رواية عرين الصياد الفصل الحادي والعشرين 21 بقلم شذرة العدوان

مشيت بساع سبقت كريمه خجلانه من نفسي عبالك اني الي جنت ويه ماجد

وصلنه الممشى ونسمع صياح نضال

وگعن السكانات مني بسبب الهبطه رجعت كريمه تركض عليهم واني ظليت متنصمه گمت هم اسمع صياح كريمه طبيت وراهه ادري اني شجابني هين شجابني ما احب هالسوالف

رحت ركض عالهول صوت الصريخ يرج

طبيت شفت صائب لازم ماجد ويضرب بي بوكسيات

ونضال شعرها مهوش وسحاب ثوبها مفتوح وحالتها تخزي و تصيح على ماجد تريد تفكه وصائب فاقد الشعور يضرب بماجد بدون وجع گلب

وكريمه لازمه راسها وتصيح

زين اني شكو اجيت شسوي هسع

رجعت على بيتنا بسااع فزعت الولد

اجو بركات وغازي ركض يريدون يشيلون صائب من ماجد معد يگدرون

ماجد سكران يروط ما يگدر يدافع عن نفسه قميصه منزوع ويفرك بعيونه يريد يستوعب وصائب واگع بي دگ ضرب دفرات بوكسيات خله الدم يسفح من وجه

صگطه تصگط التمو الأهل كلهم ومحد جاي يفهم شي

يعبالون صائب يضرب ماجد عبن سكران

ما يدرون شافه ويه نضال بحاله تخزي

غازي وبركات شالو ماجد واخذو على غير حجره

خشمه ينزف دم وبعده ما يحس على روحه ويصيح ليال حبيبتي احبها ما اعوفها

اول مره اشوف صائب بهل حاله تخبل تغيرت كل شخصيته الهادئه كسر البيت سب غلط يفشر ما خله وراح جاب سجين من المطبخ يريد يكتل ماجد

علگت الدنيا بالصريخ اجو بركات وغازي وحمايه شالو صائب شيل واخذو على بيتنا ثلاثه مجلبين بي ويريد يطير من بين اديهم حطو بالحجره وما خلو يطلع

فقد الشعور بعد ما يندل بروحه وما يفعل يهد السجين لزمه غازي من وجه ويصيح علي شجاك صائب شجاك قابل اول مره يسكر ماجد عوفه من يصحه حاسبه

عاط صائب بنبره تشگ الگلب

صائب : يولو مو عالسم الي ياخذه مو عالسممم خانييي ماجد طعني بگلبي وبضهري عفت الناس كلها وانطيته سري تالي يطعني من اگللكم نفسه دنيه محد يصدگني خانييي يا غازي كسر گلبي حطمنيي

ــ لازم اكتله خلاص هاذ ما عنده محرمات قليل شرف

نذل هدوني اموته والله اليوم ما تصبح علي الدنيا هدونييي لو اكتله لو اكتل نفسي

ظل يعيط فرطت روحه وما يفعل يهدونه ومحد فاهم منه شي

غير اني فهمت الضاهر صائب يحب نضال اني لاحظته من اول ما اجت وعيونه عليها يراقبها

زين هيه ليش هيج تسوي شگد نزلت من عيني

ــ استقلت ماجد سكران ما يندل بروحه

تخزينه گدام الناس كلها سمعت صياح صائب من يتهدد ومشت الناس بدون ما يشربون الجاي صارت هالعزيمه سم على حظ بركات خطيه حت ملابسه تشگگو وهو يحاجز بين اخوته

امل : ولا گدرت انام واغمض عيوني

واحس على عماد نفسي ما اجاه نوم حاط ايده على عيونه سحبت ايده ونمت بحضنه حطيت ايدي على صدره احاول اهدي بدون ما احجي

هاذ الهم الي شايله عماد جبال ما تحمله

مسدت على صدره اريده ينام مرتاح

صد عليه وحضني وهمس گال اني لوما انتي اضيع

غمض عيونه وغفه يربي حت ما نگدر نعيش مثل الناس بسبب الصگعات الي تجي وحده وره الأخرى

بالي يم ليال بالله نامت لو بعدها گاعده

معاضد : شعنده عماد لاج ويه ماجد شكو

ديالا : يمه هاذ ماجد اجه يخطب ليال

معاضد : يبو يالعثره هاذ شبي نهبل عد تالي عمره

ديالا : تخبلت امي گامت تحجي بعصبيه بس متگدر تعلي صوتها وجان تنط ليال

ليال: ليش يمه ماجد خوش واحد حباب گالي راح اجي اخطبج اليوم.

