رواية عرين الصياد الفصل السابع عشر 17 بقلم شذرة العدوان

كواكب : ها خي شاكر شلونك

شاكر : هلا بيج ام نشمي ولو ازحمج

بس هيرولي الريوگ بساع وانا اخوج مستعجل

كواكب : اي اخوي بس اخبز

عرب : صباح الخير يربعنه

شاكر : هله بهالصباح

عرب : شو جيت لازم گضت المهمة.

شاكر : لا ما گضت جيت اخذ ريوگ للولد

عرب : هم راح ترجع على بيت الملا انوب والله مناجيد اذا عرفو نراقب بيتهم وعدهم بناويت وين ننطي وجوهنه بين العربان شجاه صياد

شاكر : اي والله مناجيد محد يرضاهه على عرضه بس شسوي صياد يجيب ويوصي

خليت الولد يراقبون بمكاني وجيت اخذلهم الريوگ وگلبي ظل غادي اگلك خوما ابويه فگدني

عرب : اي والله فگدك وجذبنه علي واهجسه ما صدگ

شاكر : الله يسامحك صياد خليتنه نراقب بيوت العالم وگمنه نجذب على ابونه الله يسامحك

عرب :ما تفهمني صياد شنهي سالفته شعنده ويه بيت الملا الليل كله افكر ولا گضبت خيط راح يخبلني صياد قسم بالله

شاكر : ما ادري والله علمي علمك تدري بصياد ما ينطي الزبده بس يأمرك ويخليك تفر بأذانك ما تدري شكو

اني فشلان كفيلك الله لعبانه نفسي اهجس العالم كلها ادحج على عرضنه عبن اندحج على بيوت الناس انوب بناويتهم ما يلبسن ملفع مفرعات النهار كله

عرب : شمناجيد وغربال استرنه يربي انته الستير زين صارلكم شهرين او اكثر تراقبون شفتو شي

هجستو شي

شاكر : لا والله كلشي ما شفنه مجابلين البيت والمگبرة والمزرعة وحت الحداده مال عماد خلينه عليها عين تراقب وما هجسنه شي

عرب : اموت واعرف صياد شنهي سالفته انوب حت اخذ بنتهم المريضه لصلاح الدين اذا شاك بيهم عدهم شي عش يساعدهم.

شاكر : يمعود حت روحتهم لصلاح الدين

ايضه (تمويه)

عرب : شمدريك

شاكر : هجست صياد يسوي شغله اذا مو دارسها عاجنه وخابزه اعرفه ما يلح على شي اذا ما شم ريحة خيانه ويريد يفتهم الموضوع

عرب : وشراح يفتهم من اخذهم لصلاح الدين متگلي

شاكر : واني شدراني يمعود كفيلك الله لايبه روحي هسع بيت الملا ظل فارغ ماكو بس نسوان الملا وبنتهم العزبا وجتهم اختهم الجبيره يربي والله فشلان من نفسي واني اسولف على عراض الناس الله يسامحك صياد

عرب : شنسوي مجبورين خطية هسع ظلن بس النساوين الله يكون بالعون

خوما شكو بيك احد شافك لا نتمنجد يشاكر دير بالك

شاكر : لا يمعود تربية صياد احنه نصيد ما ننصاد بس البارحه لو شوي نكشفت وربك ستر

عرب : لا يلعثره شلون

شاكر : جنت افتر مداير البيت وشفت ابنهم الزغير طلع يركض وجان ينطج (وگع) رحت نفضته خطيه شافتني بنتهم وگامت تنادي على اخوها عاد سويت نفسي اعرج ومشيت

عرب : هههه تقلد صياد من سوه نفسه شاحوذ يم بيت الكهربائي

شاكر : تخسه لا تذكرني الله لا يعود هذاك اليوم جان هفينه واني الله سترني لو تريد البنت تعرفني ادفن روحي والله

عرب : لا دخيلك لا تغفل عينك وتنصاد تره سيرتنه تنكتب بالتاريخ

شاكر : بعون الله تگضي المهمه ومحد يهجسنه يالله نشمي هير نفسك تاخذك ويايه بلكت تطلع مثل ابوگ وتلگطنه سالفه وتگضي مهمة ابوك الي ما نعرف سالفتها شنهي

