رواية عرين الصياد الفصل الخامس عشر 15 بقلم شذرة العدوان

رفعت راسي للسماء يربي ساعدني مجاي الحگ يادوب اطبخ للعمال واركض وراه ليال حت لو ديالا يمها مگدر اغفل عنها

سحبت ملفعي من راسي وتحزمت بي وگمت اعزل اليوم شلون ما كان لازم اسيم الجدوره صاير بيهم فحام

اسمع ديالا بره تگول تفضلي شيخة

قوست اثمي شنهي شيخه بس لا ديالا هم تخبلت نشفت اديني وطلعت ونتلاگه گصة بگصة يبو يهالعثره هاي الشيخة خزامي

واني جني السعلوة شاده الحزام وثوبي رافعته ومشمره ارداني واديني كلها فحام

ظليت متصنمه نثولت الا المره بادرت وسلمت

عليه مديت عكسي اسلم بي گلتلها تعذريني يشيخه مسويه حملة تعزيل عالمطبخ

ابتسمت گالت وضعج يشرح محاجة تحجين وتعذروني جفتنه عليكم بدون خبر

امل: لا شيخه البيت بيتج تفضلي

همزين يربي الهول معزل

فاتت عالهول گعدت شگد رزينه ومعدلة

خليت ديالا يمها ورحت اعدل نفسي بدلت وغسلت دگيت باب حجرة عمتي صبره

جاني صوتها العذب

شراااايده

امل: عمه هاي الشيخة خزامي يمنه گاعده بالهول

عفتها ورحت على عمه معاضد لگيتها حاطه القرأن وتقرا ودموعها تنزل حطيت ايدي على جتفها

گلت عمه الشيخة خزامي يمنه

صدت عليه وهزت راسها بقبول

اخذت مي وديته يم الشيخة واشرت بحواجبي على ديالا تاتحجي ويه المره مو تظل ساكته

ورجعت اسوي جاي

ديالا: مثنيه على ركبي واعصر بأديني يربي شحجي اني ما اعرف بادرت هيه

خزامي: شلونج بنيتي عساج زينه

ديالا: الحمد لله زينه

خزامي:يستاهل الحمد نجحتي

ديالا: عصرت ايديني بخيبة دنگت گلت لا

خزامي: ميخالف بنيتي هم ولدنه اكثرهم اسقطو

ديالا:فاتت صبره وراهه امي گامت الشيخه بوجهن وسلمت

من بعد السلام والسؤالات اجت امل جايبه الجاي

امل: ادحگ الساعه ب 10 ونص الصبح

لازم اسوي غده من وكت اخاف يظلون اشرت على ديالا ولحگتني

ديالا:ها امل

امل : گبل كلشي ليال وينها

ديالا: گاعده بالحجرة صافنه

امل :سدي عليها الحجره وتعاي عاونيني نسوي غده

ديالا : رحت وگفت بالباب ادحگ على ليال مقرفصه وادحگ عالحايط

قفلت باب الحجره عليها ورحت

امل: يالله ديالا تعاي الزمي ويايه اللحم

ديالا: لازمه اللحم بطارف اصابعي وكل شوي تگع وامل تعيط

امل : الزمي زين يمعوده

ديالا : مو اخاف تگصين اصبعي

امل : شنهي عميه اني بس الزمي زين ثبتي ايدج

ديالا : برطمت بملل اكره الزم اللحم اخاف من السجين

امل : گصبت اللحم وحيطته عالنار سمعت الباب انفتح دحگت من الشباك هاذ عماد ويا الصياد

فاتو يتمشون على كيفهم ويحجون

ديالا: غسلت اديني ورحت گعدت بالهول

الشيخة تسأل عالكل وصل السره على ليال عجل هاي البنيه الحليوه وينها نادوها اسلم عليها

