رواية عرين الصياد الفصل الرابع والعشرين 24 بقلم شذرة العدوان

حسبت ايام عمري المشن بصباي

،،،شهدت الوگت مو واحد اعليها

،،،ادگن بل عمر دك هاون الحلوات

ضلام ادري اليالي واضوي اضل بيها

،،،،،تعثرت بحياتي هواي عثرات

،،،،،كل عثرة ابدرس ما ناسي ماضيها

،،،،،،بسراري الغرب عاشولي عميان

وابن ابوي الكسرني ومستحي احجيها

ليال : سد الباب بعصبيه وصد عليه يمشي بتجاهي

لزگت جسمي بالكنتور

حاضنه نفسي واشاهگ واتوسل بي يرجعني لهلي

گرب خطوات مني وحط ادينه على كتوفي

صائب : اهدئي بابا لا تبجين

ليال : گالها وطلع دشداشه من الكنتور حطها عالجربايه وگال

صائب : انزعي هاي البدله والبسي هاي

ليال : تصنمت بمكاني وكورت اديني يم صدري شلون انزع ملابسي وابدل گدام استاذي الباب مقفول علينه

واحنه وحدنه

شجاي يصير اخذت صفنه فتره واني على حطتي وهو مجرد لگح الدشداشه گدامي راح وگف يم الشباك وحاط ادينه بجيوبه دحگلي نص التفاته

صائب : مو جاي احجي وياج بدلي ملابسج يالله ارتاحي هاي البدله تسحل عليج وكلها تراب وصخه مو حلوه

ليال : دنگت راسي ورفعت طارف البدله صدگ صاير وصخ واني ما احب البس شي متوصخ وهو يعرفني

بلعت ريگي واعصر بأديني قاطع ارتباگي وبدون ما اطلب گال

صائب : يالله اني راح ادير وجهي وبدلي انتي بسااع

ليال : دار وجه وسد عيونه بأيده

واني گحزت وحصرت نفسي بين الكنتور والزاويه نزلت شلاحات البدله عالنص وما گدرت افتح السحاب حسيته جرح ضهري تحملته وبساع لبست الدشداشه وكملت باقي البدله نزعتها وعيني علي اخاف يلتفت

عدلت نفسي واعصر بأديني الدشداشه جانت گصيره شوي مو قياسي

مستمر داير وجه عني وجان يندگ الباب قوي

راح متعصب وفتحه شويه وهم خله ايده تا محد يشوف وعاط

صائب : خيير

شكحه : وليدي عمامك بره ينتظرون العالم تريد تروح

صائب : وما يروحون منو لازمهم

شكحه : يمه لا تمنجدني بروح ابوك هسع الناس وعماتك يسونك علج بحلوگهن

صائب : هسع يالله

ليال : رجد الباب وراهه بقوه الا فزيت

وگام يدفر بالغراض انوب ويلوص بالحجره

ويكسر ما خله داس على گزاز بالگاع وجان يفز گام يگمز انشگت رجله

حطيت ايدي على اثمي واكتم الشهگات حيل خفت منه ما متعوده اشوفه بهيج حاله ولا بحياتي شفته

جان دائماً استاذي الأنيق المرح الهدئ

صك على سنونه راح يعرج وگعد على حافة الشباك واني شفت الدم برجله لو تخبلت ساحت روحي

حرت بين اروحله لو اظل واگفه بمكاني

اعصر بأديني وامتمت فززني صوته

صائب : ناوشيني هاذ الجرجف مال جربايه

ليال : مسحت دموعي وتناوشت الجرجف من الگاع انطيته اله ورجعت لمكاني لازمه ثوبي

اخذ هو الجرجف وگام يلوثه دم من رجله لعبت نفسي الي اعرفه استاذي نضيف ومرتب جان يگدر ينضف رجله بشي غير هاذ مو يلوث جرجف كامل

ذب الجرجف من ايده وجان يشد رجله بالرباط

صد عليه وجان يگول

صائب : ليال روحي مددي عالدوشگ

ليال : صفنت من سالفته ورجع كررها بتشدد سويت مثل ما گال ورحت مددت وعيني عالباب ودموعي تصب

گام وهو يعرج فتح الباب عالنص وظل واگف لحد ما اجت شكحه وجان ينطيها الجرجف

اخذته منه وقبل لا تحجي جاوبها بعصبية

صائب :هاج اخذي ممنوع احد يدگ الباب عليه اهجم البيت تره

ــ رجد الباب وسرگه ورجع يعرج فل الرباط من رجله ورجعت تنزف ساحت روحه گام يلوب

گمت من مكاني گلبي وجعني علي

ليال : استاذي رجلك تنزف لازم تروح الطبيب

ــ جاوبني بدون ما يصد عليه

صائب : ميحتاج

ليال : وگفت وادحگ على رجله شلون تنزف

واحس دخت ولعبت روحي لزمت بطني وگعدت

صد عليه وگال

صائب : انطيني فانيله من ملابسي بالكنتور

ليال : گمت بسااع ادور بالكنتور جان مرتب وكلشي بمكانه لوصته كله يالله طلعت فانيله

انطيتها اله وگفت يمه ادحگ على رجله

اسد عيوني بيدي وارجع ادحگ

لزم الفانيله لفها على رجله وشدها انوب بالرباط مدد عالجربايه بطريقه معكوسه وحط ايده على وجه ويتنفس بتعب

