رواية غرباء ( لقاء بعد الموت ) الفصل السادس عشر 16 بقلم اساورالموسوي
السلام عليكم
اللهم صلِ على محمد وآل محمد
لا تنسون تعليقات عالفقرات+متابعة لحسابي+تصويت
----
اكو ناس تسمع ونينك وتعتبره صوت عابر
واكو ناس يوجعها ونينك وكأنه طالع من صدرها. 
----
"صقيل"
اختنگت شرگت ظليت اگح بقوة وطعم مقرف بلساني، ماهتم ورجع حطاه بحلگي شربني وغصيت اكثر.
ظليت اگح وبنفس الوقت احاول ابتعد، ولأول مرة ما شفت الغضب،.شفت شي ثاني، الضياع.
الضياع اللي ما يمحي الصار ولا يصلحه، ولا بعد 100 سنة، ولا يرجع الإنسان مثل قبل، يمكن هذا الضياع راح يبقه لازگ بلجدي للأبد.
گمت من مكاني ببطء واني احاول ابتعد، ابتعدت لأبعد زاوية بالغرفة، اريد مسافة اي مسافة حتى لو متر واحد.
حتى لو خطوة بس اتنفس، مختنگة واگح وهو ظل يباوعلي وما حاول يقرب او يجرني او حتى يمنعني.
يمكن حس وعرف اي خطوة راح يقربها هسة راح تبعدني عمر كامل، ناده باسمي.
:- صقيل
سديت ذتني بيديه الثنين، ماريد اسمعه تعبت حرفيًا تعبت من الوعود ومن التبريرات، تعبت من كل مرة يأذيني ويگول انُ هو يحبني.
بهاللحظة فهمت شغلة وحدة مو كل شخص يحبك، يعرف شلون يحافظ عليك، ومو كل حب يستاهل تبقين علموده.
ظلت هاي الفكرة تدور براسي، بديت احس بالغثيان والدوار مو طبيعي، بديت اتنفس بصعوبة اكثر، واريد اتقيئ.
ماكتفه لهنا گام من مكانه، فتح المجر وطلع شي بيده علبة زغيرة، طلع منها شي واجاني، بسرعة فعلت وضعية الدفاع، حاولت اركض واطلع بس المفتاح ماهو.
لزمني بعنف وفتح فكي غصب واني اصرخ واتوسله مايأذيني..
:- لاااا هشااااام لااااااااا عوفني! شنو راح تنطيني؟! دخيييلك لاااااا! هشاااااااااام!
اسمه يتردد بصريخي ومنعي ومقاومتي اله، فتح حلگي وحط حبة غريبة بلعومي، وحتى يخليني ابلعها رجع شربني فوگها غصب.
هنا حسيت نهايتي قربت، اختنگت اكثر بس للأسف بلعتها بغير قصد، تركني وانحنيت بالارض، جاثية على ركباتي وايديه عالارض.
عبالك جاي تطلع روحي الدوران والغثيان اخذ حصته مني، حطيت اصبعي ببلعومي احاول اتقيئ الشربته.
بس بسرعة لزم ايديه وهو جاثي على ركبه وياي، يباوعلي، عيوني مليانة دموع حتى ماشوفه عدل، خلاني هيچ.
بعدها شالني حطاني عالسرير، بعد ماعرف شگد من الوقت ماذكر حتى، الغرفة صارت ادور بيَّ، فقدت تركيزي.
دوران قوي واحس راسي ثگيل، ماگدر اركز كلش، حتى الاصوات صارت مشوشة، ضعف بجسمي والغثيان زاد.
فقدت التوازن، تشوشت افكاري، صار جسمي اثگل من قبل، كل ما احاول اتحرك احس اطرافي ما تستجيبلي عدل، وتركيزي جاي يضيع اكثر واكثر.
ماعرف شنو شعوري بالضبط بس كأني مو اني، كأنُ صقيل طلعت روحها بهاللحظة وبقيت جسد بلا روح.
صار يگلبني مثل مايريد ويسوي اللي يريده، ولا كأني انتمي لهذا العالم، صرت جثة بيده، استغربت من نفسي حتى.
ماعرف شكثر مر وقت واني على نفس الحال، مگلوبة على بطني عالسرير ايدي طايحة منه، وعيوني تراقب بصمت دوراني وغثياني وماعرف اني نايمة لو گاعدة لو شنو بالضيط؟!
ماگدر اتحرك احس راح اختنگ بأي لحظة واموت، حاولت وحاولت، لمن گدرت اگوم شوي، ما ان گمت صرت استفرغ عالارض.
ماعرف شلون گدرت اوگف على رجليَّ، بعد الاستفراغ حسيت الدنيا كلها تميل بيَّ وتتمرجح، ايدي ترجف جسمي احسه شاعل نار.
مسحت حلگي بظهر ايدي وباوعت بالغرفة نفسها والحيطان هي نفسها، بس ليش احس اني المختلفة ومو اني.
حسيت اذا ابقه بعد دقيقة زيادة راح اختنگ لازم اطلع واشرد منه، هالفكرة سيطرت على عقلي كله.
گمت اتعثر بخطواتي فتحت الخزانة بعشوائية سحبت اول قطعة ملابس شفتها، لبستها بدون ما انتبه شنو هي اصلًا.
شعري مبعثر، واحس عيوني مورمة من البچي والسهر،.ما يهمني المهم اطلع.
سحبت عبايتي بسرعة، لبستها بشكل مامرتبك، الشال شمرته شلون ماچان، دگات گلبي توجعني، خايفة منه اريد اشرد واخاف يمنعني.
طلعت بسرعة ماريد ابقه ثانية بعد، البيت هدوء وسكون، نزلت الدرج بسرعة واكثر من مرة تعثرت ردت اطيح وتماسكت.
بس اريد اوصل للباب وافتحه واطلع، وصلت لزمت مقبض الباب بيدي المرتجفة، بنفس اللحظة سمعت صوته وراي.
وگف حتى التنفس عندي، ماردت التفت جمدت مكاني وايدي صارت جليد عالمقبض، اهتز كل شعوري وكل كياني.
بس الخوف فجر كلشي داخلي، الخوف والهروب وطلب المساعدة مهمى چانت نظرة اهلي، بس اريد اوصلهم حتى يساعدوني وينقذوني منه.
فتحت الباب بسرعة وركضت بكل قوتي، حسيت گلبي يركض گدامي، بس اوصل ياربي بس اوصلهم، صوته وراي.
:- صقييييييل!
ماحسيت غير ايديه لزمتني ولفاهن عليَّ من حرگت گلبي صرخت بكل وجع..
:- لااااااا! لاااااااا! عووووفني!
عرفت ماراح اگدر اهرب بسهولة منه، وما لحگت انطلق، شالني وظليت اصرخ بكل مابيَّ من قوة.
:- اتركنيييي! اتركنييييي!
حاولت افلت نفسي ضربت ايده ودفعته بكل قوتي، بس جسمي منهار ومابيَّ اي قوة، سد حلگي قوي.
دخلني للصالة قبل لا يصعد الدرج وخر ايده على حلگي..
:- نزلنييييي!
:- اهدي!
:- مااااااااريدك مارررررريد ابقه وياك!
:- ماعادت هالشغلة بيدچ، ماتركچ بس من يتكوم عليَّ التراب
ظليت اتوسل بدموع..
:- اتركني اروح دخيلك خليني اروووووح! اريد امي فدوة فدوة عوفني! عوووفني!
صوتي ترس البيت صريخ وتوسل لعله ينكسر خاطره ويلين گلبه، فجأة انفتح باب غرفة طلعت رنا، اول ما شافتني بهالحالة اصفر وجهها.
رنا :- هشام شتسوي بيها ليش تصرخ؟!
ما رد عليها ظليت اصرخ استنجد بيها من اتجه بيَّ للدرج..
:- فدووووة رناااااا ساعديني فدووووة! ساعدووووني!
ماهماه وصعد الدرج ركضت رنا تمنعه لزمت ايدي قوي قبضت ايدي عليها كأني راح اموت وهي حبل نجاتي.
:- نزلللهااااا هشاااام! شتسوي بيهاااا؟!
وگف وهو هادئ..
:- رنا بعدي عن دربي
:- لااااا مابعد نزلهاااا!
:- وانتِ منو وتأمريني؟!
مشه بيَّ الدرج صوتي انباح واني اصرخ عليها، حاولت تساعدني، بس هشام دفعها وطاحت من نص الدرج.
اباوعلها گامت وهي تتألم من رجلها، واصيح مادة ايدي الها.
:- رنااااااا :- لا تخليني وياه!
بس مالحگت تگوم تساعدني، دخلني للغرفة ونزلني دفعني بعيد عنه، صوت القفل كسر گلبي اجزاء.
:- افتحححح الباب خليني اطلع!
:- مستحيييل
:- فتحه! اريد اطلع!
:- ماكو طلعة من هنا
:- اني اكرهك! تسمع؟ اكرهكككككك!
:- گوليها ألف مرة مايهمني
:- اكرهك! اكرهك! اكرهك! مارررريدك
:- بس اني اريدچ
:- ماريدك! ما ريد ابقه وياك! ماااتفهههم!
:- تبقين
:- منو انتَ حتى تقرر عني؟!
:- اني زوجچ واللي تحبيه
:- انتَ مو زوج انتَ سجان
:- سميها مثل ماتردين بس ابقه زوجچ
:- افتتتتتتتح البااااااااب!
:- چؤؤ
:- اريد امي!
:- هسة لاااء
:- دخيلك خليني اروح يوم واحد بس
:- ولا نص يوم
:- ساعة! بس ساعة!
:- لا ولا ربع دقيقة
:- ليش؟!
:- لأنچ ما ترجعين
:- اي مارجع لأني اكرهك
:- عادي لأن كرهچ ما راح يغير شي
:- انت مو طبيعي
:- اممم يمكن
:- والله العظيم انتَ مريض!
:- همين يمكن
:- ليش تسوي بيَّ هيچ؟!
:- لأن ماگدر اخليچ تروحين، اريدچ
:- بس اني ما اريدكككك!
:- اعرف
:- تعرف وتبقى هيچ؟!
:- اي عاجبني الوضع اكثر
:- الله ياخذني يوم العرفتك
:- لاااا لا تگولينها گلبي انكسر
:- انيييييي اكرررررررهك!
:- واني اريدچ اموت بيچ، عاشگچ
:- اريد اطلع اريد اهلي!
:- ماكو اني اهلچ بعد
:- هو اني اريد ابتعد عنك
:- ماكو ابتعاد عني
:- ليش تسوي هيچ؟!
:- لأنچ الي وبس، ملكييي
:- مو الك ولا ملكك اني بشر الي حق الاختيار
:- بعيونچ شي ثاني
:- شنو اللي بعيوني غير الكره والخوف منك؟!
:- انتِ سبب هالخوف ماچان لازم نوصل هيچ مواصيل
:- اني؟! لو انتَ الاناني، طلعني ماريد ابقه وياك
:- تبقين
:- غصب شنوووو ماررريدك اگلك ماريدك
:- اي غصببب
:- انت تسمع نفسك شتحچي؟!
:- اي اسمع واعرف شحچي
:- راح اندم طول عمري ان اني اختاريتك وماسعت كلامهم، چانوا هم الصح واني غلط، شافوا شي ماشفته وغبية اني غبية اختاريتك!
:- واني لو يرجع الزمن اختارچ مرة ثانية، وما امل وابقه على بابكم سنين، حتى لو متزوجة غيري اقتلچ واقتله وماخليچ
:- اسكتتتتتت كااافييييي! اطلع بره! عوووفنييي!
:- ما اطلع
:- ليش تسوي هيچ ليييييش؟!
:- لأن هذا مصيرنا
:- لا مو مصيري! موووو مصيريييي!
:- صقيل
:- لا تصيييييح باسمي!
:- صقيل
:- گلت لا تصيحنييييي!
:- حتى لو تكرهيني، تبقين
:- حتى لو ابچي واصرخ؟
:- حتى لو تصرخين وتبچين
:- حتى لو اتمناك تموت؟
:- حتى لو تموتيني بيدچ قابل، بس مابتعد عنچ
:- ارجوك هشام ارجوك عوفني اروح!
:- لا تتوسليني صقيل ما اعوفچ لو تضربيني طلقة هسة
:- دخيلك عوفني ارووووح!
:- صقيل بس اريدچ تبقين ونصلح بيننا
:- شنصلح؟! شنصلح هشاااام؟! ما بقى بيَّ حيل
:- ارتاحي هسة ونحچي بعدين
:- ما ارتاح بوجودك، وين ارتاااح وانتَ تشربني غصب وتغتصبني ولا كأني مثل الجثة بيدك! شنصلح واني ماعرف شنو من حبوب بلعتني؟! شنصلح واني سجين عندك تعنفني وتشك بيَّ؟! وتتملكني وكأني سلعة عندك! ولا كأني انسان من لحم ودم ومشاعر! شنصلح؟! جاوبنيييي!
سكتت واني ابچي، حتى صوتي بدا يختفي من كثر الصياح، حيل مابيَّ حتى للكلام.
ظل يباوعلي شوي، اتجهلي انتفض جسمي كله تراجعت ليورا طحت گعدت عالسرير، گمت بسرعة وابتعدت عبالي راح يرجع يقربلي بالغصب من جديد.
اتجه للمجر اللي يم مخدته، فتحه طلع مجموعة اوراق دار عليَّ وشمرهن عالسرير.
:- اقريهن
ما تحركت بقيت اباوع بينه وبين الأوراق..
:- ماريد اشوف شي منك
هز كتفه ببرود..
:- اوكِ لا تقريهن، اني اگلچ شنو بيهن، هاي ملفات كاملة تخص امچ
:- شنو لأمي؟
:- اختلاس
جمدت مكاني فتحت عيوني عليه..
:- شنوو؟
:- اختلاس وسرقة اموال من مكان شغلها
:- كذااااب امي مستحيل تسوي هيچ!
:- ليش مستحيل؟
:- لأن اعرفها كلش زين
ابتسم ابتسامة باردة ضوجتني اكثر..
