رواية عرين الصياد الفصل السادس والعشرين 26 بقلم شذرة العدوان

الفصل 26

رغم المرض والتعب بارت طويل لأحلى متابعات

وتدللون عليه

‏" ما بين سوء الفهم، وسوء التصرف وسوء الظن تلاشت أعمق العلاقات وظُلم أنقى الأشخاص”.

بقلمي شذرة العدوان

امل : اسولف وشفتي ترجف اسألهم وما اريد جواب

مثنيه بالگاع واعصر بأديني وادحگ على عماد

واحجي بداخلي لا عماد لا تگولها عرفو بمهره وحامد دخيلك ربي

فضيحه وموت بنفس الوكت

صبره گامت تلطم وعمتي معاضد لازمه رجلين عماد وتوسل بي يحجي

يا حامد النذل انته طلعت وراهه صرخت ولطمت على وجهي هسع نحزن عالماتو لو الي راح يموتون تربعت بالگاع وگمت ابجي واضرب على رجلي

عاط بيه عماد بتعب

عماد : كافي امل الي بيه مكفيني صوتج منا الناس

امل : شلون بينه عماد شلون بس فهمني شصار بروح ابوك مو حيلي نهد وين جنتو مختفين وشنهاي هاي حالتكم ومنين عرفت صياد لزم حامد

عماد : احنه جنه محجوزين عد صياد كافي امل تعبان وروحي تريد تطلع

امل : گالها ومدد عالصبه ولزم راسه

ظليت فاتحه اثمي ولزمت گلبي اريد احجي بعد ما اگدر انبهتت

وگامت صبره تلطم وتصيح تريد تعرف شكو

عماد ساكت وما حجه

وحميد گعد وجان يلزم راسه ورجه ضهره عالدنگه ويگوم يحجي

حميد : جنت بالنجاره واجه عماد وتكاونه فاككونه الناس وهجد كلشي فتت جوه اسوي جاي لجم واحد ظلو يمي وعماد جان گاعد بره طلعت شايل الجاي

وطبگن يمنه سيارتين ملثمين وشايلين سلاح

ارهنو الكل واخذونه بس اني وعماد شدو عيونه وجتفونه وساكتين كلمه ما حجو شگد ردنه نفتهم شكو محد حجه

الطريق طويل ومتعب السياره تشيلنه وترجدنه

تكسرنه تكسر عبالك نمشي على حجر

بعدين وگفو ونزلونه منها حطونه بمكان بس ما نشوف شي اخذو فتره وسمعت الباب نفتح

وشخص لزم راسي و شال الربطه عن عيوني

وعن عماد

دحگت علي جان واحد من الي اسرونه طويل وكتوفه عراض ولابس اسود من ساسه لراسه متلثم وحت عيونه حاطلهن فحام على جفونه وجوه عينه ما يبين منه شي ولابس جناد تارسه اسلحه عبالك جلاد

ادحگ حوالي نظرات خطف احنه بحجره مبنيه بلبن طين مسگوفه بجسور خشب و مفروشه بحصيره

وبيها فانوص مشتعل يضوي معلگ بالعامود صاير بنص الحجره

ماكو شباك بس طاگه زغيره ما تفوت البزون وحاطلها سيم ادحگ منها الدنيا ليل هندس

راح يمشي بثبات وخطواته ما الها صوت رغم ضخامته يسوي من عندي ثنين

واگف بالباب وناده ناوشوني الصينية

ناوشو الصينيه من الباب وجابها حطها گدامنه

طلع خنجر من الجناد وجان يگطع جتافنه

وگال تگلطو اكلو مزال الأجل حار

جان جايب مشاوي

راح گعد على صندقجه

بعيد عنه وگال اخذو راحتكم يالله اعتبروني ما موجود وتعشو لا تستحون

ادحگ علي شلون ما نعتبره موجود وهو ماخذ نص الحجره وشوفته تگطع النفس وانوب يگول لا تستحون احنه مو مستحين احنه ميتين

جمعت قوتي وسألته منهو انت وليش جبتونه هين

ما جاوبني شايل شاجور ويعبي بي فشگ

حطه بصفه وجان لزم الخنجر ويسن بي ولا عبالك حجيت ويا

تشاهدت بداخلي واكلنه رغم محد اله نفس ولا جوعانين

دحگ علينه اكلنه شويه ويلح الا ناكل انوب

گناله شبعنه والله اجه شال الصينيه

وگال تردون گهوه لو جاي

ظليت صافن اني سامع هالصوت وهاي اللهجة والله مو غريبه ونبرة الصوت

رجع كرر السؤال

گهوه لو جاي گناله جاي وراح جابلنه

شربنه الجاي گال تحتاجون شي بعد

گناله لا راح جاب سراحية مي وحطها يمنه وجابلنه جگاير ونفاضه مصنوعه من الطين الحري وراح

گمنه ندخن وما حجينه شي لا اني سألت عماد ولا هو سألني شويه وجان يصير صوت بالحجره الي بصفنه مدري صاله ما ندري شنهي هاذ المكان بس نسمع صوت

راح من يمنه وسد الباب وراه

وبلش صوت الصياح يرج رج

گمت وگفت بالباب احاول اتصنت بلكت افتهم شي

جان واضح جاي يعذبون بناس

جلدوهم جلد ساعه كامله ردت اموت شفت شريط حياتي كله وعماد گاعد ما تحرك ويدخن

واني ردت اموت لابت روحي الحجره ما بيها منفذ واحد ينهزم منه ولا جاي نفتهم شي گطاعين طرق هذول شنهي سالفتهم وليش اقصدونه من دون البشر معقوله يريدون فلوس اذا يريدون بيتنا وكل ما نملك مستعد انطي بس يرجعونه