امي سكتت وصدت عليه

گلت نايمه بالحجره

گالت هاا ورجعت تسبح بالسبحة

شويه وگامت ليال تردم بالباب طلعونييي طلعونييي

صفريت وظلينه اني وامي وصبره وحده ادحگ على وحده

الشيخه ظلت ادحگ علينه بتسائل

گمت بساع ولاگتني امل فتحنا الباب وهجمت علينه ليال تكفر وتصيح عبن سجناها

سدينه اثمها وهاي تفالت وتصرخ

گمنه نسحل بيها تا نفوتها جوه وصريخها يرج البيت رج

طلعت الشيخه من الهول گالت شوو عوفنها

وجان تسحب ليال من عدنا گالت شبيها الحلوه

سكتنه ما حجينه گلوبنه تطرد من الخوف والفشلة

ليال ما حجت وياهه بس ادحگ علينه بغضب

گادتها الشيخه گعدتها بالهول

نمشي وراهه ونعصر بأدينه

شلون موقف يربي بس لا ليال تغلط لو تكفر

الشيخه تمسح بشعر ليال وتحجي وياهه بلطف وليال تدفعها وتريد تگوم ومجلبه بيها

گالتلها شبيج بنيتي اگعدي هين ما اخليهن يجوسنج الي تصل صوبج اكتلها

ليال گالت ما اريد اظل يمهم اكرهم عوذا منهم

امل : انهد حيلي خايفين من ليال تروح تجفص شي گدام الشيخه گمنه نبلع برياگنه

خزامي : ميخالف عود اخذج ويايه لا تظلين يمهم امشي امل لمي هدومها

هاي شبيها البنيه اول نوبه شفتها جانت مثل الملاك ليش حالتها هيج متغيره ذبلانه وتصرفاتها هيج

صبره : عياره حشاج هاي كلها گواة ودلال

خزامي :لا ام محمد البنيه مبينه مريضه وانتو مداخين عليها ليش

امل : بعدها متأثره على ابوها واخوانها الي صار مو شويه وتمرضت وراهم

صبره: والله مابيها كل مرض يشيخه دحگيلها منتصه

امل : الشيخه تجاهلت عمتي وحطت ايدها على راس ليال وگامت تقرا بصوت عذب ومسموع +

وَاتَّبَعُواْ مَا تَتْلُواْ الشَّيَاطِينُ عَلَى مُلْكِ سُلَيْمَانَ وَمَا كَفَرَ سُلَيْمَانُ وَلَـكِنَّ الشَّيْاطِينَ كَفَرُواْ يُعَلِّمُونَ النَّاسَ السِّحْرَ وَمَا أُنزِلَ عَلَى الْمَلَكَيْنِ بِبَابِلَ هَارُوتَ وَمَارُوتَ وَمَا يُعَلِّمَانِ مِنْ أَحَدٍ حَتَّى يَقُولاَ إِنَّمَا نَحْنُ فِتْنَةٌ فَلاَ تَكْفُرْ فَيَتَعَلَّمُونَ مِنْهُمَا مَا يُفَرِّقُونَ بِهِ بَيْنَ الْمَرْءِ وَزَوْجِهِ وَمَا هُم بِضَآرِّينَ بِهِ مِنْ أَحَدٍ إِلاَّ بِإِذْنِ اللّهِ وَيَتَعَلَّمُونَ مَا يَضُرُّهُمْ وَلاَ يَنفَعُهُمْ وَلَقَدْ عَلِمُواْ لَمَنِ اشْتَرَاهُ مَا لَهُ فِي الآخِرَةِ مِنْ خَلاَقٍ وَلَبِئْسَ مَا شَرَوْاْ بِهِ أَنفُسَهُمْ لَوْ كَانُواْ يَعْلَمُونَ(102)

سورة البقرة

امل :اول ما سمعت ليال القرأن گامت تشيل بروحها وتلطخ وتفالت ونبرة صوتها مرعبه ركضنه عليها تنلزمها

صاحت علينه الشيخه گالت عوفنهاااا

استمرت تقرا وليال تفالت منها وتصيح صوتها مرعب صكت على سنونها وتخزر بالشيخه گامت تلهث وتنافخ رجليها يرجفن واديها

متنه خوف ارتعبنه هاي شبيها

ديالا: حاطه ايدي على اثمي كاتمه صوتي ومرعوبه من منظر ليال عيونها صارو فوگ وشكلها مرعب ختلت وراه امي لزمت ثوبها

امل :ما گدرت اتحمل الي صار گدامنه وليال نتفت الشيخه حت ملفعها وگعته رحت بساع سحبت ليال من الشيخه بقوه عاطت بيه

