رواية عرين الصياد الفصل التاسع عشر 19 بقلم شذرة العدوان

امل : ما صدگنه نصل البيت ونرتاح

سممنه صياد بالقصة مالته يادوب توني جست الگاع

وعماد مدد روحه لايبه اجت ديالا تصيح تگول الحگو ليال

رحنه نتراكض ليگينها تهلس بشعرها وتلطم وتصيح وشاگه القميص وتشم بغترة ابوها وصريخها يرجف الگلب لزمناها اني وعماد وفاتن وهاي تشيل بروحها وتلطخ

ليال : ابوي مااااات صرت يتيمه مهره ماتت ومحمد مات اني وين جنت وييين شلون ماتو واني ماشفتهم ويين جنت اني وييين

امل : انبح صوتها بثواني معد تگدر تصيح گامت تگح وتزوع وگعت بالگاع وتهمس هدوني

اريد اموت روحييي وجان تخرب

وصار لون شفتها حبري

عماد گام يصيح ويشيل بروحه ويرگعها

وفاتن نهد حيلها والضيم وگع علينه اني وديالا

ما اجه على بالي غير صائب ادز علي شسوي ما عدنه احد

عطت بديالا تروحين بساع على سنان تخلي ينادي صائب امشي طلعت ركض

عماد : هاي منهووو حجالها منهوو

فاتن : والله مدري اني حت ثوبي بدلته من گالتلي ديالا يالله طلعت

عماد : كلشي ضاع تعبي كله راح شسوي فهمونيييي

امل : كافي عماد اعصابك لا تنجلط ونحير بيك هيه اول وتالي راح تعرف

عماد : تعرف بس مو هيج يا امل مو هيج زعم گلت ماكو غير صائب نذبها براسه ويخبرها بطريقته هيه تهابه

امل : عماد كافي تصيح يالله نودي البنت عالدكتور شوفها ثلجت عبالك ميته

عماد : شيسويلها الدكتور شيسوي راحت البنت امل راحت بعد تعبنه كله راح ما سمعتي الشيخ شگال شگد وصانه ما نفززها ونصدمهاااا

يول اريد اعرف شلون عرفت ليال شلووووون

ديالا : ما ردت اروح على سنان وصلت باب بيته ورجعت گلت اروح بنفسي

رحت ركض انادي استاذ صائب اختصرت الطريق من البستان اركض بدون شعور وصلت الممشى مالهم ونهد حيلي معد اگدر ثنيت على رگبي وحطيت ايدي على گلبي واسحب النفس اريد گلبي يرگد

واحاول انادي واصرخ ما اگدر من الركض الي ركضته

المسافة حيل بعيده تگطع الگلب شلون وصلت مدري

طلعت سعاد زوجة غازي من بيتهم وجان تشوفني وتجي عليه لزمتني وتگلي شبيج يولي شجاج

اريد احجي وياهه ما اگدر بس ارمش بعيوني

واديني ترجف راحت بساع على بيت صائب ونادته طلع بساع ولزمني من وجهي گال شبيج ديالا احجي شصاير

جمعت قوتي بالگوه وگلت ليال غصيت بالكلمة ختنگت نهد حيلي ولزمتني سعاد شالني استاذ صائب فوتني جوه وناده رافده وكريمه گال عينجن عليها وجان يروح

ظليت امدده وارجف وست رافده تلمس بيه وحايره شلون تساعدني جابتلي سعاد مي وشربتني ما گدرت ابلعه

رافده : هاي شبيها ديالا

سعاد : مدري شفتها بره يم الممشى مالكم مثنيه وتلهث مابيها حيل خطية

رافده :خاف ركض وراهه جلب

سعاد : زين شجابها عليكم ركض دحگي انوب حافية رجليها كلها دم مجرحها العاگول

رافده : كريمه جيبي مي غسلي رجليها

ول ديالا احجي شجاج شصاير

سعاد : خليها ترتاح البنت انگلب حالها من الركض يمه الزمي گلبها يريد يطلع دخيلك ربي