:- لو چانت الناس كلها تعرف ناسها چان المحاكم سدت ابوابها
:- لا تدخل امي بهالسالفة!
:- دخلتها لو ما دخلتها، هاي الملفات موجودة
مد ايده للأوراق..
:- واكو ادلة وارقام
:- كذااااب!
:- يمكن
:- مو يمكن، إلا اكيد
:- ويمكن لا
:- امي بريئة! مستحييييل!
:- يمكن بريئة، ويمكن لا
:- هاي تهم منك والله
:- صقيل، اني كلشي اگدر اسوي اذا اريد
رجف جسمي خوف من نبرة صوته وكلامه..
:- لا ماتگدر الله موجود
:- جربيني
:- ليش تسوي هيچ لييييش؟
:- لأنچ مصرة تخليني اوصل لهالمواصيل
:- بس لا تجيب طاري اهلي بالنص!
:- اذا رحتي الهم وحچيتي كلشي، هاي الأوراق راح تكون بيد الجهات المختصة، تروح بيها سنوات، وممكن ينجر اخوچ خليل هم ما يسلم، وخواتچ المصونات يدخلن بالسالفة كلها
:- لا تكذب! كذااااب والله
:- جربي وراح تشوفين شعور الندم الحقيقي
:- انتَ وحش
:- امممم يمكن
:- مستحيل اصدگك
:- مو مطلوب تصدگيني، رفع اوراق بيده" مطلوب تعرفين ان اللعب وياي ثمنه غالي
دموعي نزلت اكثر..
:- لا تأذيهم فدوة
:- لا تجبريني
:- شنو ذنبهم؟
:- ذنبهم انچ تريدين تهربين
:- هاي مو عدالة
:- ما حچيت عن العدالة
:- حرام عليك والله
صحيح بس لأنچ ما خليتيلي خيار ثاني
:- لااااء انتَ اللي اختاريت هذا كله
:- اممم اي والله صحيح
:- اذا تحبني مثل ما تدعي، لا تمس اهلي
:- اذًا لا تخليني احتاج اسوي شي
:- جاي تهددني؟
:- لا دا افهمچ النتائج شنو لو قررتي تسوين شي مايرضيني
باوعتله ودموعي تنزل اكثر..
:- هسة شتريد مني؟
:- ابسط منها ماكو تبقين
رجفت شفايفي..
:- بس؟
:- بس
:- وتحبسني؟ وتهددني باهلي؟ وتأذيني عادي عندك؟
:- لا غايتي ابچيچ ولا أذيچ
:- هشام جاوبني
:- بس اريدچ تبقين
:- بس هالجواب؟!
:- هذا الجواب الوحيد اللي عندي
:- يعني كلشي يصير عادي عندك مقابل ابقه؟
:- اذا النتيجة تبقين اي
حسيت گلبي يوجعني..
:- وأهلي؟
:- تبقين والملفات تبقى بمكانها، يعني محد يعرف بيها
:- واذا رحت؟
:- لا تجبريني احچي اكثر
:- حرام عليك امي شسوتلك؟
:- ما سوتلي شي
:- لعد ليش؟
:- لأنچ انتِ المهمة
:- اني ما مستاهلة كل هالخراب
:- بالنسبة إلي تستاهلين
سكتت ما بقه عندي حچي، حسيت نفسي محشورة بزاوية ما بيها باب، لا اگدر اروح ولا اگدر ابقه، ظل يباوعلي ودموعي تنزل.
نزل راسه واتجه للباب قبل لا يطلع التفتلي..
:- صقيل هسة الچ حرية التفكير
:- هاي تسميها حرية؟
:- الچ حرية الاختيار وهذا الباب راح يبقى مفتوح، تبقين لو ترحين؟
يعتبر الباب مفتوح واني اشوفه مسدود ويمكن لمن ينتهي عمري، طلع واني انهاريت اكثر، حسيت كل الدنيا مسدودة بوجهي.
نزلت على ركبي عالارض، دموعي ما وگفت ولا افكاري، حضنت راسي بيديه الثنين.
:- يارب شسوي؟
فجأة لطمت وجهي بقوة من القهر، لطمته مرة ثانية وظليت الطم حيل على وجهي، شهگت بصوت عالي.
:- ياربي شسويت بنفسي اني شسويييت! ، شسوي هسة اذا رحت اخاف عليهم، واذا ابقه اضيع عمري ونفسي
رجعت اضرب بكفي على وجهي واني ابچي.
:- شنو اسوي شنوووو؟!
مالگيت جواب، ظليت اباوع للباب فترة طويلة، عبالي اذا اطول بالنظر راح يطلعلي حل بس ماكو كل الطرق مسدودة.
اروح؟ واعيش كل يوم بخوف على امي؟
لو اظل؟ واعيش كل يوم بخوف منه؟
مسحت دموعي بردان عبايتي، گمت رجليَّ يرجفن، رحت للباب وتراجعت، گعدت على حافة السرير، انتهى الموضوع عرفت قراري.
مو لأن اريده ولا لأن سامحته، بس اخاف على امي، اذا فعلًا عنده القدرة يأذيهم، فــ اني مستعدة اتحمل.
:- يمه سامحيني لأن ماگدرت ارجع، ولا تحملت نتيجة قراري مثل ماگلت
احس نفسي كبرت عشر سنين بيوم واحد يمكن اكثر، ومن هالليلة فهمت مو كل سجن بيّ قضبان، اكو سجون تمشي على رجليها وتتنفس وتحچي وتگول انها تحبك.
ما بقى عندي حيل اصرخ ولا اقاوم ولا احلم بالهروب هسة، يمكن يوم من الأيام الگه طريق.
قررت ابقه بس مو لأن هشام انتصر، بس لأن اهلي مالازم يدفعون ثمن غلطتي، راح اتحمل واشوف وين توصل وياه.
گمت نزعت العباية شمرتها عالأرض، نزعت الشال بس كأني انزع گلبي من مكانه، رحت صحت للعاملة تنظف الغرفة.
رحت للحمام فتحت الماي، سبحت وصليت واني ابچي مو بيدي ماگدرت اوگفهن واني واگفة بين ايدين ربي واصلي قضاء.
بعدني دايخة وتعبانة ونفسي تلعب، ودوران خضاني خض، ماعرف اذا الي صلاة اصلًا واني س... استحيت اگولها حتى بيني وبين ربي.
قررت اهرب من الواقع بالنوم، حتى لو غصب انوم نفسي، اصلًا ماطولت ولا فكرت، طحت مثل الميت، كوابيس دمرتني.
ماعرف بيش الساعة فزيت على مسحته على راسي ويبوسه، حسيت بالاشمئزاز من نفسي قبل لا اشمئز منه.
لأني اختاريته وماعرفته مريض لهالحد، ولا سمعت كلام اهلي وضيعت نفسي.
يشم بشعري ويبوسه باستمرار وبهدوء، بدون مايحچي شي، هدمني ويريد يجي يلمني، يظن البناية لو نهدمت ترجع من ركامها.
تظاهرت بالنوم، لمن گام عني، گمت اريد اصلي ظلت تفتر بيَّ الدنيا، رجعت اتقيئ بقوة معدتي تتقلب، ورجعت نفس الشي.
شفته لازمني يوخر شعري عن وجهي، ويحچي وياي بس سمعي اختفى، طحت بيده احس واسمع واشوف بس قليل.
بس سمعت قليل جملة هدمتني ودمرتني دمار
"تتعودين حبيبتي جديدة عليچ"
بشنو من انسان تورطت؟! لا ذمة لا ضمير! لا اخلاق! شلون يشربني وشلون يگول هالكلام؟! معناها يريد يعيدها!
شالني حطاني بالسرير، حسيت گلبي يريد يترك صدري بگد ما دگاته سريعة، اريد اگوم وتنفسي عالي.
انهاريت واني ماعرف شبيَّ حسيت الموت على شعره يمي، اتنفس بصوت عالي واجرهن بالگوة.
:- رااااح اموووووت! رااااااح امووووت! يمااااااااا رااااااح اموووت!
لزمني منعني اگوم لزم وجهي بيديه الثنين..
:- اسم الله عليچ صقيل اهدي اني يمچ
:- ولأنك يمي راح اموووووووت!
تمسك بيَّ قوي يحاول يهديني، بس كل مرة انهار من حضنه، بقيت هيچ لمن اجت رنا تتعثر بمشيتها وتعرج.
ماعرف شنو تناقشوا ولا شنو حچوا ولا اذكر حرف بس الفهمته هي خايفة عليَّ، بقت يمي وهشام طلع.
شگد حاولت تهديني بس اني عبالك اجاني ورقة اجل وگلولي راح تموتين هالساعة.
ماحسيت بنفسي إلا وراسي بحضن رنا تمسح على خدي وشعري، كأنها امي مو ضرتي، حتى راحت جابتلي أكل مارضيت آكل من البارحة على حالي.
بس عالأقل هديت شوي بوجودها يمي، بس الهدوء مايدوم، يگولون ماقبل العاصفة، وبدال مايهديني هشام يزيد الوضع عليَّ.
دخل للغرفة..
:- شلونها؟
رنا :- شلونها ماتشوف لونها؟! وجهها مزورگ! وعيونها فارغة! ولا أكل ولا شرب وبس منهارة وخايفة شمسوي بيها؟!
:- گومي طلعي بره خلص دورچ
:- حسبي الله ونعم الوكيل بيك! طفلة الله ينتقم منك ماتعوفها بحالها!
:- رناااااا طلعي بره لا اكسر ظهرچ الچ!
:- ماطلع ماعوفها، شتسوي يعني؟!
اجه عليها جراها جر من ايدها حتى صرخت بألم، اني ماعرفت احچي او ادافعلها البيَّ كافي.
طلعها من الغرفة ورگع الباب وراها قوي وقفله، ظلت تضرب عالباب وتصيح، من هاللحظة عرفت ضاع مستقبلي اللي امي حاولت تبني وانطت دم گلبها علمودي.
اجه عليَّ ظليت ارعد من الخوف، بس بسرعة لف ايدينه عليَّ قوي ويبوس راسي بأسف.
:- صقيل حبيبتي راح نصلح اللي بينا لا تخافين
ماحچيت حرف واحد، استسلمت لواقعي، نومني بالسرير وغطاني، عافني ايام هيچ بلا مايقرب عليَّ بشي.
اروح للمدرسة وارجع مثل رجل آلي، اكلي بالكاد يكون مغذي، تعبانة كلش، اريد اروح لامي مجرد زيارة مايقبل.
واني طالعة من الدوام، رجليَّ خطت باتجاه عكس اتجاهي، ردت اتوجع لأمي بدون مايعرف بسرعة اشوفها وارجع گلبي طاگ عليها.
بس تراجعت راح يسويلي سالفة الها اول مالها تالي، اجه السايق ركبت بسرعة، ايدي على خدي واباوع من الجامة.
الدنيا مغرب، صليت وطلعت يم لهيب جاي يلعب بليستيشن بالصالة، شبيب لازم كتاب يقرا بس نزلت رفع عينه عليَّ.
تجنبتهم ماريد احتك بيهم وتصيرلي سالفة ويه ابوهم، بس هم مايتركوني.
لهيب :- تعاي صقيل نلعب سوه
رنا طلعت :- شنو صار بكلمة خالة؟
لهيب :- صدگ تحچين؟! خالة هههههههههههههه غير اصغر من عدنا هي
رنا :- ولو عيب
شبيب حچه بهدوء..
:- خالة صقيل راح تبقين واگفة؟
لهيب :- هههههههههههههه باع هذا انوب صدگ
شبيب ابتسم ابتسامة غريبة..
:- خالتي اي خالتي
لهيب :- تعاي خالتنا لعبي وياي طوبة
:- بس من تخسر مو تظل تبچي
اخذت اليده قبل لا يجي هشام، العب وياه لعبة وحدة، بلشنا وصار سوالف وضحك، بس كلما اباوع لشبيب يخوفني بنظرته.
رنا :- اجه ابوكم
بس سمعت هيچ تركت اليده بسرعة گطفتها من ايدي، بسرعة رحت اصعد الدرج قبل لا يدخل.
لهيب :- هااا شنووو صااار؟
:- نسيت الماي مفتوح بالحمام
همزين فلتت قبل لا يدخل، بوقت العشا گاعدين عالطاولة كل احنه، سوالف بينهم واني ساكتة، بس اباوع لهشام يتنقل بانظاره بيني وبين ولده، ضوجني بهالنظرة.
خلصت ورحت ادرس شوي، واعدت امي ونفسي اكون قوية وشاطرة واجيبها هالسنة اجيبها.
ظليت ادرس للساعة بال12 رغم اني مالي خلگ دراسة بس جبرت نفسي، اسخت كل شوي بس درست.
رحت اراسل اصيل وفطوم، حچيت وياهم بالنص ساعة، بس امي نايمة، ب12 ونص اجه هشام للغرفة، اكيد چان بمكتب البيت يخلص شغله.
تركت المبايل، سحب نفس قوي، راح للحمام غسل وبدل، اجه عليَّ حضني قوي ويشم بيَّ بلهفة.
اختنگت كلش، حاولت ابين ماريده بس مايفهم، رفع راسه اليَّ.
:- لشوكت تبقين هيچ باردة ثلج؟
:- بس تعبانة مو وقتها
:- كل وقت عندچ مو وقتها وتعبانة، كل يوم حجة، شنو حبيبي لازم شبعانة...
ماكمل كلامه گمت من يمه..
:- رجعنا للحچي الوصخ، والله ماتستاهل انام يمك
اريد اطلع جراني من ايدي بقوة..
:- على وين حبيبي؟
:- عوفني اروح انام يم رنا ومانام يمك
:- امممم يم رنا؟ لازم اكو شي حلو هناك
فتحت عيوني بصدمة فهمته غلط لو قصده وصخ؟! دفعته بقوة اريده يتركني.
:- انتَ والله مو طبيعي!