بس اشو اجه وحده بدون اهله ولا زلم ويا هيه مو هيج الخطوبه غير تجي ناس جثيره

وعماد رزله اشو واخذني جوه عالحجره گالي ليال هاذ الحجي الي سمعتي بالهول لا تخلينه ابالج تره ماجد يمزق

ديالا : انتي شبيج تخبلتييي گعدي واسكتي هسع يسمعج عماد

ليال : ليش اسكت هاا ليش اني اريد اتزوج انتي شعليج

معاضد : يمه تخبلت البنت ديالا ناوشيني الشحاطه خن اگطعها عليها

ديالا : يولي لا تخبلين اصحي على روحج احنه بعدنه زغار ما نتزوج هسع الا نكبر گامت ليال تبجي

ليال : انتو شعليكم هاا هاي عبن ابويه مات تريد تضربيني اني اريد اتزوج واخص منكم

معاضد : ما اضربج تعاي گليلي شجابج على ماجد شلون طاوعتي احجي شگالج ورضيتيي

ليال : گالي ادللج واصير ابوج وين ما تريدين اخذج وكلشي اجيبلج

ديالا : ظلت ليال تبجي وتحجي ويه امي

بس امي تفور اعصاب منها لا تگدر تسكت ولا تگدر تضربها نخاف لا تمرض حطيت فراش ليال بيني وبين امي

وجان متفعل تنام هين گامت تريد تروح يم عماد

وصلت يم الباب وعاطت بيها امي رجعتها

گالتلها عيب برطمت وگعدت بالباب گامت تبجي وتشكي

ليال : كلشي بهاذ البيت معد ينحمل ليال لا تسوين هيج ليال اگعدي گومي لا تنفسين انتو شبيكم عليه شبيكم اني مگدر انطمر هين اريد يم عماد وامل(الناقله روعه الطائي)

معاضد : عيب يا بنتي عيب شلون تنامين يم المزوجين ما يصير حرام وانتي مره صرتي

ليال : لو بس تثبتون على رأي واحد انتو خوش

ماجد گال اريد ازوج ليال گلتو عليه جاهل وهسع اريد اولي ابات يم عماد وامل گلتو عليه صرت مره

معاضد : شو تعاي افليج واسولفلج الصحيح اني تدرين بيه ما اجذب عليج تعاي

ديالا : امي تنادي بليال وهاي مقرفصه يم الباب ومبرطمه ما تفعل تجي الا طبگ حس امي يالله گامت واجت دحست نفسها بالوسط حت جوانه الطفله مو مثلها

ــ گامت امي تمسد على شعرها وتحجيلها

معاضد : يالله مددي بحضني صلاوات اطول مني سولفي شبلاج شگد تبجين مو زين على عيونج يمه

ليال : محد يحبني كلكم تكرهوني وماجد عبن يحبني اشو ما تفعل تخلوني اتزوجه عماد رزله

معاضد : يالعثره زواج شنهي بعدج جاهل يمه ما يلام عماد اسكتي بعد لا تجيبين طاري هالحجي عيب

ليال : مو توج تگولين انتي صرتي مره وهسع غيرتي الحجي اشو

معاضد : ذاك شي وهاذ شي بنيتي انتي عيب تباتين يم المزوجين وعيب تسولفين بالزواج وتگولين اريد اعرس

ليال : ليش بس گلولي ليش عيب اتزوج مو كلها جاي تعرس

معاضد : واحنه شعلينه بالناس بنيتي گليلي انتي شنهي بنفسج تزوجين لو تدرسين وتصيرين دكتورة

ليال : ادرس واصير دكتورة بس رسبت اني

وماجد گال هاي المدرسة مو خوش اخذج ابغداد تدرسين

معاضد : هم رجعت گالت ماجد بنيتي لا تورمين گلبي هوه خلصان ارحميني ولا تزيدين همي هم ماجد ما يرهملج عيب بگد ابوج

