رواية غرباء ( لقاء بعد الموت ) الفصل الثالث عشر 13 بقلم اساورالموسوي

بعصبية لزمت ضفيرتي الطويلة كلها بيدي، دموعي گامت تنزل واني ارفع المگص.

:- اخذ مني حياتي كلها، حابسني مثل الحيوان، وحبه المريض دمر نفسيتي، إلا احرگ گلبك

وبدون تفكير بديت اگص بيها، خصلة خصلة بعصبية، صوت المگص خنگني، ظليت ابچي بصوت.

ماخلصت الضفيرة كلش ثخينة والمگص صغير، استمريت بعد لا تراجع راحت نصها، گمت اگص اكثر بسرعة وبعناد وقهر.

لحد ما شعري الطويل اللي يوصل جوه خصري اختفى كله، لزمتها بيدي، ابچي بصوت، واصيح.

:- الله يحرررررگ گلبككككك مثل ماحرررررگتني!

طاحت مني بالارض گعدت گبالها، اباوعلها تعب امي واهتمامها بشعري كله راح، بلحظة غضب، ماعرف شسوي.

بعد نص ساعة الباب انفتح هشام دخل اول ما شافني جمد، المگص گبالي والضفيرة، ظل ثواني ما مستوعب شكله....

وجهه فقد لونه بنفس اللحظة بهتت ملامحه وصاح..

:- لااااا صقيييييل شسويتي؟!

اجه بسرعة ركع عالارض لم الضفيرة المرتبة بين ايديه وكأنها شخص عزيز ميت اله.

:- ليش ليششش ولچ؟!

الخوف اخذني، اول مرة اشوف هشام هيچ مكسور وعصبي بهالطريقة.

:- هذا شعررررررچ! شلون گدرررررررتي؟!

صرخت بوجهه واني ابچي..

:- حتى اقهررررك! مثل ما قهرتني!

گام فجأة قرب عليَّ بعصبية خلتني انتفض..

:- انتِ ماتعرفين شنو سويتي بيَّ هسة!

:- وانتَ ما تعرف شنو سويت بحياتي

مد ايده بعصبية والكف نزل على وجهي طرش اذني، وجهي حسيته شعل نار، حتى بچي مالتي وگف.

ايدي على خدي ما مستوعبة، بعدني مالحگت استوعب، جراني اله بعنف، فقد السيطرة بالكامل، واني بمكاني بالارض بديت اقاومه وادفعه.

:- لااااا هشاااااام لااااا عوفني!

:- كاااااااافي تعاندين!

:- اكرهككككككك!

كل الغرفة صارت فوضى وصريخ، هو مصر واني اقاوم، يريد ياخذني غصب، عبالك جاي يشتعل وينطفي، عبالك داخلين حرب.

بين صرخاتي وتمزيقه لملابسي، فجأة وگف وتركني، لزم راسه گعد عالارض يلهث ويمسح على وجهه.

گمت شردت للحمام ملاذي الوحيد، قفلته واني ارجف واسناني تصك وحدة فوگ الآخ، رجليه ماشايلتني.

فجأة سمعت صوت الباب ينقفل، بقيت ابچي بالحمام بخوف، ماله صوت اكيد طلع، راح اتخبل اني.

الا تخبلت من صدگ، ياعاقلة تگص شعرها بهالطول علمود تقهر زوجها الخاين.

مر الوقت اخاف اطلع، تشجعت وطلعت، بعد ساعات واني قلقلة من غيابه، خايفة يجيني غضبان ويطلعها بيَّ.

عيني طاحت على صينية الأكل،.بيها سچين لثواني فكرت اذا اجرح نفسي اخوفه بيها راح يخليني ويفتح هالسجن؟

لزمت السچين ايدي ترجف، شمرتها بسرعة..

:- شجاي اسوي بحياتي، ياربي ساعدني اختنگت اريد امييي

بعد فترة طويلة كلش بحيث هسة نص الليل، انفتح الباب، رفعت راسي بسرعة من المخده دخل بس مو نفسه هشام.

شعل الاضوية، عيونه حُمر ذبلانة خطواته ثگيلة غريبة، ماحچه حرف، تقدم ناحيتي.

گمت اريد اشرد للحمام لزمني بقوة، حتى اصابعه غرزت بلحمي..

:- هشام شبييييك؟!

ماجاوبني شمرني عالسرير، شكله غريب كلش وتصرفه كأنه مو بوعيه؟ گلبي ظل يدگ بعنف.

:- هشاااام شبيييييك؟ لا تقررررب!

كأنه ماسمعني شكله مو بوعيه بالكامل مطفي من الداخل، صرخت وقاومت، بس هالمرة هذاك الهادئ ما موجود ويرجع يسيطر على نفسه.

الغرفة كلها انترست بصوتي واني احاول ابعده وادفعه، وهو بحالة ضياع وانهيار مرعبة، يمكن يحاول يثبت لنفسه بأي طريقة اني اله.

محد ساعدني ولا نقذني منه، صرت مثل الطير المذبوح بيده، افرفر واصرخ مايسمعني ولا هماه.......

**

تيجان تنحنح..

:- لازم نگوم نصلي ركعتين قربة لله تعالى، حتى الله يبارك هالزواج ويتبارك بيتنه...

