رواية عرين الصياد الفصل الثامن عشر 18 بقلم شذرة العدوان

ليــــال

يا ليْتَ من رحلوا ظلّوا وما رحـــلوا

وخلّفوا الشوقَ في الأحشاء يشتعلُ

مضوا وأبقوا لنا الذكــرى وراءهمُ

وما درَوا بالذي في الصدرِ يعتملُ

ما ودّعوا قبل ما شـالت ركـــائبهم

ولا عنــــاهم عذابُ الروحِ والوَجَلُ

فبعــــدهم كل عيش بعــــــــدهم المٌ

وكيف يصفــو لنا عيــشٌ ويكــتملُ

كانوا وكنا وكان الشَّــملُ يجــــمعنا

واليوم جارتْ علينا بالنـــوى السُّبُلُ

هي الحيــــاة كمــا شاءت تدور بنا

كمــا تــــدورُ على دولابهـــا الدولُ

صبراً على بعدهم والصبرُ حيلتنا

أنا وأيــــوبُ في بلـــواه والجمــــلُ

عماد : شيخ يعني هسع طابت ليال طلع المس

عثمان : اصبر ابني هسع نعرف اذا طلع صدگ لو يجذب علينه

عماد : شلون راح تعرف

عثمان : شبيك ابني نرجع نقرا انوب ويبين

امل : رجع الشيخ يقرا وليال نايمه ما تحركت اشرلي الشيخ اروح اگعدها صفگت على وجها وجان تون وتفتح عيونها والشيخ مستمر يقرا

گعدت ليال وجان تلزم بطنها وادحگ عالشيخ ومستغربة

الشيخ دار وجه عنها عبن وگع الملفع من شعرها

ليال : هاي شكو عدنه مولد

عثمان : الحمد لله على سلامة بنتكم تنذكر وما تنعاد

عماد : يعني طابت ليااال

عثمان : اي ابني طابت بس تظل بخطر اذا ما تحصن نفسها وهاي جدامها راح اوصيكم واوصيها

اول شي المحافظة على الصلاة بوقتها

وثاني شي اذكار المساء والصباح

وثالث شي اذكار النوم مهمة جثير

من تجي على فراشها وتمدد تا تنام

تجمع كفيها وتنفث عليها ثلاث مرات

وتقرا المعوذات ثلاث مرات وتمسح جسمها بالكامل وتقرا اية الكرسي وتنام على جنبها الأيمن وياريت تبتعد عن النوم عالبطن

ــ وممنوع تروح عالمگبرة انجان نهار او غروب ممنوع

ليال : عش اروح عالمگبره هاي شبيكم شجاي تحجون

عماد : اسكتي ليال الحجي مو يمج شيخ من رخصتك نطلع بره نكمل الحجي

امل : طلعو عماد والشيخ واني شبكت ليال احضنها وابوسها من خدها وهاي مستغربة ما تدري شكو

ليال : غدي امل لا تبوسيني وخري شبيج فطستيني

ضحكت على سوالفها گامت تمسح بخدها وگعدت تنفض بشعرها عبن بعده ما نشف

ــ رحت وگفت بالباب اتصنت على كلام الشيخ يوصي بعماد

عماد : اي شيخ كمل

عثمان : اي ابني وهاذ علاج اعشاب من ترجعون لبيتكم تاخذه اذا لا سامح الله عدها طعمة بمعدتها تروح

وممنوع الوگفه بره بوقت الغروب وممنوع تگبون مي حار بالگاع ولا بالمجاري بوقت الغروب

ولا تخلونها ادحج على نفسها بالمراية اذا رادت للضرورة تسمي بسم الله وترتب نفسها لا تظل واگفه ومركزة

