رواية عزاي انك رجاي العذب لو كل الدروب عثور الفصل الثامن والعشرين 28 بقلم الكاتبة اديم الراشد
اهلا بكم في مدونة مكتبة حواء نقرأ لكم ونكتب من اجلكم
اما جابر كان بيتشقق من الفرح وللحين تطري له اماني كان يتمنىى لو انه يقدر يشوفها ويكلمها بفتره الملكه لكن الحمدلله راضي بأنها تكون مكتوبه بأسمه
اما في طرف الحريم وصلت ام نهيان وبناتها والكل يستقبلهم بحب
وكانت ليلى كاشخه بكل مافيها من قوه ماتدري لو الصدف تجمعها بخلف لكن كانت متوتره من وعد اللي عينها عليها
ووعد ماهي كارهتها بالعكس كانت تخاف انهم يتمادون ويصير شي مو فالحسبان
جاء خلف بالدفتر وهو صابه عقده من هالدفتر يخاف يصير مع اماني اللي صار مع مضاوي
وقف وهو ينادي : يا ولد طريق
طلعت له ندى ببتسامه: يلا يلا مافيه احد
دخل خلف وهو يتمنى يشوف ليلى وطلع مستعجل لاماني ودخل مبتسم: جاهزه عروستنا
ابتسمت اماني بخجل وقالت ندى بضحك: جاهزه جاهزه
نزل خلف الدفتر قدامها وابتسم : وقعي على بركة الله
وقعت اماني وزغرطوا البنات وراها وهم يصفقون لها
وضحك خلف : قصروا الرجال تحت
قرب وهو يسلم عليها : الله يجعله زواج الدهر وانا اخوك
اماني: تسلم
ابتسم وهو يقول : شوفي لي طريق يا وجدان
مرت وجدان : يلا
نزل خلف ورجعت وجدان اول ما تاكدت ان الممر مافيه احد
ونزل خلف وهو يرتب شماغه لكنه ابتسم من الصدفه اللي ياما دعاء انها تحقق في ممر المغاسل كانت هناك هيا ومعها ليلى اللي تغسل فستانها اللي انكب عليه الشاهي ورفعت اسفل فستانها وبان خلخالها لللي من المره الاولى جايب راس خلف
لكن فز برعب واول ما سمع صوت وركض برا وقف بهدوء يهدي انفاسه ودخل مجلس الرجال بهدوء وهو مبتسم للمنظر اللي بعيونه
