رواية عزاي انك رجاي العذب لو كل الدروب عثور الفصل السابع والعشرين 27 بقلم الكاتبة اديم الراشد
اهلا بكم في مدونة مكتبة حواء نقرأ لكم ونكتب من اجلكم
ابو ناصر: تصير تصير يا عيالي والشيطان شاطر وبعدين لا تنسون ان وعد توها عروس لو تطلقت هالايام وش بيقولون الناس عليها
فيصل: ماهمنا الناس وكلامهم
ابو خلف: لاااا ياعين ابوك بيهمك بيهمك لو طلعت كلمه غلط وعد هالكلمه بتمسنا كلنا مب بس وعد !؟وبكرت دوور احد يزوجك ولا يتزوج خواتك
خلف :اللي فيه خير يطلع كلمه بس ابو ناصر: لو بتتبع كلام الناس وتدور من تكلم ياولدي صرت مجنون لكن خلو الامور تهدا وعل وعسى ربي يهدي سرهم وتكون ازمه وعدت
محمد : وينها وعد ناودها نادوها
وقف عقاب اول ما استوعب موقفه الخايس بينهم وقرر ينسحب وهو ما صدق ان مبارك راح ولا جاب طاريه ابد
دخل بيتهم وهو يشوف كل البنات واقفين بهدوء
عقاب : خير وش فيكم!
مضاوي: ولا شي مصدومين من اللي صاير مع وعد
عهد :كنت حاسه انها ما رح تطول مع طولة لسانها هاذي
عقاب: بس بس فكونا من هالموضوع !جدتي وين؟
هيا : في بيت ابو خلف
عقاب : وعزوز!!
سحر :راح يجيب اغراض
سكتوا كلهم وقعد عقاب وهو للحين في حيره من امره
_______________________.
عند وعد
اول ماقال لها سالم انهم يبونها خافت وهاذي اول مره تخاف وعد بهالطريقه من احد دخلت بهدوء لكن بادرها فيصل اللي يقول: ماعليك منه وانا اخوك والله لاخذ حقك والله
محمد : اقعدي ياوعد اقعدي ماعليك منه
ابو ناصر: تعالي يا بنتي تعالي اجلسي وعلمينا وش صار بالضبط
ماقدرت وعد تقول شي لكن كانت متماسكه وعلى وجهه انها تبكي واول ماشافوا ملامحها قرروا يسكتون لكن قالت وعد : كل القصه اني ماعاد ابي مبارك ابد ابي اتطلق منه فكوني ما ابيه
خلف : ماعليك مايصير الا اللي تبينه
ابو ناصر: ياوعد يابنتي انتي كبيره وعاقله عارفه عقابة الامور وشهي انا اقول انتظري فتره ان ما انحل الموضوع عاد وقتها بكيفك
ابو خلف : ماهو على كيفها وعدوه حطي عقلك في راسك واعرفي ان هاللي بتسوينه بيأثر على خواتك واهلك
وعد : هذا اللي لازم اسويه اداري الللي حولي وانا بالطقاق
خلف: وعد اهدي وخلينا فتره نهدا وبعدها نقرر
طلعت وعد ولف محمد بغضب لابو خلف : انت خلاص مافيك طب!!تبي تخرب حياة بنتك عشان الناس
ابو خلف : هذا الصح
ابو ناصر: محد فيكم صح واسكتوا خلوها تفكر شوي وهي تقرر
سكتوا كلهم ووقف ابو ناصر: يلا يلا عشان تلحقونا على الغداء
طلعوا كلهم لكن رجع خلف لوعد : ماعليك من كلام ابوي ما احد يجبرك على شي ابد تسمعيني
وعد : الله يديمك لي ذخر
ابتسم خلف : يلا نلحق الغداء
12
وقبل يطلعون دق الباب وفتح الباب بس انصدم خلف اول ماشاف جابر وليلى عند الباب للحظه داخ حس انه بيطيح مغمى على من الصدمه : جابر ياهلا
جابر : هلا فيك ازعجتك ياخلف ماعليه
خلف : ابد والله ابد اا ازعاج ولا شي اقلط اقلط
