رواية عرين الصياد الفصل الثالث والعشرين 23 بقلم شذرة العدوان

ماجد

من زفو المحبوب وكت المسية

ذاك رمي الچيلات تمنيتة بيه

زفوها ولزافوف مر على بابي

عمري نكلب سبعين واني بشبابي

ليال : من يوم الي راح ماجد والضوجه ذبحتني اني جثير مشتاگتله نوبات يتصل واحجي ويا يگلي شتريتلج ملابس وللعابات وشفتلج احلى مدرسة راح تدرسين بيها

وسمعني اغاني حلوه گال هذول جبتهم الج كاسيتات نزلو جديد واخذتلج مسجل اكبر من ذاك الي عندج

كيفت وگلت بس اروح ويه ماجد كل غراضي انطيهن لديالا حت ملابسي شلي بيهن ماجد يجيبلي غيرهن

وكل اتصال يختم كلامه احبج ليال لا تخلين احد يخربج عليه

وبيوم بالليل اجانه خطار عمام استاذي صائب وما طلعت ظليت العب محيبس ويه الجهال اجت امي مريضه وتعبانه گعدت يمها افرج رجليها لحد ما غفيت ونمت

الصبح گعدت وامي وامل مدري شبلاهن حت ريوگ ما تريگن وللضهر وهنه نفس الوضع وبس يدحگن عليه

طبيت عالحجره اعزل بملابسي وجان تجي امي تقفل الباب عليه وگالتلي ديري بالج تطلعين ظلي يمي

حضنتني گلتلها يمه والله طبت ومعد انهزم ليش قفلتي باب الحجره اندگ الباب شويه وامي ما فعلت تفتحه واندگ ثاني نوبه قوي ويا صوت حميد يتهدد ظلت امي لازمتني وتبجي لحد ما حميد كسر الباب وفات جرني من حضن امي

طلعني بالصاله واني اريد افتهم شكو شسويت اني گال اسمعي ليال انتي راح تزوجين استاذ صائب هسع

انصدمت وگمت انگز هزيت راسي لا والله اني اريد اتزوج ماجد مو معلمي وحاول اهد ايدي منه ضربني راشدي

وكمل عليه ضرب ودفرات صگطني اثمي گام يطلع دم گمت اصرخ وسد اثمي وعاط بأذني اذا ما اوافق يذبحني خفت اني ما اريده يضربني گتله اي اوافق بس كافي تضرب

جانن امي وامل ميگدرن يفكني منه اجاهن نص الضرب عبن فزعلي وگفت وجان تعدلني صبره وترجع شعري لوره وگبعتني بالملفع وفتت عالهول اشاهگ وحميد يرص على ايدي يريد اسكت

شفت ست رافده وامها هم گاعدات ويبجن

ويمهن استاذي جان گاعد بثبات ويحجي ويه الشيخ

سألني الشيخ انتي موافقه ما عرفت شحجي ادحگ استاذي مدنگ ويعصر بأدينه صديت على حميد اريد اطلع

رصني من ايدي قوي وجان وافقت

وطلعت حميد گال اني وكيلها وگفت بالصاله وشلت الملفع عن راسي ادحگ امي وامل يلطمن وكاتمات حسهن هاي شكو التفتت ورايه عالهول وارجع ادحگ عليهن مشيت يمهن اريد افتهم واسأل شكو مجاي افتهم شصار

حضنتني امل فوتتني جوه وگامت تنحب وتبجي وتلمس بوجهي ومسحت الدم من اثمي حطيت ايدي على خدي يوجعني من الضرب ابجي واشاهگ واتسائل بداخلي

الف سؤال يدور براسي شصار قبل شوي

استاذي صائب شعنده يمنه مسحت شعري ودموعي تصب ومگدر احجي بس خايفه ومرعوبه طلعت امل وهيه تلطم على راسها واني ظليت يم امي الي انبطحت وگامت تعن گمت امسد على راسها واتلفت ورايه واحجي ويه نفسي

امل : صگعه وگعت على روسنه

شي ما يتحمله عقل شجاكم يا صائب وحميد ثنينكم.جبرتو خواتكم دخيلك ربي منا ليال تبجي وما تدري السالفه شنو ومنا رافده گلبها ينزف دم.

