رواية غرباء ( لقاء بعد الموت ) الفصل الخامس عشر 15 بقلم اساورالموسوي

السلام عليكم

اللهم صلِ على محمد وآل محمد

لا تنسون تعليقات عالفقرات+متابعة لحسابي+تصويت

----

يا هادم اللذات ومفرق الجماعات

بلچن من تطل بروحي وياك تاخذها.

تعب هالعمر من كثر الطعنات

وروحي من الضيم ما عادت تلمها.

ما بقه بيَّ صبر لا حلم لا ثبات

حتى المراية جزعت بألمي من انظرلها.

----

"حروب"

گلبي انخسف مو بس صار يدگ، لزمني اكثر وسحبني للغرفة المظلمة، ريحته خلتني ارجف، دموعي نزلن غصب، طلع صوتي ضعيف منكسر.

:- عمو دخيلك عوفني اطلع

مد ايده يلمسني بطريقة مقززة، دفعته بكل قوتي ونبتت اظافري بخده، شهگ بعصبية.

:- ولچ يا قليلة الأدب!

:- انتَ قليل الأدب يانگس!

فلتت منه وبدون شعور ركضت بشكل مو طبيعي عبايتي عرقلت رجليَّ عثرت بالباب، بس گمت بسرعة.

ابچي وانه اركض، حسيت روحي راح اموت من الخوف، طلعت للشارع وانه مختنگة ما اشوف گدامي من الدموع، ركضت للبيت گبل، دفعت الباب بقوة دخلت توه الولد جاين من البستان.

كل واحد لاهي بشي، يمسحون طين الچيوبلس الابسينه، واللي ينظف المنجل، واللي يحضر حبال، بس شافوني ابچي نخبصوا وعافوا البيدهم.

رشاش :- حروب شبيچ؟!

يوسف :- ليش تبچين؟!

علي الزكي :- منو النزل دموعچ ولچ احچي؟!

خنجر :- شبيچ؟! اللي بچاچ هسة ننزل على راسه غضب ورعيد

انهاريت ابچي حضنت رشاش واشهگ بحسرة، صوتي ما طلع ماگدرت الفضها.

تهضمت ليش هيچ مو كل الناس مثل اخوتي نظيفين؟!

رشاش انخبص..

:- ولچ شصاير فهمينه منو مأذيچ؟!

بالگوة نطقتها..

:- عمو... عمو ابو مسلم

سكتوا كلهم فجأة..

علي الزكي :- شمسويلچ؟

گمت ارجف اكثر..

:- تحارش بيَّ حصرني ببيت عمتي ماعرف شچان يريد يسوي؟! بس شردت منه

رشاش بعدني عنه وعيونه اشتعلن نار..

:- شنوووووووو؟! ابو نعااااال شجابچ عليه؟!

يوسف بعصبية..

:- ايا چلب ابن الچلاب الناقص النگس

علي الزكي بصوت خشن مزمجر..

:- وينه هسة؟!

رشاش :- لمسچ؟!

هزيت راسي وانه ابچي..

:- لا دفعته وشردت

رشاش عروگه نطت وقبض ايده..

:- يوسف صيح لتيجان، اليوم نربي هالناقص

يوسف ركض راح يصيحله، ظليت ارجف اعرف راح تصير مصيبة ومشكلة، بس من ينسكت عنه يتماده اكثر.

علي الزكي دخل للبيت يصيح..

:- يمه يمه تعاي حروب جاي تبچي

امي طلعت من الغرفة..

:- شبيها؟!

رشاش بعصبية :- ابو مسلم النگس تحارش بيها

امي شهگت شهگة قوية وضربت صدرها..

:- يااابوفاضل دخيلك! صدگ تحچون؟!

هزيت راسي وابچي..

:- اي صدگ

امي :- اياا الخنزير ابن الخنازير، مو هذا تاريخهم معروف نگوس اولاد نگوس ولاااا تريد من عدنا مرة لابنها هو وابوه ابو الهوش

رشاش :- يمه الرجال ميت

امي :- لا تخليني انبش گبره، مات وهو بسواد الوجه يعني شنو مات وهو يصلي بالجامع؟ مات مصخم غير نحره واحد شافه وهو يلوط بالهايشة

لزمت حلگي بصدمة وبلعت ريگي من الخوف، تذكرت الشفته من مسلم چان بالحضيرة مال هوش جدي.

علي الزكي :- يمه مايصير تحچين بميت استغفر الله

امي :- انتَ انچب، روحوا شوفوا شغلكم ويه اللي يتحارش بعرضكم، اريد تسون عيونه بالطول، وتشربون من دمه السگط ابن السگط، اخلص من ابن سقطون يجيني نگسون!

تيجان اجه :- شصاير؟!

رشاش :- ابو مسلم مد ايده على حروب

عقيل اجه سمع..

:- صدگگگ ولكم اليوم اكتله!

تيجان فتح عيونه..

:- ابو مسلم رجل عمتي؟

رشاش :- اي قندرة عمتي قصدك

امي رفعت رداناتها..

:- اوگفوا ولدي اروح وياكم، اغسل هالسگط بيدي

راحت لبست عبايتها وطلعت وياهم، ظليت ارجف من الخوف، آية طلعت وشامية يسألون شكو، سولفت الهم.

حسيت آية توترت وضاجت، خطية هي تعرف هالشعور اسوء مني، ظليت ابچي، لمن سمعنا صياح وهوسة.

خفت البس عبايتي واطلع، بس ماگدرت انتظر، رحت ركض، شفت رشاش يجرونه من ابو مسلم وهو غضبان ويريد يفك نفسه يهجم عليه.

باوعتله مدمم وجهه، عمامي يبعدون باخوتي ويرجعون يهجمون، مسلم خبص نفسه يدافع لابوه، وهو بدفره وخره تيجان وطيحه بالگاع.

عمتي تصيح وتصرخ..

:- يبوووووو أكبر تعال شوف ولدك كسروا رجلي، يابه الحگ

جدي طلع وهو يدعم بالدرامات الحديد، مايدري شصاير، بس الولد ماسكتوا گلوله تجرأ على حروب.

حتى عمامي تخبلوا عليه، كسروا ظهره حتى صاح الغوث، جدي گال لعمتي لا انتِ ولا رجلچ تعتبون بابي.

ابوي اجه و ولد الشارع، حتى بيت ابو سلطان، گلولهم مشاكل عائلية، حسيت جسمي باد من الرجفة والخوف.

عبالك مسوية فد شي غلط والله، وكلما تزيد العركة ابچي، حتى لزمت برشاش وتارة بتيجان امنعهم يتعاركون حتى مايتأذون.

وانه انحب واگفة اشهگ بالبچي، تيجان التفت عليَّ اجاني حطاني جوه زنده عصرني قوي.

:- حروب لا تخافين ولچ كافي، يستاهل حتى مايتماده مرة ثانية

ابچي واشهگ..

:- ماريدكم تتأذون بسببي

تيجان جراني واخذني يمشي بيَّ للبيت انه عيني وراي اشوف اخواني اعصاب لا الا شاعلين نار.

من يومها عرفت الله انطاني اخوة سباع ويشگون بطن الارض ويدفنون اللي يدوسلنا طرف.

ابچي واشهگ، رجلي ماعاد شايلتني، تيجان شابگني يمشي بيَّ بعيد عن الهوسة والصياح، صوتهم بعده واصل للشارع.

تيجان :- حروب لا تباوعين وراچ

هزيت راسي ودموعي غسلت وجهي، دخلني للبيت، گعدني بالصالة وآية خايفة تباوعلنا، گعد گبالي ظل يباوعلي بحنية وهو بعده معصب بس هدأ گدامي.

:- هااا هسة احچيلي شبيچ تبجين هيچ؟!

:- خفت عليكم

ضحك :- ولچ شنو نسوان احنه، مو اول مرة نتعارك

:- بس شفت هواي دم خفت

:- هذا دمه مو دمنا، لا تخافين

شبگته قوي حسيت اذا عفته راح اختنگ..

:- عبالي بسببي صار كلشي

:- لا تعيدينها بعد لا تلومين نفسچ، مو انتِ السبب

وخرت عنه..

:- بس لو ساكتة ماصارت مشك...

گاطعني..

:- لو ساكتة يتمادى اكثر، وباچر يمكن ويه غيرچ، انتِ سويتي الصح من گلتي، حروب اي واحد يتجرأ عليچ گليلنه واحنه نحاسبه

:- بس ماردت مشاكل والله

:- اعرف حبيبي اهدي، مو انتِ السبب بالمشكلة، هذا يرادله تأديب من زمان وهو يتجاوز حده

:- الله يلعن كل واحد هيچ يسوي

:- لااااء حروبي گولي حسبي الله ونعم الوكيل، على كل شخص تدنه نفسه على بنية بالحرام او يخدش براءة طفل

:- حسبي الله ونعم الوكيل، حسبي الله ونعم الوكيل عليهم كلهم

مسح على راسي بهدوء..

