رواية عرين الصياد الفصل السادس عشر 16 بقلم شذرة العدوان

ديالا : تلاگيت ويه حيدر عيني بعينه وبينه مسافه زغيره جاتفه اديه وره ضهري وادفر بالحصو ظليت متصنمه وهو واگف يدحگ

حسيت على روحي گتله صباح الخير

تلبك وانتبه دنگ ولزم رگبته من وره

حيدر : صباح النور تعذريني ما عبالي انتي هنا طلعت اتمشى

ديالا : ولا يهمك البيت بيتك افتر وين متحب اني راح اسويلك ريوگ

مشيت من يمه رحت عالمطبخ لگيت امل مسويه الجاي خوش بس احمي

سويت بيض ورحت جبت خاثر من الجيران

البگره (البقره) مالتنه عدهم انطيناهه الهم بالنص يترزقون منها

وطلعت گيمر من الثلاجه مسويته امل بس اكيد مو مثل الي تسوي مهره تذكرتها

اسوي بالريوگ و دموعي تصب

مسحت دموعي بطارف ارداني گملت الصينية ورحت عالديوان حطيتها يم الدوشگ الي جان نايم علي حيدر

وطلعت بره تاندي

هاذ وينه واگفه ادحگ واريد انادي بصوت عالي خجلانة منه اجاني صوته

حيدر : ام درويش شلونها گعدت

ديالا : فزيت لزمت گلبي

حيدر : اعتذر ما قصدي افززج

ديالا : لا ما فزيت ايي فاتن گاعده لاا نايمه شتريد

حيدر : اشوفها اذا ما تحتاج شي اريد اروح

ديالا : هسع اگللها حطيتلك الريوگ بالديوان

حيدر : مشكوره

ديالا : رجعت تا اگعد فاتن واگللها

شفتها نايمه استخطيتها عفتها وطلعت

يالله شعنده حيدر قابل بعدها ساعه ب 8 الصبح

رحت گعدت بالطرمه واتخيل مهره من جانت تگعد الغبشه تريگ الخيول وتودي ريوگ للفلاحين

وتجهز الخضره للبگالين وترجع تطبخ الغده وتاخذه تكرب كراب ولا تگول مليت ولا تگول فحيت

ــــ گعدت فاتن اول ما سألت حيدر تريگ

ديالا: اي حطيتله ريوگ

فاتن : عفيه بنيتي

ديالا :حيدر گال تحتاج شي يريد يروح

فاتن : سلامته الله يحفظه ان شاء الله اروح اگله يتوكل عطلته من شغله خطيه

ديالا : مر النهار بطلعان الروح لزگت الشمس العصر ما تفعل تغيب تخسين غيبي اريد انام وما افكر من اظل گاعده وادحگ عالبيت فارغ تشوغ روحي

العصر اجتني جوانه تبجي گالت جاهد هلسني ااخ يا طلبة جاهد وجوانه الي ما تخلص

گدتها ورحت ادور لجاهد

اذا ما احاسبه گدامها تظل تبجي قرن

ادورله ماكو مدري وين ختل

وجوانه تسحل بيه تگلي دوريله

طلعت بره السياج شفت جاهد واگف ويا زلمه غريب متلثم وشكله مو مريح ارتعبت صحت بييي جاااهد

اجاني يركض والزلمه راح يمشي بهدوء ويعرج

لزمت جاهد من اذنه گتله شبلغتك اني حذرتك ميت نوبه ما تطلع تفيـع وحدك هاذ منهو الزلمه

جاهد : ما اعرفه جنت اركض وگعت وجه شالني ونفضني

ديالا : بعد ممنوع تفيع بره السياج جلاب تاكلكم

تعال ليش هالس جوانه

جاهد : والله ما هلستها جذابه

جوانه : امبلا هلسني من شعلي اضلبي ديالا اضلبي

ديالا : اوف يربي تسحل بيه تريد اضربه واني ما اصخي گدتهم وفتت جوه سديت الباب قفلته بالسرگي وجوانه متفعل تسكت الا اضرب جاهد