ادري شلون الكم.نفس يا ظالمين انته يا حميد مو جاي ادحگ رافده گبالك تبجي ما تريدك شلون نفسك راح تتقبلها يا ظالم

وصائب مستحيل اصدگ هاذ نفسه ابن خالي المثقف اكيد اكو شي صار ويا يا ناس راح اتخبل لزمت راسي وگعدت بالگاع شسوي ياربي رحمتك انتهينا بعد

راح الشيخ وطلعت صبره طشت جگليت على حميد ورافده بدون هلاهل وباركت لصائب على شنهي مكيفه على طياح حظج وحظ خلفتج

حميد مكيف يريد يطير ويبوس براس صبره ورافده گادت امها وطلعن من البيت عافن صائب وراحن مشي

ظل صائب واگف ويا حميد وگال

صائب : مبروك حميد اني عن نفسي باجر ازف

وعرس ما راح اسوي وانته ظلت يمك امت ما ردت تعال زف وبكيفك اذا تريد تستعجل لو تصبر

حميد : عليش هالعجله صائب اصبر شوي خن نتنفس لا جهزنه لا احد يدري

صائب : عن نفسي اليوم اجهز كلشي وما اريد اتأخر لو يوم اني لو الحگ جان اليوم زفيت بس صارلي شغل ومحد ويايه

حميد : هاذ هو عجل الي تشوفه سوي اني راح ارتب على كيفي

امل : طلع صائب ولحگته انادي واني گلبي يفور من الغيض انادي ما يفعل يگف فتح باب سيارته لزمته من ايده وطبگت الباب قوي عاط بيه

صائب : شبلاااج امل شتريدين

امل : فهمني يا صائب شجاي يصير هاذ انته العاقل والمثقف

صائب : ليش شمسوي

امل : وهيج بكل برود تگول شمسوي انته جبرت اختك وجبرت بنيه جاهل ويتيمه واخوك يريدها رحت عقدت عليهااااا ليش يا صائب ليييش شنهو مبررك گدام اخوك شنهي مبررك گدام. ربك.

ـــ ما جاوبني وخرني من الباب وشغل سيارته وراح خلاني اتخبل بزياده انهد حيلي اريد اصل الطرمه معد اگدر گعدت يم الدنگه ولزمت بطني الوب يا ناس وحايره بزماني شلون اسوي هسع

سعاد : رجعو رافده وشكحه من بيت الملا يبجن

تكسر الخاطر حالة رافده بنيه مرتبه وحلوه معلمة وتعبانه على نفسها تروح بكل بساطه تنغصب على رجال ما تريده والله جريمه

فاتو من يمي واني گاعده على حافة الممشى

ما يگدرن يخفن الحزن الي بيهن +

شويه واجه صائب بالسياره

مجرد طب البيت صار عياطهم عمتي طلعت من جوه وراحت عليهم واني ما تحركت من مكاني شبعت قهر عالبعد واني اسمع حجي رافده وصائب(الناقله روعه الطائي)

صائب : اول وتالي جنتي راح تزوجين حميد يا رافده عجل ما گلتي ماجد من راح خطب ليال شنهو العرض الي راح يقدمه لحميد واني متأكد انتي جنتي راح توافقين بكل رحابة صدر عبن هاذ ماجد محد يرفضله طلب

رافده : مستحيل ارضه لو يموتني مستحيل جنت راح اگف بوجه بكل حيلي على شنهي اطاوعه ليال جاهل واني سبق وبلغت فاتن ومهره الله يرحمها گلتلهم ماجد يريد ليال بس ما تجره وتصير عبن ادري حميد راح يگبعها ويجيبها وذا ما تصدگ اسأل فاتن

صائب : هسع الي صار صار كافي مناحه هاي عقدتي على حميد شبي خوش رجال على اقل راح تزوجين واحد رايدج وانتي مو زغيره تانگول ننتظرها تكبر

رافده : هاذ الي طلع وياك خلفله عليك

زين عوفك مني يطبني مرض احجيلي ليال الجاهل شلون راح تعيش وياهه شلون گلبك انطاك مو جنت تگول ليال مثل بنتي كون تسمع صريخها وحميد يضربها علمود توافق بيك وهيه بكل برائه تگله استاذي هاذ شلون اتزوجه

صائب : حياتي اني وليال محد اله علاقه بيها هيه بنتي وراح تظل عجل تردين اخلي ماجد يلعب بينه بكيفه هذاك النذل الحقير طلع هوه وره رسوب لياااال نذل ودني نفس لو اندل بي ادمي اني ازفها اله بيدي بس دني نفس ما عنده محرمات خانييي

رافده : ظل بهاذ حجيك لعبت بيكم نضال طوبه تره تريد ماجد من زمان وهو جان ما لابسها والله تسحل بروحها علي سحل

صائب : حقج تحجين هيج ما شفتي الي شفته اني

كافي تصيحين يا رافده اترجاج اني باجر ازف خليج اخت لأخر مره ويايه وامشي نجهز

رافده : شتجهز الي يسمعك يگول الأستاذ صائب راح ياخذ مره معدله مو ياخذ طالبته الجاهل الي ما تعرف الطين من العجين