عماد : شيخ تعذرني بس شدخل هاذ بحالة ليال

عثمان : ابني هاي الوصية اطبقونها الكل مو بس ليال

صحيح الجن ما يضرون بشر الا بأذن الله

بس الحذر واجب يا ابني

والمس يترصد الأنسان اذا تكاسل بصلاتة وما حصن نفسه بالأذكار

واكو بيهم اذا اذيتهم بدون قصد راح يجي وينتقم

ممكن انه يخليك تتحول غير انسان تجي على مرتك تكاونها تنفرها تخلق طلايب ويه اهلك

لو يخليك تمرض وتصير طريح الفراش

لو يخليك تنهزم بره يخبلك بحيث الناس تحير بسالفتك

شلون هسع ليال منين اجها المس راحت عالمگبرة المغرب وداست علي واجها ينتقم وعشگها لزگ بيها

همه وقت خروجهم المغرب تلگاهم بكل مكان دايجين

المگابر والأماكن الوصخه اكثر شي والحمامات والمجاري

ياكلون من اكلكم وذا ملابسكم بره عالحبل يلبسوها

وذا گبيت (بديت)مي حار بمجاري لو بالگاع واذيت واحد يجي ينتقم

عماد : والله ياشيخ اول مره اسمع هالحجي نسأل الله يحفظنه منهم

عثمان : ابني لازم تعرف وما تظل غافل الجن همه عباد الله حالهم حالنه احنه البشر كما قال الله تعالى

( وما خلقت الأنس والجن الا ليعبدون )

وهمه مثلنه خلقهم الله للعبادة

بيهم المسلم والمسيحي واليهودي وبيهم قبائل وعشائر ومشردين ويتزوجون ويخلفون والمسلم بيهم يصلي ويصوم والله اعلم يدخل الجنة

حياتهم مثل حياة البشر الا ما رحم ربي

لذلك لازم نبتعد عنهم وننطيهم حقهم بهاي الدنيا

بتحصين نفسنا وتنوير بيوتنا بذكر الله

وهمه من كيفهم راح ينسحبون من هاذ البيت وما يأذون صاحبه

عماد : الله ينور عقلك يا شيخ اكثر من هاذ النور ويجعلك من اصحاب الجنة

عثمان : امين يارب يجعل كل مؤمن في جنات الفردوس مع الأنبياء والصدقين والشهداء دير بالك على ليال

وعدها العافية ان شاء الله

عماد : جزاك الله خير مدري شلون اجازيك يصير احضنك

عثمان : هههه واجبي ابني تعال احضنك والله يجازيك على نيتك وحنيتك ويه اخيتك لا تبجي لا تبجي تظل سوالف والله

عماد : شيخ اني خسرت ثلاثه من اهلي بيوم واحد وخفت اخسر ليال هم

عثمان : الله يرحمهم جميعاً ويحفظلك خواتك دموعك غاليه الله يبارك بيك اني اترخص

عماد : شيخ امنت الله اذا جيت عالرمادي اريدك تنور بيتي بجيتك

عثمان : ان شاء الله ابني اني روحاتي عالرمادي جثيره خاصة بوكت الصيد اطلع ويه صياد عالبر

عماد : هاذ عجل نتواجه بأذن الله

عثمان : ان شاء الله عدكم العافيه وسامحني

عماد : على شنهو اسامحك شيخ انته سامحني صيحت عليك تعذرني اني ما افتهم بهاي السوالف

عثمان : مسامح ابني الله ينور دربك

امل : اكثر من ربع ساعه عماد يحجي ويه الشيخ ويبجي ويحضنه ويحجي ويا ويرجع يحضنه انوب

اووف رحمتك ياربي شگد جبيرة

وانت للطيف بعبادك

الحمد لله دائماً وابداً

طلع الشيخ من الصالة گوه هده عماد لو بيده يجيبه ويانه بس ما ترهم الله شگد مريح هالأنسان اي والله كله رحمه شگد عماد صيح علي وشگد المس غلط بحقه وهوه كلامه يثلج الگلب حجه شغلات اني اول مره اسمعها صدگ احنه بجهل

اجت الشيخه وشايله جيس جگليت فتحته وطشته فوگ ليال وهاي الخبله جانت گاعده تنفض بشعرها گامت تلگط جگليت وهيه گاعده وتفلس وتاكل وتگول شكو منهو عرس شنهي المناسبة وتاكل وفرحانه تعبالي عرس