ليال : لا مو بگد ابويه هوه بس طويل وگالي راح اصيرلج ابو وادللج

معاضد : جذب يمه محد ياخذ مكان الأب لو يصبج ذهب ويحط الگمر بيدج ما يصير مثل ابوج لا تصدگين يمه هاذ طمعان بسحرج الله يسامحه

ليال : شنهي يعني سحري

معاضد : نامي بنيتي كافي تهلوجين هالحجي مو داحمج مو هاي اخيتج ديالا دحگيلها اكبر منج وگاعده وساكته ما تحجي بسوالف عيب

ليال : بس الزواج مو عيب يمه مو كلها تزوجت وسوت عرس اشو بس من يمي عيب

معاضد : لا حول ولا قوة الا بالله العلي العظيم

زين انتي تعرفين شنهي زواج

ليال : اي اعرف يجهزون للعروس وتلبس بدلة عرس ويزفوها

واغاني وعرس عاد تسكن ويه رجلها وكل فتره تجي مسيره على اهلها ماجد گال يوميه اجيبج

معاضد : اخ يا ليال اخ بنيتي انتي مو مال تعرسين يمه بعدج زغيره البنت لازم تكبر وتفهم الزواج مسؤلية وانتي تريدين احد يهتم بيج مو تبتلين برجال يريد منج اهتمام انسي يمه لو اظل اسولف قرن ما راح تفهمين

ديالا : ظلت امي تحجي ويه ليال انها زغيره والزواج مو حلو وما يصير تحجي وتگول اريد اتزوج لحد ما ليال غفت وهيه تهذي بماجد يگول اصير ابوج

سعاد : صارت ساعه 12 وصائب بعده فاحط يشيل بروحه ويرگعها وما يفعل يشرح للولد الي شافه

بركات ظل يم صائب وغازي رجع على ماجد تا يفتهم منه اخذني ويا طبينه البيت الكل يگهد ونضال مقرفصه يم رافده وتبجي

وماجد على نومته بالحجره فات غازي گعده ويسأل بي شكو شصار بينك وبين صائب احجي

ماجد ما يفعل يحجي حت مو مركز ايده ما يگدر يشيلها سحله غازي من كتوفه وحطه بالحمام وفتح المي علي ويصفگ بوجه يريده يصحه ماكو(الناقله روعه الطائي)

ــ عافه بالحمام وطلع سأل الي بالبيت

غازي : بس فهموني شصار منهو بيكم جان موجود

وشاف شكو شبي صائب تخبل

سعاد : الكل ساكت محد جاوب ونضال مدنگه وتبلع بريگها

غازي : مو جاي احجي وياكممم استغفر الله يربي هسع اني شفتهم منهم واحد يروط ما يندل بروحه وهذاك متخبل شايل سجينته ويتهدد

بيت الشيخ علوان الساعة 11 مساءً

شاكر : نشمي يول نشمييي طرش

نشمي : هاا عمي

شاكر : وعمى صار ساعه انادي ابوك وين

نشمي : بحجرة عمي مشعل

عرب : اهوو هاذ صياد راح ينهبل قسم بالله لازم نشوفله صورة حال ونگشطه من حجرة مشعل

شاكر : انته شفته شغادي يخوف ما يفعل يزين لحيته وشعره غادي جنه الأسد

عرب : تدري بصياد ما يفك حزنه الا ياخذ الثار

شاكر : يمعود جتال مشعل حاله حال الطير الي يهدونه بالضباب ما تگلي شلون راح يلگا صياد

والله لعبت نفسنه صارلنه اشهر نراقب وكلشي ما شفنه خوما نظل طول عمرنه مجابلين الناس

عرب : والله مدري شگلك اني هم طگت روحي ومگدر اسولف ويا صايره روحه بطارف خشمه

بس گلبي يگلي يلگا لا تخاف صياد ما فد يوم راحتله طريده

روح نشمي ناد ابوك گله ينتظرونك عمامي يم السرداب

نشمي : يابه تسمحلي افوت

صياد : تعال

نشمي : يابه هذول عمي عرب وعمي شاكر ينتظرونك يم السرداب

صياد : جدك وين

نشمي : طلع صارله ربع ساعه

صياد : عجل نادهم هين

شاكر : ها نشمي وين ابوك

نشمي : يگول خلهم يجون عالحجرة مال عمي مشعل

عرب : يالله امشي بلكت تفض هالسالفة اريد اسويلي شغله عمله

شاكر : تسمح نفوت اخوي

صياد : فوتو

شاكر : الله يساعدك

صياد : ها خيركم شو ثنينكم هين عجل منهو ظل غاد

شاكر : ظلو عزت والولد ما خليت مكان فارغ لا تشيل بال جيت اخبرك بالي عرفته وارجع

صياد : اي گول فضني صارلك اربع تيام بلكت الله على هاي طستك جايب شي يسر الخاطر

شاكر : والله سويت مثل ما وصيتني ورحت نبشت المدرسة نبش رحت عالمدير بنفسه طبيت بيته

