رواية غرباء ( لقاء بعد الموت ) الفصل الرابع عشر 14 بقلم اساورالموسوي

السلام عليكم

اللهم صلِ على محمد وآل محمد

----

اضحك بوجه الناس والوجع بيَّ شاعل نار

مثل الذيب يمشي وجرحه بوسطه محتار.

ولا ناح جرحي يوم ما يطببَ دمع العين

امشي وكلي خوف لا يفضحني الحنين.

----

"صقيل"

ماعرف شگد مر وقت بعد هالعاصفة، گاعدة بنص السرير، شعري المگصوص نازل حد كتافي، ودموعي تنزل امسحهن ويرجعهن يتكاثرن.

حتى صوتي ماعاد موجود ماگدر احچي، واگف يم السرير، كأنُ كل اللي صار قبل شوي ما هزاه مثل ما هزاني.

باوعلي فترة طويلة، بعدها لبس تشيرته ببرود، سحب كرسي وگعد گبالي، حچه بهدوءه المعتاد.

:- بعدچ تردين ترحين؟

ماجاوبته حتى عيوني ما رفعتها عليه، بس دموعي استمرت تنزل، غصة بداخلي راح اختنگ.

:- صقيل احچي

ظليت ساكتة بس علت شهگاتي، تنهد، سند ايده على راسه..

:- يعني لهسة ما فهمتي؟ مستحيل اخليچ ترحين

عضيت شفتي بقوة اطلع حرگة گلبي بيها، بس همين ماحچيت، احس لساني انخرس وماعندي شي اگوله، كأنُ كلشي بداخلي مات.

گام من مكانه اجاني يريد يلمسني، فورًا جسمي رجف صرخت وابتعدت عنه لا ارادي، وگف مكانه يباوعلي.

انتبهت شگد صار خوفي منه واضح، سحب ايده ببطء، وبعدها طلع بدون اي كلمة، ورجع قفل الباب.

اول ما اختفى انهاريت حضنت الفراش بقوة وبديت ابچي بطريقة وجعتني وخلتني ينكسر خاطري على نفسي، هالانكسار اني جبته لنفسي.

1

اني اللي حاربت امي واهلي، هذا اللي تحديت الكل علموده، چنت مقتنعة ان حبه مختلف.

بس هسة حتى لو الباب انفتحلي وگلي روحي وين اروح؟ شلون ارجع لأهلي واگلهم هم چانوا صح وشلون اواجه نظرة امي؟

شلون راح اعيش باقي عمري بعد اللي صار؟ اني هسة مكسورة ماگدر اواجه اهلي واگلهم طلگوني بعد ماحاربتهم.

ظليت ابچي وابچي لحد ما نشفت دموعي من وحدها، بعدها هديت بشكل يخوف، لا صريخ لا دموع لا تفكير واضح، فراغ كبير ماعرف شنو املي.

رفعت راسي للسگف باوعتله هواي، استوعبت حقيقة مُرة ماتنجرع، اني خسرت وماگدر اتراجع، صرت ملكه.

1

هذا اختياري فلازم اتحمل نتيجته حتى لو اللي بداخلي انكسر للأبد.

گمت للحمام اغتسل من خيباتي وانكساري، اغتسل من آثار حبه المريض، حسيت بوجع وحرگة بس مو گد وجع گلبي.

طلعت من الحمام حاولت اشيل الفراش، من شفت الدم انهاريت بالارض ورجعت دموعي تنزل، اتذكر وحشية الموقف ولا انطاني فرصة، ولا گدرت ادافع عن نفسي وامنعه.

بعد ساعات انفتح الباب، ودخل بس اول ما شفته معدتي تگلبت تقززت منه حرفيًا، ولا كأني هذيچ الحاربت اهلها علموده، واللي شوفته عندي احلى شي بالدنيا.

هسة حسيت راح اتقيء من شفته، حتى قربه صار يخنگني، اجه مباشرة عليَّ ملابسه نفسهن عليه.

انتفضت ردت اشرد لزمني وجراني من رجليّ، ظليت ابچي وادفع بيّ، عيونه ذابلة وحُمر شكله مانايم، وابدًا مو عادي تصرفه.

ريحة غريبة بيه اول مرة اشمها، حتى من سوه بيَّ هيچ شميتها بس بسبب الصار تناسيتها من عقلي.

شكيت والشك اخذني، بس ما ثبت ابالي هسة اريد اشرد منه لا يعيد نفس الفعل عليَّ.

قاومت وصرخت..

:- وخررررر اتررررركني! لا تسويها فدوة هشاااااام!

لزمني وجراني لحضنه قوي، يمسح على شعري ويبوس براسي، يتلمس اطراف شعري ويجر نفس قوي.

كأنه يتحسر بقهر..

:- ليش هيچ سويتي بيه ليش ولچ؟!

1

ماحچيت بس ظليت ابچي، احس معدتي تتگلب من ريحته، ريحته اللي ماتفارگ خيالي من سواها بيَّ بالغصب.

:- انتِ جبرتيني لهالفعل صقيل

ماجاوبته استمريت ابچي، احس اختنگت وروحي راح تطلع بين ايديه، هو يمسح على شعري ويتملس اطرافه.

صوته هادئ..

:- بعدچ ناوية ترحين؟

ماجاوبته.

:- جاوبيني صقيل

ماجاوبت، وخرني ظل صافن بوجهي كم ثانية واني ابچي واشهگ، بعدها حچه ببرود مرعب.

:- بعدچ تردين تبقين محبوسة اكثر؟

رفعت عيني اله اترجاه بعيوني المورمة من البچي..

:- صقيل قرارچ هو يحررچ، يعني بيدچ حريتچ

انصدمت من الكلام بس قبل لا يخليني افهم، كمل وهو يباوع بعيوني مباشرة.

:- تبقين هنا وتتعاملين وياي طبيعي؟ او ترجعين لنفس العناد والحبس والصريخ، وتنجبرين كل ليلة تنامين بحضني، بيدچ القرار

حسيت گلبي انضغط بقوة عبالك واحد لازمة بيده يمرد بيه مرد، هاي مو حرية تهديد مغلف بالوان زاهية.

بس رغم هذا ماگدرت احچي واجاوبه، لأن داخلي مستسلم بطريقة مخيفة.

انفاسي متگطعة من كثر البچي، ظل يباوعلي ينتظر جوابب، كلشي بداخلي يريد يهرب منه، بس بنفس الوقت تورطت بعد ماگدر اطلع.

بلعت ريگي بصعوبة صوتي طلع مكسور..

:- ابقه... راح ابقه... ماروح مكان

ملامحه ارتخت شوي، كملت بسرعة قبل لا يقرب مني..

:- بس خلي اروح لأمي يومين بس، ارجع ارتاح شوي وارجع

فجأة وجهه تبدل وگام وگف..

:- لاااا

:- هشام اسمعني بس...

گاطعني بصوت عالي..

:- گلت لااا يعني لااا

سكتت فورًا اجه گبالي، نزل لمستواي وعيونه خلتني ارجف.

:- لازم تتعلمين شغلة صقيل، ماكو بعد شي اسمه كل يوم تركضين لأمج

:- اني ما رايحة هاربة بس...

لزم وجهي بين ايديه بقوة مو مؤذية بس مخيفة..

:- هنا بيتچ ومكانچ، زيارة تروحين تشوفينها اي عادي، بس تركيني يومين لا والف لا

رجعت دموعي تنزل..

:- اختنگت والله اختنگت

غمض عيونه كأنه يحاول يسيطر على نفسه..

:- وانتِ تظنين اذا طلعتچ هسة ترجعين؟

ما جاوبت لأن حتى هو يعرف اذا رحت احتمال احچي كلشي واهلي مايخلوني ابقه يمه.

:- والله ارجع وماحچي شي

:- لا تحلفين وانتِ حتى بعينچ الهروب واضح

:- لا والله ماهرب، اني عد كلامي

:- سمعيني عدل اذا خدعتيني وهربتي والله تحلمين بشي اسمه طلاگ، اجرچ للمحكمة، واخليچ ترجعين غصب لبيتچ كزوجة ناشز

رجف جسمي كله، اني سامعة بهالسوالف من قبل "بيت الطاعة" "الناشز" بس عمري مافهمت تفاصيلها، بس مجرد الاسم وحده يخوف.

:- شنو يعني؟

:- يعني محد راح يطلعچ من هنا بسهولة

حسيت روحي اختنگت اكثر هزيت راسي بسرعة واني ابچي..

:- لاااا والله ما اهرب، صدگني ما اهرب اني الك بس لا تحبسني هيچ، اختنگت راح اتخبل

تنهد ورجع حضني ويمسح على شعري..

:- اذا انتِ الي ليش تريدين تتركيني؟

ماجاوبته لأن بالحقيقة اني ماعدت اعرف، اذا اريده لو اخاف منه لو تعبت لدرجة بطلت افرق بينهم.

همس بذاني..

:- عد وعدي صقيل

بلعت ريگي بخوف شيقصد ماعرف، گام عني راح للباب وگف يمه لحظة، التفتلي ولأول مرة من ايام طلع بدون ما يقفله.

انصدمت ظليت صافنة بالباب المفتوح، حتى ما استوعبت بالبداية، بعدها گلبي دگ بسرعة، گمت من السرير فورًا، وطلعت وراه بدون تفكير.

شفته ينزل الدرج بهدوء ايده لازمه المحجر خطواته غريبة، نزلت وراه وصلت نص الدرج وگفت.