وقع جابر ووقف الكل يبارك له وهو مبتسم
ابو نهيان: وان شاء الله اماني مثل بناتي وبحطها بعيني
ابو خلف بغضب: عساها ما تكون غير كذا
تدخل خلف بسرعه: واثقين واثقين ياعمي وانتم مثل اهلها
ابو ناصر : ونعم الاهل
محمد : وابد ما تروحون ليييين تحضرون عشاكم عندنا
ابو نهيان: ما نبي نكلف عليكم
ابو ناصر: مافيه كلافه وحنا اهل
خلف: ابد يا عمي والله مايكتب لكم الا عندنا
نهيان: على بركة الله على بركة الله
جلسوا من جديد وكلهم مبسوطين الا ابو خلف زعلان ومعصب
_______________________.
وفي بيت ام ضاري
رجع نادر وهو مبسوط انه حصل بيت قريب من اهله
ودخل مع ضاري اللي مبسوط بنادر
ضاري : اجلس بجهز القهوه
نادر: اصبر ببشر شوق إنا حصلنا بيت
ضاري :بشر ياعمي بشششر يحق لك تبشر نديمتك
ضحك نادر: عقبال ما تهل عليك البشاير من نديمتك
اخذ ضاري نفس: على الله ، يلا بقول لامي تنادي لك زوجتك وانا بطلع اجيب اغراض
نادر :طيب
شوي وجات شوق وابتسمت وهي تقول : يعطيك العافيه ابتسم نادر مجرد ماشافها : يعافيك يا نديمتي
اشر بيده جنبه وقال: تعالي تعالي جنبي بقولك عن بيتنا
شوق : بالله اخذت بيت!؟ نادر : ايييه وابشرك بيت شرح ووسيع ويشرح الصدر ولا ابشك فيه حوش كبييييير يمديك تزرعين فيه وتسوين كل شي تحلمين فيه
شوق : اماااانه ياربيي ابي اشوفه
نادر: ماعليك ابد بكره بنروح له ونشوف كيف نبي نأثث
شوق : عساه ماكان غالي عليييك
نادر: الغالي يرخص لك يا شوقه
ابتسمت شوق بإمتنان : مع اني حبيت ام ضاري وتمنيييت اجلس عندها
ابتسم نادر:ماعليك احنا قريب متى ماتبين تجين
شوق: حمدلله
نادر: ايييه صح! ترا اخت خلف اليوم ملكتها على جابر ولد النوخذه
شوق: الله ياربي توفقها ان شاء للله يارب والله يستاهلون كل خير
نادر : امين
فزوا على صوت ضاري ووقفت شوق: بروح قبل يجي
ركضت ودخلت غرفتها
ودخل ضاري على امه : يمه كيفك اليوم
ام ضاري : بخييير بخير وصدري وسيع بقعدة شوق عندنا
ضحك ضاري: يوووه شكلنا رحنا ملح
ام ضاري: ابد ابد انت الاول والاخير واذا ربي جاب مضاوي بنشوف الهناء
ضاق صدر ضاري وقال: يارب
ام ضاري : رح رح لنادر لا تخلي خويك لحاله
ضاري: ابشري
راح ضاري وهو يحاول يصد عن كل موضوع يوصله لمضاوي
_______________________.
في بيت ابو خلف
البنات كانوا يسولفون مع ليلى اللي كانت تتأمل ملامحهم اللي فيها من خلف كثيييير
لفت على صوت ندى : وين وصلتي !
ضحكت ليلى : وياكم وياكم
مضاوي : هاه يا ليلى شكل الدور الجاي عليك
ضحكت مريم: اكيد ماكو الا اهي خلاص ان شاء الله قريب تسمعونها عروس
الكل : امين
ابتسمت ليلى بخوف وهي ودها تقول ( اكون عروس ببيتكم ولخلف)
ليلى: بعد سمعنا عن خطوبتچ يا مضاوي عساه فال السعد يارب
ابتسمت مضاوي بضيق: يارب
ابتسمت مريم: وعد ماكو شي بالطريچ
اسود وجهه وعد وقالت: لا
حنان بسرعه: لا بدري عليها
مريم ببتسامه: يلا ان شاء الله ربي يرزقچ مثل شيخوه هذا هي تنتظر مولود
فزوا البنات بفرح: مبروك مبروك
شيخه بخجل: يبارك بعمركم
وجدان: عاد وددددي يصير عندنا ولد اخت او اخو
شهد: حمدلله ايام يتزوج عقاب ويجيب لنا بزارين نعلب معاهم
وجدان: عادي اقدم طلب لخلف انه يتزوج
ضحكت مضاوي: مررره بيموت خلف على طلبك ويتزوج
كانت ليلى عينها على سحر اللي ضاقت ملامحها وصدت بضيق
كانت ليلى متيقنه إن خسارة سحر لخلف خساره كبيييره وتعرف ان مثل خلف الكل يتمناه لكن كانت انانيه في حبها لخلف
مر اليوم خفيف وحلو وطلعوا الكل مبسوطين
_______________________.
ومن بكره
في المجلس صحى خلف على صوت وعد اللي تصحيه بهدوء
فز خلف : وش فيك!
