رواية صغار العم الفصل الخامس عشر 15 بقلم مسرة اسامة
روايــة #صغار_العم
الحَــلْــقــة الـخــامــسـة عــشـــر 🌸
خشو البنات مع بعض : السلام عليكم
هناء شبحتلهم انصدمت 😳
يوسف شبحلهم : هادو شن جابهم
البنات انصدمو : هناء ؟؟
و مشولها
هناء : شن جابكم هني
سلسبيل : شوبينق 😍
هناء قامت حواجبها : بجديات
سنابل : أبرار بتاخد حاجات ليها
هناء شبحت لأبرار و اختها
أبرار تبتسم ☺️
هناء شبحت ليوسف : هيا نمشو حني
يوسف : باهي راجيني نخلص و نجيك
و مشي للكاسّة
سلسبيل وقفت على مراية تمكيج بِ مكياج التيست
جتها هناء : ياسري يا عار
سلسبيل ادير ف ماسكارا : تي عادي بالبلاش
و تلفتت للموظفة : ممكن تجيبيلي روج نود نجربه ؟
__
2
يوسف خلص و جي لهناء : هيا نمشو
هناء شبحتله و طلعت معاه
يوسف فتح السيارة و ركبو
هناء : توا بنروحو ؟
يوسف : مازال مشوار
هناء : وين
يوسف : بنروح بأمي
هناء : حطني و برالها
يوسف طلع بالسيارة : بري معاي
هناء : لالا خليكم بروحكم علاش نضايق فيكم
يوسف شبحلها : و منو اللي بيتضايق من الوجيه السمح هذا
هناء ضحكت : ندوي بجديات يوسف ؛ انت و امك متزاعلين خليكم بروحكم و حلو مشاكلكم بين بعضكم
يوسف : لالا نبيك معاي باش تتحشم منك و تروح
هناء سكتت
يوسف : ولا شن رايك ؟
هناء : انت شن قلتلها باش زعلت منك
يوسف سكت
هناء شبحتله : اها ؟
يوسف حك لحيته : تبي تمشيني على كيفها
هناء سكتت و شبحت قدامها
يوسف شبحلها : خيرك سكتّي
هناء : نفكر بس .. تو نمدهالها انى الهدية و نحاول نرضيهالك
يوسف : به
و فتح تليفونه ومدهولها : خشي ع الصور تلقي مصور أطقم حمامات اختاري واحد
هناء خدت منه التليفون و بدت تشوف
__________________________
سعاد في حوش اماليها تِحْبِك على يوسف : ريتيه يا امي ريتيه !! ربيت و تعبت و في الاخير بياخد وحدة بلا شوري .. اااه على بختي وخلاص
امها سالمة : نبي نفهم فاش البنية مش عاجباتك ؟ والله الا زينة و ماشاء الله عليها
سعاد : انى مش ع الزين يا امي انى نجاة مانقدرهااش مستحيل انّاسبها مستحيل
سالمة : مالك و مالها المرا ؟؟ المهم البنية تكون باهية معاك
سعاد تحرك ف صبعها : والله مامخليتني ف حالي نعرفها انى
سالمة : ماتغلضيش قلب ولدك عليك يا سعاد ؛ خليه ياخد اللي يبيها خير مايهج منك و ماعاد يوليلك .. انتي ماصدقتي روح بعد هالسنين اللي كان متغرب فيهم
سعاد سكتت و هي قالبة وجهها
سالمة : انتي ماعندكش بنيات ؛ عامليها زي بنيتك تلقيها تحن عليك و اتديرك اميمتها التانية
سعاد : ايه بكل اللي يسمع يقول كناين توا يعاملو ف عزايزهم كيف أمهاتهم ؛ تلقيها من الاول تحطه تحت باطها و تلعبله بعقله .. و بالذات بيسكن بروحه عاد ! تو يبدا يجيني مرة ف الشهر هذا لو تفكرني
سالمة : لالا ماتخافيش ؛ حتى هي اماليها معاك ف نفس الحوش الا ما تلقوهم كل يوم و يومين عندكم
سعاد هزت راسها : بنات توا يعرفو كيف يتكولفو و يقلبو الراجل على امه
سالمة ضحكت : لالا اوسيفه احنيّن
( الحوش شرين 🔔 )
سالمة تنادي على ولد ولدها صغير : أيهمممم ؟؟ يا أيهم ؟!
أيهم جاها من الدار التانية : نعم
سالمة : افتح الباب سلم ولدي
مشي أيهم بيفتح الباب
يوسف و هناء قدام الحوش
يوسف : يعني خلاص نركب الأبيض ؟
هناء : ايه مانحبش الألوان الداكنة تغم القلب
يوسف يشوف للصورة : مية مية
هناء : و المطبخ اللي قلتلك عليه هو احلى واحد
يوسف : عارف ايه
أيهم فتح الباب
يوسف ضحك : اهلااا
_
سعاد : هادي اكيد مرت ولدك الرامضة جاية تتلصق ؛ ماهي عارفتني هني تقولك بالك فيه اخبار جديدة على سلفتي العروسة باش تقصقص
سالمة : تي اسكتي راهي تسمعك
خش يوسف للدار هو و هناء : السلام عليكم
سعاد شافت هناء تكنطت
سالمة ابتسمت : و عليكم السلام
يوسف يسلم : كيف حالك حناي
سالمة : الحمد لله كيف حالك انت
يوسف : بخير الحمد لله
هناء تسلم على سعاد : كيف حالك مرت عمي اليوم
سعاد قالبة وجهها و ساكتة
هناء طبست على سالمة تسلم : كيف حالك خالتي سالمة
سالمة مبتسمة : الحمد لله بخير و نعمة أنستينا
هناء ضحكت : الله يآنسك خالتي
سالمة : لااا من اليوم بتناديني حناي زي اوسيفه
هناء تحشمت و شبحت ليوسف
يوسف ضحك
سعاد تشوفلها و ساكتة 😒
سالمة : قعمزي بنيتي خيرك واقفة هكي ؟
هناء ابتسمت ؛ قعمزت و حطت شنطتها ف حجرها