عرب : خايب هاذ ما وراه نشمي ثور الله بأرض الله سمعان بالنار تخلف سماد (رماد ) لوما يشبة صياد جان گلت بدلو يم الجده (القابلة )

نشمي : تره اني هين صحيح انتو عمامي بس حترموني جدام الوادم صگطتو حصوتي فرد نوب شو اخذوني وياكم وشوفو عني

شاكر : اخاف ينطبق عليك المثل كل كبره ثبره وانته كبرة صياد

عرب : الله يرحم مشعل ويغفرله جان ابوي يسمي الكبره الثبرة عبن صياد ازغر منه واخذ ثلاثه وخلف

ومشعل ما يفعل يعرس

شاكر : الله يرحمه ويبرد ترابه بحياته ما شاف نفسه الجبير علينه ولا جان صاحب شر

عرب: اي والله وهسع صياد صار الجبير راح يصمط بليسنه

نشمي : اذا خلصتو تگصون بأبويه تانروح

شاكر : روح شوف مرت اخونه گضت الخبز بسااع يالله

امل : گعدت الصبح على صوت الشيخه ترتل القرأن

وتدعي ونجمه جانت بصفها مثنيه وتعصر بأديها

من خلصت الشيخه دعاء بلشت نجمه توسل بيها تحاجي صياد تايعرسون

شتعلت بيه نار من حجيها ذبيت عصبيتي بليال اگعد بيها اخذتها تغسل گوه تمشي هسع يالله بدت تحس بوجع جسمها والضرب مال الشيخ گامت تون

ليال : امل جسمي يوجعني يا امل كله يصل عليه وحت سنوني توجعني

امل : هاي عبن ركضتي جثير من زرگج الجلب

ليال : اخ يمه رجليني الله يسامحج امل انتي شلون ادزيني شلون وتدرين الجلب يكرهني

امل : معد ادزج بس طيبي يالله كفي اردانج وغسلي

ليال : اكو ريوگ تره جوعانه

امل : يهالعثره لا تمجدينه يم الوادم كل شوي وگلتي جوعانه

ليال : يعني هسع اني جاذبه والله جوعانه دحگي بطني فارغه

امل : ليال رفعت القميص تشوفني بطنها وتمسح بيها تگلي جوعانه امل دحگي شافت علامه مال شطب العصاة بخصرها تخبلت

ليال : ياااا الله دحگييي امل هاي شنهي العلامة الزرگه ابطني اااامل

امل : ليال رافعه القميص لصدرها وادحگ عالعلامات واني اجر بالقميص اريد انزله احنه بره گدام الحمام وخفت احد يجي وليال گامت تگهد وتلمس بالعلامات

وصدگ اجه صياد على غفله وشافها بساع دار وجه وفتر ورجع وليال متفعل تنتبه الا ضربتها على راسها

يولي عيب منجدتينه

ليال : يا الله شسويت شبييج

امل : الزلمه شافج وانتي رافعه القميص لصدرج مخبله انتييي

ليال : منهو شافني ماكو احد

امل : راح الزلمه تفشل وانتي مثل الزماله شلحتي قميصج بره وخصرج كله طالع هيه عمله هاي ما تكبرين ولا تصيرلج جاره

ليال : وخري عني امل دحگي جسمي هاي عبن حميد جتلني كله من حامد عوذا منه

امل : تخبلت سديت اثمها بساع وادحگ هين وهناك

خاف احد سمعها اااش ليال ديري بالج تجيبين اسم حامد ديري بالج امشي يالله فوتي جوه ااخ يربي عدي هاذ اليوم بخير گدتها فوتتها جوه

خزتني گدام الشيخه تصيح جوعانه

گامت نجمه سوت الريوگ وجابت الجاي حطت الصينيه گدام ليال وفاتت تاكل الي يشوفها يگول ما ننطيها اكل بالبيت واحنه نحير شنحط گدامها بس متفعل تاكل

