رواية عرين الصياد الفصل الثاني والعشرين 22 بقلم شذرة العدوان

الفصل 22

بقلمي شذرة العدوان

ديالا : ليال من يوم الي راح ماجد وهي تون وتبجي

ودردم سوت بيه كأبه مرات يتصل ماجد وتروح تحجي ويا مدري شيگللها تجي تضحك وتصفگ

صارت مزاجيه محد يفهم منها شي ساعه ضحك ساعه بجي واحنه منطيها على گد عقلها محد يحاجيها حت حميد گام يدللها ويجيبلها هدايه في سبيل يسد بوزها

بيوم جنه گاعدين نتغده واجه عماد يمشي سريع ناده امل گال بساع لمي هدومي عندي روحه لبغداد ويه الدراويش

امل : ديالا تعاي ويايه الزمي ابني المصگوع

تا الم هدوم اخيج

رحت وياهه وگامت تلم بهدومه بساع جان حيل مستعجل وگال تره حتمال نظل اسبوع او اكثر لا يظل بالكم عليه

واحنه واگفين دگ التلفون راح عماد يحجي شويه وسده واجه

امل : خير منهو اتصل

عماد : هاي فاتن اتصلت تگول جيبلي ديالا تعاوني خطيه مريضه وگوه تحجي

امل : خطيه الله يعينها فاتن هم نگردت بهل مرض

عماد : الله يعين ها شگلتي ديالا تروحين

ديالا : صراحه كيفت اطلع من البيت الي صاير ملل وما ينجرع ابد ويوميه طلبه گلت اسأل امي خاف متفعل اروح

راح عماد يسألها واجه گال لمي هدومج اخذج بدربي امي ما عدها عتراض

رحت الم هدومي وجان تجيني صبره تفر بسبحتها گالت عود عينج من اخيتج اشتغلي زين وديري بالج تمدين ايدج وتبوگين مثل هذيج الخدامه تره اگص ايدج اذا سمعت شي يخزي منج

ولا تحطين عينج على فلوس اختج

ظليت مبهوته وصافنه عليها هديت الملابس من ايدي

ردت ابطل الا ناداني عماد بصوت عالي يااالله ديالا فضيني

اخذت نفس وزفرته وگلت بگلبي ما اخليج تخربين واهسي اهم شي اطلع من يمج اخذت هدومي وطلعت ويا عماد وتلزمنه ليال تشاهگ وبجي

ليال :اخذوني وياكم لا تعوفوني

ديالا :گوه قنعها عماد تظل الا گاللها من ارجع كلنه نروح يم فاتن

مشينه وصلنه الفلكه وتگفنه سياره ونروح

اول ما وصلنه بيت فاتن شفت حيدر گاعد بالباب مالهم حدرنه وتسالم هوه وعماد طبينه جوه عماد سلم على فاتن وصاها بنفسها وبيه وراح لبغداد

خطيه فاتن جانت تعبانه وشاده كانوله من شافتنه شهگت وگامت تبجي

طبيت بساع بدلت هدومي وعزلت حجرتها وشلت ابنها الزغير جان يعيط اخذته بدلتله

ودرويش اجه حيدر اخذه

رغم من وصلت ما گعدت كله شغل

الي اگدر علي طبعا لا اخبز ولا اطبخ

بس ما حسيت بتعب تغيرت نفسيتي ارتحت

الخبز والطبخ يجيهم من غير بيت يروح حيدر يجيبه

لليل حسيت نفسية فاتن تغيرت گامت تحجي وتضحك

فاتن : الضوجه ذبحتني ومريضه وجهالي على ايدي ومعد نأمن نجيب خدامه همزين اجيتي حيل كيفت

ديالا : والله حت اني كيفت اجاني باب فرج من اتصلتي البيت ملل وطلعان روح

وگمت احجيلها شصار وراهه

سعاد : راح ماجد بس الوضع ما هجد

صائب تخبل نهائي گام يصيح يدور لماجد يگول هزمتو دلوني وين راح وكل شوي يهجم على غازي يصيح علي

اني ظليت بين حانه ومانه احجي لو اسكت

تذكرت كلام اهلي قبل لا يجي غازي يزفني بساعه كلها وصتني واأولهم صياد ابن العم

صياد :مبارك بنت العم عساها جوازة الدهر

وتنسعدين ويرتاح بالج

انتي راح تروحين جنة على ناس غربه

ما جانت عدنه نيه ننطيج الهذول

بس ما ردنه نگف بقسمتج ودربج وغازي خوش انسان نبشت جده السابع يالله رضيت انطيج اله

ــ عاد اسمعي يا سعاد وخلي الحجي ترجيه بأذنج وانا اخوج اطبين بيت عيالج خرسه وعميا وطرشه

