رواية صغار العم الفصل السادس عشر 16 بقلم مسرة اسامة
روايــة #صغار_العم
الحَـــلْـــقـــة الــسـادســة عــشـــر 🌸
محمود : شن اديري بروحك
سلسبيل تلخبطت : شي كساد
محمود قام حواجبه : قلتليلي كساد !
و بدي يسمع في صوت الاغنية جاية من حوش سلسبيل
قرب من الباب : تسمعي ف اللي نسمع فيه ؟
سلسبيل ناضت تجري : لالا مانسمعش
محمود ضحك بصوت عالي و ركب : اااااخ و خلاص
_____________________
يوسف مع صاحبه مهاب في قهوا
مهاب : معقولة مسيب فضانيتك و جاي يا راجل
يوسف : شن بندير ماد وجهي بينهم مكاني غلط
مهاب : تي حوشكم الزفت اما مكانك غلط
يوسف يولع في دخانه : لالا خليني هني الأمور طيبة
مهاب ضحك و وقف : شوية نجيب زوز قهاوي و نجي
يوسف ينفخ ف الدخان : مدابيك نص نص
مهاب و هو ماشي : تمام به
يوسف فتح تليفونه و اتصل بهناء ..
هناء شافت تليفونها ضحكت
و ردت : الو
يوسف : هلا بغاليتي
هناء : اهلا بيك
يوسف : شن الأجواء عندك
هناء : حلوة لكن حاسة بشعور غريب ابصر كيف
يوسف ضحك : بعدين ماترقديش لين نجيك
هناء : وين تجيني
يوسف شاف مهاب جاي : نجي نشوف خطيبتي و نباركلها
هناء ضحكت : اوكى
يوسف : سلام ... و سكر الخط
مهاب حط القهاوي و قعمز : ليا مدة على أشرف ؛ معاش كلمك ؟
يوسف خدي القهوة يشرب فيها : لالا
مهاب سكت
يوسف : حتى موضوعي مايندريش عليه
مهاب استغرب : علاش مش قايله ؟ تو بيتكنطا منك لما يسمع
يوسف : ماهو طلبني فيها من قبل و انى سكرتله الموضوع
مهاب : شن هي اللي طلبك فيها ؟
يوسف : بنت عمي
مهاب سكت شوية و قال : اما هي اللي ريتها يومها و خبطت فيها ؟
يوسف علّا صوته : تي اللي انى خطبتها ياراجل خيرك تخرط
مهاب تفاجأ : بالله عليك ؟
يوسف ينفخ ف الدخان : والله
مهاب : باهي علاش ماقلتلاش انك تبيها
يوسف : لان وقتها ماكانش صاير شي
مهاب : و هو منين يعرفها
يوسف : شافها ف المطار لما روحنا
مهاب سكت
يوسف طفي دخانه ف الطبلة : نخمم فيه لما بيسمع
مهاب : نقولك راي ! كان جي و لامك قوله صاير موضوعي معاها من وقتها و ماقدرتش نقولك
يوسف هز راسه : لالا مش راي
مهاب : هذا انسب كلام تقدر تقوله ؛ و هو مايعرفهاش يعني شافها بس حتى كان يحبها نقولو انه تو يكرهك و واحد .. لكن قوله الكلمتين اهما تو يفوت و يفرحلك
يوسف ساكت
_________________________
الرجالة ف المربوعة يهدرزو و العارف مقعمز و واخده النوم تاعب من الرياضة
شافه اصيل ضحك و غمز عصام
عصام شبحله ضحك كيف بيكلمه ..
أصيل : خليه خليه
عصام شبحله
أصيل فتح تليفونه و صوره
عصام يضحك : مبردك الزفت
اصيل يضحك : خلي نذلوه بيها شوية
عصام يحرك ف العارف : بوي ؟؟ بوي نوض مش وقت نوم
العارف فتح عيونه و شبحلهم : وين وصلتو ؟
احمد جي لأصيل : و راس اصيل ابعتهالي
أصيل يشوف للصورة : نبعتلك عينك روح
احمد : بالله عليك عجبتني
اصيل : لالا
احمد يترجّا فيه : و راس امك و بوك بالله عليك عجبتني
اصيل : تي وين بنبعتهالك و انت ماعندكش تليفون
احمد مشي لبوه : بابا اعطيني تليفونك
عماد شبحله : تليفوني راح مني ف تونس
احمد مشي يجري لأمه خدي تليفونها و جي لأصيل
احمد : هيا ابعتهالي
_______________________
..
نزل محمود من حوشهم شاد سفر الفضة : يا قعادك تحرسي فيهم زي ابو ماجد متع باب الحارة
سلسبيل شبحتله ع الجنب و سكتت 😒
محمود : المفروض يديرولك معاش مش راي هكي
4
_______________________
الداخل عند حلومة العيلة ف الدار يدربكو و فرحانين
خش محمود شاد السفر : روان !! .. رواااااان !!
جاته روان تفنص فيه : خيرك تلعلع !