:- فخورين بيچ لأنچ دفعتي وشردتي، مو كل البنات تگدر تسويها

:- چنت خايفة كلش، ملخت وجهه

:- طبيعي تخافين، بس هم چنتي قوية

:- من الروح العزيزة قويت

:- ههههههه شنو هاي اظافرچ مطلعات دم بخده، عبالي شرطية مو حروب

:- ماحسيت حتى شلون دفعته

:- زين سويتي، گطعيله جلده اللي يدنه عليچ، سمعيني عدل محد بالبيت راح يحاسبچ، لا ابوي ولا امي ولا واحد من اخوانچ، لأنچ مالچ ذنب

:- بس احس نفسي...

:- لا تكملينها، لا تسمحين لهالاحساس يدخل راسچ، الغلط مو غلطچ، الغلط على الخسيس اللي مد ايده

هزيت راسي..

:- فدوة شگد احبكم

:- عيوننا ونظرها انتِ

:- الله يسلمكم النا، والله خفت تتاذون مو عليه هو يطبه مرض

:- بيني وبينچ، رشاش هسة يريد يدفنه بالبستان مو بس يضربه

انتفضت بخوف..

:- لااا تيجان لااااا انتوا تتأذون

:- هههههه هدي ولچ اتشاقه وياچ

اجتي امي وهي عصبية نزعت العباية شمرتها وگعدت بالگاع فحطانة، وهي تصفگ ايديها.

:- يممه هوا ولچ هوااا، يمه ردت اشرب من دمه، وچماله عمتك الشفيه ادافعله وتنكر بداله لتگول محامي مالته، ان ما هجمت بيوتهم وشيلتهم من هنا ماكون عتباااار

تيجان :- مو عمتي تصدگه شيگول، ملاك بريء عدها

:- اي ملائكة يمه منو مثلهم، بختتتت چان زين عندي هالبخت ويه ابوك ويدافعلي هيچ، اخخخخ يمه بخوتهم

:- يمه هم ركضتي على ابوي شمسويلچ؟! اشو حاطچ على راسه

:- ولك تويجان تسكت عني لا اطفي هالنار بيك وانعل خير خيرك "دارت عليَّ" وانتِ ولچ مصخمة شوداچ هناك؟

:- چنت اريد اروح اشتري للجهال مرت عمي دزتني

:- يامررت عم؟

:- بدور

:- ياااا بووويه بديره! وبتها شبيها محناية؟!

:- اندري وامها بس اروح تكربني وهي گاعدة

:- خدامة الخلفوها، وشعندچ كله كارصة عدهم اذا هيچ؟!

:- يمه بيت جدي شنو ماروح؟

:- تعاي اخذيلچ راشدي يمه

:- لا حشاچ يمه

:- ظلت حشاچ، انتِ مو خالية والله اكسر ظهرچ حروب اذا صارلچ شي مارحمچ فوگ ما صايرلچ

ظليت ساكتة بلعت ريگي بخوف من كلامها، صاحت بعصبية..

:- ولچن جيبلي ماي نشف ريگي الله ياخذه كون هو وابن اخوه الناقصين، وانتِ الفايخة رايحة لعش الضباع بنفسچ!

تيجان :- يمه كافي تاكلين گلب حروب شعليها

:- انتَ تنچب وتسكت لا والله اطلعها بيك، ولچچچچ آيييية جيبي سم حياي ريگي نشف، شاااامية صخمية انتِ جيبي هاي ماتت

تيجان :- انوب حولت على مرتي المسكينة

:- اممممم ضچيچه، گوم من گدامي لابوك لابو مرتك

:- على كيفچ بس لا تعصبين، يخرب جمالچ

:- اي قشمرني بحچايتين، عبالك انه هالصخلة وتضحك عليها؟!

:- هههههههه يمه شبيچ تنغثين منها، ترا حلوة مرتي حبوبة

:- گووووم من وجهييي! انعل ابوك لابو مرتك

:- يمه ليش تلعنين ابوي

:- ولكممممم تعالوا اخذوا ابن اكبر من گدامي لا انحره

:- هاي گمت، ارتاحي

شوي واجوا الولد اعصاب نار ومايتحاچون خفت يلوموني، ابوي عصبي يگلهم هيچ تحلوها وهم يگلوله حتى بعد مايتماده...

**

لزمت ايدها بقوة شهگت بخوف من شافت الدم يگطر من ايدها، ترس الصينية الچانت تسوي بيها زلاطة، حتى غرگ الخيار والطماطة..

ظلت تشهگ بخوف..

:- آآآخخخ ايدي عمة ايدي! ايدي!

السچينة طاحت من ايد عتبار، التهت تباوع لجرحها وتحاول توكف الدم، التفتت ماشافت عتبار اختفت من المطبخ وكأنُ شي ماصار.

ظلت صافنة بالدم المرعب اللي يگطر من جرحها العميق، اضطربت انفاسها بسرعة شالت وصلة الطباخ لفتها على الجرح وهي تبچي وتتألم.

:- يمه يمه يأذي، الدم ماجاي يوگف يمممه

بهاللحظة دخل سيد أكبر يتحسس الحيطان والگدامه..

:- آية وينچ بوية شبيچ سمعت صوتچ؟

طلعتله وهي تشهگ، لافة ايدها والدم طالع من الوصلة وينزل عالارض.

ظلت تگطع بالكلام..

:- عمو عمو ايدي... ايدي...

انخبص من صوتها..

:- شبيها ايدچ بوية شصاير؟

ظلت تبچي وماگدرت ترتب الحچي..

:- انجرحت... ايدي... جرح... چبير...

مد ايده يتحسسها بخوف..

:- وينچ خلي احس بيچ، شكثر الجرح؟

:- چبير!

:- وين رجلچ وينننه؟ عتبااااااار وينچ؟!

دخل تيجان اول ماشاف الدم جمد مكانه شوي وفجأة ركض الها بخوف..

:- بسم الله الرحمن الرحيم شصاير؟! شبيها ايدچ؟!

ترجف وتحچي..

:- عمتي... عمتي...

تيجان باوع حواليه بسرعة..

:- شبيها امي؟

آية دموعها تنزل..

:- هي هي گصت ايدي

تيجان فتح عيونه بصدمة..

:- شنوووو متعمدة گصت ايدچ؟!

:- اي اي

:- ليييشششش؟ يممممممه

طلعت عتبار..

:- خيرررر شكووووو؟! شبيكم تصيحون؟

تيجان :- يمه صدگ گصيتي ايد آية؟!

سيد أكبر :- بعدك تسأل امك وحقدها ماتعرفها، روح وديها للطبيب بسرعة

عتبار :- شنووووو؟! شنووووو؟! ماسمعت عيد يمه تتهمني گصيت ايد مرتتتككك انووب؟!

:- نتحاچه بعدين يمه

شال الوصلة من ايدها حتى يشوف، اول ما شاف الجرح انقبض گلبه..

:- يابه الجرح كلش عميق!

آية شهگت من الوجع..

:- آآخخخخ لا تجيسه فدوة يأذي

تيجان ارتبك..

:- اسف خلي اضغط عليه، لزمي قوي خلي اجيب ابن ابو خالد يودينه مستشفى يخيطونه

عتبار :- شدعوة هل الخوف والنعوصة هو جرح، شنو عمية وانتِ تگصين، انوب تتهمني الخايسة

سيد أكبر :- ياويلچ من الله ياعتبار

عتبار ظلت تصيح..

:- وشمسويتلها؟! لا تتهموني باطل هي فاهية وغبية ولگتها فرصة تتهمني!

سيد اكبر :- إلا انتِ بلاء اسود محد يتهمچ باطل

عتبار بنفس الصياح..

:- شنو شايفني ذابحة صالخة كاتلة ابوك حتى هيچ تگوول!

سيد أكبر تجاهلها :- بتي لا تخافين بس لبسي عبايتچ تگدرين؟

آية بخوف..

:- لا عمو مابيَّ شي ماروح

:- يا مابيچ شي دمچ راح يخلص

:- لا عمو ماروح مابيَّ شي

:- بنيتي شنو ماترحين شجاااچ

من رعبها من عتبار ونظرتها نطقت كلام مو بيدها..

:- اخاف عمتي تزعل، هي ماسوت شي انه تبليت عليها

:- شنو تفكرين هسة بزعل عمتچ؟!

:- مو حچيت عليها

:- متأكدة؟ بتي لا تخافين انه انصفچ

:- لا لا هي ماسوت شي من الخوف گلت هي

:- آية احچي الحق اعرفچ ماتحچين هيچ بلا سبب

شافت عمتها تأشرلها على رگبتها بالذبح، فخافت وظلت ترجف اكثر، بلعت ريگها ونفت كلامها.

اجه تيجان اخذها للمستشفى ويه صاحبه، وهو خايف عليها، صاحبه گله انتظركم هز راسه واخذها للطوارئ.

اول ماشافها دكتور گال تحتاج خياط، وهو يعرف تيجان ابن جيرانهم، اخذها لغرفة الطوارئ، المضمدة اخذت ايدها تنظفها وهي خافت تمسكت بملابسه قوي..