سكت فجأة وهي تعصر بأصابعها بتوتر، عينها بالگاع، التوتر ماكلها اكل، ماتعرف شلون تگله هالشي.

همست بصوت خافت كلش..

:- انه... انه... ماعرف اصلي

بالبداية ظن سمع غلط..

:- شنو؟

بلعت ريگها بخجل..

:- ماعرف اصلي

ظل يباوعلها ماستوعب الحچي، انصدم..

:- معقولة لهالعمر ماتعرفين الصلاة؟

هزت راسها بخجل وهي حاسة روحها تريد تبچي..

:- مو... لأن... محد علمني

نزل عيونه بسرعة حتى لا يحسسها بالاحراج، حك رگبته بتوتر..

:- لا لا عادي، مو مشكلة، كلها تنحل، بسيطة

هزت راسها خفيف بخجل وهي بعدها مرتبكة وتملخ باصابعها.

تنحنح..

:- روحي توضي وانه اعلمچ الصلاة خطوة بخطوة

گامت بسرعة من مكانها، بس اول ما وگفت ظلت حايرة تباوع يمين ويسار ماتعرف وين تروح أصلًا، خاص ان ماكو حمام بالغرفة.

تيجان انتبهلها..

:- يابه شبيچ؟

حاولت تحچي، همست بس ما ترفع عينها عليه..

:- انه... ما اگدر اصلي هسة

بالبداية ما فهم، وبعدين اجته لحظة استيعاب بسرعة، ارتبك مثلها..

:- هااا اي اي خوش تمام، تمام

من الاحراج دارت وجهها عنه، هو حتى مايخليها تخجل گلها.

:- عادي عادي لا تتوترين

بس هو حس زاد الاحراج عليها، شاف نفسه مرتبك مايعرف يتعامل ويه البنات، بس حاس نفسه لازم يطمنها بأي طريقة حتى يروح خوفها.

ظل واگف مكانه، صافن بالأرض، مرة يباوع للچرباية ومرة للدوشگ، حتى ايده مايعرف وين يحطها او وين يگعد.

كلشي بالغرفة هادئ بشكل يخلي الواحد بتوتر، صوت الهلاهل البعيد من بره يزيد شعوره بالثگل والحيرة.

جر نفس حتى يثبت نفسه، گعد عالچرباية، بعيد عنها بمسافة يحترم مساحتها، ظل ساكت شوي يحاول يرتب الحچي براسه بدون ما يجرحها او يحرجها.

:- آية تعاي گعدي احاچيچ شوي

باوعتله وهي خايفة ماگعدت..

:- تفضل گول

سحب نفس..

:- سمعيني زين واريدچ تفهمين حچي، انه يمكن ماعرف شلون احچي بهيچ مواقف، بس لازم اگلچ شغلة حتى ترتاحين وتأمنين

بلعت ريگها وبصعوبة طلعت الكلمة..

:- گول

:- اول شي لا تخافين مني، لا الليلة ولا غير ليلة، ما راح اضغط عليچ على شي، ولا اجبرچ على حق اليّ، اذا انتِ ما مرتاحة او خايفة، لأن الزواج مو غصب

ظلت تجر النفس بصعوبة، انتبه شگد كلامه أثر بيها، فصار ينتقي حچيه بحذر.

:- آية اعرف صعب على البنية اسرارها وحياتها يعرفها رجال غريب، وصعب تدخل بيت جديد وهي ما مطمنة، بس انه من دگيت الصدر الچ ما چنت لاعب ولا ناوي اظلمچ

ومن قررت هالقرار ولا يوم فكرت اتخلى عنچ او استغل ظروفچ، ولا اخذت هالقرار مجاملة لأحد، انه اخذته برضاي ولوجه الله، وگلت هاي امانة صارت برگبتي

ظلت ساكتة بس رجفة ايديها خفت شوي شوي.

:- ان شاء الله ما اخيب ظنچ، ولا اقصر وياچ، والبيت هذا بيتچ قبل ما يكون بيتي

سكت شوي بعدها ابتسم بخفة حتى يلطف الجو..

:- بس بالمقابل، اريد منچ شغلتين، احترام وثقة

رفعت عيونها اله وتحس نبضاتها اختلت كلها، تذكرت ان تيجان چان اول نبضة حب الها بحياتها، وبسبب تعاسة حياتها نست هالنبضات.

كمل كلامه..

:- يعني اي شي يخصچ نحچي بيّ سويه، وتاخذين برأيي، وما اطلعين من البيت بلا ما اعرف، مو لأن اريد اضيگ عليچ وافرض رجولتي، لا والله بس هاي مسؤوليتي وحق عليَّ اخاف عليچ

اشر على عيونه اليمين واليسار..

:- وانه احطچ بهالعين واغطيچ بهالعين

الحچي نزل برد على گلبها، وشگد ماتوصف تعجز عن وصف هالأنسان، تحس تعويض الله الها.

ابتسمت بخجل وتوتر..

:- شكرًا لموقفك وياي... يمكن محد راح يسويه بيوم ولا سواه احد قبلك

:- الشكر لله، وبعد آية احترام اهلي، ماريدچ تصيرين خادمة الهم لا والله حاشاچ مو خدامة، بس اريدچ تحترمين اهلي، وتحترمين سترچ بوجودي وعدمه لأن هالشي الچ مو الي

هزت راسها باي وهي تگطع ايديها، لاحظ هالشي، يحس ايتخطاها اكثر من اي شي، واگفة گباله بنية مبينة بريئة وعلى نياتها ومظلومة.