يوسف شبح لسعاد : شنو يا ست الكل ؟ عجباتك التقعميزة هني ؟
سعاد بـ غل : يا سّـــلام عليها
يوسف وقف بحداها : جيت باش نروح بيك
سعاد : مانيش مروحة
يوسف : هيا عاد فكينا من الزعل الحوش فاضي و مجاوب علينا من غيرك
سعاد : مانيش مروحة لين اتدير اللي نبيه
يوسف انحرج و سكت
هناء : انتي شن اللي تبيه يا مرت عمي ؟ قوليله شن اللي يرضيك و هو يديره
يوسف تلخبط
و سالمة ساكتة
سعاد شبحت ليوسف : هو عارف
يوسف فنص فيها : هيا نوضي معاي و تو ندوو ف الحوش
هناء مدت لسعاد كيسة العطر : تفضلي
سعاد خدتها منها : هذا شنو
هناء ابتسمت : هدية من يوسف
سعاد شبحت ليوسف : بتسكتني بيها ؟
هناء سكتت و شبحت ليوسف
يوسف : استغفر الله العظيم ؛ فكينا من النكد يا امي
سالمة شبحت لسعاد : معليشي نوضي حتى على خاطر البنية جاية معاه ماتزعليهمش منك
سعاد سكتت
هناء : هيا مرت عمي روحي معانا و ماتاخدي منه الا اللي يرضيك
سالمة سكتت .. ( لو تعرفي شن اللي بيرضيها يابنيتي ماكنتي جيتي ولا تعبتي روحك )
هناء : هو ماهانش عليه زعلك و جاك ف نفس اليوم ؛ ماتخليشي يروح متضايق و انتي تقعدي هني
سعاد : نبي طويسة امية ريقي جاف
سالمة كيف بتنوض : هاني نايضة هي
هناء تحشمت منها لانها مرا كبيرة و وقفت : لا خليك خالتي سالمة تو نجيبها انى
سالمة ابتسمت : صحيتي سلم بنيتي
هناء تشوف : وين المطبخ
يوسف اشرلها بإيده : هونا ع اليسار
( هناء طلعت من الدار و مشت للمطبخ )
سعاد فنصت فيوسف : جايبها معاك باش تحطني ف الامر الواقع ؟؟!
يوسف بصوت واطي : تي خيرنا يا امي تقول عليك ماتعرفيهاش و جاتك جديدة توا
سعاد حامقة : خودها و روح خير ماندوي قدامها و نخليها تجبد على موضوعك
يوسف تكنطا : لا اله الا الله ؛ ياسري بلا عار تو تحس بيك
سعاد : خليها تحس
سالمة شدت الريموت و علّت صوت التلفزيون : حي حي وطي صوتك عيب راهي ف حوشنا
( على جية هناء شادة المية
كيف بتخش الدار سمعتهم ؛ وقفت ف مكانها )
سعاد : جايني و كارهالي معاك باش نرضالك عليهااا !! ولا تفكر نرضىٰ انك تاخدها تسمع فيا ولاااا ؟؟
يوسف يتأفف : عندنا حوش يلمنا ندوو فيه مش وقت تلقيحك توا
سعاد فنصت فيه : لا بندوو هني
يوسف : بوي راضي و عمي دويت معاه مستحيل نطيح كلمتي على أسباب تافهة قلتهالك من امس
سعاد تتكلم بإيديها : نبي نفهم شن عاجبك ف عيلتها بس !!
يوسف انصدم
سعاد : ترا قولي امها وين اللي طالقتها معاك لتوا هكي ؟؟ .. عليك عيلة مافيش من حاكم فيها
يوسف عقد حواجبه و فنص فيها : شن الكلام اللي تقولي فيه هذا !!!
( هناء انصدمت و حست برجليها فشلو ؛ شدت ف الكنبة اللي جنب الدار و قعدت مركزة )
سعاد : انى قلتلك ماكش واخدها يعني ماكش واخدها ، مالقيتلي الا بنت نجاة تجيبها ليا كنة !!
يوسف تعفلق : استغفر الله العظيم ؛ عليك سيرة ماعادش فضّت
( هناء حطت ايدها على صدرها و قلبها يدق بسرعة )
سالمة : صلي ع النبي يا سعاد عيب اللي اديري فيه
سعاد شبحتلها : انى عند كلمتي يا امي ؛ يا يرضي قلبه يا قلب امه
يوسف يفنص فيها : اقسم بالله لو تزيدي كلمة ماقاعدلك دقيقة
سالمة تكنطت : هيا ياسري عاد ماتغششيش الولد
سعاد سكتت
يوسف بصوت واطي : استغفر الله العظيم
( هناء حبست دمعتها و بلعت ريقها ؛ خدت نفس عميق و خشت للدار )
يوسف شبحلها
هناء مدت الطاسة لسعاد و هي ساكتة
سعاد خدتها منها ؛ حطتها بحداها و هي عاقدة حواجبها
هناء لبست شنطتها و وقفت جنب يوسف مشبكة صوابع ايديها ف بعض و ساكتة ؛ منحرجة من الموقف اللي هي فيه و خانقتها العبرة
يوسف يشوف لأمه : يعني ماكش نايضة معاي
سعاد : طريقك زينة
يوسف هز راسه : ماشي
و شبح لهناء : هيا
طلعت هناء معاه و هي ساكتة
سالمة : خليكم اشربو حويجة سمله
يوسف سكر باب الحوش و ركب السيارة متعفلق
هناء ركبت معاه و مازالت مصدومة من سعاد
يوسف ولع السيارة و طلع بسرعة
_____________________
نجاة روحت الحوش لقت بناتها مهناش اتصلت بسنابل ماردتش ؛ اتصلت بسلسبيل ..
( البنات ف مطعم شوايا يتعشوا مايردوش )
نجاة متعفلقة : تو نعرف كيف نربيكم غر روحو بس
و اتصلت بهناء ..
هناء شافت تليفونها مابتش ترد
يوسف شبحلها : مني يتصل بيك
هناء ماتبيش تتكلم ؛ ورتله التليفون من يتصل بيها و ساكتة
يوسف : ردي و قوليلها شوية و نوصلو
هناء دارت تليفونها مقفل و حطاته ف الشنطة
يوسف يشوفلها : خيرك !