محمود فنص فيها : انلعلع عينك يا امسخة
روان قلبت وجهها و سكتت
محمود مدلها السفر : شدي مني و قوليلهم يسكرو افامهم الي ينبحو داخل
روان : تحشم شن ينبحو 😠
محمود مشي و خش للمربوعة
روان خاشة للمطبخ : مش عارفة ماما على من متوحمة
__
سعاد قعمزت جنب هناء مبتسمة
امال : سعاد ! شن شعورك بهناء كنتك
هناء تلخبطت
سعاد شبحت لهناء و شدتها من ورا ظهرها : اي والله هنيوه بنيتي اللي ماجبتهاش بطني ، كنت نتمنى فيها تكون من نصيب اوسيفه ف قلبي من زمان ؛ و وين سمعت انه يبيها قريب طقيت السمي من الفرحة
هناء ساكتة و مصدومة 😳
نجاة ابتسمت : ايه حتى هي وين تلقي زيها
مرام شادة ضحكتها
هناء تبي تغير الموضوع : وين خواتي ؟
روان فنصت فيها : تو يجو
هناء مافهمتهاش و سكتت
نجاة : والله الا حق مغطسات من بكري
و ناضت وقفت : خلي ندير دوره ع الشغالات و تو نشوفهم بالك فوق
و طلعت من الدار و مشت للمطبخ
3
اروى جت جنب هناء : هنيوه وريني الصور اللي صورناهم مع بعضنا
هناء تهدرز مع مرام ؛ شبحتلها : تو نبعتهملك بعدين
اروى : غر وريهملي توا و بعدين ابعتيهم براحتك
هناء فتحت تليفونها و اعطتها تشوف
اروى شافتهم ع السريع و خشت ع الفايبر بعتت صور هناء اللي مصورتهم بروحها للفايبر متعها و مسحت المحادثة
هناء لاهية تهدرز مع مرت عصام
اروى مدتلها التليفون : هاك يهبلو محلاهم
هناء خدت منها التليفون
اروى : ابعتيهملي بعدين 😊
روان ناضت ورا نجاة لقتها كيف طالعة من المطبخ : مرت عمي خليك تو نركب انى
نجاة : لالا اقعدي
و خشت للدروج
روان وراها تعلي ف صوتها : يا مرت عميييي
نجاة شبحتلها : خيرك تصيحي يابنت
روان تعلّي ف صوتها : نبيك تجيبيلي معاك شحن سامسونج
___
سنابل و محمد مقعمزين يتعشو و سلسبيل قاعدة مقعمزة ف مكانها سمعت صوت امها و روان خافت و وقفت شدت ف الحديد
ركبت نجاة لقتها : شن اديري هني ؟
سلسبيل بدت تبكي : تعاليلي يا ماما بسرعة 😭
نجاة انخلعت و جتها تجري : خيرك ؟
سلسبيل : ريت غولة ف حوشنا 😭
نجاة انصدمت : بسم الله الرحمن الرحيم
روان ساكتة 😐
سلسبيل : نزليني بسرعة معادش نبي نقعد فوق 😭
نجاة شدتها من ايدها : اختك وين ؟
سلسبيل : نزلت توا و ممكن خشت للحمام
نجاة : باهي انزلي معاي هيا
سلسبيل شدت ف امها و نزلت و هي تفنص ف روان
روان تشوفلها و ساكتة
سلسبيل نازلة تبكي : ااه يا ماما كان تشوفيها تخوف و هي تفنص فيا عيونها حمر 😭
نجاة : أعوذ بالله من الشيطان الرجيم ؛ هذا تقعميزك ف الحمام و تعطيلك فيه شوفي شنو طلعلك
سلسبيل علت صوتها : اسكتي يا ماما معاش تزيديني 😭
و خشو لحوش حلومة
_
3
روان اتطقطق على سنابل ✊
سنابل وقفت : ان شاء الله مش ماما بس
محمد ضحك
سنابل من ورا الباب : مني ؟
روان : اني افتحي
سنابل فتحت : ايوه
روان : انزلو بسرعة امك وصلت قدام الباب و نزلتها سلسبيل
سنابل خافت : حي عليا كان ماتولي
محمد شبح لروان : انزلي انتي خلاص
روان نزلت
و محمد وقف
سنابل شبحتله و ردت الباب : تمنيت الوقت ماتمش
محمد قرب منها و باسها من جبهتها : شكرًا على كل شي حبيبتي
سنابل ابتسمت : تستاهل اكثر حمودي
محمد كيف بيطلع ..
سنابل شداته من ايده : راجي
محمد شبحلها : نعم
سنابل خدت الهدية و مدتهاله : نسيت هادي
محمد ضحك و حضنها : والله ماني عارف شن بنقول و لا شن بنعبر
سنابل تضحك
محمد شبحلها و خداها منها : ربي يخليك ليا و يجمعني بيك بالحلال
سنابل تحشمت و سكتت
محمد : بعدين كيف بنكلمك
سنابل غمزاته : تو نتصرف
محمد : تمام به
( محمد طلع و ركب لحوشهم ؛ حط الهدية ف داره و نزل ..
و سنابل خشت لدارها غيرت حوايجها و لمت الماعين و الماكلة و بعدين خشت لدار امها و قعدت اتدور على تليفونها خداته و نزلت )
__
سلسبيل ف مطبخ حلومة حاطة ايدها على قلبها داروحها راعشة : اااه يا ماما مشناها مشناها 😭
( الشغالات يشوفولها و مستغربات )
ازهار حاطة ايدها على راس سلسبيل و تقرا عليها ف قرآن
نجاة : اذكري ربي و اقري قران تو تنسي
سلسبيل تمسح ف دموعها : باهي
نجاة شبحت للشغالات : حطيتو العشي ؟
وحدة منهم : ايه كيف حطيناه
خشت سنابل : سلسبيييل ؟؟ خيرك تبكي !!
_____________________
11:00 م
تمت الفضانية على خير و هناء باركولها العيلة و صاحباتها اتصلو بيها و هي في غاية الانبساط
ركبو الكناين كل وحدة لحوشها و قعدو العمام و البنات سلسبيل و سنابل عند حلومة
هناء ركبت لحوشهم و اتكت ف سريرها
فتحت تليفونها و اتصلت بيوسف ..
يوسف رد : اها ياعيوني
هناء بصوت واطي : وينك لتوا عطلت
يوسف : انى وصلت خليك فايقة
هناء : معاش قادرة نقاوم
يوسف : وصلت يابيبي لحظات بس
هناء : اوكى
________
عماد كيف راكب لحوشه و يخمم ..( كيف بنكلمها و انى سيبتها ف العرس ؟؟ حتى تليفون ماعنديش باش نتصل بيها .. شن بيصبرني للصبح باش ناخد شفرة .. ان شاء الله خير بس اكيد بنلقاها منهارة )
سنابل لمحت عماد كيف بيركب لحوشه لحقاته ف الدروج : عمي عمي !!
عماد تلفت : ايوه
سنابل جاته : بصراحة فيه حاجة صارت و انت مسافر ماقدرتش نقول عليها لحد
عماد استغرب : ان شاء الله خير
سنابل فتحت تليفونها : شوف الصورة هادي
عماد خدي منها التليفون و انصدم : هذا شني !!
