رواية عرين الصياد الفصل العشرين 20 بقلم شذرة العدوان

يـــــــبوب الدار ماكافــــــي ترابين

ابوي چواچ فــــــوگاه الترابين

يهل تنشـــــــد عــــلى حالي ترابـيــن

مازال عــــــــين ابوي غـــــــشاها التراب

بقلمي شذرة العدوان

ليال : وين جنت وشصار ويايه ما ادري

اني بحلم لو بعلم

الي اعرفه اني جنت بعرس مهره واگفه بالطرمه وابجي عليها راح يزفوها صار رمي اكيد هاي رمو فوگ الزفه هاذ الي اجه ابالي

سديت اذاني وقرفصت يم الدنگه ما احب الرمي صار صوت صريخ ادحگ الناس تركض رحت اشوف شكو وما عاد اندل دربي كلشي صار بعيوني ظلام

فتحت عيوني اني بمكان غريب وجنت حلمانه ابويه ومحمد ومهره ماتو حضني عماد وگال هاذ حلم جايف خلي يولي

استغربت المكان احنه وين

اجت الشيخه خزامي عرفتها

سألت احنه بيت عيال مهره كيفت

گالو اي بيتهم الثاني

وليش احنه هين

گلولي انتي ركض وراج جلب وخربتي

صدگت بساع عبن جرت عليه هاي الحاله من گبل

بس احس نفسي مو مرتاحه

عقلي ملخبط اريد اجمع الأحداث براسي ما جاي اصل لشي

جسمي يوجعني ومنمل الف سؤال يدور براسي گلبي يوجعني وتجيني تخيلات عبالك الحلم الي شفته من ماتو اهلي حقيقي ظل لازگ بالي احاول اطرد افكاري مجاي اگدر

عزمونه ناس غربه وجبروني الشيخه وامل البس عباة وملفع شفت صياد بالطرمه

شگد مكروه هالبشر ولا ينحب شكله مرعب هاي امت صارت لحيته هالثخن يخوف اي والله يخوف ونظراته كلها حقد ومو مريحه امشي ويه الشيخه وخايفه منه

جانت ادليني وتعلمني على بيوت اهلها گالت هاي ديرتي اني هين تربيت

طبينه على بيت اهلها جان حلو ومليان اوادم

كلام النسوان والهوسه ضوجتني

گامت تجيني افكار گومي نهزمي ليال واحس البيت طايف بيه

لزمت راسي دخت عيوني غوشو سألتني امل شبيج گلتلها گمت اغفي رجعنه على بيت الشيخه

طبيت عالحجره بيه ضوجه ما ادري شجاني تعقدت

نمت وحلمت حلم مزعج جان واحد بالحلم يلمسني ويمسد بشعري جتف اديه وشل حركتي اصرخ محد يسمعني جانت عيونه تخوف حمر

گعدت من النوم مرعوبه

تريگت ولبستني امل عباة وملفع گالت الدكتور راح يجي يعالجج

استغربت الوضع بس كيفت اني راح اخلص من الجلب وما يظل يركض ورايه وين ما شافني

اول ما طبيت شفت رجال بعدني ما ركزت بي وجان احس نفسي دخت ونمت

گعدت شفت واحد يضرب بيه اريد اركز ماكو عيوني مگدر افتحها

تذكرت هاذ حميد يضربني عبن گالي جنتي تواعدين توسلته حميد لا تضربني اجت امل فكتني منه نهزمت بره لزموني واني احلفلهم هاذ حامد امل ضربتني وسدت اثمي ما ادري شجاها اريد انهزم منها مگدر مددت بالگاع وگعدت على رجليه

اجه عماد وخرها مني وحضني گال ما اخلي حميد يضربج گادني طبينه جوه وعماد وصاني ما اجيب طاري حامد

وگال الي ضربج هاذ الدكتور مو حميد

وحجالي شغلات ما فتهمتها ليش هيج يحجون امل وعماد غلست عن كلامهم بسبب وجع جسمي من الضرب والخوف ارجف واريد اعبر وافتهم مجاي اجمع وعقلي يصورلي شغلات مو حلوه صارت ابيتنا بس ارجع احاول اطردها من خيالي

بالليل امل دهنت جسمي احس النار شتعلت بيه احسه يحرگني ما گدرت انام الا طلبت من امل تفليني وحلمت اجه نفس الشخص المرعب مال حلم البارحه بس يريد يلزمني ما يگدر

