رواية صغار العم الفصل الرابع عشر 14 بقلم مسرة اسامة
روايــة #صغار_العم
الحَـــلْـــقـــة الــرابــعــة عــشـــر 🌸
نجاة : هو غالي عليا زي وليدي لكن سعاد !!!
اسماعيل : ماك طول عمرك وجهك ف وجهها توا جاتك جديدة ؟
نجاة : مانحبهاش ولا نحب طبعها يا اسماعيل
اسماعيل : انى قلتله الرأي راي البنت لو هناء موافقة انى بنعطيها ليه
نجاة : لا هي شكلها موافقة
اسماعيل شبحلها : امالا داويتلك !!
نجاة : لالا حسيت بيها بس
اسماعيل : كيف حسيتي بيها ؟ تكلم فيه ولا كيف ؟
نجاة تلخبطت : لا مرة امك جابت سيرة زي هادي قدامها ماعلقت شي حسيتها راضية
اسماعيل شبح للتلفزيون : ماعندها ماتقول فيه وين تلقى خير منه
نجاة : وين بيسكن ولا مافكرش فيها الحاجة هادي
اسماعيل : شاري شقة من الاسبوع اللي فات مازال بيصينها بس
نجاة : اه باهي اتطمنت ؛ نحسابه بيسكن ف دار مع امه قريب عيطت
خش اصيل يتسهوك : سُمعة سموعي
اسماعيل شبحله : ابدا تزمزيك هي
اصيل ضحك و قعمز : شن الجو
اسماعيل : وين كنت ادور
أصيل : مع محمد و الشباب قدام الحوش
نجاة : قعمز و شد شيتاتك امتحاناتك قريب
اصيل : وين الحلوفات ؟ جعان نبي ناكل
اسماعيل فنص فيه : احترم نفسك باش يحترموك
أصيل : باهي شن فيها الكلمة
اسماعيل : تكلم بإحترام و ياسر من قلة الأدب حتى قدامي انى و امك
نجاة : هادو خواتك يا قرد معاش تقول عليهم هكي
اصيل ضحك : انى قرد لكن هما مش حلوفات !
نجاة : نوض دير عشاك بروحك خواتك لوطه
اصيل : علاش لوطه ؟
نجاة : قالولي بنباتو مع امّيمه لانها مازالت متغششة ع اللي صار
____________
4
سنابل واقفة ف السقيفة : خيره ماجاش ؟
سلسبيل ادف فيها : تي خشي بلا عار
سنابل خشت معاها لقو حلومة مقعمزة بروحها ف وسط الحوش
سلسبيل : امّيمه خيرك هني
حلومة شبحتلهم : ماجانيش نوم و انى نخمم
سنابل : في شنو
حلومة : في عماد اللي لتوا لا اتصل ولا روح
سنابل قربت منها : ماهو صاحبه بيدير عملية و وضعه صعب اكيد مافضاش انه يتصل
حلومة سكتت
سنابل : و مش قلتو كلم محمد امس ؟ معناها استريحي
حلومة : حتى انى نطمن ف روحي بِ هالكلام لكن قلبي مش مرتاح
سلسبيل : نوضي استريحي ف دارك و ارقدي امّيمه ؛ عمي مافيشي شي و اموره تمام قال عشرة ايام و مروح يعني مازاله هالاسبوع مش هلبا
حلومة وقفت : ان شاء الله خير
سنابل : تو حني نباتو عندك الليلة
حلومة : باهي مرحبتين بيكم
و خشت لدارها
سلسبيل شبحت لسنابل : تو انى شن وضعي بالزبط ؟؟ بنمد وجهي و خلاص !!
سنابل : مصي الليم 😛🍋
سلسبيل : مبردك 😒
خش محمد
سنابل شبحتله و ابتسمت
سلسبيل تلفتت : اهلا
محمد : اهلا بيك
سنابل : خيرك عطلت
محمد : كنت مع الشباب برا
سنابل : اممم به
سلسبيل شرين تليفونها ادم يتصل : انى بنخش للدار
سنابل ضحكت : خودي راحتك
خشت سلسبيل للدار و فتحت الخط على اساس سنابل طبعا
سلسبيل : الو
ادم : وينك يا سنابل ماترديش
سلسبيل : تو مش عارف ان هذا رقم اختي يعني لما مانردش معناها التليفون عندها و انى مش معاها
ادم : الوضع هذا مايمشيش حاله لازم اديري حل
سلسبيل : حل شني
ادم : خوديلك تليفون ولا نتكلمو ع الأرضي
سلسبيل : اكيد تحلم 😒 منين بنجيب حق التليفون توا ؟ .. و انى يوم اللي كلمتك بالأرضي جدي قريب قتلته من الرعشة
آدم سكت
سلسبيل : شن جوك و شن حالك 😏
ادم : كويس الحمد لله
______________
...
السنوسي متكي ف سريره : يعني ماناش دايرين فضانية بندوو قدام بوي و خوتي و تمت
سعاد واقفة متكنطية : سيب بنات ليبيا كلهم و ماجاش الا لهنااااء !!!
السنوسي عقد حواجبه : و خيرها هناء فاش مش عاجباتك !