امل : نصيح فوگ ليال الي لا ايد ولا رجل

وما يقهر غير عماد الي انهد حيله بالزاوية وحط راسه بين رجلينه وگام يبجي وينحب

گطع الأمل خلاص بدال ما يودي ليال عالدكتور استسلم وگال خلص لو راح تخبل لو تموت

شويه ويجي صائب يركض وينادي من بره احد هين طلعت عليه گتله اي تعال

صائب : هاا امل شلونكم امت جيتو شكو اشو ديالا اجت تركض ووشبيها لياال

امل : صائب بعدين افهمك تعال الحگني ليال تخربطت وفاتن وعماد التهو بالبجي وبس اني الوح بنفسي

صائب : وينهااا

امل : طبينه اني وصائب گام يصفگ بوجها فاقده شالها وطلع تايخذها عالدكتور انادي بي يمعود صائب جيب سياره خوما تاخذها شايلها

صائب : اسكتي امل انعل شيطانكم انتو بشر انتو

اسكتييي امشي سيارتي عاطله حظي الأگشر هسع يالله عطلت

امل : اخذها شيل وليال مثل الميته بين ادينه اديها تطوطح لحگته ركض همزين لاگتنه سيارة وگفت گدامها وجان نحط ليال ويا ورحنه عالدكتور

وصلنه وجان گلبها الدكتور گال هسع اني شفتهم منها هسع ضغطها زين شسوي بيها

صائب : عجل انته عليش دكتور اذا متعرف شتسويييي

---اخي شسوي يعني شنطيها لو عدها هبوط جان انطيتها مغذي وهاي گدام عينك حت القلم نبته برجلها ومجاي تحس البنت فاقده جسد بدون روح اخذوها ورجعو عالبيت لا تبلوني

صائب : شنهي نبليك شجاي تحجي انطيها شييي هاذ العلاج شنهي شغله عجل

ـــ اخي الف نوبه گتلك شنطيها واني ما اعرف حالتها شنهي

امل : علگت بين الدكتور وصائب رادت تصل للضرب

اني لازمه ايد ليال عبالك ايدها بدون عضام مابيها روح خلاص اتوسل بيها وابجي اگعدي ليال والله تعبتي نفسج وتعبتي الناس وياج اگعدي تخسين

ديالا : هدئت اعصابي وبديت استوعب واحس بوجع رجليني اني شلون اجيت حافيه اتذكر لبست حذيان بس يمكن نصلو من رجلي وما حسيت

گعدت وجان الزم راسي اجت سعاد

سعاد : هاا يولي طبتي شبلاج يبنيه شصاير وياج

ديالا : اختي مريضه وجيت انادي استاذ صائب

گمت تا اروح

اجت شكحه گالت اختج مريضه صائب شعلي

مبتلي بيكم لو مخلفكم وناسيكم

ـــ دنگت راسي ما حجيت واحاول اعدل وگفتي رجليه ما يعينوني مجرحات جاوبتها ست رافده

رافده : يمه شبيج شهل حجي بنات الملا هنه بناتنه وصائب يعتبرهن بناته وغصب عنه نروح الهم واني هسع هم اروح ويا ديالا

شكحه : هاي لو اني مريضه ما جان رجفتو عليه انتي واخوانج هناك ماجد يتصل وما يسأل غير عليهم وهين صائب السانه لازگ بسيرتهم وماكل همهم

رافده : يمه لخاطر الله وذا اهتمو شكو بيها عجل لأيمت نگف وياهم الضاهر نسيتي زينات الملا درويش سبحان الله انتي وخالتي صبره ابد ما عدجن صاحب

شكحه : اسكتي اسكتي روحي اطبگي ويه اخوتج

اخلف واتعب والنفع للغير من امداها بطني الجابتكم

ديالا:عفتهن مجادلات وطلعت اعرج من وجع رجليني والدمع بعيوني وصلت الممشى ما گدرت ادوس الگاع وگفت ورجيت ايدي عالحايط

جاني صوت ينادي هي يبنيه اواش

صديت شفتها سعاد اجت تمشي عليه ولابسة عباتها وشايله نعالات حطتهن گدامي گالت يالله البسي وخن نروح لهلج يالله

لبست النعالات وما گدرت اتاوزن رجليه عبالك جنت اركض على گزاز

لزمتني سعاد من عكسي گالت اواش اگودج

مشينه ونادتنه رافده گالت اگفولي اجي وياكم

امل : جريت صائب من ايده شفته صار نار راد يكسر عيادة الدكتور گتله كااافي البنت ماتت يا صائب دحگلها مثلجه وشفايفها لونها حبري ماتت يا صائب