:- لااا لاااا ماريد خياط

:- آية لازم خياط، الجرح عميق

شهگت بخوف وهزت راسها..

:- لا لا لا ما اريد

ولأن رفضت اجه الدكتور، يطمنها يحاول تقتنع يتخيط جرحها، بس ولا اقتنعت خايفة.

تيجان :- آية سمعي كلام الدكتور

لزمت بيه قوي..

:- لا تيجان دخيلك لا تخليهم

الدكتور :- اذا ما نخيطه يلتهب، الجرح مفتوح كلش هواي

آية :- لااا اخاف

تيجان :- ما راح يأذيچ

:- لا مااااريد خياط

:- فدوة اسمعي مني، بس چم خيط ويخلص

:- لا لا لا

الدكتور تنهد..

:- سيد حاول وياها لأن الدم بعده ما وگف مضبوط

تيجان مسح على راسها..

:- آية باوعيلي، انه يمچ ماراح اروح

:- لا تعوفني فدوة

:- ما عوفچ يمچ يمچ، بس خلي يخيطون الجرح لاينزف من جديد

:- يأذي والله

:- اعرف بس لازم

الدكتور :- ابرة بنج بسيطة بالبداية وبعدها ما تحسين

آية :- هااااا لااا ابرة لا

تيجان رغم قهره ضحك بخفة..

:- يابه شلون نساعدچ وانتِ خايفة من كلشي؟

:- اخاف من الأبر هنوب خيااااط!

:- باوعيلي اذا ما خيطناها تبقه توجعچ ويمكن اتعبچ ومايطيب، وانتِ سباعية مو؟

هزت راسها بخوف..

:- اي خوش

الدكتور ابتسم..

:- اي عفيه عليك سيد هيچ اقنعها

آية باوعتله بخوف طفولي..

:- صدگ ماتروح؟

:- اقسم بالله ما اتحرك من يمچ

:- وتلزم ايدي؟

:- الزمهن ثنينهن همين

تنهدت برجفة..

:- بس لا يطولون

تيجان ابتسم الها بحنان..

:- يطولون شوي وانتِ قوية مو صح؟

:- لا لا يطولون فدوة

:- شگد تحملتي بحياتچ هاي، تخافين من چم خياط؟

عضت شفتها بخجل..

:- بس اذا بچيت لا تضحك عليَّ

:- الدنيا كلها محد يگدر يضحك عليچ وانه موجود

الدكتور :- كفووو السيد ابن السيد

:- كفو من اصلك ابو زهراء، شني ماشني شلونه الطب؟

الدكتور :- والله يابو أكبر زين

:- يعني تنصحني ههههه

:- وبشدة خاصة بالجامعة، واللي يگلك تخلص سادس وخلص ترتاح هاي يضحك عليك

:- لا تگول! يعني صعب

:- لا ان شاء الله مو صعب للي يفكر بطموح، لكن تكون فخور بنفسك، انجاز تسوي

:- اي والله تنقذ ارواح الناس صدگ انجاز

:- شنو شوكت ناوي ترجع؟

:- اي والله ندمت عالراح راح اكمله واللي الله قاسمه الي اتقبله ان شاء الله

:- انتَ شاطر ابو أكبر ارجع كمل والله حرامات دراستك

هز راسه، يحچون والدكتور ينضف جرح آية وهي كل شوي تجر ايدها وتتألم، وتيجان يبلع بريگه وياها، مو بس خوف شافه يلزم ايدها هالشي حرگ مشاعره، بس للضرورة احكام.

الدكتور جهز الابر والخيط، وآية اول ماشافت المعدن لزمت تيجان اكثر..

:- لااا غيرت رأيي ما اريد

تيجان حاول ما يضحك..

:- شنو غيرتي رأيچ؟ مو قبل شوي موافقة؟

:- لا هسة لا

الدكتور ضحك..

:- سيد هاي طفلة مو مريضة

آية بخجل..

:- لااا مو طفلة!

تيجان ابتسم..

:- خوش مو طفلة، بس خلي الدكتور يشتغل

اول ما قرب الدكتور من ايدها غمضت عيونها بقوة ودفنت راسها بصدر تيجان..

:- آآخخخ

الدكتور :- بعدني ما بديت!

تيجان انفجر ضحك وغصب حبس ضحكته، رفعت راسها بصدمة وخجل، الدكتور همين ضحك وطلع بهاللحظة.

:- ضحكت عليَّ؟!

:- لا والله ماقصدي بس الدكتور بعده ما لمسچ

عبست بوجهه مثل الاطفال..

:- مو زين عليك تضحك

تيجان لف شفته حتى ما يرجع يضحك..

:- حقچ عليَّ، بس شكلچ يضحك وانتِ مغمضة عيونچ وتصرخين قبل لا تلمسچ الابرة

دارت وجهها عنه بزعل..

:- بعد ما احاچيك

المضمدة ضحكت..

:- گطعي عنه الهوا والماي همين

آية بفهاوة..

:- شلووون

تيجان :- خويه خليچ محضر خير

آية :- لا إلا گطع عليك الهوا والماي مثل ما گالت، ليش تضحك

اجه الدكتور وتيجان لازم ضحكته، بسرعة انطاها الابرة وهي شاغت روحها، ملخت ملابس تيجان من گد ما لازمتهن وتجر بيهن.

الدكتور :- هسة صار صدگ جاي يتخيط

آية شهگت..

:- تيجااان!

:- ها يمچ يمچ، خلص نصه يلا تحملي

:- اذا متت شتسوي؟

تيجان رجع ضحك غصب..

:- من چم خيط راح تموتين؟!

:- انتَ ماتدري يمكن انه اموت

:- لا ما تموتين

الدكتور گام :- وهاي خلصنا، الحمدلله على سلامتها وخلي تنتبه، لا يلتهب جرحها.

تركهم الدكتور وطلع وهو يعدل بعبايتها حتى ياخذها ويرحون، ظلت تتوجع..

:- راح اموت

:- شسالفة آية جرح يموتچ

:- اي يمكن، صدگ اذا متت تيجان شتسوي؟

:- شسوي وره الفاتحة ادورلي مرة

فتحت عيونها عليه بصدمة..

:- شنووو؟! صدددددگگگگ؟!

المضمدة ضحكت..

:- لا لا هاي قوية، هاي الزلم بعد 3 ايام من فاتحتچ يدور مرة

تيجان همسلها..

:- جاي اتشاقة ترا

:- كله تشاقيني

:- لأنچ تخبلين من تخافين

آية سكتت شوي وهمست بخجل..

:- لا تگول تخبلين

:- ليش؟

:- استحي

ضحك واخذها ورجعوا للبيت، قبل لا يدخلها للبيت گال لصاحبه ينتظر شوي.

تيجان :- السلام عليكم

سيد أكبر :- ها وليدي شصار؟ شلونها البنية؟

تيجان :- خيطوا الجرح

سيد أكبر :- الحمدلله عالسلامة بوية

آية :- الله يسلمك عمي

عتبار تهز شفايفها يمين ويسار..

:- چم خيط سويتوا علينا سالفة

تيجان :- يمه ايدها مفتوحة ترا مو خدش، بس صدگ ليش هيچ تسوين بيها؟ مو حرام عليچ يمه هسة حتى ما أمنها يمچ

عتبار :- ولك شو تاكل تبن، تصدگ مرتك وتچذبني؟!

آية :- صدگ تيجان لا تكبرها هي ماچانت يمي اصلًا

تيجان :- چا شني تحچين من يمچ

آية :- هااا مو انه...

سيد أكبر :- ماتحچي من يمها، بس الله يستر من امك

عتبار :- شنيييييي ماتصدگوني يعني هاااااا؟!

تيجان :- يمه خلصينا من السالفة هسة سديها

عتبار :- والله العظيم اذا تصدگ بمرتك...

گاطعها سيد اكبر..

:- بسچ صياح كافي

تيجان تنهد..

:- يمه راح آخذ آية لبيت اهلها اليوم، باچر اجيبها

عتبار :- لا ماتروح

تيجان :- ليش لا؟

:- لأن راح تصير كلما يصير شي تركضها لبيت اهلها؟

:- يمه صارلها شهرين ماراحتلهم غير مرة

:- وشنو يعني بيتها هنانة هسة

:- اي بيتها هنانة، بس هم اهلها تشتاقلهم

:- ماكو داعي تروح وهي بهالحالة

:- انه اريد آخذها ترتاح نفسيتها شوي

:- نفسيتها لو انتَ تريد تدللها زايد؟

:- وشبيها اذا دللت مرتي؟

:- ولكم شبيكم كلكم صايرين عبيد الها

سيد أكبر :- عتباااااار بس عاد كاااافيچ لغوة

:- لا والله ما اسكت، هاي كل يوم تكبر براسكم زيادة

تيجان :- يمه هي شمسويتلچ حتى تعاملينها هيچ؟

:- خذت ابني مني

:- يمه تره ما متت، يمچ وآكل من خيرچ وكل يوم ابوس راسچ

:- لا تحچيلي حچي حلو اعرفك، ما تستاهلك هالهايته

:- هسة شمسوية حتى تگولين هيچ؟ شني ماتستاهلك؟!