بوستها الشيخه وجان نجمه هم تبوسها وتحمدولها بالسلامة

ليال : شبيكم عش تبوسوني وتحمدون السلامة اني وين جنت يمعودين

خزامي : عبن نحبج يبعد روحي

ليال : الله شيخه والله اني هم احبج جثيير انتي حلوة

جنج امي

خزامي : يبعد روحي اسمعو الحجي الحلو يمه

امل : ليال مكيفه تضحك بس ترواح برجليها مبين يوجعنها لزمت بطنها گالت جوعانه يبو يالعثره صديت بصفحه سويت نفسي ادحگ عالحايط وما اسمع من الفشلة

خزامي : يخسه عنج الجوع امشي نجمه سوي ريوگ احنه كلنه بعد ما تريگنه

ليال : لا خلي امل تسوي ريوگ نجمه ما تعرف اطگ البيض البارحة جابته ني

امل : سبحت بالعرگ سباحه من الفشله

الشيخه تضحك ونجمه لو بيدها تخنگ ليال وتفطسها وهاي الفطيره ما تدري بروحها شتحجي تعبالي عادي مثل ما جانت تعيب عليه من اسوي گيمر واطبخ تگول طبخ مهره احلى واطيب وگيمر امل ما ينوكل يابس

خزامي : يبعد روحي بنيتي صياد من الغبشه گعد ما خله شي ما جابه حت العسل گتله الحلوة ام اللسان تريد گيمر وجابلج يالله امشي جدامي نتريگ

امل : گادتها الشيخه وراحت وادحگ على نجمه وجها صار احمر من العصبية طلعت وسدت الباب بنتر وراحت تحمي الجاي

طلعت وراهه وجان تناديني ليال

ليال : اامل سويلنه بيض الله عليج

امل : راح اسوي ام بطن بس قسم بالله ومن رخصة الشيخه اذا مثل البارحه احشدتي وترسنه الصينية وتالي عفتي واكلتي زلاطة الا اكسر عضامج

خزامي : شوو روحي سويلها ريوگ بدون حس وبكيفها شتحب تاكل وذا انتي مره تعاي مدي ايدج عليها اذا ما افجج راسج ما اطلع ام الصياد

امل : ادحگ على ليال عبن فزعتلها الشيخه ابتسامتها من الأذن للأذن حطتها الشيخه گدامها وگامت تسرح بشعرها وتصلي عالنبي وتلوح بيدها فوگ ليال وتنفث عن العين والحسد

ليال گاعده مكيفه وشعرها بالگاع متگوم

ظليت متخوصره بالباب اريدها ادحگ عليه تا اهددها بس نروح شلون اكتلها وما تفعل تصد مدنگه بالگاع ورافعه القميص ادحگ على خصرها وتلمس بالعلامات مال الضرب

والشيخه مكيفه بشعر ليال وتشيله تفتحه على كبر ضهرها شافت ليال رافعه القميص گالت ول بنيتي غطي جسمج بنيتي لا تنصابين

ليال :عش انصاب شيخه

خزامي : بنيتي عبنج بيضه وحلوه وشعرج حلو تنصابين بعد لا تفرعين جدام احد ولا اطلعين جسمج

امل : گامت الشيخه رفعت شعر ليال تا تلفه

ركزت على رگبة ليال

خزامي : اللهم صل عالنبي الله زين رگبتج من وره بشامات تسحر العين بنيتي البسي ملفع

امل : الشيخه ابتهرت حت بالشامات الي برگبة ليال وگامت تصلي عالنبي وتدعي ادحگ عليها شلون مكيفه بليال بودها تحطها بگلبها وتبوس بليال من راسها

تذكرت حجيها البارحه قبل لا انام من شافتني افلي بليال گالت تمنيت تجيني بنيه اخت لصياد واظل طول عمري اداري بيها امشط شعرها وافليها واسبحها