لزمني من عكسي گال لا تخبلين هاي هم من تصوب عماد صار بيها هيج نامت والصبح صارت زينه انتي هم جنتي فاقده وما تذكرين

كافي امل لا تصيحين وتزيدين هميييي هم

على وگفتنه وحايرين بوضع ليال اجه عماد مورم العيون شاف حالتنا ودحگ على ليال نايمه عالسدية وايدها ناصله ومثل الميته وجان يعيط

عماد : ماتت لياااال مو ماتت اخيتي ما ظل عدنه احد

امل : گعد بالگاع وگام يلطم لزمه صائب ويهزه من كتوفه وعاط بي كافي عماد ما بيها شي ليال هاي هم نوبه صار بيها هيج وطابت والله هاي نايمة

عماد : وخر عني صائب لا تجذب عليه وخر ما ادحگلها جامدة وشاحبة وتگلي نايمة مو هاي ميته يا صائب اويلي عليك عماد شمسوي بحياتي وهيج يصير بيه

صائب : خايب لا تخبل لاااا تخبل گوم شوفها الزم گلبها والله عايشه وگلبها يدگ شوو گوم الزمها

امل : واگفه اعصر بأديني ودموعي تصب وادحگ على عماد مثني اباب العياده ويصيح وصائب يسحل بي يگله گوم شوفها وعماد يهز براسه ويصيح يگول ماتت لحد ما سحله صائب من جوه اباطاته جابه يم ليال

صائب : الزم گلبها يالله حط اذنك على گلبها والله عايشه والله وهاي ثاني نوبه يصير بيها هيج كااافي لا تخبلوني

امل :گام عماد وحضن ليال وحط اذنه على گلبها ويصرخ اگعدي ليال لا تعوفين اخيج وين اولي ما ظل عندي احد اگعدي فتحي عيونج اخيتي تخسين والله سحبه صائب وبعده عنها

صائب : هاا تأكدت عايشه وخر خن اشيلها ناخذها عالبيت وهسع اطيب مزال اهل العيادات زمايل من گولة ماجد ناخذها عالبيت وننتظر رحمة الله

عماد : لا صائب خن نوديها على شيخ يرقيها مثل شيخ عثمان وهسع تگعد مو امل

امل : هزيت راسي بـ اي

صائب : انجان عالرقية اني ارقيها

يالله ناخذها عالبيت

امل :شالها صائب عبن عماد مابي حيل يعصر بأدينه وروحة لايبه ويبجي ويبوس براس ليال من شايلها صائب اخذوها حطوها بالسيارة جايبها عماد ويا ورجعنه عالبيت

اول ما طبينه حدر صائب بساع شال ليال واخذها عالهول لگينه فاتن وعمتي معاضد مسويات مناحة عمتي معاضد فاتت جوه عبن صائب اجه

عماد : يالله امل جيبي جرجف خن نغطيها تا صائب يرقيها

امل : رحت بساع وجبت جرجف وغطيتها

وصائب لزم راسها وگام يقرا

عماد : صائب اشو الشيخ عثمان يقرا بدون ما يلزم راسها

صائب : عماد اسكت لخاطر الله

عماد : ما راح احجي اقرا صائب يالله

امل : بلش صائب يقرا ولازم راس ليال بس ماكو اي رد فعل منها ولا تحركت ولا هتزت

عماد : شو ما گعدت

صائب : عبن المس رايح منها لهسبب ما گعدت

عماد : اي شيخ عثمان گال طابت وراح المس عجل شبيها هسع

صائب : مو گتلك صار بيها هيج هم من گلتلهم على اصابتك هم خربت وما صحت للصبح

عماد : وهسع شلون صائب شلون بيه خاف البنيه تموت

صائب : انته لو تبطل بجي ونحيب مثل النسوان جان خوش تخبل الي ما يتخبل كافي تفاول عالبنيه بالموت تعاي امل افرگي راحة رجليها

امل : اجيت يم ليال گمت افرگ راحة رجليها هيه شگد تغار من هاي الشغلة بس اليوم ولا حست ضغطت بكل قوتي حت اضافري نبزتهم برجلها وماكو دنگت راسي يم رجليها وگمت اشاهگ عاط بيه صائب

