رواية عرين الصياد الفصل الثالث عشر 13 بقلم شذرة العدوان

قد صدقت الرؤيا

العرس الدامي

امـــل:زوجة عماد اني احد ابطال هاي القصة

احجيلكم المصيبة عبن محد جان بوعية بذاك اليوم الدامي بس اني

امل: جنت واگفه شايله ابني وعماد حاضن ليال وديالا ويهجد بيهن عبن يبجن على مهره من زفوها

فاتن جانت شايله ابنها الزغير بعده مطالع الأربعين وتخاف لا ادوسه الناس وحجي حسين بصفها شايل ابنه الثاني

وحميد مگرمز على حافة الطرمه يبجي ويدخن

كل گرايب مهره واگفين بالطرمه ومنهم نظال ورافده بنات خوالي

اندحگ عالزفة ونلوح لمهره نودعها وهيه صاده علينه وتلوح بيدها بس ما نشوفها عبن مگبعه

صارو قريب من السيارة ويصير الرمي عليهم

خلال للحظات تبدل صوت الهلاهل بصوت الصريخ

وبدال الجگليت فشگ

كلها دنگت وكل شخص جان همه نفسه بذاك اليوم

الا صائب وماجد والصياد وديالا وعماد وحميد راحو ركض عليهم

وراهم يالله التمتت الناس

فاتن وگعت ولزمها حجي حسين وناده حيدر شالوها وفاتو جوه

اني بالطرمه لازمه ابني ومصدومة لا صرخت ولا رحت اريد افتهم شصار اريد عقلي يستوعب

ليال قرفصت يم الدنگه خايفه تگلي امل شكو

شو گام يصيحون شبيهم كلشي ما اشوف امل الله عليج شكو

معد يبينون من الناس الي تجمعت عليهم اسمع صرخات بأساميهم عماد يصرخ ياااابه محمد مهره دخيلكم يا ناس اهلي راحو

هاجر هدت ابنها وراحت تركض من سمعت اسم محمد

شلت ابنها فرفح من البجي عبالك احد گله انته صرت يتيم

اريد امشي عليهم ما اگدر جسمي تخدر

اسمع الصياد يصرخ مشعل اخوي لا تكسر ضهري دخيل ربك لا تكسر ضهري مو اجيبك عريس واخذك جنازه افتح عيونك حاجيني مشعلللل

وصاح على ربعه هذاك البيييت الرمي من هذاك البيت امشوو

دحگت شفته شايل سلاحه ويركض بتجاة بيت سنان وجماعته يركضون ورا لزمت گلبي

الرمي من بيت سنان عجل هذا اكيد حامد

لا يربي دخيلك لا تفضحنه فوگ مصيبتنا

اصوات الصريخ تهز اركان البيت هز

گامت ليال راحت تمشي عليهم واني انادي بيها ليااال لا تروحين اگفي راحت تمشي بتردد حافيه ولازمه اردانات القميص وادحگ عالناس شلون تملخ بروحها خوات مشعل وامه الدم يكت من وجوهن وشعر ما ظل بروسهن

بثواني صرخت ليااال

وراهه ديالا تصرخ انفعلن يهلسن بشعرهن ويشگگن بملابسهن ويلطمن مثنيات بالگاع

دخيلك يربي جهال ذني وين لگن هالمصيبة

التمت الناس ومعد اشوفهن لحد ما طلع ماجد من نص البشر شايل ديالا من جنب وليال من جنب مفرفحات ويفالتن

اصواتهن تگص الگلب وصاح على نظال ورافده يلزمنهن وعاط بالنسوان كلها تفوت جوه

مرت للحظات دامية مرعبة

النسوان كلها التمت جوه بس اهل مشعل ظلو بره

ليال وديالا كل وحده لازماتها نسوان ثنين ما اعرف منين يجيهن هاذ الحيل يشيلن نفسهن ويرگعنها

ويصرخن

والناس ادحگ عليهن تبجي محد يلومهن

راح ابوهن عامود البيت واختهن الي بألف رجال واخوهن الفقير الي ما سمعهن كلمة

جابو عمتي صبره تخوف الشعر ظال منه شي قليل وشاگه الثوب على طوله وصدرها ووجها صالخته والدم يسفح وراهه جابو هاجر فاقده

