مالنه صاير بين بيتنا وبين بيت صائب يفوت سياره وحده عبن بيوتنه گريبه والباقي بينه اشجار الرمان

واحلى شي شباج حجرتي صاير گبال شباك حجرة ليال بس صائب ما يفتح الشباج الا بوجوده هو يهوي الحجره ويسده جان شگد بنفسي احجي ويه ليال من الشباج بس كل ما افتحه اشوف صائب گبالي واسده

ثنيت على ركبي وليال گعدت على حافة الممشى تلگط حصو

گلتلها راح اسويلج جذيله بوسط راسج على شكل طوگ

ليال : شلون هاي

سعاد : هسع من اكملها اشوفج راح تحبيها وتوالم ويه نفنوفج احسن من جذيله وحده

ليال : يالله سويها

سعاد : كيفت وگامت تصفگ

گمت امشط شعرها سرحته وجان ابلش اجذل

جذلت نص وجان تجي سياره علينه ليال رادت تگوم جلبت بيها تا متخرب الجذيله ظليت لازمتها

كل ظني عبالي غازي ظليت بمكاني

لحد ما طبگ يمنه وحدر طلع صياد تفاجأت بي

من جيته بهساعه ومن شكله

ملابسه بيض وشماغ احمر وعگال ومخفف شعره ولحيته طالع حلو استغربت عجل وحزنه على مشعل والا ياخذ الثار

وگفت وليال ظلت گاعده واني مجلبه بشعرها ما اريد الجذيله تخرب

ــ الله حيو ابن العم زارتني البركه

صياد : ومن گال حيو السلام عليكم

سعاد : وعليكم السلام

هو يحجي ومدنگ راسه تورط و ليال جانت فاتحه اثمها اتعرف ودحگ علي

هديت شعرها وگلتلها اگضبي انتي

گضبت شعرها بيدها اليسار وجان تگف مدت ايدها تسلم على صياد حط ايده على صدره وصد بصفحه وليال بعدها ماده ايدها

اخذت ايدها وصعدتها عالممشى ورايه وهاي تگلي اصبري خن اسلم گلتلها هاي هي سلمتي

ــ تعد (تفضل ) ابن عمي

صياد : بيتج عامر تعذريني على هل جيه صارتلي طرشه هين واهلج دزو غراض عجل راعي البيت وين

سعاد : گالها والتاف عالسياره ينزل الغراض

ــ ولا يهمك ابن العم البيت بيتك وغازي ويه ابن عمه بالمستشفى

صياد : عسما شر

سعاد : ناوشني العلاگه وهو مدنگ

ماكو شي يم غازي خفيفه ان شاء الله

مستمره احجي ويا صياد

شو ليال گالت يمااا و طكتها ركضه على بيتهم تفشلت من صياد ودنگت وهو ما التفت ولا صد وراه

حاولت اتفاده الفشله گلت شلونكم ابن العم زينين

صياد : نشكر الله نزهي بالنصر بعد اخوج

بس گليلي يا سعاد عادي الواحد يمشط گبال الشارع

سعاد : دنگت وعصرت العلاگه

مو احنه محد يجي بهاذ الشارع الا العرف

صياد : والعرب الهين كلها تعرفج بنت عمي

سعاد : دنگت وما حجيت

صياد : لا تزعلين مني يبعد اخوج بس خلي ابالج انتي صحيح جنه هين وعلى ذمة رجال بس اصلج وفصلج يرجع علينه وين ما جنتي ورحتي اريدج مثل ما انتي هاي الگعده گبال الشارع لا تنعاد

سعاد : تبشر والله بعد ما تنعاد

صياد : لا شفتي الهم عساج اگلج هاي البنت الي جانت هين مو بنت الملا درويش لو اني واهم

سعاد : گالها وهو يدحگ عالسبحه مالته

امبلا هيه

صياد : شنهي شيايلين هين بصفكم

سعاد : لا هاذ هاي تزوجت هين وهاذ بيت عيالها

ــ مجرد گلت هالكلمه فتح عيونه وركز بوجهي وهو بحياته ما مركز بمره ادحگ على ايده عصر السبحه

استمر يحجي وشاح نظره بساع

صياد : بيت منهو هاذ تزوجت منهو

سعاد : اشر عالبيت بأيده بدون ما يصد

ــ تزوجت صائب ابن عم غازي

عگد حواجبه وگال

صياد : صائب المعلم ما غيره

سعاد : اي هو

صياد : بس هاذ جبير اكبر حت مني شلون رضو اخوانها يزوجها

الي اعرفه عماد رزين وفاهم

سعاد : دنگت راسي ستحيت احجيله عن الي صار وشلون الظروف الي تزوجو بيها

رفعت راسي شفته صافن بالگاع ويعصر بالسبحه بحيث دمارات ادينه رادت تطلع فرك گصته وگال