صياد : لا تحجي بالقطاره اعجل بالحجي

شاكر : اي سويت نفسي زعم نسأل عليهم نريد نخطب منهم مثل ما وصيتني والي عرفته ليال بنت الملا اداوم صف سادس ابتدائي ومعلمها اسمه صائب يصير ابن خالة حميد اخوهم وحمدو منها خوش بنيه خلقه واخلاق

صياد : الزبده يا شاكر الزبده يرحم اخوك فضنيي

گطمت الحجي جاي اسعلك البنت شلون رسبت واكو طالب وياهه اسمه حامد مجاي اسألك على اخلاقها قابل راح اخذها

شاكر : والله يا خوي سألت عالطلاب والمدير جاوب بشكل عام ما عددلي اساميهم وخفت الح ويشك بشي

گال خوش طلاب شعبة استاذ صائب كلها زينه

وسبب رسوبها سألته وگال منعرف محد جان متوقع ترسب عبن شاطره وذكيه

صياد : يعني كلشي ما دبرت لحالك رحت

شاكر : والله هاذ الي طلع ويايه بالگوه تا المدير فعل يحجي گال اسألو صائب عليها خوش بنيه هوه معلمها وگرايبها

عرب : يخوي انته غير تفهمنه هاذ الحجي شدخله بجتال مشعل بنيه جاهل تدرس لو دورنه وراهه شراح نستفاد

صياد : كلشي استفاد كلشييي لابد ما يطلعلي خيط واجلب بي هسع انتو ضيعتو وكت لحالكم

شاكر : والله يخوي ما قصرت شسوي اهدد المدير لو شسوي گالو اسأل صائب عليها خوش بنيه مدح منها المدير جثير

صياد : يبن الحلال كافي تمدح بيها احد گالك اريد اخطبهاااا بس ركز ويايي وفهمني اني على شنهي دزيتك

گتلك اعرفلي ليش رسبت وعرفلي اذا وياهه طالب اسمه حامد وهسع جيتني تهف بأديك وتمدح بالبنت

صارلك اربع تيام يا شاكر اربعه

شاكر : هاذ الي گدرت علي البنيه حصلت عليها منشده عبن گلت نريد نخطبها بس لو سألت عالطلاب شراح استفاد محد ينطي معلومه ويشكون بيه

صياد : هاذ هو خلفله عليك

حسره عليه ادزكم بشي وتريحون گلبي

عرب : اخوي اهدئ تنحل انته لو تفهمنه احنه عش نسوي اجان بلكت نگدر نعاون بشي

صياد : بيش تعينوني بشنهي اروح اگف اني بنفسي امري لله اطلعو منها انتو

سعاد : للفجر واحنه گاعدين محد غمض وصائب ما يفعل يهد السجين من ايده ويتهدد الا يكتل ماجد خلاص حت صوته غلگ معد يگدر يحجي

بركات وغازي واگفيله بالباب

اني فحيت معد اگدر اتحمل انهد حيلي من الصبح اكرب غفيت ونمت وفزيت على صياح غازي ينادييي اگففف يمعود لا تخبل صاااااائب

گمت من دون وعاتي ادور ملفعي ماكو وحجرتي ظلمه مدري شخمطت وغطيت راسي طلعت اركض وعمتي هم لاگتني مرعوبه

طلعنه بساع صار الصريخ ابيت صائب

طبينه عليهم شفنه صائب بعده مشتعل نار وشايل السجين ويدور لماجد وكلها تحاجز بي ومحد جاي يگدرله هاذ مبين گلبه ما يفعل يبرد ولا نايم يمه الله يساعده شگد يقهر

طلع ماجد من حجرته يمشي بدون توازن وجه صاير خارطه مكشم وبصوت تعبان گاله شبيك صائب شعندك(الناقله روعه الطائي)