وگفت بمكاني لازمه.ثوبي وادحگ داير مدايري

وترني المنظر ونساني البجي مجاي استوعب خفت گمت ادحگ الحجره مگلوبه گلاب

والگاع كلها دم

مواعين مال العشه مطشره بين صفنتي افكر ليش اني هين وليش استاذي تحول وحش وهيج سوه انرجد الباب ويا صرخة جوانه

ركضت عالباب وجان يفز استاذي عاط بيه

صائب : اوواش لا تفتحين الباب لا تفتحيين

ليال : لازمه السرگي وارجف وهو مستمر

صائب :وخري لا تفتحين الباب

اسمع بجي جوانه بره ما تحملت ضربت رجلي بالگاع

گتله اريد اطلع ارجع لهلي وهاي جوانه تبجي تريد عليه اسمعهم يمكن ضربوها امانه استاذي خليني اروح

گام بتعتب ويسحل برجله وخرني من الباب سند نفسه وگال

صائب : ما يصير تفتحين الباب اگعدي هسع تسكت جوانه

ليال : شلون تسكت وهاذ صريخها يرج ما تسمعه لو خليني اروحلها لو ناديهم يجيبونها

حجيت بعصبيه واشاهگ گلبي يمها

غمض عيونه وضرب جف ايده بالحايط

فتح الباب عالنص وناده سعد

ــ اجه يمه ما يشوفني عبن خلاني وراه الباب

صائب : شبيها جوانه

سعد : تريد على ليال بس سكتتها وراح اوديها لهلها

ليال : حجيت بتوسل ودموعي تصب امانه جيبها هسع تفحم هيه انحمست وره ديالا وانوب ما تلگاني جيبها امانه لو خلوني اروح عش مخليني هين

صد عليه وجان يفرك گصته حجه ويه سعد

صائب : روح جيب جوانه امشي بسااع

سعد : بس امي تگول ما يصير

صائب : ما تسمع شجاي احجي روح جيبهااا

ليال : راح سعد شويه وجان يندگ الباب گام هو فتحه فاتت جوانه تبجي والصوت مبحوح محموسه حمس حضنتها وگمت اشاهگ لزمت ايدي وتجر بيه

جوانه : امشي ليال نلوح على بيتنا امشي

ليال : لزمتها من ايدها وحجيت بتوسل

استاذي امانه اريد ارجع لبيتنا

دحگ عليه ولم شفايفه وتنهد

صائب : عود الصبح اوديج

ليال : لا امانه استاذ هسع اريد اروح

عااط بيه بصوت مرعب

صائب : انتي شبييج مجاي تفهمين ماكو روحه لهلج اگعدي واسكتي لا تخبليني انتي هم

ليال : ما اني اريد اروح طلعوني منا

جاوبني بهدوء

صائب : باتي هين اليوم وباجر من الصبح ارجعج خوش

ليال : هزيت راسي بــ اي شلت جوانه ورحت گعدت عالدوشگ حضنتها وهيه خافت وگامت تشاهگ دفنت راسها برگبتي وتهمس

جوانه : اخاف ليال اخاف امشي نلوح

ليال : همست الها اريدها تهدئ

اي جوجه نروح بس اليوم نبات هين

جوانه : ما اليد ابات هين الحجله وصخه واني جوعانه

اليد نلوح وديالا وينها

ليال : مسدت على راسها

كافي جوانه اسكتي هسع اجيبلج اكل وهسع تجي ديالا

امل : نقلنا عمتي معاضد وهي لا ايد ولا رجل عفت ابني ورحت وياهه الطم وابجي شسوي بروحي شگول لعماد من يجي دخيلك ربي ساعدني

وصلنه المضمد وجان يشيلها حميد ينزلها

جيكها وهز راسه بأسف گال جلطه هاي

تربعت بالگاع والطم واصرخ راحت المره انجلطت على بنتها

هنيالها شلون تحمل هالظلم راحت المره شسوي بروحي ملخت نفسي

لزمني حميد يصيح عليه ويلف بملفعي لزمته من ايده وعطت بي

يا متخاف ربك ارتاحيت هسع من هجمت البيت علينه فوگ هجمته ارتاحييت

عافني وشال عمتي حطها بالسياره

عاط بيه تروحين عالمستشفى لو لا

صعدت واني اشاهگ والطم على راسي

ونطلقنه عالمستشفى والطريق كله ادعي ربي يسترنه

وصلنه وجان گبل اخذوها

وما خلونه اني وحميد نفوت

الدنيا ليل وغير اني وحميد وابني عفته بالبيت يم صبره

ضعنه يربي دخيلك الطف بينه

صارت ساعه 11 بالليل واني الوب وابجي وعمتي ماكو تربعت بالگاع شلون اذا ماتت شسوي بروحي