:- آية

:- نعم

:- اريد اگلچ شي بس لا تظنين انه مان عليچ

بلعت ريگها بخوف وصوتها بالكاد ينسمع..

:- شنو گول

:- لا تخليني اندم باختياري الچ، ماريد منچ لا غسل ملابس ولا غسل اماعين ولا طبخ ونفخ، ولا تلبسين احلى الملابس، اريد مرة تصون بيتي وتصون نفسها وتعففها عن الحرام، سترچ، صلاتچ، دينچ، وت.....

سكت وهو يبلع ريگه يحس ديغلط بالكلام بس مايعرف شلون.

رجفت شفتها بقهر..

:- انتَ تعرف سري، انه والله ماعندي شي ماسويت شي غلط

:- اعرف والله اعرف واضح انچ على نياتچ وبريئة، حسبي الله ونعم الوكيل على كل ظالم

ظلت دموعها تنزل وهو انتفض..

:- لا لا آية لا تبچين، ماقصدي اجرحچ، يلا خلي نسد السالفة، شنو رأيچ اعلمچ صلاة...

سكت وتذكر هي بعذر، حك راسه بتوتر، مايعرف يتصرف بهالليلة، شلون؟

:- مو انه الاختاريت ابقه بلا صلاة، والله محد علمني

همس..

شكلي راح اجيب العيد بهالليلة وماراح اوفقها، ولا اطمنها

:- تحچي وياي؟

:- لا يابه بس جيت اگول، ترا مو عيب مانعرف ولا انتِ مسؤلة عن تعليم نفسچ، هذا واجب الاهل وانه اعلمچ كلشي لا تظلين محتارة، اذا تستحين مني حروب موجودة

:- هي حروب علمتني شوي الصلاة

:- حلوو، حربية اطيب گلب بالدنيا، چانت خايفة عليچ يمكن حتى اكثر من اهلچ، قصدي هي تعزچ كثير

:- اي اصلًا لو ماهي...

سكتت ماكملت، ظلت تباوع بحيرة، هو فهم لازم تاخذ راحتها اكيد تعبانة تريد تنام.

:- تردين شي محتاجة شي؟

:- لا بس اريد ابدل

:- هااا اييي، راح ادير وجهي واخذي راحتچ"راد يدور باوعلها تملخ باصابعها حيل" شبيچ؟

:- فدوة مو ادور انه... استح...

گاطعها..

:- يابه والله وشرفي ما اباوع، وشرف خواتي انه مو مراهق، حتى لو ماشايف مو ملهوگ...

سكت حس زاد الاحراج، دار وجهه بسرعة، وهي بسرعة راحت للكنتور اطلعلها ملابس.

وكل لحظة تباوعله خاف يدور، عبالك حس بيها جفلها صوته وهو يضحك بخفة..

:- مو تونا گلنا شوية ثقة

:- ياااء ماقصدي، بس خايفة ادور عبالك خلصت

:- يابه مادور لمن تنطين الامان، اذا ماتأمنين اطلع

:- لا راح ابدل هسة

انتظرها تعب وينتظر، يسمع صوت الفستان، خلعته وبدلت بسرعة لبست دشداشة بيت، حست هم وانزاح البدلة ثگيلة.

آية بخجل..

:- اممم تگدر تتحرك... وادور...

دار وجهه وهو يباوعلها شوي وينزل عينه، هنوب حيرة الفراش، عبالك عرف شتفكر.

:- تگدرين تنامين بطرف الچرباية ماقرب عليچ ابدًا، اذا تخافين وماتأمنين انام بالگاع

بسرعة حچت بلا تفكير..

:- لا لا تگدر تنام يمي...

سكتت وجهها شعل نار، من الفشلة رفعت فراش الچرباية وتغطت انطته ظهرها، حتى بدون ماتفتح تسريحة.

هو نزع السترة بس، همين حاير يخلع ملابسه لو شنو، ويگول اشتعل بختك تيجان على هالموقف، هسة انه ليلي محتار بمخدتيالليل محتار ببنية بصفي.

گام على كيف حتى لا يخوفها، طلع اله تشيرت وبجامة عريضة ونازلة بالوسط، ماشافها عدل بس يريد يبدل بسرعة حتى ماتخجل.

(مثل بنطرون زلم باب الحارة)

لبسها وظل يدگ على راسه شكله يضحك بيها، لو اخوانه گاعدين يمه يسونه مضحكة.

:- هاي منين طلعت بجامة عمي سامح دخيلك ربي، مدري بجامة بيبيتي

آية رفعت راسها..

:- تحچي وياي

جفل وانصرع من صوتها، گام يمشي وهو لازگ رجلينه حتى لا تشوفها، بس يريد هالليلة تخلص.

جابله بطانية وراح للسرير، تغطه حاول ينام تگلب يمين يسار ما متعود ينام على اضوية المنام، يتحرك بس على كيف، يخاف يحسسها بشي ويخوفها.

هي همين طلعت مانايمة وتحوس وتحك بشعرها كل شوي، دارت على جهته بعد ساعات من الملل بذيچ الجهة عبالها نايم..

بس من دارت گمزها صوته..