سعاد : لزمت راسي تصدعت من حجيهم يربي هاي شلون طلبه شلون راح يعيشون نفضت نفسي وگمت مددت ااخ لو بس اعرف غازي وين راح ،،،

امل : صار المغرب وختلط الظلام مو بس بالجو اختلط على روح رافده وماجد وليال امشي مثل الثوله واتصفن ويه روحي شسوي رحمتك يربي

گاعده بالمطبخ ولازمه راسي احسه يريد يطگ من القهر والجوع عبن مالي نفس اكل

اجتني صبره وهيه شايله جيس حنه حطته گدامي رفعت حواجي بتسائل شكو

صبره : هاج هاي حنه عجنيها وحني ادين ليال اليوم الحنه مالتها واني عزمت البنوات تا يسولها حنه بسيطه خوما تطلع من البيت سكاتي خطيه

امل : ضحكت بستهزاء وجان اصفگ بيدي واعض شفتي

صبره : وسم شجاج

امل : ينعل بليسج يا عمتي والله ينخاف منج مكلفه نفسج وجايبه الحنه وعازمه البنوات زعم هاذ لخاطر ليال مو ليش ما تگولين لخاطر الناس ما تگول حميد جبر اخته واخذ بدالها مره

ـــ انتي شنهي من بشر مستعده تسوين اي شي لخاطر ترضين غرورج وانانيتج (الناقله روعه الطائي)

شحصلتي صارلج سنين تخططين

اول شي استلمتي فاتن انطيتيها لشايب علمود الفلوس وتعذبت وخسرت صحتها

وراهه استلمتي محمد الله يرحمه وزوجتي وحده ما يريدها خاف تعبالين ما ادري تره سمعت الحجي كله بهذاك اليوم من فاتن حجت الماجد

وراهه عاد استلمتي مهره وظليتي وراهه الا دفنتيها يالله رتاحيتي بسبب طمعج دفنه ثلاثه بيوم واحد ومجاي تواطين ابد بالعكس زاد طبعج عوفج من ليال هاي منتهين منها مستعده تذبينها بالنار لخاطر سعادة ابنج

تعاي گليلي،شمدريج حميد ورافده راح ينسعدون ها

بطلي هاي سوالفج انتي مره جبيره رجلج بالگبر شتنتظرين گليلي

مستمره احجي نفعلت نگشت دود بطني كله

لحد ما نفجرت بوجهي مثل البركان وگامت تعيط وهجمت عليه تضرب بيه تعافشت وياهه هيه اضخم مني تغلط،وتسب وتضرب وتفزع بحميد

ليال : نايمه على رجل امي بالحجره ودموعي تصب

وامي تمسد على شعري وتصبر بيه جسمي يرجف ما ادري شبيه ولا جاي استوعب شي من الي يصير وگامت تجيني صور اهلي من ماتو افز اصرخ وترجع امي تحضني

شگد ردت احاول اطلع من البيت ما گدرت كل البيبان مقفله والمفاتيح عد حميد والتلفون ماكو اريد بس اتصل بماجد يجي ياخذني هوه مو گال ما ابطي

سمعنه صرخات امل وفزينه اني وامي بسااع لگينه صبره تضرب بأمل گامت امي تفازع بينهن

كسرن غراض المطبخ والشعر صار بكل مكان امل هم تضرب بصبره وتصيح وامي معد تگدر تفازع انهد حيلها

گمت الوب واعصر بأديني اريد افك امل ادحگ الدم گام يطلع من خشمها

تناوشت الجفجير وارگع صبره على راسها وجان ادوخ وتگع لزمت راسها وگامت تصيح

ركضت على امل حضنتها وامسح بشعرها وخشمها يكت دم

على حطتنا وجفت حميد ينادي جان تعيط صبره الحگني ول حمييد

فات بساع عالمطبخ يدحگ ويسأل شكو

استلمته صبره توز بي عليه وعلى امل

صبره : اوف يابه حميد جيت على امل گلتلها اعجني حنه تا نحني ليال عزمنه البنوات وجان تستلمني يابه غلط وتفشر وما خلت وهجمت عليه

وضربتني وتجي هاي اخيتك فوگ زيني وياهه وتضربني بالجفجير على راسي

تخبل حميد ويعيط بأمل ما شاف حالتها شلون نتفتها صبره رافع ايده ويتهدد على امل اذا ما صارت ادميه يطردها لهلها