سعاد : هي باهية لكن نجاة يا سنوسي
السنوسي : و خيرها نجاة ؟
سعاد : واعرة و لسانها مانقدراش
السنوسي : شن نجاة هي اللي بتاخديها لولدك ؟؟ ماكم عايشين مع بعضكم ليكم سنين
سعاد تحرك ف صبعها : لالا لا نبيها و لا نبي انّاسبها انى هكي و مش طايقتها ياخدلي بنتهاااا !!
السنوسي تكنطا : استغفر الله العظيم نوضي سكري الضي و خلينا نتمرقدو
سعاد : و هو خيره ماقاليش ولا مش حاسبني !!
السنوسي : قالي انى من الاول و من قبل ما يدوي مع اسماعيل يعني ماتصرفش منه ليه
سعاد زادت حمقت : و انى رجل كرسي ف الحوش ؟؟ مش حاسبني و مش قادر ياخد رايي ؟؟ هادي اكيد ذهبتله شيرته من توا و حطاته تحت جناحها هي و امها
السنوسي غم روحه باليرغان و ماردش عليها
سعاد حاطة ايديها ف نصها : ندوي معاك تغم روحك و ترقد ؟؟ 😡
السنوسي شبحلها : هااااه شن مازال ؟
سعاد : انى مانبيهاش دير حل لولدك ايواااه خير مانسيبلكم الحوش و نطلع
السنوسي : توا قولي يا مرا اما خير تاخدي وحدة تعرفيها و متربية قدام عيونك ولا يجيبلك وحدة ماتعرفيهاش و تطلعلك مش متربية و اديرلك المشاكل صبح ليل
سعاد : حتى نجاة متع مشاكل
السنوسي : بنتها مش زيها و انى مانلقىٰ خير من خوي انّاسبه
سعاد دمها يغلي 😡
السنوسي غم روحه تاني
سعاد حامقة : تو نشوفو من اللي يمشي كلمته ف الحوش هذا يا انى يا انتو !!
و طلعت من دارها مشت ليوسف
فتحت الباب و خشت : يوسف !!
يوسف شبحلها و هو يتكلم ف التليفون : شوية و نكلمك
هناء : اوكى حبيبي
يوسف سكر الخط : خيرك خاشة هكي
سعاد : حق تبي هناء اووه ؟
يوسف : ايه
سعاد متعفلقة : طيييييح سعدك مالقيت الا نجاة و بنتها تجيبهم ليا نسابة !!
يوسف فنص فيها : و خيرها هناء شن ناقصها ؟؟
سعاد : زواج الأقارب لا نحبه ولا خاشلي راس ؛ بتنحيها من راسك نهائي تسمع فيا ولااا
يوسف تعفلق : مش تحبيها و غالية عليك ؟ و لا نفاق !!
سعاد : ادوي مع امك بإحترام ولا بدت نجاة تطلق عليك !
( هناء تسمع ف سعاد تعيط من وراء الساس لكن مش فاهمة الكلام )
يوسف : ماك كنتي تبيلي اروى ولا توا غيرتي رايك ف زواج الأقارب ؟؟
سعاد : عمتك مش كيف نجاة
يوسف وقف : انى دويت مع عمي مانطيحش كلمتي على خاطر أسباب تافهة حاطتيها انتي
سعاد فنصت فيه : تبي تعصي امك على خاطرهاااا
يوسف علّا صوته : استغفر الله العظيم
سعاد : هذا علاش ماشي تشري ف الشقة و تصيّن فيها !! تبي تاخدك من امك و انى مالحقتش نفرح برجعتك
يوسف : امالا وين بنسكن !! تبينا نفتحو ديارنا على بعض و نعيشو هني ؟؟
سعاد : بتنحيها من راسك فاهم ولاااا .. تو نمشي نخطبلك احلى وحدة ف البلاد و تزوجها لو خاطرك تتزوج
يوسف : نحبها و نبيها و ما واخد غيرها عجبك ولا ماعجبكش
سعاد متعفلقة : والله ماني قاعدتلكم ف الحوش لا انت ولا بوك
طلعت و قربعت وراها الباب
يوسف ماردش عليها ؛ فتح البلكونة و طلع يدخن
_______________________
محمد طلع للجنان يكلم ف خطيبة بوه و سنابل ف المطبخ ادير ف سندوتشات
خش عليها محمود : شن اديري هني ؟
سنابل انخضت : خلعتني يعطيك البلي
محمود قعمز ف الطاولة : احسبيني معاك
سنابل : تعالى دير بروحك
محمود : بلاش مانبيش
سنابل سكتت
محمود : شن صار فيك اليوم
سنابل : فاش ؟
محمود : لما سمعتي بأمير البحار
سنابل تكنطت : هيا فكنا منه الجو اهوا وانت ماصدقت
محمود ضحك : تحملي مايجيك خير مانفضح بيك
سنابل : كانك فالح ديرها
محمود يضحك
خش محمد من باب الجنان
محمود شبحله : اوووه لقاء العشاق !!
و ناض وقف : سامحونا بالله
محمد بإستهزاء : لا خليك انت من العيلة
محمود ضحك و طلع من المطبخ
خش على سلسبيل ف الدار : حتى انتي هني !