حس بيَّ دارلي، عيونه تعبانة وملامحه ذابلة..

:- هاي فتحته، حريتچ

ماجاوبت ظل يباوع حواليه، فرد ايديه على البيت كله..

:- كل هذا الچ صقيل، البيت والحلال وراعيه الچ وتحت امرچ، شتردين تسوين سوي بس لا تخطين خارج هالبيت وانتِ ابالچ اتركيني

حسيت الكلام مو طلب تحذير هادئ، هزيت راسي بخفة، لا موافقة ولا رفض، بس ماعندي طاقة احچي.

تنهد بعمق وكأنه هو همين تعب من هالحرب البيناتنه..

طلعت صفية من غرفة واضح تعرف كلشي، اول ما عيني اجت بعينها، حسيت نار اشتعلت بصدري حقد وبغض، بعمري ما حسيت مثله تجاه احد.

هاي المرة العجوز تعرف ابنها شسوه بيَّ، تعرف حبسني ايام، تعرف شلون انكسرت ومع هذا لا فتحت الباب لا ساعدتني، لا حتى سألتني اذا اني بخير، لا هي ولا اي احد بهالبيت.

الكل يسمعون صريخي وساكتين.

صفية عيونها..

:- يمه تعالي افطري(تريگي)

باوعتلها ببرود وساكتة ماجاوبت، غريب عليَّ هالمكان وحتى كلهم وحتى نفسي حسيتها غريبة عني.

هشام باوعلي بانكسار..

:- خليها براحتها

اني ماعاد يهمني انكساره لأن اللي انكسر بداخلي ما يرجع مثل قبل، واگفة بنص البيت، احس نفسي معلگة بين حياة ماتگدر ترجع، وحياة انفرضت عليَّ غصب.

بس قررت ابقه مو لأن اريده ولا لأن سامحته، لأني تعبت واني هسة زوجته قانونًا، وشرعًا، وحتى جسديًا.

راح هشام صعد الدرج، واني رحت گعدت عالطاولة وياهم، مو لأن جوعانة بس مدري احس مابيَّ اعاند بعد.

صفية اشرت للعاملة..

:- صبي چاي لزوجة ابني

باوعتله بسكوت، صبتلي شوي ودخل لهيب تفاجئ بشوفتي، ظل يتلفت.

لهيب :- شنو اليوم زوجة ابويه يمنه عالطاولة!

صفية :- مو وقته ابني

لهيب :- وهاي سديناه" ابتسم" نورتي الطاولة

مانطقت ولا حرف اكتفيت بهزت راس خفيفة، شوي ودخل شبيب وگف ثواني وتوجه لكرسيه بدون مايحچي، بس نظراته وترتني.

شبيب رفع راسه..

:- شنو لازم انفك اسرچ

ردت اگوم حچايته ضوجتني، بس صوت صفية رجعني كأنه امر واجب الاطاعة..

:- اگعدي، ماعليچ بكلامه، وانتَ الزم لسانك هسة يجي ابوك

شبيب :- شگلت؟!

صفية :- سدوا الموضوع نهائيًا

اجه هشام شكله سابح ومبدل، لابس ملابس رسمي، دنگت ماباوعتله، گعد بالكرسي اللي گبالي، رفعت عيني يباوعلي بطريقة حسستني اني بلا ملابس.

العاملة تجيب وتحط الاكل كلشي طبيعي، صفية تشرب چاي، لهيب يتصفح مبايله، شبيب يشرب چاي بهدوء، وهشام گبالي يباوعلي بين لحظة ولحظة.

هشام :- ماتاكلين اكلچ

ماجاوبت، اني وشعري اللي واضح مو مرتب ومگوص عشوائي ومخربط، نزلت راسي حتى ما اريد اشوف وجوههم، لأن كل ما اباوعلهم اتذكر صريخي واني ادگ الباب وهم سامعين وساكتين.

شنو فرقهم عنه، مشاركين بحبسي وظليمتي، اصحي صقيل انتِ ظلمتي نفسچ تحملي.

لحظات ودخلت رنا الشعر مفتوح اشگر واصل نص ظهرها، جسمها رشيق ولا مبينة اولادها كبار، لتگول توها بنت الثلاثين، نافخة الشفة.

تحسرت اكثر من القهر، شناقصها؟ ليش ركض وراي اذا مرته هيچ حلوة ومرتبة.

رنا :- :- صباح الخير

محد رد بسرعة، احس الجو كله مكهرب، بس شوي وردوا.

الكل :- صباح الخير

ماعدى هشام ماشفت شفته تحركت ورد، يخوط بالچاي وهو ساكت وعينه عليَّ..

رنا فجأة شهگت..

:- شعرچ شبي؟!

باوعتلها اجت عيني بعينها، حسيت گلبي ينقبض، هاي المرة اللي چانت سبب كلشي ينهار، والغريب ماحسيت بكره الها گد ما حسيت بقهر من هشام.

هشام حچه..

:- رنا گعدي وبلا اسئلة

رنا :- اني ماجيت حتى اضوجچ، والله العظيم من رجعت مو علمود اخرب حياتچ

شبيب ترك الاستكانة بحدة..

:- يمه خلصينا من هالسوالف

رنا تجاهلته ظلت عيونها عليَّ..

:- استخطيت شبابچ وصغر سنچ، والله ما تمنيتلچ هالشي

باوعتلها بقهر..

:- بس صار وخدعتوني

تنهدت وبهدوء..

:- اي صار، چان لازم هشام من البداية يصارحچ

حسيت هشام توتر، واضح مايحب وجودها وياي، صفية عصبت..

:- رناااا سكتي

رنا ماهتمت..

:- انتِ مو اول وحدة يأذيها...

هشام ضرب ايده عالطاولة بعصبية..

:- رناااااا بسسسس كااافييي!

انتفضت لا اراديًا من صوته، حتى استكاين الچاي تبدت عالطاولة.

رنا ماهتمت لعصبيته ولا خافت..

:- خلي تعرف البنية حقيقتك، مارجعتلك لسواد عيونك بس لخاطر عمتي واولادي

هشام گام بغضب..

:- ليگول ميت عليچ بنت الكلاب، گومي طلعي بره

رنا گامت..

:- اطلع ليش ما اطلع

شبيب وگف گبال ابوه..

:- ليش تتعامل ويه امنا هيچ؟

هشام دفعه بغضب..

:- لا توگف بوجهي لا انهيك

شبيب تراجع وهو مقهور بسرعة طلع من غرفة الطعام، گمت اني همين اريد اطلع وگفني صوته..

:- صقيييل رجعي گعدي اكلي

:- ماريد آكل اجيت لخاطر عمة صفية

ماحچه بسرعة طلعت ركض صعدت للغرفة، ارجع للحبسة افضل، واضح يمشي الكل بكلامه ويگول فرضوا عليّ يكذب، حتى تنفسه كذب.

بعد ماطلعت لليل، عيوني خلصت من البچي، ماگدرت افتح عيوني بعد، نمت ودمعتي على خدي.

حسيت بيّ حضني واني نايمة، طريقته بشم شعري ونحري خلاني اصحه عالآخر، نبضي اضطرب عرفت شجايني.

ظلت ترجف شفتي اريد اگول لا بس ماگدرت، بقيت هيچ ايام، اروح المدرسة وارجع ولازم اتقبل هشام وقربه.

تجي امي تزورني اتظاهر بالسعادة وطايرة سعادة، بس بداخلي مخنوگة، اگعد يمهم عالوجبة بس واضح محد متقبلني، رنا ماتحچي بعد بس احسها شايلة اسرار هشام.

هشام احسه مهووس بشي اسمه صقيل، مريض همين، جابلي زيوت ومنتجات العناية بالشعر واضح غالية، كله حتى يرطع شعري مثل ما چان.

والله ما ابالغ هو يجي يدقق ويحطهن الي بنفسه، مرات تعبان مايهمه، ويهتم لأدق تفاصيلي، خذاني لصالون رتبت شعري بعد ماخربته صار جوه ذاني بشوي.

اليوم احس نفسي تعبانة فما رحت للمدرسة، گضيتها نوم وما أكلت شي، بالليل اجاني هشام يشم بيَّ ويبوس براسي.

:- نعمتي انتِ بخير ليش ما طالعة اليوم ومارايحة المدرسة؟

افتح واغمض..

:- مابيَّ شي بس فدوة خلي انام

:- تمام بس اسبح واجيچ

عافني وراح، احس ميتة برد، ماريده يجيني مالي خلگ تعبانة كلش، بس الليلة حس بيَّ وماضايقني.

فزيت الصبح ماهو طالع، حسيت جسمي خيوط، رجعت نمت، گعدت بالعشرة، ردت انزل آكل ماگدرت، جسمي بايد ونحلان.

ماحسيت غير بايد ناعمة ودافية تنحط على جبيني عبالي امي فتحت عيوني ابتسم..

:- ماما اشتاقيتلچ

رنا :- صقيل انتِ مصخنة وشاعلة نار

:- هاي انتِ! عوفيني بحالي

:- ماشفتچ طلعتي من الغرفة من امس ظل بالي عليچ

:- يعني تحسسيني الطيبة والمثالية واللي تخاف على شريچتها

:- اني مو مثل ماتتصورين

:- لعد شنوو انتِ؟! چنت محبوسة ايام مثل الحيوان محد منكم ساعدني

:- ماچنت موجودة لأن اني وهشام تعاركنا وطلعت، اجوني الولد توسلوا ارجع، اني عندي بيتي الخاص وحياتي ولا محتاجة هشام

بس عمتي الله يسلمها ماراضية تقتنع ان اني وابنها ماكو امل بيننا، رجعتني مغصوبة، فشرطت زواج عالورق بس، لأني مالي اي رغبة ان اكون وياه بنفس الغرفة، حتى لو ينگص وريدي

:- لهالدرجة هشام سيء؟!