فتحت عيوني لگيت امل والشيخه خزامي ونجمه ملتمات عليه يگعدني

اريد اگوم ما اگدر جسمي مكسر

اخذتني امل عالحمام جابت مي بسطل وحطت علي مي من قوطية

سألت شنو هاذ گالت مي ورد يخلي ريحتج طيبه

شميته صدگ ريحته طيبه

سبحتني المي من ينزل على جسمي اشتعل بنار وكل ما اريد اگع تلزمني امل

كملتني واخذتني عالحجره تنشف شعري

بس اني اغفي فحانه مددت ونمت مندل بروحي

گعدت انوب شفت رجال گاعد يمي

وبصفه عماد وامل هم

استغربت عبالي عدنه مولد

الرجال جان شكله مريح وحلو وجه كله نور ما خفت منه گام يوصيني بالصلاة والأذكار جان اسمه شيخ عثمان

اخذه عماد وطلعو بره واجت امل تبوسني وتبجي ما فتهمت شبيها هاي

وانوب اجت الشيخه وطشت عليه جگليت ما ادري عرس منو شجاي يصير ما ادري اخذت جگليت اكلت ومكيفه بس بطني توجعني جسمي كله يلجم بيه حت المقيص احسه يلجم جسمي واغلس عنه مدري شجاني جنت اذا اصبعي ينجرح اظل ابجي سبوع

امشي بالبيت واحجي ويهم مثل الدايخه كلمه اسمعها وثنين لا وجعت حيل جوعانه عبالك مو ماكله صارلي غرن

گعدت يم الشيخه گامت تمشطلي شعري

وتبوس بيه تگلي تصيرين بنتي صديت عليها گلت اي

گمات تلمس بالشامات الي برگبتي وتفرد بشعري وتقرا وتصلي عالنبي

رفعت قميصي اتلمس علامات بخصري ازرگ وبنفسجي بس لاحظت نفسي اشو ضعفانه ما ادري اني اتخيل عبن دايخه

تريگنه وصعدنه بالسياره وگالو نرجع لبيتنا جان الطريق ملل بملل انام على جتف امل واگعد وبعدنه مو واصلين وكل ما ارفع راسي اشوف صياد الوحش يدحگ عليه بالمرايه واختل يم جتف امل واسد عيوني بيدي

لعبت نفسي من الطريق عبن محد يحجي

وحاره طلبت يشغلون اغاني عماد خزرني بس صياد الوحش حجالي قصة

وما فتهمت منها شي

وصلنه بيتنا اول ما حدرت شفت ديالا شايله درويش واگفه بره سلمت عليها واخذت درويش فتت جوه

لاگتني فاتن بوستني وطلعت وصلت الصاله وشفت صبره طلعت لابسه اسود سألتها عش لابسه اسود منهو مات جان ابالي اخوها المريض

وجان تگول ابوج ومهره ومحمد كلهم ماتو بالعرس

نهد حيلي ونصل درويش من ايدي

اخذته ديالا وجان تگول جذب جذب محد مات امشي اگعدي بالهول ليال

گالت صبره لا جذب ولا شي اهلج يالمسعده ماتو

وانتي جنتي دايحه بصلاح الدين كلها تراجف عليج

الموت اخذ الزينين وخلاجن

ظليت باهته بمكاني وديالا تجذب بيها وصبره تگول اذا مو مصدگه طبي حجرة ابوج وشوفي

ركضت بدون وعي على حجرة ابويه فتحت الباب

جانت كل ملابسه منثوره عالقريوله وصورته معلگه وبيها شريط اسود مثل صور الكزنزانيه الي معلگهم ابويه وحاطلهم شريط اسود عبن ميتين

اريد اصرخ اريد افتهم واستوعب ماكو شلت غترة ابويه شميتها احس ريحته تگلي ابوج مات ومعد يرجع

صرخت وظليت اصرخ لحد ما بدت بيه العبره وصدگت انهم ماتو گمت املخ بروحي والطم واشگ هدومي واهلس براسي وانادي ابويه

وديالا شايله درويش وتحجز بيه

ما گدرتلي وطلعت

اجو يتراكضون عليه واني اشيل بروحي والطخ واتذكر احداث وصور مثل الخيال من عرس مهره شفت دم شفت ابويه امدد ومجاي استوعب عبالك حلم عقلي ملخبط مجاي يجمع

صار ظلام على عيوني وما حسيت للمغرب

گعدت جسمي ثگيل الساني ثگيل جفن عيوني يوجعني فتحت عيوني و تذكرت كلام صبره وگمت اصيح

جان استاذ صائب موجود

گام يحجي عليه ويصبرني ويوصي بيه

مجاي اگدر اتحمل احس روحي تريد تطلع گمت على حجرة ابويه اشم بيها افتر اصيح اضرب بالگاع اريد اعبر عن الوجع الي بداخلي مجاي اگدر شلون هيج صار نمت وگعدت لگيت نفسي يتيمة الأب وفاقدة اخ واخت وين اكو عقل يستوعب

انهد حيلي ومعد بيه اصيح والطم ما ظل بيه كل حيل عماد نومني يمه غفيت على صدره واتخيله ابويه