:- صقيل صيري آدمية ومطيعة لا اتصرف تصرف ثاني
:- شتسوي يعني؟
:- يا اما تتصرفين طبيعي وتحسسيني رايدة قربي وطايرة طير وياي، لو تردين تشربين من جديد
گلبي دگ بخوف وبطني مغصتني..
:- انتَ شنووووو؟! ماعندك احساس ماعندك دين واخلاق؟!
:- لا تبيعين مثاليات براسي وانتَ ويه رنا كله سويه بالغرفة
:- اياااااا مررريييض!
دفعته بغضب رجعها الي بكف قوي، ثرت وهجمت عليه اضرب بيّ مثل مايضربني، بس انهال عليَّ بالضرب والدفع.
احس كتفي انخلع من بوكساته، حتى مالحگ ادافع عن نفسي، فحطت واني ابچي.
جراني للسرير بقوة وعنف شمرني عليه وهو يخلع تشيرته، ظليت اشهگ بالبچي.
:- تصيرين مطيعة لو اتصرف وياچ بهمجية
ماجاوبته ابچي بصوت، واحس وجهي شاعل نار وكتفي يوجعني، حاولت امثل بس ماگدرت مو بيدي، ويه كل حركة دموعي تفيض.
دفعني عنه بعيد حتى ردت اطيح من السرير، گام بغضب لبس التشيرت وطلع من الغرفة، ظنيته راح يروح لغير مكان، بس جابلي كابوس ثاني.
زجاجة خمر ظليت اشهگ وابچي..
:- لااااا هشام والله راح اكون مثل ماتريد بس فدوة لا مو هاي الحل
:- شبيچ حبيبي حتى تصيرين فراشة طايرة
گمت بسرعة واني ارجف، اريد اشرد من الغرفة مالحگت، لزمني وقفل الباب، ظليت اتوسله.
:- ابوس ايدك لا تجبرني اشربه ارجوووك!
:- شربي
:- ماريد
أخذ راسي من شعري بقوة لزمه ورگع وجهي بالحايط، ظليت افرفر من الم خشمي، روحي فرفحت.
:- تشربين؟
:- لااااااا مااااريد!
رجع رگع راسي بالحايح اقوة، ظليت انكت بيديه ورجليه من الالم، حسيت بالدم نزل لزمت خشمي امسح بظهر كفي.
:- تشربينه وهسة گدامي وبيدچ؟
صرخت باعلى صوتي..
:- لااااااااااااااااااااا! ساعدووووني الله ياخذكم!
جوابي غلط رگع راسي مرة الآخ بس مو بوجهي بصفحة راسي، ماتحملت دخت ولعبت نفسي، جراني للمشروب.
بعده لازمني من شعري وامرني..
:- شربي
رفضت ورجعت رفضت بس ماحصلت غير الاهانة والضرب، شربني غصب ورجع جاب حباية بلعني اياها من جديد.
اريد اعرف اللي هنا بالبيت مايحسون، حتى رنا ماجت ساعدتني، بعد ماعرف شكم من الوقت، فقدت وصرت مثل اللي بالمرجوحة.
ونفس هذاك الشعور ماعرف نايمة او گاعدة، صار الصبح واني منو ماعرف وماذكر كل التفاصيل.
گمت من الفراش مادري اني بلا ملابس حتى ماحسيت، ظليت اترنح واتقيء عالارض، ركضت للحمام رجعت من معدتي شكثر وما ارتاحيت.
بعده الثگل براسي والدوخة، سبحت وطلعت ماعرف شحس بالضبط، باوعت للساعة العصر صاير.
زين محد فقدني محد گال هاي ماتت لو عدلة؟ شنو مو بشر؟
باوعت بالمراية انصدمت من وجهي جسمي كزبر، عيني مرعبة حمرة دم داخلها عبالك مبطوط البياض ونازف دم.
خشمي مورم وبي دم يابس مذوبه الماي، مسحته بالكلينس، وجهي ازرگ، وايدي ثگيلة كتفي يوجعني موت، حتى مفصل الورك عندي.
شلون راح اروح مدرسة بهالمنظر؟!
اليوم فاتني الدوام، وغياباتي هواي راح انفصل ياربي، بقت بس هالسنة لازم اكون قوية واكملها وما استسلم، اني گدها.
رحت نزلت للصالة شفت صفية گاعدة تشرب چاي وگفت گبالها، رفعت عينها لطولي.
:- شفتي جرايم ابنچ بيَّ اذا ماتحچين وياه وتشوفيله حل، والله اگول لعمي بالعراق يجي ويقاضيكم كلكم!
:- جرايم شنو؟
:- يضربني وساجني حتى لاهلي ممنوع اروح!
:- لو ما تستفزينه ما مد ايده عليچ
:- اني استفزه؟!
:- اي من اول يوم وانتِ ما متقبلة وضعچ
:- وضع شنو تقصدين؟! وضع السجن لو وضع الإهانة؟!
:- انتِ وافقتي عليه بنفسچ
:- وافقت على رجال محترم مو على واحد طلع غير وجهه الحقيقي!
:- ابني رجال وما يحتاج شهادة منچ
:- الرجال ما يضرب حرمة! لو ماعلمتيه هالشي؟!
:- لا ترفعين صوتچ عليَّ!
:- شسويلعد ابچي لو اضحك على حالي؟!
:- انتِ تعرفين هو شگد يحبچ
:- هذا مو حببببب!
:- لعد شتسمينه؟
:- مررررررض! تمممملك! هوووووس!
:- عيب عليچ تحچين على زوجچ هيچ
:- عيب عليه هو مو عليَّ! عيب عليكم انتوا تشوفون وساكتين!
:- صقيل التزمي حدودچ
:- لا والله اليوم ما اسكت
:- اسكتي احسنلچ
:- لا ما اسكت! ابنچ سكير!
:- شهالتهمة هنووووب؟!
:- اي سكير! ويجبرني اشرب غصب!
:- هاي كذب منچ
:- مو كذب
:- ابني عمره ما يسوي هيچ
:- لأنج ما تشوفين شيسوي من تنسد الأبواب!
:- انتِ دتبالغين
:- ليش كلما احچي تصدگين ابنچ وتكذبيني؟!
:- لأن اعرف ابني
:- واني شنو؟ مجنونة جاي ألف حچي من راسي؟!
:- انتِ ما مرتاحة من البداية
:- اي ما مرتاحة لأن ابنچ كذاب! ومريض نفسي!
:- انتبهي على كلامچ
:- لا والله ما انتبه! ابنچ خدعني!
:- شلون خدعچ؟
:- ما گال حقيقته من قبل
:- وشنو الحقيقة؟
:- انُ يشك بكل نفس اتنفسه!
:- هاي غيرة
:- هاي مو غيرة! قلة ثقة ومرض!
:- كافي صقيل احترمي غياب زوجچ
:- لا مو كافي! يفتش مبايلي كل يوم ويراقبني، يمنعني اشوف اهلي! ويشك بيَّ بشي وصخ!
:- لأنچ زوجته
:- زوجته مو عبدته!
:- صقيييييل!
:- لا تصيحين عليَّ! ابنچ دمر حياتي!
:- انتِ السبب
:- شنو ذنبي؟ شسويت حتى اني السبب؟!
:- لأنچ قبلتي برجال متزوج
:- مو اني اللي ركضت وراه! هو اللي ركض وراي!
:- وبالنهاية وافقتي
:- لأنه خدعني!
:- محد يجبر احد على الزواج
:- وهو هسة شجاي يسوي؟ مو جبر؟ مو حبس؟!
:- انتي مكبرة السالفة
:- مكبرتها؟! صدگ تحچين هاي كل قوتچ؟!
:- اي شتردين اضرب ابني وادبه وبيدچ كلشي، الرجال على ماتعوديه
:- والله لو مو خايفة على اهلي چنت هسة برا هالبيت!
:- اذا مو عاجبچ الوضع اطلعي
:- لا صدگ والله؟!
:- اي والله
:- لعد خلي ابنچ يطلگني
:- الطلاگ مو لعبة
:- وحياتي عدكم لعبة؟
:- اصبري عليه
:- شصببررر ماعنده شي زين وياي حتى اصبر!
:- والنتيجة شنو؟
:- كل يوم اسوأ من اللي قبله!
:- ابني تعب علمودچ
:- هذا تعذيب مو تعب!
:- كافي حچي روحي اكليلچ لگمة وصبري، المرة الاصيلة تصبر على زوجها
:- لا مو كافي! على شنو اصبر عالضرب والاهانة لو على اغتصابه الي لو يجبرني اشرب وياه
:- هم جاية تكذبين على ابني وتحچين عليه بالسوء
:- اريد مرة وحدة بس تصدگيني!
:- محد راح يصدگچ بهالحچي
:- حتى لو شفتوا آثار الضرب؟
:- يمكن طاح عليچ شي
:- سبحان الله! شي طاح على عيني وعلى خدي وكتفي ورجليه، وعلى خشمي، سبحان الله و كلشي يطلع ضدي بالنهاية!
:- روحي ارتاحي صقيل بتي
:- لا ماريد ارتاح واذا صدگ تعديني بنتچ، تخيلي اني وحدة منهم ويسوي زوجهن بيهن هيچ شتسوين
:- ماگدر ادخل بحياة اي احد حتى بناتي، وابني وانتِ حلوا مشاكلكم لوحدكم
:- اريد ارجع انسانة مثل قبل مو يعتبرني حيوان! حتى الحيوان هم يرأفون بيّ وحرام ضربه
:- الزمن ما يرجع وهذا اختيارچ
:-يعني مصدگتني؟!
:- لاء ابني محترم وهادئ
:- وصريخي ماتسمعونه كل يوم؟!
:- ماسمعت شي بتي روحي ارتاحي وتقبلي زوجچ، انتِ معصبة لأن رجع رنا وهو ماله شغل بيها، حتى مايروحلها باقي بس الچ
:- حسبي الله ونعم الوكيل بيكم كلكم، ان شاء الله اشوف بناتچ بهالموقف اريد اشوف شتسوين؟!
تركتها ورحت وهي ساكتة، ظليت ابچي واملخ بنفسي بغرفتي من حرگة گلبي، اخذت تلفوني اريد اتصل بامي واگلها تعاي وطززز بكلشي.
بس تذكرت الاوراق وتراجعت، حضنت راسي على رجليَّ وظليت ابچي اكثر.
المن اشكي والمن اگول؟ حتى صلاة ما مصلية، احس صلاتي ما مقبولة والله مايسمعني وحجب دعائي عنه.
رحت طلعت آكل شي وفعلت وضعية الا مبالاة، حتى صلاتي عفتها، وبالليل نفس الموضوع تكرر اجاني هشام ويريدني اتصرف وياه وكأني ميتة عليه.
وللأسف ماعرف امثل عليه، اخذتلي كم كف وانتهى الموضوع بالتهديد بالشرب، گتله كسرني ماشربه لو تموت.
استمرت حالي هاي، اروح للمدرسة وجهي كله ضرب، وبالي مو وياي، وهشام كلما ارفضه يعنفني ويشربني غصب حتى يخليني انصاع اله وشيريد يصير.
يسألوني بالدوام شنو الصار، كل يوم كذبة، طحت من الدرج، طحت بالحمام، صارلي حادث، عندي تحسس.
صارت عادي عندي انضرب مايوجعني، وصلت مرحلة اخطر من اي ضرب واهانة، هشام اذا مانطاني حبوب اتوسل بيّ عليهن.
صرت اسوي اللي يريده حتى ارضي، بدا يقلل عنف وياي لأني صرتله شيريد، وقت اللي يجي مارفضه بل اصير وقحة وياه واضحك واتدلع.
وره مايخلص مني اتقرف من نفسي واشبع نفسي ضرب بالحمام.
دراستي كلش سيئة وضعي مو زين، امي تجيني وتعتب ليش ماجي بس اطلع اعذار وكذب واضطر ابرر لزوجي المريض.
لاحظتني مو طبيعية وسألت وجهي ذبلان وزني كلش نازل بشكل يخوف، حالتي النفسية ما مستقرة، اجاوب من الدراسة.
ولهسة امي ماتدري هشام مرجع مرته، من تشوفها گتلها هي تجي علمود اولادها، مشت الچذبة بس اكيد امي مو غبية.
هشام قلل عنف وياي بس نفسه الشك ونفسه مرض الغيرة، ويدقق بلبسي، مكياج ممنوع، ضحك ممنوع باي مكان ولا اگعد يم ولده، حتى ممنوع اروح بغرفة رنا.
امتحانات نهائية ومخبوصة واحاول ادرس، حتى انجح لازم انجح والا كلشي ينتهي مستقبلي معتمد على هالسنة.
العصر على وشك الغروب گعدت بالحديقة، الكتاب مفتوح گبالي القلم بيدي، احاول اراجع كم صفحة قبل لا يضيع اليوم مثل غيره.
الهوا خفيف والحديقة هادئة، بس راسي مو هادئ ابدًا، قريت نفس السطر يمكن خمس مرات، وكل مرة اوصل لنصه وانساه، عيوني عالحروف بس عقلي بمكان ثاني.
سحبت نفس حاولت اركز، لازم انجح هاي السنة اذا ضاعت، راح يضيع وياها كلشي، نزلت عيني عالكتاب من جديد.
بالبداية ماحسيت احد موجود، وماعرف ان اكو عيون تراقبني، بس هذا الاحساس الخلاني ارفع راسي بدون وعي.
انصدمت البستاني اللي متعودة اشوفه كل يوم ما موجود، شفت بمكانه ولد شاب بعمر العشرينات تقريبًا، لابس ملابس شغل بسيطة، منحني على الزرع يگص اليابس منه.
ظللت اباوع حتى اتأكد مو متوهمة التفتت يمين ويسار، يمكن العامل الأصلي رايح ومخلي غيره مكانه.
بنفس اللحظة رفع راسه، التقت عيونه بعيوني بلحظة، نزل نظره فورًا وكمل شغله وكأنه ماشافني.