:- اني وياه مانحب بعض، هو... صقيل ماترديني اخوفچ من هشام

:- عليچ الله من الاول حسيتچ مو خبيثة، گليلي شنو شبي هشام ليش هيچ تكرهي؟!

:- هشام تزوجني مجبور من هو شاب امه جبرته، لأني بنت صديقتها، وهو چان يحب وحدة وتحبه، تزوجت وراحت وهو ظل مهووس بيها، احس...

:- شنوووو شتحسين؟

:- تشبهيها

:- هاااا؟!

:- تشبهيها صقيل عيونها واسعة وخضر مثلچ، وشعرها طويل، چان عنده صورة كل يوم اشوفها واحترگ

بلعت ريگي الناشف..

:- يعني هشام يحبني لأني اشبهها

:- ماعرف بس واضح يحبچ من صدگ لأنچ... يلا ماتردين تسمعين سوالف ماضي، لازم اجيبلچ براسيتول للحرارة، اكيد ما أكلتي

:- رناااا عفية لا تغيرين الموضوع، احچيلي شيخفي هشام؟

:- والله ماعرف شنو اگلچ، هاي السر بس اعرفه

:- مستحيييل انتِ زوجته سنين وماتعرفين بس هاي؟

:- اي ماعندي شي اگوله، يلا اروح اجيبلچ خافض للحرارة

عافتني وطلعت، ظليت ابلع بريگي الناشف گمت شربت ماي، حسيتها تحفظت بكلامها، اكو اسرار تعرفها رنا وتخفي عني.

جابتلي دوا وانطتني اياه، منا للمغرب تحسنت ماتركتني، مثل ما امي تهتم بيَّ اهتمتلي هيچ، حسيتها طيبة هواي.

مشت الايام رنا صارت مثل صديقتي، هالشي لاحظته صفية وشكلها فرحت بصداقتنا، اني ولهيب دوم نلعب سويه ونضحك مرات يدرسني، إلا شبيب احسه غامض يخوفني بنظراته.

خفت اطلع حامل، بس الحمدلله ماصارت، هشام ضاج وانقهر لأن ما صار حمل، بينما اني فرحت.

اول شي سويته اخذت حبوب وهو مايدري، لان ماريد اتورط بطفل ويه هشام هسة دراستي.

بالليل گاعدة بالصالة ويه لهيب، صفية وشبيب ورنا بغرفهم، هشام عنده شغل، البيت هادئ.

لهيب جابلي لعبة اسئلة وگال خلي نلعبها، لأن ملينا من البليستيشن، كل واحد يسأل الثاني، والخسران ينفذ طلب للآخ.

جاي اضحك من كل گلبي لأول مرة من فترة، يمكن لأن لهيب شخصيته خفيفة ومايحسسني اني غريبة مثل الباقين.

لهيب يضحك..

:- هااا هسة اجه دوري، شنو اكثر شي تخافين منه؟

باوعتله لحظة ساكتة، بعدها ضحكت حتى اتهرب من الجواب..

:- انتَ شگد تحب اللگافة

:- هااا يعني اكو شي

:- وانتَ اكو شي بعقلك غير التطفل؟

ضحك بصوت عالي..

:- لا والله بس ونسه

ضربته بالمخدة..

:- اخسر واسكت احسن

:- هاااا الاعتداء ممنوع

ظلينا نضحك، حتى صوتي صار عالي بدون ما انتبه، هو همين ماخذ راحته نام بالگاع وحط رجل على رجل.

:- يلا لعد جاوبي هسة، اكثر شي ندمتي عليه؟

ضحكتي خفت شوي.

لهيب انتبه فورًا..

:- اوووف دخلنا منطقة حساسة

:- للا تغثني عااابت

:- خلص خلص نغير السؤال...

قبل لا يكمل سؤاله، انفتح باب الصالة، صوت المفاتيح وحده خلاني اتنفض دخل هشام، لابس بدلة سودا.

اول ما شافني گاعدة ويه لهيب، ملامحه تبدلت بشكل واضح، ابتسامتي اختفت فورًا.

لهيب انتبه هو همين اعتدل بنومته..

:- هلا بويه

هشام ما رد بسرعة، ظل يباوع بيني وبين لهيب، نظراته ثگيلة بشكل خنگني..

:- الساعة عشرة ونص بالليل، وانتوا بعدكم سهرانين على سوالف وضحك؟

صوته هادئ بس احسه الهدوء اللي قبل العاصفة، لهيب حاول يخفف الجو..

:- عادي بويه چنه نلعب شوي

:- وانتَ ماعندك جامعة الصبح؟

لهيب :- اي عندي

:- وهي ماعدها مدرسة؟

نزلت عيني مباشرة، حسيت نفسي رجعت لنفس الشعور المقيت، المراقبة والخنگة.

لهيب ضحك بخفة يحاول يعديها..

:- بويه شبيها سوالف يعني مو گاعدين نسوي مصيبة

هشام باوعله بخزرة..

:- مو كلشي ينضحكله بابا لهيب

سكت لهيب فورًا، هشام تقدم جوه الصالة، عينه عليَّ..

:- وانتِ شنو الدراسة خلصت لو ماعادت تهمچ؟

:- چنه بس نسولف هسة اروح

:- امممم واضح سوالف مهمة جدًا لدرجة ناسية وقتچ

حسيت نبرة التملك بكلامه مو مجرد عتب، لهيب حس بالجو المكهرب، گام بسرعة..

:- يلا اني رايح انام

هشام :- روح راجع محاضراتك احسنلك

راح لهيب بدون نقاش، بقيت اني وحدي بالصالة وياه، ساكت گعد بالمكان اللي چان لهيب گاعد بيّ مد ايده اخذ المخدة اللي ضربته بيها قبل شوي، باوعلها وبعدين باوعلي.

:- وناسة هواي هااا؟

بلعت ريگي..

:- عادي سوالف

:- ويا لهيب تحديدًا؟

رفعت حاجبي اله باستغراب..

:- شنو قصدك؟

:- قصدي واضح

انقهرت كلش..

:- هذا ابنك شبيك؟

:- ادري ابني

:- لعد شنووو؟

نزع الرباط وفك الزر الاول من قميصه بعصبية خفيفة..

:- ما يعجبني اشوفچ هيچ مرتاحة ويا غيري، وانطيچ كلشي وانتِ حتى ضحكتچ صارت لغيري

حسيت ضيقة صارت بصدري..

:- انتَ تبالغ هواي

:- يمكن "گام وگف گبالي" بس اني هيچ

اجه عليه گعد كرفص گبالي، مد ايده لمس شعري القصير ورتبه ورا ذاني..

:- من تضحكين بصوت عالي واني ما موجود، مايعجبني الموضوع

بعدت ايده بهدوء..

:- هشام مو كلشي لازم يتحول لمشكلة

ظل يباوعلي ساكت، نزل عينه وتنهد گام وگف..

:- روحي نامي، عندچ مدرسة

هزيت راسي وگمت بسرعة قبل لا يتطور النقاش اكثر، واني اصعد الدرج حسيت نظراته بظهري طول الوقت، نفس النظرة اللي كل مرة تذكرني ان راحتي بهالبيت دائمًا الها ثمن.

واني صاعدة الدرج شفت شبيب عبرته وهو يباوعلي بطريقة غريبة، حتى ضجوجتني، دوم هيچ نظرته.

دخلت الغرفة بسرعة سديت الباب وراي، رحت بسرعة لكتبي بارتباك، بس بالحقيقة لا اريد اقرا ولا عندي خلگ للدراسة.

بس اعرف هشام جاي وراي، ومن حچاياته بالصالة ونظراته حسيت العاصفة بعدها ما مخلصة.

بعد ثواني انفتح الباب، دخل وهو يفك ساعة ايده عيونه عليَّ مباشرة.

:- شنو هالضحك توه ويه لهيب؟

ما التفتتله..

:- شنسوي يعني نحچي ونضحك جريمة؟!

:- لا حشاچ حبيبي بس اصواتكم طالعة للحديقة

:- ولهيب اني خالته طبيعي نضحك مابيها شي

:- لهيب صار رجال مو طفل

:- واذا اني خالته

شمر الساعة عالميز بعصبية..

:- من باچر تلبسين حجاب يمهم

انصدمت وبقيت صافنة..

:- شنو؟!

:- اللي سمعتيه لا تسوين نفسچ ماسمعتي

:- هشام انتَ صاحي؟ اني خالتهم شبيك؟

:- ماريد نقاش، يم لهيب وشبيب حجاب

:- بس مو حرام اصلاً، اني بمنزلة اخت امهم

:- صقيل گتلچ ماريد نقاش

:- لا والله اريد افهم، شلون فجأة صار لازم اتحجب عن ولدك؟!

:- لأن ما عاجبني وضعچ وياهم

:- وضع شنو بالضبط شتقصد؟!

:- الضحك الزايد، الگعدة، السوالف والدلال

:- دلال شنووو؟! اني جاي العب وياه، دومك موجود

:- حتى لو موجود

:- يعني شتريد بوجودهم اگعد ساكتة مثل الجثة حتى ترتاح؟!