وعد بهدوء وهي اللي قضت ليلها تفكر في مصيرها : بكلمك بموضوع قبل يصحون
خلف : قولي اسمعك
وعد : كلم مبارك يجي وبرجع معه
اتسعت عيون خلف بصدمه: وشووو !؟ انهبلتي انتي كيف بترجعين بعد اللي سواه
وعد : خلف اسمعي وافهمني تكفى! ابوي صادق وجدي صادق طلاقي بهالوقت مارح يجيب لي خير ولا لكم وانا مابي اكون عقبه حياتكم وانا مستعده اتحمل مبارك سنه بس لين اقدر اتطلق براحه
خلف بغضب: مجنونه انتي مجنونه! قلت لك لا يهمك كلام احد وعسانا نطيح كلنا جنبك مو مهم المهم نكون جنبك وحكي الناس مايهم
وعد : ادري لكن ابي ارجع وبشروطي وبكمل دراستي وانت تدري ابوي مستحيل يسمح لي اكمل واقدر اتحمل ماعليك
خلف: لا لا مستحيل اخليك ترمين نفسك مره ثانيه
وعد : خلف لا تخاف علي انا اقدر اتصرف معه وانت بتكون معي ولو سوا مبارك شي بقولك
خلف بضيق: بس
وعد: لا بس ولا شي ابيك توقف معي بس
صد خلف: زين زين اللي تبين
ابتسمت وعد : يلا صحصح مابقى شي على روحت الدكان
خلف : طيب طييب
راحت وجلس خلف يتأمل كيف وعد تقدر تخليهم واثقين بقرارتها ومستحيل يحس انها ضعيفه او ماتقدر ويدري انها قادره تتصرف مع مبارك وتحط له حدود
انسدح بتعب لكن ابتسم اول ما تذكر ليلى امس مسح على صدره ببتسامه وهو يهمس : الله يجيب يوم تكونين فيه زوجتي
لف على صوت فيصل: خلف انهبلت تضحك لحالك
ضحك خلف :خلنا نضحك يارجال هالايام الضحك علينا بالقطاره
فيصل: يلا يلا
لف خلف على سالم وغيث اللي نايمين معه ويصحيهم
والكل استعد للفطور لكن دق الباب عزوز وهو يقول : عمي خلف ياعيال جدي يقول فطوركم عندنا حياكم
ركض فيصل: اييييه الفطور عندكم يامرحبا يالتخمه
.
مضاوي من بعيد: هييييين انا اعلم خواتك يقطعون كل الامدادات عنك عشان تعرف تتهمهم انهم مجوعينك
فيصل: انا ما اشكك في جهود اخواتي لكن مالي نفس اكل في بيتنا هالفتره
هيا :صدقناك
خلف : ماعليه مردك لنا
محمد :ابوكم وين !
خلف : عند المسعده
ضحك ابو ناصر: ماعليكم ايام وتنحل
خلف: ايه ان شاء لله
عقاب : تعال اجلس جنبي عندي لك بشاره
خلف : يالله بشرى خير غرد غرد
عقاب : ابداً اخواني الاعزاء وجمعنا الكريييم اليوم جمعتكم عشان بعد الظهر نبي نروح ديرة جدتي عشان نخطب لي وجد بنت خالي
ضحك خلف : ماشاء للله قررت خلاص
عقاب : خلاص عقدنا العزم
خلف: الله يتمم لك
ام ناصر:وانت ياخليف وراء ما تزوج سحر وخليتها من بتاخذ
صد خلف بضيق: اذا ربي كتب لي نصيب بتشوفينه
محمد : ماعليه كل شي ملحوق عليه
فيصل : ودنا لو تحركون يالاخوان الكبار وتزجون وتخلونا نكمل على خطاكم
ابو ناصر: ما عمري شفت واحد ميت على الزواج كثرك ! اعقل ياولد توك بزر
فيصل: سامحك الله بزر بزر كل هالرجوله وبزر
عقاب : وييين رجوله انثبر بس انثبر
ضحك محمد : وانت ياعزوز
عزوز: اعرف الجواب واقرر الانسحاب
ضحك خلف : اشوى طلعت عاقل
ام ناصر: مدري كيف الله حفظ عقله مع فيصلوه الخبل
فيصل: خيير اليوم حاطين علي وحالفين تغسلون شراعي
ابو ناصر: بعد معروفه من دق الباب سمع الجواب
فيصل: مادقينا باب احد انتم ناديتوا للفطور
الكل :هههههههههههههههههههههههههههههههههههههههههههههههههههههههه
اخذ خلف نفس وقال: عندي موضوع بنناقشه
ابو ناصر: قول !