صياد : محتاجه شي بنت العم گولي مزال موجود

لا تكعج الا نفسج بعد اخوج

سعاد : لا سلامتك جزاك الله خير ما تقصر

راح وما طلبت منه يظل عبن ادري ما يظل والبيت مابي رجال

من راح وجان ادحگ ليال توايج من شباك حجرتها اجت بساع وجان تگول

ليال : ييي تدرين اني ما عرفته بالبدايه گلت منهو هاذ النضيف المرتب ومن حجه عرفته من صوته هاذ صياد الوحش الي يخرع يمكن اليوم هم جالفينه مثلي هههه

سعاد : گعدت بالگاع وگمت اضحك على سوالفها كون يسمعج يا ليال الا يعلگج بالجنگال

هو منهو بنضافته صياد بس جان محزن ولحيته وشعره ثخان هسع مخففهم طالع حلو

فتحت العلاگه يبوي هاي ملابس جهال حايكتهم امي من هسع بلشت تجهز يروحي شميت الملابس وحطيتهم على صدري

خمطتهم مني ليال

ليال : الله هاذ للجاهل الي بطنج يا سعاد استعجلي جيبي بساع تا يلبسهن

سعاد : لزمت گلبها وگال

ليال : يابه شگد اخاف منه ابن عمج گلبي يطرد يالله فضيني كملي الجذيله فحيت واني لازمتها من وره الوحش جان هسع مخلصين

سعاد : جذتلها ولزمت اذنها وگلت ممنوع بعد تحجين على ابن عمي هاذ صياد السباع

ليال : ااخ اذني شنهو صياد السباع

سعاد : عبن كلشي يصيد شتطلبين منه يجيب

ليال : مثل شنهي يعني

سعاد : يولي كلشي كلشي طيور ذيابه اي شي بالصحراء يصيده حت لو نمر من عدا ثنين ما يصيدهن لو ينطونه كنوز الدنيا

ليال : شنهي هنه

سعاد : طير الهدهد والضبع ما يصيدهن

شگد يجونه يطلبون منه الهدهد والضبع وما يفعل رغم هوه يكتل الضبع بس يدفنه وما يدلي مكانه

ليال :يمااا گولي والله

سعاد : اي والله

ليال : ليش عود

سعاد : شمدريني گبل لا اتزوج اجاه واحد وطلب منه ذيب وراح صاده وجابه بس طلعت نثيه وعدها جراوه وصياد ما يدري بيها

ليال : يبو يعني عدها جهال

سعاد : ههه اي جهال

ليال : وين راح بيهن هسع

سعاد : اخذهن مربيهن

ليال : يمااا هنه مو ياكلن اوادم.

سعاد : اي بس اذا يربيهن ويدربهن يصيرن ويا حالهن حال الذيب ابو سرحان الي جان مربي گبل

ليال : غدي والله هاذ مو خوش شي

سعاد : ضربتها على ضهرها كافي يولي شنهي مو خوش شو گومي شگد تسألين مگرود الي يتماين وياج

ليال : ااخ يربج ضهري يوجعني

سعاد : عود تعالن تغدن انتي وكريمه راح اسوي غده جميع

ليال : كريمه ام خشه ساده الباب على نفسها ما تفعل تحجي ويايه

سعاد : يالله ميخالف انتن ترجعن مثل گبل يالله انهضي من يمي لهيتيني

ليال : اگلج هو ليش ما سلم عليه خاف يتنگس والله ايدي نضيفه

سعاد : هههه ينعل بليسج شگد تنحبين لا ما يتنگس بس ما يصافح النسوان ابد

ليال : احسن عبنه يخرع

سعاد : راحت ركض ولازمه راسها شگد طلعت حلوه جذلت شعرها من النص سويت طوگ وخليت ذاك شعرها مهدود تخبل جنها الأميرات

حطيت علاگة الملابس بالحجره فتت عالمطبخ كملت الغده وجان اسمع صوت سياره طبگت طلعت ادحگ شفته صائب ورافده وشكحه تسحل بروحها

صائب فات جوه ورافده وشكحه ظلو بالطرمه گاعدات ومخيم عليهن الحزن

طلعت عمتي وراحت يمهن تسأل ومشيت وراهه

تحمدنه لشكحه بالسلامه ما حجت بس هزت راسها

سألنه على ماجد جاوبت رافده گالت زين

عمتي گادت شكحه وفاتت جوه ظليت يم رافده حطيت ايدي على جتفها وگلت صدگ ماجد زين شحاله