:- اريدچ تنتبهين لتصرفاتچ

:- تصرفاتي شبيها اني شمسوية اصلًا؟

:- صقيل لا ترفعين ضغطي

:- لا ارفع ضغطك شنو هو انتَ اللي يحچي وكأني سويت مصيبة

:- لهيب مو صغير حتى يظل لازگ بيچ هيچ

:- هو يعتبرني صديقة لا اكثر!

:- وانطيتيه مجال يعتبرچ هيچ

:- هشام هذا ابنك!

:- ادري ابني

:- لعد شبيك؟!

:- منا وهيچ هسة حجاب تلبسين يمهم، وقلة احتكاك وياهم

:- لا والله ما يصير، انتَ جاي تطلب شي مو منطقي

:- اني زوجچ وهاي اوامري

:- منو گلك اني عبد وانتَ الملك حتى تأمرني؟! الحياة الزوجية تفاهم مو اوامر

صاح بصوت عالي..

:- صقيييل

:- لا تعلي صوتك عليَّ، اني همين اگدر اعليه، وشنو تطلب مني البس حجاب، وشگلهم ابوكم يخاف منكم عليَّ؟!

:- لا تحورين كلامي

:- لعد شلون افهمه بلا؟!

:- افهميه مثل ما اگول

:- اللي فهمته شك، وهذا مرض مو غيرة

عصب..

:- اني ما اشك بيچ

:- لعد شنو هالكلام والتصرفات؟!

:- اريد حدود بالبيت

:- حدود بيني وبين اولادك؟! اني خالتهم يعني بمنزلة امهم

:- لا تعيدينها هواي لحيتي

:- ليش زعجتك لأنها الحقيقة؟

دفر الميز بغضب..

:- صقيل لا تستفزيني

گمت وگفت بوجهه رغم خوفي منه..

:- انتَ جاوبني شتظن يعني؟ تظن اني ممكن تزوغ عيني على غيرك على ولدك هنوب؟! لو شنو يمكن عبالك احب واحد منهم وآخذه بعدك؟! ترا ح...

ماكملت كلامي، ايده نزلت على وجهي بقوة، انلوت رگبتي من الضربة، سكتت حتى نفسي انگطع، لزمت خدي بصدمة، دمعت عيوني.

اني انفجرت بوجهه..

:- اشوووف گمت تضربني تعودت ايدك عليَّ مو؟!

هجمت عليه دفعته بكل قوتي وضربته على صدره.

لزم ايديه بغضب..

:- صقيل ايدچ

:- لااااا والله اضربك مثل ماتضربني

دفعني بكف ثاني..

:- ايدچ لا تنمد ناحيتي

رجعت ضربته بغضب..

:- اضربك بس الك مسموح، اني اكرهك اكرهههك!

لزم ايديه بعنف..

:- بطلي جنون

:- وخرررر عنيييي!

حاول يسيطر عليَّ، بس اني تهسترت بالكامل وصرت عصبية ملخته تملخ، حتى قميصه نشلعت ازراره.

:- كلشي تررررريد تسيطر عليه، نفسي، لبسي، ضحكتي، حتى شلوووون احچي!

:- لأنچ ماتعرررررفين حدووووودچ!

:- لاااااا انتَ مريييييض! انتَ موووو طبييييعي!

هاي الكلمة گلبته اكثر دفعني عالسرير بعنف..

:- اني مريض؟!

:- اييي مرييييض! شكاااااك ومهووس ومعقد!

رجع صفعني مرة الآخ اقوى، صرخت عليه وبديت ابچي بهستيريا..

:- اكتلني وخلصنيييي!

:- صقيل اسكتي كاااافي!

:- ماريدكككك اني اكررررررهك!

كل ما اگولها ايده تثگل اكثر، مو ضرب قوي دفع ويعصرني قوي بعصبية خلتني اختنگ، آخر شي لزم وجهي بقوة، دموعي مغرگة خدي، شعري مهوس.

هو يتنفس بسرعة وعيونه حُمر..

:- لا تجيبين طاري ولدي بهاي الطريقة مرة ثانية

دفعت ايده عني ببچي..

:- انتَ اللي فكرت بطريقة وصخة مو اني!

گام عني وهو يخلع سترته وشمرها بالارض بغض، أخذ شيشة عطر ضربها بتاج السرير، ظليت ارجف مكاني.

شنو متقصدني؟ راد يضربني بالعطر وماصارت؟ انصدمت! حتى عيوني انفتحت عالآخر، لزمت حلگي بصدمة خرعني.

راح للحمام، حضنت نفسي بقهر، احس كل مرة احاول اوگف بوجهه تنتهي اسوأ من القبلها.

طلع من الحمام وملامحه بعدها مشدودة، شعره مبلل عيونه حُمر واضح بعدها العصبية، لبس شورت وراح رش عطر.

شافني گاعدة متكية على تاج السرير، حاضنة رجليَّ وابچي، تنزل دموعي امسحهن وينزلن اكثر، تنهد حسيته هدئ شوي.

ظل صافن عليَّ شوي بعدها اتجهلي فورًا انتفضت ورجعت ليورا..

:- لاااا تقرررب

گعد عالسرير وتنهد مد ايده..

:- تعاي هنانة، بحضني زعلي

:- ماريدك، وخررررر عني

لزمني من ايدي جراني اله..

:- گتلچ زعلي بحضني

قاومته وابچي اكثر..

:- هشام عوفنييي

:- لا تصيرين هيچ

:- توك ضاربني وتگلي لا اصير هيچ؟!

:- انتِ الوصلتينه لهيچ مكان

:- اييي مارسوا ساديتكم وشمروا السبب بالمرة!

:- لا تصيحين دا احچي وياچ بهدوء

:- هاي نبرة صوتي

:- تعاي صقيل

:- مااااريد!

لزمني من خصري بقوة وسحبني لحضنه غصب، بديت ادفع بصدره وابچي بصوت.

:- وخررر عنيييي، صررررت اختنگ من قربك!

دفن وجهه بشعري يشم بيَّ، ايده تمسح على ظهري بعصبية متناقضة ويه حنانه المريض.

:- شبيچ بابا حبيبيانتِ ليش هيچ تعانديني؟

:- لأنك توجعنييي!

:- اني ما اريد اوجعچ

:- بس توجعني كل مرة توجعني اكثر!

رفع راسه يباوعلي، عيونه بيهن شي مرعب وشي مكسور بنفس الوقت..

:- انتِ ليش ماتفهميني؟ ليش كلشي اسويه تحسينه ضدچ؟

دفعت صدره..

:- لأنك تعاملني مثل الشي مو بني آدمية!

:- اني اخاف عليچ

:- تخاف عليَّ؟! هاي يسموها خوف؟!

شدني اكثر لحضنه لمن شهگت..

:- اي اخاف، اخاف عليچ من الكل حتى مني

رجف جسمي من هالحچي، حسيت عقله مو طبيعي فعلًا، حاولت اگوم..

:- اريد اروح الحمام

ماخلاني رجعني لحضنه بالقوة..

:- لا، اهدي بالأول

:- هشام دخيلك عوفني بس دقيقة

:- لا تروحين وانتِ تبچين هيچ

:- هسة شتريد؟!

باس راسي بسرعة وايده تتحسس خدي المحمر من الكفوف..

:- اريدچ تهدين بس

بعدت وجهه وايده عني بعصبية..

:- لاتلمسنييي

:- صقيل

:- لا تصيحني بهالصوت!

:- حبيبتي

:- مو حبيبتك!

:- نعمتي

:- لاااء لااااء

:- بناتي انتِ

:- ابويه مات من زماااان

حسيت بفكه ينشد بعصبية واضحة، بس حاول يسيطر على نفسه.

:- شسوي حتى تصدگين اني احبچ؟

:- الحب مو هيچ

:- شلون لعد؟

:- مو ضرب وحبس وشك وتحكم!

ايده بعدها تمسح على شعري..

:- اني رجال اغار

:- هاي مو غيرة، هاي مرض

تنفس بقوة حسيت راح يعصب مرة ثانية، بس بدلها حضني اكثر وباس جبيني.

:- حتى لو مرض، انتِ مرضي

دفعت كتفه ودموعي تنزل..

:- الله ياخذني يوم العرفتك

غمض عيونه كأنُ الكلمة وجعته فعلًا همس..

:- لا تگولينها ارجوچ صقيل اتخبل من اسمعها

:- اكررررها مليووون مرة، اخذت حيااااتي كلها

:- وانتِ اخذتي عقلي كله

بقيت ابچي وهو يجبرني ابقه بحضنه، كل ما احاول ابعده يرجعني، يبوس شعري وخدي وايدي بطريقة خنگتني اكثر.

:- عوفني دقيقة بس

:- لا

:- ايي ليش؟!

:- لأن من تبعدين احس راح تهربين مني

:- حتى واني بحضنك انتَ خايف اهرب؟!

باوع بعيوني بهووس يخوف..

:- اي لأنچ الوحيدة اللي گدرت تخليني هيچ، الوحيدة اللي خذت گلبي

:- اي مثل ام عيون الخضر والشعر الطويل

ابتعد عني شوي..