خزامي :وخريي البنت ممسوسه

امل :بهتت وهديت ليال بخوف

اجاني صوت عماد اااامل

طلعت مرعوبه وارجف

عماد: هاي شكو امل شنهي الصوت وشبيج خايفه

امل: بدون ما احجي جريته من ايده فوته عالهول

اول ما فات شاف ليال تختض وصاكه سنونها تخبل ما انتبه عالشيخه جيت على ليال لزمها

ويصيح هاي شبيها انشمرت احجن شبيهاااا

گالتله الشيخه لا وليدي مو شمرة اسم الله

صد عليها عماد ودنگ راسه تعذر منها گال ما شفتج

خزامي: ميخالف وليدي

امل : الشيخه غطت ليال وجان تهدئ گالت لعماد اگحز عنها شوي

عماد گلبه يطرد وبس يدحگ مو فاهم شي

خزامي : هاي البنيه شگد صارلها هيج

امل : من يوم الصگعه الي صارت

خزامي : وما وديتوها

عماد : ما خليت دكتور يعتب عليه يا شيخه

خزامي : وعلى مرقي ما وديتها

عماد : لا شيخه هاي الشغلات ما احبها وليال بيها صدمه وهيه اطيب ان شاء الله

خزامي :اني وياك البنيه انصدمت صحيح بس انمست على اثر الصدمه ليش اداخون عليها شلون گلبك منطيك متحمل خطيتها هاي البنيه لازمها علاج بالرقية الشرعية

امل : عماد مدنگ ودموعه تنزل گال والله ما داخيت ما خلينه دكتور يعتب علينه والله

خزامي : هاي مو شغلة دكتور يا ابني

بنيه مثل الورده حرام تضيع منكم اذا تقبلون ناخذها نوديها على شيخ اعرفه من گرايبي

امل : عماد ظل ساكت ومدنگ يمسح بگصته

خزامي : وليدي الشغله ما يحتاجلها تصفن

اخيتك ممسوسه وذا ما تصدگ دحگ بعينك

گعدت الشيخه وحطت ايدها على راس ليال ورجعت تقرا

گامت ليال تصيح وصاكه على سنونها ونبرة صوتها غريبة تخوف

عماد بهت ولزم راسه

خزامي : ها وليدي شفت بعينك لو تجيب الف طبيب واغلى علاج ما يفيدها اذا مو شيخ رقية

عماد گعد لزم ايد ليال وما حجه

والشيخه شافت ما منه امل يجاوب

گالت عجل صياد وين

عماد: بره

امل : طلعت الشيخه ومشيت وراهه

شفتها راحت على ابنها وتحجي ويا وملامحها حزينه وهو عگد حواجبه وهز راسه بعدم قبول

الشيخه صفگت على گفه ايدها وتتأسف

شويه وجان تجي

گالت لعماد صياد يناديك

طلع عماد وعيونه مدمعه

ليال نامت وهيه تعن

گالت الشيخه خلوها بمكانها ولحد يگعدها

عناد لحد يعاندها وشتريد انطوها ولا تخلونها ادحگ على نفسها بالمراية

وتهيرو ان شاء الله راح ناخذها عالشيخ يم اهلي بصلاح الدين وبأذن الله تتعافى وترجع اخير من گبل

امل : جاوبت عمتي معاضد ما اظن عماد يوافق(الناقله روعه الطائي)

خزامي: يوافق ان شاء الله يالله اني اترخص تظل عدكم العافية

امل: وين يشيخه الغده عالنار

خزامي : بيت العامر ان شاء الله احنه جنه گريب من هين ومرينه نشوفكم ونسلم وان شاء الله جيتنه خير

امل : خير بأذن الله زارتنه البركه

راحت وهيه توصينه على ليال

وصلناها للباب وصياد بعده يحجي ويه عماد طبطب على جتفه وصعد سيارته ومشوو

اجه عماد عاگد الحواجب فات عالهول وگعد يم ليال بدون ما يحجي مسح على راسها

سألته شكو اشرلي نطلع بره نحجي

گعدنه بالطرمه كلنه

عماد: صياد گالي تعذرني امي سولفتلي مو قصدنه نتدخل ونفرض عليكم ولا تفهم غلط

اختي جانت مريضه مثل هالبنت وبفضل الله ثم الشيخ عثمان طابت وتعافت

گال كلشي تگدر تتهاون بي الي هاذ المرض حجي الناس ما يرحم احنه جنه نگف حراسه على خيتي جانت تنهزم وتروح عالمگابر وتگص شعرها تسوي الفعايل وهسع صارت زينه الحمد لله

امل : اي وشنو گتله

عماد : گتله امهلني وقت افكر

امل : يعني راح توديها

عماد : لا طبعاً مزال ليال طلعت ممسوسه راح انطيها الطريقة الكزنازانية وهيه اطيب

امل : انتفضت من مكاني گتله طريقة شنو عماد هاي طفلة وينها وين الطريقة ومنو گالك اذا صارت كزنزانية راح اطيييب 1

عماد : ااامل الزمي حدج خليني محترمج

اي اطيب ليال وتصير احسن المشايخ ما يردون الي ينخاهم

امل: والله عجيب تأمن بالمشايخ مال كزنازانية وما تأمن بمشايخ اهل العلم يطيبوها تره الله هو الشافي المعافي والرقية سبب من الله