:- ايي ما تستاهل، اصبر شوي يتعدل حالك وازوجك الاحسن منها

:- يمه شهالحچي تزوجيني بكيفچ خراعة خضرة يمچ!

:- اي ازوجك والا اكسر راسها بضرة

:- يالله هسة لو اگول لسان وتراددچ لو تغلط عليچ لو ما تطيعچ، اشو صايرة مثل ماتردين

:- هي هاي مقامها خدامة هنا تخدمك وتخدمني، تريد تخلف منها خلف يمه بس تذكر هاي العايبة ماتلوگ لابن السادة

ضاج وانكسر خاطره مو بس آية..

:- يمه تكسرين بختي مو بس بختها، حرام عليچ هالحچي تقبلينه لخواتي؟!

عتبار بصياح..

:- لا جيب خواتك بالنص وتقارنهم بهاي

:- ترا الله مايضرب بعصا، يجي يوم وادور الدنيا

:- وللللك تعلمني...

سيد اكبر صاح..

:- بسسسسس كااافي، عتبار امشي روحي لغرفتچ، اخذ مرتك لاهلها، من يمي جزعت من امك شحالها، زين متحملتها

عتبار :- گلت لا يعني لا

سيد أكبر :- وانتِ منو وتگولين لا، روح بوية روح

عتبار :- انتَ صف وياها لمن تركب روسكم

سيد أكبر :- اصف ويه الحق، مو معقولة حتى اهلها تمنعينها منهم

عتبار :- محد يسمع حچيي بهالبيت

سيد أكبر :- الله يهدچ اذا ماهداچ

ظلت تصيح عتبار معصبة، بس شوي وسكتت وسكوتها مرعب اكثر من صياحها، دخل تيجان للغرفة لگه آية ناطه بچي من كلام امه.

:- اخخخ ياربي، آية ماعرف شگلچ امي كسرت بخاطري مو بس خاطرچ، لو تحبني من صدگ ماتسوب هيچ

:- لا هي تحبك لأن تحبك، تشوفني مالوگ الك

:- شني هي انه احسن منچ، تلوگين وراهمه فيت على گلبي

تمسح بدموعها بانكسار..

:- تيجان صدگ تگول امك، انه مو بمستواك، مافيدك...

:- الله يرضا عليچ بس لا تعيدين هالحچي، آية انتِ مرتي وام بيتي، ماكو شي يگدر يغير هالحقيقة

:- بس انه... انه... مو كاملة

ظلت تنحب ايديها على وجهها، انقهر عليها ومايعرف شلون يواسيها، لزم ايديها نزلهن من على وجهها..

:- آية انه رايدچ مجاي تشوفين مايهمني الكمال لله وحده، هو من كامل وانتِ مو ذنبچ هيچ صار... "بلع ريگه" يلا گومي حضريلچ چم شغلة اخذچ لأهلچ تونسي

:- وين اتونس تيجان ماعندي غيرك بهالدنيا يونسني، بيت اهلي محد مهتم ومنتظر جيتي

:- ميخالف لخاطر ابوچ مهمى يكون صلة رحم، اخوانچ ماتحبينهم؟

هزت راسها بإي وگامت وهي ساكتة، كل ظنها تيجان يخدرها ويريد ياخذها لبيت اهلها بس حتى يخلص منها وراح تكون هاي اخر مرة تشوفه.

تباوعله بعيون حَمرة ومليانة دموع، وكأنها تودعه، گام الها وگف وياها طول بطول، لزم راسها بيديه الثنين، مسح دموعها باصابعه.

:- آية مادام راسي يشم الهوا لا تنزل دموعچ

ظلت تبچي اكثر..

:- يعني ماراح تعوفني؟

:- اعوف النفس وماعوفچ

بلا مقدمات اخذ راسها دفنه بصدره، لف ايديه عليها، باس راسها، وهي غرگت ملابسه بدموعها.

:- عليچ الكافل كافي تبچين، والله فتتي گلبي

بصوت مبحوح..

:- حتى لو امي داعيتلي ليل ونهار ماتجي، شنو السر السويته والله يجازيني بيك؟ حتى صلاة ماعرف، منين اجيتلي انتَ؟!

ابتسم بوجهها..

:- من بطن امي اجيتچ

ظلت تضحك بدموعها، ضحك وياها ورجع حضنها قوي ويشم بيها وكأنه آخر نفس اله.

وخر عنها بعد ماخلصت بچي، ظلت تتلعثم بالخجل، وهو احترم هالحياء مالتها، واستعجلها، راحت وياه، وصلها لأهلها وهو يوصيها على نفسها زين، وراح.

حتى ماگدرت ترفع ايدها تسويله بيباي لأن ويه صديقه جاين، دخلت داخل مرت ابوها استقبلتها.

:- هلا بآية هلا شگد مشتاقيلچ خالة

:- هلا بيچ خالة شلونچ

بوستها ودخلت جوه حتى ماسألت شبيها ايدچ ولا اهتمت، بعدها مالحگت تگعد راحت مرت ابوها جابت كومة بطاطين.

:- الله جابچ والله چنت محتارة بحدي ومابيَّ ظهري يأذيني، بلكن تغسلين وياي الفرش

:- اي خالة ادللي، بس باوعي ايدي توها مخيطة ماگدر والله

:- يووه نسيت اسألچ شبيها ايدچ؟

:- تأذيت بالسچينه

:- يوووه تكبرين وتنسين، يلا تعاي تعاي هن مو هواي سهلة بسرعة يخلصن

:- خالة ماگدر ايدي گتلچ

:- مو الا تغسليهن بيدچ برجليچ دوسيهن بالطشت، من تخلصين اجي اشطفهن انه واشرهن

سكتت وهي تحس بمرارة، محد يعاملها زين لا مرت ابوها ولا عتبار شايفيها بس خدمة.

راحت نفذت مثل ماگالت الها، حطت البطانية بالطشت الفافون وتايت وماي وظلت ادوس وهي تتألم من ايدها.

انقهرت عود جابها تتونس مايدري بيها اتعس ايامها تكضيها هنا مو تتونس، الحوش مو چبير والسياچ مالته گصب.

سمعت صوت مرة من وره السياچ..

:- آية ولچ آية هاي انتِ؟

:- اي خالة ام جاسم شلونچ

:- طيبة يمه شلونچ انتِ وشلون بيت عيالچ؟

:- الحمدلله، شلونچ انتِ؟

:- نحمد الله ونشكره بنيتي، ماشفتچ من يوم تزوجتي لليوم

:- اي خالة بعد هاي حال الدنيا

:- شخبار زوجچ زين وياچ، سمعت بيه خوش زلمه والناس تمدحهم

:- اي خالة خوش زلمة وكلش خوش زلمة، حتى مستحية من الله شلون جازاني بيه وانه كل خير ماسويت اله

:- بتي انتِ يتيمة على نياتچ، وتاذيتي من هالرگطه، والله عوضچ، ربچ ينطي عالنيات مو عالاعمال

:- والنعم بالله

:- اشوف فتحي الباب اسلم عليچ واحبنچ

راحت فتحت الباب، ولأن ام جاسم جيرانهم بصف بيتهم السياج ناحية بيتها خفيف الگصب ينشاف الداخل، ولأن ام جاسم ماعدها زلم ارملة وابنها معرس بعيد عنها وبناتها معرسات بس وحدة باقية.

ام جاسم باستها بمحبة..

:- يمه شحلاته عطرچ، كون هيچ الزواج يسوي الناس حلوين

آية بخجل..

:- شكرًا خالة

:- يمه گمر من قبل گمر، بس شسوي للفگر جويسم، راح خذه وحدة ماتسوة نعالچ

:- ليش خالة تگولين هيچ مايصير تستغيبيها، هي چنتچ

:- يمه فدوة وصايرة تحچي بالدين، بيت السادة علموچ؟

:- اي والله خالة محظوظة بيهم كلهم دين واخلاق وطيبة، وزوجي علمني صلاة وهواي اشياء بالدين

:- يمه الله يحفظچ ويحفظلچ هالريال الطيب، ويهدي كل گلب گاسي عليچ

:- ايي والله خالة دعواتچ

:- يمه لسان وگلب داعيلچ

:- ماگتيلي شخبارچ

:- حتى نسيت شنو اخباري من وره هالمرة الابن المسمومة

:- يااا خالة رجعتي تحچين عليها

:- موكلته تبن يمه، مايشوف دربه خايسة وجايفة وحظها گاعد هاااكبره مبخته

:- الله يهديها، تعاي خالة اضيفچ شي

:- ياااااااء يمه شبيها ايدچ ملفوفة

:- يخالة سالفة توجع الگلب مدري تخوف، تاذيت بالسچين

:- يمه يمه روحي راحت شلون بيچ

:- الحمدلله على كل حال

:- وشنو هاي گاعدة تغسلين فرش وانتِ هيچ ايدچ؟!