صائب : ااااامل لخاطر الله شجاج انتي ورجلج لعبتو نفسي انتو دواكم ماجد والله اااخ اول مره اتمنى بهاي اللحظة

ديالا : وصلنه بيتنه گوه طبيت عالهول لگيت ليال نفس الوضع قرفصت نفسي يم الباب وگمت ابجي بدون صوت

الكل جان متأثر وماكل هم ليال فاتن داخت السكر صعد عدها راحت بحجرة امي تاخذ علاجها اسمعها تحجي ويه امي وتبجي

فاتن اكثر وحده مگرودة بينه

اخذت شايب وتمرضت بالسكر وبدال ما تجي يم اهلها ترتاح تلگه المصايب گدامها وفوگ هاذ الناس تحسدها عبن رجلها عنده فلوس

سعاد جانت واگفة بالباب خطيه تستحي تريد تجي تشوف ليال بس مستحية من عماد راحت گعدت يم فاتن وامي

وست رافده گاعده يم ليال وتحاول تصحيها ماكو

يربي لا عتراض على حكمك بس احنه ما اذينه احد ليش يصير بينه هيج

ظليت حاطه راسي بين رجليه وابجي صامت تمنيت لو بس مهره موجوده

جان وجودها يبرد الگلب بسبب شخصيتها القويه

اسبع من عماد الي بس گاعد ومرتجي عالحايط ويگهد

عماد : راح اتخبل ليال شلون عرفت اذا لا اني حجيت ولا امل ولا فاتن ولا ديالا وامي ما طلعت من حجرتها اريد افهم شلووون عرفت

ديالا : رفعت راسي بللت اثمي اريد الكلمة تطلع مني گوه يالله حجيت گتله امي صبره حجتلها

مجرد گلت هالكلمه گامو صائب وعماد ثنينهم على حجرة صبره

عماد : انتي شنهي من بشر گليلي شنهي من بشر شلون تعلمين ليال بهيج خبر وانتي تعرفين بيها مريضة

صبره : والله عياره كل مرض ما بيها هاذ ضرب دلالكم الزايد

صائب : خاله شبيج لخاطر ربج شبييج دلال شنو انتي ليش گلبج اسود ليال طفله طفله ومريضه شجاج وگلتيلها اذا ماتت تحملين خطاهااا

صبره : ما تموت هاي عرج ما يطگها بس ضنايه يموت ذني زاهيتلهن الدنيااا كلها ترجف عليهن اولهم انتو يا ولد اختيي

امل : جيت عماد على صبره وگف گدامها وعاط

عماد : اسمعي صبره قسم بالله اذا صار على ليال شي الا اطلعها من عيونج انتي انسانه لا ذمة ولا ضمير ولا عندج خوف من الله انوب حاطه القرأن وتقرين نضفي گلبج من الحقد عود الزمي القرأن

صبره : اطلع بره احسلك عود هم اخذها ويه الناس الغربة زعم تعالوجها تعبالي سوالفكم تعبر عليه جذابين الله يعلم شنهي غايتكم من رحتو

عماد : ول صائب اسمعهااا شتحجييي هسع اذا اضربها مو اطلع ناقص غيره انوب هيه ام الراهي

صائب : خااالة كااااافي خافي ربج والله نزلتي من عيني وبعد هاذ حجيج لا خالتي ولا اعرفج مره شگبرج حاطه عقلج ويه ليال الجاهل وتشككين بيها بيش تگابلين ربج باجر

صبره : اطلعو بره اطلعووو

امل : گامت صبره زعم جانت تقرا قرأن دفعتهم وطلعتهم بره وسدت باب حجرتها

ظلو صائب وعماد يفحون من العصبية يمكن لو ماجد موجود الا تطبگ عنده ويضرب صبره

رجعنه عالهول گعدنه وننتظر رحمة الله

واعصابنه نار من سوالف صبره

•

• بيت الشيخ علوان

نشمي : ها يابه الحمد لله عالسلامة

صياد : الله يسلمك

نشمي : هاا شلونج شيخة خزامي شبعتي فرات بصلاح الدين لو تريد تاخذيني وياج جان ما نگصتي