ماهتميت رجعت لكتابي، حجابي على راسي وملابسي مستورة، لأن هاي اوامر هشام من اطلع بالحديقة، اذا شافني اباوع على العامل الشاب شراح يسوي؟
مافكرت ولا اريد افكر، عيني عالكتاب، بلعت ريگي ورجعت احاول ادرس، بعد خمس دقايق اكتشفت اني قريت نفس الفقرة ثلاث مرات وما فهمت منها حرف.
:- ركزي صقيل ركزي
بس جسمي ما مرتاح وايدي ترجف رجفة خفيفة اعرفها كلش زين، رجفة صارت مألوفة عندي بالفترة الأخيرة.
سديت الكتاب، لا دراسة داخلة براسي، لا تفكيري يروح، ولا رجفة تتركني ولا حتى الحديقة جاي تساعدني.
كل اللي افكر بيه شگد باقي على موعد الحبة، اريد اخذها احس جسمي مو الي اذا ماخذها.
باوعت للعامل بعده يشتغل بسكوت، الشمس مو قوية كلش راح تغرب، بس واضح تعبان جبينه كله عرگ.
لزمت بطل الماي اللي چنت اشرب منه، بعده مليان، گمت ورحتله مديت اله بطل الماي..
:- تفضل
رفع راسه باستغراب، وباوع للبطل وبعدين إليَّ ويتكلم بلهجة اهل البلد..
:- هاي لي؟
:- لا لجاركم
ارتبك بسرعة ومد ايده اخذه..
:- شكرًا مدام
هزيت راسي ورجعت مكاني، فتح البطل وشرب منه كم جرعة ورجع كمل شغله، اني رجعت للكتاب او حاولت ارجع، قريت سطرين ثلاثة نسيتهم.
رجعت من البداية بعدها حسيت نفس هذاك الاحساس رفعت عيني، لگيته يباوع باتجاهي مو مباشرة بس باتجاهي.
من شافني منتبهة نزل راسه بسرعة ضجت كلش، رجعت للكتاب بعد دقيقة رجعت رفعت عيني، نفس الشي نظراته عليَّ.
سديت الكتاب بعصبية..
:- شبيك تباوع هيچ؟
انتفض بمكانه ووگف..
:- نعم مدام؟
:- جاي تباوع من ساعة
بين الارتباك على وجهه اكثر..
:- آسف مدام والله ما اقصد
:- لعد شتقصد؟
اشر بيده على الأرض القريبة مني..
:- هاي البقعة
التفتت..
:- شبيها؟
:- الأستاذ گال ازرعها ورد جديد، وجاي انتظر حضرتچ تخلصين حتى اشتغل بيها
:- اي صدگت، وهالبقعة بوجهي طلعت، گول من رخصتچ اشتغل هنا
بهتت ملامحه..
:- لا لا لا والله مو قصدي هيچ!
:- اي اكيد چان قصدك تدرس المساحة
:- أقسم بالله مدام مو قصدي، لا تفتهميني غلط، ارجوچ هذا شغلي الوحيد، واني معتمد عليه
:- ليش عبالك راح اطردك؟
:- لا بس الناس مرات تنقل الحچي بشكل ثاني
تنهدت بضوجة واضح مرعوب اكثر من اللازم..
:- زين اوكِ خلصنا، بعد لا تعيدها
:- اعتذر مدام راح احاول اخلص بسرعة
سكتت رجعت فتحت الكتاب، اجه على بالي سؤال..
:- وين ابو محمد؟
رفع راسه بس مايباوعلي..
:- ابو محمد شبي؟
:- العامل القديم
:- ابو محمد ابويه، واني محمد
:- اممم يعني طلعت ابنه
:- اي نعم
:- مستحيل ماتشبهه
:- ليش مستحيل؟
:- لأن هو عمره خمسين سنة ويبذر حچي، وانتَ ساكت من ساعة
:- مريض هالفترة، فأنطاني مكانه بالبيت كم يوم
:- الله يشافيه
:- آمين، مشكورة مدام
رجع يكمل شغله، بقيت اباوع لنفس الصفحة يمكن عشر دقايق، ولا كلمة وحدة دخلت براسي.
بعد شوي سمعت صوت سيارة تدخل، ما انتبهت بالبداية، بس رفعت عيني شفته هشام، نزل من السيارة، باوع باتجاهي.
نظراته خلت بطني تمغصني مباشرة، التفتت بدون شعور للعامل، بعده يشتغل بنفس المكان.
رجعت اباوع لهشام عرفت راح تصير سالفة، اجه باتجاهي بخطوات هادئة بشكل يخوف اكثر من الصياح.
وگف گدامي..
:- شتسوين هنا؟
:- جاي ادرس
:- گومي دخلي جوه درسي
رفعت الكتاب لوجهي..
:- هنا مرتاحة، خليني اركز
:- صقيل گلت گومي دخلي
:- ليش بلا؟
:- حارة هنا
بعد ما جادلت لأن عرفت من عيونه انُ الموضوع مو موضوع جو، گمت بسرعة لميت غراضي، دخلت للبيت.
صعدت للغرفة بسرعة، ما طولت بدخلتي، انفتح الباب بقوة، دخل هشام ورگعه وراه قوي، وجهه مو طبيعي.
هشام عاقد حواجبه..
:- شنو هاي؟
:- شنو؟
:- گاعدة بالحديقة وگدامه وبملابس البيت؟
:- گدام منو؟
:- لا تستغبين صقييييل!
:- تقصد العامل؟
:- اي العامل
:- شبيه؟
ارتفع صوته..
:- شبي؟! تسأليني شبي؟!
:- هشام لا تبدي فدوة عوفني بشوي هدوء
:- اني ابدي؟!
:- اي لعد اني
اشر علي بعصبية..
:- گاعدة گدام رجال غريب وتگليلي لا تبدي!
:- بالحديقة مو بغرفة نوم!
:- لا ترفعين صوتچ
:- لابسة حجابي ومستورة
:- حجابچ ما يغير شي
:- وشنو اسوي اختنگت داخل
:-اي بس مو تگعدين يمه
:- شنو يمه؟ بيني وبينه مسافة شطولها، وشعليه بيه اني؟!
:- حتى لو متر، انتِ شعليچ بس هو ديباوع عليچ
:- هشام كااااافي
:- لا مو كافي، ولا ترفعين صوتچ
:- شتريد هسة بالضبط؟
:- اريد اعرف ليش گاعدة هناك
:- جاي ادرس والله ادرس
:- بالغرفة اكو مكان للدراسة
:- ماگدرت اركز
:- وبالحديقة تركزين؟
:- اي لأن احب اگعد بيها
:- ومن يا وكت؟
حسيت اعصابي فلتت..
:- شنو يعني من يا وكت؟
:- من يا وكت صرتي تحبين الحديقة؟
:- من وكت ما خلقني ربي!
ضرب بقبضته الثانية..
:- لا تستفزيني صقيييل!
:- واني شمدريني انُ هو موجود هناك اصلًا؟
:- واول ما شفتيه مو لازم ادخلين
:- اي ليش شعليه بيه؟!
:- لأنه رجال غريب
:- عامل مجرد عامل!
:- يبقه رجال بالنهاية
:- هشام تسمع نفسك شتحچي
:- انتِ اسمعيني
:- لا والله مو طبيعي حچيك
:- حچيي مو طبيعي؟ يعني عاجبچ الوضع؟
فتحت عيوني بصدمة..
:- شنو يا وضع شبييييك؟
:- تگعدين وهو يباوعلچ
:- ما باوعلي ابدًا
:- لا تكذبين شفته بعيني يباوع عليچ
:- شفته بعينك لو بخيالك؟
:- شنو قصدچ؟
:- ماقصدي شي
:- لا احچي
:- ماكو شي احچي
:- ليش تدافعين عنه؟
:- لأنك جاي تتهمني متونسة يباوعلي وتتهم واحد مسكين جاي يشتغل على باب الله
:- مسكين صار مسكين هسة؟
:- الله أكبر! شبيك عليه بس افهمني؟
:- شنو حچيتي وياه؟
:- ماحچيت بس انطيته ماي
:- وناطيته ماي؟!
:- اي لأن استخطيته بهالحر
:- گلبچ حنين حبيبتي، وبعد صارت سوالف مو هيچ؟
:- لااااء ماسولفت وياه شبيك!
ظل يباوعلي بنظرة اعرفها كلش زين، نظرة الشك، اللي مهما جاوبت ما يقتنع ولا يصدگ.
:- ماصدگچ
غمضت عيني من التعب ومسحت على وجهي..
:- هاي مشكلتك مو مشكلتي
:- شنو ولچ؟
:- مشكلتتتتتك لأن مهما اشرح ما تصدگ
:- لأن اعرف الرجال وتفكيرهم
:- لا لأنك تشك بكلشي، اني تعبت، تعبت بكل مرة اتحاسب على شي ما سويته
:- انتِ زوجتي، ومن حقي اغار واخاف عليچ
:- بس مو سجينة وهاي مو غيرة، خوف مرضي
سكت وظل يباوعلي بنظراته اللي اعرفها، اللي من تدخل براسه فكرة مستحيل تطلع.
فجأة دار للخزانة، فتح الباب وبدا يطشر الملابس ويدور بينهن، يفتح مجرات ويسدهن وبعضهن مايسدهن.
:- هشام شتسووووي؟
مارد ظل يگلب بالمجرات والملابس بعصبية..
:- هشاااام شبيك شتدووور؟!
:- وينه؟
:- شنو هوووو؟!
:- التلفون الثاني
:- ياتلفون انتَ تخبلت؟
:- عندچ وضاميته اكيد
:- ماعندي تلفون ثاني شبييييك؟!
:- عندچ
:- والله ماعندي! والقرآن
جر المجر بغضب وشمره بالارض..
:- مستحيل لازم اكو شي
:- شنوو مستحيل ماكو تلفون هشااام!
:- ما معقول تلفونچ نظيف زيادة عن اللزوم
حسيت راسي راح ينفجر من القهر..
:- تعبت منك والله تعبت!
:- وين ضاااااامته احچي؟!
:- ماكو تلفون ثاني والله ماكوووو!
:- كذابة
:- والله مو كذب!
:- ليش لعد ما الگه شي؟
:- لأن ماكو شي اصلًا افهم انتَ راح تتخبل وتخبلني وياك!
ظل يفتش واني اصيح واحاول اوگفه، فجأة وگف وساكت، باوعت لايده شيت حبوب، وگف الدم بعروگي.
رفعهن بوجهي..
:- هاي شنو؟
ما جاوبته اختنگت النفس مايصعد، بطني مغصتني من الخوف.
:- سألتچ هاي شنو جاوووبي؟!
بلعت ريگي..
:- اسمع هشام...
گاطعني بغضب..
:- شنوووووو هااااااااااي؟
:- مجاي استخدمهن هاي من زمان...
ما لحگت اكمل لزم شعري قوي شهگت من الألم..
:- ماتردين طفل مني مو هيچ؟!
:- لا مو هيچ بس خلي افهمك!
صوته هز الغرفة بالغضب..
:- واني كل شهر انتظر واحسب الأيام وماكو شي!
:- اسمعني بس!
:- وطلعتي تاخذين حبوب من وراي؟!
:- گلتلك ما مستخدمتهن!
:- كذااااااابة!
:- والله مو مثل ما تفكر!
حاولت ابعد ايده عن شعري، بس ما گام يسمع صوتي ولا حتى يشوف وجعي..
:- منو انطاچ الجرأة تسوين هيچ؟
:- مو هيچ السالفة والله!
:- لعد شنو السالفة؟!
فتحت حلگي حتى اشرح، حتى اگله الحقيقة، بس الكلمات چلبت بحلگي وماطلعت، والحقيقة آخذهن من وراه حتى مايصير حمل.
نظراته مخيفة بشكل مو طبيعي، مال واحد مقتنع بشي ومستحيل يتراجع عنه لو شگد ما شرحت.
جراني قوي من شعري ظليت اتسنجده مايأذيني، بس ماحسيت إلا راسي انرگع بالحايط قوي، بحيث حسيت كل جمجتي اهتزت ودماغي وياها، والدنيا كلها اهتزت بيَّ.
آخر شي شفته ملامحه المشوشة، وآخر شي سمعته صوته وهو يصيح، بعدها كلشي صار ظلام....
**
عيونها ظلت تمطر دموع، وترجف رجفة عظيمة، اسم ابو فاضل ماطاح من لسانها ويه رجفتها.
:- آية عموتي لا تخافين بامان يمي
:- لااااااااا لااااا تجي!
:- شبيچ شبيچ يمعودة ما اسويلچ شي
فجأة ركض عليها وهو يمد ايده الها، وهي ظلت تصرخ وتبچي وتلوح بالسچين برجفة.
:- لااااا لاااااا، خاااااالة ام جااااااسم ساعديني!
:- آية انه عمچ، ما اذيچ عموتي
:- وخرررررر عليك الحمزة وخررر!
مد ايده يريد يلزمها، صرخت اكثر، سد حلگها وحاوطها، وهي تقاوم طاحت عالارض ودموعها تتوسله يبع.
فجأة صوت الباب انرگع، قبل لا يلتفت حس بضربة قوية، نزلت طاوة على راسه صاح متألم.
:- يااااااااااااااااابه
التفت وهو دايخ..
:- منووووو؟!
:- انه ام جاسم يالنذل! "رجعت ضربته قوي على راسه" ولك شتسوي بالبنية؟!
ورجعت ضربته بعد ضربه، ظل يطوطح ويتألم..
:- يمه راسييييي يابويه
آية گامت ركضت تبچي لبدت وره ام جاسم..
:- خاااااااالة!
:- تعاي يمه تعاي وراي، وخلي يگرب الا اشعل بخته، يا ابن الحرام شتريد منها؟!
:- خالة شبيييييچ والله جاي اتشاقة وياها
ضربته بالطاوة بزنده قوي..
:- تتشاقة؟! هاي بت اخوك يانگس!
:- خالة والله...
ماكمل ضربته..
:- اسكت!
:- يمه متت كافي وداعة...
ماكمل كفخته..