:- شني خايبة بيچ گمل تحكين فروة راسچ تملخت

استحت حتى اختنگت..

:- لا والله مابيَّ گمل التسريحة شلعت گلبي

ضحك :- شوف الفطيرة هم تحلف، اتشاقه الطف الجو

:- عبالي نمت ودرت وجهي

:- واذا درتي راح آكلچ؟

:- هااا لا شنوو ماقصدي بس...

:- بس شنو؟

:- االتسريحة ضوجتني

:- چا ليش نايمة بيها؟

:- ماعرف افتحها بحدي

:- اهااا اساعدچ؟

:- لا لا انه افتحها هسة

راحت للمراية وظلت تفك وتفك وتحاول بس ظل يتشربك شعرها، والماشات اذتها، شافها تحاول وتتأذه بكل ماشه.

:- اساعدچ؟

:- لا لا مايحتاج

:- خوش

رجعت نفس المعانات، گام گعد بمكانه..

:- خلي اساعدچ

:- لا انه بخير هاي خلصت

:- يا خلصتي شعرچ واگف مكوش چنچ واحد طاگته كهرباء

خجلت وانخرست كلش، حس نفسه جاي يخجلها بشقاه، حاول يرتب كلام منا منا.

:- آية ماقصد افشلچ بس اتشاقه وياچ الطف الجو

هزت راسها بدون ماتباوعله، گام بلا ماسمع اذنها، حط ايده على شعرها الذهب وهي انتفضت من مكانها.

سحب ايده بسرعة..

:- لا تخافين، بس جاي احاول افتحه واساعدچ ماسويت شي

هزت راسها بسرعة وهي ميته خجل..

:- ادري

رجع قرب اصابعه دخلت بين خصل شعرها بحذر حتى لا يشده ويأذيها، شعرها الذهبي الطويل نزل على ايده بس السبريه مخشنه.

انبهر بشعرها لدرجة خلاه يصفن بيها، هي حست گلبها يدگ بلعومها، حتى حبست انفاسها، رجليها وايديها ظلت تتعرق من التوتر.

وهو مركز يشيل الماشات بحذر..

:- شلون مثبتته هاي؟ شكلها تحتاج مهندس مو عريس

ضحكت ببخفة غصب عنها، بسرعة غطت وجهها حتى مايشوفها.

:- والله ما اعرف ام الصالون سوتها

:- يابه مرتكبة جريمة بحق شعرچ

:- هاي العروسة كلشي يلطخوها ويحطون بشعرها

:- ادري شعر لو عش طيور كلشي حاطين بيّ

:- سوالف العرس

:- اذا يأذيچ گولي

هزت راسها بخجل..

:- لا احسن مني شلعت نص شعري

فجأة ايده طخت رگبتها بالغلط وهو يحاول يوصل للماشة، جمد بمكانه فورًا سحب ايده كأنه انلدغ..

:- عذريني والله بالغلط

ماجاوبت وجهها شعل نار، حتى تنفسها صار مرتبك، تنحنح وباوع لغير جهة حتى يخفف توترها..

:- هاي التسريحات مؤامرة على العرسان والله

ويه كلامه تركها وراح يريد يطلع للحمام..

:- هسة اجيچ لا تشلعين شعرچ انه اسويه

هزت راسها، راد يطلع تذكر بجامة مالت بيبيته لابسها ميدري بجامة عمه سامح يلبسهن هذني.

طلعله وحدة ثانية لبسها بسرعة البرق قبل لا تباوعله، يگول ماريدها تخترع من شعر رجليني.

طلع ويه طلعته صارت سالفة عذراء، وبعد ماهدت الاوضاع رجع اخذ آية ودخلوا جوه.

آية :- هو... هو... شنو صار؟

:- ماعليچ مشاكل خالاتي وامي ماتخلص

:- خفت تصير مشكلة چبيرة

غير الموضوع..

:- هااا هسة وين وصلنه

:- بعد بيّ هواي ماشات

:- اليوم الها، وياچ المهندس تيجان

:- صدگ انتَ صرت مهندس؟

:- لا ماصار نصيب اكمل، بس چنت احلم بمهندس معماري

:- ولا انه كملت، حتى ماعرف اقرا عدل واكتب ابوي طلعني

سكت وهو مقهور، حس شگد مظلومة هالبنية حتى التعليم اللي من حقها هم انحرمت منه مجبورة، عالاقل هو واخوته يعرفون واصلين مو عميان وجهلة، وحتى بالدين ابوهم مثقفهم بالتفصيل.

اخيرًا خلصت آخر ماشه بشعرها..

:- خلصنا مو؟

:- ايي ماكو

:- تأكدي

:- لا ماكو بعد

:- الحمدلله من خلصنا عبالي راح نحتاج عدة ورشة

ضحكت مرة ثانية بصوت واضح، بسرعة عضت شفتها من المستحه، هو اول ما سمع ضحكتها ارتاح گلبه بدون مايبين.

باوع لنحرها ابيض يضوي حتى بگلوب المنام، ارتبك بحياته ماصار قريب على بنية هيچ ولا شاف بنية بجمالها وترافتها.

حط ايده بنحرها بدون قصد شي، بسرعة انتفضت تريد تروح ومن توترها وخجلها عثرت ورادت اطيح.

انتفض بسرعة مد ايده بسرعة لزمها من زندها..