البنيه حنينه وتصير ام لأمها والي ما يخلف بنات لا يگول خلفت وحت صياد امنيته يخلف بنيه

صحيح صياد ابني وعنده رضاي اهم من حياته وحياة جهاله ويحبني جثير بس يظل رجال وما لحگت اتهنى بي من جان جاهل المدرسة اخذته مني ومن تصير عطلة اگول هاي راح التهي ويه صياد ما اخلي يفارجني

تالي ياخذه الشيخ عالبر يعلمه الصيد ورگوب الخيل والرمايه والسباحه وهوه توه مفتح عالدنيا يادوب عمره 8 سنين بدال ما يوعي على نفسه شاب عادي حاله حال ربعه +

وعه على نفسه وبيده رشاش وخنجر

ما يجيبه الشيخ ليما تخلص العطله يجيني عاگد الحواجب وما يحجي ولا يمزق

ما خلا يعيش طفولة ولا يعيش مراهقة

وتوهن ختطن شواربه زوجنا وصار اب

اااخ يبنيتي اظل متندمه طول عمري اني تسببت بحرمان نفسي وحرمان صياد اجيبله اخ او اخت من بطني

صحيح اخوانه شاكر وعزت وعرب

ومشعل الله يرحمه يحبونه جثير ويسمعون كلامه ويعتبرونه هوه الجبير حت بوجود مشعل الله يرحمه

واظل متندمه اني ما وگفت بوجه الشيخ ودزيت ابني يم خواله جان هسع مكمل دراسة

امل : عجل ليش ما كمل دراستة مو زعم بس بالعطلة ياخذه الشيخ

خزامي : اااخ ينار گلبي صارت طلبة بنيتي وانسجن صياد ومن طلع ما فعل يرجع يدرس لزم الرشاش والخنجر وگام يدور ثارات واخذ حگه مربع

الله لا يعود هذاك اليوم الي من يومه الشيخ سلم صياد العشيرة كلها وصار يعتبره ايده اليمين ودرع العشيرة بدال مشعل

عبن مشعل ما جان راعي طلايب ولا يحط نفسه بكونه

الله يرحمه جان فقير وما يمر بأحد ولا يسأل شكو

ي

خلص شغيلته وينام

بس الصياد سبع الليل وما يخاف

يفوت بحلگ الذيب وياخذ حگه لوما هو ما جان ظل ابو بمنصب الشيخ

وجان راحت نص الگياعين من عدنه ولوما هو جان اخذو اخته بنت جوريه فصليه بس وگف يمه مثل الدرع وخلصها

سألتها ليش ما خلفتي بس صياد شنهو السبب

ما رضت تحجي دمعن عيونها ومسحتهن بملفعها گالت حجي الماضي ما اريد اذكره اسأل الله يسامحني

امل :واني سارحه بتفكيري واتذكر حجيها وادحگ عليها شلون مكيفه بليال فات صياد على غفله وما انتبهن ليال والشيخه ليال مدنگه تسلت خيوط من الجودلية والشيخه تفكيرها سارح بليال

واني ما شافني عبن بالباب مال المطبخ واگفه

وهو فات من الباب الي بصفه اشوف بس عكس ايده

ظل واگف يدحگ عليهن للحظات يمكن اقل الدقيقه والتاف ورجع التافيت عالمطبخ سألت نجمه عن البيض جاوبتني بنتر گالت ذاك وراج

اخذته ورحت شعلت الطباخ وادحگ صياد گعد على حافة الممشى ورجع راسه عالدنگه وغمض عيونه ملامح وجهه مرعبه يربي هاذ يمكن بحياته مو ضاحك

صفنت ويه روحي وفكرت گلت حقه يصير هيج

اذا لا عايش طفولة مثل البشر ولا حياة مراهقه

گبل فتح عيونه لگه ابو مشيله سلاح ومزوجة ثلاث نسوان وهو يادوب عمره هسع 29 سنه

ادري شنو شاف بحياته الي يشوفه يگول عمره 40 سنه عبن لحيته عاليه شواربه مفتوله من الطرف