جابر : لا والله مستعجلين لكن قلت اتطمن عليك شفتك ما رحت الدكان
خلف كان متوتر من وجود ليلى وابتسم: لا بخير عساك بخير ولا قصرت معي
ابتسم جابر : زين حمدلله ويلا احنا نترخص
خلف: لا والله ادخل ادخل تقهوو
جابر حاول يرفض بس اصر خلف ودخلوا ودخلت ليلى لوعد اللي ركض خلف يناديها وطلعت وعد مصدومه من وجود ليلى : ليلى
ابتسمت ليلى بفشله: ايه ماعليه ازعجناكم بس اصر جابر يمر خلف يتطمن عليه واضطريت اجي وياه
وعد : لا عادي تفضلي تفضلي
دخلت ليلى وهي تحس ان وعد متوتره والبيت هادي
لكن شوي ونادى جابر وفزت ليلى وهي ماتدري وش تسوي بدوا خلف اللي معها لكن اول ماوقفت طاح من يدها وشافته وعد اللي انصدمت وبدا يبان لها سبب جيت ليلى وبدت تخاف من علاقتها بخلف
نزلت وعد ورفعته بهدوء : دواء خلف
ليلى خافت وقالت بسرعه: ويييه نسييت هذا الله يسلمچ امس بالليل خلف كان عند جابر وراح ونساه وقالي جابر اجيبه وياي عشان يعطيه ونسيت اعطيه زين انچ شفتيه
وعد : اييه زين زين
خلف : يا وعد ! وين اهل جابر
وعد : جايين خل الطريق
ابعد خلف وهو وده يلف عليها ويبتسم ولا يدري وش جابها لكن اكيد عشان الدواء
طلعت ليلى وهي متوتره من وعد ومن جابر بعد لكن ارتاحت مجرد ماشافت خلف بخير
سكر خلف الباب ولا يمديه يستوعب الا اتجهت له وعد وهي تحط البخاخ بيده وكان واضح عليها الزعل وقالت : قلت لك ياخلف لا تمشي بهالطريق والايام دواره لكنك ما تطيع لين تجيب مشكله
راحت وتركت خلف اللي انفجع لكن تأكد انها اكيييد رجعت تشك فيهم
صد بضيق وطلع وهو مب ناقص بلاوي اخذ طريقه للمكان المعتاد وهناك شاف ضاري ونادر جالسين والضيق معتليهم لكن انتبه لعقاب اللي جاء بعد : خلف ليه ماجيت للغداء
خلف :مالي نفس
لف عقاب يناظر : وش فيهم هذولا
خلف : تعال تعال
راحوا لهم وقف ضاري بهدوء: حي الله
اقبل له خلف وهو يحضنه يحس انه فقده هاليوميين كثيييير ويحس انه غادره وضاري ما يستاهل
كان ضاري قادر يحس باللي في صدر خلف ويحس به ويدري خلف ماله ذنب في رفض مضاوي ابعد وهو مبتسم : وينك يا خليف من زمان عنك
خلف : موجود انت اللي غايب عنا
ضاري: انشغلت مع امي
عقاب : نادر وش فيك!؟ نادر : ما فيني شي
خلف :وراك ضايق طيب
ضاري بهدوء: اقعدوا السالفه طويله
جلسوا بتوتر وبدا نادر يقولهم السالفه
عقاب : يارجال ما عليك لعلها خييييره
خلف: كذا يا نادر احسن ابعد عن الشر وغني له يمكن هالبعد يهدي النفوس
نادر: انا كل همي كيف بعيش وعقلي وقلبي منقسم نصين بشيل هم اهلي ولا هم شوق
ضاري :قلت لك كلها فتره وبعينك بتشوف اهلك جايين يطلبونك ترجع
عقاب : اركد انت الحين ودور لك بيت قريب واجلس فيه بينهم ولا تقطعهم ولا تخرب حياتك
نادر: هذا اللي بيصير
جلسوا ساكتين وكل واحد له هم يفكر فيه وقف ضاري وقال : دام كل واحد ضايق صدره !؟ تجون معي لتركي ! نروح للبحر نحتري الغروب ونروق شوي