گمت ارجف صوت التعذيب والصياح بعده يرن بأذني

انفتح الباب بساع وجان يفوت عبالك ملك الموت شايل وصله ويمسح ادينه من الدم لگاني واگف يم العامود گال تحتاج شي

جاوبته لا تسلم ورحت گعدت يم عماد

ورجليه تختض

وهو ما حجه وجان يگف بالباب گال جيبوهم

طبو زلم ملثمين من جماعته ويسحلون بثلاثه

مكسرين تكسر ظال شي قليل من ملامحهم الموت اهون عليهم من حالتهم هاي والذله الي همه بيها

ركعو يم رجله ويتوسلون بي يرحمهم حت بسطاله باسو

لگحهم گدامنه وگال تعرفونهم

ظلينه اني وعماد واحد يدحگ على واحد

بعدني ما حجيت وجان يگول لجماعته رجعوهم.ما يعرفونهم

واحد من جماعته گال بس يا اخونه بعدهم ما حجو

يجوز يعرفونهم

صد علي وخزره بنظره خلا ما يندل الباب دعم العامود وراح

ظل الجلاد يمنه واحنه على صدمتنه وهو گاعد عالصندقجه لازم گصته ضرب رجله وجان يطلع

شويه ورجع حطلنه فراش گال نامو ورتاحو و اذا تحتاجون حمام شي دگو الباب اني نايم وراه هاذ الحايط

طلع وسد الباب وراه

وجوده يضيگ علينه النفس

ما ندري الساعه بيش ولا ندري شصار

وبس نسمع حجيهم بصفنه وما نفتهم عليهم شي لاجين وكلها تسولف حاولت اروح اتصنت وما گدرت خفت يرجع انوب

للصبح واحنه نلوب

وثاني يوم جابلنه ريوگ وخدمنه يجيب ويحط گدامنه

گلت نريد الحمام

گال تم يالله مشينه وراه ونطلع من الحجره تلگتنه صاله هم مبنيه طين بنصها مدخنه وبيها شباك

واكو بداخلها باب يمكن حمام عبن بالباب معلگه مراة وخاولي وداگين گلاص نايلون بالحايط محطوط بي فرش اسنان ومعجون وبسمار بالحايط معلگ علي خاولي وكتابه جبير مكتوبه بالحايط بصبغ اسود

اخر ثلاث حروف ما گدرت اقراهن عبن داگين بسامير بالحايط معلگين ملابس مغطيه الحروف جانت الكتابه عرين الص

وجانو زلم من جماعته بيهم الي امدد وبيهم الي بعده نايم من شافونه گامو واحد وگع لثامه وغطه وجهه بساع

دحگ بنظرة خوف على هاذ الجلاد الي واضح هو الرئيس مالهم

وهاذ الجلاد حاط ادينه وره ضهره وبهدوء جاوبه بدون ما يحجي هذاك الي وگع لثامه

گاله ميخالف وذا وگع لثامك محد يعرفك

يالله گعد الربع خل يتريگون

الولد نزل لثامه جاوبه ببتسامه

گال هسع اخونه بس اخبز

ــ گاله ميحتاج خبزت وسويت جاي

رجع ذاك يگعد بالزلم النايمين

اسأل نفسي شجاي يصير رجال شوفته تگطع النفس وشكله يسد الجوع ومبين الكل بالكل هين كل هاذ الرهبه وهو يخبز لربعه ويسويلهم جاي وريوگ لو ادري بي هو الي خبز وسوه ريوگ فلا اكل

دحگت على عماد شفته مستغرب مثلي طلعنه وبالي يم هذول الي عذبوهم البارحه وين صفه بيهم الوكت ماكو ماللهم اثر طلعنه بره واحنه مدنگين نمشي وراه

وادحگ نظرات خطف اريد افتهم احنه وين بلكت نگدر نفلت

انصدمت وظليت واگف بمكاني تربطت

احنه بالصحراء والله بالصحراء يا عالم

اريد احجي بعد ما اگدر شجابنه هين

صديت ورايه عالبيت الي جنت بي جان عباره عن حجره وصاله وحمام وبصفهم مطبخ زغير

وسيارتين طابگات وتنور طين وهاي هي

مشيت ما اندل بروحي وادحگ حوالي وعماد مصدوم مثلي شجابنه عالصحراء نفس ما بيها غير احنه ياربي

وداير مدايرنه سراب حت طير بالسماء ماكو مگطوعه

ادحگ عالرجال واريد احجي ويا ما اگدر

بادر هوه وگال لا تخاف انتو بمكان امن بس المعزب اسلوبه بالضيافة يختلف تحملوني

يقصد نفسه بالمعزب

غير هذني الكلمات حجاهن واشر بيده عالمحمام

وراح گعد على حافة الباب

رجعنه طبينه جوه نفوت من يمهم عادي ولا جن احنه مسجونين وما نعرف مصيرنه شنهي عبن هو المسيطر من كل الجهات حت لو نريد نقاوم وننهزم بأي طريقه شلون نرجع لهنه واحنه ما نعرف نفسنه وين

لليل واني حسبه تجيبني وحسبه توديني

وهم جابلنه عشه بنفسه وحرجنه تعشينه وشربنه جاي خدمنه خدمة مضايف

ما خله شي ما جابه حت بقلاوه

اخر شي جابلنه مي وراح

وراهه هم سمعنه صوت بس بدون ضرب جان يحقق ويع رجال بس گوه يحجي الرجال هذاك

گمت وگفت بالباب اتصنت زين

ــ يگله يعني تريد تقنعني بطحت نفسك على گبرها وتنحب عبن ماتت من وراك وهيه مالها ذنب وانته حاقد عبن طردوك من گاعهم ولفقولك تهمه