ليال : لل 11 واني وجوانه نبجي

دافنه راسها برگبتي وتشاهگ

واستاذي مدد بالگاع يلوب من وجع رجله حاط ايده على عيونه

وجوانه خايفه منه وادحگ عالحجره همست بأذني

جوانه : ليال جوعانه اريد اكل

ليال : مسدت على راسها وهمست استاذي جوانه تريد اكل

وخر ايده صد عليه ما سمع زين رجعها

وجان اعيد استاذي جوانه

شال ايده ورتجه گال

صائب : ها ليال حجيتي شي

ليال : اي

صائب : شنهي ما سمعتج

ليال : جوانه تريد اكل

صائب : ها يالله هسع

ليال : گالها بملل مبين تعبان دگ ادينه بالگاع وگام يعرج عالباب فتحه وينادي كريمه رافده سعد

اجت كريمه وجان يگللها جيبي اكل لجوانه بسااع

وسد الباب وظل مرتجي يمه

شويه واندگ وجان يفتحه اخذ الصينيه من كريمه وگاللها روحي انتي راحت بس اخذت نظره خطف عالحجره يمكن شافت الثريمه الي بيها

قفل الباب واجه يسحل بنفسه حط الصينيه وناده جوانه تجي تاكل

صائب : يالله تعاي ام اللسان اكلي

جوانه : ماليد مو جوعانه

صائب : اذا ما اكلتي اكلج تره

ليال : صدت عليه جوانه وحشرت راسها بصدري تخاف

گام يلاطف بيها يريدها تجي

صائب : اذا اكلتي انطيج هديه

جوانه : شني هيه

صائب : تعاي اكلي واني اگلج بعدين خاف ليال تبوگها

ليال : استسلمت جوانه وجان ادحگ عليه گلتلها روحي يالله اكلي گامت وهيه تمشي بحذر خايفه منه

فتحلها ادينه وگعدت يمه گام يسويلها لفات ويوكلها

سرحت بتفكيري اني مو جنت راح اتزوج ماجد شلون تزوجت استاذي وليش ؟؟

ــ فززني صوته

صائب : ليااال

ليال : ها

صائب : وين صفنتي تعاي اكلي ويه جوانه اني تعبان مگدر

ليال : گمت يمهم گحز هوه نام بصفنه وانطانه ضهره وحاط ادينه على عيونه

گمت اوكل بجوانه واني هم اكلت جوعانه من الصبح ما ضگت شي شبعنه وجان اشيل الصينيه فتحت السرگي وردت اطلع عاط. بيه

صائب : لا تطلعيين اگفيي

ليال : رادت الصينيه تگع مني هالگد ما هبطت

هوه جان غافي سند نفسه وگام اخذها مني بنتر فتح الباب خلاهه گدام الباب ورجع سرگه ورفع اصبعه نبه عليه