وقف نادر: ودي لكن شوق وين اوديها
ضاري : جبها عند امي تتسلى معها لين نرجع
خلف : ايه تغير جو بعد بعيد عن المشاكل
عقاب: ايه ايه قوموا قوموا
الكل قاموا يحاولون يتجاهلون اللي صاير
_______________________.
وفي بيت ابو خلف
كانت وعد هاديه ما شاركت بسوالف البنات حوالها ولا هي مع العالم وهي ماهي مستوعبه انها افتكت من كل ذا ومحد صدق مبارك
لكن هي تفكر الحين كيف تتخلص من مبارك واذا تطلقت بتمسك عده وبتجلس ومستحيل يخليها ابوها تروح للمعهد وخصوصاً ان فترة زواجها قصيره وبتصير الانظار عليها
وهنا بدت تراجع قرارتها وتفكر بمصلحتها ومصلحة الكل حولها
تنهدت ولفت على صوت اماني: وعد خليك معنا
ندى: لا يضيق صدرك خلف والله مايقصر وبيربي هالكلب المفتري
وعد :مو مهم خلاص لكن بنام تعبانه
حنان: ياحبيبتي ياوعد نامي نامي
طلعوا وتركوا وعد اللي صارت تفكر في خلف بعد اللي صار في ورطه هو الثاني مع ليلى وشربك الدنيا كلها في بعض
_______________________.
عند شوق
رتبت كل شي وجلست تنتظر نادر اللي جاء والضيق معتلي وجهه
شوق : نادر فيك شي!؟ نادر: لا لكن اللبسي وخلي الاغراض هنا وبوديك لبيت ام ضاري تجلسين عندها لين احصل بيت
شوق : بنطول عندها؟؟ نادر :لالا قبل الليل بجي اخذك ونطلع لفندق لين نرتب بيتنا
شوق : ابشر
طلع نادر يناظر امه وابوه اللي مب معطينه اهتمام نهائياً ووقف بضيق وهو يقول : عمره ماكان اختياري اني اكون في صف غير صفكم عمري ماكان ودي اني اطلع من بيتكم ولا عمري تمنيت هالحياه اللي انا فيها كان مرادي بس زوجه وراحت بال وهذا الشي الوحيد اللي طلبته منكم ويوم ما حصل كنت مطلبي هو الراحه والرحمه وانا للحين أسال ومستغرب : وش الفايده في انكم تعذبوني وتعذبون شوق ! لكن الله يسامحكم وانا اتمنى ان هالبعد يكون خير دليل للغلط اللي تفرضونه علينا .
.
طلعت شوق وابعد نادر وطلع وهو ماسك يدها بقوه وهو يدري مالها ذنب ابد في كل اللي يصير هي مظلومه مثلها مثله ومافي يدها حيلهز
شدت شوق على يده وهي مالها نيه تترك نادر ابد دام هو الوحيد اللي احتواها واحترمها وراعى ضعفها وقلة حيلتها
_______________________.
في بيت النوخذه
كانت ليلى طول الوقت متوتره متوقعه ان وعد شاكه وكاشفتهم صحت من سرحانها على صوت نهيان ومريم وشيخه اللي وصلوا
والكل وقف يستقبلهم بالاحضان وجلسوا ولف نهيان مبتسم: ماشاء الله عليك يا جابر عفت الكويت واهلها وبتاخذ من السعوديه!؟
جابر : ياخوي التغيير زين
ابو نهيان : كلنا واحد
ليلى : من وجهة نظري زييين سوى جابر ما ابيه يتزوج من الكويت
ضحك نهيان: الظاهر بنصير صفين انتي وجابر نزوجكم من السعوديه وانا وشيخه كويتين
مريم بضحك: حاول تكون متاكد من قرارك
ضحكت ام نهيان: متأكد ما عليچ مايحصل مثلچ ابد
نهيان: اي والله
ابتسمت ليلى وهي تناظرهم وهي فعلاً بدت تصير هي وجابر من احباب السعوديه ومن الوفيين لها ولأحبابهم فيها كانت تنتظر بس اللحظه اللي فعلاً ترتبط فيهم ارتباط رسمي