صائب : ياااا نذل وتسأل والك عين هدوني اموته هدوني

سعاد : ماجد لزم حافة الباب ويضرب براسه يريد يستوعب ويفرك بعيونه ويطگگ رگبته وصافن يريد يتذكر ويرجع يسأل صائب بهدوء ومستغرب شبيك صائب شجاك يمعود

غازي صد على ماجد گاله احجييي شصار البارحه شسويت وخليت صائب يتخبل احجييي ماجد

سعاد : ماجد ظل فاتح اثمه يگله شسويت رحت شربت من قهري قابل جديده ومحد اله علاقه بيه

وصائب يتفلحط يگله غشم رووحك هدوني اذبحه هدوني هاذ عار نذل

ماجد : بالله غازي وبركات ما تهدونه خن اشوف شبي حضرة المعلم

يدور حجج عليه شسويييت گلي شبيييك متخبل من صباحيات الله

صائب : حيوان حقير نذل يالدوني الي ما عندكم محرمات على عرض اخوك تغدرني تخونييي بسيطه لك ماجد الا احرگ گلبك مثل ما حرگت گلبي بسيطه

ماجد : اهووو ويگلك ليش تسكر غير من اكل الوحل هاذ هسع غير افتهم شسويت عرضك شنو محرمات شنو وخنتك شنو بس لا تطلع ليال اختك واني ما ادري

صائب : ماشي يا ماجد سو روحك غشيم وما تدري شسويت يول اني بحياتي ما فتحت گلبي وفضفضت غير يمك يااانذل شلون گلبك انطاك تخوني شلوون

ماجد : يابه وروح ابويه فلا جاي افتهم عليك شتحجي شبيكم اني شربت وجيت انطمرت اگعد الگه وجهي مكشم واخوي شايل عليه سجين ويصيح تخوني بشنهي خنتك بگت قلمك لو دفاترك

ــ هسع شسوي اشرب گهوه واصحصح لو ارجع اسكر بلكت افتهم شنهي من بيت هاذ من الله يهجمه امشي رافده سويلي گهوه خن اتزغنب

سعاد : گعد ماجد ورجه ضهره على حافة الباب وگام يدخن ولازم راسه صافن يريد يتذكر عيونه حمر دم

وصائب بعده يتفلحط ادري ما تعب صارله من البارحه يشيل روحه ويرگعها انهارت اعصابه ثلاثه مجلبين بي وماجد گاعد يدخن ابرد منه ماكو

الا وگع صائب بالگاع وخرب مثل الميت وصار الصريخ فوگا شكحه شگت ثوبها وهلست راسها مات ابني مات

گام ماجد مفزوع وشاله حطه عالقريوله ويصفگ بوجه يريد يصحي ماكو

نفضو مي على وجه وماكو

ماجد گام يصرخ ويدفر بالغراض ويصفگ بأدينه ويصيح اني شسويت شسويت فهموني شبلا صائب

گام يلزم ادين صائب ثلج

بسااع جابو السياره ونقلو

شكحه ورافده وكريمه ملخن نفسهن بصياح

ونضال تعصر بأديها وتبجي وتلم بروحها تبلع بريگها وخايفه وترجف وجها صار ينطي الوان

شويه وجابو صائب شاديله مغذي صاعد عنده الضغط

منتهي حت وجه ورم خطيه حطو عالقريوله وماجد يعلگ المغذي اله

لزمه صائب من ايده بتعب گاله بس اگوم لحيلي اذبحك يا ماجد اني متبري منك ليوم الدين

ماجد : ميخالف بس طيب عود گصبني سوني هبيط

بي فهمني شسويت نام هسع

سعاد : صائب غمض عيونه بتعب ونام وماجد ظل يتفلحط ويضرب براسه يريد يفتهم شصار

خشمه گام يطلع دم راح غسل وسبح ونضال تحوص تريد فرصه تحجي ويا مجاي تلگه

واني من ورعتي طلعت ماخذه دشداشه متلفعه بيها

رحت بساع لبست ملفع ورجعت عليهم همزين محد انتبه +

غازي : ماجد حاول تطلع من البيت لا تظل يم صائب ليما يهدئ ونشوف شبلا

ماجد : كل عقلك غازي لا تخبلوني شسويت اني شسويت هاذ صائب يسوي هيج ما يريدني اخذ ليال بس قسم بالله اذا تطبگ العرب ما اعوفها وزين من عندي متحمله ومحترمه عبن اخوي الجبير ما ادحگ شسوه بوجهي حطمني اتحمله لخاطر الخوه