طلعت بره شفت الزلم تنقل بالجرحى انصاب جم واحد اصابات خفيفه

وگامو يشيلون بالجثث

قبل شوي جان اسمهم الدرويش ومحمد ومهره ومشعل وبثواني تجرد منهم اساميهم وصارو جثث

صائب لف مهره وشالها ويصرخ عليها مثل النسوان

وماجد ويا جماعة يشيلون بمحمد وعمي

وعماد يملخ بروحه لازمينه اربع زلم وحميد فقد بعد ما يندل بروحه

اما مشعل ااخ يا مشعل

اخذو جرجف من جهازه الي جان بالبدي ونزلو جهاز عرسه وحطو مشعل بمكانه

ماكو انسان يشوف هالمنظر ويظل عاقل

بس الله سبحانه انطاني صبر وقوة استوعب وافهم الي يصير گدامي شي ما يتحملة مخلوق

احلى عرس اشوفه بحياتي تحول مجزرة

الگاع تلطخت بالدم صارت حمره

اجه الصياد وهو يسحل بسنان لزمه وگام يضرب بي كشمه تكشم وصاح على جماعته يطوقون المكان يدورون منهو الي رمه عبن سنان يصيح يگله والله مو اني اجو ملثمين ورهنوني بالسلاح وصعدو رمو عليكم والله اني ما عليه لا اعرفكم والا الي علاقه بيكم

ام سنان وخواته يصيحن گالن تونا جينه من يمه والله جان نايم واحنه حت سلاح ما عدنه

ما رد عليهم الصياد حط سنان بالسياره ودزه ويه جماعته

رجعو الزلم گالو صياد گلبنه البيت گلب ودورنه حوالينه وما لگينه احد

گاللهم بعزم والدم يقطر من ادينه

ومشتعل نار صوته يرعب كل بشر

گاللهم تنبشون المنطقه شبر شبر لا تخلون بيت ولا تخلون جحر اريدهم من جوه الگااااع امشوووو

لا ترجعون اذا مو جايبينهم گبل المغيب اريدهم

ما يندفن مشعل اذا ما ادفن جتاله وجتال حرمته گبله

صعد ويه اخو بالبدي وراحت جنازة مشعل

الي المفروض تروح الزفه مالته

مرت ساعات والصريخ يتزايد ابيتنا

الناس تجي للحظات ترجع ركض تخاف لا يصير علينه رمي انوب وصار الحجي والندس گالو هذول بيت الشيخ علوان ماكو واحد ما يطلبهم ثار شلون ينطونهم مره

وهمه نفسهم من سمعو خطبو مهره كلها حسدتها وتمنت القسمه تجيهم همه مو احنه

النفاق والتناقض يمشي بدم البشر

اركض عالجهال الي صارو كلهم برگبتي جاهد وجوانه وابن هاجر وابني وجهال فاتن

واروح يم عمتي اصرخ ارجع يم فاتن واخذ شوح يم ديالا وليال الصالة صارت عباره عن مجموعات كل مجموعة لازمه وحده من البنوات وماكو وحده تقل خبال عن رفجيتها

جنت قويه وثابته لحد ما گلولي تعاي غسلي مهره

اخذتها وسديت الباب نزعتها البدله وارجف عليها ثابته وادعي لنفسي بثبات العقل لزمت ايدها شفت الحنه واسم مشعل كتبنا الها البارحة

انهارت اعصابي وبديت اصرخ مثل المجنونه واملخ بروحي اگعد بيها مهره خيتي گومي ما تلوگلج النومه يبعد طولي هالطول منهو بعد يفزعلي من عمتي المن اگعد واشكي من هاجر

گومي مهره يبعد خيتج لا تعوفيني وتعوفين خواتج

دخيلك يربي ارحم بحالي ظليت ساعات يمها ويدگون عليه الباب يردون اخلص تا يدفنوهم گبل المغيب