صائب : ليال ممنوع تطلعين

ليال : زين ليال

صائب : انتي تزوجتي ليال ما يصير تطلعين

ليال : گالها ورجع مدد وهو يعن

زين ليش ما اطلع شنهو السبب واني اصلا ليش تزوجته

واني وين انام هسع شنهو نظل هين

واگفه بملل ومخنوگه اجت جوانه لزمت ثوبي وتجر بيه

جوانه : ليال اريد اروح عالحمام

ليال : گنبصت يمها وحضنتها اني هم اريد اروح بس استاذي ما يفعل نطلع

الضاهر سمعني وجان يگعد لزم راسه يعصر ويشد على شفايفه

گام وجان يفتح الباب طلع راسه شاف ماكو احد

صد عليه وگال يالله گدت جوانه وطلعت

وگفت بالباب گلت ما عندي نعالات

ــ لزم گفه رگبته وگال

صائب : البسي شحاطتي هاي

ليال :لبستها جبيره عليه وجان اطلع گايده جوانه

وهو يمشي ورانه

صديت علي

ليال : عش تجي ويانه نريد عالحمام

صائب : ادري وراح اگف هين يالله بساع گبل لا احد يجي

ليال : گالها وهو يتلفت عالبيت

تجاهلت الي جاي يصير هاذ شعنده لحگنه وما يريد احد يشوفني من اطلع

زين همه كلهم اهله واني اعرفهم

كملنه من الحمام ورجعنه لگيته على وگفته

طبينه عالحجره قفل الباب وجان اظل واگفه صد عليه

وگال

صائب : ها بعد شي انوب

ليال : لازمه ايد جوانه وابلع بريگي

وهو منتظر مني جواب

صائب : ليال تردين شي بعد

ليال :استاذي وين انام

ــ صدت عالجربايه گال

صائب : نامن هين واني راح انام بالگاع عالدوشگ

ليال : ادحگ عالجربايه ما عليها جرجف ولا مخاد نثرها ظلت بس الدواشگ

كمل هو وگال

صائب : هسع ارتبها

ليال : راح طلع جرجف وبسطه

وحط المخاد وجاب جرجف ثخين حطه عالجربايه

صائب : يالله نامن

ليال : صعدنه اني وجوانه حطيتها بحضني

وادحگ علي گام يعزل بالحجره لم كلشي مكسر وحطه بالصينيه

وطلع بره جاب وصله مسح الدم الي نگط،عالصبه

كمل كلشي شد راسه بالقميص وجان ياخذ جرجف سحب الدوشگ وجان ينام بطريقه معكوسه رجلينه صارت بتجاهي وراسه عالشباك

امل : للفجر يالله خلوني اشوف عمتي

اجه الدكتور گال الحمد لله تلاحگناها من جلطه محتمه بينها وبين الموت شعره

الضغط،معلگ بس ان شاء الله سوينه الي علينه وراح تصير زينه فتت عليها

حالتها تشل فاقده

لزمت ايدها وابجي وادعي وحميد ظل بالباب يدخن وما فات

وللصبح ظليت گاعده ما غفيت ولا ثانيه

كل شوي يجي الدكتور يجيكها

گال الله سالمها شلون ما ماتت معجزه حفظها الله شصاير وياهه هاي

ــ ما جاوبته كتفيت بالصمت

طلع وراح يحجي ويه حميد

ليال : گعدت الصبح على رطوبه جوه بطني

وريحه تلعب النفس فتحت عيوني بتعب وتلمست الرطوبه فزيت

ــ وجان اعيط بجوانه ياا ام. طبله ينعل بليسج سبحتيني طبال هاي ليش مو زعم بطلتي يبو يالعثره اليوم اموتج

مستمره اعيط عليها وهيه غطت راسها واني اكشف بيها فززني صوت

صائب : هيي شبيج يمعوده صوتج اريد انام

ليال : انتبهت بسااع وظليت فاتحه اثمي وادحگ عالحجره اني وين وشنو وليش

انبهتت وهو كمل

صائب : بس صوتج شويه اريد انام ولا تفتحين الباب گالها وجان يرجع يصد عالحايط ويغطي عيونه وينام

ليال : حطيت ايدي على اثمي واتذكر اني شجابني هين اي اني تزوجت استاذي البارحه وبتت هين والعثره جوانه باتت يمي وطوفتني طبال

دنگت راسي ادحگ جوه الجربايه انوب الطبله تنوگط عالصبه

ودشداشتي تگطر هم لعبت نفسي خنگتني العبره گمت انگز واعض بشفتي انقرفت من روحي

رحت عالكنتور الي طلعلي منه دشداشه فتحته على كيفي طلعت دشداشه حمره گعدت بالگاع وجان انزع الي لابستها والبس هاي بس لازم اسبح اليوم منو يفكج من ايدي يا جوانه

اريد اطلع شلون يربي شسوي لميت شعري وامسح برگبتي شسوي هسع لا اگدر اصرخ ولا اطلع

ثنيت على رگبي وگلبي يطرد وادحگ على استاذي نايم وصاد غادي وشاد راسه ورجله

اخذت فتره صافنه ويه نفسي

واريد استوعب گمت بهدوء يم اذن جوانه اگعدها بصوت ناصي بس گلبي يفور دم عليها هاي شلون هيج تسوي

ليال : گومي جوانه اگعدي خن انضف المكان

ــ ساكته ما تفعل تجاوب

گومي عفيه حبابه هسع يشوفنه

جوانه : ما اگوم اغفي اليد انام

ليال : يول گومي الله عليج گوميي

جوانه : وخلي عني اني نايمه بعدني ما گعدت

ليال : لزمت راسي بقهر واعصر بأديني اريد ادبج عليها بس خاف تصرخ ويگعد استاذي شلون هسع وهاي تنبلت قيدتني ما اگدر احاجيها متت من القهر شگد عيب يربي

امل : رجعنه عالبيت الصبح وعمتي تلوب وما تگدر تفتح عينها وصلنه البيت شالها حميد وداها عالحجره

نومها وشكل المغذي وطلع

واني امشي وراه اسحل بروحي من التعب والقهر

فتحت باب حجرتي ادور ابني علي وينه

رحت على حجرة صبره فتحتها شفتها نايمه وفارشه بصفها لجاهد وعلي سديت الباب ورجعت يم عمتي معاضد