:- اسم الله عليچ، وين رايحة مستعجلة!

من الفشلة غطت وجهها بيدها..

:- حسبالي طحت

:- لا بعدج عايشة الحمدلله

ظل يضحك بخفة، وهي هم ضحكت غصب عنها بس بخجل، رجعت للفراش وشعرها شكبره من المثبت.

هو همين راح للفراش، صار سكوت، شافته حاط ايديه جوه المخده وصايرة على نص وجهه، فجأة صوتها طلع..

:- تيجان؟

:- نعم

:- اذا نمت هيچ شلون تتنفس؟

ظل يباوعلها يريد يستوعب السؤال..

:- شلون يعني؟

:- يعني وجهك نصه بالمخده ما ينگطع نفسك؟

ظل صافن شوي بعدها ظل يضحك بخفة حتى لا يحرجها..

:- لا يابه عادي اتنفس

هزت راسها، حاولت تنام، بعد دقيقة رفعت راسها مرة ثانية..

:- تيجان

غمض عينه بتعب..

:- نعم

:- انتَ هسة نمت؟

فتح عينه دار على ظهره يباوع للسگف..

:- لا

:- زين شلون الواحد يعرف نفسه نام؟

ظل ساكت شوي بعدها انفجر ضحك.

انحرجت من ضحكتها..

:- شبيك ضحكت؟

:- سلامتچ بس سؤالچ جديد عليَّ، مادري منين جايبته

تكورت ببطانيتها بفشلة..

:- اندري حروب گالت اسأل حتى اتعلم

:- حروب راح توديچ بداهية، هذا سؤال ماله محل

ضحكت بخفة وهي تغطي وجهها، وره شوي يحاول يغفى، سمعها تون بصوت خفيف، وهي تحاول تتحرك.

التفت الها..

:- آية شبيچ؟

:- رجلي خدرت

:- من شنو؟

:- مادري يمكن من الخوف

رجع ضحك غصبًا عليه.

هي عصبت بخجل..

:- هاااي شنو كلشي يضحكك عندك؟

:- لا بس انتِ اول عروس بالحياة تگول رجلي خدرت من الخوف، غير من نومتچ محنطة نفسچ

ظلت صافنة بيّ وسألت ببراءة..

:- زين انتَ ما خايف؟

:- ليش اخاف متزوج سكنية لو جنية

:- يعني ماخايف؟

بلع ريگه وباوع للجهة الثانية بسرعة..

:- لا تخافين لازم واحد يبقى عاقل بالغرفة

:- يعني هسة انتَ عاقل؟

:- هااا؟

عضت شفتها ندمت على سؤالها، بس هو ظل يضحك..

:- لا والله، من دخلت الغرفة وانه مستواي العقلي انخفض

بعد ما حچت من الفشلة، نام تيجان وهو تعبان، آية مانامت تحس بشعور غريب، كلامه ضحكته، او يمكن مو غريب شعورها القديم احياه بهالليلة.

تتسائل بنفسها ياترا هو راح يحبني؟

**

"حروب"

مشيت بلا تردد، بس وگفني صوته التفتت شوي بس..

:- ولچ حروب

:- نعم عمو

:- چليب الماي ماتسلمين؟

انحرجت..

:- اعذرني عمو مانتبهت، السلام عليكم

ابتسم..

:- وعليكم السلام، كل يوم تزيدين طول ماشاء الله

استحيت كلش..

:- عمو من رخصتك اكو زلم ماگدر اوگف هنا

شمر حسرة چبيرة..

:- الله وياچ

مشيت حسيت وجهي شعر نار من الإحراج، يارب شبيَّ من اشوفه.

طبيت للبيت لگيت امي حارگة الدنيا، صوتها عالي واسمع صوت آية، دخلت للمطبخ بيدها مجموعة صحونة واحد بالگاع مكسور.

امي :- الله ياخذچ ماتشوووفيييين

آية بارتباك وخوف..

:- عمة والله بالغلط

:- عمه اليعميچ وين عقلچ؟ فاهية!

آية تريد تبچي..

:- هسة المه والله مادري

امي :- وشنو الفايدة تلمينه مايرجع

:- يمه شدعوة هو صحن وانكسر فدوة

امي باوعتلي بعصبية..

:- اي فدوة من جيب ابوچ مو؟! تعرفين شگد سعرهن؟

:- يمه مو قصدها خطية

:- لا تدافعين الها، من الصبح سرحانة عبالها هي ببيت اهلها تكسر وتخرب براحتها

:- يمه هسة صياحچ راح يرجعه

:- انچبي ولا تشتغلين مدافع، خلي تنتبه المرة الجاية اماعيني غالية اكسر راسها اذا ينكسر شي بعد

آية نزلت راسها وسكتت شكلها تريد تبچي.

:- يمه فدوة البنية جديدة وما متعودة عالبيت

:- اي وانه هم جديدة عالدنيا، من چنت بعمرها چنت اطبخ لعشرين نفر، وشايلة بيت عيال شكبره

:- يمه هي مو منافسة، كسرته بالغلط شصار

:- حروب انچبي انتِ الثانية، لا اطيح حظچن كل وحدة تصير محامية الها

سكتت ورحت نزعت عبايتي رجعت يم آية وشلت الگزاز من الارض..