اريد افتهم ليش ضربني مجاي اتذكر شي غير من غسلتلي انته بالحمام وگلت شعندك ويه صائب عرفته هو ضاربني بالله هاذ اخ استقلني واني سكران شيريد مني شيريييد

بركات : ميخالف ماجد اخونه الجبير ويمون هسع صائب مريض ضغطه معلك اذا گعد وشافك راح يتمرض ما سمعت الدكتور شگال

ماجد : وين اولي ان شاء الله البارحه نزلت من دوامي وغير افتهم اني شسويت يابه اذا على سالفة. ليال والله والله ما اعوفها اذا يطگ هسع

بركات : روح لبغداد جم يوم واني اوعدك گدام غازي اظل ليل ونهار اقنع بي واخلي يوافق على زواجك ويروح بنفسه يخطبلك

ماجد : مستحيل غائب يقتنع لا تحاول واني مو بعازته مجرد يقتنع عماد ازفها ما احتاج احد

غازي : ما يصير هيج ماجد عماد يقدر صائب اذا يحجي ويا كلمه راح يقنعه انته العبها صح واكسب اخوك واهل بيتك تره ماكو واحد ينطي اخته لناس مو متصافين ابيتهم

اذا سمعو بيت الملا بالكونه مالتكم من وره بنتهم راح يزعلون جثير وبعد حت السلام يگطعونه منكم

روح جم يوم والتحق بالعسكرية ومن تنزل تلگا الأمور طيبه ان شاء الله

سعاد : ظلو بركات وغازي ساعه يقنعون ماجد يروح عبن صائب حالته صعبه حيل تمرض اخر شي قتنع عبن گلوله كلنه نفزع وناخذلك ليال

لم هدومه وطلع گال ارجع الگا خاطبيها الي

امل : طلعو الولد على شغلهم

واني اخذت ليال بره البيت عالخيول بلكت الله تعدل نفسيتها وما تظل تعاند ولو عماد منعني تطلع شبر بره البيت بس شسوي

ديالا گامت تكنس وليال تمسد بالفرس مال مهره

اجه ماجد شايل جنطته وضعه تعبان وجه مكشم ولازم خشمه بجفيه كلها دم

ماجد : سلام عليكم دورتلكم.ماكو عرفتكم هين

امل :بدون ما اردله السلام گتله شجابك ماجد اشو ما تستحي كلام عماد البارحه خليته عد رجليك

تجاهلني وراح يم ليال گاللها اني رايح لبغداد

التحق من غادي ومن انزل احل كلشي لا تنسيني مو

ولحد يخربج عليه اني احبج مو

ليال : ليش تروح وشبي وجهك من ضاربك

ماجد : محد ضربني هاي وگعت ولازم اروح ارتب اموري غادي وبس ارجع اقنع عماد

امل : فور دمي هاذ متخبل عالأخر جريته من عكسه وعطت بي

شنهي ما عندك احساس انته تراضاهه على خواتك شبيك ماجد تخبلت شجرالك عوف البنيه جاهل يا بشر افهم عاد افهم والله لو تفرع براسك نخله ما ينطيها الك عماد كون تسمع كلامه البارحه نام وهو يهذي ما انطيها

ــ اترجاك لا تخرب خوتكم اترجاك

ظليت فتره احجي ويا وافهمه وهوه صافن وما جاوب بس بكلمه وحده

ماجد : احبها

امل : هديت ايده وگمت احجي ويا بهدوء

اسمعني يا ماجد اترك الموضوع ولا تلح وذا الله كاتبلك نصيب محد يگدر يگف بوجهك بس ابتعد هسع روح الله يخليك تره ادري وبدون ما تحجي اهلك محد بيهم يرضه ولا تحاول تجذب عليه متأكده صاير شي ابيتكم

گرب مني ولزم جنطته عيونه مغورگه والدمع يطلع من طرف عينه مسح رگبته والعبره الي بصدره تگص الگلب وكلامه المبحوح يحزن