سلسبيل انخلعت ؛ سكرت الخط و دارت التليفون تحت المندار
محمود : مصح وجهك طلعيه بلا جو
سلسبيل طلعاته : نحسابك اصيل
محمود : غر من هو اللي راضي برُمتك
سلسبيل : قول انى كيف راضية برُمته
محمود : بايتين هني ؟
سلسبيل : ايه علاش
محمود : نركب نجيب كارطه ولا شطرنج و نجي
سلسبيل : لالا جيب بليستيشن
محمود و هو طالع : به
و هو خاطم شبح للمطبخ لقي سنابل واقفة قريبة من محمد : اححممم نحن هنا
محمد شبحله تكنطا : ألهىٰ ف عمرك الزفت
محمود ضحك و ركب
محمد : شن هـ العيل هوا عشش
سنابل : فوته لين يمل بروحه
محمد شبحلها
سنابل : شن قلتلها المرا
محمد : فهمتها ان هو سافر و ضحك عليها ناضت تعيط و تسب زي الهبوطية
سنابل ضحكت : حي عليها هادي
محمد : قلتلها لو مش مصدقة اتصلي بيه تو تلقي رقمه مسكر قتلي عارفاته كلب من الاول مش مستريحتله
سنابل : وانت كلمتها على اساس من تكون
محمد : على اساس نخدم عنده و نسمع فيه يقول انه ندم و بيخسر عيلته ف جرتها
سنابل : راهي عرسها تفركس موعرها اللقطة
محمد : هادي اللي بتخرب حياش الناس شوفي شن يصيرلها
سنابل : ايه صح تستاهل
محمد : و تو غدوا الصبح بنمشي ندير عليه دوره
سنابل : تصدق واجعني
محمد ضحك : ماتتوجعي على غالي
سنابل : توجعت على غاليّا و قريب انجنيت
محمد شد ايدها : ربي مايوريلك وجع
سنابل تحشمت و قلبها يدق
محمد : نحبك و نموت فيك حبيبتي
سنابل وجهها احمر : غدوا شن عندك بدير
محمد قام حواجبه : نقولك نحبك تقوليلي شن عندك بدير
سنابل ضحكت : جاوبني
محمد : عازم مهاب صاحب يوسف هو و عمه
سنابل : هذا اللي طلعك ؟
محمد : ايه ؛ عزومة شكر ع اللي داره كان مش منه راهو صفوني
سنابل اتضايقت : حمودي معادش تقول هكي مانحباش الكلام هذا
محمد قربها ليه : حاضر ياعيوني الا زعلك
سنابل قلبها يدق : يعني غدوا مش حاتفضىٰ
محمد : ف الليل ماعندي شي
سنابل : امممم به
محمد : علاش تسألي
سنابل ابتسمت : غدوا تو تعرف 😉
محمد : قولي توا مافرقتش
سنابل قامت حواجبها : إلااااأ مش حانقولك
محمد شدها من خصرها و قربها ليه
سنابل تحشمت : حووول
محمد شادها : لا مانيش محول
سنابل تفك ف روحها و قلبها يدق : حول تو يجي محمود يشوفك
محمد ..
على خشة محمود
سنابل دفت محمد و ضرباته على صدره
محمود : احييييييه
محمد شبحله و سنابل وجهها انسلخ
محمود ضحك : مش هكي يا وحش
محمد تعفلق و خدي شيشة اميه حذفها عليه 💦 : اقلب وجهك يا امسخ
محمود خواها و جت ف الباب : هههههههههههه
و مشي للدار يجري
سنابل تكنطت و طلعت بسرعة تبكي
محمد لحقها : سنابل !
سنابل راكبة الدروج متعفلقة : رد بالك تلحقني
محمد سرع خطواته و وقف سكر عليها الطريق : خيرك زعلتي
سنابل قلبها يدق بسرعة و ترعش : انت كيف ادير هكي ؟؟!!
محمد : اسف تهورت
سنابل تتكلم بعصبية و مدمعة : و تقولي فيها تهورت !!! .. حول من قدامي معاش نبي نشوفك
محمد شد ايدها : اسف حبيبتي
سنابل فكت ايدها منه و جت بتركب
محمد سكر عليها الطريق
سنابل : حول من قدامي خير مانعيط !