بجت رافده مشت دموعها بطارف الربطه

رافده : ضاعت جفيتي وجاي امش بالربطه لا تهزئين عليه

سعاد : يابه من يهزاء استهدي بالله

رافده : والنعم بالله ااخ يا سعاد صحه ماجد اي بس متخبل نهائي شنهو زينه اول ما فتح عيونه گام يشيل بروحه ويرجد فز من السديه وكسر شكو شي بالحجره مال المستشفى شلع الكانوله من ايده وشگ ايده

انرعص لگينه كل جماعته ملتمين المستشفى يغص بيهم كلها ضباط وموظفين اشكال الناس ما گدرنه نحجي عن سبب المشكله بينه وبين صائب

جذبنه عالناس الكل تسأل ماجد شبي

اوف عمت عيني لايبه روحه

سعاد : الله يعينه زين صائب ما طب شافه بررله شي

رافده : ولا طب ولا گال اخويه فات بس على حجرة امي ومن صحه ماجد يسمع صياحه ولا نكسر خاطره ولا تحرك ضميره

مستحيل اصدگ هاذ صائب نفسه مستحيل يا سعاد كون تجين قبل جم شهر وتشوفين علاقتهم شلون

صائب جان اب النه تعرفين شنو يعني اب

كله من وره نضال النذله الله لا يوفقها

سعاد :وهسع شلون ماجد صحته زينه يجيبونه هين لو لا

رافده : هوه ما صحه الا قبل لا نجي بساعه جان فاقد گالو داخل بغيبوبه اول ما فتح عيونه ويعيط جيكو وضعه الدكاتره گالو حالياً زين وجاي ننطي مهدئ نخاف بس من انفعالاته وصعود الضغط

وهمه هتمو بي جثير عبن ضابط وخابرو من بغداد وصو بي تلگين المستشفى كلها تركض وراه وهو يشيل بروحه ويرجد ما جان يدري بصائب بالمستشفى لو يدري الله يعلم شيسوي

ظلو يمه غازي وبركات فحطو تملخو وهمه لازمينه وخايفين احنه وضعنه مثل بلاع الموس يا سعاد ما نگدر نگول اخونه غدرنه ،،

سعاد : گالتها وفاتت جوه تبجي شگد انكسر خاطري عليهم الله يهدي النفوس عائله متصافيه طشرتها نضال وراحت

رجعت عالبيت صبيت الغده وديته الهم

رافده وشكحه بالهول ما فعلو ياكلون

شكحه روحها صايره بطارف خشمها وبس تريد حجه تكاون

شكحه : ما نريد الغده يمه تسلمين مو جوعانين بس،شوفي المسعده الي طشرتنه ومدللها ابني اول ما فات جفت بالحجره وسد الباب شويفهم اذا تحب تاكل

سعاد : اخذت الصينيه وطلعت هسع اخليها بالمطبخ لو ارجعها خن اروح اشوف صائب وليال يتغدون

وصلت يم باب الحجره بعدني ما دگيته واسمع صائب يحجي ويه ليال ويحقق

صائب : متأكده يا ليال ما زل لسانج متأكده ما حجيتي شييي

ليال : والله ما حجيت شي ولا احد سألني هيه بس جذلت شعري ورجعت بساع

صائب : خير ان شاء الله

سعاد : رجعت بساع حطيت الصينية بالمطبخ وطلعت هاذ شبي وشكو جاي يحقق وياهه

ليال : من جذلتلي سعاد ظليت مگابله المرايه وادحگ والله حلوه الجذيله حبيتها عبالك طوگ

اگعد عالجربايه وارجع انوب ادحگ على نفسي تالي صعدت عالجربايه وگمت ابين كولي بالمرايه

فحيت ومددت عالجربايه وبساع غفيت عبن من الفجر گاعده حاطه ايدي جوه خدي وبين النايمه والگاعده فزيت على صوت الباب من انفتح

اعرك بعيوني شفته استاذي اجه

سلم وفات بساع يبدل ملابسه ذب الستره لگحها عالجربايه وينزع بالساعه عصه السير ما ينفتح وجان يگطعها ولطخها بالگاع كسرها گعد ولزم راسه

وگفت واعصر بأديني

رفع راسه يدحگ عليه

وگف وجان يجي يمي

صائب : من جذلج هيج

ليال : سعاد

عگد حواجبه وجان يگف وگام يحقق شلون وليش وخوما حجيتي شي وشنهو سألتج نشف ريگي احجي واتلعثم عبالك سويت جريمه من جذلتلي سعاد عاف وطلع وهو متعصب مدري شجاه