امشي وافكر شصار ويه ليال وصلو شحالهم هسع

امل : شگد اني قويه واتحمل كلشي الا ما رحم ربي

واليوم بهاي اللحظة تمكن الخوف مني وحيلي بهت انهزمت يم عماد لزمت ايده وارجف

الشيخ صامد عبالك يحجي ويه صديقه لو اخو استمر يستجوب المس خفت خوف مو طبيعي

الشيخ عثمان يگوله ليش ما تطلع بالله

وليال تجاوب او الي بداخلها يجاوب بلسانها احبها ما اطلع اريدهااا

ودار بينهم الحوار

عثمان : وين حبيتها شعرفك بيها

ـــــ : شفتها بالمگره داست عليه

عثمان : امت اجت شتسوي بالمگبره

ــــــ ; تجي تشوف اهلها واني جنت گاعد المغرب وجان ادوس عليه ردت اذيها بس حبيتها اريدهاااا

عثمان : انته الي تخليها تنهزم وتروح عالمگبره

ـــ : اييي

عثمان : ليش الا هاذ المكان

ـــ : اسكن هناك

عثمان : عندك اهل لو مشرد

ـــ : مشرد

عثمان : يهودي لو مسيحي

ــــ : يهودي

عثمان : تأسلم

ـــ : لااااا

عثمان : تطلع منها

ـــ :لااااا ما اطلع احبهااا اموتها وما اطلع

عثمان : احرگك اذيك

امل : گام شيخ عثمان يقرا وليال تصارخ

عثمان : عماد ابني اريدك ترخصلي لازم اضربها هاذ المس عنودي ولا تشيل بال الضرب ليال ما تحس بي راح يگع كله عالمس صحيح جسمها بعدين تصير بي علامات بس ما راح تحس حالياً عبن هوه هسع متمكن منها متلبسها كلياً

عماد : شيخ اخذ راحتك شتريد سوي المهم خلصها

امل : گام الشيخ يمها ويضربها بالعصه والمس يصيح ما اطلع احبها اعشقهاااا

بيت الشيخ علوان

الساعة 5 العصر

كواكب : نشمييي نشميييي وينك

نشمي : هاي يمه جيت جيت والله اسمع مو اطرش حسج ما نسمعه بس من يروح ابويه

كواكب : ولمه تلمك هاك هاذ الأجل (اكل) ودي لعمك شاكر

نشمي : جيبي راح اشيب وما اسمع منج جلمه حلوه

كواكب : تولي من وجهي لو ارگعك بالجفجير اعجر راسك

نشمي : شلون اخذج ابويه ما ادري سوالفج كلها بالجفجير

كواكب : زهور ناوشيني الصونده مال الطباخ من يمج تخسين

زهور : عوفي يمعوده الي يشوفكم ولا يگول ام وابنها اگف نشمي لا تروح نسيت الخبز ما حطيته

نشمي : هنيالجن ما تنسن تفكرن بصياد خطيه ما اخذ ولا وحده اني لو بمكانجن اگوم ابجي

كواكب : هيرني والله وما فعلت

زهور : والله هم گالي وما فعلت ادوخ بالطريق وتلعي نفسي ومنا حامل بطني لخشمي

نشمي : اني هم هيرني وما فعلت گتله اريد اعاون جدي وهم مكان ماكو گالي احطك بحضني بس ما فعلت

كواكب : اي صادگ

نشمي :وانتي يالبدويه هيرج لو بس هير ضرايرج

دله : والله گالي اذا تروحين تاخذ سيارتين بس ما فعلت حلمانه بأبوي حلم مو زين

كواكب : الله يستر هاي عبن تفكرين بي

زهور : سولفي بالحمام تا يفسد

نشمي : زهور منين تجيبين هالسوالف يوميه تطلعين بسالفه جديده انوب الحلم يتسولف بالحمام تا الشيطان يگرز حب ويلگح عليها الگشور ويگللها كملي اسمعج