برد المي وما صخيت اسبحها بمي بارد رحت دفيته ورجعت غسلتها

بارده يروحي شلون اغسلج بمي بارد

بدال ما يلفج مشعل بحضنه راح يلفج التراب عمت عيني عليج

ادحگ على جسمها يخبل نعامه مثل الحرير

اصابه بجتفها العضم متنثر واصابه بعينها جانت سبب موتها

كفنتها واخذوهم ومشت الجنازة شالوهم الناس نعش عبن المگبره قريبة

وديالا وليال فلتن من النسوان ولحگن الجنازة ركض يصرخن

كل ما يشگن ثوب البسهن غيره ويشگنه

ياربي ارحم بحالهن وصبرهن ياربي اربط على قلوبهن انت ارحم الراحمين

لليوم الثاني والحال نفسه اصواتهن خفتت حناجرهن معد تعينهن بس الدمع يصب ومن گد اللطم ملامحهن تغيرت واسوء حال هيه فاتن خلصتها بالمستشفى رجلها گال معد اجيبها اذا ماتت فاتن وين انطي وجهي اني وجهالي

صبره خواتها وياهه ما عافنها وعمتي معاضد ما عدها والي لا اخت ولا گرايب

نسوان الجيران مگابلاتها

رافده ونظال ظلن يمي يساعدني يجن من الصبح وما يروحن لليل خلفله عليهن اركض وحدي حت حزن مثل الأوادم ما گدرت احزن ولا گدرت اگعد مثلهم وابجي

ديالا:فتحت عيوني اسمع انين ليال تبجي وهيه نايمه وتهذي يابه حميد كتلني غطيتها ومسحت على شعرها

گمت اسحل بروحي گعدت بالطرمه

الشمس بعدها ما طالعه

والدنيا ماطره الگاع كلها مطينه

قرفصت نفسي ادحگ على مكان الزفه على مكان الحادث مكان الصگعه الي نهدت فوگ روسنا

مر الحادث گدامي مثل كل يوم صورهم واشكالهم مجاي تروح من بالي

شلون خلال ثواني تحول العرس مجزرة

گمت تمشيت وگفت بالمكان حافيه رجليه صارو طين حاضنه نفسي بردانه

ادحگ على مكان ابويه شگد گعدته وما فعل يگعد

مشعل جان عبالك صافن يدحگ عالسماء

انتقلت عيني على مكان مهره

جانت مفتحه عينها اليمنه واجنب راسها متنثر

وشفايفها احسها تريد تحجي والدم نزل على شفتها لوثها اخذت طرف الغتره مال ابويه الي تگبعت بيها ومسحت اثمها واگعدها گومي مهره گومي

مشيت خطوات وهاذ مكان

محمد جان يشاخط بحضن عماد بعدين هدئت انفاسه وظل فاتح عيونه واثمه وارتخه جسمه

يربي خاف اني حلمانه كل يوم اگعد واگول هاذ حلم

مستحيل احد مات احنه جنه بالعرس مال مهره اكيد زفوها ثنيت بالطين ابجي بدون صوت اصرخ ما يطلع صوتي حنجرتي متگطعه اجت امل تركض عليه

حضنتني تاتفوتني جوه

هزيت راسي بـ لا عوفيني واعض بشفتي

احجي بصوت شبه المعدوم گلت اريد اظل هين

ظليت گاعده لحد ما طلعت الشمس

اجه استاذ صائب لاف الشماغ على راسه

سلم عليه وگعد بصفي

ظل ساكت فتره بعدين گال ديالا بنيتي الي صار صار

قدر الله وما شاء فعل كل نفس ذاقة الموت

والحي هو الله كلنه نموت اني اموت وانتي تموتين

ارواحنه مو ملكنه ملك الله هاي امانته ومتى شاء اخذ امانته

صديت علي وصوتي مبحوح والعبره تجرح بلعومي

گتله والنعم بالله بس مو كلهم ياخذهم بنوبه وحده

طبطب على جتفي گال الله يحبهم واخذهم

همه الي رادو هيج

من احب لقاء الله احب الله لقائه

ابوج ومهره ومحمد مؤمنين

وانتي شاهده على هذا الشي

لذلك الله سبحانه حبهم واخذهم

ظل يحجي ويايه ويقرالي ايات من القرأن ويحجيلي قصص الجبر والصبر ومنها قصة نبينا ايوب عليه السلام وحجالي عن نبينا محمد عليه الصلاة والسلام