عماد : اااامل كافي سدي بوزج وفوتي جوه تحملتج جثير ممنوع تدخلين فتهمتيي

امل : گمت فتت جوه اعصابي صارت نار البنيه ممسوسه وراح تضيع منهم وهاذ يگلي كزنازانية

هم يحطوها بالدائرة ويگوم يدفون ويتدروشون وتخبل البنيه مثل ما تخبلت بنت عمي

ديالا: لليل وامل عاگده الحواجب متعصبه من عماد

اني ظليت بحيره شبيها ليال شنهي ممسوسه مرض شنهو هاذ

وره العشه امل صاده بصفحه ما تحجي ويه عماد وما تعشت

اجو اهل استاذ صائب يتعللون وياهم نظال وامها

تسالمنه وگعدو ومثل كل نوبه ما عدنه حديث غير ليال وحالتها عماد حجالهم عن الصياد وامه من اجو وشافو ليال وشنو عرضو علينه

ماجد : انتو شلون صدگتو ليال ممسوسه

عماد : اگلك گامت الشيخه تقرا عليها وتصرگعت البنت نبرة صوتها خوفتني

امل : وهي ليال من زمان اذا تسمع الأذان تخبل وتعصب وتختل بالحمام

ماجد : عجل خلينه نوديها البغداد عالسيد

عماد : هم گال سيد ماجد ما عندك غير هالحجي

ماجد : والله اذا عندك غير حل نورنه هاي صار فوگ الشهرين والبنت ما تفعل اطيب

عماد :راح انطي ليال الطريقة الكزنزانية وان شاء الله تصير زينه

ديالا: مجرد عماد گال هالكلام انتفضو حميد وماجد واستاذ صائب مره وحده تخبلوو

ماجد : لا انته اكيد تخبلت

صائب : عماد كل عقلك شجاي تحجي طريقة شنهي

كافي سدوو الموضوع ومخصم الحجي ناخذ بنصيحة الشيخه خزامي ونودي ليال على شيخ يعالجها بالرقية

ماجد : اسمعو الثاني شيگول اي استاذنه ونخلي الغربه تشتان بالبنيه موووو

صائب : ماجد انلصم وادم گاعده خليني محترمك شنهي نسلمهم بنتنه واحنه شبينه ما نوديها عدها اخوان ثنييين

عماد : اذا رحت البيت منهو يظل بي والشغل منهو يستلمه حميد راح يلتحق انوب صلاح الدين لا هين ولا هناك وبالله صار ورحت وين نگعد خوما ويه العالم يبتلون بينه ما اروح ولا اخطي شبر منا

ماجد :اني اوديها لبغداد انته ظل عود نروح اني وحميد

صائب : عماد هوه الي يوديهااا وكااافي

وروحه لبغداد ماكو احنه شنعرف عن هاذ السيد مالك هاا

ماجد : عجل شتعرفون عن هاذ الي بصلاح الدين

صائب : شجاب الشيوخ على معارفك اني اضمن شكو واحد من طرف بيت العلوان ناس خوش ناس ولوما يدرونه ثقه ما نصحونه ولحوو

يكفي ان العالم تريد تساعدنه بحالة ليال يكفي ما سمعونه حجي وماكلين هم البنيه لو واحد غيرهم وخن اگول لو من ربعنه ينكتل ابنهم بنص بيتنه جان ظلو شايلين الحقد علينه حت لو همه السبب

ماجد : عجل احنه دفنه جفار ملح موو لو هم بشر يا صائب الملا ومحمد ومهره واحدهم يسوه عشيرة الشيخ علوان شو ما حجينه مو ماتو من وره ثارات صياد وسوالفه

صائب : الله وحده العالم منهو السبب

وهاذ يومهم ما يتعدونه احنه سكنته عبن حميد وعماد ما يدورون ثارات ولا يدورون عتاب ولا يريدون مساعدة من احد

بس احجيلك عبن بيت الشيخ علوان رغم صيتهم بالعرب وما فد يوم دفنو واحد گبل الثار وناس تشتري الدم بس مع ذلك ما اذونه ولا سمعونه حجي

وصياد اجه سلم نفسه لعماد تعال گلي اي زلمه يسويها ،،،

حميد : كافيييي لخاطر الله كافيي غيروو السالفة

امل گومي سوينه حامض صخام

امل : ما صفه نقاش عبالك مصارعة بالحجي بين صائب وماجد كلامهم عباره عن اللغاز وتهديد وتحذير الي فتهمته صائب يعرف بماجد يحب ليال لهسبب منعه يروح واني ملاحظته گام كل ما يجي ماجد علينه يلحگه