هناء صوتها مخنوق : شي
يوسف : متأكدة ؟
هناء : ايه يا يوسف
يوسف حس بيها ؛ درس السيارة على جنب و شبحلها
هناء تكت راسها على مسند الكرسي و تنهدت
يوسف : شن فيه
هناء ساكتة
يوسف : هنو ؟
هناء شبحتله مكشرة : انت وجعتني كيف امك رداتك و مابتش تروح معاك
يوسف : خليها الليلة تبات عند حناي و غدوا تو تروح ، اصلاً ماتقدرش تتأقلم مع نساوين خوالي و جوهم
هناء سكتت و شبحت قدامها
يوسف : لكن الباين مش هذا بس اللي مضايقك
هناء : هيا روح بيا
يوسف : قوليلي شن فيه حبيبتي
هناء غمضت عيونها و دموعها نزلو
يوسف استغرب : شن اللي يبكي فيك خيرك
هناء مسحت دمعتها : نبي نروح راسي يوجع فيا
يوسف : هكي فجأة !
هناء : ايه
يوسف يشوفلها
هناء رشفت خشمها و تمسح ف دموعها : هيا اكيد ماما تراجي
يوسف : مش مروح بيك لين تقوليلي علاش تبكي
هناء سكتت
يوسف : هنو !
هناء شبحتله و عيونها مدمعات : كلام امك كله سمعته
يوسف انحرج كشر و غمض عيونه
هناء تبكي : ماتتصورش شن حسيت وقتها يا يوسف
يوسف شبحلها
هناء تتكلم بخنقة : انحطيت ف موقف اخيه عليه تمنيت الارض انشقت و بلعتني .. اول مرة نحس بشعور زي هذا نكون في مكان مش مرغوب بيا فيه
يوسف متضايق : ماتدوريهاش حبيبتي تو تغير رايها
هناء : لا ماتقولش تو تغير رايها ؛ امك ماتبينيش على خاطر عيلتي ! .. علاش حني في شنو ماننفعوش ؟
يوسف يسمع فيها و ساكت
هناء : باهي ماما هذا طبعها من يومها واعرة انى شن بنديرلها ؟ اني ماجيتش زيها لو جيت نفس شخصيتها شن دارت فيا امك ؟؟
يوسف : و راس عيوني خلاص معادش تلومي روحك
هناء تبكي : اصلاً الغلط مني مفروض سمعت كلام ماما و قعمزت .. عندها الحق لما قتلي الدوة بتكتر عليكم لكن ماتوقعتش ان الدوة بتطلع من مرت عمي سعاد .. كنت نحسابها تحبني و تعامل فيا زي بنتها لكن طلعت لا العكس بكل
يوسف شد ايدها : اهدي هنو
هناء تتكلم و تبكي : من الاول قتلك روح بيا وله ؟ شوف شن صار توا ماشية بنرضيها عليك سمعت كلام مسموم و روحت خاطري مكسور
يوسف يمسحلها ف دموعها و متحشم من الموقف : و راس حبيبتي ماتديري في روحك هكي ماتزيديش تقطعيني بكلامك
هناء تبكي : اصلا نعرف شن بيصير .. تو انت بتسيبني و بتتزوج غيري باش ترضي امك و انى نقعد نشوف فيكم انت و مرتك طول عمري و نموت بالعرق
يوسف باس ايدها : والله ماني واخد غيرك ولا امسيبك ؛ انتي حبيبتي و نبض قلبي و حبي الاول و الاخير يا عمري معاش تعاوديه الكلام هذا لاني مستحيل نديره
هناء تسمع فيه و تبكي
يوسف : خليها تاخد وقتها و تو تعرف انها غالطة في حقنا
هناء تبكي : مالحقتش حتى نفرح انك دويت مع بابا طول هي صدتني
يوسف شاد ايدها و يمسحلها ف دموعها : خلاص اهدي هنو و بطلي بكي و بإذن الله مايصير الا اللي حني نبوه
هناء سكتت و خدت نفس عميق
يوسف يشوفلها
هناء : نبي امية انى اللي ريقي جف
يوسف تلفت يدور على محل : مافيش محل هني
هناء فتحت مراية الشمسية تشوف ف روحها و تمسح في دموعها
يوسف طلع بالسيارة ..
بعد شوية وقف على سوق ونزل هو هناء
__________________________
2
سلسبيل و سنابل ف السيارة مروحين
سنابل : و راس نجوى اوقفيلي ع المحل هذا
سلسبيل شبحتلها : علاش
سنابل : بنحجز حاجات منه
سلسبيل علّت صوتها : فلوسي بيتمو خلااااص 😩
أبرار تضحك : اللي يسمع يقول معرقة عليهم 😂
نجوى ضحكت : المشكلة ماخلتش التليفون يبات ليلة
سلسبيل : خزيــــه 😒
سنابل ضحكت : غر هيا و راس نجوى اوقفي
نجوى درست قدام محل حلويات و سنابل نزلت تجري
______________________
08:30 م
اسماعيل فتح باب حوشه و خش
نجاة شافاته تلخبطت
اسماعيل : السلام عليكم
نجاة : و عليكم السلام
اسماعيل ينحي ف دجاكته
جاته نجاة خدتها منه : كيف كان يومك
اسماعيل : كان يوم متعب و اخيراً تم
نجاة : واضح عليك التعب
اسماعيل قعمز ع الكنبة ينحي ف كندرته : وين اصيل
نجاة : اصيل من صبح ربي ماريتاش و قال بايت ف زردة مع صحابه
اسماعيل : محمد قاعد لوطه كيف مش معاه
نجاة : بالك مش نفس القروب
اسماعيل : و البنات وين ؟
نجاة : عند امك لوطه
اسماعيل شبحلها : وين عند امي و انى توا كنت لوطا
نجاة تلخبطت : امالا ركبو لمرت عصام لان قالت تبيهم
اسماعيل وقف : قوليلهم معادش يركبو و يضايقو الناس قاعدين عرسان
نجاة : ايه عارفة حتى انى ، غر ينزلو بس
اسماعيل خاش للحمام
نجاة : نحطلك عشاك ؟
اسماعيل : باهي حطي
______________________
محمد واقف قدام الحوش يتكلم ف التليفون : خليه على طريق المطار و امنع هو تو يتصرف
عبد المعين : تخاف تضربه سيارة يا راجل و يموت
محمد : تي افتحله عيونه ماتخليشي مربوط
عبد المعين : اوكى ، راجي منه مكالمة اكيد بيكلمك من حد
________
يوسف وصل للحوش ؛ فتح القراج و خش بالسيارة
هناء نزلت من السيارة و خشت الحوش
يوسف نزل سكر السيارة و لحقها ف الدروج : هنو ؟
هناء شبحتله و هي قدام شقتهم : نعم
يوسف ركب و وقف قدامها : و راس عيوني ماتزعلي روحك خلي كل شي عليا و مايصير الا اللي يرضيك انتي
هناء هزت راسها بمعنى به
يوسف : نبيك تخلي اللي صار بينا و ماتقوليش عليه لاماليك
هناء متضايقة : اصلاً لو بنقول لماما و نحكيلها ع اللي سمعته الدنيا حاتقلبها
يوسف : عارف ؛ و عندها الحق لو دارت هكي لكن تفادياً للمشاكل خليه بينا
هناء : حاضر
يوسف باسها من جبهتها : نحبك يا أغلى من عيوني
هناء ابتسمت و خشت لحوشهم
يوسف تنهد و تلفت فتح حوشهم و خش
لقي بوه كيف واصل : السلام عليكم
السنوسي شبحله : وعليكم السلام ؛ شنو وينها ؟
يوسف حط مفتاحه و تليفونه ع الطاولة : ماجتش
السنوسي هز راسه : عليك حكم نساوين
يوسف يحكيله ف اللي صار : .......