خزامي : وخر من دربي فحانه تره هذاك صياد بعده بالطرمة انادي اخلي يگضي بيك التوبة

نشمي : گدرتج بس عليه خزامي ولا يوم حسستيني اني ولي العهد وخليفة ابنج

خزامي : خايب ولي من دربي ولي عود انتو تخلفون الصياد لاحد يسمعك ويغص من الضحج وخر

نشمي : خوش شيخة خزامي خوش ادفعيني وروحي الله كريم

خزامي : كواكب وينج

كواكب : هله عمه الحمد لله عالسلامة

خزامي : الله يسلمج امشي بنيتي بسااع سويلج لگمة اجل تره بدون غده وگبلها سوي جاي راسي يفصفص

كواكب : تبشري عمه

خزامي : نشمي هيين ولا نشمي تعال لا تسوي نفسك اطرش

نشمي : خير شتريدين

خزامي : اشوفك تحجي من گفه خشتك وين الصياد خن انادي

نشمي : هسع عوفي الصياد جاي امزق وياج خزومتي

خزامي : تمزق يول اني من وشرك

نشمي : غير بعدج شباب يروحي جنج الگمر

أمريني يشيخة العرب شرايده يگليبي

خزامي : لله درك يصياد بس يسمعون اسمك يصيرون اوادم ويرجفون

نشمي : هسع عوفي هالحجي هاذ خزومتي

خزامي : امش جيبلي جودليه افرشها هين اريد اگعد بالطرمة

نشمي : امر يا تاج راسي امر

ـــ وهاي الجودليه للشيخة خزومه

خزامي : اف ما اصدگ انتي گاع واگعد عليج اخ يمه رجليني

نشمي : مديهن افرجهن يبعد گلبي

خزامي : انته شبلاك انگلبت احوالك يول صاير بيك شي

نشمي : احم اخاف اسولف وتفشليني وتبيعين سري يم الصياد

خزامي : فرج رجليه زين وسولف شعندك

نشمي : ااخ شحجيلج تا احجيلك يا خزامي

افوت دقري بالسالفة عبن ادري بيج فضولية

خزامي : شوو گوم ولي من وجهي لا ادفرك گووم

نشمي : لا لا امزق وياج بعد گلبي

انطيني حبه (بوسة)من هالخشم يمه مو وجه كيكه

خزامي : اذا ما عندك سالفة بيها خير انهض يم ابوك خاف يحتاجك.

نشمي : خزومه الناس هيه تحتاج الصياد مو هوه يحتاج احد وتلگينه هسع راح گابل صورة عمي مشعل المهم خن اسولفلج گبل لا يجي احد

خزامي : اي

نشمي : احم خزومه هاي البنيه الحلوه الي اخذتوها وياكم منهي هاي بروح اهلج خزومه گليلي شسمها

خزامي : شوو گوم گوم انهض عرفتك ما عندك سالفة بيها خير اسليمة اطمك وين صياااد وينه

امل : صارت المغرب وليال على حطتها وما نگدر نفارگها كل شوي نسمع دگات گلبها عايشه وتبد بينه الروح صائب راح وصل سعاد ورافده ورجع علينه بساع

لحد ما صلينة المغرب وجان تگوم ليال تهذي

وتحرك كلنه التمينه يمها تحرك بشفتها وهدب عينها

اول ما فتحت ودحگت علينه اخذت مشوار وجان تعيط

ليال :ابويه مات وصرت يتيمه واخواني ماتو احنه صرنه بدون اب

امل : تحجي وتشاهك عبرتها ودموعها تگص الگلب تأشر على نفسها وتگول صرت يتيمة بدون اب بدون اب وتلطم وعماد حاضنها دافن راسها بضلوعه ويبجي وياهه

گعد يمها صائب ويداري دموعة وگام يوضعلها

ويصبر بيها وليال تقاطعه وتگول

اني وين جنت وين من ماتو اخاف اجذبون عليه

والله ما ازعل گلولي احنه نجذب

من المغرب لحد ساعة 12 بالليل وليال تنحب وتشمشم بملابس اهلها ودورلهم بالبيت تفوت بحجرة ابوها تبوس حت الحايط وتشمه ادحگ على غراض ابوها وتگول وينه الدرويش وينه هاذ مكانه وينه ما يجي يصلي قيام الليل