اذا تور الديره انتي خليج على طرف ولا تدخلين ابد

اريد اخبارج تصلني دوم تسر الخاطر اريد ترفعين روسنه جدام الغربه مثل ما عمتي رفعت روسنه بالسعودية ،،،،،

رجعت من تفكيري وظليت الوب كل ما اريد احجي لغازي عن الي شفته

اتذكر كلام اهلي وصياد واتراجع اخاف تصير عليه طلبه وتصل اهلي وتخرب بيني وبين غازي افكار جثيره لخبطت عقلي حيل اخاف اخسر غازي

اخذت نفس وزفرته بعصبيه زين هوه صائب هالگد عامي الحقد ما يدحگ على اخو جان مو بوعيه ومجاي يتذكر ليش ما يفهم ليش عامي الحقد ويريد يكتل ماجد شايل سجينته ويتهدد خله اهله بثاني حال الله يهدي النفوس بينهم گمت ادعيلهم حت بصلاتي

ما حرگ دمي غير نضال بدال ما تهدي النفوس وتحجي وتبرر على اقل احجيلج كلمه وطفي نار هالوادم

لا اكتفت بالسكوت ومن ثاني يوم خلت بركات يوديها لهلها وظل صائب يرجد بروحه

ماجد جان يوميه يتصل ويتهدد يريد يجي وغازي يگله ممنوع اذا ما اني اخابرك لا تجي ابد

وخطيه يسأل ويريد يعرف صائب ليش تخبل يگول لغازي بس فهمني صائب شبي ما حجالك اني شسويتله كل ما اسمع كلامه گلبي يوجعني اريد احجيله منا مستحيه شلون اگله شفتك بوضع ويه نضال يخزي ومنا اخاف تكبر السالفه وتنجب براسي وهاي شكحه ما ترضه احد يجيب طاري ولدها بالموزين من اول ما فتت بيتنا غازي حذرني منها

وبيوم العصر گاعده لايبه روحي اعزل بملابس غازي واهجس ريحتهم مو طيبه رغم نضيفات

وصدري مورم واهجسه نار

لزمت راسي وگعدت بالگاع دخت عفت الحجره مدعوله سحبت مخده ومددت

اجاني غازي

غازي : شنهاي الحجره سعاد فايت بيها ثور

سعاد : بعدين اعزلها دايخه دنگ عليه وباس راسي

غازي : شبيج يروحي اشو تعبانه مريضه گومي اوديج

سعاد : مابيه شي بس دايخه يمكن عبن ظليت مدنگه واعزل وريحة البخور الي شعلته عمتي لعبت روحي

غازي : هيه غير لو امي تبطل تشعل هالبخور حت ريحته جايفه

سعاد : ياريت اطفي لعب روحي

راح غازي يدور للبخور تا يطفي شويه واجاني

غازي : حنگه (تذكرت) اليوم شفت اخوج وعاتبني گل اشو ما تجيب سعاد وهددني اذا ما اخذج اليوم يجي يهجم علينه ويحرمني منج شهر

سعاد : ههه عوايدهم ما عدهم حل وسط

غازي : اي والله انوب ويا ابن عمج صياد غير من شفته ردت ازوع العافيه

سعاد : شبي صياد ..

غازي : يمعوده لحيته واصله صدره وشعره مهوش يخوف يا ستار

سعاد : هاذ عبن محزن على اخو مشعل هسع شلون نروح لهلي شگلت لخوي

غازي : ااخ اي نروح امري لله گتله اني اجيبها عجل نظل ويجوني اهلج المصاگيع ياخذونج مني بس مو اليوم باجر ان شاء الله نجفتهم من الصبح وما نجي لليل بلكت يشبعون

سعاد : هاذ هو الي تشوفه

غازي : حياتي شبلاج گومي اوديج عالطبيب اشو تجرين السالفه جر

سعاد : مابيه شي عمري هسع اصير زينه

ظل غازي يمي يمسد على راسي ليما غفيت

ــ ثاني يوم گعدنه من الصبح كملنه تانروح لهلي وهيرنه عمتي وما فعلت تگول فحانه مشينه وصلنه بيت اهلي اشو قافلين الباب وماكو ولا نفس

حدر غازي سأل جيرانه

گال كلهم راحو يم بيت الشيخ علوان عازمينهم

سعاد :هاي شلون راحت عن بالي اليوم جمعة وصياد كل جمعة يعزم العمام كلهم

غازي : عجل يالله نرجع ونجيهم غير نوبه

سعاد : لا عليك الله خن نروح هسع البنوات كلهن ملتمات واهلي غادي امشي غزوزي

غازي : ههه حلوه هاي مال غزوزي سعوده عيب نروح جفت عالوادم بدون عزيمه

سعاد : بس امشي احسن شي الجفت بدون عزيمه هم اريدها حجه تا اكاونهم ليش محد عزمني

غازي : گامت ادور كوان وطلايب اني شورطني يالله امشي

بيت الشيخ علوان… .