لف خلف : هذا ابوي جاء نبيه يسمع معنا
ابو خلف: اشوى للحين حاطني بالواجهه
خلف :يبه افهمني تكفى
محمد : تكلم ياخلف
خلف بهدوء: وعد فكرت وقررت ترجع مع مبارك
الكل سكتوا بصدمه وكلهم كانوا مقتنعين ان وعد دامها طلبت الطلاق فا مستحيييل تغير رايها
فيصل: معععصي
ابو خلف: انثبر انت ! وش غير رايها
خلف : تشوف ان طلاقها بهالوقت غلط
عقاب: يعني ناويه الطلاق ناويته!؟ محمد : لا ما اتوقع وعد عاقله واكيد مارح ترجع عشان تطلق لكن يمكن شافت انها تقدر تتفاهم مع مبارك
ابو ناصر: الله يؤلف بين قلوبهم يارب
ابو خلف : زيين طلعت فيها عقل
خلف : انا بتصل فيه يجي وماياخذها الا بشرووط
محمد : زين
6
وقف خلف وهو يتصل من التليفون ورد مبارك : الوو
خلف : مبارك معك خلف
فر مبارك وهو متوقع هجوم وطلب لطلاق وقال: وش بغيييت !؟؟
خلف: وراك تصارخ!
مبارك: ما اصارخ
خلف :المهم اسمعني انتظرك بالبيت معك نص ساعه عشان توصل
مبارك: ليييه وش السبب !
خلف : وعد تبي تكلمك
مبارك: زين زين
سكر خلف وجلس بهدوء وكان يبي يخلص من موضوع وعد ويقولهم عن حوريه اللي صار موضوعها مشغله
_______________________.
وعند نادر
اخذ شوق وزينب ( الخادمه)
وراحوا لبيتهم بعد ما ودعوا ام ضاري وضاري دخلوا وركضت شوق تلف في البيت وهي مبتسمه ومبسوطه ورجعت لنادر بفرح: توقعت كبير زي ماقلت وتوقعت شي ثاني لكن ماشاء الله يا نادر حلووو حلووو مرره
ابتسم نادر: اهم شي جاز لك بعدها كل شي هين
شوق : شوف هنا ببدا ازرع فيها واسوي لنا جلسه خضراء نفطر ونتغداء ونتعشى فيها
ضحك نادر: ترا بيصير وعد
شوق : وعد ومليون وعد
ابتسم نادر لكن قبل يتحرك تدبس بمكانه اول ما حضنته شوق ببرأه وعفويه تعبر عن امتنانها
ابتسم نادر بعذوبه ومسح على كتفها بهدوء وابعد لان قلبه صار يوجعه
بدون صوت طلعوا من البيت وهم مبسوطين بعيد عن المشاكل المشاحنات
_______________________.
في بيت ابو خلف
وصل مبارك وهو خااااايف من انهم يجبرونه يطلق
شاف فيصل واقف بغضب وعزوز ماسكه يهديه
ابعد نظره عنه ودق الباب وطلع خلف اللي واضح عليه الزعل لكن مو مثل فيصل
ودخل مبارك وهو مستعد اذا طلبت وعد الطلاق واصروا اهلها على الطلاق يقلب الطاوله على عقاب ويقول انه السبب وراء كل اللي صار
جلس بهدوء بعد ما سلم وقال ابو ناصر: اسمع يا مبارك حنا يوم زوجناك وعد عطيناك درررره عطيناك زينة بناتنا وعطيناك بنت عن مية رجال ولا هقينا ان اللي صار بيصير منك ويطلع منك
وكمل محمد : ولا تحسب إنا راضين عن سواتك
خلف : وعد غاااليه ولولا غلاها وكرامتها كان صار فيك شي ما تحمد عقباه لكن لخاطرها طلبها بنسكت
ابو خلف : بعد هذا كله وعد طالبه انها تكلمك وبعد هالكلام نتمنى ان الله يصلح ذات البيين