مرت ايام واني احاول اجمع الأحداث براسي وما فلحت شگد توسلتهم اروح عالمگبرة وما يخلوني اريد اشم تراب ابويه ومهره ومحمد ليش يحرموني منهم سجنوني بالبيت قفلو كل البيبان وضمو المفاتيح عني

ما يخلوني اعاون بشغله

عماد ينومني يمه واگعد بالليل الگه نفسي مربوطه بحبل من رجلي

هاي ليش هيج يسون اگوم ابجي ويگعد عماد ينومني ويگول اخاف عليج يبوگج الجلب

انام بحسرتي ودمعتي على خدي معد اگدر اتحمل حجيهم المنتاقض كل واحد يحجي شكل

وصدمتي من عرفت اهلي صارلهم شهرين ونص او اكثر من ماتو ما اگدر اوصفها اسأل نفسي اني وين جنت الزم راسي واصرخ حالتي تعبت صرت ابد مو اني معد اثق بيهم

اجتني ديالا گالت تعاي شوفي شسويت

طلعت وياهه شفتها مصفطه اللعابات مثل ما احب اني

اخذت اللعابة الي جابها ماجد

تذكرته وينه ماجد ليش ما يجي ولا يسأل عليه

ديالا گالت يجي اليوم

طلبت منها نطلع عالمگبره وما فعلت وگالت حجي اشكال عني زعم اني جنت اكفر واغلط واني بحياتي ما اسويهن جرحني كلامها شلون تگول عني هيج

اندگ الباب وراحت فتحته

اول ما طب وشفته ما ادري شصارلي جن شايفه ابويه ركضت وحضنته واشاهگ شكيتله منهم اعرفه ما يرضه عليهم

رزل ديالا عبن جان يتصل ويريدني بس ما يگلولي

شگد ضجت ونقهرت ليش يسون هيج ليش

ماجد : شلونج يبعد گلبي وروحي شحالج يالي عذبتيني ومرمرتيني

ليال : ماجد اني مو زينه مشتاگه لأبويه اريد اطلع من البيت ما اگدر اتحمل اني صرت يتيمه

ماجد : يروحي انتي لا تبجين هاي اني جيت وبعد شحده الي يزعلج

ليال : جان يحجي ويداري دموعه متغير وضعه تعبان

وبس صافن بيه ويمسح دموعي

ماجد : هانت اني اخلصج منهم عذبوني وعذبوج جنت اتصل بس اريد كلمه اطمني على اخبارج وارتاح لا اهلج ولا اهلي ما عدهم رحمه خلوني لايب عليج

ليال :اجت امل سلمت وگالتلي افوت جوه بس ما فعلت تشجعت بماجد لزم ايدي راحت امل وجان يگول

ماجد : ليال تريدين الخلاص منا مو

ليال : مسحت دموعي گلت اي اريد اخلص بعد ما احب هاذ البيت

ماجد : عجل نتزوج

ليال : صفنت اني شلون اتزوج واهلي ماتو

بعدني احبهم وگلبي مجروح اني اريد ابويه ما اريد اتزوج

ماجد : اهلج بعد ما يرجعون يروح ماجد اني اصير ابوج ادللج ازيد من دلاله اضمج بگلبي وروحي

وانتي اذا ظليتي هيج راح تضيعين من ايدي لا تعذبيني

ليال : عصرت اديني ودنگت هزيت راسي بـ لا ما اريد اتزوج

ماحد : ما تحبيني ليال

ليال : امبلا احبك بس اني ما اريد اتزوج مهره تزوجت وماتت گمت ابجي لزم حنجي بحنيه جانت تظراته تلمع وكلها عطف مركز بيه حت ما يرمش وگعت دمعه من طرف عينه مسحها

ماجد : يروحي مهره هاذ يومها مو عبن تزوجت

زين انتي مو تحبين ابوج وتسمعين كلامه وتصدگين بي

ليال : اي احبه ومشتاگتله اخذني عالگبر ماجد امانه

ماجد : اخذج بس اسمعي شگالي بيوم الحنة مال مهره

ليال : شگال

ماجد : رحت طلبتج منه گتله اريد ليال

گالي ميخالف اخذها بس خل مهره تعرس وتعال اخطب ليال وحت مهره گلتلها وكيفت ومحمد هم وحميد كلهم موافقين

ليال :يعني ابويه ومهره رضو يزوجوني بس مهره جانت تگول انتي ما تعرسين بعدج جاهل وابويه هم يگول الا تكملين دراسة

ماجد : اني قنعتهم گلتلهم اول وتالي ليال تكبر (الناقله روعه الطائي)

وجان يرضون واني مو گتلج من زمان اخذج لبغداد تدرسين هين ماكو مستقبل الج اني رتبت كلشي حت بيت اخذت واثثته ظلت بس موافقتج انتي وعماد