طلع ماجد معصب وگف بره يدخن

سحبت نفسي تا اروح اگله يهدئ اعصابه گبل لا تكشفه صبره وتمنجده حيل تماده بهتمامه

سمعت ابني يبجي رحت نومته طبطبتله سكت ورجعت تاروح على ماجد ما شفته بمكانه جان واگف بالطرمه

دحگت ماكو بالهول رحت عالمطبخ اخدر نومي بصره

كسرت النومي وجاي انجي الحب من عنده

واسمع سوالف همس ما مفهومه مشيت بتجاه الصوت لحد ما وصلت المطبخ الثاني مابي ضوء دحگت ماجد واگف وره شباك المطبخ

مرتجي راسه عالحايط ويدخن

مشيت گلت عجل خن احاجي من وره الشباك واحذره من عصبيته الزايده وهتمامه بليال

گربت من الشباك بعدني ما حجيت واسمع نظال تحجي

نضال: ماجد والله احبك كافي تعبتني حس بيه عاد بس فهمني شنو بيه وما اعجبك الي يشوفك يگول هاذ متدين ومستحي لو يبيع ثگل وانته صفيت النسوان على ايدك

ماجد: نضال ولي من وجهي حيل طولت خلگ وياج

نضال: ماجد بروح ابوك والله گلبي جاي يتگطع عليك تدري شگد جاي ارفض ناس علمودك بس فهمني ليش ما تحبني

ماجد: گتلج ارفضي علمودييي واعدتج بشييي سمعتج كلام انطيتج مجال لاااا كلهن ما سويتهن

فوتي جوه نضاال اترجاج

نضال: ما افوت اريد افتهم ليش ما تحبني مو جنت تگلي انتي حلوه ومعدله

ماجد : اهوو يا طلبة الگشره ـــ يول يابه ما احبج افهمي عليه لا تلزگين صائب يحبج شون افكر بيج صحيح اني نسونجي بس مو نذل احترم اخويه وانتي احترمي نفسج شو وخري من دربي

شنهي گتلج حلوه جاملتج بتليييت

امل: مشه ماجد وجان تلزمه من عكسه وتحضنه من ضهره وتبجي

نضال: والله ما احب صائب ولا اريده صارحني ورفضته وحفظ كرامته ونسه الموضوع احبك انته احبك

امل: التاف عليها ماجد لزمها من عكسها وينفض بيها

ماجد: عجل انتي ما تحفظين كرامتج وتولين من دربي لو ما عندج كرامه وشبي صائب عيني وما ترضين بي هاا شبييي يسواج ويسوه عشيرتج شلع

دحگييي نضاااال روحي صايره بخشمي اقسم بالله ابتلي بيج ياويلج تطلعين گدامي انووب ادفنج والله

امل : عافها وراح وظلت تبجي قرفصت بالگاع وتشاهك

ظليت صافنه اريد استوعب هاذ ماجد الي يموت عالحلوات رفض نظال الي تخبل

علمود اخوو وحترام اله شگد كبر بعيني

ياريت ترهم ويتوالم هوه وليال بس مستحيل

عماد ما يرضه

ومن جها انقهرت على نضال جانت دوم تگول احب واعشگ واحد كل النسوان تتمنى وتالي طلع ماجد

اااخ يالعشگ شجاي تسوي بالعالم

ديالا: مرت خمس تيام والشيخة خزامي نوبتين دزت خبر تسأل اذا نودي ليال لو لا

اخر شي اجت بنفسها

وگفت گدام عماد وگامت تقنع بي

عماد : شيخه وگفتج هاي وهتمامج ما انسا بس اذا رحنه وصلاح الدين بعيده اكيد راح نبات لو حتمال نظل ايام وين نگعد

خزامي : مع الأسف عليك وليدي احد گالك نگعد بدار اجره

عندي بيت يوليدي يطارد بي الخيل ومن هسع اگلك طبخ ما اطبخ عود مريتك ناخذها تطبخ وهم البيت يريد تنضيف عود تعاونوني بي

امل : ضحك عماد وگال ان شاء الله ارجعلج خبر بس اجهز اموري وارتب الشغل هين تدرين عندي حداده والمزرعة والبيت واني وحدي

خزامي : ما الومك والله يوليدي فكر ورجعلي خبر بسااع تره احنه مو رايحين خصوصي علمودكم اني مشتاگه لهلي وراح اخذكم ويايه وارجعكم ويايه