محمد : اسف يا قلبي معادش تتعاود
سنابل نزلت راسها متكنطية و مابتش ترد عليه
محمد نزل درجة : تقبلي اسفي و ماتخليناش متزاعلين الليلة
سنابل شبحتله : انى مانحبهمش الحركات هادم يا محمد ماتخلينيش نندم
محمد حط صبعه تحت عينها : حاضر ؛ الا هالعوينات الحلوات مايزعلوش
سنابل : و محمود اللي شافنا ؟
محمد : تي قصدك حاسبتيه العيل ؟ فوتيه و ماتعدليش عليه
سنابل : ايه و يبدا شادهالي ف فمه زي المستكة و يعزر فيا
محمد : تو نعرف كيف نربيه خليه عليا اني
سنابل : حول نبي نركب
محمد : والله ماك راكبة
سنابل : الحق فيا انى اللي وقفت معاك ف الليل
محمد : خلاص سوسو فكينا من الزعل
سنابل حمقت : ماتقوليش سوسو مانحباش الدلع هدا 😡
محمد ضحك : حاضر
شدها من ايدها و نزل بيها
_______________
محمود يركب ف البليستيشن و يضحك
سلسبيل : تي قولي خيركم كنتو تصيحو
محمود شبحلها : نتسهوك ع البرو تكنطا
سلسبيل ضحكت : خف عليهم شوية راك خليتها خل
محمود شد اليد 🎮 و اتكّا ع المندار جنب الباب : تي عادي الجو مليح
سلسبيل شدت اليد التانية 🎮 : فكنا من العراك من توا ايوه
محمود شبحلها : بتحرقيلي دمي بتاكلي على وجهك اهو نقولهالك
سلسبيل تكنطت : انت اللي بتاكل على وجهك تو تشوف
محمود شبح للتلفزيون : هيا سكريلي فمك
( فتحو دسكة كورة و بدو يلعبو )
خشو محمد و سنابل
محمود شبحلهم : الدار التانية فاضية
محمد فنص فيه و عفس على رجله بالقوة : و الله كان ماتسكرش فمك يا كلب تركب وتقلب وجهك توا
محمود يتوجع و يضحك
سنابل قعمزت جنب سلسبيل : هذا معطل ؟
سلسبيل ضحكت : شكله
محمد قعمز جنب سنابل و فتح النت
سنابل قلبها يدق بسرعة و ساكتة
سلسبيل تلعب : يسسس
محمود يلعب فجأة علّا صوته : لااا يا كلبة لاااا
البنات انخلعو
محمد شبحله : نقص صوتك يا عيل
محمود شبح لسلسبيل : والله ما قول يا امسخة بنعاودو تاني
سلسبيل فنصت فيه : ادوي باهي خيرلك 😡
محمود : بنعاودو بنعاودو
سلسبيل : تعاود عينك انحسب قول اهو قدام معاميك
محمود حذفها بالمخدة على وجهها : اما قول مصح وجهك
سلسبيل شعرها هاج : اااااي 😭
سنابل : بالشوية خيركم
محمد : نوض سكرها و اركب فكنا من دوشتك نووض
جتهم حلومة مخلوعة : بسم الله الرحمن الرحيم خيركم اللطف !!
محمد شبحلها : سامحينا خلعناك
حلومة : خيركم !!
محمد : هادي دوشة اللعبة بس
حلومة شبحت للتلفزيون : باهي ألعبو اجميع زي الوخيين و معاش تتعاركو
صغار العم ضحكو 😂
محمود : نوضيلنا الشيبّو يكسد معانا
حلومة : انتو خلعتوه من نومه جبتوه مقعمز
سلسبيل : ياسره حتى هو راقد من المغرب
حلومة : اما راقد من المغرب و هو متغشش على حميدا لين مش قادر يوقف
محمد : طلعت غالي 😂
محمود : بالك خاف يدفع فلوس هذا لاش راعش
سنابل ضحكت
حلومة فنصت فيه : العب و انت ساكت ولا خش ارقد بلا تفتفيت زايد
محمود : حاضر امّيمه ههههه
حلومة مشت لدارها
سلسبيل حطت اليد 🎮 : انى معادش بنلعب مليت
محمود : اخر شوط هي
سلسبيل : كان ربحتك !
محمود : تاخدي كف رياحي ف الحالتين
سلسبيل ضحكت و شدت اليد 🎮 : انت اللي بتاخده
محمد وشوش سنابل : نوضي معاي
سنابل شبحتله : وين
محمد : نبيك بروحك
سنابل : لالالا ولا تفكر
محمد ضحك : تأسفت منك خلاص عاد
سنابل حركت كتفها بمعنى لا
محمد : قصدك الليلة بتمشي هكي كساد ؟
سنابل : جبته لروحك
محمد تكنطا و وقف
سلسبيل شبحتله : وين
محمد طلع و ماردش
سنابل تشوفله و ساكتة
محمود عيّط : خشششششي ووووووه ⚽️
سلسبيل شبحت للتلفزيون : لاااااا 😩
محمود متشمت : الكف بتاخديه
سلسبيل وقفت : ناخد وذنك
و هي طالعة من الدار محمود مد رجله و عكفها
سلسبيل طاحت على وجهها
سنابل : هييييييه 😱
سلسبيل قعمزت : يا حيوااااان 😭
محمود وقف ، عطاها عنفقة و طلع
سلسبيل تصيح : والله الا ما تشوف يا محمود والله الا ما نطلعها من عيونك الخبطة اهيا
محمود و هو راكب : بري ملحي
______
03:00 ص
البنات رقدوا ف الدار ؛ طافيات الضي و رادين الباب
سنابل مغمضة عيونها بس مش جايها نوم
قلبها يدق بسرعة و تتفكر ف اللي صار
محمد يزربز و يحوس ف الحوش مش قادر يخشلها ؛ يتصل بيها ماتبيش ترد عليه
تكنطا و خش بيرقد
سلسبيل تهدرز مع ادم : كيف بنتلاقو
ادم : ف الغذائية اللي ف راس زنقتكم
سلسبيل : لالالا يعرفني تو يعاود لصغار عمامي فكني
ادم : البسي خمار ولا ديري حل لروحك المهم لازم تجيني باش نعطيك التليفون
سلسبيل : به ساعة قداش 😍
ادم : ممكن مع ساعة 04:30
سلسبيل : اوكى تو نتصرف
ادم : مع اني خاطري نشوفك لكن حتى بالخمار عادي يا حبي المهم تاخدي مني التليفون و نقدر نوصل فيك
سلسبيل ضحكت
ادم : شن تبيني نلبسلك
سلسبيل شقلبت عيونها : اي حاجة عادي
ادم : ماتبيش هديكا السورية اللي غالية عليك ؟
سلسبيل : اما سورية
ادم : معقولة نسيتيها !!