وجهه اسمر ضخم جنه الأسد عيونه حاده مثل عيون الصگر حواجبه نازله منطيته ملامح عابسه فوگ عبوسه يخوف اي والله يخوف ما تلام ليال من سمته الوحش بس والله اذكر اول نوبه شفته ما جان هيج يمكن بسبب حزنه على مشعل خله لحيته تصير عاليه

شلون ينامن يمه نسوانه مستحيل الي يشوفه ويه الشيخه يصدگ هاذ ابنها تبين ازغر منه صحيح طويله بس ناعمه وبيضه ما وارث من امه شي هيه تضحك وتبتسم وهو ما شفنا سنونه من جينه

اخذت البيض اكسر بس وافكر بنجمه

ما دقني وقهرني غير من فاقده علي

ومن شافته گاعد راحت ركض گعدت يمه

ظليت لازمه الطاوه و فاتحه اثمي هاي شبيها البنت شگد خفيفه اتخيلها راحت على عماد

گمت ادحگ عليهم بعصبية

گربت منه وهو جان مغمض وجان تلزم ايده فتح عيونه بدون ما يركع راسه من شافها وجان يخزرها بنظره اني من يمي خفت شنهي من نظرة خلت نجمه تفز وترجع عالمطبخ ركض

ودحگلي بطرف عينها وترجف شفايفها تريد تحجي بس متگدر گامت تشتغل بثول تشيل الغرض ويگع منها

كملت الريوگ وديته

ومثل البارحه كل الهوسه السوتها ليال تالي اكلت لگمه مال گيمر وشربت جاي

نجمه شالت الريوگ واني رحت انادي عماد بالهول

ظليت اروح واجي محتاره شلون افوت عالديوان انادي طلع صياد وشافني افتر وجان يصد بصفحه

بلعت ريگي گتله خي نادي عماد بلا امر عليك

راح بدون ما يحجي واجاني عماد

عماد : هاا امل صياد گال اهلك ينادوك شكو

امل :شنهي شكو عماد گلي نروح اليوم لو لا صارت ساعه عشره

عماد : اي نروح بس صياد گال عندي غرض اريده يجيني ونتوكل گال هسع اجي تهيرو راد نظل ولح عليه جثير بس اعذاري غلبته گتله نسوان بالبيت وحدهن وشغلي كله متوقف

امل : اگلك خوما شاك بشي ما لاحظت

عماد : والله شگلج يا امل نظراته ترعب مدري شلون يدحگ انوب الشيخ عثمان شگد حجه سوالف تضحك وصياد متصنم حت ابتسامه مثل البشر ماكو ومن يدحگ عالبشر ينبت عيونه يحسسني اني صالح للأكل

امل : غدي يربي هاذ شبي هسع شلون عماد بس لا شاك بشي اشو خايفه منه

عماد : ما اضن شاك عبن گرايبه من يجون بالليل يتعللون يمه محد يلح ويا بالحجي ولا يسألونه الضاهر هاذ طبعه من گاعه

امل : اوف مو مطمنه ذبحني القلق ما ترجعلي روحي الا انطب الرمادي وارتاح واشم تراب گاعنه

عماد : ان شاء الله نروح وبعد توبه اطب هين نص عمري راح بهاي الجيه

امل : عجل اني شگول يوميه احلم صياد لابس اسود وشايل سجين ويفتر بالبيت

عماد : ههه راح يخبلج عجل لو اگلج جماعته هين يسمونه ملك الموت

امل : غدي عماد لا تخوفني ليش يسمونه هيج

عماد : گالو عبن يصيد من اول رميه وحت جريح ما يظل گبل يلگونه ميت

امل : يمه شنهي يصيد

عماد : اشكال يصيد اي شي يطلبونه منه ذيب غزال طير اي حيوان وطير بهالصحراء

امل : عوفك منه عماد امانه خله يستعجل لح علي جثير

عماد : والله جاي الح يا امل انتي روحي كملو الغراض

امل : رحت بساع لميت كل هدومنه وغراضنه وخليتهم بالباب

نادتني الشيخه گالت بنيتي الي يشوفج يگول گاعده بدار اجره

امل : انتظرت ليال ليما تروح عالحمام وجاوبت الشيخه

والله يا شيخه البيت بس النسوان بي حميد بالعسكرية وعدنه ثلاث نسوان لازمات عده وبنيه عزبا بالبيت هم انتو ما ترضوها