جابر : زين يبه بكره بنروج ونملچ
ابو نيهان: على بركة الله
مريم بهمس : ليلوووه تعالي قولي اماني شلون شكلها نسيتها
ضحكت ليلى : الحين اقولچ تعالي ساعديني بالمطبخ
وقفوا يتساعدون وليلى تعيد وتزيد في مواصفاتت اماني عشان يتذكرونها البنات
_______________________.
على البحر
اجتمعوا كلهم بعد ما وصلوا شوق بيت ام ضاري وجلسوا بهدوء ينتظرون الغروب وقبل تغرب الشمس وصل تركي اللي سلم عليهم وهو مبتسم لكن ضحك بشك: كأنكم ضايقين
نادر: غرقانيييين
ضحك ضاري: ومنادينك تغرقنا زود
ضحك خلف بهدوء: يلا يلا شد حيلك المجاريح واجد
ابتسم عقاب : يبدو اني السليم الوحيد لذلك عطني الطبله اسنع الجو معك
ضحك تركي : ايه ايه يلا
جلسوا عقاب وتركي جنب بعض والباقين جالسين بهدوء وضاري يوزع الشاهي
تركي : وش تحبون تسمعون!؟ ضاري: غرد بما في قلبك
تركي :اجل نقول لا تضيق صدوركم ترا من بادي الوقت هذا طبع الايام
صفقوا له العياال وبدا تركي يلحن يىغني ويغني معه عقاب شوي
(من بادي الوقت هذا طبع الايَّامِ ..
عذبات الايَّام ماتمـدي لياليهـا
حلو الَّليالي توارى مثل الأحـلامِ ..
مخطور عنَّي عجاج الوقت يخفيها
أسري مع الهاجس الَّلي مابعد نامِ ..
وأصوِّر الماضي لنفسي وأسلَّيهـا
إلى صفالك زمانك علِّ ياظامـي ..
إشرب قبل لايحوس الطَّين صافيها
الوقت لو زان لك ياصاح مادامِ ..
ياسرع ماتعترض دربك بلاويهـا)
.
على اخر الابيات اعتلى المجلس صوت التنهيد اللي طالع من قلوبهم وهم كل واحد يشيل بيت يحس انه يوصفه
اولهم عقاب اللي يدعي انه سليم من الكدر والهواجيس لكنه عنده يقين تاااااام انه من بادي عمره وهذا طبع الايام معه مايهتني بلياليه العذبه الا تباغته الضيقه وترجع لماضي هو مستعد يدفع عمره ويرجع بين امه وابوه
لكن نادر كان يحس ان الليالي الحلوه اللي كان ينتظرها اختفت وتوارت بعيد عنه صارت الراحه بالنسبه له حلم وبيصعب علييييه وصوله
وخلف اللي كانت ايامه هاديه مره ومره قمه فالضيق كان يحس ان لازم يستغل صفى ايامه قبل يصير شي يعكرها
اما ضاري كان حبيس اخر شطر وهو كان حافظه وعارفه وكان مؤمن انه صايب وكان يدري ان لو زانت ايامه للبد انه بيكدرها نسبه المجهول واصله الغريب ومايمديها زانت مع مضاوي الا اسرعت الايام وجابت له خيبته العظيمه
_______________________.
في بيت ابو خلف
هدوء الليله بالنسبه للكل غريب الكل ماسك ارضه ولا احد له خلق يكلم احد وكأن ازمة وعد تلزم عليهم الصمت وان الكل يسكتون تلبيه لراحة وعد اللي ماقدرت تنام او يغمض لها جفن خايفه من مستقبل مجهول وخايفه على خلف اللي داخل بطريق غلط
طلعت بهدووء اخر الليل الوقت تأخر وخلف ما رجع لكن سمعت همس توقعته خلف ونزلت لكن وقفها صوت حوريه من المطبخ وهي تكلم وتقول : مالت على حظي طيحتني بعايله مجنونه وكل واحد اخبل من الثاني وكل واحد له مصيبه شكل ، لكن لولا خوفي على ولدي اللي بيتشرد كان هجيت ، وش بيدي اسوي مابيدي الا اجاري هالشايب واقنعه ان الولد ولده لو كشفني ذبحني وقال لاهلي كلهم ووقتها بروح بشربة موييه ، لا لا ماعليك ما رح يحس لانه غرقان في شبر مويه اللي اقوله يقول ابشري وتم، يلا ما علينا ايام واقوله يطلعني بيت لحالي عن هالعجايز وعياله اللي يقطعون الرزق ، مع السلامه ..