ليال : غدي هاذ البيض ما ينوكل بعدهن نيات ما اريده

عدكم گيمر

امل : صرت بهدومي دنگت راسي والعرگ يصب

اغمزلها واعض بشفتي متت من الفشله

ليال : امل عش تغمزين

امل : فشلتنه ثنينه اني ونجمه اريد ابلع اللگمه معد اگدر عصت بالعومي اسكت بيها ماكو والشيخه مكيفه عبالك ليال تغني مو تفشل بيهم

نجمه : عبالي تحبينه اجان وسويته وگيمير ما عدنه والله اسلگلج بيض

ليال : لا ما احبه راح اكل زلاطه

خزامي : اروح انادي صياد يجيبلها گيمر

امل : ما يحتاج شيخه مو هاذ خير الله گدامها الصينية مليانه

ليال : هسع انتي شتريدين امل خليها تجيب

امل : راحت الشيخه وهيه تضحك مكيفه ودزت صياد يجيب گيمر وهاذ راح ما خله شي وما جابه والله الصينية مليانه وانوب ترسوها وتالي ليال عافته كله

و اكلت لفة زلاطه فورت دمي تمنيت الگاع تنشگ وتبلعني

وحلفت بس نرجع الا اكتلها بگد ما شبعت قهر واني من الليل مقهوره من نجمه خلصت الليل تسولف على صياد وقصة حبها واحلامها ومن گعد گامت تراقبه وتركض وراه والله عبالك تركض وره عماد وراح تصير ضرتي متت من الغيره والغيض واني بره الموضوع وما يمي شي

ناداني عماد گال لبسي ليال تره بس يخلص الشيخ ريوگ يبلش يرقيها عنده حالات مثلها راح تجي عالمعشب واحنه خلانه اول الناس خلفله علي

هزيتله راسي بــ بأي

عماد : شبيج امل ضايجه اشو

امل : لا مو ضايجه بس ما نمت زين

عماد : والله حت اني ما نمت انوب صياد ظل الليل كله گاعد ويفتر بالديوان الحجي بينه گمت اخاف منه الفجر غفيت وگعدت لگيته نفس وضعه بس يفتر ومدري شيفكر

امل : الله يعينه اذا لازگتله وحده وهوه برگبته ثلاث نسوان

عماد : شنهي

امل : لا هيج يالله روح ومن يكمل الشيخ انطيني خبر تالبس ليال المفلع والعباة

دقائق وعماد رجعلي خبر اجيب ليال

وتعال شلون نقنع ليال تفوت وشراح يفضها اليوم البارحه عبن مو بعويها جانت سهله

بس اليوم وعيانه وتهرط سوالف وما عدها غير استاذها الجميل تحجي بي

وتگول لنجمه عندي مسجل شحلواته وبي اشكال اغاني جابهن ماجد

مصري وسوري واشكال اغاني واني اعرف ارگص بس ديالا تعيب عليه تگلي تهنطزين

والشيخه كل شوي تسأل منهو ماجد منهو صائب

ليال : صائب استاذي احلى استاذ بالدنيا

وماجد اخو بس بگد الحولي

نجمه : ههه شلون بگد الحولي سمين يعني

ليال : لا طويل مثل صياد هم شكبره گوه ينشاف بس ماجد احلى صياد يخرع

نجمه : شبي صياد تعيبين علي تره يخبل والرجال ما ينعاب هي ديري بالج

خزامي : اواشج نجمه لا تنهدين البنيه جاهله ما تفتهم

ليال : امبلا والله افتهم وصياد يخرع مو حلو جنه الوحش

نجمه : هييي اشو متعرف تحجين

خزامي : نجمه اكرصي (اسكتي) يمه جاي نگلج البنت جاهل

نجمه : عمه ما دحگيلها شون تحجي وتعيب على صياد

خزامي : ميخالف وذا عيبت تمون بنيتي وزني عقلج

امل : ليال دايره شعرها على جنب وتجذل بي وتحجي متراهيه ونجمه ورت من يمها امدها تگوم تگطع ليال