ما استبشر مبارك بهالخبر وهو يدري ان وعد تكرهه وبتكون اشد حقد وكرهه من اهلها
خلف : تعال معي للغرفه الثانيه
طلع معه مبارك وهو وده ان ابو خلف يبت فالامر ويرجع وعد معه بدون طول كلام ومشاكل وهو يدري ان ابو خلف معارض لطلاق
4
لكن وقف اول ماشاف وعد بهالغرفه وهي متكتفه وتنتظر بنفس النظره القويه اللي تعودها منها ونفس الاناقه والجمال وهذا شي يهبط قلبه ويخليه يرضى بكل شي ألا الطلاق
اما وعد كانت تدري ان مبارك مايسوي شي من راسه بالعكس مبارك مرسول من واحد يوزه واكيد انه عقاب
لذلك قررت انها ترجع وما تنكسر
طلع خلف وتركهم وتقدم مبارك : وعد انا اسف ادري اللي صار غلط وادري اني اخلفت الاتفاق لكن انتي بعد غلطتي وكذبتي علي وخليتني افكر بشي شيين
سكت ينتظر ردها لكن وعد ساكته ورجع يقول: ادري ان مالي عذر ولا انتي لك عذر لكن الشيطان دخل بينا وانا مابي اخرب بيتنا ارجعي معي وانا مستعد اني اسوي اللي يرضيك
كانت هالنقطه اللي تنتظرها وعد وقال: تهقى اني للحين اصدق وعودك!؟ مبارك : ادري انك صعب تصدقيني وصعب اصدقك انا بعد
ضحكت وعد باستهزاء: ايييه كذبت انا لكن ما آذيتك ابد ولو ضريتك! مستحييييل يكون الضرر اللي تعرضت له انت مثل اللي تعرضت له انا
مبارك : ادري وانا مليون مره اسف لكن قولي لي وش طلبك وابشري
وعد : ابد انا ارجع معك بشرووووط ولو تفكر بس تخربها مارح اطلع بس!؟؟ لاا بهد البيت فوق راسك واطلع وهذا اللي انا بسويه لكن اخواني ماني مسؤوله عنهم
اخذ مبارك نفس : وشهي شروطك!
وعد مدت له ورقه : اقراها ووقع عليها وترا هالورقه تدينك
مبارك: افا مافيه ثقه
ضحكت وعد : للاسف لا
اخذ مبارك الورقه وكانت الشروط ( ١ _ اكمل تدريبي بالمعهد
٢_اتوظف في حال حصلت على وظيفه
٣_ ممنوع حملي طوول فترة دراستي
٤_ الاحترام الاحترام الاحترام أولاً واخيراً
٥_ ممنوع إيذائك لي بالفعل والقول
٦_ جميع القرارات في المنزل تعرض علي قبل تنفيذها
٧_ في حال استجدت شروط يتم النقاش فيها واضافتها )
رفع راسه مبارك : كلها موافق عليها الا موضوع الحمل
ضحكت وعد : هذا اول شرط المفروض توافق عليه بدون ما تناقشه بعد اللي سويته وترا تدريبي كله ٣ شهور
صد مبارك وكان صعب عليه لكن كل مايناظر وعد يضعف وطلع القلم ووقع وعطاها الورقه وابتسمت وعد : اجهز واجي انتظر
ابتسم مبارك بود :انتطر ليه ما انتظر
طلعت وعد وشافت خلف واقف واتجهه لها : هاه!
ابتسمت وعد : طاح الحطب
استغرب خلف رضاها لكن قال ( يمكن تحبه والشيطان شاطر ) : الله يكتب لك اللي فيه الخير
طلع مبارك وتقدم لخلف بهدوء: ماودي يصير بيني وبينكم زعل
ابتسم خلف بخفه: ماعليه تصير لكن عشان خاطر وعد نرجع احباب
ابتسم مبارك: الله يسلمك
رجعوا وهدا عقاب اول ماقال مبارك: طاح الحطب ...