ادحگ عليها جسد بدون روح

تنهدت ومددت بالگاع وحل عليه التعب وكلشي جنت متحملته غفيت ما اندل بروحي

ليال : على حطتي الوب بالحجره

واعصر بأديني گعدت على حافة الجربايه

وافور من القهر على جوانه ادحگ عليها توخر الغطه وادحگ عليه بتك عين وما اگدر كلشي اسوي اخاف من صوتها تگوم تلعلع وتگعد الرجال

اعض بشفتي واتوسل بيها همس اني تگوم وهيه ترفعلي بحواجبها بمعنى لا وتغطي راسها

اندگ الباب عرفته شكحه حفظت دگتها من البارحه بس ما فتحت الباب خاف يعيط،بيه استاذي

گعد هو بملل وشال المشده عن راسه جانت ناصله

دحگ عليه وجان يگلي ارجعي مددي لا تگفين

ليال : عصرت اديني وين امدد فوگ طبله جوانه ردت ابجي من الفشله والقهر الي عشته طاوعته ورحت رفعت الجرجف ودحست نفسي فوگ الطبله

فتح الباب شوي وجان يگللها

صائب :ها خير

شكحه : صباح الخير وليدي اگعد عاد مو عوايدك نوم متأخر ندري عريس بس تجيك وادم هسع عود اذا تحب ظل نايم بس وينها ليال اريد ارتبها هسع تجي نسوان تشوفها

صائب : ليال نايمه والنسوان شعدها تجي علينه من الغبشه

شكحه : يبو انگلب الزلمه اي غبشه وليدي ساعه 9 ونص شنهي ساعتك وگفت

ليال : سد الباب بوجه امه وستغرب تخوصر وحك راسه ويهمس

صائب : بالتسعه واني نايم

ــ دنگ وشال ساعته من الميز فرك گصته وسند نفسه عالميز داخ

رجع توازن وجان يگول

صائب : ليال گومي اگلج

ليال :گمت وگفت يمه واني بالي يم جوانه شلون راح احجيله بلل شفايفه ودحگ عليه

صائب : اني راح اخذ ملابس اسبح خوش انتي اقفلي باب الحجره عليج اذا تظل امي ادگ بالباب سنه لا تفتحين ليما ارجع اني

ليال : هزيت راسي بــ اي وجان اخذ ملابس وطلع مجرد سديت الباب وراه رجعت على جوانه شلتها ردت ارجدها بالگاع گامت تصرخ وتوسل بيه

نزلتها من الجربايه خليتها عالصبه بصف الباب ولميت الجرجف من الجربايه وحت دشداشتي الي دمرت

گمت احوص شسوي هسع شلون اغسلهن وشلون انظف الجربايه الدواشگ تگطر الله يعثرج

هاذ فايض علينه الشط

اندگ الباب وجان اگف گلت منو

شكحه : هاي افتحيلي الباب

ليال : لا والله ما افتح

شكحه : شنهي لا والله افتحييي الباب

ليال : والله ما افتح استاذي گالي لا تفتحين

گامت ترجد بالباب وتعيط وجوانه مجلبه بيه تگلي لا تفتحين هسع يشوفوني

ليال : هو اني ما اريد افتح الباب لخاطر فضيحتج يا نذله اني اعلمج بس نرجع عالبيت

مستمره شكحه ادگ وترجد وما فتحت لحد ما سمعتها تكاون ويه استاذي بره

شكحه : شنهاي صائب موصي البنيه ما تفتحلي الباب من هسع بلشت والله مع الأسف عليك قابل شريد اسويلها

صائب : يمه وخري من دربي لو طبيتي عالحجره شراح تستفادين البنيه تستحي وخري

ليال : فتح الباب وفات وجان يسرگه واگف ينشف بشعره وجان يمسد على راسي گال عفيه من سمعتي الكلام

اخذ نظره عالجربايه استغرب الوضع شلون اني گلبتها

صد عليه وقبل لا يسأل

جاوبت جوانه

جوانه : هاي مو اني طبلت هاي ليال

ليال : تصنمت وتمنيت اختفي بهاي اللحظه

گالتها وحتمت بيه ختلت ورايه

دنگ عليها وجان يگول

صائب : ليال مو اي ادري بيها وانتي الزينه الي ما تطلع منج العيبه

ليال :گرصها من خدها وجان تكيف دنگت راسي

گتله هسع انظف الحجره استاذي

راح عالكنتور يعرج ويحجي

صائب : هسع ننظفها ما صار شي انتي تعاي اگلج

ليال : شلعت ايد جوانه من ثوبي گوه ورحت يمه

طلع ملابس وجان يحطهن بأيدي

صائب : احم وهسع راح اطلع وياج تسبحين

ليال : كيفت اني ردت اطلب منه بس خفت يفشلني وما يفعل اخذت الملابس وتشكرته

مشيت وجان ارجع ادحگ علي طلبت منه اسبح جوانه ويايه واريدلها ملابس

جاوبني بدون ما يلتفت وهو جاي يعزل بملابسه الي لصتهم اني البارحه

صائب : اي ميخالف هسع ناخذها

ليال : رحت وگفت يم جوانه وانتظر يخلص تا نروح.