شايفني جدامك جاهل يول وتريد تكلكني

صارلك نص شهر على هاي سوالفك وما تفعل تعد الصحيح

حميد :رجعت بمكاني بساع عرفت راح يجي علينه مثل البارحه

وصدگ جان يفتح الباب ويجي گعد تك ركبه ويدحگ علينه

ــ يخوف ويرعب اكبر واحد ما جانت توحي منه اي رحمه رغم ما جاسنه وخدمنه بكل ممنونيه بس شكله يخوف عباره عن سواد ماكو بس بياض عينه يبين قليل حت جفونه حاطلهم فحام اسود

ما گدرت اجابسه دنگت فززني صوته وسؤاله الي ما اعرف اخاف من ايهو منهن گال

ــ :حامد محيسن خلف شيصير منكم

حميد : دنگت بالگاع وابلع بريگي واريد ادحگ على عماد ما اگدر صخنت جاوبه عماد

عماد : ما يگربنه جان فلاح يشتغل بگاعتنه

ــ :هاا وليش جان فلاح هسع هو وين

عماد : طردنا من الگاع عبنه مو خوش ادمي وهسع ما نندله وين

ــ :ليش مو خوش ادمي شسوالكم

حميد : كل ظني عبالي واحد من ربع حامد ويريد ينتقم من عدنه جاوبت قبل عماد وگلت

الناس حجت وگالت مو خوش واطرينه نطرده من الگاع

ــ :صد عليه وگال شحجت الناس

حميد : گالو انه يگطع الطريق عالفلاحات والي يروحن يحشن وبعد سالفه اكبر من هاي

ــ :شنهيه السالفه

حميد : الناس گالت احنه ما شفنه

گالو انه متحرش بطالب مدرسة زغير من حال من دوامه گاطعله الطريق

ــ :وهذول الناس الي حجو شيصيرون منك

حميد : بلعت ريگي عبن الي گالو هالحجايه من خوالي واني ما ادري جذب لو صحيح حجي خوالي

بس جاوبت الي اعرفه عبن ادري بهاذ الرجال كلشي يعرف ويريد يسمع من عدنه

گتله من خوالي الي حجو وگالو

ــ :ها وشسويتو عاد انتو

حميد : ضربته وطردته من الگاع والمنطقه حرمته ما يطبها عبن اكثر من واحد گالي حامد يگطع لطريق عالفلاحات وعيونه على بناويت الناس وما حترم الي اكل يمهم خبز ورتزق من گاعهم

گام بدون ما يحجي وجان يطلع شويه ويرجع ويا ثنين شايلين حامد شيل گمت من مكاني وگفت على طولي انصدمت وادحگ على عماد ردت ابجي من گد الخوف والرعب الي عشته بهذيج اللحظه

جان حامد عباره عن بس اسمه

عرفته على تك عين ظاله عامره ولحيته الي بيها جنب ابيض والباقي مابي شي عمار مكشم ومضمد ومابي حيل ومأيس من حياته نهائي

گعدو گدامنه جان مدنگ وراسه يهتز

بعدني ما خلصت صدمتي من حامد وانصدم بالرجال المتلثم شال اللثام وطلع صياد ابن الشيخ علوان

لا ارادي من شفته انهد حيلي وگعدت بالگاع ارتجيت عالحايط وما حجيت شي

صياد گعد تك ركبه يم حامد ولزم جتفه

وبلش يحجي ويا

صياد : اي حامد نعيد من جديد شعندك رحت على گبر مهره حرمت اخوي مشعل وبطحت نفسك فوگ الگبر وتصيح مثل النساوين وتمرغل بروحك

حميد : جاوبه حامد بس اللسانه ثگيل گوه تطلع السالفه ويرجف جسمه كله يهتز واني روحي رادت تطلع گبل لا يجاوب حامد

حامد : الندم اخذني اترجاهه تسامحني عبن ماتت من ورايه

صياد : وليش ماتت من وراك

حامد : اني الي دليتهم عالعرس واخذت الجماعه وجتلوهم

صياد : ليش سويت اجان

حامد : اني ردت اكتل حميد عبن ضربني وتهمني وطردني من الگاع وخله سمعتي بالطين

والجماعه الي ويايه رادو يكتلونك

صياد : والي صار لا اني ولا حميد متنه واحنه جنه بصف العرسان وهذول الجماعه شعرفك بيهم شلون تحالفت وياهم هاذ الشي شلون تبرره حميداان

حامد : من طردني حميد رحت ادور شغل افتر على اهل الگيعان وصلت يم هذول وشغلوني بگاعهم

لا اعرفهم ولا يعرفوني

وبيوم جنه بالگاع وملتمين كلهم

جيت انته بهذاك اليوم من حدرت من السياره بساع وهجمت عليهم ضربتهم وكسرت خشم واحد منهم

اني جنت موجود ورحت افازع وحت انته ضربتني بوكتها اني جنت متلثم

عاد وراك من رحت گعدو يداوون جروحهم ويغسلون دمهم واتفقو يكتلونك مابيها مجال

گالو انك مثل الشوكه بحلوگهم

وموتك باب فرج عليهم

بس حتارو وين يلزمونك

جانو يسمونك السراب عبن گالو كل ما نگرب منه ونريد نكتله يختفي مثل السراب وبيهم الي يسمونك عزراين گطاف رواحه (عزرائيل )