ابو ناصر: حمدلله
محمد :لكن نرجع نقول لا تعيد اللي سويته
مبارك: ابشر
ابو خلف: اجلس للغداء
مبارك: لا والله عليكم بالعافيه
جلس وهو ينتظر وعد
_______________________.
عند وعد
رجعت تجهز والكل مستغرب منها كيف رجعت لكن هاذي هي وعد تقرر وتنفذ محد يفهمها ابد
ندى: انا ماني فاهمه كيف رجعتي معه!؟
ام وعد : بس انتي يا ابليسسس! وش تبين فالبنت خليها ترجع مع رجلها وتعيش
اماني: ماقلنا شي بس هي كانت تبي الطلاق
ام خلف: حمدلله ان الله اصلح بينهم ولا وصلوا لطلاق وبعدين ابغض الحلال عند لله الطلاق وش تبي فيه عسى الله يهنيها ويسعدها
حنان: وحمدلله يابنات الله لايجيب طاري الشر وكل بيت فيه مشاكل المهم ان الله يوفقهم وبس
ام وعد : هذا الكلام الله ينورك بعقلك يا بنتي
وجدان: انا والله ماني معترضه لاني اعرف وعد تحط كل قرار بمكانه الصح
ابتسمت وعد: مشكورين كلكم على كلامكم لكن قبل اروح اقول حطوا عينكم على شينة الحلايا ترا ماهي مضبوطه
ام خلف: ليييه ياكافي
ندى: وش شفتي عليها
وعد : ولاشي خلف بيقولهم يلا بروح مع السلامه
سلمت وطلعت وهي تخز حوريه ومرت خلف بهدوء وابتسمت: ماقصرت خلف الله يخليك لي ذخر
خلف: ابد ياوعد انا سندك متى ماضقتي علميني
وعد : ابشر لكن لا تنسى حوريه
خلف : ابشري
فيصل : وعد اذا بغيتي شي اتصلي واجيك
ابتسمت وعد: اكيد
محمد : واذا زعل خاطرك شي اتصلي بعد
وعد : ما يحتاج
سلمت وطلعت وهي فخووره باهلها اللي مثل السد المنيع حولها
ركبت مع مبارك عينها على عقاب اللي متكتف لكن وجهه اسود كأنه زعلان وتوقعت وعد انه يبيها تطلق عشان يحكرها فعلاً لكن خابت اماله
_______________________.
وقبل لا يتكلم خلف عن حوريه
فجأه الكل صاروا يستعدون يخطبون لعقاب وقرر خلف يسكت لييين يرجعون واتجهووا لديرة خوال عقاب ومعهم خوات عقاب وجدتهم
وكان عقاب هادي ما تحرك شعوره ابد ولا عنده امر جديد ابد
حتى اول ما دخلوا مجلس جد وجد وسلموا عليه وبدا ابو ناصر يخطب ماتحرك فيه شي ابد
همس خلف : اللي يشوفك يقول نخطب لغريب وراك جامد
ابتسم عقاب : مدري بس اشوف انه عادي
ضحك خلف : ضامن الموافقه!؟
ابتسم عقاب : يمكن
21
خلف : يلا الله يوفقك وشكلي بجلس لحالي هالسنه
همس محمد : ابد ما انت لحالك تحزم وتعال معي نبي نسافر ونلف الارض لف
ضحك خلف : اييه هذاك اول يوم كنت فاضي
سكتوا على صوت جد وجد اللي قال: للأمانه حنا كلمتنا ام حامد وقالت لنا ان عقاب يبي وجد وفكرت البنت واستخارت والحمدلله وافقت وعقاب رجال ويستاهلها
ابو ناصر: والله يقدره يحفظ الامانه
الكل: امين
بدوا يتفقون على المهر لكن صدمهم عقاب اللي قال: وانا يا عم ابي الزواج والملكه مع بعض وابيها بعد اسبوع
تجمدوا كلهم وصاروا يناظرون عقاب وكل واحد يناظر الثاني
همس خلف : انهبلت انت اسبوع وشو!؟ محمد: انهبل ذا
اما عقاب كان يدور اي شي يشغله لاانه خلاص يحس ان وعد اخذت حقها كامل من هالصراع وكفايه عليها اللي سواه مبارك بها وماعاد يبي يزيد هالبلاوي ومن وجهة نظره انها عقلت ورضت بمصيرها
وهو هالايام خاااف ان خلف والكل يدرون باللي يسويه وكان بيخسرهم وهو ابد مو مستعد لهالخساره ويبي اي شي يشغله عن وعد اخذ نفسه بهدوء وقال : انا مستعجل
ابو ناصر: ما كأنه بدري وانا جدك
عقاب : شوي لكن يمكن تجي لي مهمه وابغى اتزوج قبلها
جد وجد: امورك جاهزه ياولدي!