:- اي خالة گالت هسة اجي اساعدچ

:- ايااا المصرگعة شني ماتخاف الله بهالحال وتغسلين الها، ماتفك حال منچ ازوجتي بعد

:- ميخالف خالة هم اهلي

:- اهلچ عالعين والراس مو هيچ، وينها وينهاااا

طبت ام جاسم وترزل بمرت ابو آية وطيحت حظها، شلون مخليتها تغسل فراش وهي ايدها بهالحالة.

ماهماها ولا اهتزت شعره، بس راحت ام جاسم رجعت آية كملت الفرش برجلها، حتى فحطت، وعالاساس تجي تساعدها ماجت.

حتى تشطفهن برجلها بس هي تجي تشرهن، خلصت وهي حيلها خلصان، تمنت يجي تيجان يتراجع ويگول لا تبقين وياخذها.

اذن الظهر علمى صلت شافت ابوها اجه،سلمت عليه وباست راسه، بس گال هلا هلا بجفاف وراح يدور غدا.

تهضمت لهالساعة ونفس المعاملة، ولا گعدت بالارض تاخذ هاي تجيب هاي، تسوي منا ومناك مرت ابوها ولا خلتها ترتاح.

تمنت من صدگ تيجان يجي ياخذها ومايخليها تبات، تخاف همين يجي عمها، لأن هو بهيچ وكت العصريات يجي.

والشيطان من ينذكر يلفي، بس فكرت بيه دخل، شافته وجسمها اختض، ظلت ترجف داخلها لا ارادي، شوفة وجهها كأنه الموت عدها.

دخل سلم وشاف آية..

:- الله بالخير

ابو آية :- الله بالنور، تعال اشرب چاي

ابتسم لآية..

:- منو هاي منور بيت اخوي اليوم

بلعت ريگها وبطنها خبطت، كرهت حتى النفس اللي تتنفسه وياه بنفس الغرفة، اضطرت گدام ابوها تمثل..

:- هلا عمو شلونك

:- تعاي عموتي ماكو بوسة لعمچ

حست الگاع انخسفت جواها، ماراحتله ابد تخاف منه ومن نظرته ومن صوته ومن كلشي، بس هو راح نزل عليها باسها.

تقرفت من ريحته وتمنت الگاع تنشگ وتبلعها ولا هالنزلة عليها، باس خدها وهمس الها.

:- بس نبقه لوحدنا اعبرلچ عن شوقي عموتي

رجفت كل خلية بجسمها، گالت اذا ما اجاني تيجان انه آخذ عبايتي وامشي لهناك، واذا سأل وعاتبني اسولفله كلشي.

:- صايرة احلى من قبل عموتي آية، شلونچ شخبارچ زوجچ شلونه

نطقت بالگوة..

:- زين

:- ترا هذا زوجچ واحد كلاوچي وملعب، لا تشوفينه يلبس لبس الدين وهيوو انه متدين وشوفوني، ترا واحد يمشي ويتنفس نسوان، السادة تعلمينه بيهم نار وشرار مايگدرون بلا نسوان، يريد بصفه وحدة ويم راسه وحدة وبجيبي وحده وحتى يم لباسه وحدة

بلعت ريگها تعرفه مو مايگدر يوصل لمواصيلهم يحچي عليهم، باوعت لأبوها رزله.

ابو آية..

:- بلا ماتنچب وانتَ احسن منهم عود، عينك نگسة، عالاقل ماعافوا بت غريبة طبت دارهم ومشوا عليها وهي مو يمهم

سكت عمها وهو يباوعلها بطريقة خلتها تدمع، تريد تبچي، ماتريده تباوعله كلش، شغلت نفسها باي شي بالغرفة الا انها تباوع للشيطان القذر.

كلش خافت وداخلها يرجف ان ممكن يختلي بيها، الا تروح بيها، شوي وابوها طلع وعمها وياه، واخوانها بالشارع.

مرت ابوها لبست عبايتها.

:- آية غسلي الاستكاين هسة اجي

:- خالة وين رايحة عفية لا ترحين، ابقه بحدي؟!

:- وشنو ياكلچ البعبع هسة اجي

:- لا خالة فدوة لا ترحين

:- شبيچ خايبة والغسل وين عايفتچ بالصحراء؟!

:- اخذيني وياچ

:- اگعدي گعدي وين آخذچ افرفر بيچ حتى زوجچ يگول طلعتوا مرتي ومدري شني

ظلت تقلد بصوتها عليها وراحت طلعت، آية ظلت ترعد رعد من الخوف، راحت گبل للمطبخ اخذت سچين بس ايدها تأذيها ماتگدر تلزمها بيدين الثنين.

ظلت ترجف وهي لازمتها، ومثل ما گلتلها حروب دافعي عن نفسچ بالقوة، حتى لو بالسلاح.

قوت نفسها وهي ترجف مو بيدها، من شافت عمها دخل خرطت العافية وظلت تبچي برعب، صاحت بينها وبين نفسها..

:- يا ابو فاضل مولاي اسطره جاي يتعدى على شرفي وانه عرضه وشرفه..........

بمكان ثاني...

گاعدين على الصه عالشارع، مجمعين الشباب.

هَزيل :- السلام عليكم

الولد :- وعليكم السلام

رشاش :- هلا بالاعوج

هَزيل :- هلا باللطامه

شرار :- تعال هنا لا تگعد بعيد، شكلنا مو عاجبينك

هَزيل :- لا والله خايف تلطموني بالغلط

يوسف :- نلطم على عنادك، لطموا لطموا خل ينجلط ويموت

هَزيل :- هههههههههه يمعودين عش ماخذينها قضية

دفع رشاش شوي وگعد بنصهم..

يوسف :- انتَ تگول لطامه ماعاجبك نلطم ابن بنت نبيك؟!

هَزيل :- الطم وياكم وفداء اله

رشاش :- كفوووو يالذيب

هَزيل :- كفو من اصلك، اخخخخخخ يول رشاش

رشاش :- بيك يول؟

هَزيل :- اخخخخخ لو اصير لباخ چان بنيتلي بيت وازوجت

شرار :- ولك شجاب اللباخة للزواج؟

هَزيل :- اللباخ عندو بيت، واني عندي دشداشة ممزگة

يوسف :- مو مشكلة، المرة ترگعها

هَزيل :- يول اول الگيلي مرة بعدين نرگعها سويه

رشاش :- اي تزوج، ياهو كاضك؟

هَزيل :- انتَ

رشاش :- شني انه ام علي الخطابة لو ام جواد السحارة وگاطعة قسمتك؟

هَزيل :- ابخت جدك رسول الله شوفلي مرة

رشاش :- چلبت ام علي الخطابة انه؟

هَزيل :- هسة انتَ چلبت دفهم عاد اريد مرة من يمكم

شرار :- عدنا بس مستعملات

هَزيل :- انعل عشيرتكم، يول شنهو سيارات هنَ؟

يوسف :- لا هذا يحچي من كيفه، لا تلعن ولا تسب لا اگومك بدفره

علي الزكي :- هزيل شگد عمرك هسة؟

هَزيل :- عشرين

شرار :- يعني بعد عشر سنوات يصير عندك عروض من المطلقات

هَزيل :- ليش؟

شرار :- لأن الثلاثيني مرغوب

رشاش :- هذا يفكر مگلوبي عذره

هَزيل :- والله لو وحدة عرجه هم اخذها

يوسف :- واصل مرحلة بالجفاف خويه، استر نفسك بغض البصر

هَزيل :- ولكم صدگ تا احچي

عقيل :- شني تشتغل هسة؟

هَزيل :- يوم اشتغل ويوم لا

علي الزكي :- وبهالوضع تريد تتزوج؟

هَزيل :- اي

شرار :- اييي يرادلك خوش مرة، من الصبح تجيبلك ريوگ، وتطلع تشتغل بدالك

هَزيل :- هاي اريدها بالضبط

يوسف :- ولك هذا مو زواج صفقة عمل

هَزيل :- اهم شي راتبها يول

رشاش :- انكشف المعدن يدور ماديات ابو الهزازيل

هَزيل :- والله الفگر علمنا

شرار :- لا تخاف، ندبرلك وحدة غنية

هَزيل :- صدگ منين؟

شرار :- بس عمرها سبعين

هَزيل :- انعل روحك

يوسف :- لا ترفض يمكن عدها بساتين وقطع اراضي وعماير وبيوت

هَزيل :- هساع خليتني اقتنع

رشاش :- شفت باع شبابه بدون نقاش

شرار :- بعد ابو الشباب سمع بساتين وعقارات ماعت روحه

هَزيل :- اسكتوا لا يجي نصيبي وتخربوه عليَّ من هساع هههههههههه

شرار :- هَزيل اذا زوجناك شراح تسمي اول ولد؟

هَزيل :- على اسم ابوي مايريدلها كلام

يوسف :- لازم تسميه رشاش لأن راح يزوجك

هَزيل :- اذا اخته؟! هلااا بويااا هلااا احطها بهالعيون

رشاش :- انچب ولك اكبر اخت عندي طفلة

يوسف :- واشوفه يتلوگ لرشاش اثاريه يدور نسب

شرار :- ولك تبصبص لخواتي

هَزيل :- يابه والعباس اتشاقه، ما مدحگ لطول خواتك رشاش تعرفني صديقك، تظن اني ادحگ لخواتك؟!