سنابل : انى ياعمي لين رعشت لما ريتها
عماد يشوف لصورته ف التليفون و مصدوم
(( سنابل سحبت صورته من الفيس و كتبت عليها ارقام و حروف مش مفهومات و مدايرة فيها خلالات و خيوط معقودات و مصورتها ))
1
سنابل : لقيتها منزلينها في قروب ف الفيس و كاتبين عليها لقوها في مقبرة انى لين جسمي صقع و مارقدتش الليل يومها
عماد وجهه عرق و متخزرط : هذا شن معناه !!!
سنابل : هذا سحر يا عمي بعيد علينا
عماد مصدوم : من مدايره !!
سنابل : ناس مايخافوش ربي
عماد شبحلها : علاش مش قايلتيلي عليها الصورة هادي ؟
سنابل : انى ريتها اول امس بس
عماد سكت و شبح للصورة تاني
سنابل : سألت شيخة قتلي هاذي وحدة ساحراته و تبي تخرب بيته
عماد شبحلها و مازال مصدوم قلبه يدق بسرعة
سنابل : الحمد لله ياربي ان عرفنا ؛ شكلك ادير ف الخير انت و مرت عمي ازهار .. توا حصن نفسك و اسأل شيخ شن لازم اتدير
عماد : وصليني باللي لقاها ضروري
سنابل : معاش حصلتها اللي منزلة الصورة مابتش ترد عليا شورها خافت ؛ لكن قالت لوحتها ف البحر
عماد مدلها التليفون و ركب لحوشه يرعش
سنابل ضحكت و خشت لحوشهم
ردت التليفون ف مكانه وين ماحاطاته نجاة و كيف بتطلع من الدار تلقىٰ نجاة واقفة كانت تشوف فيها
سنابل : هييييه 😲
نجاة تقرب منها و تفنص فيها : شن نديرلك توا يا قردة ؟؟؟
سنابل خافت و ركبت فوق السرير : اسفة بالله عليك سامحيني
نجاة ركبتلها بتضربها : انتي تبي الرباية من الصفر يا معفنة
سنابل هربت منها و طلعت من الدار
نجاة وراها : تعالي هنيييي يا فرخة
سنابل نزلت تجري لحوش جدها
نجاة حامقة : يرزيني فيكم بس ؛ ياريتني عقمت ولا جبت هالخلفة العوجة
1
___
أصيل ف الجنان يتكلم ف التليفون : انى قتلك ماتمشيش لحوش خالتك ولا ؟؟
صاحبته تناقش فيه .......
أصيل : انتي ماتسمعيش في كلامي و انى اللي ماتسمعش كلامي ماتناسبنيش
................
أصيل : واااك توا علاش البكي حبيبتي تعرفيني مانحبش نخليك زعلانة
................
أصيل : باهي يا عمري اهدي و امسحي دموعك ... باهي تمام الليلة اقعدي لكن غدوا الصبح تروحي انى مانتحملش حسي بيا
خش عليه يوسف
أصيل شبحله : شوية و نكلمك
و سكر الخط
يوسف ضحك : خليك خليك
أصيل ضحك : اوووه نسيب ! تي وين هربت
يوسف يضحك : خليتهالكم واسعة
أصيل : مبارك مبارك
يوسف : الله يبارك فيك عقباليك
___________________
سنابل : مالحقتش حتى نلبس بيجامتي
سلسبيل : تستاهلي يا غبية مش وقته و انتي عارفتيها بتركب
سنابل : تي خديته من بكري انى ؛ هذا كله باش نوري لعمي الصورة
سلسبيل : ايه حقا شن قال
سنابل : بدي يرعش زي الجريدة 😂
سلسبيل ضحكت : اااه محلاها فيه
سنابل : توا شن بنلبس انى
سلسبيل : البسي قفطان امّيمه و خلاص
سنابل : لالا مانحبهمش القفاطين تعرفيني
سلسبيل : انى مش حانركب توا و هناء ممكن رقدت
سنابل تكنطت : اووف 😤
خش يوسف هدرز شوية مع العيلة و باركوله و طلع للجنان لقي اصيل قاعد يتكلم
قعمز ف الطاولة و يدخن
اصيل سكر تليفونه و ركب لحوشهم
يوسف اتصل بهناء ..
هناء خداها النوم ؛ حست بتليفونها يهز شافاته و ردت : الو
يوسف : انزليلي انى ف الجنان
هناء سكتت
يوسف : هنوو ؟ الو ؟
هناء مغمضة عيونها : نعم
يوسف : هيا نوضي ؛ انى لوطه
هناء : باهي حاضر
سكرت الخط و قعدت ف مكانها
بعد شوية يوسف عاودلها ..
هناء ماتردش غلبها التعب
يوسف وقف لم رشاد صغير و قعد يحذف فيه ف بلكونة دارها
هناء فتحت عيونها : بنرررقد 😭
يوسف اتصل بيها تاني ..
هناء ردت : الو
يوسف : بتنزليلي ولا نركبلك ؟
هناء : يوسف انى تعبانة هلبا
يوسف : هيا نراجي فيك
هناء سكرت الخط و وقفت لمت شعرها و نزلت
__
يوسف يراجي فيها ف الجنان اول ماطلعت جبدها من ايدها و مشي بيها ورا الحوش
هناء انخلعت و قلبها دق بسرعة
يوسف وقفها ع الحيط و وقف قدامها
هناء داهشة : يوسف خيرك !
يوسف قرب منها : مبروك علينا يا قلبي
هناء ابتسمت : الله يبارك فيك
يوسف سكت و قعد يشوفلها
هناء ضحكت : يوسف ؟
يوسف فتحلها شعرها : هذا علاش لامتيه
هناء تساوي فيه بيدها : انت نوضتني من نومي شوف حالتي بالبيجامة نازلتلك
يوسف شدها من خصرها : حتى تنزليلي بقفطان حناي عندي احلى من القمر المهم جيتيني يابيبي
هناء ضحكت و حطت ايدها على لحيته
__
محمود فتح روشن داره و وقف يدخن
بعد شوية كمل دخانه و كيف بيلوحه لمح يوسف و هناء واقفين
ضحك : حتى انى لازم نربي كبيدة مايمشيش الحال هكي ؛ نقعد نتفرج و ضاربني الجفاف !!