ماجد : امل اني اروح جم يوم ليما تهدئ النفوس ابيتكم وابيتي اترجاج بنت خالي اترجاج على اقل انتي صيري ويايه لا تگفين ضدي الي اريده منج ديري بالج على ليال لا تخربينها عليه اترجاج وداعت ابنج

ــ والله احبها يا ناس شعور هاذ مابي تخطيط وليش يا ماجد سويت هيج احبها يا امل احبها مو بيدي مگدر اعيش بلاها والله اني لوما احترم كلام عماد جان دگيت ايدي ورجلي واخذها من اليوم بس اريدها تطلع من بيته برضاته

امل : گص گلبي وهو يحجي ويبلع بريگه ماجد عاشگ ليال بكل جوارحه مستحيل يعوفها ولو نظل نحجي من هين لباجر ما راح يعوفها عاد اني جاريته حت لو غلط هالشي گتله ميخالف ادير بالي عليها وما اخربها عليك بس اترجاك ابتعد هاي الأيام

هز راسه بقبول ومسد على راس ليال وراح

وهاي الثوله لحگته وتبجي وراه

ليال : ماجد امانه لا تروح ظل

امل : صد عليها ودموعه تنزل دحگ عليه

بتوسل ما گدر يلزم روحه وحضنها وگام يشهگ

رحت علي واجر ليال منه لزم اديها يبوسهن ودموعه تصب عبالك هاي اخر نوبه يشوفها

وليال تشيل بروحها وتلطخ ما تريده يروح وتگله اخذني وياك امانه گوه جريت ليال منه وصلته الباب وسديته راح وهوه يتلفت ويمسح بدموعه

ـ شگد ما جان الرجال جسم وهيبه يكسره العشگ ويذله

راح ماجد وظلت ليال لليل تبجي وتنوح (الناقله روعه الطائي)

گعدت يمها امسد على راسها

سألتها تحبين ماجد هزت راسها بقبول ومسحت دموعها وقرفصت

ليال : بس جذاب گال اخذج ويايه جذب عليه وراح ما اخذني گال اصير ابوج

امل : ردت اواسيها هيه جاهل ما تفتهم حبت اهتمام ماجد ما حبته لشخصه ولا تعرف شنو العشگ هاذ حال البنات يتعلقن بالشخص الي يهتم بيهن حت لو جان الشخص الغلط

حطيت راسها على ركبتي وگالت فليني امل

امانه اغفي ومگدر انام عود من يجي عماد خلي يوديني بفراشي

امل : لا ظلي باتي يمنه

ليال : لا مگدر امي تگول عيب انام يم المزوجين

امل هوه ليش عيب انتو شتسوون

مل : كلشي ما نسوي انام وهاي هي

ليال : عجل امي ليش متفعل تخليني ابات يمكم

امل : اليوم باتي هين هاي عمتي عبن تخاف عليج

ظليت امسد عليها لحد ما غفت خليتها على نومتها وغطيتها

مر سبوع من راح ماجد والوضع هدوء يوميه يتصل ويسأل على ليال

اكلت نامت شربت وذا ماكو احد اناديها تحجي ويا غصب عني بسبب تهديداته اذا ما اخلي يحاجيها

يجي من بغداد يسويلنه مشكله ويهجم البيت علينه گال سبوع واجي

تعشينه وجلفت المواعين البيت هدوء موحش عمتي معاضد بحجرتها تقرا قرأن وليال يمها

واني وعمتي صبره وحميد والجهال گاعدين بالهول ساكتين وماكو غير صوت ابني يتنعوص

حميد : فاتن شعدها دزت على ديالا

امل : تگول مريضه ودزت عليها اداريها

حميد : وعماد اخذها وراح اشو ما شارني

امل : مو عماد صارتله روحه لبغداد گال ضروري اروح

ومنا اتصلت فاتن گالت اريد ديالا تجيني گال اخذها بطريقي اذبها يم فاتن واروح لبغداد

صبره : شكو بيها يمه اخذتها اختها تعاونها

احسن من گعدتهن هين لا شغله ولا عمله

حميد : شنهي روحة عماد الضروريه

امل : مدري يمكن علمود التكيه گالو راح تجتمع كل الدراويش بتكية (… .. وعماد راح بدال عمي الملا درويش