واني تمنيت اختفي بهاي اللحظه اعض بشفتي واغمز وليال ما تفعل تسكت

عطت بيها يالله ليال گومي البسي العباة اجه الدكتور

ليال: عباة شنو ودكتور شنو

امل : مو فهمناج گنالج جبناج عالدكتور يعالجج تا الجلب والبزون والحيونات كلها والحشرات معد يجون عليج يالله گومي

ليال : يالله اكييف بس عش البس ملفع وعباة والله اطلع اخزي اشو الدكتور الي يمنه ما يلبسنه عباة

امل : هسع تلبسين لو يظل الجلب يركض وراج

ليال : البسهن بس لا تضحكون عليه

خزامي : يبعد گلبي ليش نضحك يروحي انهضي يالله بساع

امل : لبست ليال واخذتها عالهول

والشيخه ونجمه ظلن بالصالة وصياد گعد بره بالطرمه گبال باب الهول فيت

سدينه البوب وليال من شافت الشيخ گامت ترجف وتبجي وتجر بثوبي تريد ترجع

نهزمت بالباب ما گدرت تفتحه رحت تا اجيبها

عثمان : عوفيها بمكانها بنتي هاي مو ليال هاذ المس اعوذ بالله منه شافني ويريد ينهزم

امل :بلش يرقيها بمكانها يم الباب وصارت نفس البارحه

هم لزگ المس ما يفعل يطلع

گام الشيخ يضرب بيها والمس معند يگول اموتها وما اطلع ونبرة الصوت ترعب والصرخات ترجف الگلب دخيلك ربي

عثمان : بنتي انتي دهنتي جسمها بالزيت الي انطيتكم ايا وسبحتيها الصبح بالمي المرقي

امل : لا والله شيخ نامت واني هم نسيت

عثمان : وهاذ شي ينسي يا بنتي جان اليوم خلصنه

واني اگول اشو هاذ متراهي وراجع اقوه من قبل

امل : والله ما ادري يا شيخ نساني الشيطان اعوذ بالله منه

عثمان : لا حول ولا قوة الا بالله قدر الله وما شاء فعل

امل : اوف يربي تلهيت اسمع حجي نجمه الي ما منه فايده

وگمت افكر ونسيت ما دهنت جسم ليال

جان اليوم خلصنه

عماد گام يلوم بيه ومن القهر والحمس لعبت نفسه داخ طلع بره يزوع

ظليت اني گاعده بالزاوية وارجف

لحد ما گمت اسمع صوت ليال الطبيعي

وهيه تصيح لا تضربني لا امانه والله كلشي ما سويت

الشيخ يضرب برجليها ويرص بطنها بالعصاة

گامت ليال تصيح بعلو صوتها لااااا حميد لا تضربني الله عليك وينك يابه تعال شوف حميد يضربني والله مو اني والله

رحت اركض عليها وگلت للشيخ عوفهااا هاي ليال مو المس فلتت مني وركض عالباب فتحته واني اركض وراهه لزمتها بالطرمه گوه جانت تريد تنهزم عالشارع

وهاي وتصييح مو انييي هاذ حامد كله بسبب حامد

ضربتها راشدي وسديت اثمها

ادحگ صياد انگلبت ملامحة ومركز بيه وصاگ ايده بوضعية البوكس

گمت ابلع بريگي وادعي ربي يحفظنه ويسترنه رصيت على اثم ليال بكل قوتي وارجف ودموعي نزلو لا ارادي وگمت اتخيل شلون يكتلون عماد وحميد واترمل ويتيتم ابني

دخيلك ربي لا تصگعنه فوگ صگعتنه يارب دخيلك

نذرت خرفان ثنين اوزعهن عالعرب بس يسترنه الله

للحظات مرعبة مريت بيها

مجزرة عرس مهره اهون عليه صحيح خسرنه مهره وعمي ومحمد وصگعه ما يتحملها بشر بس اهون بجثير من الفضيحه الموت اهون من يعرفون مهره جانت عاشگه حامد وهو الي تحالف ويه اعدائهم وسوو مجزره وجتلو ابنهم