سألته انوب استاذي والحجره لازم ننظفها هسع ونغسل الدواشگ قبل لا اروح لهلي

صد عليه وجان يگول

صائب : هسع اني اطلعهن انتي لا تجوسين شي

ليال : بتسمت وجان يجي اخذ مناشف وگال يالله عالحمام وصلنه وجان ينطيني المناشف وگال

صائب : لا تفتحين باب الحمام لحد ولا تطلعين الا اجي اني اناديج

ليال : استغربت جثير هاذ شبي معقوله اهله يفوتون ويه الواحد من يسبح ردت اسأله بس جوانه جرت ايدي وطبينه عالحمام

بلشت بيها اول سبحتها جلفتها جلف نشفتها وجان اوگفها على صفحه وهسع ظليت اني شلون اسبح يم هاي. الي تسولف كلشي گدام الناس

اجه ابالي هددتها

ليال : اسمعي راح انزع ملابسي كلها واسبح اذا حجيتي لحد وفضحتيني مثل ما فضحتي ديالا مره تره اگول لكل جهال الديره انج طبلتي يم الوادم خووش

هزت راسها وبرطمت

ليال : يالله دحگي غاد وسدي عيونج

گمت اسبح واجلف بروحي

خوش سبحتني جوانه من صباحيات الله وينج يا ديالا تشوفين حالي

كملت واخذت المنشفه وجاي انشف نفسي

اجاني صوت استاذي

صائب : ها ليال خلصتي

ليال : بعدني ما جاوبت وجان تنط جوانه

جوانه : هي لا تفوت ليال مصلخه ود…... طالعه

ليال : سديت اثمها وگمت ابلعم اي بالله هسع طلعنه

صائب : يالله انتظرج

ليال : عضيت جوانه من راسها من قهري گامت تعيط تستاهلين على هاذ الضيم الي عشته والفشلات

بدلت بسااع وطلعت

اول ما فتحت الباب ناوشني استاذي منشفه

صائب : هاج لفي شعرج

جوانه : واني هم اريد

صائب : هوه انتي منشفه وحده لافتج ليال صايره دولمايه

ليال : اخذ جوانه شالها وراح يعرج من رجله خطيه استاذي هسع رجله توجعه

وگف وجان يگلي يالله فضيني تعاي

لحگته وجان افوت عالحجره لگيته مطلع فرشها كله

وحت الجربايه طالعها شگد عيب يربي الله لا يوفقج جوانه على هاي الصگعه

گعدنه بالگاع

نزل جوانه وجان يگول

صائب : دزيت سعد يجيب ملابس لجوانه اشو طس غير طسه

ليال : عش دزينه مو احنه راح نروح.

وگف وعگد حواجبه وراح سرگ الباب حيل اجه گعد يمي دنگ بالگاع وگال

صائب : لا ليال ما تروحين لمكان هاذ بيتج هسع

ليال : شلون هاذ بيتي هسع مو گلت توديني لهلي الصبح

صائب : احم اسمعي ليال احنه تزوجنه تعرفين هاذ الشي مو

ليال : دنگت راسي عصرت اديني هزيت راسي بــ اي

صائب : خوش عجل وانتي زوجتي والمزوجة لازم تسكن ويه زوجها تعرفين هالشي مو

ليال : دحگتله بتوسل واعصر بثوبي

استاذي اني ما ردت اتزوجك انته والله حميد جبرني وضربني اني اريد اتزوج ماجد

عاط بيه وضرب ايده عالصبه

صائب : لا تگولين ماجد لا تجيبين طاري هاذ النذل انتي صرتي زوجتي وطلعه من هاذ البيت ماكو فتهمتي

ليال : سديت اذاني وگمت ابجي وجوانه حضنت ضهري وخافت دنگت ورجعت اصريت

اني ما اريد اظل هين ما اريد اتزوج احد اصلاً اريد ارجع

گلتلها وگمت من مكاني افتح الباب

لزمني من ايدي عصرها وخزرني لزگني بالحايط حطيت ايدي على وجهي خفت منه هاذ ابد مو استاذي

صائب : ما يصير هسع ترجعين لهلج ما يصير انتي صرتي متزوجه افهمي عاد

ليما تمر سبع ايام عود اني اوديج بنفسي بشرط اذا سمعتي كلامي ونفذتي بالحرف غير هاذ الحجي تحلمين تشوفين اهلج افتهمتييي