زهور : شمعرفك انته اگحز ليغاد

نشمي : اخذ العلم منج مرت ابوي كون يسمعج ابويه

دله : والله لايبه رويحتي من الفجر اتزگلب على ابوي

كواكب : خايبه لا تبجين وتفوالين عالزلمه اذكري الله

زهور : نشمي هاك الخبز وروح يالله

كواكب : ما تروح شبيك مصمهر مثل زمالنه الخضر

نشمي : والله ادحگ عليجن خوش متصافيات جنجن الخوات ولا عبالك ضراير شدگولن اذا ابويه طگجن بالرابعه وطشرتجن

زهور : كواكب دحگي ابنج شلون مفاول علينه

كواكب : حسافته ماخذ عشره والله شعره ما تهز مني

دله : اذا صارت ما اوافق الا بشرط يوديني يم ابويه

نشمي : وهاي دله وامي رضن وانتي زهور شرايج

زهور : والله اذا تطبگ العشاير ما اخلي يعرس

نشمي : ههه زعم هوه بحالجن

زهور : كواكب خلي نشمي يروح من هين تره فارت الگشره

كواكب : خلي يظل يهذي صياد بيا حال يدور نسوان انوب معمي الثار وما ينام الليل يهذي بمشعل وجتاله

زهور : اي والله مت عيني انام واگعد وهو يحش جگاير ويفتر بالحجره

نشمي : اويلي عليجن

كواكب : انته ما تولي عش واگف تلگط علوم

نشمي : اااخ اذا الله قدرني هم اخذ ثلاثه

كواكب : انته ما تصير ادمي الا اگوملك

امل : ساعتين متواصله وشيخ عثمان يرقي بليال ويضرب بيها والمس يصرخ صرخات ترعب

عماد طگت روحه وگال للشيخ كافي عوفها

گام الشيخ وهو يلهث من التعب هالگد ما يقرا ويتحاور

عماد : كافي شيخ هاذ ما يطلع وما اتحمل اشوف اختي تنضرب وتوجع

عثمان : ابني هاذ الصريخ مو لأختك والضرب مو للها صحيح هاذ جسمها بس هو متمكن بيها

عماد : ما اگدر اتحمل عوفها شيخ نشوف غير حل

عثمان : غير هاذ الحل شنو ابني دير بالك تصدگ اكو غير الرقية تساعد اخيتك وذا تأخر بيها بعد ايس منها راح يتربع على رحمها ويمنعها من الزواج ومن الخلفه للأبد هاذ مس عاشق مزال بعده من بدايته شغلته سهله ان شاء الله هسع خلها تستريح وباجر بأذن الله نكمل هاك هاذ زيت الزيتون مرقي ادهنو جسمها بالكامل الا اصبع رجلها الجبير لا تحطوله لفو بخب

وهاذ مي ورد هم مرقي تسبح بي الصبح

وراح اسويلها خلطه اعشاب تشربها اخاف المس تلبس معدتها ونطعمت وان شاء الله تتعافى بس خلي املك بالله جبير

راح تگعد هسع وترجع طبيعيه بس مؤقت عبن المس نهزم ختل برحمها حاولو ما تخرعونها ولا تخلونها تحزن وتبجي ولا تعصب ابد ،،

عماد : وذا تذكرت اهلي من ماتو وگامت تبجي شلون بيها

عثمان : هاي المشكله حاول من يمك اذا تذكرتهم حاول تهديها بأي طريقه وذا ما تذكرت لا تحجيلها

عماد : زين شلون اشرحلها عش جبناها هين راح تستغرب المكان

عثمان : احجيلها الصدگ گللها تمرضتي بس مو هاذ المرض عبن ما اريدها تخاف وتفكر بي

عماد : راح اگللها ركض وراج جلب وتمرضتي هيه تخاف من الجلاب

عثمان : اخاف الجلب يظل يتراوالها و اني ما اريدها تخاف ابد ولا تفكر

عماد : والله ما عندي غير هالسبب تقتنع بي عبن صار وياهه هاذ الموقف گبل سنه ركض وراهه جلب وخربت وتمرضت وراح احاول ما اخليها تخاف وتبجي