:- رنا بت الكلب ما مخليَّ شي ما حچته مو هيچ؟

:- اي حچتلي عنها

:- بس هي ماضي ومن سنين طويلة حتى ماذكر شكلها

:- كذاااب وانتَ محتفظ بصورتها

:- وحرگتها رنا وحرگت كل ملابسي واشيائي، ما گلتلچ رادت تحرگ نفسها هي واولادها

:- گلتلي وكله بسببك

:- انجبرت آخذها واني ماحبها، بس نسيتها من صاروا اولادي ماهتميت للحب بعد إلا من شفتچ

:- كذااااب ما اصدگك تلعب بعقلي

:- انتِ ليش ماتفهميني؟ شبيچ باباتي لو ما احبچ ما اغار عليچ مو

:- هاي مو غيرة هاي مرض!

مد ايده حتى يتلمس خدي، درت وجهي بسرعة، بس هو مايفهم ما ابتعد عني، بدا يتماده.

ابعده واصده..

:- لااا

هنا صدگ حسيت نفسه يختنگ من الرفض المتكرر، صوته صار خشن مخيف..

:- من المسچ باردة ثلج ليش هيچ؟

سكتت اباوعله برجفة شفايف..

:- جاوبيني

:- لأن ما ارتاحلك، كلشي عندك جبر ويهمك ارضاء نفسك لا اكثر

ظل يباوعلي وضحك بخفة مو طبيعي..

:- عاشت ايد رنا واضح دا تشتغل عدل براسچ

:- لا تدخل رنا بيننا مالها علاقة

:- لعد شنو هاي التصرفات كل ما اقرب منچ تتقرفين، تتمنعين لو تبچين وكأني غريب عنچ

:- لأنك جرحتني هواي واذيتني

:- اممم هيچ يعني؟ لو لأن اكو غيري دا يسد مكاني؟

انصدمت من كلامه..

:- شنوووو تقصد؟!

:- ليش من المسچ باردة؟ ليش كل ليلة حجة؟ ليش من احضنچ جسمچ ينفر شكو؟ دورتيلچ بديل لو شنو؟

:- انتَ شجاي تحچي؟!

:- يمكن اكو واحد معجب بيچ؟ يمكن عاجبچ اهتمام لهيب مثلًا؟ يمكن...

ماكمل ضربته كف بقوة على وجهه، جمد مكانه باوعلي بصدمة، فجأة تحول وحش عليَّ، لزمني بعنف..

:- انتِ ترفعين ايدچ عليَّ؟!

:- لأنك وصخ! شلون تفكر هيچ بيَّ؟! هنوب ويه ابنك!

اريد افتهم بعدها ماكو، اجتني الضربات بعصبية عمية، صارني يهزني بعنف وكل كف اقوى من القبله، لزمني من شعري حسيت انشلع وصلة من فروة راسي من الوجع.

ظليت اصرخ احاول احمي نفسي ماگدرت، كلما احط ايديه على وجهي يوخرهن، خلع ايدي وهو يجرني ويهزني بعنف.

حتى رجليّ تأذت لأن ثبتني برجليه، متت فحطت بعد مابيَّ حيل حسيت نفسي راح اموت بيده ويكتلني.

:- هشاااام لاااا فدوة لاااااا

كلماته چانت اسوء من الضرب..

:- انتِ عا....! ما تسوين فلس بدوني! منو چنتي قبل لا اخذچ؟! جبتچ من لاشيء! مدللچ ورفعت راسچ وحاطة على راسي وآخر شي تتقرفين مني؟!

كل كلمة تنزل عليَّ مثل السچين، من كمية الإهانة اللي انكسرت بيها..

:- لااااا تگول هيچ اكرهك اكثر والله!

ظل يهزني بعنف وعصبيته طلعت بشكل مرعب..

:- ليش مو هاي الحقيقة؟! بنية تطلع لحفلات من وره اهلها وتخلع حجابها شنو معناتها

ادفع بيه بقوة..

:- اكررررهكككك! اكرهكككككك ياحقير!

:- عبالچ الكل راح يحبچ لو تركتچ؟! محد يتحملچ غيري! كلچ وحدة عا.......!

كومة فشاير وكلمات سوقية سمعتها واتهضم، هنا صدگ حسيت داخلي تفتت مو بس انكسر.

مو بس لأن ضربني واهاني وفشر على شرفي، لأن استوعبت هشام اللي حاربت الدنيا علموده، ممكن بنفس اللحظة يحبني بس دمرني بلا رحمة.

فجأة وگف وهو يلهث واني ابچي بصوت متگطع، والخنگة لازمتني، يباوع لايده والي.

رجع جراني من ايدي واني ابچي واحاول ابعده عني، بس كل ما ادفعه يرجع يقرب اكثر، كأنُ مخه فصل بعد الكلام اللي صار.

دفعني عالسرير جسمي كله يرجف، حاسة روحي مهدودة لا نفس لا قوة لا حتى حيل ابچي بعد.

ظل واگف يباوعلي، صدره يعلى وينزل بعنف، راح للخزانة لبس تشيرت اسود بعصبية، حتى ايده چانت ترجف وهو يلبسه.

ماحچه شي طلع بسرعة وصفگ الباب وراه اول ما اختفى صوته وشكله انهاريت.

حضنت المخدة گمت ابچي بصوت، مو بس من الضرب، من الحچي اللي طلع منه، من كمية الوصخ اللي فجأة شمرها بوجهي.

شلون يفكر بيَّ هيچ؟ شلون يشوفني بهاي الطريقة بعد كلشي؟

ظليت ابچي لحد ما تعبت، حتى حلگي صار يوجعني وجهي شاعل نار من الصفعات، ايدي عليها آثار زرگة ماعرف سببهن.

ماعرف شگد مشه الوقت، سمعت الباب ينفتح رفعت راسي بخوف، دخل بهدوء غريب، سد الباب وراه بالمفتاح شمره بعيد.

عيوني نزلت لايده بيها زجاجة خمر مو اول مرة اشك، هواي مرات اشم ريحة غريبة عليه، خصوصًا بالليل، بس چنت اغض النظر لأن عمره ما ترنح گدامي ولا فقد وعيه.

بس هسة تأكدت اكيد عنده بمكتب البيت، ويشرب وحده بعيد عن الكل، گعد على كرسي مقابل للسرير، فتح الزجاجة واخذ رشفة طويلة، مسح شفته ولحيته بظهر ايده وباوعلي.

عيونه مرعبة..

:- تعاي

هزيت راسي..

:- ماريد

:- لا تخليني اعيد كلامي

لزگت ظهري بتاج السرير..

:- شتريد مني؟

اخذ رشفة ثانية وهو يباوعلي بدون رمشة..

:- صقيل گلت تعاي

:- ماريد اجي

:- تعاي صقييييل لا الله اشعل النار بينا بهالغرفة ونحترگ سويه

رجفت لا اراديًا من گام من الكرسي بهدوء، قرب عليَّ وريحة الخمر واضحة هالمرة مد الزجاجة ناحيتي..

:- شربي

بعدت وجهي بسرعة..

:- انتَ مو صاااااحي

:- شربي صقيل

:- مستحيييييل

:- ليش بابا ليش؟

:- شنو ليش تخبلللت! حراااام!

قرب الزجاجة من حلگي غصب..

:- جربي بس

دفعت ايده برعب..

:- هشااااام عووووفني!

:- شربي راح تحسين بشعور مختلف حبيبتي

:- ماااااريد هالشعور عوفني

لزم فكي بيده بقوة..

:- كلشي مني مرفوض هالفترة، لمستي، حضني، حتى حچي وياچ، شنو بداخل راسچ؟

دموعي نزلت..

:- لأنك تأذيني

ظل يضحك بطريقة مجنونة..

:- وانتِ هم دا تأذيني صقيل

:- لا تقرب عليَّ مو اني وحدة وصخة مثل ماتگول!

رجع قرب الزجاجة لشفتي..

:- شربي بس شوي راح تهدين

صحت بخوف وعصبية..

:- گلت لاااا وخره عني، هشااااام!

:- لا تخليني اوصل لمرحلة ما تعجبچ

ظل گبالي گاعد الزجاجة بيده، يباوعلي بطريقة خلتني احس ان الليلة السودة هاي بعدها طويلة وراح تخلص حيلي.

تنهد بعصبية، فجأة لزمني من رگبتي ثبتني مكاني، شوي وحط اصبعه بحلگي وفتحه غصب رغم عضتي وصرختي.

حط الزجاجة وشربني غصب اختنگت، ظليت اگح ما وگف لهالحد رجع خلاني اشرب غصب......

**

بعد ما انقضى شهرين محرم وصفر..

گاعدة عالسرير وهي تسوي عادتها من تخجل، تگطع بأصابعها وهي تباوعله يمشط شعره، جاي يباوعلها بطرف عينه بس ما التفت.

گلبها جاي ينبض بقوة، تعرف مو وقتها بس هي انسان مو حجر، وهي تشوف الرجال اللي نبضله گلبها من قبل وهو زوجها حلالها هسة.

وكل صفاته تخلي اي بنية تعشقه مو بس تحبه، اكيد راح تفكر بيّ، رغم الظلم المرت بيّ والالم اللي جرعته بفقد شي عزيز من قبل اقرب شخص لازم يكون حاميها.

بس هي نبضاتها مو بيدها، مرات تحسه هو همين يباوعلها بهذيچ النظرة، بس من تذكر هو مايقرب منها باي شكل حتى لمست ايد، تعرف هو مايحبها.

خلص تمشيط، رش من العطر والتفت وهو مبتسم..

:- شنو رأيچ مرتب؟

ابتسمت بخجل وبلا شعور..