يالله اني امشي

امل :جلبنه بيها وما فعلت تظل

راحت وصياد بره ما يگعد شگد يجي يظل واگف بره ولا يطب البيت

ديالا: ثاني يوم بعد صراع طويل

ويه عماد اخيراً اقتنع

استاذ صائب هم حجه ويا

ودزينه خبر للشيخه

وراح يروحون امل وعماد يودونها

تستمر القصة أدناه

بس ماجد متخبل يشيل روحه ويرگعها

وتلاطش ويه عماد يگله تسمع من صائب وما تسمع مني،،

امل :الشيخة ردت خبر گالت الغبشة نمشي بعون الله تهيرو ورتبو اموركم

بالليل حضرت كلشي ملابس ليال وابني واليه اخذنه حتياطنه خاف نتأخر وره العشه وجان نسمع الباب يندگ طلع عماد وجان يجي شايل درويش ابن فاتن

ديالا: ما اصدگ اجت فاتن يعمري شگد مشتاگلها حضنتها وگمت ابجي صايره تخوف وگوه تحجي وشايله ابنها الزغير محمود

فاتن : شلونكم ولو ميحتاج اسأل البيت مضلم واشكالكم تحجي وضعكم(الناقله روعه الطائي)

امل : خيتي فاتن الي صار صار ولا عتراض على حكم الله عوفج من كلشي وركزي بصحتج وجهالج

فاتن : الله كريم نسأل الله يصبرنه

ليال وينها شلون صارت

امل : على حطت ايدج وباجر نطلع غبشه

فاتن :وين.

امل : لصلاح الدين نوديها على شيخ يرقيها

فاتن : صلاح الدين شنو وشيخ شنو

امل : شيخ علم من گرايب الشيخه خزامي اجت وشافت حالة ليال ونصحتنه بي

ديالا : ظلت امل تشرح الوضع لفاتن حجتلها كلشي حت من ليال نهزمت وجابها رجال غريب

بالبداية فاتن رفضت گالت اوديها اني هم يمهم واحد

بس من گلتلها امل على بنت الشيخ علوان جانت ازيد من ليال وطابت على ايد هاذ اقتنعت

امل : اترخص منج اكمل لم هدومنه واحمد ربي انج اجيتي جنت ماكله هم ديالا تظل وحدها

فاتن : گوه خلاني حجي حسين اجي وخطيه حيدر ما قصر جابني بهالليل

امل : شلون تجين ويه زلمه غريب يا فاتن غير تخابرين تگولين

فاتن : خايبه اسكتي حيدر لوما شواربه جان گلت هاذ بنيه من گد الخجل والمستحه مالته

الله عليج ديالا وديله جاي خطيه جان مسوي جاي وجفتت علي فززته معد يخلف

امل : انطي لعماد يودي وتعاي لمي هدوم ليال انتي تعرفينها شتحب

ديالا : لميتهن

امل :ثاني يوم گعدنه من الفجر صلينه وننتظر الشيخه

اجت ب 5 الصبح ليال جانت نايمه شالها عماد وحطها بالسياره الكل نايم ما گعدنه احد

الشيخه گاعده بالسيارة وره

گالت نومها على جتفي وليدي

حطها عماد بالسيارة الشيخه نومتها على جتفها

حطينها بالوسط اني والشيخه وليال صعدنه وره

وصياد يسوق وعماد بصفه وابني بحضن عماد

توكلنه على الله

بالطريق والشيخه گالت ول صياد يمه نسيت غراض بالبيت

صد عليها گال شيخه مو صارلج يومين متهيره

فر السيارة ورجع البيتهم وهو يحجي

طبگ بالباب مال السياج

حدر گال وين مخليتهن گالتله عالقريوله بعلاگه بيضه بسااع وانه امك جيبهن

رااح يمشي سريع بخطوتين وصل البيت ما شاء الله بيتهم قلعه من كبره +

اجانه ولد شاب حلوو يشبه صياد بس بشرته حنطاوي سلم على عماد وبوسه

مد راسه من شباك السيارة

گال جده اخذوني وياكم عليج الله اقنعي ابويه زعم اني ما گايلج لحي عليه وگليلي تعال ويانه واني راح اسوي نفسي ما اروح

يحجي ويتلفت وراه

خزامي: امشي ولي وين اخذك ما ادحگ ماكو مكان

عينك من هين وليدي ظل ويه جدك الشيخ لا تعوفه

امل: تأفأف الولد ودحگ على ليال وجان تضربه الشيخه على گصته

حك گصته گاللها بس بيها روحه لهلج تكيفين والله الا اهيم جدي عليج حيل منطيج نعته ما يغوره ابويه صاگر نسوانه شحدها وحده تروح لهلها اذا مو هوه يوديها ويجيبها