عثمان :هاي ظلت يمك انت تعرف اختك شنهو طبعها ومن شنهو تخاف يالله اني اترخص تظل عدكم العافية

عماد : الله يعافيك شيخ ما قصرت

عثمان : واجبي

امل : طلع الشيخ وظلينه يم ليال جانت نايمه فاقده

وره شويه گامت تون فتحت عيونها ومثل ما گال الشيخ عثمان

دحگت علينه گالت ااامل حلمت مهره وابويه ومحمد ماتوو گامت تبجي وتشاهك حضنها عماد

عماد :ااش لا تبجين هاذ حلم جايف خلي يولي

ليال : اي والله حلم جايف ما اريد انام بعد

امل : ختنگت وصديت بصفحه ابجي وعماد كاتم دموعه ويهدئ بليال

اخذت شوح بحضن عماد بعدين فركت عيونها

گالت جسمي يوجعني رجليه منملات دحگت حواليها استغربت المكان دحگت على لبسها لابسه عبايه وملفع

ليال : اني وين هاي ليش لابسه مثل العجايز اني صرت عجوووز

عماد : لا بنيتي ما صرتي عجوز بعدج ليال الحلوه

ليال : عجل احنه وين هاي حجرة منهو

عماد : عماد انتي تمرضتي وجبانج عالدكتور

ليال : شلون تمرضت كلشي مابيه والله

عماد : دحگي بنيتي ما اريدج تخافين خن احجيلج وذا بجيتي وخفتي تره ازعل وبعد ما اخليج تمشطيلي

ليال : ما ابجي

عماد : خوش عفيه الذيبة عجل اسولفلج شصار انتي رحتي عالمزرعة تجيبين خس

ليال : امت رحت والله

عماد : اوااش خن اسولف لا تلگمين الحجي

رحتي تجيبين خس دزتج امل وجان يطلعلج جلب وركض وراج وگعتي وجان تخربين وجبناج عالدكتور

امل : ليال صدگت بسااع وگامت تصيح وقرفصت وتمسح بنفسها وتحجي عليه تگلي شلون ادزيني وحدي اجيبلج خس شلوون يالهايشه

عماد : عيب ليال شهل حجي لا تغلطين على امل يالله اعتذري منها

ليال : گلولي اول شي الجلب عضني جاس ملابسي

عماد : لا والله ما جاسج ولا عضج

ليال : خوش عجل اني اسفه امل بس بعد ممنوع دزيني اجيبلج خس تا تاكلين انتي شعوزج ما تروحين

امل : ميخالف اني اروح

ليال : يالله نرجع عالبيت اني جوعانه وراسي يوجعني عماد شيلني ما اگدر امشي

عماد : لا ما نرجع هسع الا طيبين

ليال : بس اني طبت مابيه شي والله

عماد : لا الدكتور گال خمس تيام يالله طيبين

ليال : يهالعثره خمس تيااام شگد جثير اني ذيج النوبه مو طبت بنفس اليوم.

عماد : مو هسع عبن خفتي جثير كافي تسألين اسمعي ليال احنه يم ناس غربه صيري عاقله ومؤدبه ولا تحجين شي ابد خوش بنيتي

ليال : خوش

امل : اندگ الباب واجاني صوت الشيخه

خزامي : تسمحون افوت

امل : فوتي شيخه

خزامي : اللهم صل على محمد نورت الحلوه يحرسج الله بعينه الي ما تنام

امل : يحفظج ويخليج شيخه

ليال : الله احنه بيت عيال مهره

خزامي : اي بنيتي تعاي احبج (ابوسج)

امل : الشيخه لزمت ليال تبوس بيها جن اول نوبه تشوفها وليال حاضنتها وتگللها عدكم عشه جوعانه