رشاش :- لا والله والنعم منك، ولو عندي اخت بعمرك اخذها بعبايتها، ونعم الاخلاق زلمة حوك

هَزيل يفتل بشواربه..

:- هلا بابو النسب

رشاش :- اشوف صدگت نفسك

هَزيل :- يابه واني اتشرف انطيك اختي

رشاش عدل گعدته..

:- احم، هسا حي الله ابو النسب

هَزيل :- عجل وين الاگي احسن منك والله

شرار :- انه احسن منه

رشاش :- بعدك زغير ابني

هَزيل :- صدگ رشاش، دبرلي مرة

رشاش :- شگد عندك مهر؟

هَزيل :- هساع مابديت إلا بهالسوالف

رشاش :- چا شلون تريد ازوجك؟ راح اشتغل خطابة ومنزل هيبتي وتريد تعرس بلا مهر

هَزيل :- اقساط مايصير

يوسف :- هههههههههه اقساط! مو المرة ثلاجة

هَزيل :- الوضع صعب يمعود

شرار :- اول دفعة مهر وبعدها حلقات ذهب، تاليها عرس، آخر دفعة طفل

عقيل :- والأخيرة حفاضات وماكو نوم

الكل ضحك.

هَزيل :- والله ما مرتاحلكم صعبتوها عليّ

رشاش :- زين اذا جبنالك مرة شتقدم الها؟

هَزيل :- اقدم نفسي شعندي غيرها

شرار :- وترجعك بنفس اليوم

هَزيل :- ليش؟

شرار :- :- لأن ما عندك غير نفسك، نسوان تريد گروش مو اهل كروش

يوسف :- لا عنده بايسكل

هَزيل :- اي عندي

عقيل :- موديل شگد؟

يوسف :- مو هي سوبر

هَزيل :- لا تفتحون الموضوع

شرار :- بايسكله موديل من ايام العثمانيين

رشاش :- عربانة وحصان هاي

هَزيل :- امشوا گوموا من هينا

رشاش :- گاعدين ابيتك وماندري؟

شرار :- زين اذا خطبولك اليوم شتسوي؟

هَزيل :- اوافق فورًا

رشاش :- حتى لو ما شفتها؟

هَزيل :- حتى اذا ما شفت ابوها

علي الزكي :- هههههههههه هذا وصل مرحلة الخطر

هَزيل :- ولكم العمر تا يركض

شرار :- لا تخاف بعدك شباب

هَزيل :- كل سنة تگولون بعدك شباب

يوسف :- لأنك فعلًا شباب

هَزيل :- باچر اصير اربعين وتگولون بعدك وردة متفتحة

رشاش :- هههههههههه لا والله ذيچ الساعة نگول الله يعينك

شرار :- ونبدي ندورلك ارملة وياها تلث جهال زوجها ميت بجلطة

هَزيل :- ولكم عش حاقدين عليّ؟

يوسف :- شبيك مو حاقدين، جاي نجهزلك للمستقبل

شرار شمر حسرة..

:- تره مو بس هَزيل يريد يتزوج، انه هم اريد مرة

رشاش :- انتَ اول شي الگه عقلك

شرار :- العقل موجود، بس المرة ما موجودة

يوسف :- شنو مواصفات اللي تريدها؟

شرار :- بس تتنفس تاكل وتشرب

هَزيل :- هههههههههههههه

عقيل :- بس؟

شرار :- اي بس

علي الزكي :- نجيبلك صخلة بس تاكل وتشرب وتتنفس

شرار :- حتى لو صخلة هم قابل

هَزيل :- هااااا دحكوا مو بس اني مبتلي

يوسف :- لا هذا اسوأ منك مراحل

رشاش :- شرار انتَ تزوجت الصخلة وتالي الليل شتسون؟

شرار :- شنسوي يعني؟

عقيل :- يحچون بالحرب والمساعدات الانسانية

يوسف :- تحچون لو تشربون چاي؟

علي الزكي :- لا يلعبون دومنة

رشاش :- لاااا جاوب انتَ شتسون

شرار يفكر..

:- مادري خل اتزوجها واگلكم

هَزيل انفجر ضحك..

:- هههههههههههههه حتى هو ما يعرف

يوسف :- انه اعرف شيسون

شرار :- اي شنسوي؟

يوسف :- تمعمع وياها طول الليل

انفجروا ضحك.

عقيل :- وبعدها؟

يوسف :- يبعرر ويترسون الغرفة بعرور ونجيبلهم تبن يصير عش مناسب لتكاثر الصخول

شرار :- خرا عليكم ههههههههههه

رشاش :- وانتَ تگعد يمها وتگللها احسنتِ اريد 3 يفرات بطن وحدة

هَزيل :- ههههههههههههههه

يوسف :- ويطلعون جديات صغار ويركضون وراه مايگولون بابا ميييع ميييع

شرار :- نعله على وجوهكم المشگه والله مرضى انتوا

رشاش :- مو انتَ الگلت لو صخلة هم قابل؟

شرار :- چنت اتشاقه

يوسف :- لا والله چنت جدي

شرار :- جدي لو ابوي هههههههه

عقيل :- دنچب عود كوميدي، شفتك بعيني عيونك لمعت من گلت صخلة

هَزيل :- هههههههههههههههه

شرار :- ماگعد وياكم بعد

رشاش :- لا تعال بعد ما خلصنا

شرار :- شكو بعد؟

رشاش :- نفرض خطبنالك صخلة

شرار :- ولكم كافي

رشاش :- وفرضًا ابوها وافق

هَزيل :- وفرضًا هي وافقت

عقيل :- وفرضًا تم العقد

رشاش :- شتكتب بالمهر؟

يوسف :- گونية شعير

هَزيل :- ههههههههههههههه

شرار :- الله لا يوفقكم واحد واحد

رشاش :- وتالي من تزعل من عندك وين تروح؟

عقيل :- للحضيرة

يوسف :- بيت اهلها قريب يطلع

هَزيل صار يصفگ ويضحك..

:- والله هاي قوية

شرار گام يريد يروح..

:- انچبوا كلكم

رشاش :- هااااا شبيك بس لا زعلت؟

شرار :- لا زعلت شنو! تجعصون خواطر وتسألون! بس إذا الله رزقني مرة راح امنعكم تدخلون العرس

يوسف :- ليش؟

شرار :- هنوب تصيحون للناس هاي مو مرته هاي صخلته

هنا حتى رشاش طاح ضحك والولد كلهم انفجروا، شرار ظل يخنزر وراح للبيت.

شافوا تيجان جاي من بعيد من يم بيت جدهم، تعداهم بدون ماينتبه وهو صافن.

هَزيل :- يالحبيب! يالثكيل! سيد شدعوة عليك نحن هينا

تيجان انتبه..

:- هلا هَزيل السلام عليكم

الكل :- وعليكم السلام

رشاش :- صلوات على محمد وآل محمد

هَزيل :- دومه هيچ حالو حتى بالبيت؟

رشاش :- لا من تزوج وهو كله صافن حتى بالبستان شغله اعوج مثلك

هزيل :- طاح بالعشگ؟

رشاش :- واضح

هزيل :- لاااا طاح النچر

يوسف :- مرته قابل حرام

علي الزكي :- سأله عن تجربته خاف يخيب ظنك بالزواج

هزيل :- اي والله فكرة، تيجان شلونك؟

تيجان :- زين

هزيل :- لا صدگ شلونك؟

تيجان :- بسبب الشمس صاير ازرگ

هزيل :- لا يول اقصد شلونو الزواج وياك

تيجان :- حلو تريد تتزوج؟

هزيل :- هساع اگول لاخوك يخطبلي ماراضي يدور مهر يول واني ماعندي بس دشداشتي

تيجان :- صدگ الزواج يريد مسؤلية

هزيل :- هساع شسوي تهوجس انك ندمت؟

تيجان :- لا ابدًا الحمدلله على كل حال

هزيل :- رشااااش هساع تروح تخطبلي

رشاش :- والله لزگ هذا امخلفك وناسيك

علي الزكي :- تيجان شبيك مو على بعضك

تيجان :- مابيَّ شي

گام من يمهم.

رشاش :- مفارگ مرته اليوم

علي الزكي :- ماظن على هالشي، رايح اشوفه

عافهم ولحگ تيجان للبيت، ظلوا الولد يضحكون ويشاقون ويه هزيل، شوي تجمعوا ولد عمهم يمهم كلهم.

**

"حروب"

بعد يومين من سالفة ابو مسلم، رجعت من الدوام ماشفت آية رحت اسأل امي.