سعاد : رحنه على بيت عمي علوان من بعيد ادحگ السيارات ملتمه الكل موجود

اول ما حدرنه تلگانا صياد مشمر دشداشته وشايل سجين الضاهر يريد يذبح بالخرفان

غازي من كل عقله ختل ورايه وهمس بأذني سعاد امشي ننهزم عليج الله

نغزته بجسعي لا يسمعه صياد

صياد : الله حيهم

غازي : ومن گال يحيا السلام عليكم

صياد : وعليكم السلام شهل جيه الي تسر الخاطر

تعدو تعدو (تفضلو ) شلونج بنت العم

سعاد : بخير ونعمه انت شلونك عساك بخير

صياد : زرتونه انتو صرنه بخير نزهي بالنصر يالله تعدو جوه لا تظل واجفين هين نسيبنه الا برزايل تا تجون

غازي : لا يخوي اني يوميه اتوسل بسعاد تجي بس متفعل تگول ما صدگت افارج اهلي انوب ارجع عليهم

صياد : منصح هالحجي ول سعيده

سعاد : عضيت شفتي لغازي الجذاب بسيطه

غمزلي وراح ويه صياد عالزلم

واني طبيت جوه وتلگني بنوات عمي ونسوان صياد

بوس ومحاضن بالساعه شكثرهم ربعنه الله يزيدهم فحيت ردت اگعد بالباب

تغدينه وجانت احلى لمه الأهل والعمام كلهم

شفت الكل من عدا شاكر وعرب ماكو

عاد مشتاگتلهم والله سألت عليهم گالو طالعين بشغل عجيب اول مره عزيمة الجمعه وبيها نقص من ولد عمي

العصر طلعنه گعدنه بالثيله

ومزق وضحك ويه البنوات تونست جثير

ونسيت حت التعب الي بيه

ردنه نروح وما فعلو يخلونه گالو تعشون وتباتون هين جلب بينه صياد ما فعل عند خطيه طلع متهير يدزلنه سياره تجيبني بس اني الي جيت

وغازي من الخوف رضه يظل

راح گعد ويه الزلم واني ويه البنوات بالمطبخ لعبت نفسي من ريحة الطبخ وطلعت بره روحي لايبه

لفت وره البيت اگحز عن ريحة الطبخ

ظليت گاعده وحدي واشم هوا نضيف

الجو حلو الدنيا غوربت وبلش الظلام يختلط

سرحانه بتفكيري اني شبيه صارلي جم يوم مو على بعضي

غمضت عيوني ومددت عالممشى فززني صوت الباب نهضت نفسي وشفت شاكر يمشي بسااع يريد يطير وگف يم المخزن وناده نشمي مدري شحجه ويا

راح نشمي بتجاه الديوان يركض وطلع هوه وصياد

وگفو يم شاكر يحجون بتركيز ويلوحون بأديهم

صياد بسااع حط ايده على جتف شاكر ومشو مزرعدين

ظل نشمي واگف بمكانه متخوصر ناديته

فز يتلفت منين هالصوت اني ما ابين عبن بيناتنا

الدنگه جنت ادحگ بتك عين

اجه يمشي عليه تفاجئ

نشمي : هاا سعاد انتي ناديتي شعندج هين ؟

سعاد : نشمي يحجي ويتلفت ويحك براسه متوتر

سألته شبيك اشو شاكر اجه بساع وراح ما لحگت اسلم علي شعدهم

نشمي : ها ماكو شي عدهم شغل

سعاد : لا تجذب هي مو زعم صديقي وسرنه واحد

ــ اني ونشمي من زمان صحبه رغم اني اكبر منه بس سرنه واحد وما يضم عليه شي النفس ابيتهم يحجيليا

لحيت علي هسع عبن انتابني الفضول بجية شاكر وروحتهم ركض گمزت صياد وصفگت ايده تخوف

نشمي : راح اسولف بس ديري بالج تجيبين طاري الحجي هاذ ابويه محتمنه محد يحجي

سعاد : تدري بيه ما احجي لو مهما صار

نشمي : تعاي هناك نسولف خاف احد يجي

تدرين زهور تشم العلم وتودي لأبويه

سعاد : يالله احجي بسااع زهور جاي تسوي عشه

نشمي : ها يولي عجل اسمعي يمكن ابويه لگه جتال عمي مشعل

سعاد : حطيت ايدي على اثمي وگلبي نغزني شلون لگا ومنهو هاذ

نشمي : اسمعي ابويه من يوم انجتل عمي مشعل ما صتنصح الوضع وگام يراقب

سعاد : گعد نشمي دگ ركبه وحجالي كلشي بالتفصيل شلون صياد شاك ابيت الملا وشلون خله عليهم مراقبين بكل مكان