:- تخبل انتَ...

سكتت لهنا وهي تتبلعم، وهو حتى يضيع الموضوع تنحنح..

:- صدگ نسيت اگلچ لاحظتچ تستحين تاكلين يمهم، فجبتلچ حلويات حطيتهن بالمجر هذا اللي يم راسچ بسيطات بس يمشن حال

:- ليش كلفت على نفسك

:- لا ماكو تكلفة تستحقينهن

:- شكرًا ماقصرت

:- الشكر لله، تردين شي؟

:- لا سلامتك، شنو راح تسوي اليوم

:-اروح اسأل واجي حتى نخلص عقد المحكمة، خليچ جاهزة خاف اجي عليچ

:- تمام

:- ابوي يتعقد من شي يطول وظروفنا صارت هيچ والاوضاع تعبانة

:- تيجان ليش تريد نعقد محكمة، مو انتَ لازم...

:- لام شنو؟

:- مرت فترة يعني...

:- يعني شنو؟

:- تعرف انتَ موقفك شهم وياي ومحد يسوي، وانه ماعندي مشكلة شتقرر، من حقك انظلمت بيَّ...

ماكملت قاطعها..

:- آية انتِ هسة مرتي محسوبة عليَّ شنو انظلمت؟! انتِ بنية معدلة وصبورة وتسمع الكلام، طيبة وهادئة و... و... من الاخير انه ماريد اطلگ اذا هاي قصدچ

عيونها دمعت..

:- والله جاي تخجلني وتموتني بهالموقف محد يسوي

:- لا تنزل عيونچ دمع يابنت الناس، ماخذيتچ ودگيت الصدر حتى اشمرچ بعد چم شهر، ثقي بالله انتِ امانة بهالرگبة والي يمسچ يمسني

ماتعرف شتگول احتارت، ماتعرف منين طلعلها هالأنسان، حتى لو امها داعيتلها ماتحصل مثله، تتمنى عوض كل بنية انظلمت مثله.

تنهد وگعد يمها عالچرباية..

:- آية صح امي شادة وياچ وصعبة عليچ، بس تحملي لخاطري، ادري امي مرات ماتنحمل بس هي تحبني واكيد تتقبل زواجنا

:- لا والله ماعندي مشكلة وياها، احسبها مثل امي، لأن انه بلا ام، وانتم عائلتي

ابتسمت بوجهه، وهو همين ابتسم، گرص خدها وگام وهي وجهها شعل نار من الأحراج، رفعت ايدها اندعت يطول بعمره ويحفظه.

لحد ماوصل للباب التفت وهو يبتسم الها، طلع وهي گامت بحماس اخذت الملابس مالته تريد تروح تغسلهن.

طلعت وصارت بوجهها عتبار..

:- هاا خير ان شاء الله توزعين ابتسامات، لازم ابني دغدغچ گبل مايطلع

بلعت ريگها..

:- صباح الخير عمة

:- ياخير هو اللي يشوف وجهچ يشوف الخير، وين راح تيجان؟

ارتبكت..

:- هاا گال رايح عنده شغله

:- شغله لو رايح يريد يعقد محكمة من غير ماعرف؟

:- هذا قراره ليش تلوميني عمة والله ما مسوية شي غلط، مظلومة انه

:- ولو مظلومة شعلينا بوصخكم

:- ليش تگولين هالحچي؟!

:- لأنچ ماتستحقين ابني، واحد مهتلف زايد عليچ

لزمتها العبرة..

:- اعتبريني وحدة من بناتچ

:- تاكلين خرا بناتي ترحين فدوة لبناتي

:- ليش عمة حچيچ قاسي

:- اويي ام دميعة كلش تأثرت، اريد اعرف شمسويتله ولازگ بيچ هيچ، ساگيته شي وإلا وين اكو واحد بعقله ورزانته يفكر يخلي وحدة مثلچ على ذمته

سيد أكبر دخل للهول وهو يتلمس الباب..

:- عتباااار ياغضب شبيچ عالبنية من الصباحيات

:- اشتغلوا المحامين، ساگيتهم كلهم

سيد اكبر :- شوكت تتعضين، خلي ابنچ يعيش حياته هو رادها وهاي حياتها

:- هاي البنية جبرتوني اتحملها، تتحملون معاملتي الها، ماتستاهل ابني والله اذا تخلوها فرض ازوجه عليها لو اعرف ابيع كليتي

:- استغفري ربچ ولا تظلمين هاليتيمة، حسبيها مثل بناتچ

:- تخسي مثل بناتي، مستورات معففات معززات مكرمات بيت ابوهن وبزود اخوتهن

:- الله أكبر يامرة اتقي الله دمعة المظلوم تعثر، هي يتيمة وكسر الخواطر مو هين

تركته وراحت وماهتمت لكلامه، آية دموعها ظلت تنزل بقهر، انمرد گلبها مو بس انكسر خاطرها.

سيد أكبر :- بوية آية لا تبچين بغلاتي عندچ بوية، عمتچ مستخفة، مسحيها بوجهي

آية تظاهرت ماتبچي..

:- لا عمي عزيز وغالي، ماصار شي

:- طنشي كلامها وكأنچ ماتسمعينه

دموعها تسابقن وتمسح بيهن وتظاهرت..

:- اي اكيد، اسويلك چاي عمي

:- لا بوية الله يحفظچ ويبارك بيچ بنيتي

رادت تروح جرت خشمها فضحتها، راحت بسرعة حتى لا يسمع شهگاتها عمها، طلعت غسلت ملابسهم بيدها.

خلصت وشرتهن وهي بعدها تبچي، طبت لغرفتها وانهارت اكثر، مو بيدها الصارلها، وعتبار كلما تشوفها تلومه وتستصغرها وكأنها حشرة وماتستاهل ابنها.

اندگ الباب عليها قوي گمزت ومسحت دموعها، صوت عتبار من وره الباب..

:- ماراح اخدمچ وانتِ نايمة بغرفتچ، يلا تعاي طبخي الغدا

گامت تريد تطلع لبست حجابها، تسمع عمها يگلها.

:- مو خدامة الخلفوچ هي، تسوي تبرع منها لا تمنين عليها

:- ليش من خدمتكم انتَ واهلك ماگلت مو خدامة

:- ماجبرتچ على خدمة حطيت ايدي حتى بغسل ملابس وياچ

:- هاي التاخذ عيال تتحمل وتخدم لبيت زوجها مو هي مرته

:- تخدم زوجها وحد مو تخدمچ

:- هسة انتَ ليش كله شاد حيلك ضدي، وادافعلها ليشششش؟ شمسويتلكم

:- نخاف الله بيها وهي صارت بنيتنا، يامرة اتقي الله، گتلچ دمعة اليتيم المظلوم تعثرچ

:- خلصت محاضرة، اروح اشوف شغلي

تنهد وهز راسه، آية راحت وبدت بشغل البيت، حضرت للطبخ، غسلت تمن ونگتعه، گطعت بتيتة، غسلتها.

وعيونها تصب دموع بحجة گص البصل، بعد ما كملت سمعت عتبار صاحتها، طلعت للهول عمها ماكو.

:- نعم عمه

:- جيبي طشت وبي ماي وملح وغسلي رجليَّ

:- ان شاء الله ادللي

راحت نفذت وحطت رجلين عمتها، رادت تروح ماهلتها..

:- تعااي وين مولية، غسلي رجليَّ

تهضمت بس حبست حسرتها ودمعتها، نفس معاملة زوجة ابوها ماتختلف، نفذت بلا كلام، وجهها احمر من كثر البچي، بنفس اللحظة دخل تيجان وشاف هالمنظر.

ظل ساكت ثواني يباوع لأمه ولآية وهو مقهور دوم تتعمد تذلها هيچ ومن يحچي تگله ساحرتك.

تيجان بلع ريگه بقهر..

:- آية بلا امر عليچ اكو حبل وره البيت لونه ازرگ محتاجه، روحي دوري

آية هزت راسها وهي تباوعله، لاحظ وجهها الأحمر عرف باچية واكيد بسبب امه.

بس راحت لزم عصبيته حتى مايصيح بوجه امه ولا تسمع آية..

:- يمه ليش تتصرفين هيچ وياها؟! ترا هي مو خدامة ليش تذلينها بهالطريقة معناها تذليني انه

:- اذلك واذلها همين، تعال انتَ كمل غسل عنها

:- يماااا احطچ على راسي، مو بس اغسل رجليچ، لو ادوسيني بالقندرة امي وتمونين

:- مو انتَ وياها واحد يمه وليدي العزيز

:- انتِ امي يختلف

:- ماتختلف وليدي شبيك هي مريتك مو هذا كلامك

:- ليش تكرهيها؟ ما مجبورة تخدمچ حرام عليچ تذليها هيچ

:- غصبًا عليكم كلكم تخدموني، مادامك اختاريت تبقه وياك هالبت تحمل كل يوم اعاملها هيچ، خدامة وبس تروح فدوة لتراب رجليك

:- يماااا شنووو هي جارية؟!

:- اي شتريد سويها جارية وخدامة، اشبع منها وليدي اخذ اللي تريده عدل، لأنك راح اطلگها غصبًا عليك واذا ماتريد اطلگ اخليك تزوج عليها

:- انتِ امي على عيني وراسي بس ما اسمحلچ تحچين هيچ عنها وعني، آية مرتي وام جهالي هيچ انه مقرر، حياتي وحر مو انتوا تعيشوها

دخلت آية وهي مبهتة ملامحها والعبرة خانگتها..