خزامي : اي والله يبنيتي ما تلامين يالله عجل

نتوكل

امل : صارت ساعه 10 ونص وناداني عماد گال يالله اخيراً فرجت طلعت الغراض بساع واخدهن عماد حطهن

ورجعت شلت ابني والشيخه گايده ليال

نجمه واگفه بالباب عيونها مدمعه

وتبتسم تحاول تكون قويه

مدري اشو اجاني احساس استخطيتها

سلمت عليها وصعدت السيارة خلينه ليال بالوسط جانت عاقله ما حجت خايفه

اخذت نفس عميق ودعيت ربي نصل بالسلامة

صياد صله عالنبي ومشينه

وبلش الملل والطريق شطوله

وليال كل شوي تسأل هاي شگد بعيدين امت نصل

وما عندي جواب غير هسع نصل اصبري وهيه تصد بملل ومبرطمه اخذت فتره وجان تكتف اديها وحجت

ليال : عماد شغل اغاني امانه والله ضوجه

امل : عماد صد على ليال خزرها وعضلها شفته عيب

دنگت ليال مبرطمه وتهمس والله ملل وبهاي اللحظه نطق ملك الموت بصوت جهوري وگال

ماكو اغاني تردين احجيلج قصة

ليال رفعت راسها اتصنت هوه ما صد عليها مركز بالسياقه ويحجي واني تفاجأة بي حجه لوما شكله وصوته جان گلت السيارة تمشي لحالها

صياد : ها شگلتي احجيلج قصة اشو ساكته

امل : ليال مدنگه خايفه منه وما تلام والله حت ابني من يشوفه يخاف عبن لحيته عاليه وشعره هم والنوب ناشر الغتره فوگ راسه اسد مرعب رفعت راسها ليال بعد تفكير لازمه عكسي

ليال : حلوة القصة ؟

صياد : اسمعيها واحكمي

ليال : يالله

صياد :هاي بعرب اهل گبل جان اكو رجال تاجر

شيخ ربعه بهيبته وصيته بين العرب طيب

بس حظه ردي عبن حرمته وحده مو خوش حشه السامعين وبيوم راح يتسبب رزقه وتجارة گبل اطول عبن ماكو سيارة طولت سفرته اربع شهور ورجع على بيته وحرمته

وره شهر گالت الحرمه ابشرك يفلان راح تصير اب

كيف الزلمه وجاب الذبايح وعزم الناس عبن هو رجال جبير والله لطف بي وانطا خلفه

وبيوم گاعدات الحبايب وسألن الحرمه جم شهر لج

گالت سبع شهور حسبت من يوم رجع رجلها من سفرته

بس حرمة حماها جانت ويه الحضور وهاي الحرمه عينها ازيد من السونار تعرف الحبله من بطنها جم شهر للها

لحگتها وگالت يفلانه اواش

صدت عليها وجان تگول

تراج حامل بالشهر التاسع ليش جذبتي وگلتي سبعه

انبجمت الحرمه وگامت تنكر الحجي

بس مرت حماها فطنه وتلگفها عالطاير

گالت والله ماني بنت ابوي ان ما طلعتي حبله بالشهر التاسع وماني بنت ابوي ان ما طلع هاذ الجاهل نغل

ليال : شنهي نغل

صياد : اواش اكمل القصة.