انصدمت صراحه بيت الملا خوش ناس ومستحيل الهم ايد بشي معقوله يضيحون بثلاثه منهم في سبيل ينجتل مشعل ما اصدگ ابد

ـــ لا ابوك متوهم هالنوبه يا نشمي

نشمي : يول اصبري افهمج شصار هسع

سعاد : يالله احجي لا تگطم الحجي

نشمي : هسع عمي شاكر مو جان مراقب المگبره

سعاد :اي ؟

نشمي : اي العصر عمي شاكر شايف واحد جاي يم الگبر مال الملا درويش وبنته وگايم ينحب ويبجي بعلات حسه عاد مسوين مثل ما موصيهم ابويه مراقبينه من بعيد ومندلين مكانه

سعاد : وهاي شعليها يا نشمي يجوز الرجال گرايبهم شكو بيها لو راح عالگبر يبجي

نشمي : واني شمدريني يمعوده بس خلي ابويه يخلص ويگطع نفسه كفيلج الله ما نشوفه صار صياد الليل ومن يجي صدفه يطب بحجرة عمي مشعل سواهه مزار

سعاد : الله يعينه مو هوه حيل يحب مشعل الله يرحمه

نشمي : مو بس شغلة يحبه ابويه جثير متغير طول الوكت حاير بزمانه وما يفعل يزين الا ياخذ الثار صاير جنه اهل الكهف ويكاون ذبان وجه

سعاد : والله مدري بعد الله يستر زين ليال بنت الملا شعليها ودز شاكر يدور وراهه

نشمي : علمي علمج هاي من اجه من صلاح الدين گبل كلف عمي شاكر بهاي المهمه وعمي شاكر حمد بالبنيه بس ابويه نفعل مدري شجاه

سعاد : اي والله خوش بنيات بس حظ ما عدهن

اني اگوم امدد اهجس نفسي ماني زينه

نشمي : شبلاج گومي نوديج عالدكتور

سعاد : لا تسلم شويه تعب وهسع يروح

طبيت جوه وافكر بكلام نشمي شلون صياد يخلي ناس تراقب بيت الملا انوب كل مكان يخصهم والله عيب شراح يستفاد

ـــ ظليت گاعده ولايبه روحي وعشه ما تعشيت يادوب صليت العشاه وجان انام ما اندل بروحي حت غازي نسيته

گعدت الصبح على صوت كواكب

كواكب : خايبه گومي رجلج ورنه ور يعبالي غبيناج عنه

سعاد : تمطيت بملل صباح الخير ام نشمي

كواكب : صباح الضهر يمعوده الساعه 9 ونص ورجلج واگف بره يريد يروح انتي شبلاج شهل نوم

سعاد : يبو يالعثره والله مدري شجاني اشو احب انام

كواكب : انوب اهلج راحو خطيه من شافوج نمتي رادو يتعللون وياج ونسدحتي وعفتيهم

سعاد : يالله عن غير نوبه خن اروح اشوف غازي

طلعت غسلت ونشفت وجهي حدر نشمي من فوگ مزنح حت ما لاحظني

طلعت بره واشوف الولد كلهم ملتمين وعرب وشاكر هم موجودين سلمت عليهم وباوستهم كيفو بجيتي

شاكر طبطب على جتفي ويمزق ويايه

ادحگ غازي ضاج

يربي شسوي هذول ولد عمي وطبعهم اذا ما اصافحهم وباوسهم يزعلون الوحيد صياد لا يصافح مره ولا يبوسها

اشرلي غازي بحواجبه زعم روحي غاد

طبيت جوه شفت نشمي يجهز اكل بصينيه

ويحاول يخفي تا محد يشوفه

وگفت بوجها عبالي اله گتله هاا يالجوعي طبعك ما مغيره

تهايگ حوالي يشوف احد يجي وگال وخري من دربي سعاد مستعجل طلع وهو متوتر ويتلفتت

قوست اثمي هاذ شبي حكيت راسي اني جوعانه بس مدري شنهي اكل مشتهيه شي ما اعرفه شنهي شيفت طماطه ملحتها وگعدت اكل

رجع نشمي بساااع گام يدور گلاص تا يصب جاي

يتفلت ومرتبك الا وگع الگلاص من ايده ونكسر

دنگ بالگاع يمسح بگصته ويدردم قلقني رحت يمه الم الگزاز

گتله شبيك نشمي

جاوب بنزعاج

نشمي : مابيه

سعاد : جذاب اعرف گول شبيك وروح مشعل احد حاجاك صياد صيح عليك

التفتت وراه يشوف احد يجي صد عليه وگال

نشمي : شحجي يا سعاد ابويه محتمنه ما نحجي لا تلحين تخسين

سعاد : گالها ورجع يلم الگزاز وطلب مني اصبله جاي بگلاص معد يگدر يتوازن ادينه ترجف حيل انقلقت