:- يمه وين آية

:- اسرح بيها، اوگفي تعاي هوينها بجيبي

:- يمه شبيچ عصبية سألت عنها بس

:- امشي ولي عن وجهي حريبة لا اطلع ضيمي بيچ

همست لنفسي..

:- يمه دخيلك ربي معصبة دوم

رحت لأبوي بالدوانية گاعد بحده يسبح، يمه راديو مالته، الكهرباء ما مستقرة وحالتنه حالة..

:- السلام عليكم، يابه وين آية؟

:- وعليكم السلام، هلا بناتي، آية راحت بيت اهلها اخذها اخوچ

:- شعجب هي ماتحب تروح هناك!

:- امچ مأذيتها، حسبي الله ونعم الوكيل عجزت ويه هالمرة وتعبت، ماتنعدل تخبلت آخر فترة

:- شسوتلها؟

:- مادري يبوچ هل تشوفين عيوني ماتشوف، البت تأذت بيدها وخذاها اخوچ للمستشفى خيطوا ايدها

لطمت صدري..

:- صدگگگگ شلونها هسة؟

:- مادري يبوچ وداها ترتاح عد اهلها اليوم

:- ياعمري ايو سودة عليَّ

:- اسم الله عليچ من السواد بتي، ديري بالچ عليها من امچ يابه انه عيوني ماتشوف

:- شنو يعني هي اذتها؟

:- تگول لا بس شكلها خايفة من امچ، من تجي سأليها اخذي لسانها، امچ گلبها اسود وخايف على بت الناس لا تمرضها بقهرها، وخايف من حوبت هاليتيمة

:- يابه اگلك شي بس ماتفهمني غلط

:- گولي يبوچ افهمنچ انه

:- امي كلش غريبة والله انه احبها ومارضه عليها، بس امي تخوف، مرات تسوي شغلات غريبة، والبيت بيه شغلات غريبة، مو بس انه اشوفها

:- قصدچ امچ تسوي سحر؟

:- مادري انه ما اتهمها هيچ وماشفت شي

:- چا شني تقصدين؟

:- خالة طوعة

:- حروب بابا ان بعض الظن اثم، امچ عصبية وحقودة وماتسامح بسهولة بس مو مال انها تسوي شي چبير مثل هيچ

:- لا بابا گلت افهمچ

:- اي فهمتچ، قصدچ يمكن تعاركن بالغلط دفعتها

:- مادري والله، حتى اشك هي ذبحت بزوناتي

:- ليش وشلون؟

:- امي تكرهن ودوم اشوفها ادفرهن برجلها بلا رحمة، ودوم تگلي الي يوم كاتلتهن الچ

:- لا يبوية يمكن مجرد تهديد، ابتسم، شلون دراستچ

:- الحمدلله زينة

:- شدي حيلچ اريدچ ترفعين راسي، انتِ وخواتچ وتفيدون نفسكم، حتى افتخر بيكم واگول شوفوا بناتي تعبت عليهم وربيتهم ماخيبوا ظني

:- ان شاء الله بابا وعد اخليك تفتخر بيَّ

:- يلا روحي اكليلچ لگمة بناتي

:- اي والله جوعانة

رحت صليت وبعدها صبيتلي غدا انه وخواتي، شامية تاكل وحلگها متروس تمن..

:- اليوم افتقدت آية مو حلو البيت بدونها

:- اي والله صدگ

:- تعودناها

:- اي بس حطي ايدچ على حلگچ واحچي لو تبلعين لگمتچ، ترستينه وانتِ اطشرين تمن من حلگچ

زمان :- لعبت نفسي شبعت

شامية :- بعد احسن

ترفة :- اگلكم ياهي ادرسني، عندي امتحان تعبير

:- شامية ادرسچ انه والله عندي كومة كومة دروس، ثالث وما ادراك شنووو! وقربنا للنهاية

شامية :- والله خبصتينا بالثالث ان ماعبرته مغمضة

:- اي عود صيري سباعية وسويها

:- اي واموتچ قهر

:- ليش اموت قهر بالعكس افرحلچ

:- انتِ ادرسين ترفة، عندي امتحان

:- وانه عندي سفرة مدرسية، هو غير عندي امتحان انگليزي

ترفة :- تيجان يدرسني لا تبچون

:- اي روحي شوفي وينه نايم بغرفته

ترفة :- خطية تعبان اكيد مايهون عليَّ

:- فدوة لگلبچ الحنون يروحي

ترفة :- اروح لرشاش

:- هم هذا تلگي ميت تعب من البستان

شامية :- علي الزكي ماينام الظهر هسة تلگي يقرا بكتب ابوي

ترفة يلا بلكي گاعد

گامت راحت غسلت وراحت لغرفة امي، نايمين كلهم حتى علي الزكي، لأن الدوانية حارة ينامون هنا، وهي الكهرباء وينها.

امي :- ترفة شتردين

:- يمه اريد علي يدرسني

:- حربو ليش مادرسچ

:- حروب عدها امتحان

:- علي عليييي گوم علي

علي الزكي رفع راسه بنعاس..

:- نعم

:- گوم درس ترفة

علي الزكي گعد وهز رشاش..

:- رشاش گوم درس ترفة عفية نعسان البارحة مانايم وگاعد من الفجر

رشاش تمطط..

:- آآآه لا تبچي گمت گمت، تروفة شعندچ

:- تعبير

:- خرررب بحظي تعبير ماتعرفين تعبرين

:- شسوي والله ماعرف موزينة بالتعبير

:- شوفي هي سهلة كتبي هيچ، عندي سبع اخوة احلى واحد بيهم واطيب واحد واكثر كشخة وهيبة ورزة وعزة رشاش، في يومًا من الأيام صادف حار ورايح للبستان وانسمط ابو ابوه

ترفة :- ههههههههه خطية كسر خاطري

رشاش :- اخخخ اكسر الخاطر صرت

امي :- گوم درس البت وعن اللغوة الزايدة

رشاش :- گممتتت گمممتتتت ويدفع بــ علي الزكي

علي الزكي :- شگد خبيث

رشاش :- نام مام نامت عليك بلوكة ام عشر زروف

طلع للصالة وگعد يدرسها ويفهمها، شلون تعبر حتى انگليزي درسها وجغرافية وتاريخ، انه گاعدة يمهم ادرس همين، اخر شي خلص تدريسها شبعها بوس.

رشاش :- اخخخ ولكم مشتهين طفل نبوس بيّ

شامية :- ننتظر تيجان لو ننتظرك

رشاش :- انه أيس يعبيس، تيجان اي والله منتظرين بفارغ الصبر

:- ههههههه يمكن احنه منتظرين مرته تطلع حامل اكثر منه

رشاش :- اي والله هيچ وتطلع بتهم شگرا وخدودها حُمر، يابعد عمچ شيخلصچ ست عمام عندچ

:- ايي فدوة ومن ايد لأيد تروح

رشاش :- ان شاء الله، ويسمونها على اسمي

شامية :- ااااييييييع اسمك من حلاته هي بنية جاي تگول بنية

رشاش :- وثول ماعاجبچ اسمي شبيه؟ ويسمونها رشا مو رشاش ياثولة

شامية :- همين ااااييييييع رشااااا

رشاش چا شنهي اسمچ الحلو

شامية :- يخببببل اسمي يسميها عليَّ وتطلع بجمالي الله الله

رشاش :- حتى تنظلم ظلم باسمچ

شامية :- لا يمه شبي اسمي

رشاش :- يلعب ستين نفس، ابوي چان مريض من سماچ بس يريد يخلص تردين تيجان يعيد نفس الغلطة

:- ههههههه هسة خل تصير آية حامل وبعدين تعاركوا عالاسم

رشاش :- ياربي دعوة واحد مسلوگ سلگ بالبستان وما لاگي شغل، ولا لاگي حل لنفسه ومكان يعرس بيّ ربي حبل مرت اخوي بسرعة، وبتوم ياربي بحق محمد وآل محمد

:- ههههههههههههه ولك عزااا كافي شگد عيب

:- شنو العيب غير راح يحبلها بالحلال

:- يبوووووووو، يمااااا تعاي لحگينه، لسان رشاش مزروف صاير ههههههههه

امي طلعت :- شبييك ويه البنات

رشاش :- شبيَّ گلت الله يحبل مرت اخوي نريد طفل نبوس بيه

امي :- اي هاي العايزنا زعاطيط من هالفاهية واراكض انه وراهم

رشاش :- واذا ركضتي وراهم غير احفادچ، مو يگولون اعز من الولد ولد الولد

:- ماتنچب يمه وادرس خواتك وانتَ ساكت

:- يمه شلون ادرسهم اذا اسكت، اسويلهم لغة الخرسان واسوي ابا ابا ابا

امي صفگته على كتفه..

:- گوووم ولي من يمي ترا مامتحملة حتى حچاية

يحرك حواجبه..

:- هاااا يمه شني گابة علينا وعصبية؟ خاف السيد اكبر ماباسچ اليوم...

ماكمل لزمته خنگته..