لوح الدخان بعيد و سكر الروشن
___________________
سنابل راقدة ف فراشها ف حوش حلومة و تهدرز مع محمد ف التليفون
محمد : خنبة ؟
سنابل تضحك : ان شاء الله امّيمه تسامحني مفيش الا تليفونها باش نكلمك
محمد : سكري تو نعاودلك خير مايضيع رصيدها
سنابل : به
سكرت و محمد عاود اتصل
سنابل ردت : ايوه
محمد : اها يا قلبي
سنابل ابتسمت تلعب بشعرها و ساكتة
محمد : نقولك حاجة ؟
سنابل : قول حاجات
محمد : انى بننزلك معاش قادر
سنابل خافت : لالا خليك ف مكانك
محمد : علاش ؟
سنابل تشوف لروحها لابسة قفطان باصمة : توا ليل علاش بتنزل
محمد : نشوفك ربع ساعة و نركب
سنابل : لالا فوت فوت
محمد سكت شوية و قال : به
سنابل استريحت و سكتت
محمد : شوية و نكلمك بنشرب امية
سنابل : اوكى
و سكرت الخط
سلسبيل تهدرز مع ادم : شنو شنو شنو ؟؟؟؟
ادم : بنجيب امي تخطبك معاش قادر نصبر
سلسبيل قعمزت تندب ف خدها : علاش مستعجل يا قلبي مازال الوقت 😅
ادم : اما مازال الوقت و انى نعرفك ليا اكتر من عام
سلسبيل : ع الأقل لين ناخد شهادتي الثانوية مش توا .. مازال صغيرة ع الخطوبة و الجو هذا
ادم : باهي نجي نعطي فيك كلمة بس
سلسبيل تشقلب ف عيونها : لا كلمة لا جملة
ادم تكنطا : يعني ماتحبينيش ؟
سلسبيل تكنطت : اييييي علينا فكنا منها الدسكة اهيا ترا
ادم : شن الأسلوب هذا ؟
سلسبيل حمقت : و خيره أسلوبي ؟؟؟ مش عاجبك اووه !!
4
سنابل بحداها : هييه سكري فمك ليل
سلسبيل تتكلم : احترم نفسك ايواااااه
ادم مصدوم : تي خيرك الزح فاش غلطت فيك ؟
سلسبيل : و تقولي الزح يا معفن ؟؟؟؟
ادم علّا صوته : تي خيرك هبلتي النهار الاحرف ؟؟؟
سنابل توشوش : خيره ؟؟
سلسبيل تأشرلها بيدها بمعنى شوية بس
ادم : نقولك بنخطبك تقوليلي فكنا منها الدسكة اهيا !!!
سلسبيل : لا انى قلتهالك لما سألتي
و تقلد فيه بصوته : يعني ماتحبينيش ؟
ادم تعفلق : هيا بلا تمهتيك زايد خيرلك
سلسبيل : و شن بتديرلي يعني ؟؟ 😡
ادم سكت
سلسبيل : انى مش مفكرة في الزواج توا ، خاطرك تتزوج قول لأمك تخطبلك اول وحدة قنينة تقابلها
ادم : لكن انى نحبك انتي يا سنابل و مانبيش غيرك
سلسبيل : ماهو انت شوف كيف تعامل فيا و تلقحلي 😭
1
سنابل تضحك 😂
ادم : باهي علاش تبكي توا يا روحي
سلسبيل نزلت التليفون متكنطية : كله منك يا حيوانة خليتيني حاصلة هالحصلة
سنابل : الله غالب عليك 😂
سلسبيل ردت التليفون لوذنها : ادم انى معاش قادرة نتكلم خلاص سكر 😢
ادم : لا مش حانسكر و انتي زعلانة و دموعك على خدك
سلسبيل : انى متضايقة شوية بس ؛ خليني نرتاح ساعة و نكلمك
ادم : تمام حبيبتي ساعة و انى نعاودلك
سلسبيل : باي
سكرت الخط و دارت البيلة خارج التغطية : يرزيني فيه مالقيت ماندير ف عمري
سنابل : خيره ؟؟
سلسبيل : يبي يخطبنا
سنابل : شنو ؟؟
سلسبيل : يبي يخطبني .. وااك قصدي يخطبك
سنابل تضحك
سلسبيل وقفت : خلي نمشي للمطبخ ناكل حاجة نرفزني الحمار
سنابل ضحكت و قعدت متكية
بعد شوية
خش عليها محمد : سنبولتي حبيبتي
سنابل شبحتله و انخلعت : لاااااا 😲
محمد تخزرط : خيرك ؟
سنابل غطت روحها : اطلللللللع
محمد : خيرك شن فيه ؟
سنابل : اطلع 😭
جتهم سلسبيل تجري : شن فيه ؟؟
و شدت محمد من حوايجه لصقاته ع الحيط : شن درت لأختي ؟؟
محمد دفها و مصدوم : مادرتلها شي شافت وجهي ناضت تعيط
سلسبيل شبحتلها
سنابل : طلعييييييه بسرعة
سلسبيل جبدت محمد من ايده : اطلع خير ماتنوض امّيمه
محمد طلع وسط الحوش مصدوم
سلسبيل ولت لسنابل و سكرت الباب : خيرك ؟؟
سنابل قعمزت داهشة : هذا شن نزله توا
سلسبيل : و كان نزل شن فيها
سنابل : شوفي منظري ! امبكري شافني متكمة و توا متحندبات ايامي
سلسبيل ضحكت : قصدك العياط هذا كله على خاطر البرستيج متعك 😂
سنابل : اطلعي ركبيه
سلسبيل : نوضي بدلي حوايجك و اطلعي انتي كلميه
_______________________
5
يوسف حاط ايده على خد هناء : يعني غدوا بتدبري كيف بتكوني معاي
هناء : هما اماليك امتى طالعين
يوسف : الصبح بكري و مش حايروحو الا ف المغرب
هناء : يوسف مانقدرش نقعد معاك بروحي
يوسف : بناكلك يعني ؟
هناء ضحكت : و ناسي ماما انت ؟
يوسف : قوليلها طالعة لحوش وحدة من خالاتك ولا وحدة من صاحباتك و تعالي عندي
هناء سكتت
يوسف يبوس ف ايديها : نبي ناكل من ايديات حبيبتي غدوا و نبي نعيش معاها يوم حلو .. ماتحرمينيش هنو
هناء قلبها يدق : ان شاء الله خير
يوسف : جاينا شهر رمضان يا بيبي و بننحرم منك ، خليني نشبع من شوفتك
هناء : حني ف نفس الحوش علاش مش حاتشوفني ؟
يوسف ضحك : حانغض البصر طبعا
هناء ضحكت بصوت عالي
يوسف فنص فيها و ضحك : بالشوية
هناء تضحك : ضحكتني
يوسف : دوم الضحك حبيبتي
هناء تشوفله و عيونها قلوب
يوسف شبح يساره : شوفي شوفي
هناء تلفتت : شنو