ليال : دمعن عيوني وگلت ليش عود اني شنو سويت استاذ والله ما اتذكر سويت شي

ضرب كف ايده بالحايط وگال

صائب : هو هاذ ذنبج يا ليال انج ما سويتي شي

لا تزيديها عليه بابا اسمعي الكلام طلعه من هين ماكو الا اقرر اني

ليال : مسحت دموعي برداني وگلت امت تقرر استاذ والله اسمع الكلام بس رجعني اني ما اريد اتزوج بعدني زغيره امل تگول

عض شفته وهز راسه بأسف گال

صائب : ادري والله ادري بس اذا سويتي مثل ما گتلج وعد مني ارجعج عالبيت وعد مني هاذ

ليال : شنو اسوي استاذي حجيتها بغصه

صائب : تسمعين كلامي وتنفذي

ليال : اي والله

صائب : تعاي اگعدي

ليال : گعد تك ركبه ويتنفس سريع

صائب : اسمعي ليال وركزي ويايه خوش

ليال : مسحت دموعي الي ما تفعل تركد وهزيت راسي بــ اي

صائب : اول شي تنسين مخلوق اسمه ماجد نهائييي

وثاني شي اذا امنعج من شي ما تعاندين وتسألين وذا اطلب شي تنفذين بدون كثرة سؤلات اذا صرتي حبابه اوديج لهلج خوش

ليال : عصرت اديني وگلت ليش شبي ماجد

رجع ضرب الصبه وگال

صائب : انسيييي ماجد انسي لا تجيبين اسمه نهائي افهمي

وذا صار واحد من الناس انجان من اهلي او من غيره سألوج شصار بليلة عرسج اياج يا ليال اياج تنطقين بحرف واحد

ليال : ستغربت شنو ليلة عرسي وليش يسألون

ـ كمل

صائب : ممنوع منع باتاً يطلع حرف واحد من هاي الحجره لو يظل يسألون سنه لا تجاوبين وذا ما گدرتي ناديني ايااج تخلين احد يسألج شي عيب فتهمتييي

ليال : استمعله واهز براسي اي وكلشي مجاي افتهم منه ظل ساعه يحجي

فرك كصته وجان يستغفر اندگ الباب گام فتحه رجع انطاني ملابس جوانه وطلع وگال

صائب : تعاي سدي الباب ورايه ممنوع تفتحي وهاذ هم من ضمن الوصايه من اطلع. الباب ينسد وما ينفتح

ليال :اخذتهن وسديت الباب بدلتلها وافكر والف سؤال يجي ابالي لييش هيج صار وليش الكل يمنعني من ماجد والله هو حباب

وبس اطلع منا وارجع لبيتنا اروح ويا لبغداد وما اظل بعد هين رجع وره شويه وجايبلي ريوگ گعدنه نتريگ اغص باللگمه مجاي تنبلع ما احب هالمكان يربي شلون راح اصبر

اجت شكحه ودگت الباب

گام فتحه عالنص يحجي وياهه وهي تحاول تبوگ نظرات عالحجره تريد تشوفني

حط ايده وگال

صائب : يمه شتريدين

شكحه : وليدي لا تخبل تره كلها عرست خليني افوت اشوف البنيه هاي عروس وليدي يجوز تمرضت تأذت تحتاج شي وتستحي تگلك.

صائب : تكفلت بكلشي وزينه البنت ما تحتاج شي اني مو جاهل يمه

شكحه :زين وليدي هاي شلون جوانه مگابلتك انته وعروستك جيبها اوديها لهلها

صائب : ما يحتاج اني اريدها يم ليال ليما تعود علينه

گالها وسد الباب ورجع يتريگ

صائب : تردين شي ليال

ليال : لا ما حجيت

صائب : ادري ما حجيتي واعرف كلشي غريب عليج ميخالف ويه الوكت تفهمين مو بابا

ليال : ابتسمت وهزيت راسي اي

سعاد : ثاني يوم زواج صائب اجه رجعلنه التلفون

وگال لغازي

صائب : اذا تريد تخبر ماجد خبره

انتظره يتصل وابشره بزواجي بس ما اتصل علينه اشو من الصبح حطيت التلفون ولا اتصل

سعاد : تخبل غازي وگام يرجد بروحه وهو الليل ما نامه خاصة من سمع بي متمم زواجه من ليال انرعص

غازي : سمعتي يا سعاد سمعتي الهلاهل اني كل ضني جان صائب بس عقد عالبنت كسرة خشم لماجد جنت عبالي جم شهر ويعوفها وهسع يگولون تمم زواجه وصارت مرته شلون يا سعاد شلون اله نفس شلون گلبه انطا

سعاد : خله هو وربه ينجاز انته عليش واره روحك شعليك فهمني كافي تصيح اريد انام

غازي : نامي سعاد نامي خليني بضيمي

سعاد : اجذب اذا اگول نمت لابت روحي افكر بالبنيه خاصة من بگت نفسي ورحت خطف اشوف الوضع وطلعت شكحه شايله الجرجف بي النيشان متت بدمي ولعبت نفسي من صائب