ظلو گاعدين يدورون حل شلون يكتلونك وين وصارت الدنيا مغرب وهمه محتارين

واحد منهم گال ليش ما نكتله بالعرس مال اخو مشعل

سأل واحد عن تفاصيل العرس ومنين راح ياخذ مشعل

جاوبه گال راح يتزوج وحده ابوها ملا كسنساني

اسمه درويش واخوانها عماد وحميد ومحمد

عاد اني عرفتهم وتفقت وياهم اشاركهم و اكتل حميد وهمه يكتلونك ودليتهم على بيت ابن عمي سنان بصف بيت الملا درويش

رحت گبل جم يوم على بيت سنان ما جان موجود بس امه تحججت عندي غراض ضامهن بالمخزن فوگ

خطيه طردتني گالت ما اريد مشاكل بسببك بس اني لحيت وترجيتها

صعدت عالصطح شفت الوضع والموقع زين

ورجعت خبرتهم كيفو وبيوم العرس رحنه

لگينه بس سنان بالبيت ضربنا ورهنته بالسلاح

اني ما صعدت ظليت جوه ويايه واحد وصعدو ثنين رمو وحدرو گالو كملنه كلشي ونهزمنه عاد

رحنه على مكان ورادو يكتلوني خافو لا انزلم وادلي عليهم بس سمعت حجيهم ونهزمت بليلتها

ما دريت اني الي ماتو همه الدرويش وبنته وابنه محمد واخوك الا من بعد فتره طويله سمعت من الناس

ورحت عالگبر ابجي ماتو ناس مالهم ذنب من ورايه

صياد : بس يا عيني يا حامد الجماعه گالو غير هاذ الحجي گالو انك طلبت منهم يخربون العرس ما گالو ردت تكتل حميد

حامد : هو عتيادي من يموت حميد يخرب العرس مابيها مجال وهمه ما فتهموني زين

صياد : زين انته ليش ظليت جوه ليش ما صعدت وصوبت على حميد همه شمعرفهم بي همه ول حامد اشو اتور بالسالفه تور وتلوص تخسه والله انته ميت من گاعك سولف الصحيح والي حق الحق

ادري بيك جذاب

حامد : مزالي ميت من گاعي عش اجذب وليش

صياد : مدري يجوز ضميرك ما يريدك تحجي

حامد : والي يروح تا يكتل بشر ويخرب عرس وتموت ناس جثيره منيله ضمير اني ما عندي ضمير

صياد : عجل شجابك يم گبر حرمة اخوي

يا حميدان وتنحب مثل النساوين وتذري تراب على روحك يول هاذ شتسمي

حامد : گتلك استخطيتها ما الها ذنب

صياد : توك تگول ما عندي ضمير وهسع تگول استخطيتها زين راح ابلعها والدرويش ومحمد ومشعل عجل شنهو ذنبهم يا حميدان ما رحت يم گبورهم تبجي

حامد : هاذ الي عندي حجيتلكيا وصارلي اعيده ايام

مليت اترجاك اكتلني وريح بالك وريحني

حميد : جنت مصدوم من الي جاي اسمعه مجاي استوعب هاذ حامد الي شوفته الويل هنته وفضحته وضربته هيج جاي يدافع عن عرضنه وجاي ينكر انه عاشگ مهره اريد اجمع الحجي براسي مجاي اگدر ما حسيت على عماد جيت على حامد ويضرب بي

وصياد ظل على گعدته گال لجماعته عوفو خلو يبرد گلبه بالتوالي الي ظلن من حامد ادحگ حامد مابي حيل حت يدافع عن نفسه گامت الدمايه تكت من كل مكان

جريت عماد بالگوه وگعدته

صياد :ها حامد بعد بيك حيل عندي سؤعال اخير

حميد : جاوب حامد واثمه ينزف دم يمكن من معدته

حامد : لا ما مابيه حيل جاوبت على كلشي جدي السابع نبشته وكلشي حجيتلك كافي اكتلني عاد

صياد : اني جاتلك يا حامد عجل اخليك ادحج عليك وانته جتال اخوي وحرمته بس بالي مجاي يرتاح عگده بگلبي مجاي تنحل انته تحجي شكل وجماعتك يحجون شكل

يالله اخذو من وجهي باجر اخلي يزور ربه والحجي الي ضمه حامد يطلعنه بربيجات المي

حميد : اخذو حامد وراحو وصياد تربع گدامنه

لزم راسه عصر واخذ فتره وراهه دحگ علينه وجان يگوم يحب راسي وراس عماد ويتعذر من عدنه

صياد : تعذروني يسباع السموحه منكم

مصيبتكم ازيد من مصيبتي ثلاثه راحو منكم

بس اني يخوان والي بعث محمد بالحق ما غفيت مرتاح من يوم عالصگعه ما يمر يوم اذا ما احلم بمشعل امدد بره الگبر ودمه راگد فوگ الگاع

لابت رويحتي گمت اشك بأخوي ابن ابويه

عبن منين ما اگلبها اشوف نفسي انخنت وانغدرت واكو شي مضموم واني اهون عليه واحد يكتل ابني جدامي ولا يخوني ويغدرني ويضم عليه شي

اخذت سنان وحققت ويا وما عترف انطه غير افاده

هديته رغم ادري بي جذب عليه بس واضح ما عنده ذنب ونغدر مثلي

عاد خليت جواسيس عالمگبره گلبي گالي راح تگضب طرف خيط هين وربك ساعدني وگضبت حامد ينحب على گبر حرمة اخوي غرت والنار شبت بيه هاي اختي وعرضي حرمة الغالي مشعل الي يجوس ترابها اگطع النفس عنه وانعل هيدا