وجان تگله اگوم ايبس عضامك امشي لا تجهل روحك خفه هالطول الي مابي نفع

امل :راح وهو مقهور

خزامي : شگد ما كبرو يظلون جهال وين ما اروح مدفگين نفسهم ويايه ومتهيرين يلمون هدومهم گبل هديماتي

عماد : شيخه العفو هاذ ابن من

خزامي : هاذ النشمي ابن صياد الجبير

عماد : اللهم صل على محمد الي يشوفه يگول اخو صياد مو ابنه

خزامي : اي وليدي صياد اكبر من ابنه ب 15 سنه

عبن عندي هو هالوحيد زوجته من زغره وخلف وكبر وهوه ولده كلمن يشوفهم يعبالي اخوته الحمد لله عوضني بيهم(الناقله روعه الطائي)

عماد : الحمد لله الله يحفظهم جميعاً

خزامي : امين وليدي امين هاذ صياد غير طس طسه هسع شوف العين شافو الجهال وتهيرو ويا

امل : اشرتلي الشيخه مديت راسي عليها وجان تساورني گالت يمه جان لبستي البنت هدوم غير هذول ولبستيها ملفع

امل : دحگت على ليال شبي لبسها تنوره سوده وقميص نيلي وليال وينها وين الملفع

حطيت راسها على جتفي ولزمت وجها

طلع صياد ومثل ما گالت الشيخه جهاله وراه يبجون وامهاتهم وراهم يركض وحده مفرعه

خزرهن شالن الجهال بسااع وفاتن جوه

حط العلاگه بالصندوگ وجان يصعد دحگ على امه ولگح ملفع بحضنها

اخذته الشيخه وجان تغطي بي ليال

صياد : شيخه مزال احنه هين گليلي خاف ناسيه شي

خزامي : بس امشي گلبي اعمى من وره جهالك اثولوني

امل :مشينه على صلاح الدين وادعي ربي يسهل دربنه ويسر امرنه

الطريق ملل وطويل ليال نايمه على جتفي

وابني بحضن عماد غفيت بالسياره وحلمت وگعدت وبعدنه ما وصلنه الطريق اطول من عمري

ديالا: نگزت بجي وراهم من گعدت وما لگيتهم

حضنت ملابس ليال وابجي وتندمت عبن اضربها من تعصبني وتكفر افتر بالبيت وادحگ ظلت بس الحيطان

هاجر لازمه عده يم اهلها

وصبره ما تطلع من حجرتها وذا طلعت صدفه تسممنه بسالفة وتفوت

وامي ما تهد القرأن من ايدها

وفاتن نايمه هيه والجهال

وعماد وليال وامل وابنها راحو هسع شسوي بروحي

من گد ما مگابله جوانه وجاهد گمت اسولف مثلهم والعب وياهم

گعدو حطيتلهم ريوگ وتريگو

وطلعتهم يلعبون تما يگعدون فاتن وجهالها خطيه گعدت بالطرمه حاطه ايدي على خدي ودموعي تجري

گمت اتمشى مداير البيت

شگد جنه مرتاحين يربي

بسبب الثارات والحب خسرنه كلشي

امشي وادفر الحصو من الگاع برجلي وحاطه اديني وره ضهري ومدنگه حايره بزماني مستمره امشي وادفر بالحصو رفعت راسي عيني بعين حيدر

امل : الكل ساكت بالسيارة هدوء تام

بحيث اسمع صوت كل قطعة حديد بالسيارة

الشيخه خزامي لازمة السبحة وتسبح وعماد يمكن نايم عبن مرجع راسه وره

وليال بعدها نايمه الحمد لله

بنص هدوئي وصفنتي

سألتني الشيخه خزامي هاي الحليوه مبين نومها ثگيل

امل : فزيت عبن جنت صافنه

گلت اي والله نومها ثگيل بلكت تظل نايمه لحد ما نصل ان شاء الله

ادحگ عماد يحرك براسه بعدين دنگ

سأله صياد اخوي انت ادخن

عماد : اي والله

صياد : عجل ما تگول اخوي

عماد : خوما ادخن بالسياره عيب من الشيخه

خزامي : لا يوليدي دخن براحتك

عماد : لا ما ترهم

صياد : عجل نگف ناخذلنه شوح لابت روحي

عماد : الي تشوفه

امل : وگفو السياره وحدرو يدخنون ويتمشون عبالك ردتلهم رواحتهم من دخنو

صياد : شيخه تحدرون تمشون

خزامي : لا وليدي البنيه نايمه

رجعو صعدو وشغل السياره ومشينه

شويه وگعدت ليال گامت تمطا بنص السياره اصبعها طب بعيني

فركت عينها وجان تثاوب وظلت ساكته وادحگ

واحنه ساكتين هدوء خايفين منها محد حجه شي

مشينه مسافه وجان اطس السياره وتفز على فزتها وتعيط هدوني ونزلوني احنه وييين واشكال الحجي