كلام كثير سمعته وعد لكن من الصدمه تدبست لين دخلت حوريه غرفتها ووعد ماهي قادره تسوي شي لكن صرخت برعب اول ما حست احد وراها ومسكها
سكتها خلف بخوف: وعد وش فيك بسم لله الرحمن الرحيم
مسكت راسها وعد بصدمه وقالت: من متى وانت هنا
خلف توني وصلت ، وش فيك انتي ، تعبانه شي!؟
وعد : لا كنت احتريك
خلف :وانا جاي بعد بكلمك
7
دخلها المجلس وهو وده يشرح انها فاهمه غلط وقال: اسمعيني اللي انتي تفكرين فيه غلط
وعد : اي غلط تقصد ماهي حياتنا هاليومين كلها غلط
خلف : اول شي من وين جبتي هالبخاخ !
وعد : طاح من ليلى وشفته الظاهر انها نوت تعطيك لكن ما صارت
خلف : وعد وش هالكلام! مليون مره اقولك مابينا شي غلط
وعد : وش تفسر اللي صار وليييه كل مره دواك يصير معها
خلف : يابنت الناس افهمي امس كنت رايح لنادر وضاري لكن وانا بالطريق كالعاده صابتني نوبه وشافني جابر واخذني لبيتهم وساعدني وانا طلعت بسرعه ورجعت للبيت مابي امي تقلق علي واكيد ان البخاخ بقى مع جابر
وعد : انا مصدقتك لكن انا خايفه عليك اخاف يصير شي وتروح فيها وقلت لك تبيها اخطبها لا تجلس تلعب كذا
خلف : ابشري ابشري بس مب الحين لين تنتهي هالمشاكل
تنهدت وعد وهي تناظر خلف بضيق وقالت: على طاري المشاكل ابشرك فيه كارثه جديده
بهت وجهه خلف وقال بهدوء: وشووو ! وش فيه بعد!؟
وعد : انا مدري اللي سمعته صدق او كذب بس الاكيد اني سمعته وانا واثقه انه تعنيه بالحرف الواحد
خلف : تكلمي ياوعد
وعد : سمعت حوريه تكلم وتقول...... وكملت لخلف اللي من الصدمه جلس وهو يقول: وشوووو وش هالكلام ياوعد انتي متاكده من اللي تقولين هالكلام خطييير خطير يا وعد
وعد : متاكده اني سمعتها تقول كذا وبعدين انت مو مستغرب من هالحمل اللي صار بسرعه وغير هذا كبر بطنها المشكوك فيه
خلف : يالللله !!!! وش بنسوي الحين كيف نتصرف اخاف انك سامعه غلط وحزتها بتنقلب الدنيا علينا
وعد : خلف انا متاكده اقولك
خلف كان مصدوم : معقوله لعبت على ابوي بهاالسرعه؟؟ ولهدرجه
وعد : ياخلف ابوي ماهو معنا ابد هذا هو يمشي وراها واحنا في كم يوم شفنا عجب العجاب
خلف : والحل !؟
وعد : تقول لجدي وعمي محمد عشان يكون موقفنا قوي اذا واجهنا ابوي بعد
خلف: ياااااربي وش هالمصايب
وعد سكتت وهي ماهي عارفه كيف بيحلونها لف خلف بهدوء: زين زين قومي نامي وبكره خير
راحت وعد وتركت خلف للي توه يحس انه صفى راسه من المشاكل بس هاذي صدمه جديده عليه وكارثه
_______________________.
ومن بكره
في بيت الجد قايد كان عقاب هالمره هادي والساحه فاضيه لعزوز اللي كالعاده يسولف ويقرا لجده وجدته كتاب قصيد
لكن قاطعته ام ناصر تقول : عقاب وش فيك
عقاب : ابد مافيني شي
ابتسم محمد وهو يقول : الظاهر تأخرنا عليه والولد وده يتزوج
ابو ناصر: ولا يهمك بكره ان شاء الله نروح ونخطب لك
عقاب :هاه !والله على راحتكم ياجدي لين تنتهي ذا المشاكل
محمد : مافيه مشاكل ان شاء لله وانت اولى يا عقاب خلنا نفرح فيكم عاد
عزوز : اي والله
عقاب : الله يسهل
جلست سحر جنب عقاب اللي توووه يدقق في سحر توه ينتبه للحزن اللي اعتلى وجهها هالفتره
لفت وابتسمت له لكن وقف عقاب: سحر تعالي ابيك
مشت معه وهي مستغربه نظرته ولف عقاب بهدوء
عقاب : سحر وانا اخوك فيك شي احد مزعل خاطرك !؟ سحر ارتبكت : لا يا اخوي مافيني الا كل خير
عقاب : وليه احسك ضايقٍ صدرك !؟
سحر: لا ابداً بالعكس انا مرتاحه ومبسوطه بس زعلانه على اللي صار في وعد
صد عقاب بهدوء: زين اجل نادي لي شهد وعهد وقولي لي اذا تبون شي
سحر : ابشر
جلس بهدوء لكن كالعاده دخلت شهد بضحكتها المعتاده وهي توقف قدامه وتدق التحيه: ناديتنا طال عمرك
ضحك عقاب :ايييه من زمان عن الضحكه الحلوه قلت اناديك توسعين صدري
ركضت شهد جنبه : افااا افا والله من مضيق صدرك عسى تضيق به دنياه
عقاب : محدٍ يضيقه وانتي توسعينه المهم علميني عن علومك واخبارك تبين شي محتاجه شي!