لزمته من ايده وحلفته بكل غالي شكو

بلل ريگه وگال

نشمي : مصيبه يا سعاد ابويه راح يبلينه

سعاد : شنهي يول شصار

همس ويتلفتت گال

نشمي : هاذ الزلمه الي شافو البارحه يم الگبر

سعاد : اي ؟

نشمي : ابويه راح جتفه وجابه من البارحه بالليل يا سعاد حاطه بالسرداب وطايح ضرب بالزلمه كشمه تكشم

سعاد : يالعثره منو هاذ ول نشمي شجاه ابوك

نشمي : مدري يا سعاد مدري كل الي اعرفه اسمه حامد

ابويه اول ما جابه گاله نورتني حامد وهسع وره ما شبعه ضرب وجلاليق گالي ودله اجل وجاي خله يتبوزع كفيلك الله احط اللگمه بأثمه وتنصل الزلمه ما ظل بي حيل اخاف يموت وابويه يبتلي ما مخلي مجان. بوجه عمار مصنفه تصنف

سعاد : يبو يالعثره يبوو

نشمي : اكرصي سعاد لحد يشوفج ابويه يذبحني اذا اسولف تخسين اكرصي لا تهبطين

سعاد : وهسع شلون عمي علوان يدري

نشمي : نصي حسج لا ينعل بليسج

علوان شنهي غير ابويه يور البيت اذا دره جدي اگضبي اثمج تخسين انطيني هالجاي الأگشر خن اودي

راح واني ظليت اعصر بأديني يمه شگد خفت

هاذ صياد شلون اله نفس ياكل وهو حاط واحد بالسرداب يعذب بي انوب طلعت امشي سريع وتصادمت ويا ردت اگع وجان يلزمني

صياد : الله الله شبلاج دحگي جدامج

سعاد : ادحگ ايده مخرمشه وبيها دم كشت روحي

تلبكت حت ما گتله شكرا من لزمني طلعت بساااع انادي غازي اجاني عاگد الحواجب

غازي : هاا اشوفج طابتلج الگعده هين

سعاد : لا ما طابتلي يالله نروح

غازي :شبيج وجهج اصفر

سعاد : مدري تعبانه يالله نروح

غازي : يالله هسع

سعاد : رحت لبست عبايتي وسلمت عالكل لحو عليه اظل بس اني روحي لايبه مگدر صحيح مو جديده علينه ربعنه طلايبهم بس ما گدرت اتحمل اسمع رجال بالسرداب جوه ايد صياد ويعذب بي انوب وصف نشمي خلاني اموت من الخوف

طلعت بره وجان اشوف صياد وغازي يم السياره

يالعثره هاذ صياد يريد يوصلنه

صعدت واني ضايجه والم بروحي

على شوي واطگ روحي واگوم اصيح

انوب عيني تجي على ايد صياد وهو لازم الستيرن

ايده مخرمشه عبالك جاين يضرب ببلوكه

ابلع بريگي اني مو بالعاده اخاف هيج زعم قويه حصرت نفسي ويه الباب تا متجي عيني على ايد صياد

وصلنه بيتنا وحدرت بساااع

طبگت الباب فز غازي وخزرني انتبهت على نفسي مو على بعضي صياد تجاهل وسلم على غازي وراح

فتت جوه نزعت عبايتي ولزمت راسي تعبانه حيل

اجاني غازي يعيط

غازي :شبيج سعاد هجمتي باب سيارة الزلمه

سعاد : هيه سياره يا غازي ارجوك عوفني ارتاح تعبانه مابيه

غازي : ماشي ارتاحي وهم عندي حجي وياج اريدج مصحصحه

سعاد : غلست عنه وقرفصت نفسي ونمت وما حسيت لليل گعدت لگيت عمتي مسويه عشه ومرتبه كلشي خلفله عليها گعدت وما ردت اكل وغازي ماد البوز متر

لمينه العشه وجبت الجاي صبيته الهم

ناوشت غازي الجاي وجان يجفت علينه بركات يعيط،

بركات : الحگني غازي الحگنييي

غازي : شكو شبلاك

بركات : هاذ صائب تخبل ما ظل براسه عقل

غازي : شبي شسوه ؟

بركات : اخذ عمامي وامي وراح تا يخطب ليال لنفسه

غازي : شنهي شجاي تهذيي

سعاد : حطيت ايدي على اثمي وصرخت بصدمه الكل انتبهلي

بركات : والله هاذ الي صار يا غازي دابرني شسوييي

غازي : هسع وينه صائب

بركات : بعده يمهم ما رجع گال ما ارجع اذا ما اخطب

غازي : امشي نلحگه

سعاد : طلعو بركات وغازي ركض لحگو صائب يم بيت الملا يربي شهل خبال هاذ زلم هاي الديره اطگع من زلمنه اشو عاد اني جنت مكيفه اخذت ناس مثقفين