:- بعدك ما متت للأسف، صل ماتفطس
هجم عليها يريد ياخذ الطاوة بس بعدتها عن ايده..
:- انطينياها خالة!
:- تعال اخذها اذا زلمة وابن ابوك
بهاللحظة آية شافت خشبة بره بالحوش، راحت شالتها ورجعت تركض، ونزلتها على ظهره بقوة حتى كسرت عظم كتفه.
صاح..
:- آخخخخخخ بت النعال
ام جاسم صاحت..
:- عفية عليچ! كسري راسه وفلشي سنونه!
دار الها بعصبية يريد ياخذ الخشبة رفعتها ورجعت ضربته، قوي اجت بزنده، جراها منها بقوة طيحها عالارض، هجم عليها ام جاسم بسرعة اخذت الخشبة وطيحتها براسه.
طاح عالارض دايخ، ظل يون ودم طلع من راسه، يريد يگوم مابيه، ظلت تبچي آية.
:- راح يمووت يماااا لا ماريد اموته! انه مو مجرمة!
ام جاسم :- خل يولي خل يفطس يريد يتعدى على شرفچ النگس بت اخوه هذا يستحق الكتل
طلع صوته بألم..
:- آية اذا اگوم احرگ اجدادچ كلهم
ام جاسم :- شفتي قليل الاصل مابي شي يموتني ومايموت
آية ترجف ورفعت الخشبة من جديد..
:- إلا اگول لابوي واخلي ام جاسم تشهد على قذارتك، بعد عندي شاهد
:- شتحچين ولچ لا انعل ابوچ؟
:- سلام الله على ابو فاضل، فضحك وسطرك كون، خلالي شاهد على افعالك، ابوي ماصدگني بالاول هسة يصدگني
تغير وجهه وباوع لأم جاسم، شاف السالفة راح تكبر، گام بسرعة وهو يطوطح، آية وام جاسم خافن وحدة شبكت الآخ، بس اتجه للباب وطلع من البيت.
ام جاسم ظلت صافنة..
:- يمه مصيبة، مصيبة وصخااام! مصيبة سودة، طرگاعة ولچ
:- خالة لا تخوفيني مو ذنبي انه
لزمت راسها..
:- ادري يمه، شسوالج هالنگس؟!
ماجاوبت وظلت تبچي برجفة شفايف.
:- احچي بتي لا تخافين انه اصدگچ
نطقت بصعوبة..
:- خالة گولي شنو ماسوه
ام جاسم لطمت وجهها..
:- عزاااااااااا العزاك والغسل الغسلك كون"لطمت مرة ثانية" شسوه يمعودة؟! احچي!
آية ظلت تبچي أكثر..
:- هو من زمان... أ...
ام جاسم شهگت..
:- شنووووو من زماااااان؟!
هزت راسها..
:- من زمان... ماعرف شلون اوصف والله، سوه هيچ من قبل وطلع دم...
ام جاسم لطمت خدودها وخرطتهن..
:- يا ساتررررر! يا حسين! وتأذيتي؟!
:- تأذيت
لطمت صدرها قوي..
:- يا فاطمة الزهراء، يايمه سودة بوجهه ومصخمة يمه!
:- خفت وگلت اذا احچي محد يصدگني، وگلت لابوي ماصدگني
:- ابوچ عباله بسر تحارش بيچ
:- مادري خالة ماصدگني كلش، وماگلت لاحد بعد وسكتت
ام جاسم ظلت تبچي وتمسح بعبايتها دموعها..
:- يمه شلون شايلة كل هذا بروحچ؟ يمه صخااام ولطام ولچ آية صخااام هذا دم وراه، هذا حرام يعيش هالنگس بت اخوووووه!
آية رجعت تذكرت وظلت تبچي بصوت، وام جاسم مستمرة تلطم صدرها وتخرط خدودها..
:- والسادة شلون عرفوا؟
:- اي عرفوا بس مو كلهم
:- شگالوا؟
:- سيد أكبر وابنه وبته، وستروني
:- يا بعد روحي يمه
:- واختاروا يزوجوني حتى يحموني
ام جاسم ظلت مصدومة وتبچي..
:- يعني زوجچ يعرف؟
:- اي يعرف وهو بنفسه دگ الصدر وتزوجني
:- واهله ماحچوا
:- لا عمو اكبر فد انسان طيب ويخاف عليَّ مثل اولاده وبناته، بس امهم شريرة
لطمت صدرها مرة ثانية..
:- يا ويلي يمه يمه، ولچ اشايلة من مصيبة ولچ آية، والله ما چنت متخيلة المصيبة هيچ چبيرة
آية تبچي..
:- خالة لا تخليني بحدي فدوة لا ترحين اخاف يرجع وينتقم مني
:- لا يمه لا ماخليچ لو اموت ماعوفچ، ومرت ابوچ الرگطة وين ماشافت ماحست، حسبي الله ونعم الوكيل، حوبتچ ما تتعداهم ان شاء الله
حضنتها بخوف وهي تبچي..
:- لو اموت ما اخليچ بحدچ هسة
:- خالة انه خايفة
:- لا تخافين يمه
:- خالة والله خايفة اخاف يحچي لاحد وانفضح، انه هسة عرض بيت السادة وراح اجيبلهم الحچاية، اخاف اطلگ وارجع لهنا وياكلوني بسنونهم
:- ماتنچبين الشريفة الطاهرة تبقه طاهرة محد يمسها، وبعدين اكو مطي يفضح نفسه غير كتلته تصير على ايد ابوچ لو السادة هذا عرض وشرف مو سالفة هينة، دم رگاب تروح عليها
:- ماريد اگول لاحد كافي انفضح، خالة لا تگولين فدوة
:- ماگول يمه سرچ للگبر وياي ينطم، مادام السيد قابل وسترچ، بس خاف مؤقت؟
:- مادري خالة خايفة مرعوبة، اخاف يتركني
:- هو لمسچ؟
:- لا ما حاول حتى ولا مرة، اظن خايف عليَّ، هو شگد طيب وحباب وحنون
:- يمه صدقة لمحمد شلون رجال والنعم، لا تخسرينه بتي كسبي گلبه
:- والله خالة ماعرف شتصرف، امه ماتريدني، هذا الجرح هي سوته بيده
شهگت..
:- عزااا بعينها! شلون؟
:- گالت اساعدچ مادري احسها متقصدة وجرحتني
:- ولچ صخام گولي لابنها او اي احد
:- گلت بس تراجعت، خفت منها، تخوفني والله يا خالة احسها مرة قوية ومرعبة
:- شنو الجديد هاي مرت ابوچ الرگطة شلعت گلبچ، لا تسكتين بتي
:- ماظن مثل مرت ابوي، عتبار مرة بالف رجال تخوف، توگف عشيرة بتك رجل
:- يمه مصيبة صابتها، بس همين لا سكتين، السكوت هم مو حل
آية دفنت وجهها بحضنها تبچي بصوت، وام جاسم ظلت تمسح على راسها وتبچي وياها..
:- يا بعد روحي يمه شكثر شايلة بگلبچ وما حاچية
شوي ودخلت مرت ابوها وهي شايلة علاگة بيدها..
:- هاي شبيكم گاعدات هيچ؟
آية بسرعة مسحت دموعها ونزلت راسها..
مرت ابوها..
:-هاي شبيها؟
:- شبيها هاااا وتسألين شبيها؟!
:- خالة شكو معصبة شبيچ؟
:- اي معصبة شترديني اصير؟ اطبلچ؟
:- فهميني شصاير
:- انتِ فهميني شلون عايفة هالبربينة بروحها بالبيت وهي امانة يمكم؟
:- خالة هي بنيتنا، بالبيت شراح يصيرلها يعني؟
:- هااا صدگ بنيتكم؟!
:- اي بنيتنا عندچ شك ام جاسم؟
:- لو بنيتكم چان هسة مو هيچ حالتها
:- خالة شبيچ والله ما مفتهمة
:- لا والله انه ما مفتهمة! انتِ شلون عايفتها بحدها وتمشين تخورين بالبيوت؟
:- وين المشكلة مو طفلة هي؟
:- المشكلة ما تشوفين ايدها؟!
:- اي ايدها مجروحة
:- اي مجروحة ومخيطة!
:- اي عادي صارلها حادث، والحوادث تصير، وين المشكلة هسة كل هالعصبية؟!
ام جاسم بعصبية..
:- والله لو ما مستحية من عمري چان سمعتي حچي يوجع الگلب، انتِ تعرفينها شگد تعبانة؟
:- خالة لتكبرين السالفة منو ما تعبان
:- اي انه اكبرها!
:- زين هسة شمسويتلها؟
:- شنو ما مسويتلها، جايتچ خطار وامانة يمچ جاية ترتاح، وتكربيها من الصبح للليل شغل، ما تخجلين على نفسچ؟!
:- خالة بيتها هذا وتساعدنا شنو بيها؟!
:- تساعدكم لو تشتغل مكانچ؟ ماتشوفين وضعها وايدها؟!
:- لا خالة الشغل مايموت، واذا ايدها هي سباعية
:- مو تغسلچ فراش! آية گولي شنو چنتي تسوين؟
آية ارتبكت..
:- عادي خالة بيت ابوي هذا...
گاطعتها..
:- لا مو عادي،ايدها مخيطة وانتِ جنابچ مخليتها تغسل فرش؟
:- ما غصبتها هي اجت ساعدت
:- اي اكيد مو غصب! من الخجل سوتها
:- والله انه گتلها لا هي اصرت
:- لا تحلفين ولچ
لوحت بيدها بعصبية، طار شوية تفال من حماسها بالحچي..
:- خالة هدي اعصابچ، هسة شصار خياطها انفك؟
:- لا والله تنتظرينه ينفك يلا تفكين منها
:- يابويه خالة منو وازاچ عليَّ اليوم
:- عمايلچ وازتني، وانكسر خاطري على هالبت المسكينة، امانة خالها زوجها يمكم
:- واحنه محافظين عليها، ترا هي بتنا
:- صار عدها زوج وعيال، مو من حقچ تسويها خدامة
:- وشبيها اذا خدمت بيت ابوها واخوانها احسن من الغربة
:- حسبي الله عليچ يامرة، والله لو محافظين عليها چان مو هيچ حالها
:- خالة انتِ ظالمتني بحچيچ
:- انه ظالمة هنوووب وانتِ مظلومة؟! تدرين شكثر خفت عليها من لگيتها ترجف؟
:- ترجف؟
:- اي ترجف وخايفة وتبچي
:- وليش بلا؟
التفتت ام جاسم بسرعة لآية، هزت راسها بخفة، تذكرت مالازم تحچي..
:- من التعب والخوف والضغط خطية وايده تاذيها ماتحسين؟!
:- خالة تره مدللة عدنا
:- اي مدللة، وحتى تاكل عنب وهي نايمة وتهفين عليها
:- والله مدللة خالة شبيچ
:- لا والله خوش دلال
:- خالة شبيچ هسة
:- اسكتي خلي احچي" اشرت بصبعها بتحذير" من اليوم اذا شفتيها تعبانة ترتاح وماتشتغل
:- زين وبعد
:- ايدها تأذيها لا تخليها تغسل ولا تشيل شي
:- خوش خالة ادللي
:- واذا اجتكم مرة ثانية بهالحالة وخليتوها تشتغل" رفعت ردانها وعدلت عبايتها على راسها" والله العظيم اجي بنفسي اغسل الفرش فوگ روسكم
:- خالة استغفري الله، صارلچ ساعة لازمتني مابقت رزالة بعد طگيني
:- لأن انقهرت عليها يتيمة ومكسورة خاطر
:- وانه ضاربتها هسة
:- هذا الناقص" دارت لآية" وانتِ لا تسكتين على روحچ بكلشي
:- ان شاء الله خالة
:- واذا احد تعبچ تعاليلي ادبه لزمانه
مرت ابوها ظلت تحرك بوزها يمين يسار باستهزاء، شوي بقت ام جاسم سوتلها آية چاي شربته وراحت.
بقت آية تفكر بتيجان وخايفة من عمها، وماتابت مرت ابوها خلتها تسوي العشا وياها، ما گالت لا ، تشتغل الف شغلة بس مايجي عمها.
خلصوا عشه وغسلت اماعين ويه خالتها، بس تفكيرها كله يم تيجان، تمنت يجيها قبل لا تنام هنا وياخذها.
بس ما صارت ونامت بيت اهلها، بس حشرت نفسها بين اخوتها حتى خاف يجي عمها، ظلت للصبح بين نايمة وگاعدة ما مرتاحة.
گاعدة بالصالة وضايجة، گبالها حليب وخبز، ماحطت لگمة على لسانها، ابوها يريد يطلع للشغل، وگفته.
:- يابه اگدر احاچيك؟
:- هاا شنو بسرعة عندي شغل
ترددت..
:- هاا لا ماكو شي الله يحفظك روح لشغلك، انه يمكن اروح يجيني تيجان اذا اجيت مالگيتني
:- الله وياچ سلمي عليهم
فرحت اول مرة ابوها هيچ يصير، طلع من الباب، ومرت ابوها استلمتها شغل، اجتها ام جاسم تشوفها.
وهمين شبعت مرت ابوها رزايل، بس مايفيدها، وهم گاعدين هي وام جاسم يسولفون، اندگ الباب.
آية فزت من مكانها..
:- الباب خالة
مرت ابوها..
:- گومي شوفي منو
ام جاسم :- استحي على ويهچ رجلها طلع شيگول تطلع للبيبان مرتي؟
مرت ابوها تأففت..
:- حسن
حسن :- هااا يمه
:- وسم الحسن تعال افتح الباب
ام جاسم گامت..
:- انه اشوفه عيزانة من روحها
راحت للباب وطلع تيجان جاي على البايسكل..
:- السلام عليكم
:- وعليكم السلام وليدي آمر
تيجان مايباوعلها..
:- مايأمر عليچ خالة ممكن تصيحين آية
:- يااااا انتَ زوجها، تعال يمه ادخل ادخل
:- لا خالة خل تجي آية نروح، ماگدر اطول عدنا فاتحة
لطمت صدرها..