:- يا ادبسزز صدگ لسانك مزروف صاير، هاي من ولد ابو سلطان

ظل يضحك بصوت..

:- لا يمه شني ولد ابو سلطان احسن اصدقاء، آخخخخ يمه العشگ... قصدي يمه اريد اتزوج

:- ومنو سعيدة الحظ اللي تريدها

طگاها بلا مقدمات..

:- خديجة اريد خديجة

:- مصخمممم خديجة مو اجو عليها مشية بيت عمامها، شلون بلا تريد تخطبها؟

:- يمه ماصارت اطمني، رفضتت رفضتت وهي تريدني وانه اريدها

صغرت عيونها..

:- وشمدريك ولك؟!

:- هااا حسيت تريدني، بعد ليش نأجل يمه گلي لابوي لا تروح مني البنية

:- لنفرض گتله وخطبت وقبلوا، منين تزوجها من گملك

:- يابويه سدتها بوجهي، مابيَّ گمل يمه قبل فترة مزين گرعة اكيد تزحلگوا وطاحوا

:- وشكله عقلك تزحلگ وياهم، لا مكان لا فلوس وتريد تعرس

:- بس عندي اخلاق

:- اي عود وكلها وشربها اخلاقك من تموت جوع وتنام وياك بالحديقة على حصيرة

:- اخخخخ يابويه گلبي، عندي شغل تدبر

:- وشغلك تحش بالبستان وتزرع وتخضر، تريد يزوجك؟! يمه نام روح نام ارتاح ابني مو زين عليك الزواج

:- يمه جديات احچي وياچ، فدوة لا تروح البنية مني، مستعد احفر الصخر واجمع مهرها، ومستعد ابيع لحمي حتى ابنيلها غرفة واجيبلها اثاثها

:- لهالمرحلة واصل

:- اي هاويها يمه، والله نوم عيوني باگته

:- خواتك گاعدات شوي استحي

:- شگايل رايدها بالحلال والله بالحلال، مارفعت عيني عليها بالحرام، دخلت گلبي مو بيدي...

ماكمل امي صگعته..

:- خواتك بعدهن لحم طري، ماريد يتعلمن على هالسوالف

:- اي صدگ امشي نتناقش يم ابوي، همين بلچن يخمطچ ببوسة حتى ترضين علينا

:- ايااا ملعون اوگفلي...

ركض وراح بره وهو يضحك، ضحكنا وياه، وهي تتوعده، العصر كلهم طلعوا الولد بعد ماخلصت دراستي بس اخذت راحة.

رحت يم امي بالغرفة بالظلمة على ضوا الالة لابسة نظاراتها، باوعتلي من فوگ النظارات ورجعت تكمل تقرا بكتبها، گعدت گبالها، اهفي عليها بالمهفة.

:- يمه حااارة الجو احتر كلش بسرعة

:- شعندچ شتردين بسرعة طلعيهن؟

:- ماكو شي بس ردت اسأل سؤال

:- شكو؟

:- يمه فدوة لا تعصبين عليَّ

:- شنووو غير تحچين

:- شنو سالفة ابو مسلم ليش تگولين هيچ عنه؟

:- وشلچ بهالسوالف

:- اريد اعرف لأني شفت شي لازم احچي الچ

:- شنووو شفتي مصخمة؟

:- انتِ احچيلي اول وانه احچيلچ شنو شفت

:- سالفة تعبانة وماتفيدچ والرجال فاطس مايصير ننبش گبره

:- اعرف بس الموضوع مهم اعرفه فدوة گولي

:- شنو شفتي؟

:- گولي وشرحيلي موضوع الحچيتي وانه اگلچ

:- حرووب ترااا اشلع اذانچ فصمي بسرعة

:- لازم اعرف الموضوع، انه مو زغيرة وابوي يفهمني قبلچ كلشي، فدوة گليلي شسالفة ابو مسلم؟ ليش دوم تحچين عنه هيچ؟

:- شلچ بهالسوالف هسة؟ هاي سوالف وصخة وما تنگال

:- يمه فدوة

:- زين اسمعي، ابو مسلم ماچان خوش رجال ومعروف بطبعه يلوط بالهوش، وابوه يدري حتى فد يوم كتله ابوه وعلگه بحديدة بالحوش وما فاده

ابوهم كلش قاسي ايده والكتل يدممهم دمام ويخليهم بلا اكل مرات وعقابهم يخليهم يگعدون بالشمس لمن تغيب واستمر هيچ رجال قاسي وبس يضرب

فد يوم طاح بنص الحوش بجلطة ومات ولده خلصوا من شره وظلمه صاروا ولده يمارسون اشكال شغل وكل مرة ينطردون، والكل يعرف بسبب اخلاقهم الزفت، فصار محد يشغلهم

ابو مسلم عنده هالولد وعمتچ وهو بينهم مشاكل على الشغل وجدچ هو يصرف عليها، مل من هالسالفة رغم مايحچي، بس عمتچ مايملي عينها بس التراب

راح لغير ديره حتى يشتغل، بس ماطول وجابوه النا منحور وسولفوا قصته ان هو منحور بين الگصب بالگيعان ويمه هايشة منحوره

صارت مشاكل چبيرة محاكم وعشاير، ودي الليف وجيب الليف، بعد مدة لگو چتاله واعترف ان هو شافه يلوط بالهايشة ومن شافه ابو مسلم محاول يكتله

وهذاك حتى يدافع عن نفسه كاتله نحر وناحر الهايشة وياه، بس محد صدگ هالقصة، شلون يكتله نحر هيچ لمجرد دافع عن نفسه

بس اهله يعرفون ماضيه وعمتچ رغم تعرف خيستهم راحت تزوجت اخوه ماهماها، كله علمود يتكفلون ابنهم وعمه صار ابوه

:- يا ساتر، يمه عبالي الموضوع بسيط وعادي؟!

:- گتلچ سوالف ما تنحچه الا تنبشين بيها، وأهله چانوا يعرفون طبعه الزين مو زين

:- وشوف شصارله بالنهاية، شگد مسكين بني آدم! يعيث فساد ونحايته حفرة وصخرة بحلگه

:- وهسة عرفتي ليش ماسولف هاي السوالف؟

:- اي يمه

:- زين هسة احچي، شنو شفتي؟

سكتت شوي..

:- حروب احچي؟

:- يمه الموضوع عبالي سهل والله

:- احچي ولچچچچ

:- شفت مسلم

:- شنو شفتي؟

شفته بحضيرة جدي

:- اييييي وبعدين الزيدة كتيهن كلهن؟

:- چان يسوي نفس هالسوالف بالحيوان

شهگت..

:- عزااااااا بعيننچچچ! شوكت هاي؟

رجفت خوف من الموضوع..

:- من زمان، بس عبالي عادي ماحچيت، خفت

:- ومن ذاك الوكت وساكتة؟!

:- خفت يمه

:- ولچ مصخمة! شلون تسكتين؟

:- عبالي افتهمت غلط مافهمت شنو اللي شفته

:- اكيد سوالف عمه معلمه، والا منين يتعلم هالخرابيط؟

:- يمه شنسوي هسة؟

:- اول شي لا تحچين هالحچي يم اي احد، وثاني شي اذا صدگ هالشي صار، حلال جدچ كله يتلف لازم ينذبح ويحترگ

گلبي دگ برعب..

:- شلون يعني؟

:- الماشية اذا صار بيها هيچ شي ما تنوكل، حتى نسلها ينذبح ويحترگ

اريد ابچي..

:- انه عبالي الموضوع سهل والله مادري

:- لا مو سهل يالعوبة، غبية هسة يلا گتيلي

:- ماعرفت والله العظيم، مادري شگد السالفة تخوف

:- لهذا گتلچ لا تظنين كل الناس مثل اخوانچ وابوچ

:- الله يستر، هسة شنو

:- لازم نروح نگول لجدچ اللي شفتي

ظليت ابچي..

وحلاله كله يروح وينكتل ويحترگ، هو غير نصه حلال شيخ مهدي

:- مصيبة هاي وصخام، مال اكتلچ، هسة ساكتة عنه شگد لايط بالهوش كله، شفتي ياهي يسوي بيها هيچ

:- اييي الحمرة، ماتت يمكن هذيچ المرة

:- يبوووووووو صخاااام يعني محول على غيرها، امشي گومي

ظليت ارجف وابچي..

:- وين؟!

:- لا تظلين تتبچبچين هسة، امشي لجدچ نحچيله

:- اخاااف يعصبون عليَّ

:- ولچ حمارة ياهايشة حلال جدچ كله راح يروح وانتِ تفكرين يعصبون عليچ

سحلتني امي ولبستني عبايتي، ظليت ارعد خوف وااموضوع اكلني ماشربني، ماعرفه لهالدرجة، بس قبل لا نطلع سمعنا صوت صريخ قوي، عبالك واحد جاي ينصلخ جلده.

ركضنا انه وامي مصدومين، امي ظلت تصيح بكل خطوة..

:- يمه ولدي! يمه تيجان!.......

يتبع