:- مالگيت حبل ازرگ وره البيت، يمكن الولد ماخذينه...

ماكملت گامت عتبار بغضب لزمتها من شعرها من وره الحجاب وهي تصيح..

:- ساحرتك بت الچلاب

تيجان سحب آية منها بشوية بعصبية..

:- يمه حراااام عليچ، ماريد اصيح بوجهچ

:- بعدددددد ناقص تضربني وليدي هو انتَ صيحت

تنهد وبلع ريگه..

:- يمه شبيچ، لا تخليني آخذها واروح للنجف هناك اعيش

:- وييييين ويييين تروح والله اظل ادعي عليك ليل ونهار واغضب عليك تعوفني وتمشي

:- انه گلت لأبوي راح اروح ادرس حوزة وهو قابل

:- شنووووووو وانه اخر من يعلم

:- چنت راح اگلچ اليوم

:- وهاي تدري وانه لا؟!

:- هاي الها اسم يمه لا تأذيني بيها، ترا انه احبهاااا هي مرتي مررررتييي صارت وعن قريب تصير ام حفيدچ

:- اخذتهاااااا ولك؟!

:- اخذتها ما اخذتها بكيفي، هي مرتي حلالي ونايمة بغرفتي...

ماكمل كلامه دفعته امه وضربته، تظاهرت ان هو يصيح بوجهها وهو چان محترمها طول الوقت وماتجاوز عليها..

آية ظلت ترجف ولازمة حلگها، بدخلة رشاش للبيت وهو يشوف امه تصيح وتضرب تيجان على وجهه.

راح لزم ايدها هنوب حولت على رشاش دفعته بس هو ماتحرك، هم اطول من امهم واضخم.

عتبار بغضب..

:- الله يغضب عليكم انه امكم تتجاوزون عليَّ، ولك مررررة تخليك ترفع صوتك على امك!

تيجان يبلع بريگه بهدوء..

:- حقچ عليَّ ابوس راسچ، اسف يمه اروحلچ فدوة

راد يبوس راسها ماخلته، وخرت ومشت لغرفتها وسدت الباب، ورشاش فارد ايديه..

رشاش :- شصاير صدگ رفعت صوتك على امي؟!

تيجان :- تعرفني هيچ؟

:- لا والله حشاك، شبيها امي؟

:- مثل العادة

:- ويه آية؟

:- اي

:- لا حول ولا قوة إلا بالله

:- انه راح اتركلها البيت قريب، رايح للنجف

:- صدگ تحچي تعوفنه؟!

:- ماعرف والله ماعرف، امي جاي تحاربني ويه آية

:- خويه اخذ مرتك وعيشوا حياتكم امي شكلها ماراح ترضى

:- ورضاها مو مهم؟! شتحچي انتَ رشاش امي هاي

:- چا هسة شسويلك حرت والله انتَ تريد تروح

:- فكرت ارجع اكمل دراسة هو بس سادس اخلصه وادخل كلية

:- اي حلو بعد الدراسة روح ادرس بالنجف

:- والكلية ماتريد فلوس

:- هسة كمل والله كريم تدبر ياخوي، جدي موجود

:- ابتلى بينا هالجد والله خطية

:- تدري لو رجعت هسة شگد راح يفرح ويشجعك هو وابوي

:- گلت لابوي راح ادرس حوزة

:- ادرسها بعدين كمل دراستك هسة

:- وانتَ ارجع، اريد الولد كلهم يرجعون

:- والبيت ياكلون نوى يمعود هسة احنه بيا حال مانلحگ للدراسة، لازم نكبر بيتنا ولازم نشوف ابوي وعيونه

:- هاي الكاسر ظهري، ماعرف شلون راح ادرس واشتغل

:- اذا بس انتَ تگدر بس نرجع كلنا ويظل البيت لا مانگدر

تنهد باوع لآية وهي مخطوفة اللون تسمعلهم، عافتهم وراحت للمطبخ، تكمل طبخ، غسلت ايدها وكملت.

الولد طلعوا راحوا للبستان، بقت بس آية وعتبار بالبيت، حست بيها وراها التفتت الها عيونها ونظرتها تخوف، تنگط شر.

آية جاي تگصص زلاطة توها بادية بالخيار، عتبار اجت بصفها كلش..

:- انطيني السچينة اساعدچ

اية رجفت خوف..

:- ممم ما ما يحتاج

:- انطينيياها اگلچ

تركتها آية وهي تباوع لوجه عتبار وعيونها اللي تخوف، حست بشي بارد اخترق جلدها ولحمها وألم ذبح رأسن سحبت ايدها والدم ينفر بشكل مرعب.........

**

"حروب"

فتحت حلگي..

:- هاااااا وين تدري؟ منو گلك

:- سألت اخوها هَزيل وگال بيت عمي جاين، مشية لاختي وبس هي عدهم ما متزوجة

حطيت ايديه على حلگي بقهر وحيرة..

:- يالله ماعرف شگول وشلون اواسيك ياخوي

:- صوچي صوچي، ما رحتلها من الباب ظليت منتظر وهاي هي راح تروح مني

:- انتظر يمكن هي ماتقبل بيه

:- شنو هي لعب وحچي لسان عمامها هذول حروب، جاين من بغداد لهنا تظنين يدرون ماتقبل ويجون

:- يجوز مايدرون هي ممكن ترفض انتظر شوي

:- ولنفرض رفضت شنو راح يخليها ترفض اهلها همَ وناس واصلة وفايخة، وغير اهلها راح يقنعوها ماظن يفوتون بيت عمها

:- هي اكيد الها رأي مستحيل هيچ اتم بسرعة

:- اتم اني اگلچ اياها، ماعندي امل منو يگول هي تباوعلي وحاطتني ابالها يمكن بس انه؟ ومنو يگول اهلها ينطون شيعة؟ ومنو يگول اهلها ينطون ناس عايشين بالفقر هذا

:- لا تيأس هيچ رشرش حبيبي

:- ما يأست بس يمكن احسن الها تعيش بالعز احسن من الفقر، شتاكل شتشرب؟

عافني ومشه وهو حزين، شكله عاشگها مو بس معجب، والله احتاريت شسوي..

:- رشاش تعال احاچيك

:- مابيَّ بعد احچي عوفيني حروب

:- ترا هي رايدتك...

لزمت حلگي لأن حچيتها بصوت عالي شوي، هو رجع دارلي وعيونه تلمع..

:- شعرفچ؟

:- هي اعترفتلي بنفسها، گالت رشاش عاجبني واخاف اگله ويفهمني غلط

لزمني بلهفة..

:- صدگگگگ بروح ابوچ حروب لا تشاقين؟!

:- والله ما اتشاقة، هاي الاخفيته عنك، خفت تتأمل وماتاخذها

:- وهاي هسة سكوتچ راح يخليها تروح مني

:- هااااا هسة انه السبب؟!

:- لا والله ماقصدي بس غير محرم ياهو يخطب بمحرم، وظروفنا وهالضيم...

:- هدي هدي رشرش حبيبي، گتلك يمكن هي ترفض، لان هي بعظمة لسانها گالتها بس خافت تفهمها غلط

:- يعني شنووو؟

:- يعني تريدك شبيك واكيد هي تحبك مثل ماتحبها، شفتها بعزاء ابا عبدالله وبس تسأل عنك

:- يالله يامحمد ياعلي! وليش افهم غلط والله مافهمها غلط، انه رايدها وهي رايدتني يعني ما مسوين غلط وعلاقة محرمة، نريد ننجمع بالحلال

:- الله يجمعكم يارب اذا مقسومين سويه، ماكو قوة تمنع هالشي

:- يالله بحق محمد وآل محمد، انتظر رفضها اذا ازوجت خديجة غيري والله ما تلوگلي مرة بعد

:- هسة هدي وانتظر

:- شنتظر ولچ گاعد على نار تحرگني والحسين الشهيد

:- سلام الله عليه، هيچ تعحبها؟

:- احبها بس عاااشگهاااا حروب انه عاشگهاااا

عيوني دمعت من كلامه..

:- فدوة ربي يجعلها نصيبك

شرار اجه طلع سامع وبحماس..

:- روووح، رووووح ولك طب بنص الزلم وگول هاي مرتي! محد ياخذها اترسه چيلات وعلي!

رشاش رفع حاجبه..

:- چنك حميت زايد

:- شبيك سويها شراح يصير يعني؟

:- اي شراح يصير بس اخوتها يشخلوني بالرصاص وعبالهم مصاحب بتهم من وراهم

:- ولك بالعكس ينطوها الك هدية حتى يستروها لان راح تصير بحلگ الزلم حچوة

:- انتَ يا اما شايل عقلك او شايل عقلك؟ ماكو خيار ثالث

:- خيار لو طماطة هههههههههههه

:- ومرض هم غبي وهم سفيه، اخليها تصير حچاية بحلگ الزلم علمود آخذها، ازين شاربي احسن

:- بكيفك ماتريد حلولي اللي تعلم مدارس واجيال؟

:- طم روحك احسن على هالنصايح

:- اروح اقدم نصايحي لچثير يحتاجوها، انتَ بطران وماتريدها

:- انچب ولي منا يلااااا! عود ينصح ابو الضروگ

شرار ظل يغني..

:- كيلو بتيتة كيلو طماطة رشرش عاشگ، هلاااااا هللاااااا"هنوب ظل ينعي" يمه يمه يمه يماااااا يبوييييية رشرش يابوي بعدك شبااااب ليش تخربه بالعشگ...