لما ماتو اولاده ابراهيم وعبد الله والقاسم

هدئت انفاسي حضن راسي وگال اسأل الله يربط على قلوبكم ويصبركم گولي امين

مسحت دموعي گلت امين

طبطب على جتفي گال اليوم السابع مال اهلج صيري قويه وخلي ايمانج يغلب ضعفج

گال يالله گومي گعدي عماد تانجيب الذبايح راح تجيكم وادم عالغده

گمت شفت ليال واگفه لازمه حافة الباب وعيونها ناعسه وملامحها اجتاحها الحزن والكأبه

تخطيتها ومشيت صايره عدوانيه ومعد تتحمل احد

مجاي تتقبل الي صار ويوميه تنهزم عالمگبره

امل:اجت ديالا گالت گعدي عماد استاذ صائب يريده

گلت بگلبي ليش عماد ينام تا اگعده سبع ايام ما ينام الا للحظات واگعد على صوت نحيبه

احاول اواسي يگلي شتواسين امل

فوگ صگعتنا واهلي نصهم ماتو ابويه واخويه واختي

انوب راح تصير روسنه بالطين

هاذ الصياد حاجز سنان ويعذب بي يريده يعترف

شلون اذا سنان گاللهم حامد شلون يا امل

مجاي نحزن مثل الوادم

رحت ناديته گتله صائب يناديك

راحو گعدو بالمطبخ

واجه حميد الي خلال سبع ايام صار شايب نحيل

حميد سأل صائب شسمعتو اخبار

صائب: على حطت ايدك الصياد حاجز سنان وما يهده الا يعترف عبن سنان مغير اقواله شاك بي يعرف شي

وسُعاد تگول الصياد ناشر خبر بين العشاير شكو واحد اله ايد بموت اخو يهجم بيتهم ويخلي بس النسوان

والناس هسع داخله انذار

كلها تعرف سوالفه وشنهو من بشر

حميد: شلون بينه صائب شراح نسوي

اذا عرف حامد النذل اله ايد

روسنه تصير بالطين فوگ مصيبتنه

عماد:قصدك اذا خلانه عايشين عود روسنه تصير بالطين

صائب:استهدو بالله شهل حجي شمدريكم حامد اله ايد بالسالفه

حميد:عجل منهووو صائب منهوو والله ما جزت شاربه هالنذل اني اريد الزمه گبل الصياد واشرب من دمه احسن ما نتمنجد بالعرب

صائب:وين تلگا بلعته الگاع الصياد وما لگا

حميد:وان شاء الله ما يلگا بس گلي امت يجي ماجد مو گال ادبر اجازه واجييي وين صارر

صائب: اهدئ حميد

حميد:شلون اهدئ متگلي ماتو اهلي وما نگدر نحزن عليهم مثل البشر جتلنه القلق مدري بأي ساعه يجفتون علينه ويريدون ثار ابنهم هاذ الصياد متخبل عبن دافن اخو گبل ما ياخذ بثاره گالو اول مره تصير عدهم يندفن واحد گبل ما يخذون ثاره

عماد:اشو اني استبعد حامد من السالفه مرات افكر اگول لو هوه جان اعترف سنان معقوله يتحمل التعذيب علموده مستحيل

حميد:غصب عنه يتحمل غير اذا عترف وهوه ابن عمه اول ما يكتلون سنان شبيك عماد اشو مدري شلون اگللكم والله ما جزت حامد

صائب: راح اگللكم شي بس الحجي بينه ما اريده يطلع اني بس اريد ابرد گلوبكم

حميد:احجي شكو برد گلبي

صائب:سُعاد حاجيه لغازي گايله الجماعة الي رمو جانو مستهدفين الصياد

حميد:شمدريك

صائب:سنان گايل من رمو وحدرو من فوگ واحد يگول للثاني بشرني وگلي صياد مات

وذاك يگله انجان ظل عايش وراه هاذ الرمي عساها گشره وطلعو ركض

اخوها جاين موجود وسامع الحجي

بس الصياد محذرهم محد يجيب طاري الحجي الا يتأكد زين

حميد:خايب اذا طلع الحجي صدگ وحامد مو وياهم وما ننفضح الا اذبح حولي لوجه الله گام يبجي گال والله يا صائب الليل ما انامه افكر شلون راح تصير سمعتنه خواتنه شراح يصير بيهن اسامحهم والله واخليها جوه الفراش وحت ثار ما اريد بس ما ننفضح وتصير سمعتنه بالطين