امل : نار شتعلت بيه شسوي الطم اصرخ

صائب ختم كلامه لحميد اليوم لازم ينطي قراره تخبلت اسمع حجيهم واذاني احس تطلع منها نار مجاي اصدگ هاذ صائب المثقف مستحيل يا ناس شلون ترهم شلون اتحسس حرارتي خاف اني متوهمه

صائب : ها حميد شگلت اليوم الك تفكر براحتك

وترجعلي خبر الصبح لو تريد من هاي الگعده ونختم

حميد : يصير خير ان شاء الله افكر واردلك خبر

صائب : هاذ هو عجل نتوكل احنه

حميد : وين رايح خن نتعلل

صائب : مشكور عندي شغل جثير وهم اخليك براحتك تفكر زين من رخصتك نادي امي

امل : وخرت من الباب واني مصدومه حت عيوني ما ترمش رحت يم باب حجرة ليال اسمعها تگول لجاهد هوه المحبس يبين من ايدك عبن زغيره رص ايدك زين

حاطه ملفعي بأثمي گعدت بالگاع طلع حميد من الهول گال امل نادي خالتي شكحه صائب يريد يروح

گمت بدون ما احجي ويا اسحل بروحي

طبيت الحجره لگيت شكحه بعدها تكاون بعمتي معاضد بس منصيه حسها گلتلها صائب يناديج حفزت بساع وراحت الدمعه لايجه بعينها ودردم وتحسب

وصلهم حميد عالباب وعمتي معاضد ظلت گاعده گالت شجاهم والله ما تجره وتصير وهين نطقت عمتي صبره وصدمتنه

صبره : ميخالف معاضد هيه اول وتالي ليال راح تعرس وبدال ما ننطيها للغريب ننطيها لصائب خوش زلمه

معاضد : خايبه انتي كل عقلك لو جاي تمزقين

هوه ماجد ازغر من صائب وما انطينا شجاج انتي لو كيفتي عبن شكحه گالت صائب راح يبادل رافده بليال

صبره : هوه صحيح جريمه ليال تبادل وحده معدله مثل رافده بس هاي صارت وكلشي قسمه احمدي ربج واشكري

امل : علگت بين عمتي معاضد وصبره وحده تناوش وحده صبره متراهيه وتحجي عالكيف وعمتي معاضد ترجد بروحها طب حميد عالصوت وعاط بيهن

حميد : شعدجن گمتن تعلن حسجن

معاضد : تعال يابه حميد اسمع حجي امك راضيلها تزوج ليال لصائب

حميد : اي وشكو بيها شبي صائب

معاضد : يمه يالعثره شلون شبي يابه جبير ما يرهم وليال جاهل انتو مو زعم رفضتو ماجد لهسبب شجاك يابه حميد اشوف هم راضيلك

حميد : اي راضيلي وهذاك حجي واليوم حجي

اني مقتنع وجيت اخبركم باجر نعقد لصائب وليال واني ورافده حجي زايد ما اريد

امل : يمه تخبلت گلبي ينزف غيض لا يولو شجاي تسون عمتي معاضد فحطت واخذتها على حجرتها گامت تنحب سألت ليال شبيها امي گلتلها مريضه گعدت يم امها وگامت تفرج رجليها

رجعت بسااع على حميد افتهم منه هاذ اكيد مو واعي شيحجي هوه كل شوي برأي وگفت گدامه بالعين الجبيره خويه حميد انته ابو البيت والجبير على عيني وراسي بس تره ما ترهم منين ما تگلبها ما ترهم على اقل انتظر عماد يجي

نطتت صبره

صبره : وعش ينتظر عماد بالله ليش هوه مو زلمه مو عقله براسه لو من حقدكم محد يريد لحميد الخير من سمعتو راح ينطونه رافده گمتن ترجفن انتي وام رجلج

اسمعني وليدي حميد لحد يخربك هاذ الله جازاك على صبرك واخيراً راح افرح بيك باجر ان شاء الله نعقدلك على رافده بنيت خالتك مو گتلك من زمان البنيه يجي يوم وترضه بيك

وخاف احد يقنعك ويگلك ليال جاهل مو جاهل يابه دحگلها شطولها تعادل نسوان ثنين بس غير دللتوها وما لگت احد يوعيها ويعلمها هسع تشوفها شلون راح تعيش يم صائب ويسعدها وتسعده

امل : فاتحه اثمي وعيوني مصدومه شلون يا عالم هيج بشر يظلم لخاطر انانيته يولو طفله الله اكبر

ما خلتني صبره احجي دفعتني وطلعتني بره وگعدت يم حميد توز بي وتشجعه وهو مكيف راح ياخذ رافده وتگله شگد ما حاولت استعجل گبل لا يجي عماد ويخرب عليك