طلعت الشيخه تركض هي ونجمه ولزمن ليال ويايه

وهاي تشيل بروحها وتلطخ

صياد ظل واگف بمكانه ويمخنزر علينه الدخان گام يطلع من خشمه من العصبيه ونحاول نسحل ليال نفوتها جوه ما تفعل تفوت صار بيها كل الحيل بهذاك اليوم الأگشر

خزامي : ول يمه امل بس هدي البنيه شو وخري ايدج من اثمها تره انتي خبلتيها بالزايد

امل : لا شيخه هاي مو بوعيها وما تعرف شتسولف خن نفوتها جوه نجمه شيليها ويايه الله عليج

حاولنه نشيلها ومدري شلون لوت نفسها مددت بالگاع عضتني من ايدي ورجعت تصرخ وتلطم

ليال :لااا تودوني على حميييد والله هاذ حامد والله اني ما عاش..

امل : گعدت على رجليها وسديت اثمها رجعت بيها الذاكره من حميد يضربها وتهمها جانت تواعد وگاللها عاشگه

عماد جان مسدوح بالثيله لايبه روحه من سمعها

استجمع قوته واجه وخرني و حضن ليال گوه يحجي

عماد : لا تخافين بنيتي كافي اني يمج اكسر ايده حميد اذا يجوسج

امل : خله راسها بين ضلوعه حضنها بكل قوته عبالك يوصل رساله انه هاي اخر حضن بينه

ليال : عماد والله هاااذ حامد

عماد : اي اعرفه حامد النذل

امل : يمكن بذيج اللحظه لو وحده بمكاني تموت لو يصير بيها سكر من الهبطه والخوف الي عشته واني ادحگ على زلمتي بلسانه يعترف وگدامي سلمهم رگبته

شلون جان حاضن اخته وعبالك يودعها ودموعه تنزل من طرف عينه وهو يمسح على راسها وليال تشاهك

وتهمس بتعب بين ضلوع عماد والله حامد

الله سبحانه لطيف بعباده شفعلنه بهاذ اليوم يمكن بسبب عمل الخير الي جان يسوي عمي جان ابو الفقراء بالديره كلها بسبب اعمال ابوها الزينه الله دحگلها ورحم بحالها نطقني بدون تخطيط احس مو اني الي حجيت

امل :ميخالف ليال وذا رسبتي بسبب حامد تعيدين السنه وتنجحين خلي يولي حامد الكسول مو انتي جنتي تقرينه

ــــ رادت تحجي وعماد لزمها من حنجها باسها بخدها

عماد : اي بنيتي تدرسين وتنجحين وتصيرين احسن من حامد يالله گومي نفوت جوه

امل :حضنها وفات يسحل بروحه وليال مستغربه الحجي السمعته من عندي ومن عماد مشيت وراهم دحگت على صياد بطرف عيني جانت ملامح وجهه اشبه بملك الموت الي يريد ياخذ روحي بلعت ريگي بغصه ودموعي تنزل لحالها

طبينه بالحجره ومحد لحگنه ظلو بره بالطرمه انطونه خصوصية قفلت الباب وعماد هد ليال وحضني باس راسي

عماد : شحجي امل بيش اجازيج گليلي انتي هديه الله دزها اليه حاير شنهي اگلج ضاع مني الحجي اني بيدي سلمت نفسي وانتي طلعتيني من الجدر امل

امل : من يوم الي تزوجت عماد لليوم ما حضني هيج حضن بادلته الحضن وگمت اشاهك من البجي شال اديني وباسهم ويرجع يحضني اوف يربي شگد غاليه روح ابن ادم

ليال : هاي شبيكم

امل : عماد خن نگعد ونفهم ليال كلشي بعد مابيها مجال مو كل مره تسلم الجره

ليال : شنهو تفهموني شبيكم

عماد : امل اگفي بالباب ديري بالج خاف احد يسمعنه

امل : فتحت الباب شويه ما شفت احد بعدهم بره خليته مفتوح وادحگ بتك عين خاف احد يجي

ارجف من الخوف رجليه معد تعيني كون ربي ما يفشلني من جذبت وتلافيت السالفه كون ربي يدحگ على ابني وما يتمه