شهد : ابد مبسوطه لكن ودنا نروح السوق من زمان عنه
عقاب : تم تم بكره نروح
شهد بضحك: عاد لازم نستغلك قبل تزوج وتروح علينا
عقاب: افااا معصي والله مايغيرني عليكم احد
شهد: كفوو
دخلت عهد بهدوء: ناديتني
عقاب : ايه تعالي اقعدي
جلست عهد قدامه بهدوء وقال عقاب:اول شي يمكن تكونين زعلانه مني لكن حطي عقلك براسك واعرفي اني بتصرف هالتصرف في كل مره تغلطين ، وانا ابي مصلحتك ولا ابيك تنجرين في كرهه اهلك عشان شي ماكتبه ربي
عهد : معك حق
عقاب : زين اجل ، تبين شي محتاجه شي
عهد: سلامتك
عقاب : زين
طلعوا كلهم من عنده وهو عنده هالعاده كل فتره يجتمع في خواته ويسألهم عن احوالهم
_______________________.
في بيت ابو خلف
كانوا مجتمعين على الفطور وخلف ووعد عيونهم على حوريه يحاولون يتأكدون من اللي في بالهم
وصد خلف وهو يستغفر ووقف : فيصل يلا معي لدكان
ندى : قبل يروح فيه اغراض نبيها
فيصل: عطيني الورقه
حنان: خذ
حوريه بدلع ماصخ : نااااصر
لف ابو خلف : هلا
حوريه: في اغراض ابيها بعد
ابو خلف : عطيها فيصل يجيبها
فيصل: انا مالي شغل في احد الا اهلي
ابو خلف : ترفع صوتك علي ياكلب
10
فزت وعد تمسك ابو خلف عن فيصل: فيصل صادق مالع شغل بأحد
ام خلف : بس بس لله يهديكم فيصل تعوذ من ابليس يمه وروح
اخذ فيصل الاوراق بزعل وطلع وطلع خلف بضيق متجهه لسوق
واول ما بدا يفتح محله لف على صوت ابو نهيان يناديه : خلف خلف
لف ببتسامه: سم ياعمي
ابو نيهان: شلونك عساك صرت زين
خلف : حمدلله بأفضل حال
ابو نهيان: حمدلله ، ووين ابوك ماهو جاي لدكان
خلف: ما اظن والله
ابو نهيان: زين اجل سلم عليه وقوله اذا ماعندكم مانع المغرب بنجي ونملچ لجابر على كريمتكم
ابتسم خلف ابتسامه وسيعه: هاذي الساعه المباركه وحياكم الله
ابو نيهان: بارك الله فيك
خلف :فمان الله
راح ابو نهيان وترك خلف الدكان وركض للبيت لازم يقولهم يستعدون ولازم اصلا ابوه يستوعب السالفه ومايسوي مشكله وحمد ربه انه حصل الكل موجودين ومحد طلع
ابو ناصر: بسم لله عليك وش فيك!؟
خلف : عزوز جب لي مويه
ركض عزوز ورجع بمويه: علامك؟
خلف: يبه جدي ترا كلمني ابو نهيان يقول بلغ اهلك اذا ماعندهم مانع بيجون يملكون المغرب
ابو خلف : وشوو!؟ معصي
محمد: وش بلاك انهبلت انت عطينا الرجال كلمه وانتهى الموضوع وبعدين ما انت لاقي احسن من جابر
ابو ناصر: الله يكتب النصيب واذا كتب لهم عندنا لا انا ولا غيرك يقدر يرده
خلف : يبه قلت لك جابر كفو ويستاهل
عقاب : هذا الحق ياعمي ولا توقف بنصيب احد
ابو ناصر:ماعليه ماعليه قله حياه الله وبلغ اهلك يستعدون
خلف : ابشر
ابو خلف : تكسر كلامي يبه !