انوب شكحه مكيفه عبالك ابنها مسوي انجاز عظيم

وطايره بسوالف النسوان من يگولن حقه ابنج

ما يطلع ويشوفنه العروس غير تخبل صلاوات

يخاف عليها من العين

ــ والله شكحه خوش صبرتي ولگيتي بنيه جنها العافيه

حلوة الحلوات

گامت شكحه تبخر البيت وتطرد العيون وتقرا المعوذات ورافده ااخ حال الضيم حالها من عرفت صائب تمم زواجه تخبلت

ما گدرت اطول رجعت والقهر بيه موتني

امل : ما حسيت على روحي للضهر اسمع صوت علي يبجي گمت بتعب هموم الدنيا كلها عليه ما گدرت حت اشيله يبجي جوعان وجاهد هم يمه يبجي يريد اكل

جاهد : امل راح نموت من الجوع لا تريگنه ولا تغدينه

امل : غمضت عيوني بأسف حت المكسر اذا شاف جهال جوعانه راح يجي الحيل وينطيهم اكل

اريد افتهم صبره شنهي من طينه

دحگت على عمتي معاضد نايمه وتعن وجفونها مورمه

سديت الباب عليها ما اريدها تگعد

ورحت عالمطبخ اسوي اكل للجهال

اشتغل ودموعي تصب على ليال اگهد بعبرة انهاريت گامت الغراض تگع من ايدي

دگ التلفون استغربت ورحت ركض هاذ امت رجعو

شلت السماعه الو واجاني صوته

ماجد : انعل بليسج ااامل انعل بليسج وينكم لخاطر الله ميتين خوما ميتين

امل : سديت اثمي اكتم صوت البجي واعض بصبعي

ماجد : وينج لخاطر الله ما تحجين اامل يمعوده… ..

امل : استغفر ربك ماجد

ماجد : خليتو بيها استغفار گليلي شنهي نهجمت الرمادي من طلعت منها كل التلفونات تعطل بيوم واحد شصاير فهموني

امل : مو احنه شسمه

ماجد : امل ليال وينهااا وروح ابوج امل اريد احجي وياهه ما عندي وقت جثير ينادوني

امل : امسح بدموعي واعض بشفتي هاذ شلون اگله

ماجد : يمعوده وين رحتي

امل : اجه على بالي الي گلته ومدري ليش خفيت علي ماجد گتله ليال يم فاتن هيه وديالا راحن يعاوننها

ماجد : شوداهاا

امل : فاتن مريضه وراحن

سده بوجهي ما خلاني اكمل كلامي

رجعت عالمطبخ اسحل بنفسي اني هم. انگردت

سعاد : مر 9 ايام على زواج صائب والوضع نسمعه هدوء مالهم حس من بعد المشكله الي سواهه عماد وختفه ورادت تصير حرب بيومها

ابد ما شفت ليال طلعت ابد

وبركات من يجي يگول صائب ما يخليها تطلع يمنه ولا تاكل ويانه

غازي : شنهي متخبل ما ظال بي خيط ناصح

بركات : فوگ ما تتصور البنيه صارلها من العرس امي تريد تشوفها وتحجي وياهه ومجاي يخليها حت عالحمام يروح يگفلها واكل يوديلها عالحجره

غازي : تحجي كل عقلك مو

بركات : اي والله شبيك امي گامت تلطم وتصيح

غازي : شبي صائب معقوله مدللها عود لو شيريد يثبت

بركات : عوفك منه هسع گلي شلون على ماجد هاذ كل ما يتصل ما نخلي صائب يحجي ويا تلگاني مگابل التلفون ليل ونهار تعبت شلون اذا اجه

غازي : عجل اني شگول خبلني اول ما شديت التلفون ثاني يوم العرس عبالك جان مگابله اتصل بس شلت السماعه استلمني غلط ومسبه ما خله

جذبت الف جذبه يا بركات ومن ضمنها گلت عطل بكل التلفونات ما گدرت احجيله شي عاد گال راح اخابرهم مدري خابرهم لو بعده

بركات : وذا خابرهم هسع همه بحاله لو بحال ولدهم الي ختفو

غازي : ااوف والله مدري هسع عماد وحميد شحالهم ما سمعت عنهم شي

بركات : والله كل الي اعرفه جاي رجال ملثم وماخذهم

غازي : مصيبه يربي شيريد منهم شنهي اخذهم يريد فلوس لو سلبهم راح اتخبل البيت بس النسوان بي

سعاد : عفت بركات وغازي يحجون واخذت السله ورحت احوي باميه وصلت الممشى وجان ادحگ عالشارع هاذ ماجد شايل جنطته والنضاره بيده

ظليت متصنمه فات من يمي وسلم عليه مشه بتجاه بيتهم

يتبع……… .عرين الصياد