يوسف باسها ف خدها
هناء شبحتله و انصدمت 😳
يوسف : اححح 😍
هناء دفاته و مشت بسرعة
يوسف ضحك و لحقها
هناء حست بيه وراها تلفتت
يوسف : جايك جايك
هناء خشت الحوش و ركبت الدروج بسرعة
و يوسف راكب وراها
سرع خطواته و شدها من ايدها و قربها ليه : وين هاربة يابيبي
هناء قلبها يدق و خايفة : يوسف حول والله نخاف منك هكي 😢
يوسف : علاش خايفة يابيبي
هناء ترعش : تخوف فيا بحركاتك هادو
يوسف باس ايدها : اسف يا عيوني ؛ والله ماتخافي مستحيل نتمادىٰ معاك او نديرلك شي بالغصب
هناء سكتت و تشوفله
يوسف : مش كان اناشب فيك معناته تفهميني غلط
هناء هزت راسها
يوسف ضحك : و ماتغيريليش رايك على غدوا نراجي فيك
هناء ضحكت : ان شاء الله
يوسف حط ايده على خدها : و نتأسف منك مرة تانية حبيبتي
هناء ابتسمت
يوسف باسها من جبهتها
________________________
محمد : وينها ؟
سلسبيل : اهي طالعة راجيها شوية
سنابل غيرت القفطان و لبست حوايجها الاولات
وطلعت
محمد قرب منها : خيرك قعدتي تعيطي ؟
سلسبيل خشت للدار و خلتهم
سنابل : انت خلعتني
محمد مستغرب : شن خلعتك و انتي فايقة
سنابل خداته من ايده و قعمزو ع الكنبة : فوت توا حبيبي و قولي خيرك نزلت
محمد قاملها خصلتها من وجهها : رايفت عليك ياعمري
______________________
11:00 ص
نجاة راقدة ف سريرها و هناء واقفة بحداها : خليني نمشي البنات كلهم ماشيات
نجاة مغمضة عيونها : ماتحسيش ف التعب نايضة بكري و موتية روحك بتطلعي ؟
هناء سكتت
نجاة شبحتلها : المفروض صاحباتك هما اللي يجوك و يباركولك مش انتي تمشيلهم
هناء : قالو بيجوني غر اليوم عيد ميلاد وحدة منهم بنديرولها مفاجأة
نجاة : الساعة ستة العشية تكوني ف الحوش
هناء فرحت و باستها من خدها : حاضر ماما
و طلعت من الحوش ؛ لقت يوسف واقف ضحكت
يوسف : شن صار
هناء مدتله مفتاح سيارتها : اطلع درسها بعيد باش ماتشكش فيا
يوسف جبدها من ايدها و دخلها للحوش : قوليلها خطمت عليك وحدة من البنات
هناء ضحكت
يوسف سكر الحوش و شبحلها
هناء نحت وشاحها : هيا للمطبخ
يوسف يقرب منها
هناء خافت و بدت توخر : يوسففف ! راهو عيطة وحدة تلم العمارة
يوسف حضنها و يدويلها ف وذنها : هنوو
هناء سكتت
يوسف : اهديلي شوية بيبي
هناء ساكتة و قلبها يدق
يوسف مغمض عيونه : خليني ناخد منك جرعة حنان لأني محتاج
هناء حاضناته و ساكتة
_________
12:00 م
هناء ف المطبخ اتطيب ف وجبة حوت
يوسف واقف بحداها و يتفرج
هناء شبحتله و ضحكت : انت بتساعدني ولا بتشوف بس
يوسف قرب منها و وقف من وراها يلم ف شعرها : هذا زي اللي حسيته ضايقك
هناء تضحك : لااا اتدغدغ فيا
يوسف يدويلها ف وذنها : نحبك هلبا بيبي
هناء تلفتتله : حبيبي ماتشتتش أفكاري و تخليني نذوب معاك
يوسف ضحك و قرصها من جنبها : كيف ترا
هناء ضحكت و وخرت
يوسف قرب منها و حضنها
هناء تضحك : يوسف !! هكي معاش يصير من الماكلة و تقعد جعان ره
__________________
03:30 م
بعد الغدي هناء دارت شاهي و قعمزت هي و يوسف ع الكنبة
يوسف شد الاي باد متعه و فتحه
هناء قربت منه : شن تشوف
يوسف شبحلها و سكره
هناء تصبله شاهي : اشرب طاستك توا و بعدين افتحه
يوسف خدي منها الطاسة و يشرب
هناء لمت شعرها بقلم : تعرف شهدره الحوت اكيد ريحته في الجنان تو يورقولنا
يوسف : عادي مش موضوع ؛ تسلم ايديك بيبي
هناء : صحتين
و شربت جغمة من الشاهي حرقها
قعدت تمروح على فمها : احيييه محرها
يوسف قرب وجهه و شبح لفمها : ترا نشوف
هناء ضحكت و دفاته من وجهه : بطل
يوسف ضحك
هناء حطت الطاسة : خليه لين يبرد
يوسف حط ايده وراها ع الكنبة
هناء شدت الاي باد و فتحاته : على شن كنت تتفرج
يوسف : خشي ع الصور
هناء خشت عليهم لقتهم صور ديار نوم : محلاهم
يوسف يشوفلها : اختاري منهم وحدة
هناء تشوف ف الصور و منسجمة : شوف هادي حلوة هلبا ؛ يركب عليها يرغان سكري او موف يمشو الاثنين
يوسف يشوفلها و ساكت
هناء فتحت على صورة تانية : هادي احلى ، سمبل هلبا و يركب عليها اي لون سواء ستار او مفرش مش مقيدة و تحسها عصرية
يوسف : اممم
هناء تشوف ف باقي الصور و مش عارفة تختار
يوسف قام ايده و فتحلها شعرها
هناء شبحتله و هو دار روحه يشوف للصور
هناء ضحكت
يوسف شبح لعيونها : خليه هكي
هناء مبتسمة : حاضر
و شبحت للصور
بعد شوية
يوسف : هنو
هناء شبحتله : نعم
يوسف : خمسة دقايق و نجيك
هناء تكنطت : فكنا من الدخان يا يوسف
يوسف : واحد بس ع السريع مابين انتي اخترتي صورة
هناء شبحت للآي باد و سكتت
يوسف ناض البلكونة و ولع دخانه
هناء مدت رجليها ع الكنبة و تتفرج
___
يوسف كمل دخانه و رجعلها لقاها واخدها النوم ضحك
خش لداره جاب غطاء و غطاها
و قعمز جنبها يتأمل فيها
___________________
06:00 م
نجاة خشت على بناتها ف دارهم : ماجتش أختكم !!