الوب مثل المره المعسره ما گدرت اغفي وعمتي معاضد تنحب وتدعي وتحسب وليال نامت ما تدري شضاملها القدر

سعاد : رجع غازي يفح من العصبيه لزم راسه گام يضربه راد يموت

سألته شصار رحتو على صائب وگفتو

غازي : رحنه يا سعاد رحنه تلاگينه بالطريق طلع خاطبها ومحصلها والصگعه مبدلها برافده شراح يصير هسع يربدنه ماجد والله ما يخلي يشم الهوا

سعاد : اعض بشفتي وامسح بگصتي اريد احجي ما اگدر يربي اخاف احد بيهم يجفص عليه و تصل لهلي ويجيني صياد يگوم يشيل زلم ويلگح بالسرداب حذرهم من اول ما زفوني محد يسمعني كلام شسوي يربي شسوي والله جريمه هاي الأخ شلون يغدر اخو

اذن الفجر وغازي يلوب ويحش جگاير ماكل هم ماجد عبن هوه دزه وتكفل صائب

امل : صبحت الدنيا وياريته مو صباح ياريت ما گعدنه

اول ما فتحت عيوني ركضت عالتلفون تا اتصل بفاتن وماجد مدري شگللهم وشلون احجي بس المهم اخبرهم

دورت اشو التلفون ماكو شنهي وين ختفه

للضهر واني اطحن بروحي حالتنه اني وعمتي معاضد ما يتمناها حت العدو ابجي ولازمه بطني موتتني بالوجع من قهري

شويه ويجي حميد يجمح وجايب ويا الشيخ الي يعقد

اخذه عالديوان واني واگفه بالشباك اعصر بالبرده اااخ يا عماد هاذ وكت روحتك هسع

اجه حميد مكيف گال هسع يجي صائب تا يعقد عود طلايب وحس نفس ما اريد فات بشر صبره وطلعت من حجرتها مكيفه

شلون ما تكيف راح تبني سعادة ابنها على حساب تعاسة ليال ورافده وماجد

الي مخبلني صائب شجاه شلون اله نفس والله جاي اجذب روحي اخاف اني بحلم هاذ صائب اثقف منه وارزن ماكو شجاه تخبل معقوله يريد ليال هم وعاشگها لا مستحيل اني سمعت نضال تگول صائب صارحني ورفضته عجل شجاه

سعاد : من صباحيات الله العياط علگان ابيت صائب

رحنه عليهم شفنه صائب شايل جلكان نفط ويتهدد يور البيت اذا وگفو بطريقه

ادحگ رافده لاطمه على وجها وحالتها تقهر

اخذتها ورحت لبيتنا اهدئ بيها

گعدت وگمات تنحب وتلطم

رافده : دابريني يا سعاد شسوي دابريني

وگعت ضحيه بين اخواني دمرونييي اني تالي صبري اروح مغصوبه لواحد ما اريده وعلى شنهو على انتقام ما يسوه والي قاهرني اخويه قدوتي هوه الي يريد ياخذني يسلمني لجلادي بيده شسويييي الله لا يوفقج يا نضااال

سعاد : الي فهمته من كلام رافده تعرف بسالفة نضال

گنبصت يمها ولزمت كتوفها سويت نفسي ما ادري گلتلها شنهي انتقام وشبيها نضال احجي بلكت الله نلگه حل

ــ عاطت

رافده :شنلگه يا سعاااد هاي نضال النذله تدري بصائب يحبها يعشقها توسلها الا مل وما رضت بي وانطاها مجال وعافها براحتهااا

وستسر بماجد وحجاله مشاعره ويه نضال

وصارلنه سنين نعرف وكاتمين وصائب يدحگلها من بعيد ويلوب بروحه

تالي بيوم العزيمه مال بركات لاگيهم صائب بوضع يخزي وشفتي بعينج شلون ضرب ماجد وكسره تكسر

سعاد : بس الي شفته ماجد ما جان بعويه تعذريني واضح سكران وما يندل بروحه يجوز صائب متوهم

لطمت رافده وعاطت

رافده : يولي والله حجينه ويااا الصبح من راح ماجد وگناله مو بوعيه ما يندل بروحه بس نضال گالت شنهي يعني تتهموني اني اجيتله وجان تكشف صدرها شوفتنه العضات والأثار برگبتها خلت صائب يرجد بروحه تخبل الزلمه يا سعاد تخبل

راحت نضال ويه بركات وجان يجيني گال اختاري

موت اخوج مقابل تزوجين حميد

شسوييي وافقت هددني يور البيت ويكتل روحه حلف الا يحرگ گلب ماجد مثل ما حرگ گلبه

سعاد : تره والله واضحه نضال ذبت نفسها على ماجد ما شفتي حت الصبح وبعده ما يندل بروحه ليش صائب مجاي يفهم.