عماد : اسمعي ليال انتي مريضه وهاذ الدكتور جان يضربج عبن جنتي فاقده

حميد معد يضربج صار يحبج وابويه گاله اذا تمد ايدك على ليال اكسرها

الي اريده منج بنيتي حامد لا تجيبين طاريه ابد

وذا احد سألج گولي هاذ ويايه بالمدرسة ورسبت من وراه عبن تهمني اغش

ليال : لااا والله ما احجي اني مو غشاشه وما رسبت حميد هوه الي

عماد : لياال اسمعيني ولا تلگمين الحجي

مثل ما فهمتج احجي گولي ويايه بالمدرسة وتهموني اغش فتهمتي ليااال

ليال : زين عش احجي هيج

عماد : شو اگعدي معد ظل بيه حيل اگف

اسمعيني بنيتي الله يخليج اذا جبتي طاري حامد راح مشعل ما يتزوج مهره وتگوم تبجي والعالم تعيرها وحميد يضربها

امل : لازمه حافة الباب وعين عالصاله وعين عالحجره يم عماد وليال انعصر گلبي من حجي عماد يربي شلون متحمل يحجي هيج ودموعه تصب

وليال اااخ يا ليال مو فاهمه كلشي وما تريد تگول حامد طالب ويايه وتهمني اغش ورسبت كلشي ولا واحد يگللها غشاشه قرفصت نفسها وحط راسها بين رجليها وتگهد

وعماد يمسح على راسها ويقنع بيها رفع راسها وباسها بخدها

عماد : هاا شگلتي

امل : مسحت دموعها ليال گالت ميخالف راح اسوي مثل مگلت بس والله اني مو غشاشه

عماد : ادري يروح اخوج والله ادري انتي الذيبه الشاطرة يابه اجيبلج ملابس يخبلن و شتريلج كاسيتات احلى من الجابهن ماجد

ليال : والله

عماد : اي والله بس اسمعي الكلام

امل : اجه يمي عماد وليال ظلت گاعده مقرفصه وتمسح دموعها بردانها هسع شراح نسوي عماد

عماد : شنسوي يعني نلم هدومنا ونرجع عالرمادي عود نوديها اني وماجد لبغداد اروح اخبر الصياد

امل : وتهگه صدگ السالفة وعبرت علي

عماد : ان شاء الله يصدگ ربج رحيم

امل : طلع عماد مسحت دموعي وگمت اعدل بليال

واوصي بيها وهيه تهز براسها بقبول

ليال : عماد راح يجيبلي كاسيتات

امل : اي عفيه عود خليني اسمع وياج

ليال : ميخالف

امل : سمعت بيها ملابس وكاسيتات وكيفت طلعنه عالصاله واجت الشيخه ونجمه وياهه تمشي وراهه مثل ضلها

خزامي : شنهي بنيتي امل اشو عماد يريد يرجع وما يكمل العلاج

امل : صحيح شيخه

خزامي : ليش بنيتي الشيخ عثمان گال لو داهنين جسمها البارحه جان اليوم بأذن الله طابت وخلصنه

اني هم مدري شلون نسيت الشيطان اعمه گلبي

امل : حجيت بگلبي والله مو الشيطان اعمه گلبج

نجمه عمت گلوبنه بسوالفها لو اني بمكان صياد الا اخذها وعالوجبات اكتلها اخليها اتوب عالساعة الي حبت بيها واحد عنده ثلاث نسوان

خزامي : بنيتي شو ساكته ما تحجين

امل : ها شيخه اي والله يم عماد هوه يريد يرجع

خزامي : لا يبنيتي ما يصير اصبرو لباجر بلكت الله

امل : ناداني عماد بالهول ورحت

عماد :امل هاذ صياد ما يفعل يخلينه نروح.