سلسبيل و سنابل : لالا
نجاة : ترا كلموها وحدة منكم
سنابل : هاتي التليفون تو نكلمها
نجاة ضحكت : ولا تفكري
شدت تليفونها و اتصلت بهناء ..
هناء حست بتليفونها يهز ف جيبها فتحت عيونها
لقت يوسف مقعمز مقرب منها و يشوفلها
خافت و قعمزت : أأأأااا 😲
يوسف انخلع : خيرك ؟
هناء تشوف للمكان و مخلوعة : انى وين
يوسف : انتي معاي
هناء سكتت و غمضت عيونها تجمع في أفكارها
يوسف ضحك : معليشي تصير اللخبطة
هناء فتحت عيونها و شبحتله : ساعة قداش
يوسف : ممكن الستة
هناء خافت و وقفت : حي عليا من ماما
طلعت تليفونها و عاودتلها ..
نجاة ردت : الو
هناء : ايوه ماما لقيتك مكلمتيني
نجاة : وينك لتوا تفاهمنا الستة تكوني ف الحوش
هناء : شوية و نوصل
نجاة : خفي روحك .. و سكرت الخط
هناء : كيف بندير توا
يوسف : تو انى نمشي نلهيها بأي موضوع و انتي انزلي لحناي ديري عليها دوره و بعدين اركبي
______________________________________________________
(( فـي شـهـر رمـضـان 🌙 ))
1
هناء و نجاة ف المطبخ ايطيبو
نجاة تلف ف شاورما : بري لخواتك نوضيهم خير مانمشيلهم ب المغرف
هناء اتدير ف بيتزا : فكيني منهم شيطت ريقي
خش اصيل للمطبخ عين مسكرة و عين مفتوحة : شن مطيبين اليوم
شبحتله هناء : اللي مطيبينه بتاكله
اصيل : باهي خيرك واتية نسأل بس
نجاة شبحتله : و انت خيرك راقد لتوا ؟؟ ولا ماتعرفش تنوض تصلي صلاتك و انت صيامك كله ف النوم ؛ مايصحش هكي حرام عليك
اصيل : تي اما مايصحش و انى راقد الحداش ؛ صيامي كله و انى فايق حسدتوني ف هالساعتين اللي رقدتهم
نجاة : قتلي ساعتين ؟؟
هناء : شن قاعد تصنع للحداش
اصيل : شي فاتح النت
نجاة : و فتحت المصحف قريته ولا ماتعرفش اديرها التُمرة هادي ؟؟
اصيل سكت و مشي لداره
نجاة غسلت ايديها و طلعت من المطبخ
خشت على سلسبيل و سنابل تصيح : نوضي اوقفي يا بهيمة انتي وياهااااا
البنات انخلعو و شبحولها
نجاة : المغرب بيأذن و انتو مازال متدمدرات ؟؟؟
سلسبيل قعمزت تلم ف شعرها : باهي نضت
سنابل قعمزت شادة راسها دايخ
نجاة : اوقفيييييي
سنابل تتأفف : باهي باهي
و مشت للحمام
_____________________
ازهار و روان ف المطبخ
روان تلف ف البوريك و متكنطية
محمود مقعمز فوق الطاولة يشوفلها : صغريها البوريكة خيرها هكي كبيرة
روان تتأفف
محمود : نبيها صغيرة باش ناكلها ف نتشتين
ازهار اتدير ف محشي : محمود انزل لوطا و قول لاميمة و اجديده يركبو المغرب قريب
محمود شبحلها : قصدك فاطرين عندنا ؟
ازهار : ايه ، انزل انت ولا أبعت احمد
احمد يلعب ف بليستيشن سمعها : لالا مانيش نازل توا نلعب
محمود يشوف لروان : كتري من الحشو خيرك مقفصة ؟
روان تعصبت : اسكت اسكتتتت ذهبتلي شيرتي
محمود : نقصي صوتك يا حيوانة 😡
ازهار : هيا اطلع برا تحرك وانت مافيك غير ذهاب الشيرة
محمود : بوي قاعد ف الجامع !
ازهار : ايه
محمود : شن قصته و هو شادها عبادة ليه ليه من الصبح لليل
ازهار : تعلم منه
محمود طلع من المطبخ لقي احمد : وين أمير البحار
احمد يلعب شبحله : من أمير البحار
محمود : محمد وين
احمد شبح للتلفزيون : مانعرفش شكله مهناش
محمود فتح الباب و نزل
_____________________
مرام في مطبخها واقفة ع الغاز تشوف للطنجرة : حي على امي خيرها هكي ولت !!