وصد عليه جرني من شعري

حميد : وانتي ليال شلون تضربين امي حيوانه حيوانه والله لوما عرسج باجر الله اصگطج تصگط امشي ولي بدلي وعجني الحنه

دفعني وراح گنبصت يم امل ابجي

وامي سانده راسها عالثلاجه وتنحب وتنعي(الناقله روعه الطائي)

اجت صبره اخذت الحنه هيه وجان تعجنها ولا جن مسويه شي وتهدد وتحلف بأمل

امل : انهضمت لأول مره بحياتي احس نفسي نكسرت

مو عبن صبره ضربتني وغلبتني لا بس مهضومه على هاي الجاهل الي ما تعرف الدنيا شضامتلها

مگنبصه يمي وتمسح بدموعي وتگلي بس يجي عماد يحل كلشي ونعزل وحدنه واني حت دراسة بعد ما اريد

اااخ يا ليال اااخ ياريت بهل بساطه

وتصير گادتني وطلعنه بالصاله اندگ الباب البره وطلع حميد يجمح شويه واجه شايل علاليگ حطحن گدامي

حميد : هاج هاذ جهاز ليال دزه صائب شوفنه للبناويت الي راح تجي هسع وفضني عاد سويتنها مناحه عدلي ليال ولبسيها شي خلي العالم تشوفها عروس مو جنها الأرمله

امل : گالها ودفر العلاليگ وراح اجت صبره وراه تفتح بالعلايگ وطلع بالملابس ومكيفه

صبره : دحجي ول ليال شجايبلج صائب ملابس حلوه وزواقه تعاي دحجي هذني شويفهن للبنوات من يجن

امل : ظلت ليال لازمه ايدي وادحگ عليه بنظره بيها الف سؤال شفايفها تمتم تريد تحجي وكأن توها يالله ستوعبت انها راح تزوج صائب حطت ايدها على اثمها وجان تعيط،

ليال : لااا اني ما اريد اتزوج استاذي اريد اتزوج ماجد

امل : لزمتها اريد اهديها اخاف عليها تنفعل گامت ترجد بروحها وتلطم احب ماجد اني اريد اتزوجه هو

طلع حميد من الحجره ولزمها من شعرها اجه يضربها على وجها وجان يرجع ايده عاط بيها

حميد : تحبين منهو ولج بگد القندره شتعرفين انتي

قسم بالله اذا ما صرتي ادميه وگعدتي عاقله الا ادفنج واحمدي ربج عرسج وما راح اضربج امشي ولي بدلي عليتيني امشييي

امل : دفعها وجان تگع مسحت دموعها وقرفصت وترجف ادحگ عليه تريد العون مني ومن عمتي معاضد واحنه لا حول ولا قوه

سعاد : حاطه المواعين اجلف بيهن

واسمع صائب يحجي ويا غازي بصوت عالي طلعت اشوف شكو وگفت بالباب انشف اديني واسمعهم

صائب : هاي تاليها غازي تعوفني وتصف ويه ماجد الي خاني وكسر گلبي

غازي : ماجد لا خانك ولا كسر گلبك وذا صدگ سواهه معنا شتفرق عنه حضرتك هسع تريد تسويها العين بالعين اتقي الله يا صائب عود من يجي ماجد حاسبه واجهه لا تخلي الحقد يعميك اصحه على روحك يا بشر طفله هاي الي راح تكسرها طفله

باجر انته تنسه وماجد يشوف حياته زين هاي البنت شنهي مصيرها فهمني

صائب : غازي من الأخير يعني ما راح تاخذ اهلك لبيت الملا تسون الحنه للبنيه

غازي : ولا اخطي خطوه وحده هاي حربك وانته اشتان بروحك.

سعاد : غازي عاف صائب بره وفات

سعاد : هاذ شعنده

غازي : بطران يريد اخذجن على بيت الملا تسون لحنه مال ليال يگول ما عدهم احد متعافي ينعل بليسه ول سعاد راح اتخبل هاذ شلون هيج عنده عادي شلون اذا اجه ماجد شلووون هسع تلگينه متخبل يتصل علينه وما يحصل احد شلون بيه اني ورطت روحي وصرت بالنص

سعاد : اهدئ يمعود لا تفحط فوت اگعد وربك يحلها

غازي : اااخ يا سعاد شلون اهدئ والله لايبه روحي انتي ما تعرفين ماجد مخبل عنده طباگات اقل شي يسوي يكتل صائب

سعاد : گعد غازي يعصر براسه ويصفگ بأدينه اختنگ گمت امسد على ضهره اوف يربي بسبب سوء تفاهم راح تنهجم بيوت الناس الطف بينه يارب

امل : التمن البنوات العازمتهن صبره وبنوات ربعنه وجايبات وياهن شيره موصيتهن زعم ينضفن ليال

جابن ليال گعدنها وشلحن رجليها وهيه خايفه وتبجي وتمسح بدموعها وتغطي برجلها

ــ گالن مابيها شعر بس ميخالف تا نگول نضفنه العروس ويضحكن.