طلعت من الحجره جوعانه يربي لا تعشيت البارحه ولا تريگت وهاذ الغده رحت عالمطبخ شفت صينية الأكل يمكن جابتها سعاد

اخذت ماعون وحطيت بي تمن وباميه وگعدت گمت اكل بعدني اول لگمتين وجان تفوت شكحه وتشيل الماعون من گدامي وترجده بالگاع طشرته

ولزمتني من عكسي غصيت گمت اگح واتلفت اريد افتهم شكو غورگن عيوني ختنگت

شكحه : تاكلين سم تاكلين زغنبوت الي يطشر راسج

وجع الي يورم گلبج يا بربوگ بعدج بگد القندره طشرتي ولدي واحد امدد بالمستشفى والأخر نافرنه سممتينه وبكل سهوله جاي تزغنبين وانوب ناصبه نفسج ولا جنج مسويه شييي ام الولد ما متربيه منهي تربيج معاضد الي جيتت فوگ ضره مثل امج انتي

ليال : ما خلت عليه بالحجي تعصف بيه من ايدي وتغلط عليه وتفشر دفعتني وجان اگع بالگاع

فات استاذي گال شهل صوت شافني بالگاع والأكل مطشر جاوبته شكحه وگالت كلشي ماكو

وگف گبالها وگال

صائب : يمه شسويتي بليال بالله مو شفتيها تاكل وهجمتي عليهاااا

شكحه : ما سويتلها شي هاي جدامك جنها البومه

صائب : يمااا البنيه صارلها ايام ما تاكل مثل البشر دحگيلها حت متغيره ولا تعشت البارحه ولا تريگت شتردين منهاااا تره مالها ذنب بشي

شكحه : والله خوش وكت الي خلاك تعلي صوتك على امك لخاطر هاي الي شبعانه خبز ومو شبعانه تربيه وخر من دربي وخر لا بارك الله بيكم ضنه بطني

ليال : دفعته وطلعت ظل واگف ويمسح بوجها

ويستغفر نفضت نفسي وگمت رحت عالحجره قرفصت وگمت ابجي اجه جايب اكل ويا حطه گدامي گحزت الصينيه بيدي گلت مو جوعانه

عافها يمي گال

صائب :اكلي ولا تهتمين لشكو شي تسمعي

ليال : گالها وطلع

زين اني شلون ما اهتم ما متعوده هيج جنت بيت اهلي كلها تحتار بيه بس يريد يشبعوني ومن يوم الي اجيت بيت استاذي متت جوع يربي مرات انقهر ما اكل ومرات استحي اطلب ومگدر اكل گدام استاذي براحتي وگفت گبال المرايه وادحگ على نفسي واتلمس بطني اي والله ضعفانه صحيح اشو ما لاحظت

حطيت ايدي على خدي وگعدت ما گدرت اكل

رحت گعدت يم الشباك ورجعت لصفناتي مال كل يوم

ظليت للعصر مليت گمت واخذت الصينية اوديها عالمطبخ

فتت من يم شكحه وخفت تهجم عليه شفتها تجاهلتني وما حجت كملت طريقي

حطيت الصينية بالمطبخ وطلعت بالطرمه

استاذي مدري وين راح محد يفعل يحجي ويايه

لا ست رافده ولا كريمه ولا حتى سعد

شفت سعاد تنشر ملابس رحت يمها

توني وصلت ابتسمتلي دنگت اشيل ملابس وانشر وياهه

شفت استاذي اجه يمشي بتجاه بيتهم شافني يم سعاد وعگد الحواجب اشرلي اجي هديت الملابس ورحت مبرطمه وصلت يمه بالطرمه وهو متخوصر

بعده ما حجه

وجان يجون سيارتين يمشون سريع طبگو گدامنه بالطرمه اول سياره حدر منها ماجد وهي بعدها تمشي وبساع جيت على استاذي ويضرب بي حصرت نفسي يم الدنگه كتمت صوتي بأيدي وگمت اصرخ

بساع اجو بركات وغازي وابن عمهم الأخر من السياره الأخرى وگام يفازعون بس يريد يشيلون ماجد ما يگدرون

بسط استاذي بالگاع ويضرب بي

خله الدم يطلع من خشمه

ماجد : انته شلون تغدرني شلون واني اخوك من دمك انته شنهي من بشر من طينة يزيد انته من طينة يزييييد

يتبع........