سمعت عصام فتح الحوش تخزرطت
طفت ع الطنجرة و طلعت تجري من المطبخ : و اخيراً جيت
عصام استغرب : تبي حاجة ؟
مرام : من بكري نتصل بيك تليفونك خارج التغطية
عصام : مانتبهتش انه مافيشي تغطية
مرام : و راس عصام تمشي للسوق تجيبلي جبنة
عصام : تي اما سوق توا ماصدقت وصلت الحوش من الزحمة
مرام : ماهو بندير بيها ماعنديش تمت
عصام قعمز ع الكنبة : مش لازمنا جبنة طيبي هكي
مرام : لا عاد عصومي
عصام سكت
مرام : هيا حبيبي نوض على خاطري
عصام فنص فيها : فكينا منه الكلام هذا مش وقته
مرام ضحكت : باهي نوض
عصام وقف : استغفر الله العظيم
خدي مفتاحه و طلع
مرام شدت تليفونها و اتصلت بأمها ..
نجمية ردت : الو
مرام : ايوه ماما
نجمية : ها شن تبي و انتي كل يوم اتصالات مابعده الراجل شن صاير فيه من ماكلتك
مرام : علاش تكشخي 😒
نجمية : شن تبي فيا توا
مرام : الشربة مافهمتش خيرها هكي ولت
نجمية : خيرها شن شكلها
مرام : ولت امبكبكة
نجمية : يرزيني ف صحتي على هالخلفة اللي بتحشمني
مرام : ماما مش وقت هزايب توا قوليلي شن ندير عصام شوية و جاي
نجمية : زيديها اميه يعطيك كيّه
7
________________________
07:30 م
يوسف ف شقته جايب عمال يركبو ف المطبخ و معاه مهاب
يوسف شبح لمهاب : مرضني الزفت مطول وذنه
مهاب : وسع بالك اهم شي الخدمة نظيفة
يوسف يشوف : لا هي ماشاء الله
مهاب شرين تليفونه سكر الخط
يوسف : مني
مهاب : امي من بكري تتصل لاني عطلت
يوسف : شحورتك اليوم ؛ روح معاي افطر عندي
مهاب : مرة تانية ان شاء الله ؛ هيا اطلع حطني ف الحوش و ارجع انى سيارتي عند خوي من الصبح طالع بيها برا طرابلس
يوسف : باعهالي و قعد احبُبّي
مهاب : ايه
يوسف : كلم اماليك و قولهم انك معطل انى مانقدرش نطلع و نخلي العمال
مهاب : خلاص تو ناخد تاكسي عادي
يوسف : اما تاخد تاكسي يا راجل اقعد و بلا جو زايد الزفت
_________________________
سنابل واقفة ف المطبخ و تتفرج عليهم
نجاة شبحتلها : حركي ايديك
سنابل : شن بندير انتو كملتو
هناء تلف في صونية ب السلفر : خودي هادي نزليها لِـ اجديده
سنابل خدتها منها و نزلت
سلسبيل اتدير ف فروبي و تنعس : و الله ماخاطري ندير حاجة نتحرك بالسيف ره
نجاة : طيح سعدك و بعدين مدي وجهك و قعمزي ف السفرة
سلسبيل : نفطر حتى على خبزة و دحي عادي المهم نتريح ف صيامي
هناء ضحكت : ولما بتتزوجي كيف بتديري ان شاء الله ؟ و بالذات لو اتطيحي في راجل يحب التصنيف ف الماكلة
سلسبيل : تو نختار واحد يحب الوجبة و ماعنداش ع الرقيق ، يوم امبكبكة و يوم بازيليا و يوم رز و تمشي الأمور
هناء تضحك
نجاة : هيا وتو السفرة وبلا كتر دوة بوكم على خشة
__________________
محمود : هيا يا جدي نوض
العارف وقف : تعرفوني مانحبش نفطر الا ف حوشي غر مابيتش نردكم
حلومة : بارك الله فيها زهورة حسبتنا امالا زي كناينك التانيات !! فالحات غر يلفو ف الصواني و يبعتو
خشت سنابل شادة الصونية : ايه يا اميمة مايفهموش ف الأصول
محمود ضحك و حلومة تلخبطت
العارف : بارك الله فيهم حتى هما
سنابل : هناء بعتتهالك مش كنتك 😏
العارف : ياودي اللي ف العمارة كلهم زايدين مع هنيوه
محمود : انى سابقكم .. و ركب لحوشهم
العارف : حطيها ف المطبخ تو نتسحروها ف الليل
سنابل خشت المطبخ و العارف و حلومة ركبو
__
محمد ف الجنان شاد طوبو و يبخبخ 💦
حست بيه سنابل من باب المطبخ اللي يطلع ع الجنان
طلعتله : محمد !
محمد تلفت : ايوه
سنابل : خلاص فوته و اركب
محمد سكر الشيشمة : كملت
سنابل سكتت و قعدت تشوفله
محمد : بري اركبي انتي
سنابل : علاش
محمد يلم ف الطوبو و عاطيها بظهره : اركبي و خلاص شن عندك بديري
سنابل قربت منه : يأذن المغرب و نركب
محمد بصوت واطي : استغفر الله العظيم
سنابل : باهي اركب معاي
محمد شبحلها و سكت
سنابل تشوفله : خيرك ساكت
محمد تكنطا و غمض عيونه : بري اركبي الزفت
سنابل : علاش تبيني نركب ؟؟ اها قول !