عقاب : كل شي جاهز والمهر بكره بيوصلكم ان شاء الله
محد عرف يرد على عقاب او يقنعه يأجل وسكتوا واضطر الجد انه يوافق بما ان وجد موافقه
وكذا انتهى الكلام وقرروا يرجعون والزواج بعد اسبوع
_______________________.
في طرف جديد
عند وجد اللي كانت انسانه انقياديه ومن الظروف اللي مرت فيها كانت تتأثر بأي راي وكانت على نيتها وكل شي ينقال لها تقول تم
كانت جالسه مع خوات عقاب تعرفهم اسم لكن من زمااااان ما شافتهم وتتذكر عقاب لكن مو مره لكن على مدح جدتها وافقت
بعد ما الكل راح جاء جدها وسلم وجلس ببتسامه :كيف مشت اموركم !
جدة وجد : اووه كل شيٍ زييين
الجد : عاد عقاب مستعجل
ناظرته وجد ببتسامه خفيفه وهالاسم الغريب بيصير مربووووط فيها ويالله كيف تبي تتقبل لكن كانت مبسوطه انها بتتزوج
جدة وجد : وش قاالك!؟
الجد:يقول عنده مهمه وخاطره يتزوج قبل ووده يكون العرس بعد اسبوع
شهقت وجد :بدري ياجدي
الجد : يابنتي الرجال بيجيب المهر بكره ويمديك
جده وجد : يابنيتي بسييييطه وعلى مايقول المثل خير البر عاجله وكل شي ملحوق اهم شي التوفيق
سكتت وجد ما تدري وش تقول وش تعترض عليييه لكن بدا لها الموضوع بسيط وينحل وخصوصاً انهم مايعترفون بالفترات الطويله من الخطوبه
_______________________. .
في بيت مبارك
وصلت وعد وهي كارهه البيت باللي فيه لكن تحاول تتقبل وتكابر
جلست بتعب لكن فزت على يد مبارك على كتفها وابعدته بضيق
مبارك: افا يا وعد وش فيك!؟ وعد : مبارك ابعد احسن لك ترا للحين ما نسيت للي سويته
مبارك:انتي اللي اجبرتيني ! وفالنهايه فعلتك لا ترضي الله ولا ترضي خلقه
وعد : اذا ما ودك بالمشاكل ابعد عني فتره لين اقدر اتخطى هاللي سويته
صد مبارك بضيق وتركها
ووقفت وعد بهدوء وهي تراقب الوقت اللي بيجي فيه موعد دوام المعهد وتطلع له
_______________________.
ومن هاليوم وخلال هالاسبوع
انتشر خبر زواح عقاب اللي كان حاط حييييله في تجهيز نفسه وبيته اللي اخذه وكان بجنب بيت جده بالضبط وكان عقاب مايخلي لنفسه فرصه يفكر في حياة وعد وكان مايحتك في مبارك ابد ولا مبارك يحتك فيه ..
وخلف اللي طول هالاسبوع يحاول يتكلم بموضوع حوريه بس كان مشغول مع عقاب وبنفس الوقت مايبي يسوي مشكله بهالوقت بذااات
وكان ينتظر ينتهي زواج عقاب وبعدها على طول ينتهي من مسأله حوريه وبعدها يخطب على طوووول لانه خلاص تعب من انه كل ليله يحلم باليوم اللي يجمعه بليلى ومن خوفه انها تطير منه ... بالنسبه لضاري رغم الزعل اللي يحسه بصدره اتجاه عقاب واللي تقريباً يحمله ٥٠٪ من رفض مضاوي لكنه ما تخلى ابد وكان يساعد عقاب اللي خفت حدته مع ضاري كثييير وكان يحاول يتجاهل موضوع مضاوي ويفكر فيه بعدين ... نادر اللي شبه استقر هو وشوق في بيتهم الجديد ومر عليه الاسبووع برضا تااام وسعاااده
ومع ذلك كان واقف مع عقاب ويساعده وشوق تروح للبنات وتساعدهم لان قرار عقاب المستعجل سوى حااالة استنفار ... بالنسبه لوعد في هالاسبوع كان الخبر المفررح لها ان عقاب تزوج وبتفتك منه ومن حربه لكن حزنها على زوجته المسكينه اللي بتعيش معه ومع عقله المريض
لكن الفايده الوحيده لها من زواجه ان مبارك انقطع تماماً عن عقاب وتغيييير بشكل ملحوووظ اجبر وعد انها تستحي على نفسها شوي وترضى وتكمل زواجها وبنفس الوقت شروطها قائمه ودراستها بالمعهد بعد ... أما ليلى
اللي بما ان امها صارت تررووح وتجي على بيت القايد كثيير صارت تروح معها وصارت تساعدهم لكن الشين في هالاسبوع انها ولا مررره صادفت خلف وكانت تسمع من اخواته انه يطلع الفجر ويرجع اخر الليل ومشغول مع عقاب ... العروسه وجد كانت مثل الفراشه وهي تجهز لزواجها وبنفس الوقت خايفه من الجاي ..