خزامي : يبعد روحي شلون ما عدنه عشه يبعد گليبي يالله تهيرو نمشي نتعشه

امل : الحمد لله والشكر ليال شبه صارت زينه صحيح تحجي ومثل قبل بس كلام الشيخ من گال المس ختل برحمها ظل ابالنه واخاف نروح وعلى غفله تنفعل وتمنجدنه گدام الناس

خزامي : بشنهو تفكرين امل بنيتي يالله

امل : الشيخه گادت ليال وطلعت عالصالة وظلينه اني وعماد ماكلين هم شراح نسوي اذا ليال تمرضت يمهم

عماد : اووف هسع شلون امل

امل : والله ما ادري نروح وخلها على الله

اجت الشيخه گالت يالله يابه العالم تنادي فوتو جزامي بالطرمه اني انتظر ليال تطلع من الحمام

طلعنه شفنه رجال بره واگف يم الصياد اجو ياخذونه نتعشه تسالم هو وعماد واني سلمت من بعيد

طلعت الشيخه وراهه ليال تعثور بالعباة والملفع يسحل

ليال : هاي احنه وين اشو مو نفس البيت الزفينه منه سعاد مرت غازي

خزامي : اي بنيتي هاذ لبيت صاير ليغاد

امل : ظلت ليال تسأل وتستفسر عن المكان وعن الأهل والشيخه خزامي الله يوفقها ما قصرت عبالك تقرا افكاري وتجاوب ليال وگدرت بأسلوبها تقنع ليال

ان هاذ بيتهم الأخر واحنه بعدنه بالرمادي وراح نرجع من اطيبين

ليال : هاي عش لبستوني ملفع والله لعب روحي

خزامي : لا يبنيتي يخبل عليج

امل : ليال ما سمعت من الشيخه وجان تزع الملفع والعباة

مشينه عالباب وجان صياد دحگ على امه واشر بحواجبه على ليال

الشيخه التفات ولزمت ليال من ايدها گالت تعاي بنيتي البسج العباة وملفع

ليال : لا غدي امانه والله يخرع

امل : ظلت الشيخه تقنع بليال تلبس العباة والملفع وليال تعاند وعماد والزلم واگفين بالباب ينتظرون

ضجت صراحه تريد تجبرها گوه تلبسها

امل : شيخه عوفيها هنه بحياتهن ما لبسن عباة وملفع ولا يعرف يلبسن

خزامي : بنيتي ميخالف بس اليوم خلها تلبس

صحيح معزومه ابيت اخوي ومو غريب عليه بس عدهم ولد وفهمج كفايه

امل : انزعجت وكتمت بداخلي ورحت اقنع بليال تلبس العباة والملفع گوه قنعتها

ضاجت ليال وبرطمت ما تعرف تمشي بالعباة والملفع تلفه وينصل

ليال : همه مو عزمونه نتعشه عش الا البس عباة وملفع يخرعن والله طلعت مو حلوه وسمينه +

خزامي : يبعد روحي اذا انتي مو حلوه عجل منهو الحلو

امل : خلصت سالفة العباة

ورحنه مشي عبن البيت العزمونه گريب

شايله ابني والشيخه گايده ليال وتگللها هاذ بيت اخوي وهاذ الي بصفه بيت اختي

طلعت المنطقه اكثرها گرايب

عماد وصياد يمشون بهدوء وما يحجون شلون توالمو ثنين ما يحبون السوالف وهاذ الرجال راح يمشي سريع تا يستقبلنه بالباب

وصلنه بيتهم اول طبينه باب السياج جانو اهل البيت مقسومين نصين الزلم بصف والنسوان بصف وستقبلونه احسن استقبال بس ابد ما گدرت استمتع بسبب خوفي من ليال