ابو ناصر: لا حطيت عقلك براسك وصرت تعرف تصرف حزتها مشيت كلامك ، وانت هالايام مسحور ماتدري وينك فيه
وقف ابو خلف بغضب وطلع والتفت محمد بيأس: رايح وطي مع هاللي ما تسمى
ام ناصر : الله يفرق بينهم مثل مافرق بين الشرق والغرب
عزوز وفيصل: امييين
ضحك محمد : عزوز مشارك المعاناه
عزوز : شسوي انضغطت معهم
ابو ناصر: يلا يلا شوفوا وش يحتاجون وساعدوهم يلا
الكل: ابشر ابشر
_______________________.
عند البنات
كالعاده كان المتصدر في الجلسه هو( الشاهي ودوار الشمس ) وسوالف وحش لين اقتحم خلف الموضوع بدون ماينتبه لوجود بنات عمه لكن صرخوا ورجع برعب : وش بلاكم
مضاوي: ارجع عندنا البنات
خلف : وبس بغيت اموت من الفجعه
حنان: بسم لله عليك امر وش بغيت!
خلف : دامكم متجمعين قوموا نظفوا وجهزوا الشغل كله
ندى: ليه من بيجي!؟
خلف ببتسامه وهو صاد: ابد الچويتي بيجي يملچ على قولهم
في مثل هالموقف فزت مضاوي بمزح وشهقت وقالت: يعني صارت الصچييييه بتتزوجين كويتي وانا اجلس بحسرتي
لف خلف بعد ماراحوا سحر وخواتها واحتدت نظرته لمضاوي اللي فجأه بلعت لسانها وجلست وهي منزله راسها ما كانت منتبهه ان موقفها مع خلف حساس وللحين زعلان من قرارها الغلط الغير مسؤول
قال خلف بهدوء: ندى قولي لعمتي وامي واجهزوا
ندى: ابشر
في ثواني انتشروا فالبيت وينظفون ويضحكون واماني للحين تحس انها في حلللم ماهي مستوعبه ابداً
_______________________.
وفي بيت النوخذه
كانوا يجهزون دزة الملكه ووقفت ليلى تناظر ببتسامه : الله يا حلاااااتها
ابتسمت مريم: ياررررب عقبالچ ان شاء الله نفرح فيچ قريب
ام نهياان: امييين
ليلى: بدري بدري من كم شهر زوجنا شيخوه خلوني استانس
شيخه : يا سلام عليچ قاعده على قلبچ
ضحكت : لا والله بالعكس انا بموووت من شوقي لچ
ام نهيان: يلا يلا انتي وياها زتكم جهزوا وخلصوا مافيه وقت
ليلى : انا الييييوم اعلن اضرابي عن غسيل المواعين تغسلهم شيووخ
شيخه:والله!؟
ليلى: والله انا تعبت خلاص مافيني حيل
ضحكت شيخه: زين بريحچ اليوم بس
ابتسمت ليلى وطلعت لغرفتها وكالعاده رفعت صوت الراديو لااااخر صوت وبدت مرحلة تجهيزها وهي تستعد للملكه بقمة الروقان والحب
ولفت على الراديو ببتسامه وهي تردد معه كلمات (دمعت فرحة بعيونك تقول احنا بعدنا احباب
انا تايه بأمر الحب وچدامي طويل الدرب
وكل ما اعاتب عيونك تزهبلي عذر واسباب)
كانت نوعاً ما منطربه لكن تنقلها افكارها لخلف وتتوقع وش يسوي الحين وكيف بياخذ هالحدث في صالحهم
_______________________.
وفي بيت ام ضاري
اللي حلفت مليون يمين وديين مايروح نادر شوق لين يحصلون بيت
كان نادر متفشل بس حاس انه مرتاااااح وقلبه متطمن على شوق انها في يدين امينه وكان يقول بداخله ( سبحان الله اللي يوزع الود والرحمه بقلوب الناس )
صحى على صوت ضاري اللي يناديه وهو مجهز الفطور: نادر يلا اصحى هذا امي مجهزه لك الفطور بيدييييينها ومجبوووور تاكل
نادر: والله يا ضاري اني محرج منك ومن امك و...