ليال : گمت اعض بشفتي واعصر بأديني اني شلون ازوج واروح ويه ماجد ما اگدر راح اشتاگ هين صحيح اني كرهت بيتنا بس عبن ساجنيني بي

هزيت راسي بـ بعدم قبول بدون ما احجي

لزم ايدي ماجد وهمس

ماجد : ليش ليال مو جنتي راضيه وگلتي احبك ليش تغيرتي اني مگدر بلاج گوه تحملت وصبرت ما صدگت روحي اجيت حت على اهلي ما سلمت هاي طلعتي من الحمام وجيتج حت ما مشطت

ليال : ختنگت گتله اهلي مدفونين هين مگدر اعوفهم

واروح احبهم مشتاگه على ابويه ومهره ما شفتهم دفنوهم وما شفتهم

ماجد : عجل نظل هين نزوج ونسكن هين ما نروح لبغداد ها شگلتي ويوميه تجين لهلج واخذج عالمگبرة تزورين ابوج ومهره ومحمد تره اذا ظلو ساجنينج راح تخبلين ومدرسة ماكو وذا صارلج شي اموت

ليال : لازم ايدي ويحجي ويايه بهدوء بدون عصبيه وعيونه بعيوني ظل يحاول وما انطاني مجال للرفض عبن كلامه كله صحيح رضيت وگتله اي نزوج ميخالف

ابتسم وگال اروح اخبر اهلي

وانتي لا تنطين مجال لأحد يخربج عليه ولا تصدگين حجي احد اذا گالج ماجد ما يرهملج وانتي ما ترهميله امسحي دموعج لا تعذبيني بيهن

راح واني طبيت جوه سألتني امل شعنده ماجد گلتلها راح نزوج اشو تخبلت وگامت تعيط

امل : انتي شبييج تخبلتي شبييج زواج شنهو

شمعرفج انتي بهالسوالف بعدج جااااهل

اذا سمع حميد راح يكسرج تكسر محد يفكج منه حت عماد

ليال : جاوبتها برود

حميد يعرف وموافق ماجد حاجي ويا وابويه قبل لا يموت هم موافق ومهره ومحمد هم كافي اريد اخلص مو اظل يمكم ساجنيني وما تفعل تخلوني اطلع حت صور ابويه ضميتوهن عني

امل : ظليت مصدومه وحاطه ايدي على گلبي اريد اگف على رجليني مگدر امت هالحجييي امت ابوج وافق منهو گلج واحنه عبن نحبج ضمينه الصور وقفلنه البيبان نخاف عليج

ليال : ماجد گالي وهاذ مو خوف انتو محد يحبني من مات ابويه محد يحبنيييي

امل : جذااب جذااب ماجد

عمي مستحيل يرضه هاذ ماجد جذاب

ليال : لااا مو جذاب انتي ليش تكرهينه

امل :لزمت وجها بأديه ثنين وگمت احجي وياهه بهدوء بلكت تفهم گلتلها اسمعي ليال انتي بعدج جاهل لا دحگين على نفسج طويله شوي انتي جاهل وماجد اكبر منج بجثير لو معرس من وكت جان هسع انتي بگد جهاله اني اعزه ماجد ابن خالي وغاليه عليه

بس ما يفيدج ماجد مو متوالمين لا بالشكل ولا بالعمر جاي تفهمين عليه ليال لو بس صافنه.

نضفت اديه من وجها وجان تحجي بنتر

ليال : والله مثل ما گال ماجد انتو راح تخربوني علي وتحجون وطلعونه مو خوش ماجد احسن منكم على اقل راح يطلعني منا ويوديني اشوف ابويه وراح يخليني ادرس وما يسجني مثلكم(الناقله روعه الطائي)

امل : اذا عالطلعه اني هسع اطلعج واوديج عالمگبره بس عوفي هالسالفه ليال ومن يجي ماجد اطردي وبعد لا تحجين ويا

ليال : ما اعوفه ماجد گال اني راح اصير ابوج وخري عني امل وخرييي

امل : انهد حيلي ثنيت على ركبي بالمطبخ ومصدومه لعب براسها ماجد هاي جاهل يربي هو مابي قصور بس ما توالمه ابد ما توالمه شلون هسع اذا عرف عماد ظليت گاعده وحسبة تجيبني وحسبة توديني وينج مهره تجين تشوفين وينج

سعاد : اني سعاد بنت عم الصياد

وزوجة غازي ابن عم صائب وماجد

اني احد ابطال هاي القصة )))