بيت الشيخ علوان الساعه 8 مساءً

عزت : نشمي نادلي عرب

نشمي : اي عمي تبشر

عرب : ها شرايد

عزت : احد شافك من جيت

عرب : لا

عزت : عجل الحگني عالمطبخ

وانته نشمي تعال

عرب : خير يمعود شكو

عزت : گبل لا نگعد عالسفرة الأجل ويسأل عالشيخ عن شاكر وين هوه والربع شنگله بالله خلونه نتفق على راي واحد

عرب : اي والله بس جان دزيت احد بدال شاكر وخليته يجي

عزت : لا صياد خلا بمكانه گال ممنوع يعوف مكانه

كواكب : هاا شعدكم هين بالمطبخ

عزت : والله يا مرت اخوي جاي نصفط جذب تا نرگع فعايل رجلج

كواكب : ليش هنوبه شمسوي صياد

عزت : نشمي سد الباب خاف احد يجي

كواكب : شكو عزت لا تهبطني

عزت : رجلج خله شاكر والربع يراقبون بيت الملا درويش والمگبره وبيت سنان

كواكب : يايمه ليش عود

عزت : مدري علمي علمج گال حت الطير الي يگف فوگ بيتهم اريد علومه

عرب : هذاك اليوم احنه بالمگبره نراقب صياد بمكان واني بمكان وشفنه بنيه اجت عالمگبره

وتمرغل بروحها رحنه عليها وجان صياد نفضها من التراب وگادها گال اوديها لبيتها وانت ظل هين

عزت : منهي هاي وشوداها عالمگبره شبلاهم اهل ذيج الديره ما يلمون بناتهم

عرب : عاد شنهي من بنيه سبحان الله لخلقها

ترعب من حلوها جنها حوريه والله بياضها يعمي وشعرها بعدله شبر يصل الگاع

عزت : خايب ما تعرفها منين ما سعلتها شسمها

عرب : هو اني دحگت عليها وصياد راد يطلع عيوني مو انوب اسعلها منين انتي

عزت : ولگه بيتها صياد

عرب : مدري راح گايدها والعلم بي بس ما خلت بالحجي مبين مهبوله مو صاحيه حرامات هالجمال وخبلة البنت

كواكب : هسع عوفو البنت وگلولي شسالفة صياد شعنده ويه هذول الناس والشيخ يدري بهالحجي

عرب : لا ما يدري وديري بالج تحجي اگضبي اثمج احنه صياد وصانه ما نحجي وهسع محد يدري غير اني وعزت وشاكر والنشمي وانتي

كواكب : يعني شاكر من يدز عالأجل يروح ياكل بالمگبره بس لا ينهبل الزلمه

امل : تعشينه جان العشه طيب بس گوه ابلع اللگمه

متوتره حيل

ليال اكلت جوعانه ولشيخه تفتت وتحط گدامها توكل بيها وليال مكيفه

شربنه الجاي وگعدنه نتعلل والنسوان كل عيونهن على ليال كل شوي وجايتني وحده تنطون البنيه عليها درب وعدها ولد عم

واني ما عندي بس جواب واحد

اخوها ما يزوجها الا تكمل دراسة

حيل ضجت عبالك اول مره يشوفون بنيه وهمه عدهم بس الي شفتهن بالعشر بنات والولد ما ينعدون ما شاء الله ليال گاعده بصفي وجان تنعس شاورتني گالت اريد انام امل

ما خليتها تنام نومها ثگيل خوما عماد يفوت بنص النسوان يشيلها

ناديت الشيخه

امل : شيخه نريد نروح ليال نعست

خزامي : اي يبنيتي خليها تنام

امل : شيخه هاي نومها ثگيل والا نشيلها وعيب من الناس

خزامي : شلون هسع زعم گلنه نتعلل

امل : والله مگدر شوفة عينج

خزامي : يالله عجل نمشي

امل : كلها گامت من شافت الشيخه تحركت وكلها تنادي وين تردين شيخه ظلي تعللي ما صدگنه اجيتي