السنوسي تعفلق : تبي تحشمني مع اسماعيل !!! عقاب الوقت تخش مرا بيني و بين خوي !!!
يوسف سكت
السنوسي : هونا تقعمز و تقّطن عند حناك تو نوريها التفتريش متعها قدام البنت شن شكله .. سودت وجهي اللي يسود وجهها
يوسف : خلتها ف حالة تانية لتوا وجهها مايتفسرش
السنوسي حامق : غدوا بنتم موضوع الخطبة قدام جدكم و عمامكم و خوالكم و خليها هي منطمرة عند امها نشوفو الكلمة عند التريس ولا النساوين
و خش لداره حامق
يوسف ضحك و خش لداره
_____________________
نجاة متعفلقة و تدوي بتوشويش : انى قتلك ماتطلعيش وله ؟؟ ردي عليا !!!
هناء واقفة تسمعلها و ساكتة
نجاة : كبرتي و بديتي تتصرفي منك ليك و مش دايرة قدر لأمك !! تبي اتضحكي عليا الناس يقولو نجاة راخية بنتها مع ولد عمها و تنسرف ؟؟؟
هناء ساكتة
نجاة تفنص فيها : ردي عليا نكلم فيك !!
هناء متضايقة : كملتي هزايب ؟
نجاة : لا ماكملتش
هناء شبحت للجهة التانية : شن مازال
نجاة : اولك و اخرلك مرة تطلعي مع يوسف بروحك فاهمة ولا لا ؟؟ خير ما التليفون و مفتاح السيارة معادش تشوفيهم
هناء شبحتلها
نجاة سكتت و هي تفنص فيها
هناء خشت لدارها و سكرت الباب
نجاة : تو نوريك انى ، الا ما نخليك عند حناك لين يقرا فيك فاتحة
و سكتت شوية تقول بينها و بين نفسها .. ( لالا تو تطلع من غادي لغادي بروحها و تتصيعلي هي وياه )
اسماعيل طلع من الحمام
نجاة شبحتله و دارت روحها جوها مليح
__
هناء نحت وشاحها و اتكت ف سريرها بحوايجها
غمت روحها باليرغان تفكر ف كلام سعاد و تبكي
_____________________
محمد قاعد واقف قدام الحوش يراجي ف مكالمة من بوه و متوتر
بعد شوية خشت اخت أبرار للزنقة مروحة بالبنات
سنابل لمحت محمد واقف : توا كيف بندخل الحاجات قدامه
أبرار : هذا محمد ؟؟
سنابل : ايه هو
أبرار تشوفله : يهبل محلاه
سنابل : هيييه احترمي نفسك 😒
البنات ضحكو 😂
أبرار : مصحك غرتي مني !
سنابل : كيف بندير توا
نجوى : انتي خششيه باش يلهىٰ معاك و سلسبيل تنزل الباكوات
سلسبيل : و انى امتى مش حاصلة فيهم 😒
سنابل : لما نديرلك تشريينة معناها الأمور تمام
سلسبيل : باهي
نجوى درست و سنابل نزلت تجري لمحمد
محمد استغرب : وين كنتي
سنابل مبتسمة : صار موضوع مستعجل طلعنا
محمد : شن هو الموضوع !
سنابل : وحدة تقرا معانا حناها توفت يا روحي عليها مشينا عزيناها 😔
محمد قام حواجبه : حناها و يا روحي عليها و موضوع مستعجل !
سنابل تلخبطت : ماهي متربية عندها و ماليهاش غيرها ف الدنيا
محمد هز راسه و شبح للسيارة : و خيرها اختك مانزلتش
سنابل شدت ف ذراعه و خشت بيه : شكلها فتحت هدرزة معاهم فوتها توا
محمد شاف للبستها : هذا شني اللي لابستيه ؟
سنابل شافت لروحها : شني !
محمد : اخرلك مرة تطلعي بالسروال هذا
سنابل خشت بيه لحوش جدها : خيره سروالي
و خشو للمربوعة
محمد : قصير شن خيره
سنابل : باهي حاضر حمودي
محمد : هذا مش حجاب ؛ تطلعي و مركبة سروالك فوق و مخلية رجليك يبانو !!
سنابل : باهي حبيبي حاضر معاش تتعاود
محمد يشبح برا المربوعة : خيرك خاشة بيا هني في الظلام ؟
سنابل فتحت تليفونها و تشرين لسلسبيل : مش عارفة لقيت روحي خاشة هني
محمد قرب منها : خاطرك ف جرعة حب
سنابل شبحتله و ضحكت : خاطرك تنكد ليلتك ؟
محمد ضحك : ابدا
و شبح للتليفون : شن اديري !
سنابل : نكلم ف سلسبيل تخش خير مايشوفوها بابا ولا اصيل
و سكرت التليفون
محمد : وينك مادورتينيش هذا غر تسألي امس شن عندي ف الليل
سنابل : مش قتلك صار موضوع مستعجل ؟
__
سلسبيل نزلت من السيارة شادة باكوات تورته و ماكرون : هي باي يا بنات
نجوى و أبرار : باي
خشت سلسبيل تجري للجنان شادة الباكوات
تلفتت للقراج لقت سيارة يوسف مدرسة : يسس خششي
و ركبت بيهم
وقفت قدام حوش عمها السنوسي و اتصلت بيوسف ..