ومن عقاب اللي ماتعرف عنه شي ابد الا أقاوووويل ينقلونها عنه لكن كانت تدعي ان الله يسخره
... في طرف بيت الجد قايد
كانت حالات الاستنفار معلنه من خوات عقاب وعمات عقاب واهله كلهم
ومع هالقرار قدرت سحر تنسى شوي من همها لكن طالما إن تسمع عن وقفة خلف مع عقاب كان ينعصر قلبها بحسره
ومو بس سحر حتى مضاوي نست همها ونست ضاري وصارت مشغوله بعقاب وبهالسبب بدت علاقتنا تتحسن مع خلف شوي ... والبقيييه تحت نفس الظروف والاستنفار
_______________________.
يوم زواج عقاب
هذا اليوم اللي ماقدر عقاب انه يصحى من فراشه ويقوم يدري ان بيته جاهز وكل الامور مضبطينها الشباب
لكن نفسه والتردد لي فيه ماعرف يجهزها او يحلها انسحب اللحاف عن وجهه بثواني وغمض اول ما اخترق صوت محمد وخلف اذنه : ييلاااا اشغلتنا بعرس وبعرس ويوم العرس نايم قممم مافيه وقت
عقاب : كنه بدري
محمد : ماعاد بدررررري يا عريس ما عاد بدري
دخلوا عزوز فيصل وهم مصدومين : ايييه اييييه قل هونت قل هونت وسلفني الموضوع عنك
ضرب خلف فيصل: وللللد اعقل
فيصل : وانا صادق
عزوز بضحك : اذا ودك تهون ياعقاب ترا الموضوع مناسبني ترجع عند خواتي وانا اتزوج عنك
فز عقاب : افااا ياقليل الخاتمه انت وياه هذا وانا حييي تناتفتوني لو اني ميت وش بتسوون
ضحك عزوز: ابد عني ما اخلي زوجة اخوي وعياله لحالهم
فيصل بضحك: ووظيفتك ازهلها كأنك تداوم
محمد :هههههههههههههههههههههههههههههههههههههههههههههههههههههههه يعني خلاص يا عقاب مت وريحنا
خلف: عسى الله لا يحطني بينكم يامرضى اخلصوا يلاا
محمد : عقاب يلا نبي نلحق الحلاق وورانا شغل يلا
عقاب : طيب يلا
جات مضاوي مبتسمه : جهززززز فطور العريس واخر خدماتي له
عقاب : مالك لوى يا حبيبتي خدماتك لي مجبره انك تكمليييينها ترا للحين ولد اخوك انا
ضحكت مضاوي: ايييه ايه يصير خير
خلف : عجل يا ولد يلا
نزلوا العيال ينتظرون عقاب وطلع خلف متجهه لبيتهم وهو صار يجيبه غلقه وضيق من شوفة حوريه كل يوم
وقف وهو ينادي: يا ندى ندىى
جات ندى تركض وهي في عز حوستها عشان تجهز لزواج : سم
خلف : جهزت ملابسي
جات حنان تركض : اييييييه جهزتها من بدري وهذا هي بالمجلس
خلف :يعطيك العافيه يارب
اماني : ما بتلبس هنا
خلف : لا لا بجهز مع عقاب ونجي مره وحده
ام خلف : الله يستر عليك يمه وانتبه لنفسك
خلف : ابشري
صدت حوريه بقرف: عشتوا كبر التيس وتقوله انتبهه
التفت خلف بهدوء وقال: اسمعيني زين تراي بالع الموس عليك وساكت لكن ماعليه يومين بس يومين وبتعرفين وش بسوي .