:- روحي سوي غير شي انه المهن

:- لا خليچ انه المهن

:- گتلچ روحي انه المهن سوي غير شي

امي بعصبية..

:- اي دللوها زيادة حتى تصعد فوگ روسكم

:- يمه كافي البنية خايفة منچ شبيچ؟!

طيحت حظنا انه وآية شبعنا رزايل إلا شوي تكفخنا بالجدورة، خلتنه نلمع المطبخ تلميع، وخلتنا نغسل بطانيات الناموا بيهن البارحة بالعرس.

ظهري انكسر اگلها عندي دروس ماتفهم، ظلينا نضحك انه وآية وحدة ترش عالثانية ماي، احس بفرحة چبيرة، يمي صديقتي بالبيت وزوجة اخوي.

صار بينا كساح من التعب، هنوب كهرباء ما مستقرة وطايح حظنا بلياها.

مرت الايام واجه محرم، انه وآية احلى صديقات، جاي اعلمها الصلاة وهواي شغلات بالدين.

بس امي كلش شديدة وياها، استخطيها كلش المفروض تعتبرها مثلنا من بناتها معزتها من معزة تيجان.

البيت اللي گبال بيتنا جاي يبنون بيّ، مبين راح يكون بيت چبير، الرجال اللي جاي يبني الفة وصداقة ويه ابوي، دوم يگعدون عالصبه اللي عالشارع لو يم بابنا.

اليوم السابع من محرم..

طلعت من بيتنا انه وشامية نمشي سريع، نريد نروح لبيت جدي عدهم طبخ، بعد ماسقط الحكم الطاغي گدرنا نمارس شعائرنا بحرية اكبر.

مع انُ ماچان يلزمنا ولو دربه جمر نتنعنه ونمارس شعائر الله بمحرم لقربانه المقدس، الحسين ابن علي عليه السلام، والناس تزور بالختلة.

لأن عدنا العقيدة مو مجرد مبدأ هي حياة ورحمة وخلود بالآخرة لكل من تمسك بيها، الحسين عدنا مو مجرد قضية ونحر.

الحسين ثورة خالدة ضد الطغيان والعبودية، وشعارنا للأبد هيهات منا الذلة، الحسين علمنا نعيش احرار ولو لا تضحيته لاجل الدين، ماچان اكو احد هسة مسلم.

فأحنه نقدس الحسين عليه السلام ليوم الدين لأنه ثورة خالدة وانقذنا وانقذ الاسلام.

فالسلام على الحسين وعلى علي ابن الحسين وعلى اصحاب الحسين وعلى اولاد الحسين، الى ان يتوقف نفسنا.

واللي يظن احنه نعبده ما واصله حبنا ولا احترامنا اله، ولا واصله انُ احنه مانردد غير اشهد ان لا إله إلا الله ومحمد رسول الله بصلاتنا.

واشهد ان علي ولي الله واولاده المعصومين حجج الله، وهم الوسيلة لله، ونحن نتمسك بوصية رسولنا الكريم.

ردنا ندخل بيت جدي، شفنا شاب لابس دشداشة سودة ولاف الشماغ على راسه لحد لحيته، غطيت وجهي بالعباية، ماعرفته بس اظن هذا اخو الشيخ مهدي.

دوم اشوفه يم بيت جدي لو يجي يم بيتنا يصيح للولد، من اجوا لهنا وهو مصادق اخواني وعمامي.

دخلنا داخل، امي هناك يمهم وآية، ساعدناهم بالطبخ، جدي ذابح عجل لأبو فاضل، هاي حتى لو ماعنده يسوي هالطبخ.

خلصنا طبخ وتوزيع هنوب غسل المواعين، ايدينا تعكرت من الماي، مادين صونده بالحوش من النهر، ونغسل، لان مو بس توزيع حتى اجوا تغدوا هنا.

البنات بعدهن يضحكن ويسولفن بالحوش، وكل شوي وحدة تقلد صوت بيبتي وهي ترزلنه.

:- بنات لا تضحكن هواي، هذا يوم السابع

شامية :- تگول لا تحكن وتالي هي اول وحدة تضحك

:- صخام وجهچ يمته گمت اضحك

شامية تضحك..

:- بس والله بيبتي من تعصب تصير اخطر من عتبار

هنا انه ضحكت..

:- لا والله امي اذا عصبت حتى الجن يشرد

شامية :- ههههههههههه اي والله

:- بيبتي عصبيتها ماتخوف تگزگزين عليها ههههههه

بيبتي سمعتنا وصاحت..

:- ترااااا اسممممع ولچ حروووب

عدلت گعدتي..

:- هااا بيبي شبيچ جاي نمدحچ

:- اي خوش، تعاي ولچ حربية

:- نعم بيبتي

:- اخذي هاي الصينية لجدچ يشرب چاي

:- اي بيبي بس لا تصيحين، اريد ابوسچ على عصبيتچ الله يساعد جدو يمكن بس گاضيها تگزگز

امي عصبت :- حررربيييييه وليييي

:- يمه يمه رحت والله رحت ههههه

زينب بنت عمي..

:- روحي يمعودة قبل لا تكسر الصينية براسچ

رحت دگيت الباب، طلعلي عمي خذه الچاي، حوش جدي چبير، لذلك ماينسمع صوتنا، بعيدين احنه عن الدوانية، يم المطبخ وجاي نتهامس تقريبًا خاف يسمعونه زلم.