يوسف فتح الخط : الو
سلسبيل : ها برو اطلعلي فم الباب انى
يوسف شبح للاسم : مني معاي ؟
سلسبيل استغربت : شنو !!
يوسف : تي تكلمي زي النتايات الهم الاحرف خيرك هكي الزح
سلسبيل ضحكت : تي اطلع يا راجل مش وقت تطييح قدر
يوسف مصدوم سكر عليها الخط و فتح الباب
سلسبيل ضحكت : شن الجو 😃
يوسف يضحك : مليح
سلسبيل مدتله الحاجات : شد شد
يوسف شد منها : هذا شنو
سلسبيل : خليهم عندك
يوسف : قصدك ناكلهم !
سلسبيل : تبي سنابل تقتلني امالا .. حطهم عندك ف الثلاجة و غدوا الصبح ناخدهم منك
يوسف : شن اديرو من عمل !
سمعو صوت محمود نازل يغني : نخمم في الحرقة في بالي .. زعما نحرق ولا لالا
سلسبيل فنصت ف يوسف : خش بسرعة بسسرعة 😳
يوسف هز راسه بإستهزاء و خش بيهم
محمود نزل
سلسبيل تضحك بعبط : محمود ههههه شن الجو هههه
محمود بإستغراب : باهي الجو
سلسبيل حاطة ايدها ع الحيط : حتى انى باهي جوي هههههه
محمود يشوفلها : خيرك !
سلسبيل : خيرني
محمود سكت ؛ هز راسه و نزل
سلسبيل عوجت فمها و فتحت تليفونها تتصل بسنابل ..
_
سنابل : محمد ياسر و خليك بعيد
محمد يقرب منها و هي توخر : مرايف عليك يا قلبي
سنابل : محمد نعيط ره
محمد ضحك و قرصها من جنبها : عيطي ترا
سنابل تبكي و تضحك بصوت واطي : اااه 😭 محمددد 😂
شرين تليفونها شافاته و سكرت بالحمرا
سنابل : خلاص سلسبيل قتلي اركبي
محمد : شن اللغة الجديدة هادي بالتشريينات
سنابل : هادي لغة التوأم ماحد يفهمها 😂
محمد ضحك و طلع معاها للدروج
سنابل : خلاص خليك بعيد توا
محمد طبس و قامها : والله مامخليها ف خاطري
سنابل انصدمت 😳 بتعيط مش قادرة
محمد راكب بيها يشوفلها و قايم حواجبه : تكلمي ترا
سنابل قلبها يدق بسرعة و توشوش ف وذنه : محمد لا يا محمدددد 😰 تو يشوفنا حد
محمد : عادي باش نعلق عليك و نقرا فيك فاتحة 😍
فجأة ينزل محمود و يلاقيهم
محمود : ما كفااااية بقىٰ يا جدعااااان
محمد و سنابل شبحوله
محمود : هتشلللل ( بصوت حسن حسني )
سنابل فكت روحها من محمد و ركبت تجري
محمود ضحك
محمد شده من رقبته و لصقه ع الحيط : خير *****
محمود يضحك : احترمنا الزح راهو هلبا الشي يا برو
محمد شرين تليفونه شافه لقاه رقم غريب رخي محمود و نزل بسرعة بيرد
محمود لحقه : خيرك منعت
محمد يمشي و يدوي لمحمود : برا توا مش وقتك
و طلع الشارع فتح الخط : الو
عماد داهش : الو محمد
محمد : ايوه بوي
عماد : تعالالي انى في طريق المطار
محمد : روحت اليوم ؟؟ خيرك ماقلتش !!
عماد : تعالى مش وقت دوة تلقاني جنب .....
______________
1
سنابل واقفة مع سلسبيل قدام شقتهم : ووه من نجاة ووه
سلسبيل : ماخاطريش فيها
سنابل توشوش : وين الحاجات
سلسبيل : عند يوسف
سنابل ضحكت : اطلع طول
و فتحو الحوش و خشو
اسماعيل شافهم من دار المعيشة : تعالي انتي وياها
البنات خافو و خشو يرعشو : نعم بابا
نجاة تفنص فيهم و ساكتة
اسماعيل مقعمز يتعشىٰ : معادش تركبو لحوش عصام تحشمو شوية
سلسبيل شبحت لسنابل و شبحت لإسماعيل تاني : مرام شدتنا ع العشي و حلفت
سنابل زرتها الضحكة
اسماعيل : المرة هادي معليشي لكن ف الجديد ماتكونوش ثقال عليهم عيب
سنابل : حاضر بابا
نجاة تتحلف فيهم بيدها من جنب اسماعيل
البنات ضحكو و خشو لدارهم يجرو
____________________
مرام مرت عصام واقفة على طاولة الأكل و تصور في العشي : وينه لتوا عطل هلبا 😔
فتحت عَ الفيس و خشت لقروب طبخ ؛ تتفرج و اتدير في سكرينات
بعد شوية عصام فتح الباب و خش
مرام شبحتله : وينك عصومي لتوا مخلي عروستك بروحها
عصام قرب منها : تلاقيت مع صحابي ف القهوة ، خليتك راقدة لما طلعت مابيتش نزعجك و نفيقك من نومتك
مرام باساته : يسلملي الحنون انا
عصام ضحك و شبح للطاولة : شنو الحاجات الحلوة هادي ؟
و شبحلها هي : بديتي اتطيبي ؟
مرام ضحكت : لالا ازهار و نجاة اللي طيبو و انى درت الحركات ع الطاولة
عصام ضحك : اهم شي الحركات
مرام ابتسمت و قعمزت هي وياه : هما بعتوه من وقت الغدي لكن حني هونا رقدنا مشي سخنته توا و قلت نتعشوه
عصام : مرومتي
مرام شبحتله : نعم حبيبي
عصام : احم ، هو عارف ان مش وقته لكن لازم نسألك
مرام : نعم
عصام : امتى بتبدي اتطيبي
مرام انحرجت و رمشت عيونها بسرعة : قريب
عصام : امتى يعني
مرام : للأربعين
عصام قام حواجبه : اما أربعين و شهر رمضان الاسبوع الجاي
مرام : هادي العادات حبيبي
عصام : لا عادات لا شي ؛ كملي هاليومين و خشي المطبخ انى تعرفيني نحب الوجبة و مانبيش نقعد ننذل و كل مرة حد يبعتلي ف غداي ف جرت العادات
مرام بلعت ريقها و سكتت
عصام حط ايده على ذقنها : تمام حبيبتي ؟
مرام ابتسمت : حاضر يا روحي
________________________
محمد مع بوه ف السيارة داروحه راعش : باهي علاش انخطفت ؟؟
عماد : انى بروحي مش عارف يا ولدي فجأة نزلو من السيارة و طبوني زي ماحكيتلك
محمد : و حني مافيش حد كلمنا بكل ؛ و تبي الحق انى حاولت انى نوصل فيك و قعدت ندور عليك زي المهبول من مكان لمكان لكن من غير ماحسست العيلة
عماد : صحة ليك ولد بوك
محمد : لدرجة كذبت عليهم انك وصلت لتونس و مع صاحبك ناصر ف المسشفى
عماد سكت
محمد شبحله : خلي عندك علم خير ماننفضح
عماد ساكت
محمد : المهم طمني ماضربوكش ؟ ماعذبوكش !!