اليوم الثلاثاء الساعة 9 صباحاً مثل روتين كل يوم

نضفت وطلعت اشطف المماشي

شفت ماجد اجه من بعيد شايل الجنطه العسكرية

وصل قريب مني سلم وفات لبيته واني رجعت اشطف المماشي

كملتهن وفتت جوه سويت جم شغله وطلعت بالحديقه

اسمع صوت شكحه يلعلع

مو بالقصد ردت اتصنت بس هيه صوتها عالي واحنه بيوتنه بصف بعض

ديرت الماطور وگمت ارش بالثيله مي

وشكحه مستمره تعيط اسمعها تگول خبلتك ما خلت براسك عقل بدال ما تجي وتبوس راسي وتگلي يمه شلونج

گبل جفتت تسأل عليها وانوب مو عاجبك طلعت انته الزعلان عبن اني ما وصلتهم ولك ماجد انته شجرالك فهمنيييي

ما اعرف تقصد منو بس شفت ماجد طلع ينشف بشعره ومبدل ما جاوبها وراح يمشي سريع ومتعصب

مرت تقريباً بالنص ساعه

اجه غازي گال سوي غده من وكت جوعان

اخذت السله وطلعت احوي باميه للغده

زرعناها مشترك احنه وبيت صائب

اجه ماجد يمشي سريع ومبتسم فات على بيتهم ماكو دقائق وتصير الهوسه وهالمره الصوت اعلى وحت صائب اسمعه يحجي

استمر العياط وزاد حيل بحيث اسمع صوت تكسير ابيتهم وصوت صريخ مال نسوان هديت السله من ايدي ورحت ركض انادي غازي وحمايه طبيت عليهم گلتلهم بيت صائب مدري شجرالهم صوت صريخ وتكسير

طلعو ركض وعمتي وياهم راحت ظليت بالطرمه اعصر بأديني واگرط اضافري اني متعوده عالكوان عبن اخواني ولد عمي جانو يوميه مسويلنه طلبه

بس من جيت هين تعودت عالهدوء وما فد يوم صارت مشكله خاصة ابيت صائب حيل هادئين

مستمره الوب وافز على صوت الصريخ اخر شي ساكتني رجليه ورحتلهم اول ما طبيت الصاله شفت ماجد يمه مثل الثور الهايج يكسر بالبيت ويغلط ويسب

وصائب لازمينه غازي وحمايه

ويتهدد على ماجد گمت اركز بحجيهم اريد افتهم شكو شجرالهم مجان الهم حس

صائب : يول حقير نذل ابو النسوااان ما لگيت غير هاي الجاهل تحط عينك عليها يول گحط گح****** يا نذل يا دني النفس

ماجد : اني مو نذل ولا نفسي دنيه اني احبها احبهااا واريدها بالحلال شكو بيها وين الغلط فهمنيييي

صائب : يول انته وين وهيه وين اگله جاهل يگوول احبهااا انته شنهو من بشر تريد تعبرها عليه ابو النسوان حب شنهي ما تگدر تگول نفسي دنيه مااا تگدر

ماجد : فكر الي تفكره ما يهمني شعليك انته شعليك هيه راضيه واهلها راضين انته شكوو فهمني شعلييك

صائب : يول شلون شعليه شلون ناس مأمنه بينه فوتونه بيتهم وگعدنه بحجرهم وامنونه على بنواتهم واسرارهم وتجي انته بكل نفس دنيه تخون الأمانه حقييير

ماجد : ما خنت ولا امانه لو ادور مكسرات جان سويت الي اريده بدون ما افضح نفسي البنيه احبها اعشگها واريد اخذها بالحلال ترضه لو ما ترضه رئيكم ما يهمني ما جيت اشوركم جيت اخبركم تروحون ويايه اخطب خير على خير ما تروحون عندي رجلين وامشي وحدي اخطب لنفسي

صائب : يول اصحه على روحك.لا تفشلنه ويا الناس انته شلون تحط عينك بعين عماد وحميد شلووون

انوب تراب ابوهم بعده اخضر شجرااالك يا دني النفس

ماجد : حميد موافق وعماد هم يقتنع راح تخبلوني قابل مسوي جريمه وابوهم صارله ثلاث شهور قابل يظلون طول عمرهم محزنين

صائب : اي حميد يوافق مو نذل هوه مثل طينتك

ماجد : شعليك انته شعليك بدال ما تفرحلي وتقوم بواجبك زعم اخوي الجبير الله يجرم

صائب : يول شفرحلك على سواد وجهك على حورك يا نسونجي يا سكير شگل للناس لو رحت اخطبلك شعندك مواصفات غير السكر والنسوان

تريد تاخذ جاهل وانوب مريضه طمعت بيها طمعتت نفسك دنيه وين تروح من ربك دنت نفسك على جاهل

ماجد : بالله ظل سولف من هيين لباجر اخذها اخذها والي يگف بطريقي لا يلوم الا نفسه وگلتلك من زمان عفت كلشي علمودها احبهااا افهمنييي