خلصنا غسل وتسفيط للبلام مال الاكل كومة چانن، ولمينا المواعين، تعبنا طلعنا انه وشامية وآية العصر، الشارع هادئ لأن الزلم كلهم بالحسينية مالت بيت عم ابوي.

واحنه طالعين فجأة صار بوجهنا رجال، طويل وجسمه عريض، لابس دشداشة سودا وشماغ ابيض، اول شي عبالي واحد غريب طاب الديرة صافن علينا.

غطيت وجهي بالعباية ونزلت عيني، هو بنفس اللحظة نزل راسه بسرعة كأنه انتبه لنفسه.

:- السلام عليكم خويه

:- وعليكم السلام

:- تيجان وينو موجود هنا؟

عرفته هذا اخو خديجة..

:- اي موجود راح يم جدي بالبستان

هز راسه بأدب..

:- مشكورة اختي

راح بطريق البستان بدون حتى مايرفع عينه علينا مرة ثانية.

شامية لزگت بيَّ وهمست..

:- هذا مو اخو خديجة؟

:- اي هو

:- سبحان الله كلش مؤدب، ولدهم فد مؤدبين

:- اي والله الله يحفظهم

شامية ضحكت بخبث..

:- بس چان صافن قبل لا تغطين وجهچ

دفعتها بخفة..

:- انچبي، عابت ماقصده الرجال

:- هااا حروب هاااا باعي وجهچ صار احمر

:- هسة احط صمة تراب بعينچ، عبالج كلشي حب وغرام

آية :- حروب انتِ مبينة اكبر من عمرچ

:- اي هاي صخام حظي، عبالهم چبيرة واصلح لزواج مايدرون الطول طول نخلة والعقل عقل صخلة

شامية :- هههههههههههه عقل مطي

دفعتها بچتفي..

:- عااابت هالوجه عقلچ هاي

شامية :- هههههههههههههه

:- ومرض خلي نمشي قبل لا يشوفنه تيجان وتتمضحكين بالشارع يشمرنا ويه حكاكة جدر التمن

اول ما دخلت للحوش، سمعت صوت خفيف، رحت بسرعة للصندوگ البي مشمش تنام، من مساع الصبح حسيتها راح تولد.

وگفت مكاني مصدومة..

:- لااااا، ولككككككم مشمش ولدت يماااااااا فدوووووة

بزونتي مشمش متمددة وبصفها اربع بزونات صغار يجننون، وحدة بيضة والثانية مخططة والثالثة سمرة واحد برتقالي نفس امه.

صرخت من الفرحة..

:- يمممممممه ولددددتتتتتت مشمش يبوووووو

گعدت بالگاع يمهم، حتى العباية انشمرت وياي بالترابة، ظليت اتلمسهم وامسح عليهم وعلى مشمش، تباوعلي كأنه تگلي سويتها.

:- بعد روحي فريخاتي شگد حلويننن

مدت ايدها شامية تلزمهم..

:- يخبلوووووون

ضربت ايدها..

:- ايدچ وخريها صغار بعدهم

شامية :- مو بس انتِ تلزمينهم

:- فريخااااتي

بدخلة رشاش للحوش وعلي الزكي ويوسف، اول ما شافوني گاعدة عالگاع اجوا علينا.

رشاش :- السلام عليكم هاااا شكو يوزعون قيمة هنانة؟

:- يا قيمة تعال شوف مشمش ولدت

يوسف مد راسه فوگي..

:- هاي شنو فيران لو بزونات؟ گد الأصبع ذني

علي الزكي ضحك..

:- حروب هسة تبدي مرحلة التربية والأمومة عدها

باوعتلهم بنص عين..

:- يلا يلا لا تزعجون فروخي

رشاش مد ايده يريد يشيل واحد..

:- هذا شبي عافس وجهه البرتقالي

:- لا لا لا فدوة لا تلزمه خطية يتأذه

رشاش :- شبيچ ما آكله

يوسف :- هاي البيضة هاي تشبهچ، مبين فاهية

علي الزكي ظل يضحك..

:- حروب فاهية؟! والله تعرف تشبه

يوسف :- يلا هسة عود صاير عدها اسود هم چنهم فيران

:- يوسف اطردك من يمهم حتى ماخليك تباوع

علي الزكي :- هسة شلون راح يرضعن

رشاش :- توكلهن حروب تمن ومرگ

:- ولكم وخروا خاف نفسيتهم تتعب

رشاش مات ضحك..

:- نفسية البزون لو نفسيتچ؟

حضنت مشمش بحب..

:- يمه اكيد تعبت خطية وهي تولد

يوسف :- حروب تره بزون هاي مو انسانة

:- وانتَ شعليك عدها مشاعر ترا

يوسف :- عدها مشاعر لو گرعة هههههههه

رشاش :- والله خوش گلب عندچ خيتي

:- عادي يعني لأن مخلوقات ضعيفة

علي الزكي :- صار عندچ اربع جهال، شنو راح تسميهن

:- البرتقالي بتيتة، البيضة غيمة والباقين ماعرف ماختاريت لهسة

علي الزكي :- يتبرن بعزچ خيتي وتشوفين احفاد احفاد احفاد احفادهم

ظلوا يضحكون..