ليال :اي

صياد : كملت الحرمه وگالت هاذ الي بطنج نغل وذا جبتي وعاش بين العرب كلها راح تعرفه نغل يجوز تعبرينها وتگولين خلفته سبيعي بس ما تگدرين تخفين مواصفات الجاهل عبن العرب قديم يعرفون النغل من ابن الحمولة

حت لو طلع يشبه امه لو يشبه الي زعم هاذ ابو حت لو صار سبع وتهاب الزلم منه يظل نغل ومعروف انه نغل

عاد الحرمه معد بيها حيل تنكر يم حرمة حماها وخافت تفضحها بين العربان اغرتها بالذهب وگالت ساعديني وشتردين انطيج شوري عليه شسوي

گلتلها اذا جاج الطلگ دزي عليه اجيبج اني

وصدگ وره جم يوم الحرمه جاها الطلگ ودزت على حرمة حماها وما فعلت تخلي احد يفوت غيرها

والزلمه بره ينتظر الجاهل

ولدتها وجان تگول وهسع شلون

گالت الحرمه لازم نجتل الجاهل نخنگه وزعم جبتي ميت

طاوعتها الحرمه بجتل ضناها بس تريد تخلص روحها

صرخ الجاهل وذيج حرمة حماها جعمت اثم الجاهل بوصله منگعه وخنگته لحد ما طلعت روحه

اخذت شوح وطلعت تصيح

گالت الحگوني الجاهل انولد ميت

صاح الرجال وگال استهدي بالله يحرمه شجاي تحجين اني سمعت صرخت ابني شلون تگولين ولدته ميت ظلت الحرمه تحلف وتجذب الرجال

ان الجاهل ميت وما سمع صرخته گالت انت متوهم

والي أكد حجيها شهادة مرته گالت اي انولد ميت وما سمعت صرخته

الرجال تحسب ونقهر وانغلب على امره

گال صبراً جميل والله المستعان على ما تصفون انجان حجيكم صدگ واني جذاب

الأيام تثبت والسالفة الصدگ يطلعنها بربيجات المي

ليال : شنهي بربيجات المي

صياد : اواش لا تلگمين

وصدگ مرت السنين والشهور والأيام

وحرمة اخو الي ولدت حرمته جان عدها ولد عمره خمس سنين وحيد على ست بنيات تحبه متعلگه روحها بي

وبيوم الولد غافل عن عين امه

وراح عالبحيرة وغرگ

شافه عمه وراح يركض وطلعه من المي وگام يضغط على گلبه تا يعيش

شافته الحرمه من بعيد وتعبالي حاط ابنها ويخنگ بي

راحت تركض وتصيح لگت ابنها طالعه روحه

گامت تملخ بروحها وتصيح ليش جتلت ابني ليش يخوي اخذت بثار ابنك ليش

وگالت هاذ البيت

( وغلاة الخبز التقاسمنا واجلنا

لونو وليدگ ما جتلنا )

افتهم الرجال بسااع وتوضح كلشي وعرف هاذ مو ابنه وحرمته تحالفت ويه حرمت اخو وجتلو الجاهل

امل : طول ما صياد يحجي بالقصة احس روحي تريد تطلع عبالك ملك الموت يگول من هو ربك ماهو دينك ليال فاتحه اثمها ومو فاهمه من القصة شي الكل ساكت لحد ما گالت الشيخه

خزامي : وشسوه الرجال عاد

صياد : وشتهگين سوه يمه

خزامي : تلافه الفضيحه لو اخذ بالثار والله مدري خبطت عندي

صياد : مع الأيام راح تعرفين شسوه

خزامي : يمعود لا تگطم القصة كملها اذا ما اعرف اطگ

صياد : اصبري يمه بعدين

امل : صديت بصفحه وعيوني دمعوو تلافيت الوضع ومسحت دموعي وادحگ على عماد متصنم مكانه

وصلنه الرمادي وجان يعزمونه يمهم عالغده وصلنه اذان العصر لح علينه صياد نمر على بيتهم بس منهو اله نفس عگب الحجي السمعه كلامه مثل خنجر ويذبح من الوريد للوريد