حميد : هاا الله يسهل

امل : حميد الباب بره يندگ

طلع حميد يشوف منو وجان

يطلعون صائب واهله وعمامه ثلاثه

تفاجأت خير اول مره يجون عمام صائب

گعدو كلهم بالهول بس عمتي صبره فاتت

لحجرتها واجت يمها شكحه واني طلعت الجهال وديتهم يم ليال

رحت اسوي جاي معقوله اجو يخطبون ليال لماجد بس عماد مو هين

زين اني شكو سويتها من صدگ يجوز الناس اجت تعلل خلصت سوالف ويه نفسي وكملت الجاي واخذته انطيته لحميد

ورجعت اخذت جاي لشكحه سمعتها تحجي ويه صبره وتصفگ على ايدها وتگول اي يخيتي هددنه يكتل نفسه من شافني سكتن

قدمت الجاي وگعدت يمهن واجت عمتي معاضد

ادحگ على شكحه تفور اعصاب تنافخ ودحگ بحقد على عمتي معاضد هاي شبيها تريد تاكلها

اخر شي انفجرت وجان تگول

شكحه :ارتاحيتي معاضد ظليتي مهيته بناويتج بدون تربيه ليما فتنن بين ولدي وسون شدخ بين الأخوان بعدهن بگد النعول ويدورن زلم

امل : عمتي معاضد ظلت فاكه اثمها

وادحگ علينه

معاضد : هاي ما مرجيه منج ام صائب بنواتي متربيات احسن تربيه وانجان قصدج على ماجد من اجه خطب ليال احنه ردينا وما انطينه

ليال جاهل مو مال الزواج والضاهر علگانه بينكم وجيتو تكاونين لو ماجد جبركم تجون تخطبون غصب عنكم ومن هسع اگلج ليال ما تناسب ماجد وما ننطي

شكحه : اي والله جينه نخطب على گولتج وغصب عنه بس مو لماجد جينه نخطب ليال لصائب

امل : انصدمت وثنيت على ركبي وعمتي معاضد نفسي انبهتت وادحگ عليه وصبره ساكته عين غير العاده تخبلت عمتي معاضد

معاضد : هاي شنهي شكحه اشو لا ظلت احترامات لا ظلت مستحه شجاي تهذين

شكحه : والله ما جاي اهذي هاذ صائب جاب عمامه واجه يخطب ليال ورهم كلشي ظلت بس موافقة حميد خسرت ولدي من وراه بنوايتج الي ما متربيات

امل : اريد احجي بعد ما اگدر مستحيل هاي شكحه تجذب اكيد طلعت من الحجره ورحت تا اتصنت عالزلم

مريت على حجرة عمتي شفت ليال تلعب محيبس ويه جاهد وجوانه سديت الباب عليها خفت تسمع الحجي وتمنجدنه ويه الوادم

ركضت بساع وگفت بالباب مال الهول واتصنت عالحجي وگلبي يرجف عضيت ملفعي اريد اعصابي ترگد

صائب : حميد اسمعني اني ما عليه بماجد جاي عليكم وخاطب ومدري شمتفق انته ويا

اني وياك ثنينه نعرف ماجد مو مال زواج

ميحتاج احجي مكسراته يمك انته متكشف على كلشي

حميد : يعني والله ما ترهم يا صائب شلون تجي تخطب البنيه الي خطبها اخوك گبلك ونرفض

صائب : كلشي يرهم حميد اني اعرف انته شنهي غايتك وليش طاوعت ماجد ورضيت بي اعرف شنهي ابالك واني هاي گدام عمامي اگلك ولا الف وادور رافده اختي هيه بديلتي بدال السياگ

اذا ما تنطيني ليال هاي ظلت يمك اشوف غيرها وانطي رافده واتزوج قابل راح اظل

امل : رجليه يطگگن وسنوني گامت تصل عليه عبالك برد شهر الواحد اريد اتاوازن معد اگدر هاذ صائب شجاه حميد ظل ساكت فتره وجان يگول

حميد : بس عماد مو هين اصبر ليما يجي

صائب : منهو اكبر انته لو عماد

حميد : اني اكبر بس اخوي لازم اشوره

صائب : عجل انته مو رجال والك شورك

اسمعني حميد حجي زايد مگدر اكثر الك اليوم

فكر وتعال باجر زف رافده واني ازف ليال ها شگلت

يتبع………… .عرين الصياد