صائب:گافي لا تبجي تفرج ان شاء الله

يالله گومو اليوم السابع راح يجون الدراويش

امل: صعبة من واحد يموتون اهله وما يگدر يحزن عليهم براحته يظل خايف وقلق ويفكر

خايف من الفضحيه وحجي الناس شلون اذا اهل مشعل عرفو حامد يعشگ مهره وهو كتلهم والله يفلشون البيت على روسنه عبن ما حجينه وغصبنه مهره تاخذ ابنهم

حميد وعماد من القلق اكل ما ياكلون خلصوها جگاير وجاي واحد صاير جنه العوده حالتهم تقهر

صافنه بحالتهم ودموعي تصب ما حسينه الا جفت علينه ابن الجيران گال الحگو ليال بالمگبره

وشايله كرك وتحفر بالگبور

حميد رگع اسكان الجاي بالگاع گال وتالي ويه هااااي البنيه وتالي طلع ركض ولحگو صائب وعماد واني وراهم

وصلنه مسافه صائب شد حيله ويحاول يسبق حميد قبل لا يلزم ليال ادحگ عليها من بعيد لازمه الكرك وتحفر

وصل صائب عليها قبل واخذ الكرك منها وخلاها وره ضهره يحميها من حميد

لزمت گلبي اخ يا ليال استوعبي وتقبلي ابوج معد يرجع راح الي جان مدللج راح اوف يمه شلون تقهر تحفر بگبر ابوها تريد اطلعه

عماد لازم حميد ويگله عوفها لا تخوفها اكثر عوفها

وصلت عليهم گوه اتنفس من الركض

رحت يمها حضنت راسها وحميد يصيح

عليها تگله هسع يطلع ابويه ويكتلك بالعگال

حميد ثنه بالگاع ويصيح هو وعماد يگللها ما يطلع يا ليال مات ابويه مات

فلتت مني وراحت تحفر الكبر بأديها

تگول طلعو ابويه راح يختنگ طلعو صارله سبع ايام دافنينه بالتراب شلون يتنفس شلون

لزمها صائب جتف اديها ويهجد بيها وعماد اخذ الكرك يرجع بالتراب الي حفرته ليال والدمع تصب

وحميد مدد بالگاع يصرخ

تفالت مني وتصيح تگول راح يختنگ ابويه طلعو

ومهره طلعوها هيه مو عروس شلون تدفنونها

وخرو عني هدونيبي

انفعلت گامت تغلط واسب وتكفر استغفر الله

اجه صائب وضربها راشدي وجان ادوخ شالها عماد ويبجي وحميد ورانه يسحل بروحه

وصلنه البيت وجان تصحه وفزت انوب تريد ترجع

جيت عليها حميد متعصب يريد يضربها

تلگته هيه وحضنته تگله امشي حميد نطلع ابويه

امشي خاف يختنگ شلون يتنفس هسع

حضنها وگام يبجي بعلو صوته

گال ليااال راح ابويه راح معد يرجع مات يا لياال مات

زمها من وجها يگللها مااات كلهم ماتو معد يرجعون كلهم ماتو ومحد بيهم راضي عني ماتت مهره وهيه زعلانه مني مات ابويه وخاطره مني ثگيل محد راضي عني يا ليااال كافي بنيتي كافي حضنها قوي ويصرخ

وهاي ما صدگته ظلت مصره

وتسحب حميد تگله امشي نطلعم ونجيبهم

كلها گامت تبجي صائب گعد بالگاع ويگهد

اخذها حميد عالحجره نومها بسد ديالا

وظل يمسح على شعرها لحد ما نامت

گالي امل عوفي شغلج راقبيها عسما نموت من الجوع ويجيف البيت يور عوفي كلشي عينج من ليال وبس

امل: تخوف حالة ليال صرنا نتمناها تبجي تلطم تصرخ احسن من وضعها هاذ حت جوانه الطفله احسن منها تگول مات ابويه وراح يم النجوم