حطت المره الشيره على رجلها وجان تصرخ ليال وتفز نهزمت ورايه وتعصر بثوبي وتهمس

ليال : امل وخريهن عني امانه حجيهن مو حلو يسولفن كله عيب ويريد يصلخني هاي صبره گالتلهن امانه امل وخريهن

امل : حضنتها وگمت احجي عليهن هجمن على ليال عبالك ما شايفات بنيه وحده شايله خيط ومنگاش وحده شايله شيره گلتلهن اني اتكفل بيها رايتجن بيضه وخرن انتن

بلش الحجي والتبسبس وهاي شلون رهمت وشلون صارت اشو كلها سكاتي

اني وعمتي معاضد وليال محد بينه يجاوب صبره تكفلت تجاوب على كل سؤال

صبره : والله ما جانت عالبال بس رحنه خطبنه رافده وطلبو بديله عنها وانطينه ليال

ـــ زين ليش ليال مو ديالا اكبر منها

صبره : والله همه استحبولها ورادوها وهيه وافقت مكيفه احنه لا جبرناها ولا ضغطنه عليها كلشي برضاتها

ــ زين اشو لا فاتن لا ديالا ولا عماد وينهم صار كلشي بساع

صبره : عماد يدري قبل لا يروح وفاتن وديالا خبرناهم حتمال باجر يجون وهاذ صائب هو مستعجل يريد يعرس خطيه الزلمه مكيف

ــ اي ام محمد شلون ما يكيف راح ياخذله عصفوره بگد جهاله وتخبل وين لگاها

صبره : هاي كلشي قسمه وانتن لا تحطن عينجن على رزق الزلمه

امل : اسمع حجيهم واعصر بأديني الوب يربي كون يصير شي ويتفلش الوضع كون ينهجم البيت علينه فوگ هجمته هاي ادحگ على ليال بس تلفت هين وهناك وكل وحده جرها بصفحه وتسألها شي وما تعرف تجاوب وصبره وراهه تفتر

اخذن ليال مني ولبسنها فستان احمر وحطنلها حمره اااخ يانار گلبي وين تروحين من ربج

عمتي معاضد داخت لزمت الحايط سحلتها گوه مددت بحجرتها احس نفسها صار ضيگ وتوسل بيه اروح يم ليال نخاف عليها ترجع تنصدم

رجعت يم ليال وشفت البنوات جايبات الحنه العجنتها صبره

گالت وحده هاي الحنه ما تطبع مبينه

ردتلها الثانيه خن نحطلها لامندوزي

وذيج تگول ونحطلها شويه بانزين راح تصير حمره طوخ لزمت صفحتي ادحگ عليهم شلون يجلفصن ويرتبن زعم خلطن الحنه انوب ولفنها بعلاگه +

وتجي بنت عمي تشاورني امل اشو مو حافين للبنيه حواجبها ثخان

خزرتها بغضب وجان تروح بلعت ريگي احس حنجرتي اطگ

شنهي نحفلها ليال وينها وين تجهيز العروس

اغمض عيوني اريد العون من ربي

حطن الحنه على ايد ليال وهيه تشاهگ

وصبره تگللهن خطيه تبجي راح تفارجنه واحنه خطوه عنها +

والنسوان تگللها اي غير كل عروس تبجي بيوم الحنه

الف سؤال انسأل بيوم.حنة ليال وصبره سكتت الكل وجاوبتهم واقنعتهم

الزم ثوبي من صدري اهيم بروحي تا اشگه واسوي فضيحه واگول ليال مغصوبه ارجع اتذكر كلام حميد من هددنه گبل لا تجي الناس

حميد : راح تجي الوادم هسع صيرن خوش وحجي زايد ما اريد وبدون مناجيد دحگن هاي الرشاش جبتها ما عندي مانع اگوم ارمي حي الله واحد گدامي