احنه نفتر وراهه صائب گال خلوها براحتها تعبر عن حزنها لحد يمنعها اذا تكتم بداخلها اطگ البجي هم زين للبشر يرتاح راح صائب وهو يوصي بينه

اجينه انام وعماد جابها يمنه حطها بحضنه ويمسد على شعرها وهيه تشاهك ومجلبه بقميصه من صدره ودموعها تجري غفت بحضنه وجان يخليها على نومتها

عماد : امل شدي رجل ليال بحبل وربطي برجلي مثل قبل

امل : ليش عماد تره ليال صارت زينه وما ظل بيها مس

عماد : ادري امل بس خايف مگدر أمن شدي للضرورة

امل : تره هاذ حزنها طبيعي لا تخاف وراح تظل جم يوم والأيام كفيله تخليها تنسه

عماد : كلها تنسه الا ليال يا امل اكثر وحده دللها ابويه بس گليلي وين اكو اب يتعنه محافظات تايجيب ملابس وزيت شعر لبنته يخاف عليهن حت من الهوا

جان دوم يوصينه بيهن ما تذكرين من گال الي يمد ايده على بنيه اتبره منه يحبهن جثير

وتره ابويه مات وهو مو راضي على حميد يا امل لو يظل حميد طول عمره يسجد ويصلي ما يفلح عبن غضب ابويه علي من ضرب مهره وليال

امل : الله يرحمه ويغفرله ويصبر البنات

عجل اگوم اشد رجلها بس ان شاء الله اخر مره هاي

عماد : ان شاء الله

امل : ظلو عماد وليال على نومتهم ادحگ عليها لشه بدون عقل ما تعرف حت تعبر عن حزنها طفلة يربي هم يجي يوم وينسعدن هيه وديالا وجوانه

بالليل واسمعها تهذي بمهره وابوها

وتفز وتخاف وتحضن عماد حيل وتلزم قميصه

زين هاي شلون بيها منو راح ينومها يمه قابل عماد يظل منومها يمه جانت مهره تلفها بحضنها ويخلنها بالوسط هيه وديالا تگول ما انام بالطرف ياكلني الوحش

جانت مهره تگول اذا تطلع رجل ليال من جوه البطانية

تگعدني تبجي تگول مهره رجلي طلعت غطيها

شگد جنه نحجي على مهره لا تعودينها عليج

تگول لا اني اريدها يمي هاي بنتي اكيف على دلالها بحضني احس نفسي ام الله يرحمج يا مهره ويعوضج الجنة عرسج انتي ومشعل بالجنة ان شاء الله

گعدت الصبح على صوت عماد جان يصلي

صد عليه

عماد : امل عينج منها الله عليج عوفي شغل البيت اريدج تعتبرين ليال جاهل عمره خمس سنين حت ابنه عوفي اهتمي بليال

امل : ميخالف بعيوني باس راسي وراح على شغله گحزت يم ليال امسد براسها واتأمل ملامحها شگد حلوة جمالها وبرائتها يلوگون بالعين

ديالا : وره جم يوم بدت ليال تستوعب موت ابويه ومهره ومحمد

گامت تذكرهم وتدعيلهم وشگد توسلت بعماد ياخذها عالمگبرة وما فعل

صارت حزينه وما تلعب ولا تطلع وحت المسجل الي جانت متعلقه بي عافته

گامت تعاونه بالشغل تكنس البيت وتعزل

رغم امل ما تخليها تشتغل بس هيه تريد تصير مثل مهره زعم هيه بهل بساطه تصير مثل مهره

تگعد حزينه عالأكل تاكل لگمه وتگوم

اجه حميد واستلم الشغل ويه عماد

جان قبل اذا يجي من العسكرية يگضيها نوم

بس هسع شغل عبن عماد ما يلحگ

فاتن راحت لبيتها

امي ما تطلع بمگابلة القرأن وتقرا وتصوم ثنين وخميس

وصبره الثبرة تفتر نوبات مثل البومه ونوبات اطس جوه وما نشوفها بس وكت الوجبه

طلعت بره فرشت الحصيره بالفي

ورحت جبت اللعابات مال ليال حطيتهن بكارتون نيمتهن رتبت المكان سويت مثل ما تحب ليال