لحو عليها گالت عندي ضيوف ومگدر عود غير نوبه

گلولها انتي وضيوفج ظلو

خزامي : مگدر السموحه منكم يالله بنيتي

امل :مشينه وگفنه بالباب وليال مجلبه بيه وتغفي وتثاوب طلعو عماد وصياد

وجان تجي بنيه وگفت وتحجي ويه الشيخه يتهامسن والبنيه مجلبه بردن الشيخه ومبينه توسل

خزامي : ابو فهد راح اخذ نجمه تبات يمي عندي ضيوف واني بعازتها

امل : جاوبها الزلمه وگال اخذيها حلال والديج

كيفت البنيه واجت اخذت ابني مني گالت جيبي اني اشيله وراحت تمشي گدامنه هاي شبيها

خزامي : يالله تصبحون على خير

امل : مشينه اسحل بليال خايفه تتعثور وتحجي بملل وضايجه بساع من وصلنه الشيخه حطتلها فراش وجان بس حطت راسها عالمخده نامت

گعدنه نتعلل اني والشيخه ونجمه الي بعدني ما اعرفها. زين

خزامي : بنيتي امل اعرفج هاي نجمه بنت اخوي ابو فهد

امل : حياهه الله

نجمه : حياج خيتي عمه گومي نحجي غادي

خزامي : خايبه شجاج احجي هين امل صارت من اهل هالبيت

نجمه : عز الله عمه اسمعي بدون ما تنطين مبررات لصياد تره والله الناس اكلت وجهي بالحجي امت تعرسين وامت وصياد ليش ما يريدج تعبت يا عمه والله طگت روحي

خزامي : يمه انتي صابج هبال البارحه دفنه مشعل بعد ترابه اخضر وانتي دورين عرس

نجمه : عمه ما ادور عرس والله ما ادور عرس ولا زفه خلي يجي ياخذني بعباتي

مو كافي تحملت جثير صار سنه من قرو فاتحتي ولحد هساعه لا عقد عليه ولا حجه ويايه

خزامي : يمه انطي عذر الرجال بركبته ثلاث نسوان وعنده كومة ولد واعين وانوب اجته مصيبت اخوو اصبري يا امي تره بعد نسوانه ما يدرن بيج

نجمه : لأمت اصبر يا عمه جاي اگلج الناس اكلت وجهي بالحجي معد اگدر اطلع من حجرتي وتره حت اخوج الي هو ابويه شايل بخاطره بس ما يضهر جدامي وذا يريد يعرس زعم هوه بحالهن

امل : استمع لحجيهم وشتعلت نار بيه هاي شبيها مخبله شلون ترضاها تاخذ واحد عنده ثلاث نسوان ولده عزابيه بگده فاتحه اثمي وعيوني وادحگ عليها عبالك تريد تاخذ عماد مو صياد من گد القهر الي نقهرته

گامت تسوي جاي وما گدرت اتحمل حجيت ويه الشيخه

امل : شيخه هاي البنت شلون ترضه تاخذ واحد مزوج ثلاثه تعذريني بعيد عن هو ابنج وحيدج وخوش رجال بس هيه شلون ترضاها

وصياد والله مو بعازة نسوان مو عنده خير من الله

وانوب خلفته كلها ولد اللهم صل على محمد

لا تجعليها مني حسد لو تدخل بس والله ما گدرت اكتم

خزامي : ااخ يا بنيتي الدنيا تعصف بصياد من مكان لمكان وين الي ما يحبها ويريدها تعصفه الدنيا وتجيبها اله نصيب احجي براحتج يمه كلامج كله صحيح بس اگلج والله صياد ما راد ولا وحده من نسوانه كلهن نفرضن علي

امل : شلون نفرضن علي الي اعرفه صياد زلمة معدل وكلمته مسموعه وهو يفرض ما ينفرض علي