:- يمه دخيلك ربي منو توفه عدكم
:- قرايبنا اسم الله عليچ توفت بجلطة بالقلب
:- ياااء ياهو خل اروح للفاتحة؟
:- قرايبنا ابو رضا تعرفيه؟ مرته انتقلت لرحمة الله امس المغرب
:- انا لله وانا اليه راجعون، البقية بحياتكم ابني، هسة اصيح مريتك
:- رحم الله والديچ خالة
راحت صاحت لآية ماصدگت سمعت ام جاسم گالت يمه رجلچ، طارت لبست عبايتها ودعت مرت ابوها وراحت.
رغم اصرار مرت ابوها يظل للغدا ماقبل گال عدنا عزاء، طلعوا راحوا، يمشون ببطء بالطريق، لازم البايسكل من المقود وهي بصفه.
:- شلون صارت ايدچ هسة؟
:- احسن الحمدلله
:- بعدها توجعچ؟
:- اي كلش توجعني
:- لا تجهدينها وانتبهيلها لمن تطيب
:- ان شاء الله، صدگ منو توفه؟
:- ام رضا مرت ذياب
شهگت قوي..
:- لااا يالله خطية
:- الله يرحمها
:- شبيها؟
:- انجلطت امس المغرب
:- يا ربي والله خطية
:- كلنا على هالدرب، محد خطية هذا يومها
:- بس زوجها واولادها خطية، الله يصبرهم
:- الله يصبرهم اي والله
سكتوا شوي وهم يمشون، وهي كل شوي تباوعله وهو يباوعلها ويبتسم بخفة، آخر ابتسامة طلعت اسنانه.
مد ايده لجيب دشداشته، طلع وردة صفرا زغيرة..
:- هاي الچ
باوعت للوردة وعيونها توسعن..
:- ياااا صدگ؟
:- اي صدگ شبيچ؟
:- والله الي؟
:- لا للبايسكل
ظل يضحك، وهي ابتسمت بخجل..
:- لا صدگ الي؟
:- اي الچ چا لبيبتي
اخذتها وهي تبتسم..
:- تجنن شكرًا
:- شكرًا شنو؟ تره ما جايب ذهب
:- هههههه بس همين حلوة، احلى من الذهب
:- شلعتها من الشارع لگيتها بطريقي
:- ههههه عادي اعرفها هذا ورد ابو فسيوه
:- اي هي لو اكو احلى اجيبلچ
:- امممم حبيتها
غمزلها..
:- لهذا جبتلچ ياها
خجلت..
:- شحلاتها
:- مو احلى من الشايلتها
:- تيجاااان!
:- نعم
:- لا تخجلني
ظل يضحك..
:- شبيچ خجلتي شگلت؟
:- لا ماخجلت
:- لا ماخجلتي شلون ووجهچ صار احمر؟
:- مو احمر
:- لا والله احمر
:- لا مو احمر
:- چا شبيه؟
:- من الشمس
رفع راسه للسما..
:- الشمس وين والدنيا غيم
عبست بوجهه..
:- يعني لازم ترد؟
:- اي لازم
ضحكت غصب..
:- الله يساعدني عليك
:- ليش شمسوي هسة؟
:- دوم تشاقيني، وصاير وكح
:- ههههههه لأن حلوة سوالفچ من تستحين
غطت وجهها بالوردة..
:- بسسسس عاد
:- لا بعدني ما بديت اصلًا
:- تيجاااان!
:- عيونه؟
هنا سكتت وماعرفت شتگول، ابتسم وهو يباوع للطريق، شوي ودار عليها.
:- الچ وحشة آية
باوعتله بخجل..
:- صدگ؟
:- اي والله، ما توقعت مكانچ يبقه فارغ هيچ
:- صدگ؟
:- اي موتيني بهالكلمة
:- اسم الله عليك
:- والله الغرفة فارغة، البيت شايلته شيل وياچ، كلها سألت عليچ
:- ليش؟
:- لأن تعودنا عليچ
:- والله؟
:- اي والله
:- حتى عمتي؟
تنحنح..
:- لا لهنا لا تسألين عنها
ضحكت بفطرتها رغم تعرف كرهها الها، تظن انها اذا كسبت گلبها راح تحبها.
:- شكو تضحكين؟
:- مادري
:- يلا خوش ماتدرين
:- وانه همين اشتاقيتلكم
:- شگد؟
:- هواي
:- هواي شگد؟
:- هواي يعني هواي
:- واذا اگلچ مشتاقلچ؟
:- تيجاااان!
:- عيونه
:- فدوة اسكت
:- ههههه هااا شبيچ استحيتي
:- والله ما احاچيك بعد
:- خوش لا تحاچيني
بعد شوي وهو يباوعلها بطرف عينه ويبتسم، وهي متوترة من نظراته ماتباوعله.
:- تيجان
:- هااااااا حچيتي ههههههههههههه
:- اوووه ما اقصد
:- لا تقصدين
:- لا
:- بله
:- لا
:- بله
:- لاااا
:- زين تعاي عبري البواري لا اطيحين بالنهر شگول ضيعت مرتي وغرگتها
:- هههههههههه
:- يطيح البايسكل يغرگ عادي، بس مرتي لا
:- خوش تضحية والله
:- ماعندي غيره اضحي بيه
:- هههههههههه
:- يدوم الضحكة وراعيتها
ظل يباوعلها وهو مبتسم وهي تضحك، مشوا بطريقهم وهم سعداء واحد بالثاني.
:- صدگ آية سؤال
:- جواب
:- الذهب اللي چنتي لابسته بالعرس وين راح ماتلبسينه؟ ماشوفه؟ لو لأن چان محرم
:- هااا سيد ليش تسأل تريد تبيع ذهباتي
:- اعوذ بالله من ظن السوء، يابه اسأل لأن ماشوفچ تلبسينه
:- هاي ما چان ذهبي كله لمرت ابوي
:- چا وانتِ ماشتريتي ذهبات؟
:- لا
:- ليش والمهر وين راح؟
:- هااا اي اشتريت بيه ملابس
:- شلچ بيها آية ملابس العندچ حتى ماتساوي ربع المهر، لاحظت كلهن مو حلوات ومايسون، بس ماردت احرجچ
:- مو اي اشتريتهن بعد
:- شنو اشتريتهن بعد؟ شبيچ ارتبكتي؟
:- ماكو شي سد الموضوع
:- لا مانسده، وين وديتي المهر آية ليش ماشتريتي ذهب؟
:- مو والله مستحية
:- ليش تستحين احچي الحقيقة وماعاتبچ والله
:- ليش تسأل عنهن اكيد تريد تستفاد منهن؟
:- يابت الناس رجعتي لظن السوء!
:- چا شني ليش تحقق وياي
:- شفتچ ماتلبسين ذهبات حالچ حال اي عروس، گلت شني مانطيتها حقها معقول؟ ليش ممكن المهر قليل لو شنو؟
:- لا هو مو قليل والله اصلًا ماچنت احلم بهيچ حتى
:- چا شني وينه؟
:- ليش تسأل؟
:- اريدچ تتزينين مثل كل النسوان وتعيشين مدللة ومحد ينقص من قدرچ ويعايرچ رجلچ مايشتريلچ، والمهر حقچ مو من حقي اجي اخذه منچ بعد ماصار الچ، اللي تتبرع بيه لزوجها هذا من ذاتها بس اجبرچ تنطينياه لا ابدًا وروح ابوي ماسويها
:- والله مستحية منك تيجان، انتَ شخص ماكو منك ثنين
:- ليش تستحين مني گولي شسويتي بالمهر؟ واريد الحقيقة والله ما اعاتبچ والحسين
ظلت تعصر بيديها..
:- المهر اخذته مرت ابوي
انصدم..
:- شنيييي؟!
:- والله هي اخذته
:- كله؟!
:- اي وهي اخذتني للسوگ اشترتلي چم شغله وگالت خلصن
:- المبلغ يجيب كومة ذهب الچ آية! تدرين شيجيبلچ بعد؟ شنو ماخذته لچم قطعة ملابس قديمة ماتسوة وخلص؟!
:- اي والله هي گالت خلص وگلتلي خذيت منه للكروة وشغلات مافهم بيها
:- الله أكبر هذا خدااااع!
:- شعرفني والله ماعرف
:- شلون خدعتچ؟!
:- مادري ماعرف اتصرف بهيچ امور
:- لازم تتعلمين تتصرفين منا وهيچ وماتنغلبين
:- اسفة والله اسفة
:- لا تتأسفين الي على شنو؟!
:- لأني غبية وفاهية
:- لا تگولين هيچ، يفدنچ فلوس الدنيا، انه اعوضچ وعد ان ماخليتچ تسولفين عمر بدلالي الچ
ابتسمت..
:- فدووة بخت وطلعتلي انتَ سيد
ابتسم بخفة..
:- ويابخت السيد بهيچ گلب صافي ونقي
:- شعرفك صافي ونقي مو يمكن...
گاطعها..
:- اسمحيلي اگلچ انچبي آية، انه زلمة اعربي والزلمة العربي يعرف دروبه وين، ويعرف ناسه شنو ويعرف الصافي من الخابط
:- يعني انتَ ماتعوفني بيوم؟
:- ابدًا لا تفكرين بهالشي بيوم
:- چا ليش تركتني بيت اهلي البارحة؟ مو تدري بسالفتي؟
تنهد..
:- آه يا آية ماگدر انطي باهلي مهمى يكون، بس خفت عليچ من امي، مادري ليش لا تسأليني بس خفت وظليت بين هاي وهاي، وديتچ بس والله طول الليل اتگلب مانمت
:- سودة عليَّ
:- اسم الله عليچ من السواد، بس لازم تتعلمين آية ماتخفين عني شي، سالفة امي اعرف انتِ سديتيها
:- يعني مصدگني امك سوت هيچ بيَّ؟
:- اي مصدگچ
:- تيجان اگلك شي
:- گولي
- انتَ رجلي ولازم اگلك، بس ماعرف شلون اگولها
:- گولي اي شي لا تخفين عني،گتلچ انه ستر وغطى الچ، وافهمچ وماحكم قبل لا اسمع عدل
:- انه... انه... عمي...
وگف فجأة وفز گلبه..
:- شبيه؟
توترت وخافت من ردة فعله..
:- اجه امس و...
:- وشنووو آية احچي تعرضلچ؟!
:- اي
:- اياااااااا كلب يانگس دهر الدهرك ياملعون، هذا شنو من حليب راضع حتى حليب الچلاب مايربي هيچ نگوس
:- لا تعصب والله مالي ذنب
لزم راسه بيد وحدة..
:- ماعصب عليچ، استغفر الله
:- اسفة ضوجتك بس لازم اگلك، بعد لا تاخذني ولا تخليني هناك ابدًا تيجان ابدًا
:- والحل تظلين هيچ خايفة وساكته؟
:- چا شسوي شبيدي؟
سكت واشرلها تمشي، ظل طول الطريق شارد الذهن ومايحچي، تحاچيه مايجاوب، كلش خافت وضاجت، ندمت حچتله.
ماتدري هو يفكر شلون ينهي هالموضوع ويحطله حد نهائي لهالعار.
وصلوا البيت شافت حروب والبنات جاي يلبسن جواريبهن، لابسات عبي ومتشحات بالسواد، حروب وجهها احمر وشامية، مبين باچيات.
آية :- السلام عليكم
البنات ردن السلام.
شامية طفرت شبگتها..
:- هلا آية ولچ البيت مو حلو بدونچ
آية :- ياروحي فدوة انه هم افتقدتكم
حروب صوتها مبحوح..
:- شني شخبارهم اهلچ
:- زينين، رايحين الفاتحة؟
حروب:- اي ترحين
تيجان :- اي اخذوها وياكم، بس مو ترجع بحدها، كومة زلم عالشارع
شامية :- وراح ياكلونها
:- اي ياكلونكم، الحچي الكم كلكم رجعن ويه امي، مو اشوف وحدة تروح وتجي من بيتنا لبيت ابو رضا كل شوي
حروب :- حبيبي شبيك عصبي ياروحي منو غاثك؟
:- محد غاثني، يلا اخذوا آية وانه واگفلكم بالباب
حروب :- خوش بس مانسه نبرتك ماعجتني، تگلي شبيك بعدين
عافهم وراح گعد بالباب وياهو يعبر من الزلم يسلم عليه، باوع للبناء اللي گبال بيتهم، راعي البيت اليوم وگف عماله احترام لعزائهم.
شوي وطلعن البنات، مشه وياهن وهو يباوع يمين ويسار ويمشي گدامهن مثل درع الهن، وكأنه يگول الزلمة البيه حظ خل يباوع لخواتي ومرتي.
يوم ويومين والثالث وخلصت الفاتحة، الولد بالهول گاعدين يتشاقون ويضحكون، آية گاعدة بعتبة غرفتها ونظرات عتبار ماتبشر بالخير.
تيجان طلع فلوس من جيبه يحسب بيهن، رفع راسه لاخوته يباوعون عليه.
رشاش:- شنو هاي الفلوس؟
تيجان بالشقه..