سلسبيل تلخبطت : هما هلبا غاليات عليا 😅
ادم : اللي ريتيني بيها اول مرة
سلسبيل : ااه ايه البسها هي تهبللللل
ادم : لعلمك اول مرة تلاقينا ماكنتش لابس سورية كنت لابس تيشرت 😒
سلسبيل تلخبطت و فنصت : الووو ؟؟
ادم : ايوه
سلسبيل : مانسمعش فيك الووو
و سكرت الخط ❌
تلفتت لسنابل : نوضي نووضي
سنابل شبحتلها : فايقة خيرك
سلسبيل : الحمار متعك شن كان لابس اول يوم شفتيه فيه
سنابل : وين نندري على امه نسيت
سلسبيل تندب ف وجهها : بننفضح يا حمارة سألني
سنابل تفكر
سلسبيل : قال تيشرت
سنابل : ايه صح تيشرت ابيض فيه رقبة و زوز بطم من قدام بالأزرق
سلسبيل : به .. و عاودت لآدم
ادم فتح الخط : الو
سلسبيل : معادش سمعتك
ادم : بالك الخطوط خشت بعضها
سلسبيل : ممكن .. شن كنت تقولي انت 😅
ادم : قتلك كنت لابس تيشرت مش سورية
سلسبيل : ايه ياروحي عارفة ؛ كان تيشرت ابيض فيه رقبة و زوز بطم بالأزرق 😌
ادم ضحك : صح
سلسبيل : غالي عليا هلبا التيشرت هذا البسه هو
ادم : حاضر حبيبتي
سلسبيل سكتت 😒
______________
تاني يوم 🌹
12:00 م
هناء مقعمزة ف الجنان تبكي
خشو عليها عصام و مرام مروح بيهم يوسف من السفر
هناء شافتهم مسحت دموعها بسرعة و وقفت
عصام ضحكلها : هنيوه !!
هناء ضحكت و جت تستقبل فيهم : الحمد لله ع السلامة
مرام مبتسمة : الله يسلمك
عصام : الله يسلمك ؛ كيف الحال
هناء : الحمد لله تمام شن جو السفرة
عصام : اااه احلى سفرة
مرام ضحكت : تمنيت ماروحتش
هناء ابتسمت : ربي يهنيكم
مرام : سلمك عقباليك
هناء : ان شاء الله
عصام خش الداخل و مرام لحقاته
هناء تنهدت و تلفتت لقت يوسف خاش
يوسف ابتسم : هنوشتي
هناء بدت تبكي تاني : يوسف 😢
يوسف قرب منها : خيرك تبكي
هناء : اتصلت بالقناة بنتأسف قالولي فسخنا العقد و مابوش حتى يناقشوني
يوسف ضحك
هناء : تضحك !! ماهو كله منك 😭
يوسف : من الاول مش راضي عليها ريتيهم كيف حتى مافهموش علاش انتي طلعتي ! .. يعني ماحاولوش حتى يسألوك شن اللي صار
هناء سكتت و مازال دموعها ينزلو
يوسف : خلاص بيبي توا بري اغسلي وجيهك السمح و جهزي روحك عندنا مشوار بعد العصر
هناء مسحت دمعتها : وين ؟
يوسف : نبيك تمشي معاي ناخد هدية لأمي
( و خشو هما الزوز لحوش جدهم )
__________
سلسبيل تنوض ف سنابل : الظهر قريب يأذن هيا نوضي
سنابل : اطلعي و خليني راقدة
سلسبيل : صوت عصام و مرته جو تعالي نشوفوهم
سنابل فتحت عيونها : باهي خمسة دقايق و انوض
سلسبيل : انى بنركب نشوف روحي شن بندير باش نطلع بعدين من غير ماتحس بيا ماما
سنابل شافت تليفونها لقت مكالمة من محمد
اتصلت بيه و غمت روحها
محمد رد : الو
سنابل : صباح الخير
محمد يسوق : صباح العسل
سنابل : لقيتك مكلمني هلبا مرات
محمد : من امس نتصل لكن البيب تدلع عليا
سنابل : لاني مازال مارضيتش عليك 😒
محمد : اه تلمحيلي انتي
سنابل سكتت
محمد : انى قريب نوصل الحوش خليك ماتركبيش
سنابل : علاش
محمد : باش نرضيك
سنابل ضحكت
________________
عصام سلم على امه و بوه و ركب شقته هو و مرام
مرام قعمزت ع الكنبة : اااه يا رجليا
عصام شبحلها : من الكعب اللي لابستيه قتلك فوتيه بيتعبك
مرام تنحي ف كندرتها : اللبسة لازم تبي كعب
عصام قرب منها : و عصام لازم يبي حبيبته 😉
مرام ضحكت : عصااااام كيف مروحين و تاعبين نبي نرقد توا
عصام : لاحقة ع النوم 😘
________________
يوسف واقف مع جده : انت شن رايك يا جدي