راقبت حامد وعرفت مكانه ورحت جبته

بين يوم ويوم اعذبه واحقق ويا ومصر على نفس الكلام الي گاله گبل شوي بس اني اشو گلبي لايب ومجاي اصدگه گل ربعي واخوتي صدگو واقتنعو بكل الحجي الا اني صدگت هذولك ولد الحرام الا حامد مجاي سوالفه مجاي تخش عقلي

عاد رحت جبتكم وتعذروني عالطريقه شلون جانت انجبرت گلت بلكت احصل منكم خبر يجذب حجي حامد بلكت اكو شي مضموم وحامد من يشوفكم يغير افادته الي مجاي اقتنع بيها مدري ليش ،،،

حميد : اريد اجابسه من يحجي مگدر سويت نفسي اگشط بالجرح على بصبعي گتله وهسع شراح تسوي

رفعت راسي شفته منبت عيونه عليه گال

صياد : قصدك شراح نسوي كلنه الثار ثارنه مو بس اني انتو راحو منكم ثلاثه شنهي ما تريد تاخذون ثار اهلكم

عماد : شلون ما نريد ناخذ ثار اهلنه انطيني سلاح وخليني اكتل حامد هسع

صياد : لا مو هسع باجر ان شاء الله نرجع عالديره

واكتلهم يم گبر مشعل بس انتو اوديكم لهلكم ترتاحون وترجعون عليه راح اعدمهم وره الضهر الساعه 2 وجيبو سنان وياكم

عماد : هاذ هو الي تشوفه

صياد : امنت الله يسباع خوما زعلانين مني

عماد : حت اذا بگلبي زعل راح انته سويت الي ولا الف واحد سواه ما هنتلك عين الا جبت جتال اهلنه وجتال اخوك اني خجلان منك مو زعلان

صياد : ولا يهمك عماد اني اعرف ظروفك شنهي واعرف الحمل الي شايله شگد ثگيل الله كريم تهون وتظل سوالف هسع نامو ورتاحو ولا تفكرون باجر نمشي ان شاء الله ويه شگ الفجر والسموحه منكم انوب

حميد : گالها وراح وصل الباب سألته اخوي احنه وين

وگف وجان يلتفت عالنص گال

صياد : انتو بعرين الصياد

حميد : نمنه وهاط علينه من الفجر صلينه وطلعنه بره

وگفنه يم السيارات وراحو ربعه وره البيت وجابو حامد والي ويا شايلينهم شيل حطوهم بالسياره بدون جتاف

اشكالهم تحجي وتگول اكتلونه وخلصونه جانو گاعدين وساكتين مشينه وجان الطريق يملل حت الزمال منين ما ادحگ صحراء يربي وحت شارع ماكو نهبد بالوديان والجبال هاذ شلون يندل الطريق لا اكو علامه ولا دليل

وساكت ما يحجي عماد صعد گدام واني وراه ويا واحد سأله عماد

عماد : اخوي صياد اريد اسألك من جبت هذول الجماعه اول نوبه وسألتنه اذا نعرفهم بدون ما نجاوب گلت ما يعرفونهم شلون هيج

حميد : جاوب بدون ما يدحگ على عماد

صياد : اول ما فوتتهم عليكم جانت رد فعلكم عاديه مبين ما تندلون السالفه شنهي ومن سعلت اذا تعرفوهم

ظليتو واحد يدحج الأخر وتسعلون بعضكم بالملامح اذا واحد بيكم يعرفهم

عاد عرفت انتو اول نوبه تشوفهم

عكس من جبتلكم حامد عرفتو بساع

حميد : سكتو وعيني عالطريق بالكت اعرف احنه وين ماكو غير جبال ووديان وصحراء مابيها غير العاگول دخت نمنه اني وعماد بالسياره ما حسينه الا احنه اباب بيتنه گعدنه صوته

صياد : يالله حدرو وصلنه

حميد : من شفت باب بيتنه عبالك باب الجنه حدرت بساع حت ما گتله تفضل شخط سيارته وراح

وهاي كل السالفه وهسع راح نسبح ونبدل ونرجع عليهم انوب علمود نشوفه شلون راح يعدمهم علمود خاف ظل بيه شويه روح وحيل يريد ينهيها خلاص

وگال جيبو سنان وياكم

امل :طول ما حميد يحجي بالسالفه واني اعض بملفعي ودموعي تصب هسع افرح عبن حامد ستر على مهره لو ابجي عبن راح ينعدم

يستاهل الي يصيرله لو لا

وشراح يصير لو انه حجه الصدگ وگال عشگتها مهره وعشگتني وما انطوها الي وجبروها على ابنكم يرجعون عماد وحميد سالمين ،،،،

سعاد : ولا بحياتي مر عليه هيج موقف

هاذ اليوم محفور بذاكرتي ولا اگدر انسا

من بعد ما شفت ماجد فات لبيتهم

رجعت بسااع اركض فزعت بركات وغازي بس گلت ماجد رجع طلعو يركضون حافي

طبينه لگينه ماجد بالصاله وليال حاضنته وتبجي وتشكيله عبالك تشكي لأبوها

ماجد مثني على ركبه ومصدوم حت عيونه ما ترمش

وادينه ترجف

تالي انخرط من طوله وگع ولا ايد ولا رجل

صار الصريخ احتاريت على منهو اصد

غازي وبركات يصيحون فوگا حالهم حال النسوان

وشكحه شگت الثوب وخربت فوگا

وليال اخ يا ليال

جانت تصرخ مثل الطير المذبوح

ولازمه ايد ماجد وتوسل بي لا تموت مثل ابويه ومهره

امانه اگعد ماااجد لا تموت

حرت بهذاك اليوم شسوي رافده جانت يم جدادها وبس كريمه وشكحه بالبيت

رحت على شكحه اگلب بيها فقدت المره

وغازي گام يشيل بروحه ويرجد يگلب بماجد ميت لا نفس ولا صوت وشفايفه بيض

استجمع قوته وعاط

غازي : امشي بركات ننقله عالمستشفى تخسه والله راح ماجد راح امشي نتلاحگه

سعاد : سحلو ماجد ما گدرو يشيلونه طلعو بالطرمه وليال تشيل بروحها وترجد تصرخ وتلطم ملخت روحها تگمز