صائب : خايب ولي حت الجاهل عقله احسن من عقلك شفهم منك تعبر سوالفك عليه

حقير اني اعلمك

سعاد : ظلو متناطلين وماجد يحجي ويكسر بالبيت عبن صائب وامه ما يفعلون يرضون بزواجه

الي عرفته هوه رايد بنت الملا درويش

بس اي وحده منهن ما اعرف شكيت بليال عبن صائب گال مريضه وطفله

صدگ هاذ ماجد شجاه البنت جاهل ما تفتهم

عفتهم ورجعت لبيتنا اسوي غده

كملته وغازي بعده يمهم طفيت عالجداري

وگعدت بره بالطرمه واسمع العياط يتزايد

شنهي بلاعيمهم ما طگت

طلع ماجد يمسح بوجهه وراح وگف عالشارع گعد على بلوكه ولزم راسه

وطلع غازي وعمتي فحانين من گد ما حاجزو بينهم ،،

غازي : هاذ ماجد تخبل عد تالي عمره

سعاد : اذا رايد البنت بالحلال شكو بيها

غازي : عيب يا سعاد عيب هسع اخوانها شيگولون

طمع بالبنيه عبنها زغيره وحلوه يعني ما ترهم شنو راح ينطيهم عذر هم اذا گال عجبتني وام بيت واريدها تربي جهالي ما ترهم عبن جاهل ما شفتيها بعرسنه گامت تبجي وتمرغل بروحها تريد بالزفه وتصفگ ويه الجهال

ــ وشيجيبها على ماجد هاي انوب يگول اعشگها

شگد عيب يربي اني من يمي فشلان من عماد وحميد شلون راح يكون رد فعلهم ،،

سعاد : يعني شكو بيها وذا عشگها اني وياك مو هم عشگنا بعض وهاي تزوجنه

غازي : سعاد لا تخبلين احنه نختلف اني عشگتج من بعيد وما طبيت بيتكم وما تماديت دفنت بگلبي لحد ما الله فرجها علينه واخذت عشيرتي كلها ورحت خطبتج واهلي كلهم راضين وانتي مو جاهل مثل ليال

سعاد : والله مدري شگلك بس ماجد مبين حيل يحبها ومتعلگ بيها

غازي : يبوو غير گام يبجي بجي يگول اذا ما انطوها ووگفتو بطريقي انهبها وانهزم وما تلگوني للموت

سعاد : يمه دخيلك ربي هاذ تخبل

امل : اجه الليل واني دايخه بسوالف ليال ابلع بريگي اريد احجي ويه عماد حايره شلون احجيله لو اسكت

وخايفه من حميد هاذ ايده والضرب

يربي هاي شلون طلبة تعبت من التفكير عشه ما تعشيت شسوي اخابر فاتن خاف تهبط المره ويصير بيها شي

گمت الوب عبالك اطلگ

يحجي ويايه عماد ولا يمه ولا اسمعه

عماد : ااامل شبيج صافنه ما تردين

امل : هاا عماد

عماد : شبيج صار ساعه انادي الجاي وين

امل : اي هسع رحت جبت الجاي وصبيت لعماد وحميد وافكر بليال گالت ماجد اليوم يجي يخطبني ادحگ عالباب ومرعوبه وليال ولا هامها حاطه اللعابه وتمشطلها

هاي مال زواج يربي الله يسامحك يا ماجد

اخذت صينية الجاي ورحت عالمطبخ اسمع باب السياج بره يندگ اجيت على عماد گتله

اخذ المفاتيح وراح شويه واجه ويا ماجد من شفته انغبطت

سلم عليهم وتحاضن هو وحميد وكيفو الولد بجيته

گعدنه بالهول وليال الثوله حت ما گامت وسلمت ظلت گاعده تگله الضهر سلمت عليك وديالا سلمت من بعيد

ظل گاعد بالربع ساعه وما يحجي شي

جبتله جاي دحگ عليه وهزيتله راسي بعدم قبول بلكت يفتهم على نفسه وما يحجي احنه بيا حال

حميد : شبيك ماجد خوما اكو شي اشو ساكت عن غير عادتك

امل : ماجد يخوط بگلاص الجاي ويمسح بوجه

ويبلع بريگه ويبوگ نظرات على ليال وهيه تلعب وتصفط اللعابات بالكارتون وتغطيهم زعم نامو بلل شفايفه وجان يگول

ماجد : اني ما اعرف منين ابدي وشلون احجي

اريدكم تسمعوني للأخير وما تقاطعوني

عماد : يالله خير احجي ماجد نسمعك +

ماجد : احم اني ما راح احجي عن نفسي شي

انتو تعرفون عني كلشي احنه رابين جميع ونعرف بعضنه شنهي من شنهي امنتو بينه وفتحتو بيتكم النه ولا فد يوم حسستونه احنه غرب

ماجد : احم اني ما راح احجي عن نفسي شي

انتو تعرفون عني كلشي احنه رابين جميع ونعرف بعضنه شنهي من شنهي امنتو بينه وفتحتو بيتكم النه ولا فد يوم حسستونه احنه غرب

حميد : منين غريب انته ابن الخاله وهاذ بيتك.