خاصة انتي يا امل والله ادشرج لهلج واخذ ابنج منج خاف تعبالين يگف بعيني عماد

امل : رجعت من تفكيري امسح برگبتي

راحت الوادم وظلت ليال ساده اديها بالحنه وتنحب وتهدد بس يجي ماجد تحجيله كلشي

شتحجيله يولي شتحجين

غسلت اديها وطگعت الحنه بيدها احمر بأسود

نامت وهيه تشاهگ عمتي معاضد الليل كله لازمه گلبها وتعن ونفسها يضيگ

حضنت ليال وامسد براسها لحد ما غفت وهيه تهمس

ليال : بس يجي ماجد اگله عليهم

امل :صبحت الدنيا النهار عبن منحوس يركض ركض

افتر احس البيت راح يگع علينه انوب اجتني صبره جرتني من جسعي

صبره : بالله نضفتي البنيه جهزتيها للعرس

امل : نفضت ايدي منها وعفتها وطلعت

ليال :مگنبصه يم امي ساكته وما تفعل تحجي وگوه تنفس امسد بصدرها وابجي ورمن عيوني الزم راسي اريد افتح عيوني زين اجت صبره وجرتني من ايدي

اخذتني على حجرتها

وگفت گدامها عيوني ناعسه واريد افتهم

صبره : روحي جيبي الشيره وتعاي انضفج اني هاي امل ما وراهه مابيها خير

ليال : ظليت فاتحه اثمي وادحگ عليها انوب گامت تحجي سوالف مدري شلون

صبره : لا تخافين من صائب يجيج وتظلون. وحدكم. بالحجره راح يدللج حظج يگعد ويا من يجي ينزعج ملابسج لا تخافين وتستحين هو هاذ الزواج

ليال : حطيت ايدي على اثمي وطلعت من يمها اصرخ تلگتني امل گمت انحب بحضنها واتوسل بيها تتصل بماجد تا يجي

امل : الوضع الي اني بي ما اتمنى حت العدوي

جاي اشوف طفله گدامي تتناهبها الذيابه واني لا بيدي اعينها ولا اعين نفسي تسلحت بالدعاء وتبردت بالبجي

وره الضهر وجان تجي صبره من الباب شايله

علاگه جابتها وجت تجمح وصلت يمنه وجان تفتحها

صبره : دحجي يول ليال هاي بدلة.عرسج دزوها تخبل مشترينها على حسابج گومي البسيها هسع تجي الوادم تشوفج

امل : ادحگ عالبدله واتخيلها جفن ليال

يربي دخيلك افرجها كون هسع يجي عماد يدفر الباب ويفوت لو ماجد يربي دخيلك بين هذول الأثنين يجينه واحد(الناقله روعه الطائي)

التمن النسوان وليال معرته بثوبي تريد العون مني

اجن النسوان هنه وصبره وجرن ليال مني گوه زوقنها ولبسنها البدله جانت تگمز وما تفعل تركد شاورتها صبره وجان تهجد وگامت تبجي صامت

صار الغروب وگاعدين ننتظر جنازة ليال مو زفتها

عمتي معاضد من الصبح بحجرتها مريضه وگلبها ينهت واني وحدي الوب شايله ابني وما خلتني صبره اگرب يم ليال لحد ما اجت الزفه عباره عن ثلاث سيارات

سعاد : مو عبالك راح يصير عرس عبالك محربه يا ستار وصائب محد يفعل يزف ويا اجو اصدقائه جم واحد وغازي وبركات فاتو بالهول مالنه گعدو يحشون جگاير وخايفين

راحت الزفه مال صائب ثلاث.سيارات

كلهم زلم وماكو نسوان غير شكحه وثنين من زوجات اصدقائه زين على شنهو سويت عرس تا بس محد من اصدقائك ياخذ عليك نظره لو تحب تتباهى رغم ضعفك

رافده المگروده كل شويه تجي تنحب وتبجي يمي تفرغ طاقتها وترجع لبيتهم

رافده : اخ يا سعاد ااخ شلون بينه هسع شلون.

يريدني اخذ حميد لا رحمه ولا ضمير عنده حط ليال وصگطها تصگط تا ترضه بصائب هاذ شلون راح اعيش ويا شلون دابروني

سعاد : زين صائب شلون رضه هاذ حرام والله حرام ما يدري البنيه مغصوبه

رافده : يدري بكلشي ويگول جاهل بعدين تعود هاذ شتحجين ويا شتحجيين ااخ يا ناري

سعاد : الله يعينج اصبري بلكت يجي ماجد وتفرج

رافده : شتفرج يا سعاد متگليلي هاذ راحو يزفون خلص انتهينا بعد ادمرنه

سعاد : راحت رافده وهيه تنحب وتحسب شلون وگعت بين اخوان ثنين ما عدهم رحمه الله يعينها

امل : طبگن السيارت واني واگفه بالصاله شايله ابني فحم من البجي ردت ارجده بالگاع من فورة.دمي وغيضي اريد بس اوصل ليال اشوفها ما خلني عبالك عصابه صبره وگرايبها الي همه گرايبي اصلاً واهلي الي ما عدهم رحمه وضمير