احاول الزمها واسد اثمها ما اگدر وعماد يحجي عليها ويهدئ بيها ماكو

لزمتها من ايد والشيخه من ايد

گامت ترافس

صياد وگف السياره

صد عليها وعاط ــــ اكرصيييي( اسكتي)

نخلست ولا حس طلع منها ختلت ورايه ولزمت ثوبي

واني وعماد والله هم انخلسنه حت ابني جان يبجي سكت

صياد طبطب على جتف عماد وگاله تعذرني اخوي

عماد : ولا يهمك

امل :وصلنه صلاح الدين بطلاع الروح

طبينه البيتهم الضهر ما شاء الله

صدگ مثل ما گالت يطارد بي الخيل جبير حيل وبي حديقه حلوه

بيتهم الي بالرمادي صح اكبر من هاذ واكثر فخامه بس مابي حديقه غير ثيله +

وهاذ حديقته جبيره اشجار ورد

مجرد طبينه الطرمه ارتحت نفسياً

بس جسدياً كسرنه الطريق تكسر

خطيه الشيخه حدرت تسحل بروحها

فتحتلنه الباب وطبينه جوه البيت نضيف ومبين اليوم منضفينه

صياد وعماد نزلو الغراض وگعدو بالحديقه

عماد مدد رجلينه تعبان منتهي

وصياد يمشي هين وهين عبالك الطريق عنده خمس دقائق الضاهر متعود

جابولنه الغده وگعدنه بالصاله نتغده اني والشيخه وليال وصياد وعماد بالهول

نمنه من التعب

والعصر اجت الشيخه گالت بنيتي اجاني اخوي وعزمنه عالعشه ما گدرت ارده لح جثير گال عيب انتو اول طبتكم لصلاح الدين وبخاطره يعزمكم

امل : والله القرار يم عماد

خزامي : وعماد يم الصياد ان شاء الله يقتنع هاذ زلمتج مبين راسه يابس گوه يقتنع بشي لا تزعلين بنيتي

امل : ههه لا شيخه والله مثل ما تفضلتي

گاعدين بالهول وجان ينادي صياد شييخه

راحت وجان يمد ايده انطاها علاگه

اجت وطلعت منها عباة

خزامي : هاج بنيتي لبسي هالحليوه العباة ولفعيها زين

امل : ليش

خزامي : راح يجي الشيخ عثمان يرقيها

امل : اخذت العبايه لبست ليال گوه ما تفعل تلبس گلتلها انادي الزلمه الي صيح عليج هزت راسها لاااا

لفعتها وجان يدگ الباب وفات الشيخ عثمان

جان رجال متوسط العمر لحيته بيضه وجهه يشع نور

فات گعد وجان صياد اشر على امه وطلعو گالو اخذو راحتكم وسدو الباب

عماد گاعد بصف الشيخ وليال لازمه ثوبي وخايفه وتبجي

بلش الشيخ سؤلات

حجيناله كلشي بالتفصيل من اول يوم الحادث لحد اخر موقف بالسياره گتله تفز بالليل وتختل بالحمام وتحجي ويه نفسها وتعصب وتكفر كلشي حجيت الا من نهزمت وجابها رجال غريب ما گدرت عبن عماد موجود

گال غطي رجليها بالجرفرف

امل غطيتهن

گام الشيخ يقرا نفس الأيه الي قرتها الشيخة

وتصرگعت ليال وهو استمر يقرا

لحد ما نهد حيل ليال ومعد ظل بيها حيل عدسة عينها مرفوعه فوگ وتلهث

وجان يگول الشيخ

اصعد براسها واحجي يالله

اني وعماد الي يذبحنه ما يلگه بينه قطرة دم

اندحگ على بعض ومو فاهمين شي گاعدين بالزاويه ونبلع بريگنه

الشيخ مستمر يحجي

لحد ما نطقت ليال وجان تگول ما اطلع منها ما اطلع

الشيخ گال ليش ما تطلع

گله احبها ما اطلع

يتبع………