العارف فرحان : موافق طبعا
يوسف ضحك
العارف : لكن مهر هنيوه غالي حط في بالك
يوسف يضحك : اطلب اللي تبيه يا حويج
العارف ضحك و قعد يشوف ليوسف
يوسف تلفت : امالا وين حناي خشت
العارف : تقربج ف المطبخ هي و هناء
يوسف شبحله و سكت
العارف : قولي يا ولدي
يوسف : نعم
العارف يشوف لبطن يوسف : هادو كيف درتهم ؟
يوسف : شن هما ؟
العارف : عضلات بطنك
يوسف ضحك : نتمرن ف حديد
العارف : امممم .. و بقداش ف اليوم ؟
يوسف : بالشهر الاشتراك و فيه اسعار من 60 و طالع يوصلو حتى لل400
العارف : امممم
يوسف : شن خطر عليك تسأل
العارف : ريتك ف البحر و بنسألك نسيت
يوسف : الرياضة اهم شي منفس الحياة
العارف : امالا اشتركلي معاك حتى انى
يوسف ضحك بصوت عالي : ماتقدرش عليها انت يا جدي
العارف : نقدر نقدر ، انت اشتركلي و ماعليكش فيا
يوسف يضحك
العارف : تو نعطيك الفلوس و اشتركلي ف أغلى صالة
يوسف : خش معاي تو تعجبك و باش حتى نمشو مع بعضنا
العارف : امالا غدوا ارفعني للأديداس ناخد حاجات
3
_____________________
ازهار في مطبخها اتطيب و معاها نجاة : سعاد اليوم مغيبة ماريتهاش
نجاة تلف ف الضولمة : اللاّي قتلي مقيلة عند امها
ازهار : حتى انى امي ليا فترة معادش ريتها كان نلقى نمشيلها
نجاة : انى طالعة العشية كان تبي نحطك
ازهار : خلي نكملو حوسة العزومة و بعدين ساهل
نجاة : تعرفي صاير موضوع ماخلانيش نرقد الليل
ازهار شبحتلها : ان شاء الله خير
نجاة : يوسف يبي هناء
ازهار شبحتلها و ضحكت
نجاة : خيرك تضحكي
ازهار : كنت حاسة
روان واقفة معاهم و ساكتة
نجاة تنهدت : ماجتني الا سعاد يا كبدي هييييه
ازهار : عادي ماتدوريهاش
نجاة : واجعتني بنيتي بس شوق مابتاكل على راسها
ازهار : لا هي مع سعاد شوق مابتسحن روحها
نجاة قامت ايدها من خليط الضولمة : لكن والله واللللللله لو كان تجيني بنتي ف يوم و تشكيلي منها بسس الا مانغبر عليها العمارة كلها
ازهار : هنيوه طيبة ماظنيتش مايتفاهموش
نجاة علّت صوتها : ماهو هذا اللي نخمم فييييه بنتي مسكسكة ماعندهاش لسان ؛ يعني لو جت وحدة من التوامة راهو ماخممتش فيها لساناتهم يهنو
روان ضحكت : حي علينا حي 😂
نجاة شبحتلها : حي عليكم مناش ؟
روان : لالا شي
ازهار : روان هي ابدي طلعي الصواني و ستفي فيهم الحاجات الراجل قريب يخش
نجاة : مش زوز هما ؟
ازهار : صاحب يوسف بس اللي جاي عمه قال عنده شغل مايقدرش يجي
________________
04:30 م
سلسبيل شادة الخمار : مانقدرش نمشي بيه نخاف نعتر و نطيح ؟؟
سنابل تشوفلها : بري بيه و خلاص ماعندكش حل
سلسبيل تليفونها يشرين ادم يتصل : واك عشعوش هالحمار مبرده
سنابل ضحكت : اطلعي خفي روحك
سلسبيل خشت لدار امها طلعت فراشية حرير متع صدرة عرسها و لبستها
سنابل خشتلها : هههههههههههه
سلسبيل ضحكت : شن رايك
سنابل : تهبل من الاخير
سلسبيل : هيا باي
سنابل : راجي شوية .. ديري روج احمر قبل
سلسبيل : علاش و انى امبمبكة
سنابل : غر ديريه و خلاص حلو
سلسبيل خدت روج و داراته 👄💄
سنابل : ماتعطليش ع السريع
سلسبيل طلعت تجري : فرارة
______________
احمد يلعب ف الجنان طق باب الشارع مشي فتح لقاهم صغار شارعهم ، طلع معاهم يلعبو ف الزنقة
نزلت سلسبيل تجري و طلعت الشارع شافت احمد سرعت خطواتها
احمد يشوفلها و مستغرب : مش امّيمه تلبس في جُبة !! خيرها لابسة هكي توا !!