ماجد : عز الله احم الي اريد اگوله وما اطول والف وادور اني بيوم الحنه مال مهره طلبت ايد ليال من الملا ورحب بيه وافق بس گال ليما يخلص عرس مهره

امل : عماد ظل فاتح اثمه ويدحگ على حميد وثنينهم انبهتو وماجد مستمر يحجي واني مغصتني معدتي من التوتر

ماجد : اني ادري هاذ مو وكته الحجي ابد

بس اني گلت اخذ موافقتكم وامت ما ردتو نعقد وشتردون اني حاضر

عماد : ماجد انته وعيان عن نفسك شجاي تحجي تره هاذ مو مزق شايفنه جهال گدامك لو شنهو

ماجد : مزق (شقه) شنهي عماد

عماد : انته سكران مو

حميد : على كيفك عماد خن نفتهم

عماد : شنفتهم مجاي تسمعه شيهذي جاي يخطب ليال تراب ابونه بعده ما نشف وليال بگد جهاله

وانوب وحده بدون اهل ويگول ابوك انطاها

اذا مو سكران شنهو تفسيره ها

ماجد : خلفله عليك بس ناقص الغيره يسكر ويطب بيوت الناس

عماد : راح اسوي نفسي ما سمعت كلامك ابد ولا جن صار شي

ماجد : عماد شبيك اني جاي اخطب لو اطلگ اخذ الموضوع بجديه واني مو بعازة اهل يجون ويايه يخطبون قابل ما اعرف اسولف لو اجيب اهلي يمدحوني گدامكم واني اظل گاعد ومبتسم

امل : عماد صعدت عنده العصبيه نار گام يفرگ بوجه

وحميد ساكت ويدخن وماجد يحجي بهدوء وينصي بصوته عاط عماد طگت روحه

عماد : شو بالله ماجد صد على ليال شجاي تسوي شو دحگلهااا بالله

امل : صد عليها وجان يگول جاي تلعب شجاي تسوي

عماد : وهيج بهل بساطه گلتها جاي تلعب جاهل هاي يا ماجد جاهل انته صاب عقلك شي وهاي مال ابويه انطاها الك لا تحاول تعيدها مستحيل اصدگ

ماجد : قصدك اني اجذب مو خلفله عليك

اني قبلان بيها جاهل ما تفتهم اربيها وادللها واحطها بعيوني وذا يوم اذيتها بكلمه الك حگ عليه هيه اول وتالي راح تكبر يا عماد شنهو الفرق تكبر وهي معرسه

عماد : حشاك من الجذب بس كلام ابويه الله يرحمه بعده يرن بأذني من گال ديالا وليال اذا ما يكملن دراسة ويتخرجن مستحيل ازوجهن لو يجيهن ابن امير وذا مو هنه يرضن بي واكو فرق جثير بين تكبر عزبا وبين تكبر معرسه لا تسوي روحك غشيم

ماجد : ابوك بالبدايه رفض بعدين فكر وگال ترهم بس انطيني صبر وارجع اگلك تكبر يمي احسن اصيرلها اب قبل لا اصيرلها زوج

عماد : يعني هسع تريد تقنعني ابويه انطاها الك انته

يا ماجد انته

ماجد : ليش شبيه ؟

عماد :ما بيك قصور كامل والكمال لله عز الله معدل الف وحده تمناك بس ما ترهم دحگ على ليال حت ما تدري على شنهي نحجي دحگلها تخيط ملابس للملاعيب هاي شلون راح تفهمك وتصير ام بيت

ماجد : يعمي اني قبلان اعتبرها بنتي واربيها ليش تكبرون الموضوع اذا عد الشرع حلال

عماد : عوف الشرع على صفحه ماجد

ما ترهم ابد لا تحاول

ديالا : من اول ما گال ماجد ابوكم انطاني ليال اشتعلت نار بيه جذاب اني سمعت ابويه گاله انسه السالفه مستحيل

ــ اتذكر حجيهم كله هاذ شلون اله عين يجذب وليال مستمره تصفط باللعابات حت بالها مو يمهم وشايله ابره وخيط تسوي ملابس للعابة

ردت احجي بس شفت عماد ما قصر ويا

وسكتت عماد گام يعلي بصوته حيل ويحجي بعصبيه

امل : ظل ماجد بالساعه يقنع بعماد والعجيب حميد ساكت معقوله مثل مگالت ليال حميد يدري وموافق

عبالي ماجد يجذب

عماد عاف ماجد گاله تنسه الموضوع من گاعه نهائي شيله من راسك اني اعزك لا تخلينه نتغاثه عد تاليها