وديالا صحيح حزينة وحالتها صعبة بس احسن من ليال على اقل تحجي ويانه وتاكل مرات

اجن رافده ونظال ساعدوني بالغده وبدينه نبلش بالعشه

رافده: عجل فاتن ما تجي

امل: والله ما اعرف حجي حسين يخاف عليها والزلمه حقه

رافده: علوا ما تجي هيه مريضه سكر تروح تموت لا سامح الله وتزيدها علينه

نظال: تدرن يبنات اني مجاي استوعب موت مهره

الله اكبر مو قبل ايام جنت احفلها واطرزلها الحنه

شلون دنيه غبره خلت مهره جوه التراب

امل: ثنينه على ركبنه بالگاع ثلاثتنه وگمنه نبجي ونعي لحد ما عاط بينه صائب

رافده: والله صار سبع ايام احلم بيها

لابسه بدلة العرس وتبجي

امل: زفوها بدمعتها ودفنوها بحسرتها حسبي الله ونعم الوكيل

ديالا: بعد مرور 14 يوم جان ماجد مگابل ليال يحاول يخليها تحجي شي تستوعب ما خله شي ما جابه الها

صافنه بس ادحگ علينه وتگول ابويه ومهره دفنوهم وهمه عايشين

وتخلي حميد وماجد يشيلون روحهم يرگعوها

حميد يگول تخبلت البنيه اني شسوي هسع وين انطي وجهي منين اتلگاها

ماجد يگله كافي انلصم هاي بس مصدومه

حجزت يم دكتور باجر نوديها

وليال تقاطعهم تگول اني شفتهممم دفنو ابويه وهوه عايش اني شفتهممم

خلت الكل يبجي دموعنه مجاي تنشف بسبب ليال مجاي تخلي احد ينسه

تگعد بالليل تفز ادور لمهره

ومن الصبح تروح ادگ باب حجرة ابويه تنادي

صيح عليها حميد وراحت تركض عالمزرعة تگله هسع اجيب ابويه يكتلك بالعگال

گعد حميد بالگاع وگام يبجي

يگللها ليال لا تحجيله ما اكتلج والله

وهاي حالتها صار 14 يوم حيرت الكل

گاعدين يمها وصافنين اجه جاهد گال عمو الجبير بره يناديكم

طلع عماد گال اشوف منو

لحگته ادحگ من الشباك اشوف منو عمو الجبير

طلع الصياد واگف يم السيارة يدخن هاذ شصاير الله يساعده هموم الدنيا كلها تبين بوجهه

التفايت عالشباك الثاني اتصنت خايفة عرفو بحامد

سلم وگال شلونك عماد يابه العذر من الله ومنك

التهيت بأخوي وجتاله وما وگفت وياكم وانتو مصيبتكم اكبر من مصيبتي

گاله عماد ولا يهمك معذور

هاي صارت بعد واحنه بالحال واحد

صياد: اطلقت سراح سنان وجبته البيته

عماد جاوب بغصة گاله عرفت شي منه

الصياد هز راسه بقبول گال عرفت عرفت

دحگ على عماد وگاله جتال اهلك واخوي جان مستهدفني

هاي اني جدامك اخذ بثار اهلك وشتريد تسوي سوي

گرب منه عماد وگال احنه مصيبتنه وحده لا اكتلك ولا تكتلني والي صار صار وهاذ قدر الله

گاله صياد قدر الله والنعم بالله بس الثار الثار

الي ما ياخذ بثاره عار احنه بينه رس البدو والله

اذا ما حضيت بيهم بعمري هاذ عندي ولد يسدون عين الشمس جيل وره جيل لظل واراهم الا اخلي تاليهم مره تنذكر بالتاريخ وهاذ وعد مني دم اخوي وحرمته واهلك ما يظل بالگاع

تحاضن هوه وعماد ودمعت عيونهم

لزم كتوف عماد گال اعتذرلي من ام سنان اني حبيت راسها واهجس خاطرها ثجيل عليه حگها الحرمه تزعل ابنها ماله ذنب واني هم حگي لحد يلومني مثل الغريج ويهبش بالمي

جاوبه عماد معذور يخوي على اقل انته حققت ولزمت طرف خيط بس هاي احنه گدامك كلشي ما سوينه