مشي لحقها : اميييييمه ؟؟؟
سلسبيل سمعاته سرعت خطواتها : حي على امه الفرخ هذا بنقتله
احمد وراها : امّيمه راجيني بنمشي معاك
سلسبيل غلضت صوتها : برا انى مش امّيمه
احمد وقف ف مكانه
سلسبيل مشت تجري
و احمد رجع لصحابه
سلسبيل خشت تجري للمحل لقت ادم واقف يراجي
وقفت معاه : هيا بسرعة
ادم ضحك : شن مدايرة ف روحك
سلسبيل : ولد عمي وراي بسرعة
ادم مدلها كيسة التليفون : هونا معاه شفرة ركبيها
سلسبيل حطاته ف الفراشية : به
ادم شاف الروج 😍
سلسبيل : هي باي
و طلعت تجري امبمبكة : الفراشية اكيد تلبزت من الروج حي على امى كيف بنمسحه منها
و هي خاشة للجنان خبطت ف مهاب طالع
الفراشية انفتح من وجهها : هيييه 😳
مهاب انصدم : يا ساتر
سلسبيل تحشمت و تلخبطت
مهاب ضحك و تلخبط : سامحيني
يوسف وراه : تفضلي يا اختي !!
سلسبيل شبحتله
يوسف انصدم : شن اديري 😳
سلسبيل غمت وجهها و خشت تجري
يوسف يشوفلها : هادي هبلت رسمي
مهاب طلع لسيارته و يوسف لحقه
وقف عليه من الروشن
مهاب : قريبتك هادي ؟
يوسف : بنت عمي ايه
مهاب ضحك
يوسف : مافهمتش شن اللي ملبسها هكي ؛ عندها أفكار غريبة
فجأة شاف احمد جاي يجري و وجهه مقلوب
يوسف : خيرك !!
احمد خش الحوش بسرعة و ماردش عليه
مهاب : خلي نتوكل انى و خليك انت مع صغار عمك
يوسف : مية مية
مهاب كلكسله و طلع
يوسف كيف بيخش الحوش شاف جارهم جايه
يوسف وقفله : عثمان ؟ كيف الحال
عثمان : من ربي بخير لكن من ولد عمك لا
يوسف : ان شاء الله خير !
عثمان داهش : كل يوم وقت القوايل يشرين و يهرب
يوسف سكت
عثمان : و مرة يضرب السيارة باش تعوي و مرة يكسرلي ف لامبات الشارع بالفليتشات !
يوسف تحشم : انى تو نتصرف معاه ماعليكش فيه
عثمان : انى مابيتش نتكلم على خاطر عماد لكن الولد كتره يا ديروله حل يا اما بنضربه
يوسف : تم يا خوي عندي ولا يهمك
عثمان : كله من الفروخ اللي يتبع فيهم يتلقطو مع بعضهم و مايديرو خير
___________________
سلسبيل نحت الفراشية ف الدروج اتطبق فيها : حي على امه الطرف اللي جايبه ؛ ااااخ يا بختي و خلاص .. مطيحني الا ف المقمل و المخمج
حطت الفراشية وراها و خشت لحوشهم
نجاة واقفة : وين كنتي ؟؟
سلسبيل تلخبطت : لوطه عند اميمة
نجاة : انى طالعة توا بنحط ف طريقي مرت عمك ازهار ف حوش امها ؛ نروح نلقى الحوش مضموم خير ما التليفونات معادش تشوفوهم
سلسبيل : خيره الحوش مافيشي شي
نجاة : انى قتلك
و خشت على هناء : هناء ؟؟
هناء تلبس ف وشاحها : نعم
نجاة تشوفلها : وين ماشية
هناء : طالعة مع يوسف لمحل
نجاة علت صوتها : و تقولي فيها بكل صحة وجه !! قعمزي و هني روحك مافيش طلوع
هناء تكنطت : علااششش
نجاة : باش تكتر عليكم الدوة من توا ؟؟
هناء : ولد عمي هو عادي
نجاة : و لما الناس بيعرفو إنكم انخطبتو شن بيقولو عليك بعدين
هناء : طز فيهم
نجاة : نحي حوايجك و قعمزي كلمة وحدة هيا
و طلعت و خلتها
هناء متعفلقة فتحت تليفونها و اتصلت بيوسف ..
يوسف شاف تليفونه يشرين : مية مية يا عثمان تم الموضوع
عثمان مشي و يوسف فتح الخط : ايوه
هناء : راجيني نص ساعة تانية
يوسف : علاش
هناء : ماما ماتبينيش نمشي معاك ؛ بنراجيها تطلع و ننزلك
يوسف : خيرها تتصرف هكي هادي ؟ تو ندوي معاها اهو راكب
هناء : لالا فكنا منها تو تردك و تحشمك
يوسف سكت
هناء : اول ماهي تطلع كلمني
يوسف : تمام به
_______________
سنابل شادك التليفون : يهبل مش عادي
سلسبيل : شن رايك نبيعوه
خشت عليهم نجاة : فيه حوايج يبو النشر انشروهم
شافت التليفون : هذا شني 😡
البنات تلخبطو
نجاة خداته منهم و هي تصيح : هذا شنووووو !!!!
سلسبيل : متع أبرار مش لينا
نجاة : على من تكذبي يا قردة تحسابيني نرضع ف صبعي ؟؟؟
سنابل : تي خيرك ياماما ؟ جابهولها صاحبها و ماقدرتش تروح بيه قدام خوتها خلاته عندنا
نجاة : هاتي تليفونك جاي !!