بالليل، بعد ما الكل نام تقريبًا، تذكرت مشمش وفروخها ابتسمت بفرحة وحماس، گلت اروحلهم اشوفهم قبل لا انام.

طلعت للحوش بهدوء، الدنيا ظلمة صوبهم وتخوف، مدري ليش حسيت بقشعريرة كزبرت جلدي، باوعت يمين يسار، الجو بارد ويخوف.

رحت بسرعة اطل عليهم عالسريع وادخل، همست..

:- مشمش، مشمش

ماسمعت صوتها ما موءت قربت وگبل لا اوصل للصندوگ، شفت شي غريب، جسم مشمش بالگاع، جسمي كزبر ازيد وجمدت مكاني.

دم وهي ممدودة گلبي دگ بسرعة، شفت البزونات وامهن مذبوحات، حسيت نفسي اختنگت.

صرخت بصوت عالي..

:- لاااااااااااااا لااااااااااا بااااااابااااااا تيجاااااان

گعدت بالگاع وانه ارجف، ظليت ابچي بلا شعور، انصدمت حرفيًا صدمة ماعرف شگول حتى.

تيجان ركضلي بخوف..

:- حروووووب ليششش تصرخين؟!

حضنت مشمش وهي ساكتة وعيونها مسدودة للأبد مثل بتيتة.

انفجرت بالچي اكثر..

:- منو مسوي هيييچ؟! شنو ذنبهن؟!

اجه رشاش :- حروب شبيچ؟!

وگفوا فجأة من شافوا المنظر، وراها اجوا يوسف وعلي الزكي وابويه، امي طلعت همين، آية والبنات.

ابوي :- ذابحين البزازين من جديد؟

رشاش :- ايي يابه

انه بس ابچي وماعرف شحچي..

:- ولكم شوفوووا شمسوييين! منو يگدر يسوي هيچ؟!

علي الزكي :- لا حول ولا قوة إلا بالله، هذا شنو من گلب يملك هيچ يسوي؟!

رشاش بعصبية..

:- شلون صار هيچ؟

ابوي :- صدگ شلون ومنو هذا؟

تيجان :- طلعت من ماعونها يابه هالشي مو هين لازم نسوي شي

رشاش :- اعرف منو ممكن يسويها، بس خاف اظن السوء

رفعت راسي بسرعة دموعي تارسة وجهي..

:- منووو عفية گول؟!

سكت وماجاوبني، تيجان اجه انحنى عليَّ اخذ البزون من ايدي..

:- حروب حبيبتي گومي لا تبقين تباوعين عليهن

:- شلون ما اباوع مو خطية شمسويات هنَ؟!

ابوي تنهد :- ايابه شبيهم الناس منو يسوي هيچ ببزونات زغار؟

يوسف :- هاي مو سالفة عادية ماينسكت عنها

علي الزكي :- اي والله، اكو شي ماكو دخان بلا نار

تيجان :- خاف هاي ناس متقصدين يريدون يوصلون رسالة اذية إلنا

ابوي :- منو راح يأذينا يابه احنه لا اذينا احد ولا راح نأذي؟

رشاش :- خاف هذا النگس

تيجان :- منووو تقصد انتَ؟

رشاش :- ماكو شي

ابوي مد ايده مسح على راسي..

:- هدي يابه هدي هاي الدنيا ما بيها رحمة بكل الناس

ظلوا يتناقشون بينهم، دخلني ابوي بالگوة تيجان اخذهن دفنهن، ظليت ابچي من كل گلبي عبالك جهالي.

يوم ثاني رشاش متعارك ويه طالب، ومطيح حظه يمكن يظن هو هيچ مسوي عناد، لأنه طفر بيتنا وهالشي خلاه بدائرة الاتهام، بس هو ناكر هالشي.

ماعرفنا منو سوه هيچ ولا ليش، ظلوا يراقبون الولد كل ليلة واحد، يخافون تنعاد ويذبحون بزوناتي الباقين، لأن الموضوع اكبر من مجرد بزونات عندهم.

صارت شي غامض يخوف ولابد اله سبب اكيد، خايفين تكون رسالة اذية.

مرت الايام وماتخطيتهن، كلش ضجت وحزنت، بس ماشية الحياة، بعد فترة محرم خلص.

الحياة تزيد صعوبة على اهلي، وعلى كل الناس، الوضع يخوف اكثر واكثر، كل البلد بحالة ضيق، حتى اخواني يخافون علينا من الدوام المدرسة.

راجعين من المدرسة، صافنة افكر قبل لا يوگف ابو الخط يم بيتنا عبرنه الفرع اللي وره بيتنا، مليان سيارات استغربت، يمكن قرايب بيت ابو سلطان هيچ طاگين وسيارات.

نزلنا من الباص واشوف رشاش گاعد على صخرة الشارع، بسبب العمال يم بيتنا ماگدرت التفت اله.

طبيت داخل رحت اريد ابدل، درت وجهي اشوف رشاش يباوعلي، حسيت اكو كلام بگلبه.

:- هااا رشرش شبيك عيناي؟

:- حروب تعاي

رحت وياه..

:- شبيك؟

رحنه وره البيت بالحديقة شكله مخنوگ وبالگوة نطقها وهو حاير..

:- حروب جاين مشية على خديجة من بغداد، بيت عمامها

فتحت حلگي..

:- هاااااا..........