عماد : لالا و انى هذا اللي مستغرب فيه ، حاطييني ف استراحة مليحة و بعيدة شكلها ف قطع الرقبة ؛ سرير نظيف و ماكلة و تلفزيون تقول ف فترة نقاهة
محمد زراته الضحكة
عماد : والله شي يخوخم ؛ حتى ندوي معاهم مايبوش يردو عليا .. الحاجة الوحيدة التليفون بس هو اللي خدوه و معادش ريته
محمد : بوي بالك قاصدينك !
عماد شبحله : كيف ؟
محمد : وين نندري عليك بالك انت غالط ف حد و قالو خلي نرعشوه
عماد سكت
محمد : المهم الحمد لله على سلامتك قريب هبلت لين مش قادر نرقد الليل
عماد : الحمد لله طحت ف عصابة طيبة
محمد : انى لقيت سيارتك ف راس الشارع دخلتها للحوش
عماد اطمن : باهي الحمد لله كنت نخمم فيها صبح ليل ياراجل
محمد سكت
عماد : أمك و خوتك كويسين ؟ شن حالكم ؟؟
محمد : كويسين هونا بايتين ف حوش حناي الليلة
عماد : باهي كويس خير ؛ و مش لازم تقوللهم اني جيت الليلة خير مايورقولي
محمد سكت
____________________
2
01:00 ص
يوسف ف سريره فتح تليفونه يتصل بهناء لقي تليفونها مقفل
اتضايق ؛ فتح البلكونة و طلع يدخن
______________
1
هناء مدايرة تليفونها وضع طيران و مستمرة ف البكي
_
سنابل ف دارها هي و اختها : نسمع ف بابا يقول لماما ان عمي يبي يفض ف هناء غدوا
سلسبيل فرحت : اطلع طووول
سنابل : معناها فرصتي مليحة غدوا مع حمودي
سلسبيل : باهي فكرتي شن بتلبسي ؟
سنابل حركت حواجبها : و اللي شريته امبكري شني 😎
سلسبيل شرين تليفونها لقاته ادم : هييييه اكيد يدور فيك ع الشفرة الجديدة
سنابل : ردي عليه و لخبطيه بكلمتين
سلسبيل فتحت الخط : الو
ادم : اهلين
سلسبيل : اهلين بيك
ادم : شن الجو
سلسبيل : تمام شن جوك انت
ادم : كويس ؛ خيرك لا ركبتي الشفرة لا اتصلتي لا اعطتيني رايك ف التليفون !!
سلسبيل ضحكت : سوري هلبا يا روحي اليوم صارلنا ظرف و مافضيتش بكل ، لكن التليفون يهبلللل على قد مانشكرك شوية
ادم : تستاهلي يا عيوني
سلسبيل سكتت
ادم : شن رايك نكلمك ع الشفرة الجديدة و تعطي التليفون هذا لأختك زي اللي كترنا عليها
سلسبيل تشقلب ف عيونها : لا عادي اختي رقدت ، و اصلاً انى الشفرة ماركبتهاش لين نقصها
_
سنابل تتصل بمحمد و محمد يسكر عليها
بعتلها مسج ( ساعة و نكلمك معاي بوي )
سنابل ضحكت : تم الإفراج عليه و اخيراً
فجأة تخش عليهم نجاة : نوضي يا حمارة انتي وياها نوضي
سلسبيل سكرت الخط بسرعة
وسنابل دارت تليفونها وضع طيران و شبحتلها
جتها نجاة بسرعة و خدت منها التليفون : هدا تنسيه نهائي
و جت لسلسبيل نحت منها التليفون : و حتى انتي
البنات يصيحو : خيرككككك !!!