خزامي : بنيتي اني خلفت صياد وصابني حادث ما اريد اتذكره ومعد اخلف من هذاك الحادث

صار صياد عمره 15 سنه بس زلمه خشن سيس على خواله بالطول والضخامه عاد قررت ازوجه مزال اني ما خلفتله اخوه من بطني على اقل اشوف جهاله واربيهم ويا لحيت علي يوافق يتزوج جان رافض يريد يركز بدراسته بس اني لحيت جثير وحرجت عالشيخ يقنعه ويايه

اقتنع وردت اخذله بنت اخوي زغيره جانت ومن عمره گلت يكبرون جميع

امل : هاي البنيه نجمه

خزامي : لا غيرها هذيج عرست

امل : عجل شصار

خزامي : الي صار الشيخ علوان الله يسامحه راح خطب بنت اخو

اسمها كواكب اكبر من صياد بخمس سنين

ما حبته جبروها جبر

وراهه بسنتين رحنه مسيرين على اهل ام الشيخ علوان بدو وجان يهدولنه بنتهم دله زفيناها وجبناها ويانه وتبجي الطريق كله ما تفعل تعرس تريد ترجع على ابوها تحبه جثير

وراد صياد يرجعها من نص الطريق بس الشيخ علوان ما فعل گاله تمجدني هاي اذا رجعت يكتلونها اهلها عبن عيبه عالعروس ترجع من الزفه الا بيها شي

امل : وجبتوها عالبيت وهيه تبجي وما تريد الزواج شلون قنعت وظلت

خزامي : اخذت وكت جثير الا اجه ابوها وگاللها لخاطري يمه ارضي بهالزيجه

وراهه عاد بسنه ونص صارت كونه ويه غير عشيرة

وربعنه دگو الطريق تا يكتلون شباب من ذولاك

بس صياد فكهم ورجعهم لهلهم سالمين رغم همه عالو بالصياد ودگوله الطريق اكثر من نوبه تا يكتلونه بس ربج بلطفه وشجاعة الصياد بكل نوبه ينقذ نفسه

عاد الشيخ مالهم دز مرسال للصلح وراحو ربعنه وبنص المجلس اهداله بنته زهور ونهبل الصياد گام يعيط انجبر ياخذها

امل : ليش انجبر ليش ما رفض

خزامي : لا يمه شلون تنرفض بنيه انهدت بمجلس جدام الوادم مو حلوه لا بحگنه ولا بحگهم وتصير بيها مكاون ودم

عاد صارن على ذمته الثلاثة اعدل بينهن وما سمع وحده كلام رغم عصبيته وعناده ما يحاجي وحده منهن ابد وكلهن خلفن ولد الحمد لله بس صياد بخاطره تجي بنيه

وهاي نجمه بنت اخوي تريد صياد عشگته

واخوي هوه خطب الصياد گاله اريد انطيك نجمه

عبنها وحيدة اخوي مدللها ما گدر يكسر بخاطرها

وصياد ما فشل خاله

گبل جم شهر قرو الفاتحه مالتهم

وزعم يعرس وره مشعل بس مثل متدرين مشعل صار جوه التراب ،،،

امل : ما گدرت ابلع هالحجي رغم الشيخه شرحت كلشي بس ما بلعتها شلون نجمه تريد واحد عنده ثلاثه نمت والغيض بداخلي

الصبح اجه الشيخ عثمان من الصبح

تريگ وگال نبلش بالرقية ان شاء الله +

لبسنه ليال الملفع والعباة وما تدري السالفة شنهي فاتت ادردم اول ما فاتت شافت الشيخ ارتعبت

الشيخ بلش الرقية وستمر ساعتين عماد مدري شجاه طلع بره يزوع

وليال فحطت فلتت من ايدي طلعت بره تبجي وتصيح لزمتها بالطرمه جان صياد گاعد من شافها گام

وليال تصارخ احاول الزمها وهيه ستگوت معد اگدرلها وعماد مسدوح بالثيله دايخ

جتفت ليال اريد افوتها جوه والشيخه ويايه

صرخت ليال بعالي صوتها حاامد كله بسبب حامد

يتبع…