ليال :مات ابويه ماتت مهره ومحمد دفنوووهم اني شفتهم وماجد هم راح يدفنونه

رجع بركات بساع عاط بليال

بركات :وين سويج سيارةصائب

سعاد : ما جاوبت ليال بس تصيح فات هو عالحجره وطلع السويج وطبگ السياره بالباب وگوه شالو ماجد حطو بالسياره

ورجعو شالو شكحه وحطوهم ثنينهم وره

ردت اروح وياهم ما خلوني

ليال لزمت باب السياره تريد تروح وياهم جريتها گوه حضنتها وفوتتها جوه ثنت بالصاله وگامت تصيح صوتها ودموعها تشگ الگلب يربي

اجه صائب ينشف بشعره جاين يسبح بالحمام الخارجي شاف ليال مثنيه وتبجي وكريمه تصيح يم الدنگه بالطرمه اجه يركض يم ليال

لزمها من كتوفها مستغرب ويسألها

صائب : شبيج ليال منهو وياج احجي شبيج

ــ ما جاوبته ليال بس تصرخ وتسد اذانها بأيدها

وتهز براسها

سعاد : عجل ما سمعت الصياح وصل للشارع

دحگ عليه مستغرب وفاتح اثمه

صائب : صياح شنهي اني احط گطن بأذاني من اريد اسبح كلشي ما اسمع شكو شصاير شبيها لياااال

احجو

سعاد : مستمر يحجي وجان تجي عينه على جنطة ماجد العسكريه ونضارته ظلو بالمكان

عگد حواجبه وجان يگوم يتلفت

صائب : ماجد هين وينه

سعاد : اي جان هين وفقد الوعي وامك هم وگعت فوگا ونقلوهم عالمستشفى بسيارتك

صائب : طبه مرض فوگ مرض حشه امي

سعاد : ظليت مصدومه من رد فعله وجاوبه

گالها واخذ ليال فوتها جوه بالحجره يسحل بيهاوهيه تشاهگ

ظليت متصنمه بمكاني شنهي من گلب عندك

شويه وطلع فات من يمي يريد يطلع بره

ما گدرت اتحمل رغم ادري بي يعرف بس لازم يسمع مني بلكت يتندم

گتله اخ صائب اواش احجايك اذا تسمح وگف بدون ما يلتفت وگال

صائب : تفضلي خيتي

سعاد : اعصر بأديني وابلع بريگي گوه طلعت مني

اسمع اخوي والله والله الي راح احجي كله صحيح وشفته بيني بهذاك اليوم والله ماجد ما خانك والله جان سكران ما يندل بروحه وگاعد بره فوته غازي جوه سحله سحل

طبيت بوكتها عالهول تا اخذ سكاناتكم للعزيمه

وشفت نضال وهيه الي جانت

سعاد : گلتها ودنگت ما گدرت اكمل الحجي والله صعبه

بس صدمني جاوبه صد عليه وجان يگول

صائب : اسمعي يا سعاد انتي البارحه جيتي

ما تعرفين ماجد شنهي من بشر ماجد عباره عن كتلة نذاله وحقاره اني حجتلي رافده من البدايه وردت اصدگ بس عگب الي شفته بعيني وسمعته من نضال مستحيل اصدگ غير الي شفته وماجد خاني وغدرني واني حاقد علي ليوم الدين وذا يطب هاذ البيت ابتلي بي وخل تگول الناس صائب جتل اخو

اني اعرف اخويه شنهو طينته يا سعاد

وشلون نظرته للنسوان ما يوفر شكو وحده تحله بعينه

اترجاج بعد لا تحشرين نفسج بحياتنه خليج خارج قوس شتشوفين شتسمعين معليج انتي

سعاد : خنگتني العبره وغورن عيوني ياريتني ما حجيت رجعت البيتي وگعدت بحجرتي وظليت ابجي

هاذ صائب قافل لو تطبگ العرب ما يصدگ غاسله مخه نضال الرخيصه خلته يفرط بأخو

امل : جهزت الحمام لعماد وفات يسبح

وطلع مورم العيون جهزتلهم اكل وما فعلو ياكلون هو وحميد ظلو صافنين لحد ما حميد گال

حميد : هسع شلون نروح لو لا صارت وحده ونص يادوب نلحگ صياد گال اريدكم عالساعه 2 وهاذ سنان گتله وما يفعل يروح يگول خل يكتلونه حامد يستاهل بس ما اريد اشوفه

امل : جاوب عماد بتعب وصوت مخنوگ

عماد : نروح گوم يالله

امل : حجوها وگامو ادحگ عليهم مجبورين عالروحه

صحيح هذول جتالين اهلهم بس احنه ما متعودين عالثارات ولا بحياتنه شفنه قصاص الثار

ظليت وراهم ادعي والوب وصارت ب6 وهمه ماكو واتصلت فاتن ومثل كل نوبه اجذب عليها لحد هساعه ما تدري بليال تزوجت