سنابل خافت : علاش
نجاة : افتحيه 😠
سنابل فتحتهولها و هي ترعش
نجاة خداته منها تتصل بأبرار : تكلميها و المايك مفتوح
التليفون ينادي و البنات يرعشو
أبرار ردت : الو ؟
نجاة تفنص ف بنتها بمعنى تكلمي
سنابل ترعش : أبرار شن الجو
أبرار : مليح شن جوكم انتو
سنابل : جونا مش مليح ف جرت التليفون اللي مخليتيه عندنا دارلنا المشاكل
أبرار ضحكت 😂
سنابل : ماما تحسابه لينا و قلنالها انه ليك لكن مش مصدقة
نجاة ضربتها على راسها
أبرار : حي سامحوني بالله عليك خلاص اليوم نجي ناخده
سنابل : تعالي توا
أبرار : خلاص به تو تجيبني اختي نص ساعة تانية
سنابل : به نتلاقو باي
نجاة سكرت الخط
سلسبيل : ها شن رايك توا 😏
نجاة لوحت عليهم التليفون و طلعت
البنات ضحكو و عاودو لأبرار
أبرار ردت : ايوه
سلسبيل : تجينا انتي و اختك توا بجديات ؟
أبرار : شورك كذبتي و صدقتي روحك
سلسبيل : غر تعالو عندنا طلعة
_________________
بعد نصف ساعة 🌹
هناء نزلت تجري ليوسف : هيا
يوسف ضحك و ركبو السيارة
هناء شافت أبرار جاية هي و اختها : دقيقة بس
يوسف : خيرك ؟
هناء : نشوف البنية هادي و نجيك
و نزلت من السيارة وقفت على أبرار من الروشن : بنات شن الجو
أبرار ضحكت : مليح ، وين خواتك ؟
هناء : فوق خشيلهم
أبرار : تي طالعين حني
هناء : ماقالوليش
جو سلسبيل و سنابل
هناء شبحتلهم : وين ماشيين
سلسبيل : عندنا مشوار مليح 😍
هناء ضحكت : وين
يوسف يكلكس
هناء تلفتتله و اشرتله بمعنى شوية بس
سنابل : بناخدو حاجات و نجو
هناء : ماتعطلوش لان حتى انى طالعة بالدرقة باش اتدرقو عليا
سنابل ضحكت : به 😂
يوسف يكلكس
هناء مشتله و ركبت
يوسف : خيرك فتحتي هدرزة
هناء : باهي ماعطلتش
يوسف طلع بالسيارة
البنات ركبو مع أبرار و اختها
نجوى اخت أبرار : وين يا بنات
سلسبيل : لشارع المداااااار 😍
________________
1
هناء : شن بتاخدلها ؟
يوسف : مش عارف
هناء : عيد ميلادها مش اليوم حسب مانعرف
يوسف : امس زعلتها ومشت لحوش جدي حرجانة
هناء ضحكت : جو 😂
يوسف سكت
هناء : شن رايك تاخدلها عطر
يوسف : عادي به ، اما محل ؟
هناء : برا لمورينا
يوسف : خلي نخطم ناخد قهوة قبل
_______________
بعد ساعة 🌹
البنات باعو التليفون ب2000 جني و ركبو السيارة
سلسبيل فرحانة : شن تبو يا بنات 😌 اطلبو و اتدللو
أبرار تضحك : انى نبي مكياااج
سنابل : و انى بناخد هدية لمحمد لاني مدايرتله مفاجأة
نجوى : و انى نبي ناكل 😂
سلسبيل : خلاص ارفعينا لمورينا نشرو مكياج و سنابل تاخد عطر لمحمد و بعدين نتعشو
_______________
خشو هناء و يوسف لمورينا : السلام عليكم
جوهم اللي يشتغلو فيه مع بعض : و عليكم السلام
يوسف استغرب : كيف حالكم !
ضحكو و ردو عليه : الحمد لله
هناء وشوشاته : ماتشبحلهمش
يوسف شبحلها : كيف !
هناء : نقصد ع البنات
يوسف ضحك
جاهم موظف شاد عطر : مرحبتين بيكم ، فيه عندنا العطر هذا جديد نازل الاسبوع اللي فات شن رايكم تجربوه ؟
يوسف : شكرًا مانبوش هذا حني
الموظف : اها تمام ؛ شوفو العطر هذا نسائي صيفي و خفيف
و مد ايده بيبخ لهناء
هناء كيف بتمد ايدها يوسف شدهالها
و شبح للموظف : بخ ف ايدي اني مش ف ايدها
هناء ضحكت
الموظف تحشم : فيه عندنا ورق ابيض للتيست
يوسف : باهي جبته من الاول و ريحتنا يا راجل
هناء ضحكت و وقفت ع الأرواج
جتها الموظفة : اتدوري ف لون معين ؟
هناء ابتسمت : لا نتفرج بس
الموظفة : اها شوفي اللون هذا مات و جريئ جربي التيست متعه يهبل يهبل يهبل
هناء ضحكت
يوسف جاها : تعالي اختاري معاي
هناء مشتله
خشو البنات مع بعض : السلام عليكم
هناء شبحتلهم انصدمت 😳
يوسف شبحلهم : هادو شن جابهم
البنات انصدمو : هناء ؟؟
و مشولها
هناء : شن جابكم هني
سلسبيل : شوبينق 😍
يـتـبـــع ... 💗
________________