امل : شنهي ما صدگ السالفه

عماد : لا بس شيخ عثمان گاله لو مسوين العلاج الي گلتلهم علي البارحه جان اليوم بحيل الله البنت طابت

امل : اي وشنو هسع

عماد : صياد گال عجل تظلون وكملو العلاج مثل ما گال الشيخ وباجر على زين وشين نتوكل عالرمادي بس بأذن الله اطيب

امل : ما ادري عماد اشو گلبي لاسبني

عماد : ااوف ياريت سمعت كلام ماجد ياريت

امل : توكل بالله بلكت على زين تفائل بالخير مزال صياد ما شك بشي اني متأكده لو شاك جان هيع انته

عماد : جان هسع اني من الميتين يا امل وفضيحتنه على كل اللسان

امل : اسم الله ربي لا يكتبها ان شاء الله

عماد : يالله روحي يم ليال وديري بالج عليها

امل : ان شاء الله انته هم دير بالك اگف انته شلون صرت

عماد : زين الحمد لله روحي

امل : لليل واني مفعل اطلع من الهبطه

غده ما تغديت وهاذ اجه العشه واني مگدر اكل شي انوب زاد القهر عندي من شفت صياد واگف يم نجمه مدري شيحجون واجت مفرفحه گعدت يم ليال وگامت تسأل عن دراستها وتحاول تسحب حجي

تلافيت الوضع وسحبت ليال زعم امشطلها وكل شوي اشاورها اذكرها بالوصيه مال عماد

تعشو واني اكلت لگمتين عصو بزردومي

تا بس محد يشك بشي سممتني نظرات نجمه اكلتنه بعيونها تقرا كل لمحه ونفس يطلع من عدنه

شربت الجاي واخذت ليال عالحجره ادهن جسمها

ليال : عش تدهنين جسمي امل غدي ريحته مو طيبه

امل : هاذ الدهن زين يخلي الجسم حلو ويوخر علامات الضرب الي بيج

ليال : صدگ والله

امل : اي يالله انزعي ملابسج هسع بس القميص انزعي

بلشت ادهن بجسمها وجان تجفت علينه نجمه بدون ما دگت الباب وليال فزت وحطت اديها على صدرها

نجمه : امل اعوانج

امل : تسلمين اني قفلت الباب شلون فتي

نجمه : لا مو مقفول

امل : وگفت نجمه حت من گلتلها ما اريد تعاونيني

وادحگ على ليال من فوگ لجوه ومگدر اگللها اطلعي

ااخ شگد تحملت اخ

نجمه : هاي ليال شگد عمرها

امل : طبت ب 13 سنه

نجمه : صلاوات الي يشوفها ما يصدگ جسمها مرصرص ههه

امل : وگفت بين ليال ونجمه وادهن بليال ومتعصبه

وما رديت على نجمه بلكت تحس

نجمه : يالله اني اطلع

امل : اي يربي حست الحمد لله شگد دمج ثگيل

خليتها تطلع وقفلت الباب بالسرگي حيل

كملت ليال ورحنه انام ومثل البارحه نجمه كررت نفس الحوار اجتني الگشره مال هسع اروح احب راس صياد واگله اخذ نجمه اني بشاربك

ليال : اامل جسمي نمل هاذ الدهن مو حلوو

امل : ميخالف بنيتي هاذ معنى زين وراح يطيب جسمج تحملي ونامي يالله

ليال : فليني امل الله عليج اريد انام

امل : لزمت راسها افلي بيها اوف كل ما افليها اتذكر مهره عودتهن على هاي السوله من تنعس وما تگدر تنام الا افليها

نجمه : عش تفلينها بيها گمل ههه

امل : لا والله تعاي شوفي شعرها بنفسج فروة راسها تبرج برج من النضافه بس هاي سولتها

نجمه : شفت شعرها طويل گلت رباة الگمل

امل : تجاهلتها وما رديت ظليت افلي بليال لحد ما نامت وطمأنيت طبيت بفراشي مددت وناداني عماد