رحت ناديتها جانت گاعده بالحجرة وتشم بملفع مهره ولافه سبحة ابويه على ايدها

حطيت ايدي على جتفها يالله ليال تعاي دحگي شسويت دحگتلي بطرف عينها والدمع يجري بدون صوت

ليال : ماريد عوفيني

ديالا : بس اطلعي دحگي وذا ما حبيتي ارجعي ابد ما الح سكتت وجان اسحبها من ايدها

وطلعنه شافت المكان ابتسمت شوي گعدت وشالت لعابتها الي جابها ماجد

ليال :ماجد امت يجي

ديالا : البارحة خابر گال اليوم يجي

ليال : ديالا اريد اروح عالمگبرة

ديالا : لا ممنوع ديري بالج

ليال : ليش گليلي ما تخلوني اروح والله بس شويه ما اتأخر

ديالا : تمرضين من تروحين يا ليال اگعدي واسكتي

ليال : عليج الله ديالا امشي نروح شلون اتمرض گليلي هيه دنيا صيف انتو محد بيكم يحبني كلكم صرتو تكرهوني ساجنيني ما تخلوني اطلع

ديالا : اگفي لا تروحين تعاي اسألج وذا عرفتي عود اخليج تروحين

ليال : شنو يالله

ديالا : بدون بجي هسع امسحي دموعج

ليال : ماشي اسألي يالله

ديالا :اسألج اهنه شگد صارلهم من ماتو

وانتي شجنتي تسوين بصلاح الدين وليش مجاي تذكرين شي

ليال : امل تگول شهرين ونص صارلهم

ديالا : وگبل لا تحجي امل جنتي تدرين

ليال : لا

ديالا : وصلاح الدين عش رحتي عليها

ليال : مو ركض ورايه جلب وخربت مثل ذيج انوبه وجان ودوني على دكتور اطيب

ديالا : شفتي جلب ركض وراج تذكرين شي

ليال : لا ما شفت ولا اتذكر شلون ماتو ابويه ومهره ومحمد وانوب صارلهم جثير

گليلي شلون ما اتذكر زين اني وين جنت ويين

ديالا : هسع بدون بجي خن نحجي

جنتي موجوده وصيحتي ولطمتي ورحنه عالمگبرة وانتي گمتي يوميه تنهزمين عالمگبرة گمتي تكفرين وتغلطين لهسبب وداج عماد لصلاح الدين يعالجج

ليال : اني ما اكفر ديالا شجاي تحجين

ديالا : مو انتي يا ليال گالو هاذ مس شيطان عبن رحتي عالمگبرة لا ركض وراج جلب ولا شي لهسبب عماد ما يخليج تروحين عالمگبرة مو عبن يكرهج بس يخاف عليج

--اشرت على نفسها

ليال :يعني اني اكفر واغلط ليش تجذبين ديالا

ديالا : اذا ما تصدگين بيه اسألي امل وعماد

مستمرين نحجي وليال ما تفعل تصدگ

اندگ الباب گمت سألت منو

اجاني صوته هاذ اني ماجد

گتله اصبر بس اجيب المفتاح.

رحت بساع جبته من المطبخ ورجعت فتحته

طب ماجد عاگد الحواجب سلم عليه

اول ما فات وشافته ليال ركضت حضنته وتبجي وهو ظل يتلفت انبهت بس حضنها وباس راسها

ليال : ماجد ابويه مات ومهره هم ومحمد كلهم ماتو حت مشعل خطيب مهره مات

ماجد : اعرف ليال اعرف الله يرحمهم

ديالا : لزم وجها بدينه ثنين ومسح دموعها

گادها من ايدها وگعدو عالحصيرة

وليال گعدت يم ركبته ولازمه ايده وتشكيله وتبجي

ليال : ماجد احجي وياهم الله عليك ما يفعل يخلوني اروح عالمگبرة ولا يفعل يخلوني اطلع بره