نجاة تفنص فيهم : باهي يا معفنات تطلعو بلا إستأذان !! خلاص استردفتو ؟؟؟
سنابل : باهي شن فيها كان سايرنا أبرار لمحل و جينا
نجاة : و ليك عين تناقشي يا قردة ؟
سنابل حمقت : انى مش قردة
نجاة تتكلم بصبعها : قردة و بهيمة يخي .. ماشااااااء الله قاعدات ف الثانوي و قالبات الدنيا على روسكم يا معفنات تهيجو طولكم و طول عصاتكم
سلسبيل : باهي كملتي المحاضرة ؟ هاتي التليفون
نجاة علت صوتها : والله ماكم رايينهم لين نمشيكم كيف مانبي
و طلعت من الدار و سكرت الباب
سنابل تتأفف : كيف بندير توا ! محمد بيكلمني بعد ساعة
سلسبيل : نفتحو الشفرة الجديدة و خلاص اكيد البهيم ادم بيتصل على رقمي و بترد عليه ماما
سنابل شهقت : هيييييه حي علينا
سلسبيل : المشكلة فاش بنركبوها
سنابل : البيلة قاعد يكافح 😍
سلسبيل : البتارية اتطيح
سنابل ناضت اتطلع فيه : تي عادي نشدوها بـ كاغط
__________________
تاني يوم 🌹
11:00 ص
يوسف اتصل بهناء لقاها كيف نايضة صبح عليها و روقها و غيرلها جوها 💕
________
03:00 م
يوسف و جده في محل اديداس
العارف شد توته : شن رايك فيها
يوسف : لالا مش لعمرك
العارف شادها : علاش خيرها ؟
يوسف : متع شباب يا جدي فوتها
العارف : لا نبيها هي
خداها و خدي معاها سبيدرو ملون و طاقية
يوسف يضحك : هيا نمشو ؟
العارف يدور : مازال مازال
يوسف : وقت علينا ياجدي مازال عندك موضوع مليح بعدين
العارف شبحله : ايه فكرتني هيا اطلع
مشو خلصو ف الكاسّة و طلعو
_____________
سعاد : انى حلفت يا امي لا يعني لا
سالمة : اليوم فضانية ولدك حي عليك تو يديروك مضحكة يسمعو بيك نساوين خوتك مامشيتيش يقولو شورها مغصبينها عليها
سعاد : الفالحة فيهم تتكلم حي عليها حي
سالمة : هما مش حايدوّو قدامك يا هبلة يتكلمو من وراك و يتشمتو فيك .. بري و افرحي و فرقي الرزاطة و العبمبر هذا وليدك البكر و مصماص الكرشة كيف تخليه بروحه ف يوم زي هذا حتى وخيات ماعنداش
سعاد متعصبة : نجاة يا امي نجااااة
سالمة علت صوتها : نجااااة ؟؟؟ نجاة تلقيها فرحانة لبنتها تصفق و ترقص و انتي اقعدي هني اسحني روحك و هي تو تستغل الفرصة و تاخد منك ولدك توكله عندها و اتطفطف عليه و انتي كولي المالح
سعاد سكتت
سالمة : اتصلي براجلك يجي يروح بيك و رطبي قلبك على وليدك ماتقسيش عليه ماليشي غيرك ف الدنيا
سعاد ساكتة
سالمة : بري اصبغي و مكيجي و البسي و وريهم انك فرحانة لولدك مش منكدة عليه ف يوم فضانيته
سعاد اقتنعت بكلام امها ؛ شدت تليفونها و اتصلت بِ السنوسي
_______________________
هناء واقفة ف حوش جدها متوترة : نحس ف روحي غريبة عليكم
البنات ضحكو 😂
أمال عمتها تضحك : هذا الشي طبيعي
روان : توا بنحسبوك بنتنا ولا كنتنا 😂
هناء : الزوز ههههه
حلومة فرحانة تغني و تصفق بإيديها : هالنهار عليه اندور 👏 هالنهار ربيع منور 👏
البنات يصفقو و ناضو فتحو المنظومة على اغاني زمزامات 💃
هناء تضحك : اجواء غريبة 😂
اروى تشوفلها و مكشرة وجهها
نجاة نزلت و خشت عليهم : وين سعاد مغطسة !!
ازهار علت صوتها : قالت تجيب الرزاطة و العبمبر و تجي
اروى : غر لمني و حنى نفس العيلة 😒
سمعتها سنابل فنصت فيها : ماهو خوالي و خوال يوسف جايين 😡
______________________
يوسف و العارف ف صالة الرياضة
يوسف واقف مع جده : بالشوية يا جدي ماتنزلش على روحك
العارف يجري ع السير و داهش : قوّي يا ولدي قوي و ماتخممش
يوسف حرك راسه : تي انزل مش كويس ليك
العارف يجري : ع الكيف يا يوسف خليني
يوسف يشوفله : حي كان مايموتلي اليوم مش وقته
_____
9
بعد نص ساعة العارف يتمرن ف سويدي
يوسف يجبد فيه من ايده : تي نوض يا جدي بتموت هكي مش كويس لصدرك
العارف داهش هلبا : خ خ خلينييي ي يا يوسـ يا يوسفف
يوسف يجبد فيه : تي اوقف خلاص بنروحو
العارف دهش هلبا و طاح
يوسف خاف : جدي ؟؟ جدي !!!
قاموه يوسف و الرجالة للسيارة ايد و رجل
يوسف يضرب فيه على وجهه ؛ جدي تسمع فيا !!
العارف داهش
يوسف يشرب فيه ف امية : اشرب مني تو تنشط غر قيم راسك بس
العارف شبحله و شرب منه
يوسف يشوفله : ها شنو !!
العارف تكّا راسه : روح بيا خلاص
يوسف ضحك و طلع بالسيارة
____________
1
07:00 م
سنابل واقفة ع المراية تشوف لروحها
لابسة جمبسوت ازرق كحلي فيه ربطة من الرقبة ؛ كمامه كلوش و كتافه مكشوفات ؛ لابسه عليه صندلي فضي عالي بس مش باين لان الجامبسوت واسع من تحت
مدايرة تسريحة شعرها فلو و قايماته بشوية نفخة من فوق
امكيجة مكياج بسيط فاونديشن و بلاشر و رسمة عين و ماسكارا و ملمع وردي 👄
خشت عليها سلسبيل : اسمعي طلبية النواشف وصلت ماركبتها الا بطلوع الروح و وتيت الطاولة توا شنو ؟
سنابل تلبس في خراصها : توا انزلي عسيلي على ماما و بابا و اصيل و ابعتيلي روان
سلسبيل : به
و نزلت تجري
___________________
مرام كيف مروحة من المزين واقفة على مراية دارها تشوف لروحها ؛ لابسة قفطان موف للركبة قماشه مطروز و فيه كم واحد
لابسة شوكر فضي و مدايرة شعرها مفتوح ع الجنب
مرام : اول مرة بننزل و بنهدرز مع عيلتك نحس ف روحي نرعش
عصام وراها لابس عربي ؛ لفتها ليه : حاتحبيهم كلهم و خصوصا مرت خوي نجاة و بناتها جوهم مليح
مرام : لكن شكلها واعرة ريتلها موقف يوم المحضر مع الزيانة لين خفت منها
عصام ضحك : هكي نظامها تحب تمشي الكل على كيفها
مرام تلفتت لعبايتها : باهي هيا حبيبي ننزلو هو هداكا
عصام شدها و قربها ليه : شن فيها لو تأخرنا نص ساعة
مرام ضحكت و فكت روحها منه : انى لو بنسمع كلامك معاش يصير من النزول
عصام ...