رافده : ما يفهم لاااا صدگ نضال ويعبالي ماجد خانه اااخ يربي شسوي هسع

سعاد : خابري ماجد بلكت يجي يبررله ويحل الوضع

رافده : منين اخابره اذا صائب شال التلفون منين وتره حت تلفونكم شاله من الصبح تگاضب ويه غازي

حلف علينه اذا ماجد يجي هين او يسمع الا يور روحه تخيلي شال جلكان النفط وحطه بالحجره

سعاد : ظلت رافده تصيح واني الوب وياهه يربي شلون كسبان خطه شجاك ول صائب والله جنت اشوفك بالعين الجبيره

صار العياط بره وطلعنه انوب صائب هالنوبه شايل مسدس بدال السجين وينادي على رافده

لمت نفسها وطلعت گاللها يالله امشي نعقد الشيخ ابيت حميد

راحت وهيه تشاهگ ومحد گدر يمنعه الكل يلوب ويتگرضم

امل : وره ساعه ويجي صائب هوه ورافده وشكحه

رافده عبالك. جايه اعدام مورمه العيون ولاطمه وجها

وشكحه روحه تريد تطفر الي فتهمته من صبره شكحه ما عدها مانع تنطي رافده لحميد بس ما تريد ليال لواحد من ولدها طبو عالهول وظليت گاعده اريد اگوم ما اگدر

انوب اجاني حميد گال يالله ليال وينها امشي ناديها

شلون اناديها وهيه ما تدري رحت عالحجره ادگ الباب قافلته عمتي معاضد گنبصت بالباب وگمت اگهد واسمعها تنحب وليال تگللها يمه شبيج تبجين ليش قفلتي باب الحجره تره اني طبت ومعد انهزم

گمت ارجد براسي عالباب وينك يا عماد وينك.

اجه حميد متعصب وعاط بيه وينهااا لياااال

فزيت وجان يوخرني ويفتح بالباب مقفول گام يرجد بي ويدفع ويعيط الا كسره وفات

وعمتي معاضد معرته بليال ما تفعل تهدها وتوسل بحميد تخسه وليدي اخيتك لا تكسرها

فاتت صبره وعتتها منها وليال تلفتت ما تدري السالفة شنهي تقرا الحجي بالوجه ومصدومه

جرها حميد من ايدها طلعها بالصاله گاللها ليال اسمعي انتي اليوم راح تزوجين صائب هاذ الشيخ بالديوان وراح يجي عالهول يعقدلكم

انصدمت ليال وفتحت عيونها وگالت

ليال : استاذ صائب استاذي لا شلون اتزوجه

اني اريد اتزوج ماجد

امل : حميد هدها وجان يضربها راشدي لزمت وجها وگامت تبجي حضنتها ولزمت راسها وهيه مصدومه ومبرطمه تريد تفهم وحميد وصبره مستمرين بيها غلط وحجي اشكال يريدون ليال گوه توافق

وهاي معنده وترجد بروحها وتگول اني احب ماجد اريد اتزوجه هو

طاح بيها حميد دگ ضرب راشديات ودفرات

اني وعمتي معاضد انبطحنه عليها ونصيح نريد نفكها فقد حميد گام الضرب يگع بينه من الخوف والضرب گلتله اي اي اتزوجه بس كافي تضربني امانه

وگف حميد وهوه يتهدد

حميد : راح يجون هسع صائب والشيخ

وراح يسألج الشيخ موافقه گولي اييي وحميد وكيلي

فتهمتييي قسم بالله يا ليال اذا بعرتيها الا اذبحج خلاااص

امل : هزت ليال راسها بــ اي وكاتمه حسها بأيدها وطارف شفتها يطلع دم

اجو صائب والشيخ وطلعن رافده وشكحه من الحجره طبن عالهول مسويتها مناحه

رجع حميد اخذه ليال سحل

وحلف علينه اذا نلحگه ونحجي شي الا يكسرنه تكسر گبع ليال بلمفع صبره وطبو عالهول

عمتي معاضد داخت وديتها عالحجره نامت على بطنها نهد حيلها

رحت وگفت اباب الهول ادحگ ليال لابسه تنوره وقميص ومگبعه بالملفع وحميد لازمها من ايدها تخسه على غيرتك يا صائب شجاي تسوي وليش

ليال تشاهگ واگفه يم الشيخ وسألها انتي موافقه نوبتين عاد السؤال الا حميد رصها من جتفها گالت اي وصوت بحتها تشگ الگلب خلتني ارگع براسي

خلت حميد وكيل وجان تگودها صبره وتجيبها

صبره : مبروك ولو ما تستاهلين واحد مثل صائب

يتبع…