ـــ هاا عماد شتريد

عماد : دهنتي جسم ليال

امل : اي

عماد نامت خوما حجت شي صار شي

امل : لا لا تطمن وانته صار يمك شي

عماد : الحمد لله باجر اخر يوم ان طابت او لا نرجع عالرمادي معد اتحمل امل على غفله وتجفص ليال وتكتهن كلهن اني شسوي

امل : والله هاذ هو الي علينه سوينا ظلت يم ربك

عماد : وگفتج اليوم ما انساها انتي مثل الدرع امل لو اني بمكانج ما سويتها الله يحفظج ليه

امل : غصب عني هاذ اذا ما تدري شصار بيه وبلحظه تخيلتك شلون ااخ ما اريد اكمل الله لا يگولها انته اذا صار عليك شي اني وين اولي بروحي

عماد : ان شاء الله ما يصير شي يالله ارجعي نامي ورتاحي

امل : باسني من خدي وراح شگد صارت للحظات جنت اتمناها بس ما اگدر افرح بهيج وضع

رجعت على فراشي مددت وادعي يارب تفرج باجر ونخلص

ديالا : گعدت على صوت التلفون دحگت عالساعه 6 الصبح گمت مبلل ادري منهو يدگ هسع جاوبت

اجاني صوته العذب

ماجد : هاا ديالا گبل كلشي گليلي ليال اجت

ديالا : لا بعدهم.

ماجد : لا يا الله ليييش بعدهم ليييش

ديالا : اني شمدريني

ماجد : زين ما اتصلوو

ديالا : لا محد اتصل

ماجد : كله لا شتعرفين انتي اگوم هسع ******

ديالا : غدي هاذ شلون گام يحجي سديت التلفون بوجه لعب روحي يتصل الف نوبه باليوم ويسأل ويريد رقمهم وعنوان بيتهم بصلاح الدين واني گليشي ما اعرف نزلت سماعة التلفون تاميتصل انوب ورجعت نمت

امل : صارت ساعة 8 واني اگعد بليال تا اسبحها گبل لا يجي الشيخ وما تفعل تگعد نهديت على صفحه تعبت الا نجمه والشيخه فزعن ويايه

اخذتها عالحمام سبحتها رادت نجمه تفوت ويايه وما فعلت

لازمه المنشفه وجاي انشف شعرها وجان تغفي وترجع تنام يبو يالعثره

ناداني عماد ورحت بساع

عماد : هاا امل وين ليال

امل : يعني شگلك هسع والله نامت

عماد : شنهي نامت امل هسع شگول للشيخ

امل : شمدريني روح شوفها

عماد : اگفي اخبر الشيخ

امل: ثواني ورجع عماد ــــ هاا شگلك

عماد : يگول عادي وذا نايمه

امل : خوش عجل الحمد لله

عماد : بس لفي شعرها لفعيها وغطيها بجرجف

امل : يالله هسع

عماد : هاا كملتي

امل : اي خلي يجي

عماد : يالله نخلص اليوم

امل : ان شاء الله

رحت يم ليال غطيتها بجرجف وگعدت بعيد عنها

فات الشيخ عالحجره هوه وعماد وسدو الباب

عماد : يعني ما نگعدها شيخ

عثمان : لا خلها نايمه احنه ما نريد ليال نريد المس وهسع من يسمع القرأن يگعد

امل : بلش الشيخ يقرا وصدگ گعد المس وگام يصرخ

هالنوبه الشيخ لح بالقرأن بدون ما يتحاور ويا ويسمع منه ساعتين متواصله يقرا الشيخ احس حنجرته رادت اطگ گام يگح من التعب بس يرجع يكمل

لحد ما نطق المس اطلع اطلع كافي حرگتني اطلع

عثمان : تطلع

ــــ ايييي اطلع

عثمان : ترجع النوب

ــــ : لاااا ما ارجع

عثمان : وذا رجعت

ــــ: احرگنييي اذا رجعت

عثمان : اطلع من رجلها اليسار

امل : رتفعت رجل ليال اليسار بعدين وگعت

عماد : هسع شصار شيخ طلع يعني

عثمان : اصبر ابني هسع نعرف اذا طلع صدگ لو جذب علينه

يتبع……