:- اريد اشتري بيهن بيت
رشاش :- هههههههههه بيت بهذني؟
:- اي بهذني
علي الزكي :- خويه بهذني تشتري كاشية وحدة
شرار :- لا كاشية شنو، هاي الفرشة اللي تنحط بالباب
يوسف :- لا فرشة ولا كاشية، تجيب چرچوب الباب والباب لمن الله يفرجها
رشاش :- هسة شگد هذني
تيجان :- مالك شغل
رشاش :- گلي حتى نحلم وياك
يوسف :- اي بلا شگد يمكن تاخذلنه بيت بصفك لو زادن
رشاش :- ياخذلك گبر بصف البيت لو بالنجف
خنجر :- هن غير حتى گبر مايجيبن
علي الزكي :- حتى الموت صار بفلوس
شرار :- اي والله الدفنة وفلوس السيارة للنجف تحتاج ثروة
رشاش :- اسكتووووا يمكن يگدر يشتري غرفة
عقيل :- غرفة شنو؟
رشاش :- غرفة دجاج
يوسف :- لا بيت مال طيور
خنجر :- عفية يجيبن قفص بلبول، انطيني اياهن اجيبلك احلى قفص بلبول
تيجان :- والبلبول منين من گمل راسك
خنجر :- نصيده من البستان
رشاش :- هو يريد بيت يعيش بيه مو تحقق احلامك بيهن
عقيل :- وقفص البلبول يعيشون بي هو ومرته
تيجان :- حتى چفيتي ماتكفيها
رشاش :- چا توكل وزعهن علينا
تيجان :- شني ورث مخلفكم وناسيكم انه
رشاش :- خويه غير انتَ الچبير
تيجان :- ساعة السودة الصرت بيها الطرگاعة
رشاش :- يلا لا تزعل حبيبي انطيني الفلوس واحطهن الك يمي بامان
تيجان :- وجيبي مزروف
رشاش :- لا خاف تصرفهن اضمهن الك ليوم الاسود
تيجان :- لا إله إلا الله مفاولني باليوم الاسود
يوسف :- لا تزعل لاااا
تيجان :- مازعلان
يوسف :- بله زعلت
تيجان :- مازعلت على شنو
يوسف:- بله علامات الزعل هاي
تيجان :- گوة يخلوك تبيع الجدر
رشاش :- اذا فافون يشتري ابو العتيگ
خنجر :- تيجان يلا يفيدك البلبول يونس مرتك
تيجان باوعله بنص عين..
:- يونس مرتي چا بس بالبيت
عقيل :- بعد اخوك محتاج نعال ماعندي
يوسف :- وانه جوعان بداعتي لفات فلافل
شرار :- وانه الطحال تعبان وياك ببسي
تيجان :- چا الببسي يعالج الامراض
شرار :- لا ينظف الكبد خخخخخخخ
تيجان باوع لعلي الزكي..
:- وانتَ كلياتك محتاجات غسل؟
علي الزكي طلع سنونه..
:- لا بس اكو كتاب اريد اشتري
تيجان باوع لرشاش :- وانتَ شناقصك؟
رشاش :- لا بس اريد اعرس بيهن
كلهم طگوها ضحكة تماطلوا سوية حتى البنات.
تيجان :- ما يجيبلك حتى بنطرون القاط
علي الزكي :- يبقه القميص على خنجر، والسترة على يوسف والحذاء على ابوي
رشاش :- دبرنا القاط والعريس موجود والمهر شلون
يوسف :- مهرها قرآن كافي الناس تشتري الزلمة
علي الزكي :- عندك اخلاقك كافي
رشاش :- حچي يفيدكم الاخلاق ماتوكل وتشرب، الزلمة عيبه جيبه
علي الزكي :- هاي الحال الحمدلله والشكر، الفقير هو فقير الاخلاق والدين
سيد أكبر :- عفية عليك ابني، مرات البركة تجي ويه المرة، هسة تيجان ابني اتزوج آية والله فتحله ابواب، الحمدلله جيبه مافرغ، والحمدلله راح يكمل دراسته، ويارب بحق محمد وآل محمد يوفقكم كلكم، جدكم رايد يزوجكم سوية بس راح يعيد بناء البيت هذا اول حتى كل واحد وغرفته
رشاش :- صدگ يابه احلى خبر، صدگ وجه مرت اخوي خير علينا
عتبار :- اي ينگط خير بحيث ماظلت مصيبة ماصارت، اول ما...
سكتت ماكملت، سيد أكبر هز راسه بقلة حيلة..
رشاش ظل يباوع لايدين تيجان..
:- يااااع وين راحن الفلوس
تيجان :- شلتهن شتريد منهن بعد
رشاش :- بس چم ورقة منهن
يوسف :- يمعود اذا تاخذ منهن تخرب خارطة البيت مالته
شرار :- اي ينقص الحمام
كلهم انفجروا ضحك..
رشاش :- هذني صارلك شگد تجمع بيهن
تيجان :- هواي
شرار :- وتالي لو رحت لابو البيت يطلع ناقصك ملاين
رشاش :- ازرعهن بالبستان
يوسف :- اي يمكن يطلعنه بيوت مو واحد
علي الزكي :- لا يمكن تطلع شجرة وتحصد ثمرها فلوس
شرار :- يطلعلك نعال لاستيك مال بيبيتي ضايع بالبستان من 15 سنة
تيجان شمر المخدة عليه.
شرار :- يااااابه اعتدى عليَّ
تيجان :- اي اعتداء مسلح
رشاش :- الشاهدين هواي
علي الزكي :- والمجني عليه ينزف
شرار لزم صدره..
:- اخخخخ وصيتي اريد اوصيها قبل لا اموت
رشاش :- هااا عندك ورث
شرار :- لا عندي لباس مزروف خل تخيطه امي
اجته دفره من رشاش.
رشاش :- صدگ شوكت ناوي ترجع للدراسة؟
تيجان :- عالسنة الجديدة غير، اقدم خارجي
رشاش :- الله يستر بس
تيجان :- ان شاء الله خير
رشاش :- اذا جبت معدل شناوي تصير؟
شرار :- دختوور لو ثور
تيجان :- انچب لا على عينك
شرار :- اي مچذب هاي خيارات الحياة
يوسف :- لا صدگ شتصير دكتور مهندس لو شنو؟
تيجان :- حسب المعدل
رشاش :- والله على شغل البستان اظن معدل عشرين ماجيب
تيجان :- لا ان شاء الله اجيبه
علي الزكي :- ان شاء الله
يوسف :- خطية ظلمته خليها 30
رشاش :- 30 شيصر هاي؟
شرار :- طواطة اسعاف
كلهم انفجروا ضحك.
تيجان :- انچب لك شني طواطة اسعاف
شرار :- هههههههه مادري هيچ طلعت وياي
يوسف :- لو تظل ساكت احسن
عقيل :- اظن تيجان يصير فد شي
شرار :- بمعدل 30 يصير حارس تواليت
تيجان :- والا اخليك تسويها على روحك ومادخلك اله
كلهم ماتوا ضحك..
شرار :- ههههههه لا بروح امي، يلا خل نرفعها شوي حارس بيت جدي
رشاش :- ههههههههههه يجي جدي تگله هويتك، يگلك بيتي سيدي
يوسف :- هههههههه وتگله ممنوع التزوير، جيب صاحب البيت، يگلك انه صاحب البيت
خنجر :- ويگله اثبتلي، وجدي يخبزه بعوچيته على ظهره
شرار :- ههههههههههه ويگول هااا هاي انتَ جدي عرفتك من كفخاتك
تيجان :- هسة اكسر روسكم كافي سفاااهة
عقيل :- عصببب الدكتووور هههههههههههه
شرار :- لا حارس التواليت
ماگام وتعب روحه بيه، جراه من يمه وخبزه وهم يضحكون.
سيد اكبر وهو يسبح بسبحته..
:- يابوية الضحك زين، بس لا تخلون العمر كله سوالف وضحك
سكتوا كلهم ونزلوا روسهم.
كمل حچيه..
:- الإمام الصادق عليه السلام يگول، إياكم وكثرة الضحك فإنه يميت القلب
مو معناها الواحد يصير عبوس طول عمره، لا اهل البيت عليهم السلام چانوا يبتسمون ويمزحون، بس مو يصير هم الإنسان همه كله لغو وسوالف فارغة
تيجان هز راسه..
:- صدگ حچيك يابه
سيد أكبر :- الدنيا تمشي بسرعة يابوية، اليوم شباب وباچر رجال وعندكم مسؤوليات واهالي وذرية، لا يروح العمر كله حچي وما يظل للواحد شي يذكر بي الله
علي الزكي :- صحيح يابه، مرات الواحد يضيع ساعات وما يحس، هذا كله من عمرنا
سيد أكبر :- اي بوية وامير المؤمنين عليه السلام يگول، إذا تم العقل نقص الكلام، يعني الإنسان كلما نضج وصار اعقل، صار يحسب لكلامه حساب
خلي الواحد منكم يتعلم شي ينفعه، يقرا او يدرس، يذكر الله حتى يبقى اله اثر بهالدنيا
مو معناها لا تحچون لا، بس خلي للكلام وزن كلمة تنفع اخوك، نصيحة، علم، ذكر لله، صلة رحم، هاي تبقه للإنسان
تيجان :- احسن حچي والله
سيد أكبر ابتسم..
:- شوفوا علي من يگعد يقرأ كتاب يفيده، وشوفوا تيجان يريد يرجع للدراسة، هاي سوالف تبني الإنسان
علي الزكي :- الله يوفق الجميع يابه
:- آمين بوية ومو واحد احسن من واحد، كلكم خير وبركة، بس اريد اشوفكم رجال ينفعون نفسهم واهلهم ودينهم
تيجان :- ان شاء الله يابه يديمكم خيمة النا
:- الله يوفقكم بويه اضحكوا وامرحوا، بس لا تنسون ليش رب العالمين خلقكم
علي الزكي :- صدگ مرات الواحد يحتاج يسمع هيچ حچي حتى يراجع نفسه
رشاش :- اي والله صدگ
شرار :- هي الدنيا شنو شفنا منها بويه، غير الصگع والرگع، اشو لا شفنه غرور الدنيا وملذاتها، ولا عشنا برفاهيتها، اللگمة مرات حسرة علينا
سيد أكبر :- الحمدلله على كل حال، عدنا هواي اشياء الله ناطينه، ام اب، اخوة واخوات، محبة بيننا، سگف، اخلاق، صحة وعافية، ولو أخذ جزء منها بس الحمدلله على كل حال
شرار :- بس معقول انخلقنا بس للعذاب بهالدنيا؟
:- لا بوية رب العالمين ما خلقنه للعذاب، الله سبحانه يقول ﴿وما خلقت الجن والإنس إلا ليعبدون﴾
:- چا ليش كل هالتعب بيها؟
:- لأن الدنيا مو دار جزاء، الدنيا دار امتحان، الإمام علي عليه السلام يگول، "الدنيا دار ممر لا دار مقر"
:- شنو يعني؟
:- يعني مثل واحد داخل امتحان، يتعب ويصبر ويتحمل حتى ينجح، مو معناه المدرسة تكرهه، بالعكس تريد تشوف شگد يتعلم ويثبت نفسه
:- بس اكو ناس حياتهم كلها وجع
:- واكو ناس وجعهم بالدنيا سترهم من وجع الآخرة، الإمام الصادق عليه السلام يگول، "إن عظم الأجر مع عظم البلاء"
:- يعني كلشي محسوب؟
:- حتى الدمعة محسوبة، وحتى الصبر محسوب، وحتى الوجع اللي تكتمه بگلبك الله يعلمه، الله مو ظالم حاشاه حتى يضيع تعب احد من عباده
:- زين واللي ما شاف خير بالدنيا؟
:- اذا ربه راضي عنه، يشوف يوم القيامة من الخير ما يخليه يتمنى يرجع للدنيا كلها، المشكلة مو شگد تعبت المشكلة شلون تطلع من هالدنيا
:- الله كريم يابه
:- كريم وارحم الراحمين وحتى ارحم بينه من امهاتنه، بس الإنسان لا يقنط من رحمة الله مهما ضاقت بيه الدنيا.
كلهم سكتوا وبعد شوي اطشروا، راحت حروب وهي ضايجة يم آية وسولفتلها كلشي بالتفصيل شصار بيت اهلها.
كلش ضاجت حروب عليها، فوگ ما قهورة على ام رضا ماتت بسرعة هيچ، وفوگ قهر سالفة الحلال مال جدها مأرقتها.
بغرفة آية وتيجان..
تمددت حتى تنام سحبت البطانية مالتها، اللي تنام بيها بحدها وتغطت.
:- تصبح على خير
:- وانتِ من اهله
متعودة ينام بعيد عنها مثل كل ليلة، بس هالمرة حست بحركته قريب منها شوية.
التفتت باستغراب..
:- تيجان شبيك؟
:- ماكو شي
:- لا اكو
:- بس جاي افكر بيني وبين نفسي
:- بشنو تفكر؟
حست بيده تلامس ايدها بلطف، رجفت شوي من المفاجأة.
:- تيجان
:- نعم
:- شتسوي؟
ارتبك وضحك بخفة..
:- ولا شي، هاي ايدچ لو مو ايدچ؟
:- چا شني رجلي
ضحك اكثر..
:- زين آسف
سحبت ايدها بخجل، ظل ساكت ويبلع بريگه مايعرف شلون يبدي وشلون يطمنها، بس هو صارله فترة يحاول يكسب ودها.
:- آية
:- نعم
:- بعدچ تخافين مني؟
بلعت ريگها..
:- مادري
تنهد بخفة..
:- لهالدرجة ما مطمنتلي؟
:- والله مو منك
:- ادري والله ادري، مرات احس كل الدنيا اذتچ لدرجة حتى من واحد يريد يقربلچ بحنية تخافين
ظلت ساكتة وماتعرف شتگول..
:- آية
:- همممم؟
:- لازم تعرفين مستحيل اجبرچ على شي ما تردينه
:- ادري بيك
:- ومستحيل اسوي شي يضوجچ
:- اعرف
:- زين ليش كل ما اقرب متر تبعدين مترين؟
:- ما جاي ابعد
:- لا تبعدين
:- لا والله، انه... "غطت وجهها بالبطانية بسرعة" نام أحسنلك
:- ها شفتي وبعدين تگولين ما استحي، انه زوجچ تره
:- ايي اعرف
:- ومستحية مني لهسة
:- تيجااااان عوووفني!
ظل يضحك، بهدوء اخذ ايدها وحطاها بين ايديه، هالمرة ما سحبتها ظل لازمها.
:- تصبحين على خير
همست..
:- وانتَ من اهل الخير
ثنينهم غمضوا وهاي خطوة صغيرة لا اكثر، الليلة البعدها صار يسولف وياها اكثر وانتهت بلزمة ايدها من جديد، وياها قبلة ناعمة على ايدها.