طبطب على جتف عماد وگاله تهون سلم وراح

رجع عماد

حميد گاله ها منو هاذ

عماد: هاذ الصياد

حميد: شيريد خوما عرف شي سنان عترف على حامد مو

عماد: شبيك حميد انته اذا ظليت هيج راح تفضحنه

ماجد:هو حميد راد يطلع وراك وما خليته جان كتهن للصياد كلهن

حميد: كافي عاد انتو ما هامكم شي الضيم عبالك بس عليه

عماد: شلون ما هامنه بس احنه ما منفعلين بگدك الله سبحانه موجود وساترنه بس الزم السانك بيدك

على كلاً الصياد اجه سلم نفسه يگول اخذ ثارك مني عبن الجتال جان مستهدفه واطلق سراح سنان وجابه لهله

حميد: يعني مو حامد

عماد: لا مو حامد

حميد: الحمد لله والشكر يربي هاي بعد انام واني مرتاح والله يكون بعونه

ماجد: انتو كل عقلكم وثار اهلكم

عماد: منين ناخذ الثار واحنه ما نعرفهم منهمه

ماجد: والصياد مو تعرفونه اخذو ثاركم منه

عماد: صياد شعلي يمعود قابل يعلم الغيب

هاذ القدر ما منه مهرب والصياد گال الاحگهم من جيل لجيل الا اعرفه منو

ماجد: بس فهمني شلون تخلي واحد غريب ياخذ بثار اهلك

عماد: ماجد الضاهر مجاي تشوف اني وحميد ظلينه بطرگ نفسنه لا عمام ولا اهل ولا صخام اذا رحنه ندور ثارات خواتنه منو الهن عن نفسي اتركها لرب العباد الي ما يضيع حگ عباده

وحميد اذا يريد يدور ثاراث خله يروح اني صارو برگبتي خوات ثنين عزبات وارملة اخويه وامهاتي ثنين وعندي عائلتي واخواني بعدهم جهال زغار الي يجي يضربني اگله اخذ انوب

ماجد: حميد وانته شتگول حميييد وانته هاذ مبسع ما نام انوب فاتح اثمه شنهي دگمه

امل:فاتن ما اجت غير مره وحده بيوم السابع بالليل وما خلاها حجي حسين بساع اخذها جانت شاحبه

تعبانه نفسياً جسدياً حت حيل مابيها تصيح اديها منتهيات من الأبر والجروح الي بيها مجاي اطيب

عماد گال لحجي حسين بعد لا تجيب فاتن خلها ترتاح جيتها علينه تزيد وجعها

ثاني يوم اجه ماجد الضهر گال يالله ناخذ ليال عالدكتور گوه اخذناها تفالت ما تفعل تروح

شالها شيل اخذناها اني ويا وعماد

ساكته الطريق كله وادحگ على مكان واحد

وصلنه الدكتور طبينه اول ما شافته گامت تصيح گالت ماريد ابره ما اريد بلاعيمي ما يوجعني ما اريد حضنها عماد گال ما انطيج علاج ولا ابره بس اگعدي گوه هجدها

شرحنه للدكتور وضعها

تأثر جثير گال والله هاي مو اختصاصي

اختصاص حالة نفسيه او اكو بيهم يكونون ممسوسين لازم يودوهم على شيخ يرقيهم

كل الي اگدر اگوه هاي حالة صدمه عبن عندي گرايبي نفس وضعها بسبب موت ابنه گدامه

طلع مصدوم وعقله مجاي يستوعب ويصدگ

حتى ان حالته تأزمت وصابه وسواس قهري

ويحجي وهو نايم

وهاي البنت مبينه مصدومة

هو اني حجيتولي وتخيلت المشهد ارتعبت كيف هيه الي صار كلشي گدامها

عماد: وشنسوي بهيج حاله دكتور تعبت گمت انومها يمي اخاف تغافلنه وتنهزم احنه منطقتنه ريفيه

لو يطلعلها ذيب لو جلب لو يتعرضلها احد شسوي

امل: جاوب الدكتور والله يا ابني الله يكون بعونك

لو بيدي شي واگدر اساعدك والله ما اقصر بس ما باليد حيله لو اطراب وحالة نفسية بسبب القالون

اگدر اساعدك بس هاي صدمة بسبب حادث

لا اگدر انطيها علاج ولا اسويلها شي

اعتذر منك ونصيحة اي علاج للحالات النفسية لا تنطوها خطية بعدها طفلة

طلعنه من يم الدكتور بخيبة امل

ماجد: هاذ الدكتور لحاله يسولف امشو اكو دكتور انوب

امل: رحنه وعسانه ما رحنه حطمنه تحطم گال ليال مخبلة ولازمها علاج وصعب علينه الحالة