واخذ ليال وراح عالحجره

وظلينه اني وحميد وماجد وديالا

ماجد ختنگ غورگن عيونه ويدحگ على حميد وثنينهم غبرو الهول بالجگاير تالي ماجد عاف وراح

وطلع حميد وراه

طلعت وراهم ادحگ حميد وماجد واگفو بالطرمه يحجون عفتهم ورحت على عماد جان گاعد يم ليال يساعدها تخيط الثوب مال اللعابه زين

اول ما فتت گالي عماد امل عود كلمه وحده ما اريد

هاذ الحجي الي صار بالهول اريد تنسونه نهائي

ـ ليال مبرطمه وتخيط واني حاطه ايدي على گلبي بس لا ليال تجفص بشي

ديالا : مرت ثلاث ايام من جيت ماجد علينه

يخطب وفشله عماد ومن ذاك اليوم ما شفنا

اجه غازي عزمنه گال اليوم عدنه عزيمه بمناسبة تخرج وتعيين بركات اخو صائب وماجد

رفضنه العزيمه ومحد راح تفهم الوضع ورجع

سعاد : غازي قرر يسوي العزيمه ابيتنا خطيه بركات محد حتفل بتخرجه عبن صارت الصگعه مال عرس مشعل ومهره عاد اجه وجايب خبر التعيين ماله وغازي گاله العزيمه والعشه عليه

الضهر وقبل لا يعزم اي واحد راح جاب صائب وماجد تا يراضيهم گال عيب راح تجي وادم غربه ويشوفون وضعكم هيج ومو حلوه بحقكم

صائب : اني ما عندي شي ويه ماجد راح اعتبره غريب وانطي نصيحه ينسه شي اسمه ليال

سعاد : ماجد تجاهله وگام ياكل عنب ولا رد

وغازي تعب وياهم وما وصل لحل عاد گام يعزم الناس عالعشه

اجو گرايبهم كلهم الا صبره عبن لازمه عده

واجت نضال خطيه اول ما طبت تحزمت وگامت تساعدني كملنه العشه وردنه نصب وختفه ماجد

طلع غازي يدور لماجد

واني دزوني ادور لغازي ثنينهم ختفو

كلها تسأل عليهم طلعت ادور واسأل

شفت غازي عالممشى مال بيت صائب يسحل بماجد

رحت انادي ما ظل وكت عالعشه +

واسمعه يگول لماجد

غازي : ما يلام بيك صائب شگد شارب تانكي

سعاد : ماجد رايح منتهي ويحجي بصعوبه يگله احبهااا يا غازي احبهااا مگدر بلاهاا اموت والله

غازي : بس گوم فوت جوه منجدتنه الشرب طالع من اذانك. ما تصيرلك جاره

ماجد : غازيي جيبلي ليال اني سكران بيها حت انته اتخيلك ليال احبها

سعاد : سحله غازي سحل من كتوفه وفوته جوه الا نفسه انگطع من ثگل ماجد رجعت بساع بدون ما يشوفني

كملنه العشه وبلشت احضر السكانات شفتهن ما يكفن

وهسع يجيني غازي يعيط

گالت رافده عدنه المعرض مليان اخذي كريمه وروحي جيبي

اخذت كريمه وجان نروح بس وصلنه الصاله كريمه گالت اروح عالحمام طلعيهن لبين ما اجي

ظليت بالصاله افر بأذاني ما اندل اي معرض بيهم الي بي سكانات عدهم ثلاثه واحد بالهول واحد بالمطبخ واحد بحجرة شكحه

دورت الي بالمطبخ عسريع وماكو مشيت بتجاه الهول وصلت الباب

واشوف الصدمه ماجد امدد عالقريوله رجل مثنيها وماد رجل وايد ناصله من القريوله والثانيه على صدره ويمه نضال گاعده بحضنه خانبه علي تبوسه من اثمه ومن رگبته وتفتح ازرار قميصه ظليت متصنمه بمكاني وفاتحه عيوني معقوله الي جاي اشوفه

وماجد يروط گوه يحجي يگللها انتي جيتي حبيبتي

ما يفعل ينطونج اني اخذج منهم احبج

ونضال تگله اي حبيبي هاي اني اخيراً عترفت انك تحبني دنگت علي انوب تبوسه لزمها من شعرها ويبوس بيها حطيت ايدي على اثمي اني شجاني وگفت ادحگ رجعت بساع وگفت بالصاله لعبت نفسي

اجت كريمه گالت هاا لگيتي السكانات

ما گدرت احجي بس هزيت راسي بــ لا

گالت بالمعرض بحجرة امي طبينه طلعناهن

وجان نتلاگه ويه صائب

امشي وادحگ علي فات عالهول

يتبع…