گلب اية صار مثل الميل يروح ماشي ماتگدر توگفه، ونبض بكل حيله اله.
والليلة الثالثة صار يقرب اكثر، والرابعة اقرب والليلة الخامسة صارت حضن، ومضت الايام وتطورت السالفة، الى ان خلاها تحس بالامان وياه.
فتح الباب ودخل، اجه يمها..
:- ايدچ شلونها
:- زينة
راحلها يريد يحضنها، صار مقابل الها وبوجهها يظل يباوعلها بالضوا الخافت، ساكت وهي خجلت وتوترت.
عدل بخصلات شعرها وخرها عن وجهها بصوت اشبه بالهمس..
:- سبحان الخلقج
وصلت حدها بالتوتر وماتعرف شتگول وشتسوي وين تضم وجهها وهو بوجهها، دارته تباوع لاي شي بس مو بوجهه.
ظل يباوعلها والابتسامة ما فارگت وجهه..
:- آية انتِ عاجبتني هواي
ظلت ساكتة دار وجهها وخلاها تباوعله، بس رجعت دارت ظلت ترجف من المستحه.
:- لا لا شني خلي احچيها، من گلت عاجبتني حسيت ظلمت الحچي، شنو عاجبتني؟ إلا انه عاشگچ آية، انتِ اول عشگ بحياتي
حست خدودها شعلن نار ماتدري وين تباوع..
:- لا تحچيي هيچ
:- ليش؟
:- والله استحي
نزل راسه عليها وباس خدها بخفة..
:- كلما تستحين ابوسچ
شهگت بخجل..
:- تيجااان!
:- احچي الصدگ آية
:- شنو احچي؟
:- شنو انه بالنسبة الج؟
عضت شفتها..
:- ماعرف
:- إلا تعرفين
:- والله ماعرف
باس خدها الثاني..
:- وهسة؟
ضحكت بخجل وهي تدفعه..
:- لااا عوفني
:- اعترفي
:- شبيك عليَّ الليلة؟
:- اريد اسمعها منچ
:- استحي
:- اعتبر تردين ابوسچ اكثر
غطت وجهها بيدها..
:- لااا والله
ضحك وهو يبعد ايدها عن وجهها..
:- چاااا يلا احچي
:- تيجااااان!
:- عيوني
:- لا تباوعلي هيچ
:- شلون؟
:- هيچ
:- شلون هيچ؟
:- هيچ يعني هيچ
ظل يضحك..
:- آية والله راح اموت قبل لا تعترفين
باوعتله ورجعت دارت..
:- انه همين...
:- شنو انه همين؟
:- همين...
:- آية!
:- يبوووو هم استحي
انفجر ضحك..
:- يلا كملي اسمعچ، اذا تردين اغمض واحچيها
ظلت ساكته وظلت تباوعله وهو كذلك وينتظرها بصبر، همست بخجل وتنهدت بقوة وكأنها داخلة معركة.
:- انه همين... همين احبك
سكت وظل صافن بيها..
:- تيجان
:- عيونه وروحه
:- شبيك؟
:- عيديها
:- لا لا
:- آية
:- لا استحي
:- فدوة
:- لا لااااا
:- مرة وحدة
ضحكت وغمضت عيونها..
:- احبك
:- والله! شگد؟
:- مادري، وانتَ؟
:- انه من زمان ضايع بيچ، بس هسة حسيت الدنيا كلها صفت بوجهي، وحتى صار بلساني طعم طيب
ضحكت بخجل..
:- شنو يعني
:- يعني هيچ طعم كاستر او فراولة؟ لا لا حتى گمت اشم ريحة ورد، يعني حالتي مو صعبة؟
:- هههه هاي عطري
:- اطيب عطر بالدنيا، آية ما تشاقة انه احبچ مو لأن مرتي ومودة بيننا، ولا اگولها حتى يتم زواجنا بس انه احبچ وبعد احبچ وهمين احبچ
:- اصلًا من زمان...
:- شنو من زمان؟
:- انتَ بداخل گلبي، حتى قبل لا...
غطت وجهها بخجل، ظل يضحك ويوخر ايديها، ورجع باسها بخدها بلا شعور، وهي تضحك.
:- تيجان؟
:- روحي
:- لا تضحك عليَّ باچر
:- على شنو؟
:- اذا تذكرت شگتلك
نام بصفها وحضنها بحنان..
:- لا والله هاي الكلمة راح اخليها بگلبي العمر كله
سكتت وظلت تتنفس بالگوة من حست بيه يدفن وجهه بشعرها، ما مرت إلا دقايق مد ايده ببطء يريد يطمنها ويقربلها.
فجأة شبحت عيونها تراجعت ليورا بسرعة وكأنها شافت شبح او جن.
:- لا لا تلمسني لااااا ماريد
:- آية شبيچ ما اجبرچ؟
هزت راسها وهي ترجف..
:- لا لا لا تقرررررب!
:- آية شبيچ؟
ارتبكت وصارت تبچي..
:- وخر عنييييي! ماريد! مارررررريد! إلا اگلهم عليك
وگف مكانه مصدوم..
:- آية انه تيجان
:- لاااا! لاااااا! "سدت ذاناتها بيديها" لا تلمسني! لا تلمسني!
:- آية باوعيلي، محد يأذيچ بعد
:- وخرررررررر! الا اگول لابوي عليك!
انكسر صوته وعيونه دمعت..
:- آية انه...
ماگدر يكمللها لأن مرعوبة وخايفة، صايرة بيها رهبة وهاي التصرف طبيعي بالنسبة للمرت بيه.
گلبي انكسر عليها، حاول يهديها بدون مايقرب بس ما سمعته، بسرعة ركضت للباب، طلعت من الغرفة وهي تبچي.
ركض وراها بخوف..
:- آية! آية! لا تطلعين هيچ! آية! رجعي
بس كأنها ما تسمع شي، ركضت للحوش وللحديقة، هناك گعدت عالتراب، حضنت رجليها وهي ترجف وتبچي وتشهگ وتباوع للظلمة برعب.
تيجان وگف بعيد عنها يخاف يقرب منها ويصيرلها شي، حرفيًا انرعب عليها بهالموقف لا تتخبل، حتى ماگدر يحچي شي.
بس يباوع عليها وكل كلمة حب چان يريد يگولها اختنگت داخل صدره وماطلعت، واول مرة يفهم حجم معاناته وخوفها، والمرت بيّ صعب.
ومهمى حاول يعوضها راح يبقه عايش داخلها للأبد وماتنساه، عيونه دمعت عليها.....
**
"حروب"
گاعدة بالحديقة بيدي كتابي، اباوع المكان فارغ، ماكو ولا بزونة من بزوناتي، الجو كئيب وماخذني بكآبته، رغم ضحكاتي دوم ماتنقفل.
بس اليوم مقفلة وبعدني مصدومة بموت ام رضا، من شفته حزين عليها ماگدرت ماحزن لحزنه، ولا هي تنسي ام رضا مرة طيبة.
دخلوا الولد جاين من البستان، التفتت لضحكاتهم، ابتسمت على ضحكتهم، رغم الحال والظروف ماتختفي ضحكتهم.
ياربي بحق محمد وآل محمد لا تفرقهم وادوم عليهم الرضا بكل الاحوال، وتخليهم دوم گلب واحد، يستحقون كل خير اخواني.
باوعتلهم بحب واحد ينزع جزمته والآخ يغسل طين رجليه جوه طرمبة الدرام، والثالث يغسل وجهه، رشاش يشيل طين من رجله ويشمره عليهم.
تيجان :- وصخ غسل وخلصنا
رشاش :- ولكم لازگ الطين شيطلعه
يوسف :- اي كافي تنكت علينا
رشاش ينكت عناد..
:- شبيكم مو بيدي، ايديه تنكت بكيفها
تيجان :- هسة امرغ راسك بططين رجليك
رشاش :- شبيك ماتتحمل شقه
يوسف :- يشمر طين علينا ويگول شبيكم ماتتحملون
رشاش :- ههههههههه هاكم
نكت عليهم كومة ماي طين، تيجان ويوسف لزموه ثنينهم واخذوا من طين رجله لطخوا بوجهه وهو ميت ضحك، علي الزكي سكر من الضحك.
خنجر :- شيلوه وشمروه بالحديقة
شرار :- اي ولطخو شعره بالطين زين للشعر ههههههههههههههه
رشاش :- لا خليكم زلم عيب سوالف الجهال! ولك تيجاااان!
شالوه كلهم كل واحد لازم طرف منه، وشمروه گبالي گعد يباوعلي، اختنگت بالضحك، اخذ صمة تراب وشمرها عليَّ.
:- ههههههههههههههه يمه ههههههههه يمه بطني باوع وجهك كله طين! يمه متت
رشاش ابتسم..
:- دوم الضحكة حربيتي
اجه لطخ وجهي طين وانه اصيح واضحك سكرانة ضحك، اجوي كلهم جروه عني، مسحت الطين عن وجهي وبعدني اضحك.
رشاش :- زين للبشرة الطين
:- يممممه يمممه ههههههههه بس مو طين رجلك طامس بخيسة البستان
رشاش :- ولچ طين المشروب مو الساگية هههههه
عقيل :- اخذنا حمام طين اليوم كلنا سبحنا بالطين
:- جاي تسگون البستان سمعت صوت المكينة
تيجان :- اي وين آية؟
:- يمكن نايمة بغرفتها چانت نعسانة مساع
رشاش :- والله وكت صار عنده مرة ويسأل وينها
:- انتَ همين تزوج واسأل عن مرتك
تيجان :- هي تسأل عليه مو هو
رشاش :- انه ما اسأل عليها اصيرلها ماي، هي وينها آخ اجيتوا عالجرح هسة
شرار :- دگوله ربابه العاشگ
يوسف :- دگوله عود احسن
علي الزكي :- حطوله ملا عطية، لو باسم الكربلائي
رشاش :- مو طگت روحي اريدهااااااا راح اروح انتحر بالساگية اذا ماتزوجتها، هدوني اگلكم عوفوني ولكم
تيجان :- ياهو كاضك بس الهوا
شرار :- روح انتحر بطحالب العگاريگ
رشاش :- بس خاف اموت هههههههههه
خنجر :- هسة تنخطب من جديد وتروح عليك
يوسف :- روح اخطب وانتَ حافي منتف، روح خويه والهوا بظهرك
رشاش :- طاح حظك عبالي انتَ بظهري
علي الزكي :- انتظر بس خلي يبنون بيتنا واخطب
رشاش :- بگملي اجمعلها مهر، منيييين إلا ابيع كليتي
شرار :- لا بيع الأحم احم
رشاش :- انچب لك چا بعد منين تصير ام
كلهم طاحوا من الضحك، من فهمت فد استحيت.
:- صايرين وكحين وادبسزية اشوف اخواني انحرفتوا
خنجر :-كله من ورا سلطان وهزيل
تيجان :- انچب لا تستغيب الوادم
رشاش لزم گلبه..
:- اخخخخ اهل النسب العزاز اخوان العزيزة
تيجان :- صاير كلش خفيف
رشاش :- اي ريشة العشگ يخليك تستخف
:- يلا غسلوا احنه بالحوش وبالشارع ينسمع ترا، هسة يعبر واحد يسمعكم
رشاش :- تعاي حربيتي غسليني مابيَّ حيل
تيجان :- انچب ماتشتغل عندك هي
:- لا يدلل اخوي حبيبي، تعال اغسلك
مد رجليه جوه الدرام وجهه كله طين حتى رمشه مطين، اغسل رجليه واضحك على وجهه وكل شوي يصفگني راشدي خفيف بالشقه ويضحك وياي.
البقية اطشروا واحد يريد چاي والآخ ماي، واحد راح لمرته، هوستهم تارسة البيت، طلعت امي للحوش وانه بعدني اضحك على رشاش وجهه.
امي :- حروب گومي يلا
:- وين؟
:- نروح لجدچ
بطني انخبصت وظلت تلويني، چنت مغلسة عالموضوع وامي ساكته بسبب انشغالنا بفاتحة ام رضا، هسة چنت اضحك وطلعت من جو الكآبة شوي اجت امي خبطت بطني.
:- يمه مو هسة اغسل لرشرش
:- گومي لا اطيح حظچ
:- يمه فدوة اجليها هسة عندي دراسة
امي :- شبيچ شمطتي العافية گومي يلا انه احچي ويه جدچ
رشاش :- شكو يمه شصاير؟
امي :- انتَ مالك علاقة
رشاش :- يمه غير اعرف شكو صاير شي؟
امي :- سالفة مصخمة، بعدين هي تسولفلك، گومي يلا
رشاش :- بس لا ابن سقطون على گولتچ
امي :- لا ابن نعلون احط رجلي بحلگه يرجع يندگ بينا، إلا اهجم بيوتهم على روسهم
رشاش :- هو انتِ خليتيهم يشطمون من الخوف بعد وين يندگون
امي :- يستاهلون، والله لوما اخاف تنفضح الخايسة بت الچلاب چان سويتها دمام عليهم
رشاش :- صار من يشوفني يركض يدخل داخل بيتهم
امي :- اي هيچ اريدكم ترعبون العارات رعب من يشوفوكم
رشاش :- بعد اولاد القائد عتبار
امي :- يلا گومي ولچ مو احاچيچ
گمت غسلت ايدي ونكتت الماي ومسحته بدشداشتي، رحت لبست شالي وعباتي، وجسمي كله رجف، شراح اگول لجدي وشلون اشرح.
ياربي سترك بس لا ينجلط جدي على هالموضوع، مشيت ويه امي ورحنه بيت جدي وانه ارعد رعيد من الخوف.
جدي بالباب گاعد، ويه جيتنا التفتت لصوت رجال غريب، شفته ابو منتظر صديق تيجان، وهو جاي صاح.
:- السلام عليكم سيد!
جدي رفع ايده..
:- هلا هلا ويلة هلا وعليكم السلام
غطيت وجهي من شفت وراه رجال طويل وكشخة، لابس بنطرون اسود وقميص ابيض، مانتبهت لشكله بسرعة طبينا انه وامي......