قررت بس يجي عماد نروحلها عالبيت ونفهمها

سعاد : صارت 7 المغرب وغازي ما منه خبر الوب بالبيت شصار وياهم يربي

دحگ التلفون وركضت بساع جاوبت

طلع غازي صوته تعبان گوه يحجي ويشاهگ

غازي : ها سعاد شلونكم

سعاد : احنه شلونه لو انتو يا غازي احجيلي ابن عمك شلونه خوما بي شي

غازي : اخ يا سعاد شحاله ماجد لا يصد ولا يرد فاقد ودگات گلبه بطيئه ثلاث دكاتره ملتمين علي ما يفعل يصحه گالو ما بدينه شي سوينه اللازم وظلت يم الله

ماجد صارت بي غيبوبه يا سعاد

سعاد : يمه شنهي غيبوبه يا غازي

غازي : شمدريني يا سعاد هاي الدكتور يگول ترسو جسم ماجد اجهزه لو تشوفينه يقهر ماجد الحيد هاذ مرتمي عالسديه مثل الميت

سعاد : گام غازي يبجي

الله يشافي يارب كافي تبجي وتشجع لخاطر ابن عمك وشكحه شلونها هسع

غازي : عمتي شكحه زينه صحت بس انطوها مغذي ترتاح وحطولها مهدئ ورجعت نامت

سعاد : يعني اليوم ما تجون

غازي : شيجيبنه هسع ديري بالج على نفسج ولا تطلعين بيت صائب ممنوع اطبينه هالنذل زعم ما دره شصار ولا لحگنه بسيطه اله بس خل ماجد يطيب

سعاد : سده غازي ورجعت الوب شلون عائله تشتت بسبب سوء تفاهم الله يهدي النفوس هم يجيك يوم يا صائب وتندم

زين ليال شحالها هسع گلبي يمها

امل : صارت ساعه 9 بالليل واني افتر بالطرمه ما تعشيت گلبي يم عماد وحميد اشو راحو من الوحده والعلم بيهم ادحگ عالباب وگلبي يطرد سمعت سياره طبگت بالباب والضوء مالها يبين من جوه الباب

لزمت الدنگه اعصر بيها وادعي اخذو فتره

عاد انفتح الباب وفات حميد والسياره ظلت طابگه

وصل حميد يمي وجهه اصفر سألته وين عماد

حميد : واگف يم صياد هسع يجي

امل : گالها وفات جوه يسحل بروحه

ظليت واگفه بمكاني مشت السياره وفات عماد سد الباب وراه تلگيته حضنته حط ايده على جتفي وطبينه جوه

جانت عمتي معاضد بحجرتها تقرا قرأن فات عليها باس راسها

مثل الي جانت ميته ورجعتلها روحها حضنته وگامت تنحب وعماد گام يبجي وياهه

ما سألته شي عبن وجهه جان ما يتفسر ومبين شايف شي فوگ طاقته وتحمله ولا عمتي معاضد سألت

حط راسه على رجل امه وادينه على عيونه

وهي گامت تمسد على راسه وتقرا

مسحت دموعي وعفتهم براحتهم

رحت على حجرتي وصليت ركعتين شكر لوجه الله

انتظرت عماد وما اجه نمت وعفته براحته

والصبح گعدت على صوته

فتحت عيوني شفته يلاعب بعلاوي ويعضعض بي

ابتسمت الحمد لله مبينه نفسيته زينه ادحگ الساعه 6 الصبح

گمت خبزت وسويت ريوگ للفلاحين

اخذه عماد ودا ورجع سويت ريوگ النه

حميد ما گعد راحت صبره تگعده وما يفعل يگعد قفل على نفسه الباب

التمينه تنريگ وادحگ صبره تلوب تريد تسأل عماد شصار من راحو البارحه عماد جان يوكل بعلاوي وهو ياكل بدون نفس نوبات يصفن نوبات يرجع يحجيله كلمه ويسكت بس عينه ما تجابس احد

صبره : وليدي عماد شصار وياكم من رحتو هاذ حميد البارحه فات ما يتحاجه سألته ونتر بيه

امل : صفن عماد يدحگ عالگاع وجه صار اصفر

فرك گصته وشرب مي شبك اصابعه ورجع على صفنته اخذ فتره وجان يحجي

عماد : رحنا منا طبينه على بيت صياد لگينه نص امة محمد غادي جمهور ماله عدد كلها زلم السيارات واصله عالشارع شافنه عزت اخو صياد وگال امشو جوه گوه طبينه عبالك ثوره يمهم

وصلنه ساحة بيتهم وشفنه صياد بعده بنفس ملابسه السود وشكله المرعب واگف وصاف حامد والي ويا مثنيهم على ركبهم ويحجي للناس جريمتهم الي سوهه

اجو اهل هذولاك الجماعه وركعو يم رجل صياد وگلوله شتريد بدال دمهم ننطيك بيوت گياعين سيارات نسوان اطب بنفسك وختار

وگف صياد بنصهم

صياد : والله لو تملكلي الدنيا لو تنطيني الف بنت لو تنطيني بنات السلاطين وبنات الملوك محد يوفي دم اخوي مشعل الي وريتو گلبي علي

العفو عن الظالم خيانه للمظلووووم

عماد : دحگ علينه واشر بيده علينه

صياد : شنهو ذنب هذول الزلم ماتو ابوهم واخوهم واختهم الي هي حرمة اخوي بسبب هذول الي دافعهم الوحيد هو الطمع والحقد

كل عداوتهم ويايه عبن انطيت گاعي ملكي في سبيل الله للناس يسترزقون منها يصيدون براحتهم بگاعي الغرگانه يولو الگاع گاعي والمي والسمج ملك الله يجون هذول الأنذال يطردون الناس منها ليش