انهد حيلي وگعدت بالگاع لزمت راسي وابني يفالت مني ملخني طب العريس وجان اگوم بعصبيه اريد احجي ويا بلكت يبطل هاي المهزله حت لو متأخر وجان اجرني صبره من ايدي وتفوتني بالحجره مالتي وتسرگ الباب عليه من بره ذبيت ابني بالگاع وگمت ارجد بالباب محد يفتحي

ليال : گاعده والنسوان محاوطاتني من كل مكان

ويعدلن بيه ابلع بريگي احجي وياهن محد يسمع ابجي يمسحن دموعي گمت ارجد بروحي وردت انهزم جلبت بيه صبره وشاورتني اذا انهزم وما اگعد عاقله هددتني تگول للنسوان ليال عاشگه وليال وحده مو خوش وتگوم تحجي عليه الوادم ويذبحني حميد اني وامي وديالا +

حطيت ايدي على اثمي وگمت ابجي صامت

گالو الزفه اجت ادور لأمل ماكو ختفت

جابولي وردايه لزمتها مثل العروس يسكتن بيه النسوان بس مگدر اسكت هوه الدمع لحاله ينزل ابجي بداخلي مرعوبه وخايفه من كل سالفه حجنها النسوان(الناقله روعه الطائي)

وخرن مني وانطو مجال گالو هاذ العريس اجه(الناقله روعه الطائي)

طب استاذي وعلى وجه ابتسامه حزينه طشن جگليت بدون هلاهل زعم حزينات على اهلي الماتو +

ــ اجه گعد يمي واني ابلع بريگي وادحگ علي مو مصدگه

صفگن شويه النسوان وجان يگودني من ايدي ومشينه عالسياره

اجت جوانه تصرخ تريد ويايه حضنتها واشاهگ

اريد اشيلها وجان النسوان اخذنها مني

گامت تمرغل بروحها

هد ايدي وگعد يمها دگ رگبه وجان ينطيها فلوس

وما تفعل تسكت وجان ينادي على سعد شالها گاله جيبها وتعال

رجع گادني بدون ما يصد عليه يسحل بيه سحل البدله طويله امشي واتعثور بيها شالها من گدام حطوني بالسياره وجان يصعد بصفي يسوق ادحگ على هاي الهوسه كلها واللمة الي بيتنا ومجاي اصدگ خاف اني حلمانه

گام يسوق ومركز بالطريق واني مدنگه مستحيه من استاذي اتخيل نفسي بالدرس وعندي واجب صعب

وصلنه بيتهم وجان يحدر بساع نزلني هوه شالني من الباب وما خلاني اگعد بالصاله حطني بالحجره وسد الباب

اجت خالته تنادي فتحلها الباب وجان يحط ايده ما خله احد يفوت گالتله شلون يابه جيب البنيه بالصاله يم البنوات خل نغني نرگص شنهي مستعجل جتفتتها بالحجره

صائب : لا خاله مو هيج بس مبينه تعبانه واريدها براحتها عوفيها هسع روحو دگو وارگصو

ليال : حجها وسد الباب وجان يجي ينطيني مي اخذت الگلاص منه ايدي ترجف شربت مي والشهگه بعدها بيه غمض عيونه بتعب وعصر راسه

گام وطلع وجان يقفل الباب من خارج تخبلت ركضت عالباب ارجد بي واصيح فتحولي محد يسمع مشغلين اغاني

گنبصت بالگاع وگمت ابجي

وارجف ادحگ حواليه اني بحجرة استاذي

ادحگ عالجربايه حاطيلها جرجف ابيض وراسمين عليها قلب حب بالجگليت وناثرين ورد جوري احمر

وادحگ على نفسي بالمرايه لابسه البدله البيضه

والبرگع وشعري على طوله وزواقه ماكو بس حمره

گمت اعصر بأديني وابلع بريگي اي هاي

مثل العرسان يعني اني هسع عروس

گمت الطم وابجي نزعت البرگع وارجد بالباب واروح عالشباك افتحه مقفلينه

گمزت وفحطت لحد ما نهد حيلي

وگعدت بالگاع منهاره

سعاد : واگفه بالطرمه ادحگ واگرط بأضافري اول مره احوص واريد اروح اشوف بس مگدر غازي منعني اروح

اخذ بركات. وراح مدري وين گال ما اتحمل اشوف هاي المهزله

الفضول سيطر عليه ورحت من طبت الزفه صائب طبگ السياره بالباب وحدر بسااع ونزل البنيه يمه من. شفتها نهد حيلي