ماكمل رشاش اخذ طابوگة يريد يفلگه وشرار فلت وهو يضحك، ورجع ينعي بشكل يفطس ضحك.

:- آه آه ههههههههههههههه آه يمااااااا ولچ يماااااااا، "نعم صوته" آه آه

رشاش :- وجعاااااااا ومرضاااه! ولي من هنا لا اطبگك هنا اخليك تضرگ مثل الدجاجة

انه متت ضحك على صوت شرار، ركض ورشاش وراه، فطست ضحك اكثر من شرار ينطط عيونه ويگمز وينعم صوته ويصيح.

:- آه آه ولك كافي اهلي سمعوا

رشاش :- بس الزمك اخليك تاكل سرجين

شرار رجع ينعي ويركض ويشرد..

:- يابويه يماااا ولكم يمااااا عاشگ الولهان صار تتن يبوووووو يمااااا ولك بعدك زغييير ولك بعدك شبااااااب!

صوت شرار هد حيلي من الضحك بطني اذتني، ورشاش ماله خلگ وهذا يچفص ابطنه.

رشاش :- ادري فاطس وتنعي على جثتي؟!

:- اي فاطس بالعشگ، ياااا يااابه شوكت اعشگ؟!

:- وجهك مال نعل ليش تخربه بالعشگ

شرار وهو يركض ويضحك..

:- ولكم شوفوا العاشگ اگول صاير يحچي شعر وبعيونه دمعة

رشاش شمر وراه طابوگة..

:- تعال يمي بس دقيقة

شرار :- ههههههههاي دقيقة وياك يعني اطلع جنازة

يوسف اجه..

:- شصاير خايبين شبيكاااام

ضحكت..

:- فضح رشاش ويريد يفلگه، هنوب ظل ينعي بشكل يفطس ضحك

يوس صاح :- رشرش لا تضربه يمكن عباله يونسك هيچ

رشاش :- يونسني لو يريد يفضحني بالمنطقة كلها

شرار :- يمه وچ يمه رشرش تغيررر، صار حتى يسمع اغاني حب ويباوع للگمررر

رشاش: :- اغاني حب بخشمك، هسة اخليك تسمع صفير بذانك سنة كاملة ليگدام

علي الزكي اجه..

:- ها شخيركم

شرار :- تعااال اسمع اخوك عاشگ وصاير يزلغ بروحه هل ايام

علي الزكي ضحك..

:- اهااا كلنا ملاحظينا يمشط هواي ويتعطر هواي، ويروح ذيچ الصفحة هواي

رشاش :- هاااا ولك انتَ الثاني شبيك داخل وياهم؟

علي الزكي :- ههههههه لا بس جاي الاحظ علامات المصاب

شرار :- ايييي ولك ايييي والله مصاب جلل، البارحة ما تعشه شفته گاعد صافن بالحوش

رشاش :- انچب ما تعشيت لأن امي مسوية التمن محروگ وذبتها براس آية المسكينة

شرار :- لا حبيبي لأنك متروس عشگ

يوسف يضحك :- بالله هاي صدگ

رشاش :- انتوا شبيكم متجمعين عليَّ اليوم عوفوني، يلا كلمن لشغله

شرار حط ايده على چتف يوسف..

:- شباب لازم نساعد اخونا المصاب

يوسف :- شلون؟

شرار: :- ناخذه للبستان يغير جو، لو ناخذه يخرب الخطبة

رشاش :- شنو رأيكم اخذكم للمگبرة احسن

علي الزكي :- لا صدگ شگد صارلك تحبها؟

رشاش سكت شوي..

:- من زمان

يوسف :- بعد شوي يگلك من الطفولة

رشاش :- ولكم انچبوا خلصوني، بدال ماتلگولي حل

شرار رجع ينعي بصوت يفطس ضحك..

:- ياااا عينيييي عالزلمة الطايح بشبااااك العشگ، يابويه يابويه يا يابه

رشاش :- والله هسة الزمك اهطرك بالحايط، روحي طالعة وعلي

يوسف :- ولك لاااا العاشگ لازم يكون حنون

رشاش :- يطيح عليك نعل مو حنان، هو انه لازم واحد يحن عليّ

علي الزكي :- اي صح شبيك عصبي الحب يهذب

يوسف :- هسة نصيح لصخلة ام فچوچ تحن عليك وتحضنك

رشاش :- مالي خلگ شقاكم

شرار رجع ينعي..

:- ولك يابويه يااااا رشرش يريد يتزوج ويخليني بحدي ياااااااااااابه، يبووووووو

علي الزكي :- لا هاي قوية هههههههههه

يوسف :- ولكم هذا زعل، وثول امشوا نساعده

علي الزكي :- بشنو نساعده، شبيدنه عليه

يوسف :- نروح نتلثم وننهبها اله

علي الزكي :- لا تظل تخربط

يوسف :- چا شني نسويله

شرار :- ننعيله ونبچيله

:- انتَ عوف البچي والنعي ادعوله

شرار :- مو انطيته حل ماقبل

علي الزكي :- شنو الحل

شرار :- گتله روح طب بنص الزلم وصيح هاي مرتي ام جهالي مالتي، واللي يقرب عليها اترسه چيلات

يوسف :- عايش بالافلام الهندية بعد اخوك

علي الزكي :- مو همه زلم غمان يسون اخوك دمه بطوله

شرار :- يلا راح اندعيله بصلاتي

يوسف :- الله وصلاتك للباب ماتوصل يمكن

علي الزكي :- لا تگله هيچ شبيك

شرار :- انه وربي كيفي بعد

:- ولكم روحوا لرشاش خطية

شرار :- اي بس اوگفي ولچ طاح! طاح! طاح!

دنگت :- هااا شنو الطاح؟

شرار :- طاح خشمچ هههههههه

علي الزكي :- شگد تافه

عافوني وراحوا شرار لحگهم، وانه وياهم، مرت ساعة وساعتين ومشه الوقت صار الليل، خطار بيت ابو سلطان ماراحوا.

ماعرف شلون عبر الليل على رشاش، بس يوم ثاني كل احنه لاحظناه مو تمام وشكله مانايم، الموضوع مو هين صعب عليه.

يوم ثاني العصر يلا راحوا خطار جيرانه چانوا تارسين الشارع سيارات، واليوم عطلة بعد مادرست قررت اروح بيت جدي.

ولأن اكو عمال طلع وياي عقيل يوصلني، ردنا نروح صوب بابهم الرئيسي شفت من بعيد اخو الشيخ مهدي، كله لازگ يم باب بيت جدي.

:- عقيل امشي مناك الصفحة الثانية

:- ليش امشي وغطي وجهچ

:- ماريد تعال مناك

:- يلا امشي

رجعنا ورحنه ذيچ الصفحة، اول مادخلت جدي گاعد بالحوش سلمت..

جدي:- هلااا هلااا بالحربية

:- هلا بيك جدو شلونك

:- شلون دراستچ يابه

:- الحمدلله

:- شدي حيلچ والچ اذبحلچ عجل لو وصلتي للكلية

:- ان شاء الله بوجودك جدو عمري

مرت عمي بس شافتني..

:- الله جابچ حروب تعاي ساعديني

:- ها عمة شنو اساعدچ

:- جاي ادور الغرفة وزنيبة ماترضى تگوم تساعدني

:- ادللي

رحت وياها كسرت ظهري بالاخشاب مالتها كويتي ابيض وثگيل، احس انگطعت نصين، وبتها حاطه رجل على رجل.

رحت ارزلها شني هاي كل مرة يستغلوني نسوان عمامي اكرب الهم، وبعدين مرت عمي اطلع فلوس تنطيني عبالك خدامة اشتغلت الها وانطتني اجر، والله لو يدري ابوي مايقبل.

رجعت فلوسها..

:- عمة ترا ماساعدتچ علمود مقابل

:- ادري بس يفيدنچ مصرف للمدرسة

:- ما محتاجة عمه اخواني ما مقصرين وجدي همين

:- بكيفچ بعد

:- عمة تردين شي راح اروح يم بيبي بالبستان

:- اي حربية فدوة جيبي للجهال حلويات من بسطية عمتچ زهرة

:- لا انه ماروح هناك دزي الجهال

:- ليش ماترحين

:- ماكو بس بيت عمتي كله ولد ماعدهم نسوان استحي

:- مو محد هنا

:- زنيبة تروح

زينب بنت عمي..

:- ولا اروح اي مكان

تأففت هذا استغلال، حتى بعد ماجي بيت جدي من وراهم، اخذت فلوسها رحت بيت عمتي.

طبيت هدوء ومحد اكو، اكو غرفة عدهم دوم ظلمة وبيها البسطية مالت عمتي، طبيت الصندوگ الخشب گبالي بس ماگدر آخذ بكيفي.

ردت اطلع وصار بوجهي رجل عمتي شطوله نخلة، ردت اروح ماخلاني عرض بالباب وين ماتجه يعرضلي، گلبي گام يركض ركض من الخوف.

تاريخهم اسود ومظلم هو ومسلم النگس، لذلك ما اوصل بيت عمتي.

:- ها عمو حروب شلونچ

:- زينة بس وخر اروح

:- وين رايحة بتي خل نشوفچ

خرطت العافية من اجاني رجعت ليورا، ردت اصرخ لزم حلگي وخذاني للظلام، روحي راحت..........

يتبع