منعتهم يطردون الناس من گاعي ومانجرو التافو انوب عالگاع الزراعية الي انطيتها للفقره يزرعونها ويسدون جوعهم منها گطعو المي عن الزرع مالهم وموتو وهددوهم محد يحجي عيشو الناس بذل وبهدلوهم

هذول سلابين گطاعين طرق هذول فاسدين شبعانين خبز ومو شبعانين تربيه وجتلهم حلال

لو مربين ولدكم زين مجان صرتو بهاذ الحال توسلون لجل حياتهم

هذول الموت عليهم ستر

والله ما اعفي عنهم من يغيب القصاص تهون الأرواح يربعنه

يقول الله تعالى《وَلَكُمْ فِي الْقِصَاصِ حَيَاةٌ يَا أُولِي الْأَلْبَابِ لَعَلَّكُمْ تَتَّقُونَ》

واني ما اتنازل عن القصاص لأخوي وحرمته

يا اما ترضون بالحد يا اما عليكم غضب الله

وتظلون تحت حكم الصياد للمات اهججكم من ديره لديره ما ارحمكم شغلي الشاغل يصير انتو

اضيگ عليكم النفس ما اخليلكم اثر اور بيوتكم واكتل شكو واحد يگف بطريقي واخلي تاليكم مره تمشي من ديره لديره تحجي بقصتكم من جيل لجيل

عماد : گالها واخذ الجتالين سحل حطهم بالسياره

ومشو عالمگبره واحنه صعدنه ويه عزت ونمشي وراهم والسيارات ورانه مالها عدد رهبه وخوف محد تجرا يحجي كلمه كلها وافقت على قرار الصياد

وصلو المگبره ونزلوهم سحل صفهم يم گبر مشعل وطلع الرشاش وربدهم اربعتهم سال دمهم عالگاع الناس انبهتت من هول المنظر وصياد دنگ على گبر اخو وباس ترابه

گام وهو كله تراب

صياد : اخاف تگولون صياد ظالم وما عنده رحمه هاي اني راح اخليكم تدفنون ولدكم وتسولهم فاتحه يالله كلمن ياخذ ابنه ويروح

عماد : راحو الزلم بساع شالو ولدهم من الگاع حت ما گدرو يبجون من الخوف

وحامد جانو عمامه ثنين موجودين الضاهر صياد دز عليهم اخذو حامد وراحو

رجعنه احنه على بيتهم واني وحميد لو كلمه ما حجينه نريد نستوعب الي شفنا

تفلشت الناس وكلمن راح البيته

وظلو بس عمام صياد ولد عمه الشيخ جلب بيهم تا يتعشون

اول ما طبينه البيت وحدر صياد من السياره تلگته ام مشعل وهلهلت وطشت فوگا جگليت وحضنته باس راسها وباس ايد ابو وفات جوه

واحنه اخذنه عزت عالمضيف گعدنه ويه الشيخ علوان جان گاعد محاوطينه جهال زغار ويلاعب بيهم ويضحك ولا جن ابنه گبل شوي ربد العالم

جابولنه مي ايدي ترجف المنظر مجاي يروح من بالي المي تكبه مني

مرت ساعه وصياد ماكو وكل ما نريد نروح ما يفعل يخلونه اخوانه گالو بس يجي صياد اصبرو

اجه صياد بس عباره عن شخص ثاني عرفنا من طوله وسماره

مخفف شعره ولحيته ولابس دشداشه وغتره بيض

عبالك عريس فات وهو شايل ابنه ولا جن مسوي شي

واخوانه وولده وراه يمشون صف يگوم صياد يگومون ويا يگعد يگعدون عنده ثلاث ولد گصه وحده الي يشوفهم يگول اخوانه وكل شوي يجي ولد يگولون هاذ ابن صياد عديتهم الي شفتهم 9 ولد وگالو عنده انوب ما شاء الله

گام صياد هوه وصبنه گهوه بيده

وگام يحجي ويه اخوانه بأمور الشغل ويقنع بيهم تا يعرسون مزال صفو الحساب

جلبو بينه عالعشه ما خلونه نرجع

طلعنه بره نتمشى ويا صياد جابوله السجين وجان يشمر اردانه ودشداشته وراح ذبح الخرفان ولا خله قطرة دم تجوس دشداشته وهو لابس ابيض من ساسه لراسه وين صياد البارحه جان عباره عن جلاد

وين صياد اليوم الي يشوفه يگول ملاك الرحمه

جابو العشه وگعد يمنه يفتت لحم ويحط گدامنه ويحرجنه ناكل ويسولف ويه اخوانه

وشيگول ردوله تم هيبته جانت ماخذه المضيف بكبره شربنه الجاي وگمنه عاد وگف ويانه

صياد : ما بخاطري تروحون بس اعرف ظروفكم شنهي امشو اوصلكم وان شاء الله تنواجه جثير منا وغاد بس بغير هاي الظروف هالنوبه تنواجه بالخير والمسره ان شاء الله

امل : احس گلبي برد وحمدت ربي وشكرته وان شاء الله يرتاح بال عماد

وحامد انقهرت علي الله يرحمه ويغفرله كلشي من ايده

سعاد : گعدت الصبح على صوت التلفون

جاوبت طلع غازي بعده صوته مخنوگ وگوه يحجي

غازي : ها سعاد شلونج اهنه شلونهم

سعاد : الحمد لله والله احنه زينين احجيلي عنكم انتو شحالكم يا غازي شصار ماجد شلونه

غازي : شحالي يا سعاد شحالي هاذ ماجد ما يفعل يصحه يولي تخسين يا سعاد بس لا يموت ماجد اويلي عليك ابن العم

يتبع…