تخبل يربي عبالك لعابه شعرها اسود ليل ولابسه ابيض ومخلين البرگع عالنص هنياله ماجد ما ينهبل عليها گمت اتگرضم

ادحگ عليها ما تعرف حت تمشي بالبدله وتبجي وخايفه والورده وگعت منها شالها صائب فوتها من الباب فتت وراهم وجان

گبل حطها بالحجره وقفلها

ظلن النسوان يحجن بالصاله شلون اخذ العروس وما خله احد يشوفها

هاي الي تگول ملهوف وما يصبر وهاي الي تگول خايف عليها من الحسد عبن اخذله عصفوره

رافده دگ مناحه عازله زاويه وتنحب

وشكحه من شافت النسوان ابتهرن بليال عبن حلوه كيفت وگامت تفيك وتهلهل وطش جگليت

اريد اظل واشوف تاليها بس گلبي يم غازي هسع يجي وما يلگاني وينهبل رجعت بساع على بيتنا

وگعدت بحجرتي ارجف وافكر بليال هالطفله شلون راح يصير بيها

امل : ظل الباب مسدود عليه لحد ما راحت الزفه

يالله اجه حميد فتحه عطت بوجه ما خليت بالحجي ما جاوبني لا هو. ولا صبره راح گعد بره يدخن

ركضت بساع على عمتي معاضد

لگيتها بتالي روح اثمها بجنب وايدها يابسه گمت اصرخ والطم ناديت حميد

وراح بسااع جاب سياره ونقلناها

ليال : ما ظل بيه حيل بس الشهگات تطلع

والصوت بره هجد وما ظللهم حس

انفتح الباب وجان اگوم مسحت عيوني

فات استاذي او الي جان استاذي

طب الحجره شايل صينية عشه

فات بدون ما يدحگ عليه

يحاول يتجنب يشوفني

نزع سترته وعلگها

گحزت يم الجربايه وختنگت علت صوت شهگاتي

صد عليه وجان يمشي بتجاهي

گل ما يگرب اگحز عنه لحد ما نحصرت يم الحايط

لزم كتوفي واني ارجف واشاهگ

صائب : لا تخافين ليال تعاي تعشي

ليال : دنگت راسي اعصر بأديني وما تفعل ترگد شهگاتي رجع طبطب على جتفي وجرني من ايدي

مشيت ويا مثل ما جنت امشي من يگودني نفوت عالصف گعدت عالدوشگ بدال الرحله وادحگ عالجربايه مكانها بمكان السبوره

لازم ايدي وگاعدين واني ادحگ عالحجره

ودموعي تصب گامت تنگط من حنجي

فززني صوته

صائب : ليااال

ليال : ها

صائب : يالله تعشي بابا

ليال : مسحت دموعي كورت اديني بحضني وهزيت راسي گلت ما اريد استاذي مو جوعانه

تنهد وجان يسويلي لفه حطها بأيدي

صائب : اكلي بس هاي لخاطري يالله

ــ اخذتها منه وهمست

ليال : استاذي اريد ارجع لبيتنا امانه

شال كشمة. خبز اكلها وهز راسه بقبول

كيفت ورجعت گلت استاذي هسع اريد ارجع وديني

عگد حواجبه وصد عليه جانت نظراته ترعب

ونبرة صوته ما بيها اي حنيه مثل مجان استاذي الي احبه گال

صائب : تعشي ونامي هين والصبح اوديج يالله

ليال : حطيت اللفه بالصينية وعزمت الرفض وسرگدت الا اروح هسع وديني استاذي اني ليش هينه گمت ابجي وعلت عبرتي گتله اني احب ماجد اني اريد اتزوجه هو +

صد عليه بغضب وجان يعيط

صائب : انعلبو ماجد كلب حقير نذل حيوان

ليال : گام يغلط ويسب ويدفر بالغراض دفر كلشي گدامه حت صينية الاكل نثر كلشي عالميز شگگ الفرشه مال الجربايه

ارتعبت هاذ مو هو مو استاذي سديت اذاني وقرفصت بصف الكنتور وابجي اسد اثمي واسد اذاني ادحگ علي تخبل فلش الحجره تفلش

لحد ما نهد حيله وثنه على ركبه

اندگ الباب وجان يفتحه عالنص وخله ايده تا محد يشوف

اجاني صوت امه اسمعها تگله يالله وليدي عمامك بره فضنه وين النيشان

ظلت تحجي ويا همس وهو يهز براسه راحت وجان يسد الباب قفله

دحگ عليه بنظرات مريبه گام يمشي بتجاهي قرفصت نفسي وسديت عيوني وگمت اشاهگ واتوسل بي يرجعني البيتنا

يتبع……