اصرينه حيل نمر على بيتنا وصلونه حدر عماد فتح باب السياج

وحدرنه بساع نركض ركض ومن الهبطه والتفكير حت نسينه نعزمهم يظلون

ادحگ ديالا واگفه بالطرمه وشايله ابن فاتن

ليال اول ما حدرت راحت حضنتها

عماد سد باب السياج بساع واجه وگف سلم على ديالا حضنها

گالتله شبيك عماد گلبك يدگ سريع وحيلك يرجف

جاوبها من الطريق وراح فات جوه

ديالا : گلبي جان حاسني اليوم يجون

كل شوي اگف بالطرمه وادحگ حت السرگي مال باب السياج فتحته گلت تا اذا اجو بس يدفعون الباب يطبون وصدگ العصر وجان يجون اول ما شفت ليال حدرت مبتسمه احس روحي ردتلي اجت عليه وحضنتني تشم بيه وشالت ابن فاتن تبوس بي

ليال : هاي امت اجت فاتن.

ديالا : بنفس الليل الي رحتو بي

ليال : ياي عجل جنت نايمه اني يمه حبيبي شگد مشتاگتلك

ديالا : الحمد لله على سلامتكم امل

امل : الله يسلمج تعاي اگلج

ديالا : رحنه بصفحه گلت شكو

امل : تره ليال ما تذكر شي من الي صار شلون هسع

ديالا : شلون يعني ما تذكر

امل : بعدين اشرحلج ديالا روحي بساع جوه وحذري امج وصبره ما يحجن شي خلينه بس نرتاح تا نعرف نتصرف

ديالا : يالله هسع اروح

امل : ناديت عماد واجه يمشي گوه

عماد : ها امل

امل : عماد احنه راح عن بالنه شلون هسع بليال وهي ما تذكر شي

عماد : اااخ يا امل اااخ هوه ظل براسي عقل من انعل الساعه الي تعرفت بيها على صياد

امل : شبيك عماد نصي صوتك وضعك مدري شلون افوت جوه انطيك شي تاكله خاف هبط عندك الضغط

عماد : اكل سم امل اكل سم انتي ما سمعتي صياد شجان يسولف بالسياره والله راد گلبي يطلع من صدري خفت عليكم لوما انتو جان اهون عليه

امل : اني خايفه اكثر من عماد بس حاولت اهدئه

يمعود تره مجرد قصة لا تشيل هم

عماد : ااخ يا امل كلامته ونظراته تموت الانسان عالبطئ اووف يربي شراح يفضها

فاتن : هاي شبيكم عماد وامل شنو ما متشاوفين

لو بديتو تعشگون بعض من جديد

عماد : اسمعي هاي البطرانه شتحجي

امل : خطيه لا تگللها هسع تمرض وهيه ظاله بي ربع روح امش نسلم عليها تلگتنا هيه وجان تبوسنا وتحضنه مكيفه عبن ليال طابت

حطيت ايدي على جتف عماد وهمست

مدد ورتاح ولا تفكر الله يفرجها

سحبته من ايده وفوته عالهول جان يمشي بيأس مدد عالفراش وحط ايده على عيونه ااخ يا عماد شتحمل تا تحمل

فاتن : امل شبي عماد

امل : هبط عنده الضغط بالطريق

ديالا : عماد امل الحگو ليااال

امل : توني گعدت وجست الگاع واجت ديالا تركض گالت الحگو ليال طلعنه نركض لگيناها بحجرة عمي تشم بهدومه وتصرخ بعلو حسها وتملخ بروحها وتلطم وتهلس بشعرها

ديالا : سويت مثل مگالت امل رحت بساع اول ما تلگتني فاتن وخبرتها ان ليال ما تدري بعدين رحت خبرت امي وگالت سدي باب الحجره لا تخلونها تفوت عليه

رحت خبرت صبره گلتلها ليال ما تذكر شي وامل گالت لحد يحجيلها وجان ادحگلي بطرف عينها +

فاتت ليال شايله درويش وتضحك طلعت صبره من حجرتها شافتها ليال لابسه اسود سألتها خير امي صبره منو مات

صبره : منهو يعني ابوج واخوج محمد ومهره كلهم ماتو بالعرس

يتبع