قاطعه ضاري: لا تنحرج ولا شي احنا اخوان والدنيا تدور اليوم عندك وبكره عندي وكل واحد يسند الثاني
نادر: ما تقصر يا ضاري
ابتسم ضاري: عاد لا تشيل هم شوق امي جالسه لها بتخليها تاكل وتوسع صدرها وبعد شوي بتجي ام محيميد وبتنبسط
ضحك نادر: ام محيميد !؟
ضاري: هاذي الله يسلمك جارتنا ينقال لها جارتنا لكن المفروض تصير راعية بيتنا لانها ٢٤ ساعه عندنا تروح اخر الليل وتجي اووول الصبح وفي هالساعتين اللي تغيبها تجيب اخبار المنطقه كامله وتجي وعاد وقتها يبدا اجتماع الحش عندها
ضحك نادر: يا حياة الشقى
بدا ضاري يسولف وهو يحس انه بجية نادر نسى همه ولقى شي يسليه
وبالنسبه لام ضاري كاااانت فرحانه ما على الارض منها شي من الفرح كانت مبسووووطه بوجود شوق وتداريها وتراعيها وخصوصاً بعد ماعرفت سالفتها مع ام نادر
ام ضاري : خذي راحتك وانا امك واللي تبينه ابشري به
شوق : تسلمين يا خالتي ماقصرتي
ام نادر: ولا يضيق صدرك شي يا حبيبتي كللللنا بهالدنيا نمر بظروف شينه ونتضايق لكن المهم إنا واقفين جنب بعض
ناظرتها شوق بضيق وقاالت بخنقه وهي تحس بالذنب اتجاهه نادر وانه انطرد من بيت امه وابوه عشانها: بس انا مخنوقه ياخالتي
فزت ام ضاري وحضنتها بحب : لا يمه لا بسم لله عليك من الخنقه ! وش فيك يا حبيبتي قولي لي قولي اللي بصدرك كله
هنا انهارت شوق تبكي بحرقه وحسره وبدت تقول لام ضاري قصتها كلها ولا حصلت من ام ضاري الا الحب والحنان اللي احتوتها به وهي تمسح عليها وتقول : ماعليك يا امي ماعليك واحمدي ربك ربي عوضك بنادر ابن حلال ويخاف الله فيك وحمدلله انه ماصار مثل بعض الرجال ماعندهم دم وهذا هو راعاك حماك وما آذاك بشي ولا طلقك يوم شافك ما تناسبينه بالعكس هذا هو واقف معك ضد الدنيا كلها وماعليك يابنتي لو ما تطلعين من هالدنيا الا بنادر هذا مكسب عظيم
مسحت شوق دموعها وهي تقول : انا والله عارفه انا ماهمني نفسي انا ضايق صدري على نادر وانا اشوفه تعبان ومتضايق
ام ضاري: ماعليييه بيتعب ويضيق لكن انتي خذي بيده وطلعيه وكوني معه
شوق : والله احاول
ام ضاري : ايام وتعدي ان شاء الله امسحي دموعك وتعوذي من ابليس لا يناديك نادر ويشوف وجهك وحزتها يضيق صدق
قامت شوق تغسل ولا هي الا ثواني ونادى عليها نادر
وطلعت بهدوء : هلا
قرب نادر بشك: وش فيه وجهك!؟ تبكين!؟
شوق : لا لا كنت اساعد ام ضاري وطار الغبار في عيني
ما صدق نادر بس قرر انه يمشيها لانه مب ناقص تعب: زين انا بطلع انا وضاري ادور بيت
_______________________.
المغرب
في بيت ابو خلف
وصل النوخذه والشيخ والكل مستعد ومبسوط كان خلف بيطير من الفرح من ناحيه فرحة اخته ومن ناحية الموضوع لصالحه وبيزيد ارتباطه بليلى
اما جابر كان بيتشقق من الفرح وللحين تطري له اماني كان يتمنىى لو انه يقدر يشوفها