من انام عماد يربط رجلي بحبل ويشدها برجلة

ويقفلون البوب بقفولة ويضمون المفاتيح گالو زعم اني انهزم

احجي وياهم امانه

ديالا : ظلت ليال تشكي لماجد ما خلت شي ما حجته

الدمعه تلالي بعينه ويفرك عينه بصبعه ويسمعها من خلصت گاللها

ماجد : بسيطه ليال اني اخلصج منهم كافي تبجين يالله امسحي دموعج

ديالا : دحگلي بغضب ردت اگوم ناداني بعصبيه

ماجد : ديالااا اگفي بالله

ديالا :ها

ماجد : ليش من اتصل وگلبي محروگ تحرگينه بالزايد نوب تسدين التلفون وترفعين السامعه تا مااتصل لو اگلج انطيني ليال احجي وياهه طلعيلي الف عذر ليش ديالا فهميني ليش جاهل اني گدامج

ديالا : ظليت مدنگه واعصر بأيدي ما گدرت اگله امل منعتني اخلي ليال تحاجيك تحملت الذنب والرزاله وحدي مشيت من يمه ودموعي تجري

امل : جنت گاعده بحجرتي اعزل الملابس الي ما احتاجها تا اوزعها عالمحتاج حطيتهن بگونيه وطلعت

لاگتني ديالا مدنگه وتبجي

امل : شبيج ديالا عش تبجين

ديالا : ماجد رزلني عبن من يتصل ما انطي ليال بس ما گتله انتي منعتيني

امل : عضيت شفتي بعصبيه گلتلها وين ماجد هسع

ديالا : بره يم ليال

امل : خوش هاج هاي گونيه الملابس حطيها ليغاد

طلعت متعصبه هاذ ماجد ما يفعل يفهم على روحه شجاي يسوي الف نوبه منعته من ليال كل ما يتصل احذره بس الضاهر احساس ماكو وصلت يمه جان لازم ايد ليال

سلمت وگام بوجهي رد السلام ورجع گعد

ماجد : شلونج بنت خالي اخبارج

امل : زينه ماجد لوما انته

ماجد : ماجد ليش شبيه

امل : دحگت على ليال جانت لازمه عكسه وعيونها مدمعه گلتلها ليال فوتي جوه يم ديالا

ليال : ما اروح اريد اظل هين

امل : ما گدرت الح عليها داريت مشاعرها ردت ماجد يحس ويفهم ان تصرفاته غلط بغلط جيته مو مناسبه ولا گعدته هاي ردت ارزله گدام ليال بس حالتها ما تسمح

فتت جوه والغيض بداخلي وادحگ من الشباك ظل گاعد يمها ويمسد شعرها ويمسح دموعها وهيه تحجي وتلوح بأديها ما ادري شنو يحجون طبطب على جتفها ومسح خدها وراح

اجت ليال وهيه مرتاحه واعصابها هادئه

سألتها شنو گلج ماجد وجان الجواب اكثر من مجرد صدمه

ليال : اني وماجد راح نزوج

• بيت الشيخ علوان الساعه 11 ليلاً

نشمي : عمي عزت ابويه يناديك انته وعمي شاكر

شاكر : وين ابوك هسع

نشمي : يم السرداب

شاكر : يالله عزت انهض نشوف شعنده

عزت : ها خوي صياد خير اللهم اجعله خير

صياد : نشمي جدك وين

نشمي : گاعد بره عالقريوله

شاكر : خير اخوي شكو

صياد : من خليتكم تراقبون ما شفتو شي ما هجستو حركه غريبه

شاكر : لا والله يخوي ما هجست شي ومثل ما وصيت المگبره والمزرعه والحداده وبيت الملا وبيت سنان مجابلينهن ليال ونهار حت الطير الي يوجر عالبيت راقبنا ما غفلت عيني ولا ثانيه وهسع اجيت خليت عرب بمجاني وراح ارجع غبشه

صياد : عشتو وهسع اريد منكم مهمه انوب

شاكر : ابشر

صياد : المدرسة الي يدرسون بيها بنوات الملا

اريد تعرفولي ليال بنت الملا بأي صف اداوم ومنهو معلمها وجم طالب وياهه وشنهو اساميهم وليش رسبت وركزولي على اسم حامد تنبشون المدرسة بلوكه بلوكه

عزت : بس هسع المدرسة معطله

صياد : من ايمت يا عزت ادزك بمهمه وتگول بس

عزت : تعذرني عبن المهمه هاي جديده علينه وغريبه بس ان شاء الله اجيبلك الخبر الي يسرك

يتبع………