محمد سكت و خش الداخل
سنابل لحقاته و ركبت معاه ف الدروج
محمد : الف مرة نقولك ماعادش تدوي معاي ف الصيام ولا
سنابل شبحتله و ضحكت : عليك جو
محمد سكت
سنابل همستله ف وذنه : حمودي نحبك اني
و ركبت تجري تضحك
محمد تعصب : صياام البلي الاحرف صيااااام 😡
_________________________
العارف مقعمز مع ولاد عماد يراجي ف المغرب
و حلومة مع روان و ازهار ف المطبخ
احمد جي للعارف : اجديده اعطيني خمسة
العارف شبحله : شن هو ؟
احمد : خممممسة
العارف : ماعنديش
احمد تكنطا و سكت
مشي جاب تليفون امه و جاه فتحله صورته و هو راقد : شن رايك فيها اللقطة اهيا
العارف انصدم : امسح امها يا كلب
احمد هرب بعيد : إلااااأ 😛
العارف تكنطا : نوض شده يامحمود و ربيه
محمود : فوتني يا جدي صيام
احمد : اعطيني فلوس نمسحها 😃
العارف حامق طلع خمسة جني : تعالى هاك
احمد شبحلها : لالا شن خمسة الصورة تجيب اكتر
العارف علّا صوته : غر يجي عماد الا ما نخليه يربيك
احمد : اجديده راهو انزلها ف النت حي عليك 😒
محمود ضحك
احمد : هيا زيدني
العارف يطلع ف الفلوس و ايتمتم بروحه : قداش تبي
احمد : عشرين 😍
العارف انصدم : قدااااش !!!
احمد : عشششريييين يا اجديده
العارف تنكد : مش هلبا يا احمد ؟
احمد : الصورة تستاهل يا اجديده
العارف مدهمله عين تضحك و عين تبكي
2
_____________________
10:00 م
اروى تتكلم ف التليفون : شن صار معاك يا أمجد
أمجد : كله تمام المحادثة عندك عاد
أروى : نمسح فيها اول بأول لان الايميل قاعد مفتوح عندها و نخاف تفتح الماسنجر في اي وقت
أمجد : باهي شن مازال امالا
اروى : توا لازم تتلاقىٰ مع خطيبها و توريه كل شي
أمجد : هبلة انتي ؟ اكيد مش حايصدقني و بناكل طريحة و بنروح
أروى : لا مش حتاكل طريحة ؛ انت وريه المحادثة و خش على بروفايلها طول باش يصدق انها هي اللي تتكلم ، و انى تو نزيد نعطيك معلومات عليها باش يزيد يصدقك ؛ و قوله انها حتى انت ضاحكة عليك و تقولك ان خاطبها ولد عمها بالغصب و تبي تفتك منه باش انت تخطبها
أمجد : و الصور شن موضوعهم
اروى : نقعد نعلم فيك توا ؟؟ وريهمله و قوله انها تبعتلك فيهم يعني شن موضوعهم
أمجد : لالا الموضوع يبي حاجة اقوى باش يصدق
اروى تعصبت : كان تبي اختك اتدير العملية عند ماما بالبلاش و ماتدفع قرش دير اللي قتلك عليه ، يا اما اوقف قدام السيمافرو و مد ايدك باش تلقط حقها
أمجد سكت
اروى : ها شن قلت توا ؟؟
أمجد : باهي شن رايك لو تعرفيني عليها ؟ و هكي نشوفو حد ياخدلنا صور ليا انى وياها و نوروهمله بالثابت
اروى ضحكت : ماخطرتش عليا الفكرة هادي
4
____________________
هناء و خواتها كيف طالعين
اسماعيل : عندكم ساعة و تروحو ، اللي شرت باهي و اللي ماشرتش مش لازمها ماتقعدوش كل ليلة تنسرفولي و ف الاخير ماتشرو شي
هناء : باهي بابا حاضر
اسماعيل : كلمة و قلتها اللي ماشرتش اليوم معادش فيه طلوع
سنابل : معقولة تخلينا نعيدو بلا حوايج عيد ؟؟
نجاة : امالا اشري اي شلتوتة و روحي
هناء : انى طلعت
خدت مفتاح سيارتها و نزلت هي و سنابل
و سلسبيل قعدت تربط ف سبيدروها
_____________________
مهاب يلبس ف كندرته : الله يسامحك حشمتني مع اماليك مانحبش ضيف على غفلة بالذات ف شهر رمضان
يوسف : تي ياسر بلا طروح تقول عليك غريب عليا و انت شادهالي من بكري الزفت
مهاب : ياودي صحيت و بارك الله فيك
يوسف : اعتبرها مكافأة على تشحوريك معاي اليوم
مهاب ضحك و فتح الباب : تي ماشي ماشي
يوسف طلع معاه للدروج
مهاب : خليك عرفت الطريق
يوسف ضحك : مية مية
مهاب نزل و يوسف خش و سكر الباب
فجأة تطلع سلسبيل للدروج و تنزل تجري
مهاب انخلع و تلفت : بسم الله
سلسبيل انصدمت و جمدت ف مكانها : اوبااا عندنا ضيف ! 😐
مهاب ضحك
سلسبيل تلخبطت و خشت بعضها بدت تنزل بطيئة
مهاب : كيف حالك ؟
سلسبيل : الحمد لله
مهاب سكت و نزل
و سلسبيل تخطاته و نزلت تجري
مهاب قعد يشوفلها و ساكت
____
طلعت للجنان لقت محمود مقعمز يدخن : خير يا طير
محمود شبحلها : راكم تشدو الحوش و تقعمزو
سلسبيل : مانبوش 😛
محمود يشوفلها ينفخ ف الدخان و ساكت
طلع مهاب : السلام عليكم
سلسبيل سمعاته طلعت تجري
محمود وقف : و عليكم السلام ، مهاب ! شن الجو
مهاب ابتسم و سلم عليه : تمام كيف الأمور ؟
________________
سلسبيل ركبت السيارة داهشة
هناء شبحتلها : وينك لتوا و انى طالعة بالدرقة على يوسف
سنابل تشوفلها
سلسبيل شادة قلبها : قلبي يدق بسرعة ماقدرتش انهديه
هناء : علاش خيرك
سلسبيل : مافهمتش خيرني
سنابل ضحكت : امالا من محمود اللي مقعمز ؟
سلسبيل : لالا
و طلع مهاب قدامهم
سلسبيل تشوفله : بسبب البيلّو هذا
خواتها شبحوله
هناء ضحكت و طلعت بالسيارة : صاحب يوسف !
سنابل شبحت لسلسبيل : اختي قلبها دق اووه ماي قاااد
يـتـبـــع ... 💗
___________