مرام هربت منه و لبست عبايتها : انى بننزل
عصام ضحك و نزل معاها
_______________________
روان تشوف لسنابل : شن مدايرة لخوي حي عليك تو ياكلك 😍
سنابل ضحكت : ياكل عينه ؛ المهم رعشيه باش يركب يجري
روان : عيب ماتوصيش
سنابل : هيا امالا بسرعة و قولي لسلسبيل تركب وراه باش تعسلي في الدروج
روان تشوف للطاولة : الله سهفتيني ف الحب
و شبحت لسنابل : خاطري نحب
سنابل ضحكت بصوت عالي : بري انزلي اجري
أحمد وراء روان : حولي نبي نشووووف خيركم
روان مدرقة عليه : هيا انزل
احمد يعافر فيها : تي حوليييييي
روان ضحكت شداته من ايده و نزلت بيه
سنابل سكرت الباب و قلبها يدق
خشت لدارها تبخ في عطرها
_______________________
(( مربوعة حوش الجد فيها العمام و صغار العم و خوال يوسف و هناء ❤️ ))
__
(( و الداخل عند حلومة العيلة و امالي نجاة و سعاد ))
العيلة مصدومين ف سعاد 😳
جتهم صابغة شعرها اصفر و امكيجة ف المزين
لابسة سروال اسود و بلوزة بيضاء كمامها كلوش
تتجكتر عليهم و حاسبة ف روحها
ازهار وشوشت نجاة : العزوزة بدت تغير من توا
نجاة شادة ضحكتها : تسخف اقسم بالله
هناء تشوف لسعاد و متضايقة كل ماتجي عينها في عين سعاد تتلخبط و تتلفت للجهة التانية
مرام مقعمزة معاهم ساكتة و متحشمة
امال : عريستنا كيف حالك ؟؟
مرام ابتسمت : الحمد لله
قعمزت بحداها هناء : شن جوكم انتي و عصام
مرام شبحتلها و ضحكت : الحمد لله تمام
هناء : امس ريتك منزلة عشاك ع السناب يهبل الجو اللي مدايرتيه
مرام : نحب انزل
هناء ضحكت : ايه عارفة
مرام : يومها ناشبتك ع الفيس لكن مارديتيش عليا شكلك مانتبهتيش
هناء : اه الماسنجر ماسحاته من عندي لان يبي ابديت جديد و انى معادش دورته الاكترية نهدرز ع الفايبر
مرام : اها
اروى مقعمزة معاهم تسمع و ساكتة لقطت موضوع الماسنجر حطاته ف راسها .. ( تو نوريك ياهناء يوسف لا ليا ولا ليك )
___________________
روان واقفة مع محمد خوها
محمد يفنص فيها : تشوفي فيا مش فاضي توا وله ؟ شن تبي فيا
روان : سنابل مريضة اركب شوفها بسرعة
محمد خاف : خيرها ؟
روان : فجأة داخت و طاحت على راسها انى خفت ماعرفتش نتصرف قلت نجيك انت
محمد ركب يجري راعش
روان تشوفله و تضحك
جتها سلسبيل : ها شن صار ؟
روان شبحتلها : ركب 😂
سلسبيل ضحكت و ركبت تجري
أحمد : حتى انى بنركب
شداته روان من حوايجه و دخلاته لحوش جدها
__
2
سنابل واقفة تراجي و ترعش
الباب طق
خدت نفس عميق و فتحت مبتسمة : اهلااا
محمد داهش و مصدوم ؛ يتفرج عليها من فوق لتحت و ساكت
سنابل : خش
محمد : مش مريضة ؟
سنابل شداته من ايده و دخلاته و سكرت الباب
محمد يشوف للطاولة و لسنابل و مصدوم
سنابل حاطة ع الطاولة نواشف و سلايط و تورته و ماكرون و شموع و بوكس الهدية
و فاتحة أغنية رومانسية هادية
سنابل شدت محمد من ايديه : شن رايك ف المفاجأة حبيبي
محمد حضنها : عندك علم خفت عليك قلبي حسيته شرين ف رجليا
سنابل تضحك
محمد : روان كيف حطتلي الموضوع خلتني نتخايلك بأسوأ حالة
سنابل شبحتله : لاني عارفاتك مش حاتركب قلت هكي انسب شي
محمد ضحك ؛ شدها من ايدها يلود فيها : ماشاء الله ماشاء الله
و قربها ليه : تبي تهبليني اكتر من ما انى هابل فيك ؟؟
سنابل ضحكت : ايه ياريت
محمد ضحك
سنابل : احمممم توا بتسلملي روحك و بترقص معاي
محمد ضحك : مانعرفش
سنابل : ساهلة ساهلة
فتحت أغنية ( Perfect ) لِـ المغني Ed Sheeran
و بدو يرقصوا ❤️
I found a love for me
Darling just dive right in
And follow my lead
Well I found a girl beautiful and sweet
I never knew you were the someone waiting for me
Cause we were just kids when we fell in love
Not knowing what it was
I will not give you up this time
But darling just kiss me slow
Your heart is all I own
And in your eyes you're holding mine
Baby, I'm dancing in the dark with you between my arms
Barefoot on the grass, listening to our favorite song
When you said you looked a mess
I whispered underneath my breath
But you heard it
Darling you look perfect tonight ❤️
سنابل تهمس لمحمد ف وذنه : نحبك ❤️
محمد شدها من خصرها و قنط عليها
_________________________
محمود خش لحوش جده مدخل سفرة القهوة
ازهار : محمود اركب اجري للحوش جيبلي سفر الفضة ع الطاولة تلقاهم
محمود تكنطا : اياح مش وقتهم توا
ازهار فنصت فيه : اركب جيبهملي
محمود طلع متكنطي
و هو راكب ف الدروج لقي سلسبيل مقعمزة ع الدرجة تلعب في لعبة الدودة متع البيلة
ضحك : خيرك هني ؟
سلسبيل انخلعت و شبحتله : اها ؟
محمود : شن اديري بروحك
سلسبيل تلخبطت : شي كساد
محمود قام حواجبه : قلتليلي كساد !
و بدي يسمع في صوت الاغنية جاية من حوش سلسبيل
قرب من الباب : تسمعي ف اللي نسمع فيه ؟
سلسبيل ناضت تجري : لالا مانسمعش
محمود ضحك بصوت عالي و ركب : اااااخ و خلاص
يـتـبـــع .