تكاون هوه وماجد گاله محد مخبل غيرك

كسر العياده عليهم انوب من عرفو ماجد ضابط بعثي عوزهم بس يبوسون رجله

طلعنه وهو يفح من العصبية تخوصر وگال اكو دكتور اخر امشو رحنه وجان ينطينه انواع العلاجات

علاكتين ترسناهن ماجد گال للصيدلاني يعني هاذ ينفعها عود

الصيدلاني گاله اي اخي هاذ زين للألتهابات

ولفقر الدم

ماجد: التهابات شنو بابه هاي حالتها غير

امل: ماجد شرحله الحاله

گال الصيدلاني هاذ العلاج ما ينفعها

ماجد بساع اخذ العلاج ورجع عالدكتور وتكاون ويا

ديالا: اخذو ليال وراحو

رحت اشوف امي تعبانه مابيها حيل تسأل شكو موت ابويه دمرها امي ما عدها اهل ابويه جان كل اهلها سندها وحيلها

لازمه عده بحجرتها وما تطلع گدام استاذ صائب

وماجد حاطه القرأن وتقرا ودموعها تصب

رحت اتمشا بره تعبانه حيلي مهدود

اجاني صوت همس صديت شفته سنان واگف اباب السياج الي مقابيلهم اتلفت هين وهناك اخاف احد يشوفني رحتله

اول ما شفته بهتت ماكو سنان ظال بس الأسم وجه مفلش تفلش خشمه مكسور جسمه متحطم

عيونه مورمه عباره عن لوحة ملونه بنفسجي وازرگ استخطيته منظره يرعب

حجه بصوت مخنوگ وتسبقه عبرة دمعن عيونه

مدنگ راسه گتله شلونك سنان الحمد لله على سلامتك

رفع راسه گال اي سلامه هز راسه بعدم قبول

گال منين تجي السلامة گليلي ضرب كف ايده عالحايط

سنان: ديالا ديري بالج تحجين هاذ الحجي لأحد ديري بالج

ديالا: اي حجي سنان

مسح دموعه ويدحگ يتفقد المكان

گال تعاي هناك احجيلج رحنه بمكان

معزول محد يجي بي

گعد على بلوكه ورجع ضهره عالحايط

گال ماتت مهره مات ابوج ومحمد واخو الصياد

كله بسبب حامد النذل الله لا يوفقه جان رحت بيها يا ديالا بيني وبين الموت شعره

فتحت عيوني لزمت گلبي

گتله لا سنان الصياد گال استهدفوني اني

اختنگ وگام يگهد بعبره گال اني الي حجيتله هيج اني يا ديالا

كسرني تكسر حطمني هاذ مو بشر ولا ينحسب عالبشر ماكو بگلبه ذرة رحمه

عذبني انواع العذاب

اني حجيتله نص الحقيقه ردت اخلص نفسي

گتله حدرو من فوگ يركضون واحد يگول للثاني بشرني وگلي صياد مات وخلصنه منه

وذاك يگله انجان ظل عايش وراه هاذ الرمي عساها گشره وطلعو ركض هاي الحقيقه الوحيده الي حجيتها اله

بس ما حجيتله حامد جان وياهم

وجان هدفه مشعل اخو الصياد

حامد راد بأي طريقه يخرب العرس

طبو عليه اني جنت نايم رهنوني بالسلاح صعدو ثنين فوگ

واحد ظل جوه ويا حامد

والله يا ديالا صيحت وقاومت ما گدرت على شي

حدرو من فوگ گالو لحامد جتلنه مشعل والصياد يالله ننهزم

خلال ثواني ختفو

حامد گدر يخفيهم هوه يعرف كل جحر بالديرة

ديالا: استمعله وابجي گتله ليش ما عترفت على حامد ليش عبن هوه ابن عمك ليش ما حجيتله

رجع راسه على حافة الباب غمض عيونه

گال ويكتلون اخوانج وياخذوجن فصليات

حط عيونه بعيوني گالها بكل صراحه

ااخ يا ديالا ما تدرين هذول شنهي من بشر

يتبع…